Yitso 88

Nuu Niiatsɛ lɛ kɛ Lazaro

YESU kɛ ekaselɔi lɛ miiwie bɔ ni esa akɛ amɛkɛ heloonaa nibii atsu nii jogbaŋŋ lɛ he, ni etsɔɔ mli akɛ wɔnyɛŋ wɔtsɔmɔ nyɔji wɔha enɛɛmɛi ni yɛ nakai beaŋ nɔŋŋ lɛ wɔtsɔmɔ nyɔji wɔha Nyɔŋmɔ hu. Farisifoi lɛ hu miibo lɛ toi, ni amɛbɔi Yesu ŋmɔlɔ kɛ ehefɛoyeli ejaakɛ amɛsumɔɔ shika. No hewɔ lɛ ekɛɛ amɛ akɛ: “Nyɛ ji mɛi ni nyɛbuɔ nyɛhe bem yɛ gbɔmɛi ahiɛ; shi Nyɔŋmɔ lɛ, ele nyɛtsuiiaŋ; ejaakɛ nɔ ni ji gojoo yɛ gbɔmɛi ateŋ lɛ, Nyɔŋmɔ miihi.”

Be eshɛ ni nibii baatsɔ sɛɛsɛɛ aha mɛi ni yɔɔ jeŋ nibii babaoo, maŋkwramɔŋ hewalɛ, kɛ jamɔ mli nɔyeli kɛ hewalɛ lɛ. Abaashɛrɛ amɛ ashwie. Shi kɛlɛ, abaahole mɛi ni hiɛ yɔɔ amɛmumɔŋ hiamɔ nii ahe lɛ anɔ. Yesu tsɔɔ tsakemɔ ni tamɔ nɛkɛ yɛ be mli ni etee nɔ ekɛɛ Farisifoi lɛ nɛkɛ lɛ:

“Mla lɛ kɛ Gbalɔi lɛ yɛ kɛbashi Yohane [Baptisilɔ lɛ] nɔ; Kɛjɛ nakai be lɛ nɔ nɛɛ aashiɛ Nyɔŋmɔ maŋtsɛyeli lɛ he sanekpakpa lɛ, ni mɔ fɛɛ mɔ boteɔ mli ekaa naa. Shi ejaraaa haaa ŋwɛi kɛ shikpɔŋ akɛ amɛaaho aya fe nɔ ni Mla lɛ mli kuli kome aaagbee shi.”

Woloŋmalɔi lɛ kɛ Farisifoi lɛ kɛ bɔ ni amɛnyiɛɔ Mose Mla lɛ sɛɛ lɛ shwãa waa. Kaimɔ akɛ beni Yesu tsɔ naakpɛɛ gbɛ nɔ egbele shwilafo ko hiŋmɛii yɛ Yerusalem lɛ, amɛshwã akɛ: “Wɔ lɛ, Mose kaselɔi ji wɔ. Wɔle akɛ Nyɔŋmɔ kɛ Mose wie.” Shi agbɛnɛ Mose Mla lɛ etsu yiŋtoo ni ehiɛ akɛ enyiɛ heshibalɔi lɛ ahiɛ kɛya Maŋtsɛ ni Nyɔŋmɔ eto, Yesu Kristo ŋɔɔ lɛ he nii. No hewɔ lɛ kɛjɛ Yohane sɔɔmɔ lɛ shishijee mli lɛ, gbɔmɛi sɔrɔtoi fɛɛ, titri lɛ heshibalɔi kɛ ohiafoi lɛ, miimia amɛhiɛ waa ni amɛtsɔmɔ Nyɔŋmɔ Maŋtsɛyeli lɛ shishi bii.

Akɛni agbɛnɛ Mose Mla lɛ miina emlibaa hewɔ lɛ, abaajie enɔ yeli he gbɛnaa nii lɛ kɛjɛ jɛmɛ. Mla lɛ ŋmɛɔ gbalamlitsemɔ gbɛ yɛ yiŋtoo fɛɛ yiŋtoo hewɔ, shi agbɛnɛ Yesu miikɛɛ akɛ: “Mɔ fɛɛ mɔ ni jeee ajwamaŋbɔɔ hewɔ jɛ ni eeeshwie eŋa ni eyawɛ yoo kroko lɛ, efite gbala; ni mɔ fɛɛ mɔ ni wɛɔ yoo ni ashwie lɛ lɛ, lɛ hu efite gbala.” Kwɛ bɔ ni wiemɔi nɛɛ baawo Farisifoi lɛ amlila aha, titri lɛ akɛni amɛŋmɛɔ gbalamlitsemɔ gbɛ yɛ yiŋtoi babaoo ahewɔ lɛ hewɔ!

Yɛ be mli ni eyaa nɔ ekɛ Farisifoi lɛ wieɔ lolo lɛ, Yesu gba amɛ abɛbua ko ni kɔɔ hii enyɔ komɛi ni yɛ naagbee lɛ, amɛgbɛhe loo shihilɛ tsake yɛ naakpɛɛ gbɛ nɔ lɛ ahe. Ani obaanyɛ ona mɛi ni nɛkɛ hii enyɔ nɛɛ damɔ kɛha lɛ, kɛ nɔ ni amɛshihilɛ ni tsake lɛ tsɔɔ?

Yesu tsɔɔ mli akɛ: “Shi nuu niiatsɛ ko ni yɔɔ, ni ewoɔ atade tsuru kɛ klala fɛfɛo, ni enaa tsuijurɔ ni efeɔ fɛo nii daa nɛɛ. Ni ohiafo ko hu yɛ ni atsɛɔ lɛ Lazaro ni ka egbo lɛ naa kɛ ehe faji obɔ, ni ebaa etsine akɛ ena ŋmaa fufuji ni jɛɔ niiatsɛ lɛ okpɔlɔ lɛ nɔ eshwieɔ shi lɛ eye; shi gbeei tete baa amɛbalɛmɔɔ efaji lɛ anɔ.”

Yesu kɛ nuu niiatsɛ lɛ miitsu nii yɛ biɛ ni ekɛdamɔ shi eha Yudafoi ajamɔ mli hiɛnyiɛlɔi, ni jeee Farisifoi lɛ kɛ woloŋmalɔi lɛ pɛ fata he, shi moŋ kɛ Sadukifoi lɛ kɛ osɔfonukpai lɛ hu lɛ. Niiatsɛmɛi ji amɛ yɛ mumɔŋ gbɛnaai kɛ hegbɛi amli, ni amɛfeɔ amɛnii tamɔ nuu niiatsɛ lɛ fee lɛ. Amɛ atadei ni ji abladei atade tsuru lɛ damɔ shi kɛha amɛgbɛhe ni yɔɔ nyam lɛ, ni klala yɛŋ lɛ feɔ jalɔi ni amɛbuɔ amɛ diɛŋtsɛ amɛhe lɛ he mfoniri.

Nɛkɛ nuu niiatsɛ ni woɔ ehe nɔ nɛɛ kuu lɛ buɔ mɛi foji, ni ji maŋbii lɛ kɛ heguɔgbee, ni amɛtsɛɔ amɛ ‛am ha·’aʹrets, aloo shikpɔŋ nɔ bii. No hewɔ lɛ ohiafo Lazaro damɔ shi kɛha nɛkɛ gbɔmɛi nɛɛ ni jamɔ mli hiɛnyiɛlɔi lɛ haaa amɛna mumɔŋ niyenii ni hi kɛ hegbɛi lɛ. No hewɔ lɛ, abuɔ mɛi foji nɛɛ akɛ mɛi komɛi ni mumɔŋ helai miiye amɛ ni no hewɔ lɛ gbeei pɛ amɛbaanyɛ amɛkɛbɔ, tamɔ Lazaro ni faji eyi ehe obɔ lɛ ji lɛ. Shi kɛlɛ, mumɔŋ niyenii he hɔmɔ kɛ kumai yeɔ Lazaro kuu lɛ mlibii lɛ ni no hewɔ lɛ amɛtaraa agbo lɛ naa, ni amɛmiitao ni amɛnine ashɛ mumɔŋ niyenii fufuji bibii fɛɛ ni baashwie shi kɛjɛ niiatsɛ lɛ okpɔlɔ lɛ nɔ lɛ nɔ.

Agbɛnɛ Yesu tee nɔ etsɔɔ tsakemɔi ni ba niiatsɛ lɛ kɛ Lazaro shihilɛi amli lɛ mli. Mɛni ji tsakemɔi nɛɛ, ni mɛni amɛdamɔ shi kɛha?

Niiatsɛ lɛ kɛ Lazaro na Tsakemɔ

Nuu niiatsɛ lɛ damɔ shi kɛha jamɔ mli hiɛnyiɛlɔi ni akɛ mumɔŋ gbɛnaai kɛ hegbɛi eha amɛ lɛ, ni Lazaro feɔ gbɔmɛi foji ni mumɔŋ niyenii he hɔmɔ yeɔ amɛ lɛ ahe mfoniri. Yesu tsa esane lɛ nɔ, ni etsɔɔ tsakemɔ ko ni yɔɔ naakpɛɛ ni ba amɛshihilɛi amli lɛ mli.

Yesu kɛɛ: “Ni eba mli akɛ ohiafo lɛ bagbo, ni ŋwɛibɔfoi bawo lɛ kɛtee Abraham mlishi; ni niiatsɛ lɛ hu bagbo, ni afu lɛ. Ni beni eyɔɔ hejaramɔi amli yɛ gbohiiaje ni eyaahole ehiŋmɛii anɔ lɛ, ena Abraham yɛ shɔŋŋ, kɛ Lazaro ni hɔ emlishi.”

Akɛni niiatsɛ lɛ kɛ Lazaro jeee gbɔmɛi diɛŋtsɛ shi amɛdamɔ shi kɛha gbɔmɛi akui hewɔ lɛ, yɛ shishinumɔ ni ja naa lɛ amɛgbele lɛ hu ji mfonirifeemɔ mli nɔ. Mɛni amɛgbele lɛ feɔ he mfoniri loo edamɔ shi kɛha?

Yesu egbe amɛjwɛŋmɔ ni etsɛ yisɛɛ kɛtee tsakemɔi ni ba amɛshihilɛi amli lɛ nɔ lɛ naa kɛtsɔ wiemɔ ni ewie akɛ ‘Mla lɛ kɛ Gbalɔi lɛ yɛ kɛbashi Yohane Baptisilɔ lɛ nɔ, shi kɛjɛ nakai be lɛ mli kɛyaa lɛ aashiɛ Nyɔŋmɔ maŋtsɛyeli lɛ’ nɔ. No hewɔ lɛ, Yohane kɛ Yesu Kristo shiɛmɔ lɛ nɔ tsɔ ni niiatsɛ lɛ kɛ Lazaro fɛɛ gboi kɛha amɛ tsutsu shihilɛ ni amɛyɔɔ mli lɛ.

Mɛi ni yɔɔ Lazaro heshibalɔ kɛ mɔ ni etsake etsui lɛ kuu lɛ mli lɛ gboi kɛha amɛ tsutsu mumɔŋ ohia shihilɛ lɛ ni amɛbaje Nyɔŋmɔ nɔkpɛlɛmɔ gbɛhe mli. Yɛ be mli ni tsutsu lɛ amɛkwɛɔ jamɔ mli hiɛnyiɛlɔi lɛ agbɛ kɛha nibii bibii ni jɛɔ amɛ okpɔlɔ lɛ nɔ eshwieɔ shi lɛ, agbɛnɛ Ŋmalɛ naa anɔkwalei ni Yesu kɛhaa lɛ miitsu amɛhiamɔ nii lɛ ahe nii. Enɛ hewɔ lɛ akɛ amɛ baa Abraham Kpeteŋkpele, Yehowa Nyɔŋmɔ mlishi, loo gbɛhe ni yɔɔ nyam mli.

Yɛ gbɛ ni tamɔɔɔ nakai nɔ lɛ, mɛi ni feɔ niiatsɛ lɛ kuu lɛ bajeɔ shihilɛ ni Nyɔŋmɔ nɔkpɛlɛmɔ bɛ mli lɛ mli, ejaakɛ amɛyaa nɔ amɛkpooɔ Maŋtsɛyeli lɛ he sane ni Yesu tsɔɔ lɛ. Enɛ hewɔ lɛ amɛgboiɔ yɛ amɛ tsutsu shihilɛ ni tamɔ nɔ ni nɔkpɛlɛmɔ yɔɔ mli lɛ mli. Yɛ anɔkwale mli lɛ, awieɔ amɛhe akɛ amɛyɛ mfonirifeemɔŋ piŋmɔ mli. Agbɛnɛ bo toi, yɛ be mli ni niiatsɛ lɛ wieɔ lɛ:

“Ataa Abraham, naa mi mɔbɔ ni otsu Lazaro ni ekɛ ewao naa ayatsɔ nu mli ni ekɛbajɔɔ mililɛi he, ejaakɛ miina nɔ yɛ lalilɛii nɛɛ mli.” Nyɔŋmɔ kojomɔ shɛɛ saji ni tamɔ la ni Yesu kaselɔi lɛ jajeɔ lɛ ji nɔ ni piŋɔ aŋkroaŋkroi ni yɔɔ niiatsɛ lɛ kuu lɛ mli lɛ. Amɛmiitao ni kaselɔi lɛ akpa nakai shɛɛ saji lɛ jajemɔ, koni no aha amɛhe ajɔ amɛ fioo kɛjɛ amɛpiŋmɔi lɛ amli.

“Shi Abraham kɛɛ: ‘Mibi, kaimɔ akɛ bo lɛ ona onii kpakpai lɛ yɛ owala be lɛ mli, ni nakai nɔŋŋ hu Lazaro na nibii fɔji; shi agbɛnɛ aashɛje emii yɛ biɛ, ni bo lɛ aapiŋo. Ni enɛɛmɛi fɛɛ sɛɛ hu lɛ, jɔɔ kpeteŋkpele ko ka wɔkɛ nyɛ teŋ, koni mɛi ni taoɔ ajɛ biɛ aya nyɛŋɔɔ lɛ akanyɛ, ni mɛi hu ni taoɔ ajɛ jɛi afoŋ kɛba wɔŋɔɔ lɛ akanyɛ.’ ”

Kwɛ bɔ ni eja ni esa hu akɛ tsakemɔ ni yɔɔ trukaa tamɔ nɛkɛ aaaba yɛ Lazaro kuu lɛ kɛ niiatsɛ lɛ kuu lɛ teŋ! Shihilɛ mli tsakemɔ lɛ ba no sɛɛ nyɔji fioo ko mli yɛ Pentekoste yɛ afi 33 Ŋ.B., beni akɛ kpaŋmɔ hee lɛ to Mla kpaŋmɔ momo lɛ najiaŋ lɛ. No hewɔ lɛ agbɛnɛ ebafeɔ faŋŋ akɛ Nyɔŋmɔ kpɛlɛɔ ekaselɔi lɛ anɔ, ni jeee Farisifoi lɛ kɛ jamɔ mli hiɛnyiɛlɔi krokomɛi lɛ. No hewɔ lɛ, “jɔɔ kpeteŋkpele” ni ka mfonirifeemɔŋ nuu niiatsɛ lɛ kɛ Yesu kaselɔi lɛ ateŋ lɛ damɔ shi kɛha Nyɔŋmɔ jalɛ kojomɔ ni tsakeee lɛ.

Kɛkɛ ni agbɛnɛ nuu niiatsɛ lɛ bi “ataa Abraham” akɛ: “Belɛ miikpao fai mɔ, ataa ni otsu lɛ [Lazaro] mitsɛ we lɛ; ejaakɛ miyɛ nyɛmimɛi enumɔ.” No hewɔ lɛ nuu niiatsɛ lɛ kpɛlɛ nɔ akɛ ekɛ tsɛ kroko yɛ wekukpaa ni bɛŋkɛ kpaakpa, ni lɛ ji Satan Abonsam diɛŋtsɛ. Niiatsɛ lɛ miibi ni Lazaro kɛ nu ashwie Nyɔŋmɔ kojomɔ shɛɛ saji lɛ anɔ bɔni afee ni ekaha “enyɛmimɛi enumɔ” lɛ, ejamɔ mli hemɛi lɛ, baje “piŋmɔ he nɛɛ.”

“Ni Abraham kɛɛ lɛ akɛ: ‘Mose kɛ Gbalɔi lɛ yɛ amɛdɛŋ; ha amɛbo nomɛi atoi.’ ” Hɛɛ, kɛ “nyɛmimɛi enumɔ” lɛ baaje piŋmɔ mli lɛ, belɛ nɔ ni he hiaa ni amɛfee nɔŋŋ ji ni amɛbo nibii ni Mose kɛ Gbalɔi lɛ eŋmala eshwie shi ni kadiɔ Yesu akɛ Mesia lɛ toi ni amɛbatsɔmɔ ekaselɔi. Shi niiatsɛ lɛ ekpɛlɛɛɛ nɔ, ni ekɛɛ: “Dabi, ataa Abraham, shi kɛji mɔ ko jɛ gbohii ateŋ tee amɛŋɔɔ lɛ, no amɛaatsake amɛtsui.”

Shi kɛlɛ, akɛɛ lɛ akɛ: “Kɛ amɛbooo Mose kɛ Gbalɔi lɛ atoi lɛ, no lɛ kɛji mɔ ko te shi kɛjɛ gbohii ateŋ tete lɛ, amɛyiŋ tsɔŋ.” Nyɔŋmɔ kɛ okadii krɛdɛɛi loo naakpɛɛ nii haŋ ni akɛtsɔ mɛi ayiŋ. Kɛ amɛbaana ehiɛ duromɔ lɛ, belɛ esa akɛ amɛkane Ŋmalɛi lɛ ni amɛkɛtsu nii. Luka 16:14-31; Yohane 9:28, 29; Mateo 19:3-9; Galatabii 3:24; Kolosebii 2:14; Yohane 8:44.

▪ Mɛni hewɔ ni esa akɛ niiatsɛ lɛ kɛ Lazaro gbele lɛ afee mfonirifeemɔ mli nɔ lɛ, ni mɛni he mfoniri amɛgbele lɛ feɔ?

▪ Mɛɛ tsakemɔ Yesu tsɔɔ akɛ ebaaba, kɛjɛ Yohane sɔɔmɔ lɛ shishijee mli kɛbaa?

▪ Mɛni abaajie yɛ Yesu gbele sɛɛ, ni te enɛ baasa gbalamlitsemɔ he sane lɛ he aha tɛŋŋ?

▪ Namɛi niiatsɛ lɛ kɛ Lazaro damɔ shi kɛha yɛ Yesu abɛbua lɛ mli?

▪ Mɛni ji piŋmɔi ni niiatsɛ lɛ naa nɔ yɛ mli lɛ, ni mɛɛ gbɛ ebiɔ ni atsɔ nɔ abajɔɔ etsui he kɛjɛ mli?

▪ Mɛni “jɔɔ kpeteŋkpele” lɛ damɔ shi kɛha?

▪ Namɔ ji niiatsɛ lɛ tsɛ diɛŋtsɛ, ni namɛi ji enyɛmimɛi enumɔ lɛ?