Gbɛjianɔ Ni Ato Koni Asɔmɔ Yehowa
“Yiŋtoo hewɔ ni mishi bo yɛ Kreta ji ni oto nɔ fɛɛ nɔ gbɛjianɔ yɛ jɛmɛ.”—TITO 1:5, The Jerusalem Bible.
1. Mɛni ji nɔ ni klɛŋklɛŋ Amerika maŋnɔkwɛlɔ nukpa lɛ wie yɛ sɔrɔtofeemɔ ni yɔɔ jamɔŋ henumɔi ahe?
1 UNITED STATES, Amerika, klɛŋklɛŋ maŋnukpa, George Washington, ŋma yɛ lɛ diɛŋtsɛ ewolo ko mli, yɛ October 20, 1792 akɛ: “Etamɔ nɔ ni nyɛ̃ɛ kɛ hetsɛ̃ ni ehi adesai ateŋ lɛ mli nɔ ni henumɔ ni jɛ sɔrɔtofeemɔ yɛ Nyɔŋmɔ jamɔ mli hewɔ lɛ kɛba lɛ ji nɔ ni etsɛ ni eka hu ni naagbai yɔɔ mli fe fɛɛ, ní esa akɛ ahiɔ kwraa. Kulɛ mihiɛ ka nɔ akɛ kɛ hoo lɛ, wɔ nifeemɔi ni tsɔɔ hiŋmɛigblemɔ kɛ mlijɔlɛ, ni ekadi ŋmɛnɛŋmɛnɛ yinɔ nɛɛ lɛ baaha Kristofoi ni yɔɔ jamɔi sɔrɔtoi lɛ amli lɛ afee ekome bɔ ni no haŋ ni wɔna akɛ amɛkɛ amɛjamɔ mli bei lɛ miiya shɔŋŋ, bɔ ni no aaafite toiŋjɔlɛ ni maŋbii yɔɔ lɛ.”
2. Te mɛi efee amɛnii yɛ jamɔi ni faa babaoo lɛ he ámɛha tɛŋŋ?
2 Ŋmɛnɛ, mɛi pii hu ehao nakai nɔŋŋ yɛ jamɔi babaoo lɛ hewɔ, ni eha amɛtsi amɛhé kɛjɛ jamɔi fɛɛ he. Mɛi krokomɛi ji sɔlemɔ lɛ mlibii shi amɛwieɔ ‘wekukpaa ni ka amɛ kɛ Nyɔŋmɔ teŋ’ lɛ he. Belɛ mɛni ji anɔkwalei ni yɔɔ mli lɛ? Ani Nyɔŋmɔ kɛ gbɔmɛi yeɔ akɛ aŋkroaŋkroi pɛi? Mɛni Biblia lɛ tsɔɔ?
Ani Nyɔŋmɔ Jwɛŋɔ Wɔhe?
3. Kɛ wɔkɛ ŋmalɛi lɛ aaatsu nii lɛ, mɛɛ nɔ wɔɔtsɔ wɔba sanebimɔ nɛɛ hetoo, Ani nyɔŋmɔ jwɛŋɔ wɔhe ákɛ aŋkroaŋkroi lo?
3 Ŋmalɛi lɛ jieɔ lɛ kpo akɛ Yehowa susuɔ gbɔmɛi ahe akɛ aŋkroaŋkroi. Akɛ nɔkwɛmɔ nɔ lɛ, yɛ ekɛ adesai ateŋ saneyeli mli lɛ, Nyɔŋmɔ Wiemɔ lɛ wieɔ enɛ: “Mɔ ni yeɔ ohiafo he fɛo lɛ, eebɔ efeelɔ lɛ ahora.” “Mɔ ni waa ohiafo yi lɛ, eebɔ efeelɔ lɛ ahora; shi mɔ ni naa mɔ ni efi lɛ lɛ mɔbɔ lɛ, eewo ehiɛ nyam,” ni ji Yehowa Nyɔŋmɔ. (Abɛi 17:5; 14:31) Yɛ anɔkwale mli lɛ, “nɛkɛ Nyɔŋmɔ sumɔ je [adesai aje] lɛ, akɛ eŋɔ e-Bi koome lɛ ha, koni mɔ fɛɛ mɔ ni heɔ enɔ yeɔ lɛ hiɛ akakpata. shi moŋ ena naanɔ wala.” (Yohane 3:16, 36) Agbɛnɛ, Bɔfo Paulo jaje akɛ; “Lɛlɛŋ miyoo akɛ, Nyɔŋmɔ jeee mɛi ahiɛaŋkwɛlɔ shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔfoi lɛ Asaji 10:34, 35) No hewɔ lɛ, Yehowa jwɛŋɔ aŋkroaŋkroi ahe, ni ekpɛlɛɔ mɛi ni sheɔ lɛ gbeyei ni amɛfeɔ nɔ ni ja lɛ anɔ.
4. Mɛɛ sanebimɔi ni teɔ shi esa akɛ wɔsusu he?
4 Biblia lɛ hu kɛɔ akɛ: “Nuŋtsɔ lɛ [Yehowa] le lɛ diɛŋtsɛ emɛi lɛ.” (2 Timoteo 2:19) Shi ani enɛ tsɔɔ akɛ Nyɔŋmɔ kpɛlɛɔ aŋkroaŋkroi ni egbɛ eshwa je lɛŋ jamɔi sɔrɔtoi lɛ amli lɛ anɔ? Aloo esa akɛ akpa gbɛ akɛ nɛkɛ gbɔmɛi nɛɛ kɛ amɛhe baabɔ gbɛjianɔtoo kome he, abaato amɛ gbɛjianɔ ni amɛsɔmɔ Yehowa?
Yehowa—Gbɛjianɔtoo Nyɔŋmɔ
5. Te ŋwɛibɔfoi krɔŋkrɔŋi lɛ kɛ Yehowa tsuɔ nii amɛhaa tɛŋŋ?
5 Nyɔŋmɔ Wiemɔ ni jɛ mumɔŋ lɛ haa wɔnaa gbɛ ni etsɔɔ nɔ efeɔ nibii komɛi lɛ amli. Akɛ nɔkwɛmɔ nɔ lɛ, susumɔ ŋwɛi ni anaaa jɛmɛ lɛ he okwɛ. Ani shihilɛi ni yɔɔ jɛmɛ yɛ basabasa? Dabida! Mumɔŋ bɔɔ nii akpekpei toi akpei abɔ ni yɔɔ jɛmɛ lɛ ateŋ mɔ fɛɛ mɔ tsuuu nii bɔ ni esumɔɔ yɛ mɔ lɛ diɛŋtsɛ gbɛ nɔ ní Yehowa baaa mli. Shi moŋ, wɔkaneɔ akɛ: “Nyɛjiea Yehowa yi, ebɔfoi lɛ, nyɛ hewalɔi ekaalɔi ni yeɔ ewiemɔ nɔ, ni nyɛboɔ ewiemɔ lɛ gbee toi lɛ! Nyɛjiea Yehowa yi, nyɛ etai lɛ fɛɛ, nyɛ esɔɔlɔi ni feɔ esuɔmɔnaa nii lɛ!” (Lala 103:20, 21) Eka shi faŋŋ akɛ áto bɔfoi krɔŋkrɔŋi lɛ gbɛjianɔ jogbaŋŋ koni amɛsɔmɔ Yehowa.
6. Noa weku lɛ je shishi akɛ mɛni yɛ Nua Afaa lɛ sɛɛ?
6 Shi adesai anɔyeli he lɛ hu? Ojogbaŋŋ, Noa gbii lɛ amli Nu Afua lɛ kɛ gbɛjianɔtooi fɛɛ ni ekolɛ eyɔɔ dani Nu Afua lɛ ba shikpɔŋ nɔ lɛ ba naagbee—ja ekome pɛ. Noa kɛ mɛi krokomɛi kpawo ni je Nu Afua lɛ mli lɛ fa kpo kɛjɛ adeka lɛ mli ákɛ weku gbɛjianɔtoo ko. Sane ni he hiaa amɛ fe fɛɛ ji ni amɛkɛ jamɔ aha Nyɔŋmɔ yɛ ekomefeemɔ mli, ejaakɛ wɔkaneɔ akɛ: “Ni Noa ma afɔleshaa latɛ eha Yehowa, ni eŋɔ shia kooloi ni he tse lɛ fɛɛ mli eko kɛ loofɔji ni he tse lɛ fɛɛ mli eko, ni eŋɔsha afɔle yɛ afɔleshaa latɛ lɛ nɔ.” Mɛi ni je Nu Afua lɛ mli lɛ kɛ amɛhe wooo jamɔi sɔrɔtoi ni amɛ diɛŋtsɛ amɛsumɔɔ amli, shi moŋ amɛ fɛɛ amɛfee ekome kɛha nii ni yɔɔ naakpɛɛ ni nɔ ni jɛ mli ba ji amɛjɔɔmɔ, tsɔsemɔ kɛ kpaŋmɔ ni Nyɔŋmɔ kɛ amɛ fee lɛ. (1 Mose 8:18–9:17) Hɛɛ, Noa weku lɛ je shishi akɛ gbɛjianɔtoo ni sɔmɔɔ Yehowa yɛ Nu Afaa lɛ sɛɛ.
7. Yɛ gbɛjianɔtoo he lɛ, mɛni wɔkaseɔ kɛjɛɔ 2 Mose wolo lɛ mli?
7 Yehowa duro Abraham seshibii lɛ waa, ni mɔ ko mɔ ko bɛ ni baaje maŋ gbɛjianɔtoo ko ni amɛbaatsɔ yɛ naagbee lɛ he ŋwane. Ejaakɛ Biblia mli wolo ni ji 2 Mose lɛ pɛ tsɔɔ gbɛ ni atsɔ nɔ ajie amɛ kɛjɛ Mizraim nyɔŋyeli mli ni ato amɛ gbɛjianɔ akɛ teokrase lɛ! Wolo lɛ haa ayooɔ Yehowa akɛ teokrase gbɛjianɔtoo Nyɔŋmɔ. Kɛ́ Israelbii lɛ bo Nyɔŋmɔ Mla toi lɛ, amɛnyɛɔ amɛjaa lɛ akɛ gbɛjianɔtoo loo asafo ko ni toɔ enɔ fɛɛ nɔ he gbɛjianɔ pɛpɛɛpɛ ni hiɔ shi shweshweeshwe ni yɔɔ miishɛɛ hu. Anyɛŋ aje gbɛjianɔ ni ato amɛ koni amɛsɔmɔ Yehowaa lɛ he ŋwane.
8. Mɛɛ gbɛjianɔtoo kpakpa he odaseyeli ana yɛ sɔɔmɔ he yɛ Yehowa he krɔŋkrɔŋ ni yɔɔ shikpɔŋ nɔ lɛ?
8 Anaa gbɛjianɔtoo kpakpa he odaseyeli ni kɔɔ Yehowa sɔɔmɔ he yɛ eshikpɔŋ nɔ he krɔŋkrɔŋ lɛ. Akɛ nɔkwɛmɔ nɔ lɛ, wɔkaneɔ yɛ Levibii lɛ ahe akɛ: “Ni David ja amɛmli kuikui yɛ Levi bihii ni ji Gershom, Kohat kɛ Merari lɛ anaa.” Nakai nɔŋŋ hu aja “Aaron bihii” lɛ amli. Yɛ Zadok kɛ Ahimelek yelikɛbuamɔ naa lɛ, “David . . . ja amɛmli yɛ amɛsɔɔmɔ lɛ gbɛjianɔtoo lɛ naa. . . . Bɔ ni ekɛ oshikifɔɔ ja amɛmli nɛ.” Yɛ sɛɛ mli lɛ, wɔkaneɔ akɛ: “Ni Yehoiada to Yehowa we lɛ nitsumɔi lɛ gbɛjianɔ ewo osɔfoi kɛ Levibii lɛ ni David eja amɛmli eto Yehowa we lɛ adɛŋ, koni amɛsha shaa afɔlei lɛ, tamɔ bɔ ni aŋma yɛ Mose mla lɛ mli lɛ, ni amɛfee kɛ nyamɔ kɛ lala, tamɔ bɔ ni David to lɛ.” (1 Kronika 23:2-6; 24:1-6; 2 Kronika 23:18) Hɛɛ, aja osɔfoi lɛ kɛ Levibii lɛ amli kuikui ni ato amɛ gbɛjianɔ ni amɛsɔmɔ Yehowa.
Ni Kristojamɔ Hu?
9. Mɛɛ odaseyeli yɔɔ ni tsɔɔ akɛ Yesu Kristo to esɛɛnyiɛlɔi lɛ gbɛjianɔ eha sɔɔmɔ ni amɛkɛaaha Yehowa?
9 Beni Yesu Kristo yɔɔ shikpɔŋ nɔ lɛ, ekɛɛɛ mɛi fɛɛ ni heɔ lɛ yeɔ lɛ akɛ amɛtsɔmɔ amɛ diɛŋtsɛ amɛgbɛi anɔ ni amɛsusu ‘wekukpaa ni ka amɛ kɛ Nyɔŋmɔ teŋ’ lɛ pɛ he. Shi moŋ, ehala kaselɔi ni bua amɛhe naa kɛba eŋɔɔ lɛ ateŋ mɛi 12 akɛ bɔfoi. Ahala amɛ yɛ sɛɛ mli beni asɔle gbɛkɛ ko ni ábi Yehowa yelikɛbuamɔ kɛ enɔkpɛlɛmɔ lɛ sɛɛ. (Luka 6:12-16) Enɛ tsɔɔ gbɛjianɔtoo loo asafo ni ŋwɛi fiɔ sɛɛ. Agbɛnɛ hu, Yesu to esɛɛnyiɛlɔi lɛ gbɛjianɔ akɛ Maŋtsɛyeli lɛ jajelɔi akuu ko ni atsɔse amɛ jogbaŋŋ. Akɛ nɔkwɛmɔ nɔ lɛ, ekɛ famɔ kɛ tsɔsemɔ ni sa ha gbɔmɛi ni ato amɛ gbɛjianɔ lɛ.—Luka 10:1-24.
10. Mɛɛ gbɛ nɔ Ŋmalɛi lɛ tsɔɔ yɛ akɛ ato Yesu klɛŋklɛŋ sɛɛnyiɛlɔi lɛ agbɛjianɔ jogbaŋŋ?
10 Kristofoi a-Hela Ŋmalɛi lɛ tsɔɔ yɛ faŋŋ mli akɛ ato Yesu klɛŋklɛŋ sɛɛnyiɛlɔi lɛ gbɛjianɔ jogbaŋŋ. Amɛkɛ amɛhe efɔɔɔ Ŋmalɛi lɛ ni amɛdiɛŋtsɛ amɛ aaakane lɛ pɛ nɔ. Shi moŋ ato asafoi ni amɛkpeɔ daa amɛkaseɔ Nyɔŋmɔ Wiemɔ lɛ. Nɛkɛ asafoi nɛɛ jeee asafoi ni eye amɛhe, mɛi ni kwɛɔ amɛ diɛŋtsɛ amɛsaji anɔ, shi moŋ amɛtsuɔ nii yɛ ekomefeemɔ mli yɛ suɔmɔ mli. Akɛ nɔkwɛmɔ nɔ lɛ, asafoi lɛ kɛ ŋamɔi ni jɛ tsuiŋ tɔ̃ɔ ŋaa amɛhe, ni kui ni ato amɛ gbɛjianɔ yɛ Makedonia lɛ ‘kpa fai koni amɛná hegbɛ ni amɛha’ “krɔŋkrɔŋbii” ni ehia amɛ yɛ hei krokomɛi lɛ nɔ̃ ko. (1 Korintobii 16:19, 20; 2 Korintobii 8:1-7; Kolosebii 4:14-16) Hɛɛ, klɛŋklɛŋ Kristofoi asafoi lɛ kɛ amɛhe ye yɛ ekomefeemɔ mli yɛ nɔyeli kuu ko ni bɔfoi lɛ kɛ onukpai ni yɔɔ Yerusalem lɛ yɔɔ mli lɛ agbɛtsɔɔmɔ shishi.—Bɔfoi lɛ Asaji 15:1–16:5.
11. Mɛni hewɔ wɔbaakpa gbɛ akɛ Nyɔŋmɔ aaato lɛ baafee nɔ ni ato he gbɛjianɔ jogbaŋŋ?
11 Bɔfo Paulo ye bua ni ato asafoi ni ato amɛ gbɛjianɔ jogbaŋŋ ni ba shihilɛ mli yɛ Nyɔŋmɔ jɔɔmɔ ni yɔɔ shiɛmɔ nitsumɔ lɛ nɔ hewɔ lɛ. Agbɛnɛ hu, Paulo kɛɛ akɛ Yehowa “jeee sakasakafeemɔ Nyɔŋmɔ, shi moŋ hejɔlɛ Nyɔŋmɔ ni.” Bɔfoi lɛ hu kɛɛ akɛ “Nyɔŋmɔ to” Yesu Kristo sɛɛnyiɛlɔi ni afɔ amɛ mu lɛ “gbɛjianɔ” bɔ ni esumɔɔ. No hewɔ lɛ, wɔbaakpa gbɛ akɛ “Nyɔŋmɔ asafo” lɛ baafee nɔ ni ato he gbɛjianɔ jogbaŋŋ koni etsu nii yɛ toiŋjɔlɛ kɛ gbeekpamɔ mli.—1 Korintobii 14:33; 12:24; 1 Timoteo 3:5
12, 13. (a) Mɛni awie yɛ asafoi ni Yesu bɔfoi lɛ to amɛ gbɛjianɔ lɛ ahe? (b) Yɛ klɛŋklɛŋ afii oha lɛ mli nɔkwɛmɔ nɔ lɛ kɛ gbeekpamɔ naa lɛ, namɛi kwɛɔ asafoŋ saji anɔ yɛ Yehowa Odasefoi ateŋ?
12 Yinɔsaneŋmalɔ, J. L. von Mosheim ŋma yɛ Yesu sɛɛnyiɛlɔi lɛ agbɛjianɔtoo lɛ he akɛ: “Kɛji akɛ . . . Yesu Kristo bɔfoi lɛ tsu nii yɛ ŋwɛi famɔ kɛ gbɛtsɔɔmɔ shishi ni Kristofonyo ko nyɛŋ aje enɛ he ŋwane lɛ, belɛ esa akɛ abu nakai shishijee sɔlemɔ loo asafo lɛ nifeemɔ ni amɛná kɛjɛ Yerusalem sɔlemɔ lɛ loo asafo lɛ ni bɔfoi lɛ diɛŋtsɛ tswa ma shi ni amɛto he gbɛjianɔ lɛ ŋɔɔ lɛ akɛ nɔ ni jɛ ŋwɛi.”—Institute of Ecclesiastical History, Ancient and Modern, Kpo 1, baafai 67-8.
13 Yehowa Odasefoi heɔ yeɔ akɛ ato klɛŋklɛŋ afii oha lɛ mli Yesu sɛɛnyiɛlɔi lɛ asafoi lɛ yɛ ŋwɛi suɔmɔnaa nifeemɔ shishi. Yɛ nakai nifeemɔ lɛ kɛ gbeekpamɔ naa lɛ, mumɔ krɔŋkrɔŋ lɛ ji nɔ ni hala nɔkwɛlɔi lɛ kɛ asafoŋ sɔɔlɔi ni yɔɔ Odasefoi ateŋ ŋmɛnɛ lɛ koni amɛkwɛ asafoŋ saji anɔ.—Bɔfoi lɛ Asaji 20: 28; Filipibii 1:1.
14. (a) Te akwɛ klɛŋklɛŋ afii oha lɛ mli Kristofoi asafoi lɛ anɔ aha tɛŋŋ? (b) Mɛni hewɔ bɔfo Paulo shi Tito yɛ Kreta?
14 Bɔfoi lɛ kɛ onukpai ni yɔɔ Yerusalem lɛ ji mɛi ni kwɛɔ asafoi lɛ anɔ yɛ klɛŋklɛŋ afii oha lɛ mli, eyɛ mli akɛ hii komɛi kwɛɔ hei pɔtɛɛ komɛi anɔ ni amɛbaanyɛ ni amɛkɛ hegbɛi aha mɛi krokomɛi (Bɔfoi lɛ Asaji 14:21-23; 15:1, 2) No hewɔ lɛ, bɔfo Paulo kɛ nitsumɔ wo Kristofonyo nɔkwɛlɔ Tito dɛŋ koni ekwɛ saji komɛi anɔ yɛ Mediteranea ŋshɔkpɔ ni ji Kreta lɛ nɔ. Yɛ enɛ hewɔ lɛ, Paulo kɛɛ Tito akɛ: “Enɛ hewɔ mishio yɛ Kreta, koni oto nii fɛɛ ni eshwɛ lɛ gbɛjianɔ pɛpɛɛpɛ, ni owowoo onukpai yɛ maŋ fɛɛ maŋ mli, taakɛ bɔ ni mikɛɛo momo lɛ.” (Tito 1:5) Wɔbaanyɛ wɔhe wɔye kwraa akɛ famɔi ni akɛ ha yɛ wolo ni akɛyaha Tito lɛ mli lɛ ye bua lɛ koni etsu nakai sane lɛ he nii koni Kristofoi ni yɔɔ jɛmɛ lɛ afee mɛi ni áto amɛ gbɛjianɔ jogbaŋŋ koni amɛsɔmɔ Yehowa.
Mɛni Hewɔ Esa Akɛ Amɛfee Mɛi Ni Ato Amɛ Gbɛjianɔ Jogbaŋŋ Ŋmɛnɛ Lɛ?
15, 16. Yɛ yiŋtoi ni ákɛha yɛ biɛ lɛ hewɔ lɛ, mɛni hewɔ wɔbaanyɛ wɔkɛɛ akɛ mɛi ni Yehowa kpɛlɛɔ amɛnɔ lɛ nyɛŋ ‘amɛkɛ Nyɔŋmɔ ana wekukpaa ni ka amɛkɛ lɛ pɛ teŋ’ yɛ be mli ni ámɛgbɛ ámɛshwa Jamɔi agbɛjianɔtooi sɔrɔtoi lɛ amli lɛ?
15 Átsɔɔ yɛ Ŋmalɛ naa kɛbashi bianɛ akɛ gbɛjianɔtoo kpakpa ji Yehowa tsuji ni hi shi yɛ blema bei amli lɛ kadimɔ nii. No hewɔ lɛ shihilɛ lɛ tamɔ nakai nɔŋŋ ŋmɛnɛ. Ni yiŋtooi ni hi fe fɛɛ yɛ ni no hewɔ ni esa akɛ ŋmɛnɛŋmɛnɛ Yehowa odasefoi lɛ afee mɛi ni ato amɛ gbɛjianɔ jogbaŋŋ lɛ.
16 Mɛi ni Yehowa ekpɛlɛ amɛnɔ lɛ ateŋ mɔ fɛɛ mɔ nyɛŋ ana ‘wekukpaa ni ka mɔ lɛ kɛ Nyɔŋmɔ pɛ teŋ,’ ni yɛ nakai beaŋ nɔŋŋ lɛ amɛfee mɛi ni amɛgbɛ amɛshwa je lɛŋ jamɔi akui sɔrɔtoi lɛ amli. Yehowa biɔ anɔkwale jamɔ ni be eshɛ mɔ ekɛ Babilon Kpeteŋkpele, jeŋ epasa jamɔ maŋtsɛyeli lɛ baaba enaagbee. (Yohane 4:24; Yakobo 1:27; Kpojiemɔ 18:1-18) Agbɛnɛ hu, aatao ekomefeemɔ yɛ anɔkwale Kristofoi ateŋ. Ŋmɛnɛ titri ji be ni esa akɛ ebua amɛnaa awo gbɛjianɔtoo kome mli bɔni afee ni amɛkɛ bɔfo Paulo ŋaawoo lɛ atsu nii kwraa: “Shi, anyɛmimɛi, miikpanyɛ fai yɛ wɔ Nuŋtsɔ Yesu Kristo gbɛi amli, ákɛ nyɛnaabu afee ekome ni mligbalamɔ akaba nyɛteŋ, shi moŋ, nyɛ fɛɛ nyɛyitsoŋ kɛ nyɛjwɛŋmɔ afee ekome.”—1 Korintobii 1:10.
17. Yɛ mɛɛ gbɛ nɔ wiemɔi ni yɔɔ Hebribii 10:24, 25 lɛ tsɔɔ yɛ akɛ esa akɛ Yehowa Nyɔŋmɔ kɛ Yesu Kristo tsuji lɛ fɛɛ afee gbɛjianɔtoo loo asafo kome ko fa?
17 Agbɛnɛ, esaaa akɛ anɔkwale Kristofoi kpooɔ amɛhe naa ni amɛaabua kutuu daa kɛha kpeei. Nakai titri ji ŋmɛnɛ, akɛni nibii agbɛjianɔtoo nɛɛ naagbee lɛ bɛŋkɛɔ hewɔ. (Hebribii 10:24, 25) Eka shi faŋŋ akɛ, kɛ Yehowa Nyɔŋmɔ kɛ Yesu Kristo anɔkwa sɔɔlɔi lɛ aaanyiɛ nakai ŋaawoo ni jɛ mumɔŋ lɛ sɛɛ lɛ, belɛ esa akɛ amɛ fɛɛ amɛfee gbɛjianɔtoo kome mli bii.
18. (a) Mɛɛ gbɛ nɔ 1 Yohane 1:3 tsɔɔ yɛ akɛ esa akɛ Kristofoi ni afɔ amɛ mu lɛ fɛɛ afee ekome yɛ gbɛjianɔtoo loo asafo kome mli? (b) Namɛi ebafata Yesu sɛɛnyiɛlɔi ni akɛ mumɔ efɔ amɛ mu lɛ ahe yɛ nɛkɛ “naagbee be” nɛɛ mli, ni mɛɛ anɔkwasaji yɔɔ ni kɔɔ ekomefeemɔ ni yɔɔ Yehowa Odasefoi fɛɛ ateŋ lɛ he?
18 Ŋmalɛi lɛ biɔ ni Yesu sɛɛnyiɛlɔi ni afɔ amɛ mu lɛ kɛ amɛhe abɔ naanyo. Yɛ enɛ gbɛfaŋ lɛ, bɔfo Yohane ŋma akɛ: “Nɔ ni wɔna ni wɔnu lɛ, no wɔjajeɔ wɔtsɔɔ nyɛ hu, koni nyɛ hu nyɛkɛ wɔ abɔ naanyo; shi naa, wɔnaanyobɔɔ lɛ, Tsɛ lɛ kɛ e-Bi Yesu Kristo lɛ wɔkɛbɔɔ.” (1 Yohane 1:3, NW) Kɛji akɛ Yesu sɛɛnyiɛlɔi ni afɔ amɛ mu lɛ ateŋ mɔ fɛɛ mɔ yɛ ‘wekukpaa ni ka ekɛ Nyɔŋmɔ pɛ teŋ’ ni amɛfeko ekome yɛ gbɛjianɔtoo kome mli lɛ, belɛ te amɛaafee tɛŋŋ amɛna enaanyobɔɔ loo sɛɛfimɔ mli ŋɔɔmɔ lɛ. Amɛbaana enɛ kɛtsɔ gbɛjianɔ ni aaato amɛ lɛ nɔ. Ŋmɛnɛ, “asafo babaoo” ko ni jɛ “tooi krokomɛi” lɛ ateŋ lɛ kɛ amɛhe ebɔ Yesu mumɔŋ sɛɛnyiɛlɔi lɛ ahe. Taakɛ Yesu tsɔɔ bɔ ni nɛkɛ gbɔmɛi ni tamɔ gwantɛŋi nɛɛ ji lɛ mli hewɔ lɛ, wɔ hu wɔbaakpa gbɛ akɛ nɛkɛ “tooi krokomɛi” nɛɛ kɛ esɛɛnyiɛlɔi ni afɔ amɛ mu lɛ baafee ekome koni amɛ fɛɛ amɛfee “kuu kome” yɛ lɛ ni ji “kwɛlɔ kome” lɛ shishi. (Kpojiemɔ 7: 9; Yohane 10:16) Ni nakai pɛ ji bɔ ni wɔnaa yɛ Yehowa tsuji ateŋ yɛ “naagbee be” nɛɛ mli. (Daniel 12:4) Ákɛ nyɛmifeemɔ kome ni ebɔle jeŋ kutruku nɛɛ he lɛ, áto Yehowa Odasefoi fɛɛ gbɛjianɔ jogbaŋŋ koni amɛsɔmɔ Nyɔŋmɔ.—Okɛto 1 Petro 2:17 he.
19. Mɛni hewɔ famɔ ni kɔɔ shiɛmɔ nitsumɔ lɛ he lɛ he nitsumɔ biɔ ekomefeemɔ yɛ gbɛjianɔtoo loo asafo kome ni mumɔ tsɔɔ lɛ gbɛ lɛ mli?
19 Famɔ akɛ ashiɛ ni afee kaselɔi lɛ he nitsumɔ hu biɔ ekomefeemɔ yɛ gbɛjianɔtoo ni efee ekome mli. (Mateo 28:19, 20; Bofoi lɛ Asaji 1:6-8) Kɛji akɛ mɔ fɛɛmɔ ni tsɛɔ ehe Kristofonyo lɛ kɛ ‘Nyɔŋmɔ yɛ wekukpaa ko pɛ mli’ ni ekɛ ehe ebɔ jamɔ kuu fɛɛ kuu ni esumɔɔ he lɛ, belɛ te aaafee tɛŋŋ ni nitsumɔ ni kɔɔ odaseyeli loo shiɛmɔ he lɛ aaanyɛ atsu hu? Ejaakɛ nɔ ni mɛi komɛi baakɛɛ ji “Shibolet” yɛ be mli ni mɛi komɛi miikɛɛ “Sibolet”! (Kojolɔi 12:4.6) Te aaafee tɛŋŋ ni mɛi ni nuɔ saji sɔrɔtoi ni kɛ amɛhe kpaaa gbee nɛɛ aaanyɛ ale nɔ ni amɛaahe amɛye hu? Esa akɛ Kristofoi ni afɔ amɛ mu lɛ ‘abɔ mɔdɛŋ ni amɛhiɛ ekomefeemɔ mumɔ ni fiɔ mɔ yɛ toiŋjɔlɛ kpãa mli lɛ mli,’ ni esa akɛ amɛna “Nuŋtsɔ kome, hemɔkɛyeli kome, baptisimɔ kome; Nyɔŋmɔ kome ni ji mɛi fɛɛ atsɛ” yɛ amɛteŋ. (Efesobii 4:1-6) Esa akɛ gbeekpamɔ aba anɔkwale Kristofoi fɛɛ ateŋ, amɛshiɛmɔ lɛ afee ekome, kɛ́ gbɔmɛi lɛ baanu nɔ ni ja, ní amɛhe anɔkwa Nyɔŋmɔ lɛ amɛyɛ diɛŋtsɛ ní amɛtsɛ Yehowa gbɛi kɛ yiŋtoo akɛ aaahere amɛyiwala. Agbɛnɛ hu, esa akɛ akɛ gbɛjianɔtoo kome ni mumɔ kome tsɔɔ lɛ gbɛ atsu nii yɛ “sanekpakpa” lɛ he anɔkwale shiɛlɔi ni atsuɔ amɛ lɛ mli—Romabii 10:11-15.
20. Mɛɛ gbɛjianɔtoo kome pɛ yɔɔ ni haa Mateo 24:14 baa mli bianɛ, ni mɛɛ odaseyeli yɔɔ ni tsɔɔ akɛ Nyɔŋmɔ sumɔɔ nitsumɔ ni ato he gbɛjianɔ jogbaŋŋ nɛɛ?
20 Agbɛnɛ hu, yɛ Yesu gbalɛ ni kɔɔ “ba ni eba” lɛ kɛ “nibii agbɛjianɔtoo nɛɛ naagbee” lɛ he lɛ, esa akɛ gbɛjianɔtoo kome ni amɛfee ekome ‘ashiɛ maŋtsɛyeli lɛ he sane kpakpa lɛ yɛ shikpɔŋ lɛ fɛɛ nɔ ni akɛye jeŋmaji lɛ fɛɛ odase dani naagbee lɛ aba.’ (Mateo24:3, 14) Ŋmɛnɛ, Yehowa Odasefoi pɛ ji mɛi ni jajeɔ sanekpakpa lɛ akɛ Maŋtsɛyeli lɛ ebɔi nitsumɔ momo kɛjɛ ŋwɛi kɛjɛ 1914, kɛ Yesu Kristo akɛ Maŋtsɛ. Mɛi ni fe 2,650,000 ní áto amɛ gbɛjianɔ jogbaŋŋ yɛ ni jajeɔ Maŋtsɛyeli lɛ he sane lɛ, ni amɛyifalɛ lɛ miiya hiɛ kɛ foi yɛ be fɛɛ mli yɛ Nyɔŋmɔ jɔɔmɔ hewɔ.—Yesaia 43:10-12; 60:22.
21. Mɛni wɔbaasusu he agbɛnɛ yɛ Yehowa gbɛjianɔtoo loo asafo lɛ he?
21 Mɛɛ hegbɛ ji enɛ, yɛ nɛkɛ “naagbee gbii” ni ji jaramɔ bei nɛɛ amli, akɛ mɔ aaafata asafo babaoo ni ato amɛ gbɛjianɔ ni amɛsɔmɔ Yehowa lɛ ahe! (2 Timoteo 3:1) Ŋmalɛ naa nɔdaamɔ nɔ kpakpa ko yɛ ni no hewɔ ni esa akɛ mɛi fɛɛ ni amɛjɛ ámɛtsui fɛɛ mli ámɛtu amɛhe amɛha Nyɔŋmɔ lɛ aya nɔ ni amɛsɔmɔ yɛ anɔkwayeli mli kɛ ewebii ni eto amɛ gbɛjianɔ lɛ. Ni taakɛ wɔbaana lɛ, yiŋtooi kpakpai hu yɛ ní no hewɔ ni esa akɛ wɔkɛ Yehowa gbɛjianɔtoo lɛ atswa wɔsɛɛ be ni yɔɔ shweshweeshwe wɔma shi lɛ.b
[Shishigbɛ niŋmai]
a Ajie kɛjɛ July 16, 1984 Watchtower lɛ mli.
b “Ofainɛ kwɛmɔ October 15, 1983 Watchtower lɛ mli yɛ baafai 28-31.”
Mɛni Obaakɛɛ?
◻ Bɔfoi krɔŋkrɔŋi lɛ tsuɔ nii amɛhaa Yehowa yɛ mɛɛ gbɛ nɔ?
◻ Mɛɛ odaseyeli yɔɔ ni tsɔɔ gbɛjianɔtoo kpakpa ni yɔɔ blema Israel teŋ?
◻ Te ooofee tɛŋŋ otsɔ Ŋmalɛ lɛ nɔ otsɔɔ akɛ ato Kristo Yesu mra be mli kaselɔi lɛ gbɛjianɔ jogbaŋŋ?
◻ Mɛni hewɔ Maŋtsɛyeli Iɛ he sane lɛ shiɛmɔ biɔ ekomefeemɔ yɛ gbɛjianɔtoo kome mli lɛ?
[Mfoniri ni yɔɔ baafa 20]
Ato osɔfoi Iɛ kɛ Levibii lɛ akui ahe gbɛjianɔ ni amɛsɔmɔ Yehowa yɛ David gbii Iɛ amli
[Mfoniri ni yɔɔ baafa 21]
Nɔyeli kuu lɛ kɛ gbɛtsɔɔmɔ ho klɛŋklɛŋ afii oha lɛ mli asafoi ni ato amɛ gbɛjianɔ jogbaŋŋ lɛ