Yitso Enumɔ
Anɔkwa Nyɔŋmɔ lɛ Gba Kpɔmɔ Efɔ̃ Shi
1, 2. (a) Mɛɛ sanebimɔi Yehowa tée lɛ shi? (b) Yehowa baama nɔ mi akɛ lɛ ekome pɛ ji anɔkwa Nyɔŋmɔ lɛ yɛ mɛɛ gbɛ nɔ?
‘NAMƆ ji anɔkwa Nyɔŋmɔ lɛ?’ Ábi sane nɛɛ aahu yɛ afii ohai abɔ ní eho lɛ mli fɛɛ. Belɛ, kwɛ bɔ ni eyɔɔ naakpɛɛ akɛ Yehowa diɛŋtsɛ tée nakai sanebimɔ lɛ shi yɛ Yesaia wolo lɛ mli! Eefɔ̃ adesai anine ní amɛsusu he akɛ: ‘Ani Yehowa pɛ ji anɔkwa Nyɔŋmɔ lɛ? Aloo ani nyɔŋmɔ ko yɛ ní baanyɛ ate shi awo egbɛhe lɛ?’ Yɛ sanegbaa lɛ shishijee sɛɛ lɛ, Yehowa kɛ tɛi ní nilee yɔɔ mli ní efolɔ eshwie shi, ní aaadamɔ nɔ ana Nyɔŋmɔ ní eji lɛ he sane lɛ naa lɛ ha. Sane naataamɔ ní akɛha lɛ haa gbɔmɛi ní yɔɔ jalɛ tsuii lɛ muɔ saji anaa bɔ ni anyɛŋ ate shi awo.
2 Yɛ Yesaia gbii lɛ amli lɛ, no mli lɛ ajáa amagai waa diɛŋtsɛ. Kwɛ bɔ ni atsɔɔ sɛɛnamɔ ní bɛ amaga jamɔ mli kwraa lɛ, yɛ sanegbaa ní mli kã shi faŋŋ ní aŋma afɔ̃ shi yɛ Yesaia gbalɛ wolo lɛ yitso 44 lɛ mli! Ni kɛlɛ, Nyɔŋmɔ diɛŋtsɛ webii lɛ eyagbee wɔji ajamɔ he tsɔne lɛ mli. No hewɔ lɛ, taakɛ wɔna yɛ Yesaia wolo lɛ yitsei ní tsɔ hiɛ lɛ amli lɛ, Israelbii lɛ ebatsɔmɔ mɛi ní sa toigbalamɔ ní mli wa waa. Shi kɛlɛ, Yehowa jɛ suɔmɔ mli ekɛ nɔmimaa ha maŋ lɛ akɛ eyɛ mli akɛ ebaaŋmɛ Babilonbii lɛ gbɛ ní amɛbaŋɔ ewebii lɛ kɛya nomŋɔɔ mli moŋ, shi ebaakpɔ̃ amɛ yɛ lɛ diɛŋtsɛ ebe ní eto mli. Gbalɛi ní kɔɔ amɛkpɔ̃mɔ kɛmiijɛ nomŋɔɔ mli kɛ anɔkwa jamɔ ní aaato shishi ekoŋŋ lɛ amlibaa he lɛ baama nɔ mi bɔ ni anyɛŋ aje he ŋwane akɛ, Yehowa kome pɛ ji anɔkwa Nyɔŋmɔ lɛ, ni ebaawo mɛi fɛɛ ní jáa jeŋmaji lɛ anyɔŋmɔi ní wala bɛ amɛmli lɛ hiɛgbele.
3. Yesaia gbalɛ wiemɔi lɛ yeɔ ebuaa Kristofoi ŋmɛnɛ yɛ mɛɛ gbɛ nɔ?
3 Gbalɛi ní yɔɔ Yesaia wolo lɛ fã nɛɛ mli lɛ kɛ amɛmlibaa ní ba yɛ blema beaŋ lɛ woɔ Kristofoi ni yɔɔ ŋmɛnɛ lɛ ahemɔkɛyeli hewalɛ. Kɛfata he lɛ, Yesaia gbalɛ wiemɔi lɛ yɛ amɛmlibaa yɛ wɔgbii nɛɛ amli kɛ wɔsɛɛ be mli po. Ni nakai nifeemɔi lɛ kɔɔ kpɔ̃lɔ ko kɛ kpɔ̃mɔ ní da kwraa fe nibii ní agba afɔ̃ shi kɛha Nyɔŋmɔ webii ní hi shi yɛ blema lɛ ahe.
Hiɛnɔkamɔ Kɛha Mɛi ní Ji Yehowa Webii Lɛ
4. Yehowa wo Israel hewalɛ yɛ mɛɛ gbɛ nɔ?
4 Yitso 44 lɛ jeɔ shishi yɛ gbɛ kpakpa nɔ kɛ kaimɔ ní ekɛha akɛ Nyɔŋmɔ ehala Israel, ni ejie amɛ kwraa kɛjɛ jeŋmaji ní bɔle amɛ lɛ ateŋ koni amɛtsɔ etsulɔ. Gbalɛ lɛ kɛɔ akɛ: “Agbɛnɛ, bo toi, mitsulɔ Yakob, bo Israel ní mihalao! Bɔ ni Yehowa, mɔ ni feeo, mɔ hu ní shɔ̃o ní eye ebuao kɛjɛ onyɛ musuŋ beebe lɛ, kɛɛ nɛ: Kaashe gbeyei, mitsulɔ Yakob, kɛ bo Yeshurun ní mihalao!” (Yesaia 44:1, 2) Yehowa ekwɛ Israel nɔ aahu, kɛji wɔɔkɛɛ lɛ, kɛjɛ enyɛ musuŋ beebe, kɛjɛ be mli ní Israel batsɔ maŋ yɛ be mli ní amɛshi Mizraim lɛ sɛɛ. Etsɛ́ɔ ewebii lɛ kutuu akɛ “Yeshurun,” ní shishi ji “Mɔ ní Ja,” ni ji sabala ko ní tsɔɔ suɔmɔ kɛ mlihilɛ ní ajieɔ lɛ kpo. Gbɛi lɛ hu feɔ kaimɔ kɛha Israelbii lɛ akɛ esa akɛ amɛhi shi akɛ jalɔi, nɔ ní bei pii lɛ amɛfeee lɛ.
5, 6. Mɛɛ nibii ní haa mɔ náa hejɔɔmɔ Yehowa kɛha Israel, ni mɛni jɛ mli ba?
5 Kwɛ bɔ ni Yehowa wiemɔi ní nyiɛ sɛɛ lɛ ŋɔɔ ní ehaa mɔ he jɔɔ lɛ hu! Ekɛɛ akɛ: “Mikɛ nu aaashwie mɛi ní kumai yeɔ amɛ lɛ anɔ, kɛ faai hu yɛ shikpɔŋ gbiŋ nɔ: mikɛ mimumɔ lɛ aaashwie oseshi nɔ, kɛ mijɔɔmɔ hu yɛ oshwiei anɔ; ni amɛaakwɛ̃ yɛ jwɛi ateŋ, tamɔ faa naa kpãai yɛ faai atoi.” (Yesaia 44:3, 4) Kɛ́ tsei akui mamɔ nu he yɛ shikpɔŋ gbiŋ ní nɔ dɔɔ nɔ po lɛ, amɛnyɛɔ amɛfeɔ frɔfrɔ. Kɛ́ Yehowa kɛ enɔkwale nui ní haa mɔ wala lɛ ha amɛ ní efɔse emumɔ krɔŋkrɔŋ lɛ eshwie amɛnɔ lɛ, Israel baashwere babaoo diɛŋtsɛ, tamɔ tsei ní mamɔ nu jɔɔi ní akɛshwieɔ dumɔnii anɔ nu lɛ atoi. (Lala 1:3; Yeremia 17:7, 8) Yehowa baaha ewebii lɛ hewalɛ koni amɛya nɔ amɛtsu amɛnitsumɔ lɛ ákɛ Nyɔŋmɔ ní eji lɛ he odasefoi.
6 Nɔ kome ní baajɛ mumɔ krɔŋkrɔŋ lɛ fɔsemɔ nɛɛ mli aba ji hiɛsɔɔ hee ní Israelbii aŋkroaŋkroi komɛi baaná amɛha amɛkɛ Yehowa teŋ wekukpaa lɛ. Enɛ hewɔ lɛ, wɔkaneɔ akɛ: “Mɔnɛ aaakɛɛ akɛ: Yehowa nɔ̃ ji mi, ni mɔnɛ hu, aaaŋɔ Yakob gbɛi lɛ awo ehe; ni mɔ ko hu kɛ enine aaaŋma akɛ Yehowa nɔ̃ ji lɛ, ni eeeŋɔ Israel gbɛi ewo ehe.” (Yesaia 44:5) Hɛɛ, hiɛnyamwoo baajɛ Yehowa gbɛi lɛ ní amɛkɛaafɔ̃ amɛnɔ lɛ mli kɛba, ejaakɛ ebaaha ana akɛ lɛ ekome pɛ ji anɔkwa Nyɔŋmɔ lɛ.
Mpoa ní Atswaa Nyɔŋmɔi Lɛ
7, 8. Yehowa tswa jeŋmaji lɛ anyɔŋmɔi lɛ mpoa yɛ mɛɛ gbɛ nɔ?
7 Yɛ Mose Mla lɛ shishi lɛ, kpɔ̃lɔ—ní bei pii lɛ efeɔ mɔ lɛ wekunyo nuu ní bɛŋkɛ lɛ kpaakpa fe fɛɛ lɛ—baanyɛ ahe mɔ kɛjɛ nyɔŋyeli shihilɛ mli. (3 Mose 25:47-54; Rut 2:20) Yehowa wie lɛ diɛŋtsɛ ehe agbɛnɛ akɛ Israel Kpɔ̃lɔ—mɔ ni baakpɔ̃ maŋ lɛ, kɛwo Babilon kɛ enyɔŋmɔi lɛ fɛɛ hiɛgbele. (Yeremia 50:34) Ete shi ewo apasa nyɔŋmɔi lɛ kɛ amɛjálɔi lɛ, ni ekɛɛ: “Bɔ ni Yehowa, Israel maŋtsɛ kɛ okpɔ̃lɔ, ni ji Yehowa Zebaot lɛ, kɛɛ nɛ: Mi ji klɛŋklɛŋ mɔ kɛ sɛɛkpee mɔ, ni Nyɔŋmɔ ko bɛ, ja mi! Ni namɔ tamɔ mi, kɛjɛ beyinɔ ní mito blema maŋ lɛ? Ha eje kpo ní ebajaje ní ekɛmamɔ mihiɛ; ní amɛjaje wɔsɛɛ saji kɛ saji ní baaba lɛ amɛtsɔɔ! Nyɛhe akakpokpoa ni nyɛkashea gbeyei! Ani jeee blema beebe mijɛ mijaje mitsɔɔ nyɛ ni miha nyɛnu? Ni nyɛ ji midasefoi! Ani misɛɛ lɛ Nyɔŋmɔ ko yɛ? Ni tɛsaa ko hu bɛ: mileee eko!”—Yesaia 44:6-8.
8 Yehowa tswa nyɔŋmɔi lɛ mpoa ní amɛkɛ odaseyeli ní amɛyɔɔ lɛ aba. Ani amɛbaanyɛ amɛwie nibii ni baaba wɔsɛɛ lɛ ahe tamɔ nɔ ni amɛyɛ momo, ní amɛgba wɔsɛɛ be nifeemɔi ní eba mli pɛpɛɛpɛ tamɔ nɔ ni nibii lɛ miiya nɔ momo? Ja ‘klɛŋklɛŋ mɔ kɛ naagbee mɔ,’ mɔ ni yɔɔ kwraa dani asusu apasa nyɔŋmɔi lɛ fɛɛ ahe ní afee amɛ, ní ebaakã he ehi shi aahu beni hiɛ ekpa amɛnɔ jeeŋmɔ lɛ pɛ baanyɛ afee enɛ. Esaaa akɛ ewebii lɛ sheɔ gbeyei akɛ amɛaaye anɔkwale nɛɛ he odase, ejaakɛ amɛyɛ Yehowa, mɔ ni ma shi shiŋŋ ní ehosooo, tamɔ tɛsaa kpeteŋkpele lɛ sɛɛfimɔ!—5 Mose 32:4; 2 Samuel 22:31, 32.
Bɔ ni Sɛɛnamɔ ko Bɛ Amaga Jamɔ He Hã
9. Ani eji tɔmɔ akɛ Israelbii lɛ aaafee bɔɔ nii ko ní yɔɔ wala mli lɛ he mfoniri ko? Tsɔɔmɔ mli.
9 Mpoa ní Yehowa tswa apasa nyɔŋmɔi lɛ haa wɔkaiɔ Kitai Nyɔŋma lɛ ateŋ nɔ ni ji enyɔ lɛ. Nakai kita lɛ jajeɔ faŋŋ akɛ: “Kaafee amaga ko loo nɔ ko ní tamɔ nii ni yɔɔ ŋwɛi, loo nii ní yɔɔ shikpɔŋ lɛ nɔ, loo nii ní yɔɔ nu mli yɛ shikpɔŋ lɛ shishi lɛ oha ohe. Kaajá amɛ, ni kaasɔmɔ amɛ hu.” (2 Mose 20:4, 5) Shi kɛlɛ, nɛkɛ naatsii nɛɛ etsɔɔɔ akɛ esaaa akɛ Israelbii lɛ feɔ nibii ahe mfonirii fɛfɛji ní akɛwulaa hei lɛ. Yehowa diɛŋtsɛ kɛ famɔ ha akɛ akɛ tsei kɛ kerubim ahe mfonirii amamɔ kpeebuu lɛ mli. (2 Mose 25:18, 33; 26:31) Shi, esaaa akɛ akɛ woo haa nibii nɛɛ, loo ajáa amɛ. Esaaa akɛ mɔ ko sɔleɔ loo eshãa afɔlei ehaa nɛkɛ nibii nɛɛ. Kita ní ajɛ ŋwɛi awo yɛ mumɔ naa lɛ tsĩɔ amaga fɛɛ amaga ní aaafee ní akɛaatsu nii akɛ nɔ ko ní akɛ jamɔ haa lɛ lɛ naa. Amagai ajamɔ loo shi ní akotoɔ ahaa amɛ yɛ woo loo bulɛ mli lɛ feɔ wɔŋjamɔ.—1 Yohane 5:21.
10, 11. Mɛni hewɔ Yehowa buɔ amagai ákɛ eji hiɛgbejianii lɛ?
10 Agbɛnɛ Yesaia wie bɔ ni sɛɛnamɔ bɛ amagai ní wala bɛ amɛmli lɛ ahe kɛ hiɛgbele ní mɛɔ mɛi ní feɔ amɛ lɛ he ni ekɛɛ: “Amagafeelɔi lɛ fɛɛ efee yaka, ni amɛtsui he nii lɛ ehiii haaa nɔ ko; ni amɛ diɛŋtsɛ amɛyeɔ amɛhe odase akɛ amɛnaaa nii ni amɛleee nii, hewɔ lɛ amɛhiɛ aaagboi. Namɔ eshɔ̃ nyɔŋmɔ ko pɛŋ, loo eshwie amaga ko, ní ehiii haaa nɔ ko kwraa? Naa, amɛnanemɛi lɛ fɛɛ hiɛ aaagboi; shi ŋaalɔi lɛ, gbɔmɛi ateŋ nɔŋŋ amɛjɛ: kɛ́ amɛ fɛɛ amɛnaa bakpe shi ní amɛdamɔ shi lɛ, amɛhe aaakpokpo, ni amɛhiɛ aaagboi!”—Yesaia 44:9-11.
11 Mɛni hewɔ Nyɔŋmɔ buɔ amagai nɛɛ akɛ amɛhe yɛ hiɛgbele waa nakai lɛ? Klɛŋklɛŋ lɛ, anyɛŋ akɛ heloonaa nibii afee bɔ ni Ofe lɛ ji lɛ he mfoniri ní eja pɛpɛɛpɛ. (Bɔfoi lɛ Asaji 17:29) Kɛfata he lɛ, jamɔ ní ajáa bɔɔ nɔ ko yɛ Bɔlɔ lɛ najiaŋ lɛ tsɔɔ bulɛ ní abɛ kwraa kɛha Nyɔŋmɔ ní Yehowa ji lɛ. Ni ani enɛ baaa bulɛ ní gbɔmɔ, ní abɔ lɛ yɛ “Nyɔŋmɔ subaŋ nɔ” lɛ yɔɔ lɛ shi?—1 Mose 1:27; Romabii 1:23, 25.
12, 13. Mɛni hewɔ adesa nyɛŋ ashɔ̃ amaga ní sa jamɔ lɛ?
12 Ani heloonaa nɔ ko ní afee lɛ baanyɛ aná krɔŋkrɔŋfeemɔ akɛni akɛ ŋaa fee koni ebatsɔ nɔ ko ní ajáa lɛ lɛ hewɔ? Yesaia kaiɔ wɔ akɛ amagafeemɔ ji adesai amɔdɛŋbɔɔ folo ko kɛkɛ. Dɛŋdadei kɛ ŋaa gbɛ̀i ní amagafeelɔ kɛtsuɔ nii lɛ tamɔ nɔ ni ŋaalɔi krokomɛi fɛɛ kɛtsuɔ nii lɛ nɔŋŋ pɛpɛɛpɛ: “Sɔ̃lɔ tswaa dade naa, ni ekɛ ŋãi kɛ la tsuɔ he nii, ni ekɛ hamle sɔ̃ɔ, ni ekɛ enineshiwalɛ tsuɔ he nii; hɔmɔ yeɔ lɛ ni ehewalɛ tãa, enuuu nu hu, hewɔ lɛ etɔɔ biti! Tsogbɔlɔ tswaa kpãa, ekɛ kadimɔ nii kadiɔ, ni ekɛ ŋaa dade gbɔɔ he, ni ekɛ kompase kadiɔ; efeɔ lɛ tamɔ gbɔmɔ su, tamɔ gbɔmɔ hefɛo, ní ehi shi yɛ shia.”—Yesaia 44:12, 13.
13 Anɔkwa Nyɔŋmɔ lɛ fee bɔɔ nii fɛɛ ní yɔɔ wala mli yɛ shikpɔŋ nɛɛ nɔ lɛ, ni gbɔmɔ fata he. Wala bɔɔ nii ní yɔɔ henumɔi kɛ jwɛŋmɔ lɛ ji Nyɔŋmɔ ní Yehowa ji lɛ he odaseyeli ní yɔɔ naakpɛɛ, shi yɛ anɔkwale mli lɛ, nɔ fɛɛ nɔ ní Yehowa fee lɛ baa shi fe lɛ. Ani eeenyɛ eba akɛ adesai baanyɛ afee nibii ní hi fe nɔ ni efee lɛ? Ani ebaanyɛ efee nɔ ko ní nɔ kwɔ fe lɛ diɛŋtsɛ—ní enɔ kwɔ aahu akɛ esa akɛ ekɛ jamɔ aha nakai nɔ̃ lɛ? Kɛ́ gbɔmɔ miishɔ̃ amaga lɛ, etɔɔ lɛ, hɔmɔ yeɔ lɛ, ni kumai hu yeɔ lɛ. Adesa gbɔjɔmɔi ji enɛɛmɛi, shi kɛ́ hoo lɛ, no tsɔɔ akɛ gbɔmɔ lɛ yɛ wala mli. Amaga ní eshɔ̃ɔ lɛ baanyɛ afee tamɔ gbɔmɔ su. Ebaanyɛ efee fɛo po. Shi wala bɛ emli. Amagai jɛɛɛ ŋwɛi kɛbaaa kɔkɔɔkɔ. Kɛfata he lɛ, amaga ko ní ashwie ‘kpelekeko shi kɛjɛko ŋwɛi’ dã, tamɔ nɔ ni ejɛɔ he kroko kɛbaa, shi jeee adesa ní gboɔ nɛɛ feɔ.—Bɔfoi lɛ Asaji 19:35.
14. Amagafeelɔi kɛ amɛhe fɔ̃ɔ Yehowa nɔ kwraa yɛ mɛɛ gbɛ nɔ?
14 Yesaia tee nɔ etsɔɔ akɛ amagafeelɔi kɛ amɛhe fɔ̃ɔ adebɔɔ mli nifeemɔi kɛ nibii ní Yehowa bɔ lɛ anɔ kwraa, ni ekɛɛ: “Eyatooɔ tseneduru tsei ehaa ehe, ni eŋɔɔ aplo kɛ odum hu, ni ehalaa koo lɛŋ tsei lɛ ateŋ eko, etɛoɔ sɛsɛo hu ni nugbɔnɛmɔ haa edaa; ni etsɔɔ lai ehaa gbɔmɔ: eŋɔɔ eko ewereɔ, eshɛreɔ eko ni eŋɔshãa aboloo; ni eŋɔɔ no nɔŋŋ eko efeɔ nyɔŋmɔ, ni ejáa! ekɛ eko feɔ amaga, ni ekotoɔ lɛ! Eshãa fã yɛ la mli; eyeɔ loo hu yɛ fã nɔ; efolɔɔ loo yɛ nɔ ni eyeɔ etɔɔ; ewereɔ ni ekɛɔ akɛ: Yiɛ! mihe edɔ, miná la! Shi nɔ ni eshwɛ lɛ, ekɛfeɔ nyɔŋmɔ, emaga: ekotoɔ lɛ, ejáa lɛ ni esɔleɔ etsɛɔ lɛ, ni ekɛɔ akɛ: Jiemɔ mi, ejaakɛ bo ji minyɔŋmɔ!”—Yesaia 44:14-17.
15. Mɛɛ nilee ní abɛ kwraa amagafeelɔ jieɔ lɛ kpo?
15 Ani lai fã ní ashãko lɛ baanyɛ ahere mɔ ko yiwala? Eka shi faŋŋ akɛ dabi. Anɔkwa Nyɔŋmɔ lɛ pɛ baanyɛ ekɛ kpɔ̃mɔ aha. Te aaafee tɛŋŋ ní gbɔmɛi aaasɔmɔ nibii ní wala bɛ mli lɛ? Yesaia tsɔɔ mli akɛ naagba lɛ diɛŋtsɛ yɛ gbɔmɔ lɛ tsui mli: “Amɛleee nɔ ko, ni amɛnaaa naa hu, ejaakɛ eshwila amɛhiŋmɛii, ní amɛkana nii, kɛ amɛtsuii hu, ní amɛkayoo sɛɛ! Ni mɔ ko mɔ ko jwɛŋmɔ baaa nɔ, asaŋ nilee loo sanesɛɛkɔmɔ ko bɛ, ní aaakɛɛ akɛ: Mishã fã yɛ laŋ, ni mishã aboloo hu yɛ eŋãi lɛ nɔ, ni mifolɔ loo yɛ nɔ miye; aso maŋɔ nɔ ni eshwɛ lɛ mafee nihii nii? aso makoto shi maha tso kuku lo? Mɔ ni nyiɛɔ lamulu sɛɛ lɛ, tsui ní ashishiu miiha eedũ gbɛ, ni enyɛŋ esusuma ejie, ni ekɛɛŋ akɛ: Aso jeee apasa yɔɔ mininejurɔ nɛɛ?” (Yesaia 44:18-20) Hɛɛ, susumɔ ní aaasusu akɛ wɔŋjamɔ baanyɛ ekɛ nɔ ko kpakpa aba yɛ mumɔŋ lɛ tamɔ nɔ ni aaye lamulu yɛ niyenii kpakpa ní hewalɛ yɔɔ mli najiaŋ.
16. Mɛɛ gbɛ nɔ wɔŋjamɔ tsɔ eje shishi, ni mɛni haa enyɛɔ ebaa?
16 Yɛ anɔkwale mli lɛ, wɔŋjamɔ je shishi yɛ ŋwɛi beni mumɔŋ bɔɔ nɔ ní he wa, ní batsɔ Satan lɛ hiɛ kɔ̃ jamɔ ní esa akɛ akɛha Yehowa pɛ lɛ nɔ lɛ. Satan hiɛjoomɔ lɛ mli wa aahu akɛ eha etsi ehe kɛjɛ Nyɔŋmɔ he kwraa. No ji wɔŋjamɔ shishijee diɛŋtsɛ, ejaakɛ bɔfo Paulo wie akɛ hiɛjoomɔ tamɔ wɔŋjamɔ nɔŋŋ pɛpɛɛpɛ. (Yesaia 14:12-14; Ezekiel 28:13-15, 17; Kolosebii 3:5) Satan laka klɛŋklɛŋ adesai enyɔ lɛ ni amɛná pɛsɛmkunya susumɔi. Hawa hiɛ kɔ̃ hegbɛ ní Satan kɛha lɛ lɛ nɔ, akɛ: “Nyɛhiŋmɛii aaagbele, ni nyɛaatsɔmɔ tamɔ Nyɔŋmɔ, ni nyɛaale ekpakpa kɛ efɔŋ.” Yesu wie akɛ hiɛjoomɔ jɛɔ tsui lɛ mli. (1 Mose 3:5; Marko 7:20-23) Wɔŋjamɔ nyɛɔ ebaa kɛji tsui lɛ tsɔ tsui fɔŋ. Belɛ, kwɛ bɔ ni ehe hiaa kɛha wɔ fɛɛ akɛ ‘wɔhiɛ akã wɔtsuii ahe,’ ní wɔkaŋmɛ gbɛ ní mɔ ko loo nɔ ko kwraa baŋɔ gbɛhe ní sa Yehowa lɛ yɛ wɔtsui mli!—Abɛi 4:23; Yakobo 1:14.
Tsuii ni Náa Yehowa He Miishɛɛ
17. Mɛni esa akɛ Israel abo toi?
17 No sɛɛ lɛ, Yehowa kpa Israelbii lɛ fai ní amɛkai akɛ amɛyɛ gbɛhe ni ji gbɛnaa nii kɛ hegbɛ krɛdɛɛ ko. Amɛji edasefoi! Ekɛɛ akɛ: “Kaimɔ enɛɛmɛi, Yakob, kɛ Israel hu, ejaakɛ mitsulɔ jio! ni mishɔ̃o, ni mitsulɔ jio; oo Israel, mihiɛ kpaŋ onɔ! Migbe onɔ̃ fɔŋ feemɔi lɛ tamɔ atatu ko, kɛ ohe eshai lɛ hu tamɔ afua ko: Kpalemɔ kɛba miŋɔɔ, shi mikpɔ̃o! Nyɛláa nyamɔ lala, nyɛ ŋwɛii, ejaakɛ Yehowa efee! Nyɛbɔa oshe, nyɛ shikpɔŋ lɛ shishigbɛi lɛ! Nyɛwóa nyamɔ lala nɔ, nyɛ gɔji, koo kɛ emli tsei lɛ fiaa; ejaakɛ Yehowa ekpɔ̃ Yakob, ni ehiɛ eba nyam yɛ Israel mli!”—Yesaia 44:21-23.
18. (a) Mɛni hewɔ Israel yɔɔ yiŋtoo ní eeedamɔ nɔ enyá lɛ? (b) Yehowa tsuji baanyɛ akase emɔbɔnalɛ he nɔkwɛmɔnɔ lɛ ŋmɛnɛ yɛ mɛɛ gbɛ nɔ?
18 Jeee Israel fee Yehowa. Ejeee nyɔŋmɔ ní adesa fee. Shi moŋ, Yehowa fee Israel koni etsɔ etsulɔ ní ehala. Ni ebaama Nyɔŋmɔ ní eji lɛ nɔ mi shikome ekoŋŋ yɛ be mli ní ekpɔ̃ɔ maŋ lɛ. Ekɛ ewebii lɛ wie yɛ mlihilɛ mli, ni ema nɔ mi eha amɛ akɛ kɛ́ amɛtsake amɛtsui lɛ, ebaatsimɔ amɛhe eshai lɛ anɔ kwraa, ni ekɛ amɛnɔtɔmɔi lɛ baato tamɔ nɔ ni akɛwo atatui ní anyɛɛɛ atsɔ mli lɛ asɛɛ. Kwɛ yiŋtoo ní Israel yɔɔ ní ekɛaanyá! Yehowa nɔkwɛmɔnɔ lɛ tsirɛɔ etsuji ní yɔɔ ŋmɛnɛŋmɛnɛ beaŋ lɛ koni amɛkase emɔbɔnalɛ lɛ. Amɛbaanyɛ amɛfee nakai kɛtsɔ mɔdɛŋ ní amɛaabɔ ní amɛye amɛbua mɛi ní tɔ̃ɔ lɛ nɔ—ní amɛbɔ mɔdɛŋ ní amɛtswa amɛ amɛma shi ekoŋŋ kɛji eeehi.—Galatabii 6:1, 2.
Nyɔŋmɔ ní Eji lɛ He Kaa lɛ Naagbee Kwraa
19, 20. (a) Yehowa kɛ esane lɛ ba enaagbee kwraa yɛ mɛɛ gbɛ nɔ? (b) Mɛɛ nibii ni haa mɔ náa miishɛɛ Yehowa gba efɔ̃ shi kɛha ewebii lɛ, ni namɔ baafee enajiaŋdamɔlɔ ní baatsu nibii nɛɛ ahe nii?
19 Agbɛnɛ Yehowa kɛ emla naa sane naataamɔ lɛ ba naagbee kwraa yɛ gbɛ ní mli wa nɔ. Etsɛŋ ni lɛ diɛŋtsɛ ekɛ Nyɔŋmɔ ní eji lɛ he kaa ní mli wa fe fɛɛ lɛ hetoo baaha—no ji nyɛmɔ ní eyɔɔ ní ekɛgbaa nɔ ni baaba wɔsɛɛ ní ebaa mli pɛpɛɛpɛ lɛ. Biblia he woloŋlelɔ ko tsɛ́ Yesaia yitso 44 lɛ kukuji enumɔ ní nyiɛ sɛɛ lɛ akɛ “lalafoo wiemɔ ní tsɔɔ bɔ ni Israel Nyɔŋmɔ lɛ nɔ kwɔ fe fɛɛ,” Bɔlɔ koome pɛ lɛ, wɔsɛɛ be saji a-Kpojielɔ koome pɛ kɛ Israel hiɛnɔkamɔ kɛha kpɔ̃mɔ lɛ. Wiemɔ kuku lɛ yaa hiɛ fiofio kɛyashɛɔ he ni kwɔ fe fɛɛ ní sa kadimɔ waa kɛtsɔ nuu ní baakpɔ̃ maŋ lɛ kɛjɛ Babilon lɛ gbɛi ní etsĩ tã lɛ nɔ.
20 “Bɔ ni Yehowa, okpɔ̃lɔ lɛ, kɛ mɔ ni shɔ̃o kɛjɛ onyɛ musuŋ lɛ, kɛɛ nɛ: Mi, Yehowa, ji mɔ ni feɔ nibii fɛɛ, mɔ ni ekome too egbeleɔ ŋwɛi mli, ní elɛɛɔ shikpɔŋ lɛ mli, ní mɔ ko fataaa ehe lɛ; mɔ ni haa amale gbalɔi akadii feɔ yaka, ní ehaa klamɔi yeɔ sɛkɛ; mɔ ni kuɔ nilelɔi anaa, ní ehaa amɛnilee lɛ tsɔɔ kwashiafeemɔ; mɔ ni maa etsulɔ wiemɔ nɔ mi, ní ehaa ebɔfoi agbalɛ baa mli; mɔ ni kɛɔ yɛ Yerusalem he akɛ: Mɛi aaahi emli! kɛ Yuda maji lɛ akɛ: Aaamamɔ amɛ, ni matée emaŋfɔ lɛ shi mamã shi! lɛ; mɔ ni kɛɔ bu kwɔŋkwɔŋ lɛ akɛ: Omli agbi! ni maha ofaai lɛ hu amii lɛ! Mɔ ni kɛɔ yɛ Koresh he akɛ: Mitookwɛlɔ ji lɛ! ni eeeha nii ní sa mihiɛ lɛ fɛɛ aba mli, ni eeekɛɛ yɛ Yerusalem he akɛ: Aaamã lɛ! kɛ sɔlemɔwe lɛ hu akɛ: Aaato shishi! lɛ.”—Yesaia 44:24-28.
21. Mɛɛ shiwoo Yehowa wiemɔi lɛ kɛhaa?
21 Hɛɛ, jeee akɛ Yehowa yɛ nyɛmɔ ní ekɛgbaa nibii ní baaba wɔsɛɛ kɛkɛ, shi moŋ eyɛ hewalɛ hu ní ekɛaatsu eyiŋtoo ní ejie lɛ kpo lɛ he nii kɛmɔ shi. Sane jajemɔ nɛɛ baatsu nii akɛ hiɛnɔkamɔ jɛɛhe kɛha Israel. Eji shiwoo ní tsɔɔ akɛ eyɛ mli akɛ Babilon asraafoi lɛ baafee shikpɔŋ lɛ amaŋfɔ moŋ, shi Yerusalem kɛ maŋtiasei ní kɛ amɛhe fɔ̃ɔ enɔ lɛ baate shi ekoŋŋ ni abaasaa ato anɔkwa jamɔ shishi ekoŋŋ yɛ jɛmɛ. Shi yɛ mɛɛ gbɛ nɔ?
22. Tsɔɔmɔ bɔ ni Eufrate Faa lɛ feɔ egbĩɔ lɛ mli.
22 Bei pii lɛ, okɔmfoi ní akɛ mumɔ tsirɛɛɛ amɛ lɛ ekaaa akɛ amɛaatsɔɔ nibii amli faŋŋ yɛ nibii ní amɛgbaa lɛ agbɛfaŋ ejaakɛ amɛsheɔ gbeyei akɛ be baaha ana akɛ amɛwiemɔi lɛ jeee anɔkwale. Shi nɔ ni tamɔɔɔ nakai lɛ, Yehowa tsɔ Yesaia nɔ ejie nuu ní ekɛbaatsu nii ní ekɛjie ewebii lɛ kɛjɛ nomŋɔɔ mli koni amɛnyɛ amɛya amɛmaŋ ní amɛyasaa Yerusalem kɛ esɔlemɔtsu lɛ ekoŋŋ lɛ gbɛi diɛŋtsɛ kpo. Egbɛi ji Koresh, ni ale lɛ akɛ Koresh Kpeteŋkpele ni jɛ Persia lɛ. Yehowa kɛ ŋaa gbɛ ní Koresh kɛbaatsu nii ní ekɛgbu shi kɛbote Babilon hefãmɔ gbɛjianɔtoo kpele ní afee lɛ jogbaŋŋ lɛ mli lɛ mlitsɔɔmɔ fitsofitso hu ha. Akɛ gbogboi ní nɔ kwɔlɔ waa kɛ nu jɔɔi wuji ní hoɔ kɛtsɔɔ maŋtiase lɛ mli kɛ ehewɔ fɛɛ lɛ baabu Babilon he. Koresh kɛ nakai gbɛjianɔtoo lɛ fã titri—ni ji Eufrate Faa lɛ—baatsu nii kɛha esɛɛnamɔ. Taakɛ blema yinɔsaneŋmalɔi Herodotus kɛ Xenophon tsɔɔ lɛ, Koresh tee faa lɛ ŋwɛigbɛ kɛjɛ Babilon, ni etsa nu jɔɔ, ni Eufrate faa lɛ mli nui lɛ ho kɛtsɔ mli aahu kɛyashi faa lɛ ba shi kwraa bɔ ni esraafoi lɛ baanyɛ anyiɛ kɛtsɔ mli. Kɛ́ aawie nyɛmɔ ní Eufrate faa kpeteŋkpele lɛ yɔɔ ní ekɛbuɔ Babilon he lɛ he lɛ, Eufrate faa lɛ nyɛɔ egbĩɔ.
23. Mɛɛ sane ko aŋma afɔ̃ shi ní kɔɔ gbalɛ ní tsɔɔ akɛ Koresh baakpɔ̃ Israel lɛ mlibaa he?
23 Ni shiwoo ní akɛha akɛ Koresh baaŋmɛɛ Nyɔŋmɔ webii ahe, ni ebaakwɛ ní asaa Yerusalem kɛ sɔlemɔtsu lɛ ekoŋŋ lɛ hu? Koresh diɛŋtsɛ wie yɛ enɔyeli lɛ sane jajemɔ ko ní ábaa yi yɛ Biblia lɛ mli lɛ mli akɛ: “Bɔ ni Koresh, Persia maŋtsɛ lɛ, kɛɛ nɛ: Yehowa, ŋwɛi Nyɔŋmɔ lɛ, etu shikpɔŋ lɛ nɔ maŋtsɛyelii lɛ fɛɛ ewo midɛŋ, ni efã mi akɛ miyama shia miha lɛ yɛ Yerusalem yɛ Yuda. Emaŋbii lɛ ateŋ mɔ fɛɛ mɔ ni yɔɔ nyɛteŋ lɛ, e-Nyɔŋmɔ lɛ afata ehe ní efã kɛya Yerusalem yɛ Yuda, ní eyama Yehowa, Israel Nyɔŋmɔ lɛ, shia lɛ. Lɛ ji Nyɔŋmɔ ni yɔɔ Yerusalem lɛ.” (Ezra 1:2, 3) Yehowa wiemɔ ní ewie kɛtsɔ Yesaia nɔ lɛ eba mli kɛmɔ shi!
Yesaia, Koresh, kɛ Kristofoi Ŋmɛnɛ
24. Mɛɛ tsakpaa yɔɔ be mli ní Artashasta wo akpɔ akɛ “ayatswa Yerusalem ekoŋŋ” lɛ kɛ Mesia lɛ baa lɛ teŋ?
24 Yesaia yitso 44 lɛ woɔ Yehowa hiɛ nyam akɛ anɔkwa Nyɔŋmɔ koome lɛ kɛ ewebii ní hi shi yɛ blema lɛ a-Kpɔ̃lɔ. Kɛfata he lɛ, gbalɛ lɛ hiɛ shishinumɔ ní mli kwɔ kɛha wɔ fɛɛ ŋmɛnɛ. Akpɔ ní Koresh wo akɛ ayasaa atswa Yerusalem sɔlemɔtsu lɛ, ní ekɛha yɛ afi 538 loo 537 D.Ŋ.B. lɛ, je nibii ní ba ní yagbe naa yɛ gbalɛ kroko ko ní sa kadimɔ waa mlibaa mli lɛ shishi. Nɔ ni nyiɛ akpɔ ní Koresh wo lɛ sɛɛ ji ekroko ní nɔyelɔ ko ní ba yɛ sɛɛ mli, ni ji Artashasta, mɔ ni wo akpɔ akɛ ayasaa ama Yerusalem maŋtiase lɛ ekoŋŋ lɛ wo lɛ. Daniel wolo lɛ jie lɛ kpo akɛ “kɛjɛ beyinɔ ni wiemɔ aaaje kpo akɛ aku sɛɛ ayatswa Yerusalem ekoŋŋ [yɛ afi 455 D.Ŋ.B.] lɛ kɛyashi mɔ ni afɔ lɛ mu ni ji lumɔ lɛ nɔ lɛ,” “otsii” 69, ní eko fɛɛ eko feɔ afii 7 baaho. (Daniel 9:24, 25) Gbalɛ nɛɛ hu ba mli anɔkwale. Abaptisi Yesu ni eje eshikpɔŋ nɔ sɔɔmɔ nitsumɔ lɛ shishi yɛ be naa pɛpɛɛpɛ yɛ afi 29 Ŋ.B., ni ji be mli ní Artashasta akpɔ lɛ bɔi nitsumɔ yɛ Shiwoo Shikpɔŋ lɛ nɔ lɛ sɛɛ afii 483.a
25. Babilon shigbeemɔ ní ba kɛtsɔ Koresh nine nɔ lɛ tsɔɔ mɛni yɛ ŋmɛnɛŋmɛnɛ beaŋ?
25 Yudafoi anɔkwafoi lɛ aheŋmɛɛmɔ kɛmiijɛ nomŋɔɔ mli, ní ba mli kɛtsɔ Babilon shigbeemɔ nɔ lɛ, fee Kristofoi ní afɔ amɛ mu lɛ ajiemɔ kɛmiijɛ mumɔŋ nomŋɔɔ mli yɛ afi 1919 lɛ he mfoniri. Nakai jiemɔ lɛ ji odaseyeli ní tsɔɔ akɛ Babilon kroko , ní atsɛ́ɔ lɛ akɛ ajwamaŋ, ni ji Babilon Kpeteŋkpele lɛ—ni feɔ jeŋ apasa jamɔi fɛɛ ní abua amɛnaa lɛ he okadi lɛ—hu egbee shi. Taakɛ aŋma afɔ̃ shi yɛ Kpojiemɔ wolo lɛ mli lɛ, bɔfo Yohane tsɔ hiɛ ena eshigbeemɔ lɛ. (Kpojiemɔ 14:8) Etsɔ hiɛ ena ehiɛkpatamɔ ni baaba trukaa lɛ hu. Bɔ ni Yohane tsɔɔ nakai jeŋ hewalɛ ní amaga jamɔ eyi lɛ obɔ̃ lɛ hiɛkpatamɔ lɛ mli eha lɛ tamɔ bɔ ni Yesaia tsɔɔ bɔ ni Koresh baaye nakai blema maŋtiase ni ji Babilon nɔ kunim eha lɛ pɛpɛɛpɛ yɛ gbɛ̀i komɛi anɔ. Taakɛ bɔ ni Babilon nui babaoo lɛ nyɛɛɛ ahere eyiwala kɛjɛ Koresh dɛŋ lɛ, nakai nɔŋŋ “nui” ni ji adesai ní fiɔ Babilon Kpeteŋkpele lɛ sɛɛ ní amɛbuɔ ehe lɛ hu ‘baamii’ dani abaakpata ehiɛ yɛ gbɛ ní ja nɔ lɛ.—Kpojiemɔ 16:12.b
26. Yesaia gbalɛ lɛ kɛ emlibaa woɔ wɔ hemɔkeyeli hewalɛ yɛ mɛɛ gbɛ nɔ?
26 Yɛ wɔ shishinumɔ naa ŋmɛnɛ, nɔ ni fe afii akpei enyɔ kɛ fã kɛjɛ be mli ní Yesaia kɛ egbalɛ lɛ ha sɛɛ nɛɛ, wɔnyɛɔ wɔnaa akɛ Nyɔŋmɔ “[haa] ebɔfoi agbalɛ baa mli” lɛɛlɛŋ. (Yesaia 44:26) No hewɔ lɛ Yesaia gbalɛ lɛ mlibaa ji bɔ ni anyɛɔ akɛ he fɔ̃ɔ gbalɛi fɛɛ ní yɔɔ Ŋmalɛ Krɔŋkrɔŋ lɛ mli lɛ anɔ lɛ he nɔkwɛmɔnɔ ní sa kadimɔ waa.
[Shishigbɛ niŋmai]
a Kwɛmɔ Bó Daniel Gbalɛ lɛ Toi!, ní Watchtower Bible and Tract Society of New York, Inc. fee lɛ yitso 11 lɛ.
b Kwɛmɔ Kpojiemɔ—Enaagbee Kwraa lɛ Ebɛŋkɛ!, ní Watchtower Bible and Tract Society of New York, Inc. fee lɛ yitsei 35 kɛ 36 lɛ.
[Mfoniri ni yɔɔ baafa 63]
Ani lai kuku ní ashãko lɛ baanyɛ ahere mɔ yiwala?
[Mfoniri ni yɔɔ baafa 75]
Koresh tsa nu jɔɔ ni eha Eufrate faa lɛ mli nui lɛ ho kɛtsɔ mli ni ekɛwo gbalɛ obɔ̃