‘Yɛ Mumɔ Krɔŋkrɔŋ Lɛ Gbɛi Amli’
“No hewɔ lɛ nyɛyaa ni nyɛyafea jeŋmaji fɛɛ mikaselɔ, nyɛbaptisia amɛ nyɛwoa . . . mumɔ krɔŋkrɔŋ lɛ gbɛi amli.”—MATEO 28:19.
1. Mɛɛ wiemɔ hee Yohane Baptisilɔ lɛ kɛtsu nii ni kɔɔ mumɔ krɔŋkrɔŋ lɛ he?
YƐ WƆ Ŋmɛnɛŋmɛnɛ Beaŋ afi 29 lɛ, Yohane Baptisilɔ lɛ tsu nii yɛ Israel ni ekɛsaa gbɛ eto Mesia lɛ, ni yɛ esɔɔmɔ nitsumɔ lɛ mli lɛ, etswa mumɔ krɔŋkrɔŋ lɛ he nɔ hee ko he adafi. Yɛ anɔkwale mli lɛ, Yudafoi lɛ le nɔ ni Hebri Ŋmalɛi lɛ kɛɔ yɛ mumɔ lɛ he lɛ momo. Shi, ekolɛ amɛnaa baakpɛ amɛhe, beni Yohane kɛɛ: “Mi lɛ, nu mikɛbaptisiɔ nyɛ haa tsuitsakemɔ; shi mɔ ni baa yɛ misɛɛ lɛ . . . ekɛ mumɔ krɔŋkrɔŋ . . . aaabaptisi nyɛ.” (Mateo 3:11) ‘Mumɔ krɔŋkrɔŋ ni akɛaabaptisi’ lɛ fee shishinumɔ hee ko kwraa kɛha amɛ.
2. Mɛɛ wiemɔ hee ni kɔɔ mumɔ krɔŋkrɔŋ lɛ he Yesu kɛtsu nii?
2 Mɔ ni baa lɛ ji Yesu. Yesu kɛ mumɔ krɔŋkrɔŋ lɛ diɛŋtsɛ ebaptisiii mɔ ko yɛ eshikpɔŋ nɔ sɔɔmɔ nitsumɔ lɛ mli, eyɛ mli akɛ ewie mumɔ lɛ he shii abɔ. Kɛfata he hu lɛ, yɛ egbohiiashitee lɛ sɛɛ lɛ, esaa ewie mumɔ krɔŋkrɔŋ lɛ he ekoŋŋ yɛ gbɛ kroko nɔ. Ekɛɛ ekaselɔi lɛ akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli.” (Mateo 28:19) Wiemɔ “yɛ . . . gbɛi amli” lɛ shishi ji “yɛ . . . nɔkpɛlɛmɔ naa.” Nu mli baptisimɔ yɛ Tsɛ lɛ, kɛ Bi lɛ, kɛ mumɔ krɔŋkrɔŋ lɛ nɔkpɛlɛmɔ naa lɛ baafee sɔrɔto yɛ baptisimɔ yɛ mumɔ krɔŋkrɔŋ lɛ mli he. Eji wiemɔ hee ko kwraa hu ni kɔɔ mumɔ krɔŋkrɔŋ lɛ he.
Abaptisi yɛ Mumɔ Krɔŋkrɔŋ Mli
3, 4. (a) Mɛɛ be klɛŋklɛŋ baptisimɔi yɛ mumɔ krɔŋkrɔŋ lɛ mli lɛ ba mli? (b) Kɛ akɛ baptisimɔ lɛ fɔ afa lɛ, mɛɛ gbɛ nɔ mumɔ krɔŋkrɔŋ lɛ tsu nii yɛ Yesu kaselɔi lɛ anɔ yɛ Pentekoste afi 33 Ŋ.B.?
3 Yɛ baptisimɔ yɛ mumɔ krɔŋkrɔŋ lɛ mli lɛ gbɛfaŋ lɛ, dani eeekwɔ kɛya ŋwɛi lɛ, Yesu wo ekaselɔi lɛ ashi akɛ: “Shi nyɛ lɛ eyeŋ gbii pii ko ni akɛ mumɔ krɔŋkrɔŋ aaabaptisi nyɛ.” (Bɔfoi lɛ Asaji 1:5, 8) No sɛɛ be fioo mli lɛ, aha nakai shiwoo lɛ ba mli. Mumɔ krɔŋkrɔŋ kpeleke shi kɛba kaselɔi 120 ni ebua amɛhe naa yɛ ŋwɛitsu ko nɔ yɛ Yerusalem lɛ anɔ, beni Yesu jɛ ŋwɛi etsu eklɛŋklɛŋ baptisimɔi yɛ mumɔ krɔŋkrɔŋ mli lɛ ahe nii lɛ. (Bɔfoi lɛ Asaji 2:1-4, 33) Mɛni jɛ mli ba? Kaselɔi lɛ batsɔmɔ Kristo mumɔŋ gbɔmɔtso lɛ fa. Taakɛ bɔfo Paulo tsɔɔ mli lɛ, “mumɔ kome mli atsɔ abaptisi [amɛ] awo gbɔmɔtso kome mli.” (1 Korintobii 12:13) Yɛ nakai beaŋ nɔŋŋ lɛ, afɔ amɛ mu hu koni amɛtsɔmɔ wɔsɛɛ be mli maŋtsɛmɛi kɛ osɔfoi yɛ Nyɔŋmɔ ŋwɛi Maŋtsɛyeli lɛ mli. (Efesobii 1:13, 14; 2 Timoteo 2:12; Kpojiemɔ 20:6) Mumɔ krɔŋkrɔŋ lɛ batsu nii hu akɛ shishijee naasɔomɔ nɔ kɛ nakai wɔsɛɛ be mli gboshinii ni yɔɔ nyam lɛ he okadi, shi jeee fɛɛ nɛ.—2 Korintobii 1:21, 22.
4 Afii fioo ni tsɔ hiɛ lɛ, Yesu kɛɛ Nikodemo akɛ: “Kɛji ajɛɛɛ ŋwɛi afɔɔɔ mɔ ko lɛ, enyɛŋ Nyɔŋmɔ maŋtsɛyeli lɛ ena. . . . Kɛji ajɛɛɛ nu kɛ mumɔ mli afɔɔɔ mɔ ko lɛ, enyɛŋ Nyɔŋmɔ maŋtsɛyeli lɛ mli ebote.” (Yohane 3:3, 5) Amrɔ nɛɛ afɔ adesai 120 ekoŋŋ. Kɛtsɔ mumɔ krɔŋkrɔŋ lɛ nɔ lɛ, akpɛlɛ amɛnɔ akɛ Nyɔŋmɔ mumɔŋ bii, Kristo nyɛmimɛi. (Yohane 1:11-13; Romabii 8:14, 15) Nɛkɛ nitsumɔi nɛɛ fɛɛ ni mumɔ krɔŋkrɔŋ lɛ tsu lɛ yɛ naakpɛɛ yɛ gbɛi krɛdɛɛ nɔ fe naakpɛɛ nii foji kɛkɛ. Kɛfata he lɛ, nɔ ni tamɔɔɔ naakpɛɛ nii ni afee be ko lɛ, mumɔ krɔŋkrɔŋ lɛ sɛɛ efooo yɛ bɔfoi lɛ agbele sɛɛ, shi moŋ etee nɔ etsu nii aahu yɛ nɛkɛ gbɛ nɔ kɛbashi wɔgbii nɛɛ amli tɔŋŋ. Eji hegbɛ ni Yehowa Odasefoi ena akɛ amɛaaná Kristo gbɔmɔtso lɛ mlibii ni akɛ mumɔ ebaptisi amɛ lɛ amli naagbee bii lɛ yɛ amɛteŋ, ni mɛnɛɛmɛi sɔmɔɔ akɛ “tsulɔ anɔkwafo kɛ nilelɔ” koni eha amɛ mumɔŋ niyenii yɛ be ni sa mli.—Mateo 24:45-47.
Abaptisi “yɛ . . . Mumɔ Krɔŋkrɔŋ lɛ Gbɛi Amli”
5, 6. Yɛ mɛɛ gbɛ nɔ klɛŋklɛŋ baptisimɔi yɛ mumɔ krɔŋkrɔŋ mli lɛ tsa nɔ kɛtee nu mli baptisimɔ mli?
5 Shi nu mli baptisimɔ yɛ Tsɛ lɛ, kɛ Bi lɛ, kɛ mumɔ krɔŋkrɔŋ lɛ gbɛi amli ni awo shi yɛ he lɛ hu? Nakai klɛŋklɛŋ kaselɔi ni abaptisi amɛ yɛ mumɔ mli lɛ naaa nɛkɛ nu mli baptisimɔ nɛɛ eko. Amɛná Yohane nu mli baptisimɔ lɛ eko momo, ni akɛni enɛ sa Yehowa hiɛ yɛ nakai be pɔtɛɛ lɛ mli hewɔ lɛ, ehe ehiaaa ni asaa abaptisi amɛ ekoŋŋ. Shi yɛ Pentekoste yɛ afi 33 Ŋ.B. lɛ, susumai babaoo ni ebua amɛhe naa anine shɛ nu mli baptisimɔ hee lɛ nɔ. Mɛɛ gbɛ nɔ enɛ ba mli yɛ?
6 Nɔ ni fata mɛi 120 lɛ abaptisimɔ yɛ mumɔ krɔŋkrɔŋ mli lɛ he hu ji gbɛɛmɔ ko ni naa wa ni gbala mɛi pii ajwɛŋmɔ. Mɛnɛɛmɛi anaa kpɛ amɛhe akɛ amɛaanu ni kaselɔi lɛ miiwie lilɛii sɔrɔtoi, ni ji, maji anɔ wiemɔi sɔrɔtoi ni mɛi ni yɔɔ jɛmɛ lɛ nuɔ shishi. Bɔfo Petro gbala mli etsɔɔ amɛ akɛ nɛkɛ naakpɛɛ nii nɛɛ ji odaseyeli ni tsɔɔ akɛ Yesu, ni atee lɛ shi kɛjɛ gbohii ateŋ ni amrɔ nɛɛ eta Nyɔŋmɔ ninejurɔ nɔ yɛ ŋwɛi lɛ efɔse Nyɔŋmɔ mumɔ lɛ eshwie amɛnɔ. Petro wo etoibolɔi lɛ hewalɛ akɛ: “No hewɔ lɛ ha ni Israel we lɛ fɛɛ ale krɛdɛɛ akɛ Nyɔŋmɔ eŋɔ nɛkɛ Yesu ni nyɛsɛŋ lɛ nɛɛ efee Nuŋtsɔ kɛ Kristo fɛɛ.” Kɛkɛ ni emu ewiemɔ lɛ naa akɛ: “Nyɛtsakea nyɛtsuii amli ni nyɛteŋ mɔ fɛɛ mɔ aha abaptisi lɛ awo Yesu Kristo gbɛi amli, koni aŋɔ nyɛhe eshai lɛ afa nyɛ, ni nyɛaaná mumɔ krɔŋkrɔŋ nɔkee nɔ lɛ.” Susumai aaafee 3,000 here enɛ nɔ.—Bɔfoi lɛ Asaji 2:36, 38, 41.
7. Mɛɛ gbɛ nɔ abaptisi mɛi 3,000 ni abaptisi amɛ yɛ Pentekoste 33 Ŋ.B. lɛ yɛ Tsɛ lɛ, kɛ Bi lɛ, kɛ mumɔ krɔŋkrɔŋ lɛ gbɛi amli yɛ?
7 Ani abaanyɛ akɛɛ akɛ abaptisi mɛnɛɛmɛi yɛ Tsɛ lɛ, kɛ Bi lɛ, kɛ mumɔ krɔŋkrɔŋ lɛ gbɛi amli (yɛ amɛnɔkpɛlɛmɔ mli)? Hɛɛ. Eyɛ mli akɛ Petro ekɛɛɛ amɛ ni amɛha abaptisi amɛ yɛ Tsɛ lɛ gbɛi amli moŋ, shi amɛkpɛlɛɔ Yehowa nɔ momo akɛ Nuŋtsɔ Maŋtsɛ, ejaakɛ heloonaa Yudafoi ji amɛ, kɛ maŋ ni ejɔɔ amɛhe nɔ amɛha Lɛ lɛ mli bii. Petro kɛɛ akɛ: ‘Nyɛhaa abaptisia nyɛ yɛ Bi lɛ gbɛi amli.’ No hewɔ lɛ amɛbaptisimɔ lɛ feɔ kpɛlɛmɔ ni amɛkpɛlɛɔ Yesu nɔ akɛ Nuŋtsɔ kɛ Kristo lɛ he mfoniri. Agbɛnɛ amɛbatsɔmɔ ekaselɔi ni amɛkpɛlɛ nɔ akɛ kɛjɛ nakai beaŋ kɛyaa lɛ, amɛnaa eshaifaa kɛtsɔɔ enɔ. Yɛ naagbee lɛ, baptisimɔ lɛ ba mli yɛ mumɔ krɔŋkrɔŋ lɛ nɔkpɛlɛmɔ naa, ni atsu he nii yɛ shiwoo ni akɛha akɛ amɛnine baashɛ mumɔ lɛ nɔ yaka akɛ nikeenii lɛ mlibaa mli.
8. (a) Mɛɛ baptisimɔ kroko Kristofoi ni afɔ amɛ mu lɛ anine eshɛ nɔ kɛfata nu mli baptisimɔ hɛ? (b) Yɛ 144,000 lɛ asɛɛ lɛ, namɛi hu anine shɛɔ nu mli baptisimɔ nɔ yɛ mumɔ krɔŋkrɔŋ lɛ gbɛi amli?
8 Abaptisi mɛi ni abaptisi amɛ yɛ nu mli yɛ Pentekoste yɛ afi 33 Ŋ.B. lɛ hu yɛ mumɔ mli, ni afɔ amɛ mu akɛ wɔsɛɛ be mli maŋtsɛmɛi kɛ osɔfoi yɛ ŋwɛi Maŋtsɛyeli lɛ mli. Taakɛ Kpojiemɔ wolo lɛ tsɔɔ lɛ, mɛnɛɛmɛi ayifalɛ ji mɛi 144,000 pɛ. No hewɔ lɛ mɛi ni abaptisi amɛ yɛ mumɔ krɔŋkrɔŋ lɛ mli ni yɛ naagbee lɛ ‘asɔo amɛnaa’ akɛ Maŋtsɛyeli niyelɔi lɛ ayifalɛ ji 144,000 pɛ. (Kpojiemɔ 7:4; 14:1) Shi, abaptisiɔ kaselɔi heei fɛɛ—yɛ Tsɛ lɛ, kɛ Bi lɛ, kɛ mumɔ krɔŋkrɔŋ lɛ gbɛi amli—ni amɛ wɔsɛɛ hiɛnɔkamɔ kɔɔɔ he eko. (Mateo 28:19, 20) No hewɔ lɛ, belɛ mɛni baptisimɔ yɛ mumɔ krɔŋkrɔŋ lɛ gbɛi amli lɛ tsɔɔ kɛhaa Kristofoi fɛɛ mɔ, kɛji amɛji “asafokuu bibioo” lɛ aloo “tooi krokomɛi” lɛ ateŋ mɛi komɛi? (Luka 12:32; Yohane 10:16) Dani wɔɔha no hetoo lɛ, nyɛhaa wɔkadia nitsumɔi ni mumɔ lɛ tsu yɛ Kristofoi abeaŋ lɛ ekomɛi.
Mumɔ lɛ Yibii Lɛ
9. Mɛɛ mumɔ krɔŋkrɔŋ lɛ nitsumɔ ko he hiaa kɛhaa Kristofoi fɛɛ?
9 Mumɔ krɔŋkrɔŋ lɛ nitsumɔ ko ni he hiaa ji yelikɛbuamɔ ni ekɛhaa wɔ ni wɔkɛnaa Kristofoi asui. Eji anɔkwale, akɛni wɔyeee emuu hewɔ lɛ, wɔnyɛŋ wɔkpa esha feemɔ. (Romabii 7:21-23) Shi kɛ wɔkɛ anɔkwayeli tsake wɔtsui lɛ, Yehowa kɛkeɔ wɔ kɛtsɔɔ Kristo afɔleshaa lɛ nɔ. (Mateo 12:31, 32; Romabii 7:24, 25; 1 Yohane 2:1, 2) Kɛfata he lɛ, Yehowa kpaa wɔ gbɛ hu akɛ wɔɔwuu wɔshi wɔhenumɔ ni haa wɔfeɔ esha lɛ, ni mumɔ krɔŋkrɔŋ lɛ yeɔ ebuaa wɔ ni wɔfeɔ enɛ. Paulo kɛɛ: “Nyɛnyiɛa yɛ mumɔ naa, ni nyɛfeŋ heloo akɔnɔi lɛ anaa nii.” (Galatabii 5:16) Paulo tee nɔ etsɔɔ akɛ mumɔ lɛ baanyɛ awo yibii ni ji sui kpakpai ni hi fe fɛɛ yɛ wɔmli. Eŋma akɛ: “Mumɔ lɛ yibii ji suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, henɔyeli.”—Galatabii 5:22, 23, New World Translation.
10. Mɛɛ gbɛ nɔ mumɔ lɛ yibii lɛ jeɔ kpo yɛ Kristofonyo mli?
10 Mɛɛ gbɛ nɔ mumɔ lɛ tsɔɔ ni ehaa Kristofonyo nyɛɔ ewoɔ yibii ni tamɔ nɛkɛ? Ebaaa lɛ trukaa kɛkɛ akɛni wɔji Kristofoi ni ejɔɔ amɛhe nɔ ni abaptisi amɛ lɛ hewɔ. Esa akɛ wɔtsu nii dani wɔna. Shi kɛ wɔkɛ Kristofoi krokomɛi ni jieɔ nɛkɛ su nɛɛ kpo bɔɔ, ni wɔsɔle wɔha Nyɔŋmɔ kɛha emumɔ lɛ koni eye ebua wɔ ni wɔnyɛ wɔna sui krɛdɛɛi komɛi, ni wɔtsi wɔhe kɛjɛ naanyobɔɔ fɔŋ he ni wɔkase Biblia lɛ kɛha ŋaawoo kɛ nɔkwɛmɔ nii kpakpai lɛ, no lɛ mumɔ lɛ yibii lɛ baada yɛ wɔmli.—Abɛi 13:20; 1 Korintobii 15:33; Galatabii 5:24-26; Hebribii 10:24, 25.
Mumɔ krɔŋkrɔŋ lɛ Ehala Amɛ
11. Mumɔ krɔŋkrɔŋ lɛ halaa onukpai lɛ yɛ mɛɛ gbɛ nɔ?
11 Beni Paulo kɛ onukpai ni jɛ Efeso lɛ wieɔ lɛ, etsi mumɔ krɔŋkrɔŋ lɛ nitsumɔ kroko ta beni ekɛɛ akɛ: “No hewɔ lɛ nyɛlea nyɛhe nɔ kwɛmɔ kɛ tooikuu lɛ fɛɛ ni mumɔ krɔŋkrɔŋ lɛ ewo nyɛ amɛnɔkwɛlɔi lɛ, koni nyɛlɛ Nyɔŋmɔ asafo lɛ ni ekɛ lɛ diɛŋtsɛ e-Bi lɛ la he lɛ.” (Bɔfoi lɛ Asaji 20:28, NW) Hɛɛ, mumɔ krɔŋkrɔŋ lɛ halaa asafo nɔkwɛlɔi, loo onukpai lɛ. Yɛ mɛɛ gbɛ nɔ? Kɛ shishinumɔ akɛ esa akɛ onukpai ni ahalaa amɛ lɛ ashɛ taomɔ nii ni atsɔɔ yɛ Biblia ni jɛ mumɔŋ lɛ mli lɛ ahe. (1 Timoteo 3:1-13; Tito 1:5-9) Amɛbaanyɛ amɛna nakai hesaai lɛ kɛtsɔ mumɔ krɔŋkrɔŋ lɛ yelikɛbuamɔ pɛ nɔ. Kɛfata he lɛ, onukpai akuu ni jieɔ onukpa hee ko yi lɛ sɔleɔ kɛhaa mumɔ krɔŋkrɔŋ lɛ gbɛtsɔɔmɔ bɔni afee ni amɛnyɛ amɛna kɛji eshɛɔ hesaai lɛ ahe aloo eshɛɛɛ he. Ni atsuɔ halamɔ lɛ diɛŋtsɛ he nii yɛ tsulɔ anɔkwafo kɛ nilelɔ ni akɛ mumɔ efɔ lɛ mu lɛ nɔkwɛmɔ shishi.
Ha Mumɔ lɛ Akudɔ Bo
12. Te aaafee tɛŋŋ ni mumɔ lɛ aaanyɛ atsɔ Biblia lɛ nɔ ana wɔnɔ hewalɛ?
12 Kristofoi kpɛlɛɔ nɔ akɛ aŋmala Ŋmalɛi Krɔŋkrɔŋi lɛ yɛ mumɔ krɔŋkrɔŋ lɛ hewalɛ shishi. No hewɔ lɛ, amɛpɛiɔ mli jogbaŋŋ kɛhaa nilee ni jɛ mumɔŋ, tamɔ Yehowa Odasefoi ni tsɔ Kristofoi abe lɛ hiɛ lɛ ji lɛ. (Abɛi 2:1-9) Amɛkaneɔ, ni amɛjwɛŋɔ nɔ, ni amɛhaa ekudɔɔ amɛshihilɛi (Lala 1:1-3; 2 Timoteo 3:16) No hewɔ lɛ mumɔ lɛ yeɔ ebuaa amɛ ni ‘amɛtaoɔ Nyɔŋmɔ nibii ni mli kwɔlɔ lɛ amli.’ (1 Korintobii 2:10, 13; 3:19) Gbɛtsɔɔmɔ ni ekɛhaa Nyɔŋmɔ tsuji yɛ nɛkɛ gbɛ nɔ lɛ ji Nyɔŋmɔ mumɔ lɛ nitsumɔ ko ni he hiaa waa kɛha wɔbe nɛɛ.
13, 14. Mɛni Yesu kɛtsu naagbai ahe nii yɛ asafo lɛ mli, ni yɛ mɛɛ gbɛ nɔ efeɔ nakai nɔŋŋ ŋmɛnɛ?
13 Kɛfata he lɛ, yɛ Kpojiemɔ wolo lɛ mli lɛ, Yesu ni atee lɛ shi lɛ kɛ shɛɛ saji maje kɛyaha asafoi kpawo ni yɔɔ Asia Bibioo lɛ. (Kpojiemɔ, yitsei 2 kɛ 3) Ejie lɛ kpo yɛ woji lɛ amli akɛ eyakwɛ bɔ ni asafoi lɛ yɔɔ ni eyoo bɔ ni amɛmumɔŋ shihilɛ ji. Ena akɛ mɛi komɛi miifee hemɔkɛyeli he nɔkwɛmɔ nɔ kpakpa. Yɛ ekrokomɛi amli hu lɛ, onukpai lɛ eŋmɛ gbɛ ni mligbalamɔ kui, jeŋba shara, kɛ kulɔkulɔfeemɔ efite tooiku lɛ. Asafo ni yɔɔ Sarde lɛ egbo yɛ mumɔŋ, ja emli susumai anɔkwafoi fioo ní eshwɛ lɛ kɛkɛ. (Kpojiemɔ 3:1, 4) Mɛɛ gbɛ nɔ Yesu tsu naagbai nɛɛ ahe nii yɛ? Ekɛ mumɔ krɔŋkrɔŋ lɛ tsu he nii. Beni ekɛ ŋaawoo haa asafoi kpawo lɛ, Yesu mu eshɛɛ saji lɛ eko fɛɛ eko naa kɛ nɛkɛ wiemɔi nɛɛ: “Mɔ ni yɔɔ toi lɛ, ha ni enu nɔ ni mumɔ lɛ kɛɔ asafoi lɛ.”—Kpojiemɔ 2:7, 11, 17, 29; 3:6, 13, 22.
14 Ŋmɛnɛ hu, Yesu kwɛɔ bɔ ni asafoi lɛ yɔɔ. Ni kɛji eyoo akɛ naagbai yɛ lɛ, eyaa nɔ etsuɔ amɛhe nii kɛtsɔɔ mumɔ krɔŋkrɔŋ lɛ nɔ. Mumɔ lɛ baanyɛ aye abua wɔ ni wɔyoo naagbai ni wɔye nɔ yɛ gbɛ pɔtɛɛ nɔ kɛtsɔ wɔ Biblia lɛ kanemɔ nɔ. Yelikɛbuamɔ hu baanyɛ ajɛ Biblia kasemɔ he woji ni tsulɔ anɔkwafo kɛ nilelɔ ni akɛ mumɔ efɔ lɛ mu lɛ ŋmalaa lɛ amli. Aloo ebaanyɛ ejɛ onukpai ni akɛ mumɔ ehala amɛ ni yɔɔ asafo lɛ mli lɛ aŋɔɔ. Bɔ fɛɛ bɔ ni eji lɛ, kɛji akɛ ŋaawoo lɛ miiha aŋkroaŋkroi jio, akɛmiiha asafo muu lɛ fɛɛ jio, ani wɔboɔ wiemɔ ni Yesu wie akɛ: “Mɔ ni yɔɔ toi lɛ, ha ni enu nɔ ni mumɔ lɛ kɛɔ” lɛ toi?
Mumɔ lɛ kɛ Shiɛmɔ Nitsumɔ Lɛ
15. Mɛɛ gbɛ nɔ mumɔ lɛ tsu nii yɛ Yesu gbɛfaŋ yɛ shiɛmɔ nitsumɔ lɛ mli?
15 Be ko ni Yesu shiɛ yɛ kpeehe ko mli yɛ Nazaret lɛ, etsɔɔ mumɔ lɛ nitsumɔ kroko hu. Nɔ ni aŋma afɔ shi lɛ kɛɔ wɔ akɛ: “Ni beni egbele wolo lɛ mli lɛ, ena he ni aŋma yɛ akɛ: ‘Nuŋtsɔ lɛ [Yehowa] mumɔ lɛ yɛ minɔ, no hewɔ lɛ efɔ mi mu, koni mijaje sanekpakpa lɛ mitsɔɔ ohiafoi; ni etsu mi koni mibatsa mɛi ni amɛtsuii ekumɔ lɛ, koni mishiɛ heyeli mitsɔɔ nomii lɛ, kɛ hiŋmɛigbelemɔ ha shwilafoi, koni miŋmɛɛ pilafoi lɛ ahe ni amɛye amɛhe.’ Ni ebɔi amɛ kɛɛmɔ akɛ: ‘Ŋmɛnɛ, ŋmalɛ nɛɛ eba mli yɛ nyɛtoiiaŋ.’” (Luka 4:17, 18, 21; Yesaia 61:1, 2) Hɛɛ, mumɔ krɔŋkrɔŋ lɛ fɔ Yesu mu koni eshiɛ sanekpakpa lɛ.
16. Yɛ mɛɛ gbɛ nɔ mumɔ krɔŋkrɔŋ lɛ na gbɛfaŋnɔ babaoo yɛ sanekpakpa lɛ shiɛmɔ mli, yɛ klɛŋklɛŋ afii oha lɛ mli?
16 Beni eshwɛ fioo ni ebaagbo lɛ, Yesu gba shiɛmɔ he tafaa kpele ko ni esɛɛnyiɛlɔi lɛ baatsu lɛ he sane efɔ shi. Ekɛɛ: “Ni ja ashiɛ sanekpakpa lɛ atsɔɔ jeŋmaji fɛɛ da.” (Marko 13:10) Nɛkɛ wiemɔi nɛɛ ná amɛ klɛŋklɛŋ mlibaa yɛ klɛŋklɛŋ afii oha lɛ mli, ni gbɛfaŋnɔ ni mumɔ krɔŋkrɔŋ lɛ ná yɛ mli lɛ sa kadimɔ jogbaŋŋ. Mumɔ krɔŋkrɔŋ ji nɔ ni tsɔɔ Filipo gbɛ ni eyashiɛ etsɔɔ Etiopia piafonyo lɛ. Mumɔ krɔŋkrɔŋ lɛ tsɔɔ Petro gbɛ kɛtee Kornelio ŋɔɔ, ni mumɔ krɔŋkrɔŋ lɛ kɛ famɔ ha akɛ atsu Paulo kɛ Barnaba kɛjɛ Antiokia kɛya akɛ bɔfoi. Yɛ sɛɛ mli, beni Paulo taoɔ eshiɛ yɛ Asia kɛ Bitinia lɛ, mumɔ krɔŋkrɔŋ lɛ tsi enaa yɛ gbɛ ko nɔ. Nyɔŋmɔ miitao ni odaseyeli nitsumɔ lɛ ayashɛ Europa.—Bɔfoi lɛ Asaji 8:29; 10:19; 13:2; 16:6, 7.
17. Yɛ mɛɛ gbɛ nɔ mumɔ krɔŋkrɔŋ lɛ naa gbɛfaŋnɔ yɛ shiɛmɔ nitsumɔ lɛ mli ŋmɛnɛ?
17 Ŋmɛnɛ hu, mumɔ krɔŋkrɔŋ lɛ miiye kɛmiibua shiɛmɔ nitsumɔ lɛ waa diɛŋtsɛ. Yɛ Yesaia 61:1, 2 mlibaa ni mli lɛɛ naa lɛ, Yehowa mumɔ lɛ efɔ Yesu nyɛmimɛi lɛ mu koni amɛshiɛ. Yɛ Marko 13:10 naagbee mlibaa naa lɛ, nɛkɛ mɛi ni afɔ amɛ mu, ni asafo babaoo lɛ yeɔ buaa amɛ lɛ, eshiɛ sanekpakpa lɛ yɛ “jeŋmaŋ fɛɛ jeŋmaŋ” mli diɛŋtsɛ. (Kpojiemɔ 7:9) Ni mumɔ lɛ fiɔ amɛ fɛɛ amɛsɛɛ yɛ enɛ mli. Taakɛ eji yɛ klɛŋklɛŋ afii oha lɛ mli lɛ, egbeleɔ shikpɔŋkukuji anaa ni ekudɔɔ nitsumɔ lɛ fɛɛ hiɛyaa. Ewajeɔ aŋkroaŋkroi, ni eyeɔ ebuaa amɛ ni amɛyeɔ gbeyeishemɔ nɔ ni amɛhaa ŋaa gbɛi ni amɛkɛtsɔɔ nii lɛ yaa hiɛ. Kɛfata he lɛ, Yesu kɛɛ ekaselɔi lɛ akɛ: “Ni lumɛi kɛ maŋtsɛmɛi ahiɛ tete po akɛ nyɛ aaatee yɛ mihewɔ, koni aŋɔye amɛ kɛ jeŋmaji lɛ odase. Shi kɛ amɛŋɔ nyɛ kɛtee lɛ, nyɛkahaoa nyɛhe yɛ bɔ ni aloo nɔ ni nyɛaakɛɛ hewɔ . . . , ejaakɛ jeee nyɛ ji mɛi ni wieɔ lɛ, shi moŋ nyɛ-Tsɛ lɛ mumɔ lɛ wieɔ yɛ nyɛmli.”—Mateo 10:18-20.
18, 19. Yɛ mɛɛ gbɛ nɔ mumɔ lɛ fataa ayemforo lɛ he ni akɛfɔ̃ɔ mɛi ni yɔɔ mlijɔlɛ tsui lɛ anine ni ‘amɛbayɛ wala nu lɛ yaka’?
18 Biblia lɛ maa bɔ ni mumɔ krɔŋkrɔŋ lɛ yeɔ ebuaa yɛ shiɛmɔ nitsumɔ lɛ mli lɛ nɔ mi ekoŋŋ, yɛ Kpojiemɔ wolo lɛ mli. Jɛmɛ bɔfo Yohane bɔ amaniɛ yɛ akɛ: “Ni mumɔ lɛ kɛ ayemforo lɛ kɛɔ akɛ: ‘Ba!’ Ni mɔ ni nuɔ lɛ, ha ni ekɛɛ: ‘Ba!’ Ni mɔ ni kumai yeɔ lɛ lɛ, ha ni eba; ni mɔ ni sumɔɔ lɛ ha ni ebayɛ wala nu lɛ yaka.” (Kpojiemɔ 22:17) Ayemforo lɛ, ni akɛ mɛi 144,000 lɛ ateŋ shwɛɛnii ni yɔɔ shikpɔŋ nɔ lolo lɛ feɔ amɛhe mfoniri lɛ, fɔ̃ɔ mɔ fɛɛ mɔ nine ni ebayɛ wala nu lɛ yaka. Shi kadimɔ akɛ, mumɔ krɔŋkrɔŋ lɛ hu kɛɔ akɛ “Ba!” Yɛ mɛɛ gbɛ nɔ?
19 Kɛ shishinumɔ akɛ shɛɛ sane ni ayemforo kuu lɛ shiɛɔ—ni ŋmɛnɛ, asafo babaoo ni ji tooi krokomɛi lɛ yeɔ buaa amɛ lɛ—jɛ Biblia lɛ, ni aŋma yɛ mumɔ krɔŋkrɔŋ lɛ kudɔmɔ shishi lɛ mli. Ni nakai mumɔ lɛ nɔŋŋ egbele ayemforo kuu lɛ tsuii kɛ amɛjwɛŋmɔi amli bɔni afee ni amɛnyɛ amɛnu Wiemɔ ni jɛ mumɔŋ lɛ shishi ni amɛgbala mli amɛtsɔɔ mɛi krokomɛi. Mɛi ni abaptisiɔ amɛ akɛ Yesu Kristo kaselɔi heei lɛ naa miishɛɛ akɛ amɛaayɛ wala nu lɛ yaka. Ni amɛmli filiɔ amɛ akɛ amɛkɛ mumɔ lɛ kɛ ayemforo lɛ aaafee ekome kɛkɛɛ mɛi krokomɛi hu akɛ “Ba!” Ni ŋmɛnɛ, mɛi fe akpekpei ejwɛ fataa mumɔ lɛ he yɛ nɛkɛ nitsumɔ nɛɛ mli.
Ni Wɔɔhi Shi yɛ Wɔbaptisimɔ lɛ Naa
20, 21. Mɛɛ gbɛ nɔ wɔɔtsɔ wɔhi shi yɛ wɔbaptisimɔ yɛ mumɔ krɔŋkrɔŋ lɛ gbɛi amli lɛ naa, ni te esa akɛ wɔbu baptisimɔ nɛɛ wɔha tɛŋŋ?
20 Baptisimɔ yɛ mumɔ krɔŋkrɔŋ lɛ gbɛi amli ji jajemɔ ni wɔjajeɔ yɛ faŋŋ mli akɛ wɔyɔseɔ mumɔ krɔŋkrɔŋ lɛ ni wɔkpɛlɛɔ gbɛfaŋnɔ ni eyɔɔ yɛ Yehowa yiŋtoi amli lɛ nɔ. Etsɔɔ akɛ wɔkɛ mumɔ lɛ baafee ekome kɛtsu nii, ni wɔfeŋ nɔ ko ni baatsi enitsumɔ yɛ Yehowa webii ateŋ lɛ naa kɔkɔɔkɔ. No hewɔ lɛ, wɔkpɛlɛɔ tsulɔ anɔkwafo kɛ nilelɔ kuu lɛ nɔ ni wɔkɛ amɛ feɔ ekome kɛtsuɔ nii. Wɔkɛ onukpai agbɛjianɔtoo ni yɔɔ asafo lɛ mli lɛ hu feɔ ekome. (Hebribii 13:7, 17; 1 Pɛtro 5:1-4) Wɔhiɔ shi yɛ mumɔŋ nilee naa, shi jeee yɛ heloonaa, ni wɔŋmɛɔ mumɔ lɛ gbɛ ni etsakeɔ wɔsu kɛ baŋ, ni ehaa etamɔɔ Kristo nɔ lɛ. (Romabii 13:14) Ni wɔkɛ wɔtsui muu fɛɛ fataa mumɔ lɛ kɛ ayemforo lɛ he kɛkɛɔ mɛi akpekpei abɔ ni yɔɔ lolo ni baahere nɔ lɛ akɛ “Ba!”
21 Kwɛ bɔ ni eji hiɛdɔɔ sane akɛ aaabaptisi mɔ ko ‘yɛ mumɔ krɔŋkrɔŋ lɛ gbɛi amli’! Ni kɛlɛ, mɛɛ jɔɔmɔi baanyɛ ajɛ mli aba nɛkɛ! Eba akɛ mɛi ni abaptisiɔ amɛ nakai lɛ ayi baaya nɔ afa babaoo. Ni eba akɛ wɔteŋ mɔ fɛɛ mɔ baaya nɔ ahi shi yɛ nakai baptisimɔ lɛ shishinumɔ naa, beni wɔsɔmɔɔ Yehowa ni wɔyaa nɔ wɔhaa ‘wɔmumɔ he dɔɔ la’ lɛ.—Romabii 12:11.
Mɛni Okaiɔ yɛ Mumɔ Krɔŋkrɔŋ lɛ he?
◻ Mɛɛ gbɛi anɔ mumɔ krɔŋkrɔŋ tsu nii yɛ, yɛ Pentekoste afi lɛ 33 Ŋ.B.?
◻ Mɛɛ gbɛ wɔɔtsɔ nɔ wɔwo mumɔ lɛ yibii lɛ?
◻ Mɛɛ gbɛ nɔ mumɔ krɔŋkrɔŋ lɛ halaa onukpai lɛ yɛ?
◻ Mɛɛ gbɛ nɔ Yesu tsɔɔ mumɔ krɔŋkrɔŋ lɛ nɔ etsuɔ naagbai ahe nii yɛ asafo lɛ mli?
◻ Yɛ mɛɛ gbɛ nɔ mumɔ lɛ naa gbɛfaŋnɔ nɔ yɛ shiɛmɔ nitsumɔ lɛ mli?
[Mfoniri ni yɔɔ baafa 15]
Baptisimɔ ni Petro shiɛ lɛ hu yɛ Tsɛ lɛ kɛ mumɔ krɔŋkrɔŋ lɛ gbɛi amli
[Mfoniri ni yɔɔ baafa 17]
Mumɔ lɛ naa gbɛfaŋnɔ babaoo yɛ sanekpakpa lɛ shiɛmɔ mli