Namɛi Nyiɛɔ Je Lɛ La Lɛ Sɛɛ?
“Nyɛtsoɔ tamɔ kanei yɛ je nɛŋ.”—FILIPIBII 2:15.
1. Mɛni Biblia lɛ kɛɔ yɛ jamɔŋ apasa lai ni yɔɔ lɛ ahe?
BIBLIA lɛ tsɛɔ Yesu yɛ faŋŋ mli akɛ “la kpeteŋkpele, Je lɛ mli la lɛ.” (Yesaia 9:1; Yohane 8:12) Ni kɛlɛ, mɛi fioo ko pɛ nyiɛ esɛɛ beni eyɔɔ shikpɔŋ nɔ lɛ. Mɛi ni fa hala akɛ amɛaanyiɛ apasa lai, ní yɛ anɔkwale mli lɛ amɛji mɛi ni kɛ duŋ moŋ baa lɛ asɛɛ. Nyɔŋmɔ Wiemɔ lɛ wieɔ mɛnɛɛmɛi ahe akɛ: “Ejaakɛ nɛkɛ mɛi nɛɛ ji amale bɔfoi, nitsulɔi shishiulɔi ni tsakeɔ amɛhe feɔ Kristo bɔfoi. Ni enɛ bɛ naakpɛɛ tete; ejaakɛ Satan diɛŋtsɛ tsakeɔ ehe etsɔɔ la bɔfo; no hewɔ lɛ kɛ esɔɔlɔi lɛ hu tsakeɔ amɛhe feɔ tamɔ jalɛ sɔɔlɔi lɛ, ejeee nɔ ko wulu ko; amɛ lɛ amɛnaagbee baafee bɔ ni amɛnitsumɔi lɛ yɔɔ lɛ.”—2 Korintobii 11:13-15.
2. Mɛni Yesu kɛɛ abaadamɔ nɔ akojo gbɔmɛi Iɛ?
2 No hewɔ lɛ jeee mɛi fɛɛ sumɔɔ la lɛ, yɛ bɔ ni enɔ bɛ ha lɛ fɛɛ sɛɛ. Yesu wie akɛ: “Shi kojomɔ lɛ nɛ, akɛ la lɛ eba je lɛ mli, ni gbɔmɛi sumɔɔ duŋ lɛ moŋ fe la lɛ, ejaakɛ amɛnitsumɔi lɛ efɔji ni. Ejaakɛ mɔ fɛɛ mɔ ni tsuɔ nifɔjianii lɛ nyɛɔ la lɛ, ni ebaaa la lɛ he, koni akakã enitsumɔi lɛ.”—Yohane 3:19, 20.
Mɛi ni Sumɔɔ Duŋ
3, 4. Mɛɛ gbɛ nɔ jamɔ mli hiɛnyiɛlɔi ni yɔɔ Yesu gbii lɛ amli lɛ tsɔɔ yɛ akɛ amɛsumɔɔɔ ni amɛnyiɛ la lɛ sɛɛ?
3 Susumɔ bɔ ni nakai eji beni Yesu yɔɔ shikpɔŋ nɔ lɛ he okwɛ. Nyɔŋmɔ kɛ hewalɛ eha Yesu koni efee naakpɛɛ nii ni yɔɔ miishɛɛ koni akɛma nɔ mi akɛ lɛ ji Mesia lɛ. Akɛ nɔkwɛmɔ nɔ lɛ, eha nuu ko ni afɔ lɛ shwilafo lɛ na nii yɛ Hejɔɔmɔ Gbi lɛ nɔ. Mɛɛ musuŋtsɔlɛ nifeemɔ ni yɔɔ naakpɛɛ nɛ! Kwɛ bɔ ni nuu lɛ hiɛ sɔ enɛ ha! Kɛjɛ be ni afɔ lɛ nɛɛ kpaako enaa nii! Ni kɛlɛ, mɛni ji nɔ ni jamɔ mli hiɛnyiɛlɔi lɛ fee yɛ enɛ he? Yohane 9:16 gbaa wɔ akɛ: “No hewɔ lɛ Farisifoi lɛ ateŋ mɛi komɛi kɛɛ [yɛ Yesu he akɛ]: ‘Nuu nɛɛ jɛɛɛ Nyɔŋmɔ ŋɔɔ, ejaakɛ eyeee Hejɔɔmɔ gbi lɛ.’” Kwɛ bɔ ni amɛtsuii efite eha! Naa naakpɛɛ tsamɔ ko ni eba, shi ni amɛmli aaafili amɛ yɛ tsutsu shwilafo nɛɛ he, ni amɛhiɛ asɔ mɔ ni tsa lɛ lɛ, amɛbu Yesu fɔ moŋ! Eka shi faŋŋ akɛ amɛkɛ nakai feemɔ fee esha amɛshi Nyɔŋmɔ mumɔ krɔŋkrɔŋ lɛ kpojiemɔ lɛ, ni amɛfee esha ni akɛfaaa kɔkɔɔkɔ lɛ.—Mateo 12:31, 32.
4 Yɛ sɛɛ mli lɛ, beni nakai osatofoi lɛ bibii nuu ni tsutsu lɛ eji shwilafo lɛ Yesu he saji lɛ, nuu lɛ ha hetoo akɛ: “Ei, enɛ ji nɔ ni yɔɔ naakpɛɛ, akɛ nyɛleee he ni [Yesu] jɛ, ni kɛlɛ egbele mihiŋmɛii lɛ! Wɔle akɛ Nyɔŋmɔ booo eshafeelɔi atoi; shi moŋ kɛji mɔ jaa Nyɔŋmɔ ni efeɔ esuɔmɔnaa nii lɛ, lɛ toi eboɔ. Kɛjɛ ni abɔ ade nɛɛ, anuko akɛ mɔ ko egbele mɔ ni afɔ lɛ shwilafo hiŋmɛii da. [Kɛji Yesu] nɛɛ jɛɛɛ Nyɔŋmɔ ŋɔɔ kulɛ, enyɛŋ nɔ ko efee.” Te jamɔ mli hiɛnyiɛlɔi nɛɛ fee amɛnii amɛha tɛŋŋ? “Amɛhere nɔ ni amɛkɛɛ lɛ akɛ: ‘Bo lɛ afɔ bo yɛ esha mli kwraa, ni bo moŋ otsɔɔ wɔ nii nɛɛ?’ Ni amɛshwie lɛ!” Kwɛ mɔbɔnalɛ ni amɛbɛ! Amɛtsuii tamɔ tɛ. No hewɔ lɛ Yesu kɛɛ amɛ akɛ, eyɛ mli akɛ amɛkɛ amɛheloo hiŋmɛii naa nii moŋ, shi amɛshwila kwraa yɛ mumɔŋ.—Yohane 9:30-41.
5, 6. Mɛni klɛŋklɛŋ afii oha lɛ mli jamɔ mli hiɛnyiɛlɔi lɛ fee ni amɛkɛtsɔɔ akɛ amɛsumɔɔ duŋ lɛ moŋ?
5 Anaa amrɔ nɔŋŋ, yɛ be kroko hu mli akɛ nɛkɛ jamɔ mli osatofoi nɛɛ miifee esha kɛmiishi Nyɔŋmɔ mumɔ lɛ, beni Yesu tee Lazaro shi kɛjɛ gbohii ateŋ lɛ. Yɛ naakpɛɛ nii nɛɛ hewɔ lɛ, gbɔmɛi foji lɛ ateŋ mɛi pii he Yesu nɔ amɛye. Shi kɛlɛ, kadimɔ nɔ ni jamɔ mli hiɛnyiɛlɔi lɛ fee. “No hewɔ lɛ osɔfonukpai lɛ kɛ Farisifoi lɛ tsɛ́ kpee, ni amɛkɛɛ: ‘Te wɔfeɔ tɛŋŋ, shi nuu nɛɛ miifee okadii sɔrɔtoi pii? Kɛji wɔŋmɛ lɛ gbɛ nɛkɛ lɛ, mɛi fɛɛ aaahe enɔ aye, ní Romabii lɛ aaaba ni amɛaabashɔ wɔ maŋ kɛ wɔ shikpɔŋ lɛ fɛɛ.’” (Yohane 11: 47, 48) Amɛmiihao yɛ amɛgbɛhei kɛ gbɛ́i ni amɛyɔɔ lɛ he. Amɛmiisumɔ ni amɛsa Romabii lɛ ahiɛ yɛ gbɛ fɛɛ gbɛ nɔ, shi jeee ni amɛsa Nyɔŋmɔ hiɛ. No hewɔ lɛ, mɛni amɛfee? “Kɛjɛ nakai gbi lɛ nɔ lɛ, amɛkpɛ amɛyiŋ akɛ amɛbaagbe [Yesu].”—Yohane 11:53.
6 Shi ani fɛɛ nɛ? Dabi. Nɔ ni amɛfee yɛ no sɛɛ lɛ tsɔɔ bɔ ni amɛsumɔɔ duŋ lɛ waa amɛha .”Ni osɔfonukpai lɛ kpɛ amɛyiŋ akɛ amɛaagbe Lazaro hu, ejaakɛ lɛ ehewɔ jɛ ni Yudafoi lɛ ateŋ mɛi pii yaa eŋɔɔ ni amɛheɔ Yesu nɔ amɛyeɔ lɛ.” (Yohane 12:10, 11, New World Translation) Mɛɛ yiwalɛ nifeemɔ ni anyɛŋ ahe aye nɛ! Eyɛ mli akɛ amɛfee enɛɛmɛi fɛɛ koni amɛkɛhi amɛgbɛhei lɛ amli moŋ, shi mɛni ba? Amɛte shi amɛwo Romabii lɛ, yɛ nakai yinɔ lɛ nɔŋŋ mli, ni Romabii lɛ batutua amɛ yɛ afii 70 Ŋ.B., ni amɛshɔ̃ amɛgbɛhe, kɛ amɛmaŋ lɛ, kɛ amɛwala tete po!—Yesaia 5:20; Luka 19:41-44.
Yesu Musuŋtsɔlɛ Lɛ
7. Mɛni hewɔ mɛi ni sumɔɔ anɔkwale lɛ ke yuu kɛtee Yesu ŋɔɔ lɛ?
7 Nakai nɔŋŋ hu yɛ wɔbe nɛɛ mli lɛ, jeee mɔ fɛɛ mɔ sumɔɔ mumɔŋ shishinumɔ loo hiɛtɛjemɔ. Shi mɛi ni sumɔɔ anɔkwale lɛ miisumɔ ni amɛba la lɛ he. Amɛmiisumɔ Nyɔŋmɔ akɛ amɛ-Maŋtsɛ, ni amɛkɛ miishɛɛ tsɔɔ amɛhe kɛyaa Yesu, mɔ ni Nyɔŋmɔ tsu lɛ koni etsɔɔ nɔ ni la lɛ ji lɛ mli lɛ ŋɔɔ, ni amɛnyiɛɔ esɛɛ. Nakai ji bɔ ni gbɔmɛi heshibalɔi lɛ fee beni Yesu yɔɔ shikpɔŋ nɔ lɛ. Amɛho yuu kɛba eŋɔɔ. Farisifoi lɛ po kpɛlɛ enɛ nɔ. Amɛwie huhuuhu akɛ: “Naa, je lɛ efa kɛnyiɛ esɛɛ lɛ.” (Yohane 12:19) Gbɔmɛi ni tamɔ gwantɛŋi lɛ sumɔɔ Yesu, ejaakɛ etamɔɔɔ nakai jamɔ mli hiɛnyiɛlɔi pɛsɛmkunyatsɛmɛi, henɔwolɔi, mɛi ni hegbɛnamɔ he kumai yeɔ amɛ, ni Yesu wie nɛkɛ yɛ amɛhe lɛ, akɛ: “Amɛfimɔɔ jatsui kɛ tsiimɔ ni teremɔ jaraa amɛkɛshwieɔ mɛi akɔ̃ɔji anɔ; shi amɛ diɛŋtsɛ lɛ, amɛsumɔɔɔ akɛ amɛkɛ amɛwao kome tsiɔ. Shi amɛnii fɛɛ lɛ amɛfeɔ koni mɛi ana.”—Mateo 23:4, 5.
8. Mɛɛ su ko Yesu yɔɔ, ni yɔɔ sɔrɔto kwraa kɛ akɛto jamɔ mli osatofoi lɛ ahe?
8 Nɔ ni tamɔɔɔ nakai lɛ, kadimɔ musuŋtsɔlɛ su ni Yesu yɔɔ lɛ: “Shi beni ena mɛi babaoo lɛ, emusuŋ tsɔ lɛ yɛ amɛhewɔ, akɛni etɔ amɛ ni amɛfee yuuyaa tamɔ tooi ni bɛ kwɛlɔ lɛ.” (Mateo 9:36) Ni mɛni efee yɛ he? Ekɛɛ mɛi ni Satan gbɛjianɔtoo lɛ eye amɛhe nii nɛɛ akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ. Nyɛwoa mipã lɛ nyɛfɔa nyɛnɔ, ni nyɛkasea mi; shi mihe jɔ ni mibaa mihe shi kɛjɛ mitsui mli; ni nyɛaana hejɔɔmɔ nyɛaaha nyɛ susumai lɛ. Ejaakɛ mipã lɛ teremɔ waaa, ni mijatsu lɛ etsiii.” (Mateo 11:28-30) Yesu tsu nɔ ni agba yɛ ehe yɛ Yesaia 61:1, 2 lɛ, he ni kɛɔ nɛkɛ lɛ: “Yehowa efɔ mi mu koni mishiɛ sanekpakpa lɛ mitsɔɔ ohiafoi; etsu mi koni mibatsa mɛi ni amɛtsuii ekumɔ lɛ, ni mijaje heyeli mitsɔɔ nomii lɛ, ni mijaje gbelemɔ mitsɔɔ mɛi ni awo amɛ tsuŋ lɛ; ni mishiɛ Yehowa duromɔ afi kɛ wɔ-Nyɔŋmɔ lɛ oweletɔɔ gbi, ni mishɛje ŋkɔmɔyelɔi fɛɛ amii.
La Hiɛlɔi lɛ Anaabuamɔ
9. Mɛɛ nibii komɛi ni sa kadimɔ waa ba yɛ 1914?
9 Beni ekwɔ kɛtee ŋwɛi lɛ sɛɛ lɛ, esa akɛ Yesu amɛ aahu kɛyashi be baashɛ, ni Nyɔŋmɔ kɛ Maŋtsɛyeli hewalɛ lɛ aaaha lɛ. Kɛkɛ lɛ ebaagbala “gwantɛŋi” lɛ amli kɛjɛ “abotiai lɛ” ateŋ. (Mateo 25:31-33; Lala 110:1, 2) Nakai be lɛ shɛ beni “naagbee gbii lɛ” je shishi yɛ 1914 lɛ. (2 Timoteo 3:1-5) Yesu, ni aha lɛ hewalɛ akɛ Nyɔŋmɔ ŋwɛi Maŋtsɛyeli lɛ nɔ Maŋtsɛ lɛ bɔi mɛi ni taoɔ ni amɛnyiɛ la lɛ sɛɛ lɛ anaabuamɔ kɛ eninejurɔ nɔ, ni ji duromɔ mli yaa. Yɛ Jeŋ Ta I sɛɛ lɛ, nakai naabuamɔ nitsumɔ lɛ tee hiɛ oyayaayai kɛ foi.
10. Mɛɛ sane abaanyɛ abi yɛ mɛi ni Yesu kɛtsuɔ nii yɛ naabuamɔ nitsumɔ lɛ mli lɛ ahe?
10 Kɛtsɔ Kristo Yesu hiɛnyiɛmɔ nɔ lɛ, áha nakai naabuamɔ nitsumɔ lɛ eye omanye jogbaŋŋ diɛŋtsɛ. Be ko bako yɛ yinɔsane mli pɛŋ, ni gbɔmɛi sɔrɔtoi babaoo ni jɛ jeŋmaji sɔrɔtoi pii amli efee ekome yɛ anɔkwa jamɔ ni haa mɔ shishinumɔ loo hiɛtɛjemɔ mli tamɔ nɛkɛ da. Ni namɛi ji mɛi ni nyiɛɔ la ni jɛɔ Nyɔŋmɔ kɛ Kristo ŋɔɔ baa lɛ sɛɛ ŋmɛnɛ? Namɛi ji mɛi ni tsuɔ nɔ ni Filipibii 2:15 kɛɔ lɛ, akɛ, “nyɛtsoɔ tamɔ kanei yɛ je nɛŋ,” ni amɛfɔ̃ɔ mɛi krokomɛi nine ni ‘amɛbayɛ wala nu lɛ yaka’ lɛ?—Kpojiemɔ 22:17.
11. Mɛni ji Kristendom shidaamɔ yɛ tsakpaa ni yɔɔ ekɛ mumɔŋ la lɛ teŋ lɛ gbɛfaŋ?
11 Ani Kristendom miifee nakai? Eka shi faŋŋ akɛ, Kristendom, kɛ ejamɔi ni mli egbala lɛ kpɛɛɛ loo etsooo tamɔ kane. Yɛ anɔkwale mli lɛ, osɔfoi lɛ tamɔ jamɔ mli hiɛnyiɛlɔ ni hi shi yɛ Yesu gbii amli lɛ pɛpɛɛpɛ. Amɛhaaa anɔkwa la ni jɛ Nyɔŋmɔ kɛ Kristo ŋɔɔ lɛ akpɛ. Afii nyɔŋmai etɛ kɛ etɛ nɛ ni wolo, Theology Today lɛ jaje akɛ: “Esa ákɛ akɛ awerɛho akpɛlɛ nɔ akɛ nɛkɛ la nɛɛ kɛ hewalɛ babaoo kpɛɛɛ yɛ Sɔlemɔ lɛ mli. . . . Sɔlemɔ lɛ efee tamɔ akutsei ni ebɔle ehe kɛkpe lɛ babaoo moŋ. Ejeee je lɛ la lɛ titri, shi moŋ eji mɔ ni gbɛɔ lai ni kpɛɔ yɛ je lɛ diɛŋtsɛ mli lɛ eshwãa.” Ni Kristendom shihilɛ efite kwraa po fe nakai ŋmɛnɛ. Nɔ ni akɛɛ eji la ni ejɛɔ je lɛŋ egbɛɔ eshwaa nɛɛ ji duŋ diɛŋtsɛ, ejaakɛ nɔ ni Satan kɛ eje lɛ yɔɔ ni amɛkɛaaha lɛ fɛɛ nɛ. Dabi, anɔkwa la ko baaa kɛjɛɛɛ Kristendom ni ji je lɛŋ jamɔi diɛŋtsɛ ni kɛ amɛhe kpaaa gbee lɛ mli.
12. Namɛi feɔ anɔkwa la-hiɛlɔi asafo lɛ ŋmɛnɛ?
12 Abaanyɛ akɛɛ kɛ nɔmimaa ŋmɛnɛ akɛ, Yehowa Odasefoi, ni ji jeŋ hee asafo lɛ ji anɔkwa gbɛjianɔtoo ni yɔɔ jeŋ fɛɛ ni hiɛ la lɛ. Emli bii lɛ fɛɛ—hii, yei kɛ gbekɛbii fɛɛ—kɛ ekomefeemɔ haa amɛla ni jɛɔ Yehowa kɛ Kristo ŋɔɔ lɛ kpɛɔ yɛ gbɔmɛi fɛɛ ahiɛ. Nyɛsɛɛ afi lɛ, la hiɛlɔi ni amɛyi fa kwraa fe akpekpei ejwɛ kɛ ekaa wie Nyɔŋmɔ kɛ eyiŋtoi ahe saji amɛtsɔɔ mɛi krokomɛi, yɛ Yehowa Odasefoi asafoi ni miihe ashɛ 70,000 yɛ je lɛŋ fɛɛ lɛ amli. Ni daa afi lɛ, wɔnaa gbɔmɛi ni miisumɔ ni amɛna mumɔŋ shishinumɔ loo hiɛtɛjemɔ lɛ anaabuamɔ babaoo ni yaa hiɛ be fɛɛ be. Abaptisiɔ gbɔmɛi akpei ohai abɔ, yɛ be mli ni amɛkase Biblia lɛ ni amɛna anɔkwale lɛ he anɔkwa nilee lɛ sɛɛ. Lɛlɛŋ, Nyɔŋmɔ “sumɔɔ akɛ ehere gbɔmɛi fɛɛ yiwala, koni amɛshɛ anɔkwale lɛ lee mli.”—1 Timoteo 2:4.
13. Mɛni he wɔbaanyɛ wɔkɛ la ni jɛɔ Yehowa ŋɔɔ baa lɛ ato?
13 Wɔbaanyɛ wɔkɛ shishinumɔ ni baa kɛjɛɔ Yehowa ŋɔɔ ŋmɛnɛ lɛ ato nɔ ni ba beni Nyɔŋmɔ webii ni hi shi yɛ blema lɛ shi Mizraim lɛ he: “Ni shwane lɛ Yehowa nyiɛɔ amɛhiɛ yɛ atatu kutuu mli, koni etsɔɔ amɛ gbɛ, ni nyɔɔŋ hu yɛ la kutuu mli, koni eha amɛna nii, ni amɛnyiɛ shwane kɛ nyɔɔŋ.” (2 Mose 13:21, 22) Shwane atatu kɛ nyɔɔŋ la lɛ ji gbɛtsɔɔmɔ nii ni jɛ Nyɔŋmɔ ŋɔɔ ni anyɛɔ akɛ he fɔɔ nɔ. Anyɛɔ akɛ he fɔɔ amɛnɔ tamɔ hulu ni Nyɔŋmɔ bɔ koni ekɛ jetsɛremɔ ŋmɛlɛtswai aha wɔ lɛ. Nakai nɔŋŋ hu wɔbaanyɛ wɔkɛ wɔhe afɔ Yehowa nɔ koni eha mɛi ni taoɔ anɔkwale lɛ yɛ gbii fɔji nɛɛ amli lɛ agbɛ nɔ akpɛ aha amɛ yɛ mumɔŋ. Abɛi 4:18 maa nɔ mi haa wɔ akɛ: “Jalɔi atempɔŋ lɛ tamɔ la ni kpɛɔ, ni eyaa nɔ ekpɛɔ aahu kɛyashiɔ shwane fintii.”
Maŋtsɛyeli La lɛ Kpɛmɔ
14. Mɛni esa akɛ efee oti titri ni ma la hiɛlɔi ahiɛ?
14 Yɛ be mli ni Yehowa ji shishinumɔ Jɛɛhe, ni Kristo ji nakai la lɛ Kpɛlɔ Nukpa lɛ, esa akɛ Yesu sɛɛnyiɛlɔi lɛ hu aha nakai la lɛ akpɛ. Ewie amɛhe akɛ: “Nyɛ ji je lɛŋ la lɛ. . . . Nyɛhaa nyɛ la atsoa yɛ gbɔmɛi ahiɛ, koni amɛna nyɛ nifeemɔ nii kpakpai lɛ, ni amɛwo nyɛ-Tsɛ ni yɔɔ ŋwɛi lɛ hiɛ nyam.” (Mateo 5: 14, 16) Ni mɛni ji la ni esa akɛ esɛɛnyiɛlɔi lɛ aha etso yɛ gbɔmɛi ahiɛ lɛ saneyitso titri? Mɛni amɛbaatsɔɔ yɛ jeŋ yinɔsane naagbee be nɛɛ mli? Yesu ekɛɛɛ akɛ esɛɛnyiɛlɔi lɛ baashiɛ maŋbii anɔyeli, yiwalɛ nɔyeli, Sɔlemɔ kɛ Maŋ ekomefeemɔ, aloo je lɛŋ ŋaatsɔɔi lɛ eko. Shi moŋ, egba efɔ shi yɛ Mateo 24:14 akɛ, yɛ jeŋ muu fɛɛ shitee-kɛ-woo lɛ fɛɛ sɛɛ lɛ, abaashiɛ “maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.” No hewɔ lɛ, la hiɛlɔi ni yɔɔ ŋmɛnɛ lɛ gbaa mɛi krokomɛi Nyɔŋmɔ Maŋtsɛyeli ni kɛ Satan je lɛ baaba enaagbee, ni ekɛ jalɛ jeŋ hee aba lɛ he sane.—1 Petro 2:9.
15. Nɛgbɛ mɛi ni taoɔ la lɛ baatsɔ amɛhe kɛya?
15 Mɛi ni sumɔɔ la lɛ haŋ nɔ ni je nɛɛ kɛɔ kɛ otii ni ekɛmamɔ ehiɛ lɛ alaka amɛ. Etsɛŋ ni nɔ ni amɛkɛɔ nɛɛ kɛ otii ni amɛkɛmamɔ amɛhiɛ lɛ fɛɛ baafee efolo, ejaakɛ je nɛɛ miibɛŋkɛ enaagbee. Shi moŋ, mɛi ni sumɔɔ jalɛ lɛ baasumɔ ni amɛtsɔ amɛhe kɛya sanekpakpa lɛ ni mɛi ni haa Nyɔŋmɔ Maŋtsɛyeli la lɛ kpɛɔ kɛyaa shikpɔŋ lɛ naagbee hei lɛ jajeɔ lɛ he. Mɛnɛɛmɛi ji mɛi ni agba yɛ amɛhe yɛ Kpojiemɔ 7:9, 10, ni kɛɔ nɛkɛ lɛ: “Mikwɛ, ni naa, asafo babaoo ni mɔ ko mɔ ko nyɛŋ akane ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli damɔ [Nyɔŋmɔ] maŋtsɛsɛi lɛ hiɛ kɛ Toobi [Kristo]hiɛ . . . Ni amɛbolɔ kɛ gbee waa amɛkɛɛ: ‘Yiwalaheremɔ lɛ ji wɔ-Nyɔŋmɔ ni ta maŋtsɛsɛi lɛ nɔ lɛ kɛ Toobi lɛ nɔ.’” Kuku 14 kɛɔ akɛ: “Mɛnɛɛmɛi ji mɛi ni jɛ amanehulu kpeteŋkpele lɛ mli lɛ.” Hɛɛ, amɛjeɔ je nɛɛ naagbee lɛ mli kɛyaboteɔ jeŋ hee ni bɛ naagbee lɛ mli yɛ Nyɔŋmɔ Maŋtsɛyeli lɛ shishi.
Jeŋ Hee ni Aha Ena La Kpɛmɔ Lɛ
16. Mɛni baaba Satan je lɛ nɔ yɛ amanehulu kpeteŋkpele lɛ mli?
16 Anɔkwale la ni kpɛɔ kaŋkaŋ lɛ baayi nakai jeŋ hee lɛ mli obɔ. Lɛlɛŋ, susumɔ bɔ ni shihilɛ lɛ baaji aha, yɛ gbi ni Nyɔŋmɔ kɛ nibii agbɛjianɔtoo nɛɛ baaba enaagbee lɛ sɛɛ lɛ he okwɛ. Satan, edaimonioi lɛ, kɛ emaŋkwramɔ, jarayeli, kɛ ejamɔ gbɛjianɔtoi lɛ fɛɛ baafee nɔ ni eho etee—amɛteŋ mɔ fɛɛ mɔ! Satan apasa gbɛjianɔtoo muu lɛ fɛɛ hu eho etee. No hewɔ lɛ, yɛ amanehulu kpeteŋkpele lɛ sɛɛ lɛ, adafitswaa wolo ko, wolo tɛtrɛɛ ko, wolo wulu ko, wolo bibioo ko, loo dɛhiɛmɔ wolo ko ni akala ni fiɔ yiwalɛ je nɛɛ sɛɛ lɛ ekome folo po ehiŋ shi dɔŋŋ. Anuŋ tɛlivishin loo redio nitsumɔ hei awiemɔi ni naa gbɔmɛi anɔ hewalɛ yɛ gbɛ fɔŋ nɔ lɛ ahe dɔŋŋ. Akɛ hewalɛ nifeemɔ shikome pɛ baajie ebɔɔ ni yɔɔ Satan je lɛ mli lɛ fɛɛ kɛya!—Mateo 24:21; Kpojiemɔ 7:14; 16:14-16; 19:11-21.
17, 18. Te obaatsɔɔ mumɔŋ shihilɛ ni baahi shi yɛ Satan je lɛ naagbee lɛ sɛɛ lɛ mli oha tɛŋŋ?
17 Mɛɛ hejɔlɛ babaoo po enɛ kɛaaba nɛkɛ! Kɛjɛ nakai gbi lɛ nɔ kɛyaa lɛ, mumɔŋ la kpakpa ni wajeɔ mɔ ni jɛɔ Yehowa kɛ e-Maŋtsɛyeli lɛ mli baa lɛ pɛ baana adesai anɔ hewalɛ. Taakɛ Yesaia 54:13 (NW) gba efɔ shi lɛ: “Ni obii lɛ fɛɛ aaafee mɛi ni Yehowa etsɔɔ amɛ nii, ni obii lɛ atoiŋjɔlɛ baafa babaoo.” Akɛni Nyɔŋmɔ nɔyeli lɛ yeɔ shikpɔŋ muu lɛ fɛɛ nɔ hewɔ lɛ, eshiwoo ji akɛ, taakɛ Yesaia 26:9 (NW) kɛɔ lɛ, “jalɛ ji nɔ ni shikpɔŋ lɛ nɔ bii lɛ baakase.”
18 Nibii fɛɛ ni ebɔle wɔhe yɛ jwɛŋmɔŋ kɛ mumɔŋ lɛ baatsake oya ni efee ekpakpa. Nibii ni tswaa mɔ emaa shi ji nii ni abaakpa gbɛ, shi jeee nibii ni nyɛɔ mɔ nɔ ni ehiii ni egbɛ eshwa babaoo amrɔ nɛɛ. Abaatsɔɔ mɔ fɛɛ mɔ ni yɔɔ wala mli yɛ nakai beaŋ lɛ anɔkwale ni kɔɔ Nyɔŋmɔ kɛ eyiŋtoi ahe lɛ he nii. Abaaha gbalɛ ni yɔɔ Yesaia 11:9 lɛ aba mli kwraa kɛmɔ shi, he ni kɛɔ akɛ: “Shikpɔŋ lɛ nɔ aaayi obɔ kɛ Yehowa he nilee lɛ tamɔ bɔ ni nu ha ŋshɔ shishi lɛ.”
Ehe Miihia Waa Akɛ Anyiɛ La lɛ Sɛɛ
19, 20. Mɛni hewɔ ehe hiaa ni mɛi ni taoɔ ni amɛnyiɛ la lɛ sɛɛ lɛ ahiɛ ahi amɛhe nɔ be fɛɛ be lɛ?
19 Ŋmɛnɛ, ehe miihia ni anyiɛ je lɛ la lɛ sɛɛ, yɛ gbɛjianɔtoo fɔŋ nɛɛ naagbee afii nɛɛ amli. Ni ehe miihia ni wɔkwɛ wɔhe nɔ jogbaŋŋ, ejaakɛ aawuu ta ni mli wa waa aashi wɔ koni wɔkanyiɛ yɛ la lɛ mli. Nɛkɛ shitee-kɛ-woo nɛɛ baa kɛjɛɔ duŋ mli hewalɛi lɛ aŋɔɔ—ejɛɔ Satan, edaimonioi lɛ, kɛ eshikpɔŋ nɔ gbɛjianɔtoo lɛ ŋɔɔ. No hewɔ ni bɔfo Petro bɔɔ wɔ kɔkɔ akɛ: “Nyɛhiɛ akaa shi, nyɛsaraa; ejaakɛ nyɛ henyɛlɔ Abonsam lɛ nyiɛ tamɔ jata ni hũuɔ eetao mɔ ní eeemi.”—1 Petro 5:8.
20 Satan kɛ gbɛtsii nii baamamɔ mɛi ni kɛ la lɛ ebana tsakpaa lɛ agbɛ nɔ ejaakɛ eesumɔ ni eha amɛya nɔ amɛhi duŋ lɛ mli. Ebaanyɛ efee nɔnyɛɛ ni jɛ wekumɛi loo tsutsu nanemɛi ni teɔ shi woɔ anɔkwale lɛ aŋɔɔ. Ebaanyɛ efee yiŋkɔshikɔshi-feemɔ ni anaa yɛ Biblia lɛ he, akɛni apasa jamɔ mli tsɔɔmɔi loo mɛi ni heee Nyɔŋmɔ nɔ amɛyeee kɛ mɛi ni kɛɔ akɛ anyɛŋ ale akɛ Nyɔŋmɔ yɛ, ni amɛbɛ hemɔkɛyeli lɛ alakamɔ wiemɔi lɛ eshwila amɛhiŋmɛi hewɔ. Ekolɛ mɔ diɛŋtsɛ eshafeemɔ henumɔi hu baanyɛ aha ewa kɛha lɛ akɛ eeehi shi yɛ ŋwɛi taomɔ nii anaa.
21. Mɛni esa akɛ mɛi fɛɛ ní taoɔ amɛhi Nyɔŋmɔ jeŋ hee lɛ mli lɛ afee?
21 Shi yɛ gbɛtsii nii ni okɛkpeɔ lɛ fɛɛ sɛɛ lɛ, ani oosumɔ ni ona wala mli ŋɔɔmɔ yɛ jeŋ ni ohía, efɔŋfeemɔ, jalɛsane ni ayeee, loo tawuu bɛ mli lɛ mli lɛlɛŋ? Ani oosumɔ ni ona hewalɛnamɔ ni yeɔ emuu kɛ naanɔ wala mli ŋɔɔmɔ lɛlɛŋ yɛ paradeiso shikpɔŋ nɔ? No lɛ kpɛlɛmɔ Yesu Kristo nɔ akɛ je lɛ la lɛ, ni onyiɛ esɛɛ yɛ anɔkwayeli mli, ni obo mɛi ni hiɛ “wala wiemɔ lɛ mli” kpɛŋŋ ni “[amɛ]tsoɔ tamɔ kanei yɛ je nɛŋ” lɛ ashɛɛ sane lɛ toi jogbaŋŋ.—Filipibii 2:15, 16.
Te Obaaha Hetoo Oha Tɛŋŋ
◻ Yɛ mɛɛ gbɛ nɔ jamɔŋ hiɛnyiɛlɔi tsɔɔ akɛ amɛsumɔɔ duŋ lɛ?
◻ Mɛɛ su ko Yesu na yɛ gbɔmɔi ahe?
◻ Te la hiɛlɔi lɛ anaabuamɔ lɛ etee nɔ eha tɛŋŋ?
◻ Mɛɛ tsakemɔi ni sa Kadimɔ waa etsɛŋ ni ebaaba?
◻ Mɛni hewɔ ehe hiaa waa akɛ anyiɛ je lɛŋ la lɛ sɛɛ ŋmɛnɛ lɛ?
[Mfoniri ni yɔɔ baafa 14,15]
Farisifoi tsuiwalɔi lɛ shwie nuu ni Yesu gbele ehiŋmɛii lɛ