Na Hemɔkɛyeli Yɛ Maŋtsɛyeli Lɛ Mli!
“Shi bei lɛ kɛ yinɔi lɛ ahewɔ lɛ, anyɛmimɛi, ehiaaa nyɛ akɛ aŋma anyɛ. Ejaakɛ nyɛ diɛŋtsɛ nyɛle krɛdɛɛ akɛ Nuŋtsɔ lɛ gbi lɛ baaba tamɔ julɔ baa nyɔɔŋ lɛ.”—1 Tes. 5:1, 2.
1, 2. Yehowa etee nɔ ekɛ Yesu Kristo ni atee lɛ shi lɛ etsu mli yɛ mɛɛ gbɛ nɔ?
1 AKƐ “Wiemɔ,” loo Logos Iɛ, wɔ Ŋwɛi Tsɛ lɛ kɛ Yesu Kristo tsu nii babaoo diɛŋtsɛ. (Yoh. 1:1-3; Kol. 1:16) Shi nii ni Yehowa Nyɔŋmɔ kɛ Yesu tsu lɛ tee nɔ yɛ egbele kɛ eshitee lɛ po sɛɛ. Bɔfo Paulo wiemɔi ni kɛ shishinumɔ baa lɛ maa enɛ nɔ mi jogbaŋŋ.
2 Bɔfo lɛ wie yɛ faŋŋ mli akɛ Nyɔŋmɔ eto eyiŋ akɛ ebaabua nibii ni yɔɔ ŋwɛi kɛ shikpɔŋ nɔ lɛ fɛɛ naa ewo eshishi, ni ebaafee enɛ kɛtsɔ Yesu Kristo lá ni efɔse eshwie shi lɛ nɔ. (Kol. 1:19, 20) , Enɛ kɛ PauIo wiemɔ lɛ kpaa gbee akɛ Yehowa eto gbɛjianɔ akɛ ‘ebaabua nibii fɛɛ ni yɔɔ ŋwɛi kɛ shikpɔŋ nɔ lɛ naa ewo Kristo shishi.’ (Efe. 1:10; Filip. 2:9-11) Shi naagbee nibii ni baaba yɛ enɛ gbɛfaŋ lɛ hu baakɔ Nyɔŋmɔ Mesia maŋtsɛyeli lɛ ni aaato ama shi lɛ kɛ “Nuŋtsɔ lɛ [Yehowa] gbi” ni aaaba yɛ naakpɛɛ gbɛ nɔ lɛ he. (1 Tes. 5:1, 2) Ŋmalɛi lɛ haa nii ni Kristo baatsu lɛ mli feɔ faŋŋ kɛjɛ be mli ni ekwɔ kɛtee ŋwɛi fe afii 1,900 ni eho nɛ lɛ. Ebaahi jogbaŋŋ kɛha wɔ kɛji akɛ wɔgbala wɔjwɛŋmɔ kɛba egbɛhe ni tsɔɔ nɔ ko pɔtɛɛ ni eyɔɔ yɛ Yehowa gbɛjianɔtoo lɛ mli lɛ nɔ.
3. Mɛni hewɔ ni Yesu le gbalɛ wiemɔi ni kɔɔ Maŋtsɛyeli nɔyeli lɛ he lɛ?
3 Yɛ enitsumɔ akɛ Logos aloo “Wiemɔ” dani eba shikpɔŋ nɔ lɛ hewɔ lɛ, Yesu le gbalɛ wiemɔi ni awie ni kɔɔ Maŋtsɛyeli nɔyeli lɛ he lɛ jogbaŋŋ. No hewɔ lɛ, akɛ gbɔmɔ lɛ, Yesu fɔ nine etsɛ nikanelɔ lɛ ni ekɛ sɛɛyoomɔ atsu nii beni esusuɔ Daniel wiemɔi ni kɔɔ “naagbee be” lɛ he lɛ. (Dan. 12:4; Mat. 24:15-22) Nyɛhaa wɔgbelea Daniel wolo lɛ mli ni wɔsusu nibii ni ŋwanejee ko kwraa bɛ he akɛ Yesu, akɛ Logos aloo “Wiemɔ” lɛ eyoo lɛ ekomɛi. Ejaakɛ eka shi faŋŋ akɛ lɛ ji Mɔ ni wɔ Ŋwɛi Tsɛ lɛ kɛ lɛ tsu nii ni eha blema bei amli gbalɔi lɛ ŋmala nii taakɛ amɛfee lɛ.
4. Mɛni ji nɔ ni akɛɛ wɔ yɛ Daniel 2:44; 7:13, 14 kɛ 12:1 ni kɔɔ Maŋtsɛyeli nɔyeli he?
4 Yɛ be mli ni wɔkwɛɔ Daniel wolo lɛ mli kɛ shishiumɔ hiŋmɛi lɛ, wiemɔi sɔrɔtoi etɛ gbalaa wɔjwɛŋmɔ titri. Anaa klɛŋklɛŋ nɔ̃ lɛ yɛ Daniel 2:44:
“Ni nɛkɛ maŋtsɛmɛi nɛɛ ayinɔ lɛ, Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.”
Anaa wiemɔ ko ni tamɔ nakai nɔŋŋ yɛ Daniel 7:13, 14 ni kɛɛɔ akɛ:
“Misaa mina yɛ nyɔɔŋ ninaa lɛ mli, ni naa, mɔ ko tamɔ gbɔmɔ bi kɛ ŋwɛi atatui miiba, ni eba mɔ ni eye gbii pii lɛ ŋɔɔ, ni akɛ lɛ ba ehiɛ; ni aha lɛ nɔyeli kɛ anunyam kɛ maŋtsɛyeli, koni majimaji kɛ asafoi kɛ wiemɔi lɛ fɛɛ asɔmɔ lɛ, enɔyeli lɛ naanɔ nɔyeli ni hoŋ eyaŋ ni, ni emaŋtsɛyeli lɛ nɔ ni fiteŋ ni.”
Yɛ naagbee lɛ, nɔ ni Daniel 12:1 yɔɔ kɛɛmɔ nɛ:
“Ni nakai be lɛ mli lɛ Mikael ni ji lumɔ kpeteŋkpele ni damɔ shi kɛha omaŋbii lɛ aaate shi adamɔ shi; shi fimɔ be ko aaaba ni anako nɔ da kɛjɛ beyinɔ ni jeŋ maŋ yɔɔ lɛ kɛyashi nakai be lɛ mli.”
Daniel wieɔ Maŋtsɛyeli nɔyeli lɛ ni ato ama shi lɛ he yɛ Daniel gbalɛi ni yɔɔ kukuji etɛ ni wɔkane nɛɛ amli, ni enɛ bɛ mɔ ko mɔ ko dɛŋ akɛ ja ‘gbɔmɔ bi’ lɛ aloo Mikael. Nɛkɛ wiemɔi nɛɛ fɛɛ kɔɔ Kristo Yesu he yɛ Maŋtsɛyeli hewalɛ mli.—Kpoj. 12:7-10.
5. Ani eji nɔ ni Ŋmalɛ lɛ fiɔ sɛɛ akɛ wɔhiɛ aaahi wɔhe nɔ yɛ be he yɛ be mli ni Maŋtsɛyeli nɔyeli lɛ aaaŋɔ hewalɛ lɛ he?
5 Nyɛbaanyɛ nyɛkadi yɛ Daniel wiemɔi nɛɛ amli akɛ atsi be ko ni ŋwɛi nɔyeli lɛ kɛbaapue ni ebaŋɔ hewalɛ lɛ ta. Kɛji akɛ wɔhiɛ yɛ nakai be lɛ nɔ lɛ, belɛ 1 Tesalonikabii 5:1 kɔɔ wɔhe ŋmɛnɛ yɛ anɔkwale mli, beni ekɛɔ akɛ:
“Shi bei lɛ kɛ yinɔi lɛ ahewɔ lɛ, anyɛmimɛi, ehiaaa nyɛ akɛ aŋma nyɛ.”
Kɛji akɛ wɔnuɔ Nyɔŋmɔ Wiemɔ lɛ shishi diɛŋtsɛ yɛ anɔkwale mli lɛ, titri lɛ yɛ be mli ni wɔboteɔ “naagbee be” lɛ mli vii lɛ, belɛ nɔ ko nɔ ko baŋ wɔnɔ trukaa. Wɔbaafee gbɔmɛi ni yɔɔ sɛɛyoomɔ ni le nibii ni kɔɔ “nibii agbɛjianɔtoo lɛ naagbee” be lɛ he. (Mat. 24:3, NW) Belɛ nyɛhaa wɔtaoa nɔ hewɔ ni Daniel wie wiemɔi sɔrɔtoi etɛ ni kɔɔ Maŋtsɛyeli nɔyeli ni ato ama shi lɛ he lɛ.
DANIEL KƆKƆBƆƆ WIEMƆ
6. Mɛni awie yɛ maŋtsɛyeli ni ji ejwɛ lɛ he yɛ Daniel 2:40?
6 Wɔteŋ mɛi pii le lamɔ mli amaga ni atsɔɔ mli yɛ Daniel yitso enyɔ lɛ ni wɔle akɛ, yɛ Yehowa mumɔ krɔŋkrɔŋ lɛ yelikɛbuamɔ naa lɛ, gbalɔ Daniel kɛɛ Maŋtsɛ Nebukadnezar nɔ ni nɛkɛ amaga nɛɛ damɔ shi kɛha. Edamɔ shi kɛha je lɛŋ maŋtsɛyelii ni eye nɔ kɛtsara nɔ ni je shishi kɛjɛ Babilon nɔ. Wɔyɛ miishɛɛ titri yɛ “maŋtsɛyeli ni ji ejwɛ” lɛ he, ejaakɛ lɛ ehe Daniel kɛɛ akɛ:
“Ni maŋtsɛyeli ni ji ejwɛ lɛ he aaawa tamɔ dade, ni taakɛ bɔ ni dade jwaraa ni egbɛlɛɔ nibii fɛɛ lɛ, nakai nɔŋŋ eeejwara ni eeefufulu enɛɛmɛi fɛɛ, tamɔ dade fufuluɔ nii.”—Dan. 2:40.
7. Mɛni ji nɛkɛ “maŋtsɛyeli ni ji ejwɛ” nɛɛ?
7 Mɛɛ maŋtsɛyeli nɔ ni tamɔ dade nɛɛ batsɔ? Yɛ Biblia yinɔsane mli lɛ, “maŋtsɛyeli ni ji ejwɛ” aloo jeŋ hewalɛ, kɛ akane kɛjɛ Babilon nɔ lɛ ji, Roma Maŋtsɛyeli lɛ, ni nɔ ni fo teŋ ji Media kɛ Persia kɛ Hela. Beni be shwieɔ mli lɛ, ajara Roma Maŋtsɛyeli lɛ mli afee lɛ bokagbɛ maŋtsɛyeli kɛ anaigbɛ amaŋtsɛyeli koni anyɛ aye nɔ jogbaŋŋ. Ni nɛkɛ anaigbɛ maŋtsɛyeli nɛɛ mli Ŋleshi Maŋtsɛyeli lɛ kwɛ̃ kɛjɛ. Yɛ nɔyeli mli atuatsemɔ ni ba Amerika shihemɔ maji lɛ amli hewɔ lɛ, ato United States, Amerika ama shi. Yɛ shishijee yiŋtooi komɛi ahewɔ lɛ, nɛkɛ maji enyɔ nɛɛ bana akɛ ehi jogbaŋŋ akɛ amɛaafee ekome yɛ tawuu kɛ agbɛnɛ yɛ nibii krokomɛi amli bɔni afee ni amɛkɛto Ŋleshi kɛ Amerika Jeŋ Hewalɛ lɛ amɛma shi.
8, 9. Mɛni yɔɔ Daniel 2:40 kɛ Daniel 7:7 ni je amɛhe?
8 Shi kɛlɛ, yɛ nakai “maŋtsɛyeli ni ji ejwɛ” lɛ he lɛ—yɛ bɔ ni eji kɛjɛ shishijee akɛ Roma Maŋtsɛyeli hewɔ lɛ—Daniel kɛɔ wɔ nɔ kɔ yɛ egbalɛi krokomɛi lɛ amli:
“Enɛ sɛɛ lɛ mihiɛ kwɛmɔ yɛ nyɔɔŋ ninaai lɛ amli, ni naa koŋloo ni ji ejwɛ lɛ, ehe yɛ gbeyei kɛ naakpɛɛ, ni ehe wa naakpa, ni eyɛ dade nyanyɔji kpelei, eye nii, ni ekumɔ mli dukuduku, ni nii ni shwɛ lɛ ekɛ enaji naanaa no; ni esoro lɛ, ni esoro kooloi krokomɛi ni tsɔ ehiɛ ba lɛ, ni eyɛ akoloŋtoi nyɔŋma.”—Dan. 7:7.
9 Yɛ Daniel yitso kpawo lɛ mlitaomɔ mli lɛ, abaanyɛ ana akɛ gbalɔ lɛ miitsɔɔ nakai maŋtsɛyelii ejwɛ loo jeŋ hewalɛi ejwɛ lɛ nɔŋŋ mli taakɛ atsɔɔ mli yɛ yitso enyɔ lɛ. Shi ni eeetsɔɔ nɛkɛ hewalɛi nɛɛ amli akɛ amɛji amaga ko fã, ni jeɔ shishi kɛjɛɔ shika yitso lɛ nɔ lɛ, etsɔɔ akɛ amɛtamɔ kooloi. Yɛ yitso kpawo lɛ mli lɛ, eje shishi kɛ jata (Babilon) ni ekɛ koŋloo ni he wa naakpa ni ji ejwɛ ni hiɛ dade nyanyɔji lɛ yagbe naa. Ákɛ Daniel 7:7 lɛ kɛ Daniel 2:40 lɛ kpaa aloo amɛyaa pɛpɛɛpɛ lɛ jeee nɔ ko ni ba trukaa. Akɛ nikuumɔ kɛ jwaramɔ kɛ hewalɛ ni tamɔ dade ni yɔɔ gbeyei toɔ Roma maŋtsɛyeli nɛɛ he yɛ gbɛ ni mli ka shi faŋŋ nɔ. Esanebimɔ lɛ yɛ lolo akɛ: Te nɛkɛ “maŋtsɛyeli ni ji ejwɛ” nɛɛ feɔ tɛŋŋ ebadamɔɔ shi kɛhaa jeŋ hewalɛi enyɔ lɛ?
10. Nɛgbɛ ‘akloŋto bibioo’ lɛ jɛ?
10 Nyɛhaa wɔyaa nɔ wɔkanea, yɛ Daniel 7:8:
“Mihiɛ akoloŋtoi lɛ akwɛmɔ, ni naa, akoloŋto kroko ni ji bibioo baje kpo yɛ amɛteŋ, ni klɛŋklɛŋ akoloŋtoi lɛ ateŋ etɛ famɔ yɛ ehiɛ, ni naa, nɛkɛ akoloŋto nɛɛ hiŋmɛii yɛ he tamɔ gbɔmɔ hiŋmɛii kɛ naabu ni wieɔ nibii wuji.”
Kwɛ miishɛɛ ni enɛ ji! Nɛkɛ maŋtsɛyeli ni ji ejwɛ, Roma Jeŋ Hewalɛ nɛɛ je shishi ekwɛ̃ akoloŋto kroko kɛjɛ okadi kooloi ayitso lɛ he. Kɛkɛ ni etamɔ akoloŋtoi ni yɔɔ jɛmɛ momo lɛ mli etɛ koni enɛ akwɛ̃ kɛjɛ mli. Mɛni ji nɔ ni enɛɛmɛi fɛɛ tsɔɔ? Nyɛhaa wɔkwɛa yinɔsane mli anɔkwalei lɛ.
YINƆSANE MA DANIEL KƆKƆBƆƆ LƐ NƆ MI
11. Mɛni hewɔ eji nɔ ko ni yɔɔ miishɛɛ babaoo akɛ wɔɔkadi bɔ ni Roma Maŋtsɛyeli lɛ ha nibii ni Daniel tsɔɔ mli lɛ ba mli lɛ?
11 Yɛ anɔkwale mli lɛ, ‘ehe ehiaaa ni aŋma wɔ nɔ ko afata he,’ ejaakɛ aŋma fɛɛ momo yɛ Nyɔŋmɔ Wiemɔ ni jɛ mumɔ mli lɛ mli afɔ shi. Nɔ ni fata he lɛ, kɛji akɛ wɔyɛ mumɔŋ niiashikpamɔ yɛ anɔkwale mli lɛ, nibii ni baa yɛ jeŋ muu fɛɛ lɛ baninaŋ wɔ trukaa tamɔ julɔ baninaa mɔ ko ni hiɛ kaaa ehe nɔ lɛ. Shi ehe miihia ni ajɛ Ŋmalɛi lɛ amli abɔ wɔ amaniɛ jogbaŋŋ, ni eyɛ miishɛɛ akɛ wɔɔle bɔ ni Roma Maŋtsɛyeli lɛ ha nibii ni atsɔɔ mli yɛ Daniel gbalɛ ninaa lɛ mli lɛ fɛɛ ba mli anɔkwale lɛ.
12. Roma nɔyeli na Ŋleshi Ablotsiri nɔ hewalɛ kɛyashɛ nɛgbɛ?
12 Roma bafee tawuu mli hewalɛ kɛjɛ shishijee, ni elɛɛ enɔyeli lɛ mli kɛtee shɔŋŋ. Ŋleshi loo Britania ni yɛ nakai he lɛ mli lɛ eyɔɔ wekui loo akutsei anɔyeli shishi lɛ bafee Roma Maŋtsɛyeli lɛ fa, ni anaa nɛkɛ nɔyeli nɛɛ he okadii yɛ Ŋleshi Ablotsiri loo Britania fɛɛ. Nɔ ni fata enɛɛmɛi ahe ji gbogbo ni Maŋtsɛ Hadrian tswa kɛfo Ŋleshi Ablotsiri kooyigbɛ lɛ mli lɛ.
13, 14. (a) Klɛŋklɛŋ lɛ, te Roma hewalɛ lɛ yɔɔ tɛŋŋ? (b) Shi mɛni jɛ mli ba yɛ afii ohai etɛ kɛ ejwɛ lɛ mli?
13 Beni Roma bahe gbɛi ni agbɛnɛ etee nɔ efite yɛ jeŋba mli akɛni enɔyelɔi lɛ bɔɔ ahoshwi babaoo hewɔ lɛ, etawuu mli hewalɛ lɛ naa ba shi. Beni shɛɔ Nero kɛ esɛɛyelɔi maŋtsɛmɛi lɛ abe mli lɛ, no mli lɛ Roma tawuu mli hewalɛ lɛ eba shi ni anaa faŋŋ. Shi mɛi ni sumɔɔ ni nɛkɛ maŋtsɛyeli nɛɛ aya nɔ ashwere lɛ tsɔ ŋaa ko bɔni afee ni amɛba ehe shi akɛ mɔ ni he hiaa yɛ jeŋ saji amli afii ohai babaoo ni baaba lɛ amli, eyɛ mli akɛ ejeee tawuu mli hewalɛ dɔŋŋ. Mɛɛ gbɛ nɔ atsɔ afee enɛ?
14 Beni oboteɔ afii ohai etɛ kɛ ejwɛ Ŋ.B. lɛ mli lɛ, ebafee tamɔ nɔ ni Roma ebatsɔ jamɔŋ kɛ maŋkwramɔŋ hewalɛ kɛfata tawuu mli hewalɔ ni eji lɛ he. Amɛtsɔ ŋaa gbɛ nɔ amɛto gbɛjianɔ koni Pope lɛ hewalɛ ni eyɔɔ yɛ Roma lɛ ashɛ shɔŋŋ ni eye shikpɔŋ ni ayɔɔ nɔ ni ale yɛ nakai be lɛ mli lɛ babaoo nɔ. Abale nɛkɛ gbɛjianɔtoo nɛɛ akɛ nuŋtsɔmɛi kɛ amɛtsuji agbɛjianɔtoo, ni Roma Maŋtsɛyeli Krɔŋkrɔŋ lɛ kɛ Roma ni Pope lɛ yeɔ nɔ lɛ ye bua titri ni gbɛjianɔtoo nɛɛ shwere. Ni ajɛ biɛ aye jeŋ saji anɔ aahu kɛ hoo kwraa lɛ afii 1,000.
15. Te fee tɛŋŋ ni pope lɛ nɔyeli tee nɔ eye gbɔmɛi lɛ anɔ afii ohai babaoo lɛ?
15 Gbɔmɛi lɛ ateŋ mɛi ni fa hiɔ shi akɛ kosɛɛbii yɛ ohia kpotoo mli ni leee woloŋ yɛ nuŋtsɔmɛi kɛ amɛtsuji agbɛjianɔtoo nɛɛ shishi. Amɛjɛɔ niyenii fioo ni amɛnaa lɛ mli amɛkɛyeɔ amɛbuaa amɛ nuŋtsɔmɛi hejɔ̃lɔi ni nuuu nii ahe haaa mɔ ni yɔɔ amɛshiai kɛ mɔji wuji lɛ amli yɛ Europa fɛɛ ni Ŋleshi Ablotsiri hu fata he lɛ. Yɛ enɛ sɛɛ lɛ, nɛkɛ nuŋtsɔmɛi nɛɛ hu tsuɔ onia aloo too amɛhaa maŋtsɛ lɛ ni eshikpɔŋ nɔ amɛyɔɔ lɛ. Kɛkɛ lɛ nɛkɛ maŋtsɛmɛi nɛɛ hu, kɛ́ amɛyɛ Ŋleshi Ablotsiri, loo Europa maji lɛ ekomɛi amli amɛyɔɔ jio, akɛni amɛtamɔ maŋtsɛmɛi ni tsuɔ onia amɛhaa maŋtsɛ kroko hewɔ lɛ, abiɔ ni amɛwo nɛkɛ nuŋtsɔmɛi kɛ tsuji atoo loo onia lɛ amɛha Roma pope lɛ nɔyeli lɛ. No hewɔ lɛ pope lɛ nɔyeli lɛ baná shika babaoo kɛ hegbɛ hu babaoo yɛ be kakadaŋŋ ni afɔɔ lɛ tsɛmɔ akɛ Duŋ Be lɛ mli.
16. (a) Te Daniel etsɔɔ Roma Maŋtsɛyeli Krɔŋkrɔŋ lɛ mli jogbaŋŋ eha tɛŋŋ? (b) Mɛni ana ni eekwɛ̃ kɛmiijɛ Roma “koŋloo ni ji ejwɛ” lɛ yitso he?
16 Kwɛ bɔ ni Daniel gbalɛ mlitsɔɔmɔ ni kɔɔ maŋtsɛyeli ni “amaga kpeteŋkpele” lɛ dade naji lɛ damɔ shi kɛha lɛ lɛ sa jogbaŋŋ ha yɛ yinɔsane ni eho lɛ mli! (Dan. 2:31) Ni kwɛ bɔ ni koŋloo ni he yɔɔ gbeyei ni yɔɔ dade nyanyɔji lɛ kuumɔ jwaramɔ kɛ gblɛmɔ ni afee ehe mfoniri yɛ Daniel yitso kpawo lɛ sa lɛ jogbaŋŋ hu ha! Klɛŋklɛŋ lɛ efa kɛtsɔ Europa fɛɛ, ni ekɛ etawuu mli hewalɛ lɛ ba nɔ fɛɛ nɔ ni yɔɔ egbɛ nɔ lɛ shi. Kɛkɛ ni agbɛnɛ etsɔ maŋkwramɔ, jamɔ kɛ jarayeli mli lakamɔ kɛ ŋaalee nɔ enyɛ mɛi anɔ ni emɔ hewalɛ ni ena yɛ amɛnɔ lɛ mli. Shi nɔ ni kwɛ̃ loo efa kpo nɛɛ hu nɛkɛ akoloŋto bibioo ni ana ni ekwɛ̃ kɛjɛ “koŋloo ni ji ejwɛ” lɛ ni Roma damɔ shi kɛha lɛ lɛ yitso ni yɔɔ gbeyei lɛ mli lɛ hu? Mɛɛ be enɛ baa mli?
‘AKOLOŊTO BIBIOO’ LƐ PUE
17. Te ‘akoloŋto bibioo’ lɛ kwɛ̃ɛ lo epuemɔ lɛ je shishi eha tɛŋŋ?
17 Kɛbashi afi 1533 Ŋ.B. lɛ, no mli lɛ Ŋleshi maŋtsɛyeli lɛ tsuɔ too loo onia ehaa maŋ kroko. Ehɔ Pope lɛ nɔyeli shishi. Shi yɛ afi ni nyiɛ sɛɛ lɛ mli lɛ, Maŋtsɛ Henry VIII bafee Katolek Sɔlemɔ ni yɔɔ Ŋleshi Ablotsiri lɛ yitso. Efo tsakpaa ni ka ekɛ Roma teŋ lɛ mli. Agbɛnɛ abɔi Ŋleshi Ablotsiri jwetri ni tsutsu lɛ Roma Katolek Sɔlemɔ lɛ looɔ kɛyaa lɛ anaabuamɔ yɛ Ŋleshi maŋtsɛ lɛ ni agbɛnɛ ebatsɔ Ŋleshi Katolek Sɔlemɔ lɛ yitso lɛ nɔ yeli shishi. (Katolek Sɔlemɔ lɛ ni yɔɔ Ŋleshi Ablotsiri lɛ ehiɛ Roma Katolek Sɔlemɔ lɛ gbɛjianɔtoo lɛ nɔŋŋ mli yɛ gbɛ babaoo nɔ kɛbashi ŋmɛnɛ.) Roma Maŋtsɛyeli Krɔŋkrɔŋ lɛ hewalɛ lɛ nɔ miigbɔ agbɛnɛ, shi ‘akoloŋto bibioo’ ko eje shishi eekwɛ̃ kɛmiijɛ mli.
18. Mɛɛ gbɛhe mli Britania yɔɔ yɛ Maŋnyɛ Elizabeth I be lɛ mli, mɛni ji nɔ ni enɛ tsɔɔ kɛha France, Netherlands kɛ Spania?
18 Afii nyɔŋmai abɔ ko ho, ni Britania loo Ŋleshi Ablotsiri bana ehe yɛ Maŋnyɛ Elizabeth I nɔyeli shishi. Beni shɛɔ nɛkɛ be mli lɛ, no mli lɛ jwetri ni abua naa kɛtsɔ nuŋtsɔmɛi kɛ tsuji agbɛjianɔtoo lɛ nɔ lɛ shishi yɛ Ŋleshi Ablotsiri lɛ mli sɛɛnamɔi miije kpo. Anyɛ abua ta-lɛji saŋŋ naa. Etsɛɛɛ ni yɛ gbɔmɛi ni bahe gbɛi tamɔ Drake, Raleigh kɛ Hawkins agbɛtsɔɔmɔ shishi lɛ, Ŋleshi Ablotsiri ta-lɛji lɛ kɛ ŋshɔ hiɛ hewalɛi tamɔ Spania, Netherlands kɛ France (ni fɛɛ hɔ Roma jamɔ shishi lolo lɛ) bɔi tawuu, ni amɛye amɛfɛɛ nɔ kunim, ni Spaniabii ata-lɛji babaoo ni he yɔɔ gbeyei lɛ hu fata he. Nɔ ni jɛ mli ba ji akɛ, Ŋleshi Ablotsiri batsɔ maŋtsɛ yɛ ŋshɔ hiɛ aloo ebaye ŋshɔ nɔ kunim ni eshwãa yɛ enɛ he.
19. Kɛ akɛ Daniel yitso enyɔ kɛ yitso kpawo lɛ to he lɛ, mɛni mlibaa ni yɔɔ nyam wɔnaa agbɛnɛ?
19 Mɛni Daniel 7:8 keɔ? Hɛɛ, “akoloŋtoi” etɛ baafamɔ kɛjɛ nɔ ni kwɛ̃ɔ ni ji ‘akoloŋto bibioo’ nɛɛ hiɛ, ni ebaawie “nibii wuji.” No hewɔ lɛ, beni Ŋleshi Jeŋ Hewalɛ lɛ pue ni yɛ sɛɛ mli lɛ Amerika bafata ehe pɛ ni nɛkɛ gbalɛ nɛɛ bana emlibaa kwraa. Ŋleshi kɛ Amerika Jeŋ Hewalɛ lɛ kwɛ̃ kɛjɛ Roma Maŋtsɛyeli lɛ mli. Eji Roma “bi,” no hewɔ lɛ awie ehe yɛ gbalɛ mli akɛ ekwɛ̃ kɛjɛ Roma, ni ji “koŋloo ni ji ejwɛ” ni onyanyɔji tamɔ dade lɛ “ yitso” lɛ mli. Kɛji akɛ wɔkɛ Daniel yitso enyɔ kɛ kpawo lɛ to he lɛ ewaaa akɛ wɔɔna bɔ ni ‘dade naji’ lɛ damɔ shi kɛha jeŋ hewalɛi enyɔ ni tsara nɔ kɛba shi jeee ekome pɛ lɛ.—Dan. 2:32, 33.
NƐGBƐ WƆSHƐ YƐ BE NAA
20. Mɛɛ gbɛ nɔ wɔɔtsɔ wɔtao bɔ ni fee ni dade naji lɛ ba aahu kɛbashi wɔ afii ohai 20 nɛɛ mli lɛ mli?
20 Taakɛ Daniel 2:41-43 tsɔɔ lɛ, wɔnaa faŋŋ akɛ je lɛŋ maŋtsɛyelii ni ale amɛ jogbaŋŋ baaho aya. Ani ‘dade naji’ enyɔ lɛ fɛɛ eko damɔ shi kɛha jeŋ hewalɛi sɔrɔtoi enyɔ? Dabi, jeee nakai, ni nakai nɔŋŋ hu ‘jwiɛtɛi niji enyɔ’ ni yɔɔ amaga lɛ ŋwɛigbɛ lɛ hu damɔɔɔ shi kɛhaaa jeŋ hewalɛi enyɔ yɛ be mli ni Media kɛ Persia hé gbɛi lɛ. Nakai naji enyɔ lɛ kɛ waabii lɛ mli dade lɛ fɛɛ kwɛ̃ kɛjɛ Roma Maŋtsɛyeli lɛ mli, titri lɛ kɛjɛ afii ohai ejwɛ lɛ mli, he mli ni Konstantino shi emaŋtiase Roma ni yɔɔ anaigbɛ lɛ eyato bokagbɛ maŋtiase Konstantinopol lɛ. Nɛkɛ maŋtsɛyeli ni mli egbala nɛɛ mli jeŋmaji sɔrɔtoi ni kɛ amɛhe fɔɔ maji krokomɛi anɔ lɛ fa kpo kɛjɛ, ni Ŋleshi kɛ Amerika Jeŋ Hewalɛ lɛ hu baná hewalɛ fe amɛfɛɛ yɛ naagbee. Nakai “naji” enyɔ lɛ batsɔ tamɔ “dade” lɛlɛŋ yɛ wɔ afii oha nɛɛ mli jeŋ tai enyɔ lɛ mli yɛ be mli ni Ŋleshi kɛ Amerika Jeŋ Hewalɛ lɛ tawuu mli hewalɛ kumɔ asraafoi ni teɔ shi woɔ amɛ lɛ ni agbɛnɛ amɛkɛ nuklea tawuu nii tsu nii klɛŋklɛŋ yɛ ta lɛ mli lɛ.
21. Mɛɛ gbɔjɔmɔi yɛ naagbee lɛ ebapue yɛ amaga lɛ naagbee fã kwraa lɛ he?
21 Agbɛnɛ wɔmiiba amaga kpeteŋkpele nɛɛ naagbee kwraa lɛ. Edamɔ shi kɛha Ŋleshi kɛ Amerika Jeŋ Hewalɛ lɛ. Shi agbɛnɛ eyɛ gbɔjɔmɔ ko. Enaji kɛ ewaabii lɛ elaaje dade hewalɛ ni enaji lɛ yɔɔ lɛ. Ejaakɛ enaji lɛ “fã dade ni fã hu sũ.” Daniel tsɔɔ enɛ shishi akɛ:
“Ni bɔ ni ona dade ni sũ ni ekpɔtɔ futu mli lɛ, nakai amɛkɛ gbɔmɛi eseshibii aaafutu amɛmli moŋ, shi amɛkpɛtɛŋ, taakɛ bɔ ni dade kɛ sũ futuuu lɛ.”—Dan. 2:33, 43.
22. (a) Mɛni hewɔ ni kwasafoŋ kɛ kwaamaŋ loo Komunist nɔyelɔi lɛ ahe baaa sane lɛ mli yɛ biɛ lɛ? (b) Belɛ namɛi ji “gbɔmɛi aseshibii”? (d) Mɛni eba “dade” lɛ kɛ “sũ” lɛ nɔ?
22 Ani enɛ tsɔɔ akɛ ŋmɛnɛŋmɛnɛ beaŋ kwasafo kɛ kwaamaŋ loo kɔmunist nɔyelɔi lɛ batsɔɔ jeŋ hewalɛ? Dabi, ejaakɛ Biblia gbalɛ tsɔɔ akɛ nakai maŋkwramɔŋ gbɛjianɔtooi ni amɛhe gbɛi nɛɛ eteŋ shi ni amɛbatsɔmɔ jeŋ hewalɛi. Amaga ni he yɔɔ gbeyei lɛ naagbee fa ni baa naagbee yɛ be naa lɛ kã he eji nɔ ni akɛ dade titri fee. Ekã he eji jeŋ hewalɛ ni fa kpo kɛjɛ Roma Maŋtsɛyeli Krɔŋkrɔŋ lɛ mli. Shi nɛkɛ hewalɛ ni tamɔ dade nɛɛ gbɔjɔɔ yɛ be lɛ naagbee kɛtsɔ nɔ ko ni tamɔ su ni akpɔtɔ ni waaa lɛ nɔ—gbɛjianɔtoo ni miiba ni gbɔmɛi lɛ aná babaoo kɛɛmɔ yɛ saji amli tamɔ kɛtsɔ nitsumɔŋ ekomefeemɔ gbɛjianɔtooi, shitee-kɛwoo nitsumɔi kɛ nɔ ni tamɔ nakai lɛ anɔ. “Gbɔmɛi aseshibii,” gbɔmɔ folo ni nyiɛ ni abuuu lɛ lɛ bɔɔ mɔdɛŋ ni “anu egbee” yɛ bɔ ni atsuɔ nibii ahe nii ahaa lɛ mli. Wɔnaa enɛ ŋmɛnɛ, jeee yɛ anaigbɛ Europa maji lɛ ni tsutsu lɛ amɛfata Roma Maŋtsɛyeli Krɔŋkrɔŋ lɛ he lɛ pɛ mli, shi moŋ titri lɛ yɛ Ŋleshi kɛ Amerika Jeŋ Hewalɛ lɛ nɔyelihei lɛ amli. Biɛ ji heni nitsumɔi ni ajeɔ gbɛ atsuɔ lɛ shɔ̃ɔ, nitsulɔi ni kɛ mlifu kpaa nitsumɔ kɛ basabasafeemɔ egbɔjɔ nɔyeli hewalɛ lɛ ni be ko lɛ etamɔ “dade” lɛ. Yɛ be mli ni nitsulɔi wuɔ shiɔ nitsumɔtsɛmɛi lɛ, belɛ “gbɔmɛi aseshibii” lɛ miibɔ mɔdɛŋ ni amɛtsɔɔ bɔ ni amɛbaatsu nii ni amɛhi shi amɛha. Ani enɛ kɛ toiŋjɔlɛ shihilɛ eba nitsulɔ lɛ kɛ nɔyeli lɛ teŋ? Nyɔŋmɔ Wiemɔ lɛ kɛɔ yɛ faŋŋ mli akɛ: “Amɛkpɛtɛŋ.”
23. (a) Akɛ wɔshɛ amaga lɛ “waabii” anaa agbɛnɛ lɛ tsɔɔ mɛni? (b) Mɛni esa akɛ wɔkpa gbɛ agbɛnɛ? (d) Esa akɛ enɛ atsirɛ wɔ ni wɔfee mɛni yɛ “naagbee be” nɛɛ mli?
23 Belɛ nɛgbɛ wɔyɔɔ yɛ be naa? Beni kuku 43 lɛ baa naagbee lɛ, no mli lɛ “amaga” ko bɛ dɔŋŋ. Wɔba aahu kɛbashɛ “ewaabii” lɛ anɔ! Be ni nɔyelii ni adesa to lɛ shɛɔ amɛnaagbee ni yɔɔ awerɛho lɛ mli wɔyɔɔ nɛɛ. Bei lɛ anaagbee enina wɔ! Daniel ekɛɛ wɔ nɔ ni esa akɛ wɔkpa gbɛ. Hɛɛ, Kristo maŋtsɛyeli lɛ ni baaye gbɔmɛi fɛɛ nɔ lɛ, “tɛ” ni tse kɛjɛ Yehowa jeŋ muu fɛɛ maŋtsɛyeli “gɔŋ” lɛ nɔ lɛ miihe abatswa amaga kpeteŋkpele lɛ nane lɛ, ni ekumɔ lɛ ni ekpata adesa yiwalɛ nɔyeli gbɛjianɔtoo lɛ fɛɛ hiɛ. Enɛ baakadi “fimɔ be ko [ni] aaaba ni anako nɔ da kɛjɛ beyinɔ ni jeŋmaŋ yɔɔ lɛ kɛyashi nakai be lɛ mli” lɛ. Shi nɔ ni baanyiɛ sɛɛ aba oya ji adesa yinɔsane be ni yɔɔ naakpɛɛ fe fɛɛ, Kristo afii 1,000 nɔyeli lɛ. Ani anɔkwa Kristofonyo baanyɛ ata shi shikpilikpii ni ekwɛ nibii ni yaa nɔ yɛ “naagbee be” nɛɛ mli lɛ kɛkɛ ni nɔ ko tsirɛɛɛ lɛ ni efi Maŋtsɛyeli nɔyeli lɛ sɛɛ? Be ni wɔkɛaaatsɔɔ mɔ masɛi ni wɔyɔɔ lɛ nɛ, Yehowa masɛi, aloo Satan masɛi!—Dan. 2:44, 45; 7:14; 12:1, 4.
24. Mɛɛ gbɔmɛi sɔrɔto nɛkɛ wɔbaaya nɔ wɔfee, ni mɛni hewɔ?
24 Taakɛ 1 Tesalonikabii 5:1 tsɔɔ lɛ, ehe ehiaaa ni aŋma wɔ nɔ ko yɛ be lɛ kɛ yinɔi lɛ ahe! Fɛɛ yɛ Nyɔŋmɔ Wiemɔ lɛ mli. Nɔ ni sa feemɔ pɛ ji ‘wɔtsa wɔshwie shi.’ No hewɔ lɛ nyɛhaa wɔfea tamɔ bɔ ni Hebribii 10:35-39 woɔ wɔ ŋaa lɛ: “No hewɔ lɛ nyɛkashɛa nyɛmli ekaa lɛ nyɛfɔa, ejaakɛ eyɛ nyɔmɔwoo kpeteŋkpele. Ejaakɛ tsuishitoo ehia nyɛ, koni, beni nyɛfee Nyɔŋmɔ suɔmɔnaa nii lɛ, nyɛnine ashɛ shiwoo lɛ nɔ. Ejaakɛ ‘fioo kɛkɛ eshwɛ ni mɔ ni baa lɛ aaaba, ni etsɛŋ kwraa; shi jalɔ ni jɛ hemɔkɛyeli mli lɛ yi aaana wala; ni kɛ ekpa yɛ misɛɛ lɛ, misusuma naŋ ehe tsuijurɔ.’ Shi wɔ lɛ, jeee mɛi ni kpaleɔ kɛyaa hiɛkpatamɔ mli lɛ ateŋ mɛi komɛi ji wɔ, shi moŋ wɔji mɛi ni kɛ hemɔkɛyeli naa amɛsusuma yiwalaheremɔ lɛ ateŋ mɛi komɛi.” Nyɛhaa wɔnaa hemɔkɛyeli ni hiɔ shi daa, ni kanyaa mɔ yɛ Maŋtsɛyeli lɛ mli!a
[Shishigbɛ niŋmai]
a Ajie Kɛjɛ May 15, 1981 Blɔfo Buu-Mɔɔ lɛ mli
[Wiemɔ ni akɔ ni akɛmiitsu nii ni yɔɔ baafa 15]
“Je nɛŋ maŋtsɛyeli lɛ etsɔ wɔ Nuŋtsɔ Iɛ kɛ e-Kristo (mɔ ni efɔlɛ mu lɛ) nɔ, ni eeeye maŋtsɛ kɛaatee naanɔi anaanɔ.”—Kpoj. 11:15.