Te Wɔɔfee Tɛŋŋ Ni Wɔkɛ Pɛsɛmkunya Akahere Nyɔŋmɔ Suɔmɔ Lɛ Nɔ?
“Kɛ Nyɔŋmɔ sumɔɔ wɔ nɛkɛ Iɛ, esa akɛ wɔ hu wɔsumɔsumɔɔ wɔhe.”—1 YOHANE 4:11.
1, 2. Mɛni he hiaa wɔ kɛji wɔɔnyɛ wɔhere Nyɔŋmɔ suɔmɔ lɛ kpojiemɔi lɛ anɔ yɛ gbɛ ni pɛsɛmkunya bɛ mli nɔ?
YEHOWA ji suɔmɔ su lɛ he mfonirifeemɔ diɛŋtsɛ. Yɛ anɔkwale mli lɛ, wɔna bɔ ni esuɔmɔ lɛ kpojiemɔ lɛ fa babaoo ha yɛ nikasemɔ ni tsɔ enɛ hiɛ lɛ mli. Agbɛnɛ hu wɔkadi bɔ ni Mose, David, kɛ Yesu Kristo here nakai suɔmɔ kpojiemɔi lɛ anɔ yɛ gbɛ ni pɛsɛmkunya bɛ mli nɔ amɛha. Ani esaaa akɛ Yehowa Odasefoi ateŋ mɔ fɛɛ mɔ sumɔɔ akɛ eeefee nakai nɔŋŋ? Eka shi faŋŋ akɛ nakai eji!
2 Mɛni he hiaa wɔ kɛji wɔɔnyɛ wɔhere Nyɔŋmɔ suɔmɔ lɛ kpojiemɔi lɛ anɔ yɛ gbɛ ni pɛsɛmkunya bɛ mli nɔ? Nɔ kome ji akɛ, esa akɛ wɔha lɛ klɛŋklɛŋ gbɛhe yɛ wɔshihilɛ mli, ni wɔsumɔ lɛ kɛ wɔtsui muu fɛɛ, wɔsusuma, wɔjwɛŋmɔ, kɛ wɔhewalɛ fɛɛ. (Marko 12:29, 30) Enɛ tsɔɔ akɛ esa akɛ wɔtuu wɔhe wɔha Nyɔŋmɔ, ni wɔna wɔkɛ lɛ teŋ wekukpaa ni yɔɔ miishɛɛ. Ani wɔshweɔ ni wɔkɛ wɔŋwɛi Tsɛ lɛ awie yɛ sɔlemɔ mli? Ani wɔhiɛɔ sɔlemɔ mli daa ni wɔfɔ̃ɔɔ ni wɔmiaa wɔhiɛ yɛ sɔlemɔ mli? Aloo wɔkɛ oyaiyeli sɔleɔ, ni yɛ bei komɛi amli po lɛ, wɔnaaa deka ni wɔkɛaasɔle? (Romabii 12:12; 1 Tesalonikabii 6:17) Ani wɔgbalaa mɛi ajwɛŋmɔ kɛbaa Yehowa nɔ, ni wɔkɛ yijiemɔ haa lɛ kɛ egbɛjianɔtoo lɛ yɛ nɔ ni ekolɛ wɔnyɛ wɔtsu lɛ hewɔ? (1 Korintobii 3:7; 4:7) Lɛlɛŋ, ani wɔnuɔ he taakɛ lalatsɛ lɛ nu he lɛ? Ewie yɛ Nyɔŋmɔ he akɛ: “Mijieɔ oyi shii kpawo jenamɔ yɛ ojalɛ kojomɔi lɛ ahewɔ.”—Lala 119:164.
3. Kɛ wɔbua wɔhe naa kɛha hiɛtserɛjiemɔ lɛ, mɛɛ gbɛ nɔ wɔɔtsɔ wɔjie kpo wɔtsɔɔ akɛ wɔmiihere Nyɔŋmɔ suɔmɔ lɛ nɔ yɛ gbɛ ni pɛsɛmkunya bɛ mli nɔ?
3 Kɛji wɔmiihere Nyɔŋmɔ suɔmɔ lɛ nɔ yɛ gbɛ ni pɛsɛmkunya bɛ mli nɔ aloo wɔfeee nakai lɛ baanyɛ aje kpo yɛ be mli ni wɔbuaa wɔhe naa kɛha hiɛtserɛjiemɔ lɛ. Ani sane ni wɔgbaa yɛ nakai beaŋ lɛ kɔɔ wɔ heloo naa nitsumɔi amli saji ahe pɛ aloo ekɔɔ mumɔŋ nibii hu ahe? Jeee akɛ ehe miihia ni wɔkase Biblia lɛ kɛ hiɛdɔɔ be fɛɛ be ni wɔkɛ wɔnanemɛi Kristofoi krokomɛi aaakpe. Shi eka shi faŋŋ akɛ wɔbaana mumɔŋ nibii komɛi ni yɔɔ miishɛɛ ni wɔkɛfata wɔsanegbaa lɛ he. Ani wɔnyɛŋ wɔgba shiɛmɔ nitsumɔ lɛ mli niiashikpamɔi, aloo wɔwie ŋmalɛi ni wɔsumɔɔ fe fɛɛ lɛ he, aloo wɔgba bɔ ni fee ni wɔbana anɔkwale lɛ, aloo wɔtsitsii odaseyelii komɛi ni tsɔɔ Nyɔŋmɔ hebuu ni suɔmɔ yɔɔ mli kɛ ejɔɔmɔi lɛ hu ata?
4. Kɛ aku hiɛ ashwie wɔnɔ yɛ sɔɔmɔ hegbɛ ko gbɛfaŋ lɛ, te esa akɛ wɔsusu saji ahe wɔha tɛŋŋ?
4 Shihilɛ kroko ni baanyɛ ajie bɔ ni hiɛsɔɔ ni wɔyɔɔ kɛha Nyɔŋmɔ suɔmɔ lɛ mli kwɔ ha lɛ kpo ji be mli ni aku hiɛ afɔ wɔnɔ yɛ sɔɔmɔ hegbɛ ko gbɛfaŋ yɛ Yehowa gbɛjianɔtoo lɛ mli lɛ. Te wɔfeɔ wɔnii wɔhaa tɛŋŋ? Kɛji Yehowa hiɛ nyam ni wɔɔwo lɛ ji nɔ ni he hiaa wɔ fe fɛɛ lɛ, no lɛ wɔɔkpɛlɛ nɔ akɛ ekolɛ mɔ fɛɛ mɔ ni akɛ sɔɔmɔ hegbɛ pɔtɛɛ ko eha lɛ lɛ hu baawo Nyɔŋmɔ hiɛ nyam nakai nɔŋŋ.(Okɛto Luka 9:48 he.) Shi kɛji, wɔ diɛŋtsɛ wɔsɛɛnamɔ kɛ wɔgbɛi namɔ he hiaa wɔ fe fɛɛ lɛ, no lɛ wɔɔhao akɛ aku hiɛ afɔ wɔnɔ, taakɛ bɔ ni ekolɛ wɔɔsusu lɛ. Esa akɛ wɔkai akɛ Yehowa sumɔɔ wɔ ni ele akɛ ekolɛ wɔnyɛŋ wɔtere teokrase gbɛnaa nii ko tsiimɔ lɛ amrɔ nɛɛ. Ekolɛ wɔnaa ejɔɔmɔi babaoo yɛ gbɛi krokomɛi anɔ, ni esa akɛ suɔmɔ ni ejie lɛ kpo yɛ nɛkɛ gbɛi anɔ lɛ aye abua wɔ ni wɔŋmɛ pɛpɛɛpɛ yɛ mumɔŋ.—Abɛi 10:22.
Ni Wɔɔsumɔ Jalɛ, Ni Wɔnyɛ Efɔŋfeemɔ
5. Mɛɛ hewalɛ esa akɛ Nyɔŋmɔ suɔmɔ lɛ kpojiemɔi ana yɛ wɔjeŋba nɔ?
5 Esa akɛ suɔmɔ ni Nyɔŋmɔ yɔɔ kɛha wɔ lɛ he odaseyelii lɛ akanya wɔ ni wɔkase Kristo ni wɔsumɔ jalɛ ni wɔnyɛ efɔŋfeemɔ. (Hebribii 1:9) Eji anɔkwale akɛ, wɔnyɛŋ wɔfee enɛ ni eye emuu kɛmɔ shi, taakɛ Yesu fee lɛ. Shi kɛlɛ, wɔɔnyɛ wɔfee lɛ oti ni ma wɔhiɛ akɛ wɔɔfee krɔŋkrɔŋ, ni wɔye anɔkwa, ni wɔfee mɛi ni yeɔ mla nɔ bɔ ni wɔɔnyɛ yɛ wɔshihilɛ ni yeee emuu nɛɛ mli. Kɛji wɔɔnyɛ wɔfee enɛ lɛ, belɛ jeee akɛ wɔɔna suɔmɔ wɔha jalɛ kɛ nibii kpakpai pɛ kɛkɛ, shi moŋ esa akɛ wɔna hetsɛ̃, loo nyɛɛ ko, loo wɔhi efɔŋfeemɔ kwraa. Taakɛ bɔfo Paulo wie he lɛ: “Nyɛhia efɔŋ kwraa; nyɛkpɛtɛa ekpakpa he.” (Romabii 12:9) “Nyɛhia” loo ahi nɔ ko lɛ ji wiemɔ ni mli wa, ni tsɔɔ akɛ “ni ana nyɛɛ ni mli wa waa aha nɔ ko.”—Webster’s New Collegiate Dictionary.
6. Mɛni baaye abua wɔ koni wɔkwɛ wɔhe nɔ yɛ kaai ni je lɛ, wɔheloo ni haa wɔfeɔ esha, kɛ Abonsam kɛshwieɔ wɔgbɛ nɔ lɛ ahe?
6 Mɛni baaye abua wɔ koni wɔkwɛ wɔhe nɔ jogbaŋŋ yɛ kaai ni je lɛ, wɔ diɛŋtsɛ wɔheloo ni haa wɔfeɔ esha, kɛ Abonsam kɛshwieɔ wɔgbɛ nɔ lɛ ahe? Anɔkwa ni wɔɔye Yehowa lɛ pɛ. Ekpaa wɔ fai akɛ: “Mibi, feemɔ ohe nilelɔ, ni oha mitsui anyɔ mimli, ni mana hetoo maha mɔ ni bɔɔ mi ahora lɛ.” (Abɛi 27:11) Hɛɛ, anɔkwa ni wɔɔye Yehowa lɛ baakanya wɔ ni wɔkɔ gbɛ ni nilee yɔɔ mli ni ji nyɛ ni wɔɔnyɛ nɔ ni enyɛɔ lɛ. Ni kɛfata he lɛ, bɔ fɛɛ bɔ ni Nyɔŋmɔ mlai lɛ ateŋ ekome mlikuu baafee tamɔ nɔ ni ŋɔɔ wɔnaa loo ehaa wɔnaa miishɛɛ po lɛ, esa akɛ wɔya nɔ wɔkɛɛ wɔhe be fɛɛ be akɛ nakai ni wɔɔfee lɛ esaaa kwraa. (Galatabii 6:7, 8) Adesa tsui lɛ, kutumpɔfo kɛ shishiulɔ ni, ni elakaa mɔ, taakɛ bɔ ni akaiɔ wɔ yɛ Yeremia 17:9 lɛ. Kristofonyo tsui lɛ sumɔɔ nibii kpakpai ni yɔɔ fɛo, kɛ nibii ni he tse hu. Shi bei komɛi lɛ eshafeemɔŋ henumɔi tsirɛɔ lɛ ni eshweɔ nɔ ni ehiii lɛ hu. Taakɛ Israelbii ni jaa Yehowa ni kɛlɛ amɛtee nɔ amɛhiɛ amɛ wɔŋjamɔ mli “hei grɔŋŋi” lɛ mli lolo lɛ atsui ji lɛ, nakai nɔŋŋ wɔ hu wɔɔnyɛ wɔna hiɛjoomɔ tsui ni lakaa mɔ. (1 Maŋtsɛmɛi 22:44; 5 Mose 12:2) Wɔtsui ni yeee emuu lɛ baabɔ mɔdɛŋ ni etao nibii ni ekɛjie enaa koni ekɛwɔ ayanyiɛ kaa gbɛ nɔ. Ekolɛ eeeka akɛ eeeha wɔbu esha he kaa ni wɔkɛkpeɔ lɛ akɛ nɔ ni hiɛdɔɔ tsɔ ko bɛ he. Aloo ekolɛ wɔtsui baabɔ mɔdɛŋ akɛ eeetsɔ wɔyiŋ akɛ toigbalamɔ ni akɛaaha wɔ yɛ he lɛ baafee be kukuoo ko mli nɔ.
7. Mɛni hewɔ ni esa akɛ wɔkwɛ wɔhe nɔ jogbaŋŋ yɛ suɔmɔ ni wɔɔna wɔha efɔŋ he lɛ?
7 Esa akɛ wɔjɛ hiɛsɔɔ ni wɔyɔɔ kɛha Nyɔŋmɔ suɔmɔ lɛ mli wɔbu wɔhe yɛ suɔmɔ ni wɔɔna wɔha nɔ ni ji efɔŋ, tamɔ wɔjwɛŋmɔ ni wɔkɛaamɔ bɔlɛnamɔ mli jeŋba shara nɔ lɛ he, ni kɛji wɔji oshijafoi loo wɔbote gbalashihilɛ mli lɛ kɔɔɔ he eko. Yɛ be kɛ bei amli lɛ, nɔ ni jeɔ shishi tamɔ nyiɛmɔ ni tsɔɔ gbalashihilɛ hiɛ ni yeee awui ko lɛ yagbeɔ naa kɛ shihilɛ ko ni haa Kristofoi enyɔ lɛ kɛ amɛhe bɔɔ waa yɛ henumɔŋ akɛ amɛfeɔ esha ni ashwieɔ amɛ. Ni onukpai, ni kulɛ esa akɛ amɛfee nɔkwɛmɔ nii ni anaaa amɛhe sane ko atã kɛha tooku lɛ eye amɛhe awui yɛ nɛkɛ saji nɛɛ amli!—Okɛto 1 Maŋtsɛmɛi 15:4, 5 he.
8. Mɛɛ kɔkɔbɔɔ nɔkwɛmɔ nɔ ko bɔfo Paulo kɛhaa wɔ, ni te wɔɔnyɛ wɔfee naagba ni tamɔ enɛ he mfoniri wɔha tɛŋŋ?
8 Susumɔ bɔfo Paulo, mɔ ni akɛ nibii ni kwɔlɔ fe adesai asusumɔ lɛ ahe ninaai kɛ hewalɛ kɛ mumɔ lɛ tsirɛmɔ ni jɛ ŋwɛi ha lɛ lɛ he okwɛ. Bɔni afee ni eye omanye yɛ ehe ni epeleɔ eshiɔ eshafeemɔ mli henumɔi lɛ amli lɛ, ebi ni egbala egbɔmɔtso lɛ mai—hɛɛ, ni eyi ehe waa—diɛŋtsɛ. Ani nɔ ni wɔfeɔ wɔ diɛŋtsɛ wɔhe ni shɛɛɛ enɛ lɛ saa wɔhiɛ? (Romabii 7:15-25; 1 Korintobii 9:27) Etamɔ nɔ ni wɔta lɛlɛ bibioo ko ni awiriɔ mli yɛ faa ni miiho waa ko hiɛ ni nu lɛ miigbala wɔ kɛmiiya enujɔɔ voo ko mli. Kɛ wɔmiitao wɔjo oshara lɛ naa foi lɛ, belɛ esa akɛ wɔwiri kɛya faa lɛ ŋwɛigbɛ kɛku nu lɛ hewalɛ ni ekɛgbalaa wɔ lɛ naa. Ekolɛ eeefee tamɔ nɔ ni wɔyaaa wɔhiɛ pii ko, shi bei abɔ ni wɔyaa nɔ wɔmiaa wɔhiɛ waa lɛ, wɔyagbeŋ nujɔɔ voo lɛ mli ni wɔhiɛ ayakpata. Eka shi faŋŋ akɛ, esa akɛ wɔha suɔmɔ ni Nyɔŋmɔ yɔɔ kɛha wɔ lɛ kpojiemɔ lɛ akanya wɔ ni wɔmia wɔhiɛ waa ni wɔye lɛ anɔkwa kɛtsɔ nyɛ ni wɔɔnyɛ efɔŋ loo mlakwamɔ ni wɔsumɔ ekpakpa lɛ nɔ.
Jiemɔ Nyɛmimɛi Asuɔmɔ Kpo
9. Mɛɛ ŋaawoo bɔfo Yohane kɛha yɛ suɔmɔ ni wɔɔna wɔha wɔnyɛmimɛi lɛ he?
9 Esa akɛ gbɛi anɔ ni Nyɔŋmɔ suɔmɔ lɛ jeɔ kpo yɛ lɛ hu akanya wɔ ni wɔsumɔ wɔnyɛmimɛi taakɛ Yesu Kristo sumɔɔ ekaselɔi lɛ. (Yohane 13:1) Bɔfo Yohane jaje yɛ gbɛ ni sa jogbaŋŋ nɔ akɛ: “Enɛ mli suɔmɔ lɛ yɔɔ: jeee akɛ wɔ ni wɔsumɔɔ Nyɔŋmɔ, shi moŋ akɛ lɛ ni esumɔɔ wɔ, ni etsu e-Bi lɛ akɛ ebafee wɔhe eshai lɛ ahe kpatamɔ nɔ. Suɔmɔ mɛi, kɛ Nyɔŋmɔ sumɔɔ wɔ nɛkɛ lɛ, esa akɛ wɔ hu wɔsumɔsumɔɔ wɔhe.” (1 Yohane 4:10, 11) Yɛ anɔkwale mli lɛ, Yesu kɛɛ akɛ gbɛ ni aaatsɔ nɔ akɛna enɔkwa sɛɛnyiɛlɔi lɛ ji kɛtsɔ suɔmɔ ni amɛyɔɔ yɛ amɛteŋ lɛ nɔ.—Yohane 13:34, 35.
10, 11. Mɛni ji gbɛi komɛi anɔ ni wɔɔtsɔ wɔjie nyɛmimɛi asuɔmɔ kpo yɛ?
10 Wɔle akɛ esa akɛ Kristofoi ajie nyɛmimɛi asuɔmɔ kpo. Shi ejeee tɔmɔ akɛ wɔɔkai wɔhe yɛ gbɛi sɔrɔtoi anɔ ni wɔɔtsɔ wɔjie nɛkɛ Kristo suɔmɔ nɛɛ kpo wɔha wɔhe lɛ he. Suɔmɔ ni tamɔ nɛkɛ baaye abua wɔ koni wɔku wɔhiɛ wɔshwie sɔrɔtofeemɔi tamɔ nɔ ni kɔɔ hewolonɔ su, maŋ nɔ ni mɔ ko jɛ, ewoloŋlee, maji anɔ kusumii sɔrɔtoi kɛ shika gbɛfaŋ shihilɛ he lɛ anɔ kwraa. Ni kɛfata he lɛ, nyɛmimɛi asuɔmɔ baatsirɛ wɔ ni wɔbabua wɔhe naa kutuu yɛ kpeei ashishi. Kɛji wɔsumɔɔ wɔnyɛmɛi lɛlɛŋ lɛ, wɔŋmɛŋ gbɛ ni kɔɔyɔɔŋ tsakemɔ fioo ko ni aaaba aloo wɔgbɔmɔtsoŋ naagbai bibii atsi wɔnaa ni miishɛɛ ni wɔɔna yɛ wɔkɛ amɛ naanyobɔɔ mli koni wɔkɛ amɛ ana gbɛfaŋnɔ yɛ hewalɛ ni wɔɔwowoo wɔhe lɛ mli lɛ aŋmɛɛ wɔ. (Romabii 1:11, 12) Ni nɔ ni fe fɛɛ lɛ, nyɛmimɛi asuɔmɔ baaha wɔsaa wɔhe jogbaŋŋ kɛha wɔkpeei ni wɔna gbɛfaŋnɔ ni mɔɔ shi yɛ mli koni wɔnyɛ wɔwowoo wɔhe hewalɛ yɛ suɔmɔ kɛ nitsumɔi kpakpai ahe.—Hebribii 10:23-25.
11 Ni wɔnyɛmimɛi lɛ ni wɔɔye wɔbua amɛ yɛ shiɛmɔ nitsumɔ lɛ mli lɛ hu? Akpa shi ana akɛ yɛ bei babaoo mli lɛ onukpai kɛ asafoŋ sɔɔlɔi lɛ kɛ amɛhe yaa shia-kɛ-shia shiɛmɔ nitsumɔ lɛ, aloo amɛkome amɛyaa yɛ be mli ni kɛji amɛto gbɛjianɔ jogbaŋŋ lɛ, kulɛ amɛbaanyɛ amɛfɔ̃ Maŋtsɛyeli shiɛlɔi ni yelikɛbuamɔ he hiaa amɛ yɛ sɔɔmɔ nitsumɔ lɛ mli lɛ nine ni amɛfata amɛhe kɛya. Ŋwanejee ko bɛ he akɛ kɛji ajie suɔmɔ kpo yɛ nɛkɛ gbɛ nɔ lɛ, ebaaha onukpai kɛ asafoŋ sɔɔlɔi lɛ ashiɛmɔ nitsumɔ lɛ afee nɔ ni sɛɛnamɔ yɔɔ he. Ni shiɛlɔ hee ko ni ekolɛ wɔɔha efata wɔhe kɛya shia Biblia mli nikasemɔ ko nɔ lɛ hu?—Romabii 15:1, 2.
12. Te esa akɛ wɔnu 1 Yohane 3:16-18 shishi wɔha tɛŋŋ?
12 Suɔmɔ baaha wɔye wɔbua wɔnyɛmimɛi ni ehia amɛ yɛ heloo gbɛfaŋ lɛlɛŋ lɛ hu. Bɔfo Yohane ŋma akɛ: “Enɛ mli wɔyooɔ suɔmɔ lɛ yɛ, akɛ eŋɔ ewala eŋmɛ shi yɛ wɔhewɔ, ni sa akɛ wɔ hu wɔkɛ wɔwala ŋmɛɔ shi yɛ wɔnyɛmimɛi ahewɔ. Shi mɔ ni yɔɔ je nɛŋ nii, ni enaa akɛ efi enyɛmi, ni emli joɔ yɛ enɔ lɛ, te aaafee tɛŋŋ ni Nyɔŋmɔ suɔmɔ lɛ aaahi emliŋ? Bii bibii, nyɛkahaa wɔsumɔa mɛi yɛ wiemɔi mli loo lilɛi nɔ kɛkɛ, shi moŋ yɛ nitsumɔ kɛ anɔkwale mli.” (1 Yohane 3:16-18) Abiŋ wɔ amrɔ nɛɛ akɛ wɔkɛ wɔwala afɔ shi yɛ amɛhewɔ, shi bei komɛi lɛ wɔnaa hegbɛi ni wɔkɛaajie suɔmɔ kpo wɔtsɔɔ amɛ yɛ gbɛi krokomɛi anɔ, jeee yɛ wiemɔ mli loo yɛ lilɛi nɔ kɛkɛ, shi moŋ yɛ nitsumɔi amli hu. Nɔ fɔŋ ko bɛ suɔmɔ ni wɔɔsumɔ wɔnyɛmimɛi yɛ wiemɔ mli lɛ he, shi wɔsumɔɔɔ ni wɔsuɔmɔ lɛ afee yɛ nɛkɛ gbɛ nɔ pɛ yɛ be mli ni heloonaa nibii ahe miihia amɛ. Wiemɔ ni Yesu wie akɛ “nɔ hamɔ mli yɛ jɔɔmɔ fe hemɔ” lɛ kɔɔ heloonaa yelikɛbuamɔ ni wɔkɛaaha lɛ hu he.—Bɔfoi lɛ Asaji 20:35.
13. (a) Mɛni ji shishijee anɔkwalei ni wɔtsɔ Yehowa gbɛjianɔtoo ni anaa lɛ yelikɛbuamɔ nɔ wɔkase lɛ ekomɛi? (b) Mɛɛ oti ni he hiaa waa Charles Taze Russell wie he?
13 Wɔyɛ hegbɛ hu akɛ wɔjieɔ suɔmɔ kpo wɔtsɔɔ wɔnyɛmimɛi ni nyiɛɔ hiɛ yɛ asafo lɛ mli lɛ aloo yɛ nibii ni kɔɔ Yehowa gbɛjianɔtoo ni anaa yɛ jeŋ fɛɛ lɛ hu gbɛfaŋ. Nɔ ni fata enɛ he hu ji anɔkwa ni wɔɔye “tsulɔ anɔkwafo kɛ nilelɔ” lɛ. (Mateo 24:45-47) Nyɛhaa wɔkpɛlɛa anɔkwale nɛɛ nɔ akɛ shii abɔ ni wɔ diɛŋtsɛ wɔɔkane Biblia lɛ fɛɛ sɛɛ lɛ, kulɛ wɔleŋ anɔkwale lɛ wɔ diɛŋtsɛ kɔkɔɔkɔ. Kulɛ wɔleŋ anɔkwale ni kɔɔ Yehowa kɛ eyiŋtoi kɛ esui ahe lɛ hu, kɛ egbɛi lɛ shishinumɔ kɛ bɔ ni ehe hiaa ha, Maŋtsɛyeli lɛ, Yesu kpɔmɔ nɔ lɛ, kɛ sɔrɔtofeemɔ ni yɔɔ Nyɔŋmɔ gbɛjianɔtoo lɛ kɛ Satan nɔ lɛ teŋ, aloo nɔ hewɔ ni Nyɔŋmɔ eŋmɛ efɔŋfeemɔ gbɛ lɛ hu shishi kɔkɔɔkɔ. Etamɔ bɔ ni Buu Mɔɔ Asafo lɛ klɛŋklɛŋ sɛinɔtalɔ, Charles Taze Russell ŋma yɛ 1914 lɛ pɛpɛɛpɛ: “Ani wɔjeee mɛi ni ajɔɔ wɔ, mɛi ni yɔɔ miishɛɛ? Ani wɔ-Nyɔŋmɔ lɛ jeee anɔkwafo? Kɛji mɔ ko le nɔ ko ni hi fe enɛ lɛ, nyɛhaa ekɔa. Kɛji nyɛteŋ mɔ ko na nɔ ko ni hi fe enɛ lɛ, wɔhiɛ ka nɔ akɛ nyɛbaakɛɛ wɔ. Wɔleee nɔ ko ni hi fe enɛ loo nɔ ni hilɛ tamɔ nɔ ni wɔna yɛ Nyɔŋmɔ Wiemɔ lɛ mli lɛ mlijaa fa po. . . . Lilɛi loo niŋmaa tso ko bɛ ni baanyɛ atsɔɔ toiŋjɔlɛ, kɛ miishɛɛ kɛ jɔɔmɔ ni anɔkwa Nyɔŋmɔ lɛ he nilee ni mli tse keŋkeŋ lɛ kɛba wɔtsui kɛ wɔshihilɛ mli lɛ mli. Nyɔŋmɔ Nilee, Jalɛsaneyeli, Hewalɛ, kɛ Suɔmɔ lɛ he Sane lɛ haa wɔnaa nibii ni wɔyitso kɛ wɔtsui fɛɛ shweɔ lɛ kwraa kɛmɔɔ shi. Wɔtaooo nii babaoo fe enɛ dɔŋŋ. Nɔ ko bɛ ni wɔɔshwe dɔŋŋ fe akɛ wɔnine aaashɛ nɛkɛ naakpɛɛ Sane nɛɛ nɔ yɛ gbɛ ni mli ka shi faŋŋ nɔ yɛ wɔjwɛŋmɔ mli.” (The Watch Tower, December 15, 1914, baafai 377-8) Kwɛ bɔ ni nakai wiemɔi ni aje gbɛ aŋma jogbaŋŋ lɛ ji anɔkwale ha!
Ni Wɔɔsɔmɔ Mɛi ni Yɔɔ Sɛɛ Lɛ
14. Mɛɛ gbɛ nɔ esa akɛ Nyɔŋmɔ suɔmɔ lɛ kpojiemɔi akanya wɔ ni wɔfee wɔnii yɛ mɛi ni yɔɔ asafo lɛ sɛɛ lɛ ahe yɛ?
14 Esa akɛ Nyɔŋmɔ suɔmɔ lɛ kpojiemɔi ni wɔna mli ŋɔɔmɔ lɛ akanya wɔ ni wɔjie nanemɛi asuɔmɔ kpo wɔtsɔɔ mɛi ni yɔɔ asafo lɛ sɛɛ lɛ. Mɛɛ gbɛ nɔ wɔɔtsɔ wɔfee enɛ? Shihilɛi lɛ ekomɛi baanyɛ atsɔɔ akɛ wɔbaanyɛ wɔye wɔbua wɔ kuuŋbii yɛ heloo gbɛfaŋ. Shi, akɛ nɔ ni he hiaa fe fɛɛ lɛ, wɔbaanyɛ wɔjie nanemɛi asuɔmɔ kpo kɛtsɔ Nyɔŋmɔ Maŋtsɛyeli lɛ he sanekpakpa lɛ ni wɔkɛaaha mɛi krokomɛi ni wɔye wɔbua mɛi ni sumɔɔ jalɛ lɛ koni amɛbatsɔmɔ Yesu Kristo kaselɔi lɛ nɔ. Ani wɔkɛ wɔhe woɔ nɛkɛ maŋ sɔɔmɔ nitsumɔ nɛɛ mli daa, aloo ani wɔmiiku wɔhiɛ wɔmiishwie nɔ? Ani ebatsɔ nɔ ko ni wɔmiifee daa gbi aloo sɔɔmɔ bibioo ko kɛkɛ? Aloo ani nanemɛi asuɔmɔ kanyaa wɔ lɛlɛŋ? Ani wɔjieɔ niiahenumɔ kpo? Ani wɔtoɔ wɔtsui shi, ni wɔmɛɔ ni gbɔmɛi lɛ ahere nɔ? Ani wɔwoɔ shiatsɛmɛi lɛ hewalɛ ni amɛ hu amɛtsɔɔ amɛjwɛŋmɔ? Hɛɛ, ni wɔ kome pɛ wɔɔwie lɛ, nyɛhaa wɔŋmɛa nanemɛi asuɔmɔ gbɛ ni etsirɛ wɔ ni wɔbo mɛi ni wɔkɛkpeɔ yɛ wɔsɔɔmɔ nitsumɔ lɛ mli lɛ toi koni wɔkɛ amɛ ana Biblia mli sanegbaa ni he yɔɔ sɛɛnamɔ.
15. (a) Mɛni hewɔ wiemɔ “trukaa odaseyeli” lɛ hi fe “odaseyeli hegbɛ ko ni wɔkɛaatsuu nii kɛkɛ” lɛ? (b) Mɛni hewɔ ni esa akɛ wɔŋɔ hegbɛi ni wɔnaa lɛ ni wɔkɛye odase trukaa lɛ?
15 Ani wɔhiɛ yɛ wɔhe nɔ bɔ ni wɔɔnyɛ koni wɔŋɔ hegbɛi ni wɔnaa lɛ ni wɔkɛye odase trukaa? Esa akɛ akadi akɛ enɛ jeee odaseyeli hegbɛ ko ni wɔkɛaatsu nii kɛkɛ, ni tsɔɔ nifeemɔ ko ni atoko he gbɛjianɔ loo nɔ ni abuɔ akɛ ehe ehiaaa tsɔ ko. Trukaa odaseyeli he miihia waa diɛŋtsɛ, ni suɔmɔ ni wɔyɔɔ kɛha wɔnanemɛi adesai lɛ baaha wɔshwe akɛ wɔɔtao hegbɛi ni wɔkɛ wɔhe awo mli. Ni kwɛ bɔ ni odaseyeli ni tamɔ nakai yeɔ omanye ehaa! Akɛ nɔkwɛmɔ nɔ lɛ, beni nyɛminuu ko yaa Yehowa Odasefoi akpee ko shishi yɛ Italia kooyigbɛ lɛ, ekɛ etsɔne tee tsɔnei asaamɔ he ko koni atsake ekane lɛ aha lɛ. Beni emɛɔ lɛ, eye mɛi ni yɔɔ emasɛi lɛ odase ni eha amɛ dɛhiɛmɔ woji ni ekɛfɔ amɛ nine koni amɛbabo Biblia mli maŋshiɛmɔ ni abaaha Hɔgbaa lɛ toi. Beni afee majimaji ateŋ kpee ko yɛ Rome yɛ no sɛɛ afi mli lɛ, nyɛminuu ko ni eyooo lɛ kɛ miishɛɛ kpele baŋa lɛ. Namɔ ji nyɛminuu nɛɛ? Ojogbaŋŋ, hii ni ekɛ dɛhiɛmɔ woji lɛ ha amɛ yɛ tsɔnei asaamɔ he lɛ yɛ afi ni eho lɛ mli lɛ ateŋ mɔ kome ni! Nuu lɛ tee eyabo maŋshiɛmɔ lɛ toi ni ekɛ egbɛi ha koni akɛ lɛ afee Biblia mli nikasemɔ. Amrɔ nɛɛ lɛ kɛ eŋa fɛɛ ebatsɔmɔ Yehowa Odasefoi ni ejɔɔ amɛhe nɔ. Ŋwanejee ko bɛ he akɛ trukaa odaseyeli he baanyɛ aba sɛɛnamɔ babaoo diɛŋtsɛ!
Nyɛyaa nɔ Nyɛherea Nyɔŋmɔ Suɔmɔ lɛ Nɔ
16. Mɛɛ sanebimɔi ebaahi akɛ wɔɔbibii wɔ diɛŋtsɛ wɔhe?
16 Eji anɔkwale akɛ Yehowa ejie suɔmɔ babaoo kpo yɛ ebɔɔnii ahe lɛlɛŋ. Taakɛ bɔ ni wɔna lɛ, Ŋmalɛi lɛ kɛ mɛi ni here Nyɔŋmɔ suɔmɔ lɛ kpojiemɔi lɛ anɔ yɛ gbɛ ni pɛsɛmkunya bɛ mli nɔ lɛ ahe nɔkwɛmɔ nii babaoo haa wɔ. Akɛ nɔ ni sa jogbaŋŋ fe fɛɛ lɛ, lalatsɛ ni mumɔ tsirɛɔ lɛ lɛ jaje akɛ: “Esa akɛ amɛjie Yehowa yi yɛ emlihilɛ kɛ enaakpɛɛ nii ni etsuɔ ehaa gbɔmɛi abii lɛ ahewɔ.” (Lala 107:8, 15, 21, 31) Ani wɔbaaka akɛ wɔɔkpɛlɛ Nyɔŋmɔ duromɔ ni esaaa wɔ lɛ nɔ yakatswaa? Ekaba lɛ nakai kɔkɔɔkɔ! (2 Korintobii 6:1) No hewɔ lɛ nyɛhaa wɔteŋ mɔ fɛɛ mɔ abi lɛ diɛŋtsɛ ehe akɛ: ‘Ani mihiɛ sɔɔ Nyɔŋmɔ suɔmɔ lɛ kpojiemɔi ni mina mli ŋɔɔmɔ momo kɛ nɔ ni miyɔɔ hiɛnɔkamɔ yɛ mli akɛ mana mli ŋɔɔmɔ yɛ wɔsɛɛ lɛ diɛŋtsɛ? Ani amɛmiikanya mi koni masumɔ Yehowa kɛ mitsui fɛɛ, kɛ misusuma fɛɛ, kɛ mijwɛŋmɔ fɛɛ, kɛ mihewalɛ fɛɛ hu? Ani mituu mihe fɛɛ miha Nyɔŋmɔ yɛ anɔkwale mli? Ani misumɔɔ jalɛ ni minyɛɔ efɔŋ? Ani mijieɔ nyɛmimɛi asuɔmɔ kpo? Ni te mibɔɔ mɔdɛŋ akɛ manyiɛ Yesu nanemaa hei lɛ asɛɛ kpaakpa yɛ misɔɔmɔ nitsumɔ lɛ gbɛfaŋ tɛŋŋ?’
17. Kɛji wɔhere Yehowa Nyɔŋmɔ suɔmɔ lɛ kpojiemɔi lɛ anɔ yɛ gbɛ ni pɛsɛmkunya bɛ mli nɔ lɛ, mɛni baajɛ mli aba?
17 Lɛlɛŋ, gbɛi sɔrɔtoi pii yɛ ni wɔɔnyɛ wɔtsɔ nɔ wɔtsɔɔ wɔtsuiŋ hiɛsɔɔ yɛ Nyɔŋmɔ suɔmɔ lɛ kpojiemɔ ni wɔna mli niiashikpamɔi lɛ ahe. Kɛ wɔkɛ hegbɛi ni wɔnaa akɛ wɔjie hiɛsɔɔ ni tamɔ nɛkɛ kpo lɛ tsu nii kɛmɔ shi kwraa lɛ, no lɛ wɔɔha wɔŋwɛi Tsɛ lɛ tsui anya, ni wɔɔtsɔmɔ jɔɔmɔi wɔha mɛi krokomɛi, ni wɔ diɛŋtsɛ hu wɔnine aaashɛ miishɛɛ kɛ toiŋjɔlɛ nɔ, ni wɔtsui hu aaanyɔ wɔmli. No hewɔ lɛ eba akɛ wɔɔya nɔ wɔhere Nyɔŋmɔ suɔmɔ lɛ kpojiemɔi lɛ anɔ yɛ gbɛ ni pɛsɛmkunya bɛ mli nɔ.
Te Obaaha Hetoo Oha Tɛŋŋ?
◻ Mɛni ataoɔ yɛ wɔdɛŋ dani wɔnyɛ wɔhere Nyɔŋmɔ suɔmɔ Iɛ nɔ yɛ gbɛ ni pɛsɛmkunya bɛ mli nɔ?
◻ Mɛɛ gbɛ nɔ wɔɔtsɔ wɔkwɛ wɔhe nɔ jogbaŋŋ yɛ kaai ahe?
◻ Mɛni ji gbɛi komɛi ni wɔɔtsɔ nɔ wɔjie nyɛmimɛi asuɔmɔ kpo?
◻ Mɛɛ gbɛ nɔ esa akɛ Yehowa suɔmɔ Iɛ kpojiemɔi akanya wɔ ni wɔkɛ wɔnanemɛi aye yɛ?
[Mfoniri ni yɔɔ baafa 17]
Esa akɛ wɔpele wɔshi eshafeemɔŋ henumɔi, koni wɔjo oshãra naa foi
[Mfoniri ni yɔɔ baafa 18]
Onukpai Iɛ tsɔɔ nyɛmimɛi asuɔmɔ kɛtsɔ mɛi krokomɛi ni amɛfataa amɛhe yɛ Maŋtsɛyeli sɔɔmɔ lɛ mli lɛ nɔ
[Mfoniri ni yɔɔ baafa 19]
Charles Taze Russell, ni ji Buu Mɔɔ Asafo Iɛ klɛŋklɛŋ sɛinɔtalɔ Iɛ gbala jwɛŋmɔ kɛba toiŋjɔlɛ, miishɛɛ, kɛ jɔɔmɔ ni Nyɔŋmɔ pɛ baanyɛ ekɛha Iɛ nɔ