She Yehowa Gbeyei ni Oye Ekitai lɛ Anɔ
“She Nyɔŋmɔ gbeyei ni oye ekitai lɛ anɔ! shi enɛ ji gbɔmɛi fɛɛ agbɛnaa.”—JAJELƆ 12:13.
1, 2. (a) Gbeyeishemɔ baanyɛ abu wɔhe yɛ gbɔmɔtsoŋ yɛ mɛɛ gbɛ nɔ? (b) Mɛni hewɔ fɔlɔi ni le nii lɛ bɔɔ mɔdɛŋ ni amɛdu gbeyeishemɔ kpakpa amɛwo amɛbii amli lɛ?
LEONARDO DA VINCI kɛɛ akɛ: “Bɔ ni tsuisalɛ kɛ wala woɔ oshara mli lɛ, nakai gbeyeishemɔ báa yi.” Ekaafeemɔ loo buuluufeemɔ haa gbɔmɔ hiɛ jeɔ oshara nɔ, yɛ be mli ni gbeyeishemɔ kaiɔ lɛ akɛ ekwɛ ehe nɔ jogbaŋŋ. Ákɛ nɔkwɛmɔnɔ lɛ, kɛji akɛ wɔbɛŋkɛ tɛsaa ko ni yɔɔ gɔŋ ko yiteŋ naabu tuuntu, ni wɔna he ni wɔbaanyɛ wɔshane kɛyagbee lɛ, wɔteŋ mɛi pii kɛ henumɔ yaa sɛɛ amrɔ nɔŋŋ. Nakai nɔŋŋ hu jeee akɛ gbeyeishemɔ kpakpa kanyaa mɔ kɛ Nyɔŋmɔ teŋ wekukpaa kpakpa, taakɛ wɔkase yɛ nikasemɔ ni tsɔ hiɛ mli lɛ kɛkɛ, shi moŋ eyeɔ ebuaa ni ebuɔ wɔhe kɛjɛɔ pilamɔ he.
2 Shi kɛlɛ, esa akɛ akase ŋmɛnɛŋmɛnɛ beaŋ osharai ahe gbeyeishemɔ hu. Akɛni gbekɛbii bibii leee oshara ni yɔɔ sarawa hewalɛ loo tsɔnei ni nyiɛ maŋtiasei agbɛjegbɛ nɔ lɛ he nɔ ko hewɔ lɛ, oshara ni hiɛdɔɔ yɔɔ mli baanyɛ aba amɛnɔ yɛ gbɛ ni waaa nɔ.a Fɔlɔi ni le nii bɔɔ mɔdɛŋ ni amɛdu gbeyeishemɔ kpakpa amɛwo amɛbii amli, ni amɛbɔɔ amɛ kɔkɔ shii abɔ yɛ osharai ni ebɔle amɛ lɛ ahe. Fɔlɔi le akɛ gbeyeishemɔ nɛɛ baanyɛ ahere amɛbii lɛ ayiwala.
3. Mɛni hewɔ, ni mɛɛ gbɛ nɔ Yehowa tsɔɔ ebɔɔ wɔ kɔkɔ yɛ mumɔŋ osharai ahe?
3 Yehowa yɛ susumɔ ni tamɔ nakai kɛha wɔhilɛ-kɛhamɔ. Ákɛ Tsɛ ni yɔɔ suɔmɔ lɛ, etsɔɔ e-Wiemɔ kɛ egbɛjianɔtoo lɛ nɔ etsɔɔ wɔ nii ni he baaba sɛɛnamɔ aha wɔ. (Yesaia 48:17) Nɛkɛ ŋwɛi nitsɔɔmɔ he gbɛjianɔtoo nɛɛ kɔɔ kɔkɔ ni ebɔɔ wɔ ‘shii abɔ’ yɛ mumɔŋ tsɔnei ni baanyɛ adu wɔ lɛ ahe, koni wɔná gbeyeishemɔ kpakpa yɛ oshara ni tamɔ nɛkɛ he. (2 Kronika 36:15; 2 Petro 3:1) Mumɔŋ osharai babaoo yɛ ni abaanyɛ akwa ni aje piŋmɔi amli ehi shi yɛ yinɔsane bei fɛɛ mli, ‘eji gbɔmɛi ha amɛtsui ná gbeyeishemɔ kɛha Nyɔŋmɔ ni amɛye ekitai anɔ kulɛ.’ (5 Mose 5:29) Te wɔɔfee tɛŋŋ wɔná tsui ni sheɔ Nyɔŋmɔ gbeyei, ni wɔtsi wɔhe kɛjɛ mumɔŋ oshara he yɛ nɛkɛ “jaramɔ bei” nɛɛ amli?—2 Timoteo 3:1.
Tsi Ohe Kɛjɛ Efɔŋ He
4. (a) Mɛɛ nyɛ̃ɛ esa akɛ Kristofoi ana? (b) Te Yehowa nuɔ eshafeemɔ jeŋba he ehaa tɛŋŋ? (Kwɛmɔ shishigbɛ niŋmaa.)
4 Biblia lɛ tsɔɔ mli akɛ, “Yehowa gbeyeishemɔ ji akɛ anyɛ̃ efɔŋ.” (Abɛi 8:13) Wolo ko ni ato Biblia mli wiemɔi ashishitsɔɔmɔ naa yɛ mli lɛ tsɔɔ nɛkɛ nyɛ̃ɛ nɛɛ shishi akɛ “henumɔ su ni ajieɔ lɛ kpo atsɔɔ gbɔmɛi kɛ nibii ni ateɔ shi awoɔ, ahiɔ, anyaŋeɔ ni mɔ ko sumɔŋ ni ekɛná tsakpaa loo sharamɔ ko.” No hewɔ lɛ, nɔ ni fata Nyɔŋmɔ gbeyeishemɔ he ji nɔ ko ni anyɛɛɔ kɛjɛɔ mligbɛ loo nihiinii kɛha nɔ fɛɛ nɔ ni ji efɔŋ yɛ Yehowa hiɛ.b (Lala 97:10) Etsirɛɔ wɔ koni wɔtsi wɔhe kɛjɛ efɔŋ he, tamɔ bɔ pɛ ni wɔbaatsi wɔhe kɛjɛ gɔŋ ko yiteŋ tɛsaa ko naabu yɛ be mli ni wɔ gbeyeishemɔ henumɔ lɛ bɔɔ wɔ kɔkɔ lɛ. Biblia lɛ kɛɔ akɛ, “Yehowa gbeyeishemɔ haa mɔ jeɔ efɔŋ he.”—Abɛi 16:6.
5. (a) Te wɔɔfee tɛŋŋ wɔwaje wɔ Nyɔŋmɔ gbeyeishemɔ kɛ nyɛ̃ɛ ni wɔyɔɔ kɛha nɔ ni ji efɔŋ lɛ? (b) Mɛni Israel maŋ lɛ yinɔsane tsɔɔ wɔ yɛ enɛ gbɛfaŋ?
5 Wɔbaanyɛ wɔwaje nɛkɛ gbeyeishemɔ kpakpa kɛ nyɛ̃ɛ kɛha efɔŋ nɛɛ kɛtsɔ nibii ni yeɔ awui ni yɛ naagbee lɛ esha kɛbaa lɛ hesusumɔ nɔ. Biblia lɛ maa nɔ mi kɛhaa wɔ akɛ, wɔbaakpá nɔ ni wɔduɔ lɛ—kɛji akɛ wɔdu yɛ heloonaa aloo yɛ mumɔ lɛ naa. (Galatabii 6:7, 8) Yɛ yiŋtoo nɛɛ hewɔ lɛ, Yehowa tsɔɔ nɔ ni baajɛ ekitai ni aaaku hiɛ ashwie nɔ lɛ kɛ anɔkwa jamɔ ni aaakpoo lɛ mli aba lɛ mli faŋŋ. Kɛji akɛ ŋwɛi hebuu bɛ lɛ, Israel maŋ bibioo ni he waaa lɛ baaba abaje maji ni ebɔle lɛ ni yi wa ni he wa lɛ ahewalɛ shishi. (5 Mose 28:15, 45-48) Aŋma oshara ni jɛ Israel toigbele lɛ mli ba lɛ fitsofitso yɛ Biblia lɛ mli “ni aŋɔbɔ wɔ kɔkɔ” koni wɔnyɛ wɔkase nii kɛjɛ mli ni wɔná Nyɔŋmɔ gbeyeishemɔ.—1 Korintobii 10:11.
6. Mɛni ji Ŋmalɛ naa nɔkwɛmɔnii komɛi ni wɔbaanyɛ wɔsusu he beni wɔkaseɔ Nyɔŋmɔ gbeyeishemɔ lɛ? (Kwɛmɔ shishigbɛ niŋmaa.)
6 Yɛ nɔ ni ba Israel maŋ muu lɛ fɛɛ nɔ lɛ sɛɛ lɛ, aŋkroaŋkroi ni kɛ amɛhe wo awuŋayeli, jeŋba shara, hiɛjoomɔ, loo henɔwomɔ mli lɛ ashihilɛ mli niiashikpamɔi diɛŋtsɛ yɛ Biblia lɛ mli.c Nɛkɛ hii nɛɛ ateŋ mɛi komɛi kɛ afii pii esɔmɔ Yehowa, shi amɛshihilɛ be ko ni he hiaa waa mli lɛ, gbeyei ni amɛsheɔ Nyɔŋmɔ lɛ mli eyawaaa bɔ ni sa, ni nɔ ni jɛ mli ba lɛ tsɔ awerɛho sane. Ŋmalɛ mli nɔkwɛmɔnii nɛɛ anɔjwɛŋmɔ baanyɛ awaje wɔfaishitswaa akɛ wɔkɛ wɔhe woŋ tɔmɔi ni tamɔ nɛkɛ mli. Kwɛ awerɛho sane ni eeeji akɛ wɔɔmɛ kɛyashi oshara ko aaaba wɔnɔ dani wɔbo Nyɔŋmɔ ŋaawoo lɛ toi! Nɔ ni tamɔɔɔ nɔ ni aheɔ ayeɔ daa lɛ, niiashikpamɔ—titri lɛ nɔ ni jɛ mɔ lɛ diɛŋtsɛ akɔnɔ fɔŋ mli ba lɛ—jeee tsɔɔlɔ kpakpa.—Lala 19:8.
7. Namɔ Yehowa fɔ̃ɔ lɛ nine kɛbaa e-mfonirifeemɔ buu lɛ mli?
7 Yiŋtoo titri ko ni mli wa waa kɛha Nyɔŋmɔ gbeyeishemɔ ni wɔɔná lɛ ji bɔ ni wɔshweɔ ni wɔbaa wekukpaa ni kã wɔkɛ Nyɔŋmɔ teŋ lɛ yi lɛ. Wɔsumɔŋ ni wɔfee nɔ ko ni esaaa Yehowa hiɛ ejaakɛ wɔbuɔ ekɛ naanyobɔɔ lɛ akɛ nɔ ko ni jara wa waa. Namɔ Nyɔŋmɔ buɔ lɛ akɛ enaanyo, mɔ ko ni ebaafɔ lɛ nine kɛba e-mforifeemɔ buu lɛ mli? “Mɔ ni nyiɛɔ pɛpɛɛpɛ ni etsuɔ jalɛ nii.” (Lala 15:1, 2) Kɛji akɛ wɔbuɔ wekukpaa ni ji hegbɛ ni kã wɔkɛ wɔ-Bɔlɔ lɛ teŋ lɛ waa lɛ, wɔbaakwɛ jogbaŋŋ ni wɔnyiɛ pɛpɛɛpɛ yɛ ehiɛ.
8. Mɛɛ gbɛ nɔ Israelbii komɛi ni yɔɔ Maleaki gbii lɛ amli lɛ kɛ Nyɔŋmɔ naanyobɔɔ lɛ shwɛ yɛ?
8 Mɔbɔ sane ji akɛ, Israelbii komɛi ni yɔɔ Maleaki gbii lɛ amli lɛ kɛ Nyɔŋmɔ kɛ naanyobɔɔ lɛ fee shwɛmɔ. Yɛ nɔ najiaŋ ni amɛaashe Yehowa gbeyei ni amɛwo ehiɛ nyam lɛ, amɛkɛ kooloi ni he yeɔ ni eje kpa baa efɔleshãa latɛ lɛ nɔ. Nyɔŋmɔ gbeyeishemɔ ni amɛbɛ lɛ hu je kpo yɛ su ni amɛhiɛ yɛ gbalashihilɛ he lɛ mli. Bɔni afee ni amɛkɛ oblayei abote gbalashihilɛ mli lɛ, amɛshwie amɛblahiiaŋ ŋamɛi lɛ yɛ saji bibiibibii ahewɔ. Maleaki kɛɛ amɛ akɛ Yehowa “miinyɛ̃ ŋa shwiemɔ,” ni ákɛ amɛ kutumpɔo mumɔ lɛ etsi amɛ kɛjɛ amɛ-Nyɔŋmɔ lɛ he. Te aaafee tɛŋŋ ni Nyɔŋmɔ kɛ nɔkpɛlɛmɔ aaakwɛ amɛ afɔlei lɛ, yɛ be mli ni akɛ mfonirifeemɔŋ yaafonui eha afɔleshãa latɛ lɛ nɔ—amɛŋamɛi ni amɛ́shi amɛ lɛ ayaafonui kɛ dɔlɛ lɛ? Emlai ni akɛ bulɛ haaa yɛ faŋŋ mli nɛɛ tsirɛ Yehowa ni ebi akɛ: “Nɛgbɛ migbeyeishemɔ lɛ yɔɔ?”—Maleaki 1:6-8; 2:13-16.
9, 10. Te wɔɔfee tɛŋŋ wɔtsɔɔ akɛ wɔbuɔ Yehowa naanyobɔɔ lɛ akɛ ejara wa waa?
9 Ŋmɛnɛ, Yehowa hu naa wumɛi kɛ tsɛmɛi loo ŋamɛi kɛ nyɛmɛi pɛsɛmkunyatsɛmɛi ni bɛ jeŋba lɛ ahefatalɔi babaoo ni amɛfeko efɔŋ ko ni amɛtsuii ekumɔ ni amɛbii anii efee mɔbɔ lɛ. Yɛ anɔkwale mli lɛ, eyeɔ awerɛho yɛ enɛ he. Mɔ ni ji Nyɔŋmɔ naanyo lɛ baana saji yɛ gbɛ ni Nyɔŋmɔ naa amɛ lɛ nɔ, ni ebaatsu nii waa ni ekɛwaje egbalashihilɛ lɛ, ebaakpoo je lɛ susumɔ ni gbeɔ bɔ ni gbalashihilɛ tsakpaa lɛ he hiaa ha lɛ he guɔ lɛ, ni ‘ebaajo ajwamaŋbɔɔ naa foi.’—1 Korintobii 6:18.
10 Yɛ gbalashihilɛ kɛ agbɛnɛ wɔshihilɛ mli hei krokomɛi lɛ, nyɛ̃ɛ kɛha nɔ fɛɛ nɔ ni ji efɔŋ yɛ Yehowa hiɛ, kɛ hiɛsɔɔ ni mli kwɔ kɛha enaanyobɔɔ lɛ kɛ Yehowa hiɛ duromɔ kɛ enɔkpɛlɛmɔ baaba. Bɔfo Petro kɛ shiŋŋfeemɔ jaje akɛ: “Lɛɛlɛŋ, miyoo akɛ, Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔfoi lɛ Asaji 10:34, 35) Wɔyɛ Ŋmalɛ mli nɔkwɛmɔnii babaoo ni tsɔɔ bɔ ni Nyɔŋmɔ gbeyeishemɔ tsirɛ aŋkroaŋkroi ni amɛfee nɔ ni ja yɛ shihilɛi srɔtoi ni kaa mɔ shishi.
Mɛi Etɛ ni She Nyɔŋmɔ Gbeyei
11. Mɛɛ shihilɛi ashishi ajaje akɛ Abraham ‘sheɔ Nyɔŋmɔ gbeyei’ lɛ?
11 Nuu ko yɛ Biblia lɛ mli ni Yehowa diɛŋtsɛ tsɔɔ mli akɛ eji eshieŋtsɛ—blematsɛ Abraham. (Yesaia 41:8) Aka Abraham Nyɔŋmɔ gbeyeishemɔ lɛ akwɛ beni Nyɔŋmɔ kɛɛ lɛ akɛ, ekɛ ebinuu koome, Isak, ni Nyɔŋmɔ baatsɔ enɔ eha shiwoo akɛ Abraham seshi lɛ baatsɔ maŋ kpeteŋkpele lɛ ayashã afɔle lɛ. (1 Mose 12:2, 3; 17:19) Ani “Nyɔŋmɔ shieŋtsɛ” lɛ baaye omanye yɛ kaa ni wa nɛɛ mli? (Yakobo 2:23) Beni Abraham wo ekakla nɔ ni ebaagbe Isak pɛ kɛkɛ ni Yehowa bɔfo kɛɛ akɛ: “Kaaha onine miisa oblanyo lɛ he, ni asaŋ kaafee lɛ nɔ ko nɔ ko! Shi kpaako mina mile akɛ osheɔ Nyɔŋmɔ gbeyei, akɛni okamaaa mi obi kome too nɛɛ lɛ.”—1 Mose 22:10-12.
12. Mɛni kanya Abraham Nyɔŋmɔ gbeyeishemɔ lɛ, ni te wɔɔfee tɛŋŋ wɔjie su ni tamɔ nɛkɛ nɔŋŋ kpo?
12 Eyɛ mli akɛ Abraham etsɔ hiɛ ejie ehe kpo akɛ mɔ ni sheɔ Yehowa gbeyei moŋ, shi ejie Nyɔŋmɔ ni esheɔ lɛ gbeyei lɛ kpo yɛ gbɛ ni ekaaa nɔ yɛ nakai be lɛ mli. Suɔmɔ mli ni ejɛ akɛ ekɛ Isak aaashã afɔle lɛ fe bulɛ kɛ toiboo ni afeɔ atsɔɔ kɛkɛ. Nɔ ni kanya Abraham ji hekɛnɔfɔɔ kwraa ni eyɔɔ akɛ eŋwɛi Tsɛ lɛ baaha E-shiwoo lɛ aba mli kɛtsɔ Isak ni eeetee lɛ shi kɛ ehe miihia lɛ nɔ. Taakɛ Paulo ŋma lɛ, Abraham yɛ “hewalɛ yɛ nɔ jogbaŋŋ, akɛ, nɔ ni ewo he shi lɛ, eeenyɛ efee hu.” (Romabii 4:16-21) Ani wɔfee klalo akɛ wɔbaafee Nyɔŋmɔ suɔmɔnaa nii kɛji akɛ ebiɔ afɔleshãai wuji po? Ani wɔyɛ hekɛnɔfɔɔ kwraa akɛ nɛkɛ toiboo nɛɛ kɛ naanɔ sɛɛnamɔi baaba, akɛni wɔle akɛ Yehowa ji “mɛi ni taoɔ esɛɛgbɛ lɛ anyɔmɔwolɔ hu” lɛ? (Hebribii 11:6) No ji anɔkwa Nyɔŋmɔ gbeyeishemɔ lɛ.—Lala 115:11.
13. Mɛni hewɔ Yosef baanyɛ atsɔɔ yɛ gbɛ ni ja nɔ akɛ eji nuu ni ‘sheɔ anɔkwa Nyɔŋmɔ lɛ gbeyei’ lɛ?
13 Nyɛhaa wɔpɛia Nyɔŋmɔ gbeyeishemɔ nifeemɔ he nɔkwɛmɔnɔ kroko mli wɔkwɛa—Yosef nɔ̃ lɛ. Ákɛ tsulɔ yɛ Potifar we lɛ, Yosef kɛ nɔnyɛɛ koni efite gbãla kpeɔ daa gbi. Gbɛ ko kwraa bɛ ni eeetsɔ nɔ ekwa enuntsɔ lɛ ŋã lɛ ní kãa he elakaa lɛ be fɛɛ be koni ekɛ lɛ abote jeŋba shara mli lɛ. Yɛ naagbee lɛ, beni “emɔ etade lɛ mli” lɛ, “eshi etade lɛ eha lɛ ni ejo foi etee.” Mɛni tsirɛ lɛ koni etsi ehe kɛjɛ efɔŋ he amrɔ nɔŋŋ lɛ? Ŋwanejee ko bɛ he akɛ, nɔ̃ titri lɛ ji Nyɔŋmɔ gbeyeishemɔ, bɔ ni eshweɔ ni ekafee ‘efɔŋ kpeteŋkpele ni tamɔ nɛkɛ nɛɛ, ni efee esha eshi Nyɔŋmɔ.’ (1 Mose 39:7-12) Yosef baanyɛ atsɔɔ yɛ gbɛ ni ja nɔ akɛ eji nuu ni ‘sheɔ anɔkwa Nyɔŋmɔ lɛ gbeyei.—1 Mose 42:18.
14. Yosef musuŋtsɔlɛ lɛ jieɔ anɔkwa Nyɔŋmɔ gbeyeishemɔ kpo yɛ mɛɛ gbɛ nɔ?
14 Afii komɛi asɛɛ lɛ, Yosef kɛ enyɛmimɛi, ni kɛ yiwalɛ hɔɔ lɛ wo nyɔŋyeli mli lɛ bakpe hiɛ-kɛ-hiɛ. Kulɛ ebaanyɛ ni ekɛ bɔ ni niyenii he ehia amɛ waa lɛ atsu nii yɛ gbɛ ni waaa nɔ akɛ hegbɛ ni ená ni ekɛaatɔ owele ni ekɛto efɔŋ ni amɛfee lɛ lɛ najiaŋ. Shi gbɔmɛi ni ayeɔ amɛnɔ kɛ yiwalɛ lɛ etsɔɔɔ Nyɔŋmɔ gbeyeishemɔ. (3 Mose 25:43) No hewɔ lɛ, beni Yosef na enyɛmimɛi lɛ atsuitsakemɔ lɛ he odaseyeli babaoo lɛ, etsɔ musuŋtsɔlɛ nɔ ekɛ amɛhe ke amɛ. Taakɛ Yosef ji lɛ, wɔ Nyɔŋmɔ gbeyeishemɔ lɛ baatsirɛ wɔ ni wɔkɛ ekpakpa aye efɔŋ nɔ kunim, ni wɔkwa kaa mli ni wɔɔgbee hu.—1 Mose 45:1-11; Lala 130:3, 4; Romabii 12:17-21.
15. Mɛni hewɔ Hiob jeŋba ha Yehowa tsui nya lɛ?
15 Hiob hu ji nɔkwɛmɔnɔ kroko ni ekaaa akɛ mɔ ni she Nyɔŋmɔ gbeyei. Yehowa kɛɛ Abonsam akɛ: “Ani oŋɔ otsui ofɔ mitsulɔ Hiob hu nɔ? Ejaakɛ mɔ ko mɔ ko bɛ ní tamɔ lɛ yɛ shikpɔŋ lɛ nɔ, eji nuu ní kpa ko bɛ ehe ni eja, esheɔ Nyɔŋmɔ gbeyei, ni esɔleɔ ehe yɛ efɔŋ he.” (Hiob 1:8) Hiob jeŋba ni kpa ko bɛ he afii babaoo lɛ ha eŋwɛi Tsɛ lɛ tsui nyã babaoo. Hiob sheɔ Nyɔŋmɔ gbeyei ejaakɛ ele akɛ no ji nɔ ni hi ni esa akɛ efee kɛ gbɛ ni hi fe fɛɛ ni ekɛ aaahi shi nɔ. Hiob jaje akɛ: “Naa, [Yehowa NW] gbeyeishemɔ lɛ, no ji nilee, ni efɔŋ he jee ji jwɛŋmɔ.” (Hiob 28:28) Ákɛ nuu ni ebote gbalashihilɛ mli lɛ, Hiob kwɛɛɛ oblayei yɛ gbɛ ni ejaaa nɔ, ni asaŋ etsɔɔɔ gbalafitemɔ he ŋaa yɛ etsui mli. Eyɛ mli akɛ eji niiatsɛ moŋ, shi ekɛ ehe efɔɔɔ ninámɔ nɔ, ni ekpoo wɔŋjamɔ nifeemɔ fɛɛ wɔŋjamɔ nifeemɔ.—Hiob 31:1, 9-11, 24-28.
16. (a) Mɛɛ gbɛi anɔ Hiob jie mlihilɛ kɛ mɔbɔnalɛ kpo yɛ? (b) Mɛɛ gbɛ nɔ Hiob tsɔɔ yɛ akɛ etsiii tɔmɔ ni akɛkeɔ lɛ naa?
16 Shi, Nyɔŋmɔ gbeyeishemɔ tsɔɔ akɛ afee ekpakpa koni yɛ nakai beaŋ nɔŋŋ lɛ atsi he kɛjɛ nɔ ni ehiii he. No hewɔ lɛ, Hiob jie mlihilɛ kpo etsɔɔ shwilafoi, obubuafoi, kɛ ohiafoi. (3 Mose 19:14; Hiob 29:15, 16) Hiob nu shishi akɛ, “mɔ ni héɔ atɔ biti lɛ, esa akɛ enanemɛi amli ahi yɛ enɔ; kɛ́ jeee nakai lɛ, eeekwa Ofe lɛ gbeyeishemɔ.” (Hiob 6:14) Tɔmɔ ni akɛkeee loo bɛ ni abɛɔ mɔ awoɔ mli lɛ baanyɛ afata mlihilɛ kɛ mɔbɔnalɛ naa ni atsĩɔ lɛ he. Hiob sɔle yɛ Nyɔŋmɔ gbɛtsɔɔmɔ naa eha enanemɛi ni ha eye awerɛho babaoo lɛ. (Hiob 42:7-10) Ani wɔbaanyɛ wɔjie mumɔ ni haa akɛ tɔmɔ keɔ naanyo heyelilɔ ko ni ekolɛ efee wɔ efɔŋ yɛ gbɛ ko nɔ lɛ? Sɔlemɔ yɛ anɔkwayeli mli kɛha mɔ ni efee wɔ efɔŋ lɛ baanyɛ afee babaoo koni eye ebua wɔ ni wɔye mlifu nɔ kunim. Jɔɔmɔi ni Hiob ná mli ŋɔɔmɔ yɛ Nyɔŋmɔ gbeyei ni esheɔ hewɔ lɛ haa wɔtsɔɔ hiɛ wɔnaa ‘nibii kpakpai babaoo ni Yehowa kɛto eha mɛi ni sheɔ lɛ gbeyei lɛ.’—Lala 31:20; Yakobo 5:11.
Nyɔŋmɔ Gbeyeishemɔ, Aloo Gbɔmɔ Gbeyeishemɔ
17. Mɛni gbɔmɔ gbeyeishemɔ baanyɛ afee wɔ, shi mɛni hewɔ nɛkɛ gbeyeishemɔ nɛɛ kwɛɛɛ nii kɛyaaa shɔŋŋ lɛ?
17 Yɛ be mli ni Nyɔŋmɔ gbeyeishemɔ baanyɛ atsirɛ wɔ ni wɔfee ekpakpa lɛ, gbɔmɔ gbeyeishemɔ baanyɛ afite wɔhemɔkɛyeli. Yɛ enɛ hewɔ lɛ, beni Yesu woɔ bɔfoi lɛ hewalɛ koni amɛtsɔmɔ sanekpakpa lɛ he shiɛlɔi ni yɔɔ ekãa lɛ, ekɛɛ amɛ akɛ: “Nyɛkashea mɛi ni gbeɔ gbɔmɔtso lɛ ni amɛnyɛɛɛ susuma lɛ amɛgbe lɛ agbeyei; shi moŋ nyɛshea mɔ ni nyɛɔ susuma kɛ gbɔmɔtso fɛɛ hiɛ ekpataa yɛ gehena mli lɛ gbeyei.” (Mateo 10:28) Yesu tsɔɔ mli akɛ, gbɔmɛi ahe gbeyeishemɔ kwɛɛɛ nii kɛyaaa shɔŋŋ, ejaakɛ gbɔmɛi nyɛŋ akpata wɔ wɔsɛɛ be wala gbɛkpamɔi lɛ ahiɛ. Agbɛnɛ hu, wɔsheɔ Nyɔŋmɔ gbeyei ejaakɛ wɔyɔseɔ ehewalɛ kpele, ni kɛ akɛto jeŋmaji lɛ fɛɛ ahewalɛ he lɛ ejeee fɛifɛi lɛ. (Yesaia 40:15) Taakɛ Abraham ji lɛ, wɔyɛ hekɛnɔfɔɔ kwraa yɛ Yehowa hewalɛ ni E-kɛaatee etsuji anɔkwafoi lɛ ashi lɛ mli. (Kpojiemɔ 2:10) No hewɔ lɛ, wɔkɛ hekɛnɔfɔɔ kɛɔ akɛ: “Kɛ́ Nyɔŋmɔ yɛ wɔ sɛɛ lɛ, namɔ aaate shi awo wɔ?”—Romabii 8:31.
18. Mɛɛ gbɛ nɔ Yehowa tsɔɔ ewoɔ mɛi ni sheɔ lɛ gbeyei lɛ nyɔmɔ yɛ?
18 Kɛji akɛ mɔ ni teɔ shi woɔ wɔ lɛ ji weku lɛ mlinyo, aloo mɔ ni taoɔ mɔ naa béi yɛ skul hu lɛ, wɔbaana akɛ, “hiɛnɔkamɔ ni mli wa yɛ Yehowa gbeyeishemɔ mli.” (Abɛi 14:26) Wɔbaanyɛ wɔsɔle wɔha Yehowa kɛha hewalɛwoo, ejaakɛ wɔle akɛ ebaabo wɔ toi. (Lala 145:19) Yehowa hiɛ kpaaa mɛi ni sheɔ lɛ gbeyei lɛ anɔ kɔkɔɔkɔ. Etsɔ egbalɔ Maleaki nɔ ema nɔ aduatsɔ akɛ: “Kɛkɛ ni mɛi ni sheɔ Yehowa gbeyei lɛ kɛ amɛhe wie, ni Yehowa bo toi, ni enu, ni aŋma kaimɔ wolo yɛ ehiɛ aha mɛi ni sheɔ Yehowa gbeyei lɛ, kɛ mɛi ni jwɛŋɔ egbɛi lɛ he lɛ.”—Maleaki 3:16.
19. Mɛɛ gbeyeishemɔi nɛkɛ baaba naagbee lɛ, shi te nɔ ni baahi shi kɛya naanɔ lɛ?
19 Be ni mɔ fɛɛ mɔ ni yɔɔ shikpɔŋ nɔ lɛ baajá Yehowa ní gbɔmɔ gbeyeishemɔ baalaaje lɛ ebɛŋkɛ. (Yesaia 11:9) Hɔmɔ, hela, awuiyeli, kɛ tawuu he gbeyeishemɔ hu baafee nɔ ni bɛ dɔŋŋ. Shi Nyɔŋmɔ gbeyeishemɔ baahi shi kɛya naanɔ fɛɛ mli, yɛ be mli ni etsuji ni yɔɔ ŋwɛi kɛ shikpɔŋ nɔ lɛ yaa nɔ amɛkɛ bulɛ, toiboo, kɛ woo ni sa haa lɛ lɛ. (Kpojiemɔ 15:4) Dani enɛ aaaba lɛ, eba akɛ wɔ fɛɛ wɔkɛ Salomo ŋaawoo ni jɛ mumɔŋ lɛ aaato wɔtsui mli, akɛ: “Kaaha otsui hiɛ miikɔ̃ eshafeelɔi anɔ, shi moŋ hiɛmɔ Yehowa gbeyeishemɔ mli daa nɛɛ. Ejaakɛ lɛɛlɛŋ, akɛ wɔsɛɛ be ko yɛ, ni ohiɛnɔkamɔ lɛ efeŋ yaka.”—Abɛi 23:17, 18.
[Shishigbɛ niŋmai]
a Onukpai komɛi ŋmɛɛɔ oshara he gbeyeishemɔ ni amɛyɔɔ lɛ he kɛ́ amɛnitsumɔ haa amɛkɛ shihilɛi ni yɔɔ oshara kpeɔ be fɛɛ be. Beni abi nɔ hewɔ ni kapintɛfoi pii yɛ ni amɛwao kome efo lɛ, ŋaalɔ ko ni he esa waa lɛ ha hetoo kuku akɛ: “Amɛŋmɛɛɔ gbeyeishemɔ ni amɛyɔɔ kɛha sarawa hewalɛ tsɔnei ni folɔɔ tsei kɛ foi lɛ he.”
b Yehowa diɛŋtsɛ nuɔ nihiinii nɛɛ he. Ákɛ nɔkwɛmɔnɔ lɛ, Efesobii 4:29 tsɔɔ wiemɔ fɔŋ mli akɛ “wiemɔ-sha.” Hela wiemɔ ni akɛtsu nii aha “sha” lɛ shishitsɔɔmɔ diɛŋtsɛ kɔɔ aduawa, ŋshɔŋ loo faaŋ loo, aloo milɛloo ni esha he. Wiemɔ ni tamɔ nɛkɛ tsɔɔ nyaŋemɔ ni esa akɛ wɔná wɔha jɛmɔ loo yakayaka wiemɔ. Nakai nɔŋŋ hu awieɔ amagai ahe yɛ Ŋmalɛi lɛ amli akɛ “nihiinii” loo ‘sɛbo.’ (5 Mose 29:16; Ezekiel 6:9) Bɔ ni wɔnyaŋeɔ sɛbo loo wamɔ yɛ adebɔɔ naa wɔhaa lɛ yeɔ ebuaa wɔ koni wɔnu bɔ ni Nyɔŋmɔ nuɔ nihiinii ni ji wɔŋjamɔ fɛɛ wɔŋjamɔ he ehaa lɛ shishi.
c Ákɛ nɔkwɛmɔnɔ lɛ, susumɔ Ŋmalɛ mli saji ni kɔɔ Kain he (1 Mose 4:3-12); David he (2 Samuel 11:2-12:14); Gehazi he (2 Maŋtsɛmɛi 5:20-27); kɛ Uzia (2 Kronika 26:16-21) he lɛ ahe okwɛ.
Ani Okaiɔ?
• Te wɔfeɔ tɛŋŋ wɔkaseɔ bɔ ni anyɛ̃ɛɔ nɔ ni ehiii?
• Yɛ mɛɛ gbɛ nɔ Israelbii komɛi ni hi shi yɛ Maleaki gbii lɛ amli lɛ bu Yehowa naanyobɔɔ lɛ akɛ nɔ ko ni yɔɔ fɛlɛfɛlɛ lɛ?
• Mɛni wɔbaanyɛ wɔkase kɛjɛ Abraham, Yosef, kɛ Hiob ŋɔɔ yɛ Nyɔŋmɔ gbeyeishemɔ he?
• Mɛɛ gbeyeishemɔ baahi shi be fɛɛ be, ni mɛni hewɔ?
[Mfoniri ni yɔɔ baafa 19]
Fɔlɔi ni le nii duɔ gbeyeishemɔ kpakpa amɛwoɔ amɛbii amli
[Mfoniri ni yɔɔ baafa 20]
Bɔ ni gbeyeishemɔ tsiɔ wɔ kɛjɛɔ oshara he lɛ, nakai Nyɔŋmɔ gbeyeishemɔ kpakpa tsiɔ wɔ kɛjɛɔ nɔ ni ehiii he
[Mfoniri ni yɔɔ baafa 23]
Hiob hiɛ gbeyeishemɔ ni eyɔɔ kɛha Nyɔŋmɔ lɛ mli beni ekɛ apasa nanemɛi etɛ lɛ kpe po lɛ
[He ni Sane lɛ Jɛ]
Ejɛ Biblia shishitsɔɔmɔ ni ji Vulgata Latina, afi 1795 mli