Tookwɛlɔ Kpakpa Lɛ Kɛ ‘Etoi Atsu’ Nɛɛ Mli Toi Lɛ
1, 2. (a) Te Maŋtsɛ David tsɔɔ bɔ ni Yehowa ji yɛ Lala 23:1 lɛ mli eha tɛŋŋ? (b) Mɛni hewɔ esa ákɛ akɛ Yehowa aaato tookwɛlɔ he ni akɛ Israel ato etoi ahe lɛ?
1 “YEHOWA ji mikwɛlɔ, nɔ ko nɔ ko ehiaŋ mi. Ehaa mibuɔ shi yɛ lɛɛhei ni yɔɔ frɔfrɔ, ewaa mi kɛyaa nui ni he jɔ lɛ ahe.” Nɛkɛ wiemɔi nɛɛ be ko gbekɛ nuu tookwɛlɔ kɛ kpãa saŋkutswalɔ ni sɛɛ mli lɛ ebatsɔ Israel maŋ lɛ nɔ maŋtsɛ lɛ kɛgbele elalai ni asumɔɔ jogbaŋŋ lɛ ekome naa.—Lala 23:1, 2.
2 Jeee maŋ ko shi moŋ blema Israel maŋ lɛ lalafolɔ kroko baanyɛ eŋma nɛkɛ wiemɔi ni yɔɔ Lala 95:6, 7 lɛ aha: “Nyɛbaa, ni wɔbumɔa shi ni wɔjaa lɛ, ni wɔkulaa shi yɛ Yehowa wɔ-Feelɔ lɛ hiɛ! Ejaakɛ lɛ ji wɔ-Nyɔŋmɔ, ni wɔ lɛ, elɛɛhe lɛ maŋ kɛ edɛŋ toi ji wɔ.” Eyɛ mli akɛ abaanyɛ akɛ emaŋtsɛ ni ji adesa lɛ ato tookwɛlɔ he moŋ, shi abaanyɛ akɛ Israel maŋ lɛ ato toi ni yɔɔ Tookwɛlɔ ni fe fɛɛ, Yehowa Nyɔŋmɔ he. Lɛ ji Tookwɛlɔ kpakpa ni fe fɛɛ ni gbɔmɛi ni sɔmɔɔ akɛ okadi tookwɛlɔi yɛ Yehowa webii ni amɛjɔɔ amɛhe nɔ lɛ asafo lɛ mli lɛ baanyɛ akase lɛ Iɛ.
3. Yɛ mɛɛ gbɛ nɔ Yehowa he ni awieɔ akɛ Tookwɛlɔ lɛ sa yɛ Yesu po he?
3 Maŋtsɛ David fee Yesu Kristo he mfoniri, ni sɛɛkpee mɔ nɛɛ bafee mɔ ni da kwraa fe blema David ni ji eblematsɛ odehe lɛ. Belɛ ebaanyɛ etsɛ David wiemɔi lɛ ni ewie he: “Yehowa ji mikwɛlɔ.” Ani mɔ ni tsɔ ehiɛ lɛ, Yohane Baptisilɔ lɛ, ewieee Yesu Kristo he nɛkɛ etsɔɔɔ mɛi ni damɔ shi ni boɔ lɛ toi lɛ yɛ be mli ni ena ni eeba lɛ: “Naa, Nyɔŋmɔ toobi lɛ ni woɔ je lɛ he esha lɛ kɛyaa lɛ”? (Yohane 1:29, 36) Yɛ be mli ni ewieɔ Yesu he akɛ Toobi ni jɛ too gwantɛŋi aweku Iɛ mli lɛ he lɛ, ekolɛ Yohane yɛ wiemɔi ni yɔɔ Yesaia 53:7 lɛ yɛ ejwɛŋmɔ mli: “Tamɔ too gwantɛŋ bi ni akɛ lɛ yaa ayagbe lɛ.” Ni awieɔ Yesu ni awo ehiɛ nyam lɛ he shii 28 yɛ mfonirifeemɔ mli akɛ Toobi yɛ Biblia lɛ mli naagbee wolo lɛ mli, kɛjɛ Kpojiemɔ 5:6 kɛyaa.
4. Te fee tɛŋŋ ni Yesu batsɔ tamɔ too yɛ toi atsu mli ni mɛni ji nakai toi atsu lɛ?
4 Atsɔ naakpɛɛ gbɛ nɔ afɔ lɛ awo Israel maŋ lɛ mli, yɛ afi 2 D.Ŋ.B. No hewɔ lɛ ebaje Mla kpaŋmɔ ni Yehowa, Israel Tookwɛlɔ lɛ kɛ nakai maŋ ni ehala lɛ efee lɛ shishi. Gbalɔ Mose ji mɔ ni damɔ nakai Mla kpaŋmɔ lɛ kɛ e-Kitai Nyɔŋma lɛ mli eha Israel maŋ lɛ. (Galatabii 4:4, 5) Ni Yesu, akɛ nakai gbɔmɛi ni ahala amɛ lɛ mlinyo lɛ, afɔ lɛ akɛ okadi toi ni Yehowa ji amɛ Tookwɛlɔ Fe Fɛɛ lɛ ateŋ mɔ kome. Yesu diɛŋtsɛ baje okadi toi atsu ko mli, wekukpaa kpakpa ni duromɔ yɔɔ mli ni ka Ŋwɛi Tookwɛlɔ lɛ kɛ lɛ teŋ, ni Mose Mla kpaŋmɔ lɛ ni tamɔ gbogbo lɛ buɔ he.
5. Mɛni ji yiŋtoo hewɔ ni anaa jwɛŋmɔ kroko yɛ toi atsu ni yɔɔ Yohane 10:1 he lɛ?
5 Ani wɔmiitsɔɔ yɛ biɛ akɛ “gwantɛŋi atsu” ni yɔɔ Yohane yitso 10, kuku 1 lɛ kɛ Mose Mla kpaŋmɔ lɛ gbɛjianɔtoo lɛ kpaa gbee? Hɛɛ! Tsutsu shishitsɔɔmɔ ni akɛhaa akɛ gwantɛŋi atsu lɛ ji Abraham kpaŋmɔ lɛ damɔ jwɛŋmɔ ni ahiɛ akɛ Yohane yitso 10 tsi kuu kome pɛ ta lɛ nɔ, ni kɛji akɛ nakai eji lɛ, belɛ Abraham kpaŋmɔ lɛ baafee nɔ ni etsɔɔ ni jwɛŋmɔ yɔɔ mli. Shi, nɛkɛ yitso nɛɛ he nikasemɔ lolo tsɔɔ akɛ Yesu wie nɔ ni fe toi atsu kome he. No hewɔ lɛ, taakɛ wɔbaana lɛ, tsakemɔ yɛ shishitsɔɔmɔ mli bafee nɔ ni sa.
6. Te onuɔ nɛkɛ tsakemɔi yɛ Biblia mli saji ahe shishinumɔ nɛɛ he ohaa tɛŋŋ?
6 Nɛkɛ tsakemɔi nɛɛ bafeɔ nɔ ni he hiaa yɛ be kɛ bei amli, ejaakɛ Abɛi 4:18 kɛɔ wɔ akɛ “jalɔi atempɔŋ lɛ tamɔ la ni kpɛɔ ni eyaa nɔ ekpɛɔ aahu kɛyashiɔ shwane fintiŋŋ.” Oo, hemɔkɛyeli kwalɔi ni teɔ shi woɔ anɔkwale lɛ ‘kpeɔ amɛnyanyɔji ashishi’ yɛ nɛkɛ kpojiemɔi ni baa fiofio nɛɛ hewɔ, shi enɛ gbaaa wɔnaa. (Bɔfoi lɛ Asaji 7:54) Shi wɔdaa Yehowa shi akɛ “la baate shi aha jalɔ kɛ̃, kɛ miishɛɛ hu ha mɛi ni ja yɛ amɛtsuiaŋ lɛ.” (Lala 97:11) Wɔyɛ hekɛnɔfɔɔ akɛ ebaafee bo miishɛɛ akɛ ooole nɔ ni Yesu nɔkwɛmɔ nɔ ni kɔɔ toi atsũi lɛ he lɛ shishi diɛŋtsɛ ji kɛha bo kɛ mɛi fɛɛ ni ji Yehowa Odasefoi ŋmɛnɛ lɛ.
Klɛŋklɛŋ Gwaŋtɛŋi Atsu, Yɛ Mla Lɛ Shishi
7. Te fee tɛŋŋ ni Yesu bana nitsumɔ hee ko yɛ afi 29 Ŋ.B. yɛ Israel toi atsu lɛ he?
7 Ni nakai gwantɛŋi atsu ni yɔɔ Mose Mla kpaŋmɔ lɛ shishi lɛ hu? Beni Yohane Baptisilɔ lɛ ebaptisi Yesu, ni akɛ Yehowa mumɔ krɔŋkrɔŋ lɛ efɔ lɛ mu, ni aka lɛ gbii 40 yɛ Yudea ŋa lɛ nɔ lɛ sɛɛ lɛ, Yesu Kristo ba akɛ mumɔŋ Tookwɛlɔ kɛha Israel toi loo gwantɛŋi atsu lɛ yɛ afi 29 Ŋ.B. Yesu Kristo kɛɛ akɛ atsu lɛ kɛba “Israel we toi ni elaaje” lɛ diɛŋtsɛ ŋɔɔ. (Mateo 10:6; 16:24) Kɛbashi be mli ni abaptisi lɛ lɛ no mli lɛ ehi shi kɛkɛ akɛ heloonaa Israelnyo ni yɔɔ too gwantɛŋi atsu he gbɛjianɔtoo ni yɔɔ Mose Mla kpaŋmɔ lɛ shishi lɛ mli. Shi agbɛnɛ, akɛni akɛ Yehowa mumɔ lɛ efɔ lɛ mu ni afɔ lɛ hu hewɔ lɛ, Yesu Kristo baanyɛ aba nakai toi atsu lɛ mli yɛ enitsumɔ hee ni ena akɛ “tookwɛlɔ kpakpa” lɛ hewɔ.—Yohane 10:11.
8. Namɔ ji okadi shinaakwɛlɔ ni yɔɔ Yohane 10:3 lɛ, ni yɛ mɛɛ gbɛ nɔ?
8 Yohane Baptisilɔ lɛ ji klɛŋklɛŋ mɔ ni yoo Yesu akɛ Anɔkwale Tookwɛlɔ ni Tookwɛlɔ Fe Fɛɛ, Yehowa Nyɔŋmɔ ehala lɛ. Yesu baaa akɛ eeba ni ebaha toi ni yɔɔ toi atsu lɛ mli lɛ anii, shi moŋ eba ni ebatsu nitsumɔ diɛŋtsɛ ni mla ŋmɛɔ gbɛ. No hewɔ lɛ ebaanyɛ ekɛ ehe aha akɛ toi atsu ni ji Israel maŋ lɛ mumɔŋ Tookwɛlɔ yɛ woo mli. Yɛ nɔ ni kɛ gbalɛ ni yɔɔ Maleaki 3:23 kpaa gbee lɛ (okɛto Mateo 11:12-14; Luka 1:13-17 he) , no mli lɛ Tookwɛlɔ Fe Fɛɛ lɛ kɛ nitsumɔ ewo Yohane dɛŋ koni efee Israel toi atsu lɛ mfonirifeemɔ mli “shinaakwɛlɔ.” (Yohane 1:15, 17, 19-28;10:3) Yohane yoo nibii ni yɔɔ Yesu Kristo he ni tsɔɔ akɛ esa ni akɛ eji Yehowa Nyɔŋmɔ Tookwɛlɔ Bibioo lɛ ni efee klalo nɔŋŋ akɛ eeeŋmɛ lɛ gbɛ ni eba mli, koni eha ayoo lɛ akɛ Mesia Tookwɛlɔ ni agba ehe sane afɔ shi ni ebaatsɛ etoi lɛ kɛ amɛgbɛi ni enyiɛ amɛhiɛ kɛya lɛɛhei lɛ.
9, 10. Yɛ mɛɛ gbɛ nɔ Yesu sa bɔ ni lɛ diɛntsɛ etsɔɔ bɔ ni tookwɛlɔ ji ha lɛ mli pɛpɛɛpɛ lɛ, ni te Israel tookwɛlɔi lɛ kɛ amɛtoi lɛ ye ha tɛŋŋ?
9 Yesu tsɔɔ bɔ ni lɛ diɛŋtsɛ esa ha lɛ mli yɛ bɔ ni etsɔɔ Tookwɛlɔ Kpakpa kɛ Anɔkwafo lɛ mli eha yɛ lɛ diɛŋtsɛ ewiemɔi amli lɛ, taakɛ atsɔɔ mli yɛ Yohane 10:1-5 lɛ mli lɛ: “Lɛlɛŋ, lɛlɛŋ miikɛɛ nyɛ akɛ: Mɔ ni tsɔɔɔ shinaa lɛ mli ni ekɛbote gwantɛŋi atsu lɛ mli, shi moŋ etsɔɔ he kroko ekwɔɔ lɛ, julɔ kɛ ojotswalɔ ji lɛ. Shi mɔ ni tsɔɔ shinaa lɛ mli kɛboteɔ mli lɛ, toi lɛ akwɛlɔ ji lɛ. Lɛ, shinaakwɛlɔ lɛ gbeleɔ haa, ni toi lɛ nuɔ egbee, ni ekɛ lɛ diɛŋtsɛ etoi lɛ agbɛi tsɛɔ amɛ, ni ekɛ amɛ jeɔ kpo. Ni kɛ́ ejie etoi lɛ fɛɛ lɛ, enyiɛɔ amɛhiɛ, ni toi lɛ nyiɛɔ esɛɛ, ejaakɛ amɛle egbee. Shi mɔkpɔŋ lɛ, amɛnyiɛŋ esɛɛ, shi moŋ amɛaajo foi yɛ eŋɔɔ, ejaakɛ amɛleee mɛikpɔji agbee.”
10 Blema Israel tookwɛlɔ lɛ leɔ etoi lɛ jogbaŋŋ. Eyɛ gbee loo tsɛmɔ ko ni lɛ pɛ ele ni ekɛtsɛɔ amɛ ni etoi nɛɛ fɛɛ buaa amɛhe naa kɛbaa eŋɔɔ koni ekwɛ amɛ. Agbɛnɛ, ewoɔ etoi lɛ eko fɛɛ eko gbɛi. Yɛ toiboo mli lɛ too fɛɛ too hereɔ nɔ kɛ atsɛ egbɛi. Toi lɛ le bɔ ni amɛ diɛŋtsɛ amɛkwɛlɔ lɛ gbee ni jijeɔ lɛ he hiaa ha no hewɔ lɛ amɛhereŋ mɛikpɔji agbeei anɔ.
11. Te wɔ diɛŋtsɛ lɛ esa akɛ wɔnu Yesu nitsumɔ akɛ Tookwɛlɔ lɛ he wɔha tɛŋŋ?
11 Nɔ ni kɛ enɛ kpaa gbee lɛ, mɛɛ miishɛɛ enɛ ji kɛha wɔ akɛ wɔɔna nɔmimaa akɛ wɔmumɔŋ Tookwɛlɔ lɛ le wɔteŋ mɔ fɛɛ mɔ gbɛi ni lɛ diɛŋtsɛ ebaanyɛ ekwɛ wɔ nɔ ni ejwɛŋ wɔhe! Ekaba akɛ wɔɔtamɔ Yesu gbii lɛ amli toibolɔi lɛ ateŋ mɛi pii ni yooo ebɛbua ni shishinumɔ yɔɔ mli lɛ sɛɛ lɛ. Ákɛ kɔkɔbɔɔ nɔkwɛmɔ nɔ kɛha wɔ lɛ, aŋma yɛ Yohane 10:6 akɛ: “Yesu bu amɛ [etoibolɔi Yudafoi lɛ] abɛ nɛɛ; shi amɛ lɛ amɛnaaa nɔ ni ekɛ amɛ wieɔ lɛ shishi.”
12. Namɛi ji “mɛikpɔji” ni Yesu wie amɛhe lɛ, ni nakai eji yɛ mɛɛ gbɛ nɔ?
12 Israelbii krokomɛi ni ba ni amɛkɛɛ akɛ amɛ amɛji shiwoo Mesia, loo Kristo lɛ ji mɛi ni Yesu wie amɛhe akɛ mɛikpɔji Iɛ. Yohane, ni Yesu ba eŋɔɔ koni ebaptisi lɛ lɛ, ni eji mɔ ni Yehowa ehala lɛ akɛ “shinaakwɛlɔ” lɛ kɛ amɛ etsɔɔɔ akɛ Yehowa Mesia Tookwɛlɔ. Yesu tɔɔɔ yɛ enɛ mli kwraa. (Mateo 3:1-7; Marko 1:1-7; Luka 3:1-9) Ni bɔni afee ni ebaa gbɔmɛi lɛ ayi hewɔ ni Yesu na agbɛnɛ akɛ ehi akɛ eeejie ehe kpo akɛ Mɔ ni Yehowa etsu lɛ kɛba amɛŋɔɔ akɛ amɛmumɔŋ Tookwɛlɔ koni ekpa tookwɛlɔi shishiulɔi lɛ ahe mama.
Toi Atsu Hee Yɛ Tookwɛlɔ Kpakpa Lɛ Shishi
13. Mɛni tsakemɔ Nyɔŋmɔ fee yɛ etoi atsu lɛ he?
13 Nɔ ni he hiaa ji ni mɔ ko abote toi atsu ni ja lɛ mli yɛ nakai be lɛ mli kɛ ŋmɛnɛ hu. Ani akɛ enɛ miitsɔɔ akɛ tsakemɔ baanyɛ aba toi atsui ni Yehowa Nyɔŋmɔ kpɛlɛɔ nɔ lɛ amli? Hɛɛ. Nɔ ni Yesu tee nɔ ekɛɛ yɛ Yohane yitso 10 kɛ nɔ ni yinɔsane mli anɔkwalei tsɔɔ lɛ fɛɛ tsɔɔ akɛ Nyɔŋmɔ baatsake Israel toi atsu ni yɔɔ Mla lɛ shishi lɛ ni ekɛ toi atsu hee ato najiaŋ. Kadimɔ enɛ yɛ be mli ni wɔyaa nɔ kɛ Yesu wiemɔi Iɛ.
14, 15. Mɛni hewɔ eka shi faŋŋ akɛ Yesu miiwie toi atsu hee ko he yɛ Yohane 10:7-10?
14 “No hewɔ lɛ Yesu saa kɛɛ amɛ ekoŋŋ,” yɛ Yohane 10:7-10, akɛ, “Lɛlɛŋ, lɛlɛŋ, miikɛɛ nyɛ akɛ: Miji toi lɛ ashinaa lɛ. Mɛi fɛɛ ni tsɔ mihiɛ ba lɛ, julɔi kɛ ojotswalɔi ji amɛ: shi toi lɛ booo amɛ toi hu. Miji shinaa lɛ. Mi lɛ, kɛji mɔ ko tsɔ minaa etee mli lɛ, aaahere eyiwala, ‘ni eeetee mli ni eeeje kpo, ni eeena lɛɛ nii. Julɔ baaa yaka, shi juu kɛ gbee kɛ hiɛkpatamɔ hewɔ ebaa; mi lɛ miba bɔni afee ni amɛna wala ni amɛna ni ateke nɔ.”
15 Kadimɔ yɛ nɛkɛ sane nɛɛ mli akɛ Yesu wieɔ lɛ diɛŋtsɛ ehe akɛ toi atsu ni etsiɔ ta agbɛnɛ lɛ shinaa, Tookwɛlɔ Fe Fɛɛ, Yehowa Nyɔŋmɔ toi atsu lɛ shinaa. Yesu jeee heloonaa Israel toi atsu lɛ okadi shinaa lɛ, ejaakɛ lɛ diɛŋtsɛ lɛ Yudayoo obalayoo foro Maria fɔ lɛ ewo enɛ mli; Yesu jeee Mla kpaŋmɔ lɛ teŋdamɔlɔ ni tamɔ shinaa ni no nɔ atsɔ ni aha Israel maŋ lɛ ba amɛ kɛ Yehowa Nyɔŋmɔ teŋ wekukpaa mli lɛ. Jeeŋmɔ beebe beni afɔko Yesu yɛ shikpɔŋ nɔ Yehowa Nyɔŋmɔ kɛɛ Israel maŋ lɛ akɛ: “Nyɛ kɛkɛ mile yɛ shikpɔŋ lɛ nɔ wekui lɛ ateŋ.” (Amos 3:2) Nɛkɛ okadi Yudafoi atoi atsu nɛɛ mli anɔkwale Yehowa Nyɔŋmɔ Tookwɛlɔ Bibioo lɛ baatse ekuu lɛ mli klɛŋklɛŋ toi lɛ kɛjɛ ni enyiɛ amɛhiɛ kɛya mumɔŋ lɛɛhe krɛdɛɛ ko mli. No hewɔ lɛ Yesu je shishi ebɔi toi atsu hee ko ni lɛ ni ji Tookwɛlɔ Kpakpa lɛ ji shinaa yɛ shishinumɔ kroko mli lɛ he wiemɔ.
16. (a) Mɛni atsɔɔ hiɛ anaa mra ni tsɔɔ akɛ Yehowa baana toi atsu hee (b) Yɛ mɛɛ gbɛ nɔ Yesu tsɔɔ yɛ akɛ toi atsu hee lɛ miihe aba shihilɛ mli?
16 Nakai Yudafoi lɛ ni.kpoo akɛ amɛaatsɔmɔ ekaselɔi ni tamɔ gwantɛŋi lɛ nu he akɛ amɛ pɛ amɛnɔ̃ lɛ ji toi atsu ni yɔɔ Yehowa Nyɔŋmɔ jwɛŋmɔ mli ni akɛ ebaaya nɔ ehi shi kɛya naanɔ. Amɛsusuuu “kpaŋmɔ hee” lɛ ni Yehowa Nyɔŋmɔ ewo shi akɛ ebaato ema shi taakɛ Yeremia 31:31-34 lɛ tsɔɔ lɛ he. Enɛ tsɔɔ wekukpaa hee ni baaka amɛ kɛ Yehowa Nyɔŋmɔ teŋ, ni tsɔɔ akɛ, okadi toi atsu hee. Yesu Kristo jeee shinaa kɛha toi atsu ni be eho, ni afabaŋ ni tamɔ Yehowa hebuu lɛ bɛ he dɔŋŋ. (Hebribii 8:7-13) Yesu wie wiemɔi komɛi ni sa kadimɔ jogbaŋŋ be mli ni ekɛ Hehoo wein lɛ haa amɛ yɛ enaagbee gbɛkɛ ni ekɛ ekaselɔi lɛ Yudafoi lɛ ye enaagbee Hehoo lɛ. Ekɛ okadi shishinumɔ ko ha wein lɛ, akɛ: “Nɛkɛ kpulu nɛɛ ji kpaŋmɔ hee lɛ yɛ milá ni aaaŋɔ shwie shi aha nyɛ lɛ mli.”—Luka 22:20; Mateo 26:27-29.
17, 18. (a) Mɛni ji nɛkɛ toi atsu hee ni Yesu ji enɔ Tookwɛlɔ Kpakpa lɛ? (b) Mɛɛ gbɛ nɔ aaanyɛ akɛ lɛ ato toi atsu hee nɛɛ shinaa hu he?
17 Yesu Kristo baafee shinaa aha toi atsu ni hiɔ shi daa, nɔ ni hi ni baaye tsutsu toi atsu kɛha heloonaa Israel ni yɔɔ Mose Mla kpaŋmɔ lɛ shishi lɛ najiaŋ. Beni Yesu shi ekaselɔi lɛ yɛ sɛɛ yɛ shikpɔŋ nɔ ni ekwɔ kɛtee ŋwɛi yɛ eshitee kɛmiijɛ gbohii ateŋ lɛ sɛɛ gbii 40 lɛ, ekwɔ kɛtee ní eka he ehiɛ hegbɛ ni eyɔɔ akɛ ena adesa wala ni yeɔ emuu lɛ mli lolo, hegbɛ, ni ejeko edɛŋ yɛ heloo mli esha ko hewɔ. (Yesiai 53:3-12; Bɔfoi lɛ Asaji 8:30-35) No hewɔ lɛ, awula lɛ akɛ esɔmɔ akɛ Teŋdamɔlɔ ni ekɛ nɛkɛ wala hegbɛ nɛɛ, ni ela lɛ damɔ shi kɛha no lɛ atsu nii ni ekɛsɔo kpaŋmɔ heei ko ni hi naa eha ekaselɔi ni yɔɔ shikpɔŋ nɔ lɛ. Efee enɛ kɛ hoo lɛ yɛ Pentenkoste gbi lɛ nɔ yɛ afi 33 Ŋ.B., beni afɔse mumɔ krɔŋkrɔŋ lɛ ashwie ekaselɔi Yudafoi toibolɔi ni mɛɔ yɛ Yerusalem lɛ anɔ lɛ.
18 Akɛ nɛkɛ kaselɔi nɛɛ ba kpaŋmɔ hee lɛ mli yɛ nɛkɛ gbɛ nɔ, kɛkɛ ni toi atsu hee ko ba shihilɛ mli, ni ji wekukpaa ni ka amɛ kɛ Yehowa Nyɔŋmɔ teŋ ni damɔ kpaŋmɔ hee ni akɛ Yesu Kristo lá lɛ esɔo naa lɛ nɔ. Akɛ Yehowa mumɔ lɛ fɔ́ nɛkɛ ekadi gwantɛŋi ni eba toi atsu hee nɛɛ mli lɛ ni akɛ emumɔ lɛ fɔ amɛ mu. Yesu Kristo ji nɛkɛ toi atsu nɛɛ shinaa kɛ agbɛnɛ Tookwɛlɔ Kpakpa ni Yehowa ehala lɛ ni kwɛɔ toi ni yɔɔ toi atsu loo kuu nɛɛ mli lɛ nɔ.
19. Gbalɛ ni yɔɔ Zakaria 13:7 lɛ ba mli yɛ mɛɛ gbɛ nɔ?
19 Yɛ gbii etɛ mli fai komɛi ni amɔ Yesu ni egbo yɛ gbonyobu mli lɛ, ehe bahia ni ekɛ ekaselɔi ni tamɔ gwantɛŋi lɛ akwɛmɔ aha Tookwɛlɔ Fe Fɛɛ, Yehowa. Nakai bei amli Yehowa wiemɔ ni yɔɔ Zakaria 13:7 lɛ ba mli, akɛ: “Tswaa tookwɛlɔ lɛ nɔ, ni toi lɛ aaagbɛ ashwa, ni matsɔ minine kɛaaba bibii lɛ anɔ!” Tookwɛlɔ Ofe, Yehowa, gbala enine kɛba nɛkɛ kaselɔi ni abuuu amɛ nɛɛ anɔ, kɛyashi be mli ni ekɛ amɛ wo “Yesu Kristo, e-Tookwɛlɔ Bibioo ni atee lɛ shi lɛ dɛŋ ekoŋŋ.—Mateo 26:31, 32.
20. Yɛ mɛɛ gbɛ nɔ Yohane 10:16 haa anaa akɛ kuu kroko hu miiba shihilɛ mli, ni mɛni hewɔ esa akɛ enɛ akɔ wɔhe lɛ?
20 Shi akɛni nɛkɛ toi atsu hee ni yɔɔ Tookwɛlɔ Kpakpa lɛ shishi lɛ yɔɔ ejwɛŋmɔ mli hewɔ lɛ, kadimɔ nɔ ni Yesu kɛɛ yɛ Yohane 10:16 lɛ: “Ni miyɛ toi krokomɛi ni jɛɛɛ toi atsu nɛɛ mli; ni nomɛi hu, ja miŋɔ amɛ kɛba.” Ani enɛ etsɔɔɔ akɛ ebaana nɔ ni ji enyɔ, kuu ko ni ebaasɔmɔ amɛ akɛ Tookwɛlɔ Kpakpa? Kɛji nakai ni lɛ, mɛɛ be mli abaana amɛ ni namɛi baafee emli toi lɛ? Enɛɛmɛi ji saji ni abi yɛ amɛbe naa pɛpɛɛpɛ, ni amɛ hetooi lɛ baanyɛ ana ohiɛnɔkamɔ kɛ naanɔ wala gbɛkpamɔi lɛ anɔ hewalɛ diɛŋtsɛ. No hewɔ lɛ nyɛhaa wɔtaoa sane lɛ mli.a
[Shishigbɛ niŋmai]
a Ajie kɛjɛ February 15, 1984 Blɔfo Buu-Mɔɔ lɛ mli.
Te Obaaha Hetoo Oha Tɛŋŋ?
□ Mɛɛ gbɛ nɔ atsɔ afɔ́ Yesu awo toi atsu ko mli, ni namɔ ji e-Tookwɛlɔ?
□ Mɛɛ gbɛhe loo nitsumɔ hee mli Yesu baje yɛ afi 29 Ŋ.B.?
□ Yohane Baptisilɔ lɛ tsu mɛni yɛ Israel toi atsu lɛ he?
□ Mɛni ji toi atsu hee lɛ ni Yesu ji amɛnɔ Tookwɛlɔ Kpakpa lɛ?
□ Mɛni tsɔɔ akɛ toi atsu kroko yɛ ni baaba?
[Mfoniri ni yɔɔ baafa 22]
Ákɛ okadi shinaakwɛlɔ lɛ, Yohane Baptisilɔ lɛ here Tookwɛlɔ Kpakpa, Yesu
[Mfoniri ni yɔɔ baafa 23]
Yesu nyiɛ etoi lɛ ahiɛ kɛbote tsu hee ko mli. Mɛni ji no?