Nɔ Ni Yohane Ŋma
11 Agbɛnɛ, nuu ko ni jɛ Betania ni atsɛɔ lɛ Lazaro lɛ bɛ hewalɛ; Betania ji Maria kɛ enyɛmi yoo Marta akrowa lɛ.+ 2 Nɛkɛ Maria nɛɛ ji mɔ ni fɔse ojeŋma* eshwie Nuŋtsɔ lɛ he ni ekɛ eyitsɔi tsumɔ enaji ahe lɛ;+ enyɛmi nuu Lazaro ji mɔ ni bɛ hewalɛ nɛɛ. 3 No hewɔ lɛ, enyɛmimɛi yei lɛ kɛ shɛɛ maje lɛ amɛkɛɛ: “Nuŋtsɔ, naa! mɔ ni osumɔɔ esane lɛ bɛ hewalɛ.” 4 Shi be ni Yesu nu lɛ, ekɛɛ: “Nɛkɛ hela nɛɛ jeee nɔ ni baayagbe naa yɛ gbele mli, shi moŋ koni akɛwo Nyɔŋmɔ hiɛ nyam,+ koni atsɔ no nɔ awo Nyɔŋmɔ Bi lɛ hu hiɛ nyam.”
5 Yesu sumɔɔ Marta kɛ enyɛmi yoo lɛ kɛ Lazaro fɛɛ. 6 Shi be ni enu akɛ Lazaro bɛ hewalɛ lɛ, eje gbɛ ehi shi yɛ he ni eyɔɔ lɛ gbii enyɔ kɛfata he. 7 Kɛkɛ ni no sɛɛ lɛ, ekɛɛ kaselɔi lɛ akɛ: “Nyɛhãa wɔyaa Yudea ekoŋŋ.” 8 Kaselɔi lɛ kɛɛ lɛ akɛ: “Rabi,+ etsɛko tsɔ ni Yudeabii lɛ tao akɛ amɛtswia bo tɛi,+ ni ooya jɛmɛ ekoŋŋ lo?” 9 Yesu hã hetoo akɛ: “Ani jeee ŋmɛlɛtswai 12 yɔɔ jetsɛremɔ mli?+ Kɛji mɔ ko nyiɛ be ni je etsɛre lɛ, etɛɛɛ, ejaakɛ enaa je nɛŋ la lɛ. 10 Shi kɛji mɔ ko nyiɛ be ni je ena lɛ, etɛɔ, ejaakɛ la lɛ bɛ emli.”
11 Be ni ewie nibii nɛɛ, ekɛshi sɛɛ akɛ: “Wɔnaanyo Lazaro ewɔ,+ shi miiya jɛmɛ ni miyatsĩɛ lɛ.” 12 Ni kaselɔi lɛ kɛɛ lɛ akɛ: “Nuŋtsɔ, kɛ́ wɔ ewɔɔ lɛ, no lɛ, ebaaná hewalɛ.” 13 Shi no mli lɛ, Yesu miiwie egbele he. Shi amɛsusu akɛ eewie wɔ ni awɔɔ kɛjɔɔ he lɛ he. 14 Kɛkɛ ni Yesu kɛɛ amɛ faŋŋ akɛ: “Lazaro egbo,+ 15 ni eŋɔɔ minaa akɛ mibɛ jɛmɛ yɛ nyɛ hewɔ, koni nyɛhe nyɛye. Shi nyɛhãa wɔyaa eŋɔɔ.” 16 No hewɔ lɛ, Toma, mɔ ni atsɛɔ lɛ Hãaji lɛ kɛɛ enanemɛi kaselɔi lɛ akɛ: “Nyɛhãa wɔ hu wɔyaa koni wɔkɛ lɛ ayagbo.”+
17 Be ni Yesu shɛ jɛmɛ lɛ, ena akɛ Lazaro eye gbii ejwɛ momo yɛ gbonyobu* lɛ mli. 18 Shi Betania bɛŋkɛ Yerusalem, ni ekɛ lɛ teŋ jekɛmɔ aaafee mailii enyɔ.* 19 Ni Yudafoi lɛ ateŋ mɛi pii eba Marta kɛ Maria ŋɔɔ koni amɛbashɛje amɛmii yɛ amɛnyɛmi nuu lɛ hewɔ. 20 Be ni Marta nu akɛ Yesu miiba lɛ, etee ekɛ lɛ yakpe; shi Maria+ lɛ, etee nɔ eta shĩa. 21 Kɛkɛ ni Marta kɛɛ Yesu akɛ: “Nuŋtsɔ, eji oyɛ biɛ kulɛ, minyɛmi nuu lɛ gboŋ. 22 Shi amrɔ nɛɛ po lɛ, mile akɛ nɔ fɛɛ nɔ ni obaabi Nyɔŋmɔ lɛ, Nyɔŋmɔ kɛbaahã bo.” 23 Yesu kɛɛ lɛ akɛ: “Onyɛmi nuu lɛ baate shi.” 24 Marta kɛɛ lɛ akɛ: “Mile akɛ ebaate shi yɛ gbohiiashitee+ lɛ mli yɛ naagbee gbi lɛ nɔ.” 25 Yesu kɛɛ lɛ akɛ: “Miji gbohiiashitee lɛ kɛ wala lɛ.+ Mɔ ni heɔ minɔ eyeɔ* lɛ, kɛ́ egbo po lɛ, ebaaba wala mli; 26 ni mɔ fɛɛ mɔ ni hiɛ kã ni heɔ minɔ eyeɔ* lɛ, egboŋ kɔkɔɔkɔ.+ Ani oheɔ enɛ oyeɔ?” 27 Ekɛɛ lɛ akɛ: “Hɛɛ, Nuŋtsɔ, miheɔ miyeɔ akɛ bo ji Kristo lɛ, Nyɔŋmɔ Bi lɛ, mɔ ni baa je lɛ mli lɛ.” 28 Be ni ewie enɛ lɛ, eyiŋ etee eyatsɛ enyɛmi yoo Maria, ni ekɛ lɛ pɛ wie akɛ: “Tsɔɔlɔ+ lɛ eba ni eetsɛ bo.” 29 Be ni Maria nu enɛ lɛ, ete shi oya ni etee eŋɔɔ.
30 No mli lɛ, Yesu boteko akrowa lɛ mli, shi moŋ eyɛ he ni Marta kɛ lɛ kpe yɛ lɛ lolo. 31 Be ni Yudafoi ni kɛ Maria yɔɔ shĩa ni amɛshɛjeɔ emii lɛ na akɛ Maria ete shi oya ni eje kpo lɛ, amɛnyiɛ esɛɛ, ejaakɛ amɛsusu akɛ eeya gbonyobu*+ lɛ naa eyafó yɛ jɛmɛ. 32 Be ni Maria shɛ he ni Yesu yɔɔ lɛ ni ehiŋmɛi gba enɔ lɛ, eho egbee enaji anaa ni ekɛɛ lɛ akɛ: “Nuŋtsɔ, eji oyɛ biɛ kulɛ, minyɛmi nuu lɛ gboŋ.” 33 Be ni Yesu na akɛ eefó ni Yudafoi ni kɛ lɛ ba lɛ hu miifó lɛ, ewerɛ ho ehe yɛ emli* ni ehao. 34 Ekɛɛ: “Nɛgbɛ nyɛkɛ lɛ eŋmɛ?” Amɛkɛɛ lɛ akɛ: “Nuŋtsɔ, ba ni obakwɛ.” 35 Kɛkɛ ni yaafonui jɛ Yesu hiŋmɛiiaŋ.+ 36 Kɛkɛ ni Yudafoi lɛ bɔi kɛɛmɔ akɛ: “Nyɛkwɛa, esumɔɔ esane waa ee!” 37 Shi amɛteŋ mɛi komɛi kɛɛ: “Nuu nɛɛ ni gbele shwilafo lɛ hiŋmɛii lɛ,+ ani enyɛŋ efee ni kulɛ mɔ nɛ akagbo?”
38 Kɛkɛ ni Yesu werɛ ho ehe yɛ emli ekoŋŋ ni eba gbonyobu* lɛ naa. Anɔkwa, tɛkplo ni, ni tɛ bu naa. 39 Yesu kɛɛ: “Nyɛjiea tɛ lɛ.” Marta, mɔ ni egbo lɛ nyɛmi yoo lɛ kɛɛ lɛ akɛ: “Nuŋtsɔ, benɛ nɛɛ eeje fu, ejaakɛ eye gbii ejwɛ.” 40 Yesu kɛɛ lɛ akɛ: “Ani mikɛɛɛ bo akɛ kɛ́ ohe oye lɛ obaana Nyɔŋmɔ anunyam lɛ?”+ 41 No hewɔ lɛ, amɛjie tɛ lɛ. Kɛkɛ ni Yesu hole ehiŋmɛii anɔ kɛtee ŋwɛi+ ni ekɛɛ: “Ataa, miida bo shi akɛ obo mi toi. 42 Anɔkwa, mile akɛ oboɔ mi toi daa; shi mɛi ni damɔ biɛ lɛ ahewɔ miwieɔ lɛ, koni amɛhe amɛye akɛ bo otsu mi.”+ 43 Be ni ewie nibii nɛɛ, ebo kɛ gbee ni wa ekɛɛ: “Lazaro ee, jee kpo!”+ 44 Nuu ni no mli lɛ egbo lɛ je kpo ni akɛ mamai ebala enaji kɛ eniji, ni akɛ mama efi ehiɛ. Yesu kɛɛ amɛ akɛ: “Nyɛfɛnea lɛ ni nyɛhãa eyaa.”
45 No hewɔ lɛ, Yudafoi ni ba Maria ŋɔɔ ni na nɔ ni Yesu fee lɛ ateŋ mɛi pii ná hemɔkɛyeli yɛ emli,+ 46 shi amɛteŋ mɛi komɛi yiŋ amɛtee Farisifoi lɛ aŋɔɔ ni amɛyagba amɛ nɔ ni Yesu fee lɛ. 47 No hewɔ lɛ, osɔfoi hiɛnaanɔbii lɛ kɛ Farisifoi lɛ bua Sanhedrin* lɛ naa kɛkpe, ni amɛkɛɛ: “Mɛni wɔfeɔ, ejaakɛ nuu nɛɛ miifee okadii pii?+ 48 Kɛ́ wɔŋmɛ lɛ gbɛ ni etee nɔ nɛkɛ nɔŋŋ lɛ, amɛ fɛɛ amɛbaaná hemɔkɛyeli yɛ emli, ni Romabii lɛ baaba amɛbaŋɔ wɔjamɔhe* kɛ wɔmaŋ lɛ.” 49 Shi amɛteŋ mɔ kome, Kaiafa,+ ni ji osɔfonukpa yɛ nakai afi lɛ mli lɛ kɛɛ amɛ akɛ: “Nyɛleee nii kwraa, 50 ni nyɛnaaa akɛ sɛɛnamɔ yɛ he kɛhã nyɛ akɛ gbɔmɔ kome baagbo ehã maŋ lɛ, moŋ fe nɔ ni jeŋmaŋ muu lɛ fɛɛ hiɛ baakpãtã.” 51 Shi jeee lɛ diɛŋtsɛ ekpɛ eyiŋ ewie enɛ, shi moŋ akɛni osɔfonukpa ji lɛ yɛ nakai afi lɛ mli hewɔ lɛ, egba akɛ Yesu baagbo ehã jeŋmaŋ lɛ, 52 ni jeee kɛhã jeŋmaŋ lɛ pɛ, shi moŋ koni ebua Nyɔŋmɔ bii ni egbɛ eshwã lɛ hu anaa efee amɛ ekome. 53 No hewɔ lɛ, kɛjɛ nakai gbi lɛ nɔ kɛyaa lɛ, amɛkpaŋ eyi nɔ koni amɛgbe lɛ.
54 No hewɔ lɛ, Yesu enyiɛɛɛ yɛ faŋŋ dɔŋŋ yɛ Yudafoi lɛ ateŋ, shi moŋ eshi jɛmɛ etee kpokpaa ni bɛŋkɛ ŋa lɛ nɔ lɛ nɔ, ni etee maŋ ko ni atsɛɔ lɛ Efraim lɛ mli,+ ni ekɛ kaselɔi lɛ yahi jɛmɛ. 55 Agbɛnɛ, Yudafoi lɛ a-Hehoo+ lɛ miibɛŋkɛ, ni mɛi babaoo ni jɛ hei ni etse amɛhe banee lɛ kwɔ kɛtee Yerusalem dani Hehoo lɛ ashɛ, koni amɛyafee amɛhe krɔŋkrɔŋ yɛ kusum naa. 56 Amɛmiitao Yesu, ni be ni amɛdamɔdamɔɔ shi yɛ sɔlemɔ shĩa lɛ, amɛkɛɛkɛɛ amɛhe akɛ: “Te nyɛsusuɔ tɛŋŋ? Ani ebaŋ gbi jurɔ lɛ kwraa?” 57 Shi osɔfoi hiɛnaanɔbii lɛ kɛ Farisifoi lɛ ewo kitã akɛ kɛ́ mɔ ko ná ele he ni Yesu yɔɔ lɛ, ebabɔ amaniɛ, koni amɛyamɔ lɛ.