Kristofoi kɛ Adesai Aje Lɛ
“Nyɛnyiɛa yɛ nilee mli, yɛ mɛi ni yɔɔ sɛɛ lɛ ahiɛ.”—KOLOSEBII 4:5.
1. Mɛni Yesu wie yɛ esɛɛnyiɛlɔi lɛ kɛ je lɛ he?
YESU wie esɛɛnyiɛlɔi lɛ ahe, yɛ sɔlemɔ mli eha eŋwɛi Tsɛ lɛ akɛ: “Je lɛ miinyɛ amɛ, ejaakɛ amɛjɛɛɛ je lɛ mli, taakɛ bɔ ni mi hu mijɛɛɛ je lɛ mli lɛ.” Kɛkɛ ni ekɛfata he akɛ: “Mibiii akɛ ojie amɛ kɛjɛ je lɛ mli, shi moŋ akɛ obu amɛhe yɛ efɔŋ lɛ mli.” (Yohane 17:14, 15) Esaaa akɛ Kristofoi tsiɔ amɛhe kwraa kɛjɛɔ je lɛ he yɛ gbɔmɔtsoŋ—akɛ nɔkwɛmɔnɔ lɛ, ní amɛyahi he ko banee yɛ mɔ kome shihilɔi ashihilɛhei. Shi moŋ, Kristo ‘tsu amɛ kɛtee je lɛ mli’ koni amɛfee edasefoi “kɛyashi shikpɔŋ lɛ naagbeehei lɛ.” (Yohane 17:18; Bɔfoi lɛ Asaji 1:8) Shi kɛlɛ, ebi ni Nyɔŋmɔ abu amɛhe ejaakɛ Satan, ni ji “je nɛŋ lumɔ lɛ,” baawo hewalɛ ni anyɛ amɛ yɛ Kristo gbɛi lɛ hewɔ.—Yohane 12:31; Mateo 24:9.
2. (a) Te Biblia lɛ kɛ wiemɔ “je” lɛ tsuɔ nii ehaa tɛŋŋ? (b) Mɛɛ shidaamɔ ni ŋmɛɔ pɛpɛɛpɛ Yehowa jieɔ lɛ kpo yɛ je lɛ he?
2 Yɛ Biblia lɛ mli lɛ, bei pii lɛ wiemɔ “jeŋ” (Hela, koʹsmos) lɛ kɔɔ adesai ashihilɛ gbɛjianɔtoo ni ejaaa, ni “kã mɔ fɔŋ lɛ mli” lɛ he. (1 Yohane 5:19) Akɛni Kristofoi hiɔ shi yɛ tɛi ni Yehowa efolɔ eshwie shi lɛ anaa, ni amɛboɔ famɔ ni akɛha amɛ akɛ amɛshiɛ Nyɔŋmɔ Maŋtsɛyeli lɛ he sanekpakpa lɛ amɛtsɔɔ je lɛ hu toi hewɔ lɛ, bei komɛi lɛ wekukpaa ni jeee ekpakpa bakãa amɛkɛ je lɛ teŋ. (2 Timoteo 3:12; 1 Yohane 3:1, 13) Shi kɛlɛ, akɛ koʹsmos tsuɔ nii hu yɛ Ŋmalɛ lɛ mli kɛkɔɔ adesai aweku muu lɛ fɛɛ he. Beni ewieɔ je lɛ he yɛ shishinumɔ nɛɛ naa lɛ, Yesu kɛɛ akɛ: “Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala. Ejaakɛ Nyɔŋmɔ tsuuu ebi lɛ kɛbaaa je lɛ mli koni ebakojo je lɛ, shi moŋ koni atsɔ enɔ ahere je lɛ yiwala.” (Yohane 3:16, 17; 2 Korintobii 5:19; 1 Yohane 4:14) No hewɔ lɛ, yɛ be mli ni enyɛɔ nibii ni kadiɔ Satan gbɛjianɔtoo fɔŋ lɛ, Yehowa jie suɔmɔ ni eyɔɔ kɛha adesai lɛ kpo kɛtsɔ e-Bi lɛ ni etsu lɛ kɛba shikpɔŋ nɔ lɛ nɔ, koni ehere mɛi fɛɛ ni ‘baashɛ tsuitsakemɔ he’ lɛ ayiwala. (2 Petro 3:9; Abɛi 6:16-19) Esa akɛ Yehowa shidaamɔ ni ŋmɛɔ pɛpɛɛpɛ yɛ je lɛ he lɛ akudɔ ejalɔi.
Yesu Nɔkwɛmɔnɔ
3, 4. (a) Mɛɛ shidaamɔ Yesu kɔ yɛ nɔyeli hegbɛ he? (b) Te Yesu bu adesai aje lɛ eha tɛŋŋ?
3 Beni eshwɛ fioo ni ebaagbo lɛ, Yesu kɛɛ Pontio Pilato akɛ: “Mimaŋtsɛyeli lɛ jɛɛɛ je nɛŋ.” (Yohane 18:36) Yɛ wiemɔi nɛɛ kɛ gbeekpamɔ naa lɛ, Yesu etsɔ hiɛ ekpoo hegbɛ ni Satan kɛhaa lɛ akɛ ekɛ je lɛŋ maŋtsɛyelii lɛ anɔ hewalɛ baaha lɛ lɛ momo, ni eŋmɛɛɛ gbɛ hu ni Yudafoi lɛ awo lɛ maŋtsɛ. (Luka 4:5-8; Yohane 6:14, 15) Shi kɛlɛ, Yesu jie suɔmɔ kpele kpo etsɔɔ adesai aje lɛ. Bɔfo Mateo bɔ enɛ he nɔkwɛmɔnɔ he amaniɛ akɛ: “Shi beni ena mɛi babaoo lɛ, emusuŋ tsɔ lɛ yɛ amɛhewɔ, akɛni etɔ amɛ ni amɛfee yuyaa tamɔ tooi ni bɛ kwɛlɔ lɛ.” Suɔmɔ ni eyɔɔ lɛ hewɔ lɛ, eshiɛ etsɔɔ gbɔmɛi lɛ yɛ amɛmaji kɛ akrowai lɛ amli. Etsɔɔ amɛ nii ni etsá amɛ helai lɛ. (Mateo 9:36) Enu mɛi ni baa eŋɔɔ amɛbakaseɔ nii lɛ aheloonaa hiamɔ nii hu he. Wɔkaneɔ akɛ: “Yesu tsɛ ekaselɔi lɛ kɛba ni ekɛɛ: ‘Mimusuŋ miitsɔ mi yɛ asafoi lɛ ahewɔ, akɛ ŋmɛnɛ ji gbii etɛ ni amɛkɛ mi ehi shi, ni amɛbɛ nɔ ko ni amɛyeɔ; ni misumɔɔɔ akɛ miwoɔ amɛ gbɛ kɛ hɔmɔ, ni ekolɛ amɛyatɔɔ biti yɛ gbɛ lɛ nɔ.’ ” (Mateo 15:32) Mɛɛ mɔ hesusumɔ ni tsɔɔ suɔmɔ nɛ!
4 Yudafoi lɛ hiɛ Samariabii lɛ ahe jwɛŋmɔ fɔŋ waa diɛŋtsɛ, shi Yesu kɛ Samariayoo ko wie yɛ be kakadaŋŋ mli, ni eye gbii enyɔ ni ekɛye odase jogbaŋŋ kɛmɔ shi yɛ Samaria maŋtiase ko mli. (Yohane 4:5-42) Eyɛ mli akɛ Nyɔŋmɔ tsu lɛ kɛba “Israel we tooi ni elaaje lɛ aŋɔɔ” moŋ, shi bei komɛi lɛ, Yesu tsuɔ hemɔkɛyeli wiemɔi ni mɛi krokomɛi ni amɛjeee Yudafoi lɛ wieɔ lɛ ahe nii. (Mateo 8:5-13; 15:21-28) Hɛɛ, Yesu fee lɛ faŋŋ akɛ abaanyɛ afee ‘mɛi ni jɛɛɛ je lɛ mli,’ ní yɛ nakai beaŋ nɔŋŋ lɛ ajie suɔmɔ kpo atsɔɔ adesai aje lɛ, ni ji gbɔmɛi. Ani wɔ hu wɔjieɔ musuŋtsɔlɛ kpo wɔtsɔɔ gbɔmɛi yɛ he ni wɔyɔɔ, he ni wɔtsuɔ nii, loo he ni wɔyeɔ jara yɛ lɛ? Ani wɔsusuɔ amɛ hilɛ-kɛhamɔ he—jeee yɛ amɛ mumɔŋ hiamɔ nii agbɛfaŋ pɛ kɛkɛ, shi moŋ yɛ amɛ hiamɔ nii krokomɛi hu he kɛji akɛ eyɛ wɔhewalɛ mli akɛ wɔɔnyɛ wɔye wɔbua? Yesu fee nakai, ni ekɛ nakai feemɔ gbele gbɛ ni ekɛtsɔɔ gbɔmɛi lɛ Maŋtsɛyeli lɛ he saji. Eji anɔkwale akɛ, wɔnyɛŋ wɔfee naakpɛɛ nii diɛŋtsɛ tamɔ bɔ ni Yesu fee lɛ. Shi bei pii lɛ, mlihilɛ nifeemɔ feɔ naakpɛɛ nii, kɛ́ wɔɔwie he nakai, ni ejieɔ jwɛŋmɔ fɔŋ ni mɛi hiɛ yɛ wɔhe lɛ kɛyaa.
Subaŋ ni Paulo Jie lɛ Kpo Yɛ “Mɛi ni Yɔɔ Sɛɛ” lɛ Ahe
5, 6. Te bɔfo Paulo kɛ Yudafoi “ni yɔɔ sɛɛ” lɛ ye eha tɛŋŋ?
5 Yɛ ewoji lɛ babaoo mli lɛ, bɔfo Paulo wieɔ “mɛi ni yɔɔ sɛɛ” lɛ ahe, ni miitsɔɔ mɛi ni jeee Kristofoi, kɛji amɛji Yudafoi loo Jeŋmajiaŋbii. (1 Korintobii 5:12; 1 Tesalonikabii 4:12; 1 Timoteo 3:7) Te ekɛ gbɔmɛi nɛɛ ye eha tɛŋŋ? ‘Etsɔ ehe nɔ fɛɛ nɔ eha mɛi fɛɛ, koni be fɛɛ be ni aaafee lɛ ekɛhere mɛi komɛi ayiwala.’ (1 Korintobii 9:20-22) Kɛ́ eyashɛ maŋtiase ko mli lɛ, gbɛ ni etsɔɔ nɔ eshiɛɔ ji akɛ, klɛŋklɛŋ lɛ eyaa Yudafoi ni eyahi jɛmɛ lɛ aŋɔɔ. Mɛɛ gbɛ nɔ etsɔɔ ekɛ amɛ wieɔ? Ekɛ ŋaalee kɛ bulɛ tsuɔ nii ni ekɛ Biblia mli odaseyelii kɔneɔ amɛyiŋ akɛ Mesia lɛ eba, ebagbo afɔleshaa gbele, ni atee lɛ shi.—Bɔfoi lɛ Asaji 13:5, 14-16, 43; 17:1-3, 10.
6 Paulo tsɔ nɛkɛ gbɛ nɔ etswa ema nilee ni Yudafoi lɛ yɔɔ yɛ Mla lɛ kɛ gbalɔi lɛ ahe lɛ nɔ koni enyɛ etsɔɔ amɛ Mesia lɛ kɛ Nyɔŋmɔ Maŋtsɛyeli lɛ he saji. Ni enyɛ etsɔ amɛteŋ mɛi komɛi ayiŋ yɛ omanyeyeli mli. (Bɔfoi lɛ Asaji 14:1; 17:4) Yɛ shitee-kɛ-woo ni Yudafoi ahiɛnyiɛlɔi lɛ kɛba lɛ fɛɛ sɛɛ lɛ, Paulo jie suɔmɔ henumɔi akpo etsɔɔ enanemɛi Yudafoi lɛ beni eŋma akɛ: “Anyɛmimɛi, nɔ ni mitsui shweɔ kɛ fai ni mikpaa Nyɔŋmɔ mihaa Israel [Yudafoi lɛ] ji akɛ ahere amɛyiwala. Ejaakɛ miiye amɛhe odase akɛ amɛhiɛ dɔɔ yɛ Nyɔŋmɔ he moŋ, shi jeee nilee naa.”—Romabii 10:1, 2.
Heyelilɔi ni Jeee Yudafoi lɛ ni Aaaye Abua Amɛ
7. Mɛi ni atsake amɛ kɛba Yuda jamɔ mli lɛ ateŋ mɛi babaoo here sanekpakpa ni Paulo shiɛ lɛ nɔ yɛ mɛɛ gbɛ nɔ?
7 Mɛi ni atsake amɛ ehee lɛ ji mɛi ni amɛjeee Yudafoi, ni ebatsɔmɔ mɛi ni diɔ Yuda jamɔ sɛɛ ni afolɔ amɛ ketia lɛ. Eka shi faŋŋ akɛ, Yudafoi ni atsake amɛ ehee lɛ ekomɛi yɛ Roma, Siria Antiokia, Etiopia, kɛ Antiokia ni yɔɔ Pisidia—yɛ anɔkwale mli lɛ, yɛ Yudafoi ni Egbɛ Eshwã lɛ ateŋ fɛɛ. (Bɔfoi lɛ Asaji 2:8-10; 6:5; 8:27; 13:14, 43; okɛto Mateo 23:15 he.) Ákɛ mɛi ni tamɔɔɔ Yudafoi anɔyelɔi lɛ ateŋ mɛi babaoo lɛ, ekolɛ mɛi ni atsake amɛ ehee lɛ wooo amɛhe, ni amɛnyɛŋ amɛkɛ henɔwomɔ ashwã akɛ Abraham seshibii ji amɛ. (Mateo 3:9; Yohane 8:33) Shi moŋ, amɛshi wɔŋjalɔi anyɔŋmɔi lɛ, ni amɛkɛ heshibaa etsɔ amɛhe kɛba Yehowa ŋɔɔ, ni amɛbaná ekɛ emlai lɛ ahe nilee ko. Ni amɛkpɛlɛɔ Yudafoi ahiɛnɔkamɔ ni kɔɔ Mesia ni baa lɛ he lɛ nɔ. Akɛni amɛjɛ amɛsuɔmɔ mli amɛtsɔɔ akɛ amɛmiisumɔ ni amɛfee tsakemɔi yɛ anɔkwale ni amɛtaoɔ lɛ mli hewɔ lɛ, amɛteŋ mɛi babaoo efee klalo akɛ amɛaafee tsakemɔi babaoo koni amɛkpɛlɛ bɔfo Paulo shiɛmɔ lɛ nɔ. (Bɔfoi lɛ Asaji 13:42, 43) Kɛji mɔ ko ni atsake lɛ, ní tsutsu ko lɛ ejaa wɔŋjalɔi anyɔŋmɔi lɛ tsake kɛba Kristojamɔ mli lɛ, ebafeɔ mɔ ko ni awula lɛ yɛ gbɛ krɛdɛɛ nɔ, koni eye Jeŋmajiaŋbii krokomɛi ni jaa nakai nyɔŋmɔi lɛ lolo lɛ odase.
8, 9. (a) Yɛ mɛi ni atsake amɛ lɛ asɛɛ lɛ, mɛɛ Jeŋmajiaŋbii akuu kroko hu agbala amɛ kɛba Yudafoi ajamɔ lɛ he? (b) Te Nyɔŋmɔ gbeyeishelɔi foolɔi babaoo here sanekpakpa lɛ nɔ amɛha tɛŋŋ?
8 Yɛ mɛi ni atsake amɛ ni afolɔ amɛ ketia lɛ asɛɛ lɛ, agbala mɛi krokomɛi ni amɛjeee Yudafoi hu kɛba Yudafoi ajamɔ lɛ mli. Mɛnɛɛmɛi ateŋ klɛŋklɛŋ mɔ ni batsɔ Kristofonyo ji Kornelio, mɔ ni, eyɛ mli akɛ etsakeee kɛyaaa Yuda jamɔ mli moŋ, shi eji ‘Nyɔŋmɔ jalɔ ni sheɔ Nyɔŋmɔ gbeyei’ lɛ. (Bɔfoi lɛ Asaji 10:2) Nilelɔ F. F. Bruce ŋma yɛ shishitsɔɔmɔ ni eŋma yɛ Bɔfoi lɛ Asaji awolo lɛ he lɛ mli akɛ: “Afɔɔ nɛkɛ Jeŋmajiaŋbii nɛɛ tsɛmɔ akɛ ‘Nyɔŋmɔ gbeyeishelɔi’; eyɛ mli akɛ enɛ jeee nɔ ni damɔ mla nɔ moŋ, shi eji gbɛi ni sa kɛha nitsumɔ. Eyɛ mli akɛ Jeŋmajiaŋbii ni hi shi yɛ nakai gbii lɛ amli lɛ ateŋ mɛi babaoo efeee klalo akɛ amɛaatsake kwraa kɛya Yudafoi ajamɔ lɛ mli (akɛni ketiafoo he taomɔ nii lɛ ji tɛmɔtɛ krɛdɛɛ ko kɛha hii lɛ hewɔ lɛ) moŋ, shi Nyɔŋmɔ kome mli hemɔkɛyeli ni yɔɔ Yudafoi akpeehei lɛ amli jamɔi amli, kɛ jeŋba he mlai ahe tɛi ni afolɔ ashwie shi yɛ Yudafoi ashihilɛ mli lɛ gbala amɛ kɛba. Amɛteŋ mɛi komɛi yaa kpeehe lɛ, ni amɛbatsɔmɔ mɛi ni le sɔlemɔi kɛ ŋmalɛ mli nikasemɔi, ní amɛnuɔ ni akaneɔ yɛ Hela wiemɔ mli lɛ jogbaŋŋ bɔ ni sa.”
9 Bɔfo Paulo kɛ Nyɔŋmɔ gbeyeishelɔi babaoo kpe beni eshiɛɔ yɛ kpeehei ni yɔɔ Asia Bibioo lɛ kɛ Hela lɛ. Beni eyɔɔ Antiokia ni yɔɔ Pisidia lɛ, ekɛ mɛi ni babua amɛhe naa yɛ kpeehe lɛ wie ni etsɛ amɛ “ataamɛi Israel hii kɛ nyɛ mɛi ni nyɛsheɔ Nyɔŋmɔ gbeyei.” (Bɔfoi lɛ Asaji 13:16, 26) Luka ŋma akɛ beni Paulo kɛ Hejɔɔmɔ Gbii etɛ shiɛ yɛ kpeehe ni yɔɔ Tesalonika lɛ, “amɛteŋ mɛi komɛi [Yudafoi lɛ] hé kpɛlɛ [amɛtsɔmɔ Kristofoi] ni amɛkɛ amɛhe kpɛtɛ Paulo kɛ Sila he, kɛ Helabii Nyɔŋmɔ gbeyeishelɔi lɛ ateŋ mɛi babaoo, kɛ yei hiɛnaanɔbii hu pii.” (Bɔfoi lɛ Asaji 17:4) Eeenyɛ efee akɛ, ekolɛ Helabii lɛ ekomɛi ji Nyɔŋmɔ gbeyeishelɔi foolɔi. Odaseyeli yɛ ni tsɔɔ akɛ Jeŋmajiaŋbii ni tamɔ nɛkɛ babaoo kɛ amɛhe bɔ Yudafoi akui ahe.
Shiɛmɔ Yɛ “Mɛi ni Heee Yeee” lɛ Ateŋ
10. Mɛɛ gbɛ nɔ Paulo tsɔ eshiɛ etsɔɔ Jeŋmajiaŋbii ni bɛ Ŋmalɛi lɛ ahe nilee ko kwraa lɛ, ni mɛni jɛ mli kɛba?
10 Yɛ Kristofoi a-Hela Ŋmalɛi lɛ amli lɛ, wiemɔ “mɛi ni heee yeee” lɛ baanyɛ akɔ gbɔmɛi fɛɛ ni bɛ Kristofoi asafo lɛ mli lɛ ahe. Bei pii lɛ ekɔɔ wɔŋjalɔi ahe. (Romabii 15:31; 1 Korintobii 14:22, 23; 2 Korintobii 4:4; 6:14) Atsɔse mɛi ni heee yeee, ni yɔɔ Ateene lɛ ateŋ mɛi babaoo yɛ Hela jeŋ nilee mli, ni amɛbɛ Ŋmalɛi lɛ ahe nilee ko kwraa. Ani enɛ je Paulo nijiaŋ wui koni ekaye amɛ odase? Dabi. Shi kɛlɛ, etsake gbɛ ni etsɔɔ nɔ eyeɔ odase lɛ mli. Etsɔ ŋaa gbɛ nɔ ewie Biblia mli susumɔi ahe ní etsɛɛɛ wiemɔi asɛɛ tɛɛ kɛjɛɛɛ Hebri Ŋmalɛi lɛ, ní Ateenebii lɛ leee lɛ amli. Ekɛ ŋaalee tsɔɔ bɔ ni Biblia mli anɔkwale lɛ kɛ susumɔi komɛi ni blema Stoamɛi lalafolɔi ewie lɛ je amɛhe hã. Ni ewie susumɔ ni kɔɔ anɔkwa Nyɔŋmɔ kome kɛha adesai fɛɛ, Nyɔŋmɔ ni baakojo yɛ jalɛ naa kɛtsɔ nuu ni gbo ni atee lɛ shi lɛ nɔ lɛ he etsɔɔ amɛ. No hewɔ lɛ, Paulo tsɔ ŋaa gbɛ nɔ eshiɛ Kristo he saji etsɔɔ Ateenebii lɛ. Mɛni jɛ mli ba? Eyɛ mli akɛ mɛi pii ye ehe fɛo yɛ faŋŋ mli loo amɛheee lɛ amɛyeee moŋ, shi “hii komɛi kɛ amɛhe kpɛtɛ ehe ni amɛhe amɛye; amɛteŋ mɛi komɛi ji Dionisio, Areopagonyo lɛ hu, kɛ yoo ko ni atsɛɔ lɛ Damari lɛ, kɛ mɛi krokomɛi ni fata amɛhe.”—Bɔfoi lɛ Asaji 17:18, 21-34.
11. Mɛɛ maŋtiase nɛkɛ ji Korinto, ni mɛni jɛ Paulo shiɛmɔ nitsumɔ yɛ jɛmɛ lɛ mli kɛba?
11 Yudafoi akuu ni da saŋŋ yɛ Korinto, no hewɔ lɛ Paulo yashiɛ yɛ kpeehe lɛ ni ekɛje esɔɔmɔ nitsumɔ lɛ shishi yɛ jɛmɛ. Shi beni Yudafoi lɛ bafee amɛhe shitee-kɛ-wolɔi lɛ, Paulo tee Jeŋmajiaŋbii lɛ aŋɔɔ. (Bɔfoi lɛ Asaji 18:1-6) Ni mɛɛ gbɔmɛi po nɛ! Korinto ji jarayeli maŋtiase ni mli yɔɔ hirihiri, ni gbɔmɛi ni jɛ je lɛŋ hei sɔrɔtoi yɔɔ mli, ni ehe gbɛi fɔŋ yɛ Helabii kɛ Romabii aje lɛ mli fɛɛ yɛ jeŋba shara ni yɔɔ mli lɛ hewɔ. Yɛ anɔkwale mli lɛ, “ní aaafee Korintonyo” lɛ tsɔɔ akɛ akɛ he woɔ jeŋba shara mli. Shi kɛlɛ, beni Yudafoi lɛ kpoo Paulo shiɛmɔ lɛ sɛɛ dani Kristo jie ehe kpo etsɔɔ lɛ ni ekɛɛ lɛ akɛ: “Kaashe gbeyei, shi moŋ wiemɔ . . . , ejaakɛ miyɛ mɛi pii yɛ maŋ nɛŋ.” (Bɔfoi lɛ Asaji 18:9, 10) Ni lɛɛlɛŋ hu, Paulo to asafo shishi yɛ Korinto, eyɛ mli akɛ tsutsu lɛ, emlibii lɛ ateŋ mɛi komɛi ehi “Korintonyo” shihilɛ lɛ mli dã.—1 Korintobii 6:9-11.
Mɔdɛŋ ni Abɔɔ ni Ahere “Gbɔmɛi Fɛɛ” Yiwala Ŋmɛnɛ
12, 13. (a) Wɔ shikpɔŋkuku ni wɔshiɛɔ yɛ mli ŋmɛnɛ lɛ tamɔ Paulo nɔ lɛ yɛ mɛɛ gbɛ nɔ? (b) Mɛɛ su wɔjieɔ lɛ kpo yɛ shikpɔŋkukuji ni ato Kristendom jamɔi ashishi yɛ jɛmɛ etsɛ, aloo hei ni mɛi babaoo ayiŋ efutu amɛ yɛ jamɔ ni ato he gbɛjianɔ lɛ he lɛ amli?
12 Ŋmɛnɛ, taakɛ eji yɛ klɛŋklɛŋ afii oha lɛ mli lɛ, “Nyɔŋmɔ duromɔ . . . akɛhereɔ gbɔmɛi fɛɛ yiwala.” (Tito 2:11) Shikpɔŋkuku ni yɔɔ kɛha sanekpakpa lɛ shiɛmɔ mli elɛɛ kɛyashɛ shikpɔji wuji lɛ fɛɛ kɛ ŋshɔkpɔi lɛ ateŋ babaoo nɔ. Ni, taakɛ eji yɛ Paulo gbii lɛ amli lɛ, akɛ “gbɔmɛi fɛɛ” miikpe lɛɛlɛŋ. Akɛ nɔkwɛmɔnɔ lɛ, wɔteŋ mɛi komɛi shiɛɔ yɛ shikpɔji anɔ hei ni afii ohai babaoo nɛ ni ato Kristendom sɔlemɔi lɛ ashishi yɛ jɛmɛ. Taakɛ Yudafoi ni hi shi yɛ klɛŋklɛŋ afii oha lɛ mli lɛ ji lɛ, ekolɛ jamɔ mli blema saji ená amɛmli bii lɛ anɔ hewalɛ waa diɛŋtsɛ. Shi kɛlɛ, wɔyɛ he miishɛɛ akɛ wɔɔtao mɛi ni yɔɔ tsui kpakpa lɛ koni wɔha nilee fɛɛ nilee ni amɛyɔɔ yɛ Biblia lɛ he lɛ aya hiɛ. Wɔkɛ wɔwiemɔ etsɔɔɔ akɛ wɔbaa amɛ shi loo wɔbuuu amɛ kɛji akɛ bei komɛi lɛ amɛ jamɔ mli hiɛnyiɛlɔi lɛ teɔ shi amɛwoɔ wɔ ni amɛwaa wɔ yi po. Shi moŋ, wɔyɔseɔ akɛ mɛi komɛi yɛ amɛteŋ ni ekolɛ “amɛhiɛ dɔɔ yɛ Nyɔŋmɔ he,” eyɛ mli akɛ amɛbɛ anɔkwa nilee. Taakɛ Yesu kɛ Paulo ji lɛ, wɔjieɔ anɔkwa suɔmɔ kpo wɔtsɔɔ gbɔmɛi lɛ, ni wɔshweɔ waa akɛ ahere amɛyiwala.—Romabii 10:2.
13 Kɛ́ wɔmiishiɛ lɛ, wɔteŋ mɛi pii kɛ aŋkroaŋkroi ni yiŋ efutu amɛ yɛ jamɔ ni ato he gbɛjianɔ he lɛ kpeɔ. Shi, ekolɛ amɛkã he amɛji Nyɔŋmɔ gbeyeishelɔi, ni heɔ Nyɔŋmɔ nɔ amɛyeɔ kɛyashiɔ he ko, ni amɛmiibɔ mɔdɛŋ ni amɛhi shi yɛ gbɛ kpakpa nɔ. Ani esaaa ni wɔmii shɛɔ wɔhe akɛ wɔkɛ gbɔmɛi ni yɔɔ Nyɔŋmɔ mli hemɔkɛyeli aaakpe yɛ nɛkɛ yinɔ kɔ̃ɔdɔ̃ŋ ni bɛ Nyɔŋmɔ gbeyeishemɔ kwraa nɛɛ mli? Ni ani wɔbɔɔ mɔdɛŋ akɛ wɔɔtsɔɔ amɛ gbɛ kɛba jamɔ ni osatofeemɔ kɛ amale kadiii lɛ lɛ mli?—Filipibii 2:15.
14, 15. Agbele ŋmɔ agbo naa kɛha sanekpakpa lɛ shiɛmɔ yɛ mɛɛ gbɛ nɔ?
14 Yesu gba efɔ shi yɛ ebɛbua ni kɔɔ yáa lɛ he lɛ mli akɛ abaaná shikpɔŋkuku agbo kɛha shiɛmɔ nitsumɔ lɛ. (Mateo 13:47-49) Beni etsɔɔ abɛbua nɛɛ mli lɛ, Buu-Mɔɔ ni je kpo yɛ June 15, 1992 lɛ wie yɛ baafa 20 lɛ akɛ: “Kristendom mli bii kɛ afii ohai abɔ etsu babaoo yɛ Nyɔŋmɔ Wiemɔ lɛ shishitsɔɔmɔ, enɔ ni akwɛɔ aŋmalaa ekomɛi, kɛ ejaa mli. Yɛ sɛɛ mli lɛ, sɔlemɔi lɛ to Biblia asafoi loo amɛfi ekomɛi asɛɛ, ni amɛtsɔɔ Biblia lɛ shishi kɛtee shikpɔji ni yɔɔ hei banee lɛ awiemɔi amli. Amɛtsu maŋsɛɛ sanekpakpa shiɛlɔi ni ji tsofafeelɔi kɛ tsɔɔlɔi, ni amɛha gbɔmɛi batsɔmɔ Kristofoi yɛ niyenii kɛ heloo gbɛfaŋ nibii ni amɛnine shɛɔ nɔ lɛ hewɔ. Enɛ bua looi babaoo ni ehiii, ni bɛ Nyɔŋmɔ nɔkpɛlɛmɔ lɛ anaa. Shi kɛ hoo lɛ, eha gbɔmɛi akpekpei abɔ ni jeee Kristofoi bale Biblia lɛ kɛ Kristojamɔ ko, eyɛ mli akɛ ekpɔtɔ.”
15 Mɛi heei ni Kristendom tsakeɔ kɛbaa ejamɔ lɛ mli lɛ emɔ shi waa, titri lɛ yɛ Amerika Wuoyigbɛ, Afrika, kɛ ŋshɔkpɔi komɛi anɔ. Wɔkɛ heshibalɔi babaoo ekpe yɛ hei nɛɛ yɛ wɔgbii nɛɛ amli, ni wɔbaanyɛ wɔya nɔ wɔfee ekpakpa babaoo kɛji wɔjie subaŋ kpakpa kɛ suɔmɔ kpo yɛ nɛkɛ gbɔmɛi heshibalɔi nɛɛ ahe, taakɛ Paulo fee yɛ mɛi ni tsake kɛba Yudafoi ajamɔ mli lɛ ahe lɛ. Mɛi ni wɔ yelikɛbuamɔ he hiaa amɛ lɛ ateŋ mɛi komɛi hu ji gbɔmɛi akpekpei abɔ ni abaanyɛ atsɛ amɛ “mɛi ni sumɔɔ” Yehowa Odasefoi “asane” lɛ. Amɛnáa miishɛɛ akɛ amɛaana wɔ be fɛɛ be, kɛ́ wɔtee amɛŋɔɔ. Amɛteŋ mɛi komɛi kɛ wɔ ekase Biblia lɛ ni amɛba wɔ kpeei hu, titri lɛ Kristo gbele lɛ Kaimɔ ni afeɔ daa afi lɛ. Ani nɛkɛ gbɔmɛi nɛɛ jeee ŋmɔ agbo kɛha Maŋtsɛyeli lɛ he sanekpakpa lɛ shiɛmɔ?
16, 17. (a) Mɛɛ gbɔmɛi nɛkɛ wɔkɛ sanekpakpa lɛ yaa amɛŋɔɔ? (b) Wɔkaseɔ Paulo yɛ gbɔmɛi sɔrɔtoi fɛɛ ni wɔshiɛɔ wɔtsɔɔ amɛ lɛ mli yɛ mɛɛ gbɛ nɔ?
16 Kɛfata he lɛ, mɛi ni jɛ hiŋmɛigbelemɔi ni fataaa Kristendom he lɛ amli—kɛji wɔkɛ amɛ kpeɔ yɛ amɛ diɛŋtsɛ amɛshikpɔji anɔ aloo amɛji gbɔmɛi ni efã gbɛ kɛyahi Anaigbɛ shikpɔji anɔ lɛ hu? Ni nakai gbɔmɛi akpekpei babaoo ni ekpoo Nyɔŋmɔ jamɔ kwraa, ni amɛtsɔmɔ mɛi ni kɛɔ akɛ Nyɔŋmɔ bɛ loo anyɛŋ ale akɛ Nyɔŋmɔ yɛ lɛ hu? Kɛfata he lɛ, mɛi ni kɛ henumɔ ni mli wa tamɔ jamɔŋ henumɔ nyiɛɔ ŋmɛnɛŋmɛnɛ beaŋ jeŋ nilee loo susumɔi ni egbɛ eshwã he fɛɛ he, ní aŋmalaa awoɔ woji babaoo ni akɛyeɔ abuaa he lɛ amli, ni anaa yɛ woji ahɔɔmɔ hei lɛ asɛɛ lɛ hu? Ani esa akɛ wɔku wɔhiɛ wɔfɔ̃ gbɔmɛi nɛɛ ateŋ eko nɔ, ni wɔbu amɛ akɛ anyɛŋ akpɔ̃ amɛ? Wɔfeŋ nakai kɛji wɔkase bɔfo Paulo.
17 Beni eshiɛɔ yɛ Ateene lɛ, Paulo egbeee kaa ni ji jeŋ nilee he saji ni ekɛ etoibolɔi lɛ aaataa naa yɛ he lɛ mli. Shi kɛlɛ, etsake esaji ahesusumɔ lɛ mli koni ekɔ gbɔmɛi ni ekɛwieɔ lɛ ahe, ni ekɛ Biblia mli anɔkwalei lɛ ha yɛ gbɛ ni yɔɔ faŋŋ, ni shishinumɔ yɔɔ mli nɔ. Nakai nɔŋŋ ehe ehiaaa ni wɔ hu wɔhe asa jogbaŋŋ yɛ gbɔmɛi ni wɔshiɛɔ wɔtsɔɔ amɛ lɛ ajamɔi loo jeŋ nilee he saji amli. Shi kɛlɛ, wɔtsakeɔ gbɛ ni wɔtsɔɔ nɔ lɛ koni eha wɔ odaseyeli lɛ amɔ shi, ni wɔkɛ nakai feemɔ tsɔmɔɔ ‘nɔ fɛɛ nɔ wɔhaa mɛi fɛɛ.’ (1 Korintobii 9:22) Beni eŋmaa wolo eyaha Kristofoi ni yɔɔ Kolose lɛ, Paulo wie akɛ: “Nyɛnyiɛa yɛ nilee mli yɛ mɛi ni yɔɔ sɛɛ lɛ ahiɛ, ni nyɛtsu nyɛdekã lɛ he nii. Nyɛhaa nyɛ wiemɔ he abaa nyam daa, ni ŋoo ahi mli, ni nyɛle bɔ ni sa akɛ nyɛhaa mɔ fɛɛ mɔ hetoo.” (Wɔma efã ko nɔ mi.)—Kolosebii 4:5, 6.
18. Mɛɛ gbɛnaa nii kã wɔnɔ, ni mɛni esaaa ni wɔhiɛ kpaa nɔ kɔkɔɔkɔ?
18 Taakɛ Yesu kɛ bɔfo Paulo fee lɛ, nyɛhaa wɔjiea suɔmɔ kpo wɔtsɔɔa gbɔmɛi sɔrɔtoi fɛɛ. Titri lɛ, nyɛhaa wɔbɔa mɔdɛŋ fɛɛ ni wɔɔnyɛ ni wɔkɛ mɛi krokomɛi agba Maŋtsɛyeli lɛ he sanekpakpa lɛ he sane. Yɛ gbɛ kroko nɔ lɛ, wɔhiɛ akakpa nɔ kɔkɔɔkɔ akɛ Yesu wie ekaselɔi lɛ ahe akɛ: “Amɛjɛɛɛ je lɛ mli.” (Yohane 17:16) Abaasusu nɔ ni enɛ tsɔɔ kɛha wɔ lɛ he babaoo yɛ nikasemɔ ni nyiɛ sɛɛ lɛ mli.
Kɛha Emlitii
◻ Tsɔɔmɔ su ni ŋmɛɔ pɛpɛɛpɛ ni Yesu hiɛ yɛ je lɛ he lɛ mli.
◻ Mɛɛ gbɛ nɔ bɔfo Paulo tsɔ eshiɛ etsɔɔ Yudafoi kɛ mɛi ni atsake amɛ kɛba Yuda jamɔ mli lɛ?
◻ Mɛɛ gbɛ nɔ Paulo tsɔ ekɛ Nyɔŋmɔ gbeyeishelɔi kɛ mɛi ni heee yeee lɛ wie?
◻ Mɛɛ gbɛ nɔ wɔɔtsɔ wɔfee wɔhe ‘nɔ fɛɛ nɔ wɔha mɛi fɛɛ’ yɛ wɔ shiɛmɔ nitsumɔ lɛ mli?
[Mfoniri ni yɔɔ baafa 10]
Bei pii lɛ, Kristofoi baanyɛ ajie amɛhe jwɛŋmɔ fɔŋ ni mɛi hiɛ lɛ kɛtsɔ mlihilɛ nibii ni amɛaafee amɛha amɛkutsoŋbii lɛ anɔ