‘Ná Oblahiiaŋ Ŋa Lɛ He Miishɛɛ’
‘Ná oblahiiaŋ ŋa lɛ he miishɛɛ. Mibi, mɛɛba mɔ kroko ŋa haa oyitsoŋ kɔneɔo?’—ABƐI 5:18, 20.
1, 2. Mɛni hewɔ abaanyɛ akɛɛ akɛ bɔlɛnamɔ ni yaa nɔ yɛ wu kɛ eŋa teŋ lɛ ji jɔɔmɔ lɛ?
BIBLIA lɛ wieɔ bɔlɛnamɔ saji ahe. Abɛi 5:18, 19 kaneɔ akɛ: “Ha onubu lɛ atsɔ nɔ ni ajɔɔ, ni ona oblahiiaŋ ŋa lɛ he miishɛɛ. Ha ni efee tamɔ ofrote ni he yɔɔ fɛo kɛ yoo ni he yɔɔ akɔnɔ; ekpokuai lɛ asa ohiɛ be fɛɛ be, ni esuɔmɔ lɛ aha oyitsoŋ akɔneo daa!”
2 ‘Nubu’ ni awieɔ he yɛ biɛ lɛ damɔ shi kɛha mɔ ni akɛgbeɔ bɔlɛnamɔ he akɔnɔ. Eji jɔɔmɔ kɛ shishinumɔ akɛ, bɔlɛ ni gbalashihilɛ mli hefatalɔi náa kɛ miishɛɛ ni amɛnáa yɛ mli lɛ ji Nyɔŋmɔ dɛŋ nikeenii. Shi kɛlɛ, esa akɛ bɔlɛnamɔ nɛɛ aya nɔ yɛ mɛi ni ebote gbalashihilɛ mli akɛ wu kɛ ŋa lɛ pɛ ateŋ. Enɛ ha mɔ ni ŋma Abɛi a-Wolo lɛ ni ji Maŋtsɛ Salomo ni hi blema Israel lɛ bi akɛ: “Mibi, mɛɛba mɔ kroko ŋa haa oyitsoŋ kɔneɔo, ni olooɔ yoo mɔkpɔŋ atuu nɛɛ?”—Abɛi 5:20.
3. (a) Mɛni eba gbalashihilɛi babaoo anɔ ni yɔɔ dɔlɛ? (b) Te Nyɔŋmɔ buɔ gbalamlikuu ehaa tɛŋŋ?
3 Gbi ni nuu kɛ yoo boteɔ gbalashihilɛ mli lɛ, amɛkãmɔɔ amɛhe kitã ko ni yɔɔ hiɛdɔɔ akɛ amɛbaasumɔ amɛhe, ni ákɛ amɛteŋ mɔ ko ejeŋ enaanyo sɛɛ ni ekɛ mɔ kroko ayaná bɔlɛ. Kɛlɛ, gbalamlikuu eha gbalashihilɛi babaoo efite. Anɔkwa sane ji akɛ, beni niiamlipɛilɔ ko epɛi gbalashihilɛi ni fa fe 24 mli sɛɛ lɛ, emu sane naa akɛ “ŋamɛi 100 mlijaa 25 kɛ wumɛi 100 mlijaa 44 eje amɛhefatalɔi asɛɛ amɛkɛ mɛi krokomɛi ená bɔlɛ.” Bɔfo Paulo kɛɛ akɛ: “Nyɛkahaa alakaa nyɛ! Ajwamaŋbɔlɔi loo wɔŋjalɔi loo gbalaŋkulɔi loo mɛi ni kɛ amɛ diɛŋtsɛ amɛheloo feɔ yakayaka nii loo hii ni kɛ hii feɔ yakayaka nii . . . anine shɛŋ Nyɔŋmɔ maŋtsɛyeli lɛ nɔ kwraa.” (1 Korintobii 6:9, 10) Sane lɛ yɛ faŋŋ. Nyɔŋmɔ buɔ gbalamlikuu akɛ esha ni yɔɔ hiɛdɔɔ, ni esa akɛ anɔkwa Kristofoi akwɛ amɛhe nɔ jogbaŋŋ ni amɛkaje amɛhefatalɔi asɛɛ amɛkɛ mɛi krokomɛi yaná bɔlɛ. Mɛni baaye abua wɔ koni ‘wɔwo gbãla hiɛ nyam, ni wɔkabule gbãla saa’?—Hebribii 13:4.
Ohiɛ Ahi Ohe Nɔ yɛ Tsui ni Eyi Tɔ Kɛ Kutumpɔo lɛ He
4. Mɛɛ gbɛ nɔ Kristofonyo ni ebote gbalashihilɛ mli baanyɛ ená suɔlɔ kroko yɛ ehefatalɔ lɛ sɛɛ ní lɛ diɛŋtsɛ lɛ eyɔseee?
4 Gbɔmɛi ni yɔɔ jeŋ ni jeŋba egbee shi yɛ mli nɛɛ mli lɛ ateŋ mɛi babaoo “[a]hiŋmɛi amli eyimɔ obɔbɔ kɛ gbalafitemɔ, ni amɛhiɛ ejɔɔɔ kɛ eshafeemɔ.” (2 Petro 2:14) Amɛjeɔ gbɛ amɛjeɔ amɛhefatalɔi asɛɛ ni amɛkɛ mɛi krokomɛi yanáa bɔlɛ. Yɛ maji komɛi anɔ lɛ, nitsulɔi ni yɔɔ jɛmɛ lɛ ateŋ mɛi babaoo ji yei, ni akɛni amɛfutuɔ hii kɛtsuɔ nii hewɔ lɛ, no eha nuu kɛ yoo teŋ suɔmɔ nifeemɔi ni bɛ hiŋmɛi nɔ ní yaa nɔ yɛ nitsumɔhei lɛ efa babaoo. No sɛɛ lɛ, sane ni atsɔɔ Internet lɛ nɔ akɛ mɛi krokomɛi gbaa lɛ hu eha nibii efee mlɛo aahu akɛ mɛi po ni abuɔ akɛ amɛsheɔ gbeyei akɛ amɛaatsi amɛbɛŋkɛ mɛi ni amɛkɛ amɛ agba sane lɛ náa suɔlɔi amɛkɛgbaa sane yɛ Internet lɛ nɔ. Mɛi ni ebote gbalashihilɛ mli lɛ ateŋ mɛi babaoo kɛ amɛyitso yawoɔ naanyobɔɔ ni yɔɔ oshara tamɔ nɛkɛ mli ní amɛyɔseee.
5, 6. Te fee tɛŋŋ Kristofonyo yoo ko kɛ eyitso yawo nifeemɔ ko ni yɔɔ oshara mli, ni mɛni wɔkaseɔ kɛjɛɔ mli?
5 Susumɔ bɔ ni fee ni Kristofonyo ko ni wɔbaatsɛ́ lɛ Mary lɛ kɛ ehe yawo nifeemɔ ko ni shwɛ sharao ni eha ekɛ ehe awo jeŋba shara mli lɛ he okwɛ. No mli lɛ, ewu ni ejeee Yehowa Odasefonyo lɛ edɔɔɔ ehe ekpakpa ko. Mary tsɔɔ mli akɛ, be ko lɛ, ekɛ ewu nanemɛi nitsulɔi lɛ ateŋ mɔ kome kpe. Nuu lɛ baa ejeŋ jogbaŋŋ, ni sɛɛ mli po lɛ, ejie miishɛɛ kpo yɛ nibii ni Mary heɔ eyeɔ lɛ ahe. Mary kɛɛ akɛ: “No mli lɛ, ekɛ mi yɛ jogbaŋŋ ni srɔto agbo yɛ ekɛ miwu teŋ.” Eyeee be ko ni Mary kɛ ewu naanyo nitsulɔ lɛ ná suɔmɔ amɛha amɛhe. Mary taa sane naa akɛ: “Mifiteko gbãla, ni nuu lɛ hu yɛ Biblia lɛ he miishɛɛ. Ekolɛ manyɛ maye mabua lɛ.”
6 Dani eeebalɛ akɛ Mary kɛ nuu ni ená suɔmɔ eha lɛ nɛɛ aaafite gbãla lɛ, ehɛle shi yɛ gbɛ ni ekɔ lɛ he. (Galatabii 5:19-21; Efesobii 4:19) Ehenilee bɔi nitsumɔ ni efee tsakemɔi fɛɛ ni sa. Mary niiashikpamɔ lɛ maa nɔ mi akɛ “tsui yɔɔ nɛɛ, eyi tɔ kɛ kutumpɔo fe nii fɛɛ, ni esane ehiii kwraa.” (Yeremia 17:9) Biblia lɛ woɔ wɔ ŋaa akɛ: “Ohiɛ akã otsui he fe nii fɛɛ.” (Abɛi 4:23) Mɛɛ gbɛ nɔ wɔɔtsɔ wɔfee nakai?
‘Hiɛtɛ̃lɔ Teeɔ Ehe’
7. Kɛ́ ooye oobua mɔ ko ni kɛ naagbai miikpe yɛ egbalashihilɛ mli lɛ, mɛɛ Ŋmalɛ naa ŋaawoo kɛ nitsumɔ baabu ohe?
7 Bɔfo Paulo ŋma akɛ: “Mɔ ni susuɔ akɛ edamɔ shi lɛ akwɛ ehe ni ahi koni ekagbee shi.” (1 Korintobii 10:12) Ni Abɛi 22:3 lɛ kɛɔ akɛ: “Hiɛtɛ̃lɔ naa efɔŋ ní baa, ni eteeɔ ehe.” Kaaná hekɛnɔfɔɔ yɛ omli fe nine ni okɛɛ akɛ: ‘Milɛ, nɔ ko nyɛŋ aba minɔ,’ shi yɛ no najiaŋ lɛ, nilee yɛ mli akɛ oootsɔ hiɛ osusu shihilɛi komɛi ni baanyɛ ekɛ naagbai aba lɛ ahe. Ákɛ nɔkwɛmɔnɔ lɛ, kɛ́ mɔ ko ni esoro ebɔɔ su kɛ naagbai ni haoɔ mɔ miikpe yɛ egbalashihilɛ mli lɛ, kaafee ohe mɔ pɛ ni enyɛɔ ekɛ lɛ yeɔ eyitsoŋ sane. (Abɛi 11:14) Ha nakai ashimashi lɛ ale akɛ mɛi ni ehi jogbaŋŋ ákɛ ekɛ amɛ aaasusu egbalashihilɛ mli naagbai lɛ ahe ji ehefatalɔ, kɛ́ nuu ni lɛ, hii Kristofoi ni edara yɛ mumɔŋ, ni kɛ́ yoo ni lɛ, yei Kristofoi ni edara yɛ mumɔŋ ní taoɔ egbalashihilɛ lɛ ekpakpa, kɛ agbɛnɛ hu asafoŋ onukpai lɛ. (Tito 2:3, 4) Asafoŋ onukpai ni yɔɔ Yehowa Odasefoi asafoi lɛ amli lɛ feɔ nɔkwɛmɔnɔ kpakpa yɛ enɛ gbɛfaŋ. Kɛ́ ehe bahia koni asafoŋ onukpa ko kɛ Kristofonyo yoo ko asusu nɔ ko he amɛyi enyɔ lɛ pɛ lɛ, ekɛ lɛ taa he ni mɛi baanyɛ ana amɛ—tamɔ Maŋtsɛyeli Asa lɛ nɔ.
8. Mɛni ehe hiaa ni wɔkwɛ wɔhe nɔ jogbaŋŋ yɛ he yɛ wɔnitsumɔhei lɛ?
8 Kɛ́ oyɛ nitsumɔhe aloo he kroko lɛ, kwɛmɔ jogbaŋŋ yɛ shihilɛi ni baanyɛ aha okɛ mɔ ko abɔ gbagbalii lɛ ahe. Ákɛ nɔkwɛmɔnɔ lɛ, kɛ́ nuu ji bo ni otee nɔ okɛ yoo tsu nii aloo yoo ji bo ni otee nɔ okɛ nuu tsu nii nyɛyi enyɔ lɛ pɛ beni akpa nitsumɔ sɛɛ lɛ, no baanyɛ ekɛ bo aya kaa mli. Ákɛ nuu loo yoo ni ebote gbalashihilɛ mli lɛ, esa akɛ okɛ owiemɔ kɛ onifeemɔ fɛɛ atsɔɔ faŋŋ akɛ oyɛ hefatalɔ. Ákɛ mɔ ko ni etu ehe eha Nyɔŋmɔjamɔ lɛ, ekã shi faŋŋ akɛ osumɔŋ ni ogbala mɛi ajwɛŋmɔ kɛba onɔ bɔ ni esaaa kɛtsɔ hii loo yei anɔ ni obaanyiɛ aloo kɛtsɔ atadewoo kɛ hesaamɔi komɛi ni bɛ hiŋmɛi nɔ lɛ anɔ. (1 Timoteo 4:8; 6:11; 1 Petro 3:3, 4) Owu loo oŋa kɛ obii lɛ afoto ní okɛ eko aaayakpɛtɛ he ni otsuɔ nii yɛ lɛ baakai bo kɛ mɛi krokomɛi akɛ oweku lɛ kã otsui nɔ. Tswaa ofai shi akɛ otseŋ ohiɛ ohaŋ mɛi ni kɛ suɔmɔ wiemɔi woɔ mɔ yiteŋ mulu bɔni afee ni mɔ lɛ aná suɔmɔ kɛha amɛ lɛ.—Hiob 31:1.
“Okɛ Ŋa ni Osumɔɔ lɛ Ahi Shi yɛ Miishɛɛ Mli”
9. Mɛɛ nifeemɔi baanyɛ aha wu loo ŋa aná suɔmɔ eha mɔ kroko ní kɛ́ enaaa mɔ lɛ ehiii lɛ wɔ̀ɔ?
9 Ní wɔɔha wɔhiɛ akã wɔtsui lɛ he lɛ biɔ babaoo fe wɔhe ni wɔɔtsi kɛjɛ shihilɛi ni yɔɔ oshara lɛ ahe kɛkɛ. Kɛ́ wu loo ŋa ná suɔmɔ eha mɔ ko ni jeee ehefatalɔ lɛ, no baanyɛ atsɔɔ akɛ ekɛ ehefatalɔ lɛ fɛɛ susuuu amɛhiamɔ nii ahe. Ekolɛ wu lɛ hiɔ shi ni efooo eŋa daaŋ aloo eeenyɛ eba akɛ be fɛɛ be lɛ, ŋa lɛ miiwie ewu hiɛ. Nibii kã he eeya nɔ nɛkɛ kɛkɛ lɛ, wu lɛ loo ŋa lɛ kɛ mɔ ko ekpe—yɛ enitsumɔhe loo yɛ Kristofoi asafo lɛ po mli—ni hiɛ sui kpakpai ni ehefatalɔ lɛ bɛ eko. Oona kɛ onaaa lɛ, atsɔmɔ nanemɛi, ní kɛ́ mɔ ko enaaa enaanyo lɛ, enyɛɛɛ ewɔ̀. Bɔ ni nibii baa lɛ ehaa, ní eko nyiɛ eko sɛɛ lɛ haa anaa akɛ nɔ ni Biblia lɛ wie lɛ ji anɔkwale. Ekɛɛ akɛ: “Mɔ fɛɛ mɔ lɛ, lɛ diɛŋtsɛ ekɔnɔ ni gbalaa lɛ ni lakaa lɛ lɛ kaa lɛ.”—Yakobo 1:14.
10. Mɛɛ gbɛ nɔ wumɛi kɛ ŋamɛi aaatsɔ amɛha suɔmɔ ni mli wa ahi amɛteŋ?
10 Esaaa akɛ wumɛi kɛ ŋamɛi jeɔ amɛhefatalɔi asɛɛ amɛyataoɔ mɛi krokomɛi kɛgbeɔ amɛkɔnɔ—kɛ́ akɔnɔ nɛɛ kɔɔ mɔ ko ni baadɔ amɛhe, naanyo ni amɛaaná, aloo mɔ ko ni baaye ebua amɛ kɛ́ amɛyaje shihilɛi ni mli wawai amli lɛ he—yɛ no najiaŋ lɛ, esa akɛ amɛbɔ mɔdɛŋ amɛha suɔmɔ ni mli wa ahi amɛkɛ amɛhefatalɔi lɛ ateŋ. Belɛ, nyɛnáa be nyɛhaa nyɛhe ni nyɛfea nii kutuu, koni nyɛkɛ nyɛhe abɔ gbagbalii. Susumɔ nɔ ni ha oná suɔmɔ oha ohefatalɔ lɛ he. Kaimɔ bɔ ni no mli lɛ odɔɔ nuu loo yoo ni batsɔ ohefatalɔ lɛ he ohaa lɛ. Susumɔ nibii kpakpai ni nyɛnáa mli ŋɔɔmɔ lɛ ahe. Tsĩi naagba lɛ tã otsɔɔ Nyɔŋmɔ yɛ sɔlemɔ mli. Lalatsɛ David kpa Yehowa fai akɛ: “Nyɔŋmɔ, bɔɔ tsui ni he tse oha mi, ni ofee mumɔ ni fiɔ shi ehee yɛ mimli!” (Lala 51:12) Tswaa ofai shi koni ‘okɛ oŋa ni osumɔɔ lɛ lɛ ahi shi yɛ miishɛɛ mli, yɛ owala gbii ni Nyɔŋmɔ ehão yɛ hulu shishi nɛɛ.’—Jajelɔ 9:9.
11. Nilee, ŋaalee, kɛ sanesɛɛkɔmɔ tswaa gbalashihilɛ emaa shi yɛ mɛɛ gbɛ nɔ?
11 Anyɛŋ aku hiɛ ashwie bɔ ni nilee, ŋaalee, kɛ sanesɛɛkɔmɔ tswaa gbalashihilɛ ehaa lɛ nɔ. Abɛi 24:3, 4 kɛɔ akɛ: “Nilee [loo “ŋaalee,” NW] akɛmaa tsũ, ni sanesɛɛkɔmɔ akɛhaa edamɔɔ shi, ni nilee akɛhaa piaiaŋ yimɔɔ kɛ nii ni jara wa ni yɔɔ fɛo fɛɛ.” Sui tamɔ suɔmɔ, anɔkwayeli, Nyɔŋmɔ gbeyeishemɔ, kɛ hemɔkɛyeli fata nibii ni akɛwoɔ we obɔ̃ lɛ ahe. Sui nɛɛ akpojiemɔ biɔ ni mɔ aná Nyɔŋmɔ he nilee. No hewɔ lɛ, esa akɛ gbalashihilɛ mli hefatalɔi afee mɛi ni kɛ hiɛdɔɔ kaseɔ Biblia lɛ. Ni te ŋaalee kɛ sanesɛɛkɔmɔ he hiaa ha tɛŋŋ? Ebiɔ ŋaalee ni ji nyɛmɔ ni akɛtsuɔ nibii ni akase kɛjɛ Ŋmalɛi lɛ amli lɛ ahe nii dani mɔ anyɛ etsu naagbai srɔtoi ni ekɛkpeɔ daa lɛ ahe nii. Wu loo ŋa ni kɔɔ sane sɛɛ lɛ nyɛɔ enuɔ ehefatalɔ lɛ susumɔi kɛ bɔ ni enuɔ nii ahe ehaa lɛ shishi. (Abɛi 20:5) Yehowa tsɔ Salomo nɔ ekɛɛ akɛ: “Mibi, bo minilee lɛ toi, ni oka otoi oha misanesɛɛkɔmɔ lɛ.”—Abɛi 5:1.
Kɛ́ akɛ “Amanehulu” Kpe
12. Mɛni hewɔ ebɛ naakpɛɛ akɛ gbalashihilɛ mli hefatalɔi kɛ naagbai kpeɔ lɛ?
12 Gbalashihilɛ ko bɛ ni naagba bɛ mli. Biblia lɛ po kɛɛ wumɛi kɛ ŋamɛi baana “heloo gbɛfaŋ amanehulu.” (1 Korintobii 7:28) Yeyeeyefeemɔi, hela, yiwaa, kɛ nibii krokomɛi ni tamɔ enɛɛmɛi baanyɛ ekɛ naagba aba gbalashihilɛ mli. Kɛlɛ, kɛ́ naagbai te shi lɛ, esa akɛ nyɛkɛ ekomefeemɔ atao amɛnaa tsabaa ákɛ hefatalɔi ni yeɔ amɛhe anɔkwa, ní taoɔ amɛsa Yehowa hiɛ.
13. Mɛɛ gbɛ nɔ wu kɛ ŋa aaatsɔ apɛi amɛmli amɛkwɛ?
13 Ni kɛ́ naagba ni ete shi yɛ gbalashihilɛ lɛ mli lɛ jɛ bɔ ni wu kɛ ŋa lɛ kɛ amɛhe yeɔ amɛhaa lɛ hu? Ebiɔ mɔdɛŋbɔɔ dani aná naagba ni tamɔ nakai lɛ naa tsabaa. Ákɛ nɔkwɛmɔnɔ lɛ, ekolɛ be ni eho lɛ, kɛ́ fee lɛ wiemɔi shai komɛi jeɔ amɛnaa, shi agbɛnɛ lɛ, ebatsɔ amɛsu. (Abɛi 12:18) Taakɛ wɔsusu he yɛ nikasemɔ ni tsɔ hiɛ lɛ mli lɛ, enɛ baanyɛ afite nii babaoo. Biblia mli abɛ ko kɛɔ akɛ: “Faŋ nɔ ni oyahi ŋa mli fe nɔ ni okɛ yoo hebéilɔ kɛ mlila tsɛ aaahi shi.” (Abɛi 21:19) Kɛ́ oji ŋa ní kɛ naagba ni tamɔ nakai miikpe yɛ egbalashihilɛ mli lɛ, no lɛ bi ohe akɛ, ‘Ani minifeemɔ haa ewaa kɛhaa miwu akɛ eeebɛŋkɛ mi?’ Biblia lɛ kɛɔ wumɛi akɛ: “Nyɛsumɔa nyɛŋamɛi, ni nyɛmli akajoa yɛ amɛnɔ.” (Kolosebii 3:19) Kɛ́ wu ji bo lɛ, bi ohe akɛ, ‘Ani miŋa he ni midɔɔɔ hewɔ enuɔ he akɛ eyatao miishɛjemɔ yɛ he kroko lɛ?’ Eji anɔkwale akɛ, mɔ ko nyɛŋ ekɛ ehe ayawo jeŋba shara mli koni ekɛ saji ni tamɔ enɛɛmɛi ajie enaa ni abu lɛ bem. Kɛlɛ, esa akɛ anɔkwale ni eji akɛ oshara ni tamɔ nakai baanyɛ aba lɛ aha nyɛná be kɛsusu naagbai ni nyɛkɛkpeɔ lɛ ahe yɛ faŋŋ mli.
14, 15. Mɛni hewɔ gbalashihilɛ mli hefatalɔ sɛɛ ní aaaje aná suɔmɔ aha mɔ kroko lɛ efoŋ naagbai ni akɛkpeɔ yɛ gbalashihilɛ mli lɛ sɛɛ?
14 Kɛ́ wu loo ŋa kɛ naagbai miikpe yɛ egbalashihilɛ mli, ni eje ehefatalɔ sɛɛ eyaná suɔmɔ eha mɔ kroko lɛ, no efoŋ naagbai lɛ asɛɛ. Nɛgbɛ gbɛ ni tamɔ nɛkɛ ni aaakɔ lɛ kɛ mɔ baaya? Ani no baaha mɔ aná hefatalɔ hee kɛ gbalashihilɛ kpakpa? Mɛi komɛi baasusu nakai. Amɛbaataa sane naa akɛ, ‘Mɔ nɛɛ yɛ sui fɛɛ ni mitaoɔ yɛ mihefatalɔ he lɛ eko.’ Shi susumɔ ni tamɔ nɛkɛ lɛ ejaaa, ejaakɛ mɔ fɛɛ mɔ ni eeeshi ewu loo eŋa—aloo eeewo bo hewalɛ ni ofee nakai—lɛ ebuuu gbalashihilɛ akɛ eyɛ krɔŋkrɔŋ. Nilee bɛ mli akɛ oookpa gbɛ akɛ, kɛ́ okɛ nakai mɔ ni oná suɔmɔ oha lɛ lɛ yahi shi lɛ, nyɛgbalashihilɛ lɛ baahi.
15 Mary ni wɔtsĩ etã mra mli lɛ kɛ hiɛdɔɔ susu naagbai ni baanyɛ ajɛ gbɛ ni ekɔ lɛ mli kɛba, kɛ agbɛnɛ hu bɔ ni no baanyɛ aha lɛ loo mɔ kroko akaná Nyɔŋmɔ hiɛ duromɔ lɛ ahe. (Galatabii 6:7) Ewie akɛ: “Beni mibɔi suɔmɔ ni miná miha miwu naanyo nitsulɔ lɛ he susumɔ lɛ, miyɔse akɛ gbɛ ni mikɔ lɛ haŋ nuu nɛɛ aná hegbɛ ebale anɔkwale lɛ. Gbɛ fɔŋ ní mɔ aaakɔ lɛ baasa mɛi fɛɛ ni le he eko lɛ ahe yɛ gbɛ fɔŋ nɔ, ni ebaatɔ̃tɔ̃ mɛi krokomɛi hu anane!”—2 Korintobii 6:3.
Hewalɛwoo Nɔ̃ ni Fe Fɛɛ
16. Mɛni ji naagbai ni jɛɔ jeŋba shara mli kɛbaa lɛ ekomɛi?
16 Biblia lɛ bɔɔ kɔkɔ akɛ: “Mɔ kroko ŋa naabu tsereɔ wò, ni edaaŋ shãmɔɔ fe mu; shi enaagbee jooɔ tamɔ taatso, enaa ba tamɔ klante kɛ enaa ŋta.” (Abɛi 5:3, 4) Nibii ni jɛɔ jeŋba shara mli kɛbaa lɛ dɔɔ mɔ, ni ebaanyɛ egbe mɔ hu. Naagbai nɛɛ ekomɛi ji henilee ni haoɔ mɔ, bɔlɛnamɔ mli tsɛŋemɔ helai, kɛ basaa ni hefatalɔ ni je ewu loo eŋa sɛɛ lɛ feɔ. Yɛ anɔkwale mli lɛ, enɛ hewɔ esaaa akɛ mɔ kɔɔ gbɛ ko ni no baaha eje ewu loo eŋa sɛɛ.
17. Mɛni ji nɔ̃ titri hewɔ ni esaaa akɛ mɔ jeɔ ewu loo eŋa sɛɛ ekɛ mɔ kroko yanáa bɔlɛ lɛ?
17 Nɔ̃ titri hewɔ ni wu loo ŋa sɛɛ ní ajeɔ akɛ mɔ kroko yanáa bɔlɛ lɛ ji tɔmɔ ji akɛ, Yehowa ni ji Mɔ ni to gbalashihilɛ lɛ shishi ní eduro adesai nyɛmɔ ni akɛnáa bɔlɛ lɛ buɔ nifeemɔ nɛɛ fɔ́. Etsɔ gbalɔ Maleaki nɔ ekɛɛ akɛ: “Matsi mabɛŋkɛ ní makojo, ni matsɔ odasefonyo ní he yɔɔ oya mashi . . . gbalafitelɔi.” (Maleaki 3:5) Beni Abɛi 5:21 lɛ wieɔ nibii ni Yehowa naa lɛ ahe lɛ, ekɛɛ akɛ: “Mɔ fɛɛ mɔ gbɛ̀i jwere Yehowa hiɛ, ni ejajeɔ etempɔŋi lɛ fɛɛ pɛpɛɛpɛ.” Hɛɛ, “ateee bɔɔ nɔ ko yɛ ehiɛ, shi nibii fɛɛ yɛ faŋŋ ni agbele nɔ yɛ lɛ mɔ ni wɔkɛyɔɔ sane lɛ hiŋmɛiiaŋ.” (Hebribii 4:13) No hewɔ lɛ, le ni wɔle akɛ jeŋba shara fɛɛ jeŋba shara ni wɔkɛ wɔhe aaawo mli lɛ baafite wekukpãa ni kã wɔ kɛ Yehowa teŋ lɛ bafeɔ nɔ ni woɔ wɔ hewalɛ fe fɛɛ koni wɔkaje wɔŋamɛi loo wɔwumɛi asɛɛ wɔkɛ mɛi krokomɛi yaná bɔlɛ, ekɔɔɔ he eko bɔ ni mɔ ko naŋ ale aloo bɔ ni nɔ ni baajɛ mli kɛba lɛ yeŋ wɔ aloo mɛi krokomɛi awui.
18, 19. Mɛni wɔkaseɔ kɛjɛɔ Yosef kɛ Potifar ŋa lɛ sane lɛ mli?
18 Yosef ni ji blematsɛ Yakob bi lɛ nɔkwɛmɔnɔ lɛ haa wɔnaa akɛ toiŋjɔlɛ ni mɔ sumɔɔ akɛ ehi ekɛ Nyɔŋmɔ teŋ lɛ ji nɔ ko ni woɔ mɔ hewalɛ waa. Akɛni Yosef hiɛ ba nyam yɛ Potifar ni ji Farao piafonyo lɛ hiɛ hewɔ lɛ, Potifar ha lɛ hegbɛ wulu ko yɛ ewe lɛ. Potifar ŋa lɛ na akɛ Yosef he “yɛ fɛo ni ehiɛ hu yɛ fɛo.” Daa lɛ, yoo nɛɛ bɔɔ mɔdɛŋ koni elaka Yosef ni ekɛ lɛ awɔ, shi eyeee omanye. Mɛni ha Yosef tseee ehiɛ ehaa yoo nɛɛ? Biblia lɛ kɛɔ wɔ akɛ: ‘Ekpɛlɛɛɛ, ni ekɛɛ enuŋtsɔ ŋa lɛ akɛ: Naa, minuŋtsɔ kamaaa mi nɔ ko nɔ ko, akɛ ja bo kɛkɛ, ejaakɛ bo lɛ eŋa jio. Te aaafee tɛŋŋ ni mafee efɔŋ kpeteŋkpele ni tamɔ nɛkɛ nɛɛ, ni mafee esha mashi Nyɔŋmɔŋ?’—1 Mose 39:1-12.
19 Yosef ní no mli lɛ eboteko gbalashihilɛ mli lɛ tee nɔ ehiɛ jeŋba ni he tse mli kɛtsɔ kpɛlɛmɔ ni eyakpɛlɛɛɛ akɛ ekɛ mɔ kroko ŋa aaaná nɔ ko feemɔ lɛ nɔ. Abɛi 5:15 lɛ kɛɔ hii akɛ: “Nuu bo diɛŋtsɛ onubu mli nu kɛ nu ni jɛɔ bo diɛŋtsɛ obu ni baa lɛ mli lɛ.” Kwɛmɔ ohe nɔ jogbaŋŋ ni okaje oŋa loo owu sɛɛ oná suɔmɔ oha mɔ kroko ni oleee akɛ shihilɛ mli ni okɛ ohe eyawo ji no. Bɔɔ mɔdɛŋ koni oha suɔmɔ ni yɔɔ okɛ ogbalashihilɛ mli hefatalɔ lɛ teŋ lɛ mli awa, ní asaŋ obɔ mɔdɛŋ otsu naagbai fɛɛ ni okɛkpeɔ yɛ ogbalashihilɛ lɛ mli lɛ ahe nii. Hɛɛ, ‘ná oblahiiaŋ ŋa lɛ he miishɛɛ.’—Abɛi 5:18.
Mɛni Okase?
• Mɛɛ gbɛ nɔ Kristofonyo baanyɛ ená suɔmɔ eha mɔ ko ni eleee akɛ shihilɛ mli ni ekɛ ehe eyawo ji no?
• Mɛɛ nifeemɔi baanyɛ aye abua mɔ koni etsi ehe kɛjɛ suɔlɔ kroko ni eeená yɛ eŋa loo ewu sɛɛ lɛ he?
• Kɛ́ gbalashihilɛ mli hefatalɔi kɛ naagbai kpe lɛ, mɛni esa akɛ amɛfee?
• Mɛni ji nɔ̃ titri ni woɔ mɔ hewalɛ koni ekaje eŋa loo ewu sɛɛ ekɛ mɔ kroko yaná bɔlɛ?
[Mfoniri ni yɔɔ baafa 26]
Dɔlɛ sane ji akɛ, nitsumɔhe baanyɛ atsɔ he ko ni nuu kɛ yoo teŋ suɔmɔ nifeemɔi ni bɛ hiŋmɛi nɔ yaa nɔ yɛ
[Mfoniri ni yɔɔ baafa 28]
‘Nilee akɛhaa piaiaŋ yimɔɔ kɛ nii kpakpai’