Mɛɛ Be Afɔ Yesu?
TAAKƐ bɔni jeŋnilee he niŋmalɔ Isaac Asimov kɛɛɔ lɛ, “hulu gbijurɔyeli ni ehe gbɛi waa fe fɛɛ yɛ blema bei lɛ amli ji Romabii anɔ lɛ.” Eji Saturnalia (December 17 kɛyashi 24) ni ayeɔlɛ otsi sɔŋŋ, ni akɛwoɔ okwaayeli nyɔŋma Saturn, lɛ hiɛ nyam lɛ. Dr. Asimov kɛɛ hu akɛ:
“Mitrabii lɛ yeɔ Mitra fɔmɔgbi yɛ fɛi be mli, be ni baa daa afi ni ato ama shi akɛ December 25 beni afee ni Romabii a-Saturnalia lɛ abote Mitrabii ‘a-Hulu Gbi’ lɛ mli akɛ nɔni akɛ-gbeɔ naa. . . . Be ko, yɛ afi A.D. 300 sɛɛ dani Kristo jamɔ nyɛ eto gbɛjianɔ yɛ naagbee, ni ekpɛlɛ Saturnalia nɔ, ni nakai be lɛ mli ekɛye Mitraim jamɔ nɔ kunim kwraa. Ato December 25 ama shi akɛ Yesu fɔmɔgbi ni afee nakai gbijurɔyeli kpeteŋkpele lɛ akɛ Kristofoi anɔ̃. Nɔ ko nɔ ko bɛ Biblia lɛ mli ni maa December 25 nɔ mi akɛ be ni akɛfɔ Yesu.”
Miishɛɛ sane diɛŋtsɛ nɛ. Shi enɛɛmɛi kɛ nɔ ko baa daa afi blonya gbijurɔyelii lɛ anɔ ni eteeɔ sanebimɔi komɛi ashi. Ani abaanyɛ ale afi nɔ ni afɔ Yesu Kristo lɛ? Ani abaanyɛ ale gbi lɛ pɔtɛɛ? Hɛɛ, mɛ be mli afɔ Yesu?
Afi Lɛ Diɛŋtsɛ Ni Aaanyɛ Ale Pɔtɛɛ
Gbɛ kome ni aaatsɔ nɔ ale afi nɔ ni afɔ Yesu ji ni aaasusu gbalɛ ni jɛ mumɔŋ ni kɔɔ “otsii nyɔŋmai kpawo,” aloo “otsii nyɔŋmai kpawo ni ji afii,” ni aŋma afɔ shi yɛ Daniel 9:24-27 lɛ he lɛ. (An American Translation; Moffatt; Revised Standard Version; ekɛto New World Translation, shishigbɛ niŋmaa lɛ he.) Bɔfo Gabriel kɛɛ Hebri gbalɔ Daniel akɛ: “Kɛjɛ beyinɔ ni wiemɔ aaaje kpo akɛ aku sɛɛ ayatswa Yerusalem ekoŋŋ lɛ kɛyashi mɔni afɔle mu ni ji lumɔ lɛ nɔ lɛ efeɔ otsii kpawo, ni otsii nyɔŋmai ekpaa kɛ enyɔ mli [ni ji afii, aloo afii 483] lɛ, aaaku sɛɛ ayatswalɛ ekoŋŋ.”—Dan. 9:25; 4 Mose 14:34; Ezek. 4:6.
Mɛɛ be mli ni nɛkɛ afii 483 nɛɛ je shishi? Yɛ afi 455 D.Ŋ.B. gbo be mli, yɛ Maŋtsɛ Artashasta nɔyeli afi ni ji 20 lɛ mli, be mli ni Pershia maŋtsɛ lɛ wo akpɔ akɛ aku sɛɛ atswa Yerusalem kɛ egbogboi lɛ ekoŋŋ lɛ (Neh. 2:1-8) Nohewɔ lɛ, nakai “otsii” 69 (ni ji afii 483) lɛ ba naagbee yɛ afi 29 Ŋ.B. gbo be mli. Kɛkɛ, ni Mesia lɛ bapue, ejaakɛ nakai afi lɛ nɔ Yohane Baptisilɔ lɛ baptisi Yesu ni ebatsɔ Mɔni Afɔlɛ Mu lɛ aloo Kristo lɛ kɛtsɔ Nyɔŋmɔ mumɔ krɔŋkrɔŋ lɛ ni fɔlɛ mu lɛ nɔ. (Mat 3:13-17) Shi Luka 3:13 tsɔɔ akɛ Yohane je ebaptisimɔ nitsumɔ shishi yɛ “Kaisare Tiberio maŋtsɛyeli afi ni ji nyɔŋma kɛ enumɔ lɛ mli,” ni enɛ je shishi kɛjɛ August 17, afi 29 Ŋ.B. kɛyashi August 16, afi 29 Ŋ.B.
Afii enyiɛ Yesu eye yɛ ebaptisimɔ lɛ mli? Ŋmalɛi lɛ haa hetoo: “Ni beni Yesu diɛŋtsɛ bɔi lɛ, [yɛ ebaptisimɔ lɛ sɛɛ nɔŋŋ] eye aaafee afii nyɔŋmai-etɛ.” (Luka 3:21-23) Kɛji wɔkane afii kɛjɛ Yesu baptisimɔ be lɛ mli yɛ afi 29 Ŋ.B. kɛtee sɛɛ lɛ (ni wɔkai akɛ afi ko ni ji zero (o) bɛ D.Ŋ.B. kɛ Ŋ.B. teŋ lɛ) , wɔnaa akɛ afɔ lɛ yɛ afi 2 D.Ŋ.B.
Nɔni fiɔ nɛkɛ be nɛɛ sɛɛ ji “otsii nyɔŋmai-kpawo ni ji afii” gbalɛ lɛ. Etsɔɔ akɛ abaagbe Mesia lɛ, ni “eeeha afɔle kɛ niyenii afɔle sɛɛ afo’ ejaakɛ enɛ he ehiaa dɔŋŋ yɛ “otsi” ni ji 70 lɛ teŋ. (Dan 9:7; Rom. 6:14; Heb. 7:26-28) Enɛ tsɔɔ akɛ Kristo sɔɔmɔ nitsumɔ lɛ ye afii etɛ kɛ fa. Eje shishi yɛ ebaptisimɔ yɛ afi 29 Ŋ.B. lɛ mli ni eba naagbee kɛ egbele lɛ yɛ Hehoo be lɛ mli lɛ afi 33 Ŋ.B. (Luka 22:7-20) Kɛ wɔkane afii 33 1/2 kɛtee sɛɛ (Yesu wala shihilɛ yɛ shikpɔŋ nɔ) lɛ eyeɔ ebuaa wɔ hu ni wɔnyɛɔ wɔbuɔ afi nɔ nii afɔle lɛ akɛ no ji afi 2 D.Ŋ.B.
Ni Gbi Lɛ Hu?
Taakɛ wɔle kɛtsɔ hiɛ lɛ, Yesu gbo yɛ Hehoo be aaafee April 1, afi 33 Ŋ.B. (Mat. 26:17-30) Akɛni Kristo eye aaafee efii 30 yɛ be mli ni eje enitsumɔ lɛ shishi ni esɔɔmɔ nitsumɔ hu he afi etɛ kɛ fa hewɔ lɛ, beni shɛɔ Hehoo be aloo aaafee April 1, afi 33 Ŋ.B. lɛ no mli lɛ eye afi 33 1/2 Kristo baanyɛ aye afii 34 yɛ no sɛɛ nyɔji ekpaa aloo aaafee October 1. Agbɛnɛ kɛji ákɛ wɔkane kɛtee sɛɛ lɛ wɔbaanyɛ wɔmu sane lɛ naa akɛ afɔ Yesu aaafee October 1, yɛ afi 2 D.Ŋ.B. shi jeee yɛ December 25.
Afɔɔɔɔ Lɛ Yɛ Fɛi Be Mli
Fɛi be esaaa shihilɛ mli ni afɔ Yesu aaafee afii 30 yɛ Betlehem lɛ kwraa. Be ni fɛi baa ni nugbɔ nɛɔ hu yɛ Palestina lɛ jeɔ shishi yɛ October naagbee be mli ni ehiɔ shi aahu nyɔji babaoo. Kɛ eshɛ December mli lɛ snoo nɛɔ yɛ Betlehem kɛ Yerusalem ni bɛŋkɛ jɛmɛ lɛ yɛ gbɛkɛ mli. Ni te fɛi lɛ naa wa ha tɛ̃ɛŋ? Wɔkaneɔ yɛ Yuda Maŋtsɛ Yehoiakim he akɛ: “Maŋtsɛ lɛ ta fɛi be tsu lɛŋ, yɛ nyɔŋ ni ji nɛɛhu lɛ nɔ, [Kislev, ni kɛ November-December yeɔ egbɔ] ni la kɛ ŋɛsu ni etsɛ̃ ma ehiɛ.” (Yer. 36:22) La ni tamɔ nɛkɛ he miihia lɛ beni afee ni no aha ehe adɔ. Agbɛnɛ, yɛ Yerusalem, yɛ be ni Israelbii lɛ eku amɛsɛɛ kɛjɛ nomŋɔɔ mli amɛba lɛ, gbɔmɛi ni Ezra bua amɛnaa yɛ kpo lɛ, nɔ yɛ nakai fɛi be nyɔŋ lɛ nɔŋŋ nɔ lɛ “ahe miikpokpo yɛ nɛkɛ sane nɛɛ kɛ nyɔŋmɔ ni nɛɔ lɛ hewɔ.” (Ezra 10:9, 13) Nɔni sa kadimɔ ji akɛ nyɔŋ ni nyiɛ sɛɛ lɛ, Tebeth (December-January) bafee nyɔŋ ni fɛi yɔɔ mli fe fɛɛ yɛ afi lɛ mli ni ehaa snoo nɛɔ be kɛ bei amli yɛ gɔji lɛ ayiteŋ.
Kaisare Augusto fa akɛ akane gbɔmɛi ni aŋma, ni bɔni ebalɛ lɛ, enɛ kɛ be ni akɛ-fɔ Yesu bakpa gbee. Shi ani osusuɔ akɛ Roma maŋtsɛ lɛ baawo eshishibii ni ji Yudafoi ni tseɔ atua kpitiokpitio lɛ amli la yaka kɛtsɔ akpɔ ni eeewo akɛ amɛya amɛmaŋ ni amɛyaŋmala amɛgbɛi ni akaneamɛ yɛ nunɛmɔ be, kɛ fɛi be ni snoo nɛɔ yɛ mli, ni ji December lɛ mli, yɛ be mli ni gbɛfaa aaawa fe be fɛɛ lɛ? Dabida.
Tookwɛlɔi miikwɛ amɛtoi yɛ “ŋa nɔ” yɛ nakai gbɛkɛ ni afɔ Yesu lɛ. (Luka 2:8-14) . Shi nunɛmɔ be lɛ eje shishi momo yɛ gbo nyɔŋ ni ji Bul (October-November) lɛ mli. (5 Mose 11:14) Kɛmiiya October naagbee yɛ be mli ni Bul eje shishi lɛ, no mli lɛ abua kooloi lɛ anaa awo amɛtsui amli momo yɛ gbɛkɛ, no hewɔ lɛ tookwɛlɔi ni yɔɔ ŋa nɔ yɛ nakai gbɛkɛ lɛ kɛ odaseyeli ni tsɔɔ akɛ afɔ Yesu yɛ gbo ni ji Ethanim (September-October) lɛ kpaa gbee.
Gbijurɔyeli Ni Ataoɔ
Belɛ eka shi faŋŋ akɛ afɔɔɔ Yesu yɛ December 25. Shi moŋ odaseyeli ni yɔɔ lɛ tsɔɔ akɛ aaafee October 1, yɛ afi 2 D.Ŋ.B. No hewɔ lɛ efɔmɔgbi ni aaaye yɛ Blonya be mli yɛ December 25 lɛ ejaaa kwraa kɛhaaa mɛi ni Ŋmalɛ Krɔŋkrɔŋ lɛ tsɔɔ amɛ gbɛ lɛ.
Shi kɛlɛ esaa akɛ Yesu fɔmɔ be pɔtɛɛ ko ni bɛ lɛ gbaa wɔ naa. Fɛɛ sɛɛ lɛ fɔmɔgbi agbijurɔyeli ni aŋma yɛ Biblia lɛ mli lɛ ji nɔni jeŋ nɔyelɔi ye.—1 Mose 40:20; Mat. 14:6; Marko 6:21-28; Yoh. 18:36.
Shi kɛlɛ esa akɛ akai Yesu. Enɛ hewɔ ni eto egbele lɛ Kaimɔ ni afɔɔlɛ tsɛmɔ akɛ Nuŋtsɔ lɛ Gbɛkɛnaashi Niyenii lɛ. Yesu fee nakai yɛ eshikpɔŋ nɔ shihilɛ lɛ naagbee gbɛkɛ, ni no sɛɛ etsɛɛɛ kwraa ni “eŋɔ esusuma lɛ eha yɛ mɛi pii akpɔmɔ hewɔ.” (Mat. 20:28) Beni ekɛ aboloo akpiti kɛ wein lɛ damɔɔ shi kɛhaa egbɔmɔtso kɛ elá ni ekɛbaasha afɔle lɛ, Yesu ha enɔkwa sɛɛnyiɛlɔi lɛ ye, ni ewoamɛ hewalɛ akɛ: “Nyɛfea enɛ ni nyɛŋɔ kai mi.” (Luka 22:19, 20; 1 Kor. 11:28-26) No hewɔ lɛ, eyɛ mli akɛ anɔkwa Kristofoi yɛ miishɛɛ akɛ amɛaale be mli ni afɔ Yesu moŋ, shi Yesu Kristo gbele lɛ moŋ ji nɔni esa akɛ amɛye aloo amɛkai daa afi, shi jeee efɔmɔ lɛ.