Amɛfee Yehowa Suɔmɔnaa Nii

Maria Hala “Nɔ ni Hi Lɛ”

YƐ Yesu gbii lɛ amli lɛ, rabifoi ablema saji lɛ tsĩ Yudafoi yei lɛ anaa. No hewɔ lɛ, aje amɛnijiaŋ wui koni amɛkakase Mla lɛ. Eji anɔkwale akɛ, yiŋsusumɔ ko ni atsɛ yisɛɛ yɛ Mishnah lɛ mli lɛ kɛɛ akɛ: “Kɛ nuu ko tsɔɔ ebiyoo Mla lɛ, etamɔ nɔ ni étsɔɔ lɛ nyenyeŋtswibɔɔ.”​—Sotah 3:⁠4.[1]

Enɛ hewɔ lɛ, yei babaoo ni hi shi yɛ klɛŋklɛŋ afii oha lɛ mli yɛ Yudea lɛ eyaaa skul. The Anchor Bible Dictionary lɛ wie akɛ: “Odaseyeli ko bɛ ni tsɔɔ akɛ dani Yesu aaaje esɔɔmɔ nitsumɔ lɛ shishi lɛ, aŋmɛ Yudafoi yei lɛ agbɛ koni amɛtsɔmɔ tsɔɔlɔ kpele lɛ kaselɔi, ni aŋmɛɛɛ gbɛ hu ni amɛfata tsɔɔlɔ ni tamɔ nɛkɛ he kɛfã gbɛ, loo ni amɛtsɔɔ mɔ ko nii akɛ ja gbekɛbii pɛ.”[2] Kɛfata nibii krokomɛi ni akɛgbe yei ahe guɔ lɛ he lɛ, jamɔ mli hiɛnyiɛlɔi komɛi fee mla ni tsɔɔ akɛ, esaaa akɛ nuu kɛ yoo wieɔ yɛ maŋ![3]

Yesu kwa sui ni Nyɔŋmɔ gbeyeishemɔ bɛ mli nɛɛ. Etsɔɔ yei kɛ hii fɛɛ nii, ni anyɛɔ anaa hii kɛ yei yɛ ekaselɔi lɛ ateŋ. (Luka 8:​1-⁠3) Be ko lɛ, afɔ̃ Yesu nine kɛtee Marta kɛ Maria shia. (Luka 10:​38) Yei enyɔ nɛɛ ji Lazaro nyɛmimɛi yei, ni mɛi etɛ nɛɛ fɛɛ ji Yesu kaselɔi kɛ nanemɛi kpakpai. (Yohane 11:⁠5) Ekolɛ, ale weku nɛɛ waa, kɛ asusu mɛi babaoo ni bashɛje Marta kɛ Maria mii beni Lazaro gbo lɛ he lɛ.[4] Yɛ fɛɛ sɛɛ lɛ, nɔ ni ba yɛ amɛshia beni Yesu yato amɛ gbɔ lɛ kɛ nikasemɔ ni he yɔɔ sɛɛnamɔ babaoo haa, jeee kɛha amɛ pɛ shi moŋ kɛha wɔ hu.

Ní Aaakase Nii yɛ Yesu Naji Anaa

Ŋwanejee ko bɛ he akɛ, Marta kɛ Maria miisumɔ ni amɛfee niyenii kɛ ŋɔɔmɔ ko amɛha Yesu, ni ekolɛ, enɛ yɛ amɛnyɛmɔ mli. (Okɛto Yohane 12:​1-⁠3 he.) Shi kɛlɛ, beni amɛgbɔ lɛ bashɛ shi lɛ, Maria ‘bata Yesu naji anaa ni ebo ewiemɔ lɛ toi.’ (Luka 10:​39) Adesai ablema kusum ko nyɛŋ atsĩ Yesu naa ni ekatsɔɔ yoo anɔkwafo ni miisumɔ ni ekase nii lɛ nii! Wɔbaanyɛ wɔfee Maria ni eta Yesu hiɛ, ni etsɔ nikaselɔ ni miibo e-Nuntsɔ tsɔɔmɔ toi jogbaŋŋ lɛ he mfoniri.​—Okɛto 5 Mose 33:⁠3; Bɔfoi lɛ Asaji 22:⁠3 he.

Akɛ mɔ ni tamɔɔɔ Maria lɛ, Marta “gba ehe naa tuutu yɛ sɔɔmɔ pii hewɔ.” Akɛni eehoo nibii babaoo hewɔ lɛ, enitsumɔ lɛ he ebe saŋŋ. Etsɛɛɛ ni Marta mli fu akɛ ashi lɛ pɛ ni eefee nɔ fɛɛ nɔ yɛ be mli ni enyɛmiyoo lɛ ta shi yɛ Yesu naji anaa! No hewɔ lɛ, Marta fo sane ni Yesu kɛ Maria gbaa lɛ mli, ekolɛ oya nɔŋŋ ni ekɛɛ: “Nuntsɔ okwɛɛɛ akɛ minyɛmi lɛ eshi mi ni mikome misɔmɔo nɛɛ? no hewɔ lɛ kɛɛmɔ lɛ, ni lɛ hu ebafata mihe.”​—Luka 10:⁠40.

Tɔ̃mɔ ko bɛ nɔ ni Marta biɔ lɛ diɛŋtsɛ he. Ejaakɛ niyenii hoomɔ kɛha kuu lɛ ji nitsumɔ dɛŋdɛŋ, ni esaaa akɛ jatsu lɛ yakãa mɔ kome pɛ nɔ. Shi kɛlɛ, Yesu yɔse yɛ Marta wiemɔ lɛ mli akɛ, hegbɛ yɛ ni ekɛaatsɔɔ nɔ̃ ko ni he hiaa waa. Ekɛɛ akɛ: “Marta, Marta! oogba ohe naa ni oohao ohe yɛ nibii pii ahewɔ; shi nɔ kome ehia. Nɔ ni hi lɛ, Maria ekɔ lɛ, ni no lɛ ashɔŋ yɛ edɛŋ.”​—Luka 10:​41, 42.

Yesu etsɔɔɔ akɛ Marta bɛ mumɔŋ nibii ahe miishɛɛ. Nɔ ni tamɔɔɔ nakai lɛ, ele lɛ akɛ yoo ni yɔɔ Nyɔŋmɔ jamɔ hetuu-kɛ-hamɔ ni mli kwɔ.a Ŋwanejee ko bɛ he akɛ, no ji nɔ ni tsirɛ lɛ ni ekɛfɔ̃ Yesu nine klɛŋklɛŋ kwraa kɛba eshia lɛ. Shi kɛlɛ, Yesu miikɛɛ Marta yɛ ehiɛkamɔ wiemɔ ni mli waaa tsɔ nɛɛ mli akɛ, hegbɛ ni ená akɛ Nyɔŋmɔ Bi lɛ diɛŋtsɛ atsɔɔ lɛ nii lɛ miiŋmɛɛ lɛ kɛtsɔ niyenii he yeyeeyefeemɔ lɛ nɔ.

Wɔbaanyɛ wɔkpɛlɛ nɔ akɛ, kusum ni yɔɔ yɛ nakai gbii lɛ amli lɛ baanyɛ afi jwɛŋmɔ ni ahiɛ lɛ sɛɛ, akɛ yoo baanyɛ atsɔɔ bɔ ni ehe yɔɔ sɛɛnamɔ ha kɛtsɔ nyɛmɔ ni enyɛɔ ekɛtsuɔ shia nii lɛ nɔ. Shi Yesu wiemɔi lɛ tsɔɔ akɛ taakɛ hii ji lɛ, yei baanyɛ ata Nyɔŋmɔ Bi lɛ naji anaa ni amɛbo wala wiemɔi lɛ atoi! (Yohane 4:​7-​15; Bɔfoi lɛ Asaji 5:​14) Enɛ hewɔ lɛ, kulɛ ebaafee nɔ ni hi jogbaŋŋ kɛha Marta akɛ eeehoo niyenii fioo ko​—loo ekolɛ ekome pɛ​—​kɛji no baaŋmɛ lɛ gbɛ koni enyɛ eta Nuntsɔ lɛ naji anaa ni ekase nii kɛjɛ eŋɔɔ.[8]​—Okɛto Mateo 6:​25 he.

Nikasemɔ Kɛha Wɔ

Ŋmɛnɛ, anaa hii kɛ yei fɛɛ yɛ mɛi ni hereɔ Yesu ninefɔɔ lɛ nɔ akɛ, ‘abayɛ wala nu lɛ yaka’ lɛ ateŋ. (Kpojiemɔ 22:​17) Akɛni suɔmɔ tsirɛɔ amɛ hewɔ lɛ, mɛi komɛi​—ni tamɔ Marta lɛ​—feɔ nɔ fɛɛ nɔ ni amɛaanyɛ koni amɛkɛtsu nanemɛi heyelilɔi ahiamɔ nii ahe nii. Amɛkɛ amɛjwɛŋmɔ tsuɔ nii ni amɛhe yɛ oya kɛ nifeemɔ, ni Yehowa ewo shi akɛ ebaawo amɛsuɔmɔ deŋme ni amɛgboɔ lɛ he nyɔmɔ. (Hebribii 6:​10; 13:​16) Shi ekolɛ mɛi komɛi hu tamɔ Maria. Amɛyɛ kpoo ni amɛjwɛŋɔ nii anɔ. Miishɛɛ ni amɛyɔɔ akɛ amɛaajwɛŋ Nyɔŋmɔ Wiemɔ lɛ nɔ lɛ yeɔ ebuaa amɛ ni amɛdamɔɔ shi shiŋŋ yɛ hemɔkɛyeli lɛ mli.​—Efesobii 3:​17-​19.

Gbɔmɛi aŋkroaŋkroi enyɔ nɛɛ fɛɛ tsuɔ hiamɔ nii ko ni he hiaa waa he nii yɛ Kristofoi asafo lɛ mli. Ni kɛlɛ, yɛ naagbee mli lɛ, esa akɛ mɔ fɛɛ mɔ ‘ahala nɔ ni hi lɛ’ kɛtsɔ mumɔŋ nibii ni amɛaagbala amɛjwɛŋmɔ kɛya nɔ titri lɛ nɔ. Kɛ́ wɔha wɔjwɛŋmɔ hi mumɔŋ nibii anɔ titri lɛ, wɔbaaná Yehowa nɔkpɛlɛmɔ kɛ edɛŋ jɔɔmɔ.​—Filipibii 1:​9-​11.

[Shishigbɛ niŋmaa]