Ani Biblia Lɛ Teɔ Shi Woɔ Ehe?

WOLOŊMALƆ Henry Van Dyke ŋma be ko akɛ: “Akɛba shihilɛ mli yɛ Boka Teŋgbɛ, ni akɛ wiemɔi ni sa ŋmala yɛ Bokagbɛ sui kɛ okadi wiemɔi amli, Biblia lɛ kɛ naji ni ale jogbaŋŋ nyiɛɔ je lɛŋ gbɛi fɛɛ nɔ, ni eboteɔ shikpɔŋ fɛɛ shikpɔŋ nɔ koni eyatao lɛ diɛŋtsɛ enii yɛ he fɛɛ he. Ekase bɔ ni awieɔ wiemɔi ohai abɔ atsɔɔ gbɔmɔ tsui. Gbekɛbii kɛ naakpɛɛ kɛ miishɛɛ boɔ emli saji atoi, ni nilelɔi jwɛŋɔ nɔ akɛ shihilɛ mli abɛbuai. Efɔŋfeelɔi kɛ henɔwolɔi ahe kpokpoɔ yɛ emli kɔkɔbɔɔi ahewɔ, shi eji nyɛ awo gbee kɛha mɔ ni epila kɛ mɔ ni yeɔ awerɛho. . . . Gbɔmɔ ko bɛ ni eji ohiafo kɛ mɔ ni akwa lɛ kɛ eyɛ jwetri ni tamɔ nɛkɛ akɛ lɛ diɛŋtsɛ enɔ̃.”

Biblia lɛ “ekase bɔ ni awieɔ wiemɔi ohai abɔ” lɛlɛŋ. Kɛ hoo lɛ, atsɔɔ ewoji 66 lɛ ateŋ ekome shishi kɛtee kɛ wiemɔi aaashɛ 1,970 mli. Akpekpei abɔ buɔ Biblia lɛ akɛ nikeenii ni jɛ Nyɔŋmɔ ŋɔɔ ni amɛkɛ miishɛɛ kaneɔ ni amɛnaa he sɛɛ. Shi mɛi krokomɛi hu kɛɔ akɛ wiemɔi ni teɔ shi woɔ ehe yɛ mli ni yɛ enɛ hewɔ lɛ anyɛŋ akɛ he afɔ nɔ. Mɛni ji nɔ ni emlipɛimɔ jogbaŋŋ tsɔɔ?

Taakɛ mfoniri ni yɔɔ wolo nɛɛ hiɛ lɛ tsɔɔ lɛ, Nyɔŋmɔ kɛ gbɔmɛi anɔkwafoi tsu nii koni amɛŋma Biblia lɛ. Yɛ anɔkwale mli lɛ, Biblia lɛ mli kwɛmɔ jogbaŋŋ jieɔ lɛ kpo akɛ gbɔmɛi 40 ŋmala yɛ be kpalaŋŋ ni he afii ohai 16 mli. Ani amɛji mɛi ni kɛ woji aŋmalamɔ efee amɛnitsumɔ? Dabi. Mɔ ko baanyɛ ana tookwɛlɔ, wolɛɛnyo, too helɔ, tsofafeelɔ, buulolɔ, osɔfo, gbalɔ, kɛ maŋtsɛ yɛ amɛteŋ. Amɛ niŋmaai lɛ fɔɔ gbɔmɛi kɛ kusumii ni wɔ mɛi ni wɔyɔɔ afii ohai 20 nɛɛ mli lɛ leee lɛ atatsii. Yɛ anɔkwale mli lɛ, jeee be fɛɛ be Biblia ŋmalalɔi lɛ diɛŋtsɛ nuɔ nɔ ni saji ni amɛŋmala lɛ tsɔɔ lɛ shishi. (Daniel 12:​8-10) No hewɔ lɛ kɛ wɔkɛ saji komɛi ni eshishinumɔ wa kɛha wɔ kpe yɛ be mli ni wɔkaneɔ Biblia lɛ ekafee wɔ naakpɛɛ.

Ani abaanyɛ anu nibii ni mli wawai nɛɛ ashishi? Ani Biblia lɛ teɔ shi woɔ ehe? Bɔni afee ni wɔna lɛ, nyɛhaa wɔsusua emli nɔkwɛmɔ nii komɛi ahe.

Ani Saji ni Amɛ Shishinumɔ Wa Diɛŋtsɛ Nɛ?

▪ Nɛgbɛ Kain na eŋa lɛ kɛjɛ? (1 Mose 4:⁠17)

Ekolɛ mɔ ko baasusu akɛ beni agbe Habel sɛɛ lɛ, enyɛmi nuu Kain ni yeɔ fɔ lɛ kɛ amɛfɔlɔi, Adam kɛ Hawa pɛ shwɛ yɛ shikpɔŋ lɛ nɔ. Shi Adam kɛ Hawa fɔ bii babaoo. Taakɛ 1 Mose 5:​3, 4 (New World Translation) tsɔɔ lɛ, Adam yɛ binuu ni atsɛɔ lɛ Set. Sane lɛ kɛfataa he akɛ: “Ni gbii abɔ ni Adam ye, beni efɔ Set sɛɛ lɛ ji afii ohai-kpaanyɔ. Ni efɔ bihii kɛ biyei yɛ be ni shwie mli lɛ mli.” No hewɔ lɛ Kain kɛ enyɛmi yoo loo enyɛmimɛi abiyei lɛ eko hi shi. Akɛni no mli lɛ adesai bɛŋkɛ emuuyeli he kpaakpa hewɔ lɛ, eka shi faŋŋ akɛ gbalashihilɛ ni tamɔ nɛkɛ kɛ gbɔmɔtsoŋ hewalɛnamɔ mli osharai ni baagba ekomefeemɔ ni tamɔ nɛkɛ naa ŋmɛnɛ lɛ eko baaa.

▪ Namɛi Hɔɔ Yosef Kɛtee Mizraim Lɛ?

Mose Klɛŋklɛŋ Wolo 37:27 kɛɔ akɛ Yosef nyɛmimɛi lɛ kpɛ amɛyiŋ akɛ amɛbaahɔɔ lɛ amɛha Ishmaelbii komɛi. Shi kuku ni nyiɛ sɛɛ lɛ kɛɔ akɛ: “Ni Midianbii ni ji guɔyelɔi lɛ baho; ni [Yosef nyɛmimɛi lɛ] amɛyagbala Yosef ni amɛjie lɛ yɛ bu lɛ mli; ni amɛyahɔɔ Yosef amɛha Ishmaelbii lɛ amɛhe jwiɛtɛi kukuji nyɔŋmai enyɔ. Ni amɛkɛ Yosef tee Mizraim.” Ani ahɔɔ Yosef aha Ishmaelbii lɛ loo Midianbii lɛ? Ojogbaŋŋ, ekolɛ atsɛɔ Midianbii lɛ hu akɛ Ishmaelbii akɛni amɛkɛ amɛ jɛ weku kome mli kɛtsɔ amɛ blematsɛ Abraham nɔ lɛ hewɔ. Aloo ekolɛ Midian guɔyelɔi lɛ fata Ishmaelbii ni faa gbɛ lɛ ahe. Yɛ fɛɛ sɛɛ lɛ, Yosef nyɛmimɛi lɛ diɛŋtsɛ hɔɔ lɛ, ni enyɛ ekɛɛ amɛ yɛ sɛɛ mli akɛ: “Miji nyɛnyɛmi Yosef, mɔ ni nyɛhɔɔ kɛba Mizraim lɛ.”​—1 Mose 45:⁠4.

▪ Israelbii enyiɛ gboi pɛ ajwamaŋ ni amɛkɛ Moab yei lɛ bɔ kɛ agbɛnɛ Baal-Peor jamɔ ni amɛkɛ amɛhe wo mli lɛ hewɔ?

Aŋma yɛ 4 Mose 25:9 akɛ: “Ni mɛi ni gboi yɛ gbele-hela [ni jɛ Nyɔŋmɔ ŋɔɔ yɛ amɛjeŋba gbonyo lɛ hewɔ] lɛ mli lɛ naa shiɔ mɛi akpei nyɔŋmai enyɔ-kɛ-ejwɛ.” Shi bɔfo Paulo kɛɛ: “Ni wɔsaa wɔkabɔ ajwamaŋ, tamɔ bɔ ni amɛteŋ mɛi komɛi [Israelbii lɛ yɛ ŋa lɛ nɔ] bɔ, ni gbi kome nɔ lɛ, mɛi akpei nyɔŋmai enyɔ-kɛ-etɛ nyɔnyɔi lɛ.” (1 Korintobii 10:⁠8) Ekolɛ mɛi ni agbe amɛ lɛ ayifalɛ ka 23,000 kɛ 24,000 teŋ, no hewɔ lɛ eeeha yibɔ nɛɛ eko fɛɛ eko afee nɔ ni sa. Ni kɛlɛ 4 Mose wolo lɛ jeɔ gbɛ ekɛɔ akɛ kojolɔi gbe “maŋ lɛ nɔ onukpai lɛ fɛɛ” ni kɛ amɛhe yawo esha nɛɛ mli lɛ. (4 Mose 25:​4, 5) Ekolɛ “onukpai” ni fee esha nɛɛ ateŋ mɛi 1,000 yɔɔ ni baaha yibɔ lɛ fɛɛ afee 24,000 kɛ akɛfata 23,000 ni Paulo tsi ta lɛ he lɛ. Yɛ be mli ni eka shi faŋŋ akɛ mɛi 23,000 ji mɛi ni gboi yɛ gbele-hela ni jɛ Nyɔŋmɔ ŋɔɔ lɛ naa lɛ, 24,000 lɛ fɛɛ gboi yɛ gbele-hela lɛ hewɔ ejaakɛ amɛteŋ mɔ fɛɛ mɔ gboi yɛ efɔbuu kojomɔ ni ekɛba amɛnɔ lɛ shishi.​—5 Mose 4:⁠3.

▪ Akɛni Agag kɛ Israel maŋtsɛ Saul hi shi yɛ be kome mli hewɔ lɛ, ani bɔ ni Bileam tsɔ hiɛ etsi Amalek nɔyelɔ ko ni hiɛ gbɛi ni tamɔ nakai ta lɛ kɛ naataomɔ baŋ?

Aaafee afi 1473 D.Ŋ.B. lɛ, Bileam gba fɔ shi akɛ Israel maŋtsɛ ko baafee mɔ ni “aaawo enɔ fe Agag.” (4 Mose 24:⁠7) Awieee Agag he dɔŋŋ nɛkɛ aahu kɛbashi Maŋtsɛ Saul nɔyeli beaŋ (1117-1078 D.Ŋ.B.). (1 Samuel 15:⁠8) Shi enɛ jeee naataomɔ, ejaakɛ “Agag” baanyɛ afee odehei asabala ni tamɔ Mizraim Farao lɛ nɔ. Agbɛnɛ eeenyɛ efee akɛ Agag ji gbɛi diɛŋtsɛ ni Amalek nɔyelɔi kɛtsuɔ nii shii abɔ.

▪ Namɔ ha David kane Israelbii ayibɔ lɛ?

Samuel Wolo Ni Ji Enyɔ 24:1 kɛɔ akɛ: “Ni Yehowa mli wo Israel la ekoŋŋ, ni etsirɛ David yisɛɛ ewo amɛ [loo, “beni atsirɛ David yisɛɛ lɛ,” NW, shishigbɛ niŋmaa] akɛ: ‘Yaa, ni oyakane Israel kɛ Yuda.’” Shi jeee Yehowa ji mɔ ni tsirɛ Maŋtsɛ David yisɛɛ koni efee esha, ejaakɛ 1 Kronika 21:1 kɛɔ akɛ: “Ni Satan [loo, “shitee-kɛ-wolɔ,” NW, shishigbɛ niŋmaa] te shi ewo Israel, ni etsirɛ David yisɛɛ koni ekane Israel.” Nyɔŋmɔ mli fu Israelbii lɛ, no hewɔ lɛ eŋmɛ Satan Abonsam gbɛ koni ekɛ nɛkɛ esha nɛɛ aba amɛnɔ. Yɛ enɛ hewɔ lɛ, 2 Samuel 24:1 kaneɔ tamɔ oookɛɛ Nyɔŋmɔ diɛŋtsɛ fee. Nɔ ni yɔɔ miishɛɛ ji akɛ, Joseph B. Rotherham shishitsɔɔmɔ lɛ kaneɔ nɛkɛ: “Ni Yahweh mlifu te shi wo Israel, no hewɔ lɛ etsirɛ David koni ete shi ewo amɛ, akɛ, Yaa ni oyakane Israel kɛ Yuda.”

▪ Te mɔ ko aaafee tɛŋŋ anu yibɔi sɔrɔtoi ni akɛha ni kpaaa gbee yɛ Israelbii kɛ Yudafoi ni David kane amɛ lɛ mli lɛ shishi?

Yibɔ ni akɛha yɛ 2 Samuel 24:9 ji Israelbii 800,000 kɛ Yudafoi 500,000, yɛ be mli ni 1 Kronika 21:5 kɛɛ Israelbii ni yaa ta lɛ ayibɔ ji 1,100,000 kɛ Yuda nɔ ni ji 470,000. Mɛi ni sɔmɔɔ akɛ asraafoi daa gbi yɛ maŋtsɛ lɛ sɔɔmɔ mli ji asraafoi 288,000, ni ajara amɛmli afee amɛ kui 12 ni kuu fɛɛ kuu yibɔ ji 24,000, ni kuu fɛɛ kuu sɔmɔɔ nyɔŋ kome yɛ afi lɛ mli. Agbɛnɛ 12,000 krokomɛi yɛ ni sɔmɔɔ akutsei lɛ anɔ lumɛi 12 lɛ, ni ehaa asraafoi ayibɔ lɛ fɛɛ yafeɔ 300,000. Eka shi faŋŋ akɛ nɛkɛ asraafoi 300,000 ni yɔɔ sɔɔmɔ lɛ mli momo nɛɛ fata 1,100,000 ni yɔɔ 1 Kronika 21:5 lɛ ahe, yɛ be mli ni amɛfataaa 2 Samuel 24:9 yibɔ lɛ he. (4 Mose 1:​16; 5 Mose 1:​15; 1 Kronika 27:​1-22) Yɛ Yuda gbɛfaŋ, yɛ 2 Samuel 24:9 lɛ, eka shi faŋŋ akɛ hii 30,000 ni yɔɔ asraafoi abuu he ni yɔɔ Filistibii ahusui lɛ anaa lɛ fata nakai yibɔ lɛ he, shi amɛfataaa yibɔ ni yɔɔ 1 Kronika 21:5 Iɛ he. (2 Samuel 6:⁠1) Kɛ wɔkai akɛ gbɔmɛi sɔrɔtoi enyɔ ni kwɛɔ nii yɛ gbɛi sɔrɔtoi anɔ ni hiɛ yiŋtoi sɔrɔtoi hu ŋmala 2 Samuel kɛ 1 Kronika lɛ, no lɛ wɔkɛ yibɔi sɔrɔtoi lɛ baakpa gbee yɛ gbɛ ni waaa kwraa nɔ.

Namɔ ji Shealtiel tsɛ?

Ŋmalɛi komɛi tsɔɔ akɛ Yekonia (Maŋtsɛ Yehoiakin) bi ji Shealtiel. (1 Kronika 3:​16-18; Mateo 1:12) Shi Sanekpakpa ŋmalɔ Luka tsɛ Shealtiel akɛ “Neri bi.” (Luka 3:27) Eka shi faŋŋ akɛ Neri kɛ ebiyoo ha Shealtiel akɛ eŋa. Ní akɛni Hebribii lɛ fɔɔ amɛ shaanuu loo amɛbiyoo wu tsɛmɔ akɛ binuu, titri lɛ yɛ amɛ fɔmɔ he woji ahe gbɛjianɔtoo naa hewɔ lɛ, Luka baanyɛ atsɛ Shealtiel akɛ Neri bi yɛ gbɛ ni ja nɔ. Nakai nɔŋŋ hu Luka tsɛ Yosef akɛ Heli bi, yɛ be mli ni yɛ anɔkwale mli lɛ eji Yosef ŋa Maria moŋ tsɛ.​—Luka 3:⁠28.

▪ Ŋmalɛi ni Kɔɔ Yesu He lɛ ni Aaaha Ekpa Gbee

Gbɔmɛi enyiɛ Yesu Kristo famɔ daimonioi ni yabote kpolotoi akuu babaoo ko mli lɛ kɛjɛ amɛmli?

Sanekpakpa ŋmalɔ Mateo tsiɔ hii enyɔ ta, shi Marko kɛ Luka wieɔ mɔ kome pɛ he. (Mateo 8:​28; Marko 5:2; Luka 8:27) Etamɔ nɔ ni Marko kɛ Luka gbala jwɛŋmɔ kɛtee mɔ kome pɛ ni daimonioi yɔɔ emli lɛ nɔ ejaakɛ Yesu kɛ lɛ wie ni esane lɛ hu yɛ sɔrɔto waa. Ekolɛ nakai gbɔmɔ lɛ hiɛ wa waa, aloo epiŋ yɛ daimonio kudɔmɔ shishi yɛ be kakadaŋŋ mli. Ekolɛ yɛ no sɛɛ lɛ, nakai nuu kome lɛ pɛ miisumɔ ni enyiɛ Yesu sɛɛ. (Marko 5:​18-20) Yɛ sane ko ni tamɔ nakai nɔŋŋ mli lɛ, Mateo wie shwilafoi enyɔ ni Yesu tsa amɛ lɛ ahe, yɛ be mli ni Marko kɛ Luka tsi mɔ kome pɛ ta. (Mateo 20:​29-34; Marko 10:​46; Luka 18:35) Enɛ eteee shi ewooo ehe, ejaakɛ kɛ hoo lɛ nuu kome ni tamɔ nɛkɛ yɛ.

▪ Te atade ni Yesu wo yɛ egbele gbi lɛ nɔ lɛ su yɔɔ ha tɛŋŋ?

Taakɛ Marko (15:17) kɛ Yohane (19:⁠2) tsɔɔ lɛ, asraafoi lɛ kɛ atade tsuru ko wo Yesu. Shi Mateo 27:28 (NW) tsɛ lɛ “tade ko ni tsuɔ tamɔ muneele,” ni ekɛma etsulɛ nɔ mi. Akɛni afaseo su hiɛ sui tamɔ etsuru kɛ bluu fɛɛ hewɔ lɛ, Marko kɛ Yohane kpɛlɛ nɔ akɛ atade lɛ su tamɔ etsuru. La ni aaakpɛ ashwie atade lɛ nɔ lɛ aaaha ana lɛ yɛ shɔŋŋ yɛ sui sɔrɔtoi amli, ni Sanekpakpa ŋmalalɔi lɛ tsi su ni jeɔ kpo waa kɛha amɛ loo kɛha mɛi ni gba amɛ saji lɛ ta. Sɔrɔto-feemɔ bibii nɛɛ tsɔɔ bɔ ni amɛteŋ mɔ fɛɛ mɔ ŋma nɔ ni ena lɛ eha ehe ni tsɔɔ akɛ amɛbaaa gbeekpamɔ ko yɛ teemɔŋ yɛ amɛ niŋmaai lɛ amli.

▪ Namɔ tere Yesu sɛŋmɔtso lɛ?

Yohane (19:17) kɛɛ: “Ni lɛ [Yesu] diɛŋtsɛ etere esɛŋmɔtso lɛ kɛtee he ni atsɛɔ Yitsoŋoŋo He, ni Hebri mli lɛ atsɛɔ lɛ Gol’gotha lɛ.” Shi Mateo (27:32), Marko (15:21), kɛ Luka (23:26) kɛɔ akɛ, ‘beni amɛjeɔ kpo lɛ, amɛna Simon ni jɛ Kireene lɛ, ni amɛnyɛ enɔ koni etere sɛŋmɔtso lɛ.’ Yesu ji mɔ ni tere esɛŋmɔtso lɛ taakɛ Yohane jaje lɛ. Shi beni Yohane muaa saji lɛ anaa lɛ, ekɛ sane ni tsɔɔ akɛ yɛ sɛɛ mli lɛ anyɛ Simon nɔ koni etere sɛŋmɔtso lɛ fataaa he. No hewɔ lɛ Sanekpakpa lɛ mli saji lɛ kɛ amɛhe kpaa gbee yɛ enɛ mli.

▪ Yuda Iskariot gbo yɛ mɛɛ gbɛ nɔ?

Mateo 27:5 kɛɔ akɛ Yuda wo esɛ̃ kpãa loo esɛŋ ehe, yɛ be mli ni Bɔfoi lɛ Asaji 1:18 kɛɔ akɛ “eyama eyi shi, ni emli gba enyɔ, ni emli nii fɛɛ tue shwie shi.” Yɛ be mli ni etamɔ nɔ ni Mateo miitsɔɔ gbɛ ni etsɔ nɔ egbe ehe lɛ, Bɔfoi lɛ Asaji lɛ miitsɔɔ nɔ ni jɛ mli ba. Eka shi faŋŋ akɛ Yuda kɛ kpãa fi tso ko nine, ni efi lɛ afãla ni ekɛfi ekuɛ, ni ebɔ mɔdɛŋ ni esɛŋ ehe kɛtsɔ tu ni etu kɛjɛ tɛsaa gɔgɔmee lɛ hiɛ lɛ nɔ. Etamɔ nɔ ni ekolɛ kpãa lɛ tse loo tso nine lɛ ku, no hewɔ lɛ ebagbee tɛsaa ni yɔɔ shishigbɛ lɛ anɔ ni emli gba. Bɔ ni shikpɔŋ ni ebɔle Yerusalem he lɛ yɔɔ lɛ haa sanenaamuu ni tamɔ nɛkɛ feɔ nɔ ni jwɛŋmɔ yɔɔ mli.

▪ Te Obaasusu Saji Ahe Oha Tɛŋŋ?

Kɛ wɔkɛ saji komɛi ni tamɔ nɔ ni kɛ ehe kpaaa gbee kpe yɛ Biblia lɛ mli lɛ, ehi akɛ aaayoo akɛ yɛ bei pii amli lɛ gbɔmɛi wieɔ saji komɛi ni tamɔ nɔ ni teɔ shi woɔ ehe, shi anyɛɔ atsɔɔ shishi yɛ gbɛ ni waaa nɔ ni anuɔ shishi. Akɛ nɔkwɛmɔ lɛ, nitsumɔtsɛ ko kɛ mɔ ko baanyɛ aye sharamɔ kɛtsɔ wiemɔ ni eeewie ni ewoloŋmalɔ aŋma aha lɛ lɛ nɔ. Kɛ abi lɛ sane lɛ ebaaha hetoo akɛ lɛ ji mɔ ni kɛ wolo lɛ maje lɛ. Shi akɛni ewoloŋmalɔ lɛ ji mɔ ni kɛ tsɔne kala loo eŋma ni ekɛ wolo lɛ diɛŋtsɛ maje hewɔ lɛ, lɛ hu ebaanyɛ ekɛɛ akɛ lɛ ji mɔ ni kɛmaje. Nakai nɔŋŋ ejeee nɔ ni teɔ shi woɔ ehe akɛ Mateo (8:⁠5) aaakɛɛ akɛ asraafonyo nukpa ko bakpa Yesu nɔ ko he fai, yɛ be mli ni Luka (7:​2, 3) kɛɛ akɛ nuu lɛ tsu enajiaŋdamɔlɔ kɛba.

Nɔkwɛmɔ nii ni tsɔ hiɛ lɛ tsɔɔ akɛ abaanyɛ ana saji ni tamɔ nɔ ni mli wa yɛ Biblia mli lɛ anaa. No hewɔ lɛ, yiŋtoo kpakpa yɛ ni aaanyɛ adamɔ nɔ ana Ŋmalɛi lɛ ahe jwɛŋmɔ kpakpa. Ajie su ni tamɔ nɛkɛ yi yɛ wiemɔi ni je kpo yɛ weku Biblia ko ni afee yɛ 1876 mli lɛ amli:

“Su kpakpa ni akɛaatsu nakai nibii ni tamɔ nɔ ni mli wa lɛ ahe nii ji ni ajie kɛya shɔŋŋ bɔ ni aaanyɛ, ni akɛ he akpɛtɛ anɔkwale lɛ he ni aba he shi aha enɛ, kɛji akɛ anyɛɛɛ ajie nɔ ni efee tamɔ eha he lɛ fɛɛ kɛya po. Esa akɛ wɔkase bɔfoi lɛ anɔkwɛmɔ nɔ lɛ, mɛi ni, yɛ be mli ni kaselɔi lɛ ateŋ mɛi komɛi amli fu yɛ nɔ ni amɛtsɛ lɛ ‘wiemɔ ni wa,’ koni amɛkpoo Kristo lɛ, amɛkɛ wiemɔ nɛɛ ku shitee-kɛ-woo fɛɛ naa lɛ: ‘Nuŋtsɔ, namɔ ŋɔɔ wɔɔtee? Bo oyɔɔ naanɔ wala wiemɔi lɛ; ni wɔ lɛ wɔhe wɔye, ni asaŋ wɔna wɔle akɛ, bo ji Kristo, Nyɔŋmɔ hiɛkalɔ lɛ Bi lɛ.‘ . . . Kɛ wɔna ni anɔkwale ko efee tamɔ nɔ ni eete shi eewo anɔkwale kroko lɛ, nyɛhaa wɔbɔa mɔdɛŋ ni wɔnaa naa, ni wɔkɛtsɔɔ mɛi fɛɛ akɛ ana naa.”​—Yohane 6:​60-69.

Ani obaakɔ shidaamɔ ni tamɔ nɛkɛ? Yɛ be mli ni wɔsusu nɔkwɛmɔ nii fioo ni tsɔɔ bɔ ni Ŋmalɛi lɛ kɛ amɛhe kpaa gbee lɛ ahe lɛ, wɔyɛ hiɛnɔkamɔ akɛ okɛ lalatsɛ lɛ ni kɛɛ Nyɔŋmɔ nɛkɛ lɛ kpaa gbee: “Owiemɔ-tso muu lɛ fɛɛ lɛ, anɔkwale ni.” (Lala 119:160) Nakai ji bɔ ni Yehowa Odasefoi susuɔ Biblia muu lɛ fɛɛ he ni amɛkɛ miishɛɛ baatsɔɔ yiŋtoi ahewɔ ni amɛheɔ amɛyeɔ lɛ mli. Mɛni hewɔ okɛ amɛ susuuu wolo ni eko kɛ lɛ yeee egbɔ nɛɛ he? Emli wiemɔi ni shɛjeɔ mɔ mii lɛ kɛ anɔkwa hiɛnɔkamɔ kɛ miishɛɛ baawo otsui mli obɔ.

[Mfoniri ni yɔɔ baafa 7]

Ani obi Yehowa Odasefoi lɛ nɔ hewɔ ni amɛheɔ Biblia lɛ amɛyeɔ lɛ?