Miishɛjemɔ ni Yehowa Kɛhaa lɛ Mli Gbɛfaŋnɔ ni Wɔɔna

“Wɔhiɛ ni kã nyɛnɔ lɛ gbugbãaa, ejaakɛ wɔle akɛ, bɔ ni nyɛnaa amanehului lɛ eko lɛ, nakai nɔŋŋ kɛ̃ nyɛnáa miishɛjemɔ lɛ hu eko.”—2 KORINTOBII 1:7.

1, 2. Mɛni ji mɛi babaoo ni amɛbatsɔmɔ Kristofoi ŋmɛnɛ lɛ aniiashikpamɔ?

MƐI heei ni kaneɔ Buu-Mɔɔ lɛ bianɛ lɛ ateŋ mɛi pii dara ni amɛbɛ Nyɔŋmɔ anɔkwale lɛ he nilee ko. Ekolɛ nakai eji yɛ ogbɛfaŋ. Kɛ nakai lɛ, kaimɔ bɔ ni onu he oha beni oniiashishinumɔ hiŋmɛii bɔi gbelemɔ lɛ. Akɛ nɔkwɛmɔ nɔ lɛ, beni onu shishi klɛŋklɛŋ kwraa akɛ gbohii lɛ naaa amanehulu, shi moŋ amɛleee nɔ ko nɔ ko lɛ, ani ehaaa bo hejɔɔmɔ? Ni beni obale hiɛnɔkamɔ ni yɔɔ kɛha gbohii lɛ, akɛ abaatee mɛi akpekpei akpei abɔ shi kɛba wala mli yɛ Nyɔŋmɔ jeŋ hee lɛ mli lɛ, ani eshɛjeee omii?—Jajelɔ 9:5, 10; Yohane 5:28, 29.

² Shi shiwoo ni Nyɔŋmɔ kɛha akɛ ebaafo efɔŋ feemɔ sɛɛ ni etsake shikpɔŋ nɛɛ ni etsɔ paradeiso lɛ hu? Beni okase enɛ he nii lɛ, ani eshɛjeee omii ni eeeha ona gbɛkpamɔ ni mli wa waa? Beni obaná ole akɛ eeenyɛ eba akɛ ogboŋ, ni ooonyɛ ona yibaamɔ kɛya nakai shikpɔŋ nɔ Paradeiso ni baa lɛ mli lɛ he nii klɛŋklɛŋ kwraa lɛ, te onu he oha tɛŋŋ? Ŋwanejee ko bɛ he akɛ omli fili bo waa. Hɛɛ, onine eshɛ Nyɔŋmɔ shɛɛ sane ni haa mɔ miishɛjemɔ, ni Yehowa Odasefoi shiɛɔ yɛ je lɛŋ he fɛɛ he amrɔ nɛɛ lɛ nɔ.—Lala 37:9-11, 29; Yohane 11:26; Kpojiemɔ 21:3-5.

 3. Mɛni hewɔ mɛi ni kɛ mɛi krokomɛi wieɔ Nyɔŋmɔ miishɛjemɔ shɛɛ sane lɛ he lɛ hu naa amanehulu lɛ?

³ Shi, beni oka akɛ okɛ mɛi krokomɛi baawie Biblia mli sane lɛ he lɛ, obayoo hu akɛ “jeee mɛi fɛɛ yɔɔ hemɔkɛyeli.” (2 Tesalonikabii 3:2) Ekolɛ otsutsu nanemɛi lɛ ekomɛi ye ohe fɛo yɛ Biblia shiwoi amli hemɔkɛyeli ni oyɔɔ lɛ hewɔ. Aloo ekolɛ awa bo yi po yɛ Yehowa Odasefoi ni oyaa nɔ ofataa amɛhe kɛkaseɔ Biblia lɛ hewɔ. Ekolɛ shitee-kɛ-woo lɛ mli bawa beni obɔi tsakemɔi afeemɔ koni oshihilɛ kɛ Biblia shishitoo mlai akpa gbee lɛ. Ni obabɔi amanehulu ni Satan kɛ eje lɛ kɛbaa mɛi fɛɛ ni kpɛlɛɔ Nyɔŋmɔ miishɛjemɔ lɛ nɔ lɛ anɔ lɛ mli niiashikpamɔ namɔ.

 4. Mɛi heei ni yɔɔ wiemɔ lɛ he miishɛɛ lɛ feɔ amɛnii yɛ amanehulu he yɛ mɛɛ gbɛi sɔrɔtoi anɔ?

⁴ Dɔlɛ sane ji akɛ, taakɛ Yesu gba efɔ̃ shi lɛ, amanehulu haa mɛi komɛi anaji tɔ̃tɔ̃ɔ ni amɛkɛ Kristofoi asafo lɛ kpaa bɔɔ. (Mateo 13:5, 6, 20, 21) Mɛi krokomɛi ŋmɛɔ amɛtsui shi yɛ amanehulu mli kɛtsɔɔ amɛjwɛŋmɔ ni amɛhaa ehiɔ shiwoi ni shɛjeɔ mɔ mii ni amɛkaseɔ he nii lɛ anɔ lɛ nɔ. Yɛ naagbee lɛ, amɛjɔɔ amɛwala nɔ amɛhaa Yehowa ni amɛhaa abaptisiɔ amɛ akɛ e-Bi, Yesu Kristo kaselɔi. (Mateo 28:19, 20; Marko 8:34) Shi yɛ anɔkwale mli lɛ, amanehulu lɛ sɛɛ efooo kɛji abaptisi Kristofonyo ko. Akɛ nɔkwɛmɔ nɔ lɛ, hetsemɔ mli ni aaahi lɛ baanyɛ afee hepelemɔ ni wa kɛha mɔ ko ni kɛ ehe ewo jeŋba shara shihilɛ mli dã. Mɛi krokomɛi hu yɛ ni esa akɛ amɛkpee shitee-kɛ-woo ni jɛ amɛwekumɛi ni heee yeee aŋɔɔ lɛ naa daa. Bɔ fɛɛ bɔ ni amanehulu lɛ ji lɛ, mɛi fɛɛ ni kɛ anɔkwayeli hiɔ shi akɛ mɛi ni ejɔɔ amɛhe nɔ amɛha Nyɔŋmɔ lɛ baanyɛ ana nɔmimaa yɛ nɔ kome he. Amɛbaana Nyɔŋmɔ miishɛjemɔ kɛ yelikɛbuamɔ, yɛ gbɛ krɛdɛɛ nɔ.

“Miishɛjemɔ Fɛɛ Nyɔŋmɔ Lɛ”

 5. Mɛni hu ba Paulo nɔ, kɛfata kaai babaoo mli amanehulu ni ena lɛ he?

⁵ Mɔ ko ni hiɛ sɔ miishɛjemɔ ni Nyɔŋmɔ kɛhaa lɛ waa ji bɔfo Paulo. Yɛ jaramɔ be titri ko ni ekɛkpe yɛ Asia kɛ Makedonia lɛ sɛɛ lɛ, ena miishɛɛ kpele beni enu akɛ Korinto asafo lɛ kɛ wolo ni eŋma ni ekɛkã amɛ lɛ miitsu nii jogbaŋŋ lɛ. Enɛ tsirɛ lɛ ni eŋma amɛ wolo ni ji enyɔ, ni yijiemɔ wiemɔi ni nyiɛ sɛɛ nɛɛ yɛ nakai wolo lɛ mli: “Ajɔɔ Nyɔŋmɔ kɛ wɔ-Nuntsɔ Yesu Kristo tsɛ lɛ, mɔ ni ji musuŋtsɔlɛi atsɛ kɛ miishɛjemɔ fɛɛ Nyɔŋmɔ lɛ, mɔ ni shɛjeɔ wɔmii yɛ wɔmanehului lɛ fɛɛ mli [lɛ].”—2 Korintobii 1:3, 4.

 6. Mɛni wɔkaseɔ kɛjɛɔ Paulo wiemɔi ni yɔɔ 2 Korintobii 1:3, 4 lɛ mli?

⁶ Nɛkɛ wiemɔi ni jɛ mumɔŋ nɛɛ haa wɔleɔ saji babaoo. Nyɛhaa wɔsusua he wɔkwɛa. Kɛ Paulo kɛ yijiemɔ loo shidaa ha Nyɔŋmɔ, loo ekɛ faikpamɔ ko fɔ̃ ehiɛ yɛ ewoji lɛ amli lɛ, bei pii lɛ, wɔnaa akɛ ekɛ hiɛsɔɔ kpele ni eyɔɔ kɛha Yesu, Kristofoi asafo lɛ Yitso lɛ fataa he. (Romabii 1:8; 7:25; Efesobii 1:3; Hebribii 13:20, 21) No hewɔ lɛ, Paulo kɛ ‘Nyɔŋmɔ kɛ wɔ-Nuntsɔ Yesu Kristo tsɛ lɛ’ wie nɛkɛ yijiemɔ wiemɔi nɛɛ. Kɛkɛ ni, ekɛ Hela wiemɔ ni atsɔɔ shishi akɛ “musuŋtsɔlɛi” lɛ tsu nii nɔ ni ji klɛŋklɛŋ kwraa yɛ eniŋmaai lɛ amli. Nɛkɛ wiemɔ nɛɛ jɛ wiemɔ ni akɛtsuɔ nii kɛjieɔ ŋkɔmɔyeli kpo yɛ mɔ kroko amanehulu he lɛ mli. Enɛ hewɔ lɛ Paulo miiwie musuŋtsɔlɛ ni Nyɔŋmɔ yɔɔ kɛha E-tsuji anɔkwafoi ni naa amanehulu lɛ ateŋ mɔ fɛɛ mɔ—mlitsɔlɛ henumɔi ni tsirɛɔ Nyɔŋmɔ ni ejieɔ mɔbɔnalɛ kpo etsɔɔ amɛ lɛ he. Yɛ naagbee lɛ, Paulo kɛ ehiɛ fɔ̃ Yehowa nɔ akɛ nɛkɛ su ni asumɔɔ waa nɛɛ jɛɛhe, yɛ tsɛmɔ ni etsɛ lɛ ‘musuŋtsɔlɛi atsɛ’ lɛ hewɔ.

 7. Mɛni hewɔ abaanyɛ awie akɛ Yehowa ji ‘miishɛjemɔ fɛɛ Nyɔŋmɔ lɛ’?

⁷ Nyɔŋmɔ “musuŋtsɔlɛi” lɛ haa mɔ ni naa amanehulu lɛ naa hejɔlɛ. No hewɔ lɛ, Paulo tee nɔ ewie Yehowa he akɛ “miishɛjemɔ fɛɛ Nyɔŋmɔ.” Enɛ hewɔ lɛ, nɔ̃ miishɛjemɔi fɛɛ ni wɔɔna kɛjɛ nanemɛi heyelilɔi amlihilɛ kpojiemɔ mli lɛ, wɔbaanyɛ wɔkɛ wɔhiɛ afɔ̃ Yehowa nɔ akɛ ejɛɛhe. Miishɛjemɔ diɛŋtsɛ ni sɛɛ tsɛɔ ko kwraa bɛ ni jɛɛɛ Nyɔŋmɔ ŋɔɔ. Kɛfata he lɛ, lɛ ji mɔ ni bɔ gbɔmɔ yɛ lɛ diɛŋtsɛ esubaŋ nɔ, no hewɔ lɛ, ehaa wɔnyɛɔ wɔfeɔ miishɛjelɔi. Ni Nyɔŋmɔ mumɔ krɔŋkrɔŋ lɛ ji nɔ ni kanyaa etsuji ni amɛjieɔ musuŋtsɔlɛ kpo amɛtsɔɔ mɛi ni miishɛjemɔ he ehia amɛ lɛ.

Aatsɔse Wɔ Koni Wɔtsɔmɔ Miishɛjelɔi

 8. Eyɛ mli akɛ jeee Nyɔŋmɔ ji wɔ kaai lɛ ajɛɛhe moŋ, shi mɛɛ hewalɛ ni he yɔɔ sɛɛnamɔ wɔ tsuishiŋmɛɛ yɛ amanehulu mli lɛ naa yɛ wɔnɔ?

⁸ Eyɛ mli akɛ Yehowa Nyɔŋmɔ ŋmɛɔ gbɛ ni kaai sɔrɔtoi baa etsuji anɔkwafoi anɔ moŋ, shi ejeee nɛkɛ kaai nɛɛ ajɛɛhe kɔkɔɔkɔ. (Yakobo 1:13) Shi kɛlɛ, miishɛjemɔ ni ehaa wɔ kɛji wɔŋmɛ wɔtsui shi yɛ amanehulu mli lɛ, baanyɛ atsɔse wɔ koni wɔnu mɛi krokomɛi ahiamɔ nii ahe. Ni mɛni baajɛ mli aba? “Koni wɔ hu wɔnyɛ wɔkɛ miishɛjemɔ, ni Nyɔŋmɔ ŋɔshɛjeɔ wɔ diɛŋtsɛ wɔmii lɛ, ashɛje mɛi ni naa amanehulu fɛɛ amanehulu lɛ amii.” (2 Korintobii 1:4) Enɛ hewɔ lɛ, Yehowa tsɔseɔ wɔ koni wɔfee mɛi ni hãa wɔnanemɛi heyelilɔi kɛ mɛi ni wɔkɛkpeɔ yɛ wɔsɔɔmɔ nitsumɔ lɛ mli lɛ náa emiishɛjemɔ lɛ mli gbɛfaŋnɔ kɛmɔɔ shi, beni wɔkaseɔ Kristo ni ‘wɔshɛjeɔ ŋkɔmɔyelɔi fɛɛ amii lɛ.’—Yesaia 61:2; Mateo 5:4.

 9. (a) Mɛni baaye abua wɔ ni wɔŋmɛ wɔtsui shi yɛ amanehulu mli? (b) Kɛ wɔkɛ anɔkwayeli ŋmɛ wɔtsui shi yɛ amanehulu mli lɛ, eshɛjeɔ mɛi krokomɛi amii yɛ mɛɛ gbɛ nɔ?

⁹ Paulo ŋmɛ etsui shi yɛ amanehului pii ni ena lɛ amli, kɛtsɔ miishɛjemɔ babaoo ni ena kɛjɛ Nyɔŋmɔ ŋɔɔ kɛtsɔ Kristo nɔ lɛ nɔ. (2 Korintobii 1:5) Wɔ hu wɔbaanyɛ wɔna miishɛjemɔ babaoo kɛtsɔ Nyɔŋmɔ shiwoi ni yɔɔ nyam lɛ ni wɔɔjwɛŋ nɔ, kɛ sɔlemɔ ni wɔɔsɔle kɛha emumɔ krɔŋkrɔŋ lɛ sɛɛfimɔ, kɛ na ni wɔɔna akɛ Nyɔŋmɔ eha wɔsɔlemɔi lɛ ahetoo lɛ nɔ. Nakai feemɔ baawo wɔ hewalɛ ni wɔya nɔ wɔfi Yehowa maŋtsɛyeli lɛ sɛɛ, ni wɔha ana Abonsam akɛ amalelɔ. (Hiob 2:4; Abɛi 27:11) Taakɛ Paulo fee lɛ, kɛ wɔkɛ anɔkwayeli ŋmɛ wɔtsui shi yɛ amanehulu fɛɛ amanehulu mli lɛ, esa akɛ wɔkɛ yijiemɔ lɛ fɛɛ aha Yehowa, mɔ ni emiishɛjemɔ haa Kristofoi nyɛɔ amɛyaa nɔ amɛyeɔ anɔkwa yɛ kaa mli lɛ. Anɔkwa Kristofoi atsuishiŋmɛɛ lɛ náa miishɛjemɔ hewalɛ yɛ nyɛmifeemɔ lɛ nɔ, ni ehaa mɛi krokomɛi hu tswaa amɛfai shi akɛ ‘amɛaato amɛtsui shi kɛna nakai amanehului lɛ nɔŋŋ.’—2 Korintobii 1:6.

10, 11. (a) Mɛni ji nibii ni kɛ amanehulu ba blema Korinto asafo lɛ mli lɛ ekomɛi? (b) Te Paulo shɛje Korintobii asafo lɛ mii eha tɛŋŋ, ni mɛɛ hiɛnɔkamɔ ejie lɛ kpo?

¹⁰ Korintobii lɛ ná amɛgbɛfaŋnɔ yɛ amanehului ni baa anɔkwa Kristofoi fɛɛ anɔ lɛ mli. Kɛfata he lɛ, ehe bahia ni amɛna ŋaawoo koni amɛshwie ajwamaŋbɔlɔ ni tsakeee etsui lɛ kɛjɛ asafo lɛ mli. (1 Korintobii 5:1, 2, 11, 13) Enɛ ni amɛfeee, kɛ béi kɛ mligbalamɔi ni yɔɔ asafo lɛ mli ni amɛfooo sɛɛ lɛ kɛ hiɛgbele ba asafo lɛ nɔ. Shi yɛ naagbee lɛ, amɛkɛ Paulo ŋaawoo lɛ tsu nii ni amɛjie anɔkwa tsuitsakemɔ kpo. No hewɔ lɛ, ekɛ miishɛɛ jie amɛyi ni ewie akɛ bɔ ni amɛtsu ewolo lɛ he nii yɛ gbɛ kpakpa nɔ lɛ eshɛje emii. (2 Korintobii 7:8, 10, 11, 13) Ana faŋŋ akɛ, mɔ ni ashwie lɛ kɛjɛ asafo lɛ mli lɛ hu tsake etsui. No hewɔ lɛ Paulo wo amɛ ŋaa akɛ ‘amɛŋɔfa lɛ, ni amɛshɛje emii, koni ŋkɔmɔyeli tuutu akasu nuu nɛɛ tsui.’—2 Korintobii 2:7.

¹¹ Eka shi faŋŋ akɛ, Paulo wolo ni ji enyɔ lɛ shɛje Korinto asafo lɛ mii. Ni enɛ ji eyiŋtoi lɛ ateŋ ekome. Etsɔɔ mli akɛ: “Wɔhiɛ ni kã nyɛnɔ lɛ gbugbãaa, ejaakɛ wɔle akɛ, bɔ ni nyɛnaa amanehului lɛ eko lɛ, nakai nɔŋŋ kɛ̃ nyɛnáa miishɛjemɔ lɛ hu eko.” (2 Korintobii 1:7) Yɛ ewolo lɛ naagbee lɛ, Paulo wo amɛ hewalɛ akɛ: “Nyɛhaa ashɛjea nyɛmii, . . . ni suɔmɔ kɛ hejɔlɛ Nyɔŋmɔ lɛ kɛ nyɛ aaahi shi.”—2 Korintobii 13:11.

12. Mɛɛ hiamɔ nii Kristofoi fɛɛ yɔɔ?

¹² Kwɛ nii ni he hiaa ni wɔkaseɔ kɛjɛɔ enɛ mli! Ehe miihia ni Kristofoi asafo lɛ mli bii fɛɛ “aná miishɛjemɔ” ni Nyɔŋmɔ kɛhaa kɛtsɔɔ e-Wiemɔ, emumɔ krɔŋkrɔŋ lɛ, kɛ eshikpɔŋ nɔ gbɛjianɔtoo lɛ nɔ lɛ “eko.” Ekolɛ miishɛjemɔ he miihia mɛi ni ashwie amɛ kɛjɛ asafo lɛ mli lɛ po, kɛji amɛshwa amɛhe ni amɛjaje amɛgbɛ fɔŋ lɛ. Enɛ hewɔ lɛ, “tsulɔ anɔkwafo kɛ nilelɔ” lɛ eto gbɛjianɔ ni mɔbɔnalɛ yɔɔ mli koni akɛye abua amɛ. Onukpai enyɔ baanyɛ aya mɛi ni ashwie amɛ nɛɛ ateŋ mɛi komɛi aŋɔɔ shikome yɛ afi mli. Ekolɛ nɛkɛ mɛi nɛɛ ejieee atuatsemɔ su kpo, aloo amɛfeee eshai ni yɔɔ hiɛdɔɔ dɔŋŋ, ni ekolɛ ehe miihia ni aye abua amɛ ni amɛtsɔ gbɛi ni he hiaa lɛ anɔ koni ahe amɛ kɛba asafo lɛ mli ekoŋŋ.—Mateo 24:45; Ezekiel 34:16.

Amanehulu ni Paulo Na yɛ Asia

13, 14. (a) Te Paulo wie amanehulu be ni mli wa waa ni ekɛkpe yɛ Asia lɛ he eha tɛŋŋ? (b) Mɛɛ sane ko ni eba ekolɛ eyɔɔ Paulo jwɛŋmɔ mli?

¹³ Anyɛŋ akɛ amanehulu ni Korinto asafo lɛ ena aahu kɛbashi biɛ lɛ ato amanehului babaoo ni ehe bahia ni Paulo aŋmɛ etsui shi yɛ mli lɛ he. Enɛ hewɔ lɛ, enyɛ ekai amɛ akɛ: “Anyɛmimɛi, wɔsumɔɔɔ akɛ wɔŋɔ wɔmanehului ni wɔna yɛ Asia lɛ wɔtee nyɛ, akɛ wɔna nɔ tsɔ̃, fe bɔ ni wɔɔnyɛ po, ni wɔhiɛ kãaa wala nɔ tete; shi moŋ wɔ diɛŋtsɛ wɔna yɛ wɔmli faŋŋ akɛ wɔbaagboi, koni wɔkaŋɔ wɔhiɛ wɔfɔ̃ wɔ diɛŋtsɛ wɔhe nɔ, shi moŋ wɔŋɔfɔ̃ Nyɔŋmɔ ni teeɔ gbohii ashi lɛ nɔ; mɔ hu ni jie wɔ kɛjɛ gbele ni tamɔ nɛkɛ mli, ni ejieɔ wɔ lolo, ni wɔhiɛ kã enɔ akɛ esaa eeejie wɔ kwraa.”—2 Korintobii 1:8-10.

¹⁴ Biblia he nilelɔi komɛi heɔ yeɔ akɛ Paulo miiwie basabasa feemɔ ni ba Efeso, ni kulɛ ebaanyɛ eha Paulo kɛ ehefatalɔi gbɛfalɔi enyɔ ni jɛ Makedonia, ni ji Gaio kɛ Aristarko alaaje amɛwala lɛ he. Anyɛ nɛkɛ Kristofoi enyɔ nɛɛ anɔ ni amɔ̃mɔ̃ amɛ kɛtee shwɛmɔ he ko ni mɛi babaoo eyi jɛmɛ obɔ̃, ni “[amɛmiibolɔ] aaafee ŋmɛlɛtswai enyɔ sɔŋŋ akɛ: ‘Efesobii [anyɔŋmɔyoo] Artemi lɛ kekenam ni!’ ” Yɛ naagbee lɛ, maŋ lɛŋ onukpa ko nyɛ eha mɛi babaoo nɛɛ fee dioo. Eka shi faŋŋ akɛ, Gaio kɛ Aristarko wala he gbeyei ni awo nɛɛ hao Paulo waa diɛŋtsɛ. Yɛ anɔkwale mli lɛ, kulɛ eetao eya jɛmɛ ni ekɛ mɛi babaoo ni amɛye jamɔ he sɛkɛ nɛɛ ayasusu saji ahe, shi aŋmɛɛɛ lɛ gbɛ ni ekɛ ewala awo oshara mli yɛ nɛkɛ gbɛ nɔ.—Bɔfoi lɛ Asaji 19:26-41.

15. Mɛɛ shihilɛ ko ni mli wa waa ekolɛ awieɔ he yɛ 1 Korintobii 15:32?

¹⁵ Shi, ekolɛ benɛ Paulo miiwie shihilɛ ko ni mli wa kwraa fe shihilɛ ni tsɔ̃ hiɛ lɛ he. Paulo bi yɛ eklɛŋklɛŋ wolo ni eŋma eyaha Korintobii lɛ mli akɛ: “Kɛ gbɔmɔ gbɛfaŋ ni mikɛ kooloi awuiyelɔi wuu yɛ, yɛ Efeso lɛ, kulɛ mɛɛ sɛɛnamɔ miyɔɔ?” (1 Korintobii 15:32) Ekolɛ enɛ tsɔɔ akɛ jeee gbɔmɛi ni feɔ amɛnii tamɔ kooloi lɛ pɛ wo Paulo wala he gbeyei, shi moŋ kooloi awuiyelɔi diɛŋtsɛ hu yɛ Efeso shwɛmɔ he lɛ. Bei komɛi lɛ, ahãa awuiyelɔi kɛ kooloi ni hiɛ yɔɔ la nɔ̃ɔ ni akɛ nakai feemɔ gbalaa amɛtoi, beni gbɔmɛi babaoo ni lá he kumai miiye amɛ lɛ miikwɛ. Kɛji Paulo miitsɔɔ akɛ ekɛ kooloi awuiyelɔi diɛŋtsɛ kpe lɛ, no lɛ eka shi faŋŋ akɛ yɛ naagbee lɛ, atsɔ̃ naakpɛɛ gbɛ nɔ ajie lɛ kɛjɛ yiwalɛ gbele mli, tamɔ bɔ ni ahere Daniel yiwala kɛjɛ jatai diɛŋtsɛ adaaŋ lɛ.—Daniel 6:22.

Ŋmɛnɛŋmɛnɛ Beaŋ Nɔkwɛmɔ Nii

16. (a) Mɛni hewɔ Yehowa Odasefoi pii ena nibii ni tamɔ amanehulu ni Paulo na lɛ eko lɛ? (b) Wɔbaanyɛ wɔna nɔmimaa yɛ mɛi ni gboi yɛ amɛhemɔkɛyeli hewɔ lɛ agbɛfaŋ, yɛ mɛni he? (d) Mɛɛ hewalɛ kpakpa gbele ni Kristofoi komɛi jeɔ mli lɛ naa yɛ mɛi anɔ?

¹⁶ Ŋmɛnɛŋmɛnɛ beaŋ Kristofoi pii yɛ ni amɛtsɔmɔ amanehului ni tamɔ nɔ ni Paulo na lɛ amli. (2 Korintobii 11:23-27) Ŋmɛnɛ hu, Kristofoi “[ena] nɔ tsɔ̃, fe bɔ ni [amɛaanyɛ],” ni amɛteŋ mɛi pii kɛ shihilɛi komɛi ekpe ni ‘amɛhiɛ kãaa amɛwala nɔ tete.’ (2 Korintobii 1:8) Mɛi komɛi egboi yɛ gbɔmɔgbelɔi ni kpataa mɛi babaoo ahiɛ, kɛ yiwalɔi adɛŋ. Wɔbaanyɛ wɔna nɔmimaa akɛ Nyɔŋmɔ hewalɛ ni shɛjeɔ mɔ mii lɛ ha amɛnyɛ amɛŋmɛ amɛtsui shi, ni amɛgboi ni amɛtsuii kɛ jwɛŋmɔi ma amɛ hiɛnɔkamɔ lɛ mlibaa nɔ shiŋŋ, ekɔɔɔ he akɛ eji ŋwɛi hiɛnɔkamɔ loo shikpɔŋ nɔ nɔ̃. (1 Korintobii 10:13; Filipibii 4:13; Kpojiemɔ 2:10) Yɛ shihilɛi krokomɛi amli lɛ, Yehowa kudɔ saji ni tee nɔ lɛ, ni ajie wɔnyɛmimɛi lɛ kɛjɛ gbele mli. Ŋwanejee ko bɛ he akɛ, mɛi ni ajie amɛ yɛ nɛkɛ gbɛ nɔ lɛ ená hekɛnɔfɔɔ babaoo yɛ “Nyɔŋmɔ ni teeɔ gbohii ashi lɛ” mli. (2 Korintobii 1:9) Sɛɛ mli lɛ, amɛnyɛ amɛwie kɛ nɔmimaa babaoo beni amɛkɛ mɛi krokomɛi wieɔ Nyɔŋmɔ shɛɛ sane ni shɛjeɔ mɔ mii lɛ he lɛ.—Mateo 24:14.

17-19. Mɛɛ niiashikpamɔi tsɔɔ akɛ wɔnyɛmimɛi ni yɔɔ Rwanda lɛ naa Nyɔŋmɔ miishɛjemɔ lɛ eko?

¹⁷ Nyɛsɛɛ nɛɛ, wɔ suɔmɔ nyɛmimɛi ni yɔɔ Rwanda lɛ tsɔ̃ shihilɛ ko ni tamɔ nɔ ni ba Paulo kɛ ehefatalɔi lɛ anɔ lɛ nɔŋŋ mli. Mɛi pii laaje amɛwala, shi Satan mɔdɛŋbɔɔi lɛ nyɛɛɛ afite amɛ hemɔkɛyeli lɛ. Shi moŋ, wɔnyɛmimɛi ni yɔɔ shikpɔŋ nɛɛ nɔ lɛ ená Nyɔŋmɔ miishɛjemɔ lɛ mli niiashikpamɔ yɛ gbɛi babaoo nɔ. Beni Tutsibii kɛ Hutubii ni yɔɔ Rwanda lɛ ateŋ gbɔmɔgbee lɛ yaa nɔ lɛ, Hutubii komɛi yɛ ni kɛ amɛwala wo oshara mli ni amɛkɛbu Tutsibii ahe, kɛ Tutsibii hu ni bu Hutubii ahe. Yiwalɔi gbe amɛteŋ mɛi komɛi, yɛ amɛnanemɛi heyelilɔi ni amɛbu amɛhe lɛ hewɔ. Akɛ nɔkwɛmɔ nɔ lɛ, agbe Hutu Odasefonyo ko ni atsɛɔ lɛ Gahizi, yɛ nyɛmi yoo Tutsinyo ni atsɛɔ lɛ Chantal ni ekɛ lɛ to lɛ hewɔ. Nyɛmi yoo Hutunyo ko ni atsɛɔ lɛ Charlotte, kɛ Chantal wu, Jean, ni ji Tutsinyo lɛ, to he kroko kwraa. Jean kɛ nyɛmi nuu Tutsinyo kroko tee amɛhe yɛ lasu tsɔmɔ-he agbo ko mli gbii 40 sɔŋŋ, ni amɛjeɔ kpo be kukuoo pɛ, kɛ́ duŋ wo. Yɛ nɛkɛ be nɛɛ mli fɛɛ lɛ, Charlotte hã amɛ niyenii ni ebu amɛhe hu, eyɛ mli akɛ he ni amɛyɔɔ lɛ bɛŋkɛ Hutubii aŋsara ko. Kɛ okwɛ baafa nɛɛ, obaana Jean kɛ Chantal mfoniri, ní amɛfee ekome ekoŋŋ, ni amɛdaa shi waa akɛ amɛnanemɛi jálɔi Hutubii lɛ ‘kɛ amɛhe wo gbele mli yɛ amɛwala hewɔ,’ taakɛ Priska kɛ Akwila fee amɛha bɔfo Paulo lɛ.—Romabii 16:3, 4.

¹⁸ Adafitswaa wolo ni atsɛɔ lɛ Intaremara lɛ jie Hutu Odasefonyo kroko, Rwakabubu yi, yɛ enanemɛi heyelilɔi Tutsibii ni ebaa amɛyi lɛ hewɔ.a Ewie akɛ: “Mɔ kroko hu ji Rwakabubu, Yehowa Odasefoi ateŋ mɔ ko, ni tee nɔ ekɛ mɛi to yɛ hei sɔrɔtoi yɛ enyɛmimɛi lɛ ateŋ lɛ (nakai ji bɔ ni nanemɛi heyelilɔi lɛ tsɛɔ amɛhe). Ekɛ gbi muu fɛɛ tsuɔ nii kɛtereɔ niyenii kɛ nu kɛyahaa amɛ, eyɛ mli akɛ fɛ̃fɛ̃ yɛ ehe. Shi Nyɔŋmɔ ha ena hewalɛ sɔrɔto ko kɛfee enɛ.”

¹⁹ Agbɛnɛ, susumɔ Hutubii gbalashihilɛ mli hefatalɔi ni atsɛɔ amɛ Nicodeme kɛ Athanasie, ni yɔɔ wiemɔ lɛ he miishɛɛ lɛ hu he okwɛ. Dani gbɔmɔgbee lɛ baaje shishi lɛ, no mli lɛ gbalashihilɛ mli hefatalɔi nɛɛ kɛ Tutsinyo Odasefonyo ko ni atsɛɔ lɛ Alphonse kaseɔ Biblia lɛ. Amɛkɛ amɛwala wo oshara mli ni amɛkɛ Alphonse to amɛshia lɛ mli. Sɛɛ mli lɛ, amɛna akɛ shia lɛ mli bɛ shweshweeshwe ejaakɛ amɛkutsoŋbii Hutubii lɛ le amɛnaanyo Tutsinyo nɛɛ. No hewɔ lɛ, Nicodeme kɛ Athanasie kɛ Alphonse to bu ko mli yɛ amɛyale lɛ mli. Ŋaa gbɛ kpakpa nɛ, ejaakɛ akutsoŋbii lɛ bɔi shia lɛ baa daa gbi ni amɛmiitao Alphonse. Beni eyɔɔ bu nɛɛ mli gbii 28 sɔŋŋ lɛ, Alphonse jwɛŋ Biblia mli saji tamɔ nɔ ni kɔɔ Rahab, mɔ ni kɛ Israelbii enyɔ to etsu ŋsɛŋdo mli yɛ Yeriko lɛ he lɛ ahe. (Yoshua 6:17) Ŋmɛnɛ, Alphonse miiya nɔ eesɔmɔ lolo yɛ Rwanda akɛ sanekpakpa shiɛlɔ, ni edaa shi waa akɛ e-Biblia kaselɔi Hutubii lɛ kɛ amɛwala wo oshara mli yɛ ehewɔ. Ni Nicodeme kɛ Athanasie hu? Amrɔ nɛɛ amɛji Yehowa Odasefoi ni abaptisi amɛ, ni amɛkɛ mɛi fe 20, ni yɔɔ wiemɔ lɛ he miishɛɛ feɔ Biblia mli nikasemɔ.

20. Yehowa eshɛje wɔnyɛmimɛi ni yɔɔ Rwanda lɛ amii yɛ mɛɛ gbɛ nɔ, shi mɛɛ hiamɔ ko amɛteŋ mɛi babaoo kã he amɛyɔɔ lolo?

²⁰ Beni Rwanda gbɔmɔgbee lɛ je shishi lɛ, no mli lɛ sanekpakpa jajelɔi 2,500 ji mɛi ni yɔɔ maŋ lɛ mli. Eyɛ mli akɛ mɛi ohai abɔ laaje amɛwala aloo shihilɛ lɛ ha amɛjo foi kɛshi maŋ lɛ mli moŋ, shi Odasefoi lɛ ayifalɛ etee hiɛ kɛteke mɛi 3,000. No ji odaseyeli ni tsɔɔ akɛ Nyɔŋmɔ shɛje wɔnyɛmimɛi lɛ amii lɛlɛŋ. Ni awusãi kɛ okulafoi babaoo ni yɔɔ Yehowa Odasefoi ateŋ lɛ hu? Eka shi faŋŋ akɛ, mɛnɛɛmɛi miina amanehulu lolo, ni ehe miihia ni ashɛje amɛmii. (Yakobo 1:27) Ja gbohiiashitee lɛ eba yɛ Nyɔŋmɔ jeŋ hee lɛ mli dani abaatsumɔ amɛhiɛaŋ yaafonui fɛɛ kɛmɔ shi. Shi kɛlɛ, kɛtsɔ amɛnyɛmimɛi asɔɔmɔ, kɛ “miishɛjemɔ fɛɛ Nyɔŋmɔ lɛ” jalɔi ni amɛji lɛ nɔ lɛ, amɛnyɛɔ amɛkpeeɔ shihilɛ lɛ naa.

21. (a) Nɛgbɛ hu Nyɔŋmɔ miishɛjemɔ he ehia wɔnyɛmimɛi lɛ waa yɛ, ni mɛni ji gbɛi komɛi ni wɔ fɛɛ wɔɔnyɛ wɔtsɔ nɔ wɔye wɔbua? (Kwɛmɔ akrabatsa ni ji “Miishɛjemɔ yɛ Afii Ejwɛ Tawuu Be Mli.”) (b) Mɛɛ be abaatsu miishɛjemɔ ni he hiaa wɔ lɛ he nii kwraa kɛmɔ shi?

²¹ Wɔnyɛmimɛi lɛ miiya nɔ amɛkɛ anɔkwayeli miisɔmɔ Yehowa yɛ hei krokomɛi babaoo, tamɔ Eritrea, Singapore, kɛ tsutsu Yugoslavia nɛkɛ, yɛ amanehulu ni amɛnaa lɛ fɛɛ sɛɛ. Eba akɛ wɔɔye wɔbua nyɛmimɛi nɛɛ kɛtsɔ fai ni wɔɔkpa daa koni amɛna miishɛjemɔ lɛ nɔ. (2 Korintobii 1:11) Ni eba hu akɛ wɔkɛ anɔkwayeli aaaŋmɛ wɔtsui shi aahu kɛyashi be mli ni Nyɔŋmɔ baatsɔ Yesu Kristo nɔ ‘atsumɔ wɔhiɛaŋ yaafonui fɛɛ’ kwraa kɛmɔ shi. Kɛkɛ lɛ wɔbaaná miishɛjemɔ ni Yehowa kɛaaha yɛ ejalɛ jeŋ hee lɛ mli lɛ mli niiashikpamɔ diɛŋtsɛ kɛmɔ shi kwraa.—Kpojiemɔ 7:17; 21:4; 2 Petro 3:13.

[Shishigbɛ niŋmaa]

Ani Ole?

◻ Mɛni hewɔ atsɛɔ Yehowa akɛ ‘miishɛjemɔ fɛɛ Nyɔŋmɔ lɛ’?

◻ Te esa akɛ wɔsusu amanehului ahe wɔha tɛŋŋ?

◻ Namɛi wɔbaanyɛ wɔha amɛ miishɛjemɔ?

◻ Abaatsu miishɛjemɔ ni he hiaa wɔ lɛ he nii kɛmɔ shi yɛ mɛɛ gbɛ nɔ?

[Mfoniri ni yɔɔ baafa 17]

Eyɛ mli akɛ Tutsibii Odasefoi ji Jean kɛ Chantal moŋ, shi Hutubii Odasefoi kɛ amɛ to yɛ hei sɔrɔtoi yɛ gbɔmɔgbee ni tee nɔ yɛ Rwanda lɛ mli

[Mfoniri ni yɔɔ baafa 17]

Yehowa Odasefoi yaa nɔ amɛkɛ Nyɔŋmɔ shɛɛ sane ni shɛjeɔ mɔ mii lɛ haa amɛkutsoŋbii yɛ Rwanda