Yitso 33

Aakojo Ajwamaŋ ni Hiɛ Eshwie Shi Lɛ

Ninaa 11​—Kpojiemɔ 17:1-18

Saneyitso: Babilon Kpeteŋkpele lɛ ta kooloo ni tsuɔ tamɔ muneele nɔ ni naagbee lɛ kooloo lɛ tsɔ ehiɛ ewo lɛ ni ekpata ehiɛ

Emlibaa be: Kɛjɛ 1919 kɛyashi amanehulu kpeteŋkpele lɛ mli

 1. Mɛni bɔfoi kpawo lɛ ateŋ mɔ kome jie lɛ kpo etsɔɔ Yohane?

ESA akɛ afɔse Yehowa jalɛ mlifu lɛ ashwie shi kɛgbe naa kwraa, ni fɛɛ feɔ tɔi kpawo! Beni bɔfo ni ji ekpaa lɛ fɔse etɔ lɛ mli nii lɛ eshwie he ni blema Babilon yɔɔ lɛ, ebafee Babilon Kpeteŋkpele lɛ haomɔ yɛ gbɛ ni ja nɔ taakɛ bɔ ni nibii yaa nɔ oyayaayai kɛyaa Harmagedon naagbee ta lɛ he lɛ. (Kpojiemɔ 16:1, 12, 16) Eka shi faŋŋ akɛ, eeenyɛ efee akɛ nɛkɛ bɔfo nɛɛ nɔŋŋ agbɛnɛ ejieɔ nɔ hewɔ kɛ bɔ ni Yehowa tsuɔ ejalɛ kojomɔi lɛ ahe nii lɛ kpo lɛ. Nɔ ni Yohane nu ni ena yɛ enɛ sɛɛ lɛ ha enaa kpɛ ehe: “Ni bɔfoi kpawo lɛ ni hiɛ tɔi kpawo lɛ ateŋ mɔ kome ba ni ekɛ mi bawie ekɛɛ: Ba, ni matsɔɔo ajwamaŋ kpeteŋkpele lɛ ni ta nui babaoo lɛ anɔ lɛ kojomɔ lɛ, mɔ ni shikpɔŋ lɛ nɔ maŋtsɛmɛi lɛ kɛbɔ ajwamaŋ, ni mɛi ni yɔɔ shikpɔŋ lɛ nɔ lɛ tɔrɔ daa kɛ ejwamaŋbɔɔ lɛ daa lɛ.”—Kpojiemɔ 17:1, 2.

 2. Mɛɛ odaseyeli yɔɔ ni tsɔɔ akɛ “ajwamaŋ kpeteŋkpele lɛ” (a) jeee blema Roma? (b) ejeee jarayeli nitsumɔ wulu? (d) eji nyɔŋmɔjamɔ gbɛjianɔtoo ni yɔɔ diɛŋtsɛ?

² “Ajwamaŋ kpeteŋkpele”! Mɛni hewɔ akɛ gbɛi ni haa mɔ he jɔ̃ɔ lɛ nɛkɛ haa lɛ lɛ? Namɔ ni? Mɛi komɛi kɛ nɛkɛ okadi ajwamaŋ nɛɛ toɔ blema Roma he. Shi Roma ji maŋkwramɔŋ hewalɛ. Nɛkɛ ajwamaŋ nɛɛ kɛ shikpɔŋ lɛ nɔ maŋtsɛmɛi naa bɔlɛ, eka shi faŋŋ akɛ Roma maŋtsɛmɛi lɛ fata he. Kɛfata he lɛ, kɛ akpata ehiɛ lɛ, akɛɛ “shikpɔŋ lɛ nɔ maŋtsɛmɛi lɛ” woɔ yara akɛni ebɛ dɔŋŋ lɛ hewɔ. No hewɔ lɛ, enyɛŋ efee maŋkwramɔŋ hewalɛ. (Kpojiemɔ 18:9, 10) Agbɛnɛ hu, akɛni je lɛŋ guɔyelɔi hu woɔ yara yɛ ehewɔ hewɔ lɛ, enyɛŋ efee jarayeli nitsumɔ wulu he mfoniri. (Kpojiemɔ 18:15, 16) Shi wɔkaneɔ akɛ, ‘etsɔ emumɔi atsɛmɔi anifeemɔi lɛ anɔ eshishiu jeŋmaji lɛ fɛɛ.’ (Kpojiemɔ 18:23) Enɛ feɔ lɛ faŋŋ akɛ esa akɛ ajwamaŋ kpeteŋkpele lɛ afee jeŋ fɛɛ jamɔ gbɛjianɔtoo ko ni yɔɔ shihilɛ mli.

 3. (a) Mɛni hewɔ esa akɛ ajwamaŋ kpeteŋkpele lɛ afee nɔ ni feɔ nɔ ko babaoo he mfoniri fe Roma Katolik Sɔlemɔ lɛ loo Kristendom fɛɛ lɛ? (b) Mɛɛ Babilon tsɔɔmɔi anaa yɛ Bokagbɛ jamɔi babaoo mli kɛ agbɛnɛ hu yɛ Kristendom jamɔi sɔrɔtoi lɛ amli? (d) Mɛni Roma Katolik osɔfo John Henry Newman kpɛlɛ nɔ yɛ Kristendom tsɔɔmɔi, kusum nifeemɔi, kɛ nifeemɔi sɔrɔtoi babaoo lɛ ashishijee he? (Kwɛmɔ shishigbɛ niŋmaa lɛ.)

³ Mɛɛ jamɔ ni yɔɔ shihilɛ mli nɛ? Ani lɛ ji Roma Katolik Sɔlemɔ lɛ, taakɛ mɛi komɛi kɛɔ lɛ? Aloo lɛ ji Kristendom fɛɛ? Dabi, esa akɛ efee mɔ ni da fe enɛɛmɛi kɛ eeenyɛ eshishiu jeŋmaji fɛɛ. Yɛ anɔkwale mli lɛ, lɛ ji jeŋ muu fɛɛ apasa jamɔ maŋtsɛyeli lɛ. Anaa eshishijee kɛjɛɔ Babilon teemɔŋ saji amli yɛ bɔ ni Babilon hemɔkɛyelii kɛ tsɔɔmɔi pii egbɛ eshwa jamɔi ni ebɔle shikpɔŋ muu lɛ fɛɛ nɔ lɛ amli lɛ hewɔ. Akɛ nɔkwɛmɔ nɔ lɛ, hemɔkɛyeli yɛ adesa susuma ni gbooo, yɛ hɛl piŋmɔ he, kɛ triniti nyɔŋmɔi amli lɛ ji nɔ ko ni anaa yɛ Bokagbɛ jamɔi lɛ babaoo kɛ agbɛnɛ yɛ Kristendom jamɔi sɔrɔtoi lɛ amli. Apasa jamɔ je shishi egbɛ eshwa yɛ nɔ ni fe afii 4,000 ni eho nɛ yɛ blema Babilon maŋtiase lɛ mli, ni etee nɔ eda agbo yɛ ŋmɛnɛŋmɛnɛ beaŋ ni ebatsɔ nɔ ni atsɛɔ lɛ, yɛ gbɛ ni ja nɔ akɛ, Babilon Kpeteŋkpele lɛ.a Shi mɛni hewɔ akɛ gbɛi ni ahiɔ ni ji “ajwamaŋ kpeteŋkpele” lɛ tsɛɔ lɛ lɛ?

 4. (a) Mɛni mli blema Israel bɔ ajwamaŋ yɛ? (b) Babilon Kpeteŋkpele lɛ bɔ ajwamaŋ yɛ mɛɛ gbɛ ni ekaaa nɔ?

⁴ Babilon (aloo Babel, ni eshishi ji “Futufutu”) lɛ bashɛ he ni ebahe gbɛi fe fɛɛ yɛ dalɛ mli, yɛ Nebukadnezar be lɛ mli. Eji jamɔ kɛ maŋkwramɔŋ maŋ ni eyɛ sɔlemɔtsui kɛ gbatsui fe akpe. Esɔfoyeli lɛ yɛ hewalɛ kpeteŋkpele. Eyɛ mli akɛ Babilon bɛ dɔŋŋ akɛ jeŋ hewalɛ afii babaoo ni eho nɛ, shi jamɔ Babilon Kpeteŋkpele lɛ yɛ lolo, ni akɛni ediɔ blema nɔ lɛ sɛɛ hewɔ lɛ, eyaa nɔ enaa maŋkwramɔŋ saji anɔ hewalɛ ni ekudɔɔ amɛ. Shi ani Nyɔŋmɔ kpɛlɛɔ jamɔ ni akɛwoɔ maŋkwramɔŋ lɛ nɔ? Awie yɛ Hebri Ŋmalɛi lɛ amli akɛ Israel bɔ ajwamaŋ beni ekɛ ehe wo apasa jamɔ mli lɛ kɛ agbɛnɛ yɛ be mli ni ekɛ jeŋmaji lɛ fee kpaŋmɔ moŋ fe ni ekɛ ehiɛ aaafɔ Yehowa nɔ lɛ. (Yeremia 3:6, 8, 9; Ezekiel 16:28-30) Babilon Kpeteŋkpele lɛ hu bɔɔ ajwamaŋ. Nɔ ni fe fɛɛ lɛ, efee nɔ fɛɛ nɔ ni esusuɔ akɛ eja gbɛ bɔni afee ni ekɛna gbɛi kɛ hewalɛ yɛ shikpɔŋ lɛ nɔ maŋtsɛmɛi ni yeɔ nɔ lɛ anɔ.—1 Timoteo 4:1.

 5. (a) Mɛɛ gbɛihemɔ jamɔ mli osɔfoi naa mli ŋɔɔmɔ? (b) Mɛni hewɔ bɔ ni ashweɔ akɛ aaahe gbɛi yɛ je lɛŋ lɛ ji nɔ ni teɔ shi woɔ Yesu Kristo wiemɔi lɛ?

⁵ Ŋmɛnɛ, jamɔ mli hiɛnyiɛlɔi biɔ ni aha amɛ nɔyeli mli gbɛhe ni kwɔ, ni yɛ shikpɔji komɛi anɔ lɛ, amɛkɛ amɛhe woɔ nɔyeli lɛ mli, ni amɛnaa gbɛhe yɛ nɔyeli lɛ mli akɛ maŋsɔɔlɔi. Yɛ 1988 mli lɛ, Protestant osɔfoi enyɔ ni ale amɛ jogbaŋŋ bi ni ahala amɛ akɛ United States, Amerika maŋsɔɔlɔ nukpa. Babilon Kpeteŋkpele lɛ mli onukpai lɛ sumɔɔ ni ale amɛ; anaa amɛ mfonirii yɛ adafitswaa woji amli ni amɛkɛ maŋkwralɔi ni ehe gbɛi miigba sane. Nɔ ni tamɔɔɔ enɛ lɛ, Yesu kpoo maŋkwramɔŋ saji ni ekɛ ehe aaawo mli, ni ewie yɛ ekaselɔi lɛ ahe akɛ: “Amɛjɛɛɛ je lɛ mli, taakɛ bɔ ni mi hu mijɛɛɛ je lɛ mli lɛ.”—Yohane 6:15; 17:16; Mateo 4:8-10; kwɛmɔ Yakobo 4:4 hu.

Ŋmɛnɛŋmɛnɛ Beaŋ ‘Ajwamaŋbɔɔ’

6, 7. (a) Te fee tɛŋŋ ni Hitler Nazi Kuu lɛ ba hewalɛ mli yɛ Germany lɛ? (b) Yɛ mɛɛ gbɛ nɔ kpaŋmɔ loo gbeekpamɔ ni Vatican kɛ Nazi Germany fee lɛ ye bua Hitler yɛ jeŋ nɔyeli ni etaoɔ lɛ mli?

⁶ Yɛ maŋkwramɔŋ ni ekɛ ehe woɔ lɛ hewɔ lɛ, ajwamaŋ kpeteŋkpele lɛ kɛ awerɛho babaoo eba adesai anɔ. Akɛ nɔkwɛmɔnɔ lɛ, susumɔ anɔkwalei ni hɔlɔ bɔ ni fee ni Hitler bana hewalɛ yɛ Germany lɛ he—anɔkwalei komɛi ni ehiii kwraa ni mɛi komɛi baasumɔ ni amɛtsumɔ kɛjɛ yinɔsane woji amli. Yɛ May 1924 lɛ, Nazi Kuu lɛ hiɛ sɛii 32 yɛ German Reichstag loo Mlawoo Gwabɔɔ lɛ mli. Beni shɛɔ May 1928 lɛ, enɛ eba shi kwraa kɛbashɛ sɛii 12. Shi, bei ni anaaa nitsumɔ atsu kɛ emli ohia ba jeŋ muu lɛ fɛɛ nɔ yɛ 1930; nɔ ni nyiɛ sɛɛ ba ji, kanyamɔ ni Nazi Kuu lɛ kanya amɛhe, ni amɛna sɛii 230 yɛ sɛii 608 ni yɔɔ German oshiki ni afɔ yɛ July 1932 mli lɛ mli. Yɛ no sɛɛ etsɛɛɛ nɔŋŋ ni tsutsu maŋsɔɔlɔ nukpa Franz von Papen, ni Paapa lɛ eha lɛ gbɛhe lɛ baye ebua Nazi Kuu lɛ. Taakɛ yinɔsaneŋmalɔi tsɔɔ lɛ, von Papen na Roma Maŋtsɛyeli Krɔŋkrɔŋ hee ko he ninaa. Be kuku ni lɛ diɛŋtsɛ lɛ ekɛye nɔ akɛ maŋsɔɔlɔ nukpa lɛ bafee efolo, no hewɔ lɛ agbɛnɛ ehiɛ ka nɔ akɛ ebaatsɔ Nazi Kuu lɛ nɔ ena hewalɛ. Beni shɛɔ January 1933 lɛ, ebua gbɔmɛi anaa kɛjɛ jarayeli nitsumɔi wuji amli koni amɛfi Hitler sɛɛ, ni etsɔ ŋaa gbɛi sɔrɔtoi anɔ ekwɛ koni Hitler abatsɔ Germany maŋsɔɔlɔ nukpa yɛ January 30, 1933. Lɛ diɛŋtsɛ hu lɛ ebafee maŋsɔɔlɔ nukpa sɛɛyelɔ ni Hitler kɛ lɛ tsu nii koni Katolikbii ni yɔɔ Germany lɛ abafi esɛɛ. Beni Hitler na hewalɛ lɛ sɛɛ nyɔji enyɔ pɛ kɛkɛ ni egu mlawoo gwabɔɔ lɛ, ni emɔmɔ hiɛnyiɛlɔi ni teɔ shi woɔ lɛ lɛ mli gbɔmɛi akpei abɔ ni ekɛ amɛ tee gbokɛlɛfoi aŋsraiaŋ, ni eje shishi efa nɔnyɛɛ he ta eshi Yudafoi lɛ yɛ faŋŋ mli.

⁷ Yɛ July 20, 1933 lɛ, miishɛɛ ni Vatican yɔɔ yɛ Nazi hewalɛ ni teɔ shi lɛ mli lɛ je kpo yɛ faŋŋ mli beni Cardinal Pacelli (ni yɛ sɛɛ mli lɛ ebatsɔ Paapa Pius XII lɛ) kɛ ewaonaa gbɛi wo kpaŋmɔ ko ni afee yɛ Roma ni ka Vatican kɛ Nazi Germany teŋ lɛ shishi. Von Papen kɛ ewaonaa gbɛi wo woji lɛ ashishi akɛ Hitler najiaŋdamɔlɔ, ni Pacelli kɛ paapa lɛ jweremɔ nɔ ni ji Grand Cross of the Order of Pius lɛ ha von Papen.b Tibor Koeves ŋma yɛ enɛ he yɛ ewolo ni ji Satan in Top Hat lɛ mli, ni ekɛɛ akɛ: “Nɛkɛ Gbeekpamɔ loo Kpaŋmɔ nɛɛ ji kunimyeli kpeteŋkpele kɛha Hitler. Ekɛ jeŋba mli sɛɛfimɔ ni ji klɛŋklɛŋ nɔ ni enine shɛ nɔ kɛjɛ je lɛŋ lɛ ha lɛ, ni enɛ jɛ jɛɛhe ko ni awo nɔ grɔŋŋ.” Kpaŋmɔ loo gbeekpamɔ lɛ bi ni Vatican agbala ehe shi kɛjɛ Germany Katolik Kuu lɛ ni efiɔ sɛɛ lɛ he, koni yɛ nɛkɛ gbɛ nɔ lɛ, efi Hitler kuu kome ni ji “maŋ muu fɛɛ nɔ” lɛ sɛɛ.c Agbɛnɛ emla ni ji 14 lɛ jaje akɛ: “Abaahala osɔfonukpai, osɔfoi kɛ mɛi krokomɛi ni tamɔ nakai yɛ be mli ni amralo lɛ, ni Nɔyeli lɛ ehala lɛ, ena nɔmimaa akɛ yɛ maŋkwramɔŋ susumɔi asɛɛ lɛ, yiŋkɔshikɔshifeemɔ ko bɛ enɛ he lɛ.” Beni shɛɔ 1933 naagbee (ni Paapa Pius XI ejaje akɛ eji “Afi Krɔŋkrɔŋ” lɛ), no mli lɛ Vatican sɛɛfimɔ ebafee nɔ titri yɛ bɔ ni Hitler biɔ ni eye jeŋ muu fɛɛ nɔ lɛ mli.

8, 9. (a) Te Vatican kɛ agbɛnɛ Katolik Sɔlemɔ lɛ kɛ esɔfoi lɛ fee amɛnii yɛ Nazi niseniianifeemɔ lɛ he amɛha tɛŋŋ? (b) Mɛɛ sane German Katolik osɔfonukpai lɛ kɛha yɛ Jeŋ Ta II shishijee? (d) Mɛni ejɛ jamɔ kɛ maŋkwramɔ ni efee ekome lɛ mli eba?

⁸ Eyɛ mli akɛ osɔfoi kɛ yei osɔfoi fioo ko te shi wo Hitler niseniianifeemɔ lɛ—ni amɛna amanehulu hu yɛ enɛ hewɔ moŋ—shi Vatican kɛ agbɛnɛ Katolik Sɔlemɔ lɛ kɛ esɔfoi babaoo lɛ je gbɛ amɛfi Nazi niseniianifeemɔ lɛ sɛɛ, ni amɛbuɔ enɛ akɛ nɔ ni akɛbaate shi ashi jeŋ Komunisim mli lɛɛmɔ lɛ yɛ faŋŋ mli aloo yɛ ŋaa mli. Paapa Pius XII ni ta shi ni ehe ejɔ lɛ yɛ Vatican lɛ kwɛ, ni eha Yudafoi lɛ a-Seshibulemɔ kɛ yiwaa ni mli wa ni akɛba Yehowa Odasefoi lɛ kɛ mɛi krokomɛi anɔ lɛ tee nɔ ni ewieee eshiii enɛ. Ewa diɛŋtsɛ akɛ Paapa John Paul II aaajie osɔfo kome ni te shi wo Nazi nifeemɔ lɛ yi yɛ be mli ni eyasara Germany yɛ May 1987 lɛ. Mɛni ji nɔ ni Germany osɔfoi akpei abɔ lɛ feɔ yɛ be mli ni Hitler kɛ hegbeyeiwoo yeɔ nɔ lɛ? Sɔlemɔ lɛ wolo ko ni German Katolik osɔfonukpai lɛ ŋma yɛ September 1939, yɛ be mli ni Jeŋ Ta II fɛ lɛ haa anuɔ nɛkɛ sane nɛɛ shishi. Efa ko kaneɔ nɛkɛ: “Wɔmiiwo Katolik asraafoi lɛ ŋaa ni amɛtsu amɛnitsumɔ yɛ toiboo mli amɛha (Fuehrer) Hiɛnyiɛlɔ lɛ ni amɛfee klalo akɛ amɛkɛ amɛhe baasha afɔle yɛ nɛkɛ yiŋkpɛɛ ŋmɛlɛtswaa nɛɛ mli. Wɔmiibi Anɔkwafoi lɛ ni amɛfata he ni akɛ sɔlemɔ ni mli wa aha koni Ŋwɛi Nɔkwɛmɔ anyiɛ nɛkɛ ta nɛɛ hiɛ kɛya omanyeyeli mli yɛ jɔɔmɔ mli.”

⁹ Katolik ŋaa nifeemɔ ni tamɔ nɛkɛ lɛ feɔ nɔ ajwamaŋbɔɔ ni jamɔ kɛ ehe ewo mli fe afii 4,000 ni eho nɛ, yɛ maŋkwramɔŋ Maŋ lɛ ni elakaa koni ekɛna hewalɛ kɛ hegbɛ lɛ he mfoniri. Jamɔ kɛ maŋkwramɔŋ ekomefeemɔi ni tamɔ nɛkɛ kɛ tawuu, yiwaa, kɛ adesai apiŋmɔi pii eba. Kwɛ miishɛɛ ni adesai baana akɛ Yehowa kojomɔ ni ekɛbaa ajwamaŋ kpeteŋkpele lɛ nɔ lɛ eshɛ shi. Aha eba mli oya!

Eta Nui Babaoo Nɔ

10. Mɛni ji “nui babaoo” ni Babilon Kpeteŋkpele lɛ kɛ ehiɛ fɔɔ nɔ kɛha ehebuu lɛ, ni mɛni baa amɛnɔ?

¹⁰ Blema Babilon ta nui babaoo nɔ—Eufrate Faa lɛ kɛ nu jɔɔi babaoo. Enɛɛmɛi buɔ ehe ni yɛ nakai beaŋ nɔŋŋ lɛ eji jarayeli gbɛ ni etsɔɔ nɔ enaa nii, kɛyashi be mli ni fɛɛ mii yɛ gbɛkɛ kome mli. (Yeremia 50:38; 51:9, 12, 13) Babilon Kpeteŋkpele lɛ hu kɛ ehiɛ fɔɔ “nui babaoo” nɔ koni ebu ehe ni eha ena nii. Nɛkɛ okadi nui nɛɛ ji “gbɔmɛi kɛ asafoi kɛ maji kɛ majianɔwiemɔi,” ni ji akɛ, adesai akpekpei toi akpei abɔ ni eye amɛ nɔ ni amɛkɛ amɛ nibii efi esɛɛ lɛ. Shi nɛkɛ nui nɛɛ hu miimii, amɛmiita, aloo amɛmiigbala amɛhe shi kɛmiijɛ esɛɛfimɔ lɛ he.—Kpojiemɔ 17:15; okɛto Lala 18:5; Yesaia 8:7 he.

11. (a) Te fee tɛŋŋ ni blema Babilon ‘ha shikpɔŋ muu lɛ fɛɛ tɔrɔ daa’ lɛ? (b) Yɛ mɛɛ gbɛ nɔ Babilon Kpeteŋkpele lɛ ‘eha shikpɔŋ muu lɛ fɛɛ hu etɔ daa’ yɛ?

¹¹ Agbɛnɛ, atsɔɔ akɛ blema Babilon ji “shika kpulu . . . yɛ Yehowa dɛŋ, ni eha shikpɔŋ muu lɛ fɛɛ etɔrɔ daa.” (Yeremia 51:7) Blema Babilon nyɛ jeŋmaji ni bɛŋkɛ amɛ lɛ anɔ koni amɛmi Yehowa mlifu wiemɔi yɛ be mli ni etsɔ tawuu mli eye amɛnɔ kunim, ni eha amɛtsɔmɔ mɛi ni egbɔjɔ tamɔ hii ni etɔrɔ daa lɛ. Yehowa kɛ lɛ tsu nii akɛ edɛŋdade yɛ enɛ mli. Babilon Kpeteŋkpele lɛ hu eye kunim kɛyashɛ he ni ebatsɔ jeŋ muu fɛɛ maŋtsɛyeli. Shi eka shi faŋŋ akɛ ejeee dɛŋdade ko ni yɔɔ Nyɔŋmɔ dɛŋ. Shi moŋ, esɔmɔ “shikpɔŋ lɛ nɔ maŋtsɛmɛi” lɛ ni ekɛ amɛ ebɔ jamɔŋ ajwamaŋ. Eshɛje nɛkɛ maŋtsɛmɛi nɛɛ amii kɛtsɔ epasa tsɔɔmɔi kɛ enifeemɔi ni ŋɔɔ mɔ nyɔŋ lɛ anɔ koni eha gbɔmɛi ni “hiɔ shikpɔŋ lɛ nɔ lɛ” agbɔjɔ tamɔ hii ni etɔrɔ daa, ni amɛsɔmɔ amɛnɔyeli lɛ ni amɛbiii sane yɛ he.

12. (a) Yɛ mɛɛ gbɛ nɔ Babilon Kpeteŋkpele lɛ fa ko ni yɔɔ Japan lɛ ha afɔse la babaoo ashwie shi yɛ Jeŋ Ta II be lɛ mli? (b) Mɛɛ gbɛ nɔ atsɔ atsĩ “nui” ni fiɔ Babilon Kpeteŋkpele lɛ sɛɛ lɛ naa kɛjɛ ehe yɛ Japan, ni mɛni jɛ mli ba?

¹² Shinto Japan kɛ enɛ he nɔkwɛmɔ nɔ ni sa kadimɔ haa. Japan asraafonyo ni atsɔ eyiŋ lɛ susuɔ akɛ eji hiɛnyamwoo ni da fe fɛɛ akɛ ekɛ ewala aaaha maŋtsɛ lɛ—Shinto nyɔŋmɔ ni fe fɛɛ lɛ. Yɛ Jeŋ Ta II mli lɛ, Japan asraafoi 1,500,000 gboi yɛ tawuu he; etamɔ nɔ ni amɛteŋ mɔ fɛɛ mɔ susuɔ akɛ ni aaaŋmɛɛ tawuu lɛ he lɛ ji hiɛshishwiemɔ. Shi yɛ Japan nɔ kunim ni aye lɛ hewɔ lɛ, enɛ nyɛ Maŋtsɛ Hirohito nɔ ni ekpoo nyɔŋmɔ ni akɛɛ eji lɛ. Nɔ ni jɛ enɛ mli ba ji “nui” ni fiɔ Shinto jamɔ ni yɔɔ Babilon Kpeteŋkpele lɛ mli lɛ sɛɛ lɛ ni agbala he shi kɛjɛ ehe—ao, yɛ be mli ni Shinto jamɔ ekpɛlɛ la babaoo ni afɔse ashwie shi yɛ Pasific tawuu he lɛ nɔ lɛ sɛɛ! Nɛkɛ Shinto jamɔ mli hewalɛ ni gbɔjɔ nɛɛ hu gbele gbɛ yɛ nyɛsɛɛ afii nɛɛ amli koni Japanbii fe 200,000, ni amɛteŋ mɛi ni fa ji tsutsu Shintobii kɛ Buddhabii abatsɔmɔ Jeŋ Muu Fɛɛ Nuŋtsɔ Yehowa sɔɔlɔi ni amɛjɔɔ amɛhe nɔ ni abaptisi amɛ.

Ajwamaŋ lɛ Ta Kooloo Ko Nɔ

13. Mɛɛ naakpɛɛ nii ko Yohane na beni bɔfo ko kpala lɛ yɛ mumɔ lɛ hewalɛ mli kɛtee ŋa nɔ lɛ?

¹³ Mɛni ekoŋŋ gbalɛ lɛ jieɔ lɛ kpo yɛ ajwamaŋ kpeteŋkpele lɛ kɛ nɔ ni baaba enɔ lɛ he? Taakɛ Yohane gba agbɛnɛ lɛ, ebana mfoniri kroko ko yɛ faŋŋ mli: “Ni [bɔfo lɛ] ekpala mi kɛtee ŋa nɔ yɛ mumɔ mli; ni mina yoo ko ta kooloo ko ni tsuɔ tamɔ muneele ko nɔ ni ehe eyi obɔ kɛ musubɔɔ gbɛii, ni eyɛ yitsei kpawo kɛ akoloŋtoi nyɔŋma.”—Kpojiemɔ 17:3.

14. Mɛni hewɔ esa jogbaŋŋ akɛ aaakpala Yohane kɛaaya ŋa nɔ lɛ?

¹⁴ Mɛni hewɔ akpala Yohane kɛtee ŋa lɛ nɔ lɛ? Mra be mli fɔbuu sane ko ni ajaje ashi blema Babilon lɛ ji sane ko ni atsɔɔ mli akɛ eji “ŋshɔ naa ŋa lɛ kojomɔ he gbalɛ.” (Yesaia 21:1, 9) Enɛ kɛ kɔkɔbɔɔ ni sa ha akɛ yɛ enui babaoo ni fãa ehe loo ebuɔ ehe lɛ fɛɛ sɛɛ lɛ, blema Babilon baatsɔ amaŋfɔ ni wala bɛ nɔ. No hewɔ lɛ esa akɛ aaakpala Yohane yɛ ninaa nɛɛ mli kɛaaya ŋa nɔ koni eyana nɔ ni baaba Babilon Kpeteŋkpele lɛ nɔ. Lɛ hu ebaatsɔ amaŋfɔ koikoi. (Kpojiemɔ 18:19, 22, 23) Shi nɔ ni Yohane na yɛ jɛmɛ lɛ ha enaa kpɛ ehe. Jeee ajwamaŋ kpeteŋkpele lɛ pɛ yɔɔ jɛmɛ! Eta kooloo ko ni he yɔɔ gbeyei nɔ!

15. Mɛɛ sɔrɔtofeemɔi yɔɔ kooloo lɛ ni yɔɔ Kpojiemɔ 13:1 lɛ kɛ Kpojiemɔ 17:3 lɛ teŋ?

¹⁵ Nɛkɛ kooloo nɛɛ yɛ yitsei kpawo kɛ akoloŋtoi nyɔŋma. Ani no nɔŋŋ ji kooloo ni Yohane tsɔ hiɛ ena, ni yɔɔ yitsei kpawo kɛ akoloŋtoi nyɔŋma lɛ? (Kpojiemɔ 13:1) Dabi, sɔrɔto yɛ mli. Nɛkɛ kooloo nɛɛ tsuɔ tamɔ muneele, etamɔɔɔ tsutsu kooloo lɛ, ejaakɛ ebɛ maŋtsɛfaii. Ni eeena musubɔɔ gbɛii yɛ eyitsei kpawo lɛ pɛ he lɛ, “ehe eyi obɔ kɛ musubɔɔ gbɛii.” Ni kɛlɛ, wekukpaa ko baanyɛ aka nɛkɛ kooloo hee nɛɛ kɛ tsutsu nɔ lɛ teŋ; bɔ ni amɛje amɛhe lɛ yɛ faŋŋ tsɔ fe nɔ ko ni aaanyɛ aba trukaa kɛkɛ.

16. Mɛni ji kooloo ni tsuɔ tamɔ muneele lɛ, ni mɛni atsɔɔ akɛ no ji eyiŋtoo?

¹⁶ Belɛ mɛni ji nɛkɛ kooloo hee ni tsuɔ tamɔ muneele nɛɛ? Esa akɛ efee kooloo lɛ ni Anglo-Amerika kooloo lɛ ni yɔɔ akoloŋtoi bibii enyɔ tamɔ toobi lɛ wo hewalɛ ni afɔ lɛ lɛ he amaga lɛ. Beni afee amaga lɛ sɛɛ lɛ, aŋmɛ gbɛ ni nakai akoloŋtoi enyɔ kooloo lɛ kɛ mumɔ wo kooloo lɛ amaga lɛ mli. (Kpojiemɔ 13:14, 15) Agbɛnɛ Yohane na amaga ni yɔɔ wala mli, ni miimu. Efeɔ Jeŋmaji Akpaŋmɔ gbɛjianɔtoo lɛ ni kooloo ni yɔɔ akoloŋtoi bibii enyɔ lɛ kɛba shihilɛ mli yɛ 1920 lɛ he mfoniri. U.S. Amerika Maŋ Sɔɔlɔ Nukpa Wilson etsɔ hiɛ ena akɛ Kpaŋmɔ lɛ “baafee he ni abaabua he naa yɛ ni ajɛ akɛ jalɛsaneyeli aha mɛi fɛɛ ni ajie tawuu he gbeyeishemɔ lɛ kɛya kwraa.” Beni atee lɛ shi ekoŋŋ yɛ jeŋ ta ni ji enyɔ lɛ sɛɛ akɛ Jeŋmaji Ekomefeemɔ lɛ, eyiŋtoo ni aŋmala ashwie shi lɛ ji “ni eha majimaji ateŋ toiŋjɔlɛ kɛ shweshweeshwe shihilɛ aba.”

17. (a) Musubɔɔ gbɛi yɛ okadi kooloo ni tsuɔ tamɔ muneele lɛ he fɛɛ he yɛ mɛɛ gbɛ nɔ? (b) Namɔ ta kooloo ni tsuɔ tamɔ muneele lɛ nɔ lɛ? (d) Babilon jamɔ kɛ ehe yabɔ Jeŋmaji Akpaŋmɔ lɛ kɛ esɛɛyelɔ lɛ he kɛjɛ shishijee tɔɔ yɛ mɛɛ gbɛ nɔ?

¹⁷ Nɛkɛ okadi kooloo nɛɛ he eyi obɔ kɛ musubɔɔ gbɛii yɛ mɛɛ gbɛ nɔ? No ji akɛ gbɔmɛi kɛ amaga ni majimaji fee nɛɛ ebaye Nyɔŋmɔ Maŋtsɛyeli lɛ najiaŋ—akɛ no baanyɛ atsu nɔ ni Nyɔŋmɔ kɛɔ akɛ e-Maŋtsɛyeli lɛ pɛ baanyɛ atsu lɛ. (Daniel 2:44; Mateo 12:18, 21) Nɔ ni sa kadimɔ yɛ Yohane ninaa lɛ mli ji akɛ, Babilon Kpeteŋkpele lɛ ta kooloo ni tsuɔ tamɔ muneele lɛ nɔ. Gbalɛ lɛ ji anɔkwale, ejaakɛ Babilon jamɔ, titri lɛ nɔ ni yɔɔ Kristendom lɛ kɛ ehe ebɔ Jeŋmaji Akpaŋmɔ lɛ kɛ esɛɛyelɔ lɛ he. Mra mli yɛ December 18, 1918 tɔɔ ni kuu ni ale bianɛ akɛ Amerika Kristo Sɔlemɔi Amaŋ Gwabɔɔ lɛ kpɛlɛ sanejajemɔ ko nɔ ni efa ko kɛɔ akɛ: “Kpaŋmɔ ni tamɔ nɛkɛ jeee nɔ ni he yɔɔ sɛɛnamɔ yɛ maŋkwramɔŋ kɛkɛ; shi moŋ eji Nyɔŋmɔ Maŋtsɛyeli lɛ kpojiemɔ yɛ maŋkwramɔŋ yɛ shikpɔŋ nɔ. . . . Sɔlemɔ lɛ baanyɛ ni ekɛ tsuijurɔ mumɔ aha, ni kɛ enɛ bɛ mli lɛ, Jeŋmaji Akpaŋmɔ ko nyɛŋ ahi shi. . . . Jeŋmaji Akpaŋmɔ lɛ shishitoo jɛ Sanekpakpa lɛ mli. Taakɛ Sanekpakpa lɛ ji lɛ, eyiŋtoo ji ‘toiŋjɔlɛ yɛ shikpɔŋ nɔ, ni ana gbɔmɛi ahe tsuijurɔ.’”

18. Kristendom osɔfoi lɛ jie amɛhe kpo akɛ amɛfiɔ Jeŋmaji Akpaŋmɔ lɛ sɛɛ yɛ mɛɛ gbɛ nɔ?

¹⁸ Yɛ January 2, 1919 lɛ, San Francisco Chronicle lɛ mli sane ko ni aŋma yɛ ehiɛ gbɛ diɛŋtsɛ ji: “Paapa lɛ Miikpa Fai Koni Akpɛlɛ Wilson Jeŋmaji Akpaŋmɔ lɛ Nɔ.” Yɛ October 16, 1919 lɛ, akɛ wolo ko ni akɛmiikpa fai ni sɔlemɔi wuji ni ale amɛ lɛ mli osɔfoi 14,450 kɛ amɛwaonaa gbɛi ewo shishi baha U.S. Amerika Bɛgwafoi lɛ, ni amɛmiiwo nakai kuu lɛ hewalɛ akɛ “amɛkpɛlɛ Paris toiŋjɔlɛ yelikɛfuamɔ ni jeŋmaji akpaŋmɔ lɛ kpaŋmɔ lɛ yɔɔ mli lɛ nɔ.” Eyɛ mli akɛ U.S. Amerika Bɛgwafoi lɛ nyɛɛɛ akpɛlɛ nɛkɛ kpaŋmɔ nɛɛ nɔ moŋ, shi Kristendom osɔfoi lɛ tee nɔ amɛfi Kpaŋmɔ lɛ sɛɛ. Ni yɛ mɛɛ gbɛ nɔ atsɔ ato Kpaŋmɔ lɛ ama shi agbɛnɛ? Adafitswaa sane ko ni jɛ Switzerland, ni je kpo yɛ November 15, 1920 lɛ, kaneɔ akɛ: “Atswa Jeŋmaji Akpaŋmɔ lɛ klɛŋklɛŋ gwabɔɔ lɛ naagbelemɔ lɛ he adafi yɛ leebi nɛɛ ŋmɛji nyɔŋma-kɛ-ekome kɛtsɔ sɔlemɔi ni yɔɔ Geneva lɛ fɛɛ aŋmɛlɛ ni amɛtswa lɛ nɔ.”

19. Beni kooloo ni tsuɔ tamɔ muneele lɛ jie ehe kpo lɛ, mɛɛ nifeemɔ gbɛ Yohane kuu lɛ kɔ?

¹⁹ Ani Yohane kuu lɛ, ni ji kuu kome pɛ ni yɔɔ shikpɔŋ nɔ ni kɛ oyaiyeli kpɛlɛ Mesia Maŋtsɛyeli ni baa lɛ nɔ lɛ kɛ Kristendom na gbɛfaŋnɔ yɛ kooloo ni tsuɔ tamɔ muneele lɛ ni akɛ woo kɛ yijiemɔ ha lɛ lɛ mli? Dabida! Yɛ Hɔgbaa, September 7, 1919 lɛ, Yehowa webii akpee ni amɛfee yɛ Cedar Point, Ohio, lɛ kɛ maŋshiɛmɔ ko ha, ni no ji “Adesai ni Ehao lɛ Ahiɛnɔkamɔ.” Yɛ enɔ jetsɛremɔ lɛ, Sandusky Star-Journal adafitswaa wolo lɛ bɔ amaniɛ akɛ J. F. Rutherford wie etsɔɔ mɛi ni miihe ashɛ 7,000 ni ekɛɛ yɛ mli akɛ “etsɛŋ ni Nuŋtsɔ lɛ mlifu baaba Kpaŋmɔ lɛ nɔ . . . ejaakɛ osɔfoi lɛ—Katolik kɛ Protestant—ni kɛɔ akɛ amɛji Nyɔŋmɔ najiaŋdamɔlɔi lɛ, ekpoo egbɛjianɔtoo lɛ, ni amɛyakpɛlɛ Jeŋmaji Akpaŋmɔ lɛ nɔ, ni amɛjie eyi akɛ eji Kristo maŋtsɛyeli lɛ kpojiemɔ yɛ maŋkwramɔŋ yɛ shikpɔŋ lɛ nɔ.”

20. Mɛni hewɔ eji musubɔɔ akɛ osɔfoi lɛ aaajie Jeŋmaji Akpaŋmɔ lɛ yi akɛ “Nyɔŋmɔ Maŋtsɛyeli lɛ kpojiemɔ yɛ maŋkwramɔŋ yɛ shikpɔŋ nɔ” lɛ?

²⁰ Kulɛ esa akɛ Jeŋmaji Akpaŋmɔ lɛ nine ni nyɛ shi yɛ hiɛshishwiemɔ mli lɛ ahɛle osɔfoi lɛ shi akɛ adesai agbɛjianɔtoo jeee Nyɔŋmɔ Maŋtsɛyeli ni yɔɔ shikpɔŋ nɔ lɛ fa. Mɛɛ musubɔɔ saji ji enɛ yɛ nakai kɛɛmɔ mli! Ehaa ebafeɔ tamɔ nɔ ni Nyɔŋmɔ fata nitsumɔ gbonyo ni Kpaŋmɔ lɛ batsɔ lɛ he. Yɛ Nyɔŋmɔ gbɛfaŋ lɛ, “enitsumɔi hi pɛ.” Yehowa ŋwɛi Maŋtsɛyeli ni yɔɔ Kristo shishi lɛ—ji nɔ ni ebaatsɔ nɔ ni ekɛ toiŋjɔlɛ aba ni eha afee esuɔmɔnaa nii yɛ shikpɔŋ nɔ taakɛ afeɔ yɛ ŋwɛi lɛ—shi jeee maŋkwralɔi ni amɛfutu ni miipele nibii ahe ni amɛteŋ mɛi pii ji mɛi ni heee Nyɔŋmɔ nɔ amɛyeee lɛ.—5 Mose 32:4; Mateo 6:10.

21. Mɛni tsɔɔ akɛ ajwamaŋ kpeteŋkpele lɛ fiɔ Kpaŋmɔ lɛ sɛɛyelɔ, Jeŋmaji Ekomefeemɔ lɛ sɛɛ ni ejieɔ eyi?

²¹ Ni Kpaŋmɔ lɛ sɛɛyelɔ, Jeŋmaji Ekomefeemɔ lɛ hu? Kɛjɛ be mli ni ato ama shi lɛ mli beebe ni ajwamaŋ kpeteŋkpele lɛ tu eta esɛɛ, ni ana lɛ yɛ enɔ yɛ faŋŋ mli ni eebɔ mɔdɛŋ ni ekudɔ lɛ kɛya eyiŋtoo he. Akɛ nɔkwɛmɔ nɔ lɛ, beni ena afii 20 ni aye enɛ gbijurɔ yɛ June 1965 lɛ, Roma Katolik Sɔlemɔ lɛ najiaŋdamɔlɔi kɛ Eastern Orthodox Sɔlemɔ lɛ najiaŋdamɔlɔi kɛ Protestantbii, Yudafoi, Hindubii, Buddhabii, kɛ Moslembii ni akɛɛ amɛfee ekome—ni amɛdamɔ shi kɛha shikpɔŋ lɛ nɔ bii akpekpei akpei enyɔ—bua amɛhe naa yɛ San Francisco ni amɛkɛye Jeŋmaji Ekomefeemɔ lɛ sɛɛ ni amɛfiɔ kɛ eyi ni amɛjieɔ lɛ he gbijurɔ. Beni Paapa Paul VI yasara Jeŋmaji Ekomefeemɔ lɛ yɛ October 1965 lɛ, etsɔɔ akɛ eji “majimaji ateŋ gbɛjianɔtoi lɛ ateŋ nɔ ni da fe fɛɛ” ni ekɛfata he akɛ: “Gbɔmɛi ni yɔɔ shikpɔŋ muu lɛ fɛɛ nɔ lɛ kɛ amɛhiɛ fɔɔ Jeŋmaji Ekomefeemɔ lɛ nɔ akɛ naagbee hiɛnɔkamɔ kɛha gbeekpamɔ kɛ toiŋjɔlɛ.” Beni paapa kroko, ni ji Paapa John Paul II yasara jɛmɛ ni ewieɔ etsɔɔ Jeŋmaji Ekomefeemɔ lɛ gwabɔɔ lɛ yɛ October 1979 lɛ, ekɛɛ: “Miyɛ hiɛnɔkamɔ akɛ Jeŋmaji Ekomefeemɔ lɛ baaya nɔ adamɔ shi akɛ toiŋjɔlɛ kɛ jalɛsaneyeli gwabɔɔ he ni kwɔ fe fɛɛ.” Nɔ ni sa kadimɔ ji akɛ, paapa lɛ wie Yesu Kristo kɛ Nyɔŋmɔ Maŋtsɛyeli lɛ he fioo pɛ yɛ ewiemɔ lɛ mli. Beni eyasara U.S. Amerika yɛ September 1987 mli lɛ, taakɛ The New York Times lɛ bɔ amaniɛ lɛ, “John Paul wie babaoo yɛ Jeŋmaji Ekomefeemɔ lɛ nitsumɔ kpakpa ni ekɛhaa . . . ‘jeŋ muu fɛɛ ekomefeemɔ sɛɛfimɔ hee’ shwereɔ lɛ he.”

Gbɛi Ko, Teemɔŋ Sane Ni

22. (a) Mɛɛ kooloo nɛkɛ ajwamaŋ kpeteŋkpele lɛ ehala akɛ eeeta enɔ lɛ? (b) Te Yohane tsɔɔ okadi ajwamaŋ Babilon Kpeteŋkpele lɛ mli eha tɛŋŋ?

²² Etsɛŋ ni bɔfo Yohane baale akɛ ajwamaŋ kpeteŋkpele lɛ ehala kooloo ko ni he yɔɔ gbeyei ni eta enɔ. Shi klɛŋklɛŋ lɛ, egbalaa ejwɛŋmɔ kɛyaa Babilon Kpeteŋkpele lɛ diɛŋtsɛ nɔ. Ewula kɛ nibii kpakpai, shi oh, kwɛ bɔ ni anyaŋeɔ lɛ ahaa! “Ni yoo lɛ wo afaseo diŋ kɛ muneele atade, ni akɛ shika kɛ tɛi ni jara wa kɛ adiagbai ewula lɛ, ni ehiɛ shika kpulu ni eyi obɔ kɛ ejwamaŋbɔɔ lɛ mli nihii nii kɛ muji nii lɛ yɛ edɛŋ; ni aŋma gbɛi ko yɛ ehiɛnaa akɛ teemɔŋ sane: Babilon Kpeteŋkpele lɛ, shikpɔŋ lɛ nɔ ajwamaŋi lɛ kɛ nihii nii lɛ anyɛ lɛ. Ni mina yoo lɛ akɛ krɔŋkrɔŋbii lɛ ala lɛ kɛ Yesu he odasefoi lɛ ala lɛ etɔ lɛ daa.”—Kpojiemɔ 17:4-6a.

23. Mɛni ji Babilon Kpeteŋkpele lɛ gbɛi lɛ fɛɛ, ni mɛni ji nɔ ni etsɔɔ?

²³ Taakɛ afɔɔ feemɔ yɛ blema Roma lɛ, ayɔseɔ nɛkɛ ajwamaŋ nɛɛ kɛtsɔɔ gbɛi ni yɔɔ ehiɛnaa lɛ nɔ.d Eji gbɛi kakadaŋŋ: “Babilon Kpeteŋkpele lɛ, shikpɔŋ lɛ nɔ ajwamaŋi lɛ kɛ nihii nii lɛ anyɛ lɛ.” Nakai gbɛi lɛ ji “teemɔŋ sane,” nɔ ko ni akɛ eshishinumɔ etee. Shi abaatsɔɔ teemɔŋ sane lɛ mli yɛ Nyɔŋmɔ be ni sa mli. Yɛ anɔkwale mli lɛ, bɔfo lɛ kɛ saji babaoo ni fa haa Yohane bɔni afee ni Yehowa tsuji ni yɔɔ ŋmɛnɛ lɛ ayoo nɔ ni egbɛi ni atsɔɔ mli nɛɛ damɔ shi kɛha diɛŋtsɛ. Wɔyɔseɔ Babilon Kpeteŋkpele lɛ akɛ apasa jamɔi fɛɛ. Lɛ ji “ajwamaŋi . . . lɛ anyɛ lɛ” ejaakɛ apasa jamɔi komekomei ni yɔɔ je lɛŋ lɛ fɛɛ, ni Kristendom mli jamɔi sɔrɔtoi babaoo lɛ fata he lɛ tamɔ biyei kɛha lɛ, ni amɛkaseɔ lɛ yɛ mumɔŋ ajwamaŋ ni ebɔɔ lɛ mli. Agbɛnɛ hu eji “nihii nii lɛ anyɛ” kɛ shishinumɔ akɛ efɔ bii ni anyaŋeɔ tamɔ wɔŋjamɔ, mumɔi atsɛmɔ, kaablɛfii, ŋulamiiaŋkwɛmɔ, klamɔ, gbɔmɛi ni akɛ amɛ shaa afɔle, sɔlemɔtsu mli ajwamaŋbɔɔ, daatɔɔ ni akɛwoɔ apasa nyɔŋmɔi ahiɛ nyam, kɛ nihii nii krokomɛi.

24. Mɛni hewɔ eji nɔ ni sa akɛ aaana akɛ Babilon Kpeteŋkpele lɛ wo “afaseo diŋ kɛ muneele atade” ni “akɛ shika kɛ tɛi ni jara wa kɛ adiagbai ewula lɛ” lɛ?

²⁴ Babilon Kpeteŋkpele lɛ wo “afaseo diŋ kɛ muneele atade,” atadei lɛ su tsɔɔ odehei atade, ni “akɛ shika kɛ tɛi ni jara wa kɛ adiagbai ewula lɛ.” Kwɛ bɔ ni enɛ sa jogbaŋŋ ha! Bo lɛ susumɔ tsũi fɛfɛji lɛ, amagai ni yɔɔ naakpɛɛ kɛ nitɛŋmɔi lɛ, nibii ni jara wawai ni asɔ loo ashɔ lɛ, kɛ jamɔ mli nibii krokomɛi kɛ agbɛnɛ jwetri kɛ shika diɛŋtsɛ babaoo ni je nɛŋ jamɔi ebua naa lɛ he okwɛ. Kɛji akɛ enɛɛmɛi yɛ Vatican, yɛ TV nɔ sanekpakpashiɛlɔi amaŋtsɛyeli he ni yɔɔ U.S. Amerika lɛ, aloo eyɛ Bokagbɛbii agbatsui kɛ sɔlemɔtsui fɛfɛji lɛ amli hu lɛ, Babilon Kpeteŋkpele lɛ—ebua jwetri babaoo naa—ni yɛ bei komɛi amli hu lɛ elaajeɔ fɛɛ.

25. (a) “Kpulu ni eyi obɔ kɛ . . . nihii nii kɛ muji nii” lɛ feɔ mɛni he okadi? (b) Okadi ajwamaŋ lɛ etɔ daa yɛ mɛɛ shishinumɔ naa?

²⁵ Agbɛnɛ kwɛmɔ nɔ ni ajwamaŋ lɛ hiɛ yɛ edɛŋ lɛ. Yohane baanyɛ amu waa yɛ be mli ni ena enɛ lɛ—shika kpulu “ni eyi obɔ kɛ ejwamaŋbɔɔ lɛ mli nihii nii kɛ muji nii lɛ”! Enɛ ji kpulu ni “ejwamaŋbɔɔ lɛ he mlifu daa” ni no nɔ etsɔ ni ekɛha jeŋmaji lɛ fɛɛ tɔrɔ daa lɛ yɔɔ mli lɛ. (Kpojiemɔ 14:8; 17:4) Kɛ okwɛ esɛɛ lɛ eyɛ fɛo ni ejara wa, shi nɔ ni yɔɔ mli lɛ ji nihii nii, nii ni he tseee. (Okɛto Mateo 23:25, 26 he.) Nifeemɔi ni anyaŋeɔ kɛ amalei ni ajwamaŋ kpeteŋkpele lɛ kɛtsu nii ni ekɛlaka jeŋmaji lɛ koni ekɛ amɛ awo ehewalɛ shishi lɛ ji nɔ ni yɔɔ mli. Nɔ ni anyaŋeɔ fe fɛɛ hu lɛ, Yohane na akɛ ajwamaŋ lɛ diɛŋtsɛ etɔ daa, Nyɔŋmɔ tsuji lɛ ala etɔ lɛ daa! Yɛ anɔkwale mli lɛ, wɔkaneɔ yɛ sɛɛ mli akɛ “emli ana gbalɔi kɛ krɔŋkrɔŋbii kɛ mɛi fɛɛ ni agbe yɛ shikpɔŋ lɛ nɔ lɛ ala lɛ yɛ.” (Kpojiemɔ 18:24) Mɛɛ la yi sɔ babaoo aye nɛkɛ!

26. Mɛɛ odaseyeli yɔɔ ni tsɔɔ akɛ Babilon Kpeteŋkpele lɛ eye la yi sɔ?

²⁶ Jeŋ apasa jamɔ maŋtsɛyeli lɛ efɔse la babaoo ni tamɔ ŋshɔ eshwie shi yɛ afii ohai abɔ lɛ amli. Akɛ nɔkwɛmɔ nɔ lɛ, yɛ Japan, yɛ teŋgbɛ afii lɛ amli lɛ, akɛ sɔlemɔtsui ni yɔɔ Kyoto lɛ fee mɔji, ni Buddha osɔfoi ni amɛtsɔmɔ amɛhe tabilɔi tsɛɔ “Buddha gbɛi krɔŋkrɔŋ lɛ,” ni amɛkɛ amɛhe wuɔ ta yɛ gbɛjegbɛi anɔ aahu kɛyashiɔ be mli ni la hoɔ yɛ gbɛi nɛɛ anɔ. Yɛ afii ohai 20 lɛ mli hu lɛ, Kristendom osɔfoi lɛ kɛ amɛmaji sɔrɔtoi lɛ amli asraafoi lɛ shi ako kɛtee ta, ni amɛgbegbee amɛhe, ni kɛ hooo lɛ amɛkpata gbɔmɛi ni fe akpekpei oha awala hiɛ. Yɛ October 1987 mli lɛ, tsutsu U.S. Amerika maŋsɔɔlɔ nukpa Nixon kɛɛ: “Afii ohai 20 nɛɛ efee nɔ ni afɔse la ashwie shi yɛ mli fe fɛɛ yɛ yinɔsane mli. Agbe gbɔmɛi babaoo yɛ tai ni awuu yɛ afii oha nɛɛ mli lɛ fe tai fɛɛ ni awuu ni tsɔ afii oha nɛɛ hiɛ lɛ mli.” Nyɔŋmɔ buɔ je lɛŋ jamɔi lɛ fɔ yɛ amɛhe ni amɛkɛwo enɛɛmɛi fɛɛ mli lɛ hewɔ; Yehowa hiɔ “niji ni shwieɔ la ni eye bem shi” lɛ. (Abɛi 6:16, 17) Yohane etsɔ hiɛ enu bolɔmɔ ko kɛjɛ afɔleshaa latɛ lɛ mli akɛ: “Owura krɔŋkrɔŋ kɛ anɔkwafo, mɛɛ beyinɔ po oookojo ni oootɔ wɔla lɛ he owele yɛ mɛi ni hiɔ shikpɔŋ lɛ nɔ lɛ anɔ?” (Kpojiemɔ 6:10) Babilon Kpeteŋkpele lɛ, ajwamaŋi lɛ kɛ shikpɔŋ lɛ nɔ nihii nii lɛ anyɛ lɛ baafee mɔ ni abaayoo lɛ waa yɛ be mli ni ahaa nakai sanebimɔ lɛ hetoo lɛ.

[Shishigbɛ niŋmai]

Ni aaatsuu nɛkɛ wɔŋjamɔ nɛɛ he nɛkɛ lɛ, “Yehowa Ofe lɛ” woɔ Kristofoi aŋaa akɛ: “Nyɛjea amɛteŋ, ni nyɛtsia nyɛhe, ni nyɛkataa muji nɔ ko he.”—2 Korintobii 6:14-18.

[Akrabatsa ni yɔɔ baafa 237]

Churchill Kpa ‘Ajwamaŋbɔɔ’ he Mama

Yɛ ewolo The Gathering Storm (1948) lɛ mli lɛ, Winston Churchill bɔ amaniɛ akɛ Hitler hala Franz von Papen akɛ German sɔɔlɔ kɛha Vienna “koni ekɛfite hiɛnaanɔbii ni yɔɔ Austria maŋkwramɔ mli lɛ loo ni ekɛgbala amɛ kɛba egbɛfaŋ.” Churchill tsɛ U.S. Amerika maŋsɔɔlɔ ni yɔɔ Vienna lɛ wiemɔi asɛɛ akɛ ewie von Papen he akɛ: “Papen kɛ ekaa tsɔ gbɛ ni ehiii kwraa nɔ . . . etee nɔ ekɛɛ mi akɛ . . . eto eyiŋ akɛ ekɛ gbɛi ni ena akɛ Katoliknyo kpakpa lɛ baatsu nii koni ekɛye Austriabii anɔ kunim tamɔ osɔfonukpa loo Cardinal Innitzer.”

Beni Austria gbee shi ni Hitler asraafoi lɛ enyiɛ kɛbote Vienna lɛ, Katolik osɔfonukpa Innitzer fa akɛ Austria sɔlemɔi fɛɛ ashi swastika ni ji German aflaŋaa lɛ, amɛtswa amɛŋmɛlɛ, ni amɛsɔle amɛha Adolf Hitler ni akɛwo efɔmɔ gbi lɛ hiɛ nyam.

[Akrabatsa/Mfoniri ni yɔɔ baafa 238]

Aŋma sane ni nyiɛ sɛɛ nɛɛ, yɛ nɛkɛ saneyitso nɛɛ shishi yɛ The New York Times lɛ mli klɛŋklɛŋ nɔ ni je kpo yɛ December 7, 1941 lɛ mli:

[Akrabatsa ni yɔɔ baafa 244]

“Musubɔɔ Gbɛii”

Beni kooloo ni hiɛ akoloŋtoi bibii enyɔ lɛ ha ato Jeŋmaji Akpaŋmɔ lɛ yɛ Jeŋ Ta I sɛɛ lɛ, ejamɔ mli hemɛi babaoo lɛ tao amrɔ nɔŋŋ akɛ amɛaatsuu nifeemɔ nɛɛ he yɛ jamɔ mli. Nɔ ni jɛ mli ba ji akɛ, toiŋjɔlɛ gbɛjianɔtoo hee lɛ batsɔ nɔ ni “ehe eyi obɔ kɛ musubɔɔ gbɛii.”

“Kristojamɔ baanyɛ ekɛ tsuijurɔ aha, akɛ hewalɛ ni yɔɔ [jeŋmaji] akpaŋmɔ lɛ sɛɛ, koni etsake kpaŋmɔ lɛ kɛjɛ wolo folo ko ni eji lɛ mli efee lɛ Nyɔŋmɔ maŋtsɛyeli lɛ dɛŋdade.”—The Christian Century, U.S.A., June 19, 1919, baafa 15.

“Jeŋmaji Akpaŋmɔ lɛ jwɛŋmɔ lɛ ji Nyɔŋmɔ Maŋtsɛyeli lɛ ni akpa mli kɛtee jeŋmaji lɛ ateŋ akɛ jeŋ gbɛjianɔtoo ni kɛ tsuijurɔ baaba. . . . Eji nɔ ko ni Kristofoi fɛɛ sɔleɔ yɛ he beni amɛkɛɔ akɛ, ‘O-Maŋtsɛyeli lɛ aba’ lɛ.”—The Christian Century, U.S.A., September 25, 1919, baafa 7.

“Nɔ ni haa Jeŋmaji Akpaŋmɔ lɛ waa kpɛŋŋ ji Kristo La lɛ.”—Dr. Frank Crane, Protestant osɔfo, U.S.A.

“The [National] Council [of Congregational Churches] lɛ fiɔ [Jeŋmaji Akpaŋmɔ] lɛ Kpaŋmɔ lɛ sɛɛ akɛ maŋkwramɔŋ dɛŋdade pɛ ni yɔɔ bianɛ ni Yesu Kristo Mumɔ lɛ baana hegbɛ ni da ni ekɛtsu nii ni ekɛto jeŋmaji lɛ asaji ahe gbɛjianɔ.”—The Congregationalist and Advance, U.S.A., November 6, 1919, baafa 642.

“Kpee lɛ miibi ni Methodistbii fɛɛ afi ni amɛdi [Jeŋmaji Akpaŋmɔ lɛ] jwɛŋmɔ kpakpa ni Nyɔŋmɔ ni ji Tsɛ lɛ kɛ Nyɔŋmɔ bii ni yɔɔ shikpɔŋ nɔ lɛ hiɛ lɛ sɛɛ.”—The Wesleyan Methodist Church, Britain.

“Kɛ wɔsusu kpaŋmɔ nɛɛ taomɔ nii, nibii ni ebaanyɛ efee, kɛ yiŋkpɛi ahe lɛ, wɔnaa akɛ nɔ ni yɔɔ mli ji Yesu Kristo tsɔɔmɔi lɛ amli oti: Nyɔŋmɔ Maŋtsɛyeli lɛ kɛ ejalɛ lɛ . . . Ejeee nɔ ko ni shɛɛɛ enɛ.”—Shiɛmɔ wiemɔ ni Archbishop of Canterbury lɛ kɛha yɛ be mli ni agbeleɔ Jeŋmaji Akpaŋmɔ lɛ gwabɔɔ lɛ naa yɛ Geneva, December 3, 1922 lɛ.

“Jeŋmaji Akpaŋmɔ lɛ Naanyobɔɔ ni yɔɔ maŋ nɛɛ mli lɛ yɛ hegbɛ ni yɔɔ krɔŋkrɔŋ ni maŋsɛɛ sanekpakpashiɛlɔi akuu ni diɔ adesai asɛɛ lɛ yɔɔ lɛ nɔŋŋ, ejaakɛ amrɔ nɛɛ lɛ ji dɛŋdade titri kɛha Kristo akɛ toiŋjɔlɛ Lumɔ lɛ nɔyeli yɛ jeŋmaji lɛ ateŋ.”—Dr. Garvie, Congregationalist osɔfo, Britain.

“Katolek Osɔfonukpai ni Yɔɔ Fulda lɛ Miibi Jɔɔmɔ kɛ Kunimyeli . . . Germany Katolek Osɔfonukpai a-Gwabɔɔ ni tee nɔ yɛ Fulda lɛ ejie yi akɛ aje ‘tawuu sɔlemɔ’ krɛdɛɛ ko shishi koni akane yɛ sɔlemɔ lɛ shishijee kɛ enaagbee. Sɔlemɔ lɛ miibi Ŋwɛi Gbɛtsɔɔmɔ kɛ jɔɔmɔ yɛ German tawuu nii anɔ kɛ kunimyeli ni eebi ni abu asraafoi lɛ awala kɛ amɛgbɔmɔtsoŋ hewalɛnamɔ he. Osɔfonukpai lɛ fa lolo akɛ Katolek osɔfoi lɛ aje gbɛ amɛhala Hɔgbaa krɛdɛɛ ko ni amɛkai German asraafoi ‘ni yɔɔ shikpɔŋ nɔ, ŋshɔ hiɛ kɛ kɔɔyɔɔŋ lɛ,’ kɛ hooo lɛ shikome yɛ nyɔŋ kome mli.”

Ajie sane ni aŋma nɛɛ kɛjɛ adafitswaa wolo lɛ mli nɔ ni akala yɛ sɛɛ mli lɛ amli. December 7, 1941 ji gbi nɔ ni Nazi Germany hefatalɔ, Japan yatutua U.S. Amerika tawuu lɛji lɛ yɛ Pearl Harbor lɛ.

[Shikpɔŋ he mfoniri ni yɔɔ baafa 236]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Apasa tsɔɔmɔi ni aheɔ ayeɔ yɛ jeŋ fɛɛ lɛ na amɛ shishijee kɛjɛ Babilon

Babilon

Trinitii loo nyɔŋmɔi etɛ sɔrɔtoi

Adesa susuma hiɔ shi yɛ gbele sɛɛ

Mumɔi atsɛmɔ—“gbohii” ni akɛ amɛ wieɔ

Amagai kɛ nitsumɔ yɛ jamɔ mli

Kaablɛfii kɛ nitsumɔ ni akɛkpata daimonioi

Osɔfoyeli kuu ni yɔɔ hewalɛ lɛ anɔyeli

[Mfoniri ni yɔɔ baafa 239]

Blema Babilon ta nui babaoo nɔ

[Mfoniri ni yɔɔ baafa 239]

Ajwamaŋ kpeteŋkpele lɛ hu ta “nui babaoo” anɔ ŋmɛnɛ

[Mfoniri ni yɔɔ baafa 241]

Babilon Kpeteŋkpele lɛ ta kooloo ni he yɔɔ gbeyei nɔ

[Mfonirii ni yɔɔ baafa 242]

Jamɔ mli ajwamaŋ lɛ kɛ shikpɔŋ lɛ nɔ maŋtsɛmɛi ebɔ ajwamaŋ

[Mfonirii ni yɔɔ baafa 245]

“Krɔŋkrɔŋbii lɛ ala lɛ etɔ” yoo “lɛ daa”