Ye Obua Obi Ni Eye Afii Nyɔŋma-kɛ-etɛ Kɛyaa lɛ ni Eya Nɔ

 1, 2. Mɛɛ kaai, ni mɛɛ miishɛɛ hu afii nyɔŋma-kɛ-etɛ beaŋ kɛyaa baanyɛ lɛ ekɛba?

KƐ OYƐ bi ni eye afii nyɔŋma-kɛ-etɛ kɛyaa lɛ, esoro lɛ kwraa yɛ mɔ ni eye afii enumɔ loo afii nyɔŋma he. Afii nyɔŋma-kɛ-etɛ beaŋ kɛyaa lɛ kɛ amɛ diɛŋtsɛ amɛkaai kɛ naagbai baa, shi amɛbaanyɛ amɛkɛ miishɛɛ kɛ nyɔmɔwoi hu aba. Nɔkwɛmɔ nii tamɔ Yosef, David, Yosia, kɛ Timoteo tsɔɔ akɛ gbekɛbii baanyɛ atsu amɛ gbɛnaa nii ahe nii, ni amɛna amɛkɛ Yehowa teŋ wekukpaa kpakpa. (1 Mose 37:2-11; 1 Samuel 16:11-13; 2 Maŋtsɛmɛi 22:3-7; Bɔfoi lɛ Asaji 16:1, 2) Anaa anɔkwale ni sane nɛɛ ji mɛi ni eye afii nyɔŋma-kɛ-etɛ kɛyaa lɛ ateŋ mɛi pii ahe. Ekolɛ, ole amɛteŋ mɛi komɛi.

² Shi kɛlɛ, afii nyɔŋma-kɛ-etɛ kɛyaa nɛɛ feɔ haomɔ afii kɛhaa mɛi komɛi. Obalahii kɛ obalayei bibii naa henumɔŋ bei ni ŋɔɔ kɛ bei ni eŋɔɔɔ. Ekolɛ gbekɛbii hii kɛ yei ni eye afii nyɔŋma-kɛ-etɛ kɛyaa lɛ baasumɔ ni amɛna heyeli babaoo, ni ekolɛ amɛbaate shi amɛwo husui ni amɛfɔlɔi efolɔ eha amɛ lɛ. Shi kɛlɛ, nɛkɛ gbekɛbii nɛɛ jeee mɛi ni yɔɔ niiashikpamɔ babaoo, ni amɛfɔlɔi ayelikɛbuamɔ ni suɔmɔ, kɛ tsuishitoo yɔɔ mli he miihia amɛ. Hɛɛ, afii nyɔŋma-kɛ-etɛ beaŋ kɛyaa baanyɛ afee miishɛɛ afii, shi amɛbaanyɛ amɛkɛ yiŋfutumɔ hu aba—yɛ fɔlɔi kɛ gbekɛbii ni ena nakai afii kɛyaa lɛ agbɛfaŋ. Te aaafee tɛŋŋ aye abua gbekɛbii yɛ nɛkɛ afii nɛɛ amli?

 3. Fɔlɔi baanyɛ aha amɛbii ni miidara lɛ hegbɛ fɛfɛo yɛ amɛshihilɛ mli yɛ mɛɛ gbɛ nɔ?

³ Fɔlɔi ni nyiɛɔ Biblia ŋaawoo sɛɛ lɛ kɛ hegbɛ ni hi fe fɛɛ haa amɛshwiei ni eshɛ obalahii kɛ obalayei bibiiaŋ lɛ koni amɛkɛha amɛshihilɛ aye omanye kɛtsɔ nakai kaai ni kɛ amɛ yaa onukpa tsɔmɔ he gbɛnaa nii amli lɛ mli. Akɛ omanyeyeli ejɔɔ fɔlɔi kɛ mɛi ni eye afii nyɔŋma-kɛ-etɛ kɛyaa, ni kɛ Biblia shishitoo mlai tsuɔ nii kutuu lɛ yɛ shikpɔji fɛɛ nɔ yɛ bei fɛɛ mli.—Lala 119:1.

 4. Mɛni hewɔ teemɔŋ saji ahe sanegbaa he hiaa waa yɛ afii nyɔŋma-kɛ-etɛ namɔ mli kɛyaa lɛ?

⁴ Biblia lɛ kɛɔ akɛ: “Kɛ ajinatoo bɛ lɛ, yiŋtoi feɔ yaka.” (Abɛi 15:22) Kɛji teemɔŋ saji ahe sanegbaa he miihia beni gbekɛbii lɛ darako kɛshɛko nɛkɛ lɛ, no lɛ ehe miihia waa titri beni amɛye afii nyɔŋma-kɛ-etɛ kɛyaa—beni efɔɔ kaa akɛ gbekɛbii kɛ be fioo pɛ hiɔ shia, ni amɛkɛ amɛskul nanemɛi kɛ mɛi krokomɛi hiɔ shi be babaoo lɛ. Kɛ teemɔŋ saji ahe sanegbaa—ni ji sanegbaa ni yɔɔ faŋŋ ni anɔkwayeli yɔɔ mli—bɛ gbekɛbii kɛ fɔlɔi ateŋ lɛ, no lɛ gbekɛbii ni eye afii nyɔŋma-kɛ-etɛ kɛyaa lɛ baanyɛ atsɔmɔ gbɔi yɛ shia lɛ mli. No hewɔ lɛ mɛɛ gbɛ nɔ aaatsɔ aha sanegbaa gbɛi ahi shi daa?

 5. Te awoɔ obalahii kɛ obalayei bibii lɛ hewalɛ ni amɛsusu sanegbaa ni aaahi amɛkɛ amɛfɔlɔi ateŋ lɛ he amɛha tɛŋŋ?

⁵ Esa akɛ obalahii kɛ obalayei bibii nɛɛ kɛ fɔlɔi lɛ fɛɛ atsu amɛ gbɛfaŋnɔ he nii yɛ enɛ mli. Eji anɔkwale akɛ, ekolɛ ebaawa kɛha obalahii kɛ obalayei bibii ni miidara lɛ akɛ amɛkɛ amɛfɔlɔi aaagba sane, fe bɔ ni amɛfeɔ beni amɛdarako nakai lɛ. Shi fɛɛ sɛɛ lɛ, kaimɔ akɛ “he ni maŋ kudɔmɔ bɛ lɛ, maŋ gbeɔ shi; shi ŋaawolɔi pii lɛ, toiŋjɔlɛ yɛ mli.” (Abɛi 11:14) Wiemɔi nɛɛ kɔɔ mɔ fɛɛ mɔ he, gbekɛbii kɛ onukpai fɛɛ. Gbekɛbii ni yeko afii nyɔŋmai enyɔ, ni yooɔ enɛ lɛ baanu shishi akɛ, gbɛtsɔɔmɔ ni jɛ ŋaalee mli he miihia amɛ lolo, ejaakɛ amɛkɛ saji ni yɔɔ hwanyaŋŋ diɛŋtsɛ miikpe fe bei ni eho lɛ. Esa akɛ amɛyoo akɛ amɛfɔlɔi ni heɔ yeɔ lɛ ahe esa jogbaŋŋ akɛ ŋaawolɔi, ejaakɛ amɛna shihilɛ mli niiashikpamɔ babaoo fe amɛ, ni amɛjie mɔ hesusumɔ ni jɛɔ suɔmɔ mli kpo afii babaoo. No hewɔ lɛ, he ni amɛshɛ yɛ amɛshihilɛ mli nɛɛ, gbekɛbii ni le nii lɛ tsiŋ amɛhe kɛjɛŋ amɛfɔlɔi ahe.

 6. Mɛɛ su fɔlɔi ni yɔɔ nilee kɛ suɔmɔ lɛ baaná yɛ sanegbaa ni aaahi amɛkɛ amɛbii obalahii kɛ obalayei bibii ateŋ lɛ he?

⁶ Sanegbaa ni yɔɔ faŋŋ tsɔɔ akɛ fɔlɔ lɛ baabɔ mɔdɛŋ waa ni ena deka kɛji gbekɛ lɛ nuɔ he akɛ ehe miihia ni ekɛ lɛ awie. Kɛ fɔlɔ ji bo lɛ, kwɛmɔ akɛ sanegbaa hegbɛ yɛ be fɛɛ be, kɛ hoo lɛ, yɛ ogbɛfaŋ. Ekolɛ enɛ feemɔ efeŋ mlɛo. Biblia lɛ kɛɔ akɛ “dioofeemɔ be yɛ, ni wiemɔ be yɛ.” (Jajelɔ 3:7) Be mli ni obi lɛ nuɔ he akɛ eetao ekɛ bo awie lɛ, no mli lɛ ekolɛ no ji be ni osumɔɔ ni ofee dioo. Ekolɛ oto nakai be lɛ kɛha oteemɔŋ nikasemɔ, hejɔɔmɔ, aloo shia nitsumɔ ko. Kɛlɛ, kɛji obi lɛ miitao ni ekɛ bo awie lɛ, bɔɔ mɔdɛŋ ni otsake ogbɛjianɔtoo mli fioo ni onyɛ obo lɛ toi. Kɛ jeee nakai lɛ, ekaŋ akɛ ekɛ bo aaawie dɔŋŋ. Kaimɔ Yesu nɔkwɛmɔ nɔ lɛ. Be ko lɛ, eto be eha ehe kɛha hejɔɔmɔ. Shi beni gbɔmɛi babua amɛhe naa babaoo ni amɛmiitao amɛbo lɛ toi lɛ, etsi ehejɔɔmɔ lɛ eto ni ebɔi amɛ nitsɔɔmɔ. (Marko 6:30-34) Gbekɛbii pii yooɔ akɛ deka bɛ amɛfɔlɔi ashihilɛ mli, shi esa akɛ amɛna nɔmimaa akɛ amɛfɔlɔi yɛ kɛha amɛ kɛji amɛhe miihia amɛ. No hewɔ lɛ, na deka oha amɛ ni onu amɛ shishi.

 7. Mɛni ehe hiaa ni fɔlɔi atsi amɛhe kɛjɛ he?

⁷ Bɔɔ mɔdɛŋ ni okai bɔ ni oshihilɛ ji beni oji gbekɛ lɛ, ni okaha shwɛmɔ kɛ naaŋmɔlɔwoo su ni oyɔɔ lɛ miilaaje! Esa akɛ fɔlɔi ana amɛbii lɛ kɛ shihilɛ he miishɛɛ. Kɛji be yɛ ni fɔlɔi lɛ kɛfeee nɔ ko lɛ, te amɛtsuɔ he nii amɛhaa tɛŋŋ? Kɛ amɛsumɔɔ ni amɛkɛ amɛbe ni amɛkɛfeee nɔ ko nɛɛ atsu nii kɛfee nibii ni amɛweku lɛ fataaa he be fɛɛ be lɛ, amɛbii obalahii kɛ obalayei bibii lɛ baayoo enɛ oya. Kɛ gbekɛbii ni miidara kɛmiitsɔmɔ onukpai lɛ mu sane naa akɛ amɛ skul nanemɛi susuɔ amɛhe babaoo fe bɔ ni amɛfɔlɔi feɔ lɛ, no lɛ bɔ fɛɛ bɔ ni fee lɛ, amɛbaana naagbai.

 8. Mɛɛ gbɛ nɔ abaatsɔ aha gbekɛbii lɛ aná anɔkwayeli, nitsumɔ ni wa, kɛ jeŋba kpakpa he miishɛɛ?

⁸ Kɛ fɔlɔi lɛ dũko anɔkwayeli kɛ nitsumɔ kpakpa he hiɛsɔɔ amɛwoko amɛbii lɛ amli momo lɛ, no lɛ esa akɛ amɛtsɔ gbɛ fɛɛ gbɛ nɔ amɛfee nakai yɛ be mli ni amɛna afii nyɔŋma-kɛ-etɛ kɛyaa. (1 Tesalonikabii 4:11; 2 Tesalonikabii 3:10) Ehe miihia hu ni amɛna nɔmimaa akɛ, amɛbii lɛ jɛɔ amɛtsui muu fɛɛ mli amɛheɔ bɔ ni ehe hiaa ni ahi jeŋba kpakpa kɛ hetsemɔ shihilɛ mli lɛ amɛyeɔ. (Abɛi 20:11) Fɔlɔ kɛ ebii wieɔ nɛkɛ nibii ahe jogbaŋŋ babaoo kɛtsɔɔ nɔkwɛmɔ nɔ nɔ̃. Bɔ ni abaanyɛ “ashi wiemɔ lɛ sɛɛ ni atsɔ yei lɛ ajeŋba nɔ ni nine ashɛ” wumɛi ni heee yeee lɛ anɔ lɛ, nakai nɔŋŋ gbekɛbii lɛ hu baanyɛ akase shishitoo mlai ni ja kɛtsɔ amɛfɔlɔi ajeŋba nɔ. (1 Petro 3:1) Shi kɛlɛ, nɔkwɛmɔ nɔ folo ni aaafee lɛ kɛkɛ faaa, ejaakɛ gbekɛbii naa nɔkwɛmɔ nii gbohii kɛ lakamɔ wiemɔi babaoo yɛ he fɛɛ he kɛji amɛshi shia. No hewɔ lɛ, ehe miihia ni fɔlɔi ni susuɔ amɛbii ahe waa lɛ ale nɔ ni amɛbii obalahii kɛ obalayei bibii lɛ susuɔ yɛ nɔ ni amɛnaa kɛ nɔ ni amɛnuɔ lɛ he, ni enɛ biɔ sanegbaa ni sɛɛnamɔ yɔɔ he waa.—Abɛi 20:5.

 9, 10. Mɛni hewɔ esa akɛ fɔlɔi lɛ akwɛ ni amɛtsɔɔ amɛbii lɛ bɔlɛnamɔ he saji lɛ, ni mɛɛ gbɛ nɔ amɛaatsɔ amɛfee enɛ?

⁹ Enɛ feɔ anɔkwale titri yɛ bɔlɛnamɔ he saji ahe. Fɔlɔi, ani nyɛhiɛ gboɔ akɛ nyɛkɛ nyɛbii lɛ aaawie bɔlɛnamɔ he saji ahe? Kɛ nyɛhiɛ gboɔ po lɛ, nyɛbɔa mɔdɛŋ nyɛfea, ejaakɛ bɔ fɛɛ bɔ ni fee lɛ, nyɛbii lɛ baakase bɔlɛnamɔ he saji kɛjɛ mɔ kroko ŋɔɔ. Kɛ amɛkaseee kɛjɛɛɛ oŋɔɔ lɛ, namɔ le saji ni ejaaa ni amɛaakase? Yɛ Biblia lɛ mli lɛ, efeee Yehowa hiɛgbele akɛ eeewie saji ni kɔɔ bɔlɛnamɔ he lɛ ahe, ni nakai nɔŋŋ esaaa akɛ efeɔ fɔlɔi hu hiɛgbele.—Abɛi 4:1-4; 5:1-21.

¹⁰ Wɔdaa shi waa, akɛ bɔlɛnamɔ mli jeŋba he gbɛtsɔɔmɔ ni yɔɔ faŋŋ yɛ Biblia lɛ mli, ni Buu Mɔɔ Asafo lɛ eŋmala saji babaoo ni yeɔ ebuaa yɛ enɛ he, ni tsɔɔ akɛ anyɛɔ akɛ nɛkɛ gbɛtsɔɔmɔi nɛɛ tsuɔ nii lolo yɛ ŋmɛnɛŋmɛnɛ je nɛɛ mli. Mɛni hewɔ okɛ yelikɛbuamɔ nɛɛ tsuuu nii? Akɛ nɔkwɛmɔ nɔ lɛ, mɛni hewɔ okɛ obinuu loo obiyoo lɛ etĩii Questions Young People Ask—Answers That Work wolo lɛ fã ni ji “Bɔlɛnamɔ kɛ Jeŋba Kpakpa” lɛ mli? Nɔ ni baanyɛ ajɛ mli aba lɛ baanyɛ afee bo naakpɛɛ kɛ miishɛɛ.

11. Mɛni ji gbɛ ni mɔɔ shi fe fɛɛ ni fɔlɔi baatsɔ nɔ atsɔɔ amɛbii lɛ bɔ ni asɔmɔɔ Yehowa?

¹¹ Mɛni ji saneyitso ni he hiaa fe fɛɛ ni esa akɛ fɔlɔi kɛ amɛbii agba he sane? Bɔfo Paulo tsĩ tã beni eŋma akɛ: “Nyɛlɛa [nyɛbii lɛ] yɛ Nuntsɔ [Yehowa, NW] tsɔsemɔ kɛ ŋaawoo lɛ mli.” (Efesobii 6:4) Ehe miihia ni gbekɛbii aya nɔ akase Yehowa he nii. Titri lɛ, esa akɛ amɛkase suɔmɔ ni amɛaaná amɛha lɛ, ni esa akɛ amɛsumɔ akɛ amɛaasɔmɔ lɛ. Yɛ biɛ hu lɛ, abaanyɛ atsɔ nɔkwɛmɔ nɔ nɔ atsɔɔ nii babaoo. Kɛ gbekɛbii ni miidara kɛmiitsɔmɔ onukpai lɛ na akɛ amɛfɔlɔi sumɔɔ Nyɔŋmɔ ‘kɛ amɛtsui fɛɛ kɛ amɛsusuma fɛɛ kɛ amɛjwɛŋmɔ fɛɛ,’ ni enɛ woɔ yibii kpakpai yɛ fɔlɔi lɛ ashihilɛ mli lɛ, no lɛ ekolɛ ebaaná amɛnɔ hewalɛ ni amɛ hu amɛfee nakai. (Mateo 22:37) Nakai nɔŋŋ hu, kɛ gbekɛbii na akɛ amɛfɔlɔi hiɛ susumɔ kpakpa yɛ heloonaa ninamɔ he, ni amɛkɛ Nyɔŋmɔ Maŋtsɛyeli lɛ yeɔ klɛŋklɛŋ gbɛhe lɛ, no lɛ ebaaye ebua amɛ ni amɛná nakai su lɛ eko.—Jajelɔ 7:12; Mateo 6:31-33.

12, 13. Kɛji weku nikasemɔ baaye omanye lɛ, mɛɛ otii komɛi esa akɛ aha ehi jwɛŋmɔ mli?

¹² Daa otsi weku Biblia mli nikasemɔ feemɔ ji yelikɛbuamɔ ni hi fe fɛɛ yɛ mumɔŋ sui kpakpai ni akɛ gbekɛbii aaagba he sane lɛ mli. (Lala 119:33, 34; Abɛi 4:20-23) Nikasemɔ ni tamɔ nɛkɛ ni aaafee daa lɛ he miihia. (Lala 1:1-3) Esa akɛ fɔlɔi kɛ amɛbii fɛɛ ayoo akɛ esa akɛ ato nibii krokomɛi ahe gbɛjianɔ kɛbɔle weku nikasemɔ lɛ he, shi jeee nikasemɔ lɛ moŋ kɛbɔle nibii krokomɛi ahe. Kɛfata he lɛ, kɛ weku nikasemɔ lɛ baamɔ shi jogbaŋŋ lɛ, no lɛ su kpakpa ni aaana yɛ he lɛ he miihia. Tsɛ ko wie akɛ: “Nɔ titri ni he hiaa ji ni nɔkwɛlɔ lɛ awo miishɛɛ shihilɛ, shi kɛlɛ bulɛ yɔɔ mli he hewalɛ beni afeɔ weku nikasemɔ lɛ—yɛ ŋaa gbɛ nɔ, shi jeee kɛ shwɛmɔ. Ekolɛ jeee be fɛɛ be eeefee mlɛo akɛ aaaŋmɛ pɛpɛɛpɛ yɛ gbɛ ni ja nɔ, ni ehe baahia ni ajaje gbekɛbii lɛ asu yɛ be kɛ bei amli. Kɛ nibii eyaaa nɔ jogbaŋŋ shikome loo shii enyɔ ko lɛ, miamɔ ohiɛ ni okpa gbɛ akɛ ebaahi be kroko.” Nɛkɛ tsɛ nɛɛ nɔŋŋ wie akɛ, kɛ eesɔle ni amɛje nikasemɔ shishi daa lɛ, ejeɔ gbɛ ebiɔ yelikɛbuamɔ kɛjɛɔ Yehowa ŋɔɔ koni eha mɛi fɛɛ ni fata he yɛ nikasemɔ lɛ mli lɛ ana jwɛŋmɔ kpakpa yɛ he.—Lala 119:66.

¹³ Fɔlɔi ni heɔ yeɔ lɛ agbɛnaa nii ji weku nikasemɔ lɛ feemɔ. Eji anɔkwale akɛ, fɔlɔi komɛi yɛ ni amɛhe esako tsɔ̃ kɛ nitsɔɔmɔ, ni ekolɛ ebaawa kɛha amɛ akɛ amɛaatao gbɛi ni amɛaatsɔ nɔ amɛha weku nikasemɔ lɛ afee miishɛɛ. Shi kɛlɛ, kɛ osumɔɔ obii ni miidara lɛ asane “yɛ nitsumɔ kɛ anɔkwale mli” lɛ, no lɛ obaasumɔ ni oye obua amɛ yɛ heshibaa kɛ anɔkwayeli gbɛ nɔ ni amɛya hiɛ yɛ mumɔŋ. (1 Yohane 3:18) Ekolɛ amɛbaawie nibii komɛi ahe yɛ be kɛ bei amli moŋ, shi eka shi faŋŋ akɛ amɛbaana bɔ ni osusuɔ amɛ hilɛ-kɛhamɔ he lɛ jogbaŋŋ.

14. Mɛɛ gbɛ nɔ abaanyɛ akɛ 5 Mose 11:18, 19 atsu nii yɛ, kɛ akɛ obalahii kɛ obalayei bibii miigba mumɔŋ nibii ahe sane?

¹⁴ Jeee weku nikasemɔ lɛ ji be mli pɛ ni akɛgbaa nibii ni he hiaa waa yɛ mumɔŋ lɛ ahe sane. Ani okaiɔ Yehowa famɔ ni ekɛha fɔlɔi lɛ? Ekɛɛ amɛ akɛ: “Nyɛŋɔa miwiemɔi nɛɛ nyɛtoa nyɛtsuii amli kɛ nyɛsusumai amli, ni nyɛŋɔfee kaimɔ nii nyɛfimɔ nyɛ nijiashi, ni amɛtsɔmɔ hiɛnaa taramɔ nii yɛ nyɛhiŋmɛii ateŋ. Ni nyɛŋɔtsɔɔ nyɛbii, ni nyɛwie he, beni otá oshia kɛ beni onyiɛ gbɛ teŋ kɛ beni okã shi kɛ beni ote shi.” (5 Mose 11:18, 19; kwɛmɔ 5 Mose 6:6, 7 hu.) Enɛ etsɔɔɔ akɛ belɛ esa akɛ fɔlɔi ashiɛ atsɔɔ amɛbii be fɛɛ be. Shi esa akɛ weku yitso ni yɔɔ suɔmɔ lɛ hiɛ ahi ehe nɔ be fɛɛ be, kɛha hegbɛi ni ekɛtswa bɔ ni eweku lɛ mumɔŋ shidaamɔ ji lɛ ema shi jogbaŋŋ.

15, 16. (a) Mɛni ji tsɔsemɔ? (b) Namɔ gbɛnaa nii ji tsɔsemɔ nɛɛ kɛhamɔ, ni namɔ ebafeɔ sɔ̃ ni kã enɔ akɛ ekwɛ akɛ abaabo tsɔsemɔ nɛɛ toi?

¹⁵ Tsɔsemɔ ji nitsɔɔmɔ ni jajeɔ mɔ, ni wiemɔ-kɛ-tsɔɔmɔ fata he. Tsɔsemɔ hiɛ shishinumɔ ni tsɔɔ jajemɔ babaoo ni akɛaaha, fe toigbalamɔ—eyɛ mli akɛ ekolɛ toigbalamɔ baanyɛ aba sane lɛ mli. Tsɔsemɔ he bahia obii lɛ beni amɛdarako kɛshɛko he ni amɛshɛ nɛɛ, ni amrɔ nɛɛ ní amɛye afii nyɔŋma-kɛ-etɛ kɛyaa lɛ, ehe miihia amɛ lolo yɛ gbɛ ko nɔ, ekolɛ ehe miihia amɛ babaoo po. Obalahii kɛ obalayei bibii ni yɔɔ nilee lɛ le enɛ akɛ eji anɔkwale.

¹⁶ Biblia lɛ kɛɔ akɛ: “Buulu gbeɔ etsɛ tsɔsemɔ he guɔ; shi mɔ ni buɔ kamɔ lɛ, ehiɛ tɛ̃ɔ.” (Abɛi 15:5) Wɔkaseɔ nii babaoo kɛjɛɔ ŋmalɛ nɛɛ mli. Etsɔɔ akɛ akɛ tsɔsemɔ baaha. Gbekɛ ni eye afii nyɔŋma-kɛ-etɛ kɛyaa lɛ ‘nyɛŋ abu kamɔ’ kɛji akãaa lɛ. Yehowa kɛ tsɔsemɔ ni akɛaaha lɛ he gbɛnaa nii fɔ̃ɔ fɔlɔi anɔ, titri lɛ tsɛ lɛ. Shi, sɔ̃ ni ji nakai tsɔsemɔ lɛ toiboo kã gbekɛ ni eye kɛjɛ afii nyɔŋma-kɛ-etɛ kɛyaa nɛɛ nɔ. Kɛ ebo etsɛ kɛ enyɛ tsɔsemɔ ni nilee yɔɔ mli lɛ toi lɛ, ebaakase nibii babaoo, ni ebaatɔ̃ tɔ̃mɔi fioo pɛ. (Abɛi 1:8) Biblia lɛ kɛɔ akɛ: “Mɔ ni ekpɛlɛɛɛ tsɔsemɔ lɛ, ohia kɛ hiɛgbele ji enɔ; shi mɔ ni buɔ kamɔ lɛ, awoɔ ehiɛ nyam.”—Abɛi 13:18.

17. Mɛɛ pɛpɛɛpɛ-ŋmɛɛ esa akɛ fɔlɔi kɛma amɛhiɛ akɛ oti kɛ amɛkɛ tsɔsemɔ miiha?

¹⁷ Kɛ aatsɔse obalahii kɛ obalayei bibii lɛ, esa akɛ fɔlɔi lɛ aŋmɛ pɛpɛɛpɛ. Esa akɛ amɛkwɛ ni amɛkafee kpɛŋŋ, bɔ ni ebaawo amɛbii lɛ amlifu, ni ekolɛ efite hekɛnɔfɔɔ ni amɛbii nɛɛ yɔɔ yɛ amɛ diɛŋtsɛ amɛmli lɛ po. (Kolosebii 3:21) Ni kɛlɛ, esaaa ni fɔlɔi lɛ ŋmɛɔ nɔ fɛɛ nɔ feemɔ gbɛ, ni no ha amɛbii bibii lɛ laaje tsɔsemɔ ni he hiaa ni sa akɛ amɛna lɛ. Nɛkɛ nɔ fɛɛ nɔ feemɔ gbɛ ni aŋmɛɔ nɛɛ baanyɛ afite nii waa. Abɛi 29:17 kɛɔ akɛ: “Tsɔsemɔ obi, ni eeeha ohe ajɔo; ni eeeha osusuma mii ashɛ ehe.” Shi kɛlɛ, kuku 21 kɛɔ akɛ: “Kɛ mɔ ko hiɛ etsulɔ fɔfɔɔle kɛjɛ egbekɛbiiashi lɛ, kɛ fee sɛɛ lɛ, ebuuu nɔ̃.” Eyɛ mli akɛ ŋmalɛ kuku nɛɛ miiwie tsulɔ he moŋ, shi ekɔɔ gbekɛ fɛɛ gbekɛ ni yɔɔ weku lɛ mli lɛ he yɛ nakai gbɛ nɔŋŋ nɔ.

18. Tsɔsemɔ ji mɛni he odaseyeli, ni kɛ fɔlɔi kɛ tsɔsemɔ ha be fɛɛ be lɛ, ehaa atsiɔ he kɛjɛɔ mɛni he?

¹⁸ Yɛ anɔkwale mli lɛ, tsɔsemɔ kpakpa ni akɛhaa lɛ ji suɔmɔ ni fɔlɔ yɔɔ kɛha ebi lɛ nɔmimaa. (Hebribii 12:6, 11) Kɛ fɔlɔ ji bo lɛ, ole akɛ ewa akɛ aaahiɛ tsɔsemɔ ni nilee yɔɔ mli lɛ kɛhamɔ mli be fɛɛ be. Yɛ toiŋjɔlɛ namɔ hewɔ lɛ, ekolɛ ebaafee tamɔ nɔ ni eyɛ mlɛo akɛ aaaŋmɛ gbekɛ kuɛŋtilɔ ni eye afii nyɔŋma-kɛ-etɛ kɛyaa lɛ gbɛ ni efee nɔ ni etaoɔ. Shi, yɛ naagbee lɛ, fɔlɔ ni kɔɔ nɛkɛ sɛɛkpee gbɛ nɛɛ baawo nyɔmɔ kɛ weku ni ekudɔmɔ eje edɛŋ.—Abɛi 29:15; Galatabii 6:9.

19, 20. Fɔlɔi baanyɛ atsu hiɛtserɛjiemɔ kɛha amɛ obalahii kɛ obalayei bibii ahe sane lɛ he nii yɛ nilee mli yɛ mɛɛ gbɛ nɔ?

¹⁹ Be ko ni eho lɛ, kulɛ akpaa gbekɛbii agbɛ akɛ amɛaaye amɛbua kɛ shia loo ŋmɔ mli nitsumɔ. Shi ŋmɛnɛ, gbekɛbii ni eye afii nyɔŋma-kɛ-etɛ kɛyaa lɛ ateŋ mɛi pii naa bei babaoo ni amɛkɛfeee nɔ ko. Jarayeli je lɛ feɔ shwɛmɔ nibii babaoo, koni aná nɔ ko akɛ nakai be lɛ afee. Ni kɛ okɛ anɔkwale ni eji akɛ je lɛ kɛ bulɛ bibioo pɛ haa jeŋba kpakpa he tɛi ni Biblia lɛ efolɔ eshwie shi lɛ fata he lɛ, onaa faŋŋ akɛ nibii nɛɛ fɛɛ kɛ oshara baaba wɔsɛɛ.

²⁰ No hewɔ lɛ, fɔlɔ ni susuɔ saji ahe jogbaŋŋ lɛ hiɛɔ hegbɛ ni eyɔɔ, akɛ efee naagbee yiŋkpɛɛ yɛ hiɛtserɛjiemɔ he lɛ mli. Shi, ohiɛ akakpa nɔ akɛ, gbekɛ ni eye afii nyɔŋma-kɛ-etɛ kɛyaa nɛɛ miida. Daa afi lɛ, ekolɛ ebaasumɔ babaoo fe be ni eho lɛ, akɛ akɛ lɛ aye akɛ onukpa. Enɛ hewɔ lɛ, nilee yɛ mli akɛ fɔlɔ lɛ aaaha lɛ hegbɛ bɔ ni sa ni ekɛhala ehiɛtserɛjiemɔ, be mli ni edaa kɛyaa hiɛ lɛ—bei abɔ ni nɔ ni ehalaa lɛ tsɔɔ akɛ eeya hiɛ kɛmiibote mumɔŋ dalɛ mli lɛ. Bei komɛi lɛ, ekolɛ gbekɛ ni eye kɛjɛ afii nyɔŋma-kɛ-etɛ kɛyaa nɛɛ baahala nibii ni nilee bɛ mli, yɛ lala, nanemɛi, kɛ nibii krokomɛi agbɛfaŋ. Kɛ eba lɛ nɛkɛ lɛ, esa akɛ akɛ lɛ asusu he, bɔni afee ni ehala nibii nɛɛ amli ekpakpai wɔsɛɛ.

21. Hiɛshikamɔ yɛ be falɛ ni akɛwoɔ hiɛtserɛjiemɔ mli lɛ baanyɛ abu obalanyo loo obalayoo fioo lɛ he yɛ mɛɛ gbɛ nɔ?

²¹ Be falɛ enyiɛ esa akɛ ato aha hiɛtserɛjiemɔ? Yɛ shikpɔji komɛi anɔ lɛ, ahaa obalahii kɛ obalayei bibii nuɔ shishi akɛ amɛyɛ hegbɛ kɛha hiɛtserɛjiemɔ daa gbi. No hewɔ lɛ, ekolɛ gbekɛ ni miida kɛmiitsɔ onukpa agbɛnɛ lɛ baato ebe he gbɛjianɔ, bɔ ni ebaana be kɛha “hiɛtserɛjiemɔ” kɛya kɛba. Eji fɔlɔi lɛ anitsumɔ akɛ amɛha ekase akɛ esa akɛ ena be ni ekɛtsu nibii krokomɛi hu he nii, tamɔ weku lɛ, amɛ diɛŋtsɛ amɛ teemɔŋ nikasemɔ, mɛi ni edara jogbaŋŋ yɛ mumɔŋ ni amɛkɛ amɛ aaabɔ naanyo, Kristofoi akpeei, kɛ shia nitsumɔi nɛkɛ. Enɛ baatsĩ “je nɛŋ . . . ŋɔɔmɔyelii” lɛ agbɛ ni ekagbe Nyɔŋmɔ Wiemɔ lɛ.—Luka 8:11-15.

22. Esa akɛ aha hiɛtserɛjiemɔ kɛ mɛni aŋmɛ pɛpɛɛpɛ yɛ gbekɛ ni eye afii nyɔŋma-kɛ-etɛ kɛyaa lɛ shihilɛ mli?

²² Maŋtsɛ Salomo wie akɛ: “Miyoo akɛ, nɔ ko nɔ ko bɛ ni hi ha amɛ, fe nɔ ni amɛmii aaashɛ amɛhe ni amɛaafee ekpakpa yɛ amɛwala be lɛ mli. Ni asaŋ miyoo akɛ, kɛ gbɔmɔ fɛɛ gbɔmɔ aaaye ni enu, ni eye nii kpakpai amli ŋɔɔmɔ yɛ edeŋmegbomɔ fɛɛ mli lɛ, Nyɔŋmɔ nikeenii ni.” (Jajelɔ 3:12, 13) Hɛɛ, miishɛɛ ni aaaná lɛ fata shihilɛ ni ŋmɛɔ pɛpɛɛpɛ he. Shi nakai nɔŋŋ hu ji nitsumɔ ni wa. Obalahii kɛ obalayei bibii pii yɛ ŋmɛnɛ ni amɛkaseee tsui ni nyɔɔ mɔ mli, ni anáa kɛjɛɔ nitsumɔ ni wa, loo bulɛ ni mɔ nuɔ he akɛ ena eha ehe, ni jɛɔ naagba ko he nitsumɔ kɛ enaa tsabaa namɔ mli baa lɛ. Amɛteŋ mɛi komɛi yɛ ni ahaaa amɛ hegbɛ ni amɛkase ŋaa loo ninenaa nitsumɔ ko ni amɛbaanyɛ amɛkɛkwɛ amɛhe wɔsɛɛ. Biɛ ji he ni kaa diɛŋtsɛ lɛ yɔɔ kɛha fɔlɔ lɛ. Ani obaakwɛ ni obi lɛ ana hegbɛi ni tamɔ nɛkɛ? Kɛ oye omanye ni onyɛ otsɔɔ obi obalanyo loo obalayoo bɔ ni abuɔ loo anáa nitsumɔ ni wa po he miishɛɛ lɛ, ebaaha ena jwɛŋmɔ kpakpa ni kɛ sɛɛnamɔi baaha lɛ yɛ ewala be fɛɛ mli.

23. Fɔlɔi baanyɛ awo amɛbii obalahii kɛ obalayei bibii lɛ hewalɛ yɛ mɛɛ gbɛ nɔ?

²³ Kɛ onaa naagbai yɛ obi obalanyo loo obalayoo fioo lɛ he po lɛ, ŋmalɛ nɛɛ kã he eji anɔkwale lolo, akɛ: “Suɔmɔ sɛɛ efooo gbi ko gbi ko.” (1 Korintobii 13:8) Kaaha suɔmɔ ni ŋwanejee ko bɛ he akɛ onuɔ he lɛ kpojiemɔ sɛɛ fo kɔkɔɔkɔ. Bi ohe akɛ, ‘Ani mijieɔ gbekɛbii lɛ ateŋ mɔ fɛɛ mɔ yi yɛ naagbai ni enyɛɔ etsuɔ he nii loo gbɛtsii nii ni eyeɔ nɔ yɛ omanyeyeli mli lɛ he? Ani mikɛ hegbɛi ni minaa lɛ tsuɔ nii ni mikɛjieɔ suɔmɔ kɛ hiɛsɔɔ ni miyɔɔ kɛha mibii lɛ kpo, dani nakai hegbɛi lɛ jeɔ midɛŋ?’ Eyɛ mli akɛ bei komɛi lɛ, ekolɛ shishinumɔ baŋ yɛ saji komɛi ahe moŋ, shi kɛ obalahii kɛ obalayei bibii lɛ ná nɔmimaa akɛ oyɛ suɔmɔ kɛha amɛ lɛ, eka shi faŋŋ akɛ amɛbaato nakai suɔmɔ lɛ najiaŋ amɛha bo.

24. Mɛɛ Ŋmalɛ naa shishitoo mla kã he eji anɔkwale akɛ mla ni yɔɔ kɛha mɔ fɛɛ mɔ yɛ bii atsɔsemɔ mli, shi mɛni esa akɛ aha ehi jwɛŋmɔ mli?

²⁴ Shi eji anɔkwale akɛ, beni gbekɛbii daraa kɛtsɔmɔɔ onukpai lɛ, yɛ naagbee lɛ amɛbaafee yiŋkpɛi komɛi ni he hiaa waa amɛha amɛ diɛŋtsɛ amɛhe. Yɛ shihilɛ komɛi amli lɛ, ekolɛ fɔlɔi lɛ sumɔŋ nakai yiŋkpɛi lɛ. Kɛji amɛbi lɛ kpɛ eyiŋ akɛ ebaakpa Yehowa Nyɔŋmɔ sɔɔmɔ hu? Enɛ baanyɛ aba. Yehowa diɛŋtsɛ mumɔŋ bii lɛ ekomɛi po kpoo eŋaawoo, ni amɛfee amɛhe atuatselɔi. (1 Mose 6:2; Yuda 6) Jeee kɔmpiutai ji gbekɛbii lɛ, ni wɔbaanyɛ wɔha amɛfee nii bɔ ni wɔtaoɔ lɛ. Bɔɔ nii ni yɔɔ hegbɛ akɛ amɛhalaa nɔ ni amɛsumɔɔ ji amɛ, ni amɛbaabu yiŋkpɛi ni amɛfeɔ lɛ he akɔntaa amɛha Yehowa. Shi kɛlɛ, Abɛi 22:6 feɔ anɔkwale lolo, akɛ mla ko ni kã shi, akɛ: “Tsɔɔmɔ gbekɛ gbɛ ni sa akɛ etsɔ̃ nɔ, ni kɛ egbɔ hu lɛ, ejeŋ nɔ.”

25. Mɛni ji gbɛ ni hi fe fɛɛ ni fɔlɔi aaatsɔ nɔ ajie hiɛsɔɔ kpo amɛtsɔɔ Yehowa, yɛ hegbɛ ni amɛna akɛ fɔlɔi lɛ he?

²⁵ No hewɔ lɛ, jiemɔ suɔmɔ babaoo kpo otsɔɔ obii lɛ. Bɔɔ mɔdɛŋ fɛɛ ni ooonyɛ ni onyiɛ Biblia shishitoo mlai asɛɛ yɛ amɛtsɔsemɔ mli. Feemɔ Nyɔŋmɔ gbeyeishemɔ jeŋba kpakpa he nɔkwɛmɔ nɔ fɛfɛo oha amɛ. Kɛtsɔ no nɔ lɛ, obaaha obii lɛ aná hegbɛ ni hi fe fɛɛ ni amɛkɛaadara kɛtsɔmɔ onukpai ni sheɔ Nyɔŋmɔ gbeyei, ni tsuɔ gbɛnaa nii ahe nii. Enɛ ji gbɛ kpakpa ni hi fe fɛɛ ni fɔlɔi aaatsɔ nɔ ajie hiɛsɔɔ kpo amɛtsɔɔ Yehowa yɛ hegbɛ ni amɛna akɛ fɔlɔi lɛ he.