Bɔfoi Lɛ Anitsumɔi
20 Be ni basabasafeemɔ lɛ sɛɛ fo lɛ, Paulo tsu ni ayatsɛ kaselɔi lɛ kɛba, ni be ni ewo amɛ hewalɛ sɛɛ lɛ, ekɛ amɛ ye shɛɛ, ni eje egbɛfãa kɛmiiya Makedonia lɛ shishi. 2 Be ni eyatsɔ nakai kpokpai lɛ anɔ ni ekɛ wiemɔi babaoo wo mɛi ni yɔɔ jɛmɛ lɛ hewalɛ lɛ, eba Grees. 3 Eye nyɔji etɛ yɛ jɛmɛ, shi be ni eeba ebakwɔ lɛlɛ kɛya Siria lɛ, akɛni Yudafoi lɛ etsɔ ŋaa yɛ ehe hewɔ lɛ,+ efee ejwɛŋmɔ akɛ ebaaku esɛɛ eyatsɔ Makedonia. 4 No mli lɛ, mɛi ni fata ehe kɛtee ji Sopatre, ni ji Piros ni jɛ Beroia lɛ binuu lɛ, kɛ Aristarko+ kɛ Sekundo ni ji Tesalonikabii lɛ, kɛ Gaio ni jɛ Derbe lɛ, kɛ Timoteo,+ kɛ Tihiko+ kɛ Trofimo+ ni jɛ Asia kpokpaa lɛ nɔ lɛ. 5 Hii nɛɛ tsɔ hiɛ ni amɛyamɛ wɔ yɛ Troia; 6 shi Blodo Ni Ashikishaŋ-sha* Bɛ Mli Gbi Jurɔ lɛ gbii lɛ asɛɛ lɛ,+ wɔwo lɛlɛ kɛjɛ Filipi, ni gbii enumɔ mli lɛ, wɔbashɛ amɛŋɔɔ yɛ Troia, ni wɔye gbii kpawo yɛ jɛmɛ.
7 Otsi lɛ mli klɛŋklɛŋ gbi lɛ nɔ lɛ, be ni wɔbua wɔhe naa koni wɔye nii* lɛ, Paulo kɛ amɛ bɔi wiemɔ, ejaakɛ enɔ jetsɛremɔ lɛ ebaashi; ni ewie aahu kɛyashi nyɔɔŋteŋ. 8 No mli lɛ, asu kanei pii yɛ ŋwɛi asa lɛ nɔ he ni wɔbua wɔhe naa yɛ lɛ. 9 Be ni Paulo kã he ewieɔ lɛ, no mli lɛ oblanyo ko ni atsɛɔ lɛ Eutiko lɛ ta samfɛlɛ lɛ naa, ni wɔ ni tsii loo lɛ, ni wɔ ni ewɔ vii lɛ sɔŋŋ hã ekpɔ kɛjɛ ŋwɛitsu lɛ nsɔɔdo ni ji etɛ* lɛ nɔ ebagbee shi, ni ayawó lɛ ni egbo. 10 Shi Paulo kpeleke shi, ni eyabu enɔ ni efua lɛ+ ni ekɛɛ: “Nyɛkayea awerɛho, ejaakɛ ehiɛ kã.”*+ 11 Kɛkɛ ni ekwɔ kɛba ekoŋŋ ni ebaje niyeli lɛ shishi* ni eye nii. Etee nɔ egba sane aahu kɛyashi je tsɛre, kɛkɛ ni eshi etee. 12 No hewɔ lɛ, amɛkɛ gbekɛ nuu lɛ tee ni ehiɛ kã, ni enɛ hã amɛmii shɛ amɛhe waa.
13 Agbɛnɛ wɔtsɔ hiɛ kɛtee meele lɛ mli ni wɔfã kɛtee Aso, shi Paulo lɛ, ekpɛ eyiŋ akɛ ebaanyiɛ kɛya jɛmɛ. Ni wɔto wɔyiŋ akɛ wɔbaawó lɛ yɛ jɛmɛ, ejaakɛ efã wɔ akɛ wɔfee nakai. 14 No hewɔ lɛ, be ni ebanina wɔ yɛ Aso lɛ, wɔwo lɛ, ni wɔyi mli kɛtee Mitilene. 15 Ni enɔ jetsɛremɔ lɛ, wɔkɛ meele shi jɛmɛ, ni wɔyashɛ Kio koŋ nɔ, shi enɔ jetsɛremɔ ekoŋŋ lɛ, wɔyawa fioo yɛ Samo, ni enɔ jetsɛremɔ lɛ wɔyashɛ Mileto. 16 No mli lɛ, Paulo ekpɛ eyiŋ akɛ ekɛ meele lɛ baatsɔ Efeso+ he kɛho koni ekaye be yɛ Asia kpokpaa lɛ nɔ, ejaakɛ eeye oyai koni kɛ́ ebaahi lɛ, eyashɛ Yerusalem+ yɛ Pentekoste Gbi Jurɔ lɛ nɔ.
17 Shi ejɛ Mileto ekɛ wiemɔ tsu kɛtee Efeso koni ayatsɛ asafo lɛ mli onukpai lɛ kɛba. 18 Be ni amɛba eŋɔɔ lɛ, ekɛɛ amɛ akɛ: “Nyɛle bɔ ni mifee minii mihã yɛ nyɛteŋ kɛjɛ klɛŋklɛŋ gbi ni miba Asia kpokpaa lɛ nɔ lɛ nɔ,+ 19 akɛ mijɛ heshibaa fɛɛ* mli misɔmɔ Nuŋtsɔ lɛ akɛ nyɔŋ+ kɛ yaafonui, ni mina nɔ babaoo yɛ Yudafoi lɛ aŋaatsɔi lɛ hewɔ, 20 ni nakai be lɛ mli nɔŋŋ lɛ, mishashaooo shi akɛ makɛɛ nyɛ nibii ni he yɔɔ sɛɛnamɔ* lɛ ni agbɛnɛ hu matsɔɔ nyɛ nii yɛ maŋ+ kɛ shĩa fɛɛ shĩa.+ 21 Shi moŋ miye odase fitsofitso mitsɔɔ Yudafoi kɛ Greekbii fɛɛ akɛ amɛtsake amɛtsui+ ni amɛba Nyɔŋmɔ ŋɔɔ, ni amɛhe wɔ-Nuŋtsɔ Yesu nɔ amɛye.+ 22 Ni agbɛnɛ, naa! akɛni mumɔ lɛ miinyɛ minɔ* hewɔ lɛ, miiya Yerusalem, shi mileee nɔ ni baaba minɔ yɛ jɛmɛ, 23 akɛ ja nɔ ni mumɔ krɔŋkrɔŋ lɛ yeɔ mi odase shii abɔ yɛ maŋ fɛɛ maŋ nɔ akɛ tsuŋwoo kɛ amanehului miimɛ mi lɛ.+ 24 Shi mibuuu mi diɛŋtsɛ miwala* akɛ nɔ ko ni he hiaa kɛhã mi,* bɔ ni afee ni magbe mifoidamɔ+ kɛ sɔɔmɔ ni miná kɛjɛ Nuŋtsɔ Yesu dɛŋ, akɛ miye Nyɔŋmɔ dromɔ lɛ he sane kpakpa lɛ he odase fitsofitso lɛ naa.
25 “Ni agbɛnɛ, naa! mile akɛ nyɛ mɛi fɛɛ ni mishiɛ Maŋtsɛyeli lɛ yɛ nyɛteŋ lɛ ateŋ mɔ ko mɔ ko enaŋ mihiɛ dɔŋŋ. 26 No hewɔ lɛ, ŋmɛnɛ gbi nɛɛ, miitsɛ nyɛ ni nyɛbaye mihe odase akɛ miyeee gbɔmɔ ko gbɔmɔ ko lá yi sɔ̃,+ 27 ejaakɛ mijaje Nyɔŋmɔ yiŋtoi lɛ fɛɛ mitsɔɔ nyɛ, ni mikɛ nɔ ko eteee nyɛ.+ 28 Nyɛhiɛ ahia nyɛ diɛŋtsɛ nyɛhe nɔ+ kɛ tooku lɛ hu fɛɛ nɔ, mɛi ateŋ ni mumɔ krɔŋkrɔŋ lɛ ehole nyɛ nɔkwɛlɔi yɛ lɛ,+ koni tamɔ bɔ ni tookwɛlɔ kwɛɔ etoi lɛ, nyɛ hu nyɛkwɛa Nyɔŋmɔ asafo+ lɛ ni ekɛ lɛ diɛŋtsɛ e-Bi lɛ lá hé lɛ.+ 29 Mile akɛ kɛ́ mishi mitee lɛ, ŋa mli gbei ni yitseiaŋ wala baabote nyɛteŋ+ ni amɛkɛ suɔmɔ ehiɛŋ tooku lɛ, 30 ni hii baate shi yɛ nyɛ diɛŋtsɛ nyɛteŋ, ni amɛbaawie saji kɔɔdɔji ni amɛkɛloo kaselɔi lɛ kɛnyiɛ amɛ diɛŋtsɛ amɛsɛɛ.+
31 “No hewɔ lɛ, nyɛyaa nɔ nyɛshia kpe, ni nyɛhãa ehia nyɛjwɛŋmɔ mli akɛ, mitee nɔ mikɛ yaafonui wie mitsɔɔ nyɛteŋ mɔ fɛɛ mɔ jenamɔ kɛ jetsɛremɔ afii etɛ sɔŋŋ,+ ni mikpaaa. 32 Ni amrɔ nɛɛ, miitu nyɛ miiwo Nyɔŋmɔ kɛ edromɔ lɛ he wiemɔ lɛ dɛŋ, wiemɔ ni baanyɛ atswa nyɛ ama shi ni ehã nyɛná gboshinii lɛ yɛ mɛi krɔŋkrɔŋi lɛ fɛɛ ateŋ lɛ.+ 33 Mihiɛ ekɔ̃ko mɔ ko jwiɛtɛi loo shika tsuru loo atade nɔ.+ 34 Nyɛ diɛŋtsɛ nyɛle akɛ nibii ni he hiaa mi kɛ mɛi ni kɛ mi yɔɔ lɛ, nɛkɛ niji nɛɛ nɔŋŋ tsu he nii.+ 35 Mihã nyɛna yɛ nibii fɛɛ mli akɛ nakai esa akɛ nyɛtsu nii waa+ ni nyɛkɛye nyɛbua mɛi ni egbede lɛ, ni esa akɛ nyɛhã Nuŋtsɔ Yesu wiemɔi, ni lɛ diɛŋtsɛ ewie lɛ ahi nyɛjwɛŋmɔ mli akɛ: ‘Nɔhãmɔ hãa mɔ náa miishɛɛ+ fe hemɔ.’”
36 Ni be ni ewie nibii nɛɛ, ekɛ amɛ fɛɛ kula shi ni esɔle. 37 Anɔkwa, amɛ fɛɛ amɛfó waa diɛŋtsɛ, ni amɛfua Paulo,* ni amɛkɛ suɔmɔ shɔ enaa, 38 ejaakɛ edɔ amɛ waa akɛ ekɛɛ amɛnaŋ ehiɛ dɔŋŋ.+ Ni amɛyajie lɛ gbɛ kɛtee meele lɛ mli.