Toi Atsu ni Ato Nyɛsɛɛ Nɛɛ Aha “‘Toi Krokomɛi” Lɛ
“Ni miyɛ toi krokomɛi ni jɛɛɛ toi atsu nɛɛ mli; ni nomɛi hu, ja miŋɔ amɛ kɛba, ni amɛbanu migbee, ni toi Iɛ fee kuu kome kɛ kwɛlɔ kome.”—Yohane 10:16
1. Mɛni akɛfata mumɔŋ Israel toi atsu lɛ he yɛ afi 36 Ŋ.B.?
1 BENI ajie mumɔŋ Israel toi atsu hee lɛ kpo yɛ Pentekoste gbi lɛ nɔ yɛ afi 33 Ŋ.B. lɛ, kɛkɛ ni tsutsu toi atsu kɛha heloonaa Yudafoi ni yɔɔ Mose Mla kpaŋmɔ Iɛ shishi lɛ ho kɛtee akɛ etsu eyiŋtoo he nii egbe naa. Afii etɛ kɛ fa sɛɛ lɛ atsake Roma asraafoi oha’ atsɛ Kornelio kɛ eweku kɛ enanemɛi ni heɔ yeɔ lɛ yɛ Kaisarea ni abaptisi amɛ ni mumɔ krɔŋkrɔŋ lɛ fɔ amɛ mu. Nɛkɛ gbɛ nɔ atsɔ ni Jeŋmajiaŋbii ni bɛ Yudafoi ajamɔ lɛ mli ni afeko amɛ ketia lɛ babote toi atsu ni Yesu Kristo ji “shinaa” lɛ mli. (Bɔfoi lɛ Asaji, yitso 10) Mɛi ni feɔ nɛkɛ kuu’nɛɛ ji “Nyɔŋmɔ Israel,” Israel yɛ mumɔ naa, aloo mumɔŋ Israelbii. Ani abaanyɛ awiɛ yɛ nɛkɛ—Yudafoi loo Jeŋmajiaŋbii—nɛɛ ahe akɛ amɛji toi ni “jɛɛɛ toi atsu nɛɛ mli”—kuu ni abua amɛnaa taakɛ kpaŋmɔ hee gbɛjianɔtoo lɛ tsɔɔ lɛ? Akɛŋ nakai!—Galatabii 6:16; Yohane 10:16.
2. Yesu miisɔmɔ lolo akɛ Tookwɛlɔ Kpakpa kɛha mɛi ni yɔɔ kpaŋmɔ hee lɛ mli lɛ yɛ mɛɛ gbɛ nɔ?
2 Nyɔŋmɔ Israel lɛ mli shwɛɛnii yɛ shikpɔŋ nɔ lolo yɛ be ni ekpe sɛɛ tsɔ nɛɛ po mli, ni anɔkwasane nɛɛ yeɔ odase akɛ Yesu Kristo, kpaŋmɔ hee nɛ teŋdamɔlɔ lɛ etee nɔ efee Tookwɛlɔ Kpakpa kɛ Anɔkwafo. No hewɔ lɛ ŋmɛnɛ po, yɛ nɔ ni fe afii ohai 19 sɛɛ nɛɛ, Yesu Kristo ni awo ehiɛ nyam lɛ baanyɛ akɛɛ yɛ gbɛ ni ja nɔ, ni hepupuumɔ ko bɛ mli, nɔ ni etsi ta ewie dani egbo ni atee lɛ shi lɛ, ni wɔkaneɔ enɛ yɛ Yohane 10:14, 15: “Miji tookwɛlɔ kpakpa lɛ, ni mile mɛi ni ji mimɛi, mi mimɛi lɛ hu le mi, taakɛ bɔ ni tsɛ lɛ [Tookwɛlɔ Fe Fɛɛ lɛ] le mi, ni mi hu mile tsɛ lɛ; ni miŋɔɔ miwala miŋmɛɔ shi yɛ toi lɛ anajiaŋ.”
3, 4. “Mɛni hewɔ abaayoo “toi krokomɛi” lɛ yɛ “asafoku bibioo” lɛ ahe lɛ?
3 Nɛkɛ be mli Yesu tee nɔ ewie sane ko ni sa kadimɔ jogbaŋŋ ni jɛ etsui mli tɔɔ lɛ: “Ni miyɛ toi krokomɛi ni jɛɛɛ toi atsu nɛɛ mli; ni nomɛi hu, ja miŋɔ amɛ kɛba, ni amɛbanu migbee, ni toi lɛ fee kuu kome kɛ kwɛlɔ kome.” (Yohane 10:16) Namɛi ewieɔ amɛhe akɛ “toi krokomɛi” lɛ?
4 Akɛni nakai “toi krokomɛi” lɛ “jɛɛɛ toi atsu nɛɛ mli” hewɔ lɛ, amɛfataŋ Nyɔŋmɔ Israel ni emlibii hiɛ mumɔŋ loo ŋwɛi gboshiniyeli lɛ ahe. Titri lɛ nɛkɛ mumɔŋ Israelbii nɛɛ baafee “asafoku bibioo,” ejaakɛ Yesu kɛɛ ekaselɔi ni abaafɔse mumɔ krɔŋkrɔŋ lɛ ashwie amɛ nɔ yɛ Pentekoste lɛ akɛ: “Kaashe gbeyei, asafoku bibioo; ejaakɛ nyɛ-Tsɛ lɛ yɛ he tsuijurɔ akɛ eeeŋɔ maŋtsɛyeli lɛ eha nyɛ.” (Luka 12:32) Toi asafoku bibioo ni akɛ ŋwɛi Maŋtsɛyeli Iɛ baaha amɛ ni amɛkɛ Tookwɛlɔ Kpakpa Yesu Kristo aye maŋtsɛ yɛ nakai Maŋtsɛyeli Iɛ mli lɛ ayibɔ baafee mumɔŋ Israelbii 144,000 pɛ.—Kpojiemɔ 7:1-8; 14:1-5.
5. Te ooofee tɛŋŋ okɛ Kpojiemɔ 14:4 atsu nii ni okɛtsɔɔ akɛ toi krokomɛi lɛ yɛ hiɛnɔkamɔ ni yɔɔ sɔrɔto yɛ asafoku bibioo lɛ nɔ he lɛ?
5 Kpojiemɔ 14:4 kɛɔ akɛ: “Mɛnɛɛmɛi ji mɛi ni ahe kɛjɛ gbɔmɛi ateŋ ni amɛtsɔmɔ klɛŋklɛŋ yibii amɛba Nyɔŋmɔ kɛ Toobi lɛ.” Te aaafee tɛŋŋ ni nakai mumɔŋ Israelbii 144,000 lɛ aaafee okadi klɛŋklɛŋ yibii ni jɛ adesai ateŋ kɛji akɛ yibii krokomɛi loo sɛɛ mli yibii enyiɛŋ amɛ sɛɛ lɛ? Eji nɔ ni ka shi faŋŋ akɛ belɛ yɛ mumɔŋ Israelbii 144,000 ni feɔ asafoku bibioo ni ji toi odehei ni yɔɔ kpaŋmɔ hee toi atsu lɛ mli lɛ sɛɛ lɛ, esa akɛ toi krokomɛi ni abaabua amɛnaa yɛ sɛɛ mli ahi shi. Ni nakai pɛ ji bɔ ni eba lɛ, aloo jeee nakai?
6, 7. Kpojiemɔ 22:17 miiba mli yɛ mɛɛ gbɛ nɔ, ni namɛi afɔɔɔ nine atsɛɛɛ amɛ akɛ “ba” yɛ biɛ lɛ?
6 Agba afɔ shi yɛ Kpojiemɔ 22:17 akɛ “ni mumɔ lɛ kɛ ayemforo lɛ kɛɔ akɛ: Ba! Ni mɔ ni kumai yeɔ lɛ lɛ, ha ni eba, ni mɔ ni sumɔɔ lɛ ha ni ebayɛ wala nu lɛ yaka.” Mumɔŋ Kristo ayemforo lɛ efɔɔɔ nine etsɛɛɛ lɛ diɛŋtsɛ ehe akɛ “Ba!” ni ji akɛ, mɛi ni Yehowa Nyɔŋmɔ baahala amɛ lolo ni amɛfee ayemforo kuu lɛ fã, bɔni afee ni 144,000 lɛ ashɛ lɛ. Nɛkɛ “nibii agbɛjianɔtoo nɛɛ naagbee” ni je shishi kɛjɛ 1914 nɛɛ mli wɔnu nine ni “ayemforo” lɛ fɔɔ kɛ Tookwɛlɔ Fe Fɛɛ lɛ mumɔ krɔŋkrɔŋ lɛ gbeekpamɔ.—Mateo 24:3.
7 Nakai wiemɔi lɛ akɛfɔɔ nine atsɛɔ mɛi ni ji adesai ni yɔɔ shikpɔŋ nɛɛ nɔ, ni sumɔɔ ni amɛná adesa wala ni eye emuu yɛ Nyɔŋmɔ subaŋ nɔ yɛ Paradeiso ni Nyɔŋmɔ Maŋtsɛyeli kɛtsɔ Kristo nɔ lɛ baasaa ekɛba shikpɔŋ nɛɛ nɔ lɛ mli lɛ. Ŋmɛnɛ, yɛ nibii agbɛjianɔtoo nɛɛ naagbee nɛɛ mli lɛ, mɛi ni afɔ nine atsɛ amɛ nɛɛ ji Yesu “toi krokomɛi” ni yɔɔ Yesu jeeŋmɔ beebe gbalɛ ni yɔɔ Yohane 10:16 lɛ. Amɛjɛɛɛ “toi atsu” nɛɛ ni Tookwɛlɔ Kpakpa Yesu Kristo tsi ta lɛ mli. Shi amɛnine shɛɔ ninefɔɔ lɛ nɔ kɛtsɔɔ “toi” lɛ amli shwɛɛnii ni yɔɔ “toi atsu nɛɛ mli” lɛ anɔ ni amɛkɛ amɛhe ebɔ mumɔŋ shwɛɛnii lɛ ahe kɛmiifɔ nine kɛmiitsɛ mɛi krokomɛi lolo kɛyashi be mli ni nibii agbɛjianɔtoo nɛɛ aaaba naagbee kwraa.
8. Mɛɛ jwɛŋmɔ ni kɔɔ toi krokomɛi lɛ ahe ana yɛ 1905?
8 Aŋma sane ko yɛ Zion’s Watch Tower ni ji March 15, 1905 nɔ lɛ mli ni eyitso ji ‘Anɔkwa Tookwɛlɔ, Anɔkwa Toi, Anɔkwa Kuu.’ Ekɛ sɔrɔtofeemɔ ba toi ni jɛ “toi atsu nɛɛ mli” lɛ kɛ mɛi ni atsɛɔ amɛ toi krokomɛi lɛ ateŋ. Ema nɔ mi akɛ “toi atsu nɛɛ mli” toi lɛ kɔɔ Kristofoi asafo ni aajie amɛ kɛmiijɛ nɔ ni atsɛɔ lɛ “Sanekpakpa lɛ Yinɔ’ lɛ mli. Yɛ yitsei bibii ni ji ‘Toi Krokomɛi ni jɛ Asafoku Kroko Mli’ kɛ ‘Nanemɛi Niyelɔi ni jɛ Shiwoo Kome lɛ Nɔŋŋ Mli’ lɛ sɛɛ lɛ, (baafai 89, 90) tee nɔ ekɛɛ akɛ:
‘Asafoku ni Nuŋtsɔ lɛ buaa amɛ naa kɛbaa emasɛi yɛ abɛbua nɛɛ be nɛɛ mli lɛ jeee heloonaa Israel, shi mumɔŋ Israel. . . . No hewɔ lɛ jwɛŋmɔ ni mɛi komɛi hiɛ akɛ wɔ mɛi ni wɔji Jeŋmajiaŋbii aloo ‘toi krokomɛi’ ni atsi amɛ ta lɛ ji mɛi ni aabua amɛnaa bianɛ kɛmiiba kuu kome lɛ mli lɛ jeee anɔkwale. . . . Eka shi faŋŋ akɛ nɛkɛ ‘toi krokomɛi’ ni atsi amɛ ta yɛ abɛbua lɛ mli lɛ ji mɛi ni baatsɔmɔ Nuŋtsɔ lɛ toi yɛ sɛɛ mli be mli ni ‘asafoku bibioo’ nɛɛ anaabuamɔ eba naagbee lɛ.”
9, 10. (a) Mɛni hewɔ anyɛŋ akɛ gwantɛŋi lɛ kɛ abotiai lɛ ahe abɛbua lɛ atsu nii yɛ Afii Akpe lɛ mli lɛ? (b) Mɛɛ be mli abaabua toi krokomɛi lɛ anaa?
9 Yɛ sɛɛ mli kuku ko mli yɛ nakai sane lɛ nɔŋŋ mli lɛ, akɛ “toi krokomɛi” lɛ to “toi’ ni atsɔɔ mli yɛ Yesu abɛbua ni kɔɔ gwantɛŋi kɛ abotiai lɛ ahe taakɛ eyɔɔ Mateo 25:31-46 lɛ he. Asusu he yɛ afi 1905 mli akɛ nakai abɛbua lɛ baakɔ Kristo Afii Akpe Nɔyeli lɛ he yɛ “Nyɔŋmɔ Ofe lɛ gbi wulu nɔ ta” yɛ Harmagedon ta lɛ sɛɛ. (Kpojiemɔ 16:14-16) Shi, esa akɛ wɔha ahi wɔjwɛŋmɔ mli akɛ gwantɛŋi kɛ abotiai lɛ ahe abɛbua Iɛ ji Yesu hetoo ni ekɛha ekaselɔi lɛ asanebimɔ yɛ nɔ ni baafee “ba ni eba lɛ kɛ nibii agbɛjianɔtoo lɛ naagbee he okadi” lɛ naagbee lɛ fa. (Mateo 24:3, NW) No hewɔ lɛ esa akɛ abɛbua nɛɛ mlibaa aba mli yɛ nibii agbɛjianɔtoo nɛɛ naagbee ni je shishi yɛ afi 1914 lɛ.
10 No hewɔ lɛ wɔyooɔ akɛ Tookwɛlɔ Kpakpa Yesu Kristo kɛ “toi krokomɛi” ni yɔɔ Yohane 10:16 lɛ baaa yɛ klɛŋklɛŋ afii oha lɛ mli be mli ni Samariabii ni amɛfo ketia lɛ je shishi akɛ amɛaatsake kɛba Kristojamɔ mli lɛ. Ni asaŋ efeee nakai yɛ be mli ni Roma asraafoi ohai atsɛ, ni ji Jeŋmajiaŋnyo Kornelio ni efoko ketia lɛ atsake lɛ yɛ afi 36 Ŋ.B. lɛ. Ojogbaŋŋ, belɛ mɛɛ be Tookwɛlɔ Kpakpa lɛ to gbɛjianɔ koni ekɛ etoi krokomɛi lɛ aba? Afii ohai babaoo sɛɛ, hɛɛ, yɛ afii ohai 20 nɛɛ mli, taakɛ sane lɛ he anɔkwasaji tsɔɔ lɛ.—Bɔfoi lɛ Asaji 8:4-17; 10:9-48.
11. Namɛi mumɔŋ Israelbii lɛ susu amɛhe aahu kɛbashi 1935?
11 Wɔkadiɔ akɛ kɛbashi afi 1935 agbiɛnaa be mli lɛ no mli lɛ mumɔŋ Israel shwɛɛnii ni yɔɔ “toi atsu nɛɛ” mli lɛ bɛ deka kwraa kɛ naagbee bii ni baaha mumɔŋ Israelbii ni ji 144,000 lɛ ayikulɛ lɛ ashɛ lɛ anaabuamɔ kɛmiiwo nakai kuu loo toi atsu lɛ mli. Mɛnɛɛmɛi baafee naagbee bii ni akɛ amɛ aaaba kpaŋmɔ hee lɛ ni Tookwɛlɔ Kpakpa ni gbo akɛ Nyɔŋmɔ Toobi koni ekɛ “naanɔ kpaŋmɔ lɛ lá” aha lɛ damɔ mli ha amɛ lɛ mli. (Hebribii 13:20; Lala 50:5) Belɛ mɛni ba yɛ afi 1935?
12. Mɛɛ naakpɛɛ nii loo nɔ ko ni ekaaa ba yɛ 1935 kpee lɛ shishi?
12 Yehowa Odasefoi fee kpee ko yɛ U.S. Amerika maŋtiase, Washington D.C. ni no mli aje gbɛ afɔ nine atsɛ Biblia Kaselɔi ni tamɔ Yonadab ni jeee Israelnyo lɛ nine krɛdɛɛ akɛ amɛba kpee lɛ shishi. Yɛ kpee lɛ nɔ gbi ni ji enyɔ, May 31 lɛ, Buu Mɔɔ Asafo lɛ sɛinɔtalɔ yɛ nakai be lɛ mli lɛ ha kpee lɛ na miishɛɛ babaoo yɛ wiemɔ ni ekɛha ni kɔɔ Kpojiemɔ 7:9-17, ni kɔɔ “asafo babaoo” lɛ he Iɛ hewɔ. Etsɔɔ mli akɛ nɛkɛ “asafo babaoo” ni agba amɛhe sane afɔ shi nɛɛ ji mɛi ni baafee “toi krokomɛi” lɛ ni akɛ Yonadab loo Yehonadab, ni jeee Israelnyo ni fata Israel maŋtsɛ Yehu he ni ekɛjie ekaa ni eyɔɔ kɛha Yehowa kɛ bɔ ni eteɔ shi ewoɔ apasa nyɔŋma Baal jalɔi lɛ kpo lɛ fee amɛhe mfoniri lɛ. (2 Maŋtsɛmɛi 10:15-28; Yeremia 35:6-19) No hewɔ lɛ Yesu tsɔɔ akɛ “eŋmɛɛɛ bienyɛ ni akɛ Yehowa aaaye lɛ gbɛ,” aloo taakɛ Authorized Version tsɔɔ lɛ “eyeɔ awuŋa ehaa NUŊTSƆ lɛ.”—2 Maŋtsɛmɛi 10:16.
13, 14. (a) Namɛi batsɔmɔɔ ŋmɛnɛŋmɛnɛ beaŋ Yonadabbii lɛ? (b) Mɛni ji nɔ ni sa jogbaŋŋ akɛ amɛaafee, ni mɛni hewɔ?
13 Mɛi ni sumɔɔ ni amɛtsɔmɔ tamɔ Yonadab ni amɛfata Tookwɛlɔ Kpakpa lɛ “toi krokomɛi” lɛ ahe lɛ ohahai abɔ kpɛlɛ nakai tsɛmɔ ni atsɔ woji anɔ aŋmala aha lɛ nɔ ni amɛba Washington kpee lɛ. Bɔni afee ni amɛtsɔmɔ ŋmɛnɛŋmɛnɛ beaŋ mfonirifeemɔ mli Yonadab bii lɛ, eji nɔ ni he hiaa yɛ Ŋmalɛ naa akɛ amɛaajɔɔ amɛhe nɔ kwraa amɛha Yehowa Nyɔŋmɔ kɛtsɔ Tookwɛlɔ Kpakpa lɛ nɔ ni amɛkɛ nu mli baptisimɔ kwraa afee amɛhenɔjɔɔmɔ nɛɛ he okadi, taakɛ toi ni yɔɔ “toi atsu nɛɛ” mli lɛ efee lɛ. No hewɔ lɛ, yɛ Hɔɔ, June 1, 1935 lɛ, abaptisi mɛi ni ba kpee lɛ ateŋ mɛi 840 yɛ nu mli, tamɔ bɔ ni abaptisi mɛi babaoo yɛ Pentekoste gbi lɛ nɔ yɛ afi 33 Ŋ.B. yɛ Yerusalem lɛ. Mɛɛ nifeemɔ fɛfɛo ni kadiɔ be hee ko enɛ ji kɛha Tookwɛlɔ Kpakpa lɛ akɛ eeetsɔɔ akɛ efee klalo agbɛnɛ akɛ ekɛ toi krokomɛi lɛ ni baabo egbee toi tamɔ Tookwɛlɔ ni amɛsumɔɔ lɛ lɛ aaaba ekwɛmɔ kɛ elɛɛ shishi! Yɛ 1935 Washington kpee lɛ sɛɛ lɛ, akala wiemɔ titri ni akɛtsɔɔ Kpojiemɔ 7:9-17 mli lɛ yɛ Buu-Mɔɔ wolo tɛtrɛɛ lɛ mli, yɛ August 1 kɛ 15, 1935 nɔ ni afee lɛ mli yɛ yitso ni ji “Asafo Babaoo” (Fai 1 kɛ 2) lɛ mli.
14 Nikanelɔi akpe toi akpei abɔ na hegbɛ diɛŋtsɛ ni amɛyɔɔ akɛ amɛaatsɔmɔ Tookwɛlɔ Kpakpa lɛ toi krokomɛi ni akɛ amɛ awo toi atsu ni sa lɛ mli. Yɛ enɛ hewɔ lɛ, amɛha abaptisi amɛ mra amɛkɛfee amɛhe nɔ ni amɛjɔɔ yɛ nilee mli amɛha Tookwɛlɔ Fe Fɛɛ kɛtsɔ e-Tookwɛlɔ Bibioo Yesu Kristo nɔ lɛ he okadi. Akɛni amɛyoo akɛ Yehowa Tookwɛlɔ Bibioo lɛ kɛ ewala loo esusuma akɛ adesa lɛ ha yɛ toi lɛ fɛɛ ahewɔ hewɔ lɛ, amɛ hu, “amɛfɔ amɛtadei lɛ” ni haa ayɔseɔ amɛ lɛ “ahe” yɛ nɛkɛ Nyɔŋmɔ “Toobi lɛ lá lɛ mli” ni “amɛha eyɛ futaa” bɔni afee ni amɛye ŋwɛi kaa-kɛ-kwɛmɔ lɛ mli omanye.—Kpojiemɔ 7:14.
15. Toi krokomɛi lɛ ayi efa kɛyashɛ nɛgbɛ, ni enɛ yeɔ mɛni he odase?
15 Nibii agbɛjianɔtoo lɛ naagbee ni je shishi yɛ Jeŋmaji Abe lɛ naagbee yɛ 1914 lɛ baaa naagbee yɛ 1935 yɛ Tookwɛlɔ Kpakpa lɛ jwɛŋmɔ ni hereɔ mɔ yiwala ni egbala kɛba toi krokomɛi lɛ anɔ lɛ hewɔ. Etee nɔ aahu kɛbashi wɔ afi 1984 nɛɛ mli, ni naagbee lɛ baaba yɛ be mli ni agbe Maŋtsɛyeli shiɛmɔ nitsumɔ lɛ naa kwraa lɛ. Amrɔ nɛɛ mɛi ni jieɔ amɛhe kpo akɛ amɛfata toi krokomɛi lɛ akuu lɛ ahe yɛ Nuŋtsɔ lɛ Gbɛkɛnaashi Niyenii lɛ shishi lɛ ayibɔ ebote akpekpei abɔ mli, ni babaoo hu ni anyɛŋ akane amɛyibɔ nyiɛ gbɛ kɛmiiba kuu lɛ mli. Amrɔ nɛɛ amɛyi fa kwraa fe yibɔ ni ji 144,000 ni ahala ato momo, ni afo amɛhe husu, ni ato aha mɛi ni akɛ amɛ baa “toi atsu nɛɛ” ni akɛma shi aha mumɔŋ Israelbii lɛ mli, ni ji Tookwɛlɔ Kpakpa lɛ hefatalɔi niyelɔi yɛ eŋwɛi Maŋtsɛyeli lɛ mli lɛ. Nɛkɛ anɔkwasane nɛɛ yeɔ odase lolo akɛ amɛfataaa Tookwɛlɔ Kpakpa lɛ “asafoku bibioo” lɛ “toi atsu nɛɛ” mlibii lɛ ahe.—Luka 12:32.
16, 17. (a) Mɛni ji wekukpaa ni ka toi krokomɛi lɛ kɛ asafoku bibioo lɛ teŋ? (b) Yesu wiemɔi ni kɔɔ “kuu kome” ni amɛaatsɔmɔ he lɛ eba mli yɛ mɛɛ gbɛ nɔ?
16 Ani hiɛnɔkamɔi sɔrɔtoi nɛɛ—ŋwɛi hiɛnɔkamɔ kɛha toi ni yɔɔ “toi atsu nɛɛ” mli lɛ kɛ shikpɔŋ nɔ hiɛnɔkamɔ kɛha toi krokomɛi lɛ ni yɔɔ nyɛsɛɛ toi atsu nɛɛ mli lɛ—ená amɛ nɔ hewalɛ ni eha amɛgbala amɛteŋ tamɔ nɔ ni amɛkɛ amɛhe bɛ nɔ ko feemɔ? Nibii ni etee nɔ kɛjɛ afi 1935 lɛ haa hetoo, kɛ nɔmimaa akɛ, Dabi kwraa! Yesu, Tookwɛlɔ Kpakpa lɛ gba akɛ ebaŋ lɛ nakai, ejaakɛ etee nɔ ekɛɛ akɛ: “Ni toi lɛ fee kuu kome.” (Yohane 10:16) Wɔkadiɔ akɛ ekɛɛɛ akɛ, “Kuu kome yɛ toi atsu kome mli.” Shi eyɛ mli akɛ toi atsu sɔrɔtoi baanyɛ ahi shi moŋ, shi amɛbaana “kwɛlɔ kome,” ni mɔ nɛɛ bafeɔ Tookwɛlɔ kɛ Maŋtsɛ ni bɔi nɔ yeli kɛjɛ ŋwɛi kɛjɛ Jeŋmaji Abei Iɛ naagbee yɛ 1914 Iɛ. Nɔ ni kɛ anɔkwasane nɛɛ yaa pɛpɛɛpɛ lɛ, “toi” lɛ hiɛ nitsumɔ kome ni amɛ fɛɛ amɛbaatsu, ‘Maŋtsɛyeli lɛ he sanekpakpa Iɛ shiɛmɔ yɛ shikpɔŋ ni ayɔɔ nɔ lɛ fɛɛ nɔ ni akɛye jeŋmaji lɛ fɛɛ odase,’ dani je momo nɛɛ mli nibii agbɛjianɔtoo lɛ aba naagbee.—Mateo 24:14.
17 Toi krokomɛi lɛ nuuu he yɛ gbɛ ko kwraa nɔ akɛ ajie amɛ kɛjɛ asafoku bibioo lɛ he. Amɛ fɛɛ amɛfeɔ Tookwɛlɔ Kpakpa lɛ toi ni ji kuu kome lɛ. Toi krokomɛi lɛ naa miishɛɛ yɛ ekome ni amɛkɛ asafoku bibioo lɛ feɔ lɛ hewɔ, ni amɛbuɔ lɛ hegbɛ kpele ni amɛna akɛ amɛkɛ nakai wɔsɛɛ be maŋtsɛmɛi kɛ osɔfoi, ni amɛbaatsɔmɔ amɛshishibii yɛ Afii Akpe Maŋtsɛyeli lɛ mli lɛ aaasɔmɔ yɛ be kuku ko mli.
18. (a) Mɛni yɔɔ wɔsɛɛ be mli kɛha kpaŋmɔ hee lɛ kɛ toi ni afɔ amɛ mu ni yɔɔ “toi atsu nɛɛ” mli lɛ? (b) Mɛni gbɛ toi krokomɛi lɛ kpaa?
18 Kɛ yɛ Nyɔŋmɔ be ni sa mli lɛ mumɔŋ Israel shwɛɛnii lɛ gbe amɛshikpɔŋ nɔ nitsumɔ lɛ naa ni amɛshi koni amɛyahe amɛŋwɛi nyɔmɔwoo lɛ, kpaŋmɔ hee lɛ ni damɔ Teŋdamɔlɔ, Tookwɛlɔ Kpakpa, Yesu Kristo lá lɛ nɔ lɛ baaba naagbee ni etsuŋ nii dɔŋŋ, akɛni etsu eyiŋtoo he nii yɛ omanyeyeli mli hewɔ. Yɛ enɛ hewɔ lɛ Nuŋtsɔ lɛ Gbɛkɛnaashi Niyenii ni ayeɔ yɛ Hehoo Gbi Iɛ nɔ daa afi lɛ sɛɛ baafo. Kɛkɛ lɛ mumɔŋ Israel kuu lɛ ni ji “toi atsu nɛɛ” mlibii lɛ ehiŋ shi dɔŋŋ. Toi krokomɛi ni amɛjɔɔ amɛhe nɔ ni abaptisi amɛ lɛ baahi shikpɔŋ nɔ ni amɛyabote nakai Maŋtsɛyeli, ni Tookwɛlɔ Kpakpa, Yesu Kristo kɛ enanemɛi maŋtsɛmɛi kɛ osɔfoi 144,000 feɔ no lɛ jɔɔmɔi ni amɛaafɔse amɛshwie amɛnɔ lɛ mli. Toi krokomɛi lɛ ni amɛfee ekome lɛ pɛ baashwɛ yɛ shikpɔŋ ni atsumɔ nɔ lɛ nɔ akɛ too ku kome. Enɛ baaha amɛya nɔ amɛbo amɛ-Tookwɛlɔ kɛ Maŋtsɛ lɛ gbee toi, ni enɛ baaha amɛna naanɔ wala yɛ adesa gbɔmɔtso ni yeɔ emuu mli yɛ Paradeiso yɛ shikpɔŋ nɔ.a
[Shishigbɛ niŋmai]
a Ajie kɛjɛ February 15, 1984 Blɔfo Buu-Mɔɔ lɛ mli.
Ani Obaanyɛ Otsɔɔ Mli?
□ Mɛni tsɔɔ akɛ toi krokomɛi lɛ yɛ sɔrɔto yɛ asafoku bibioo lɛ he?
□ Kpojiemɔ 22:17 miiba mli ŋmɛnɛ yɛ mɛɛ gbɛ nɔ?
□ Mɛɛ be ni nɛgbɛ toi krokomɛi lɛ je shishi akɛ amɛaajie amɛhe kpo?
□ Akɛni toi krokomɛi lɛ yɛ ku kroko mli ni esoro no yɛ mɛi ni afɔ amɛ mu lɛ anɔ̃ lɛ he hu hewɔ lɛ, amɛfeɔ ku kome yɛ mɛɛ gbɛ nɔ?
[Mfoniri ni yɔɔ baafa 26]
Sane ni aŋma ‘Asafo Babaoo,’ yɛ 1935 lɛ ye bua ni ayoo “toi krokomɛi” lɛ
[Mfoniri ni yɔɔ baafa 28]
Beni “asafoku bibioo” lɛ tsɛmɔ bɛŋkɛ enaagbee lɛ, Yesu bua “toi krokomɛi” akuu ko naa