Ani Obaanyɛ Osaa Ohe Bianɛ Oha Yiwaa?
“Kɛ amɛwami yi lɛ, amɛaawa nyɛ hu yi.”—YOHANE 15:20.
1, 2. Mɛɛ nifeemɔ ko ni akpaaa gbɛ nɔyelii komɛi efee amɛshi Yehowa Odasefoi?
SUSUMƆ he akɛ oka shi oojɔɔ ohe leebi maŋkpa ko. Wɔ yɛ ohiɛ lolo ni oosusu kɛji akɛ ote shi amrɔ nɔŋŋ aloo oka shi fioo. Shi klɛŋklɛŋ lɛ okpa onine mli ogbele oradio lɛ koni onu leebi saji lɛ. Trukaa kɛkɛ ni mɔ ni wieɔ yɛ radio nɔ lɛ hɛle bo shi. Etswa adafi akɛ: “Taakɛ akpɔ ni nɔyeli lɛ ewo lɛ tsɔɔ lɛ, agu jamɔ ni ale amɛ akɛ Yehowa Odasefoi lɛ yɛ maŋ muu lɛ fɛɛ mli.” Hejɔɔmɔ bɛ dɔŋŋ kɛha bo!
2 Enɛ, aloo nɔ ko ni tamɔ enɛ ji nɔ ni efee Kristofoi ni yɔɔ maji komɛi amli yɛ ŋmɛnɛŋmɛnɛ bei nɛɛ amli lɛ aniiashikpamɔ. Yɛ be babaoo mli lɛ, amɛtsɔɔ hiɛ amɛnaa nɔ ni baaba lɛ he kɔkɔbɔɔi komɛi. Shi ekomɛi yɛ ni nitsumɔ Iɛ ni atsiɔ naa lɛ baa trukaa ni akpaaa gbɛ. Ani esa akɛ enɛ aha wɔnaa akpɛ wɔhe?
3. Mɛɛ niiashikpamɔi komɛi ni kɛ amɛhe kpaaa gbee kwraa Yesu Kristo kɛkpe yɛ afi 33 Ŋ.B.?
3 Jeee nakai tsɔ. Nibii komɛi ni tamɔ nakai ba yɛ klɛŋklɛŋ afii oha lɛ mli. Kaimɔ bɔ ni Yesu Kristo ta teji nɔ kɛtee Yerusalem yɛ afi 33 Ŋ.B. agbiɛnaa be mli lɛ. Gbɔmɛi lɛ kɛ miishɛɛ nya ehe, amɛkɛ amɛ atadei shwie gbɛ lɛ nɔ koni etsɔ nɔ. Shi mɛni ba yɛ gbii fioo sɛɛ? Akojo Yesu yɛ Pontio Pilato hiɛ ni gbɔmɛi asafo yuu ni feɔ gidigidi ni jɛ nakai maŋ lɛ nɔŋŋ mli lɛ bolɔ tamɔ mɛi ni lá he kumai miiye amɛ akɛ: “Ha ni asɛŋ lɛ! . . . Ha ni asɛŋ lɛ!” (Mateo 21:6-9; 27:22, 23) Shihilɛ lɛ etsake trukaa.
4. Akɛ Yesu sɛɛnyiɛlɔi Iɛ, mɛni ni abaafee wɔ esa akɛ wɔkpa no gbɛ lɛ?
4 No hewɔ lɛ, kɛ yɛ shikpɔji komɛi anɔ lɛ shihilɛ lɛ tsake ŋmɛnɛ ni shitee kɛ woo te shi trukaa lɛ esaaa akɛ efeɔ wɔ naakpɛɛ. Kaimɔ akɛ, kɛji akɛ wɔji Yesu sɛɛnyiɛlɔi lɛlɛŋ lɛ, belɛ wɔbaakpa shitee kɛ woo gbɛ. (Yohane 15:20) Enɛ maa bɔ ni Yesu wiemɔi nɛɛ ahe hiaa ha lɛ nɔ mi, “Nyɛyaa nɔ nyɛsaraa.”—Mateo 24:42.
5. Mɛɛ sanebimɔi esa akɛ wɔsusu he agbɛnɛ?
5 Te wɔɔfee tɛŋŋ wɔfee enɛ hu? Ani gbɛ ko yɛ ni wɔɔtsɔ nɔ wɔsaa wɔhe, kɛ́ nɔ ni ehiii fe fɛɛ lɛ ba?
Saamɔ Ojwɛŋmɔ Kɛ Otsui
6, 7. (a) Mɛni hewɔ ewa akɛ wɔɔnyɛ wɔsaa wɔhe yɛ heloo naa kɛha yiwaa lɛ? (b) Mɛɛ hesaamɔ kɛha yiwaa ni he hiaa fe fɛɛ esa akɛ wɔfee lɛ?
6 Ewa akɛ ooosaa ohe yɛ heloo naa oto yiwaa ejaakɛ oleee bɔ ni shihilɛ lɛ baaji. Kɛ ebako lɛ, onyɛŋ ole kɛji akɛ nitsumɔ lɛ naa ni atsi lɛ baafee nɔni abaadi sɛɛ keketee aloo abaadi sɛɛ jabejabe ko, aloo akɛ abaatsi nitsumɔ lɛ naa po. Ekolɛ shia kɛ shia shiɛmɔ lɛ pɛ abaatsi naa, aloo ekolɛ asafoŋ kpee. Ekolɛ aguɔ Yehowa Odasefoi lɛ agbɛjianɔtoo ni mla ŋmɛɔ gbɛ lɛ, aloo awoɔ aŋkroaŋkroi komɛi atsuŋ amrɔ nɔŋŋ. Wɔbaanyɛ wɔha hei sɔrɔtoi ni abaanyɛ akɛ woji ato kɛ ehe ehia nakai lɛ ahi wɔjwɛŋmɔ mli. Shi yɛ no sɛɛ lɛ, nɔ ko fioo ko pɛ wɔbaanyɛ wɔfee ni wɔkɛsaa wɔhe yɛ heloo naa.
7 Shi, obaanyɛ osaa ojwɛŋmɔ kɛ otsui, ni enɛ he hiaa fe fɛɛ. Okɛ ojwɛŋmɔ ama nɔ hewɔ ni aŋmɛɔ yiwaa gbɛ kɛ nɔ hewɔ ni abaagbala bo kɛya nɔyelɔi ahiɛ lɛ nɔ. Yesu kɛɛ, “Koni aŋɔye amɛ . . . odase.” (Mateo 10:16-19) Kɛji akɛ osaa otsui akɛ obaahi shi anɔkwafo ni nɔ fɛɛ nɔ ni baaba lɛ kɔɔɔ ohe eko lɛ, Yehowa baanyɛ ajie nilee gbɛ ni esa akɛ otsɔ nɔ ofee onii kɛ́ hiamɔ lɛ ba lɛ kpo atsɔɔ bo. No hewɔ lɛ, mɛɛ gbɛ nɔ wɔɔtsɔ wɔsaa wɔ diɛŋtsɛ wɔhe yɛ mumɔŋ kɛha yiwaa?
Te Okɛ Gbɔmɛi Yeɔ Ohaa Tɛŋŋ?
8. Mɛni hewɔ Paulo baanyɛ akɛɛ akɛ ‘emii shɛɔ yɛ jɛmɔi amli’ Iɛ?
8 Bɔfo Paulo kɛɛ: “Mimii shɛɔ mihe yɛ gbɔjɔmɔi amli, yɛ jɛmɔi amli, yɛ fimɔi amli, yɛ yiwaai kɛ naagbai amli yɛ Kristo hewɔ.” (2 Korintobii 12:10, NW.) Ani kɛ́ aajɛ Paulo lɛ eŋɔɔ enaa? Dabida. Shi jɛmɔ fataa yiwaa he kɛbaa yɛ fɛɛ mli ni kɛji akɛ enɛ ji nɔ ni kɛ yijiemɔ aaaba Nyɔŋmɔ gbɛi lɛ nɔ lɛ, belɛ Paulo kɛ miishɛɛ aaaŋmɛ etsui shi yɛ mli.
9. Te wɔɔfee tɛŋŋ wɔsaa wɔhe bianɛ koni wɔŋmɛ wɔtsui shi yɛ ‘jɛmɔi . . . yɛ Kristo hewɔ’ lɛ mli?
9 Wɔ hu be ko baaba ni ebaabi ni wɔŋmɛ wɔtsui shi “yɛ jɛmɔi amli . . . wɔha Kristo.” Abaanyɛ ajɛ wɔ aloo ayi wɔ diɛŋtsɛ. Ani wɔbaaŋmɛ wɔtsui shi yɛ mli? Ojogbaŋŋ, te wɔsusuɔ wɔ diɛŋtsɛ wɔhe bianɛ wɔhaa tɛŋŋ? Ani wɔsusuɔ wɔhe akɛ mɛi ni he hiaa tsɔ ni no hewɔ lɛ, ehaa wɔfeɔ oya wɔhaa jɛmɔi aloo nɔ ni wɔsusuɔ he nakai lɛ ahetoo? Kɛji nakai ni lɛ, belɛ mɛni hewɔ obɔɔɔ mɔdɛŋ akɛ oootsu nii ni ona “tsuishiŋmɛɛ, . . . mlijɔlɛ, henɔyeli”? (Galatabii 5:22, 23) Enɛ baafee tsɔsemɔ ni nɔ bɛ aha Kristofoi ni yɔɔ wala mli bianɛ, ni ebaanyɛ ehere oyiwala yɛ yiwaa bei amli hu.
Te Osusuɔ Sɔɔmɔ Nitsumɔ Lɛ He Ohaa Tɛŋŋ?
10. Mɛni ji ŊmaIɛ naa nifeemɔ ni sa kɛ́ agu aloo atsi wɔshiɛmɔ nitsumɔ lɛ naa lɛ?
10 Yɛ be babaoo mli lɛ, klɛŋklɛŋ nii ni atsiɔ naa ji “sanekpakpa” lɛ shiɛmɔ yɛ maŋ. Ni kɛlɛ, shiɛmɔ kɛ kaselɔ feemɔ he miihia waa yɛ nɛkɛ naagbee gbii nɛɛ amli. Ejaakɛ kulɛ te aaafee tɛŋŋ ni gbɔmɛi aaakase Nyɔŋmɔ Maŋtsɛyeli lɛ he nii? No hewɔ lɛ, nifeemɔ ni sa jogbaŋŋ yɛ naatsii ni tamɔ nɛkɛ shishi ji nɔ ni bɔfoi lɛ jie lɛ kpo lɛ yɛ be mli ni Yudafoi ajamɔ mli hiɛnyiɛlɔi lɛ bɔ mɔdɛŋ ni amɛgu amɛshiɛmɔ nitsumɔ lɛ. (Bɔfoi lɛ Asaji 5:28, 29) Kɛ atsi nitsumɔ lɛ naa lɛ, gbɛi komɛi ni wɔtsɔɔ nɔ wɔshiɛɔ lɛ baatsi kwraa. Shi bɔ fɛɛ bɔ ni eji lɛ esa akɛ atsu enɛ. Ani obaana hewalɛ ni okɛaya nɔ oshiɛ yɛ yiwaa ni nyɛɔ onɔ shishi?
11, 12. Te ooofee tɛŋŋ ole kɛji akɛ obaanyɛ ona hewalɛ ni he hiaa ni baaha oya nɔ oshiɛ kɛ aaawa bo yi lɛ?
11 Ojogbaŋŋ, te osusuɔ shiɛmɔ nitsumɔ lɛ he bianɛ ohaa tɛŋŋ? Ani oŋmɛɔ gbɛ koni gbɛtsii nii bibii atsi onaa ni enɛ aha ofee mɔ ni eyaaa shiɛmɔ daa? Kɛji nakai ni lɛ, mɛni ji nɔ ni obaanyɛ ofee kɛ́ agu nitsumɔ lɛ? Ani osheɔ gbɔmɛi agbeyei bianɛ? Ani oosumɔ ni oshiɛ yɛ shia kɛ shia loo yɛ gbɛjegbɛi anɔ? Ani ooshe gbeyei akɛ okome ootsu nii? Shikpɔji komɛi yɛ ni kɛ́ mɛi enyɔ miishiɛ yɛ jɛmɛ lɛ, amɛgbalaa mɛi ajwɛŋmɔ tsɔ. No hewɔ lɛ, kɛ́ ehi moŋ akɛ aaafee nakai lɛ, mɛni hewɔ okome too pɛ oshiɛɛɛ bianɛ yɛ he kɛ bei komɛi amli? Ebaanyɛ efee tsɔsemɔ kpakpa.
12 Ani okɛ ohe woɔ woji tɛtrɛbii ajaa nitsumɔ yɛ gbɛjegbɛi anɔ lɛ mli? Ani oyɛ ekaa kɛ hegbɛ, ni okɛtaoɔ hegbɛi koni oye trukaa odase? Ani otsuɔ nii yɛ shikpɔŋkukuji ni nitsumɔ hei wuji yɔɔ mli lɛ amli? Ani osheɔ gbeyei akɛ ooobɛŋkɛ niiatsɛmɛi loo gbɔmɛi ni yɔɔ gbɛi? Kɛji akɛ shiɛmɔ nitsumɔ lɛ ekome pɛ mli okɛ ohe woɔ lɛ, mɛni ji nɔ ni obaafee kɛ atsi nitsumɔ lɛ naa, ni yɛ nakai be mli Iɛ shiɛmɔ kome pɛ ni onyɛɔ okɛ ohe woɔ mli lɛ bɛ dɔŋŋ lɛ?
13. Mɛni obaanyɛ ofee yɛ osɔɔmɔ nitsumɔ lɛ he bianɛ koni eha osaa ohe jogbaŋŋ ni oshiɛ yɛ yiwaa bei amli?
13 Ani oyɔse akɛ oyɛ gbɔjɔmɔ ko yɛ enɛ mli? Enɛ ji be ni okɛ aaatsu he nii. Kasemɔ gbɛ ni oootsɔ nɔ okɛ ohe afɔ Yehowa nɔ ni ohe asa babaoo akɛ sɔɔlɔ. Kɛkɛ lɛ, obaafee mɔ ni awula lɛ jogbaŋŋ kɛha shiɛmɔ bianɛ kɛ mɔ ni esaa ehe koni eŋmɛ etsui shi yɛ yiwaa bei amli.
Ani Anyɛɔ Akɛ He Fɔɔ Onɔ?
14, 15. (a) Mɛɛ shifimɔ he nɔkwɛmɔ nɔ kpakpa klɛŋklɛŋ afii oha lɛ mli Kristofoi lɛ baji yɛ be mli ni yiwaa te shi lɛ? (b) Te ŋmɛnɛŋmɛnɛ beaŋ Yehowa tsulɔ aaafee tɛŋŋ atsɔ tamɔ nakai mra be mli Kristofoi ni he wa lɛ?
14 Kɛji akɛ okwɛ Kristofoi a-Hela Ŋmalɛi lɛ amli fɛɛ lɛ, onaa aŋkroaŋkroi ni atsi amɛ ta akɛ akulashiŋi yɛ asafo lɛ mli. Akɛ nɔkwɛmɔ nɔ lɛ, Onesiforo kɛ tsuisalɛ loo ekãa ye ebua Paulo yɛ be mli ni awo lɛ tsuŋ yɛ Roma lɛ. (2 Timoteo 1:16) Ajie Foibe yi yɛ enitsumɔ ni wa ni etsuɔ yɛ asafo ni yɔɔ Kenkrea lɛ mli lɛ hewɔ. (Romabii 16:1, 2) Nɛkɛ hii kɛ yei nɛɛ baanyɛ afee mɛi ni naa mɛi anɔ hewalɛ kpakpa kɛ́ yiwaa te shi. Amɛji mɛi ni ‘buɔ, amɛdamɔɔ shi shiŋŋ yɛ hemɔkɛyeli lɛ mli, amɛtsuɔ nii akɛ hii ni amɛhe waa.’—1 Korintobii 16:13.
15 Esa akɛ Kristofoi fɛɛ, titri lɛ onukpai abɔ mɔdɛŋ ni amɛshwere kɛya amɛhiɛ ni amɛtsɔmɔ tamɔ klɛŋklɛŋ Kristofoi ni he wa lɛ. (1 Timoteo 4:15) Nyɛkasea bɔ ni nyɛafee ni nyɛkɛ teemɔŋ saji atee ni nyɛkpɛa nyɛyiŋ yɛ Ŋmalɛ mli shishitoo mlai anaa. Tsɔsemɔ ohe koni onyɛ oyoo Kristofoi asui ni yɔɔ mɛi krokomɛi amli lɛ koni oyoo mɔ ni abaanyɛ akɛ he afɔ enɔ yɛ nɔnyɛɛ be mli. Tsu nii, yɛ Yehowa hewalɛ mli, koni otsɔ tamɔ akulashiŋ yɛ osafo lɛ mli, gbɔmɔ ni yeɔ buaa mɛi krokomɛi moŋ, fe mɔ ni yelikɛbuamɔ he hiaa lɛ yɛ be fɛɛ mli.—Galatabii 6:5.
Te Okɛ Gbɔmɛi Hiɔ Shi Ohaa Tɛŋŋ?
16, 17. Yɛ mɛɛ gbɛ nɔ Kolosebii 3:12, 13 ni akɛaatsu nii bianɛ lɛ baanyɛ aye abua bo ni osaa ohe kɛha yiwaa?
16 Bɔfo Paulo wo wɔ hewalɛ akɛ: “Nyɛwoa musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishitoo. Ni kɛji mɔ ko kɛ mɔ ko na sane ko lɛ, nyɛnanaa nyɛhaa nyɛhe ni nyɛkɛfafaa nyɛhe.” (Kolosebii 3:12, 13) Ani enɛ feemɔ yɛ mlɛo kɛha bo? Aloo emuu ni mɛi krokomɛi yeee lɛ gbaa onaa bɔ ni esaaa? Ani omli fuɔ mramra aloo onijiaŋ jeɔ wui? Kɛji nakai ni lɛ, biɛ ji he kroko ni obaanyɛ osaa ohe yɛ.
17 Yɛ shikpɔji ni agu kpeei yɛ nɔ lɛ, Kristofoi kpeɔ daa yɛ kui bibii amli. Yɛ shihilɛi ni tamɔ nɛkɛ mli lɛ, amɛfatɔɔi lɛ jeɔ kpo waa. Mɛni hewɔ otsɔseee ohe bianɛ koni onyɛ odamɔ mɛi krokomɛi agbɔjɔmɔi anaa, tamɔ bɔni eka shi faŋŋ akɛ amɛ hu amɛmiidamɔ onɔ̃ naa lɛ? Kaawie mɛi krokomɛi ahe efɔŋ ni okɛje amɛnijiaŋ wui. Tsɔsemɔ bo diɛŋtsɛ ohe kɛ obii hu koni amɛkɛ bulɛ aha mɛi krokomɛi anibii yɛ be mli ni amɛtee Asafo Woloŋ Nikasemɔ. Kɛ́ yiwaa ba lɛ, bulɛ ni tamɔ nɛkɛ baaha toiŋjɔlɛ wekukpaa ahi shi.
Ani Oji Mɔ Ni Sumɔɔ Sane?
18. Mɛni hewɔ yɛ bei komɛi amli lɛ, ehi kwraa akɛ ooole nɔ ni he hiaa akɛ oleɔ lɛ pɛ lɛ?
18 Yɛ fɔmɔsu naa lɛ, wɔteŋ mɛi komɛi sumɔɔ sane waa. Wɔnyɛɛɛ wɔhi shi akɛ “mɛi ni leee nɔ ni yaa nɔ.” Ani otamɔ nakai? Kɛji nakai ni lɛ, susumɔ enɛ he: Yɛ bei komɛi amli, kɛ atsi Yehowa Odasefoi anitsumɔ lɛ naa lɛ, henyɛlɔi lɛ baabɔ mɔdɛŋ fɛɛ ni amɛle amɛgbɛjianɔtoo lɛ mli kɛ nɔkwɛlɔi komɛi agbɛi. Kɛji akɛ oji mɔ ni le nibii nɛɛ lɛ, abaaje gbɛ ayi bo jogbaŋŋ bɔni afee ni akɛbɔ mɔdɛŋ ni anyɛ onɔ koni otsɔɔ gbɔmɛi nɛɛ. Ni kɛji akɛ ofee nakai lɛ, enɛ baasa onyɛmimɛi lɛ anitsumɔ lɛ he yɛ gbɛ fɔŋ nɔ. No hewɔ lɛ, yɛ bei komɛi amli lɛ, ehi kwraa moŋ akɛ ooole nɔ ni he hiaa akɛ ole lɛ pɛ, shi jeee babaoo.
19. Mɛni baanyɛ aye abaa bo bianɛ koni okwɛ teemɔŋ saji ni ooojie lɛ kpo yɛ be mli ni awaa bo yi lɛ?
19 Ani obaanyɛ otsɔse ohe bianɛ kɛha enɛ? Hɛɛ. Akɛ nɔkwɛmɔ nɔ lɛ, kɛji akɛ saneyeli ajinafoi lɛ miiye sane ko yɛ asafo lɛ mli lɛ, esa akɛ aŋkroaŋkroi lɛ atsui anyɔ amɛmli yɛ nɔ ni onukpai lɛ ena akɛ ehi akɛ amɛaakɛɛ amɛ lɛ pɛ he, shi amɛkabɔ mɔdɛŋ akɛ amɛaapɛi nibii amli bɔni afee ni amɛnu nɔ fɛɛ nɔ fitsofitso. Onukpai aŋamɛi kɛ amɛbii akabɔ mɔdɛŋ akɛ amɛaanyɛ onukpai lɛ anɔ koni amɛjie teemɔŋ saji akpo amɛtsɔɔ amɛ. Yɛ nɔ fɛɛ nɔ mli lɛ, esa akɛ wɔkase bɔ ni wɔɔfee ni ‘wɔkɛ wɔhe akawo saji ni kɔɔɔ wɔhe eko lɛ amli.’—2 Tesalonikabii 3:11.
Ani Oji Biblia Kaselɔ?
20, 21. Biblia lɛ kasemɔ kɛ hiɛdɔɔ bianɛ baaye abaa bo beni atsi nitsumɔ lɛ naa yɛ mɛɛ gbɛ nɔ?
20 Biblia lɛ ji Kristofonyo lɛ mumɔŋ hewalɛ lɛ nɔdaamɔ nɔ. Ehaa lɛ esanebimɔi ni he hiaa lɛ fe fɛɛ lɛ ahetoo ni ehaa enine shɛɔ Nyɔŋmɔ nilee lɛ diɛŋtsɛ nɔ. (2 Timoteo 3:14-16) Kristofoi fɛɛ kpɛlɛɔ nɛkɛ shishitoo mla nɛɛ nɔ, shi mɛɛ gbɛfaŋnɔ Biblia lɛ naa diɛŋtsɛ yɛ oshihilɛ mli? Ani okaseɔ enɛ daa ni oŋmɛɔ gbɛ koni ekudɔ bo yɛ nɔ fɛɛ nɔ ni ofeɔ lɛ mli?—Lala 119:105.
21 Yɛ be babaoo mli lɛ, onaŋ hegbɛ ni onine ashɛ o-Biblia kasemɔ he woji lɛ anɔ yɛ hei ni atsi nitsumɔ lɛ naa waa yɛ lɛ. Eshɛɔ be ni ewa po akɛ onine aaashɛ Biblia nɔ. Kɛ́ shihilɛi ni tamɔ nɛkɛ ba lɛ, mumɔ krɔŋkrɔŋ lɛ baakai bo nibii ni okase yɛ tsutsu lɛ. Shi ekaiŋ bo nibii ni okaseko! No hewɔ lɛ, babaoo ni okaseɔ bianɛ lɛ, babaoo hu ooonyɛ okɛto ojwɛŋmɔ kɛ otsui mli koni mumɔ krɔŋkrɔŋ lɛ akai bo nibii nɛɛ yɛ be mli ni amɛhe hiaa bo lɛ.—Marko 13:11.
Ani Osɔleɔ?
22. ‘Sɔlemɔ ni wɔɔhiɛ mli daa’ lɛ baanyɛ aye abua wɔ yɛ wɔbe ni wɔsaa kɛhaa yiwaa lɛ mli yɛ mɛɛ gbɛ nɔ?
22 Enɛ ji sanebimɔ ko ni he hiaa kɛ́ wɔsusu yiwaa he. Biblia lɛ woɔ ŋaa akɛ: “Nyɛhiɛa sɔlemɔ mli daa.” (Romabii 12:12) Sɔlemɔ ji sane ni wɔkɛ Yehowa Nyɔmɔ gbaa tɛ̃ɛ. Wɔbaanyɛ wɔtsɔ nɔ wɔbi hewalɛ ni wɔŋmɛ wɔtsui shi yɛ naagbai amli, ni wɔkpɛ wɔyiŋ yɛ gbɛ ni ja nɔ, koni wekukpaa kpakpa abaka wɔ kɛ Yehowa Nyɔŋmɔ teŋ. Kɛji akɛ shitee kɛ wolɔi eshɔ̃ wɔwoji, wɔ-Bibliai, kɛ naanyobɔɔ ni ka wɔkɛ wɔnyɛmimɛi Kristofoi ateŋ lɛ kɛtee po lɛ, amɛnyɛŋ amɛhe hegbɛ ni sɔlemɔ kɛhaa lɛ. Kristofonyo nine baanyɛ ashɛ Nyɔŋmɔ nɔ yɛ tsuŋwoo hé, ni atsi enaa kwraa yɛ jɛmɛ lɛ. Kɛ̀ wɔɔŋɔ hegbɛ fɛɛ ni sɔlemɔ kɛhaa lɛ, belɛ wɔŋɔ gbɛ ni hi fe fɛɛ ni wɔɔtsɔ nɔ wɔsaa wɔhe kɛha nɔ fɛɛ nɔ ni baaba yɛ wɔsɛɛ be mli.
Ani Okɛ Ohe Fɔɔ Mɛi Ni Akɛ Hegbɛ Ewo Amɛdɛŋ Lɛ Anɔ?
23. Mɛni hewɔ esa akɛ wɔna hekɛnɔfɔɔ yɛ onukpai ni ahala amɛ lɛ kɛ agbɛnɛ yɛ “tsulɔ anɔkwafo kɛ nilelɔ” lɛ mli Iɛ?
23 Hekɛnɔfɔɔ nɛɛ ni ooona lɛ hu he hiaa. Onukpai ni yɔɔ asafo lɛ mli lɛ ji gbɛjianɔ ni Nyɔŋmɔ eto koni ekɛbaa wɔyi lɛ fã. Esa akɛ onukpai lɛ afee amɛ nii yɛ gbɛ ni aaaha amɛfee mɛi ni akɛ he aaafɔ amɛnɔ, ni ehe miihia ni mɛi ni yɔɔ asafo lɛ mli lɛ akase bɔ ni amɛaafee ni amɛkɛ amɛhe afɔ amɛ nɔ. (Yesaia 32:1, 2; Hebribii 13:7, 17) Nɔ ni he hiaa fe fɛɛ lɛ, esa akɛ wɔkase bɔ ni wɔɔfee wɔkɛ wɔhe aaafɔ “tsulɔ anɔkwafo kɛ nilelɔ” lɛ nɔ.—Mateo 24:45-47.
24. Mɛni wɔbaanyɛ wɔfee ni wɔkɛsaa wɔhe ni wɔkɛte shi wɔshi amalei ni Yehowa webii ahenyɛlɔi lɛ kɛtutuaa wɔ lɛ?
24 Henyɛlɔi baanyɛ amale Nyɔŋmɔ gbɛjianɔtoo lɛ he. (1 Timoteo 4:1, 2) Yɛ maŋ ko mli lɛ, ashishiu Kristofoi lɛ ateŋ mɛi komɛi ni amɛhe amɛye akɛ Yehowa Odasefoi Anɔyeli Kuu lɛ ekpoo Kristojamɔ, yɛ be mli ni amɛ lɛ amɛmiiye Kristojamɔ anɔkwale lolo. Gbɛ ni hi jogbaŋŋ ni aaatsɔ nɔ ate shi awo tutuamɔi ni tamɔ nɛkɛ lɛ ji ni wɔna suɔmɔ ni mli wa wɔha wɔnyɛmimɛi Iɛ ni wɔkase gbɛ ni wɔɔtsɔ nɔ wɔkɛ wɔhe aaafɔ nibii ni Yehowa eto he gbɛjianɔ lɛ anɔ.—1 Yohane 3:11.
Obaanyɛ Oye Kunim
25. Mɛni baanyɛ aye abua wɔ ni wɔye omanye yɛ be mli ni awaa wɔ yi lɛ?
25 Beni bɔfo Yohane ni egbɔ Iɛ ena amanehulu yɛ yiwaa mli sɛɛ lɛ, ekɛɛ wɔ akɛ: “Ejaakɛ nɔ fɛɛ nɔ ni ajɛ Nyɔŋmɔ mli afɔ́ lɛ eyeɔ je lɛ nɔ kunim, ni wɔhemɔkɛyeli lɛ ji nɔ ni wɔkɛyeɔ je lɛ nɔ kunim.” (1 Yohane 5:4) Onyɛŋ oye kunim yɛ bo diɛŋtsɛ ohewalɛ mli. Satan kɛ eje lɛ he wa fe bo. Shi amɛhe waaa fe Yehowa Nyɔŋmɔ. No hewɔ lɛ, kɛ̃ wɔbo Nyɔŋmɔ kitai atoi ni wɔsɔle wɔbi emumɔ lɛ koni eye ebua wɔ ni wɔkɛ wɔhe fɔ enɔ kwraa kɛha hewalɛwoo koni wɔnyɛ wɔŋmɛ wɔtsui shi lɛ, no lɛ wɔbaaje mli shweshweeshwe kɛ omanyeyeli.—Habakuk 3:13, 18; Kpojiemɔ 15:2; 1 Korintobii 15:57.
26. Kɛji akɛ amrɔ nɛɛ po yiwaa baaa onɔ lɛ, mɛni esa akɛ ofee?
26 Aawa Kristofoi Komɛi ayi yɛ shikpɔji fɛɛ nɔ, ni ekolɛ kɛtsɔ gbalashihilɛ mli hefatalɔi anɔ, aloo yɛ gbɛ kroko nɔ. Yɛ shikpɔji komɛi anɔ lɛ, Nyɔŋmɔ tsuji fɛɛ miina nɔ yɛ maŋ lɛ mli nɔyeli lɛ nifeemɔi komɛi ahewɔ. Shi amrɔ nɛɛ po, kɛji akɛ bo diɛŋtsɛ lɛ onaaa shitee kɛ woo aloo naagba ko ni yɔɔ sɔrɔto baaa onɔ lɛ, kaimɔ akɛ ebaanyɛ eba be fɛɛ be. Yesu kɛɛ akɛ Kristofoi ayiwaa baafee naagbee be lɛ mli okadi lɛ fã; no hewɔ lɛ, esa ake wɔkpa enɛ gbɛ yɛ be fɛɛ mii. (Mateo 24:9) No hewɔ lɛ, mɛni hewɔ osaaa ohe kɛhaaa enɛ bianɛ? Tswaa ofai shi akɛ, yɛ nɔ fɛɛ nɔ ni ka ohiɛ lɛ mli lɛ, obaaha ojeŋba kɛ yijiemɔ abaha oŋwɛi Tsɛ, Yehowa Nyɔŋmɔ, yɛ be fɛɛ mlia.—Abɛi 27:11.
[Shishigbɛ niŋmaa]
a Ajie kɛjɛ November 15, 1985 Watchtower lɛ mli.
Mɛni Ji Ohetooi?
◻ Mɛɛ hesaamɔi kɛha yiwaa obaanyɛ ofee bianɛ?
◻ Mɛni obaanyɛ ofee bianɛ ni okɛna hewalɛ ni he hiaa ni baaha oya nɔ oshiɛ kɛ aawa bo yi?
◻ Mɛɛ gbɛ nɔ Kolosebii 3:12, 13 kɛ nitsumɔ bianɛ baaye abua kɛ yiwaa ba?
◻ Mɛni hewɔ esa akɛ okɛ ahe afɔ onukpai ni ahala amɛ Iɛ kɛ “tsulɔ anɔkwafo kɛ nilelɔ” lɛ nɔ lɛ?
◻ Te ooofee tɛŋŋ otsɔ kunimyelɔ yɛ be mli ni awaa bo yi?