Okɛ Ohiɛ Afɔ Yehowa Nɔ!
“Okɛ ohiɛ afɔ Yehowa nɔ kɛ otsui fɛɛ.”—ABƐI 3:5.
1. Te Abɛi 3:5 na obalanyo ko nɔ hewalɛ waa eha tɛŋŋ, ni mɛni jɛ mli ba yɛ be kakadaŋŋ mli?
MAŊSƐƐ sanekpakpa shiɛlɔ ko ni etsɛ waa yɛ sɔɔmɔ lɛ mli ŋma akɛ: “‘OKƐ OHIƐ AFƆ YEHOWA NƆ KƐ OTSUI FƐƐ, NI OKƐ OHE AKAKPASA BO DIƐŊTSƐ OJWƐŊMƆ.’ Nakai wiemɔi ni jɛ Biblia lɛ mli ni aŋma atsotsoro shi yɛ tsu ko mli yɛ shia ni miyasaraa mɛi yɛ mli lɛ gbala mijwɛŋmɔ. Misusu wiemɔi nɛɛ ahe yɛ gbi muu lɛ fɛɛ mli. Mibi mihe akɛ, ani manyɛ ni mikɛ mitsui fɛɛ afɔ Yehowa nɔ?” No mli lɛ gbɔmɔ nɛɛ eye afii 21. Eye afii 90 ni eesɔmɔ lolo yɛ anɔkwayeli mli akɛ onukpa yɛ Perth, Australia, ni ebaanyɛ ekwɛ ewala shihilɛ be ni eho yɛ esɛɛ lɛ akɛ nɔ ni mli eyi obɔ kɛ yibii ni tsui fɛɛ mli ni ajɛɔ akɛ hiɛ fɔɔ Yehowa nɔ lɛ ewo, kɛfata afii 26 ni ekɛtsu nii waa yɛ maŋsɛɛ sanekpakpa shiɛmɔ shikpɔji anɔ yɛ Ceylon (amrɔ nɛɛ Sri Lanka), Burma (amrɔ nɛɛ Myanmar), Malaya, Thailand, India, kɛ Pakistan lɛ he.a
2. Mɛɛ hekɛnɔfɔɔ esa akɛ Abɛi 3:5 atswa awo wɔmli?
2 “Okɛ ohiɛ afɔ Yehowa nɔ kɛ otsui fɛɛ”—esa akɛ wiemɔi ni yɔɔ Abɛi 3:5 nɛɛ, taakɛ New World Translation lɛ tsɔɔ mli lɛ akanya wɔ fɛɛ ni wɔya nɔ wɔjɛ wɔtsui muu fɛɛ mli wɔtuu wɔwala wɔha Yehowa, kɛ hekɛnɔfɔɔ akɛ ebaawaje wɔhemɔkɛyeli ni wɔkɛye gbɛtsii nii ni tamɔ gɔji lɛ anɔ kunim. (Mateo 17:20) Nyɛhaa wɔpɛia saji ni kɔɔ Abɛi 3:5 lɛ fɛɛ he lɛ mli agbɛnɛ.
Nitsɔɔmɔ ni Tamɔ Tsɛ Nɔ̃
3. (a) Mɛɛ hewalɛwoo anaa yɛ Abɛi awolo lɛ klɛŋklɛŋ yitsei nɛɛhu lɛ amli? (b) Mɛni hewɔ esa akɛ wɔsusu Abɛi 8:1, 2 he waa lɛ?
3 Biblia mli wolo ni ji Abɛi lɛ mli shishijee yitsei nɛɛhu lɛ mli eyi obɔ kɛ nitsɔɔmɔ ni tamɔ tsɛ nɔ̃, ŋaawoo ni jɛ Yehowa ŋɔɔ ni nilee yɔɔ mli kɛha mɛi fɛɛ ni kpaa gbɛ akɛ amɛbaana biiatsɔmɔ mli ŋɔɔmɔ yɛ ŋwɛi loo “Nyɔŋmɔ bii lɛ anunyam heyeli” lɛ mli ŋɔɔmɔ yɛ paradeiso shikpɔŋ lɛ nɔ. (Romabii 8:18-21, 23) Naa ŋaawoo ni nilee yɔɔ mli ni fɔlɔi baanyɛ amɛkɛtsu nii ni amɛkɛtsɔse bihii kɛ biyei. Nɔ ni ekaaa ji ŋaawoo ni yɔɔ Abɛi yitso 3, ni jeɔ shishi kɛ kɔkɔbɔɔ nɛɛ: “Mibi, ohiɛ akakpa mimla lɛ nɔ, shi ha otsui ato mikitai lɛ!” Yɛ be mli ni Satan yiwalɛ je lɛ bɛŋkɛɔ enaagbee kwraa lɛ he lɛ, eba akɛ wɔɔbo Yehowa kaimɔi lɛ atoi jogbaŋŋ. Gbɛ lɛ baafee tamɔ gbɛ ni kɛ waa, shi shiwoo ni akɛhaa mɛi fɛɛ ni ŋmɛɔ amɛtsui shi lɛ ji akɛ, “gbii asɛɛjɛkɛmɔ kɛ wala afii kɛ hejɔlɛ amɛaaŋɔfata he amɛhao”—naanɔ wala yɛ Yehowa gbɛjianɔtoo hee lɛ mli.—Abɛi 3:1, 2.
4, 5. (a) Mɛɛ miishɛɛ wekukpaa ko atsɔɔ mli yɛ Yohane 5:19, 20? (b) Ŋaawoo ni yɔɔ 5 Mose 11:18-21 lɛ kɔɔ wɔgbii nɛɛ ahe yɛ mɛɛ gbɛ nɔ?
4 Miishɛɛ wekukpaa ni ka tsɛ kɛ binuu teŋ lɛ baanyɛ afee nɔ ni jara wa waa ni sɛɛnamɔ yɔɔ he. Wɔ Bɔlɔ lɛ, ni ji Yehowa Nyɔŋmɔ to gbɛjianɔ ni eba lɛ nakai. Kristo Yesu wie wekukpaa ni bɛŋkɛ kpaakpa ni ka ekɛ Yehowa teŋ lɛ he akɛ: “Bi lɛ diɛŋtsɛ nyɛŋ eto eyiŋ efee nɔ ko, ja nɔ ni enaa akɛ Tsɛ lɛ feɔ lɛ; ejaakɛ nibii fɛɛ ni no feɔ lɛ, nomɛi nɔŋŋ ni Bi lɛ hu feɔ. Ejaakɛ Tsɛ lɛ sumɔɔ Bi lɛ, ni etsɔɔ lɛ nibii fiaa ni lɛ diɛŋtsɛ efeɔ lɛ.” (Yohane 5: 19, 20) Yehowa to eyiŋ akɛ esa akɛ teemɔŋ wekukpaa ni bɛŋkɛ kpaakpa akã lɛ diɛŋtsɛ kɛ eweku ni yɔɔ shikpɔŋ nɔ lɛ fɛɛ teŋ, kɛ agbɛnɛ yɛ tsɛmɛi ni ji adesai lɛ kɛ amɛbii ateŋ.
5 Awo weku ni kɛ amɛhe fɔɔ amɛhe nɔ lɛ he hewalɛ yɛ blema Israel. Yehowa wo tsɛmɛi lɛ hewalɛ yɛ jɛmɛ akɛ: “Nyɛŋɔa miwiemɔi nɛɛ nyɛtoa nyɛtsuii amli kɛ nyɛsusumai amli, ni nyɛŋɔfee kaimɔ nii nyɛfimɔ nyɛniji ashi, ni amɛtsɔmɔ hiɛnaataramɔ nii yɛ nyɛhiŋmɛii ateŋ. Ni nyɛŋɔtsɔɔ nyɛbii, ni nyɛwie he, beni ota oshia kɛ beni onyiɛ gbɛ teŋ kɛ beni oka shi kɛ beni ote shi; ni oŋma yɛ oshia lɛ shinaatsei kɛ omaŋ lɛ agboi lɛ ahe, koni ogbii kɛ obii lɛ agbii afa yɛ shikpɔŋ ni Yehowa ka otsɛmɛi lɛ akita akɛ eeeŋɔha amɛ lɛ nɔ, tamɔ bɔ ni ŋwɛi kɛ shikpɔŋ gbii yɔɔ lɛ.” (5 Mose 11:18-21) Wɔ Tsɔɔlɔ Kpeteŋkpele, Yehowa Nyɔŋmɔ wiemɔ ni jɛ mumɔŋ lɛ baanyɛ aha fɔlɔi kɛ amɛbii abɔ kpaakpa diɛŋtsɛ, kɛ mɛi krokomɛi hu ni sɔmɔɔ lɛ yɛ Kristofoi asafo lɛ mli lɛ.—Yesaia 30:20, 21.
6. Te wɔɔfee tɛŋŋ wɔna nyam kɛ buu kpakpa loo duromɔ yɛ Nyɔŋmɔ kɛ gbɔmɛi fɛɛ hiɛ?
6 Ŋaawoo ni nilee yɔɔ mli ni tamɔ tsɛmɛi anɔ kɛha Nyɔŋmɔ webii, onukpai kɛ gbekɛbii fɛɛ lɛ yaa nɔ yɛ Abɛi yitso 3, kukuji 3 kɛ 4 akɛ: “Kaaha mlihilɛ kɛ anɔkwale miishio; ŋɔfi okuɛ, ŋmaa yɛ otsuiŋ tao lɛ nɔ: no dani ooona nyam kɛ buu kpakpa yɛ Nyɔŋmɔ kɛ gbɔmɛi ahiɛ.” Yehowa Nyɔŋmɔ diɛŋtsɛ tekeɔ nɔ yɛ mlihilɛ kɛ anɔkwale ni ajieɔ atsɔɔ lɛ mli. Lala 25:10 jajeɔ akɛ: “Yehowa tempɔŋi lɛ fɛɛ lɛ mlihilɛ kɛ anɔkwale sɔŋŋ ni.” Yɛ Yehowa kasemɔ mli lɛ, esa akɛ wɔbu nɛkɛ sui nɛɛ kɛ amɛ hewalɛ ni buɔ mɔ he lɛ akɛ sɛɛnamɔ babaoo yɛ he, ni wɔbu amɛ tamɔ bɔ ni wɔɔbu kuɛnii ni jara wa waa ni wɔŋmala yɛ wɔtsuii anɔ bɔ ni anyɛŋ atsumɔ. No hewɔ lɛ wɔkɛ hiɛdɔɔ baanyɛ asɔle akɛ: “Yehowa . . . ha omlihilɛ kɛ onɔkwale lɛ abaa miyi daa nɛɛ.”—Lala 40:12.
Hekɛnɔfɔɔ ni Hiɔ Shi Daa
7. Mɛɛ gbɛi anɔ Yehowa etsɔɔ yɛ akɛ anyɛɔ akɛ hiɛ fɔɔ enɔ?
7 Webster’s Ninth New Collegiate Dictionary lɛ tsɔɔ hiɛ ni akɛfɔɔ mɔ nɔ lɛ mli akɛ “he ni akɛfɔɔ mɔ ko, enyɛmɔ, hewalɛ, loo mɔ ko anɔkwale loo nɔ ko ni ji anɔkwale nɔ kɛ nɔmimaa.” Akɛ Yehowa su lɛ ela emlihilɛ lɛ kpɛŋŋ tamɔ sɛkɛ. Ni wɔbaanyɛ wɔna hekɛnɔfɔɔ kwraa yɛ nyɛmɔ ni eyɔɔ ni ekɛaafee nɔ ni ewo shi yɛ he lɛ mli, ejaakɛ egbɛi, ni ji Yehowa, lɛ diɛŋtsɛ haa ayɔseɔ lɛ akɛ Yiŋtolɔ kpeteŋkpele. (2 Mose 3:14; 6:2-8) Akɛ Bɔlɔ lɛ, lɛ ji hewalɛ kɛ nyɛmɔ fɛɛ Jɛɛhe. (Yesaia 40:26, 29) Lɛ ji anɔkwale fɛɛ naamuu, ejaakɛ “Nyɔŋmɔ nyɛŋ emale.” (Hebribii 6:18) No hewɔ lɛ, awoɔ wɔ hewalɛ ni wɔkɛ wɔhiɛ afɔ Yehowa, wɔ-Nyɔŋmɔ, ni ji anɔkwale fɛɛ Jɛɛhe, ni yɔɔ hewalɛ ni fe fɛɛ ni ekɛaabu mɛi ni kɛ amɛhiɛ fɔɔ enɔ lɛ ahe ni eha eyiŋtoi kpelei lɛ aba mli yɛ anunyam mli lɛ nɔ kwraa kɛmɔ shi.—Lala 91:1, 2; Yesaia 55:8-11.
8, 9. Mɛni hewɔ he kɛ hiɛ ni akɛfɔɔ mɔ nɔ lɛ bɛ je lɛ mli kwraa lɛ, ni esoro Yehowa webii yɛ enɛ mli yɛ mɛɛ gbɛ nɔ?
8 Nɔ ni yɔɔ mɔbɔ yɛ jeŋ ni aba lɛ shi nɛɛ mli ji akɛ, hiɛ ni akɛfɔɔ mɔ nɔ lɛ elaaje kwraa. Nɔ ni wɔnaa moŋ ji hiɛjoomɔ kɛ fitemɔ yɛ he fɛɛ he. Nɔ ni aŋma lɛ agboi yɛ May 1993 wolo tɛtrɛɛ ni ji World Press Review lɛ hiɛ ji shɛɛ sane nɛɛ: “JUU KƐ OJOTSWAA EGBƐ ESHWA WAA—Shika ni Anaa yɛ Gbɛ Fɔŋ Nɔ Hɔ Jeŋ Gbɛjianɔtoo Hee lɛ Mli. Juu kɛ ojotswaa nitsumɔ lɛ mli elɛɛ kɛjɛ Brazil kɛyashi Germany, kɛjɛ U.S. Amerika kɛyashi Argentina, kɛjɛ Spain kɛyashi Peru, kɛjɛ Italy kɛyashi Mexico, kɛjɛ Vatican kɛyashi Russia.” Akɛni edamɔ hetsɛ̃, hiɛjoomɔ, kɛ he ni aheee mɔ ayeee nɔ hewɔ lɛ, yibii ni nɔ ni gbɔmɔ tsɛɔ lɛ jeŋ gbɛjianɔtoo hee lɛ kpaa nɔŋŋ ji haomɔi ni yaa hiɛ kɛha adesai.
9 Akɛ mɛi ni tamɔɔɔ maŋkwramɔŋ jeŋmaji lɛ, Yehowa Odasefoi yɛ miishɛɛ akɛ amɛfee “maŋ ni e-Nyɔŋmɔ ji Yehowa.” Amɛ pɛ ji mɛi ni baanyɛ akɛɛ yɛ anɔkwayeli mli akɛ “Nyɔŋmɔ nɔ wɔkɛ wɔhiɛ fɔɔ.” Amɛteŋ mɔ fɛɛ mɔ baanyɛ ni ekɛ nyamɔ abolɔ akɛ: “Nyɔŋmɔ mli ni mijieɔ ewiemɔ lɛ yi yɛ . . . Nyɔŋmɔ nɔ mihiɛ ka, misheee gbeyei.”—Lala 33:12; 56:5, 12.
10. Mɛni ewo obalaŋtai Kristofoi pii ahewalɛ koni amɛhiɛ amɛ emuuyeli mli?
10 He kɛ hiɛ ni akɛfɔɔ Yehowa nɔ yɛ Asia shikpɔŋ ko ni obalaŋtai Odasefoi akpei abɔ ena nɔ̃ kɛtsɔ yii ni naa wa kɛ tsuŋwoi anɔ lɛ, eha amɛteŋ mɛi ni fa eŋmɛ amɛtsui shi yɛ mli. Gbi ko gbɛkɛ beni eyɔɔ tsuŋwoo mli lɛ, Odasefonyo obalanyo ko ni etsɔ niseniianifeemɔ ni yɔɔ gbeyei waa mli lɛ nu he akɛ enyɛŋ edamɔ naa dɔŋŋ. Shi obalaŋta kroko tsɔ duŋ mli kɛba eŋɔɔ. Kɛkɛ ni ewie blɛoo ewo etoiŋ akɛ: “Onijiaŋ akaje wui; miŋmɛɛ saji ahe ni akɛsaa, shi minako jwɛŋmɔŋ toiŋjɔlɛ kɛjɛ nakai be lɛ mli kɛbaa.” Klɛŋklɛŋ obalaŋta lɛ wo efaishitswaa akɛ ebaadamɔ shi shiŋŋ lɛ mli hewalɛ. Wɔbaanyɛ wɔkɛ wɔhiɛ afɔ Yehowa nɔ kwraa akɛ ebaaye abua wɔ ni wɔye mɔdɛŋ fɛɛ ni Satan aaabɔ akɛ eeeha wɔ emuuyeli mlihiɛmɔ lɛ nɔ agbɔ lɛ nɔ kunim.—Yeremia 7:3-7; 17:1-8; 38:6-13, 15-17.
11. Akanyaa wɔ ni wɔkɛ wɔhiɛ afɔ Yehowa nɔ yɛ mɛɛ gbɛ nɔ?
11 Klɛŋklɛŋ kita lɛ fa ko kaneɔ nɛkɛ: “Suɔmɔ Nuŋtsɔ [Yehowa] o-Nyɔŋmɔ lɛ kɛ otsui fɛɛ.” (Marko 12:30) Yɛ be mli ni wɔjwɛŋɔ Nyɔŋmɔ Wiemɔ lɛ nɔ lɛ, anɔkwalei wuji ni wɔkaseɔ lɛ boteɔ wɔtsui mli tɔ̃ɔ kɛyaa shɔŋŋ ni enɛ kanyaa wɔ koni wɔkɛ wɔ nɔ fɛɛ nɔ awo wɔ naakpɛɛ Nyɔŋmɔ, Nuŋtsɔ Maŋtsɛ Yehowa sɔɔmɔ mli. Tsui ni mli eyi obɔ kɛ hiɛsɔɔ kɛha lɛ—kɛha nibii ni etsɔɔ wɔ, efee kɛha wɔ, ni ebaafee lolo aha wɔ lɛ—ji nibii ni kanyaa wɔ koni wɔkɛ wɔhiɛ afɔ eyiwalaheremɔ nɔ kwraa kɛmɔ shi lɛ.—Yesaia 12:2.
12. Yɛ mɛɛ bɛ nɔ Kristofoi babaoo kɛ amɛhiɛ efɔ Yehowa nɔ, ni afii lɛ hoɔ lɛ?
12 Abaanyɛ ana hekɛnɔfɔɔ ni tamɔ nɛkɛ yɛ be mli ni afii lɛ hoɔ lɛ. Yehowa Odasefonyo ko ni baa ehe shi ni kɛ anɔkwayeli sɔmɔ fe afii 50 yɛ Buu Mɔɔ Asafo lɛ nitsumɔ he yitso ni yɔɔ Brooklyn lɛ, beni esɔɔmɔ nɛɛ je shishi yɛ April 1927 lɛ eŋma akɛ: “Beni nyɔŋ lɛ gbo lɛ, minine shɛ yelikɛbuamɔ shika ni ji dɔlai 5 (aaafee ₵3,500) ni akɛwo wolo kotoku mli nɔ kɛ wolo fɛfɛo ko ni hɔ mli ni aŋma Biblia mli ŋmalɛ ni yɔɔ Abɛi 3:5, 6 yɛ nɔ . . . Nɔ ni madamɔ nɔ mikɛ mihiɛ afɔ Yehowa nɔ lɛ yɛ, ejaakɛ etsɛɛɛ ni mibayoo yɛ nitsumɔ he yitso lɛ akɛ Yehowa yɛ ‘tsulɔ anɔkwafo kɛ nilelɔ’ ko ni kɛ anɔkwayeli miikwɛ Maŋtsɛyeli lɛ he nibii fɛɛ ni yɔɔ shikpɔŋ nɔ lɛ nɔ.—Mateo 24:45-47.”b Jeee shika suɔmɔ nɔ nɛkɛ Kristofonyo nɛɛ kɛ etsui ema, shi moŋ ni eeena “jwetri ni etaaa yɛ ŋwɛi.” Nakai nɔŋŋ hu ŋmɛnɛ, mɛi akpei abɔ ni sɔmɔɔ yɛ Buu Mɔɔ Asafo lɛ Betel shiai amli yɛ shikpɔŋ lɛ fɛɛ nɔ lɛ feɔ nakai yɛ ohia he kita ni akãa ni ji mla naa nɔ ko shishi. Amɛkɛ amɛhiɛ fɔɔ Yehowa nɔ akɛ eeeha amɛ amɛ daa gbi hiamɔ nii.—Luka 12:29-31, 33, 34.
Kpasamɔ Yehowa
13, 14. (a) Nɛgbɛ pɛ abaanyɛ ana ŋaawoo kpakpa kɛjɛ? (b) Mɛni esa akɛ akwa koni wɔje yiwaai ni akɛbaa wɔnɔ lɛ amli?
13 Wɔ-ŋwɛi Tsɛ lɛ woɔ wɔ ŋaa akɛ: “Okɛ ohe akakpasa bo diɛŋtsɛ ojwɛŋmɔ.” (Abɛi 3:5) Je lɛŋ ŋaawolɔi kɛ jwɛŋmɔ he nilelɔi nyɛŋ ana hiɛnɔkamɔ ko akɛ amɛbaashɛ nilee kɛ shishinumɔ ni Yehowa jieɔ lɛ kpo lɛ he. “Enilee hu aleee naa.” (Lala 147:5) Ni wɔɔkpasa gbɔmɛi ni ehe gbɛi yɛ je lɛŋ lɛ anilee loo wɔ diɛŋtsɛ wɔhenumɔi ni leee nii lɛ, nyɛhaa wɔkwɛa Yehowa, e-Wiemɔ lɛ, kɛ onukpai ni yɔɔ Kristofoi asafo lɛ mli lɛ kɛha mumɔŋ ŋaawoo.—Lala 55:23; 1 Korintobii 2:5.
14 Adesa nilee loo mɔ ko gbɛhe nɔkwɔlɛ kɛ wɔ shɛŋ he ko yɛ kaa ni mli wa waa gbi ni baa kɛ foi lɛ mli. (Yesaia 29:14; 1 Korintobii 2:14) Yɛ Japan, be mli ni Jeŋ Ta II yaa nɔ lɛ, Nyɔŋmɔ webii lɛ anɔkwɛlɔ ko ni he esa waa shi ewoɔ ehe nɔ lɛ hala akɛ ekɛ ehe aaakpasa lɛ diɛŋtsɛ ejwɛŋmɔ. Be mli ni ebaje nɔnyɛɛ shishi lɛ, etsɔ hemɔkɛyeli kwalɔ, ni nyɛmimɛi lɛ ateŋ mɛi pii kpa shiɛmɔ yɛ yiwaa lɛ hewɔ. Japan nyɛmiyoo anɔkwafo ko, ni fee ekãa kɛje niseniiani-feemɔ ni naa wa yɛ tsuŋwoo hei ni mli ewo muji mli lɛ kɛɛ akɛ: “Mɛi ni hi shi akɛ anɔkwafoi lɛ bɛ nyɛmɔi krɛdɛɛi komɛi, ni ayooo amɛ yɛ nɔ ko mli. Yɛ anɔkwale mli lɛ, esa akɛ wɔteŋ mɔ fɛɛ mɔ kɛ ehiɛ afɔ Yehowa nɔ kɛ wɔtsui muu fɛɛ.”c
15. Mɛɛ su ni Nyɔŋmɔ gbeyeishemɔ yɔɔ mli he hiaa kɛ wɔɔnyɛ wɔsa Yehowa hiɛ?
15 Ni okɛ ohiɛ aaafɔ Yehowa nɔ moŋ fe bo diɛŋtsɛ ojwɛŋmɔ lɛ kɔɔ heshibaa he. Kwɛ bɔ ni nɛkɛ su nɛɛ he hiaa kɛha mɛi fɛɛ ni sumɔɔ ni amɛsa Yehowa hiɛ lɛ. Ejaakɛ wɔ-Nyɔŋmɔ lɛ, ni ji jeŋ muu fɛɛ Nuŋtsɔ Maŋtsɛ lɛ po jieɔ heshibaa kpo yɛ bɔ ni ekɛ ebɔɔ nii ni yɔɔ jwɛŋmɔ lɛ yeɔ haa lɛ mli. Wɔbaanyɛ wɔda shi yɛ enɛ he. “[E]maa ehiɛ shi ni ekwɛɔ nii ni yɔɔ ŋwɛi kɛ shikpɔŋ lɛ nɔ fɛɛ lɛ . . . Eteeɔ humi shi kɛjɛɔ su mli.” (Lala 113:6, 7) Yɛ emɔbɔnalɛ babaoo hewɔ lɛ, etsɔɔ enikeenii ni fe fɛɛ kɛha adesai, esuɔmɔ Bi, Kristo Yesu kpɔmɔ afɔleshaa ni jara wa lɛ nɔ ekɛ wɔtɔmɔi keɔ wɔ. Kwɛ bɔ ni esa akɛ wɔda shi wɔha yɛ emlihilɛ ni wɔsaaa nɛɛ hewɔ!
16. Te nyɛmimɛi hii aaafee tɛŋŋ ni amɛnine ashɛ hegbɛi ni yɔɔ asafo lɛ mli lɛ anɔ?
16 Yesu diɛŋtsɛ kaiɔ wɔ akɛ: “Mɔ fɛɛ mɔ ni aaawo ehe nɔ lɛ, aaaba lɛ shi; ni mɔ fɛɛ mɔ ni aaaba ehe shi lɛ, aaawo enɔ.” (Mateo 23:12) Esa akɛ nyɛmimɛi hii ni abaptisi amɛ lɛ kɛ heshibaa atao gbɛnaa nii yɛ Kristofoi asafo lɛ mli. Ni kɛlɛ, esaaa akɛ nɔkwɛlɔi susuɔ amɛhalamɔ lɛ he akɛ gbɛhe ni kwɔ ni amɛna, shi moŋ akɛ hegbɛ ni amɛkɛaatsu nii, yɛ heshibaa mli, kɛ hiɛsɔɔ, yɛ suɔmɔ mli, taakɛ Yesu ni wie nɛkɛ lɛ fee lɛ: “Mi-Tsɛ miitsu nii kɛbashi be nɛɛ, no hewɔ ni mi hu mitsuɔ nii lɛ.”—Yohane 5:17; 1 Petro 5:2, 3.
17. Mɛni esa akɛ wɔ fɛɛ wɔyoo, ni mɛɛ nitsumɔ baanyɛ ajɛ enɛ mli aba?
17 Eba akɛ wɔkɛ heshibaa kɛ sɔlemɔ aaakpɛlɛ nɔ yɛ be fɛɛ mli akɛ wɔjeee fɛi tamɔ mulu yɛ Yehowa hiɛ. Belɛ kwɛ wɔmii ni aaashɛ wɔhe akɛ, “Yehowa mɔbɔnalɛ lɛ yɛ kɛjɛ naanɔ kɛmiiya naanɔ yɛ mɛi ni sheɔ lɛ gbeyei lɛ anɔ, ni ejalɛ lɛ yɛ ha bii abii”! (Lala 103: 14, 17) No hewɔ lɛ, esa akɛ wɔ fɛɛ wɔfee mɛi ni kɛ hiɛdɔɔ kaseɔ Nyɔŋmɔ Wiemɔ lɛ. Esa akɛ be ni wɔyeɔ yɛ weku nikasemɔ kɛ asafoŋ kpeei amli lɛ afee ŋmɛlɛtswai ni sɛɛnamɔ yɔɔ he waa fe fɛɛ daa otsi lɛ ateŋ ekomɛi. Nɛkɛ gbɛ nɔ wɔtsɔɔ wɔtswaa “Mɔ Krɔŋkrɔŋ lɛ lee” wɔmaa shi. Ni no ji “sanesɛɛkɔmɔ.”—Abɛi 9:10.
“Yɛ Ogbɛ̀i Fɛɛ Mli”
18, 19. Te wɔɔfee tɛŋŋ ni wɔkɛ Abɛi 3:6 aaatsu nii yɛ wɔshihilɛi amli, ni mɛni baajɛ mli aba?
18 Yɛ be mli ni etsɔɔ wɔ gbɛ kɛyaa Yehowa, sanesɛɛkɔmɔ (shishinumɔ) Jɛɛhe ni yɔɔ ŋwɛi lɛ ŋɔɔ lɛ, Abɛi 3:6 kɛɛ kɛtsa nɔ akɛ: “Kaimɔ lɛ yɛ ogbɛi fɛɛ mli, ni lɛ eeejaje otempɔŋi lɛ!” Ni wɔɔkai Yehowa lɛ tsɔɔ ni wɔbɛŋkɛ lɛ kpaakpa yɛ sɔlemɔ mli. Wɔnyɛɔ wɔbɛŋkɛɔ lɛ oya yɛ sɔlemɔ mli yɛ he fɛɛ he ni wɔyɔɔ kɛ agbɛnɛ yɛ sane fɛɛ sane ni aaate shi lɛ mli. Yɛ be mli ni wɔyaa nɔ yɛ wɔ daa gbi nitsumɔi amli, yɛ be mli ni wɔsaa wɔhe kɛhaa shiɛmɔ, yɛ be mli ni wɔyaa shia kɛ shia ni wɔjajeɔ e-Maŋtsɛyeli lɛ wɔtsɔɔ lɛ, wɔsɔlemɔ yɛ be fɛɛ mli baanyɛ afee akɛ ebaajɔɔ wɔnitsumɔ lɛ nɔ. Yɛ nɛkɛ gbɛ nɔ lɛ, wɔbaanyɛ wɔna hegbɛ kɛ miishɛɛ ni jara wa waa ni ji ‘Nyɔŋmɔ ni wɔkɛ lɛ aaanyiɛ,’ kɛ hiɛnɔkamɔ akɛ ‘eeejaje wɔtempɔŋi lɛ,’ taakɛ efee kɛha Henok, Noa, kɛ lsraelbii anɔkwafoi tamɔ Yoshua kɛ Daniel nɛkɛ lɛ.—1 Mose 5:22; 6:9; 5 Mose 8:6; Yoshua 22:5; Daniel 6:23; kwɛmɔ Yakobo 4:8, 10 hu.
19 Kɛ wɔha Yehowa le wɔsɔlemɔi kɛ faikpamɔi lɛ, wɔbaanyɛ wɔna hekɛnɔfɔɔ akɛ ‘Nyɔŋmɔ toiŋjɔlɛ ni fe jwɛŋmɔi fɛɛ lɛ baabu wɔtsuii kɛ jwɛŋmɔŋ nyɛmɔi ahe kɛtsɔ Kristo Yesu nɔ.’ (Filipibii 4:7) Nɛkɛ Nyɔŋmɔ toiŋjɔlɛ, ni jeɔ kpo akɛ miishɛɛ yɛ wɔhiɛ lɛ baanyɛ ajie wɔ shɛɛ sane lɛ yi aha shiatsɛmɛi ni wɔkɛ amɛ kpeɔ yɛ wɔshiɛmɔ nitsumɔ lɛ mli lɛ. (Kolosebii 4:5, 6) Ebaanyɛ ewo mɛi ni naa amanehulu yɛ nɔnyɛɛ loo jalɛsane ni ayeee ni efa babaoo yɛ ŋmɛnɛ je nɛɛ mli hewɔ lɛ hu hewalɛ, taakɛ sane ni nyiɛ sɛɛ nɛɛ tsɔɔ lɛ.d
20, 21. (a) Mɛɛ gbɛ nɔ emuuyeli ni Yehowa Odasefoi hiɛ mli lɛ wo mɛi krokomɛi ahewalɛ yɛ Nazi niseniiani-feemɔ be lɛ mli yɛ? (b) Mɛɛ faishitswaa esa akɛ Yehowa gbee atee lɛ shi yɛ wɔmli?
20 Max Liebster, ni ji heloo naa Yudanyo ni je Yudafoi a-Shishibulemɔ lɛ mli yɛ naakpɛɛ gbɛ nɔ lɛ tsɔɔ egbɛfaa kɛmiiya Nazi hiɛkpatamɔ ŋsara lɛ mli yɛ nɛkɛ wiemɔi nɛɛ amli: “Aŋamɔ wɔyi awo oketeke tsui ni ajara mli bibiibii koni mɛi enyɔ ahi tsu kome mli lɛ amli. Ashi mi ŋtia awo ekome mli, ni mina gbokɛlɛfonyo ko ni hiɛ tsɔɔ akɛ eyɛ miishɛɛ ni esheee gbeyei. Ehɔ jɛmɛ yɛ bulɛ ni eyɔɔ kɛha Nyɔŋmɔ mla hewɔ, ehala tsuŋwoo kɛ ekolɛ gbele moŋ fe ni eeefɔse mɛi krokomɛi ala eshwie shi. Eji Yehowa Odasefoi lɛ ateŋ mɔ kome. Ahe ebii yɛ edɛŋ ni ágbe eŋa. Eekpa gbɛ akɛ abaagbe lɛ hu tamɔ agbe eŋa lɛ. Gbii 14 gbɛfaa lɛ ha mina misɔlemɔi lɛ ahetoo, ejaakɛ nɛkɛ gbɛfaa ni kɛ mɔ yaa gbele mli nɛɛ nɔŋŋ mli miná naanɔ wala he hiɛnɔkamɔ lɛ yɛ.”
21 Beni ajie lɛ kɛjɛ Auschwitz, “jatai abuu,” taakɛ etsɛ jɛmɛ lɛ mli lɛ kɛ ebaptisimɔ sɛɛ lɛ, nyɛminuu nɛɛ kɛ Yehowa Odasefoi lɛ atɛŋ mɔ kome ni lɛ hu awo lɛ tsuŋ, ni etsɛ hu na amanehulu yɛ Dachau gbokɛlɛfoi aŋsaraŋ lɛ bote gbalashihilɛ mli. Beni nyɛmiyoo nɛɛ yɔɔ jɛmɛ lɛ ni enu akɛ amɔ etsɛ kɛ enyɛmiyoo fioo ko hu. Etsɔɔ bɔ ni enu he eha lɛ mli akɛ: “Mihao waa diɛŋtsɛ. Kɛkɛ ni gbi ko beni wɔto sɛrɛnɛɛ kɛmiimɛ hejuu lɛ, minu gbee ko ni miitsɛ wiemɔi kɛmiijɛ Abɛi 3:5, 6 . . . Egbɛɛ tamɔ gbee ko ni miiba kɛmiijɛ ŋwɛi. No pɛ he hiaa mi koni manyɛ madamɔ minaji anɔ ekoŋŋ.” Yɛ anɔkwale mli lɛ, gbee lɛ ji gbokɛlɛfonyo kroko gbee, ni eeti ŋmalɛ nɛɛ mli wiemɔi lɛ amli eekɛɛ, shi nɔ ni ba nɛɛ maa hewalɛ ni Nyɔŋmɔ Wiemɔ lɛ baanyɛ ana yɛ wɔnɔ lɛ nɔ mi. (Hebribii 4:12) Eba akɛ Yehowa gbee kɛ hewalɛ aaawie atsɔɔ wɔ ŋmɛnɛ kɛtsɔ wɔ 1994 afi ŋmalɛ lɛ nɔ: “Okɛ ohiɛ afɔ Yehowa nɔ kɛ otsui fɛɛ”!
[Shishigbɛ niŋmai]
a Kwɛmɔ “Trusting Jehovah With All My Heart,” ni Claude S. Goodman ŋma yɛ The Watchtower, December 15, 1973, lɛ baafai 760-5 lɛ.
b Kwɛmɔ “Determined to Praise Jehovah,” ni Harry Peterson gba, ni aŋma yɛ The Watchtower, July 15, 1968 nɔ lɛ baafai 437-40 lɛ.
c Kwɛmɔ “Jehovah Does Not Forsake His Servants” taakɛ Matsue Ishii gba ni yɔɔ The Watchtower, May 1, 1988, baafai 21-5 lɛ.
d Kwɛmɔ sane, “Deliverance! Proving Ourselves Grateful,” taakɛ Max Liebster gba yɛ The Watchtower, October 1, 1978 lɛ baafai 20-4 lɛ.
◻ Mɛɛ ŋaawoo nɛkɛ akɛha yɛ Abɛi awolo lɛ mli?
◻ Hiɛ ni akɛfɔɔ Yehowa nɔ lɛ baa sɛɛnamɔ kɛhaa wɔ yɛ mɛɛ gbɛ nɔ?
◻ Mɛni yɔɔ Yehowa ni wɔɔkpasa lɛ mli?
◻ Mɛni hewɔ esa akɛ wɔkai Yehowa yɛ wɔgbɛi fɛɛ mli lɛ?
◻ Yehowa jajeɔ wɔtempɔŋi lɛ yɛ mɛɛ gbɛ nɔ?
[Nikasemɔ lɛ he Sanebimɔi]
[Mfoniri ni yɔɔ baafa 15]
Maŋtsɛyeli lɛ he shɛɛ sane ni ŋɔɔ lɛ gbalaa gbɔmɛi ni yɔɔ tsuijurɔ