Abu Nyɔŋmɔ Toiŋjɔlɛ He Bɔfoi lɛ akɛ Amɛyɛ Miishɛɛ
“Mɛi ni Yehowa ekpɔ̃ amɛ lɛ aaaku amɛsɛɛ kɛaaba ekoŋŋ, ni amɛaaba Zion kɛ nyamɔ lala; naanɔ miishɛɛ aaahi amɛyiteaŋ.” —YESAIA 35:10.
1. Mɛni he hiaa je lɛ waa diɛŋtsɛ?
SANEKPAKPA bɔfo he miihia adesai ŋmɛnɛ fe bei fɛɛ ni eho. Ehe miihia waa ni aná mɔ ko ni baawie anɔkwale ni kɔɔ Nyɔŋmɔ kɛ eyiŋtoi ahe, odasefonyo ni sheee gbeyei, ni baabɔ efɔŋ feelɔi kɔkɔ yɛ hiɛkpatamɔ ni baa lɛ he, ni eye ebua mɛi ni yɔɔ jalɛ tsuii ni amɛná Nyɔŋmɔ toiŋjɔlɛ.
2, 3. Yɛ Israel gbɛfaŋ lɛ, Yehowa hã eshiwoo ni aŋma yɛ Amos 3:7 lɛ ba mli yɛ mɛɛ gbɛ nɔ?
2 Yɛ Israel beaŋ lɛ, Yehowa wo shi akɛ ekɛ bɔfoi ni tamɔ nakai baaha. Yɛ afii ohai nɛɛhu D.Ŋ.B. lɛ naagbee gbɛ lɛ, gbalɔ Amos wie akɛ: “Nuntsɔ Yehowa efeŋ nɔ ko, akɛ ja ejie eyiŋtoo lɛ kpo etsɔɔ etsuji, gbalɔi lɛ, dã.” (Amos 3:7) Yehowa fee nibii wuji babaoo, yɛ afii ohai abɔ ni nyiɛ sanejajemɔ nɛɛ sɛɛ lɛ amli. Akɛ nɔkwɛmɔ nɔ lɛ, yɛ afi 607 D.Ŋ.B. lɛ, egbala ewebii ni ehala lɛ atoi waa ejaakɛ amɛtsɔmɔ atuatselɔi kɛ mɛi ni eye lá yi sɔ̃. Egbala jeŋmaji ni bɔle amɛ, ni nyá yɛ Israel amanehulu lɛ hewɔ lɛ hu atoi. (Yeremia, yitsei 46-49) Kɛkɛ ni, yɛ afi 539 D.Ŋ.B. lɛ, Yehowa hã abutu Babilon jeŋ hewalɛ ni he wa waa lɛ, ni nɔ ni jɛ mli ba ji akɛ, yɛ afi 537 D.Ŋ.B. lɛ, Israel shwɛɛnii ko ku sɛɛ kɛba amɛshikpɔŋ nɔ koni amɛbasaa amɛma sɔlemɔtsu lɛ ekoŋŋ.—2 Kronika 36:22, 23.
3 Nibii ni he hiaa waa diɛŋtsɛ nɛ, ni yɛ Amos wiemɔi lɛ kɛ gbeekpamɔ naa lɛ, Yehowa tsɔ̃ hiɛ ejie kpo etsɔɔ gbalɔi ni tsu nii akɛ bɔfoi lɛ, ni amɛbɔ Israel kɔkɔ yɛ nɔ ni baaba lɛ he. Yɛ afii ohai kpaanyɔ D.Ŋ.B. teŋ gbɛ lɛ, etee Yesaia shi. Yɛ afii ohai kpawo D.Ŋ.B. teŋ gbɛ lɛ, etee Yeremia hu shi. Kɛkɛ ni, kɛbaa nakai afii oha lɛ naagbee gbɛ lɛ, etee Ezekiel shi. Mɛnɛɛmɛi kɛ gbalɔi anɔkwafoi krokomɛi ye Yehowa yiŋtoi ahe odase kɛmɔ shi.
Nyɔŋmɔ Bɔfoi lɛ Yɔsemɔ Ŋmɛnɛ
4. Mɛni feɔ bɔ ni toiŋjɔlɛ he bɔfoi ahe hiaa adesai lɛ he mfoniri?
4 Shi ŋmɛnɛ hu? Mɛi pii yɛ je lɛŋ ni kɛ́ amɛna bɔ ni adesai ashihilɛ yaa nɔ efiteɔ lɛ, amɛjɛɔ amɛjwɛŋmɔ mli amɛnuɔ he akɛ amanehulu ko kã wɔhiɛ. Mɛi ni sumɔɔ jalɛ nifeemɔ lɛ nuɔ dɔlɛ he yɛ amɛtsui mli kɛ́ amɛna osatofeemɔ kɛ efɔŋ feemɔ ni yaa nɔ yɛ Kristendom lɛ. Taakɛ Yehowa gba efɔ̃ shi kɛtsɔ Ezekiel nɔ lɛ, ‘amɛdɔmɔɔ ŋtsɔi ni amɛyeɔ ŋkɔmɔ yɛ nihii nii fɛɛ ni afeɔ yɛ eteŋ lɛ hewɔ.’ (Ezekiel 9:4) Shi kɛlɛ, mɛi pii yooo nɔ ni Yehowa yiŋtoi ji. Esa akɛ akɛɛ amɛ.
5. Yesu tsɔɔ akɛ abaaná bɔfoi yɛ wɔgbii nɛɛ amli yɛ mɛɛ gbɛ nɔ?
5 Ani mɔ ko kɛ ekãa mumɔ ni Yesaia, Yeremia, kɛ Ezekiel yɔɔ lɛ wieɔ ŋmɛnɛ? Yesu tsɔɔ akɛ mɔ ko baafee nakai. Beni egbaa nibii ni baaba yɛ wɔgbii nɛɛ amli lɛ, ewie akɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.” (Mateo 24:14) Namɔ haa nakai gbalɛ lɛ baa mli ŋmɛnɛ, ni etsuɔ nii akɛ bɔfo, sanekpakpa shiɛlɔ? Nibii ni je amɛhe yɛ wɔgbii nɛɛ amli kɛ blema Israel beaŋ yeɔ ebuaa wɔ ni wɔhaa nakai sanebimɔ lɛ hetoo.
6. (a) Tsɔɔmɔ niiashikpamɔi ni “Nyɔŋmɔ Israel” ná yɛ klɛŋklɛŋ jeŋ ta lɛ mli lɛ amli. (b) Ahã Ezekiel 11:17 ba mli yɛ blema Israel nɔ yɛ mɛɛ gbɛ nɔ?
6 Yɛ Jeŋ Ta I jaramɔ gbii lɛ amli lɛ, Yehowa ŋmɛnɛŋmɛnɛ beaŋ webii, ni ji “Nyɔŋmɔ Israel” ni afɔ amɛ mu lɛ ateŋ shwɛɛnii lɛ tee nomŋɔɔ mli, tamɔ bɔ ni aŋɔ Israel nom kɛtee Babilon lɛ. (Galatabii 6:16) Amɛtee mumɔŋ nomŋɔɔ mli yɛ Babilon Kpeteŋkpele lɛ, ni ji jeŋ apasa jamɔi agbɛjianɔtoo ni Kristendom ji efã titri ni ale kɛ efã ni sa shwamɔ fe fɛɛ lɛ mli. Shi kɛlɛ, Yehowa wiemɔi ni ekɛ Ezekiel wie lɛ tsɔɔ akɛ eŋmɛɛɛ amɛhe. Ekɛɛ: “Mabua nyɛnaa kɛaajɛ majimaji lɛ amli, ni mahã nyɛnaa abati kɛaajɛ shikpɔji ni agbɛ nyɛ ashwã nɔ lɛ anɔ, ni mikɛ Israel shikpɔŋ lɛ aaaha nyɛ.” (Ezekiel 11:17) Bɔni afee ni nakai shiwoo lɛ aba mli aha blema Israel lɛ, Yehowa tee Persianyo Koresh shi ni ebabutu Babilon Jeŋ Hewalɛ lɛ, ni egbele gbɛ kɛha Israel shwɛɛnii ko, koni amɛku amɛsɛɛ kɛya amɛ shikpɔŋ nɔ. Shi ŋmɛnɛ hu?
7. Mɛɛ nifeemɔ ko ni ba yɛ 1919 tsɔɔ akɛ Yesu fee nii eshi Babilon Kpeteŋkpele lɛ? Tsɔɔmɔ mli.
7 Afii oha nɛɛ shishijee gbɛ lɛ, abana odaseyeli ni mli wa ni tsɔɔ akɛ Koresh Kpeteŋkpele lɛ miitsu nii. Namɔ ni? Jeee mɔ ko mɔ ko, fe Yesu Kristo, ni awo lɛ maŋtsɛ yɛ ŋwɛi Maŋtsɛyeli lɛ mli kɛjɛ 1914 lɛ. Nɛkɛ Maŋtsɛ kpele nɛɛ jie nɔkpɛlɛmɔ kɛ sɛɛfimɔ kpo yɛ enyɛmimɛi ni afɔ amɛ mu, ni yɔɔ shikpɔŋ nɔ lɛ ahe, beni, yɛ afi 1919 mli lɛ, ajie Kristofoi ni afɔ amɛ mu lɛ kɛjɛ mumɔŋ nomŋɔɔ mli ni akɛ amɛ ku sɛɛ kɛba amɛ “shikpɔŋ” nɔ, ni ji amɛ mumɔŋ shihilɛ mli lɛ. (Yesaia 66:8; Kpojiemɔ 18:4) Enɛ hewɔ lɛ, Ezekiel 11:17 na emlibaa yɛ ŋmɛnɛŋmɛnɛ beaŋ. Blema lɛ, Babilon shigbeemɔ gbele gbɛ kɛha Israelbii lɛ koni amɛku amɛsɛɛ kɛya amɛ shikpɔŋ nɔ. Yɛ ŋmɛnɛŋmɛnɛ beaŋ lɛ, Nyɔŋmɔ Israel ni akɛ amɛ ku sɛɛ kɛba ekoŋŋ lɛ bafee odaseyeli ni tsɔɔ akɛ Babilon Kpeteŋkpele lɛ egbee shi kɛtsɔ Koresh Kpeteŋkpele lɛ nɔ. Bɔfo ni ji enyɔ ni yɔɔ Kpojiemɔ yitso 14 lɛ tswa shigbeemɔ nɛɛ he adafi beni ebo waa akɛ: “Ejwa, Babilon maŋ kpeteŋkpele lɛ ejwa, ejaakɛ eha jeŋmaji lɛ fɛɛ enu ejwamaŋbɔɔ lɛ he mlifu dãa lɛ eko.” (Kpojiemɔ 14:8) Kwɛ shihilɛ tsakemɔ ni eji kɛha Babilon Kpeteŋkpele lɛ, titri lɛ kɛha Kristendom! Ni kwɛ jɔɔmɔ ni eji kɛha anɔkwa Kristofoi!
8. Te Ezekiel wolo lɛ wie Nyɔŋmɔ webii amiishɛɛnamɔ yɛ amɛ kpɔmɔ yɛ 1919 sɛɛ lɛ he eha tɛŋŋ?
8 Wɔkaneɔ bɔ ni gbalɔ lɛ wie Nyɔŋmɔ webii amiishɛɛnamɔ lɛ he eha, yɛ amɛ sɛɛkuu lɛ sɛɛ lɛ, yɛ Ezekiel 11:18-20. Ewiemɔi lɛ aklɛŋklɛŋ mlibaa tsɔɔ Israel hetsuumɔ yɛ Ezra kɛ Nehemia gbii lɛ amli. Emlibaa yɛ ŋmɛnɛŋmɛnɛ beaŋ hu tsɔɔ nɔ ko ni tamɔ nakai nɔŋŋ. Hã wɔkwɛ bɔ ni ebaa lɛ ehaa. Yehowa wie akɛ: “Ni amɛaaba [amɛ shikpɔŋ nɔ], ni amɛaabajie emli taŋtaŋ nii lɛ fɛɛ kɛ nihii nii lɛ fɛɛ kɛaajɛ mli kɛaatee.” Taakɛ agba afɔ̃ shi lɛ, kɛjɛ 1919 kɛbaa lɛ, Yehowa tsuu ewebii ahe ni eha amɛ hewalɛ hee koni amɛkɛsɔmɔ lɛ. Amɛbɔi Babilonbii anifeemɔi kɛ tsɔɔmɔi ni wo amɛhe muji yɛ ehiɛ lɛ fɛɛ jiemɔ kɛmiijɛ amɛ mumɔŋ shihilɛ he lɛ.
9. Mɛɛ jɔɔmɔi ni sa kadimɔ waa Yehowa kɛha ewebii, kɛjɛ 1919 kɛbaa?
9 Kɛkɛ ni, taakɛ kuku 19 lɛ tsɔɔ lɛ, Yehowa tee nɔ ekɛɛ akɛ: “Ni mahã amɛ tsui kroko, ni mikɛ mumɔ hee aaawo nyɛmli, ni majie tɛ tsui lɛ kɛaajɛ amɛheloo mli, ni mahã amɛ loo tsui.” Yɛ wiemɔi nɛɛ kɛ gbeekpamɔ naa lɛ, yɛ afi 1919 mli lɛ, Yehowa fee etsuji ni efɔ amɛ mu lɛ ekome, ni eha amɛ “tsui [kome],” kɛji wɔɔtsɛ lɛ nakai, bɔni afee ni amɛsɔmɔ lɛ “kɛ gbee kome.” (Zefania 3:9) Kɛfata he lɛ, Yehowa hã ewebii lɛ mumɔ krɔŋkrɔŋ koni ewo amɛ hewalɛ yɛ shiɛmɔ nitsumɔ lɛ mli, koni ewo yibii kpakpai ni awie he yɛ Galatabii 5:22, 23 lɛ yɛ amɛmli. Ni yɛ tsui ni ekpiliŋ, ni tamɔ tɛ tsui najiaŋ lɛ, Yehowa hã amɛ tsui ni yɔɔ bɔdɔɔ, ni hiɔ kudɔmɔ, tsui ni feɔ toiboo, tsui ni baafee esuɔmɔnaa nii.
10. Mɛni hewɔ Yehowa ejɔɔ ewebii ni ekɛ amɛ eku sɛɛ kɛba ekoŋŋ kɛjɛ 1919 kɛbaa lɛ?
10 Mɛni hewɔ efee enɛ? Yehowa diɛŋtsɛ tsɔɔ nɔ hewɔ. Wɔkaneɔ yɛ Ezekiel 11:20 akɛ: “Bɔni afee ni amɛnyiɛ yɛ mikpɔi lɛ anaa, ni amɛye mimlai lɛ anɔ ni amɛfee, ni amɛtsɔ mimaŋ, ni mi hu matsɔ amɛ-Nyɔŋmɔ.” Nyɔŋmɔ Israel kase toiboo ni amɛaafee amɛha Yehowa mla, moŋ fe ni amɛaanyiɛ amɛ diɛŋtsɛ amɛsusumɔi asɛɛ. Amɛkase Nyɔŋmɔ suɔmɔnaa nifeemɔ ni gbɔmɔ gbeyeishemɔ bɛ mli. Enɛ hewɔ lɛ, abana amɛ akɛ esoro amɛ kwraa yɛ amale Kristofoi ni yɔɔ Kristendom lɛ ahe. Yehowa webii ji amɛ. Ni no hewɔ lɛ, Yehowa efee klalo akɛ ekɛ amɛ baatsu nii akɛ ebɔfo, “[etsulɔ] anɔkwafo kɛ nilelɔ.”—Mateo 24:45-47.
Nyɔŋmɔ Bɔfoi lɛ Amiishɛɛnamɔ
11. Te Yesaia wolo lɛ wie Yehowa webii amiishɛɛnamɔ lɛ he eha tɛŋŋ?
11 Ani obaanyɛ ofee miishɛɛ ni amɛná beni amɛyoo hegbɛ kpele ni amɛnaa mli ŋɔɔmɔ lɛ he mfoniri okwɛ? Akɛ kuu lɛ, amɛha wiemɔi ni yɔɔ Yesaia 61:10 lɛ jije akɛ: “Manya yɛ Yehowa mli, ni misusuma mli aaafili lɛ yɛ mi-Nyɔŋmɔ lɛ mli.” Ahã shiwoo ni yɔɔ Yesaia 35:10 lɛ ba mli yɛ amɛnɔ, akɛ: “Mɛi ni Yehowa ekpɔ̃ amɛ lɛ aaaku amɛsɛɛ kɛaaba ekoŋŋ, ni amɛaaba Zion kɛ nyamɔ lala; naanɔ miishɛɛ aaahi amɛyiteaŋ, amɛnine aaashɛ mlifilimɔ kɛ miishɛɛ nɔ, ni awerɛho kɛ ŋtsɔidɔɔmɔ aaajo foi.” Nɛkɛ ji miishɛɛ ni Yehowa Nyɔŋmɔ toiŋjɔlɛ bɔfoi lɛ na yɛ afi 1919 mli tɔ̃ɔ, beni amɛje shishi akɛ amɛaashiɛ sanekpakpa lɛ amɛtsɔɔ adesai fɛɛ lɛ. Kɛjɛ nakai beaŋ aahu kɛbashi ŋmɛnɛ lɛ, amɛkpako nitsumɔ nɛɛ tsumɔ, ni amɛ miishɛɛ lɛ efa babaoo diɛŋtsɛ. Yesu wie yɛ e-Gɔŋ nɔ Shiɛmɔ lɛ mli akɛ: “Miishɛɛ ji mɛi ni taoɔ toiŋjɔlɛ lɛ, ejaakɛ abaatsɛ amɛ ‘Nyɔŋmɔ bii.’ ” (Mateo 5:9, NW shishigbɛ niŋmaa) “Nyɔŋmɔ bii” ni afɔ amɛ mu lɛ ateŋ shwɛɛnii lɛ ená anɔkwale ni yɔɔ sanejajemɔ nɛɛ mli lɛ mli niiashikpamɔ aahu kɛjɛ 1919 kɛbashi ŋmɛnɛ.
12, 13. (a) Namɛi bafata Nyɔŋmɔ Israel he yɛ Yehowa sɔɔmɔ mli, ni mɛɛ nitsumɔ amɛ hu amɛbɔi tsumɔ? (b) Mɛɛ miishɛɛ kpele Yehowa tsuji ni afɔ amɛ mu lɛ ena mli ŋɔɔmɔ?
12 Beni afii lɛ hoɔ lɛ, Nyɔŋmɔ Israel yifalɛ lɛ tee hiɛ waa kɛyashi 1930 afii lɛ amli, beni mɛi ni afɔ amɛ mu lɛ ateŋ shwɛɛnii lɛ anaabuamɔ lɛ bɛŋkɛɔ enaagbee lɛ. Ani sanekpakpa shiɛlɔi lɛ ayifalɛ ni yaa hiɛ lɛ ba naagbee yɛ nakai beaŋ? Dabi kwraa. Kristofoi asafo babaoo ni yɔɔ shikpɔŋ nɔ hiɛnɔkamɔ babɔi puemɔ, ni mɛnɛɛmɛi bafata amɛ nyɛmimɛi ni afɔ amɛ mu lɛ ahe yɛ shiɛmɔ nitsumɔ lɛ mli. Bɔfo Yohane na nɛkɛ asafo babaoo nɛɛ yɛ ninaa mli, ni bɔ ni ewie amɛhe eha lɛ sa kadimɔ waa: “[Amɛyɛ] Nyɔŋmɔ maŋtsɛsɛi lɛ hiɛ, ni amɛjaa lɛ nyɔɔŋ kɛ shwane.” (Kpojiemɔ 7:15) Hɛɛ, asafo babaoo lɛ bɔi Nyɔŋmɔ sɔɔmɔ kɛ amɛdekã fɛɛ. Nɔ ni enɛ kɛba ji akɛ, beni mɛi ni afɔ amɛ mu lɛ ayifalɛ bɔi shibaa, yɛ 1935 sɛɛ lɛ, amɛ hefatalɔi anɔkwafoi nɛɛ hã odaseyeli nitsumɔ lɛ tee hiɛ kɛ ekãa babaoo diɛŋtsɛ.
13 Atsɔ nɛkɛ gbɛ nɔ ahã Yesaia 60:3, 4 ba mli akɛ: “Jeŋmaji aaanyiɛ kɛaaba ola lɛ he, ni maŋtsɛmɛi aaaba kpɛmɔ ni kpɛɔ yɛ onɔ lɛ he. Holemɔ ohiŋmɛii anɔ ni okwɛ ohe kɛkpe: Amɛ fɛɛ amɛbua amɛhe naa kɛmiiba oŋɔɔ! Obihii lɛ aaajɛ maŋsɛɛ shɔŋŋ aba, ni obiyei lɛ hu, aaahiɛ amɛ yɛ ŋmawuiaŋ kɛaaba.” Awie miishɛɛ ni nɛkɛ nibii ni ba nɛɛ ha Nyɔŋmɔ Israel ná lɛ he yɛ gbɛ ni yɔɔ fɛo nɔ, yɛ Yesaia 60:5, he ni wɔkaneɔ yɛ akɛ: “No lɛ ooona, ni ohiɛ aaakpɛ kɛ miishɛɛ, ni otsui aaakpokpo ni emli hu aaalɛɛ; ejaakɛ mɛi babaoo aaajɛ ŋshɔŋ aba oŋɔɔ, jeŋmaji lɛ ahewalɛ lɛ aaaba oŋɔɔ.”
Yehowa Gbɛjianɔtoo lɛ Miiya Hiɛ
14. (a) Mɛɛ ŋwɛi nibii ahe ninaa Ezekiel na, ni mɛɛ fãmɔ enine shɛ nɔ? (b) Mɛni Yehowa webii ni yɔɔ ŋmɛnɛŋmɛnɛ beaŋ lɛ yoo, ni mɛɛ gbɛnaa nii amɛnu he akɛ ekã amɛnɔ?
14 Yɛ afi 613 D.Ŋ.B. lɛ, Ezekiel ná Yehowa ŋwɛi gbɛjianɔtoo ni tamɔ shwiili ni miinyiɛ lɛ he ninaa. (Ezekiel 1:4-28) Sɛɛ mli lɛ, Yehowa kɛɛ lɛ akɛ: “Gbɔmɔ bi, yiŋ ni oya Israel we lɛ ŋɔɔ, ni oyawie miwiemɔi lɛ otsɔɔ amɛ.” (Ezekiel 3:4) Wɔyooɔ yɛ afi nɛɛ ni ji 1997 mli akɛ, Yehowa ŋwɛi gbɛjianɔtoo lɛ kã he eeya ehiɛ waa ni egbɔjɔɔɔ ehiɛyaa lɛ mli, koni eha Nyɔŋmɔ yiŋtoi aba mli. No hewɔ lɛ, wɔnuɔ he akɛ sɔ̃ kã wɔnɔ lolo akɛ wɔgba mɛi krokomɛi nakai yiŋtoi lɛ ahe sane. Yɛ Ezekiel gbii lɛ amli lɛ, ewie wiemɔi ni jɛ Yehowa mumɔ mli tɛ̃ɛ. Ŋmɛnɛ, wɔwieɔ wiemɔi ni jɛ Yehowa Wiemɔ ni jɛ mumɔŋ, ni ji Biblia lɛ mli. Ni kwɛ shɛɛ sane ni nakai wolo lɛ hiɛ kɛha adesai! Eyɛ mli akɛ mɛi pii ehao yɛ wɔsɛɛ be he moŋ, shi Biblia lɛ tsɔɔ akɛ nibii ehiii kwraa—ni yɛ nakai beaŋ nɔŋŋ lɛ, ehi waa—fe bɔ ni amɛsusuɔ.
15. Mɛni hewɔ je lɛŋ shihilɛ ehiii kwraa fe bɔ ni mɛi babaoo susuɔ ŋmɛnɛ lɛ?
15 Nibii ehiii kwraa ejaakɛ, taakɛ wɔkase yɛ nikasemɔi ni tsɔ hiɛ lɛ amli lɛ, etsɛŋ ni abaakpata Kristendom kɛ apasa jamɔi krokomɛi fɛɛ hiɛ kwraa tamɔ bɔ ni afee Yerusalem yɛ afi 607 D.Ŋ.B. lɛ. Kɛfata he lɛ, eshwɛ fioo ni abaakpata jeŋ muu fɛɛ maŋkwramɔ gbɛjianɔtoo, ni afee ehe mfoniri yɛ Kpojiemɔ wolo lɛ mli akɛ kooloo awuiyelɔ ni yɔɔ yitsei kpawo kɛ akoloŋtoi nyɔŋma lɛ hu hiɛ kwraa, tamɔ bɔ ni afee wɔŋjalɔi amaji ni ebɔle Yerusalem he lɛ amli babaoo lɛ. (Kpojiemɔ 13:1, 2; 19:19-21) Yɛ Ezekiel gbii lɛ amli lɛ, Yehowa wie gbeyeishemɔ ni Yerusalem hiɛkpatamɔ ni baa lɛ kɛbaaba lɛ he kɛ wiemɔ ni mli kã shi faŋŋ. Shi ewiemɔi lɛ baaná shishinumɔ babaoo beni gbɔmɛi baayoo je nɛɛ hiɛkpatamɔ ni baa lɛ. Yehowa kɛɛ Ezekiel akɛ: “No hewɔ lɛ bo, gbɔmɔ bi, dɔɔmɔ ŋtsɔi yɛ ohɛ ni ekũ lɛ hewɔ, ni odɔmɔ ŋtsɔi waa yɛ amɛhiɛ! Ni aaaba mli akɛ, kɛ amɛbio akɛ: ‘Mɛɛ hewɔ po odɔmɔɔ ŋtsɔi?’ lɛ, okɛɛ akɛ: ‘Adafitswaa lɛ hewɔŋ;’ ejaakɛ eeba, ni tsui fɛɛ tsui aaafã, ni nijiaŋ fɛɛ aaaje wui, ni mumɔ fɛɛ mumɔ aaafee vii, ni nakutsei fɛɛ aaasere tamɔ nu. Naa, eeba, ni ebaaba mli,’ Nuntsɔ Yehowa kɛɛ.” (Ezekiel 21:6, 7; Mateo 24:30) Nibii ni yɔɔ gbeyei waa jwere wɔhiɛ nɔŋŋ kɛmiiba. Suɔmɔ kpele ni wɔyɔɔ kɛha wɔnanemɛi adesai lɛ tsirɛɔ wɔ koni wɔbɔ kɔkɔ, ni wɔkɛ Yehowa mlifu ni baa lɛ he “adafitswaa” ahã.
16. Mɛni hewɔ shihilɛ lɛ hi waa kɛha heshibalɔi lɛ, fe bɔ ni mɛi pii susuɔ lɛ?
16 Yɛ nakai beaŋ nɔŋŋ lɛ, nibii hi waa kɛha mɛi ni yɔɔ jalɛ tsuii lɛ fe bɔ ni mɛi babaoo susuɔ. Yɛ mɛɛ gbɛ nɔ? Kɛ shishinumɔ akɛ, Yesu Kristo egbo yɛ wɔhe eshai lɛ ahewɔ, ni amrɔ nɛɛ eeye nɔ akɛ Nyɔŋmɔ Maŋtsɛyeli lɛ nɔ Maŋtsɛ. (1 Timoteo 1:15; Kpojiemɔ 11:15) Etsɛŋ ni abaaye adesai anaagbai, ní yɛ adesai asusumɔ naa lɛ etamɔ nɔ ni anyɛɛɛ aná amɛnaa tsabaa lɛ anɔ kunim kɛtsɔ nakai ŋwɛi Maŋtsɛyeli lɛ nɔ. Gbele, hela, fitemɔ, hɔmɔ, kɛ awuiyeli fɛɛ baafee tsutsu nii ni eho etee, ni Nyɔŋmɔ Maŋtsɛyeli lɛ baaye paradeiso shikpɔŋ nɔ, ni mɔ ko eteee shi ewooo. (Kpojiemɔ 21:3, 4) Adesai baaná Nyɔŋmɔ toiŋjɔlɛ mli ŋɔɔmɔ—ni ji toiŋjɔlɛ wekukpaa ni baahi amɛkɛ Yehowa Nyɔŋmɔ kɛ amɛkɛ amɛnanemɛi adesai hu ateŋ.—Lala 72:7.
17. Mɛɛ shweremɔi hãa Nyɔŋmɔ toiŋjɔlɛ he bɔfoi lɛ atsuii naa miishɛɛ?
17 Yɛ je lɛŋ hei komɛi lɛ, gbɔmɛi heshibalɔi babaoo miihere Nyɔŋmɔ toiŋjɔlɛ he shɛɛ sane nɛɛ nɔ. Kɛ wɔɔtsĩ nɔkwɛmɔ nii fioo komɛi pɛ tã lɛ, nyɛsɛɛ afi lɛ, Ukraine bɔ shiɛlɔi ayifalɛ oha mlijaa 17 hiɛyaa he amaniɛ. Mozambique bɔ oha mlijaa 17 hiɛyaa he amaniɛ, Lithuania ná oha mlijaa 29 nɔyaa. Russia ná oha mlijaa 31 hiɛyaa, ni Albania ná shiɛlɔi ayifalɛ oha mlijaa 52 hiɛyaa. Nɛkɛ hiɛyaa nɛɛ fɛɛ tsɔɔ aŋkroaŋkroi akpei nyɔŋmai abɔ ni yɔɔ jalɛ tsuii, ni miisumɔ ni amɛná Nyɔŋmɔ toiŋjɔlɛ lɛ mli ŋɔɔmɔ, ni amɛkɔ amɛshidaamɔ kɛha jalɛ nifeemɔ. Shweremɔ ni baa oyayaayai ni tamɔ nɛkɛ haa Kristofoi anyɛmifeemɔ lɛ fɛɛ naa miishɛɛ.
18. Kɛji gbɔmɛi bo toi jio, amɛbooo toi jio, mɛni baafee wɔsu?
18 Ani gbɔmɛi hereɔ sane lɛ nɔ oya nakai yɛ he ni oyɔɔ lɛ? Kɛ nakai lɛ, wɔkɛ bo fɛɛ naa miishɛɛ. Shi, yɛ shikpɔŋkukuji komɛi amli lɛ, ebiɔ ŋmɛlɛtswai babaoo kɛ nitsumɔ aahu dani anaa mɔ kome ni yɔɔ wiemɔ lɛ he miishɛɛ. Ani mɛi ni tsuɔ nii yɛ shikpɔŋkukuji nɛɛ amli lɛ gbɔjɔɔ amɛnijiaŋ loo amɛnijiaŋ jeɔ wui? Dabi. Yehowa Odasefoi kaiɔ wiemɔ ni Nyɔŋmɔ kɛ Ezekiel wie beni E-kɛ nitsumɔ wo gbalɔ obalanyo lɛ dɛŋ klɛŋklɛŋ kwraa akɛ eshiɛ eha emaŋbii Yudafoi lɛ: “Ni amɛ lɛ, amɛbo toi jio, amɛbooo toi jio, akɛni weku toigbolɔi ji amɛ hewɔ lɛ, amɛná amɛle kɛ̃ akɛ gbalɔ ko yɛ amɛteŋ.” (Ezekiel 2:5) Tamɔ Ezekiel ji lɛ, amɛbo toi jio, amɛbooo toi jio, wɔyaa nɔ wɔkɛ gbɔmɛi wieɔ Nyɔŋmɔ toiŋjɔlɛ lɛ he. Kɛ amɛbo toi lɛ, wɔnaa miishɛɛ waa. Shi kɛ amɛbooo wɔ toi, ni amɛye wɔhe fɛo, ni amɛwa wɔ yi po lɛ, wɔmiaa wɔhiɛ. Wɔsumɔɔ Yehowa, ni Biblia lɛ kɛɔ akɛ: “Suɔmɔ . . . toɔ etsui shi yɛ nii fɛɛ mli.” (1 Korintobii 13:4, 7) Akɛni wɔshiɛɔ kɛ hiɛmiamɔ hewɔ lɛ, gbɔmɛi le mɛi ni Yehowa Odasefoi ji. Amɛle wɔ shɛɛ sane lɛ. Kɛ́ naagbee lɛ ba lɛ, amɛbaale akɛ Yehowa Odasefoi bɔ mɔdɛŋ akɛ amɛaaye amɛbua amɛ ni amɛna Nyɔŋmɔ toiŋjɔlɛ lɛ mli ŋɔɔmɔ.
19. Akɛ anɔkwa Nyɔŋmɔ lɛ tsuji lɛ, mɛɛ hegbɛ kpele ko wɔbuɔ akɛ ejara wa waa?
19 Ani hegbɛ kpele ko yɛ fe Yehowa ni asɔmɔɔ lɛ? Dabi! Wɔ miishɛɛ kpele fe fɛɛ baa kɛjɛɔ wɔkɛ Nyɔŋmɔ teŋ wekukpaa kɛ le ni wɔle akɛ wɔmiifee esuɔmɔnaa nii lɛ mli. “Ajɔɔ maŋ ni le tɛtrɛmantɛrɛ gbɛɛmɔ lɛ! Yehowa, ohiɛ kpɛmɔ lɛ mli amɛnyiɛɔ.” (Lala 89:16) Eba akɛ wɔɔbu Nyɔŋmɔ toiŋjɔlɛ he bɔfoi ni wɔji kɛha adesai lɛ akɛ hegbɛ ni jara wa waa. Eba akɛ wɔkɛ ekãa aaatsu wɔ gbɛfaŋnɔ yɛ nitsumɔ nɛɛ mli kɛyashi Yehowa baakɛɛ akɛ agbe naa.
Ani Okaiɔ?
◻ Namɛi ji Nyɔŋmɔ toiŋjɔlɛ he bɔfoi ŋmɛnɛ?
◻ Te wɔfeɔ tɛŋŋ wɔleɔ akɛ Babilon Kpeteŋkpele lɛ gbee shi yɛ 1919?
◻ Mɛni titri he hiaa “asafo babaoo” lɛ fe fɛɛ?
◻ Mɛni hewɔ wɔsɛɛ be ehiii kwraa fe bɔ ni mɛi babaoo susuɔ lɛ?
◻ Mɛni hewɔ wɔsɛɛ be baanyɛ afee nɔ ni hi waa kɛha mɛi ni yɔɔ jalɛ tsuii fe bɔ ni amɛsusuɔ lɛ?
[Mfoniri ni yɔɔ baafa 21]
Mɛi pii yɛ ni kɛ́ amɛna bɔ ni adesai ashihilɛ yaa nɔ efiteɔ lɛ, amɛnuɔ he akɛ amanehulu ko kã wɔhiɛ
[Mfoniri ni yɔɔ baafa 23]
Nyɔŋmɔ toiŋjɔlɛ he bɔfoi lɛ ji gbɔmɛi ni yɔɔ miishɛɛ fe fɛɛ yɛ shikpɔŋ nɔ ŋmɛnɛ