Mɛi ni Feɔ Ekome Kɛhiɔ Shi yɛ “Shikpɔŋ” ni Akɛha Ekoŋŋ Nɔ
“Nyɛ lɛ, aaatsɛ nyɛ Yehowa osɔfoi, ni aaakɛɛ nyɛ akɛ wɔ-Nyɔŋmɔ lɛ sɔɔlɔi ji nyɛ.”—YESAIA 61:6.
1, 2. (a) Mɛɛ shihilɛ mli mɛi ni etsake kɛba jamɔ lɛ mli lɛ hi yɛ Israel? (b) Mɛɛ mumɔ “asafo babaoo” lɛ mlibii lɛ ejie lɛ kpo yɛ ŋmɛnɛŋmɛnɛ beaŋ?
YƐ BLEMA beaŋ lɛ, kɛ Israel ye anɔkwa lɛ, etsuɔ nii yɛ je lɛ mli akɛ Yehowa anunyam lɛ he odaseyeli. (Yesaia 41:8, 9; 43:10) Gbɔi pii here nɔ ni amɛbafata E-webii ni ehala amɛ nɛɛ ahe ni amɛbaja Yehowa. Yɛ anɔkwale mli lɛ, amɛkɛɛ Israel nɔ ni Rut kɛɛ Naomi lɛ nɔŋŋ, akɛ: “Omaŋ ji mimaŋ, ni o-Nyɔŋmɔ ji mi hu mi-Nyɔŋmɔ.” (Rut 1:16) Amɛba amɛhe shi amɛha taomɔ nii ni atsɔɔ yɛ Mla kpaŋmɔ lɛ mli lɛ, ni hii lɛ ha afolɔ amɛ ketia. (2 Mose 12:43-48) Yei lɛ ekomɛi kɛ Israelbii bote gbalashihilɛ mli. Rahab ni jɛ Yeriko lɛ kɛ Rut ni ji Moabyoo lɛ batsɔmɔ Yesu Kristo blema nyɛmɛi. (Mateo 1:5) Nɛkɛ mɛi ni tsake kɛba jamɔ lɛ mli nɛɛ fata Israel asafo lɛ he.—5 Mose 23:7, 8.
2 Taakɛ eji yɛ mɛi ni etsake kɛba jamɔ lɛ mli yɛ Israel lɛ ahe lɛ, “asafo babaoo” lɛ ekɛɛ shwɛɛnii ni afɔ amɛ mu lɛ hu ŋmɛnɛ akɛ: “Wɔkɛ nyɛ aaatee; ejaakɛ wɔnu akɛ Nyɔŋmɔ kɛ nyɛ yɛ.” (Kpojiemɔ 7:9; Zakaria 8:23) Amɛyooɔ akɛ nɛkɛ Kristofoi ni afɔ amɛ mu nɛɛ ji Yehowa “tsulɔ anɔkwafo kɛ nilelɔ” lɛ, ni amɛkɛ amɛ feɔ ekome kɛtsuɔ nii aahu akɛ, mɛi ni afɔ amɛ mu lɛ kɛ “tooi krokomɛi” lɛ feɔ “kuu kome kɛ kwɛlɔ kome.” (Mateo 24:45-47; Yohane 10:16) Mɛni baaba asafo babaoo lɛ nɔ kɛ amɛnyɛmimɛi ni afɔ amɛ mu lɛ fɛɛ anine shɛ amɛ ŋwɛi nyɔmɔwoo lɛ nɔ? Ehe ehiaaa ni amɛshe gbeyei. Yehowa eto nibii ahe gbɛjianɔ yɛ “naagbee gbii” nɛɛ amli fɛɛ kɛha nakai be lɛ.—2 Timoteo 3:1.
Mumɔŋ “Shikpɔŋ” Ko
3. Mɛni ji “ŋwɛi hee” ni Petro gba efɔ shi lɛ, ni mɛɛ be ato shishi?
3 Bɔfo Petro gba ŋwɛi nɔyeli gbɛjianɔtoo ni Kristofoi 144,000 ni afɔ amɛ mu lɛ baafata he lɛ efɔ̃ shi. Ewie akɛ: “Yɛ eshiwoo lɛ naa lɛ, wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (2 Petro 3:13) Ato “ŋwɛi hee” nɛɛ shishi yɛ 1914, beni akɛ Kristo ta maŋtsɛsɛi nɔ akɛ Maŋtsɛ yɛ ŋwɛi Maŋtsɛyeli lɛ mli lɛ. Shi “shikpɔŋ hee” lɛ hu?
4. (a) Mɛɛ nifeemɔ ko ni akpaaa gbɛ ba yɛ 1919? (b) Mɛni ji ‘jeŋmaŋ ni afɔ lɛ shikome’ lɛ, ni mɛni ji ‘shikpɔŋ ni afɔ lɛ’ lɛ?
4 Yɛ 1919 lɛ, Yehowa jie mɛi ni afɔ amɛ mu lɛ ateŋ shwɛɛnii lɛ kɛjɛ Babilon Kpeteŋkpele lɛ nomŋɔɔ mli. (Kpojiemɔ 18:4) Kɛha Kristendom hiɛnyiɛlɔi lɛ, nifeemɔ ni yɔɔ naakpɛɛ nɛɛ bafee nɔ ko ni amɛkpaaa gbɛ kwraa. Biblia lɛ wieɔ yɛ he akɛ: “Namɔ enu enɛ eko pɛŋ, loo namɔ ena enɛ eko pɛŋ? Ani gbi kome afɔɔ shikpɔŋ, aloo shikome afɔɔ jeŋmaŋ?” (Yesaia 66:8) Beni mɛi ni afɔ amɛ mu lɛ asafo lɛ pue yɛ jeŋmaji lɛ ahiɛ akɛ gbɔmɛi ni akpɔ̃ amɛ lɛ, ebafee jeŋmaŋ ni ‘afɔ lɛ shikome’ lɛlɛŋ. Shi mɛni ji “shikpɔŋ” lɛ? Yɛ shishinumɔ ko naa lɛ, eji blema Israel shikpɔŋ lɛ henɔ yɛ mumɔŋ. Eji hegbɛ ni aha “jeŋmaŋ” hee ni afɔ lɛ lɛ ni ekɛtsu nii, he ni Paradeiso gbalɛi ni yɔɔ Yesaia wolo lɛ mli lɛ yɔɔ ŋmɛnɛŋmɛnɛ beaŋ mlibaa yɛ mumɔŋ. (Yesaia 32:16-20; 35:1-7; okɛto Hebribii 12:12-14 he.) He fɛɛ he ni Kristofonyo aaahi yɛ gbɔmɔtsoŋ lɛ, kɛlɛ eyɛ nakai “shikpɔŋ” lɛ nɔ.
5. Mɛɛ shishitoo kuu ko ba shihilɛ mli yɛ 1919? Tsɔɔmɔ mli.
5 Mɛni enɛ kɛ “shikpɔŋ hee” ni Petro gba fɔ shi lɛ yɔɔ feemɔ? Ojogbaŋŋ, nakai “jeŋmaŋ” hee, ni afɔ lɛ yɛ afi 1919 mli yɛ “shikpɔŋ” ni asaa akɛha ekoŋŋ nɔ lɛ, baada ni ebaatsɔ jeŋ muu fɛɛ gbɛjianɔtoo ni Yehowa yijielɔi ni afɔ amɛ mu kɛ mɛi ni afɔko amɛ mu fɛɛ yɔɔ mli. Nɛkɛ gbɛjianɔtoo nɛɛ baafo Harmagedon kɛbote Nyɔŋmɔ jeŋ hee lɛ mli. Yɛ nɛkɛ gbɛ nɔ lɛ, abaanyɛ abu nakai jeŋmaŋ lɛ akɛ adesai ajalɛ shihilɛ gbɛjianɔtoo, shikpɔŋ hee, ni baahi shi yɛ Satan je lɛ hiɛkpatamɔ sɛɛ lɛ shishitoo kuu.a Beni shɛɔ 1930 afii lɛ teŋgbɛ lɛ, no mli lɛ abua mɛi ni afɔ amɛ mu lɛ anaa akɛ kuu, kɛtee shikpɔŋ ni akɛha ekoŋŋ lɛ nɔ. Kɛjɛ nakai beaŋ kɛbaa nɛɛ, agbala jwɛŋmɔ kɛtee asafo babaoo ni ji tooi krokomɛi, ni ŋmɛnɛ amɛyifalɛ miihe ashɛ akpekpei enumɔ lɛ anaabuamɔ nɔ. (Kpojiemɔ 14:15, 16) Ani mɛi fa yɛ “shikpɔŋ” lɛ nɔ fe nine? Dabi, abaanyɛ alɛɛ ehusui lɛ amli kɛya shɔŋŋ bɔ ni he hiaa. (Yesaia 26:15) Lɛlɛŋ, eyɛ miishɛɛ akɛ aaana akɛ emlibii ayifalɛ lɛ miiya hiɛ beni mɛi ni afɔ amɛ mu lɛ woɔ “shikpɔŋ” lɛ obɔ kɛ “yibii”—mumɔŋ niyenii kpakpa ni haa mɔ hewalɛ lɛ. (Yesaia 27:6) Shi mɛni ji nɛkɛ tooi krokomɛi nɛɛ agbɛhe yɛ Nyɔŋmɔ webii ‘ashikpɔŋ’ ni akɛha amɛ ekoŋŋ nɛɛ nɔ?
Gbɔi ni Yɔɔ Ekaa yɛ “Shikpɔŋ” lɛ Nɔ
6. Yɛ mɛɛ gbɛ nɔ gbɔi ena ekaa yɛ Nyɔŋmɔ webii ‘ashikpɔŋ’ lɛ nɔ?
6 Taakɛ bɔ ni mɛi ni tsake kɛba jamɔ lɛ mli yɛ Israel shikpɔŋ nɔ lɛ hi Mose Mla lɛ shishi lɛ, nakai nɔŋŋ asafo babaoo ni yɔɔ “shikpɔŋ” ni akɛha ekoŋŋ lɛ nɔ ŋmɛnɛ lɛ boɔ Yehowa kitai atoi. Akɛni amɛnyɛmimɛi ni afɔ amɛ mu lɛ etsɔse amɛ hewɔ lɛ, amɛtsiɔ amɛhe kɛjɛɔ apasa jamɔ gbɛi sɔrɔtoi fɛɛ he, ni amɛkɛ bulɛ haa krɔŋŋ ni la ji lɛ. (Bɔfoi lɛ Asaji 15:19, 20; Galatabii 5:19, 20; Kolosebii 3:5) Amɛsumɔɔ Yehowa kɛ amɛtsui, jwɛŋmɔ, susuma, kɛ hewalɛ fɛɛ, ni amɛsumɔɔ amɛnanemɛi hu tamɔ amɛ diɛŋtsɛ amɛhe. (Mateo 22:37; Yakobo 2:8) Yɛ blema Israel lɛ, mɛi ni etsake kɛba jamɔ lɛ mli lɛ ye amɛbua yɛ Salomo sɔlemɔtsu lɛ maa mli, ni amɛfi anɔkwa jamɔ ni asaa akɛma shi ekoŋŋ lɛ sɛɛ. (1 Kronika 22:2; 2 Kronika 15:8-14; 30:25) Ŋmɛnɛ, asafo babaoo lɛ hu naa tsumaa nitsumɔi amli gbɛfaŋnɔ. Akɛ nɔkwɛmɔ nɔ lɛ, amɛyeɔ amɛbuaa kɛtswaa asafoi kɛ kpokpai amaa shi, kɛfata nitsumɔi diɛŋtsɛ ni amɛkɛ amɛhe woɔ mli, tamɔ Maŋtsɛyeli Asai, Kpeei Asai, kɛ nitsumɔ he nine tsui amaamɔ mli lɛ he.
7. Mɛni ba yɛ Yerusalem yɛ nomŋɔɔ lɛ sɛɛ beni Levibii ni baatsu sɔlemɔ we sɔɔmɔi ahe nii lɛ ayi faaa lɛ?
7 Yɛ afi 537 D.Ŋ.B., beni Israel ku sɛɛ kɛjɛ nomŋɔɔ mli yɛ Babilon lɛ, amɛje shishi amɛto sɔɔmɔ he gbɛjianɔ yɛ he ni amaa sɔlemɔwe lɛ yɛ lɛ. Shi, Levibii ni ku amɛsɛɛ kɛba lɛ ayi faaa babaoo. No hewɔ lɛ, aha Nethinim—ni ji gbɔi ni afolɔ amɛ ketia, ni tsutsu ko lɛ amɛji Levibii lɛ ayelikɛbualɔi lɛ—hegbɛi babaoo yɛ sɔlemɔwe sɔɔmɔ mli. Shi kɛlɛ, amɛkɛ osɔfoi ni jɛ Aaron weku lɛ mli, ni afɔ amɛ mu lɛ yeee egbɔ.b—Ezra 7:24; 8:15-20; Nehemia 3:22-26.
8, 9. Tooi krokomɛi lɛ kɛ amɛhe ewo nitsumɔ ni ji sɔɔmɔ krɔŋŋ lɛ mli babaoo yɛ naagbee gbii lɛ amli yɛ mɛɛ gbɛ nɔ?
8 Kristofoi ni afɔ amɛ mu lɛ enyiɛ nɔkwɛmɔ nɔ nɛɛ sɛɛ ŋmɛnɛ. Beni “naagbee be lɛ” yaa hiɛ lɛ, belɛ mɛi ni afɔ amɛ mu lɛ ateŋ mɛi ni eshwɛ lɛ ayifalɛ miiba shi daa nɛɛ yɛ Nyɔŋmɔ webii ‘ashikpɔŋ’ lɛ nɔ. (Daniel 12:9; Kpojiemɔ 12:17) Enɛ hewɔ lɛ, amrɔ nɛɛ asafo babaoo lɛ tsuɔ nitsumɔ ni ji ‘sɔɔmɔ krɔŋŋ’ ni akɛhaa lɛ mli babaoo. (Kpojiemɔ 7:15) Amɛnyiɛɔ amɛnyɛmimɛi ni afɔ amɛ mu lɛ ahiɛnyiɛmɔ sɛɛ, ni ‘amɛkɛ yijiemɔ afɔle haa Nyɔŋmɔ daa; no ji naabui ni jajeɔ egbɛi lɛ ayibii lɛ.’ ‘Amɛhiɛ kpaaa ejurɔfeemɔ kɛ nikee hu nɔ,’ ejaakɛ amɛle akɛ “nakai afɔlei saa Nyɔŋmɔ hiɛ jogbaŋŋ.”—Hebribii 13:15, 16.
9 Kɛfata he lɛ, akɛni asafo babaoo lɛ ayifalɛ yaa hiɛ akpei ohai abɔ daa afi hewɔ lɛ, nɔkwɛlɔi ahiamɔ ni yɔɔ lɛ miiya hiɛ daa gbi. Yɛ be ko mli lɛ, Kristofoi ni afɔ amɛ mu lɛ pɛ tsuɔ enɛ he nii. Amrɔ nɛɛ, akɛ asafoi pii, kɛ agbɛnɛ hu kpokpai bibii, kpokpai wuji, kɛ nitsumɔ he niji anɔkwɛmɔ ewo tooi krokomɛi lɛ adɛŋ yɛ hiamɔ ni yɔɔ hewɔ. Yɛ 1992 mli lɛ, aha mɛnɛɛmɛi ateŋ mɛi fioo ko hegbɛ akɛ amɛya Nɔyeli Kuu lɛ ajinafoi akui lɛ akpee lɛ eko akɛ yelikɛbualɔi ni fataaa yiŋkpɛɛ feemɔ he. Ni kɛlɛ, tooi krokomɛi lɛ yaa nɔ amɛyeɔ amɛnanemɛi Kristofoi ni afɔ amɛ mu lɛ anɔkwale ni amɛnuɔ he akɛ eji hegbɛ ni amɛna akɛ amɛaafi amɛ sɛɛ akɛ Yehowa tsulɔ anɔkwafo kɛ nilelɔ lɛ.—Mateo 25:34-40.
“Tamɔ Asafoiatsɛ”
10, 11. Yɛ Filistibii komɛi anɔkwɛmɔ nɔ sɛɛnyiɛmɔ mli lɛ, mɛɛ gbɛ nɔ Nyɔŋmɔ webii atsutsu henyɛlɔi komɛi etsake amɛtsui yɛ? Mɛni ejɛ mli eba?
10 Agba bɔ ni tsulɔ anɔkwafo kɛ nilelɔ lɛ kɛ tooi krokomɛi lɛ etsu nii yɛ nɔkwɛmɔ gbɛhei amli lɛ afɔ̃ shi yɛ Zakaria 9:6, 7. Wɔkaneɔ yɛ jɛmɛ akɛ: “Ni mafo Filistibii ahewoo lɛ sɛɛ. Ni majie elá lɛ yɛ edaaŋ, kɛ enihiinii lɛ hu yɛ enyanyɔji ateŋ, ni lɛ hu eeetsɔ shwɛɛ nɔ eha wɔ-Nyɔŋmɔ lɛ, ni eeetsɔ tamɔ asafoiatsɛ yɛ Yuda, ni Ekronnyo hu aaatamɔ Yebushnyo.”c Filistibii lɛ ji Yehowa webii ahenyɛlɔi ni ale amɛ waa, taakɛ Satan je lɛ ji ŋmɛnɛ lɛ. (1 Yohane 5:19) Bɔ ni yɛ naagbee lɛ, akpata Filistibii lɛ ahiɛ kwraa akɛ maŋ lɛ, nakai nɔŋŋ etsɛŋ ni Yehowa mlifu ni kpataa nii ahiɛ lɛ baaba je nɛɛ kɛ ejamɔ, maŋkwramɔ, kɛ jarayeli gbɛjianɔtoi lɛ fɛɛ nɔ.—Kpojiemɔ 18:21; 19:19-21.
11 Shi kɛlɛ, taakɛ Zakaria wiemɔi lɛ tsɔɔ lɛ, Filistibii lɛ ekomɛi tsake amɛtsui, ni enɛ feɔ he mfoniri akɛ mɛi ni ji je lɛŋ bii ŋmɛnɛ lɛ ekomɛi kaŋ he amɛhiŋ shi daa akɛ Yehowa henyɛlɔi. Amɛbaakpa jamɔ mli wɔŋjamɔi kɛ amɛmli nifeemɔi ni anyaŋeɔ kɛ afɔleshai ni ahiɔ lɛ fɛɛ, ni amɛhe baatse yɛ Yehowa hiɛ. Anaa nɛkɛ “Filistibii” ni etsake nɛɛ yɛ wɔgbii nɛɛ amli yɛ asafo babaoo lɛ mli.
12. “Ekron” etsɔ tamɔ “Yebushnyo” yɛ ŋmɛnɛŋmɛnɛ beaŋ yɛ mɛɛ gbɛ nɔ?
12 Taakɛ gbalɛ lɛ tsɔɔ lɛ, Filistibii amaŋtiase wulu ni ji Ekron “aaatamɔ Yebushnyo.” Tsutsu ko lɛ, Israelbii ahenyɛlɔi ji Yebushbii lɛ hu. Yerusalem hi amɛdɛŋ aahu kɛyashi be mli ni David ye amɛnɔ kunim. Shi kɛlɛ, mɛi ni yi na wala yɛ tai ni amɛkɛ Israel wuu lɛ amli lɛ ateŋ mɛi komɛi tsake kɛba jamɔ lɛ mli. Amɛsɔmɔ yɛ Israel shikpɔŋ lɛ nɔ akɛ nyɔji, ni amɛna hegbɛ po akɛ amɛaatsu nii yɛ sɔlemɔtsu lɛ maa mli. (2 Samuel 5:4-9; 2 Kronika 8:1-18) Ŋmɛnɛ, “Ekronbii” ni tsakeɔ kɛbaa Yehowa jamɔ mli lɛ hu yɛ sɔɔmɔ hegbɛi yɛ “shikpɔŋ” lɛ nɔ yɛ tsulɔ anɔkwafo kɛ nilelɔ lɛ nɔkwɛmɔ shishi.
13. Mɛni ji asafoiatsɛmɛi yɛ blema je lɛ mli?
13 Zakaria kɛɔ akɛ Filistinyo lɛ baatsɔ tamɔ asafoiatsɛ yɛ Yuda. Hebri wiemɔ ʼal·luphʹ, ni atsɔɔ shishi akɛ “asafoiatsɛ” lɛ, shishinumɔ ji “mɛi akpe hiɛnyiɛlɔ” (loo, “chiliarch”). Eji gbɛhe ni nɔ kwɔ waa. Anaa faŋŋ akɛ blema Edom maŋ lɛ na asafoiatsɛmɛi 13 pɛ. (1 Mose 36:15-19) Akɛ wiemɔ “asafoiatsɛ” lɛ efɔɔɔ nitsumɔ kɛ aawie Israel he, shi moŋ wiemɔ ni ji “asafoi lɛ anɔ onukpa (loo, lumɔ)” afɔɔ namɔ. Beni Mose tsɛ Israel maŋ lɛ najiaŋdamɔlɔi lɛ fɛɛ kɛkpe lɛ, etsɛ “Israel asafoi lɛ anɔ onukpai lɛ.”d Mɛnɛɛmɛi ayibɔ ji mɛi 12, ni eka shi faŋŋ akɛ Mose pɛ shishi amɛyɔɔ. (4 Mose 1:4-16) Nakai nɔŋŋ hu, yɛ asraafoi lɛ ahe gbɛjianɔtoo mli lɛ, akpekpei atsɛmɛi lɛ yɛ tatsɛ loo maŋtsɛ lɛ pɛ shishi.—2 Samuel 18:1, 2; 2 Kronika 25:5.
14. Mɛɛ gbɛ nɔ ŋmɛnɛ “Filistinyo” ebatsɔ tamɔ asafoiatsɛ yɛ?
14 Zakaria egbaaa efɔɔɔ shi akɛ Filistinyo ni etsake etsui lɛ baatsɔ asafoiatsɛ diɛŋtsɛ yɛ Israel. No ebahiŋ, akɛni ejeee mɔ ni afɔ lɛ akɛ Israelnyo lɛ hewɔ. Shi ebaatsɔ tamɔ asafoiatsɛ, ni ebaana gbɛhe ni nɔ kwɔ ni abaanyɛ akɛto asafoiatsɛ he. Ni nibii eba mli nakai pɛpɛɛpɛ hu. Beni Kristofoi ni afɔ amɛ mu lɛ amli shwɛɛnii ni yɔɔ lɛ ayifalɛ baa shi ni mɛi ni yɔɔ wala mli lɛ ateŋ mɛi pii nyɛɛɛ nii pii amɛtsu yɛ gbɔlɛ hewɔ lɛ, kɛ wɔɔkɛɛ lɛ, tooi krokomɛi ni atsɔse amɛ jogbaŋŋ tsuɔ nitsumɔi ni amɛnyɛɛɛ amɛtsu lɛ. Amɛsumɔɔɔ ni amɛheɔ amɛnyɛmimɛi ni afɔ amɛ mu lɛ agbɛhei lɛ yɛ amɛdɛŋ. Shi tsulɔ anɔkwafo kɛ nilelɔ lɛ kɛ hegbɛ ni he hiaa lɛ haa amɛ yɛ “shikpɔŋ” lɛ nɔ bɔni afee ni Nyɔŋmɔ gbɛjianɔtoo lɛ akã he aya hiɛ yɛ gbɛjianɔtoo kpakpa naa. Anaa hiɛyaa ni baa daa, ni tamɔ nɛkɛ yɛ gbalɛ kroko hu mli.
Osɔfoi kɛ Hulɔi
15. (a) Yɛ Yesaia 61:5, 6 mlibaa mli lɛ, namɛi ji “Yehowa osɔfoi” lɛ, ni mɛɛ be amɛsɔmɔɔ yɛ gbɛhe nɛɛ mli yɛ shishinumɔ ni eye emuu naa? (b) Namɛi ji “gbɔi” ni tsuɔ Israel okwaayeli nitsumɔ lɛ, ni—yɛ mumɔŋ shishinumɔ naa lɛ—mɛni fata nɛkɛ nitsumɔ nɛɛ he?
15 Yesaia 61:5, 6 kaneɔ akɛ: “Maŋsɛɛbii aaadamɔ shi ni amɛaalɛ nyɛtooi lɛ, ni mɛi kpɔji aaatsɔmɔ nyɛhulɔi kɛ nyɛweintrom saalɔi. Shi nyɛ lɛ, aaatsɛ nyɛ Yehowa osɔfoi, ni aaakɛɛ nyɛ akɛ wɔ-Nyɔŋmɔ lɛ sɔɔlɔi ji nyɛ; nyɛaaye jeŋmaji lɛ anii, ni amɛnunyam lɛ aaatsɔ nyɛnɔ.” Ŋmɛnɛ, “Yehowa osɔfoi” lɛ ji Kristofoi ni afɔ amɛ mu lɛ. Yɛ naagbee shishinumɔ ni eye emuu naa lɛ, amɛbaasɔmɔ akɛ “Yehowa osɔfoi, . . . wɔ-Nyɔŋmɔ lɛ sɔɔlɔi,” yɛ ŋwɛi Maŋtsɛyeli lɛ mli. (Kpojiemɔ 4:9-11) Namɛi ji “maŋsɛɛbii” ni akɛ okwaayeli nitsumɔ ewo amɛdɛŋ nɛɛ? Mɛnɛɛmɛi ji tooi krokomɛi, ni yɔɔ Nyɔŋmɔ Israel “shikpɔŋ” lɛ nɔ lɛ. Mɛni ji tookwɛmɔ, humɔ, kɛ weintrom saamɔ ni akɛwo amɛdɛŋ nɛɛ? Yɛ mumɔŋ shishinumɔ ni he hiaa naa lɛ, nɛkɛ nitsumɔi nɛɛ kɔɔ gbɔmɛi ayelikɛbuamɔ, amɛtsɔsemɔ, kɛ amɛnaabuamɔ he.—Yesaia 5:7; Mateo 9:37, 38; 1 Korintobii 3:9; 1 Petro 5:2.
16. Namɛi naagbee lɛ amɛbaatsu nitsumɔ lɛ fɛɛ yɛ Nyɔŋmɔ webii ‘ashikpɔŋ’ lɛ nɔ?
16 Amrɔ nɛɛ, mumɔŋ Israelbii lɛ ateŋ mɛi fioo yɛ shikpɔŋ nɛɛ nɔ ni amɛmiina mumɔŋ tookwɛmɔ, humɔ, kɛ weintrom saamɔ lɛ mli gbɛfaŋnɔ. Kɛji mɛi ni afɔ amɛ mu lɛ asafo muu lɛ fɛɛ kɛ Kristo fee ekome yɛ naagbee lɛ, abaashi nitsumɔ nɛɛ fɛɛ aha tooi krokomɛi lɛ. Akɛ “shikpɔŋ” lɛ nɔkwɛmɔ ni akɛbaaha adesai yɛ nakai beaŋ lɛ po baawo tooi krokomɛi lɛ ateŋ mɛi ni sa, ni awieɔ amɛhe yɛ Ezekiel wolo lɛ mli akɛ lumɛi akuu lɛ adɛŋ.—Ezekiel, yitsei 45, 46.e
“Shikpɔŋ” lɛ Tee nɔ Ehi Shi
17. Mɛɛ nibii ahe gbɛjianɔ Yehowa etee nɔ eto aahu yɛ naagbee gbii nɛɛ amli?
17 Hɛɛ, esaaa ni asafo babaoo lɛ sheɔ gbeyei! Yehowa eto nibii ahe gbɛjianɔ bɔ ni sa eha amɛ. Nifeemɔ ko ni he hiaa fe fɛɛ ni etee nɔ yɛ shikpɔŋ nɛɛ nɔ yɛ naagbee gbii nɛɛ amli ji mɛi ni afɔ amɛ mu lɛ anaabuamɔ kɛ amɛnaasɔomɔ. (Kpojiemɔ 7:3) Shi, yɛ be mli ni ekwɛɔ akɛ aatsu enɛ lɛ, nakai beaŋ nɔŋŋ lɛ Yehowa kɛ tooi krokomɛi lɛ hu ebafata amɛhe yɛ mumɔŋ shikpɔŋ ni akɛha ekoŋŋ nɔ. Alɛ amɛ jogbaŋŋ yɛ mumɔŋ ni atsɔse amɛ yɛ Kristofoi ashihilɛ mli hu yɛ jɛmɛ. Kɛfata he lɛ, atsɔse amɛ ni amɛhe esa jogbaŋŋ yɛ sɔɔmɔ krɔŋŋ, kɛ nɔkwɛmɔ nitsumɔ hu mli. Amɛdaa Yehowa kɛ amɛnyɛmimɛi ni afɔ amɛ mu lɛ ashi waa diɛŋtsɛ yɛ enɛ he.
18. Mɛɛ nibii tooi krokomɛi lɛ baaya nɔ aye anɔkwa kɛtsɔ mli yɛ mumɔŋ Israel “shikpɔŋ” lɛ nɔ?
18 Kɛ Gog ni jɛ Magog lɛ kɛ enaagbee tutuamɔ ba Nyɔŋmɔ webii anɔ lɛ, tooi krokomɛi lɛ baafata shwɛɛnii ni afɔ amɛ mu lɛ ahe kɛdamɔ shi shiŋŋ yɛ “shikpɔŋ ni naa kã lɛ nɔ.” Tooi krokomɛi lɛ baahi nakai “shikpɔŋ” lɛ nɔ lolo beni amɛyi ena wala kɛfo jeŋmaji lɛ ahiɛkpatamɔ lɛ kɛbote Nyɔŋmɔ jeŋ hee lɛ mli lɛ. (Ezekiel 38:11; 39:12, 13; Daniel 12:1; Kpojiemɔ 7:9, 14) Kɛ amɛtee nɔ amɛye anɔkwa lɛ, ahaŋ amɛshi nakai shihilɛ he fɛfɛo lɛ kɔkɔɔkɔ.—Yesaia 11:9.
19, 20. (a) Mɛɛ nɔkwɛmɔ nitsumɔ kpele “shikpɔŋ” lɛ nɔ bii lɛ baana mli ŋɔɔmɔ yɛ jeŋ hee lɛ mli? (b) Mɛni wɔshweɔ kɛ gbɛkpamɔ ni mli wa waa?
19 Maŋtsɛmɛi ni ji adesai ye blema Israel nɔ, ni amɛna osɔfoi ni jɛ Levi akutso lɛ mli. Yɛ jeŋ hee lɛ mli lɛ, Kristofoi baana nɔkwɛlɔi ni nɔ kwɔlɔ kwraa fe amɛ. Amɛbaaba amɛhe shi, yɛ Yehowa Nyɔŋmɔ shishi, amɛha Osɔfo Nukpa kpeteŋkpele kɛ Maŋtsɛ, Yesu Kristo, kɛ ehefatalɔi osɔfoi kɛ maŋtsɛmɛi 144,000—ní amɛle amɛteŋ mɛi komɛi jogbaŋŋ akɛ amɛnyɛmimɛi hii kɛ yei Kristofoi yɛ shikpɔŋ nɛɛ nɔ lɛ. (Kpojiemɔ 21:1) Anɔkwafoi ni yɔɔ mumɔŋ shikpɔŋ lɛ nɔ lɛ baahi shikpɔŋ ni atsake lɛ afee lɛ paradeiso diɛŋtsɛ nɔ, ni amɛmli baafili amɛ yɛ tsamɔ jɔɔmɔi ni akɛtsɔɔ Yerusalem Hee lɛ nɔ akɛbaa amɛ nɔ lɛ mli.—Yesaia 32:1; Kpojiemɔ 21:2; 22:1, 2.
20 Beni Yehowa ŋwɛi shwiili kpeteŋkpele lɛ yaa ehiɛ kɛha eyiŋtoi ahe nitsumɔ ni anyɛɛɛ atsĩ naa lɛ, wɔ fɛɛ wɔhiɛ kã nɔ kɛ gbɛkpamɔ ni mli wa akɛ, wɔɔtsu wɔ gbɛfaŋnɔ ni aha wɔ lɛ he nii. (Ezekiel 1:1-28) Kɛ nakai yiŋtoi lɛ ba mli yɛ naagbee lɛ, susumɔ miishɛɛ ni akɛbaaye Yehowa hetsemɔ kunimyeli lɛ he gbijurɔ lɛ he okwɛ! Nakai beaŋ lɛ, adebɔɔ fɛɛ baala lala kpele ni aŋma yɛ Kpojiemɔ 5:13 lɛ, akɛ: “Aŋɔ jɔɔmɔ kɛ agbojee kɛ anunyam kɛ nɔyeli lɛ aha Mɔ ni ta maŋtsɛsɛi lɛ nɔ lɛ kɛ Toobi lɛ kɛjɛ naanɔ kɛya naanɔ”! Kɛji wɔgbɛhe baahi ŋwɛi jio, shikpɔŋ nɛɛ nɔ jio, ani wɔshweee akɛ wɔɔhi jɛmɛ, ni wɔkɛ wɔgbeei afata nakai yijiemɔ lala kpeteŋkpele lɛ he?
[Shishigbɛ niŋmai]
a Kwɛmɔ “New Heavens and a New Earth,” ni Watchtower Bible and Tract Society of New York, Inc. fee yɛ 1953 mli lɛ, baafai 322-3.
b Kɛha emlitsɔɔmɔ kɛmɔ shi lɛ, kwɛmɔ saneyitso ni ji “Yehowa Gbɛjianɔtoo, ‘Mɛi ni Akɛ Amɛ Eha Lɛ’ ” yɛ April 15, 1992, Buu-Mɔɔ lɛ mli.
c Kwɛmɔ Paradise Restored to Mankind—By Theocracy!, ni Watchtower Bible and Tract Society of New York, Inc. fee yɛ 1972 mli lɛ, baafai 264-9.
d Hebri: raʼ·shehʹ ʼal·phehʹ Yis·ra·ʼelʹ, ni atsɔɔ shishi akɛ khi·liʹar·khoi Is·ra·elʹ “chiliarchs of Israel” yɛ Septuagint lɛ mli.
e Kwɛmɔ “The Nations Shall Know That I Am Jehovah”—How?, ni Watchtower Bible and Tract Society of New York, Inc. fee yɛ 1971 mli lɛ, baafai 401-7.
Te Obaaha Hetoo Tɛŋŋ?
◻ Mɛɛ “shikpɔŋ” akɛha ekoŋŋ yɛ 1919 lɛ, ni mɛɛ gbɛ nɔ atsɔ ana mɛi yɛ nɔ?
◻ Aha tooi krokomɛi lɛ gbɛnaa nitsumɔi babaoo yɛ Nyɔŋmɔ webii ni ekɛ amɛ eba ekoŋŋ lɛ ‘ashikpɔŋ’ lɛ nɔ yɛ mɛɛ gbɛ nɔ?
◻ Asafo babaoo lɛ mlibii lɛ “tamɔ Yebushnyo” kɛ agbɛnɛ “tamɔ asafoiatsɛ yɛ Yuda” yɛ mɛɛ gbɛ nɔ?
◻ Bei enyiɛ tooi krokomɛi anɔkwafoi lɛ kɛbaahi shi yɛ “shikpɔŋ” lɛ nɔ?
[Mfoniri ni yɔɔ baafa 23]
Ŋmɛnɛŋmɛnɛ beaŋ Filistinyo lɛ baafee “tamɔ asafoiatsɛ yɛ Yuda”
[Mfonirii ni yɔɔ baafa 24]
Mɛi ni afɔ amɛ mu lɛ kɛ tooi krokomɛi lɛ efee ekome kɛmiisɔmɔ yɛ mumɔŋ shikpɔŋ nɔ