Te Wɔɔfee Tɛŋŋ Wɔkɛ Jeŋba Kpakpa Afata Wɔ Hemɔkɛyeli He?
“Nyɛkɛ jeŋba kpakpa afataa nyɛ hemɔkɛyeli lɛ he.”—2 PETRO 1:5, New World Translation.
1, 2. Mɛni hewɔ esa akɛ wɔkpa Yehowa webii agbɛ akɛ amɛaafee nibii kpakpai?
YEHOWA kɛ jeŋba kpakpa tsuɔ nii be fɛɛ be. Efeɔ nɔ ni ja kɛ nɔ ni hi. No hewɔ lɛ, bɔfo Petro baanyɛ awie Nyɔŋmɔ he akɛ mɔ ni tsɛ Kristofoi ni afɔ amɛ mu lɛ ‘kɛtsɔ E-nunyam kɛ enikpakpai anifeemɔ nɔ.’ Amɛ ŋwɛi Tsɛ ni haa nibii kpakpai lɛ he anɔkwa nilee etsɔɔ amɛ nɔ ni he hiaa koni amɛdi anɔkwa Nyɔŋmɔ-jamɔ hetuu-kɛhamɔ shihilɛ diɛŋtsɛ sɛɛ.—2 Petro 1:2, 3.
2 Bɔfo Paulo woɔ Kristofoi ahewalɛ ni amɛtsɔmɔ “Nyɔŋmɔ kaselɔi, tamɔ bii ni asumɔɔ.” (Efesobii 5:1) No hewɔ lɛ, taakɛ amɛ ŋwɛi Tsɛ lɛ ji lɛ, esa akɛ Yehowa jalɔi afee nii kpakpai yɛ shihilɛi fɛɛ mli. Shi mɛni ji jeŋba kpakpa?
Nɔ Ni Jeŋba Kpakpa Ji
3. Te atsɔɔ “jeŋba kpakpa” mli aha tɛŋŋ?
3 Ŋmɛnɛŋmɛnɛ beaŋ wiemɔi komekomei ashishitsɔɔmɔ woji tsɔɔ “jeŋba kpakpa” mli akɛ “jeŋba ni hi kɛteke nɔ; ejurɔfeemɔ.” Eji “nifeemɔ kɛ jwɛŋmɔ ni ja; subaŋ kpakpa.” Mɔ ni yɔɔ jeŋba kpakpa lɛ jalɔ ni. Atsɔɔ jeŋba kpakpa mli hu akɛ “he ni akpɛtɛɔ tɛi ni ja ni afolɔ ashwie shi he.” Shi kɛha Kristofoi lɛ, Nyɔŋmɔ ji mɔ ni tsɔɔ “tɛi ni ja ni afolɔ ashwie shi,” ni afee lɛ faŋŋ yɛ e-Wiemɔ ni yɔɔ Krɔŋkrɔŋ ni ji Biblia lɛ mli.
4. Mɛɛ sui ni atsi ta yɛ 2 Petro 1:5-7 esa akɛ Kristofoi atsu he nii waa ni amɛna?
4 Anɔkwa Kristofoi kɛ amɛhe kpɛtɛɔ jalɛ tɛi ni Yehowa Nyɔŋmɔ kɛmamɔ shi lɛ ahe, ni amɛkpɛlɛɔ eshiwooi ni jara wawai lɛ anɔ kɛtsɔɔ emli hemɔkɛyeli ni amɛnaa lɛ nɔ. Amɛboɔ Petro ŋaawoo lɛ hu toi: “Belɛ enɛ nɔŋŋ hewɔ hu lɛ, nyɛkɛ mɔdɛŋbɔɔ fɛɛ afataa he, ni nyɛkɛ jeŋba kpakpa afataa nyɛ hemɔkɛyeli lɛ he, ni nyɛkɛ nilee afataa nyɛ jeŋba kpakpa lɛ he, ni nyɛkɛ henɔyeli afataa nyɛ nilee lɛ he, ni nyɛkɛ tsuishiŋmɛɛ afataa nyɛ henɔyeli lɛ he, ni nyɛkɛ Nyɔŋmɔ-jamɔ hetuu-kɛhamɔ afataa nyɛ tsuishiŋmɛɛ lɛ he, ni Nyɔŋmɔ-jamɔ hetuukɛhamɔ mli hu lɛ, nyɛmimɛi ahedɔɔ, ni nyɛmimɛi ahedɔɔ mli lɛ, suɔmɔ.” (2 Petro 1:5-7, NW) Esa akɛ Kristofonyo lɛ atsu nii waa ni ekɛna nɛkɛ sui nɛɛ. Afeee enɛ yɛ gbii loo afii fioo mli, shi moŋ ebiɔ wala be fɛɛ mli mɔdɛŋ ni ayaa nɔ abɔɔ. Ejaakɛ jeŋba kpakpa ni wɔkɛaafata wɔhemɔkɛyeli he lɛ ji kaa loo nitsumɔ ni wa diɛŋtsɛ!
5. Yɛ Ŋmalɛ naa lɛ, mɛni ji jeŋba kpakpa?
5 Mɔ ni buaa wiemɔ komekomei ashishitsɔɔmɔ naa, M. R. Vincent, kɛɔ akɛ shishijee Hela wiemɔ ni atsɔɔ shishi akɛ “jeŋba kpakpa” lɛ diɛŋtsɛ tsɔɔ “nɔ fɛɛ nɔ ni hi kɛteke nɔ.” Petro kɛ ebabaoo-feemɔ wiemɔ tsu nii beni ekɛɛ akɛ esa akɛ Kristofoi ajaje Nyɔŋmɔ “agbojee” loo ejeŋba kpakpai amɛtsɔɔ lɛ. (1 Petro 2:9) Yɛ Ŋmalɛ naa lɛ, atsɔɔɔ jeŋba kpakpa mli akɛ nɔ ko ni mli waaa, shi moŋ akɛ “jeŋba mli hewalɛ, jeŋba mli nyɛmɔ, susuma ni yɔɔ ekãa.” Nɔ ni yɔɔ Petro jwɛŋmɔ mli yɛ be mli ni etsiɔ jeŋba kpakpa ta lɛ ji jeŋba ni yɔɔ ekãa ni hi kɛteke nɔ ni akpaa gbɛ akɛ Nyɔŋmɔ tsuji baajie kpo amɛtsɔɔ ni amɛhiɛ mli lɛ. Shi, akɛni wɔyeee emuu hewɔ lɛ, ani wɔbaanyɛ wɔfee nɔ kpakpa diɛŋtsɛ yɛ Nyɔŋmɔ hiɛ?
Wɔyeee Emuu Shi Wɔbaa Jeŋ Kpakpa
6. Eyɛ mli akɛ wɔyeee emuu moŋ, shi mɛni hewɔ abaanyɛ akɛɛ akɛ wɔbaanyɛ wɔfee nɔ ni hi yɛ Nyɔŋmɔ hiɛ lɛ?
6 Wɔna emuu ni ayeee kɛ esha akɛ gboshinii, no hewɔ lɛ wɔbaanyɛ wɔsusu bɔ ni wɔfee wɔba jeŋ kpakpa diɛŋtsɛ yɛ Nyɔŋmɔ hiɛ lɛ he. (Romabii 5:12) Yɛ anɔkwale mli lɛ, Yehowa yelikɛbuamɔ he miihia wɔ kɛ wɔɔnyɛ wɔna tsuii ni yɔɔ krɔŋŋ, ni susumɔi, wiemɔi, kɛ nifeemɔi kpakpai baanyɛ ajɛ mli aba. (Okɛto Luka 6:45 he.) Beni David fee esha yɛ Batsheba hewɔ lɛ sɛɛ lɛ, lalatsɛ ni etsake etsui lɛ kpa fai akɛ: “Nyɔŋmɔ, bɔɔ tsui ni he tse oha mi, ni ofee mumɔ ni fiɔ shi ehee yɛ mimli!” (Lala 51:12) David nine shɛ Nyɔŋmɔ dɛŋ eshaifaa nɔ kɛ yelikɛbuamɔ ni he hiaa ni baaha etiu jeŋba kpakpa sɛɛ. No hewɔ lɛ, kɛji akɛ wɔfee esha ko ni hiɛdɔɔ yɔɔ mli, shi wɔkɛ tsuitsakemɔ ekpɛlɛ Nyɔŋmɔ kɛ asafoŋ onukpai lɛ ayelikɛbuamɔ nɔ lɛ, wɔbaanyɛ wɔku wɔsɛɛ kɛya jeŋba kpakpa gbɛ lɛ nɔ ni wɔhi nɔ.—Lala 103:1-3, 10-14; Yakobo 5:13-15.
7, 8. (a) Mɛni he hiaa, kɛ wɔɔhi shi akɛ mɛi ni yɔɔ jeŋba kpakpa? (b) Mɛɛ yelikɛbuamɔ Kristofoi yɔɔ yɛ jeŋba kpakpa ni amɛaana lɛ mli?
7 Yɛ esha ni wɔna kɛjɛ fɔmɔ mli hewɔ lɛ, esa akɛ wɔya nɔ wɔwuu wɔmligbɛ ta koni wɔfee nɔ ni jeŋba kpakpa baabi yɛ wɔdɛŋ lɛ. Kɛ wɔɔhi shi akɛ mɛi ni yɔɔ jeŋba kpakpa lɛ, wɔnyɛŋ wɔŋmɛ gbɛ kɔkɔɔkɔ ni wɔtsɔmɔ esha tsuji. Shi moŋ, esa akɛ wɔtsɔmɔ “jalɛ tsuji,” ni wɔsusu nii ahe, wɔwie, ni wɔfee wɔnii yɛ gbɛ kpakpa nɔ be fɛɛ be. (Romabii 6:16-23) Eyɛ mli akɛ wɔ heloo mli akɔnɔi kɛ eshafeemɔ sui lɛ amli wa, ni mpleshii ka enɛɛmɛi kɛ nibii kpakpai ni Nyɔŋmɔ biɔ yɛ wɔdɛŋ lɛ teŋ. No hewɔ lɛ, mɛni esa akɛ afee?
8 Nɔ kome ji akɛ, ehe miihia ni wɔnyiɛ Yehowa mumɔ krɔŋkrɔŋ loo enifeemɔ hewalɛ lɛ gbɛtsɔɔmɔ sɛɛ. No hewɔ lɛ esa akɛ wɔdi Paulo ŋaawoo nɛɛ sɛɛ: “Nyɛnyiɛa yɛ mumɔ naa, ni nyɛfeŋ heloo akɔnɔi lɛ anaa nii. Ejaakɛ heloo lɛ diɔ nii asɛɛ eshiɔ mumɔ lɛ, ni mumɔ lɛ hu diɔ nii asɛɛ eshiɔ heloo lɛ; shi enɛɛmɛi kɛ amɛhe yeee, koni nyɛkafee nii moŋ ni nyɛsumɔɔɔ lɛ.” (Galatabii 5:16, 17) Hɛɛ, akɛ hewalɛ kɛha jalɛnifeemɔ lɛ, wɔyɛ Nyɔŋmɔ mumɔ lɛ, ni akɛ gbɛtsɔɔmɔ nɔ kɛha jeŋba kpakpa lɛ, wɔyɛ e-Wiemɔ lɛ. Agbɛnɛ hu wɔyɛ Yehowa gbɛjianɔtoo lɛ yelikɛbuamɔ ni suɔmɔ yɔɔ mli lɛ kɛ ŋaawoo ni jɛ “tsulɔ anɔkwafo kɛ nilelɔ” lɛ ŋɔɔ lɛ. (Mateo 24:45-47) Enɛ baaha wɔnyɛ wɔwuu wɔshi eshafeemɔ sui lɛ yɛ omanyeyeli mli. (Romabii 7:15-25) Shi kɛ susumɔ ko ni he tseee ba jwɛŋmɔ lɛ mli pɛ lɛ, esa akɛ wɔjie kɛjɛ wɔjwɛŋmɔ mli amrɔ nɔŋŋ ni wɔsɔle wɔbi Nyɔŋmɔ yelikɛbuamɔ koni wɔku kaa fɛɛ kaa ni baaha wɔfee nii yɛ gbɛ ni tsɔɔ akɛ wɔbɛ jeŋba kpakpa lɛ naa.—Mateo 6:13.
Jeŋba Kpakpa kɛ Wɔ Susumɔi
9. Jeŋba kpakpa biɔ ni wɔna mɛɛ susumɔ loo jwɛŋmɔ?
9 Jeŋba kpakpa jeɔ shishi yɛ gbɛ ni mɔ ko susuɔ loo ejwɛŋɔ nii ahe ehaa lɛ nɔ. Kɛ wɔɔna ŋwɛi duromɔ mli ŋɔɔmɔ lɛ, esa akɛ wɔjwɛŋ nibii ni ja, ni hi, kɛ jeŋba kpakpa he. Paulo kɛɛ: “Anyɛmimɛi, nii abɔ ni ji anɔkwa, nii ni sa woo, nii ni ja, nii ni he tse, nii ni adɔɔ he, nii ni yɔɔ gbɛi kpakpa lɛ fɛɛ, kɛ jeŋba kpakpa ko yɛ, kɛ yijiemɔ ko hu yɛ lɛ, enɛɛmɛi anɔ nyɛjwɛŋa.” (Filipibii 4:8) Ehe miihia ni wɔha wɔjwɛŋmɔ ahi nibii ni ja, ni he tse lɛ anɔ, ni esaaa ni nɔ fɛɛ nɔ ni jeŋba kpakpa bɛ mli lɛ feɔ wɔ fɛo loo ebaa wɔ tsine. Paulo baanyɛ akɛɛ akɛ: “Nii hu ni nyɛkase ni nyɛmɔ mli ni nyɛnu ni nyɛna yɛ mihe lɛ, nomɛi nɔŋŋ nyɛfea.” Kɛ wɔtamɔ Paulo—ni wɔsusumɔ, wiemɔ kɛ nifeemɔ ja loo eji ekpakpa lɛ—wɔbaafee nanemɛi kpakpai, mɛi ni toɔ okadi kpakpa yɛ Kristofoi ashihilɛ mli, ni ‘toiŋjɔlɛ Nyɔŋmɔ lɛ kɛ wɔ aaahi shi.’—Filipibii 4:9.
10. Yɛ mɛɛ gbɛ nɔ 1 Korintobii 14:20 ni wɔkɛaato wɔshihilɛ he lɛ baaye abua wɔ ni wɔhi shi akɛ mɛi ni yɔɔ jeŋba kpakpa?
10 Kɛ nɔ ni wɔshweɔ ji ni wɔna susumɔ loo jwɛŋmɔ kpakpa ni wɔsa wɔŋwɛi Tsɛ lɛ hiɛ lɛ, belɛ ehe miihia ni wɔkɛ Paulo ŋaawoo lɛ atsu nii: “Nyɛkafea nyɛhe gbekɛbii yɛ jwɛŋmɔ gbɛfaŋ, shi efɔŋ gbɛfaŋ lɛ, nyɛfea nyɛhe abifabii; shi jwɛŋmɔ gbɛfaŋ lɛ nyɛfea nyɛhe mɛi ni edara.” (1 Korintobii 14:20) Enɛ tsɔɔ akɛ, akɛ Kristofoi lɛ, wɔtaooo efɔŋ feemɔ he nilee loo ni wɔhe aaasa yɛ mli. Ni wɔɔŋmɛ gbɛ ni wɔjwɛŋmɔ ahi yɛ nɛkɛ gbɛ nɔ lɛ, wɔkɛ nilee halaa moŋ akɛ wɔɔhi shi akɛ mɛi ni leee efɔŋ he nɔ ko tamɔ abifabii yɛ nɛkɛ gbɛ nɔ. Yɛ nakai beaŋ nɔŋŋ lɛ, wɔnuɔ shishi jogbaŋŋ akɛ jeŋba shara kɛ efɔŋ feemɔ ji esha yɛ Yehowa hiɛ. Bɔ ni wɔshweɔ jogbaŋŋ yɛ wɔtsui mli akɛ wɔɔsa ehiɛ kɛtsɔ jeŋba kpakpa mli ni wɔɔhiɛ nɔ lɛ he baaba sɛɛnamɔ aha wɔ, ejaakɛ ebaatsirɛ wɔ ni wɔkwa hiɛtserɛjiemɔi komɛi ni he tseee kɛ jeŋ ni ka Satan hewalɛ mli nɛɛ sui krokomɛi ni fiteɔ jwɛŋmɔ lɛ.—1 Yohane 5:19.
Jeŋba Kpakpa kɛ Wɔwiemɔ
11. Jeŋba kpakpa ni mɔ ko yɔɔ lɛ biɔ ni ewiemɔ afee mɛni, ni mɛɛ nɔkwɛmɔ nii wɔyɔɔ yɛ Yehowa Nyɔŋmɔ kɛ Yesu Kristo he yɛ enɛ gbɛfaŋ?
11 Kɛ wɔyɛ jwɛŋmɔ loo susumɔi kpakpai lɛ, esa akɛ enɛ ana hewalɛ diɛŋtsɛ yɛ nɔ ni wɔwieɔ lɛ nɔ. Mɛi ni yɔɔ jeŋba kpakpa ni wɔji lɛ biɔ ni wɔwiemɔ afee nɔ ni he tse, nɔ ni hi, anɔkwale, ni tswaa mɔ maa shi. (2 Korintobii 6:8, 4, 7) Yehowa ji “Nyɔŋmɔ anɔkwafo” lɛ. (Lala 31:6) Eyeɔ anɔkwa yɛ enifeemɔi fɛɛ mli, ni eshiwooi baaba mli anɔkwale, ejaakɛ enyɛŋ emale. (4 Mose 23:19; 1 Samuel 15:29; Tito 1:2) Nyɔŋmɔ Bi, Yesu Kristo, ji mɔ ni “duromɔ kɛ anɔkwale eyi lɛ obɔ.” Beni eyɔɔ shikpɔŋ nɔ lɛ, ewieɔ anɔkwale lɛ be fɛɛ be taakɛ enine shɛ nɔ kɛjɛ e-Tsɛ lɛ ŋɔɔ lɛ. (Yohane 1:14; 8:40) Agbɛnɛ hu, Yesu “efeee esha, ni asaŋ anaaa apasa yɛ edaaŋ.” (1 Petro 2:22) Kɛ wɔji Nyɔŋmɔ kɛ Kristo tsuji lɛlɛŋ lɛ, wɔwiemɔ baafee anɔkwale ni wɔ jeŋba baafee nɔ ni ja, tamɔ nɔ ni wɔkɛ ‘anɔkwale efi wɔhɛ.’—Efesobii 5:9; 6:14.
12. Kɛ wɔɔfee mɛi ni yɔɔ jeŋba kpakpa lɛ, mɛɛ wiemɔi nɛkɛ esa akɛ wɔkwa?
12 Kɛ wɔji mɛi ni baa amɛjeŋ jogbaŋŋ lɛ, wiemɔi komɛi yɛ ni wɔbaatsi wɔhe kɛjɛ he kwraa. Paulo ŋaawoo nɛɛ ji nɔ ni baakudɔ wɔ: “Nyɛhaa mlijoomɔ kɛ mlila kɛ mlifu kɛ bolɔmɔ kɛ musubɔɔ fɛɛ sɛɛ afoa yɛ nyɛteŋ, kɛ efɔŋ fɛɛ efɔŋ.” “Shi ajwamaŋbɔɔ kɛ nyaŋemɔ-nitsumɔ fɛɛ aloo hiɛjoomɔ lɛ, akatsi ta tete yɛ nyɛteŋ, taakɛ bɔ ni sa mɛi krɔŋkrɔŋi, kɛ hiɛgbejianitsumɔ kɛ yakayaka wiemɔ kɛ fɛoyeli hu ni esaaa lɛ; shi moŋ shidaa.” (Efesobii 4:31; 5: 3, 4) Mɛi krokomɛi baana akɛ amɛhe jɔɔ amɛ kɛ amɛyɛ wɔteŋ, ejaakɛ wɔtsuii ni ja lɛ tsirɛɔ wɔ ni wɔkwa wiemɔi ni jeee Kristofoi anɔ̃.
13. Mɛni hewɔ esa akɛ Kristofoi aye lilɛi lɛ nɔ lɛ?
13 Bɔ ni wɔshweɔ ni wɔsa Nyɔŋmɔ hiɛ ni wɔwie wiemɔi kpakpai lɛ baaye abua wɔ ni wɔye wɔlilɛi nɔ. Yɛ eshafeemɔ sui hewɔ lɛ, wɔ fɛɛ wɔtɔ̃ɔ yɛ wiemɔ mli yɛ bei komɛi amli. Ni kɛlɛ kaselɔ Yakobo kɛɛ, “kɛ wɔkɛ okpɔŋɔi amanyofɛlɛi wo amɛdaaŋ” lɛ, amɛkɛ toiboo yaa he fɛɛ he ni wɔkudɔɔ amɛ kɛyaa. No hewɔ lɛ, esa akɛ wɔbɔ mɔdɛŋ waa ni wɔwo lilɛi lɛ manyofɛlɛ ni wɔbɔ mɔdɛŋ ni wɔkɛtsu nii yɛ gbɛi kpakpai ni ja pɛ nɔ. Abuɔ lilɛi ni anyɛɛɛ nɔ aye lɛ akɛ “nishaianii ajeŋ.” (Yakobo 3:1-7) Jeŋ ni leee Nyɔŋmɔ nɛɛ sui gbohii lɛ fɛɛ eko kɔɔ lilɛi ni anyɛɛɛ nɔ aye lɛ he. Lɛ ekɛ nibii ni yeɔ awui tamɔ amale odaseyeli, jɛmɔ, kɛ mɔheguɔgbee baa. (Yesaia 5:20; Mateo 15:18-20) Ni kɛ lilɛi ni anyɛɛɛ nɔ aye lɛ bɔi mɛi ajɛmɔ, kɛ wiemɔi ni wa loo mɛi aheguɔgbee lɛ, no mli lɛ ebɔɔ ni gbeɔ mɔ eyi mli obɔ.—Lala 140:3; Romabii 3:13; Yakobo 3:8.
14. Mɛɛ subaŋi enyɔ ni kɛ amɛhe kpaaa gbee esa akɛ Kristofoi akpoo yɛ wiemɔ mli?
14 Taakɛ Yakobo tsɔɔ lɛ, ebaafee sane ni kɛ ehe kpaaa gbee akɛ wɔkɛ no ‘aaajɔɔ Yehowa’ kɛtsɔ Nyɔŋmɔ ni wɔɔwie ehe ekpakpa lɛ nɔ, ni agbɛnɛ wɔkɛ lilɛi lɛ atsu nii yɛ gbɛ fɔŋ nɔ ni ‘wɔkɛlomɔ gbɔmɛi’ kɛtsɔ efɔŋ ni wɔɔtsɛ akɛ eba amɛnɔ lɛ nɔ. Kwɛ bɔ ni eji esha akɛ wɔɔla Nyɔŋmɔ yijiemɔi yɛ kpeei ashishi ni agbɛnɛ wɔje kpo ni wɔyawie nanemɛi heyelilɔi ahe efɔŋ! Nu ŋma kɛ nu ni jooɔ fɛɛ nyɛŋ ajɛ nuhiŋmɛi kome lɛ nɔŋŋ mli aba. Kɛ wɔmiisɔmɔ Yehowa lɛ, no lɛ mɛi krokomɛi yɛ hegbɛ akɛ amɛkpaa wɔ gbɛ akɛ wɔɔwie nibii ni ja shi jeee wiemɔi ni ehiii. No hewɔ lɛ nyɛhaa wɔkpooɔ wiemɔi gbohii ni wɔbɔ mɔdɛŋ wɔwie wiemɔi ni he baaba sɛɛnamɔ aha wɔnanemɛi ni etswa amɛ ema shi yɛ mumɔŋ.—Yakobo 3:9-12.
Jeŋba Kpakpa kɛ Wɔnifeemɔi
15. Mɛni hewɔ ehe hiaa waa akɛ wɔɔkwa kutumpɔo kɛ shishiumɔ nifeemɔi ni wɔkɛ wɔhe aaawo mli lɛ?
15 Akɛni esa akɛ Kristofoi asusumɔ kɛ wiemɔ afee nɔ ni hi loo ekpakpa hewɔ lɛ, wɔnifeemɔi hu? Wɔjeŋba ni aaafee ekpakpa lɛ pɛ nɔ wɔɔtsɔ wɔna Nyɔŋmɔ nɔkpɛlɛmɔ. Nyɔŋmɔ sɔɔlɔ ko nyɛŋ akpoo jeŋba kpakpa, ni ekɛ ehe awo kutumpɔo kɛ shishiumɔ nifeemɔi amli, ni esusu akɛ Nyɔŋmɔ baakpɛlɛ nibii ni tamɔ nɛkɛ nɔ. Abɛi 3:32 kɛɔ akɛ: “Yehowa miihi kutumpɔfo, shi mɛi ni ja ekɛbɔɔ.” Kɛ wɔbuɔ wekukpaa ni ka wɔkɛ Yehowa Nyɔŋmɔ teŋ lɛ waa lɛ, esa akɛ nakai wiemɔi ni kanyaa jwɛŋmɔ lɛ atsi wɔ gbɛ ni wɔkakpaŋ efɔŋ loo wɔfee nɔ ko ni bɛ trɔmɔɔ. Nɔ ni fata nibii kpawo ni ji nihii nii kɛha Yehowa lɛ he ji “tsui ni shwieɔ eyiŋ jwɛŋmɔi fɔji”! (Abɛi 6:16-19) Belɛ nyɛhaa wɔkpooa nifeemɔi ni tamɔ nɛkɛ ni wɔfee nɔ ni ja loo nɔ kpakpa, ni ehe aba sɛɛnamɔ aha wɔnanemɛi gbɔmɛi ni ewo wɔŋwɛi Tsɛ lɛ hiɛ nyam.
16. Mɛni hewɔ esaaa akɛ Kristofoi kɛ amɛhe woɔ osato nifeemɔi amli lɛ?
16 Jeŋba kpakpa ni wɔɔjie lɛ kpo lɛ biɔ ni wɔfee mɛi ni yeɔ anɔkwa. (Hebribii 13:18) Osatofo, ni enifeemɔi kɛ ewiemɔi kpaaa gbee lɛ jeee mɔ ni yɔɔ jeŋba kpakpa. Hela wiemɔ ni atsɔɔ shishi akɛ “osatofo” (hy·po·kri·tes’) lɛ tsɔɔ “mɔ ni haa hetoo” ni etsɔɔ mɔ ni jieɔ mɛi ahiɛtserɛ yɛ shwɛmɔ he hu. Akɛni Hela kɛ Roma shwɛlɔi ni jieɔ mɛi ahiɛtserɛ lɛ woɔ kakamotobi hewɔ lɛ, akɛ wiemɔ nɛɛ tsu nii akɛ nɔ ni akɛtoɔ loo akɛdamɔɔ shi ahaa lakpatoo loo mɔ ni feɔ ehe mɔ ni ejeee. Osatofoi ‘yeee anɔkwa.’ (Okɛ Luka 12:46 ato Mateo 24:50, 51 he.) Osatofeemɔ (hy·poʹkri·sis), baanyɛ atsɔɔ yiwalɛ kɛ ŋaatsɔɔ fɔŋ. (Mateo 22:18; Marko 12:15; Luka 20:23) Kwɛ bɔ ni eji mɔbɔ sane kɛ akɛ ŋmɔlɔ, naadɔkɔmɔ, kɛ nifeemɔi ni ji lakpatoo kɛkɛ shishiu gbɔmɔ ni anyɛɔ akɛhe fɔɔ enɔ lɛ! Shi yɛ gbɛ kroko nɔ lɛ, kɛ wɔle akɛ Kristofoi ni anyɛɔ akɛ he fɔɔ amɛnɔ lɛ wɔkɛ amɛ yeɔ lɛ, wɔtsui nyaa. Ni Nyɔŋmɔ jɔɔ wɔ akɛni wɔjeŋba hi ni wɔfeee osato hu lɛ hewɔ. Enɔkpɛlɛmɔ hiɔ mɛi ni jieɔ “nyɛmimɛi ahedɔɔ ni apasa [osato] bɛ mli” kpo, ni amɛyɔɔ “hemɔkɛyeli ni apasa [osato] ko bɛ mli” hu lɛ anɔ.—1 Petro 1:22; 1 Timoteo 1:5.
Jeŋba Kpakpa Ji Ejurɔfeemɔ ni Tsuɔ Nii
17, 18. Te wɔkɛ mɛi krokomɛi baaye aha tɛŋŋ, yɛ be mli ni wɔjieɔ mumɔ lɛ yibii ni ji ejurɔfeemɔ kpo lɛ?
17 Kɛ wɔkɛ jeŋba kpakpa fata wɔhemɔkɛyeli he lɛ, wɔbaabɔ mɔdɛŋ ni wɔtsĩ wɔhe naa kɛjɛ nibii ni Nyɔŋmɔ ekpɛlɛɛɛ nɔ lɛ ahesusumɔ, amɛhe wiemɔ, kɛ amɛfeemɔ he. Shi Kristofoi ajeŋba kpakpa kpojiemɔ hu biɔ ni wɔfee ejurɔ be fɛɛ be. Yɛ anɔkwale mli lɛ, atsɔɔ jeŋba kpakpa mli akɛ ejurɔfeemɔ. Ni ejurɔfeemɔ ji Yehowa mumɔ krɔŋkrɔŋ lɛ yibii lɛ eko, jeee nɔ ní jɛ adesa mɔdɛŋbɔɔ kɛkɛ mli ba. (Galatabii 5: 22, 23) Yɛ be mli ni wɔjieɔ mumɔ lɛ yibii ni ji ejurɔfeemɔ kpo lɛ, ebaakanya wɔ ni wɔjwɛŋ mɛi krokomɛi ahe ekpakpa, ni wɔjie amɛ yi yɛ amɛsui kpakpai lɛ ahewɔ yɛ emuu ni amɛyeee lɛ fɛɛ sɛɛ. Ani amɛkɛ afii pii esɔmɔ Yehowa yɛ anɔkwayeli mli? Belɛ esa akɛ wɔjie bulɛ kpo wɔtsɔɔ amɛ ni wɔwie amɛ kɛ sɔɔmɔ ni amɛkɛha Nyɔŋmɔ lɛ he ekpakpa. Wɔ ŋwɛi Tsɛ lɛ kadiɔ suɔmɔ ni amɛjieɔ lɛ kpo yɛ egbɛi lɛ he lɛ kɛ amɛhemɔkɛyeli nitsumɔi kpakpai lɛ, ni nakai esa akɛ wɔ hu wɔfee.—Nehemia 13:31b; Hebribii 6:10.
18 Jeŋba kpakpa haa wɔtoɔ wɔtsui shi, wɔnuɔ mɛi ashishi, wɔnaa mɔbɔ. Kɛ naanyo Yehowa jalɔ ko ehao waa loo eyɛ nɔnyɛɛ shishi lɛ, wɔkɛ mlijɔlɛ baawie wɔtsɔɔ lɛ ni wɔbɔ mɔdɛŋ wɔshɛje emii, taakɛ wɔŋwɛi Tsɛ ni yɔɔ suɔmɔ lɛ shɛjeɔ wɔmii lɛ. (2 Korintobii 1:3, 4; 1 Tesalonikabii 5:14) Wɔnuɔ he wɔhaa mɛi ni yeɔ awerɛho, ekolɛ yɛ suɔlɔ ko gbele hewɔ lɛ. Kɛ wɔbaanyɛ wɔfee nɔ ko ni wɔkɛba amanehulu shi lɛ, wɔbaafee, ejaakɛ mumɔ kpakpa kanyaa nifeemɔ ni suɔmɔ kɛ mlihilɛ yɔɔ mli.
19. Eka shi faŋŋ akɛ te mɛi krokomɛi kɛ wɔ baaye aha tɛŋŋ kɛ wɔbaa wɔjeŋ jogbaŋŋ yɛ wɔsusumɔ, wiemɔ, kɛ nifeemɔ mli?
19 Taakɛ wɔjɔɔ Yehowa kɛtsɔɔ ehe ekpakpa ni wɔwieɔ lɛ nɔ lɛ, eeenyɛ eba akɛ mɛi krokomɛi hu miijɔɔ wɔ, kɛ wɔja yɛ susumɔ, wiemɔ, kɛ nifeemɔ mli. (Lala 145:10) Abɛ ko ni nilee yɔɔ mli kɛɔ akɛ: “Jɔɔmɔ aaaba jalɔ yiteŋ, shi mɛi fɔji lɛ, amimyeli sɔŋŋ aaamɔ amɛnaabu.” (Abɛi 10:6) Mɔ fɔŋ ni yi wa lɛ bɛ jeŋba kpakpa ni baaha mɛi krokomɛi asumɔ esane. Nɔ ni eduɔ lɛ, no nɔŋŋ ekpaa, ejaakɛ gbɔmɛi nyɛŋ ajɛ anɔkwayeli mli amɛjɔɔ lɛ kɛtsɔ ehe ekpakpa ni amɛaawie nɔ. (Galatabii 6:7) Kwɛ bɔ ni ehi jogbaŋŋ kɛha mɛi ni susuɔ nii ahe, amɛwieɔ, ni amɛfeɔ nii yɛ gbɛi kpakpai anɔ akɛ Yehowa tsuji lɛ! Mɛi krokomɛi naa amɛhe suɔmɔ, hekɛnɔfɔɔ, kɛ bulɛ, ni enɛ kanyaa amɛ koni amɛjɔɔ amɛ ni amɛwie amɛhe ekpakpa. Agbɛnɛ nɔ ni jɛɔ amɛjeŋba kpakpa ni Nyɔŋmɔ gbeyeishemɔ yɔɔ mli lɛ mli baa ji Yehowa jɔɔmɔ ni nɔ bɛ lɛ.—Abɛi 10:22.
20. Mɛɛ hewalɛ kpakpa susumɔi, wiemɔ, kɛ nifeemɔi ni hi baanyɛ ana yɛ Yehowa webii asafo lɛ nɔ?
20 Susumɔi, wiemɔi kɛ nifeemɔi kpakpai he baa sɛɛnamɔ kɛ̃ kɛhaa Yehowa webii asafo lɛ. Kɛ nanemɛi heyelilɔi yɛ susumɔi ni tsɔɔ hedɔɔ kɛ bulɛ kɛha amɛhe lɛ, nyɛmimɛi asuɔmɔ shwereɔ babaoo yɛ amɛteŋ. (Yohane 13:34, 35) Wiemɔ kpakpa, ni kafomɔ diɛŋtsɛ kɛ hewalɛwoo fata he lɛ haa ekomefeemɔ kɛ gbeekpamɔ ni miishɛɛ yɔɔ mli hiɔ shi. (Lala 133:1-3) Ni nifeemɔi kpakpai ni miishɛɛ yɔɔ mli kanyaa mɛi krokomɛi koni amɛ hu amɛto he nakai nɔŋŋ. Nɔ ni fe fɛɛ Iɛ, nɔ ni jɛɔ Kristofoi ajeŋba kɛ nitsumɔ mli baa ji wɔŋwɛi Tsɛ Yehowa ni yɔɔ jeŋba kpakpa lɛ nɔkpɛlɛmɔ kɛ jɔɔmɔ. No hewɔ lɛ, eba akɛ wɔkɛaafee oti ni ma wɔhiɛ akɛ wɔɔkpɛlɛ Nyɔŋmɔ shiwooi ni jara wawai lɛ anɔ kɛtsɔ emli hemɔkɛyeli namɔ nɔ. Ni yɛ anɔkwale mli lɛ, wɔtsɔ gbɛ fɛɛ gbɛ nɔ wɔbɔ mɔdɛŋ loo wɔmia wɔhiɛ waa ni wɔkɛ jeŋba kpakpa afata wɔhemɔkɛyeli he.
Mɛni Ji Ohetooi?
◻ Te obaatsɔɔ “jeŋba kpakpa” mli oha tɛŋŋ, ni mɛni hewɔ gbɔmɛi ni yee emuu baanyɛ afee mɛi ni yɔɔ jeŋba kpakpa?
◻ Jeŋba kpakpa biɔ mɛɛ susumɔi nɛkɛ?
◻ Te esa akɛ jeŋba kpakpa asa wɔwiemɔ he eha tɛŋŋ?
◻ Mɛɛ hewalɛ esa akɛ jeŋba kpakpa ana yɛ wɔnifeemɔi anɔ?
◻ Mɛni ji jeŋba kpakpa ni mɔ ko yɔɔ lɛ mli sɛɛnamɔi ekomɛi?
[Mfoniri ni yɔɔ baafa 21]
Akɛni nu ŋma kɛ nu ni jooɔ nyɛŋ aba yɛ nu bu kome mli hewɔ lɛ, mɛi krokomɛi kpaa Yehowa webii agbɛ yɛ gbɛ ni ja nɔ akɛ amɛaawie wiemɔi ni hi pɛ