Bɔ Ni Fee Ni Kristofoi Agbɛkwɛmɔ Laaje

YESU kɛɛ ekaselɔi lɛ ni amɛya nɔ ‘amɛshi’ beni eba lɛ kɛ e-Maŋtsɛyeli lɛ baa lɛ he ‘kpe.’ (Marko 13:​17, NW) Odaseyelii babaoo yɛ Kristofoi a-Hela Ŋmalɛi lɛ amli ni tsɔɔ akɛ klɛŋklɛŋ afii oha lɛ mli Kristofoi lɛ fee nakai pɛpɛɛpɛ. Yɛ anɔkwale mli lɛ, mɛi komɛi po bafee mɛi ni tsui yeɔ yɛ he. (2 Tesalonikabii 2:​1, 2) Yɛ gbɛ kroko nɔ lɛ, bɔni afee ni atsĩ Kristofoi agbɛkwɛmɔ nɛɛ ni he aaajɔ lɛ naa lɛ, Paulo, Yakobo, Petro kɛ Yohane fɛɛ ŋmala woji ni woɔ amɛnyɛmimɛi lɛ ŋaa ni amɛhiɛ ahi amɛhe nɔ yɛ mumɔŋ yɛ be mli ni amɛkɛ tsuishitoo mɛɔ beni Kristo “eba” lɛ kɛ “Yehowa gbi” lɛ.​—Hebribii 10: 25, 37; Yakobo 5:​7, 8; 1 Petro 4:7; 2 Petro 3:​1-15; 1 Yohane 2:​18, 28.

Nibii amlipɛimɔ he wolo ko ni Kristendom yinɔsaneŋmalɔi kɛ jamɔ he nilelɔi ŋma ha lɛ yɔseɔ anɔkwasane nɛɛ. French Katolek Dictionaire de la Bible wolo ko ni ji Supplement lɛ ni saji pii yɔɔ mli ni ale jogbaŋŋ lɛ jaje akɛ: “Sɛɛnamɔ bɛ he kwraa akɛ aaabɔ mɔdɛŋ yɛ gbɛ fɛɛ gbɛ nɔ ákɛ aaakwa naagbee lɛ he gbɛkwɛmɔi ni jeɔ kpo yɛ Kpaŋmɔ Hee lɛ mli ŋmalɛi lɛ amli lɛ akɛ ebɛ mli. . . . Porousia. [ba ni eba] lɛ he gbɛkwɛmɔ lɛ tsu nɔ titri ni eyaa nɔ nakai nɔŋŋ kɛjɛɔ K[paŋmɔ] H[ee] lɛ naagbee kome kɛyaa ekroko lɛ naagbee. . . . yɛ mra be mli Kristojamɔ mli.”

Shi mɛni hewɔ Kristendom Nyɔŋmɔ jamɔ he nilelɔi lɛ ateŋ mɛi komɛi bɔɔ “mɔdɛŋ yɛ gbɛ fɛɛ gbɛ nɔ amɛkpooɔ akɛ naagbee lɛ he gbɛkwɛmɔi . . . ” ni jeɔ kpo yɛ klɛŋklɛŋ Kristofoi lɛ ateŋ lɛ “bɛ mli” lɛ? Ŋwanejee ko bɛ he akɛ koni amɛkɛbu mumɔŋ hewalɛ ni bɛ ni jeɔ kpo ŋmɛnɛ yɛ mɛi pii ni tsɛɔ amɛhe Kristofoi lɛ kɛ amɛmumɔŋ hiɛnyiɛlɔi lɛ ateŋ lɛ bem. Te fee tɛŋŋ ni nɛkɛ tsakemɔ nɛɛ ba lɛ?

Bɔ Ni Fee Ni Gbɛkwɛmɔ Lɛ Laaje

Kristofoi agbɛkwɛmɔ ni he bajɔ lɛ ji nibii ni ha hemɔkɛyeli kwamɔ ni no mli lɛ eje shishi momo po dani Kristo bɔfoi lɛ gboi lɛ ba lɛ ateŋ ekome. Bɔfo Paulo bɔ kɔkɔ akɛ nakai hemɔkɛyeli kwamɔ lɛ “miitsu nii momo” yɛ Kristofoi asafo ni yɔɔ egbii lɛ amli lɛ mli. (2 Tesalonikabii 2:​3, 4, 7) Afii fioo ko sɛɛ lɛ, bɔfo Petro ha enanemɛi Kristofoi lɛ ahiɛ ba amɛhe nɔ yɛ “amale tsɔɔlɔi” kɛ “hefɛoyelɔi” ni baakɛɛ akɛ: “Nɛgbɛ ba ni eba nɛɛ he shiwoo lɛ yɔɔ? Ejaakɛ kɛjɛ beyinɔ ni wɔtsɛmɛi lɛ tee yawɔwɔi yɛ gbele mli nɛɛ, bɔ ni nibii yɔɔ kɛjɛ jeŋ bɔɔ shishijee mli lɛ, nakai nɔŋŋ amɛyɔɔ nɛɛ” lɛ ahe.​—2 Petro 2:1; 3:​3, 4, NW.

Nɔ ni yɔɔ miishɛɛ ji akɛ, mɛi ni he Ŋmalɛ mli anɔkwale akɛ Yesu shiwoo ni kɔɔ “ba ni eba” lɛ he lɛ baatsɔɔ bɔ ni Kristo Afii Akpe Nɔyeli yɛ shikpɔŋ nɔ lɛ ebɛŋkɛ eha lɛ mɔ Kristofoi agbɛkwɛmɔ kpakpa nɛɛ mli yɛ be ko mli. Justin Martyr (ní gbo aaafee 165 Ŋ.B.) , Irenaeus (ní gbo aaafee 202 Ŋ.B.) kɛ Tertullian (ní gbo yɛ 220 Ŋ.B. lɛ sɛɛ) lɛ fɛɛ hé Kristo Afii Akpe Nɔyeli lɛ amɛye ni amɛkɛɛ akɛ esa akɛ akwɛ ŋmɛnɛŋmɛnɛ yiwalɛ nibii agbɛjianɔtoo nɛɛ naagbee lɛ gbɛ.

Beni be shwieɔ mli ni hemɔkɛyeli kwamɔ lɛ yaa hiɛ lɛ, afii akpe hiɛnɔkamɔ akɛ abaatsake shikpɔŋ lɛ ni afee lɛ je muu fɛɛ paradeiso yɛ Kristo Maŋtsɛyeli lɛ shishi lɛ bafee nɔ ni agbɛnɛ akɛ gbɛkwɛmɔ ko ni damɔ yiŋsusumɔ ni damɔ Hela jeŋ nilee ni kɔɔ adesa susuma ni gbooo lɛ nɔ lɛ bafee nɔ ni agbɛnɛ akɛmiito no najiaŋ fiofio. Agbɛnɛ abatsɔɔ akɛ Paradeiso he hiɛnɔkamɔ lɛ jeee shikpɔŋ nɔ nɔ̃ dɔŋŋ shi moŋ ŋwɛi nɔ̃, ni nine shɛɔ nɔ yɛ gbele sɛɛ. No hewɔ lɛ Kristofoi agbɛkwɛmɔ ni kɔɔ Kristo parousia, aloo ba ni eba lɛ lɛ kɛ e-Maŋtsɛyeli lɛ he lɛ he bajɔ. Amɛsusu akɛ, ‘Mɛni hewɔ esa akɛ ashi kpe kpɛ̃kpɛ̃ɛkpɛ̃ yɛ ba ni Yesu eba lɛ he okadi lɛ he, yɛ be mli ni obaanyɛ ona hiɛnɔkamɔ akɛ obaafata Kristo he yɛ ŋwɛi yɛ gbele sɛɛ?’

Nɛkɛ kpe ni Kristofoi shiɔ ni he bajɔ nɛɛ ha Kristofoi ni amɛkwa hemɔkɛyeli lɛ to gbɛjianɔ ni amɛbua amɛhe naa amɛwo sɔlemɔ mli, mɛi ni agbɛnɛ amɛkwɛɛɛ Kristo parousia ni baa aloo beni eba lɛ dɔŋŋ, shi moŋ emlibii lɛ anɔ ni amɛaaye, aloo kɛ aaahi lɛ, je lɛ nɔ ni amɛaaye. The New Encyclopaedia Britannica lɛ jaje akɛ: “Parousia lɛ baa ni shashao shi lɛ ji nɔ ni eka shi faŋŋ akɛ eha nɔ ni klɛŋklɛŋ sɔlemɔ lɛ kpaa gbɛ lɛ gbɔjɔ. Yɛ nɔ ni ha tsɔɔmɔi ni kɔɔ [“Naagbee Nibii” lɛ ahe lɛ gbɔjɔ] hewɔ lɛ, sɔlemɔ ni amɛto he gbɛjianɔ Iɛ moŋ baye Nyɔŋmɔ Maŋtsɛyeli lɛ najiaŋ agbɛnɛ. Katolek Sɔlemɔ lɛ ni ato ama shi akɛ osɔfoi agbɛjianɔtoo lɛ fata he titri ni gbɛkwɛmɔ ni asusuɔ akɛ ehaa lɛ ba shi kwraa lɛ.”

Agbe Hiɛnɔkamɔ Nɛɛ Kwraa

Sɔlemɔ lɛ “tsɛ” aloo “nilelɔ” ni gbe kpé ni Kristofoi shiɔ nɛɛ kwraa ni ŋwanejee ko bɛ he ji Augustine ni jɛ Hippo lɛ (354-430 Ŋ.B.) . Augustine jaje yɛ eniŋmaa ko ni he gbɛi ni ji The City of God lɛ mli akɛ: “Sɔlemɔ lɛ ni yɔɔ shikpɔŋ nɔ bianɛ lɛ ji Kristo maŋtsɛyeli lɛ kɛ ŋwɛi maŋtsɛyeli lɛ fɛɛ.”

The New Bible Dictionary lɛ tsɔɔ nɔ ni jɛ susumɔ nɛɛ mli ba Katolek Nyɔŋmɔ jamɔ he nitsɔɔmɔ nɔ akɛ: “Yɛ Roma Katolek jamɔ he nitsɔɔmɔ mli lɛ, sɔrɔtofeemɔ ko jɛɔ kpo waa yɛ bɔ ni ayoo Nyɔŋmɔ maŋtsɛyeli lɛ akɛ eji Sɔlemɔ lɛ yɛ eshikpɔŋ nɔ nitsumɔ mli lɛ, ni nɔ ni ha ayoo enɛ titri lɛ jɛ hewalɛ ni Augustine na yɛ mɛi anɔ lɛ. Atsɔ osɔfoi anɔyeli lɛ nɔ abale Kristo akɛ Nyɔŋmɔ maŋtsɛyeli lɛ nɔ Maŋtsɛ. Nyɔŋmɔ maŋtsɛyeli lɛ nɔyeli he lɛ husui tamɔ Sɔlemɔ lɛ hewalɛ kɛ hegbɛ lɛ nɔŋŋ. Ŋwɛi maŋtsɛyeli lɛ mli lɛɛɔ kɛtsɔɔ Sɔlemɔ lɛ ni yɔɔ je lɛ mli lɛ nitsumɔ ni shwereɔ lɛ nɔ.”

Enɛ jie bɔ ni ehe hiaa akɛ ‘aaashi kpe’ kɛha okadi ni baatsɔɔ akɛ Nyɔŋmɔ Maŋtsɛyeli lɛ ebɛŋkɛ lɛ namɔ lɛ kɛtee. Yɛ be mli ni eŋmaa yɛ The New Encyclopaedia Britannica lɛ mli lɛ, Nilelɔ E. W. Benz ma enɛ nɔ mi akɛ: “Lɛ [Augustine] ji mɔ ni ha nɔmimaa akɛ shishijee gbɛkwɛmɔ ni ebɛŋkɛ lɛ laaje kɛtsɔ nɔ ni ejaje akɛ Nyɔŋmɔ Maŋtsɛyeli lɛ eje shishi momo yɛ sɔlemɔ yɛ ni ato ama shi lɛ hewɔ ni sɔlemɔ lɛ ji Nyɔŋmɔ Maŋtsɛyeli ni yɔɔ Shikpɔŋ nɔ lɛ najiaŋdamɔlɔ yɛ yinɔsane mli. Klɛŋklɛŋ shitee lɛ, taakɛ Augustine tsɔɔ lɛ, yaa nɔ daa yɛ sɔlemɔ lɛ mli kɛtsɔɔ Baptisimɔ nifeemɔ ni no nɔ atsɔɔ akɛ anɔkwafoi baa Nyɔŋmɔ Maŋtsɛyeli lɛ mli lɛ nɔ.”

Augustine hu ji mɔ ni yɛ naagbee Iɛ eha Kristendom kwa Ŋmalɛ naa hiɛnɔkamɔ ni ji Yesu Kristo Afii Akpe Nɔyeli lɛ ni emli ni ebaasaa eto Paradeiso yɛ shikpɔŋ nɔ lɛ. (Kpojiemɔ 20:​1-3, 6; 21:​1-5) The Catholic Encyclopedia lɛ kpɛlɛ nɔ akɛ: “St. Augustine kpɛlɛ nɔ yɛ naagbee akɛ Afii Akpe ko baŋ . . . Afii Akpe hejɔɔmɔ gbi ni baanyiɛ afii akpei ekpaa yɛ yinɔsane mli lɛ sɛɛ lɛ ji naanɔ wala muu lɛ fɛɛ; aloo, yɛ gbɛ kroko nɔ lɛ, aatao ni akɛ yinɔ ni ji akpe lɛ ato emuuyeli he.” Britannica Macropaedia (1977) lɛ kɛfata he akɛ: “Kɛha [Augustine] lɛ, afii akpe lɛ ebatsɔ mumɔŋ shihilɛ ni Sɔlemɔ muu lɛ fɛɛ bote mli yɛ Pentekoste. . . . Akpaaa hewalɛ ko ni fe adebɔɔ mli nɔ̃ ni miiba ni kɛ ehe baawo mli yɛ yinɔsane mli lɛ gbɛ.” No hewɔ lɛ kɛha Katolekbii lɛ, sɔlemɔ ni ji, “omaŋtsɛyeli lɛ lɛ aba” lɛ baafee nɔ ni shishinumɔ bɛ he.

Teŋgbɛ Afii Lɛ Amli Duŋ Kpii Lɛ

Akɛɛ wɔ akɛ Augustine shishitsɔɔmɔ lɛ “bafee tsɔɔmɔ ni afo afɔ shi yɛ teŋgbɛ afii lɛ amli.” No hewɔ lɛ Kristofoi agbɛkwɛmɔ lɛ ba shi kwraa fe be fɛɛ yɛ nakai be lɛ mli. Wɔkaneɔ akɛ: “Yɛ Kristendom ni hi shi yɛ teŋgbɛ afii lɛ amli lɛ be lɛ mli lɛ, aha Kpaŋmɔ Hee lɛ tsɔɔmɔ ni kɔɔ naagbee nibii ahe lɛ gbɛhe akɛ etamɔ tsɔɔmɔ ko ni Sɔlemɔ lɛ kɛba ni abaahe aye kɛkɛ ni abiii he sane, ni klɛŋklɛŋ lɛ eshishitoo ni jɛ jeŋ nilee mli lɛ damɔ Platonistic [ni jɛ Hela nilelɔ Plato] kɛ agbɛnɛ, yɛ sɛɛ mu lɛ, yɛ anaigbɛ, Aristotelian [ni jɛ Hela jeŋ nilelɔ Aristotle] lɛ tsɔɔmɔ nɔ. Shishijee hemɔkɛyelii ni kɔɔ parousia, (ba ni eba) lɛ kɛ gbohiiashitee kɛ ekrokomɛi lɛ ahe lɛ bafee nɔ ni akɛ Hela susumɔi ni kɔɔ susuma lɛ kɛ shihilɛ ni gbele bɛ mli lɛ he lɛ efutu. . . . Teŋgbɛ afii lɛ amli Kristojamɔ lɛ shiii gbɛhe ko kwraa kɛhaaa naagbee nibii ahenumɔ lɛ. Shi kɛlɛ, nɛkɛ henumɔ nɛɛ gboko; eyɛ “musubɔlɔi akui” (taakɛ Katolek jamɔ lɛ tsɛɔ amɛ) lɛ ekomɛi amli lolo.”​—Encyclopaediɔ Britannica, 1970 nɔ.

Roma Katolek Sɔlemɔ lɛ wieɔ nɛkɛ “musubɔlɔi akui” nɛɛ ahe efɔŋ, ni amɛtsɛɔ amɛ “afii akpe jamɔ kui.” Eyinɔsaneŋmalɔi yeɔ “Afii 1,000 Hegbeyeiwoo” he fɛo. Shi tɔmɔ akɛ je lɛ baaba naagbee yɛ afi ni ji 1,000 lɛ mli lɛ ni gbɔmɛi foji babaoo heɔ yeɔ lɛ he tɔmɔ lɛ jɛ namɔ? Nɛkɛ “hegbeyeiwoo” nɛɛ jɛ Katolek “Hetselɔ” Augustine Nyɔŋmɔ jamɔ he tsɔɔmɔ lɛ diɛŋtsɛ. Ekɛɛ akɛ afimɔ Satan beni Kristo pue yɛŋ klɛŋklɛŋ be mli kwraa lɛ. Ni akɛni Kpojiemɔ 20:​2, 7, 8 kɛɔ akɛ abaafimɔ Satan afii 1,000, ni agbɛnɛ “no sɛɛ lɛ ja afɛne lɛ be fioo ko . . . ni eyashishiu jeŋmaji lɛ” (The Jerusalem Bible) lɛ hewɔ lɛ, ebɛ naakpɛɛ mɔ akɛ gbɔmɛi komɛi hi shi yɛ afii ohai nyɔŋma lɛ mli ni she nɔ ni baaba yɛ afi 1,000 lɛ mli lɛ gbeyei.

No hewɔ lɛ, taakɛ wɔɔkpa gbɛ lɛ; Roma Katolek Sɔlemɔ lɛ wie eshi nɛkɛ “hegbeyeiwoo” nɛɛ taakɛ efee Cistercian Abbot Joachim ni jɛ Flora, ni gba akɛ Kristofoi abe lɛ baaba naagbee afi 1260 lɛ. Yɛ naagbee lɛ, yɛ afi 1516 lɛ, yɛ Sɔlemɔ lɛ gwabɔɔ ko ni atsɛ lɛ akɛ Fifth Lateran Council lɛ shishi lɛ, Paapa Leo X fee mla akɛ eegu Katolekbii fɛɛ akɛ amɛkagba be mli ni Antikristo lɛ kɛ Naagbee Kojomɔ lɛ baaba lɛ kwraa. Nɔ ni afeɔ mɔ ni kuɔ mla ni tamɔ nɛkɛ mli lɛ ji shwiemɔ ni ashwieɔ lɛ kɛjɛɔ sɔlemɔ lɛ mli!

Protestant Jwɛŋmɔ Saamɔ

Yɛ wolo hiɛ lɛ, kulɛ esa akɛ afii ohai 16 Tsakemɔ lɛ kɛ nɔ ni akɛɛ akuɔ sɛɛ ayaa Biblia lɛ he lɛ aha ana ni Kristofoi agbɛkwɛmɔ lɛ miite shi ekoŋŋ. Ni efee nakai hu yɛ be ko mli. Shi yɛ enɛ mli hu, taakɛ eji yɛ ekrokomɛi babaoo hu mli lɛ, Tsakemɔ lɛ haaa eshiwooi lɛ aba mli. Ekadiii anɔkwale Biblia mli Kristojamɔ ni aaku sɛɛ aya he. Protestant sɔlemɔi lɛ ni afɔ amɛ yɛ Tsakemɔ lɛ sɛɛ lɛ laaje kpé ni amɛshiɔ akɛ Kristofoi lɛ oyayaayai, ni amɛkɛ ŋmɛnɛŋmɛnɛ je nɛɛ bakpa gbee.

Wɔkaneɔ akɛ: “Shi etsɛɛɛ ni Tsakemɔ lɛ sɔlemɔi lɛ batsɔmɔ [maŋ] sɔlemɔi agbɛjianɔtooi ni hiɛ shikpɔŋkukuji, ni amɛ hu amɛbanyɛ naagbee be gbɛkwɛmɔ lɛ nɔ, ni eha ‘naagbee nibii’ lɛ ahe tsɔɔmɔ lɛ batsɔ sane bibioo ko ni ehe ehiaaa ni akɛfataa hemɔkɛyeli he tsɔɔmɔ ni abiii sane yɛ he lɛ he yɛ enaagbee gbɛ.” “Yɛ jamɔ mli heyeli ni fa kpo lɛ mli lɛ, titri lɛ yɛ Protestant kɛ Yudafoi ateŋ lɛ, kɛmiiba afii ohai 18 kɛ 19 naagbee be lɛ, no mli lɛ naagbee nibii ahe tsɔɔmɔ lɛ bɛ gbɛhe ko kwraa. Abu enɛ akɛ blema jamɔ he nibii komɛi ni akɛwula lɛ ni ebe eho ni ebɛ fɛo hu ni mɛi ni hiŋmɛi gbeleko lɛ diɔ sɛɛ, ni akpɛlɛɛɛ nɔ dɔŋŋ yɛ hiŋmɛigbelemɔ yinɔ lɛ mli. Hei komɛi po yɛ ni aŋmɛɛ naagbee nibii ahe susumɔ lɛ he kwraa, ni susuma ni gbooo he tsɔɔmɔ ni ji blema nibii amlitii lɛ ji nɔ ni akɛma shi akɛ gbɔmɔ naagbee. Nyɔŋmɔ jamɔ he tsɔɔlɔi krokomɛi ku sɛɛ amɛtsɔɔ Nyɔŋmɔ Maŋtsɛyeli lɛ gbɛkwɛmɔ lɛ shishi akɛ eji nɔ ko ni kɔɔ jeŋba, nɔ ko ni tamɔ teemɔŋ sane aloo kwasafoŋ nifeemɔ ko he.”​—Encyclopædia Britannica

No hewɔ lɛ, ni amɛaaye amɛbua Kristofoi ni ‘amɛshi’ ba ni Kristo eba lɛ kɛ Nyɔŋmɔ Maŋtsɛyeli ni baa lɛ he ‘kpe’ lɛ, Protestant Nyɔŋmɔ jamɔ he tsɔɔlɔi ejie jwɛŋmɔ ni kɔɔ anɔkwale Kristofoi agbɛkwɛmɔ he lɛ kɛtee. Yɛ amɛteŋ mɛi pii agbɛfaŋ lɛ, “Nyɔŋmɔ maŋtsɛyeli lɛ . . . bafee nɔ ko ni aŋkroaŋkroi baanu shishi aha amɛ diɛŋtsɛ amɛhe yɛ be babaoo mli; eji duromɔ kɛ toiŋjɔlɛ ni baaye lumɔ yɛ gbɔmɛi atsuii amli.” Kɛha mɛi krokomɛi lɛ, “maŋtsɛyeli lɛ baa ji kwasafoŋ shihilɛ mli tsakemɔ yɛ jalɛ gbɛ nɔ kɛ nɔyaa yɛ akutseiaŋ.”​—The New Bible Dictionary (Protestant) .

Katolek Gbɛkwɛmɔi

Kɛ hoo lɛ, yɛ wolo hiɛ, aloo kɛ aka yiŋ awie lɛ, esa akɛ Katolekbii ashi kpe yɛ mumɔŋ ni amɛkwɛ ba ni Kristo eba lɛ gbɛ. Yɛ Augustine jamɔ he tsɔɔmɔ ni kɛ Maŋtsɛyeli gbɛkwɛmɔ kɛ afii akpe hiɛnɔkamɔ kɛha Katolekbii lɛ ba naagbee lɛ fɛɛ sɛɛ lɛ, nɔ ni fata Roma Sɔlemɔ lɛ tsɔɔmɔ ni abiii he sane lɛ he ji Kristofoi anitsumɔ akɛ amɛshi Kristo sɛɛkuu lɛ he kpe. Akɛ nɔkwɛmɔ nɔ, Vatican Asafo lɛ Hemɔkɛyeli he Tsɔɔmɔ lɛ kɛ wolo ko ni Paapa John Paul II ekpɛlɛ nɔ ni aŋma yɛ May 17, 1979 ni akɛyaha Katolek osɔfonukpai ni yɔɔ jeŋ fɛɛ akɛ wolo lɛ jaje akɛ: “Taakɛ Ŋmalɛi lɛ tsɔɔ lɛ, Sɔlemɔ lɛ miimɛ wɔ Nuŋtsɔ Yesu Kristo ‘anunyam kpojiemɔ lɛ.’”

Bɔ ni Katolek Sɔlemɔ lɛ tsɔɔmɔ ni aka yiŋ awie lɛ yɔɔ nɛ. Shi ekɛ nitsumɔ diɛŋtsɛ lɛ, shii enyiɛ Katoleknyo ko enu ni esɔfo lɛ miishiɛ yɛ bɔ ni ehe hiaa akɛ aaaya nɔ ashi Kristo ba ni eba lɛ kɛ Nyɔŋmɔ Maŋtsɛyeli lɛ baa lɛ he kpe?

Kristofoi Akpeshii Lɛ Gboko

Kristofoi agbɛkwɛmɔi laaje yɛ Kristendom sɔlemɔi lɛ amli ejaakɛ amɛkpoo Biblia mli anɔkwalei ni mli ka shi faŋŋ lɛ ni amɛhala akɛ amɛaanyiɛ Hela jeŋ nilee kɛ Augustine “hetselɔ” lɛ jamɔ he tsɔɔmɔi lɛ asɛɛ. Saji ni aŋmala ni nyiɛ sɛɛ nɛɛ baatsɔɔ akɛ Nyɔŋmɔ anɔkwale sɔɔlɔi lɛ etee nɔ amɛhi shi akɛ mɛi ni kwɛɔ ba ni Kristo eba lɛ gbɛ yɛ be fɛɛ mli, ni ákɛ gbɔmɛi yɛ ŋmɛnɛ ni amɛtee nɔ amɛjie amɛhe kpo akɛ Kristofoi ni amɛshi kpe yɛ afii lɛ amli ni amɛyoo naakpɛɛ hiɛnɔkamɔ ko ni baanyɛ afee bo hu onɔ. Ofainɛ yaa nɔ okane ni obi Yehowa Odasefoi lɛ ateŋ mɔ ko ni eye ebua bo ‘ni oya nɔ oshi’ Biblia mli hiɛnɔkamɔ lɛ mlibaa he ‘kpe.’

[Wiemɔ ni akɔ ni akɛmiitsu nii ni yɔɔ baafa 5]

“Sɛɛnamɔ bɛ he kwraa . . . akɛ aaabɔ mɔdɛŋ yɛ gbe fɛɛ gbe nɔ ákɛ aaakwa naagbee lɛ he gbɛkwɛmɔi ni jeɔ kpo yɛ Kpaŋmɔ Hee Iɛ mli ŋmalɛi Iɛ amli lɛ”

[Mfoniri ni yɔɔ baafa 6]

Augustine kɛɛ akɛ sɔlemɔ lɛ ni yɔɔ shikpɔŋ nɔ lɛ ji Kristo Maŋtsɛyeli Iɛ

[Mfoniri ni yɔɔ baafa 7]

Paapa Leo X gu akɛ Katoleknyo ko akagba be mli ni Naagbee Kojomɔ Iɛ baabu