Ha Otoiŋjɔlɛ Afa Kɛtsɔ Anɔkwale Nilee Nɔ
“Duromɔ kɛ hejɔlɛ afa obaaye yɛ Nyɔŋmɔ kɛ wɔ-Nuŋtsɔ Yesu he nilee lɛ mli.”—2 PETRO 1:2.
1, 2. (a) Mɛni hewɔ abaanyɛ akɛ toiŋjɔlɛ wekukpaa ni ka wɔkɛ Nyɔŋmɔ teŋ lɛ ato gbalashihlɛ he? (b) Mɛɛ gbɛ nɔ wɔɔtsɔ wɔwo toiŋjɔlɛ ni ka wɔkɛ Nyɔŋmɔ teŋ lɛ mli hewalɛ?
TOIŊJƆLƐ wekukpaa ni okɛ Yehowa Nyɔŋmɔ na yɛ obaptisimɔ mli lɛ tamɔ gbalashilɛ yɛ gbɛ ko nɔ. Eyɛ mli akɛ yookpeemɔ gbi lɛ yɛ miishɛɛ moŋ, shi enɛ feɔ wekukpaa ni jara wa ko shishijee kɛkɛ. Kɛtsɔ mɔdɛŋbɔɔ, be kɛ niiashikpamɔ nɔ lɛ, gbalashihilɛ wekukpaa lɛ feɔ nɔ ni adɔɔ he babaoo ni ebatsɔɔ abobaa he yɛ haomɔ be mli. No hewɔ lɛ, bo hu kɛtsɔ hiɛmiamɔ kɛ Nyɔŋmɔ yelikɛbuamɔ nɔ lɛ, obaanyɛ oha toiŋjɔlɛ ni ka okɛ lɛ teŋ lɛ aya hiɛ.
2 Bɔfo Petro tsɔɔ bɔ ni mɛi ni ‘nine eshɛ hemɔkɛyeli lɛ nɔ’ lɛ baanyɛ awaje toiŋjɔlɛ ni ka amɛkɛ Nyɔŋmɔ teŋ lɛ mli. Eŋma akɛ: “Duromɔ kɛ hejɔlɛ afa aha nyɛ yɛ Nyɔŋmɔ kɛ wɔ-Nuŋtsɔ Yesu Kristo nilee lɛ mli.”—2 Petro 1:1, 2.
‘Nyɔŋmɔ Ha Anɔkwale Nilee’
3. Yehowa kɛ Yesu he anɔkwale nilee ni wɔɔna lɛ tsɔɔ mɛni?
3 Hela wiemɔ “anɔkwale nilee” (e.pi’gno.sis) ni akɛtsu nii yɛ ŋmalɛ nɛɛ mli lɛ shishi ji nɔ ko he nilee diɛŋtsɛ ni mli kwɔ jogbaŋŋ. Feemɔ-wiemɔ lɛ baanyɛ atsɔɔ nilee ni mɔ ko ena kɛtsɔ lɛ diɛŋtsɛ eniiashikpamɔ nɔ, ni atsɔɔ shishi akɛ “ona . . mli anɔkwale” yɛ Luka 1:4. Hela woloŋlelɔ Culverwel tsɔɔ mli akɛ yɛ egbɛfaŋ lɛ, wiemɔ nɛɛ shishi “ji ni male nɔ ko jogbaŋŋ fe bɔ ni mile tsutsu lɛ; nɔ ko ni mina dã aloo mikwɛ yɛ shɔŋŋ lɛ ni masaa mana lɛ jogbaŋŋ.” Anɔkwale nilee ni tamɔ nɛkɛ ni wɔɔna lɛ tsɔɔ le ni wɔɔle Yehowa kɛ Yesu akɛ gbɔmɛi yɛ teemɔŋ diɛŋtsɛ, ni wɔle amɛ jogbaŋŋ kɛ amɛsui.
4. Te wɔɔfee tɛŋŋ wɔha Nyɔŋmɔ he nilee ni wɔyɔɔ lɛ aya hiɛ, ni mɛni hewɔ enɛ haa toiŋjɔlɛ ni ka wɔkɛ lɛ teŋ lɛ shwereɔ lɛ?
4 Gbɛi enyɔ ni aaatsɔ nɔ ana nilee nɛɛ ji kɛtsɔ mɔ diɛŋtsɛ teemɔŋ nikasemɔ sui kpakpai kɛ Nyɔŋmɔ webii akpeei ashishi yaa yɛ yɛ be fɛɛ mli nɔ. Kɛtsɔ nɛkɛ gbɛi anɔ obaakase bɔ ni Nyɔŋmɔ tsuɔ nii ehaa diɛŋtsɛ kɛ nɔ ni esusuɔ lɛ yɛ faŋŋ mli. Obaafee he mfoniri diɛŋtsɛ yɛ ojwɛŋmɔ mli. Shi akɛ ooole Nyɔŋmɔ jogbaŋŋ yɛ teemɔŋ lɛ tsɔɔ akɛ ookase ni ojie esu kɛ baŋ lɛ akpo. Akɛ nɔkwɛmɔ nɔ lɛ, Yehowa wie mɔ ko ni jieɔ Nyɔŋmɔjamɔ su ni pɛsɛmkunya bɛ mli lɛ kpo lɛ he ni E-kɛɛ akɛ: “Ani jeee enɛ ji le ni aleɔ mi lɛ?” (Yeremia 22:15, 16; Efesobii 5:1) Nyɔŋmɔ ni okaseɔ lɛ jogbaŋŋ lɛ haa okɛ lɛ teŋ toiŋjɔlɛ lɛ faa babaoo, ejaakɛ oyaa hiɛ yɛ gbɔmɔtso hee “ni tsɔɔ ehee ekoŋŋ kɛyaa nilee mli yɛ mɔ ni bɔ lɛ lɛ subaŋ lɛ naa” lɛ woo mli. Obafeɔ mɔ ni saa Nyɔŋmɔ hiɛ babaoo—Kolosebii 3:10.
5. (a) Anɔkwale nilee ye bua Kristofonyo yoo ko yɛ mɛɛ gbɛ nɔ? (b) Mɛɛ gbɛi anɔ nɛkɛ wɔbaanyɛ wɔkase Yehowa yɛ?
5 Kristofonyo yoo ko ni egbɛi ji Lynn na akɛ ewa kɛha lɛ akɛ ekɛ nɔtɔmɔ aaake yɛ shishinumɔ ni yabaaa ekɛ Kristofonyo ko teŋ lɛ hewɔ. Shi Lynn nikasemɔ ni efeɔ lɛ jogbaŋŋ lɛ ha epɛi esui amli. Ekpɛlɛ nɔ akɛ, “Mikai nɔ̃ Nyɔŋmɔ ni Yehowa ji, kɛ bɔ ni ebɛɛɛ mɔ ewooo emli Iɛ. Misusu nibii bibii fɛɛ ni wɔfeɔ Yehowa daa gbi, shi ebuuu enɛɛmɛi ahe akɔntaa eshiii wɔ lɛ he. Sane ni ebaka mi kɛ minyɛmi yoo Kristofonyo nɛɛ teŋ lɛ ji nɔ ko bibioo ko kɛkɛ kɛ́ akɛ aaato he. No hewɔ lɛ, be fɛɛ be ni mana lɛ lɛ, mikɛɔ mihe akɛ, ‘Yehowa miisumɔ lɛ taakɛ bɔ ni esumɔɔ mi lɛ.’ Enɛ ye bua mi ni minyɛ miye nakai naagba lɛ nɔ kunim.” Ani oona hei ni bo hu obaanyɛ okase Yehowa jogbaŋŋ yɛ lɛ?—Lala 18:36; 103:8, 9; Luka 6:36; Bɔfoi lɛ Asaji 10:34, 35; 1 Petro 1:15, 16.
Kristo He Anɔkwale Nilee
6. Mɛɛ gbɛ nɔ Yesu Kristo tsɔɔ yɛ akɛ shiɛmɔ nitsumɔ lɛ he hiaa lɛ fe fɛɛ?
6 Akɛ ooona Yesu he anɔkwale nilee lɛ biɔ ni ona “Kristo jwɛŋmɔ lɛ” ni okase lɛ. (1 Korintobii 2:16) Yesu ji anɔkwale lɛ shiɛlɔ ni yɔɔ miishɛɛ (Yohane 18:37) Eŋmɛɛɛ gbɛ ni jwɛŋmɔ ni ejaaa ni emaŋbii lɛ hiɛ lɛ aye esanekpakpajajemɔ mumɔ lɛ nɔ. Eyɛ mli akɛ Yudafoi sumɔɔɔ Samariabii asane moŋ, shi eshiɛ etsɔɔ Samaria yoo ko yɛ nu bu ko he. Hɛɛ, yoo kɛ sanegbaa kakadaŋ yɛ kpetekpelee nɛkɛ lɛ kɛ heguɔgbee baã.a Shi Yesu eŋmɛɛɛ gbɛ ni emaŋbii ahenumɔ nɛɛ atsi enaa koni ekaye odase. Nyɔŋmɔ nitsumɔ lɛ ha ena miishɛɛ. Ekɛɛ akɛ: “Miŋmaa ji akɛ mafee mɔ ni tsumi lɛ suɔmɔnaa nii, ni magbe enitsumɔ Iɛ naa.” Na ni Yesu na bɔ ni gbɔmɛi ni tamɔ Samaria yoo Iɛ kɛ emaŋbii krokomɛi lɛ here ewiemɔ lɛ nɔ amɛha lɛ waje Yesu tamɔ niyenii .—Yohane 4:4-42; 8 : 48.
7. (a) Esa akɛ Kristo he nilee atsirɛ wɔ ni wɔfee mɛni? (b) Ani Nyɔŋmɔ kpaa etsuji fɛɛ agbɛ akɛ amɛbaatsu nitsumɔ falɛ kome too lɛ nɔŋŋ yɛ shiɛmɔ mli? Tsɔɔmɔ mli.
7 Ani onuɔ he tamɔ bɔ ni Yesu nu he lɛ? Gbɔ ni akɛ lɛ aaaje sanegbaa shishi yɛ Biblia mli lɛ wa kɛha mɛi pii ni akutseiaŋbii nyaaa enɛ he. Shi, kɛ́ wɔɔna jwɛŋmɔ ni Yesu hiɛ lɛ, no lɛ wɔnyɛŋ wɔjo anɔkwale nɛɛ naa foi: Esa ni wɔye odase. Shi jeee mɔ fɛɛ mɔ baanyɛ ashiɛ babaoo tamɔ mɛi krokomɛi. Esoroɔ yɛ wɔnyɛmɔi kɛ wɔshihilɛi lɛ hewɔ. No hewɔ lɛ, kaanu he akɛ Nyɔŋmɔ bɛ wɔsɔɔmɔ krɔŋŋ lɛ he miishɛɛ. Shi, esa akɛ Yesu he nilee ni wɔna lɛ atsirɛ wɔ ni wɔfee nɔ ni fe fɛɛ ni wɔbaanyɛ Yesu jie susuma muu fɛɛ mli ni ajɛɔ afeɔ nii lɛ yi.—Mateo 13:18-23; 22:37.
Bɔ Ni Ehe Hiaa Akɛ Wɔhi Efɔŋ
8, 9. Mɛni ji nibii komɛi ni Nyɔŋmɔ nyɛɔ, ni mɛɛ gbɛ nɔ Wɔɔtsɔ wɔjie nakai nyɛ̃ɛ su lɛ nɔŋŋ kpo?
8 Anɔkwale nilee hu yeɔ ebuaa wɔ ni wɔnaa nibii ni Yehowa kɛ Yesu hiɔ. (Hebribii 1:9; Yesaia 61:8) “Nibii ekpaa Yehowa nyɛɔ, ni nɔ ni ji kpawo lɛ ji enihii nii; Hewoo hiŋmɛi, apasa lilɛi, kɛ niji ni shweɔ la ni eye bem shi, tsui ni shweɔ eyiŋ jwɛŋmɔi fɔji, naji ni he yɔɔ oya kɛ foijee kɛ efɔŋ mli yaa, amale odaseyelɔ ni foɔ sane taa, kɛ mɔ ni woɔ nyɛmimɛi ateŋ bei.” (Abɛi 6:16-19) Jeŋbai kɛ sui nɛɛ ji “nihii nii” kɛha lɛ. Ajie Hebri wiemɔ ni atsɔɔ shishi yɛ biɛ akɛ “nihii nii” lɛ kɛjɛ wiemɔi ni eshishi ji “ni aaanyaŋe, nɔ ko ni haa mɔ shweɔ,” ni “aaana nyɛɛ aha nɔ ko, tamɔ nɔ ni ahiɔ yɛ he fɛɛ he; ni aaana hetsɛ aha nɔ ko, kɛ mlifu.” No hewɔ lɛ, kɛ wɔkɛ Nyɔŋmɔ baahi shi yɛ toiŋjɔlɛ mli lɛ, belɛ, esa ni wɔ hu wɔna su ni tamɔ nɛkɛ nɔŋŋ.
9 Akɛ nɔkwɛmɔ nɔ lɛ, kwa “hewoo hiŋmɛi” kɛ henɔwomɔ sui fɛɛ. Yɛ baptisimɔ sɛɛ lɛ, mɛi komɛi nuɔ he akɛ yelikɛbuamɔ ni mɛi ni tsɔɔ amɛ nii lɛ kɛhaa amɛ lɛ he ehiaaa amɛ dɔŋŋ. Shi esa akɛ Kristofoi heei kɛ heshibaa akpɛlɛ yelikɛbuamɔ nɔ beni amɛnane mɔɔ shi yɛ anɔkwale lɛ mli lɛ. (Galatabii 6:6) Asaŋ, kwa oshekuyeli, ni baanyɛ awo “nyɛmimɛi ateŋ bei” lɛ. Kɛ́ wɔkɛ “apasa lilɛi” gbɛɔ akɛɛ-akɛɛ ni ji amɛle kɛ naataomɔi ni bɛ mli wɔshwaa lɛ, ekolɛ ‘wɔshwieee’ lá diɛŋtsɛ shi moŋ, shi wɔbaanyɛ ‘wɔfite’ mɔ ko gbɛi kpakpa. Wɔnyɛŋ wɔkɛ Nyɔŋmɔ ahi shi yɛ toiŋjɔlɛ mli kɛ toiŋjɔlɛ bɛ wɔkɛ wɔnyɛmimɛi ateŋ. (Abɛi 17:9; Mateo 5:23, 24) Agbɛnɛ Nyɔŋmɔ kɛɔ yɛ e-Wiemɔ lɛ mli akɛ “miinyɛ ŋashwiemɔ.” (Maleaki 2:14, 16) No hewɔ lɛ, kɛ́ obote gbalashihilɛ mli lɛ, ani otsuɔ nii koni oha ogbalashihilɛ lɛ mli awa? Ani hemɔfeemɔ kɛ mɔ kroko ŋa kɛ shwɛmɔ ji nihii nii kɛha bo? Ani ohiɔ bɔlɛnamɔ mli jeŋba shara tamɔ Yehowa? (5 Mose 23:17, 18) Nifeemɔ nɛɛ ni wɔɔhi lɛ bɛ mlɛo, ejaakɛ wɔheloo ni egbee shi lɛ baasumɔ enɛɛmɛi, ni je lɛ nyaa enɛɛmɛi ahe.
10. Te wɔɔfee tɛŋŋ wɔkase bɔni anyɛɔ efɔŋ?
10 Akɛ nɔ ni baaye abua bo ni onyɛ efɔŋfeemɔ lɛ, kwa sinii kɛ tɛlivishin kwɛmɔ, mumɔi fɔji, jeŋba shara kɛ awuiyeli he woji akanemɔ ni akɛjieɔ hiɛtserɛ lɛ. (5 Mose 18:10-12; Lala 11:.5) Akɛni hiɛtserɛjiemɔ ni tamɔ nɛkɛ lɛ haa nɔ fɔŋ feemɔ feɔ tamɔ nɔ ni ‘nɔ fɔŋ ko bɛ he’ aloo ewoɔ naaŋmɔlɔ hewɔ lɛ, egbɔjɔɔ mɔdɛŋ ni abɔɔ koni wɔna nyɛ̃ɛ ni Nyɔŋmɔ gbeyeishemɔ yɔɔ mli wɔha enɛ lɛ. Shi sɔlemɔ ni jɛ tsuiŋ yɛ be fɛɛ mli lɛ baaye abua, ejaakɛ Yesu kɛɛ: “Nyɛshia kpe ni nyɛsɔlea, koni nyɛkabote kaa mli; mumɔ lɛ miipele moŋ, shi heloo lɛ egbede.” (Mateo 26:41) Yɛ heloo gbɛfaŋ akɔnɔ ni naa wa ni wɔkɛaakpe lɛ gbɛfaŋ lɛ, Kristofonyo ko kɛɛ akɛ: “Mi diɛŋtsɛ misɔleɔ. Yɛ bei komɛi amli lɛ, minuɔ he akɛ misaaa mɔ ni bɛŋkɛɔ Yehowa, shi kɛtsɔ mihiɛ ni mimiaa mifeɔ, kɛtsɔ faikpamɔ ni mikɛ shwieɔ ehiɛ nɔ lɛ, minine shɛɔ hewalɛ ni he hiaa mi lɛ nɔ.” Obaanyɛ ona nɔ hewɔ ni Yehowa hiɔ nɔ fɔŋ feemɔ lɛ kɛji akɛ osusu piŋmɔi ni jɛɔ mli baa lɛ he lɛ.—2 Petro 2:12, 13.
11. Mɛni nibii komɛi baanyɛ agba wɔnaa yɛ bei komɛi amli?
11 Yɛ toiŋjɔlɛ ni ka okɛ Nyɔŋmɔ teŋ lɛ fɛɛ sɛɛ lɛ, daa gbi nɔnyɛɛ kɛ kaai kɛ bo diɛŋtsɛ ofatɔɔi baahao bo yɛ bei komɛi amli. Kaimɔ akɛ, otsɔ oti krɛdɛɛ ko ni Satan tuatuaa. Ewuɔ eshiɔ mɛi ni yeɔ Nyɔŋmɔ kitai anɔ kɛ Yehowa Odasefoi! (Kpojiemɔ 12:17) Belɛ, te ooofee tɛŋŋ omɔ omligbɛ toiŋjɔlɛ lɛ mli?
Amanehului Ni Gbaa Toiŋjɔlɛ Naa Lɛ Anaa Ni Wɔɔdamɔ
12. (a) Mɛɛ shihilɛ mli ajɛ aŋma Lala 34 lɛ? (b) Ŋmalɛ nɛɛ tsɔɔ David henumɔi yɛ nakai niiashikpamɔ lɛ mli yɛ mɛɛ gbɛ nɔ?
12 David ŋma yɛ Lala 34:20 akɛ: “Jalɔ amanehului faa babaoo.” Lala nɛɛ yiteŋ niŋmaa tsɔɔ akɛ, David ŋma enɛ beni eje gbele ko mli lɛ sɛɛ nɔŋŋ. David jo Maŋtsɛ Saul naa foi eyaba abo yɛ Akish ni ji Filisti maŋtsɛ ni jɛ Gat lɛ ŋɔɔ. Maŋtsɛ nɛɛ tsuji lɛ yɔɔ David ni beni amɛkai bɔ ni ewu eha Israel lɛ, amɛbɔ Akish amaniɛ. Beni David nu enɛ lɛ, “eŋɔ wiemɔ nɛɛ eto etsui mli, ni eshe Gat maŋtsɛ Akish gbeyei naakpa.” (1 Samuel 21:11-13) Ni fɛɛ sɛɛ lɛ Goliat maŋ nɛ, ni David egbe amɛtatsɛnukpa nɛɛ—ni ehiɛ Goliat klante lɛ? Ani amɛkɛ klante kakadaŋŋ nɛɛ baafo David yitso? Mɛni efee?—1 Samuel 17:4; 21:10.
13. Mɛni David fee yɛ nɛkɛ amanehulu nɛɛ mli, ni wɔbaanyɛ wɔnyiɛ enɔkwɛmɔ nɔ lɛ sɛɛ yɛ mɛɛ gbɛ nɔ?
13 David kpa Nyɔŋmɔ fai kɛ yaafo ni mli wa kɛba yelikɛbuamɔ. Eŋma akɛ: “Nɔnalɔ nɛɛ bolɔ ni Yehowa bo toi, ni ehere lɛ kɛjɛ efimɔi fɛɛ mli.” Eŋma ekoŋŋ akɛ Yehowa “hereɔ amɛ kɛjɛɔ amɛfimɔi fɛɛ mli.” (Lala 34:5, 7, 16, 18) Ani bo hu okase bɔ ni asɔleɔ ahaa Yehowa, ni ofɔseɔ otsui oshwieɔ shi yɛ ehiɛ yɛ haomɔ bei amli? (Efesobii 6:18; Lala 62:9) Ekolɛ ohaomɔ lɛ jeee nɔ ni mli wa tamɔ David nɔ lɛ, shi Obaana akɛ Nyɔŋmɔ baaye abuao yɛ be ni sa mli. (Hebribii 4:16) Shi David fee babaoo fe sɔlemɔ kɛkɛ.
14. David kɛ “nilee kɛ jwɛŋmɔ” tsu nii yɛ mɛɛ gbɛ nɔ, ni mɛni Nyɔŋmɔ kɛha ni baaye ebua wɔ koni wɔfee nakai nɔŋŋ?
14 “Ni [David] etsake enifeemɔ yɛ amɛhiɛ, ni ekwa eye sɛkɛ yɛ amɛdɛŋ . . . Kɛkɛ ni Akish kɛɛ etsuji lɛ akɛ: ‘Naa nyɛna akɛ nuu nɛɛ miiye sɛkɛ; mɛɛ hewɔ mɔ ni nyɛkɛ lɛ ba miŋɔɔ?’” (1 Samuel 21:13-15) David tsɔ ŋaa ni etsɔ no nɔ ejo foi. Yehowa jɔɔ emɔdɛŋbɔɔ lɛ nɔ. Nakai nɔŋŋ hu, kɛ́ wɔkɛ naagbai ni mli wa kpe lɛ, Yehowa kpaa wɔ gbɛ akɛ Wɔkɛ wɔ diɛŋtsɛ wɔjwɛŋmɔŋ hewalɛi atsu nii, shi, wɔkakpa gbɛ akɛ ebaafee nɔ fɛɛ nɔ yɛ he eha wɔ. Ekɛ e-Wiewɔ ni jɛ mumɔŋ lɛ eha wɔ, “ni akɛtsɔɔ mɛi ni nako jwɛŋmɔ lɛ ahiɛtɛɛ . . . nilee kɛ jwɛŋmɔ.” (Abɛi 1:4; 2 Timoteo 3:16, 17) Nyɔŋmɔ kɛ asafo lɛ mli onukpai eha, mɛi ni baanyɛ aaye ebua wɔ koni wɔle bɔ ni wɔɔfee wɔhiɛ Nyɔŋmɔ taomɔ nii amli. Hii nɛɛ baanyɛ aye abua bo yɛ be babaoo mli ni otao Buu Mɔɔ Asafo lɛ woji amli kɛha yelikɛbuamɔ koni okpɛ oyiŋ yɛ gbɛ ni ja nɔ aloo onyɛ odamɔ naagba ko naa.
15. Mɛni hewɔ Lala 34:19 shɛjeɔ mɔ mii lɛ?
15 Beni wɔtsui ehao yɛ wɔ diɛŋtsɛ wɔgbɔjɔmɔi kɛ nijiaŋwujeei amli po lɛ, kɛ́ wɔhiɛ jwɛŋmɔ ni ja lɛ, wɔbaanyɛ wɔhiɛ toiŋjɔlɛ ni ka wɔkɛ Nyɔŋmɔ teŋ lɛ mli. David ŋma yɛ Lala 34:19 akɛ: “Yehowa bɛŋkɛɔ mɛi ni tsuii ekumɔ lɛ, ni ehereɔ mɛi ni mumɔ tswiaa shi kɛ dɔlɛ lɛ.” Kɛ wɔbi eshaifaa ni wɔto gbɛjianɔ ni sa wɔkɛjaje saji lɛ, (titri yɛ tɔmɔi ni,hiɛdɔɔ yɔɔ mli ahe lɛ) , Yehowa baabɛŋkɛ wɔ ni eeewaje wɔ yɛ henumɔ mli.—Abɛi 28: 13; Yesaia 55:7; 2 Korintobii 7:9-11.
Teemɔŋ Nilee Kɛ Toiŋjɔlɛ Baa
16. (a) Mɛni ji gbɛ kroko ni wɔtsɔɔ nɔ wɔnaa Nyɔŋmɔ he anɔkwale nilee? (b) Tsɔɔmɔ David wiemɔ nɛɛ mli: “Nyɛsaa nyɛnaa nyɛkwɛa, ni nyɛaana akɛ Yehowa hi.”
16 Yɛ mumɔŋ nibii ni wɔɔkase sɛɛ lɛ, gbɛ kroko ni wɔtsɔɔ nɔ wɔnaa Nyɔŋmɔ he anɔkwale nilee ji kɛtsɔ bɔ ni wɔ diɛŋtsɛ wɔkpaa eyelikɛbuamɔ ni suɔmɔ yɔɔ mli lɛ shi wɔhaa (Lala 41:11, 12) Akɛ aaajie wɔ kɛaajɛ haomɔ mli lɛ etsɔɔɔ haomɔ lɛ naagbee kwraa yɛ be fɛɛ mli; ekolɛ enɛ baabi ni oka he oŋmɛ otsui shi yɛ mli. (1 Korintobii 10:13) Eyɛ mli akɛ abaa David wala yi yɛ Gat moŋ, shi etee nɔ ehi shi akɛ kobɔfo afii pii, ni ekɛ osharai sɔrɔtoi kpe. Shi David nu Yehowa kwɛmɔ kɛ eyibaamɔ he yɛ fɛɛ mli. Etao, ni ena ekɛ Nyɔŋmɔ teŋ toiŋjɔlɛ, ni ekase akɛ mɛi ni feɔ nakai lɛ, “nɔkpakpa ko ehiaŋ amɛ.” Beni David diɛŋtsɛ na bɔ ni Yehowa fi esɛɛ eha yɛ haomɔi amli lɛ, enyɛ ejaje akɛ: “Nyɛsaa nyɛnaa nyɛkwɛa, ni nyɛaana akɛ Yehowa hi; ajɔɔ gbɔmɔ ni baa lɛ abo lɛ.”—Lala 34:9-11, 15, 16.
17. Mɛɛ hewalɛ Yehowa ni abaa lɛ abo yɛ fimɔ mli lɛ na yɛ weku ko nɔ?
17 Yehowa ni oooba lɛ abo yɛ fimɔ bei amli lɛ ‘baaha osa onaa okwɛ ni ooona akɛ Yehowa hi.’ Yɛ oshara ko ni ba hewɔ lɛ, Kristofonyo ko ni yɔɔ U.S. Amerika anaigbɛ-teŋgbɛ lɛ nitsumɔ ni haa lɛ shika bɔ ni sa ni ekɛ afii 14 etsu lɛ fite. Ekɛ eweku lɛ sɔle amɛha Nyɔŋmɔ, ejaakɛ amɛbɛ nyɔmɔwoo ko yɛ enɛ sɛɛ. Yɛ nakai beaŋ nɔŋŋ lɛ, amɛlɛte fioo ni amɛyɔɔ lɛ he, amɛyaye kpɛkpɛo yɛ ŋmɔji ni bɛŋkɛ lɛ amli ni amɛshaa loo amɛkɛfeɔ niyenii. Yelikɛbuamɔ ni jɛ asafo lɛ mli bii komɛi aŋɔɔ kɛ be fa nitsumɔ ni amɛnaa yɛ bei komɛi amli lɛ ha weku kɛ emli bii ejwɛ nɛɛ hi shi. Yɛ oshara lɛ sɛɛ afi mli lɛ, nyɛ lɛ nyɛ ewie akɛ: “Wɔbaanyɛ wɔlaka wɔhe ni wɔsusu akɛ wɔkɛ wɔhiɛ fɔɔ Yehowa nɔ, beni yɛ anɔkwale mli lɛ, wɔkɛ wɔhiɛ fɔɔ wɔ diɛŋtsɛ wɔnyɛmɔi, wɔ hefatalɔ aloo wɔnitsumɔ nɔ. Wɔkase bɔ ni wɔɔfee ni wɔkɛ wɔhe afɔ lɛ pɛ nɔ. Abaanya ashɔ nibii nɛɛ yɛ wɔdɛ, shi Yehowa shiii wɔ gbi ko—jeee yɛ hiŋmɛitswaa kome po mli. Eyɛ mli akɛ wɔnine shɛɔ nɔ ni he hiaa wɔ lɛ pɛ nɔ moŋ, shi wekukpaa ni ka wɔkɛ Yehowa teŋ, ákɛ weku lɛ, mli ewa waa fe tsutsu lɛ.”
18. Mɛni baaye ebua bo ni oŋmɛ otsui shi yɛ haomɔi ni tsaraa nɔ baa po mli?
18 Hɛɛ, ohia baanyɛ aba. Aloo ekolɛ gbɔmɔtsoŋ hela ko ni ehiii tsamɔ baaba wɔnɔ, bei baate shi yɛ wɔkɛ mɔ ko teŋ, ekolɛ wɔbaana henumɔŋ naagbai aloo nɔnyɛɛ kɛ naagbai sɔrɔtoi lɛ eko moŋ. Shi kɛ́ ole Nyɔŋmɔ yɛ anɔkwale mli lɛ, Obaana hemɔkɛyeli akɛ ebaafi osɛɛ. (Yesaia 43:10) Hekɛnɔfɔɔ ni tamɔ nɛkɛ ni gbugbaaa lɛ baaye abuɔ bo ni onyɛ ofi shi koni ona “Nyɔŋmɔ hejɔlɛ ni fe jwɛŋmɔi fɛɛ” lɛ eko.—Filipibii 4:7.
19. Te wɔfeɔ tɛŋŋ wɔleɔ akɛ Yehowa ebuuu wɔnɔnaai lɛ akɛ nɔ ko bibioo?
19 Beni okɛ haomɔ ekpe lɛ, kaimɔ akɛ Yehowa le onɔnaa lɛ. Yɛ lala ko ni David fee beni ekai amanehulu ni ena yɛ Gat lɛ mli lɛ, ekpa Yehowa fai akɛ: “Okɛ mihiɛ yaafonui awo otɔ lɛ mli! Ani amɛbɛ owolo lɛ mli?” (Lala 56:9) Eka shi faŋŋ akɛ Yehowa bo David nibimɔ lɛ toi. Kwɛ miishɛɛ ni eji akɛ Nyɔŋmɔ aaabaa nakai amanehulu kɛ haomɔ mli yaafonui Iɛ anaa ewo etɔ lɛ mli taakɛ bɔ ni akɛ Wein kpakpa aloo nu kpakpa woɔ tɔ mli lɛ. Abaakai nakai yaafonui lɛ yɛ be fɛɛ mii, hɛɛ, aŋmala ashwie shi yɛ Nyɔŋmɔ wolo Iɛ mli. Mɛɛ hejɔlɛ yɔɔ Yehowa kwɛmɔ mli nɛkɛ!
20. Te wɔɔfee tɛŋŋ wɔha toiŋjɔlɛ ni ka wɔkɛ Nyɔŋmɔ teŋ lɛ afa?
20 No hewɔ lɛ, obaptisimɔ ji toiŋjɔlɛ wekukpaa ni ka okɛ Nyɔŋmɔ teŋ lɛ shishijee kɛkɛ. Kɛ oná ole Nyɔŋmɔ kɛ Yesu su kɛ baŋ lɛ jogbaŋŋ, ni okpa shi ona bɔ ni Yehowa fĩɔ etsuji asɛɛ yɛ kaai amli lɛ, toiŋjɔlɛ ni ka okɛ Nyɔŋmɔ teŋ lɛ baafa babaoo. Yɛ shweshweeshwe shihilɛ ni okɛ Yehowa teŋ weku kpaa lɛ baaha ona bianɛ sɛɛ lɛ, obaana shihilɛ kɛmiiya naanɔ yɛ Paradeiso he hiɛnɔkamɔ he ni ‘omii baashɛ ohe yɛ hejɔlɛ babaoo mli’ yɛ.—Lala. 37:11, 29.b
[Shishigbɛ niŋmai]
a Ajie kɛjɛ April 15, 1987 Watchtower lɛ mli.
b Taakɛ Talmud lɛ tsɔɔ lɛ, blema rabifoi lɛ wo ŋaa akɛ woloŋlelɔ ko “kɛ yoo ko akagba sane yɛ blohuiaŋ.” Kɛ ayeɔ kusum nifeemɔ nɛɛ nɔ lolo yɛ Yesu gbii amli lɛ, ekolɛ no hewɔ ni ekaselɔi lɛ hiɛ fee amɛ yaa akɛ ekɛ yoo miiwie” lɛ.—Yohane 4: 27
Ani Okaiɔ?
◻ Mɛɛ gbɛi anɔ wɔbaatsɔ wɔna Nyɔŋmɔ kɛ Kristo he anɔkwale nilee?
◻ Nyɔŋmɔ kɛ Yesu kasemɔ baaha wɔfee mɛni?
◻ Te wɔfeɔ tɛŋŋ wɔkaseɔ bɔ ni Nyɔŋmɔ nyɛɔ efɔŋ?
◻ Te wɔɔfee tɛŋ Wɔhiɛ toiŋjɔlɛ mli yɛ shihilɛi ni mi wawai amli?
[Mfoniri ni yɔɔ baafa 28]
Yesu eŋmɛɛɛ gbɛ koni akutseiaŋ tsɛmɔ fɔŋ atsi enaa koni ekaye odase. Ani okaseɔ ekãa ni eyɔɔ lɛ yɛ shiɛmɔ mli?
[Mfonirii ni yɔɔ baafa 29]
David sɔle eha Yehowa beni ekɛ naagba ko ni mli wa kpe . . . . .ni etsake ehe etsɔ tamɔ sɛkɛyelɔ koni etsɔ mli ejo foi Yehowa bo David sɔlemɔ lɛ toi