Nikasemɔi ni jɛ Ŋmalɛi lɛ Amli: Mika 1:​1–7:⁠20

Awo Yehowa Jalɛsaneyeli Kɛ Egbɛi Nɔ

GBALƆ Mika hi shi yɛ afii ohai kpaanyɔ D.Ŋ.B. lɛ mli, eji wɔŋjamɔ kɛ jalɛsane ni ayeee be yɛ Israel kɛ Yuda. Bɔ ni shihilɛ lɛ yɔɔ yɛ nakai be lɛ mli lɛ tamɔ wɔ nɔ ni yɔɔ ŋmɛnɛŋmɛnɛ lɛ nɔŋŋ akɛ ehaa Mika shɛɛ saji lɛ kɛ kɔkɔbɔi lɛ feɔ nɔ ni sa wɔbe nɛɛ. Ni saji kpakpai ni ewie he lɛ hu kɛ hiɛnɔkamɔ diɛŋtsɛ haa wɔ yɛ jeŋ ni Satan yeɔ nɔ nɛɛ mli.​—1 Yohane 5:⁠19.

Anyɛɔ amuɔ Mika shɛɛ sane lɛ naa awoɔ wiemɔi etɛ ni nyiɛ sɛɛ nɛɛ amli: “Kpoo ha mɛi ni . . . toɔ nifɔji ahe ŋaai.” “Nɔ ni Yehowa biɔ yɛ odɛŋ . . . ji akɛ ofee nɔ ni ja gbɛ, ni osumɔ ejurɔfeemɔ, ni okɛ o-Nyɔŋmɔ lɛ anyiɛ yɛ heshibaa mli.” “Shi wɔ lɛ, wɔɔnyiɛ yɛ Yehowa, wɔ-Nyɔŋmɔ lɛ gbɛi amli kɛaatee naanɔi anaanɔ.”​—Mika 2:1: 6:8; 4:⁠5.

Awie Ashi Amaga Jamɔ

Yehowa etooo etsui shi yɛ efɔŋfeelɔi ahe kɛyaaa naanɔ. Amaga jamɔ kɛ atuatsemɔ efa yɛ Israel kɛ Yuda. No hewɔ lɛ, Yehowa tsɔ odasefonyo eshi amɛ. Abaakumɔ amɛ amagai lɛ dukuduku. Wɔŋjalɔi lɛ ‘ayiteŋ baafee kpataa tamɔ akpaŋa nɔ’ ni abaatswa amɛnane shi tu kɛya nom mli.​—1:​1-16.

Yehowa tsɔ hiɛnɔkamɔ Nyɔŋmɔ kɛha anɔkwafoi lɛ. Awie ashi mɛi ni tsɔɔ ŋaa fɔŋ lɛ akɛ amɛtamɔ julɔi kɛ ojotswalɔi Oshara baaba amɛnɔ. Ni kɛlɛ awo sɛɛkuu kɛ saamɔ he shi aha “lsrael mɛi ni eshwɛ lɛ.” “Maŋɔ amɛ mato he kome tamɔ tooi ni yɔɔ tsu mli, loo tamɔ tookuu ni yɔɔ amɛlɛɛ he lɛ teŋ,” Yehowa kɛɛ.​—2:​1-13.

Yehowa miikpa gbɛ akɛ mɛi ni gbɛnaa nii jwere amɛnɔ yɛ ewebii ateŋ Iɛ aaatsu jalɛsaneyeli he nii. Akɛɛ Israel hiɛnyiɛlɔi ni jɛɔ mɛi lɛ akɛ: “Ani jeee nyɛgbɛnaa ji akɛ nyɛaale nɔ ni ja? Nyɛnyɛɔ ekpakpa, ni nyɛsumɔɔ efɔŋ, nyɛjieɔ amɛhe wolo kɛjɛɔ amɛhe kɛ amɛheloo hu kɛjɛɔ amɛwui ahe.” Akɛni Mika “eyi obɔ kɛ hewalɛ kɛ Yehowa mumɔ lɛ kɛ kojomɔ kɛ ekaa sɔŋŋ” hewɔ lɛ, etee nɔ ejaje Nyɔŋmɔ fɔbuu kojomɔi eshi amɛ. Ekɛɛ akɛ hiɛnyiɛlɔi ni amɛjaaa lɛ heɔ nyɔɔŋ nii ni amɛkojoɔ, emli osɔfoi lɛ hu nyɔmɔwoo hewɔ amɛtsuɔ nii, ni emli gbalɔi lɛ hu gbaa amɛheɔ shika. No hewɔ lɛ Yerusalem “aaatsɔ koikoi.”​—3:​1-12.

Shɛɛ Sane ni Hiɛnɔkamɔ Yɔɔ Mli

Abaatsu anɔkwa jamɔ he nii yɛ shikpɔŋ lɛ fɛɛ nɔ. Mika gba akɛ “naagbee gbii lɛ amli lɛ,” abaatsɔɔ gbɔmɛi ni jɛ jeŋmaji babaoo mli Yehowa gbɛi. Nyɔŋmɔ baatsu kojomɔ he nii yɛ amɛteŋ, ni ta bɛ dɔŋŋ. Anɔkwa jalɔi lɛ ‘aaanyiɛ yɛ Yehowa amɛnyɔŋmɔ lɛ gbɛi amli kɛaatee naanɔ.’ Yɛ amɛnane shi tu ni atswaa kɛ piŋmɔ lɛ fɛɛ sɛɛ lɛ, abaajie ewebii lɛ kɛjɛ amɛhenyɛlɔi adɛŋ.​—4:​1-13.

Wɔbaanyɛ wɔna hekɛnɔfɔɔ yɛ Jielɔ ni Nyɔŋmɔ ewo shi yɛ ehe lɛ mli. Nɔyelɔ ko ni jɛ Betlehem ji mɔ ni baalɛ amɛ yɛ Yehowa hewalɛ mli. Agba ‘jiemɔ kɛmiijɛ Ashur dɛŋ’ afɔ shi. Shwɛɛnii ko ni ji anɔkwa jalɔi baatsɔ tamɔ bɔ loo tamɔ futufuli ni shwaa jwɛi nɔ, ni abaafamɔ apasa jamɔ kɛ daimonioi ajamɔi fɛɛ kɛya.​—5:​1-15.

Yehowa Jalɛsaneyeli Baahi Shi

Yehowa miikpa gbɛ akɛ ewebii lɛ baahi shi yɛ tɛi ni efolɔ eshwie shi ni ja lɛ anaa. Mɛni efee hewɔ ni jamɔ ni yɔɔ basabasa nɛkɛ sa lɛ lɛ? Efee nibii kpakpai eha ewebii lɛ. ‘Ni mɛni po Yehowa taoɔ yɛ amɛdɛŋ akɛ amɛsumɔ jalɛsaneyeli, amɛsumɔ ekpakpafeemɔ, ni amɛkɛ amɛ-Nyɔŋmɔ lɛ anyiɛ yɛ heshibaa mli.’ Kɛ amɛtee nɔ yɛ amɛyiwalɛ kɛ awuiyeli kɛ shishiumɔ gbɛ lɛ mli lɛ, fɔbuu kojomɔ pɛ ji nɔ ni amɛbaakpa gbɛ akɛ eeeba amɛnɔ.​—6:​1-16.

Esa akɛ wɔkɛ wɔhiɛ afɔ Yehowa jalɛsaneyeli kɛ emɔbɔnalɛ nɔ. Weku mli bii po baanyɛ atsɔmɔ henyɛlɔi Shi Mika kɛɔ akɛ: “Shi mi lɛ, makwɛ Yehowa gbɛ, mamɛ miyiwalaheremɔ Nyɔŋmɔ lɛ; mi-Nyɔŋmɔ lɛ aaabo mi toi!” Gbalɔ lɛ kɛ ehiɛ fɔɔ Yehowa jalɛsaneyeli lɛ nɔ, ejaakɛ ele akɛ Nyɔŋmɔ “ehiɛŋ emlifu lɛ mli kɛyaŋ naanɔ, ejaakɛ enaa mɔbɔnalɛ he tsui!”​—7:​1-20.

Nii ni wɔkaseɔ kɛjɛɔ mli ŋmɛnɛ: Yehowa miikpa gbɛ akɛ ewebii lɛ aaaye jalɛsane Yɛ nitsumɔi amli nifeemɔi gbɛfaŋ lɛ, esa akɛ Kristofonyo lɛ abi lɛ diɛŋtsɛ ehe akɛ: “Ani mihe aaatse, kɛ mihiɛ ŋsɛnii fɔji kɛ fotro kɛ emli shishiumɔ ŋsɛnii tɛi lɛ?” (6:11) Esa akɛ Yehowa webii ni yɔɔ naagbee gbii nɛɛ amli lɛ fɛɛ aye abua kɛha eshikpɔŋ nɔ gbɛjianɔtoo lɛ ekomefeemɔ ni amɛkpɛlɛ toiŋjɔlɛ gbɛi ahe tsɔsemɔ ni akɛhaa amɛ lɛ nɔ. Esa akɛ wɔfee nɔ fɛɛ nɔ ni wɔɔnyɛ ni wɔwo Yehowa gbɛi lɛ nɔ ni wɔha anɔkwa jamɔ ashwere.​—2:​12; 4:​1-4.

[Akrabatsa ni yɔɔ baafa 14]

Biblia Mli Ŋmalɛi Ni Atsɔɔ Mli

○ 1:16​—Yɛ Israel lɛ, akɛ yiteŋ kpataa lɛ toɔ hiɛgbele. yarafeemɔ kɛ haomɔ he. (Yesaia 3:​24-26: 15:⁠2, 3; Yeremia 47:⁠5) Wɔŋjalɔi amaji komɛi shɛɔ amɛyitsɔi fɛɛ amɛshwieɔ yɛ awerɛho be mli amɛhaa wekunyo ko ni egbo Yɛ be mli ni mɔ yiteŋ ni kpaa yɛ adebɔɔ naa lɛ jeee no ni abuɔ lɛ akɛ nɔ ko ni he tseee yɛ Mla lɛ shishi lɛ, kɛlɛ esaaa akɛ Israelbii lɛ shɛɔ amɛyiteŋ yɛ yarafeemɔ hewɔ, ejaakɛ amɛji “maŋ krɔŋkrɔŋ kɛha Yehowa.” (5 Mose 14:​1, 2) Shi, Mika kɛɛ Israel kɛ Yuda akɛ amɛshɛ amɛyiteŋ kɛ amɛyitsɔi yɛ amɛ eshafeemɔ ni ji wɔŋjamɔ gbɛ lɛ ni haaa amɛfee gbɔmɛi krɔŋkrɔŋi ni eha amɛtsɔmɔ shwiei ni sa nomŋɔɔ mliyaa lɛ hewɔ. Hebri wiemɔ ni atsɔɔ shishi akɛ “akpaŋa” lɛ yɛ yitsɔi bibioo ko pɛ yɛ eyisɛɛ Tsɛbelɛ ejɛɛɛ okropɔŋi aweku lɛ ni asusu he akɛ etamɔ nakai lɛ mli.

○ 2:12​—Nɛkɛ Wiemɔi nɛɛ baa mli yɛ ŋmɛnɛŋmɛnɛ beaŋ mumɔŋ Israel nɔ. (Galatabii 6:16) Titri lɛ kɛjɛ 1919 kɛbaa nɛɛ, aha gbɛ lɛ efee faŋŋ aha shwɛɛnii ni afɔ amɛ mu lɛ koni amɛjo foi kɛjɛ Babilon kpeteŋkpele lɛ ni eŋɔ amɛ nom yɛ jamɔ gbɛfaŋ lɛ mli (Kpojiemɔ 18.2) Taakɛ Mika gba fɔ shi lɛ. abua amɛnaa ‘tamɔ tookuu ni yɔɔ tooi atsu mli, loo tamɔ tooi ni yɔɔ amɛlɛɛ he.’ Akɛni “asafo babaoo” lɛ ni ji “tooi krokomɛi” lɛ kɛ amɛhe ebabo amɛhe kɛjɛ 1935 hewɔ lɛ, amɛbafee “hoo yɛ mɛi lɛ ayifalɛ hewɔ.”​—Kpojiemɔ 7.9: Yohane 10:⁠16.

○ 3:​1-3​—Naa sɔrɔtofeemɔ ko ni ka Yehowa tookwɛlɔ ni mli hi lɛ kɛ ewebii ni hi shi yɛ blema yɛ Mika gbii lɛ amli lɛ hiɛnyiɛlɔi yiwalɔi lɛ ateŋ. Mɛnɛɛmɛi nyɛɛɛ atsu nitsumɔ ni akɛwo amɛdɛŋ akɛ amɛbu tooi lɛ ahe kɛtsɔ jalɛsaneyeli nɔ lɛ. Amɛkɛ yiwalɛ ye okadifeemɔ mli tooi lɛ ahe nii, jeee kɛtsɔ amɛhetsɔi ni amɛshɛ kɛkɛ nɔ, shi moŋ ‘amɛhewolo diɛŋtsɛ’ ni amɛkpo​—tamɔ klaji lɛ nɔ. Tookwɛlɔi yiwalɔ lɛ kɛ amɛ yeee jalɛsane ni amɛnyɛ amɛ nɔ amɛwo ‘lashishwiemɔ nifeemɔi amli.’ (3:10) Yɛ jalɛsane ni atsɔɔ hiɛ abuɔ shi hewɔ lɛ, ashishiu mɛi ni nyɛɛɛ afa amɛhe lɛ, ni ashɔ amɛshiai kɛ amɛdaaŋ ŋmaa kɛjɛ amɛdɛŋ.​—2:2; ekɛto Ezekiel 34:​1-5 he.

○ 4:3​—Nɛkɛ “maji pii” kɛ “jeŋmaji agboi” nɛɛ jeee maŋkwramɔŋ maji kɛ nɔyelii lɛ. Shi moŋ, mɛnɛɛmɛi ji aŋkroaŋkroi ni jɛ jeŋmaji fɛɛ mli, gbɔmɛi ni tsiɔ amɛhe kɛjɛɔ amɛmaŋhedɔɔ jamɔ he ni tsɔɔ amɛhe kɛbaa Yehowa sɔɔmɔ he yɛ Yehowa anɔkwa jamɔ gɔŋ lɛ nɔ lɛ (Yesaia 2:​2-4) Yehowa ‘baakojo saji ni ejaje nibii’ yɛ mumɔŋ gbɛ nɔ kɛha nɛkɛ heyelilɔi ni badamɔɔ Nyɔŋmɔ Maŋtsɛyeli lɛ masɛi lɛ. Nɛkɛ gbɔmɛi ni jɛ “asafo babaoo” lɛ ateŋ lɛ hiɔ shi yɛ ŋwɛi kojomɔi anaa, ni amɛkɛ amɛ klantei sɔɔ kɔi ni enɛ tsɔɔ akɛ amɛkɛ amɛnanemɛi Yehowa Odasefoi lɛ miihi shi yɛ toiŋjɔlɛ mli

○ 5:1​—Atsɛɔ Betlehem Efrata nɛkɛ ejaakɛ ekolɛ maji enyɔ yɔɔ ni atsɛɔ amɛ Betlehem Mika ha ale nɔ ni yɔɔ Yuda, yɛ Yerusalem wuoyigbɛ lɛ. Maŋ kroko lɛ yɛ Zebulun kooyigbɛ (Yoshua 19: 10,15) “Efrata.” aloo “Efrat.” lɛ ji gbɛi ni akɛha Betlehem yɛ Yuda yɛ mra mli aloo he ni ebɔle lɛ lɛ. (1 Mose 48:7; Rut 4:11) Nɛkɛ sane mlitsɔɔmɔ fitsofitso nɛɛ haa ayɔseɔ bɔ ni Nyɔŋmɔ gbalɛ shiwoi ni kɔɔ Mesia lɛ he lɛ ji anɔkwale eha lɛ.

○ 6:8​—Mika baaa afɔleshai ni kpataa esha lɛ jara lɛ shi yɛ biɛ, shi moŋ eema nɔ ni jara wa yɛ Yehowa hiɛ lɛ nɔ mi diɛŋtsɛ. (okɛto 5 Mose 10:12 he.) Kɛji akɛ Yehowa baakpɛlɛ afɔleshai lɛ anɔ lɛ. belɛ esa akɛ eshafeelɔ lɛ ajie sui ni ji jalɛsaneyeli, mlihilɛ, kɛ heshibaa kpo. Ŋmɛnɛ, Yehowa kwɛɔ nii ni tamɔ nɛkɛ moŋ yɛ wɔsɔɔmɔ mli.​—1 Korintobii 13:​4-8.

○ 7:4​—Kpitikpiti kɛ ŋmeei afabaŋ lɛ ji kwɛɛnii komɛi ni baanyɛ agbala mama loo atade ni etiti mɔ ko heloo. Mika kɛ enɛ miitsɔɔ jeŋba mii kpɔtɔmɔ ni maŋ lɛ ni yɔɔ egbii lɛ amli lɛ ebote mli lɛ mli. No hewɔ lɛ eka shi faŋŋ akɛ eetsɔɔ akɛ Israel sɛɛsɛɛyalɔi lɛ ateŋ mɔ ni hi fe fɛɛ lɛ yeɔ awui loo epilaa mɔ tamɔ kpitikpiti kɛ ŋmeei afabaŋ ni mɔ ko aaabɛŋkɛ he.

[Mfoniri ni yɔɔ baafa 15]

Mika gba yɛ he ni abaafɔ Yesu yɛ lɛ he