Yitso 107

Yookpeemɔ Okpɔlɔŋmɛɛ lɛ He Abɛbua Lɛ

YESU etsɔ abɛbuai enyɔ nɔ ekpa woloŋmalɔi lɛ kɛ osɔfonukpai lɛ ahe mama, ni no hewɔ lɛ amɛmiitao amɛgbe lɛ. Shi Yesu kɛ amɛ egbeko naa kwraa. Etee nɔ egba amɛ abɛbua kroko, ni ekɛɛ:

“Ŋwɛi maŋtsɛyeli lɛ tamɔ maŋtsɛ ko ni kpeeɔ yoo eha ebi. Ni etsu etsuji akɛ amɛyatsɛ mɛi ni akpee lɛ kɛba yookpeemɔ lɛ he, shi amɛmiii baa.”

Yehowa Nyɔŋmɔ ji Maŋtsɛ ni ŋmɛɔ yookpeemɔ okpɔlɔ ehaa e-Bi, Yesu Kristo lɛ. Yɛ naagbee lɛ, ayemforo ni ji esɛɛnyiɛlɔi 144,000 ni afɔ amɛ mu lɛ kɛ Yesu baafee ekome yɛ ŋwɛi. Maŋtsɛ lɛ shishibii lɛ ji Israel maŋ lɛ mlibii lɛ, ni, yɛ be mli ni akɛ amɛ ba Mla kpaŋmɔ lɛ mli yɛ afi 1513 D.Ŋ.B. lɛ, amɛna hegbɛ akɛ amɛfee “osɔfoi amaŋtsɛyeli” lɛ. No hewɔ lɛ, yɛ nakai be lɛ mli lɛ, atsɔ hiɛ afɔ amɛ nine koni amɛba yookpeemɔ okpɔlɔŋmɛɛ lɛ shishi.

Shi kɛlɛ, klɛŋklɛŋ tsɛmɔ ni akɛha mɛi ni afɔ amɛ nine lɛ eyaaa aahu kɛyashi afi 29 Ŋ.B. lɛ agbiɛnaa mli, beni Yesu kɛ ekaselɔi lɛ (maŋtsɛ lɛ tsuji lɛ) je amɛnitsumɔ ni ji Maŋtsɛyeli shiɛmɔ lɛ shishi lɛ. Shi heloonaa Israelbii ni nine shɛ nɛkɛ tsɛmɔ ni jɛ tsuji lɛ adɛŋ kɛjɛ afi 29 Ŋ.B. kɛyashi 33 Ŋ.B. lɛ nɔ lɛ emiii baa. No hewɔ lɛ Nyɔŋmɔ kɛ hegbɛ kroko ha maŋ ni afɔ amɛ nine nɛɛ mlibii lɛ shikome ekoŋŋ, taakɛ Yesu gba lɛ:

“Esaa etsu tsuji krokomɛi ekɛɛ: ‘Nyɛyakɛa mɛi ni akpee lɛ akɛ: “Naa, migbe niyenii lɛ anaa; agbe mitsina lɛ kɛ milɛɛ kooloi lɛ, ni agbe nɔ fɛɛ nɔ naa: Nyɛbaa yookpeemɔ he lɛ!” ’ ” Tsɛmɔ ni ji enyɔ kɛ naagbee nɔ ni akɛha mɛi ni afɔ amɛ nine nɛɛ je shishi yɛ Pentekoste yɛ afi 33 Ŋ.B., beni afɔse mumɔ krɔŋkrɔŋ ashwie Yesu sɛɛnyiɛlɔi lɛ anɔ lɛ. Nɛkɛ tsɛmɔ nɛɛ tee nɔ aahu kɛyashi afi 36 Ŋ.B.

Shi kɛlɛ, Israelbii lɛ ateŋ mɛi pii ku amɛhiɛ amɛshwie tsɛmɔ nɛɛ hu nɔ. Yesu kɛɛ akɛ: “Shi amɛ lɛ, amɛbuuu po, ni amɛkɔlɔ amɛgbɛii, mɔ kome tee ebɔɔ mli, ni mɔ kroko hu tee eguɔyeli. Ni mɛi ni eshwɛ lɛ mɔmɔ etsuji lɛ, ni amɛfee amɛ nisenianii, ni amɛgbe amɛ.” Yesu tee nɔ akɛ: “Shi beni maŋtsɛ lɛ nu lɛ, emli fu, ni etsu etabilɔi, ni amɛyagbe nɛkɛ awuiyelɔi nɛɛ, ni ashã amɛmaŋ lɛ.” Enɛ ba yɛ afi 70 Ŋ.B., beni Romabii lɛ kpata Yerusalem hiɛ butuu, ni agbe nakai awuiyelɔi lɛ.

Kɛkɛ ni Yesu tsɔɔ nɔ ni ba yɛ nakai be mli lɛ mli akɛ: “Kɛkɛ ni [maŋtsɛ lɛ] kɛɛ etsuji lɛ akɛ: ‘Ato yookpeemɔ lɛ he nii agbe naa moŋ, shi mɛi ni akpee lɛ, esaaa amɛ. No hewɔ lɛ nyɛyaa ŋmaŋmashai lɛ anɔ, ni mɛi abɔ ni nyɛaana lɛ, nyɛkpeea amɛ kɛbaa yookpeemɔ lɛ he.’ ” Ni tsuji lɛ fee nakai, ni “yookpeemɔ lɛ yi tɔ kɛ mɛi.”

Nɛkɛ nitsumɔ ni ji gbɔi ni abuaa amɛnaa kɛjɛɔ ŋmaŋmashai lɛ anɔ yɛ mɛi ni akpee amɛ lɛ amaŋ lɛ sɛɛ lɛ je shishi yɛ afi 36 Ŋ.B. Roma asraafoi atsɛ Kornelio kɛ eweku lɛ ji mɛi ni jeee Yudafoi ni afolɔko amɛ ketia lɛ ateŋ klɛŋklɛŋbii ni abua amɛnaa. Nɛkɛ mɛi ni jeee Yudafoi, ni amɛ fɛɛ amɛji mɛi ni baye mɛi ni kpoo tsɛmɔ lɛ kɛjɛ shishijee lɛ anajiaŋ nɛɛ anaabuamɔ lɛ etsa nɔ aahu kɛbashi afii ohai 20 nɛɛ mli.

Afii ohai 20 lɛ mli ni tsu ni ato kɛha yookpeemɔ lɛ bayi tɔ. Yesu gba nɔ ni ba mli yɛ nakai be lɛ mli lɛ ni ekɛɛ: “Shi beni maŋtsɛ lɛ ba mɛi lɛ akwɛmɔ lɛ, ebana mɔ ko yɛ jɛi ni ewooo yookpeemɔ atade; ni ekɛɛ lɛ akɛ: ‘Naanyo, te fee tɛŋŋ ni oba biɛ nɛɛ ni owooo yookpeemɔ atadeŋ?’ Ni etɔ mu. Kɛkɛ ni maŋtsɛ lɛ kɛɛ etsuji lɛ akɛ: ‘Nyɛfimɔa eniji kɛ enaji ni nyɛwoa lɛ nyɛshɛa lɛ nyɛfɔa gbɛ sɛɛ duŋ lɛ mli! Jɛi yaafo kɛ nyanyɔji ashishikpemɔ yɔɔ.’ ”

Nuu ni wooo yookpeemɔ atade lɛ feɔ Kristendombii ni kwaa amɛfeɔ amɛhe Kristofoi lɛ ahe mfoniri. Nyɔŋmɔ ekpɛlɛko mɛnɛɛmɛi anɔ akɛ amɛyɛ kadimɔ nii diɛŋtsɛ akɛ mumɔŋ Israelbii. Nyɔŋmɔ kɛ mumɔ krɔŋkrɔŋ lɛ efɔɔɔ amɛ mu akɛ Maŋtsɛyeli lɛ niyelɔi. No hewɔ lɛ ashɛrɛ amɛ ashwie agbo lɛ sɛɛ yɛ duŋ lɛ mli yɛ he ni amɛbaana hiɛkpatamɔ mli amanehulu lɛ.

Ni Yesu mu ebɛbua lɛ naa ni ekɛɛ: “Ejaakɛ atsɛ mɛi pii moŋ, shi mɛi fioo ahala.” Hɛɛ, afɔ nine atsɛ mɛi pii kɛjɛ Israel maŋ lɛ mli koni amɛbafee Kristo ayemforo kuu lɛ mlibii, shi heloonaa Israelbii lɛ ateŋ mɛi fioo ko pɛ ahala. Gbɔmɛi 144,000 ni atsɛ amɛ ni nine shɛ ŋwɛi jweremɔ nɔ lɛ nɔ lɛ ateŋ mɛi pii bafee mɛi ni jeee Israelbii. Mateo 22:1-14; 2 Mose 19:1-6; Kpojiemɔ 14:1-3.

▪ Namɛi ji mɛi ni afɔ amɛ nine tsutsu koni amɛba yookpeemɔ okpɔlɔŋmɛɛ lɛ shishi lɛ, ni mɛɛ be mli akɛ ninefɔɔ lɛ ha amɛ?

▪ Mɛɛ be mli akɛ tsɛmɔ lɛ ha klɛŋklɛŋ kwraa kɛha mɛi ni afɔ amɛ nine lɛ, ni namɛi ji tsuji ni akɛtsu nii ni akɛha lɛ?

▪ Mɛɛ be mli akɛ tsɛmɔ ni ji enyɔ lɛ ha, ni yɛ sɛɛ mli lɛ, namɛi afɔ amɛ nine?

▪ Namɛi nuu ni wooo yookpeemɔ atade lɛ feɔ amɛhe mfoniri?

▪ Namɛi ji mɛi pii ni atsɛ amɛ lɛ, kɛ mɛi fioo ni ahala lɛ?