Fɔlɔi, Nyɛnaa Nyɛbii lɛ Ahe Miishɛɛ

“Hã otsɛ kɛ onyɛ mii ashɛ amɛhe.”—ABƐI 23:25.

 1. Mɛni baaha fɔlɔi ana amɛbii ahe miishɛɛ?

KWƐ bɔ ni eyɔɔ fɛo akɛ aaana akɛ tso bibioo ko eda ni etsɔ̃ tso agbo fɛfɛo ni haa hɔ̃lɔ̃—titri lɛ kɛji bo odũ ni okwra lɛ! Nakai nɔŋŋ hu fɔlɔi ni kwɛɔ amɛbii ni amɛdaraa ni amɛbatsɔmɔɔ Nyɔŋmɔ sɔɔlɔi lɛ naa amɛhe miishɛɛ babaoo diɛŋtsɛ, taakɛ Biblia mli abɛbua lɛ kɛɔ lɛ, akɛ: “Jalɔ tsɛ aaanya babaoo; ni mɔ ni fɔɔ bi nilelɔ lɛ, emii aaashɛ ehe yɛ ehewɔ. Hã otsɛ kɛ onyɛ mii ashɛ amɛhe, ni mɔ ni fɔo lɛ hu anya.”—Abɛi 23:24, 25.

2, 3. (a) Mɛɛ gbɛ nɔ fɔlɔi baatsɔ̃ atsi amɛhe kɛjɛ haomɔ kɛ awerɛhoyeli he? (b) Mɛni he hiaa tsei bibii kɛ gbekɛbii hu bɔni afee ni amɛtsɔmɔ miishɛɛ jɛɛhe?

² Ni kɛlɛ, “jalɔ” kɛ “nilelɔ” ni gbekɛ ko aaatsɔ̃ lɛ baaa trukaa kɛkɛ. Mɔdɛŋbɔɔ babaoo he miihia koni akɛye abua gbekɛbii lɛ ni amɛkatsɔmɔ “haomɔ” kɛ “tsuiyeli” jɛɛhe, tamɔ bɔ ni tso bibioo kwramɔ kɛyashi eeetsɔ tso agbo fɛfɛo lɛ biɔ nitsumɔ lɛ. (Abɛi 17:21, 25) Akɛ nɔkwɛmɔ nɔ lɛ, tsei ni akɛaawaje tso bibioo ni kwɛ̃ɔ lɛ baanyɛ aha eda trɔmɔɔ ni ehe awa hu. Ehe miihia ni ashwie nɔ nu daa, ni ehe baahia ni abu tso bibioo ni kwɛ̃ɔ lɛ he kɛjɛ kooloi bibii ni baanyɛ agbe lɛ lɛ ahe. Naagbee lɛ, ehe saamɔ yeɔ ebuaa ni anaa tso ni yɔɔ fɛo.

³ Nyɔŋmɔ Wiemɔ lɛ jieɔ lɛ kpo akɛ nibii tamɔ tsɔsemɔ ni Nyɔŋmɔ gbeyeishemɔ yɔɔ mli, nu ni ji Biblia mli anɔkwale lɛ ni aaahã amɛ babaoo, hebuu kɛmiijɛ jeŋba mli niseniianifeemɔi ahe, kɛ kãmɔ ni jɛ suɔmɔ mli, ni akɛaajie subaŋi gbohii kɛjɛ amɛhe lɛ he miihia gbekɛbii lɛ. Kɛha hiamɔ nii nɛɛ ahe nitsumɔ lɛ, awoɔ tsɛmɛi lɛ titri hewalɛ akɛ amɛtsɔse amɛbii lɛ “yɛ Nuntsɔ [Yehowa, NW] tsɔsemɔ kɛ ŋaawoo lɛ mli.” (Efesobii 6:4) Mɛni enɛ feemɔ biɔ?

Yehowa Wiemɔ lɛ Nɔmimaa

 4. Mɛɛ gbɛnaa nii kã fɔlɔi anɔ yɛ amɛbii agbɛfaŋ, ni mɛni he hiaa dani amɛbaanyɛ amɛtsu he nii?

⁴ “Nuntsɔ [Yehowa, NW] tsɔsemɔ kɛ ŋaawoo” tsɔɔ wɔ susumɔ ni wɔɔkudɔ ni ekɛ Yehowa suɔmɔnaa nii akpa gbee. Belɛ, esa akɛ fɔlɔi lɛ adũ bɔ ni Yehowa susuɔ yɛ saji ahe lɛ amɛwo amɛbii bibii lɛ ajwɛŋmɔi amli. Ni esa akɛ amɛkase Nyɔŋmɔ nɔkwɛmɔ nɔ ni ji kãmɔ ni jɛ musuŋtsɔlɛ mli, loo tsɔsemɔ ni akɛjajeɔ mɔ lɛ. (Lala 103:10, 11; Abɛi 3:11, 12) Shi dani fɔlɔi baanyɛ afee enɛ lɛ, esa akɛ amɛ diɛŋtsɛ lɛ amɛle Yehowa wiemɔi jogbaŋŋ, taakɛ Nyɔŋmɔ gbalɔ Mose wo blema Israelbii lɛ aŋaa lɛ, akɛ: “Nɛkɛ wiemɔi [ni jɛ Yehowa ŋɔɔ] nɛɛ ni miwoɔo he kita ŋmɛnɛ gbi nɛɛ akã otsui nɔ.”—5 Mose 6:6. (Wɔma efã ko nɔ mi.)

 5. Mɛɛ be, ni mɛɛ gbɛ nɔ esa akɛ Israelbii ni ji fɔlɔi lɛ atsɔse amɛbii yɛ, ní ‘ajwɛŋ nɔ atsɔɔ’ lɛ tsɔɔ mɛni?

⁵ Biblia lɛ kasemɔ daa, enɔjwɛŋmɔ, kɛ sɔlemɔ wulaa fɔlɔi koni amɛtsu fãmɔ ni Mose tsa nɔ ekɛha lɛ he nii, akɛ: “Ni ojwɛŋ [Yehowa wiemɔi lɛ] anɔ otsɔɔ obii, ni owie he, beni ota shi yɛ oshia lɛ kɛ beni onyiɛ gbɛ teŋ kɛ beni okã shi kɛ beni ote shi.” Hebri wiemɔ ni atsɔɔ shishi akɛ ‘ojwɛŋ nɔ otsɔɔ’ lɛ shishi ji “ni atĩ mli,” “ni akɛɛ aahu shii abɔ,” “ni anyɛ nɔ awo jwɛŋmɔ mli jogbaŋŋ.” Kadimɔ bɔ ni Mose tee nɔ ema bɔ ni ehe hiaa ni ahã Yehowa wiemɔi aye klɛŋklɛŋ gbɛhe lɛ nɔ mi eha lɛ: “Ni oŋɔfee kaimɔ nɔ ofĩ onineshi, ni amɛtsɔmɔ hiɛnaa-taramɔ nii yɛ ohiŋmɛii ateŋ; ni oŋma yɛ oshinaa tsei kɛ ogboi ahe!” Eyɛ faŋŋ akɛ, Yehowa biɔ ni fɔlɔi ajɛ suɔmɔ mli amɛsusu amɛbii ahe daa!—5 Mose 6:7-9. (Wɔma efã ko nɔ mi.)

 6. Mɛni esa akɛ fɔlɔi ajwɛŋ nɔ atsɔɔ amɛbii, ni mɛɛ sɛɛnamɔ baajɛ mli aba?

⁶ Mɛni ji Yehowa “wiemɔi nɛɛ” ni esa akɛ fɔlɔi ajwɛŋ nɔ atsɔɔ amɛbii lɛ? Etsɛko tsɔ̃ ni Mose tĩ nɔ ni afɔɔ lɛ tsɛmɔ akɛ Kitai Nyɔŋma, ní kitai ni awo akɛ akagbe gbɔmɔ, akabɔ ajwamaŋ, akaju, akaye amale odase, ni hiɛ akakɔ̃ mɔ ko nɔ ko nɔ lɛ fata he lɛ mli eha amɛ. Nɛkɛ jeŋba he taomɔ nii nɛɛ, kɛ kita hu ni awo akɛ “suɔmɔ Yehowa, o-Nyɔŋmɔ lɛ, kɛ otsui fɛɛ kɛ osusuma fɛɛ kɛ ohewalɛ fɛɛ” lɛ, ji nibii titrii ni esa akɛ Israelbii ni ji fɔlɔi lɛ kɛtsɔse amɛbii. (5 Mose 5:6-21; 6:1-5) Ani okpɛlɛŋ nɔ akɛ enɛ ji nitsɔɔmɔ ni he hiaa gbekɛbii ŋmɛnɛ?

 7. (a) Akɛ gbekɛbii toɔ mɛni he yɛ Biblia lɛ mli? (b) Mɛni he wɔbaasusu agbɛnɛ?

⁷ Akɛɛ Israelnyo ni ji tsɛ lɛ akɛ: “Oŋa aaatamɔ weintso ni woɔ yibii yɛ owe lɛ, obii lɛ aaatamɔ mutsei bibii kɛaabɔle okpɔlɔ lɛ.” (Lala 128:3) Ni kɛlɛ, kɛ fɔlɔi aaaná amɛ “tsei bibii” lɛ ahe miishɛɛ moŋ fe ni amɛaaye amɛhe awerɛho lɛ, no lɛ esa akɛ amɛna amɛbii lɛ ahe miishɛɛ daa gbi. (Abɛi 10:1; 13:24; 29:15, 17) Nyɛhaa wɔpɛia gbɛ ni fɔlɔi baanyɛ atsɔ nɔ atsɔse amɛbii, ni amɛshwie amɛnɔ nu yɛ mumɔŋ, amɛbu amɛhe, ni amɛjɛ suɔmɔ mli amɛkã amɛ, bɔ ni eeeha amɛna amɛhe miishɛɛ diɛŋtsɛ lɛ he wɔkwɛa.

Tsɔsemɔ Kɛmiijɛ Gbekɛbiiashi

 8. (a) Namɛi tsu nii akɛ tsei ni akɛmamɔ̃ shi kɛwaje Timoteo? (b) Mɛɛ be tsɔsemɔ lɛ je shishi, ni mɛni jɛ mli kɛba?

⁸ Susumɔ Timoteo, mɔ ni kɛ wɔɔkɛɛ lɛ, ená sɛɛfimɔ kɛjɛ tsei enyɔ ni akɛmamɔ̃ shi shiŋŋ kɛwaje lɛ—ni ji enyɛ kɛ enaa ŋɔɔ lɛ he okwɛ. Akɛni Helanyo ji Timoteo tsɛ, ni eka shi faŋŋ hu akɛ ejeee heyelilɔ hewɔ lɛ, enyɛ Eunike, ni ji Yudayoo lɛ, kɛ enaa Loise, ji mɛi ni tsɔse gbekɛ nuu lɛ ‘kɛjɛ egbekɛbiiashi yɛ ŋmalɛi krɔŋkrɔŋi lɛ amli.’ (2 Timoteo 1:5; 3:15; Bɔfoi lɛ Asaji 16:1) Awo mɔdɛŋbɔɔ ni amɛkɛtsɔɔ Timoteo “[naakpɛɛ] nii ni [Yehowa] etsu” lɛ ahe nii—beni eji abifao po lɛ—he nyɔmɔ babaoo. (Lala 78:1, 3, 4) Timoteo batsɔ maŋsɛɛ sanekpakpa shiɛlɔ yɛ shikpɔji ni yɔɔ shɔŋŋ nɔ, ekolɛ beni ekã he eji obalanyo ni yeko afii nyɔŋmai enyɔ lolo lɛ, ni ena gbɛfaŋnɔ ni he hiaa yɛ mra be mli Kristofoi asafoi lɛ ahewalɛwoo mli.—Bɔfoi lɛ Asaji 16:2-5; 1 Korintobii 4:17; Filipibii 2:19-23.

 9. Gbekɛbii baanyɛ akase bɔ ni amɛaafee amɛjo heloonaa ninamɔ he tsɔne lɛ naa foi yɛ mɛɛ gbɛ nɔ?

⁹ Fɔlɔi, mɛɛ tsei ni akɛmamɔ̃ shi ni akɛwajeɔ tsei bibii lɛ nɛkɛ nyɛji? Akɛ nɔkwɛmɔ nɔ lɛ, ani nyɛmiisumɔ ni nyɛbii lɛ ana heloonaa nii ahe jwɛŋmɔ ni ŋmɛɔ pɛpɛɛpɛ? No lɛ esa akɛ nyɛfee nɔkwɛmɔ nɔ kpakpa, ni nyɛkadi lala-tswaa tsɔnei heei ni fe fɛɛ ni eba loo nibii krokomɛi ni he ehiaaa nyɛ diɛŋtsɛ lɛ asɛɛ. Kɛji nyɛhala akɛ nyɛaadi heloonaa sɛɛnamɔi asɛɛ lɛ, no lɛ nyɛhiɛ akafea nyɛ yaa kɛji nyɛbii lɛ miikase nyɛ. (Mateo 6:24; 1 Timoteo 6:9, 10) Lɛlɛŋ, kɛji tsei ni akɛwaje tsei bibii lɛ bɛ trɔmɔɔ lɛ, te amɛaafee tɛŋŋ amɛdara trɔmɔɔ hu?

10. Namɔ gbɛtsɔɔmɔ esa akɛ fɔlɔi atao sɛɛ gbɛ be fɛɛ be, ni mɛɛ subaŋ esa akɛ amɛná?

¹⁰ Fɔlɔi ni naa amɛbii ahe miishɛɛ lɛ baatao ŋwɛi yelikɛbuamɔ sɛɛ gbɛ daa koni amɛkɛtsɔse amɛ, ni amɛsusu nɔ ni hi fe fɛɛ kɛha amɛbii lɛ yɛ mumɔŋ lɛ he be fɛɛ be. Yoo ko ni hiɛ bii ejwɛ wie akɛ: “Dani wɔɔfɔ wɔbii lɛ po lɛ, wɔsɔleɔ wɔbiɔ Yehowa daa akɛ eye ebua wɔ ni wɔfee fɔlɔi kpakpai, ni e-Wiemɔ lɛ akudɔ wɔ, ni wɔkɛtsu nii yɛ wɔshihilɛ mli.” Ekɛfata he akɛ: “ ‘Yehowa baa klɛŋklɛŋ’ ní wɔkɛɔ lɛ jeee wiemɔ folo kɛkɛ, shi moŋ nakai wɔhiɔ shi wɔhaa.”—Kojolɔi 13:8.

“Nu” ni Aaaha Amɛ Daa

11. Mɛni he hiaa tsei bibii kɛ gbekɛbii hu kɛha dalɛ?

¹¹ Ehe hiaa ni ashwie tsei bibii anɔ nu titri be fɛɛ be, taakɛ bɔ ni tsei ni kwɛ̃ɔ jogbaŋŋ yɛ faa toi lɛ tsɔɔ lɛ. (Okɛto Kpojiemɔ 22:1, 2 he.) Abifabii hu baaya hiɛ yɛ mumɔŋ kɛji ahãa amɛ nu ni ji Biblia mli anɔkwale lɛ be fɛɛ be. Shi esa akɛ fɔlɔi lɛ asusu be sɛɛjɛkɛmɔ ni gbekɛ lɛ jwɛŋmɔ nyɛɔ emɔ̃ɔ nii lɛ he. Ekolɛ nitsɔɔmɔ bei ni sɛɛ kɛlɛɛɛ, ni aaafee lɛ kpitiokpitio lɛ baamɔ shi jogbaŋŋ fe nitsɔɔmɔ bei fioo ni sɛɛ kɛ. Kaasusu akɛ sɛɛnamɔ bɛ bei ni sɛɛ kɛɛɛ nɛɛ ahe tsɔ̃. Be ni aaana ni akɛ amɛ afee ekome lɛ he miihia koni eha tsakpaa, ni ji ekomefeemɔ ni Ŋmalɛi lɛ woɔ he ŋaa yɛ be kɛ bei amli lɛ, akã fɔlɔ lɛ kɛ ebi lɛ teŋ.—5 Mose 6:6-9; 11:18-21; Abɛi 22:6.

12. Mɛɛ sɛɛnamɔ yɔɔ sɔlemɔ ni akɛ gbekɛbii sɔleɔ lɛ he?

¹² Nɛkɛ be ni anaa ahaa gbekɛbii nɛɛ ekome baanyɛ afee gbɛkɛnaashi. Gbekɛ yoo ko kaiɔ akɛ: “Mifɔlɔi taraa wɔ saatso lɛ najiashigbɛ daa gbɛkɛ ni wɔ diɛŋtsɛ wɔsɔleɔ ni amɛboɔ wɔ toi.” Gbekɛ yoo kroko hu wie sɛɛnamɔ ni yɔɔ enɛ he lɛ he akɛ: “Enɛ ha ebatsɔ̃ misubaŋ akɛ misɔleɔ mihaa Yehowa daa gbɛkɛ dani miwɔɔ.” Kɛ gbekɛbii lɛ nuɔ ni amɛfɔlɔi miiwie Yehowa he ni amɛmiisɔle amɛmiiha lɛ daa gbi lɛ, ebafeɔ mɔ ko ni yɔɔ diɛŋtsɛ kɛhaa amɛ. Obalanyo ko wie akɛ: “Minyɛɔ miŋaa mihiŋmɛii ni misɔleɔ mihaa Yehowa, ni minaa lɛ akɛ mɔ ko diɛŋtsɛ ni tamɔ minii. Mifɔlɔi eye amɛbua mi ni mina akɛ Yehowa yɛ gbɛfaŋnɔ yɛ nɔ fɛɛ nɔ ni wɔfeɔ loo wɔkɛɔ lɛ mli.”

13. Mɛni hu baanyɛ afata be ni akɛfeɔ nikasemɔ daa lɛ he?

¹³ Fɔlɔi lɛ baanyɛ amɛkɛ nibii pii ni anyɛɔ afeɔ diɛŋtsɛ afata be ni ato kɛha daa gbi nitsɔɔmɔ lɛ he, koni eye ebua gbekɛbii lɛ ni amɛnu nu ni ji Biblia mli anɔkwale lɛ. Fɔlɔi ni yɔɔ bii enyɔ ni yeko afii nyɔŋma kɛ etɛ lɛ wie akɛ: “Wɔkɛ bɔ ni ataraa shi dioo yɛ Maŋtsɛyeli Asa lɛ nɔ lɛ he tsɔsemɔ bɔi gbekɛbii enyɔ lɛ fɛɛ hamɔ kɛjɛ be ni amɛye otsii fioo ko pɛ.” Tsɛ ko wie nɔ ni eweku lɛ feɔ lɛ he akɛ: “Wɔŋmalaa Biblia mli woji lɛ fɛɛ wɔwoɔ woji bibii anɔ, ni wɔbɔɔ mɔdɛŋ akɛ wɔbaato naa pɛpɛɛpɛ, ni wɔtoɔ naa ni mɔ fɛɛ mɔ naa mli gbɛfaŋnɔ. Gbekɛbii lɛ sumɔɔ ni wɔfee enɛ be fɛɛ be.” Wekui pii kɛ nitsɔɔmɔ be kuku fataa amɛ niyeli he, kɛtsɔɔ hiɛ loo yɛ niyenii lɛ sɛɛ. Tsɛ ko wie akɛ: “Gbɛkɛ niyeli be ji be ni hi waa kɛha wɔ ni wɔkɛsusuɔ daa gbi Biblia ŋmalɛ lɛ he.”

14. (a) Mɛɛ nifeemɔi ni he yɔɔ sɛɛnamɔ yɛ mumɔŋ abaanyɛ ahã gbekɛbii lɛ ana mli gbɛfaŋnɔ? (b) Mɛɛ nyɛmɔi gbekɛbii yɔɔ kɛha nikasemɔ?

¹⁴ Gbekɛbii sumɔɔ Biblia mli saji ni awie he jogbaŋŋ yɛ My Book of Bible Stories wolo lɛ mli lɛ toiboo.a “Beni gbekɛbii lɛ darako lɛ,” taakɛ gbalashihilɛ mli hefatalɔi komɛi wie lɛ, “wɔkɛ amɛ kaseɔ nikasemɔ kome kɛjɛɔ Bible Stories wolo lɛ mli, no sɛɛ lɛ gbekɛbii lɛ saa amɛhe tamɔ bɔ ni yɔɔ wolo lɛ mli lɛ, ni amɛfeɔ mɛi ni yɔɔ mli lɛ ahe mfoniri tamɔ gbekɛbii adrama. Amɛsumɔɔ waa, ni bei pii lɛ amɛsumɔɔ ni amɛfee nɔ ni fe sane kome yɛ nikasemɔ kome mli.” Kaasusu nyɛmɔ ni obi lɛ yɔɔ ni ekɛaakase nii lɛ he akɛ nɔ ko bibioo! Gbekɛbii ni eye afii ejwɛ enyɛ amɛkase Bible Stories wolo lɛ mli saneyitsei muu amɛwo amɛyitsoŋ ni amɛkase Biblia lɛ kanemɔ po! Gbekɛ ko kaiɔ akɛ beni eye aaafee afii etɛ kɛ fã lɛ, enyɛɛɛ etsɛ Blɔfo wiemɔ “judicial decisions” jogbaŋŋ, shi etsɛ wo lɛ hewalɛ ní eya nɔ ekase tsɛmɔ.

15. Mɛɛ saji abaanyɛ akɛfata nibii ni akɛ gbekɛbii wieɔ he lɛ ahe, ni mɛɛ odaseyeli yɔɔ ni tsɔɔ akɛ sɛɛnamɔ yɛ sanegbaai ni tamɔ nɛkɛ he?

¹⁵ Obaanyɛ okɛ be ni okɛtsɔɔ obii anii lɛ atsu nii ni okɛtsɔɔ amɛ bɔ ni amɛkɛ anɔkwale nu lɛ aaaha mɛi krokomɛi, tamɔ, yɛ saji ahetoohamɔ mli yɛ kpeei ashishi nɛkɛ. (Hebribii 10:24, 25) “Wɔ nikasemɔ bei amli lɛ, mibɔɔ mɔdɛŋ akɛ mahã saji ahetoo yɛ mi diɛŋtsɛ miwiemɔ mli,” taakɛ gbekɛ ko kaiɔ lɛ. “Aŋmɛɛɛ mi gbɛ ni makane kɛkɛ ni minuuu shishi.” Agbɛnɛ hu, abaanyɛ atsɔse gbekɛbii lɛ ni amɛna shiɛmɔ nitsumɔ lɛ mli gbɛfaŋnɔ kɛmɔ shi. Yoo ko ni fɔlɔi ni tsɔse lɛ lɛ sheɔ Nyɔŋmɔ gbeyei lɛ tsɔɔ mli akɛ: “Wɔjeee mɛi ni nyiɛ wɔfɔlɔi asɛɛ kɛkɛ, ni wɔfataa amɛhe yɛ amɛ nitsumɔ lɛ mli. Wɔle akɛ wɔyɛ gbɛfaŋnɔ yɛ mli, kɛ eji shinaa naa ŋmɛlɛ kɛkɛ po ni wɔɔtswa loo dɛhiɛmɔ wolo ni wɔkɛaahã. Bɔ ni wɔtsɔ̃ɔ hiɛ wɔsaa wɔhe jogbaŋŋ kɛhaa daa otsi naagbee nitsumɔ lɛ hewɔ lɛ, wɔleɔ nɔ ni wɔbaakɛɛ. Hɔɔ leebi ko bɛ ni wɔteɔ shi dani wɔbiɔ akɛ ani wɔbaaya shiɛmɔ lo. Wɔle akɛ wɔbaaya.”

16. Mɛni hewɔ weku nikasemɔ ni akɛ gbekɛbii aaafee daa lɛ he hiaa lɛ?

¹⁶ Bɔ ni ehe hiaa ni ahã gbekɛbii lɛ Biblia mli nu ni ji anɔkwale lɛ daa lɛ nyɛŋ afee nɔ ni ama nɔ mi tsɔ̃, ni tsɔɔ akɛ daa otsi weku Biblia kasemɔ he miihia. Tsɛ ko ni hiɛ bii enyɔ wie akɛ, “nɔ titri ni haa gbekɛbii amli fuɔ ji gbɛjianɔtoo ni tsaaa nɔ daa.” (Efesobii 6:4) Ekɛɛ: “Mikɛ miŋa hala gbi kɛ be ni wɔbaakase nii, ni wɔfeɔ weku nikasemɔ lɛ yɛ nakai gbɛjianɔtoo lɛ naa pɛpɛɛpɛ. Etsɛɛɛ kwraa ni gbekɛbii lɛ le nakai be lɛ akɛ be ni wɔkɛkaseɔ nii.” Nɛkɛ tsɔsemɔ ni akɛhaa kɛjɛɔ gbekɛbiiashi nɛɛ he miihia, yɛ anɔkwale wiemɔ nɛɛ kɛ gbeekpamɔ naa, akɛ, ‘Bɔ ni akudɔɔ tso fɔ́ lɛ ahaa lɛ, nakai tso lɛ daa ebatsɔɔ.’

17. Mɛni he hiaa tamɔ Biblia mli anɔkwalei ni aaatsɔɔ gbekɛbii lɛ nɔŋŋ pɛpɛɛpɛ?

¹⁷ Biblia mli anɔkwalei ni aaatsɔɔ gbekɛbii lɛ he miihia, shi fɔlɔi anɔkwɛmɔ nɔ hu he miihia nakai nɔŋŋ. Ani obii lɛ naa bo ni ookase nii, ni ooya kpeei daa, ni okɛ ohe miiwo shiɛmɔ nitsumɔ lɛ mli, hɛɛ, ni oona Yehowa suɔmɔnaa nifeemɔ he miishɛɛ? (Lala 40:9) Ehe miihia ni amɛna akɛ ofeɔ nakai. Nɔ ni sa kadimɔ ji akɛ, gbekɛ yoo ko wie yɛ enyɛ ni ŋmɛ etsui shi yɛ ewu shitee-kɛ-woo shishi aahu, ni etsɔse bii ekpaa ni amɛbatsɔmɔ Odasefoi anɔkwafoi lɛ he akɛ: “Nɔ ni wɔnaa he miishɛɛ fe fɛɛ ji Awo diɛŋtsɛ nɔkwɛmɔ nɔ—emɔɔ shi jogbaŋŋ fe wiemɔi diɛŋtsɛ.”

Hebuu ni Aaahã Gbekɛbii

18. (a) Fɔlɔi baanyɛ amɛkɛ hebuu ni he hiaa gbekɛbii lɛ aha amɛ yɛ mɛɛ gbɛ nɔ? (b) Mɛɛ tsɔsemɔ gbekɛbii ni hi shi yɛ Israel lɛ ná yɛ gbɔmɔtso lɛ hei ni ji fɔmɔ nii lɛ ahe?

¹⁸ Taakɛ bei pii lɛ ehe hiaa ni abu tsei bibii ahe kɛjɛ kooloi bibii ni gbeɔ amɛ lɛ ahe lɛ, nakai nɔŋŋ ehe hiaa ni abu gbekɛbii ahe kɛjɛ “gbɔmɛi fɔji” ahe, yɛ nibii agbɛjianɔtoo fɔŋ nɛɛ mli. (2 Timoteo 3:1-5, 13) Mɛɛ gbɛ fɔlɔi baatsɔ nɔ amɛkɛ hebuu nɛɛ ahã? Kɛtsɔ yelikɛbuamɔ ni akɛaaha amɛ koni amɛna ŋwɛi nilee lɛ nɔ! (Jajelɔ 7:12) Yehowa kɛ fãmɔ ha Israelbii—ni amɛ “gbekɛbii” fata he—akɛ amɛbo e-Mla ni akaneɔ atsɔɔ amɛ, ní nibii ni atsɔɔ akɛ eji bɔlɛnamɔ he jeŋba ni sa kɛ nɔ ni esaaa fata he lɛ toi. (5 Mose 31:12; 3 Mose 18:6-24) Atsĩɔ gbɔmɔtso lɛ hei ni ji fɔmɔ nii lɛ atã yɛ bei babaoo mli, tamɔ “gbɛɛiaŋ wui” kɛ ‘nuuhe loo yoohe’ nɛkɛ. (3 Mose 15:1-3, 16; 21:20; 22:24; 4 Mose 25:8; 5 Mose 23:10) Bɔ ni ŋmɛnɛ je lɛ efite kɛyashɛ shɔŋŋ hewɔ lɛ, ehe miihia ni gbekɛbii lɛ ale nɔ ni ji gbɔmɔtso lɛ he nii, ni fata adebɔɔ nii ni Nyɔŋmɔ wie yɛ he akɛ “ehi naakpa” lɛ ahe nɛɛ kɛ nitsumɔ yɛ gbɛ ni sa, kɛ gbɛ ni esaaa nɔ.—1 Mose 1:31; 1 Korintobii 12:21-24.

19. Mɛni ji tsɔsemɔ ni sa akɛ akɛha gbekɛbii lɛ yɛ amɛ gbɔmɔtso lɛ hei ni ji fɔmɔ nii lɛ ahe?

¹⁹ Nɔ ni hi waa ji akɛ, esa akɛ fɔlɔi enyɔ lɛ fɛɛ, aloo onukpai ni tsɔseɔ gbekɛ lɛ, ateŋ mɔ fɛɛ mɔ atsɔɔ gbekɛ lɛ bɔ ni atsɛɔ egbɔmɔtso lɛ hei ni ji efɔmɔ nii lɛ ahãa. No sɛɛ lɛ esa akɛ amɛtsɔɔ lɛ jogbaŋŋ akɛ esaaa ni eŋmɛɔ gbɛ ni mɔ ko kwraa taraa nɛkɛ hei nɛɛ ahe. Akɛni bei pii lɛ mɛi ni feɔ gbekɛbii niseniianii lɛ kaa bɔ ni gbekɛbii bibii feɔ amɛnii yɛ bɔlɛnamɔ nifeemɔi ni yɔɔ nigii lɛ ahe lɛ amɛkwɛɔ hewɔ lɛ, esa akɛ atsɔɔ gbekɛ lɛ ni ete shi ewo enɛ waa, ni ekɛɛ akɛ, “Makɛɛ nibii ni ofee mi lɛ!” Tsɔɔmɔ obii lɛ akɛ be fɛɛ be ni mɔ ko aaabɔ mɔdɛŋ akɛ eeetara amɛhe bɔ ni amɛsumɔɔɔ lɛ, esa akɛ amɛbakɛɛ bo, ekɔɔɔ he eko bɔ ni mɔ lɛ baawo amɛhe gbeyei eha koni amɛkakɛɛ.

Tsɔsemɔ ni Aaajɛ Suɔmɔ Mli Akɛha

20. (a) Tsɔsemɔ tamɔ tso hesaamɔ yɛ mɛɛ gbɛ nɔ? (b) Mɛni ji shishijee hewalɛ ni tsɔsemɔ naa, shi mɛni jɛɔ mli baa?

²⁰ Gbekɛbii naa tsɔsemɔ ni jɛɔ suɔmɔ mli lɛ he sɛɛ, taakɛ tso naa ehesaamɔ he sɛɛ lɛ. (Abɛi 1:8, 9; 4:13; 13:1) Kɛji afolɔ niji ni asumɔɔɔ lɛ yɛ he lɛ, ewoɔ ekrokomɛi hewalɛ ni amɛdaraa. No hewɔ lɛ kɛ obii lɛ kɛ amɛjwɛŋmɔ fɛɛ miimã heloonaa ninamɔ nɔ, loo amɛmiikpalaŋ kɛmiiya naanyobɔɔ fɔŋ loo hiɛtserɛjiemɔ ni esaaa he lɛ, nakai subaŋi gbohii lɛ tamɔ tso niji ni esa akɛ afolɔ kɛjɛ he. Kɛji ajie kɛjɛ he lɛ, ebaaye ebua obii lɛ ni amɛdara yɛ mumɔŋ gbɛtsɔɔmɔ naa. Kɛjɛ shishijee lɛ, ekolɛ anaŋ tsɔsemɔ ni tamɔ nɛkɛ he miishɛɛ, tamɔ bɔ ni tso lɛ niji komɛi afolɔmɔ baaha enu haomɔ ko he lɛ. Shi nibii kpakpai ni jɛɔ tsɔsemɔ mli baa ji dalɛ hee yɛ gbɛ ni otaoɔ ni obi lɛ ada yɛ nɔ lɛ nɔ.—Hebribii 12:5-11.

21, 22. (a) Mɛni tsɔɔ akɛ tsɔsemɔ kɛhamɔ kɛ enɔkpɛlɛmɔ fɛɛ jeee nɔ ni yɔɔ miishɛɛ? (b) Mɛni hewɔ esaaa ni fɔlɔi tsĩɔ tsɔsemɔ naa lɛ?

²¹ Akpɛlɛɔ nɔ amrɔ nɔŋŋ akɛ anaaa tsɔsemɔ kɛhamɔ loo enɔkpɛlɛmɔ he miishɛɛ. “Mibinuu lɛ kɛ gbekɛ ko ni onukpai lɛ ebɔ mi kɔkɔ akɛ ejeee naanyo kpakpa lɛ fɔɔ nyiɛmɔ,” taakɛ tsɛ ko wie lɛ. “Kulɛ esa akɛ matsu he nii oya fe be mli ni mitsu he nii lɛ. Eyɛ mli akɛ mibinuu lɛ kɛ ehe wooo efɔŋ feemɔ ko mli yɛ faŋŋ mli moŋ, shi ehe mi be saŋŋ dani minyɛ mitsake ejwɛŋmɔ.” Ebinuu lɛ tsɔɔ mli akɛ: “Ni ahã mikɛ minaanyo ni misumɔɔ esane fe fɛɛ lɛ kpa bɔɔ lɛ, edɔ mi waa.” Shi ekɛfata he akɛ: “Yiŋkpɛɛ kpakpa nɛ, ejaakɛ no sɛɛ etsɛɛɛ tsɔ̃ ni ashwie lɛ kɛjɛ asafo lɛ mli.”

²² “Tsɔsemɔ kamɔi lɛ, wala gbɛ ni,” taakɛ Nyɔŋmɔ Wiemɔ lɛ kɛɔ lɛ. No hewɔ lɛ, bɔ fɛɛ bɔ ni tsɔsemɔ kɛhamɔ baawa eha lɛ, kaatsĩ obii lɛ atsɔsemɔ naa. (Abɛi 6:23; 23:13; 29:17) Be ni sa mli lɛ, amɛbaada bo shi akɛ otsɔse amɛ. “Mikaiɔ akɛ mimli fuɔ mifɔlɔi waa kɛji amɛmiitsɔse mi,” taakɛ gbekɛ ko kɛɛ lɛ. “Eji mifɔlɔi kɛ nakai tsɔsemɔ lɛ haaa mi kulɛ, amrɔ nɛɛ mimli baafu amɛ waa po fe nakai.”

Nyɔmɔwoo lɛ Sa Ehe Mɔdɛŋbɔɔ Lɛ

23. Mɛni hewɔ suɔmɔ fɛɛ mli ni ajɛɔ akwɛɔ gbekɛbii lɛ sa mɔdɛŋbɔɔ ni akɛtsuɔ he nii lɛ?

²³ Ŋwanejee ko bɛ he akɛ, gbekɛbii ni fɔlɔi kɛ mɛi krokomɛi fɛɛ naa amɛhe miishɛɛ lɛ, jɛɔ kwɛmɔ ni ajɛɔ suɔmɔ mli akwɛɔ amɛ daa lɛ mli baa. Shi kɛlɛ, mɔdɛŋbɔɔ fɛɛ ni akɛwoɔ amɛ kwɛmɔ mli—kɛ amɛji heloonaa bii jio, mumɔŋ bii jio lɛ—sa ehe nyɔmɔwoo ni abaanyɛ ana mli ŋɔɔmɔ lɛ. Bɔfo Yohane ni eda yɛ afii amli lɛ tsɔɔ enɛ beni eŋma akɛ: “Mibɛ miishɛɛ ni fa fe enɛ akɛ manu akɛ mibii lɛ nyiɛɔ anɔkwale lɛ mli.”—3 Yohane 4.

[Shishigbɛ niŋmaa]

Ani Okaiɔ?

◻ Mɛni he hiaa tsei bibii kɛ gbekɛbii hu koni amɛtsɔmɔ mɛi ni sa yijiemɔ?

◻ Yɛ naagbee lɛ, fɔlɔi baanyɛ afee tamɔ tsei ni akɛmamɔ̃ shi jogbaŋŋ kɛha tsei bibii awajemɔ yɛ mɛɛ gbɛ nɔ?

◻ Mɛni abaanyɛ akɛfata be ni akɛtsɔɔ gbekɛbii anii lɛ he, ni mɛni esa akɛ atsɔse amɛ ni amɛte shi amɛwo?

◻ Tsɔsemɔ he baa sɛɛnamɔ kɛhaa gbekɛ, tamɔ bɔ ni tso hesaamɔ ji kɛha tso lɛ, yɛ mɛɛ gbɛ nɔ?

[He ni Mfoniri ni yɔɔ baafa 10 lɛ Jɛ]

Green Chimney’s Farm kɛha