Yerusalem—“Maŋtsɛ Agbo lɛ Maŋ Ni”
“Nyɛkakãa kitã kwraa! Kaakã . . . Yerusalem, shi maŋtsɛ agbo lɛ maŋ ni.”—MATEO 5:34, 35.
1, 2. Mɛni baaha mɛi komɛi ajwɛŋmɔ afutu amɛ yɛ Yerusalem he?
YERUSALEM—egbɛi lɛ diɛŋtsɛ teeɔ henumɔi ni mli wa waa shi yɛ gbɔmɛi ni jɛ jamɔi srɔtoi amli lɛ amli. Yɛ anɔkwale mli lɛ, wɔteŋ mɔ ko nyɛŋ akũ ehiɛ eshwie blema maŋtiase nɛɛ nɔ, ejaakɛ afɔɔ etãtsii yɛ saji amli. Shi nɔ ni yɔɔ mɔbɔ ji akɛ, amaniɛbɔi pii jieɔ lɛ kpo akɛ jeee be fɛɛ be Yerusalem feɔ he ko ni toiŋjɔlɛ yɔɔ.
2 Enɛ baaha Biblia kanelɔi komɛi ajwɛŋmɔ afutu amɛ. Tsutsu lɛ, Yerusalem gbɛi ni afo lɛ kuku ji Salem, ni eshishi ji “toiŋjɔlɛ.” (1 Mose 14:18; Lala 76:3; Hebribii 7:1, 2) No hewɔ lɛ, ekolɛ obaasusu akɛ, ‘Mɛni hewɔ ni bei nɛɛ amli ni toiŋjɔlɛ bɛ maŋ ni hiɛ gbɛi ni tamɔ nɛkɛ mli nakai lɛ?’
3. Nɛgbɛ wɔbaanyɛ wɔná Yerusalem he saji ni anyɛɔ akɛ he fɔ̃ɔ nɔ lɛ kɛjɛ?
3 Bɔni afee ni wɔha nakai sanebimɔ lɛ hetoo lɛ, ehe miihia ni wɔya sɛɛ shɔŋŋ yɛ yinɔsane mli ni wɔkase blema Yerusalem lɛ he saji. Shi mɛi komɛi baasusu akɛ, ‘Wɔbɛ be ni wɔkɛaakase blema yinɔsane.’ Shi kɛlɛ, Yerusalem shishijee yinɔsane he anɔkwale nilee he yɛ sɛɛnamɔ kɛha wɔ fɛɛ. Biblia lɛ tsɔɔ nɔ̃ hewɔ lɛ yɛ nɛkɛ wiemɔi nɛɛ amli: “Nibii abɔ ni aŋma ato momo lɛ, wɔ diɛŋtsɛ wɔhe nitsɔɔmɔ hewɔ aŋma ato lɛ, koni wɔkɛ tsuishiŋmɛɛ kɛ ŋmalɛi lɛ amli miishɛjemɔ lɛ aná hiɛnɔkamɔ.” (Romabii 15:4) Biblia mli nilee ni kɔɔ Yerusalem he lɛ baanyɛ aha wɔná miishɛjemɔ—hɛɛ, kɛ toiŋjɔlɛ he hiɛnɔkamɔ, jeee yɛ nakai maŋtiase lɛ pɛ mli, shi yɛ shikpɔŋ lɛ fɛɛ nɔ.
He ni “Yehowa Sɛ̃i” lɛ Yɔɔ
4, 5. Yɛ mɛɛ gbɛ nɔ David fata yelikɛbuamɔ ni akɛha Yerusalem ni ha ebatsu nɔ titri yɛ Nyɔŋmɔ yiŋtoo mli lɛ he?
4 Yɛ afii ohai 11 D.Ŋ.B. lɛ mli lɛ, Yerusalem bahe gbɛi akɛ maŋ ni yɔɔ shweshweeshwe kɛ toiŋjɔlɛ maŋtiase. Yehowa Nyɔŋmɔ ha afɔ oblanyo David mu akɛ nakai blema maŋ—Israel lɛ, nɔ maŋtsɛ. Akɛni nɔyeli sɛi lɛ yɔɔ Yerusalem hewɔ lɛ, David kɛ edehei aseshibii lɛ batara “Yehowa maŋtsɛyeli sɛi” loo “Yehowa sɛi” nɔ.—1 Kronika 28:5; 29:23.
5 David, Nyɔŋmɔ-gbeyeishelɔ lɛ—Israelnyo ni jɛ Yuda akutso lɛ mli lɛ—ye Yerusalem nɔ kunim kɛjɛ Yebusbii ni jáa wɔji lɛ adɛŋ. No mli lɛ maŋtiase lɛ yɛ gɔŋ ko ni atsɛɔ lɛ Zion lɛ nɔ, shi akɛ nakai gbɛi lɛ batsɛ Yerusalem diɛŋtsɛ. Yɛ be ni sa mli lɛ, David ha akɛ Nyɔŋmɔ kpaŋmɔ ni ekɛ Israel fee lɛ he adeka lɛ ba Yerusalem, ni akɛbato buu ko mli. No mli lɛ Nyɔŋmɔ etsɔ hiɛ ekɛ egbalɔ Mose ewie kɛjɛ atatu ni yɔɔ nakai Adeka krɔŋkrɔŋ lɛ yiteŋ lɛ mli afii pii. (2 Mose 25:1, 21, 22; 3 Mose 16:2; 1 Kronika 15:1-3) Adeka lɛ damɔ shi kɛha jɛmɛ ni Nyɔŋmɔ yɔɔ, ejaakɛ Yehowa ji Israel Maŋtsɛ diɛŋtsɛ. No hewɔ lɛ, yɛ shishinumɔ ni bɔ he enyɔ naa lɛ, abaanyɛ akɛɛ akɛ Yehowa Nyɔŋmɔ ye maŋtsɛ kɛjɛ Yerusalem maŋtiase lɛ mli.
6. Mɛɛ shiwoo Yehowa kɛha ni kɔɔ David kɛ Yerusalem he?
6 Yehowa wo David shi akɛ, edehei aweku maŋtsɛyeli lɛ, ní Zion loo Yerusalem damɔ shi kɛha no lɛ baŋ naagbee. Enɛ tsɔɔ akɛ David seshinyo ko baaná hegbɛ lɛ ni ekɛye maŋtsɛ kɛya naanɔ akɛ Mɔ ni Nyɔŋmɔ Efɔ Lɛ Mũ—Mesia, loo Kristo lɛ.a (Lala 132:11-14; Luka 1:31-33) Biblia lɛ jieɔ lɛ kpo hu akɛ, “Yehowa sɛi” lɛ naanɔ niyelɔ nɛɛ baaye jeŋmaji lɛ fɛɛ nɔ, jeee Yerusalem pɛ nɔ.—Lala 2:6-8; Daniel 7:13, 14.
7. Mɛɛ gbɛ nɔ Maŋtsɛ David ha jamɔ krɔŋŋ shwere yɛ?
7 Mɔdɛŋ ni abɔ koni afã Maŋtsɛ David, mɔ ni Nyɔŋmɔ efɔ lɛ mũ lɛ kɛjɛ esɛ̃i lɛ nɔ lɛ fee efolo. Yɛ no najiaŋ lɛ, aba jeŋmaji ni ji henyɛlɔi lɛ ashi, ni akpã Shiwoo Shikpɔŋ lɛ husui amli kɛyashɛ he ni Nyɔŋmɔ etsɔɔ akɛ akɛyashɛ. David kɛ shihilɛ nɛɛ tsu nii ni ekɛlɛɛ anɔkwa jamɔ mli. Ni David lalai lɛ pii jieɔ Yehowa yi akɛ Maŋtsɛ diɛŋtsɛ ni yɔɔ Zion.—2 Samuel 8:1-15; Lala 9:2, 12; 24:1, 3, 7-10; 65:2, 3; 68:2, 25, 30; 110:1, 2; 122:1-4.
8, 9. Te fee tɛŋŋ ni anɔkwa jamɔ ni yaa nɔ yɛ Yerusalem lɛ mli lɛɛ yɛ Maŋtsɛ Salomo nɔyeli shishi?
8 Yɛ David bi Salomo nɔyeli be lɛ mli lɛ, alɛɛ Yehowa jamɔ mli kɛyashɛ shɔŋŋ. Salomo lɛɛ Yerusalem mli kɛtee kooyigbɛ ni eha Moria gɔŋ lɛ (he ni ŋmɛnɛŋmɛnɛ beaŋ Dome of the Rock lɛ yɔɔ lɛ) bafata he. He ni kwɔ nɛɛ nɔ ená hegbɛ koni ema sɔlemɔtsu ko ni yɔɔ fɛo waa kɛha Yehowa yijiemɔ yɛ. Akɛ kpaŋmɔ adeka lɛ bama nakai sɔlemɔtsu lɛ He Krɔŋkrɔŋ Fe Fɛɛ lɛ mli.—1 Maŋtsɛmɛi 6:1-38.
9 Israel maŋ lɛ ná toiŋjɔlɛ yɛ be mli ni amɛjɛɔ amɛtsui muu fɛɛ mli amɛfiɔ Yehowa jamɔ ni yɔɔ Yerusalem lɛ sɛɛ lɛ. Yɛ be mli ni etsɔɔ shihilɛ nɛɛ mli fɛfɛo lɛ, Ŋmalɛi lɛ kɛɛ: “Yuda kɛ Israel yi fa babaoo, tamɔ ŋshɔnaa shia kɛ falɛ, amɛyeyeɔ nii, amɛnunuɔ dãai, ni amɛmli filiɔ amɛ. . . . Ni Salomo yinɔ lɛ fɛɛ lɛ Yuda kɛ Israel hi shi shweshweeshwe, mɔ fɛɛ mɔ yɛ eweintso shishi kɛ egbamitso shishi.”—1 Maŋtsɛmɛi 4:20; 5:4, 5.
10, 11. Shitsaa kɛha blema nibii ataomɔ maa nɔ ni Biblia lɛ wieɔ yɛ Yerusalem he beni Salomo ye nɔ lɛ nɔ mi yɛ mɛɛ gbɛ nɔ?
10 Nibii ni ana kɛtsɔ shitsaa kɛha blema nibii ataomɔ nɔ lɛ fiɔ Salomo nɔyeli lɛ shweremɔ lɛ he wiemɔ nɛɛ sɛɛ. Nilelɔ Yohanan Aharoni ŋma yɛ ewolo ni ji The Archaeology of the Land of Israel lɛ mli akɛ: “Ninámɔ ni ba maŋtsɛwe lɛ kɛjɛ hei srɔtoi fɛɛ lɛ kɛ jarayeli ni shwereɔ lɛ . . . kɛ tsakemɔ ni baa oyayaayai ni anaa faŋŋ yɛ nɔyaa yɛ heloonaa mli ba. . . . Anaa tsakemɔ ni ba yɛ shihilɛ mli lɛ . . . jeee yɛ fɛo nibii amli pɛ kɛkɛ, shi titri hu lɛ yɛ nibii ni akɛ sũ eshɔ̃shɔ̃i lɛ amli. . . . Shɔ̃ɔnii lɛ kɛ bɔ ni ashã yɛ flɔnɔɔ mli aha lɛ hilɛ tee hiɛ waa.”
11 Nakai nɔŋŋ hu Jerry M. Landay ŋma akɛ: “Yɛ Salomo nɔyeli shishi lɛ, Israel hiŋmɛigbelemɔ yɛ heloo naa lɛ tee hiɛ babaoo yɛ afii nyɔŋmai etɛ mli fe bɔ ni eji yɛ afii ohai enyɔ ni tsɔ hiɛ ba lɛ mli. Wɔnaa nitsumɔi wuji ni aatsu, maŋtiasei wuji kɛ amɛ gbogboi ni dara naakpa, tsũi babaoo ni amamɔ lɛ jogbaŋŋ akɛ mɛi ni yɔɔ nii lɛ ashihilɛhe ni kpɛtɛkpɛtɛɛ amɛhe, nɔyaa babaoo yɛ nilee ni gbɛshɔ̃lɔ lɛ kɛtsuɔ nii yɛ hesaa mli yɛ eshɔ̃ɔnii ni efeɔ lɛ mli yɛ nibii ni atsa shi ana yɛ Salomo beaŋ lɛ mli. Wɔnaa guɔyeli nibii ni afee yɛ hei ni jɛkɛjɛkɛi, okadii ni tsɔɔ majimaji ateŋ jarayeli kɛ nihɔ̃ɔmɔ.”—The House of David.
Kɛjɛ Toiŋjɔlɛ Kɛmiiya Amaŋfɔfeemɔ Mli
12, 13. Te eba lɛ tɛŋŋ ni anɔkwa jamɔ eyaaa nɔ eshwereee yɛ Yerusalem lɛ?
12 Yerusalem, maŋtiase ni Yehowa sɔlemɔtsu lɛ yɔɔ jɛmɛ lɛ toiŋjɔlɛ kɛ shweremɔ ji nibii ni esa akɛ adamɔ nɔ asɔle. David ŋma akɛ: “Nyɛbaa hejɔlɛ nyɛhaa Yerusalem! Mɛi ni sumɔɔo lɛ ahi aha amɛ! Hejɔlɛ ahi ogbogboi lɛ ateŋ, toiŋjɔlɛ ahi omɔ̃ji lɛ amli! Minyɛmimɛi lɛ kɛ minanemɛi lɛ ahewɔ lɛ makɛɛ akɛ: Hejɔlɛ ahi omli!” (Lala 122:6-8) Eyɛ mli akɛ Salomo ná hegbɛ ema sɔlemɔtsu ni yɔɔ fɛo waa yɛ nakai toiŋjɔlɛ maŋtiase lɛ mli moŋ, shi yɛ naagbee lɛ ekɛ ŋamɛi pii ni ji wɔŋjalɔi bote gbãlashihilɛ mli. Yɛ egbɔlɛ be mli lɛ, amɛlaka lɛ ni eha nakai gbii lɛ amli apasa nyɔŋmɔi ajamɔ shwere. Hemɔkɛyeli kwamɔ nɛɛ tsɔ nɔ ni fite maŋ muu lɛ fɛɛ, ni ehaaa emaŋ lɛ kɛ emli bii lɛ aná toiŋjɔlɛ diɛŋtsɛ.—1 Maŋtsɛmɛi 11:1-8; 14:21-24.
13 Yɛ Salomo bi Rehabeam nɔyeli lɛ shishijee mli lɛ, akutsei nyɔŋma tse amɛhe ni amɛyato Israel kooyigbɛ maŋtsɛyeli lɛ. Yɛ amɛ amagai ajamɔ hewɔ lɛ, Nyɔŋmɔ ŋmɛ gbɛ ni Ashur butu nakai maŋtsɛyeli lɛ. (1 Maŋtsɛmɛi 12:16-30) Yuda akutsei enyɔ maŋtsɛyeli ni yɔɔ wuoyigbɛ lɛ tee nɔ ehi Yerusalem. Shi yɛ be ko sɛɛ lɛ amɛ hu amɛtsi amɛhe kɛjɛ jamɔ krɔŋŋ he, no hewɔ lɛ Nyɔŋmɔ ŋmɛ Babiloniabii lɛ gbɛ ni amɛkpata maŋtiase ni egba afã lɛ hiɛ yɛ afi 607 D.Ŋ.B. Yudafoi ni atswa amɛ naneshi tu lɛ piŋ yɛ nomŋɔɔ mli yɛ Babilon afii 70. Kɛkɛ ni yɛ Nyɔŋmɔ mɔbɔnalɛ naa lɛ, aŋmɛ amɛ gbɛ koni amɛku amɛsɛɛ amɛba Yerusalem koni amɛbato anɔkwa jamɔ amɛma shi ekoŋŋ.—2 Kronika 36:15-21.
14, 15. Te fee tɛŋŋ ni Yerusalem bafee he ni ale jogbaŋŋ ekoŋŋ yɛ Babilonia nomŋɔɔ lɛ sɛɛ, shi kɛ mɛɛ tsakemɔ?
14 Yɛ afii 70 amaŋfɔ̃feemɔ sɛɛ lɛ, tsũi ní ekumɔ lɛ amli baatsa jwɛi waa. Akumɔ Yerusalem gbogboi lɛ, ni gbɛ̀i foji kãmɔ he ni be ko lɛ agbói kɛ mɔ̃ji lɛ yɔɔ lɛ. Kɛlɛ, Yudafoi ni kuɔ amɛsɛɛ lɛ anijiaŋ ejeee wui. Amɛma afɔleshãa latɛ yɛ he ni tsutsu sɔlemɔtsu lɛ ma lɛ, ni amɛje afɔlei ni amɛshãa amɛhaa Yehowa daa gbi lɛ shishi.
15 Shishijee kpakpa nɛ, shi nakai Yerusalem ni asaa ama ekoŋŋ lɛ efeŋ maŋtsɛyeli ko maŋtiase ni Maŋtsɛ David seshinyo ko ta maŋtsɛsɛi nɔ yɛ jɛmɛ dɔŋŋ gbi ko gbi ko. Yɛ no najiaŋ lɛ, amralo ko ni Babilon nɔ kunimyelɔi lɛ hala lɛ ye Yudafoi lɛ anɔ, ni ehe bahia ni amɛtsu onia amɛha amɛ nuntsɔmɛi ni ji Persiabii lɛ. (Nehemia 9:34-37) Eyɛ mli akɛ eyɛ ‘nɔnaamɔ’ shihilɛ mli moŋ, shi Yerusalem kã he eji maŋtiase kome ni yɔɔ shikpɔŋ lɛ fɛɛ nɔ ni Yehowa Nyɔŋmɔ eduro lɛ titri. (Luka 21:24) Ákɛ jamɔ krɔŋŋ shikwɛ̃ɛhe lɛ, edamɔ shi kɛha hegbɛ ni Nyɔŋmɔ yɔɔ akɛ etsuɔ enɔyeli he nii yɛ shikpɔŋ lɛ nɔ hu kɛtsɔ Maŋtsɛ David seshinyo ko nɔ.
Apasa Nyɔŋmɔi Ajálɔi ni Ebɔle Amɛ Te Shi Wo Amɛ
16. Mɛni hewɔ Yudafoi ni ku amɛsɛɛ kɛjɛ Babilon lɛ kpá Yerusalem ni amɛsaa amɛtswaa ekoŋŋ lɛ?
16 Etsɛɛɛ ni Yudafoi ni eku amɛsɛɛ kɛjɛ nomŋɔɔ mli kɛtee Yerusalem lɛ to sɔlemɔtsu hee ko shishi. Shi maji ni diɔ apasa jamɔ sɛɛ ni amɛbɔle amɛ lɛ ŋma heguɔgbee wolo amɛyaha Persia Maŋtsɛ Artashasta, kɛmiitsɔɔ akɛ Yudafoi lɛ baatse atua. Kɛkɛ ni Artashasta tsĩ tsũ ni aaaya nɔ ama yɛ Yerusalem lɛ naa. Obaanyɛ osusu akɛ eji ohi shi yɛ nakai maŋtiase lɛ mli yɛ no beaŋ kulɛ, obaasusu nɔ ni wɔsɛɛ be baaji aha nakai maŋ lɛ he. Taakɛ eba lɛ lɛ, Yudafoi lɛ kpa sɔlemɔtsu lɛ maa, ni amɛkɛ amɛhe wo amɛ diɛŋtsɛ amɛ heloonaa nibii asɛɛdii mli.—Ezra 4:11-24; Hagai 1:2-6.
17, 18. Mɛni nɔ Yehowa tsɔ koni ekɛkwɛ ni asaa ama Yerusalem ekoŋŋ?
17 Aaafee amɛsɛɛkuu lɛ sɛɛ afii 17 lɛ, Nyɔŋmɔ tée gbalɔi tamɔ Hagai kɛ Zakaria shi koni amɛjaje ewebii lɛ ajwɛŋmɔ. Tsuitsakemɔ tsirɛ amɛ, ni Yudafoi lɛ je sɔlemɔtsu lɛ maa shishi ekoŋŋ. No mli lɛ Dario ebatsɔ Persia maŋtsɛ. Ema fãmɔ ni Maŋtsɛ Koresh kɛha akɛ aku sɛɛ ama Yerusalem sɔlemɔtsu lɛ ekoŋŋ lɛ nɔ mi. Dario kɛ wolo maje gbɔmɛi ni ebɔle Yudafoi lɛ ahe lɛ, ebɔ amɛ kɔkɔ ni ‘amɛtsi amɛhe kɛjɛ Yerusalem he kɛya sɛɛ fɛlɛŋŋ’ koni ajie shika kɛjɛ maŋtsɛ lɛ shika mli ni akɛfi sɛɛ koni agbe nakai tsũmaa nitsumɔ lɛ naa.—Ezra 6:1-13.
18 Yudafoi lɛ gbe sɔlemɔtsu lɛ naa yɛ amɛsɛɛkuu lɛ mli afi ni ji 22 lɛ mli. Obaanyɛ onu shishi akɛ be ni sa kadimɔ nɛɛ baanyɛ afee be ni akɛ miishɛɛ kpele baaye he gbi jurɔ. Ni kɛlɛ, Yerusalem kɛ egbogboi ní ekumɔ lɛ babaoo jwere shi lolo. Agbala jwɛŋmɔ kɛba maŋtiase lɛ nɔ yɛ “Nehemia kɛ osɔfo Ezra ni ji woloŋmalɔ lɛ” gbii lɛ amli. (Nehemia 12:26, 27) Eyɛ faŋŋ akɛ, beni shɛɔ afii ohai enumɔ D.Ŋ.B. lɛ naagbee lɛ, no mli áku sɛɛ áma Yerusalem ágbe naa kwraa akɛ maŋtiase wulu yɛ blema je lɛ mli.
Mesia lɛ Pue!
19. Mesia lɛ yɔse gbɛhe krɛdɛɛ mli ni Yerusalem yɔɔ lɛ yɛ mɛɛ gbɛ nɔ?
19 Shi, nyɛhaa wɔshaa foi kɛyaa hiɛ afii ohai babaoo kɛya nɔ ko ni ba ni he hiaa jeŋ muu fɛɛ lɛ nɔ, Yesu Kristo fɔmɔ. Yehowa Nyɔŋmɔ bɔfo ekɛɛ Yesu nyɛ oblayoo fro lɛ akɛ: “[Yehowa, NW] Nyɔŋmɔ aaaŋɔ etsɛ David maŋtsɛsɛi lɛ aha lɛ, . . . ni emaŋtsɛyeli lɛ sɛɛ efoŋ.” (Luka 1:32, 33) Afii komɛi asɛɛ lɛ, Yesu kɛ e-Gɔŋ nɔ Shiɛmɔ ni ehe gbɛi lɛ ha. Emli ni ekɛ hewalɛwoo kɛ ŋaawoo ha yɛ saji pii ahe. Ákɛ nɔkwɛmɔnɔ lɛ, ewo etoibolɔi lɛ hewalɛ koni amɛtsu shiwoo ni amɛkɛha Nyɔŋmɔ lɛ he nii, shi amɛkwɛ jogbaŋŋ koni amɛkɛ amɛhe akawo kitãkãmɔi ni he ehiaaa mli. Yesu kɛɛ: “Nyɛnu akɛ akɛɛ blemabii lɛ akɛ: ‘Kaakã amale kitã, shi ye okitãi lɛ anɔ oha Yehowa (NW).’ Shi mi lɛ, miikɛɛ nyɛ akɛ: Nyɛkakãa kitã kwraa! Kaaka ŋwɛi, shi Nyɔŋmɔ sɛ̃i ni; aloo shikpɔŋ, shi enajiashi maaŋoo ni; aloo Yerusalem, shi maŋtsɛ agbo lɛ maŋ ni.” (Mateo 5:33-35) Esa kadimɔ akɛ Yesu yɔse Yerusalem gbɛhe ni ekaaa lɛ—nɔ ni ená mli ŋɔɔmɔ afii ohai abɔ lɛ. Hɛɛ, eji “Maŋtsɛ agbo lɛ,” Yehowa Nyɔŋmɔ “maŋ,” NW.
20, 21. Mɛɛ trukaa tsakemɔ ko ba yɛ mɛi ni yɔɔ Yerusalem lɛ ateŋ mɛi pii asubaŋ mli?
20 Kɛmiiba eshikpɔŋ nɔ sɔɔmɔ lɛ naagbee lɛ, Yesu kɛ ehe ha mɛi ni yɔɔ Yerusalem lɛ akɛ amɛ Maŋtsɛ ni sa ni áfɔ lɛ mũ. Yɛ nakai miishɛɛ nifeemɔ lɛ nɔheremɔ mli lɛ, mɛi pii kɛ mlifilimɔ bolɔ akɛ: “Ajɔɔ mɔ ni baa yɛ [Yehowa, NW] gbɛi anɔ lɛ! Ajɔɔ wɔtsɛ David maŋtsɛyeli ni baa” lɛ.—Marko 11:1-10; Yohane 12:12-15.
21 Shi eshɛɛɛ otsi, ni asafoi lɛ ŋmɛ Yerusalem jamɔ mli hiɛnyiɛlɔi lɛ agbɛ koni amɛha amɛte shi amɛwo Yesu. Ebɔ kɔkɔ akɛ Yerusalem maŋtiase lɛ kɛ maŋ muu lɛ fɛɛ baalaaje amɛ duromɔ shidaamɔ ni amɛyɔɔ yɛ Nyɔŋmɔ hiɛ lɛ. (Mateo 21:23, 33-45; 22:1-7) Ákɛ nɔkwɛmɔnɔ lɛ, Yesu jaje akɛ: “Yerusalem, Yerusalem, bo mɔ ni ogbeɔ gbalɔi lɛ ni otswiaa mɛi ni atsuɔ amɛ oŋɔɔ lɛ atɛi: shii enyiɛ mitao akɛ kulɛ mibuaa obii anaa tamɔ bɔ ni wuɔ buaa ebii anaa ewoɔ efiji ashishi lɛ, ni nyɛkpɛlɛɛɛ! Naa, aaashi nyɛwe lɛ amaŋfɔ̃ aha nyɛ!” (Mateo 23:37, 38) Yɛ afi 33 Ŋ.B. Hehoo be lɛ mli lɛ, mɛi ni teɔ shi woɔ Yesu lɛ ha agbe lɛ yɛ Yerusalem sɛɛ yɛ gbɛ ni ejaaa nɔ. Shi kɛlɛ, Yehowa tée Mɔ ni Efɔ Lɛ Mũ lɛ shi ni ekɛ mumɔŋ wala ni gbele bɛ mli wo ehiɛ nyam yɛ ŋwɛi Zion, nifeemɔ ni wɔ fɛɛ wɔbaanyɛ wɔná he sɛɛ.—Bɔfoi lɛ Asaji 2:32-36.
22. Yɛ Yesu gbele sɛɛ lɛ, akɛ saji pii ni kɔɔ Yerusalem he lɛ toɔ mɛni he?
22 Kɛjɛ nakai be lɛ mli kɛbaa lɛ, abaanyɛ anu Zion loo Yerusalem gbalɛi pii ni bako mli lɛ ashishi akɛ ekɔɔ ŋwɛi gbɛjianɔtoi loo Yesu sɛɛnyiɛlɔi ni afɔ amɛ mũ lɛ ahe. (Lala 2:6-8; 110:1-4; Yesaia 2:2-4; 65:17, 18; Zakaria 12:3; 14:12, 16, 17) Saji pii ni awie ni kɔɔ “Yerusalem” loo “Zion” he ni aŋmala yɛ Yesu gbele lɛ sɛɛ lɛ hiɛ mfonirifeemɔŋ shishinumɔ yɛ faŋŋ mli ni ekɔɔɔ maŋtiase lɛ diɛŋtsɛ loo he ni eyɔɔ lɛ he. (Galatabii 4:26; Hebribii 12:22; 1 Petro 2:6; Kpojiemɔ 3:12; 14:1; 21:2, 10) Naagbee odaseyeli ni tsɔɔ akɛ Yerusalem jeee “maŋtsɛ agbo lɛ maŋ” dɔŋŋ lɛ ba yɛ afi 70 Ŋ.B., beni Roma asraafoi lɛ fee lɛ amaŋfɔ̃, taakɛ Daniel kɛ Yesu Kristo gba fɔ̃ shi lɛ. (Daniel 9:26; Luka 19:41-44) Biblia ŋmalɔi loo Yesu diɛŋtsɛ egbaaa shikpɔŋ nɔ Yerusalem saamɔ ekoŋŋ yɛ sɛɛ mli be ko mli kɛmiiya Yehowa Nyɔŋmɔ duromɔ krɛdɛɛ ni be ko lɛ ená mli ŋɔɔmɔ lɛ mli amɛfɔ̃ɔɔ shi.—Galatabii 4:25; Hebribii 13:14.
Naanɔ Toiŋjɔlɛ He Nibii ni Atsɔ̃ɔ Hiɛ Anaa
23. Mɛni hewɔ esa akɛ wɔná Yerusalem he miishɛɛ lolo?
23 Akɛni wɔtĩ shikpɔŋ nɔ Yerusalem shishijee yinɔsane lɛ mli hewɔ lɛ, ŋwanejee ko bɛ he akɛ maŋ lɛ hi shi yɛ shishinumɔ ni yɔɔ egbɛi lɛ sɛɛ lɛ kɛ gbeekpamɔ naa—“Mɔ ni Yɔɔ [loo, Shishitoo] Toiŋjɔlɛ ni Bɔ He Enyɔ”—yɛ Maŋtsɛ Salomo toiŋjɔlɛ nɔyeli be lɛ mli. Ni kɛlɛ, eji toiŋjɔlɛ kɛ shweremɔ ko ni etsɛŋ ni mɛi ni sumɔɔ Nyɔŋmɔ lɛ ni baahi shi yɛ shikpɔŋ ni atsake lɛ afee lɛ paradeiso nɔ lɛ baaná mli ŋɔɔmɔ lɛ he nɔ̃ ko ni atsɔɔ hiɛ anaa kɛkɛ.—Luka 23:43.
24. Mɛni wɔbaanyɛ wɔkase kɛjɛ shihilɛi ni yɔɔ yɛ be mli ni Salomo yeɔ maŋtsɛ lɛ mli?
24 Lala 72 lɛ jieɔ shihilɛi ni hi shi yɛ Maŋtsɛ Salomo nɔyeli be lɛ mli lɛ kpo. Shi nakai lala ni ŋɔɔ lɛ ji gbalɛ ni kɔɔ jɔɔmɔi ni adesai baaná yɛ Mesia, Yesu Kristo ŋwɛi nɔyeli lɛ shishi lɛ ahe. Lalatsɛ lɛ lá yɛ ehe akɛ: “Jalɔ aaafrɔke yɛ egbii lɛ amli, ni hejɔlɛ aaafa kɛyashi beyinɔ ni nyɔɔŋtsere bɛ dɔŋŋ. . . . Ejaakɛ eeejie ohiafoi ni bolɔɔ lɛ, kɛ nɔnalɔ ni bɛ bualɔ lɛ. Eeena ohiafo kɛ mɔ ni efi lɛ lɛ mɔbɔ, ni ehere mɛi ni efi amɛ lɛ asusumai ayiwala. Eeekpɔ amɛsusuma kɛaajɛ fifiamɔ kɛ yiwalɛ mli, ni amɛlá jara aaawa yɛ ehiɛ. Shikpɔŋ lɛ nɔ aaaba abele babaoo kɛyashwie gɔji lɛ ayiteaŋ.”—Lala 72:7, 8, 12-14, 16.
25. Mɛni hewɔ esa akɛ wɔsumɔ akɛ wɔɔkase Yerusalem he saji babaoo lɛ?
25 Mɛɛ miishɛjemɔ kɛ hiɛnɔkamɔ po nakai wiemɔi lɛ kɛhaa mɛi ni sumɔɔ Nyɔŋmɔ ni yɔɔ Yerusalem loo shikpɔŋ nɔ he fɛɛ he lɛ nɛkɛ! Obaanyɛ ofata mɛi ni baaná toiŋjɔlɛ yɛ shikpɔŋ lɛ fɛɛ nɔ yɛ Nyɔŋmɔ Mesia Maŋtsɛyeli lɛ shishi lɛ ahe. Yerusalem he saji ni eho lɛ ahe nilee baanyɛ aye abua wɔ ni wɔnu Nyɔŋmɔ yiŋtoo kɛha adesai lɛ shishi. Nikasemɔi ni nyiɛ sɛɛ lɛ baagbala jwɛŋmɔ kɛya saji ni tee nɔ beni Yudafoi lɛ eku amɛsɛɛ kɛjɛ Babilonia nomŋɔɔ lɛ mli lɛ sɛɛ afii nyɔŋmai kpawo kɛ afii nyɔŋmai kpaanyɔ lɛ mli lɛ nɔ. Enɛ kɛ miishɛjemɔ bahaa mɛi fɛɛ ni sumɔɔ ni amɛkɛ jamɔ ni nɔkpɛlɛmɔ yɔɔ mli aha Yehowa Nyɔŋmɔ, Maŋtsɛ Agbo lɛ.
[Shishigbɛ niŋmai]
a Sabalai “Mesia” (ni aná kɛjɛ Hebri wiemɔ mli) kɛ “Kristo” (ni jɛ Hela wiemɔ mli) lɛ fɛɛ shishi tsɔɔ “Mɔ ni Afɔ Lɛ Mũ.”
Ani Okaiɔ?
◻ Te fee tɛŋŋ ni Yerusalem batsɔ he ni ‘Yehowa maŋtsɛsɛi’ lɛ yɔɔ?
◻ Mɛni Salomo tsu titri ni sa kadimɔ yɛ anɔkwa jamɔ shweremɔ mli?
◻ Te wɔfeɔ tɛŋŋ wɔleɔ akɛ Yerusalem ebafeee Yehowa jamɔ shikwɛ̃ɛhe dɔŋŋ?
◻ Mɛni hewɔ wɔsumɔɔ ni wɔkase Yerusalem he saji babaoo lɛ?
[Mfoniri ni yɔɔ baafa 10]
David Maŋ lɛ kã wuoyigbɛ gɔŋ lɛ nɔ, shi Salomo lɛɛ maŋtiase lɛ mli kɛtee ekooyigbɛ ni ema sɔlemɔtsu lɛ
[He ni Sane lɛ Jɛ]
Pictorial Archive (Near Eastern History) Est.
[He ni Mfoniri ni yɔɔ baafa 10 lɛ Jɛ]
Pictorial Archive (Near Eastern History) Est.