Yehowa Kɛ Toiŋjɔlɛ kɛ Anɔkwale Babaoo Haa
“Matsa amɛ ni amɛhe aaatã, ni mafã hejɔlɛ kɛ anɔkwale babaoo naa maha amɛ.”—YEREMIA 33:6.
1, 2. (a) Mɛni jeŋmaji lɛ efee amɛfɔ shi, yɛ toiŋjɔlɛ gbɛfaŋ? (b) Mɛni Yehowa tsɔɔ Israel yɛ toiŋjɔlɛ he, yɛ afi 607 D.Ŋ.B.?
TOIŊJƆLƐ! Kwɛ bɔ ni asumɔɔ waa, ni kɛlɛ, kwɛ bɔ ni anaaa kwraa yɛ adesai ayinɔsane mli! Afii ohai 20 nɛɛ titri, ji afii oha ni toiŋjɔlɛ bɛ mli kwraa. Yɛ no najiaŋ lɛ, awuu tai enyɔ ni kpata nii ahiɛ fe fɛɛ yɛ adesai ayinɔsane mli lɛ yɛ mli. Yɛ klɛŋklɛŋ jeŋ ta lɛ sɛɛ lɛ, ato Jeŋmaji Akpaŋmɔ lɛ ama shi koni eha jeŋ toiŋjɔlɛ namɔ ahi shi daa. Nakai gbɛjianɔtoo lɛ yi yahɛ shi. Yɛ jeŋ ta ni ji enyɔ lɛ sɛɛ lɛ, ato Jeŋmaji Ekomefeemɔ gbɛjianɔtoo lɛ hu shishi kɛ nakai oti lɛ nɔŋŋ. Adafitswaa woji ni jeɔ kpo daa gbi lɛ akanemɔ kɛkɛ baaha wɔna bɔ ni no hu nine nyɛɔ shi ehaa.
2 Ani esa akɛ efee wɔ naakpɛɛ akɛ adesai agbɛjianɔtoi nyɛɛɛ amɛkɛ toiŋjɔlɛ aba? Dabi kwraa. Nɔ ni fe afii 2,500 nɛ, ni aha Nyɔŋmɔ webii ni ehala, ni ji Israel, kase nɔ ko yɛ enɛ gbɛfaŋ. Yɛ afii ohai kpawo D.Ŋ.B. lɛ, jeŋ hewalɛ ni nɔ kwɔ fe fɛɛ, ni ji Babilon, wo Israel toiŋjɔlɛ shihilɛ he gbeyei. Israel kɛ ehiɛ fɔ̃ Mizraim nɔ kɛha toiŋjɔlɛ. Shi Mizraim nyɛɛɛ eha ena. (Yeremia 37:5-8; Ezekiel 17:11-15) Yɛ afi 607 D.Ŋ.B. lɛ, Babilon asraafoi bakumɔ Yerusalem gbogboi lɛ fɛɛ amɛshwie shi ni amɛkɛ la shã Yehowa sɔlemɔtsu lɛ. Enɛ hewɔ lɛ Israel tsɔ̃ amanehulu ni ena lɛ nɔ ekase bɔ ni hiɛ ni akɛfɔ̃ɔ adesai agbɛjianɔtoi anɔ lɛ feɔ efolo hãa. Yɛ nɔ najiaŋ ni eeena toiŋjɔlɛ lɛ, anyɛ maŋ muu lɛ fɛɛ nɔ awo nomŋɔɔ mli yɛ Babilon.—2 Kronika 36:17-21.
3. Yɛ Yehowa wiemɔi ni ewie kɛtsɔ Yeremia nɔ lɛ mlibaa mli lɛ, mɛɛ yinɔsane mli nibii ni ba tsɔɔ Israel toiŋjɔlɛ he nikasemɔ ni ji enyɔ ni he hiaa waa?
3 Shi, dani Yerusalem shigbeemɔ lɛ aaaba lɛ, no mli lɛ Yehowa ejie lɛ kpo momo akɛ lɛ ji mɔ ni baaha Israel ana anɔkwa toiŋjɔlɛ, shi jeee Mizraim. Etsɔ Yeremia nɔ egba efɔ shi akɛ: “Matsa amɛ ni amɛhe aaatã, ni mafã hejɔlɛ kɛ anɔkwale babaoo naa maha amɛ. Ni maha Yuda kɛ Israel nomii lɛ aku sɛɛ aba ekoŋŋ, ni mamã amɛ tamɔ tsutsu lɛ.” (Yeremia 33:6, 7) Yehowa shiwoo lɛ bɔi mlibaa yɛ afi 539 D.Ŋ.B. beni aye Babilon nɔ kunim ni aha Israel nomii lɛ hegbɛ kɛha heyeli lɛ. (2 Kronika 36:22, 23) Kɛbaa afi 537 D.Ŋ.B. naagbee gbɛ lɛ, Israelbii akuu ko ye Asesei Agbijurɔ lɛ yɛ Israel shikpɔŋ nɔ, nɔ ni ji klɛŋklɛŋ kwraa yɛ afii 70 mli! Yɛ gbijurɔyeli lɛ sɛɛ lɛ, amɛje shishi akɛ amɛbaama Yehowa sɔlemɔtsu lɛ ekoŋŋ. Te amɛnu enɛ he amɛha tɛŋŋ? Nɔ ni aŋma afɔ̃ shi lɛ kɛɔ akɛ: “Maŋ muu lɛ fɛɛ bɔ oshe waa, beni amɛkafoɔ Yehowa yɛ Yehowa shia lɛ shishitoo lɛ hewɔ lɛ.”—Ezra 3:11.
4. Te Yehowa kanya Israelbii lɛ koni amɛtsu nitsumɔ ni ji sɔlemɔtsu lɛ maa lɛ eha tɛŋŋ, ni mɛɛ shiwoo ekɛha yɛ toiŋjɔlɛ he?
4 Shi, yɛ nakai nitsumɔ lɛ shishijee kɛ miishɛɛ lɛ sɛɛ lɛ, shitee-kɛ-wolɔi ha Israelbii lɛ anijiaŋ je wui ni amɛkpa sɔlemɔtsu lɛ maa. Afii komɛi asɛɛ lɛ, Yehowa tee gbalɔ Hagai kɛ gbalɔ Zakaria shi koni amɛwo Israelbii lɛ ekaa ni amɛgbe tsu ni amɛmaa ekoŋŋ lɛ naa. Kwɛ miishɛɛ ni eeeji kɛha amɛ beni amɛnuɔ ni Hagai miiwie yɛ sɔlemɔtsu ni amɛbaama lɛ he akɛ: “ ‘Shia nɛɛ sɛɛkpee anunyam lɛ aaada fe tsutsu nɔ lɛ,’ Yehowa Zebaot kɛɛ; ‘ni biɛ nɛɛ maha hejɔlɛ yɛ’ ”!—Hagai 2:9.
Yehowa ha Eshiwooi Ba Mli
5. Mɛni sa kadimɔ waa yɛ Zakaria yitso kpaanyɔ lɛ he?
5 Wɔkaneɔ ninaai kɛ gbalɛi babaoo ni jɛ mumɔŋ ni wo Nyɔŋmɔ webii hewalɛ yɛ afii ohai ekpaa D.Ŋ.B. lɛ ahe saji yɛ Biblia mli wolo ni ji Zakaria mli. Nɛkɛ gbalɛi nɛɛ nɔŋŋ yaa nɔ amɛmaa Yehowa sɛɛfimɔ nɔ mi amɛhaa wɔ. Amɛhaa wɔ yiŋtoo ni wɔɔdamɔ nɔ wɔhe wɔye akɛ Yehowa baaha ewebii toiŋjɔlɛ yɛ wɔgbii nɛɛ amli hu. Akɛ nɔkwɛmɔ nɔ lɛ, yɛ wolo ni akɛ egbɛi tsɛɔ lɛ lɛ yitso kpaanyɔ lɛ mli lɛ, gbalɔ Zakaria wieɔ wiemɔi nɛɛ shii nyɔŋma sɔŋŋ akɛ: ‘Bɔ ni Yehowa kɛɛ nɛ.’ Yɛ eko fɛɛ eko mli lɛ, wiemɔ lɛ jieɔ sane jajemɔ ko ni jɛ ŋwɛi ni kɔɔ Nyɔŋmɔ webii atoiŋjɔlɛ namɔ he lɛ kpo. Gbalɛi nɛɛ ekomɛi ba mli yɛ Zakaria gbii lɛ amli tɔ̃ɔ. Fɛɛ eba mli aloo amɛmiiba mli ŋmɛnɛ.
“Miiye Zion he Awuŋa”
6, 7. Yehowa ‘ye Zion he awuŋa kɛ hiɛdɔɔ kpeteŋkpele’ yɛ mɛɛ gbɛ nɔ?
6 Wiemɔ lɛ jeɔ kpo klɛŋklɛŋ yɛ Zakaria 8:2, he ni wɔkaneɔ yɛ akɛ: “Bɔ ni Yehowa Zebaot kɛɛ nɛ: ‘Miiye Zion he awuŋa kpeteŋkpele, ni hiɛdɔɔ kpeteŋkpele mikɛyeɔ ehe awuŋa nɛɛ.’ ” Shiwoo ni Yehowa kɛha akɛ ebaaye awuŋa, ni ebaajie ekaa kpeteŋkpele kpo, yɛ ewebii ahewɔ lɛ tsɔɔ akɛ ehiɛ baahi ehe nɔ jogbaŋŋ koni eha amɛna amɛ toiŋjɔlɛ lɛ ekoŋŋ. Israel ni ekɛ lɛ ku sɛɛ kɛba eshikpɔŋ nɔ ekoŋŋ kɛ sɔlemɔtsu ni asaa ama lɛ fee nakai ekaa lɛ he odaseyeli.
7 Shi, mɛi ni te shi amɛwo Yehowa webii lɛ hu? Ekaa ni ejieɔ lɛ kpo yɛ ewebii ahewɔ lɛ kɛ “hiɛdɔɔ kpeteŋkpele” ni ekɛbaaba henyɛlɔi nɛɛ anɔ lɛ yeɔ egbɔ. Yɛ be mli ni Yudafoi anɔkwafoi lɛ jaa Nyɔŋmɔ yɛ sɔlemɔtsu ni asaa ama ekoŋŋ lɛ mli lɛ, amɛbaanyɛ amɛsusu nibii ni eba Babilon maŋ kpeteŋkpele, ni amrɔ nɛɛ egbee shi lɛ nɔ lɛ he. Amɛbaanyɛ amɛsusu bɔ ni henyɛlɔi ni ka akɛ amɛbaatsi sɔlemɔtsu ni amaa ekoŋŋ lɛ naa lɛ anine enyɛ shi kwraa lɛ hu he. (Ezra 4:1-6; 6:3) Ni amɛbaanyɛ amɛda Yehowa shi akɛ eha eshiwoo lɛ eba mli. Ekaa ni ejie lɛ kpo lɛ ha amɛye kunim!
“Anɔkwale Maŋ”
8. Yɛ Zakaria gbii lɛ amli lɛ, mɛɛ gbɛ nɔ Yerusalem baatsɔ anɔkwale maŋ yɛ, kɛ akɛto tsutsu be ni eho lɛ he?
8 Zakaria ŋma nɔ ni ji shii enyɔ nɔ akɛ: “Bɔ ni Yehowa saa kɛɛ hu nɛ.” Mɛni ji Yehowa wiemɔi yɛ be nɛɛ mli? “Maku misɛɛ kɛba Zion, ni mabahi Yerusalem teŋ, ni aaatsɛ Yerusalem akɛ: Anɔkwale maŋ, kɛ Yehowa Zebaot gɔŋ lɛ akɛ: Gɔŋ krɔŋkrɔŋ.” (Zakaria 8:3) Dani afi 607 D.Ŋ.B. aaashɛ lɛ, no mli lɛ Yerusalem jeee anɔkwale maŋ yɛ gbɛ ko kwraa nɔ. No mli lɛ emli osɔfoi kɛ gbalɔi lɛ efite, ni emlibii lɛ yeee anɔkwa. (Yeremia 6:13; 7:29-34; 13:23-27) Amrɔ nɛɛ Nyɔŋmɔ webii miisaa amɛmiima sɔlemɔtsu lɛ ekoŋŋ, ni tsɔɔ bɔ ni amɛtuu amɛhe amɛha anɔkwa jamɔ. Yehowa bahi Yerusalem ekoŋŋ yɛ mumɔŋ. Aawie jamɔ krɔŋŋ mli anɔkwalei lɛ ekoŋŋ yɛ maŋ lɛ mli, no hewɔ lɛ abaanyɛ atsɛ Yerusalem akɛ “anɔkwale maŋ.” Abaanyɛ atsɛ eshikamɔ hé ni nɔ kwɔ grɔŋŋ lɛ akɛ ‘Yehowa gɔŋ.’
9. Mɛɛ tsakemɔ ni sa kadimɔ ba yɛ “Nyɔŋmɔ Israel” gbɛfaŋ yɛ afi 1919 mli?
9 Eyɛ mli akɛ nɛkɛ sane jajemɔi enyɔ nɛɛ hiɛ shishinumɔ kɛha blema Israel moŋ, shi amɛhiɛ shishinumɔ babaoo kɛha wɔ hu, beni afii ohai 20 nɛɛ baa naagbee lɛ. Aaafee afii 80 sɔŋŋ nɛ, yɛ klɛŋklɛŋ jeŋ ta lɛ mli, ni mɛi ni afɔ amɛ mu ni amɛyifalɛ shɛɔ akpei fioo ko, ni nakai beaŋ lɛ amɛdamɔ shi kɛha “Nyɔŋmɔ Israel lɛ” tee mumɔŋ nomŋɔɔ mli, tamɔ bɔ ni blema Israel tee nomŋɔɔ mli yɛ Babilon lɛ pɛpɛɛpɛ. (Galatabii 6:16) Awie amɛhe yɛ gbalɛ wiemɔ mli akɛ gbohii ni kamɔ blohu mli. Shi kɛlɛ, amɛkɛ anɔkwayeli miisumɔ lolo ni amɛja Yehowa “yɛ mumɔ kɛ anɔkwale mli.” (Yohane 4:24) No hewɔ lɛ, Yehowa jie amɛ kɛjɛ amɛ nomŋɔɔ lɛ mli yɛ 1919 mli, ni etee amɛ shi kɛjɛ amɛ mumɔŋ gbele shihilɛ lɛ mli. (Kpojiemɔ 11:7-13) Yehowa tsɔ nakai feemɔ nɔ eha sane ni Yesaia bi yɛ gbalɛ wiemɔ mli akɛ: “Ani gbi kome afɔɔ shikpɔŋ, aloo shikome afɔɔ jeŋmaŋ?” lo lɛ hetoo akɛ Hɛɛ kɛ hewalɛ diɛŋtsɛ. (Yesaia 66:8) Yɛ 1919 mli lɛ, Yehowa webii hi shi shikome ekoŋŋ akɛ mumɔŋ maŋ yɛ amɛ diɛŋtsɛ amɛ “shikpɔŋ” nɔ, loo amɛ mumɔŋ shihilɛ he yɛ shikpɔŋ nɛɛ nɔ.
10. Kɛjɛ 1919 kɛbaa lɛ, mɛɛ jɔɔmɔi Kristofoi ni afɔ amɛ mu lɛ ena mli ŋɔɔmɔ aahu yɛ amɛ “shikpɔŋ” nɔ?
10 Akɛni amɛyɛ shweshweeshwe yɛ nakai shikpɔŋ lɛ nɔ hewɔ lɛ, Kristofoi ni afɔ amɛ mu lɛ sɔmɔ yɛ Yehowa mumɔŋ sɔlemɔtsu kpeteŋkpele lɛ mli. Abaha amɛ gbɛi akɛ “tsulɔ anɔkwafo kɛ nilelɔ” lɛ, ni amɛkpɛlɛ nitsumɔ ni akɛha amɛ akɛ amɛkwɛ Yesu nibii ni yɔɔ shikpɔŋ nɛɛ nɔ lɛ nɔ, ni enɛ efee hegbɛ ni amɛnaa mli ŋɔɔmɔ lolo yɛ be mli ni afii ohai 20 nɛɛ bɛŋkɛɔ enaagbee lɛ. (Mateo 24:45-47) Amɛkase ni amɛle jogbaŋŋ akɛ Yehowa ji “hejɔlɛ Nyɔŋmɔ lɛ diɛŋtsɛ.”—1 Tesalonikabii 5:23.
11. Kristendom jamɔ mli hiɛnyiɛlɔi lɛ ejie amɛhe kpo akɛ amɛji Nyɔŋmɔ webii ahenyɛlɔi yɛ mɛɛ gbɛ nɔ?
11 Shi, Nyɔŋmɔ Israel henyɛlɔi lɛ hu? Ekaa ni Yehowa jieɔ lɛ kpo yɛ ewebii ahe lɛ kɛ hiɛdɔɔ ni ekɛbaa shitee-kɛ-wolɔi anɔ lɛ yaa pɛpɛɛpɛ. Yɛ klɛŋklɛŋ jeŋ ta lɛ mli lɛ, Kristendom jamɔ mli hiɛnyiɛlɔi lɛ kɛ nɔnyɛɛ kpele diɛŋtsɛ ba bɔ ni amɛaanyɛ—shi amɛnine nyɛ shi—akɛ amɛaakpata Kristofoi ni wieɔ anɔkwale lɛ akuu bibioo nɛɛ hiɛ. Beni awuuɔ jeŋ ta ni ji enyɔ lɛ, Kristendom osɔfoi lɛ fee ekome yɛ nɔ koome ko pɛ mli: Amɛfi fãi enyɔ ni kɛ amɛhe wuuɔ lɛ asɛɛ, ni amɛwo nɔyelii lɛ hewalɛ ni amɛnyɛ Yehowa Odasefoi anɔ. Ni ŋmɛnɛ po, yɛ shikpɔji pii anɔ lɛ, jamɔ mli hiɛnyiɛlɔi miiwo nɔyelii lɛ hewalɛ ni amɛtsi Kristofoi ashiɛmɔ nitsumɔ ni Yehowa Odasefoi tsuɔ lɛ naa loo amɛgu kwraa.
12, 13. Ajieɔ Yehowa mlifu kpo yɛ Kristendom nɔ yɛ mɛɛ gbɛ nɔ?
12 Yehowa miina nɔ ni yaa nɔ nɛɛ. Yɛ klɛŋklɛŋ jeŋ ta lɛ sɛɛ lɛ, Kristendom, kɛ Babilon Kpeteŋkpele lɛ fã ni eshwɛ lɛ fɛɛ, ná shigbeemɔ ko. (Kpojiemɔ 14:8) Bɔ ni Kristendom egbee shi diɛŋtsɛ lɛ baje kpo ni ana faŋŋ beni, kɛjɛ 1922 mli kɛbaa lɛ, afɔse mfoniri-feemɔŋ haomɔi babaoo ashwie shi kɛtsara nɔ, ni akɛkpa emumɔŋ gbele shihilɛ lɛ he mama yɛ faŋŋ mli ni akɛbɔ ehiɛkpatamɔ ni baa lɛ he kɔkɔ lɛ. (Kpojiemɔ 8:7–9:21) Ákɛ odaseyeli ni tsɔɔ akɛ nɛkɛ haomɔi nɛɛ afɔsemɔ miiya nɔ lolo lɛ, aha wiemɔ ko ni yitso ji “Apasa Jamɔ Naagbee Ebɛŋkɛ” yɛ je lɛŋ fɛɛ yɛ April 23, 1995, kɛkɛ ni no sɛɛ lɛ aja Maŋtsɛyeli Sane krɛdɛɛ ni je kpo lɛ ekomekomei akpekpei abɔ aha mɛi fɛɛ.
13 Ŋmɛnɛ, Kristendom yɛ shihilɛ ni yɔɔ mɔbɔ waa mli. Yɛ afii ohai 20 nɛɛ mli fɛɛ lɛ, emli bii egbegbee amɛhe yɛ tai ni mli wa, ni emli osɔfoi kɛ hiɛnyiɛlɔi lɛ jɔɔ nɔ lɛ amli. Yɛ shikpɔji komɛi anɔ lɛ, hewalɛ ni kulɛ eyɔɔ yɛ mɛi anɔ lɛ eta kwraa. Nɔ ni ato ni baaba enɔ ji hiɛkpatamɔ, kɛfata Babilon Kpeteŋkpele lɛ fã ni eshwɛ lɛ he.—Kpojiemɔ 18:21.
Toiŋjɔlɛ Kɛha Yehowa Webii
14. Mɛɛ gbalɛ mli mfoniri ko ni afee yɛ wiemɔ mli, akɛha kɛkɔ gbɔmɛi ni yɔɔ toiŋjɔlɛ he?
14 Nɔ ni tamɔɔɔ enɛ lɛ, Yehowa webii miina toiŋjɔlɛ babaoo mli ŋɔɔmɔ yɛ amɛ shikpɔŋ ni akɛ amɛ etee nɔ ekoŋŋ lɛ nɔ, yɛ afi ni ji 1996 nɛɛ mli, taakɛ awie he yɛ Yehowa sane jajemɔ ni ji etɛ lɛ mli lɛ, akɛ: “Bɔ ni Yehowa Zebaot kɛɛ nɛ: ‘Hiimeji kɛ yeimeji aaakã he atara Yerusalem blohui lɛaŋ, ni mɔ fɛɛ mɔ aaahiɛ tso yɛ edɛ̃ yɛ gbɔlɛ sɔŋŋ naa. Ni maŋ lɛŋ blohui lɛaŋ aaayimɔ tɔ kɛ gbekɛbii hii kɛ gbekɛbii yei sɔŋŋ ni shwɛɔ yɛ emli blohui lɛaŋ.’ ”—Zakaria 8:4, 5.
15. Yɛ jeŋmaji lɛ atai lɛ fɛɛ sɛɛ lɛ, mɛɛ toiŋjɔlɛ Yehowa tsuji ena mli ŋɔɔmɔ?
15 Nɛkɛ mfoniri fɛfɛo ni afee yɛ wiemɔ mli nɛɛ jieɔ shihilɛ ko ni sa kadimɔ waa ni anaa yɛ jeŋ ni ta egbala mli nɛɛ mli lɛ kpo—gbɔmɛi ni yɔɔ toiŋjɔlɛ. Kɛjɛ 1919 kɛbaa nɛɛ, Yesaia gbalɛ wiemɔi nɛɛ eba mli, akɛ: “ ‘Hejɔlɛ, hejɔlɛ aha mɔ ni yɔɔ shɔŋŋ kɛ mɔ ni yɔɔ kpaakpa lɛ,’ Yehowa kɛɛ, ‘ni matsá lɛ. Shi . . . hejɔlɛ ko bɛ ha mɛi fɔji lɛ,’ mi-Nyɔŋmɔ lɛ kɛɛ.” (Yesaia 57:19-21) Shi kɛlɛ, eyɛ mli akɛ Yehowa webii jeee je lɛ fã moŋ, shi amɛnyɛŋ amɛhi shi ni jeŋmaji lɛ abasabasa feemɔ lɛ esaaa amɛhe kɔkɔɔkɔ. (Yohane 17:15, 16) Yɛ shikpɔji komɛi anɔ lɛ, amɛkɛ jaramɔ shihilɛi ni mli wa waa kpeɔ, ni agbe amɛteŋ mɛi fioo komɛi po. Kɛlɛ, mɛi ni ji Kristofoi diɛŋtsɛ lɛ yɛ toiŋjɔlɛ yɛ gbɛi titri enyɔ nɔ. Klɛŋklɛŋ lɛ, amɛkɛ “Nyɔŋmɔ teŋ yɛ hejɔlɛ yɛ [amɛ] Nuntsɔ Yesu Kristo hewɔ.” (Romabii 5:1) Nɔ ni ji enyɔ lɛ, amɛyɛ toiŋjɔlɛ yɛ amɛ diɛŋtsɛ amɛteŋ. Amɛnaa “nilee ni jɛ ŋwɛi,” nɔ ni “tsutsu lɛ ehe tse, no sɛɛ lɛ ehe jɔ” lɛ. (Yakobo 3:17; Galatabii 5:22-24) Kɛfata he lɛ, amɛmiikpa gbɛ akɛ amɛbaana toiŋjɔlɛ yɛ gbɛ ni eye emuu kɛmɔ shi nɔ, beni “mɛi ni he jɔ lɛ, shikpɔŋ lɛ aaatsɔ̃ amɛnɔ, ni amɛmii aaashɛ amɛhe yɛ hejɔlɛ babaoo mli” lɛ.—Lala 37:11.
16, 17. (a) “Hiimeji kɛ yeimeji” kɛ agbɛnɛ hu “gbekɛbii hii kɛ gbekɛbii yei” ewo Yehowa gbɛjianɔtoo lɛ hewalɛ yɛ mɛɛ gbɛ nɔ? (b) Mɛni feɔ Yehowa webii atoiŋjɔlɛ lɛ he mfoniri?
16 “Hiimeji kɛ yeimeji,” ni ji mɛi ni afɔ amɛ mu ni kaiɔ shishijee kunim sɔrɔtoi ni Yehowa gbɛjianɔtoo lɛ eye lɛ, yɛ Yehowa webii ateŋ lolo. Hiɛ sɔɔ amɛ anɔkwayeli kɛ amɛ tsuishiŋmɛɛ lɛ waa diɛŋtsɛ. Mɛi ni afɔ amɛ mu lɛ ateŋ obalahii kɛ obalayei lɛ nyiɛ hiɛ yɛ 1930 afii ni akɛ ekaa tsu nii waa yɛ mli, kɛ Jeŋ Ta II mli kɛ agbɛnɛ, afii ni nyiɛ sɛɛ ni yɔɔ miishɛɛ waa ni kɛ shweremɔ babaoo ba lɛ amli. Kɛfata he lɛ, kɛjɛ 1935 titri kɛbaa lɛ, “asafo babaoo” ni ji “tooi krokomɛi” lɛ ejie amɛhe kpo faŋŋ. (Kpojiemɔ 7:9; Yohane 10:16) Akɛni Kristofoi ni afɔ amɛ mu lɛ miidara yɛ afii amli ni amɛnɔ miigbɔ hewɔ lɛ, tooi krokomɛi lɛ kɛ amɛhe ewo shiɛmɔ nitsumɔ lɛ mli waa ni amɛlɛɛ mli kɛtee shikpɔŋ lɛ nɔ he fɛɛ he. Tooi krokomɛi lɛ miike yuu kɛmiiba Nyɔŋmɔ webii ashikpɔŋ lɛ nɔ yɛ nyɛsɛɛ afii fioo nɛɛ amli. Lɛlɛŋ, nyɛsɛɛ afi lɛ pɛ lɛ, abaptisi amɛteŋ mɛi 338,491 akɛ amɛ henɔjɔɔmɔ kɛha Yehowa lɛ he okadi! Nɛkɛ mɛi heei nɛɛ darako kwraa, kɛ wɔɔwie he yɛ mumɔŋ. Abuɔ hewalɛ hee kɛ ekaa ni amɛyɔɔ lɛ akɛ ejara wa waa, beni amɛyaa nɔ amɛhaa mɛi ni laa shidaa kɛ yijiemɔ lalai amɛhaa “wɔ-Nyɔŋmɔ ni ta maŋtsɛsɛi lɛ nɔ lɛ, kɛ toobi lɛ” ayi faa babaoo kɛyaa hiɛ lɛ.—Kpojiemɔ 7:10.
17 Ŋmɛnɛ, ‘gbekɛbii hii kɛ gbekɛbii yei,’ ni ji Odasefoi ni yɔɔ obalahiiaŋ ekaa, ‘eyimɔ blohui lɛ amli tɔ.’ Yɛ 1995 sɔɔmɔ afi lɛ mli lɛ, nine shɛ akɔntaabui anɔ kɛjɛ shikpɔji kɛ ŋshɔkpɔi 232 nɔ. Shi majimaji ateŋ mpleshii, kɛ hewolonɔ sui ateŋ nyɛɛ, kɛ awuŋayeli fɔŋ ko kwraa bɛ mɛi ni afɔ amɛ mu lɛ kɛ tooi krokomɛi lɛ ateŋ. Amɛ fɛɛ amɛdaraa kutuu yɛ mumɔŋ, ni amɛfee ekome yɛ suɔmɔ mli. Lɛlɛŋ, esoro Yehowa Odasefoi ajeŋ muu fɛɛ nyɛmifeemɔ lɛ kwraa yɛ je lɛŋ shihilɛ he.—Kolosebii 3:14; 1 Petro 2:17.
Ani Ewa Tsɔ̃ Kɛha Yehowa?
18, 19. Kɛjɛ 1919 kɛbaa nɛɛ, Yehowa etsu nɔ ni ekolɛ etamɔ nɔ ni anyɛŋ atsu yɛ adesai asusumɔ naa lɛ yɛ mɛɛ gbɛ nɔ?
18 Mra mli yɛ afi 1918 beni mɛi ni afɔ amɛ mu lɛ bafee susumai akpei fioo ko pɛ ni nijiaŋ eje wui yɛ mumɔŋ nomŋɔɔ mli lɛ, no mli lɛ mɔ ko kwraa nyɛɛɛ atsɔ hiɛ ena bɔ ni nibii baaba lɛ aha. Shi kɛlɛ, Yehowa le—taakɛ egbalɛ sane jajemɔ ni ji ejwɛ lɛ yeɔ he odase lɛ, akɛ: “Bɔ ni Yehowa Zebaot kɛɛ nɛ: ‘Kɛ eyɛ naakpɛɛ yɛ maŋ nɛɛ mli mɛi ni eshwɛ lɛ ahiɛ yɛ nɛkɛ gbii nɛɛ amli lɛ, ani mi hu eeefee naakpɛɛ yɛ mihiɛ?’ Yehowa Zebaot kɛɛ.”—Zakaria 8:6.
19 Yɛ 1919 mli lɛ, Yehowa mumɔ lɛ tsĩɛ ewebii ahiɛ kɛha nitsumɔ ni kã amɛhiɛ lɛ. Shi kɛlɛ, ebi hemɔkɛyeli dani mɔ ko kɛ ehe akpɛtɛ Yehowa jálɔi agbɛjianɔtoo bibioo lɛ he. No mli lɛ amɛyi faaa kwraa, ni nibii babaoo ashishinumɔ bɛ faŋŋ. Shi kɛlɛ, Yehowa tee nɔ ewo amɛ hewalɛ fiofio yɛ gbɛjianɔtoo gbɛfaŋ, ni ewaje amɛ koni amɛtsu Kristofoi anitsumɔ ni ji sanekpakpa shiɛmɔ kɛ kaselɔi afeemɔ nitsumɔ lɛ. (Yesaia 60:17, 19; Mateo 24:14; 28:19, 20) Eye ebua amɛ fiofio hu ni amɛyoo saji ni he hiaa waa, tamɔ amɛhe ni amɛkɛwooo maŋ saji amli kɛ jeŋ muu fɛɛ maŋtsɛyeli sane lɛ hu. Ani ewa tsɔ̃ kɛha Yehowa akɛ eeetsu eyiŋtoo he nii kɛtsɔ nakai Odasefoi akuu bibioo lɛ nɔ? Eka shi faŋŋ akɛ hetoo lɛ ji dabi! Anaa enɛ faŋŋ yɛ wolo tɛtrɛɛ nɛɛ baafai 12 kɛyashi 15, he ni tao ni tsɔɔ Yehowa Odasefoi anitsumɔ ni amɛtsu yɛ 1995 sɔɔmɔ afi lɛ mli lɛ jeɔ kpo yɛ lɛ.
“Mi hu Matsɔ̃ Amɛ Nyɔŋmɔ”
20. Te agba afɔ̃ shi akɛ Nyɔŋmɔ webii anaabuamɔ lɛ mli baalɛɛ aha tɛŋŋ?
20 Sane jajemɔ ni ji enumɔ lɛ tsɔɔ miishɛɛ shihilɛ ni Yehowa Odasefoi yɔɔ mli ŋmɛnɛ lɛ mli lolo, akɛ: “Bɔ ni Yehowa Zebaot kɛɛ nɛ: ‘Naa, mahere mimaŋ lɛ yiwala kɛaajɛ boka shikpɔŋ lɛ nɔ kɛ anai shikpɔŋ lɛ nɔ hu, ni mikɛ amɛ aaaba, ni amɛbahi Yerusalem teŋ, ni amɛtsɔ mimaŋ, ni mi hu matsɔ̃ amɛ Nyɔŋmɔ yɛ anɔkwale mli kɛ jalɛ mli!’ ”—Zakaria 8:7, 8.
21. Yehowa webii ehiɛ amɛ toiŋjɔlɛ babaoo lɛ mli ni amɛlɛɛ mli hu yɛ mɛɛ gbɛ nɔ?
21 Wɔbaanyɛ wɔkɛɛ yɛ 1996 mli, ni shishashaomɔ ko bɛ mli akɛ ashiɛ sanekpakpa lɛ yɛ je lɛŋ he fɛɛ he, kɛjɛ “boka shikpɔŋ lɛ nɔ” kɛyashi “anai shikpɔŋ lɛ nɔ hu.” Afee gbɔmɛi ni jɛ jeŋmaji fɛɛ mli kaselɔi, ni amɛna Yehowa shiwoo nɛɛ mlibaa, akɛ: “Obii lɛ fɛɛ aaafee Yehowa kaselɔi, ni maha obii lɛ hejɔlɛ babaoo.” (Yesaia 54:13) Wɔyɛ toiŋjɔlɛ ejaakɛ Yehowa ji mɔ ni tsɔɔ wɔ nii. Yɛ enɛ hewɔ lɛ, afee woji yɛ wiemɔi sɔrɔtoi fe 300 mli. Nyɛsɛɛ afi lɛ pɛ lɛ, akɛ wiemɔi 21 kroko fata he. Amrɔ nɛɛ akalaa Buu-Mɔɔ wolo tɛtrɛɛ lɛ yɛ wiemɔi sɔrɔtoi 111 mli yɛ be kome mli, kɛ Awake! lɛ hu yɛ wiemɔi 54 mli. Maji anɔ kɛ majimaji ateŋ kpeei haa maŋbii fɛɛ naa toiŋjɔlɛ ni Nyɔŋmɔ webii yɔɔ lɛ faŋŋ. Daa otsi kpeei ni wɔyaa lɛ feɔ wɔ ekome ni ehaa wɔ hewalɛwoo ni he hiaa wɔ koni wɔdamɔ shi shiŋŋ. (Hebribii 10:23-25) Hɛɛ, Yehowa miitsɔɔ ewebii anii “yɛ anɔkwale mli kɛ jalɛ mli.” Eeha ewebii toiŋjɔlɛ. Kwɛ bɔ ni ajɔɔ wɔ waa aha akɛ wɔnaa nakai toiŋjɔlɛ ni fa babaoo lɛ mli gbɛfaŋnɔ!
Ani Obaanyɛ Otsɔɔ Mli?
◻ Yehowa ‘eye awuŋa kɛ hiɛdɔɔ kpeteŋkpele’ eha ewebii yɛ ŋmɛnɛŋmɛnɛ beaŋ yɛ mɛɛ gbɛ nɔ?
◻ Yehowa webii naa toiŋjɔlɛ mli ŋɔɔmɔ yɛ shikpɔji ni tai egbala mli lɛ anɔ po yɛ mɛɛ gbɛ nɔ?
◻ ‘Blohui lɛ amli eyimɔ tɔ kɛ gbekɛbii hii kɛ gbekɛbii yei’ yɛ mɛɛ gbɛ nɔ?
◻ Mɛɛ gbɛjianɔ sɔrɔtoi ato bɔni afee ni Yehowa kɛtsɔɔ ewebii anii?
[Akrabatsa ni yɔɔ baafa 12-15]
1995 SERVICE YEAR REPORT OF JEHOVAH’S WITNESSES WORLDWIDE
(Kwɛmɔ “bound volume”)
[Mfoniri ni yɔɔ baafa 8, 9]
Yɛ afii ohai ekpaa D.Ŋ.B. lɛ, Yudafoi anɔkwafoi ni yasaa amɛma sɔlemɔ tsu lɛ ekoŋŋ lɛ bale akɛ Yehowa pɛ ji toiŋjɔlɛ jɛɛhe ni abaanyɛ akɛ he afɔ̃ enɔ