“Kɛɛmɔ Wɔ, Mɛɛ Be Mli Nibii Nɛɛ Baaba?”
“Nibii heei mijajeɔ nɛɛ, miiha nyɛnu he dani epue.”—YESAIA 42:9.
1, 2. (a) Mɛni Yesu bɔfoi lɛ bi yɛ wɔsɛɛ be he? (b) Yɛ mɛɛ gbɛ nɔ Yesu hetoo ni tsɔɔ okadi ni nibii pii yɔɔ mli lɛ ba mli?
ŊWƐI nitsɔɔmɔ jɛ Yehowa Nyɔŋmɔ, “Mɔ ni jɛɔ shishijee ejajeɔ naagbee nii lɛ” ŋɔɔ kɛbaa. (Yesaia 46:10, NW) Taakɛ nikasemɔ ni tsɔ hiɛ lɛ tsɔɔ lɛ, bɔfoi lɛ tao nitsɔɔmɔ ni tamɔ nɛkɛ kɛjɛ Yesu ŋɔɔ, ni amɛbi lɛ akɛ: “Kɛɛmɔ wɔ, Mɛɛ be mli nibii nɛɛ baaba, ni mɛni baafee be mli ni nɛkɛ nibii nɛɛ baaba naagbee lɛ ahe okadi?”—Marko 13:4, NW.
2 Yɛ hetoo-hamɔ mli lɛ, Yesu tsɔɔ nibii pii ni feɔ “okadi” ni ji odaseyeli ni baatsɔɔ akɛ etsɛŋ ni Yudafoi agbɛjianɔtoo lɛ baaba naagbee. Enɛ ba mli kɛ Yerusalem hiɛkpatamɔ yɛ afi 70 Ŋ.B. Shi Yesu gbalɛ lɛ baana emlibaa ni da afii pii yɛ wɔsɛɛ be mli. Kɛ “jeŋmaji abei ni ato” lɛ ba naagbee yɛ 1914 pɛ lɛ, okadi ko ni abaana yɛ hei pii baaje kpo, ni baatsɔɔ akɛ etsɛŋ ni ŋmɛnɛŋmɛnɛ yiwalɛ nibii agbɛjianɔtoo nɛɛ baaba naagbee yɛ “amanehulu kpeteŋkpele” ko mli.a (Luka 21:24, NW) Akpekpei abɔ ni yɔɔ wala mli ŋmɛnɛ lɛ baanyɛ aye odase akɛ okadi nɛɛ eba mli yɛ jeŋ tai kɛ afii ohai 20 nɛɛ mli nibii ni sa kadimɔ lɛ amli. Enɛɛmɛi hu kadiɔ Yesu gbalɛ mlibaa wuji lɛ, nɔ ni ba kɛjɛ afi 33 kɛyashi 70 Ŋ.B. lɛ fee nɔ ni baa mli yɛ ŋmɛnɛŋmɛnɛ beaŋ lɛ he mfoniri.
3. Yɛ be mli ni ewieɔ okadi kroko he lɛ, mɛni nibii krokomɛi Yesu gba kɛfata he?
3 Beni Luka tsi jeŋmaji abei ni ato lɛ ta lɛ sɛɛ lɛ, saji ni tamɔ nakai ni yɔɔ Mateo, Marko, kɛ Luka lɛ tsɔɔ nibii krokomɛi ni baaba lolo ni okadi ko fata he kɛfata ‘nibii agbɛjianɔtoo lɛ naagbee he okadi’ ni nibii pii yɔɔ mli lɛ he. (Mateo 24:3) (Akɛ liamɔi enyɔ ekadi sane nɛɛ yɛ baafa 15.) Mateo kɛɔ akɛ: “No gbii lɛ amli amanehului lɛ asɛɛ nɔŋŋ lɛ hulu aaawo duŋ, ni nyɔŋtsere kpɛŋ, ni ŋulamii aaatserɛ kɛaajɛ ŋwɛi atswia shi, ni aaahoso ŋwɛi hewalɛi lɛ. Kɛkɛ lɛ gbɔmɔ Bi lɛ okadi lɛ aaapue yɛ ŋwɛi, ni no lɛ shikpɔŋ lɛ nɔ akutsei fɛɛ aaawo yara, ni amɛbaana gbɔmɔ Bi lɛ akɛ eeba yɛ atatui lɛ anɔ kɛ hewalɛ kɛ anunyam babaoo. Ni eeetsu ebɔfoi lɛ kɛ tɛtrɛmantrɛ gbɛɛmɔ ni naa wa, ni amɛaabua emɛi ni ehala lɛ anaa kɛaajɛ kɔɔyɔi ejwɛ lɛ nɔ, kɛaajɛ ŋwɛi naagbee he kome nɔ kɛyashi naagbee he kroko lɛ nɔ.”—Mateo 24:29-31, NW.
Amanehulu kɛ Ŋwɛi Okadii ni Yɔɔ Naakpɛɛ
4. Mɛɛ sanebimɔi teɔ shi yɛ ŋwɛi naakpɛɛ okadii ni Yesu tsi ta lɛ ahe?
4 Mɛɛ be mli enɛ baaba mli? Sanekpakpai etɛ lɛ fɛɛ tsiɔ nɔ ni wɔbaanyɛ wɔtsɛ lɛ akɛ ŋwɛi okadii ni yɔɔ naakpɛɛ lɛ ata—hulu kɛ nyɔŋtsere ni wo duŋ kɛ ŋulamii ni miigbeegbee shi. Yesu kɛɔ akɛ enɛɛmɛi baanyiɛ “amanehulu” lɛ sɛɛ. Ani amanehulu ni yagbe naa yɛ afi 70 Ŋ.B. lɛ ji nɔ ni yɔɔ Yesu jwɛŋmɔ mli, aloo eewie amanehulu kpeteŋkpele ni yɔɔ wɔsɛɛ be mli lolo yɛ wɔ ŋmɛnɛŋmɛnɛ gbii nɛɛ amli lɛ he?—Mateo 24:29; Marko 13:24.
5. Mɛɛ susumɔ ahiɛ be ko yɛ ŋmɛnɛŋmɛnɛ beaŋ amanehulu lɛ he?
5 Kɛjɛ be mli ni jeŋmaji abei ni ato lɛ ba naagbee yɛ 1914 nɛɛ, Nyɔŋmɔ webii enya “amanehulu kpeteŋkpele” lɛ he waa. (Kpojiemɔ 7:14) Amɛkɛ afii pii esusu akɛ ŋmɛnɛŋmɛnɛ beaŋ amanehulu kpeteŋkpele lɛ yɛ eshishijee fã ni kɛ Jeŋ Ta I yeɔ egbɔ, kɛ agbɛnɛ emlifoo be, kɛ enaagbee fã ni muɔ naa kwraa, “Nyɔŋmɔ Ofe lɛ gbi wulu lɛ nɔ ta lɛ.” Kɛji nakai eji lɛ, mɛni baaba yɛ “nibii agbɛjianɔtoo lɛ naagbee” afii nyɔŋmai abɔ ni baafo mli lɛ amli?—Kpojiemɔ 16:14; Mateo 13:39, NW; 24:3; 28:20.
6. Mɛni asusu akɛ no ha Yesu gbalɛ ni kɔɔ ŋwɛi naakpɛɛ okadii lɛ ahe lɛ ba mli?
6 Ojogbaŋŋ, asusu akɛ abaana okadi ni nibii pii yɔɔ mli lɛ, ni Nyɔŋmɔ webii ni ebua amɛnaa lɛ ashiɛmɔ nitsumɔ lɛ fata he yɛ be ni baafo mli nɛɛ mli. Etamɔ nɔ ni abaanyɛ akpa ŋwɛi okadii ni yɔɔ naakpɛɛ lɛ hu gbɛ yɛ be ni baafo mli nɛɛ mli yɛ eshishijee kɛjɛ 1914-18 lɛ sɛɛ. (Mateo 24:29; Marko 13:24, 25; Luka 21:25) Agbala jwɛŋmɔ kɛtee ŋwɛi nibii ni akɛ hiŋmɛii baana diɛŋtsɛ lɛ anɔ—ŋwɛiniiaŋ ni apɛiɔ, osaramaŋi, ŋwɛi la-kpɛmɔi ni shɛɔ shikpɔŋ lɛ nɔ, kɛ nyɔŋtsere lɛ nɔ ni gbɔmɛi yaa.
7. Mɛɛ tsakemɔ ni kɔɔ amanehulu kpeteŋkpele lɛ shishinumɔ he akɛha agbɛnɛ?
7 Shi, February 1, 1971 Buu-Mɔɔ lɛ saa pɛi Yesu gbalɛ lɛ mli ekoŋŋ, titri lɛ amanehulu kpeteŋkpele ni baa lɛ. Etsɔɔ mli akɛ, yɛ nɔ ni ba klɛŋklɛŋ afii oha lɛ mli lɛ hewɔ lɛ, ŋmɛnɛŋmɛnɛ beaŋ amanehulu lɛ nyɛŋ ana eshishijee fã yɛ 1914-18, be kakadaŋŋ ni feɔ afii nyɔŋmai abɔ, ni eje shishi yɛ sɛɛ mli. Nakai wolo tɛtrɛɛ lɛ mu sane naa akɛ: “Nakai ‘amanehulu kpeteŋkpele’ lɛ ni eko baŋ ni tamɔ nakai dɔŋŋ lɛ ka wɔhiɛ lolo, ejaakɛ etsɔɔ jeŋ apasa jamɔ maŋtsɛyeli (ni Kristendom fata he) lɛ hiɛkpatamɔ, ni nɔ ni nyiɛɔ sɛɛ ji ‘Nyɔŋmɔ Ofe lɛ gbi wulu lɛ nɔ ta lɛ’ yɛ Harmagedon.”
8. Yɛ ŋmɛnɛŋmɛnɛ beaŋ amanehulu lɛ he jwɛŋmɔ ni etsake nɛɛ hewɔ lɛ, te atsɔɔ Mateo 24:29 mli aha tɛŋŋ?
8 Shi Mateo 24:29 kɛɔ akɛ ŋwɛi okadii ni yɔɔ naakpɛɛ lɛ baa yɛ “amanehului lɛ asɛɛ” nɔŋŋ. Te eeefee tɛŋŋ eba lɛ nakai hu? November 1, 1975 Buu-Mɔɔ lɛ tsɔɔ akɛ, nɔ ni “amanehulu” lɛ tsɔɔ yɛ biɛ lɛ ji nɔ ni yagbe naa yɛ afi 70 Ŋ.B. lɛ. Shi mɛɛ shishinumɔ naa aaanyɛ akɛɛ yɛ akɛ wɔ bei nɛɛ amli ŋwɛi okadii ni yɔɔ naakpɛɛ lɛ ba yɛ nibii ni ba yɛ afi 70 Ŋ.B. lɛ asɛɛ “nɔŋŋ”? Asusu akɛ yɛ Nyɔŋmɔ hiɛ lɛ afii ohai abɔ ni baka teŋ lɛ baafee kuku. (Romabii 16:20; 2 Petro 3:8) Shi gbalɛ nɛɛ mlipɛimɔ kɛmiiya shɔŋŋ, titri lɛ Mateo 24:29-31, kɛ shishitsɔɔmɔ ni yɔɔ sɔrɔto kwraa haa. Enɛ feɔ bɔ ni la kpɛɔ “ni eyaa nɔ ekpɛɔ aahu kɛyashiɔ jetsɛremɔ yeɔ emuu” lɛ he mfoniri. (Abɛi 4:18, American Standard Version)b Nyɛhaa wɔsusua nɔ hewɔ ni emlitsɔɔmɔ hee loo nɔ ni etsake sa lɛ he.
9. Mɛɛ gbɛ nɔ Hebri Ŋmalɛi lɛ kɛ Yesu wiemɔi ni tsɔɔ nibii ni aaaba yɛ ŋwɛi lɛ he shishinumɔ haa yɛ?
9 Yesu kɛ gbalɛ ni kɔɔ ‘hulu ni baawo duŋ, nyɔŋtsere ni kpɛŋ, kɛ ŋulamii ni gbeɔ shi’ lɛ ahe lɛ ha ebɔfoi ejwɛ. Akɛ Yudafoi lɛ, amɛbaayoo wiemɔi ni tamɔ nɛkɛ yɛ Hebri Ŋmalɛi lɛ amli, akɛ nɔkwɛmɔ nɔ lɛ, yɛ Zefania 1:15, he ni atsɛ Nyɔŋmɔ kojomɔ be lɛ yɛ akɛ “amaŋfɔ kɛ amaŋfɔ feemɔ gbi ni, duŋ kɛ jeŋ tuutuu-feemɔ gbi ni, atatu kɛ oblɔtu kpii gbi hu ni” lɛ. Hebri gbalɔi sɔrɔtoi hu tsɔɔ bɔ ni hulu wo duŋ, ni nyɔŋtsere kpɛɛɛ, ni ŋulamii hu kɛ amɛkpɛmɔ haaa. Obaana wiemɔi ni tamɔ nɛkɛ yɛ ŋwɛi shɛɛ saji ni akɛshiɔ Babilon, Edom, Mizraim, kɛ Israel kooyigbɛ maŋtsɛyeli lɛ mli.—Yesaia 13:9, 10; 34:4, 5; Yeremia 4:28; Ezekiel 32:2, 6-8; Amos 5:20; 8:2, 9.
10, 11. (a) Mɛni Yoel gba yɛ nibii ni yɔɔ ŋwɛi lɛ ahe? (b) Mɛɛ Yoel gbalɛ lɛ mli fai komɛi ba mli yɛ afi 33 Ŋ.B., ni te nɔ ni baaa mli lɛ?
10 Beni amɛnu nɔ ni Yesu kɛɛ lɛ, eka shi faŋŋ akɛ Petro kɛ mɛi etɛ lɛ kai Yoel gbalɛ ni anaa yɛ Yoel 3:1-4 kɛ 4:15 lɛ: “Mafɔse mimumɔ lɛ mashwie heloo fɛɛ nɔ, ni nyɛbihii kɛ nyɛbiyei lɛ aaagba. . . . Ni maha ana naakpɛɛ nii yɛ ŋwɛi kɛ shikpɔŋ lɛ nɔ, lá kɛ la kɛ lasu kutuu. Hulu aaatsɔ duŋ, ni nyɔŋtsere aaatsɔ lá, dani Yehowa gbi wulu ni he yɔɔ gbeyei lɛ aaaba.” “Hulu kɛ nyɔŋtsere ewo duŋ, ni ŋulamii efɔɔ kpɛmɔ.”
11 Taakɛ atsɔɔ mli yɛ Bɔfoi lɛ Asaji 2:1-4 kɛ 14-21 lɛ, Nyɔŋmɔ fɔse emumɔ krɔŋkrɔŋ lɛ eshwie kaselɔi 120, hii kɛ yei fɛɛ nɔ, yɛ Pentekoste afi 33 Ŋ.B. Bɔfo Petro ha ale akɛ enɛ ji nɔ ni Yoel egba efɔ shi lɛ. Shi Yoel wiemɔi ni kɔɔ ‘hulu ni woɔ duŋ kɛ nyɔŋtsere ni tsɔɔ lá kɛ ŋulamii ni kpɛɛɛ’ lɛ ahe lɛ hu? Nɔ ko nɔ ko bɛ ni tsɔɔ akɛ enɛ ba mli yɛ afi 33 Ŋ.B., aloo yɛ nɔ ni fe afii 30 ni kɛ Yudafoi anibii agbɛjianɔtoo lɛ ba naagbee lɛ mli.
12, 13. Ŋwɛi naakpɛɛ okadii ni Yoel gba fɔ shi lɛ ba mli yɛ mɛɛ gbɛ nɔ?
12 Eka shi faŋŋ akɛ nakai Yoel gbalɛ lɛ naagbee fã lɛ kɔɔ “Yehowa gbi wulu ni he yɔɔ gbeyei”—Yerusalem hiɛkpatamɔ lɛ he kpaakpa. November 15, 1966 Watchtower lɛ, wie amanehulu ni ba Yerusalem nɔ yɛ afi 70 Ŋ.B. lɛ he akɛ: “Eji ‘Yehowa gbi’ diɛŋtsɛ ni kɔɔ Yerusalem kɛ ebii ahe. Ni nɔ ni ba yɛ nakai gbi lɛ mli ji ‘lá kɛ la kɛ lasu babaoo,’ hulu haaa maŋ ni efee kusuu lɛ akpɛ yɛ jetsɛremɔ mli, ni nyɔŋtsere lɛ ha akai lá ni afɔse ashwie shi, shi jeee nyɔŋtsere kpɛmɔ yɛ gbɛkɛ ni tamɔ jwiɛtɛi ni haa mɔ toiŋ jɔɔ lɛ lɛ.”c
13 Hɛɛ, taakɛ eji yɛ gbalɛi krokomɛi ni wɔkadi lɛ ahe lɛ, ŋwɛi okadi ni yɔɔ naakpɛɛ ni Yoel gba fɔ shi lɛ baaba mli beni Yehowa aaatɔ owele lɛ. Ní emli aaalɛɛ kɛaateke Yudafoi anibii agbɛjianɔtoo lɛ naagbee moŋ lɛ, hulu, nyɔŋtsere, kɛ ŋulamii ni wo duŋ lɛ ba beni hiɛkpatalɔi lɛ batutua Yerusalem lɛ. Yɛ sane naatsɔɔmɔ ni ja naa lɛ, wɔbaanyɛ wɔkpa nakai Yoel gbalɛ lɛ fa lɛ mlibaa ni da gbɛ, beni Nyɔŋmɔ jeɔ ŋmɛnɛŋmɛnɛ gbɛjianɔtoo nɛɛ hiɛkpatamɔ shishi lɛ.
Mɛɛ Amanehulu Baaba Dani Ŋwɛi Okadii ni Yɔɔ Naakpɛɛ lɛ Aba?
14, 15. Yoel gbalɛ lɛ kɔɔ shishinumɔ ni wɔna yɛ Mateo 24:29 lɛ he yɛ mɛɛ gbɛ nɔ?
14 Yoel gbalɛ lɛ mlibaa (ni kɛ gbalɛi krokomɛi ni kɛ wiemɔi ni tamɔ nɛkɛ tsuɔ nii lɛ kpaa gbee lɛ) yeɔ ebuaa wɔ ni wɔnuɔ wiemɔi ni yɔɔ Mateo 24:29 lɛ shishi. Eyɛ faŋŋ akɛ nɔ ni Yesu wie yɛ ‘hulu ni aaawo duŋ, kɛ nyɔŋtsere ni kpɛŋ, kɛ ŋulamii ni tswiaa shi’ lɛ ahe lɛ kɔɔɔ nibii ni baa mli yɛ afii nyɔŋmai abɔ ni ŋmɛnɛŋmɛnɛ gbɛjianɔtoo nɛɛ naagbee lɛ kɛhi shi lɛ ahe, tamɔ ŋwɛiniiaŋ osaramaŋi, nyɔŋtsere lɛ nɔ ni akɛ gbɔmɛi yaa, kɛ nibii ni tamɔ nakai lɛ. Dabi, shi ekɛto nibii ni kɔɔ “Yehowa gbi wulu ni he yɔɔ gbeyei,” hiɛkpatamɔ ni baaba kpaako lɛ he.
15 Enɛ kɔɔ wɔshishinumɔ ni tsɔɔ bɔ ni ŋwɛi okadii ni yɔɔ naakpɛɛ lɛ baaba yɛ “amanehului lɛ asɛɛ” nɔŋŋ lɛ he. Jeee amanehulu ni yagbe naa yɛ afi 70 Ŋ.B. lɛ he Yesu wieɔ lɛ. Shi moŋ eetsɔɔ amanehulu kpeteŋkpele lɛ ni baaba jeŋ muu fɛɛ gbɛjianɔtoo lɛ nɔ yɛ wɔsɛɛ be, ni baamua “ba ni eba” lɛ naa lɛ. (Mateo 24:3, NW) Nakai amanehulu lɛ ka wɔhiɛ lolo ni ebaaba.
16. Mɛɛ amanehulu Marko 13:24 tsɔɔ lɛ, ni mɛni hewɔ nakai eji lɛ?
16 Ni wiemɔi ni yɔɔ Marko 13:24: “Shi no gbii lɛ amli, yɛ nɛkɛ amanehulu nɛɛ sɛɛ lɛ, hulu hiɛ aaawo duŋ, ni nyɔŋtsere hu kpɛŋ” lɛ hu? Wiemɔi “no” kɛ “nɛkɛ” ni yɔɔ biɛ lɛ fɛɛ ji Hela wiemɔ e·keiʹnos mli sui komɛi, najiaŋ gbɛi ni tsɔɔ nɔ ko ni yɔɔ shɔŋŋ yɛ be naa. Abaanyɛ akɛ e·keiʹnos atsu nii ni akɛtsɔɔ nɔ ko ni eho jeeŋmɔ (loo ni atsi ta yɛ tsutsu) loo nɔ ko ni yɔɔ wɔsɛɛ be shɔŋŋ. (Mateo 3:1; 7:22; 10:19; 24:38; Marko 13:11, 17, 32; 14:25; Luka 10:12; 2 Tesalonikabii 1:10) No hewɔ lɛ, Marko 13:24 miitsɔɔ “nɛkɛ amanehulu nɛɛ,” jeee amanehulu ni Romabii lɛ tee lɛ shi lɛ, shi Yehowa hewalɛ nifeemɔi yɛ ŋmɛnɛŋmɛnɛ gbɛjianɔtoo nɛɛ naagbee.
17, 18. Mɛɛ shishinumɔ ni feɔ faŋŋ Kpojiemɔ haa wɔnaa yɛ bɔ ni amanehulu kpeteŋkpele lɛ aaaba aha lɛ he?
17 Kpojiemɔ yitsei 17 kɛyashi 19 kɛ enɛ yaa pɛpɛɛpɛ ni emaa Mateo 24:29-31, Marko 13:24-27, kɛ Luka 21:25-28 he shishinumɔ ni etsake nɛɛ nɔ mi. Yɛ mɛɛ gbɛ nɔ? Sanekpakpai lɛ tsɔɔ akɛ amanehulu nɛɛ ejeŋ shishi ni eba naagbee shikome trukaa. Beni amanehulu kpeteŋkpele lɛ eje shishi sɛɛ lɛ, no mli lɛ adesai toigbolɔi lɛ ateŋ mɛi komɛi yɛ wala mli lolo koni amɛna “gbɔmɔ Bi lɛ okadi lɛ,” ni amɛaafee nɔ ko yɛ he—amɛaawo yara, ni taakɛ atsɔɔ mli yɛ Luka 21:26 lɛ, “ni nɔ aaanyɔnyɔɔ [amɛ]nɔ yɛ gbeyei kɛ nibii ni baa je lɛŋ lɛ agbɛkwɛmɔ hewɔ.” Nakai gbeyei ni aaana amɛnɔ hewalɛ kwraa lɛ baafee nɔ ni jɛ “okadi” ni amɛna ni tsɔɔ amɛhiɛkpatamɔ ni baa hewɔ lɛ.
18 Sane ni yɔɔ Kpojiemɔ lɛ tsɔɔ akɛ wɔsɛɛ be amanehulu kpeteŋkpele lɛ baaje shishi beni majimaji ateŋ “kooloo” lɛ “akolontoi” ni ji esraafoi lɛ tutuaa “ajwamaŋ kpeteŋkpele,” Babilon Kpeteŋkpele lɛ.d (Kpojiemɔ 17:1, 10-16) Shi mɛi pii baashwɛ, ejaakɛ maŋtsɛmɛi, jarayelɔi, lɛlɛ mli onukpai baafo loo amɛbaawo yara yɛ apasa jamɔ naagbee lɛ he. Ŋwanejee ko bɛ he akɛ mɛi pii baayoo akɛ amɛkojomɔ ji nɔ ni baanyiɛ sɛɛ aba.—Kpojiemɔ 18:9-19.
Mɛni Baaba Lɛ?
19. Mɛni wɔbaanyɛ wɔkpa gbɛ beni amanehulu kpeteŋkpele lɛ jeɔ shishi lɛ?
19 Sanekpakpai lɛ amli saji ni yɔɔ Mateo, Marko, kɛ Luka lɛ kɛ Kpojiemɔ yitsei 17-19 feɔ ekome kɛtsɔɔ nibii ni etsɛŋ kwraa ni ebaaba lɛ amli. Amanehulu kpeteŋkpele lɛ baaje shishi yɛ be ni Nyɔŋmɔ eto lɛ mli kɛ tutuamɔ ni akɛbaaba jeŋ apasa jamɔ maŋtsɛyeli (Babilon Kpeteŋkpele) lɛ nɔ lɛ. Enɛ mli baawa waa titri aha Kristendom, ni kɛ Yerusalem ni yeee anɔkwa lɛ yeɔ egbɔ lɛ. Yɛ amanehulu nɛɛ “sɛɛ” nɔŋŋ lɛ, “okadii aaaba hulu kɛ nyɔŋtsere kɛ ŋulamii amli, ni jeŋmaji afimɔ [ni eko bako ni tamɔ nakai da] aaaba shikpɔŋ lɛ nɔ.”—Mateo 24:29; Luka 21:25, NW.
20. Mɛɛ ŋwɛi naakpɛɛ okadii wɔbaanyɛ wɔkpa amɛbaa gbɛ?
20 Mɛɛ shishinumɔ naa ‘hulu aaawo duŋ, ni nyɔŋtsere kpɛŋ, ni ŋulamii aaajɛ ŋwɛi atswia shi, ni aaahoso ŋwɛi hewalɛi lɛ’ yɛ? Ŋwanejee ko bɛ he akɛ yɛ amanehulu kpeteŋkpele lɛ shishijee fa lɛ mli lɛ, no mli lɛ “akolontoi nyɔŋma lɛ” ni atsi amɛ ta yɛ Kpojiemɔ 17:16 lɛ ekpa ŋwɛi kanei pii—jamɔ je lɛ mli osɔfoi ni ehe gbɛi lɛ—ahe mama ni akpata amɛhiɛ. Ŋwanejee ko bɛ he akɛ no mli lɛ ahoso maŋkwramɔŋ hewalɛi lɛ hu. Ani nibii ni yɔɔ gbeyei hu baanyɛ ajɛ ŋwɛi ni anaa nɛɛ mli aba? Eka shi faŋŋ akɛ eeenyɛ eba lɛ nakai, ni eji nɔ ni yɔɔ gbeyei kwraa fe nɔ ni Josephus tsɔɔ mli akɛ eba yɛ Yudafoi lɛ agbɛjianɔtoo lɛ naagbee gbɛ lɛ. Wɔle akɛ Nyɔŋmɔ ejie ehewalɛ kpelei ni ekɛkpataa nii ahiɛ lɛ kpo yɛ blema, ni ebaanyɛ efee nakai ekoŋŋ.—2 Mose 10:21-23; Yoshua 10:12-14; Kojolɔi 5:20; Luka 23:44, 45.
21. Wɔsɛɛ be mli “okadi” ko baaba yɛ mɛɛ gbɛ nɔ?
21 He ni wɔshɛ nɛɛ, agbɛnɛ Sanekpakpa ŋmalɔi etɛ lɛ fɛɛ kɛ Hela wiemɔ toʹte (kɛkɛ lɛ) tsu nii ni amɛkɛwie nɔ ni nyiɛ sɛɛ kɛba lɛ he. “Kɛkɛ [lɛ] gbɔmɔ Bi lɛ okadi lɛ aaapue yɛ ŋwɛi.” (Mateo 24:30; Marko 13:26; Luka 21:27) Kɛjɛ Jeŋ Ja I sɛɛ kɛbaa nɛɛ, Yesu anɔkwa kaselɔi eyoo ba ni eba ni akɛ hiŋmɛi enaaa lɛ lɛ he okadi ni nibii pii yɔɔ mli lɛ, yɛ be mli ni mɛi pii ji mɛi ni yooo. Shi Mateo 24:30 gbalaa jwɛŋmɔ kɛyaa “okadi” ko ni baapue yɛ wɔsɛɛ be mli lɛ nɔ, ni no ji “gbɔmɔ Bi lɛ” nɔ lɛ, ni abaanyɛ jeŋmaji lɛ fɛɛ anɔ ni amɛyoo nakai okadi lɛ. Kɛ Yesu kɛ ‘atatui lɛ ba’ ni anaaa lɛ lɛ, no lɛ ebaabi ni adesai shitee-kɛ-wolɔi fɛɛ ni yɔɔ je lɛŋ fɛɛ lɛ ayoo nakai “baa” (Hela, er·khoʹme·non) lɛ, yɛ emaŋtsɛyeli hewalɛ ni fe adesai anɔ̃ ni eeejie lɛ kpo lɛ hewɔ.—Kpojiemɔ 1:7.
22. Mɛni baajɛ Mateo 24:30 “okadi” lɛ ni aaana lɛ mli aba?
22 Mateo 24:30 kɛ toʹte tsu nii shikome ekoŋŋ ni ekɛtsɔɔ nɔ ni baanyiɛ sɛɛ aba. Akɛni jeŋmaji lɛ baayoo nɔ ni baajɛ amɛshihilɛ lɛ mli aba hewɔ lɛ, amɛaagbala amɛhe mai ni amɛaawo yara, ekolɛ amɛbaayoo akɛ amɛhiɛkpatamɔ ka amɛhiɛ kɛmiiba. Kwɛ bɔ ni eyɔɔ sɔrɔto yɛ Nyɔŋmɔ tsuji ahe, ejaakɛ wɔ lɛ, wɔbaanyɛ wɔhole wɔyitesi anɔ, ejaakɛ wɔle akɛ wɔkpɔmɔ ebɛŋkɛ! (Luka 21:28) Kpojiemɔ 19:1-6 lɛ hu tsɔɔ anɔkwa jálɔi ni yɔɔ ŋwɛi kɛ shikpɔŋ nɔ lɛ ni miinya yɛ ajwamaŋ kpeteŋkpele lɛ hiɛkpatamɔ lɛ hewɔ.
23. (a) Mɛni Yesu baafee yɛ mɛi ni ahala amɛ lɛ ahe? (b) Mɛni abaanyɛ awie yɛ shwɛɛnii lɛ ni aŋɔɔ amɛ kɛyaa ŋwɛi lɛ he?
23 Yesu gbalɛ lɛ yaa nɔ ekɛɔ, yɛ Marko 13:27 akɛ: “Kɛkɛ [lɛ] (toʹte) eeetsu ebɔfoi lɛ, ni amɛaabua ehalamɔ bii lɛ anaa kɛaajɛ kɔɔyɔi ejwɛ lɛ nɔ, kɛjɛ shikpɔŋ naagbee he kɛyashi ŋwɛi naagbee he.” Yesu miigbala jwɛŋmɔ kɛmiiya “halamɔ bii” 144,000 lɛ ateŋ shwɛɛnii ni yɔɔ wala mli lolo yɛ shikpɔŋ lɛ nɔ lɛ anɔ. Mra mli yɛ nibii agbɛjianɔtoo lɛ naagbee be lɛ mli ni abua nɛkɛ Yesu kaselɔi ni afɔ amɛ mu nɛɛ anaa afee amɛ teokrase kuu kome. Shi, yɛ bɔ ni ato nibii anaa aha lɛ naa lɛ, Marko 13:27 kɛ Mateo 24:31 tsɔɔ nɔ kroko kɛfataa he. Akɛ “tɛtrɛmaŋtɛrɛ ni gbee wa” baabua “halamɔ bii” lɛ ateŋ mɛi ni eshwɛ lɛ anaa kɛbaajɛ shikpɔŋ lɛ naagbee hei lɛ. Abaabua amɛnaa yɛ mɛɛ gbɛ nɔ? Ŋwanejee ko bɛ he akɛ, yɛ naagbee lɛ ‘abaasɔo amɛnaa’ ni Yehowa baakadi amɛ faŋŋ akɛ “mɛi ni atsɛ kɛ mɛi ni ahala kɛ anɔkwafoi” lɛ ateŋ mɛi komɛi. Ni yɛ Nyɔŋmɔ be ni eto mli lɛ, abaabua amɛnaa kɛya ŋwɛi ni amɛyatsɔmɔ maŋtsɛmɛi kɛ osɔfoi.e Enɛ baaha amɛ, kɛ amɛhefatalɔi anɔkwafoi lɛ, ni ji “asafo babaoo” ní amɛ hu abaakadi amɛ, ‘akɛni amɛje amanehulu kpeteŋkpele lɛ mli’ lɛ ana miishɛɛ ni amɛyana jɔɔmɔi yɛ shikpɔŋ nɔ paradeiso lɛ mli.—Mateo 24:22; Kpojiemɔ 7:3, 4, 9-17; l7:14; 20:6; Ezekiel 9:4, 6.
24. Mateo 24:29-31 jieɔ bɔ ni nibii ni baa lɛ baato naa atsara nɔ aba lɛ kpo yɛ mɛɛ gbɛ nɔ?
24 Beni bɔfoi lɛ bi akɛ, “Tsɔɔmɔ wɔ . . .” lɛ, Yesu hetoo lɛ wie nibii babaoo he fe bɔ ni amɛaanyɛ amɛnu shishi. Ni kɛlɛ, yɛ amɛwala be mli lɛ, amɛna miishɛɛ akɛ amɛaana egbalɛ lɛ mlibaa titri ko. Yesu hetoo lɛ hesusumɔ nɛɛ egbala wɔjwɛŋmɔ kɛtee egbalɛ lɛ fã ni baaba mli yɛ wɔsɛɛ be ni ka wɔhiɛ kpaakpa nɛɛ mli lɛ nɔ. (Mateo 24:29-31; Marko 13:24-27; Luka 21:25-28) Amrɔ nɛɛ wɔmiina momo po akɛ wɔkpɔmɔ lɛ miibɛŋkɛ. Wɔbaanyɛ wɔkpa amanehulu kpeteŋkpele lɛ shishijee gbɛ, no sɛɛ lɛ gbɔmɔ Bi lɛ okadi lɛ, kɛkɛ lɛ halamɔ bii lɛ ní Nyɔŋmɔ aaabua amɛnaa. Yɛ naagbee lɛ, wɔ-Tatsɛ-kɛ-Maŋtsɛ, Yesu ni akɛ lɛ eta maŋtsɛsɛi nɔ lɛ ‘baagbe ekunimyeli lɛ naa’ akɛ Yehowa Blafo yɛ Harmagedon. (Kpojiemɔ 6:2) Nakai Yehowa gbi ni ebaatɔ owele lɛ baaba ákɛ nibii agbɛjianɔtoo nɛɛ naagbee ní ekadi Nuŋtsɔ Yesu gbi lɛ kɛjɛ 1914 mli aahu kɛbaa nɛɛ fɛɛ lɛ naagbee kwraa.
25. Te wɔɔfee tɛŋŋ wɔna Luka 21:28 mlibaa ni yɔɔ wɔsɛɛ be mli lɛ mli gbɛfaŋnɔ?
25 Eba akɛ oooya nɔ ona ŋwɛi nitsɔɔmɔ he sɛɛ, koni onyɛ otsu Yesu wiemɔi ni baaba mli yɛ wɔsɛɛ be mli lɛ he nii akɛ: “Beni nibii nɛɛ aaatsɔ naa shi lɛ, no lɛ nyɛkwɛa ŋwɛi ni nyɛholea nyɛyitsei anɔ, ejaakɛ nyɛkpɔmɔ lɛ miibɛŋkɛ.” (Luka 21:28) Mɛɛ wɔsɛɛ be ni yɔɔ nyam kã halamɔ bii lɛ kɛ asafo babaoo lɛ ahiɛ nɛkɛ, beni Yehowa yaa nɔ etseɔ egbɛi krɔŋkrɔŋ lɛ he lɛ!
[Shishigbɛ niŋmai]
a Yehowa Odasefoi yɛ he miishɛɛ akɛ amɛkɛ enɛ he odaseyeli aaaha, ni tsɔɔ bɔ ni nibii ni eba mli yɛ wɔgbii nɛɛ amli ni anaa faŋŋ lɛ haa Biblia gbalɛ baa mli lɛ.
b Saji krokomɛi ni fata he jeɔ kpo yɛ God’s Kingdom of a Thousand Years Has Approached, ni Watchtower Bible and Tract Society of New York, Inc. fee yɛ 1973 lɛ baafai 296-323, kɛ The Watchtower, September 15, 1982, baafai 17-22.
c Josephus ŋma nibii ni tee nɔ yɛ beni Romabii lɛ tutua Yerusalem klɛŋklɛŋ kwraa (66 Ŋ.B.) lɛ kɛ ehiɛkpatamɔ lɛ teŋ: “Yɛ gbɛkɛ lɛ ahum ko ni fiteɔ nii tswa; lasuogbele ho kɛbɔle shi, nugbɔnɛmɔ wuji tee nɔ, sarawai gbala kɛtsara nɔ, nugbɔshimɔ lɛ woɔ mɔ he gbeyei, shikpɔŋ lɛ hoso waa kɛ gbɛɛmɔ ni tsimɔɔ toi. Bɔ ni nibii kumɔ shwie shi kwraa lɛ feɔ oshara ni baaba adesa nɔ lɛ he mfoniri, ni mɔ ko mɔ ko bɛ ni jeɔ okadii ni yaa nɔ, ni tsɔɔ oshara ni eko bɛ ni tamɔ no lɛ he ŋwane.”
d Nɔ ni Yesu wie he akɛ “amanehulu babaoo” kɛ “amanehulu” yɛ ekɛ nitsumɔ klɛŋklɛŋ kwraa lɛ ji Yudafoi anibii agbɛjianɔtoo lɛ hiɛkpatamɔ. Shi yɛ kukuji ni kɔɔ wɔgbii nɛɛ pɛ he lɛ amli lɛ, ekɛ wiemɔ ni tsɔɔ nɔ̃ pɔtɛɛ “lɛ” tsu nii, akɛ, “amanehulu lɛ.” (Mateo 24:21, 29; Marko 13:19, 24) Kpojiemɔ 7:14 tsɛ nii ni baaba yɛ wɔsɛɛ be mli nɛɛ akɛ “amanehulu kpeteŋkpele lɛ,” yɛ eshishitsɔɔmɔ diɛŋtsɛ naa lɛ, “amanehulu lɛ kpeteŋkpele ni.”
e Kwɛmɔ “Sanebimɔi ni Jɛ Kanelɔi Adɛŋ” ni yɔɔ August 15, 1990 Buu-Mɔɔ lɛ mli lɛ.
Ani Okaiɔ?
◻ Yoel 3:1-4 kɛ 4:15 mli fai komɛi ba mli yɛ klɛŋklɛŋ afii oha lɛ mli yɛ mɛɛ gbɛ nɔ?
◻ Mɛɛ amanehulu Mateo 24:29 wieɔ he lɛ, ni mɛni hewɔ wɔmuɔ sane naa nakai lɛ?
◻ Mɛɛ ŋwɛi naakpɛɛ okadii Mateo 24:29 wieɔ he lɛ, ni mɛni hewɔ enɛ baanyɛ aba yɛ amanehulu lɛ sɛɛ nɔŋŋ lɛ?
◻ Te Luka 21:26, 28 baaba mli yɛ wɔsɛɛ be mli aha tɛŋŋ?
[Mfoniri ni yɔɔ baafa 16, 17]
He ni sɔlemɔwe lɛ yɔɔ
[He ni Sane lɛ Jɛ]
Pictorial Archive (Near Eastern History) Est.