“Nyɛjea emli, mimaŋ”
“Nyɛjea emli, mimaŋ, koni nyɛkɛ lɛ akafee ekome yɛ ehe eshai lɛ amli, ni nyɛkana ehaomɔi lɛ eko.”—Kpoi. 18:4.
1. Mɛɛ be mli ajaje atsɔɔ akɛ ajo foi kɛjɛ Babilon Kpeteŋkpele lɛ mli Iɛ, ni mɛni hewɔ nɛkɛ tsɛmɔ nɛɛ sa lɛ?
1 “NYƐJEA emli, mimaŋ.” Atswa adafi nɛɛ kɛjɛ afi 1919, afi nɔ ni majimaji ni kɛ amɛhe wuuɔ yɛ 1914-1918 jeŋ ta lɛ mli lɛ kɛ amɛnine wo toiŋjɔlɛ kpaŋmɔ shishi lɛ. Jeŋ Jamɔi ni Ato Amɛ Gbɛjianɔ lɛ fi jeŋ fɛɛ ta lɛ sɛɛ. Gbɔmɛi ni Biblia Iɛ Nyɔŋmɔ lɛ tsɛɔ amɛ “mimaŋ” lɛ hu? Nɛkɛ Kristofoi ni he jɔ nɛɛ ba nyɔŋyeli shishi kɛha Babilon Kpeteŋkpele lɛ kɛ emaŋkwramɔŋ hemɛi lɛ ni kɛ amɛhe ewo Jeŋ Ta I lɛ mli lɛ, ni awo amɛ tsuŋ po.
2. Mɛɛ tsɛmɔ ko ni tamɔ nakai atsɔ hiɛ akɛha kɛtsɔ Yeremia nɔ?
2 Anaa tsɛmɔ akɛ “nyɛjea emli” lɛ yɛ Kpojiemɔ 18:4. No mli lɛ atsɔ hiɛ akɛ tsɛmɔ ko ni tamɔ nakai eha yɛ Yeremia 51:45: “Mimaŋ, nyɛjea kpo kɛjɛa eteŋ, ni nyɛteŋ mɔ fɛɛ mɔ ahere eyiwala [ajo foi] kɛjɛ Yehova mlifu ni naa wa lɛ mli.”
3, 4. (a) Taakɛ Yeremia 50:8-10 tsɔɔ lɛ, ‘amɛbaajo foi’ kɛjɛ nɛgbɛ? (b) Beni naagbee gbalɛ nɛɛ baa mli lɛ ani wekukpaa ni ka Yehowa kɛ Babilon teŋ lɛ tamɔ bɔni eji yɛ Nebukadnezar nɔyeli be lɛ mli lɛ? Mɛni hewɔ?
3 ‘Foijee’ kɛmiijɛ nɛgbɛ? Yeremia 50:8-10 haa hetoo yɛ faŋŋ mli: “Nyɛjoa foi kɛjɛa Babel teŋ, ni nyɛjea Kaldeabii lɛ ashikpɔŋ lɛ nɔ, ni nyɛtamɔa too kpakpoi ni nyiɛ too kuu lɛ hiɛ! Shi naa, matsiɛ jeŋmaji wuji asafo yuu hiɛ, mikɛ amɛ aaajɛ kooyigbɛ shikpɔŋ lɛ nɔ afa kɛba Babel nɔ, ni amɛaaagba ta amɛwo lɛ, ni jɛi nɔŋŋ aaajɛ abaŋɔ lɛ; . . . ni Kaldeabii aaatsɔ ojonii; mɛi fɛɛ ni aaatswa lɛ ojo lɛ aaatɔrɔ, Yehowa kɛ.ɛ.”
4 Beni nakai gbalɛ wiemɔi lɛ aaaba mli lɛ, no mli lɛ Babilon Maŋtsɛ Nebukadnezar egbo. Odehei ni baye esɛɛ lɛ ateŋ mɔ kome, ni ji, Belshazar, Nabonidus bi lɛ ji mɔni baaye Babilonia Maŋtsɛyeli lɛ nɔ yɛ afi 539 D.Ŋ.B. No hewɔ lɛ beni aaashɛ nakai be lɛ, nɔni Babilon damɔ shi kaha yɛ gbalɛ naa kɛjɛ Nebukadnezar nɔyeli lɛ shishijee yɛ afi 625 D.Ŋ.B. lɛ etsake Yehowa etsɛ Nebukadnezar akɛ “mitsulɔ.? (Yer. 27:6) Agbɛnɛ hu Yehowa kɛ Maŋtsɛ Nebukadnezar ye yɛ gbalɛ mli lamɔi sɔrɔtoi enyɔ ko ni he hiaa lɛ mli, yɛ be mli ni áŋɔ Yudanyo gbalɔ Daniel nom yɛ Babilon lɛ. (Dan. yitsei 2 kɛ 4) Agba Maŋtsɛ Nebukadnezar nitsumɔi lɛ ahe sane po afɔ shi yɛ gbalɛ mli aahu kɛbashi afi 592 D.Ŋ.B. (Ezek. 29:17-20) No hewɔ lɛ kɛ hoo kwraa lɛ Yehowa kɛ Babilon Maŋtsɛyeli ni yɔɔ Nebukadnezar shishi lɛ tsu nii akɛ edɛŋ-dade ko ni ekɛ fɔse emlifu eshwie Yuda maŋtsɛyeli lɛ kɛ jeŋmaji ni ebɔle amɛ ni yeee anɔkwale lɛ anɔ. Nii ni Nebukadnezar tsu ni kɛ Yehowa suɔmɔnaanii kpaa gbee lɛ feɔ Yesu Kristo nitsumɔ yɛ “naagbee be” nɛɛ ni wɔyɔɔ mli bianɛ lɛ he mfoniri.
5. Taakɛ Yesaia 44:28 kɛyashi 45:7 tsɔɔ lɛ, mɛni akɛfee Yesu Kristo nitsumɔ lɛ he mfoniri yɛ be mli ni Babilon gbee shi lɛ, ni mɛɛ gbɛ nɔ bɔni Daniel tsɔɔ gbogbo he niŋmaa lɛ shishi lɛ kɛ nɔni Yesaia gba fɔ shi lɛ kpaa gbee yɛ?
5 Taakɛ Yesaia 44:28 kɛyashi 45:7 tsɔɔ lɛ, be mli ni Babilon shigbeemɔ lɛ bɛŋkɛɔ lɛ, Koresh Kpeteŋkpele, Media kɛ Persia Maŋtsɛyeli lɛ nɔyelɔ lɛ baŋɔ nitsumɔ ni akɛfee nɔni Yesu Kristo ni awo ehiɛ nyam lɛ baafee yɛ “naagbee be” lɛ mli lɛ he mfoniri. Yɛ gbɛkɛ ni Babilon gbee shi yɛ afi 539 D.Ŋ.B. lɛ, gbalɔ Daniel tsɔɔ gbogbo he niŋmaa ni Maŋtsɛ Belshazar nɔ lɛ shishi: “PERES: [mɔ komefeemɔ wiemɔ yɛ gbogbo he niŋmaa wiemɔi ni ji etɛ lɛ mli] aja omaŋtsɛyeli lɛ mli, ni aŋɔha Mediabii kɛ Persiabii.” Atee nɔ atsɔɔ nɔni Daniel kɛ ehiŋmɛi na lɛ mli akɛ: “Shi nakai nyɔɔŋ lɛŋ nɔŋŋ agbe Kaldeabii amaŋtsɛ Belshazar lɛ. Ni Dario, Medianyo lɛ, ŋɔ maŋtsɛyeli lɛ, [ákɛ Koresh hefatalɔ].”—Dan. 5:28-31; 9:1, 2.
6. Atsɔɔ nɔni Babilon fee he mfoniri yɛ Belshazar gbii lɛ amli lɛ yɛ mɛɛ Biblia wolo mli, ni no ji mɛni ŋmɛnɛ? (b) Namɔ to nakai okadi Babilon lɛ shishi, ni mɛɛ jamɔi fata enɛ he?
6 Anaa nɔni blema Babilon fee he mfoniri yɛ enaagbee be lɛ amli akɛ jeŋ awulaa lɛ yɛ Kpojiemɔ wolo lɛ ni mumɔ tsirɛ bɔfo Yohane ni eŋma aaafee afi 96 Ŋ.B. yɛ be mli ni blema Babilon maŋtiase lɛ ni ekumɔ lɛ fai komɛi yɔɔ lolo lɛ mli. Ebafeɔ faŋŋ yɛ nɔni Yohane ŋma yɛ Kpojiemɔ 16:12 kɛyashi 19:3 lɛ mli akɛ Babilon ni yɔɔ Belshazar gbii lɛ amli ni abu lɛ fɔ lɛ fee jeŋ apasa jamɔ ni yɔɔ shihilɛ mli lolo lɛ he mfoniri. Nakai maŋtsɛyeli, ni agbɛnɛ jeŋ ni abu lɛ fɔ lɛ mli jamɔi fɛɛ fata he lɛ ji nɔ ko ni “gbɔbilɔ kpanaa ko ni teɔ shi woɔ Yehowa” lɛ je shishi. Lɛ ji Nimrod, Noa nanakansowa lɛ, ni lɛ eto Babel maŋtiase lɛ shishi yɛ Eufrate faa lɛ naa. (Kpoj. 16:12; 1 Mose 10:8-10) Maŋtsɛyeli ni atsɛɔ lɛ bianɛ akɛ Babilon Kpeteŋkpele lɛ ji nɔ ko ni jamɔi fɛɛ fata he ‘ni eteɔ shi owoɔ Yehowa’ ni ‘enaagbee be’ lɛ mli eyɔɔ bianɛ lɛ.—Dan. 12:4.
7. (a) Mɛɛ be mli ‘mɛi ni jo foi’ lɛ shi blema Babilon? (b) Mɛɛ be mɛi ni jo foi lɛ shi Babilon Kpeteŋkpele lɛ mli, ni mɛni hewɔ yɛ nakai be lɛ mli?
7 Nakai jeŋ fɛɛ jamɔ maŋtsɛyeli lɛ mli atsɛɔ Yehowa webii lɛ akɛ “nyɛjea emli” lɛ, ni amɛka shashao shi kwraa. Nakai maŋtsɛyeli lɛ ji nɔni akɛ Babilon ni Yeremia wie he yɛ yitsei 50 kɛ 51 lɛ fee ehe mfoniri lɛ. Yɛ nakai blema Babilon Maŋtsɛyeli lɛ gbɛfaŋ lɛ, nakai Yudafoi lɛ kɛ amɛnanemɛi ni aŋɔ amɛ nom lɛ nyɛŋ ‘amɛje emli’ kɛyashi be mli ni eeegbee shi yɛ Mediabii kɛ Persiabii lɛ ahiɛ yɛ aaafee 539 D.Ŋ.B. da. (Yes. 14:12-17) Shi kɛlɛ, afii ohai 20 nɛɛ mli hu? Mɛi ni Yehowa tsɛɔ amɛ ŋmɛnɛ akɛ “mimaŋ” lɛ hu? Áfa mɛnɛɛmɛi akɛ ‘amɛje’ ŋmɛnɛŋmɛnɛ Babilon kpeteŋkpele lɛ mli dani akpata ehiɛ yɛ “amanehulu kpeteŋkpele” ni baa ni Yesu Kristo gba he sane efɔ shi lɛ mli. (Mat. 24:21, 22; Kpoj. 1:1; 7:14, 1.5) Yiŋtoo lɛ ji akɛ beni afee ni nɛkɛ mɛi ni ‘joɔ foi’ nɛɛ akwa haomɔ kɛ hiɛkpatamɔ ni baa Babilon kpeteŋkpele lɛ ni ji jeŋ apasa jamɔ maŋtsɛyeli ni yɔɔ lolo lɛ nɔ lɛ.—Kpoj. 18:4.
8. Mɛi ni atsɛamɛ kɛjɛ Babilon Kpeteŋkpele lɛ mli kɛjɛ 1919 lɛ akpojee lɛ tsɔɔ mɛni, ni mɛɛ dɛŋdade akɛ tsu nii yɛ enɛ mli?
8 Anyɛŋ ajo foi kɛjɛ Babilon Kpeteŋkpele lɛ mli yɛ be mli etsutsu maŋkwramɔŋ suɔlɔi lɛ etsɔ amɛhiɛ amɛha lɛ ni amɛkpata ehiɛ lɛ. (Kpoj. 17:15-18) Kɛjɛ ta lɛ sɛɛ yɛ afi 1919 Ŋ.B. lɛ mli tɔ̃ɔ Yehowa webii ni amɛjɔɔ amɛhe nɔ amɛha lɛ lɛ eje kpo kɛjɛ emli. Enɛ tsɔɔ yɛ gbɛ ko nɔ akɛ Babilon Kpeteŋkpele lɛ egbee shi momo. Yɛ mɛɛ gbɛ nɔ? Yɛ okadi gbɛ nɔ? Aaafee afi 1919 mli akumɔ ehewalɛ ni ekɛyeɔ Yehowa webii lɛ nyɔŋ lɛ mli. Kɛjɛ nakai be lɛ mli kɛbaa nɛɛ amɛfeko nyɔji yɛ jamɔ mli amɛhako Babilon Kpeteŋkpele lɛ dɔŋŋ, taakɛ bɔni amɛfee yɛ 1914-1918 jeŋ ta lɛ mli lɛ. Amɛkpɔmɔ he shidaa sa Mɔ ni kɛ mumɔ tsirɛ Yeremia ni egba no akɛ E-yiŋtoo lɛ fa lɛ. Nakai Mɔ lɛ ji Yehowa. Ekɛ Koresh Kpeteŋkpele ni ji Nuŋtsɔ Yesu Kristo ni awo ehiɛ nyam lɛ tsu enɛ he nii. Nɛkɛ okadi feemɔ mli Koresh nɛɛ je enɔyeli shishi yɛ ŋwɛi maŋtsɛyeli lɛ mli yɛ 1914, yɛ “bei kpawo” ni agba afɔ shi yɛ Nebukadnezar lamɔ lɛ mli lɛ naagbee. (Dan. 4:1-37) Kɛjɛ 1919 kɛbaa nɛɛ Koresh Kpeteŋkpele lɛ ni yeɔ nɔ lɛ ekpɔ gbɔmɛi akpekpei babaoo ni miitao jamɔ mli heyeli lɛ kɛ́jɛ Babilon Kpeteŋkpele lɛ mli. Anɔkwa ni amɛaaye emaŋtsɛyeli lɛ baaha abu amɛhe shweshweeshwe. Kristendom osɔfoi lɛ loo jamɔi ni jeee Kristofoi anɔ̃ lɛ ahiɛnyiɛlɔi nyɛɛɛ aye amɛnɔ.
Agba Sɛɛku Kɛmiiya Gɔŋ Nɔ Maŋtiase Lɛ Mli Lɛ Afɔ Shi
9, 10. Ani shwɛɛnii lɛ akpamɔ kɛmiijɛ Babilon Kpeteŋkpele lɛ mli lɛ 1919 lɛ ji nɔ ko ni ba trukaa lɛ, ni mɛni Yeremia 50:4, 5, 28 tsɔɔ akɛ no ji yiŋtoo ni yɔɔ sɛɛ?
9 Ŋmɛnɛ ni fe afii 60 nɛɛ, mɔ ko mɔ ko akasusu akɛ jamɔ mli kpɔmɔ ni akpɔ Yehowa webii ni ji shwɛɛnii ni abuuu amɛ lɛ akuu fioo ko lɛ ji nɔ ko ni ba trukaa kɛkɛ. Eba beni afee ni ebawo lɛ diɛŋtsɛ e-Biblia mli gbalɛi lɛ obɔ̃. Wɔkaneɔ yɛ egbalɛ ni etsɔ Yeremia nɔ ekɛha yɛ afi 614 D.Ŋ.B. ni gbaa Babilon shigbeemɔ yɛ 539 D.Ŋ.B. lɛ akɛ:
10 “Nakai gbii lɛ amli lɛ kɛ nakai be lɛ mli lɛ, Yehowa kɛɛ, Israelbii lɛ aaaba, amɛ kɛ Yudabii lɛ fɛɛtswɛm; ni amɛaaba fo kɛnyiɛ, ni amɛaaba tao Yehowa, amɛ-Nyɔŋmɔ lɛ sɛɛ gbɛ. Amɛaabi Zion [maŋtiase ni yɔɔ gɔŋ yiteŋ lɛ] shi, ni amɛaatsɔmɔ amɛhiɛaŋ jɛi gbɛ: nyɛbaa ni wɔkɛ wɔ he ayadamɔa Yehowa yɛ naanɔ kpaŋmɔ ni hiɛ kpaŋ nɔ mli [Kɛha mɛɛ yiŋtoo?] Anuɔ mɛi ni jo foi ni amɛje mli kɛjɛ Babel shikpɔŋ lɛ nɔ lɛ agbee, ni amɛmiijaje Yehowa, wɔ Nyɔŋmɔ lɛ, oweletɔɔ, esɔlemɔwe lɛ he oweletɔɔ lɛ yɛ Zion.”—Yer. 50:4, 5, 28.
11. Ani Yeremia gbalɛ Iɛ kɔɔ Yudafoi a-Zion Gbɛjianɔtoo lɛ he, ni mɛni anɔkwasaji lɛ tsɔɔ ŋmɛnɛ?
11 Enɛ kɔɔɔ Zion Gbɛjianɔtoo ko ni Austrian Yudanyo ko ni, atsɛɔlɛ Theodor Herzl je shishi yɛ 1897 lɛ he kwraa. Yerusalem ni Yudafoi lɛ yɔɔ mli ŋmɛnɛ lɛ baje amɛdɛŋ kɛtsɔ tawuu nɔ yɛ Gbii Ekpaa Ta ni amɛwuu yɛ 1967 lɛ mli, ni nɔni ma gɔŋ lɛ nɔ ji Islambii asɔlemɔtsu ni atsɛɔ lɛ “Dome of the Rock” lɛ, ni enɛ gbalaaa jwɛŋmɔ kɛbaaa Yehowa gbɛi lɛ nɔ. Mɛɛ “Zion” ji nɔni shwɛɛnii lɛ eku amɛsɛɛ kɛba mli yɛ toiŋjɔlɛ mli kɛjɛ 1919 lɛ?
12. Mɛɛ Zion nɛkɛ shwɛɛnii lɛ eku amɛsɛɛ kɛtee mli yɛ toiŋjɔlɛ mli kɛjɛ 1919 kɛbaa nɛɛ?
12 No ji Zion Gɔŋ ni Kristofonyo bɔfo Yohane na yɛ ninaa mli yɛ Yudafoi a-Yerusalem ni Roma asraafoi lɛ kpata hiɛ yɛ afi 70 Ŋ.B. lɛ sɛɛ afii 26 lɛ. Aŋma yɛ enɛ he akɛ: “Ni mikwɛ, ni naa, toobi lɛ damɔ Zion Gɔŋ lɛ nɔ, ni mɛi akpei oha kɛ nyɔŋmai-ejwɛ-kɛ-ejwɛ ni aŋma egbɛi kɛ etsɛ gbɛi yɛ amɛhiɛtsei anɔ fata ehe. . . . Ni gbee ni minu lɛ tamɔ saŋkutswalɔi ni hiɛ amɛsaŋkui amɛtswaa lɛ agbee. Ni amɛlaa lala ko ni tamɔ ehee yɛ [Nyɔŋmɔ] maŋtsɛsɛi lɛ hiɛ kɛ hiɛkalɔi ejwɛ lɛ kɛ onukpai lɛ ahiɛ; ni mɔ ko nyɛɛ lala lɛ akase akɛ ja mɛi akpei oha kɛ nyɔŋmai-ejwɛ-kɛ-ejwɛ lɛ ni ahe kɛjɛ shikpɔŋ lɛ nɔ lɛ kɛkɛ. . . . Ni amɛnyiɛɔ toobi lɛ sɛɛ kɛyaa he fɛɛ he ni eyaa lɛ. Mɛnɛɛmɛi ji mɛi ni ahe kɛjɛ gbɔmɛi ateŋ ni amɛtsɔmɔ kɛlɛŋkɛlɛŋ yibii amɛba Nyɔŋmɔ kɛ toobi lɛ.”—Kpoj. 14:1-4.
13. (a) Mɛni ji nɔni bɔfo Yohane bɔ he amaniɛ ni kɔɔ Babilon Kpeteŋkpele Iɛ he yɛ kukuji fioo ko sɛɛ? (b) Mɛni ni ba yɛ 1919 ha etsui fa?
13 Nɔni yɔɔ miishɛɛ ji akɛ, beni etsɔɔ enɛ mli nɛkɛ, ni kukuji komɛi hu ebaho lɛ Yohane ŋma akɛ: “Ni bɔfo kroko ni ji enyɔ nyiɛ sɛɛ Ekɛɛ: Ejwa, Babilon maŋ Kpeteŋkpele lɛ ejwa, ejaakɛ eha jeŋmaji fɛɛ enu ejwamaŋbɔɔ le he mlifu dãa lɛ eko.” (Kpoj. 14:8) Yɛ jamɔŋ ajwamaŋ ni ekɛ je lɛŋ maŋkwralɔi ebɔ lɛ fɛɛ sɛɛ lɛ Babilon Kpeteŋkpele Iɛ gbee shi waa yɛ 1919, yɛ hewalɛ ni enaa yɛ mɛi anɔ lɛ gbɛfaŋ. Bɔni Koresh Kpeteŋkpele Toobi Yesu Kristo kpɔ̃ nɛkɛ mumɔŋ Israelbii nɛɛ ni ji shwɛɛnii nɛɛ ni ekɛ mumɔŋ nitsumɔ ko wo amɛdɛŋ lɛ ha etsui fa.
14. (a) Ani shwɛɛnii lɛ ni ákpɔ amɛ lɛ tsu nii yɛ gbɛ ni ha ekɛ sabala akɛ “jamɔ ji ebɔɔ ni gbeɔ gbɔmɛi ajwɛŋmɔ” lɛ kpa gbee aloo mɛni ji nɔni akɛɛ Jeŋmaji Akpaŋmɔ lɛ ji? (b) Mɛɛ gɔŋ nɔ maŋtiase ko amɛtsɔ amɛhe amɛha?
14 Mɛi ni butuɔ nɔyelii ni yɛ 1919 mli lɛ Europa bokagbɛ maŋkwramɔŋ gbɛjianɔtooi lɛ bashɛ amɛdɛŋ lɛ tsu nii taakɛ bɔni amɛsabala lɛ tsɔɔ, “Jamɔ ji ebɔɔ ni gbeɔ gbɔmɛi ajwɛŋmɔ.” Shi amɛnɔ̃ lɛ jeee gbɛ ni esa akɛ Yehowa shwɛɛnii lɛ ni nakai be mli lɛ akpɔ amɛ kɛ́jɛ jamɔ Babilon Kpeteŋkpele lɛ mli lɛ atsɔ nɔ. Agbɛnɛ hu, ato Jeŋmaji Akpaŋmɔ ko he gbɛjianɔ ni asusu he ni akpɛlɛ nɔ yɛ afi 1919 Toiŋjɔlɛ kpee lɛ shishi, ni Amerika Kristo Sɔlemɔi Agwabɔɔ lɛ kpɛlɛ nɔ ni amɛtsɛ enɛ akɛ “Nyɔŋmɔ maŋtsɛyeli lɛ maŋkwramɔ gbɛjianɔtoo ni yɔɔ shikpɔŋ nɔ.” Ani Yehowa shwɛɛnii lɛ bu enɛ akɛ eji gbɛ kɛha amɛ? Dabi! Be mli ni amɛfee amɛkpee wulu yɛ Cedar Point, Ohio, U.S.A., yɛ September 1-8, 1919 lɛ, amɛkpa enɛ he mama akɛ eji apasa Nyɔŋmɔ maŋtsɛyeli, ni amɛgba mli kpoo amɛkɛɛ akɛ eyeŋ omanye. Akɛni amɛkpoo nɔ fɛɛ nɔ ni gbɔmɛi to akɛ amɛkɛ aaato najiaŋ lɛ hewɔ lɛ, amɛtsɔ amɛhiɛ amɛba ŋwɛi Zion Gɔŋ lɛ, ejaakɛ jɛmɛ ji heni amɛkɛ hemɔkɛyeli na Nyɔŋmɔ Toobi, Yesu Kristo, ni damɔ shi akɛ Maŋtsɛ ni miiye nɔ yɛ.—Kpoj. 14:1-3; Heb. 12:22.
15. Mɛni hewɔ shwɛɛnii lɛ kɛ yaafo tao mumɔŋ Zion sɛɛ gbɛ Iɛ, ni mɛɛ yiŋtoo hee amɛkɛje Biblia lɛ kasemɔ shishi agbɛnɛ?
15 No hewɔ lɛ shwɛɛnii lɛ kɛ miishɛɛ “yaafonui” tsi amɛhe kɛjɛ Babilon Kpeteŋkpele lɛ he, ni amɛtao mumɔŋ Zion Gɔŋ lɛ, heni amɛ ŋwɛi Maŋtsɛ lɛ damɔ ni eeye nɔ kɛjɛ Jeŋmaji Abe lɛ naagbee yɛ 1914 lɛ. Taakɛ ekɛ amɛ teokrase yiŋtoo lɛ kpaa gbee lɛ, amɛkɛ shishinumɔ kɛ yiŋtoo hee kase Biblia lɛ, ejaakɛ agbɛnɛ amɛmiina Biblia mli gbalɛi babaoo ni kɔɔ Nyɔŋmɔ maŋtsɛyeli kɛtsɔ Kristo nɔ lɛ he lɛ mlibaa.
16. Yɛ mɛɛ gbɛ nɔ aaanyɛ akɛɛ akɛ oweletɔɔ ni shwɛɛnii lɛ jaje lɛ ji kɛha ‘esɔlemɔwe’ lɛ, ni mɛɛ ‘jalɛnii’ amɛbaanyɛ amɛjaje amɛtsɔɔ yɛ gbɛkpamɔ mli?
16 Shwɛɛnii lɛ ni aku sɛɛ akɛ amɛ eba lɛ je shishi amɛjaje Yehowa, wɔ Nyɔŋmɔ lɛ oweletɔɔ, esɔlemɔ we lɛ he oweletɔɔ lɛ amɛtsɔɔ ni gbeyeishemɔ ko kwraa bɛ mli. (Yer. 50:28) Amɛ hu amɛji emumɔŋ sɔlemɔwe lɛ fa, okadi sɔlemɔwe ni Yesu Kristo ni ji Koŋtɛ Titri lɛ kɛ sɔlemɔwe kuu lɛ mlibii ni ji 144,000 lɛ fata he. (1 kor. 3:16, 17; Efe. 2:19-22) Yɛ Jeŋ Ta I lɛ mli lɛ afee shwɛɛnii nɛɛ ni ji sɔlemɔwe kuu lɛ niseniianii, ni yiwalɛ kɛ mɔdɛŋ ni abɔ koni akpata amɛhiɛ nɛɛ ha Yehowa ná nɔni ebaadamɔ nɔ ekɛjie emlifu kpo etsɔɔ Babilon Kpeteŋkpele lɛ kɛ ehemɛi lɛ yɛ be ni sa mli. Kɛkɛ lɛ ebaatsu Yeremia gbalɛ kakadaŋŋ lɛ he nii eshi Babilon kɛgbe naa kwraa. Akɛni amɛyɔɔ hemɔkɛyeli ni mli wa akɛ Yeremia gbalɛ lɛ mli nibii krokomɛi lɛ baaba mli, ni fɛɛ tamɔ nɔni atsu he nii momo po hewɔ lɛ, shwɛɛnii lɛ ni akɛ enɛ eba ekoŋŋ lɛ ŋɔɔ Yeremia wiemɔ ni yɔɔ yitso 51:10 lɛ ni amɛkɛɛɔ akɛ: “Yehowa ejie wɔjalɛ kpo: nyɛbaa ni wɔyagbaa, Yehowa, wɔ Nyɔŋmɔ lɛ nitsumɔ lɛ yɛ Zion.”
17. Mɛɛ najiaŋtoo nitsumɔ Yehowa esaa lɛ diɛŋtsɛ edɛŋ-dade lɛ eto kɛha efeemɔ?
17 Ákɛ Oweletɔlɔ lɛ, Yehowa yɛ nɔni lɛ diɛŋtsɛ ekɛ baatsu nii lɛ yɛ edɛŋ, ni etsĩɔ yiŋtoo hewɔ ni ekɛ baatsu nii lɛ ta etsɔɔ wɔ yɛ Yeremia wiemɔ ni yɔɔ 51:24 nɛɛ mli: “Ni mawo Babel kɛ Kaldeabii lɛ fɛɛ amɛnifɔji fɛɛ ni amɛfee Zion lɛ he nyɔmɔ yɛ nyɛhiŋmɛiiaŋ! Yehowa kɛɛ.”
18. Yɛ ahorabɔɔ lɛ fɛɛ ni eba Nyɔŋmɔ gbɛi lɛ nɔ Iɛ hewɔ Iɛ, namɔ jwɛŋmɔ shwɛɛnii lɛ baanyɛ aŋɔ yɛ gbɛ ni ja nɔ ni amɛkɛtsɔɔ nɔni amɛshweɔ yɛ Babilon Kpeteŋkpele lɛ awuiyeli kɛ lashishwiemɔ lɛ hewɔ?
18 Nyɛhaa wɔkaia ahorabɔɔ lɛ fɛɛ ni Babilon, jeŋ jamɔ gbɛjianɔtoo lɛ kɛba anɔkwa Nyɔŋmɔ hiɛkalɔ kome lɛ gbɛi anɔ lɛ, titri kɛtsɔ yi ni ewaa gbɔmɛi ni amɛjɔɔ amɛhe nɔ ni buɔ ni amɛhiɛɔ egbɛi lɛ mli lɛ anɔ lɛ. Kɛkɛ lɛ wɔbaayoo nɔ “hewɔ ni eji Yehowa diɛŋtsɛ yiŋtoo ni ja akɛ eeetsumɔ gbɛjianɔtoo ni yɔɔ shikpɔŋ nɔ ni ehenyɛlɔ kpeteŋkpele, Satan Abonsam kɛtsu nii lɛ fɛɛ kɛya lɛ. No hewɔ lɛ mɛi ni yɔɔ shikpɔŋ nɔ ni damɔ shi kɛha ŋwɛi Zion lɛ kpɛlɛɔ Yehowa diɛŋtsɛ jwɛŋmɔ yɛ nɛkɛ saji nɛɛ amli lɛ nɔ, amɛkpɛlɛɔ eyiŋtoo ni ejaje lɛ nɔ yɛ be mli ni amɛkɛɛɔ akɛ: “Zionnyo aaakɛɛ akɛ: Yi ni awa mi kɛ miheloo lɛ aba Babel nɔ! Yerusalem aaakɛɛ akɛ: Milã aba Kaldeabii lɛ anɔ!” Yer. 51:35.
19. Mɛɛ gbɛ mɔ yiwalɛ nibii ni yɔɔ nɛkɛ sɔlemɔ nɛɛ mli lɛ ni mɔ ko aaate shi ashi lɛ aaanyɛ afee nɔni ekɛaato nɔni Yehowa kɛɛɔ lɛ̀ he, yɛ be mli ni ewieɔ ehaa lɛ diɛŋtsɛ ehe yɛ Yeremia 51:36, 37 lɛ?
19 Kaaha mɔ ko ni teɔ shi woɔ ni buɔ nɛkɛ Zion kɛ Yerusalem sɔlemɔi nɛɛ akɛ eji yiwalɛ nii lɛ miisusu akɛ Yehowa Nyɔŋmɔ efeŋ mɔ ni tsuɔ jalɛ nii yɛ nɛkɛ sɔlemɔi nɛɛ ahetoo ni eeeha aba mli yɛ Babilon Kpeteŋkpele lɛ ni yɔɔ ŋmɛnɛ lɛ nɔ lɛ hewɔ. Ekuuu ehiɛ eshwieee yinɔsane mli anɔkwale ni ji akɛ ekɛ yiwalɛ ewa Yehowa jalɔi lɛ ayi lɛ nɔ, aahu kɛyashi heni efɔse amɛlá eshwie shi po. Nyɛhaa ewiea ehaa lɛ diɛŋtsɛ ehe yɛ wiemɔi ni yɔɔ Yeremia 51:36, 37 nɛɛ amli: “No hewɔ lɛ bɔni Yehowa kɛɛ nɛ: Naa, maye osane lɛ mahao, ni mato ohe owele; ni maha eŋshɔ [ni etsɔɔ nɔ ekɛyeɔ jara] lɛ agbi, ni maha enubu lɛ ata. Ni Babel aaatsɔmɔ koikoi.”
20. Shihilɛ ni yɔɔ amrɔ nɛɛ yɛ heni blema Babilon yɔɔ tsutsu lɛ yeɔ mɛɛ Yehowa nifeemɔi ahe odase?
20 Gbalɛ ni tamɔ nɛkɛ, ni akɛha yɛ 614 D.Ŋ.B.; aloo afii 75 dani aye Babilon nɔ kunim lɛ tamɔ nɔni enyɛŋ eba mli yɛ nakai be lɛ mli. Afi 614. D.Ŋ.B. lɛ, no mli lɛ Babilon miitee shi yɛ hewalɛ kɛ anunyam mli. Shi ŋmɛnɛ, heni blema Babilon maŋ lɛ hi yɛ henɔwomɔ mli yɛ Eufrate Faa lɛ naa lɛ yeɔ odase akɛ Yehowa maleee yɛ egbalɛ lɛ mli. Babilon blema tɛi lɛ fioo pɛ eshwɛ yɛ jɛmɛ. Nɔni Yehowa ma nɔ mi eha ewebii ni ayeɔ amɛ sane fɔŋ lɛ ba mli anɔkwale. No hewɔ lɛ eye “amɛsane” lɛ eha amɛ yɛ jeŋ muu fɛɛ saneyelihe lɛ; ekɛ ŋwɛi oweletɔɔ ba amɛnɔ. Ekwɛ nii eha jalɛsaneyeli ŋmɛ pɛpɛɛpɛ.
21, 22. Taakɛ Lala 137:8, 9 tsɔɔ lɛ, mɛɛ miishɛɛ Koresh Kpeteŋkpele lɛ baana yɛ wɔsɛɛ be ni ebɛŋkɛ lɛ mli?
21 Etsɛŋ, yɛ wɔsɛɛ be ni ebɛŋkɛ lɛ mli, ni okadi feemɔ mli Koresh, ni ji Yesu Kristo ni awo ehiɛ nyam lɛ kɛ miishɛɛ baatsu sane ni ka ekɛ Babilon Kpeteŋkpele lɛ ni yɔɔ ŋmɛnɛ lɛ teŋ lɛ he nii. Yehowa jalɔi ni amɛna amanehulu yɛ edɛŋ lɛ hiɛ ŋwɛi jalɛsaneyeli he jwɛŋmɔ, no hewɔ lɛ amɛbaanyɛ amɛkɛ lalatsɛ lɛ ni mumɔ yɔɔ enɔ lɛ afee ekome ni amɛkɛɛ akɛ:
22 “Bo Babel biyoo ni afeee butuu lɛ, aaajɔɔ mɔ ni too najiaŋ, tamɔ bɔni ofee wɔ lɛ! Aaajɔɔ mɔ ni ŋɔ obii bibii lɛ etswia tɛsaa lɛ!”—Lala 137:8, 9.
23. Ani akɛ shikpɔŋ nɔ gbɛjianɔtooi komɛi baatsu nii ni akɛfite Babilon Kpeteŋkpele, lɛ shi kɛlɛ gbɛnaanii nɛɛ bafeɔ nɔmɔ nɔ̃?
23 Abaaŋmɛ adesai agbɛjianɔtooi ni yɔɔ shikpɔŋ nɔ lɛ gbɛ yɛ be ni sa mli ni amɛkpata Babilon Kpeteŋkpele lɛ hiɛ. (Kpoj. 17:15-18) Shi Yesu Kristo baana miishɛɛ akɛ eeeŋɔ nakai hegbɛ lɛ ni ekɛkpata jeŋ apasa jamɔ maŋtsɛyeli lɛ hiɛ. Biblia gbalɛ jieɔ eyi akɛ lɛ ji Koresh Kpeteŋkpele lɛ ni esa akɛ ebutuɔ Babilon Kpeteŋkpele lɛ. Lɛ ji mɔ ni beni eyɔɔ shikpɔŋ nɔ akɛ gbɔmɔ lɛ, ekɛ enanemaahei asɛɛnyiɛlɔi lɛ na amanehulu babaoo yɛ edɛŋ lɛ.—Kpoj. 18:24.
24. (a) Babilon Kpeteŋkpele lɛ jieɔ ehe kpo akɛ eji hewolɔ yɛ nɔyeli he yɛ mɛɛ gbɛ nɔ? (b) Namɔ “biyoo” ji lɛ, ni mɛɛ amanehului etsɛŋ aaaba enɔ, ni yɛ mɛɛ gbɛ nɔ?
24 Abuɔ Babilon Kpeteŋkpele lɛ akɛ Hewolɔ ni ejie ehe kpo ákɛ gbɛjianɔtoo (Yer. 50:31, 32) Jeee shikpɔŋ nɔ Yerusalem aloo Zion ni yɔɔ bianɛ, he ni Islambii asɔlemɔtsu “Dome of the Rock” lɛ yɔɔ lɛ ekɛ-na sane, shi moŋ ŋwɛi Zion Gɔŋ lɛ ji mɔ ni ebuɔ lɛ akɛ ebienyɛ, ejaakɛ jɛmɛ ji he ni Koresh Kpeteŋkpele lɛ yeɔ nɔ akɛ Maŋtsɛ. Beni afee ni etsɔɔ nɛkɛ bienyɛyeli nɛɛ mli lɛ ekɛɛ akɛ: “Mita shi akɛ maŋnyɛ.” (Kpoj. 18:7) Kɛji akɛ aaatsɛ lɛ “biyoo” taakɛ bɔni atsɛ blema Babilon lɛ, belɛ nakai pɛ eji kɛha Satan Abonsam. (Yoh. 8:44; Yer. 50:42; 51:33) Ágba osharai sɔrɔtoi enyɔ ni baaba nɛkɛ jamɔŋ ajwamaŋ nɛɛ nɔ oya lɛ: “Aaakpakpaa obii yɛ ohe, ni oootsɔ okulafo.” (Yes. 47:9; Kpoj. 18:7, 8; Yer. 50:9) Ekolɛ abaagbe ejamɔ gbɛjianɔtoo lɛ mlibii lɛ yɛ “amanehulu kpeteŋkpele” ni baa lɛ mli aloo amɛbaagboi yɛ ehiɛ kɛtsɔ kwamɔ ni amɛaakwa lɛ lɛ hewɔ, ni amɛaakɛɛ akɛ amɛbɛ jamɔ ko kwraa mli. Enɛ baaha ewo yara!
25. Kɛji akɛ wɔteŋ mɔ ko sumɔɔɔ ni abuɔ lɛ akɛ efata nakai Babilon “bii” ni akɛ amɛ ‘baatswia tɛsaa’ lɛ ahe lɛ, bɛlɛ mɛni esa akɛ wɔfee ni shishashaomɔ ko bɛ mli?
25 Ani wɔteŋ mɔ ko miisumɔ ni akane lɛ afata Babilon Kpeteŋkpele lɛ jamɔ “bii” lɛ ahe yɛ be mli ni Nyɔŋmɔ be lɛ shɛɔ akɛ ekɛ amɛ aaatswia tɛsaa lɛ? Kɛji akɛ wɔsumɔɔɔ ni abu wɔ nɛkɛ, titri lɛ kɛji akɛ wɔkɛɛɔ akɛ wɔfata mɛi ni Nyɔŋmɔ tsɛɔ amɛ “mimaŋ” lɛ he lɛ, no lɛ mɛni? Esa ni wɔkɛ be ni eshwɛ lɛ atsu nii ni wɔbo mlihilɛ famɔ ni jɛ Nyɔŋmɔ ŋɔɔ kɛtsɔ e-Wiemɔ lɛ nɔ lɛ toi. “Nyɛjea emli, mimaŋ, koni nyɛkɛ lɛ akafee ekome yɛ ehe eshai lɛ amli, ni nyɛkana ohaomɔi lɛ eko.”—Kpoj. 18:4; Yer. 50:8a.
[Shishigbɛ niŋmai]
a Ajie kɛjɛ May 15, 1980 Blɔfo Buu-Mɔɔ lɛ mli.