Ani Abaahere Oyiwala Beni Nyɔŋmɔ Feɔ Enii Lɛ?

“Ni kɛ afooo no gbii lɛ anɔ kpitioo lɛ, kulɛ ahereŋ heloo ko heloo ko yiwala; shi mɛi ni ahala lɛ ahewɔ lɛ, aaafo no gbii lɛ anɔ kpitioo.”—MATEO 24:22.

1, 2. (a) Mɛni hewɔ eja gbɛ akɛ wɔɔnya wɔ wɔsɛɛ be he lɛ? (b) Fɔmɔ su naa miishɛɛ baanyɛ akɔ mɛɛ sanebimɔi ni he hiaa lɛ ahe?

MƐƐ miishɛɛ oyɔɔ yɛ bo diɛŋtsɛ ohe? Ŋmɛnɛ, mɛi pii tsũɔ he-suɔmɔ ni amɛyɔɔ lɛ he nii kɛyashɛɔ shɔŋŋ, amɛ pɛ amɛhe amɛsusuɔ. Ni kɛlɛ, Biblia lɛ ebuuu miishɛɛ ni sa ni wɔyɔɔ yɛ nibii ni saa wɔhe lɛ ahe lɛ fɔ. (Efesobii 5:33) Nɔ ni fata he ji wɔ wɔsɛɛ be ni wɔɔna he miishɛɛ. No hewɔ lɛ, akɛ ooosumɔ ni ole nɔ ni yɔɔ owɔsɛɛ be lɛ sa nakai. Ani oyɛ he miishɛɛ?

² Wɔbaanyɛ wɔna nɔmimaa akɛ Yesu bɔfoi lɛ ná miishɛɛ ni tamɔ nɛkɛ yɛ amɛ wɔsɛɛ be he. (Mateo 19:27) Ebaanyɛ efee akɛ no fata he hewɔ ni mɛi ejwɛ lɛ kɛ Yesu yɔɔ Mu Gɔŋ lɛ nɔ lɛ. Amɛbi akɛ: “Tsɔɔmɔ wɔ be mli ni aaafee nii nɛɛ, kɛ be mli ni nii nɛɛ fɛɛ kwa aaaba mli lɛ he okadi.” (Marko 13:4) Yesu ekuuu ehiɛ eshwieee miishɛɛ ni ayɔɔ yɛ wɔsɛɛ be he lɛ nɔ—nibii ni amɛyɔɔ he miishɛɛ kɛ wɔ nɔ̃. Ema bɔ ni nibii baaba esɛɛnyiɛlɔi lɛ anɔ aha kɛ nɔ ni baajɛ mli aba yɛ naagbee lɛ nɔ mi shii abɔ.

 3. Mɛni hewɔ wɔkɛ hetoo ni Yesu hã lɛ tsaa wɔbe nɛɛ nɔ lɛ?

³ Yesu hetoo lɛ kɛ gbalɛ ni efã titri baaba mli yɛ wɔbe nɛɛ mli lɛ hã. Wɔbaanyɛ wɔna enɛ kɛjɛ jeŋ tai kɛ wɔ afii oha nɛɛ mli tawuui krokomɛi lɛ amli, shikpɔŋ hosomɔi ni kpataa wala babaoo hiɛ, hɔmɔ ni kɛ hela kɛ gbele baa, kɛ tsɛŋemɔ helai—kɛjɛ Spania aja ni ba yɛ hei babaoo yɛ 1918 lɛ nɔ, kɛbashi AIDS hela ni yɔɔ amrɔ nɛɛ lɛ nɔ. Shi kɛlɛ, Yesu hetoo lɛ babaoo hu na emlibaa ni yabote Romabii lɛ ni kpata Yerusalem hiɛ yɛ afi 70 Ŋ.B. ni efata he hu lɛ mli. Yesu bɔ ekaselɔi lɛ kɔkɔ akɛ: “Nyɛlea nyɛhe nɔ kwɛmɔ; ejaakɛ amɛaaŋɔ nyɛ kɛaatee gwabɔi amli, ni aaayi nyɛ yɛ kpeehei lɛ, ni akɛ nyɛ aaadamɔ lumɛi kɛ maŋtsɛmɛi ahiɛ yɛ mihewɔ, koni akɛye amɛ odase.”—Marko 13:9.

Nɔ ni Yesu Gba, kɛ Nɔ ni Ba

 4. Mɛni ji kɔkɔbɔi komɛi ni fata Yesu hetoo lɛ he?

⁴ Yesu tee nɔ kɛteke gbalɛ ni kɔɔ bɔ ni mɛi krokomɛi kɛ ekaselɔi lɛ aaaye aha lɛ he lɛ. Ehɛle amɛ shi hu yɛ bɔ ni esa akɛ amɛ diɛŋtsɛ lɛ amɛfee amɛnii amɛha lɛ he. Akɛ nɔkwɛmɔ nɔ lɛ: “Shi kɛ nyɛna amaŋfɔ nihii nii lɛ . . . akɛ ema he ni esaaa akɛ emaa lɛ (mɔ ni kaneɔ lɛ ha ni eyoo sɛɛ!), no lɛ mɛi ni yɔɔ Yudea lɛ ajo foi aya gɔji lɛ anɔ.” (Marko 13:14) Sane ni tamɔ nakai nɔŋŋ ni yɔɔ Luka 21:20 lɛ kɛɔ akɛ: “Shi kɛ nyɛna akɛ abɔ ŋsara awo Yerusalem he lɛ.” Te fee tɛŋŋ ni enɛ ba mli anɔkwale yɛ eklɛŋklɛŋ mlibaa lɛ mli?

 5. Mɛni tee nɔ yɛ Yudafoi ni yɔɔ Yudea lɛ ateŋ yɛ afi 66 Ŋ.B.?

⁵ The International Standard Bible Encyclopedia (1982) lɛ kɛɔ wɔ akɛ: “Yudafoi lɛ atsui ni enyɔɔɔ amɛmli kwraa lɛ miiya hiɛ yɛ Roma nɔyeli shishi, ni maŋ lɛ nɔkwɛlɔi lɛ yɛ basabasa waa, amɛyi wa, ni amɛyeee anɔkwa. Atuatsemɔ fɛ yɛ faŋŋ mli yɛ afi 66 Ŋ.B. . . . Ta lɛ je shishi beni Hiɛdɔlɔi lɛ shɔ̃ Masada kɛjɛ amɛdɛŋ, ni agbɛnɛ amɛfã ni amɛbatutua Yerusalem yɛ Menahem shishi lɛ. Yɛ nakai beaŋ nɔŋŋ lɛ, akpata Yudafoi ni yɔɔ amralo lɛ maŋtiase ni ji Kaisarea lɛ fɛɛ ahiɛ, ni nɔ fɔŋ feemɔ nɛɛ gbɛ eshwa maŋ muu lɛ fɛɛ mli. Akɛ shika heei ni ashwie ni akpɛ wiemɔ, Afi 1 kɛyashi Afi 5 yɛ nɔ kadi afi nɔ ni atse atua lɛ.”

 6. Mɛni Romabii lɛ fee yɛ Yudafoi atuatsemɔ lɛ he?

⁶ Roma Asraafoi Akuu ni ji Nyɔŋma kɛ Enyɔ ni yɔɔ Cestius Gallus shishi lɛ fã kɛjɛ Siria, ni amɛfite Galilea kɛ Yudea, kɛkɛ ni amɛtutua maŋtiase lɛ, ni amɛhé kooyigbɛ fã lɛ ni ji “Yerusalem, maŋ krɔŋkrɔŋ lɛ.” (Nehemia 11:1; Mateo 4:5; 5:35; 27:53) Beni emuaa nibii ni tee nɔ lɛ naa lɛ, wolokpo ni ji The Roman Siege of Jerusalem lɛ kɛɔ akɛ: “Romabii lɛ kɛ gbii enumɔ bɔ mɔdɛŋ ni amɛkɛ atswere akwɔ gbogbo lɛ, shi amɛwo amɛ foi shii abɔ. Yɛ naagbee lɛ, hefãlɔi lɛ, ni afɔ̃ɔ gaimlibii ni tsoɔ kɛ la ashwieɔ amɛ nɔ lɛ ŋmɛɛ he. Amɛfee testudo—amɛkɛ amɛ tsɛŋi lɛ tsara ni amɛkɛha amɛyiteŋ koni amɛkɛfee hebuu nii amɛha amɛhe,—kɛkɛ ni Roma asraafoi lɛ tsa gbogbo lɛ shishi, ni amɛbɔ mɔdɛŋ ni amɛshã agbó lɛ. Gbeyei kpele mɔmɔ hefalɔi lɛ.” Kristofoi ni yɔɔ maŋ lɛ mli lɛ baanyɛ akai Yesu wiemɔi lɛ ni amɛyoo akɛ, amaŋfɔ nihii nii ko ma he krɔŋkrɔŋ lɛ.a Shi, akɛni awo maŋ lɛ he ka hewɔ lɛ, te aaafee tɛŋŋ ni Kristofoi ni tamɔ nɛkɛ aaajo foi, taakɛ Yesu wo ŋaa lɛ?

 7. Mɛni Romabii lɛ fee beni amɛmiihe amɛye kunim yɛ afi 66 Ŋ.B. lɛ?

⁷ Yinɔsaneŋmalɔ Flavius Josephus wie akɛ: “Cestius [Gallus], ni leee haomɔ ni maŋ ni awo he ka lɛ yɔɔ mli loo gbɔmɛi lɛ ahenumɔi lɛ, kɛɛ esraafoi lɛ akɛ amɛkpa maŋ lɛ tutuamɔ, eŋmɛɛ ehiɛnɔkamɔ lɛ he, eyɛ mli akɛ ayeko enɔ kunim yɛ gbɛ ko nɔ, ni egbala ehe shi kɛjɛ Maŋ lɛ he ni shishinumɔ ko kwraa bɛ enifeemɔ lɛ mli.” (The Jewish War, II, 540 [xix, 7]) Mɛni hewɔ Gallus gbala ehe shi lɛ? Bɔ fɛɛ bɔ ni eyiŋtoo lɛ ji ha lɛ, ehe shi ni egbala lɛ ŋmɛ gbɛ koni Kristofoi lɛ abo Yesu famɔ lɛ toi ni amɛjo foi kɛya gɔji lɛ anɔ kɛya he ni yɔɔ shweshweeshwe.

 8. Mɛni ji shi ni Romabii lɛ teɔ amɛwoɔ Yerusalem lɛ fã ni ji enyɔ lɛ, ni mɛni mɛi ni je mli lɛ na?

⁸ Toiboo bafee yiwalaheremɔ. Etsɛɛɛ ni Romabii lɛ ku amɛsɛɛ ni amɛbaba atuatsemɔ lɛ shi. Tafaa ni tee nɔ yɛ Tatsɛ Tito shishi lɛ ba naagbee kɛ Yerusalem hekawoo, kɛjɛ April kɛyashi August, afi 70 Ŋ.B. Bɔ ni Yudafoi lɛ na amanehulu ni Josephus tsɔɔ mli eha lɛ kanemɔ haa ŋmiŋmi mɔ̃ɔ mɔ. Yɛ mɛi ni gboi beni amɛkɛ Romabii lɛ wuɔ ta lɛ asɛɛ lɛ, Yudafoi akui krokomɛi ni kɛ Yudafoi akui krokomɛi yeee lɛ gbegbee amɛhe, ni hɔmɔ ni ba lɛ ha amɛtsɔmɔ mɛi ni yeɔ gbɔmɛi aloo. Beni Romabii lɛ yeɔ kunim lɛ, no mli lɛ Yudafoi 1,100,000 egboi.b Agbe gbɔmɛi 97,000 ni je mli lɛ ateŋ mɛi komɛi amrɔ nɔŋŋ; ni afee mɛi krokomɛi nyɔji. Josephus kɛɔ akɛ: “Akɛ dade gbokɛlɛi wo mɛi ni eye fe afii nyɔŋma kɛ kpawo lɛ, ni akɛ amɛ tee Mizraim koni amɛyasɔmɔ dɛŋdɛŋ yɛ jɛmɛ, ni Tito kɛ amɛteŋ mɛi pii tee kpokpai lɛ anɔ koni amɛhiɛ ayakpata yɛ jɛmɛ shwɛmɔ hei lɛ kɛtsɔ klante loo kooloi awuiyelɔi anɔ.” Beni atoɔ nɔ ni baaba amɛnɔ lɛ ahe gbɛjianɔ nɛkɛ po mli ni gbokɛlɛfoi 11,000 gboi yɛ hɔmɔ hewɔ.

 9. Mɛni hewɔ Kristofoi lɛ naaa nɔ ni jɛ mli ba Yudafoi lɛ anɔ lɛ eko lɛ, shi mɛɛ sanebimɔi yɔɔ lolo?

⁹ Kristofoi lɛ baanyɛ ada shi akɛ amɛbo Nuntsɔ lɛ kɔkɔbɔɔ lɛ toi, ni amɛjo foi kɛjɛ maŋ lɛ mli dani Roma asraafoi lɛ ku amɛsɛɛ. Nɛkɛ gbɛ nɔ atsɔ ahere amɛyiwala kɛjɛ nɔ ni Yesu tsɛ lɛ ‘amanehulu babaoo ni eko bako ni tamɔ nakai dã kɛjɛ je lɛŋ shishijee mli kɛbashi ŋmɛnɛ, ni asaŋ eko baŋ dɔŋŋ,’ ni ba Yerusalem nɔ lɛ fã lɛ mli. (Mateo 24:21) Yesu kɛfata he akɛ: “Ni kɛ afooo no gbii lɛ anɔ kpitioo lɛ, kulɛ ahereŋ heloo ko heloo ko yiwala; shi mɛi ni ahala lɛ ahewɔ lɛ, aaafo no gbii lɛ anɔ kpitioo.” (Mateo 24:22) Mɛni no tsɔɔ yɛ nakai be lɛ mli, ni mɛni no tsɔɔ ŋmɛnɛ?

10. Te wɔtsɔɔ Mateo 24:22 mli yɛ tsutsu wɔha tɛŋŋ?

¹⁰ Tsutsu lɛ atsɔɔ mli akɛ, ‘heloo ni aaahere amɛyiwala’ lɛ damɔ shi kɛha Yudafoi ni je amanehulu ni ba Yerusalem nɔ lɛ mli yɛ afi 70 Ŋ.B. lɛ. Kristofoi lɛ ejo foi, no hewɔ lɛ Nyɔŋmɔ baanyɛ aha Romabii lɛ kɛ hiɛkpatamɔ ni baa oya aba. Yɛ gbɛ kroko nɔ lɛ, yɛ anɔkwale ni eji akɛ “mɛi ni ahala” lɛ bɛ oshara mli hewɔ lɛ, abaanyɛ afo amanehulu gbii lɛ anɔ kpitioo, koni aŋmɛ gbɛ ni ahere Yudafoi ‘aheloo’ ko yiwala. Anu he akɛ Yudafoi ni je mli lɛ feɔ mɛi ni baaje amanehulu kpeteŋkpele ni baa yɛ wɔgbii nɛɛ amli lɛ mli lɛ ahe mfoniri.—Kpojiemɔ 7:14.

11. Mɛni hewɔ etamɔ nɔ ni esa akɛ asusu Mateo 24:22 mlitsɔɔmɔ lɛ he ekoŋŋ lɛ?

¹¹ Shi ani nakai sane mlitsɔɔmɔ lɛ kɛ nɔ ni tee nɔ yɛ afi 70 Ŋ.B. lɛ kpaa gbee? Yesu kɛɛ akɛ ‘abaahere’ adesa “heloo” ko “yiwala” kɛjɛ amanehulu lɛ mli. Ani okɛ wiemɔ ‘here yiwala’ lɛ baatsu nii ni okɛtsɔɔ gbɔmɛi 97,000 ni je mli lɛ, yɛ anɔkwale ni eji akɛ etsɛɛɛ ni amɛteŋ mɛi akpei abɔ gboi yɛ hɔmɔ hewɔ loo agbe amɛ yɛ shwɛmɔ hei lɛ? Josephus wieɔ shwɛmɔ he ko ni yɔɔ Kaisarea lɛ he akɛ: “Gbɔmɛi ayibɔ ni hiɛ kpata yɛ kooloi ni amɛkɛ amɛ wuu loo yɛ wuu ni amɛkɛ amɛhe wuu loo kɛtsɔ shã ni akɛ la shã amɛ hiɛkãlɔi nɔ lɛ fe 2,500.” Eyɛ mli akɛ amɛgboiii yɛ hekawoo lɛ mli moŋ, shi anyɛŋ akɛɛ akɛ ‘ahere amɛyiwala.’ Ni ani Yesu baabu amɛ akɛ amɛtamɔ mɛi ni yɔɔ miishɛɛ ni baaje “amanehulu kpeteŋkpele” ni baa lɛ mli lɛ?

Ahere Heloo ko Yiwala —Yɛ Mɛɛ Gbɛ Nɔ?

12. Namɛi ji klɛŋklɛŋ afii oha lɛ mli “mɛi ni ahala” ni Nyɔŋmɔ yɔɔ amɛhe miishɛɛ lɛ?

¹² Beni shɛɔ afi 70 Ŋ.B. lɛ, no mli lɛ Nyɔŋmɔ ebuuu heloo naa Yudafoi lɛ akɛ ewebii ni ehala amɛ dɔŋŋ. Yesu tsɔɔ akɛ Nyɔŋmɔ ekpoo nakai maŋ lɛ, ni ebaaha emaŋtiase lɛ, esɔlemɔtsu, kɛ ejamɔ gbɛjianɔtoo lɛ aba naagbee. (Mateo 23:37-24:2) Nyɔŋmɔ hala maŋ hee ko, mumɔŋ Israel. (Bɔfoi lɛ Asaji 15:14; Romabii 2:28, 29; Galatabii 6:16) Mɛi ni feɔ enɛ ji hii kɛ yei ni ahala amɛ kɛjɛ jeŋmaji fɛɛ mli, ni akɛ mumɔ krɔŋkrɔŋ efɔ amɛ mũ. (Mateo 22:14; Yohane 15:19; Bɔfoi lɛ Asaji 10:1, 2, 34, 35, 44, 45) Afii komɛi dani Cestius Gallus aaabatutua amɛ lɛ, Petro ŋma wolo eyaha “mɛi ni [ahala, NW] yɛ tsɛ Nyɔŋmɔ lɛ le ni ele eto momo lɛ naa, [yɛ mumɔ lɛ, NW] hetsuumɔ mli” lɛ. Mɛi ni akɛ mumɔ efɔ amɛ mũ nɛɛ ji “weku ni [ahala, NW] . . . maŋtsɛmɛi ni yeɔ osɔfoi, jeŋmaŋ krɔŋkrɔŋ.” (1 Petro 1:1, 2; 2:9) Nyɔŋmɔ kɛ mɛi ni ahala nɛɛ baaya ŋwɛi ni amɛkɛ Yesu ayaye maŋtsɛ.—Kolosebii 1:1, 2; 3:12; Tito 1:1; Kpojiemɔ 17:14.

13. Mɛɛ shishinumɔ ekolɛ Yesu wiemɔi ni yɔɔ Mateo 24:22 lɛ ná?

¹³ Mɛi ni ahala lɛ ayɔsemɔ nɛɛ yeɔ ebuaa, ejaakɛ Yesu gba akɛ abaafo amanehulu gbii lɛ anɔ kpitioo yɛ “mɛi ni ahala lɛ ahewɔ.” Abaanyɛ atsɔɔ Hela wiemɔ ni atsɔɔ shishi akɛ “yɛ amɛ hewɔ” lɛ hu shishi akɛ ‘ehewɔ’ loo “hewɔ.” (Marko 2:27; Yohane 12:30; 1 Korintobii 8:11; 9:10, 23; 11:9; 2 Timoteo 2:10; Kpojiemɔ 2:3) No hewɔ lɛ, Yesu baanyɛ akɛɛ akɛ, ‘Kɛji akɛ afooo nakai gbii lɛ anɔ kpitioo lɛ, ahereŋ heloo ko yiwala; shi yɛ mɛi ni ahala lɛ ahewɔ lɛ, abaafo no gbii lɛ anɔ kpitioo.’c (Mateo 24:22) Ani nɔ ko ba ni he ba sɛɛnamɔ kɛha Kristofoi ni ahala amɛ ni asa amɛnaa yɛ Yerusalem lɛ loo yɛ ‘amɛ hewɔ’?

14. Mɛɛ gbɛ nɔ ahere “heloo” ko yiwala beni Roma asraafoi lɛ gbala amɛhe shi kɛjɛ Yerusalem he trukaa yɛ afi 66 Ŋ.B. lɛ?

¹⁴ Kaimɔ akɛ, Romabii lɛ fã kɛtsɔ shikpɔŋ lɛ nɔ yɛ afi 66 Ŋ.B., amɛyahe shi yɛ Yerusalem yiteŋgbɛ, ni amɛbɔi gbogbo lɛ shishitsaa. Josephus wie akɛ: “Eji eŋmɛ etsui shi fioo yɛ hekawoo lɛ mli kulɛ eye Maŋ lɛ nɔ kunim amrɔ nɔŋŋ.” Bi ohe akɛ, ‘Mɛni hewɔ Roma asraafoi ni he wa lɛ shi tafaa lɛ trukaa ni amɛgbala amɛhe shi . . . ni “shishinumɔ ko kwraa bɛ enifeemɔ lɛ mli” lɛ?’ Rupert Furneaux, mɔ ni he esa waa yɛ tawuu he yinɔsane mlitsɔɔmɔ mli lɛ wie akɛ: “Yinɔsaneŋmalɔ ko nyɛko ekɛ susumɔ ko ni sa atsɔɔ Gallus yiŋkpɛɛ ni yɔɔ naakpɛɛ ni kɛ oshara ba lɛ mli.” Bɔ fɛɛ bɔ ni yiŋtoo ni yɔɔ sɛɛ lɛ ji lɛ, nɔ ni jɛ mli ba ji akɛ, afo amanehulu lɛ nɔ kpitioo. Romabii lɛ gbala amɛhe shi, ni Yudafoi lɛ tutua amɛ beni amɛkuɔ amɛsɛɛ lɛ. Ni Kristofoi ni afɔ amɛ mu, “mɛi ni ahala” ni asa amɛyi lɛ hu? Hekawoo lɛ ni ajie lɛ tsɔɔ akɛ ahere amɛyiwala kɛjɛ hiɛkpatamɔ ni wo amɛhe gbeyei yɛ amanehulu lɛ mli lɛ mli. No hewɔ lɛ, Kristofoi ni ná afi 66 Ŋ.B. lɛ amanehulu gbii lɛ ni afo nɔ kpitioo lɛ ahe sɛɛ lɛ ji “heloo” ko yiwala ni ahere, ni atsĩ tã yɛ Mateo 24:22 lɛ.

Mɛni Baafee Owɔsɛɛ Be?

15. Mɛni hewɔ obaakɛɛ akɛ esa akɛ Mateo yitso 24 lɛ afee nɔ ni wɔnyaa he waa yɛ wɔgbii nɛɛ amli?

¹⁵ Mɔ ko baanyɛ abi akɛ, ‘Mɛni hewɔ esa akɛ minaa Yesu wiemɔi nɛɛ ashishinumɔ ni mli efee faŋŋ nɛɛ he miishɛɛ?’ Ojogbaŋŋ, yiŋtoi pii yɛ ni aaadamɔ nɔ amu sane naa akɛ, Yesu gbalɛ lɛ baana emlibaa ni da, kɛteke nɔ ni ba, ni afi 70 Ŋ.B. fata he lɛ.d (Okɛto Mateo 24:7; Luka 21:10, 11; Kpojiemɔ 6:2-8 he.) Yehowa Odasefoi kɛ afii nyɔŋmai abɔ eshiɛ akɛ, emlibaa wulu ni yaa nɔ yɛ wɔbei nɛɛ amli lɛ yeɔ odase akɛ wɔbaanyɛ wɔkpa “amanehulu babaoo” ni da ni ka wɔhiɛ nɔŋŋ lɛ gbɛ. Mɛɛ gbɛ nɔ aaatsɔ ni gbalɛ wiemɔi ni yɔɔ Mateo 24:22 lɛ aba mli beni enɛ yaa nɔ lɛ?

16. Mɛɛ anɔkwa sane ko ni woɔ mɔ hewalɛ Kpojiemɔ kɛhaa yɛ amanehulu kpeteŋkpele ni bɛŋkɛɔ lɛ he?

¹⁶ Bɔfo Yohane ŋma Kpojiemɔ wolo lɛ yɛ Yerusalem amanehulu lɛ sɛɛ aaafee afii nyɔŋmai enyɔ. Ema nɔ mi akɛ amanehulu kpeteŋkpele yɛ hiɛ ni miiba. Ni akɛni wɔyɔɔ nɔ ni kɔɔ wɔhe diɛŋtsɛ lɛ he miishɛɛ hewɔ lɛ, ekolɛ wɔtsui baanyɔ wɔmli akɛ wɔɔle akɛ, Kpojiemɔ maa nɔ mi kɛhaa wɔ yɛ gbalɛ naa akɛ, adesa heloo ko baahi wala mli kɛtsɔ amanehulu kpeteŋkpele ni baa nɛɛ mli. Yohane gba “asafo babaoo . . . ni jɛ jeŋmaŋ fɛɛ jeŋmaŋ, kɛ akutsei, kɛ maji, kɛ majianɔ wiemɔi amli.” Namɛi nɛ? Gbee ko ni jɛ ŋwɛi ha hetoo: “Mɛnɛɛmɛi ji mɛi ni jɛ amanehulu kpeteŋkpele lɛ mli lɛ.” (Kpojiemɔ 7:9, 14) Hɛɛ, amɛyi baana wala! Kpojiemɔ haa wɔleɔ bɔ ni nibii baaba lɛ aha yɛ amanehulu kpeteŋkpele ni baa lɛ mli, kɛ bɔ ni Mateo 24:22 baaba mli aha.

17. Mɛni baafata amanehulu kpeteŋkpele lɛ shishijee fã lɛ he?

¹⁷ Amanehulu nɛɛ shishijee fã lɛ baafee tutuamɔ ni akɛaaba mfoniri feemɔŋ ajwamaŋ ni atsɛɔ lɛ “Babilon Kpeteŋkpele” lɛ nɔ. (Kpojiemɔ 14:8; 17:1, 2) Edamɔ shi kɛha jeŋ muu fɛɛ apasa jamɔ maŋtsɛyeli lɛ, ni Kristendom ji efã ni anyaŋeɔ fe fɛɛ lɛ. Taakɛ wiemɔi ni yɔɔ Kpojiemɔ 17:16-18 tsɔɔ lɛ, Nyɔŋmɔ kɛbaawo maŋkwramɔŋ gbɛjianɔtoo lɛ tsui mli ni etutua nɛkɛ mfoniri feemɔŋ ajwamaŋ nɛɛ.e Susumɔ bɔ ni enɛ aaatamɔ yɛ mɛi ni Nyɔŋmɔ efɔ amɛ mu ni “ahala” lɛ kɛ amɛ hefatalɔi “asafo babaoo” lɛ ahiɛ lɛ he. Beni tutuamɔ ni akɛkpataa jamɔ hiɛ nɛɛ yaa nɔ lɛ, ebaafee tamɔ nɔ ni ebaakpata jamɔ gbɛjianɔtoi fɛɛ hiɛ, ni Yehowa webii fata he.

18. Mɛni hewɔ ekolɛ ebaafee tamɔ nɔ ni ahereŋ “heloo” ko yiwala yɛ amanehulu kpeteŋkpele lɛ shishijee fã lɛ mli lɛ?

¹⁸ Biɛ ji he ni Yesu wiemɔi ni anaa yɛ Mateo 24:22 lɛ baaba mli yɛ gbɛ ni da nɔ lɛ. Beni efee tamɔ nɔ ni mɛi ni ahala amɛ ni yɔɔ Yerusalem lɛ ebaje oshara mli lɛ, ebaafee tamɔ nɔ ni oshara yɛ akɛ abaakpata Yehowa tsuji lɛ ahiɛ yɛ tutuamɔ ni akɛbaa jamɔ nɔ lɛ mli, tamɔ nɔ ni nakai tutuamɔ lɛ baakpata Nyɔŋmɔ webii ‘aheloo’ fɛɛ hiɛ. Kɛlɛ, nyɛhaa nɔ ni ba yɛ afi 66 Ŋ.B. lɛ ahia wɔjwɛŋmɔ mli. Afo amanehulu ni Romabii lɛ kɛba lɛ anɔ kpitioo, ni enɛ ŋmɛ gbɛ koni mɛi ni Nyɔŋmɔ efɔ amɛ mu ni ehala amɛ lɛ ana hegbɛ ni fa ni amɛkɛjo foi ni amɛhi wala mli. No hewɔ lɛ, wɔbaanyɛ wɔna nɔmimaa akɛ, aŋmɛŋ gbɛ koni tutuamɔ ni akɛkpataa jamɔ hiɛ lɛ agbe jeŋ muu fɛɛ anɔkwa jalɔi asafo lɛ fɛɛ. Ekɛ oyaiyeli baaya nɔ, tamɔ yɛ “gbi kome nɔ.” Shi, abaafo nɔ kuku yɛ gbɛ ko nɔ, ni aŋmɛŋ gbɛ ni egbe eyiŋtoo lɛ naa, bɔni afee ni anyɛ ‘ahere’ Nyɔŋmɔ webii ‘ayiwala.’—Kpojiemɔ 18:8.

19. (a) Yɛ amanehulu kpeteŋkpele lɛ klɛŋklɛŋ fã lɛ sɛɛ lɛ, mɛni baaje kpo faŋŋ? (b) Enɛ kɛ mɛni baaba?

¹⁹ No sɛɛ lɛ, Satan Abonsam shikpɔŋ nɔ gbɛjianɔtoo lɛ mli nibii krokomɛi lɛ baaya nɔ kɛyashi be ko, ni amɛbaawo yara akɛni amɛnyɛɛɛ amɛkɛ amɛ tsutsu jamɔŋ hemɔ lɛ aye sharamɔ dɔŋŋ hewɔ. (Kpojiemɔ 18:9-19) Ebaashɛ he ko ni amɛbaana akɛ Nyɔŋmɔ anɔkwa tsuji lɛ yɛ, “ni amɛhiɔ shi shweshweeshwe, ni amɛ fɛɛ amɛhiɔ shi ni amɛbɛ gbogbo,” ni amɛtamɔ mɛi ni nine baanyɛ ashɛ amɛnɔ oya. Mɛɛ naakpɛɛ sane akɛto aha amɛ nɛkɛ! Nyɔŋmɔ baate shi yɛ kojomɔ mli eshi ehenyɛlɔi lɛ yɛ amanehulu kpeteŋkpele lɛ naagbee fã lɛ mli, koni ekɛtsu tutuamɔ diɛŋtsɛ ni akɛbaa etsuji lɛ anɔ, loo akɛwoɔ amɛhe gbeyei lɛ he nii.—Ezekiel 38:10-12, 14, 18-23.

20. Mɛni hewɔ amanehulu kpeteŋkpele lɛ fã ni ji enyɔ lɛ kɛ Nyɔŋmɔ webii woŋ oshara mli lɛ?

²⁰ Amanehulu kpeteŋkpele lɛ fã ni ji enyɔ nɛɛ baatamɔ nɔ ni ba Yerusalem kɛ emli bii lɛ anɔ yɛ tutuamɔ ni ji enyɔ ni Romabii lɛ kɛba yɛ afi 70 Ŋ.B. mli lɛ. Ebaafee “amanehulu babaoo . . . ni anako nɔ dã kɛjɛ je lɛŋ shishijee mli kɛbashi [no beaŋ], ni asaŋ anaŋ enɔ gbi ko gbi ko dɔŋŋ.” (Mateo 24:21) Shi, wɔbaanyɛ wɔna nɔmimaa akɛ, mɛi ni Nyɔŋmɔ ehala amɛ lɛ kɛ amɛ hefatalɔi lɛ ehiŋ he ni oshara yɔɔ lɛ, koni eba lɛ akɛ aaagbe amɛ. Oo, no mli lɛ amɛjoko foi kɛyako shikpɔŋ lɛ nɔ fã ko. Klɛŋklɛŋ afii oha lɛ mli Kristofoi ni yɔɔ Yerusalem lɛ nyɛ amɛjo foi kɛjɛ nakai maŋtiase lɛ mli kɛtee gɔji akpokpaa lɛ anɔ, tamɔ Pela yɛ Yordan sɛɛ. Shi, yɛ wɔsɛɛ be mli lɛ, abaana Nyɔŋmɔ anɔkwa Odasefoi lɛ yɛ shikpɔŋ lɛ fɛɛ nɔ, no hewɔ lɛ, shweshweeshwe feemɔ damɔŋ shikpɔŋ lɛ fã ko nɔ hilɛ nɔ.

21. Namɛi kɛ amɛhe baawo naagbee tawuu lɛ mli, ni mɛni baajɛ mli aba?

²¹ Hiɛkpatamɔ lɛ jeee nɔ ni Roma asraafoi loo adesa gbɛjianɔtoo ko kɛbaaba. Shi moŋ, Kpojiemɔ wolo lɛ tsɔɔ akɛ blafoi tabilɔi lɛ jɛ ŋwɛi. Hɛɛ, jeee adesai asraafoi baatsu nakai amanehulu kpeteŋkpele lɛ naagbee fã lɛ he nii, shi moŋ “Nyɔŋmɔ Wiemɔ Lɛ,” Maŋtsɛ Yesu Kristo, ni “tai ni yɔɔ ŋwɛi” lɛ miiye kɛmiibua, ni Kristofoi ni afɔ amɛ mu ni atee amɛ shi lɛ fata amɛhe lɛ. ‘Maŋtsɛmɛi a-Maŋtsɛ kɛ nuntsɔmɛi a-Nuntsɔ’ lɛ baatsu hiɛkpatamɔ ko ni mɔɔ shi jogbaŋŋ kwraa fe bɔ ni Roma asraafoi lɛ fee yɛ afi 70 Ŋ.B. lɛ he nii. Ebaajie adesai ni teɔ shi woɔ Nyɔŋmɔ lɛ fɛɛ—maŋtsɛmɛi, tatsɛmɛi, odehei kɛ nyɔ̃ji, mɛi bibii kɛ mɛi wuji kɛya. Adesai agbɛjianɔtoi po ni yɔɔ Satan je lɛ mli lɛ kɛ amɛ naagbee baakpe.—Kpojiemɔ 2:26, 27; 17:14; 19:11-21; 1 Yohane 5:19.

22. Abaahere “heloo” ko yiwala yɛ mɛɛ shishinumɔ kroko mli?

²² Kaimɔ akɛ, no mli lɛ ahere “heloo,” ni ji shwɛɛnii ni afɔ amɛ mu lɛ kɛ “asafo babaoo” lɛ ayiwala momo, yɛ be mli ni Babilon Kpeteŋkpele lɛ hiɛ kpata kwraa yɛ oyaiyeli mli yɛ amanehulu lɛ klɛŋklɛŋ fã lɛ mli lɛ. Nakai nɔŋŋ hu yɛ amanehulu lɛ naagbee fã lɛ mli lɛ, abaahere “heloo” ni ejo foi kɛtee Yehowa masɛi lɛ yiwala. Kwɛ bɔ ni ebaasoro enɛ yɛ nɔ ni jɛ mli ba kɛha Yudafoi atuatselɔi lɛ yɛ afi 70 Ŋ.B. mli lɛ!

23. “Heloo” ni abaahere amɛyiwala lɛ baanyɛ akpa mɛni gbɛ?

²³ Beni osusuɔ nɔ ni baanyɛ aba owɔsɛɛ be kɛ osuɔlɔi anɔ̃ he lɛ, kadimɔ nɔ ni awo shi yɛ he yɛ Kpojiemɔ 7:16, 17 lɛ: “Hɔmɔ yeŋ amɛ dɔŋŋ, ni kumai hu yeŋ amɛ dɔŋŋ, ni asaŋ hulu loo latsaa ko esaŋ amɛhe dɔŋŋ; ejaakɛ [Toobi lɛ, NW] ni yɔɔ maŋtsɛsɛi lɛ teŋ lɛ aaalɛ amɛ, ni eeetsɔɔ amɛ gbɛ kɛaatee wala nu bui ahe, ni Nyɔŋmɔ aaatsumɔ amɛhiɛaŋ yaafonui fɛɛ.” Yɛ anɔkwale mli lɛ, no ji ‘aahere oyiwala’ diɛŋtsɛ, yɛ shishinumɔ ni yɔɔ naakpɛɛ ni hiɔ shi daa lɛ naa.

[Shishigbɛ niŋmai]

Te Obaaha Hetoo Oha Tɛŋŋ?

◻ Mɛɛ fãi enyɔ yɔɔ Roma asraafoi lɛ ni tutua Yerusalem lɛ mli?

◻ Mɛni hewɔ enyɛŋ eba akɛ Yudafoi 97,000 ni yi na wala yɛ afi 70 Ŋ.B. lɛ ji “heloo” ni atsĩ tã yɛ Mateo 24:22 lɛ?

◻ Mɛɛ gbɛ nɔ atsɔ afo Yerusalem amanehulu gbii lɛ anɔ kpitioo yɛ, ni ahere “heloo” ko yiwala nɛkɛ yɛ mɛɛ gbɛ nɔ?

◻ Mɛɛ gbɛ nɔ abaatsɔ afo gbii lɛ anɔ kpitioo ni ahere “heloo” ko yiwala, yɛ amanehulu kpeteŋkpele ni baa lɛ mli?

[Mfoniri ni yɔɔ baafa 16]

Yudafoi ashika ni ashwie yɛ atuatsemɔ lɛ sɛɛ. Niŋmaa ni yɔɔ Hebri mli lɛ kɛɔ akɛ, “Afi ni ji enyɔ,” ni ji afi 67 Ŋ.B., amɛhe nɔ yeli afi ni ji enyɔ

[He ni Sane lɛ Jɛ]

Pictorial Archive (Near Eastern History) Est.

[Mfoniri ni yɔɔ baafa 17]

Roma shika ni ashwie yɛ afi 71 Ŋ.B. Nɔ ni yɔɔ abɛkugbɛ ji Roma asraafonyo; nɔ ni yɔɔ ninejurɔgbɛ ji Yudayoo ni miifo. Wiemɔi “IVDAEA CAPTA” lɛ shishi ji “Yudea Nomi”

[He ni Sane lɛ Jɛ]

Pictorial Archive (Near Eastern History) Est.