Yitso 29
Kunimyeli Lala Hee lɛ Lamɔ
Ninaa 9—Kpojiemɔ 14:1-20
Saneyitso: 144,000 lɛ kɛ Toobi lɛ yɛ Zion Gɔŋ lɛ nɔ; bɔfoi jaje saji yɛ shikpɔŋ muu lɛ fɛɛ nɔ; akpa ŋmaa
Emlibaa be: 1914 kɛyashi amanehulu kpeteŋkpele lɛ mli
1. Mɛni wɔtsɔ hiɛ wɔkase momo ni kɔɔ Kpojiemɔ yitsei 7, 12, kɛ 13 he, ni mɛni wɔbaakase agbɛnɛ?
KWƐ miishɛɛ ni eji akɛ wɔɔtsɔ wɔhe kɛya Yohane ninaa ni nyiɛ sɛɛ lɛ he! Nɔ ni tamɔɔɔ drako lɛ gbɛjianɔtoi ni tamɔ kooloo ni he yɔɔ gbeyei lɛ nɔ lɛ, wɔnaa Yehowa tsuji anɔkwafoi lɛ kɛ amɛnitsumɔi yɛ Nuŋtsɔ lɛ gbi lɛ mli agbɛnɛ. (Kpojiemɔ 1:10) Kpojiemɔ 7:1, 3 etsɔ hiɛ egba wɔ akɛ atsi kɔɔyɔi ejwɛ ni fiteɔ nii lɛ anaa kɛyashi be mli ni aaasɔo tsuji 144,000 ni afɔ amɛ mu lɛ fɛɛ naa. Kpojiemɔ 12:17 eha wɔle akɛ “yoo lɛ seshibii ni eshwɛ” lɛ batsɔmɔɔ mɛi titri ni Satan, drako lɛ, tutuaa yɛ nakai be lɛ mli. Ni Kpojiemɔ yitso 13 lɛ etsɔɔ maŋkwramɔ gbɛjianɔtoi ni Satan teɔ amɛ shi yɛ shikpɔŋ lɛ nɔ koni amɛkɛ nɔnyɛɛ kɛ yiwaa ni naa wa aba Yehowa anɔkwa tsuji lɛ anɔ lɛ. Shi nakai henyɛlɔ kpeteŋkpele lɛ nyɛŋ afite Nyɔŋmɔ yiŋtoo! Wɔbaakase agbɛnɛ akɛ yɛ Satan yiŋtoo fɔŋ ni ekɛtsuɔ nii lɛ fɛɛ sɛɛ lɛ, abua 144,000 lɛ fɛɛ naa yɛ kunimyeli mli.
2. Mɛɛ ninaa ni tsɔɔ naagbee ni yɔɔ miishɛɛ lɛ hiɛ Yohane kɛhaa wɔ yɛ Kpojiemɔ 14:1, ni namɔ ji Toobi lɛ?
2 Atsɔ hiɛ akɛ nɔ ni jɛ mli ba ni yɔɔ miishɛɛ lɛ he ninaa ha Yohane kɛ Yohane kuu ni yɔɔ ŋmɛnɛ lɛ: “Ni mikwɛ, ni naa, toobi lɛ damɔ Zion Gɔŋ lɛ nɔ, ni mɛi akpei oha kɛ nyɔŋmai ejwɛ kɛ ejwɛ ni aŋma egbɛi kɛ e-Tsɛ gbɛi yɛ amɛhiɛŋtsei anɔ fata ehe.” (Kpojiemɔ 14:1) Taakɛ wɔna lɛ, Toobi nɛɛ nɔŋŋ ji Mikael ni tsuu ŋwɛi he kɛtsɔ shɛ ni eshɛrɛ Abonsam kɛ edaimonioi lɛ kɛjɛ jɛmɛ eshwie shi lɛ nɔ lɛ. Lɛ ji Mikael ni Daniel tsɔɔ mli akɛ “edamɔ shi ha [Nyɔŋmɔ] omaŋbii lɛ” yɛ be mli ni esaa ehe koni ‘ete shi edamɔ shi’ koni etsu Yehowa jalɛ kojomɔi ahe nii lɛ. (Daniel 12:1; Kpojiemɔ 12:7, 9) Kɛjɛ 1914 kɛbaa nɛɛ, nɛkɛ Nyɔŋmɔ Toobi ni kɛ ehe sha afɔle nɛɛ damɔ Zion Gɔŋ lɛ nɔ akɛ Mesia Maŋtsɛ.
3. Mɛni ji “Zion Gɔŋ lɛ” ni Toobi lɛ kɛ 144,000 lɛ “damɔ nɔ” lɛ?
3 Etamɔ bɔ ni Yehowa gba fɔ shi lɛ pɛpɛɛpɛ: “Shi miwo mi-maŋtsɛ yɛ migɔŋ krɔŋkrɔŋ Zion lɛ nɔ.” (Lala 2:6; 110:2) Enɛ kɔɔɔ shikpɔŋ nɔ Zion Gɔŋ, he ni shikpɔŋ nɔ Yerusalem yɔɔ diɛŋtsɛ, ni maŋtsɛmɛi ni ji adesai ni jɛ David wekukpaa lɛ mli ye nɔ yɛ lɛ he dɔŋŋ. (1 Kronika 11:4-7; 2 Kronika 5:2) Dabi, ejaakɛ yɛ Yesu gbele kɛ eshitee yɛ afi 33 Ŋ.B. lɛ sɛɛ lɛ, ebatsɔ shishitoo koŋ tɛ yɛ ŋwɛi Zion Gɔŋ lɛ nɔ, ŋwɛi he ni Yehowa eto akɛ ebaafee “Nyɔŋmɔ hiɛkalɔ lɛ maŋ ni ji ŋwɛi Yerusalem lɛ.” No hewɔ lɛ, “Zion Gɔŋ” lɛ damɔ shi kɛha Yesu kɛ enanemɛi niyelɔi ni feɔ ŋwɛi Yerusalem lɛ ni ji Maŋtsɛyeli lɛ gbɛhe ni awo nɔ lɛ. (Hebribii 12:22, 28; Efesobii 3:6) No ji odehei anunyam shihilɛ mli ni Yehowa woɔ amɛnɔ kɛyaa yɛ Nuŋtsɔ lɛ gbi lɛ mli lɛ. Yɛ afii ohai abɔ lɛ amli lɛ, Kristofoi ni afɔ amɛ mu lɛ ni ji “tɛi ni hiɛ kamɔ” lɛ kɛ anɔkwayeli ekpa be mli ni amɛbaadamɔ ŋwɛi Zion Gɔŋ lɛ nɔ, ni amɛkɛ Nuŋtsɔ Yesu Kristo ni awo ehiɛ nyam yɛ e-Maŋtsɛyeli agbojee mli lɛ afee ekome lɛ gbɛ.—1 Petro 2:4-6; Luka 22:28-30; Yohane 14:2, 3.
4. Te feɔ tɛŋŋ ni 144,000 lɛ fɛɛ damɔ Zion Gɔŋ lɛ nɔ lɛ?
4 Jeee Yesu pɛ Yohane na, shi moŋ kuu ni ji 144,000 nanemɛi niyelɔi yɛ ŋwɛi Maŋtsɛyeli lɛ mli lɛ fɛɛ ni damɔ Zion Gɔŋ lɛ nɔ. Beni akɛ ninaa lɛ haa lɛ, no mli lɛ 144,000 lɛ ateŋ mɛi pii etee ŋwɛi momo, shi jeee fɛɛ. Yɛ sɛɛ mli yɛ nakai ninaa lɛ nɔŋŋ mli lɛ, Yohane bale akɛ esa akɛ krɔŋkrɔŋbii lɛ ateŋ mɛi komɛi aŋmɛ amɛtsui shi ni amɛgboi yɛ anɔkwayeli mli. (Kpojiemɔ 14:12, 13) Eka shi faŋŋ akɛ, belɛ 144,000 lɛ ateŋ mɛi komɛi yɛ shikpɔŋ lɛ nɔ lolo. No hewɔ lɛ te feɔ tɛŋŋ ni Yohane na amɛ fɛɛ akɛ amɛkɛ Yesu damɔ Zion Gɔŋ lɛ nɔ lɛ?a No ji akɛ, akɛ Kristofoi ni afɔ amɛ mu lɛ asafo lɛ mlibii lɛ, mɛnɛɛmɛi eba “Zion Gɔŋ lɛ he . . . kɛ Nyɔŋmɔ hiɛkalɔ lɛ maŋ ni ji ŋwɛi Yerusalem lɛ.” (Hebribii 12:22) Taakɛ Paulo ji yɛ be mli ni eyɔɔ shikpɔŋ nɔ lɛ, atee amɛ shi momo—yɛ mumɔŋ shishinumɔ naa—koni amɛkɛ Kristo Yesu afee ekome yɛ ŋwɛi. (Efesobii 2:5, 6) Kɛfata he lɛ, 1919 mli ni amɛhere tsɛmɔ nɛɛ nɔ: “Nyɛkwɔa kɛbaa biɛnɛɛ,” kɛkɛ ni “amɛkwɔ kɛtee ŋwɛi yɛ atatu lɛ mli,” yɛ okadi gbɛ nɔ. (Kpojiemɔ 11:12) Yɛ ŋmalɛi nɛɛ ahewɔ lɛ, wɔbaanyɛ wɔna akɛ 144,000 lɛ fɛɛ—kɛ aaawie amɛhe yɛ mumɔŋ lɛ—kɛ Yesu Kristo yɛ Zion Gɔŋ lɛ nɔ.
5. Namɛi agbɛii aŋmala yɛ 144,000 lɛ ahiɛnai, ni te gbɛi lɛ eko fɛɛ eko he hiaa ha tɛŋŋ?
5 Mɛi 144,000 nɛɛ kɛ mɛi ni jaa kooloo lɛ, ni akɛ kadimɔ nii ni ji yibɔ okadi 666 ekadi amɛ lɛ bɛ nɔ ko feemɔ. (Kpojiemɔ 13:15-18) Nɔ ni tamɔɔɔ enɛ lɛ, aŋmala Nyɔŋmɔ kɛ Toobi lɛ gbɛi yɛ anɔkwafoi nɛɛ ahiɛnai. Ŋwanejee ko bɛ he akɛ, Yohane, ni ji Yudanyo lɛ, na Nyɔŋmɔ gbɛi lɛ yɛ Hebri niŋmai יהוה amli.b Akɛni aŋmala Yesu Tsɛ lɛ gbɛi yɛ okadi gbɛ nɔ yɛ amɛhiɛnai hewɔ lɛ, mɛi ni asoɔ amɛnaa nɛɛ haa mɛi fɛɛ leɔ akɛ amɛji Yehowa odasefoi, E-tsuji. (Kpojiemɔ 3:12) Yesu gbɛi hu ni aŋma yɛ amɛhiɛŋtsei anɔ lɛ tsɔɔ akɛ amɛkpɛlɛɔ nɔ akɛ enii ji amɛ. Lɛ ji amɛ “wu” ni atsɛ amɛhe baa aha lɛ, ni amɛji mɛi ni baafee “eyemforo,” “bɔɔnɔ hee” ni sɔmɔɔ Nyɔŋmɔ kɛ ŋwɛi wala he hiɛnɔkamɔ lɛ. (Efesobii 5:22-24; Kpojiemɔ 21:2, 9; 2 Korintobii 5:17) Wekukpaa ni bɛŋkɛ kpaakpa ni ka amɛ kɛ Yehowa kɛ Yesu Kristo teŋ lɛ saa amɛjwɛŋmɔi kɛ nifeemɔi fɛɛ he.
Amɛmiila Lala ko ni Tamɔ Lala Hee
6. Mɛɛ lala ko Yohane nu ni aala, ni te etsɔɔ enɛ mli eha tɛŋŋ?
6 Nɔ ni kɛ enɛ kpaa gbee lɛ, Yohane bɔ amaniɛ akɛ: “Ni minu gbee ko kɛjɛ ŋwɛi tamɔ nui pii agbee, ni asaŋ etamɔ nugbɔshiimɔi kpeteŋkpele gbee; ni gbee ni minu lɛ tamɔ saŋkutswalɔi ni hiɛ amɛ saŋkui amɛtswaa lɛ agbee. Ni amɛlaa lala ko ni tamɔ ehee yɛ maŋtsɛsɛi lɛ hiɛ kɛ hiɛkalɔi ejwɛ lɛ kɛ onukpai lɛ ahiɛ; ni mɔ ko nyɛɛɛ lala lɛ akase, akɛ ja mɛi akpei oha kɛ nyɔŋmai ejwɛ kɛ ejwɛ lɛ ni ahe kɛjɛ shikpɔŋ lɛ nɔ lɛ kɛkɛ.” (Kpojiemɔ 14:2, 3) Belɛ ebɛ naakpɛɛ mɔ akɛ beni Yohane nu 144,000 lɛ agbee ni miila lala ko ni ŋɔɔ lɛ, ekai lɛ nui pii agbee kɛ nugbɔshiimɔi ko ni tamɔ dɛtswaa. Kwɛ bɔ ni nakai saŋkutswaa lala lɛ ŋɔɔ ni emli tse ha! (Lala 81:3) Mɛɛ lalatsɛmɛi akuu yɔɔ shikpɔŋ nɔ ni amɛgbee baanina nakai anunyam lala lɛ?
7. (a) Mɛni ji lala hee ni yɔɔ Kpojiemɔ 14:3 lɛ? (b) Mɛni hewɔ lala ni yɔɔ Lala 149:1 lɛ ji ehee yɛ wɔgbii nɛɛ amli lɛ?
7 Ni mɛni ji nɛkɛ ‘lala hee’ nɛɛ? Taakɛ wɔyoo yɛ Kpojiemɔ 5:9, 10 hesusumɔ mli lɛ, lala lɛ kɔɔ Yehowa Maŋtsɛyeli lɛ yiŋtoi kɛ egbɛjianɔtoo ni yɔɔ naakpɛɛ, kɛtsɔ Yesu Kristo nɔ koni efee mumɔŋ Israel “osɔfoi amaŋtsɛyeli kɛha wɔ-Nyɔŋmɔ” lɛ he. Eji yijiemɔ lala ni akɛhaa Yehowa ni miitswa nibii hee ni efeɔ kɛtsɔɔ Nyɔŋmɔ Israel kɛ agbɛnɛ yɛ ehewɔ lɛ he adafi. (Galatabii 6:16) Mumɔŋ Israel mli bii nɛɛ hereɔ lalatsɛ lɛ ninefɔɔ lɛ nɔ: “Nyɛlaa lala hee nyɛhaa Yehowa; nyɛjiea eyi yɛ mɛi krɔŋkrɔŋi agwabɔɔ lɛ mli! Ha Israel anya mɔ ni fee lɛ lɛ he, ni Zionbii lɛ amli afili amɛ yɛ amɛmaŋtsɛ lɛ hewɔ!” (Lala 149:1, 2) Eji anɔkwale akɛ aŋmala nakai wiemɔi lɛ afii ohai abɔ ni eho nɛ, shi ala yɛ wɔgbii nɛɛ amli kɛ shishinumɔ hee. Ato Mesia Maŋtsɛyeli lɛ ama shi yɛ 1914. (Kpojiemɔ 12:10) Kɛkɛ ni yɛ 1919 lɛ, Yehowa webii ni yɔɔ shikpɔŋ nɔ lɛ je shishi akɛ amɛaatswa “maŋtsɛyeli lɛ he wiemɔ” lɛ he adafi kɛ ekaa hee. (Mateo 13:19) Akɛni afi ŋmalɛ kɛha 1919 (Yesaia 54:17) lɛ wo amɛ hewalɛ ni agbɛnɛ bɔ ni asaa akɛ amɛ eba mumɔŋ paradeiso lɛ mli lɛ ekanya amɛ hewɔ lɛ, amɛje shishi yɛ nakai afi lɛ mli akɛ ‘amɛkɛ saŋku lalai aaala amɛha Yehowa yɛ amɛtsuii amli.’—Efesobii 5:19.
8. Mɛni hewɔ 144,000 lɛ pɛ nyɛɔ amɛkaseɔ lala hee ni yɔɔ Kpojiemɔ 14:3 lɛ?
8 Shi mɛni hewɔ 144,000 lɛ pɛ nyɛɔ amɛkaseɔ lala ni atsi ta yɛ Kpojiemɔ 14:3 lɛ? Ejaakɛ ekɔɔ amɛniiashikpamɔi akɛ Nyɔŋmɔ Maŋtsɛyeli lɛ niyelɔi ni ahala amɛ lɛ he. Amɛ pɛ ji mɛi ni ahala amɛ akɛ Nyɔŋmɔ bii ni akɛ mumɔ krɔŋkrɔŋ lɛ efɔ amɛ mu. Amɛ pɛ ji mɛi ni ahe amɛ kɛjɛ shikpɔŋ nɔ akɛ amɛbafee ŋwɛi Maŋtsɛyeli lɛ fa, ni amɛ pɛ ji mɛi ni “baatsɔmɔ osɔfoi . . . ni amɛaaye maŋtsɛmɛi” kɛ Kristo Yesu kɛha afii akpe ni amɛkɛ adesai aba emuuyeli mli. Amɛ pɛ ji mɛi ni anaa akɛ “amɛmiila lala ko ni tamɔ ehee” yɛ Yehowa hiɛ diɛŋtsɛ.c Nɛkɛ niiashikpamɔi kɛ gbɛkpamɔi ni ekaaa nɛɛ haa amɛhiɛ sɔɔ Maŋtsɛyeli lɛ yɛ gbɛ krɛdɛɛ nɔ ni ehaa amɛnyɛɔ amɛlaa yɛ he yɛ gbɛ ni mɔ ko nyɛŋ afee nakai nɔ.—Kpojiemɔ 20:6; Kolosebii 1:13; 1 Tesalonikabii 2:11, 12.
9. Asafo babaoo lɛ ehere mɛi ni afɔ amɛ mu lɛ alala lɛ nɔ yɛ mɛɛ gbɛ nɔ, ni mɛɛ ŋaawoo amɛtsu he nii?
9 Yɛ fɛɛ sɛɛ lɛ, mɛi krokomɛi boɔ toi ni amɛhereɔ lala lɛ nɔ. Kɛjɛ 1935 kɛbaa nɛɛ, asafo babaoo ko ni ji toi krokomɛi enu amɛ kunimyeli lala lɛ he ni amɛkɛ amɛhe ebabɔ amɛhe amɛkɛmiijaje Nyɔŋmɔ Maŋtsɛyeli lɛ. (Yohane 10:16; Kpojiemɔ 7:9) Eji anɔkwale akɛ, nɛkɛ mɛi heei nɛɛ nyɛŋ akase ni amɛla lala hee nɛɛ pɛpɛɛpɛ taakɛ Nyɔŋmɔ Maŋtsɛyeli lɛ wɔsɛɛ be nɔyelɔi lɛ laa lɛ lɛ. Shi amɛ hu amɛkɛ gbee ni jijeɔ hereɔ nɔ amɛkɛjieɔ Yehowa yi yɛ nibii heei ni efeɔ lɛ hewɔ. No hewɔ lɛ amɛhaa Lalatsɛ lɛ ŋaawoo nɛɛ baa mli: “Nyɛlaa lala hee nyɛhaa Yehowa, shikpɔŋ lɛ fɛɛ, nyɛlaa nyɛhaa Yehowa! Nyɛlaa nyɛhaa Yehowa, nyɛjiea egbɛi lɛ yi! Nyɛgbaa eyiwalaheremɔ lɛ he sane gbi fɛɛ gbi! Nyɛjajea enunyam lɛ nyɛtsɔa yɛ jeŋmaji lɛ ateŋ, kɛ enaakpɛɛ nii lɛ yɛ maji fɛɛ ateŋ! Nyɛ maji lɛ amli akutsei lɛ, nyɛkɛhaa Yehowa, nyɛkɛ anunyam kɛ hewalɛ ahaa Yehowa! Nyɛkɛa yɛ jeŋmajiaŋ lɛ ateŋ akɛ: Yehowa miiye maŋtsɛ.”—Lala 96:1-3, 7, 10; 98:1-9.
10. Te ebaalɛ tɛŋŋ ni 144,000 lɛ nyɛɔ amɛlaa “yɛ” okadi onukpai 24 lɛ “ahiɛ” lɛ?
10 Te aaafee tɛŋŋ ni 144,000 lɛ aaala “yɛ” onukpai lɛ “ahiɛ,” akɛni onukpai 24 lɛ nɔŋŋ ji 144,000 lɛ ni yɔɔ amɛnunyam mli yɛ ŋwɛi gbɛhe mli lɛ? Nuŋtsɔ lɛ gbi lɛ mra mli ni atee mɛi ni “egboi yɛ Kristo mli” lɛ ashi akɛ mumɔŋ bɔɔ nii. No hewɔ lɛ, Kristofoi anɔkwafoi ni afɔ amɛ mu ni eye kunim lɛ yɛ ŋwɛi bianɛ, ni amɛmiitsu nitsumɔi ni tamɔ nɔ ni onukpai ni ji osɔfoi akui 24 lɛ tsuɔ lɛ yɛ okadi gbɛ nɔ. Amɛfata Yehowa ŋwɛi gbɛjianɔtoo lɛ he ninaa lɛ he. (1 Tesalonikabii 4:15, 16; 1 Kronika 24:1-18; Kpojiemɔ 4:4; 6:11) No hewɔ lɛ 144,000 lɛ mli shwɛɛnii ni yɔɔ shikpɔŋ nɔ lolo lɛ miila lala hee lɛ yɛ amɛnyɛmimɛi ni atee amɛ shi ni yɔɔ ŋwɛi lɛ ahiɛ tamɔ amɛmiina amɛ.
11. Mɛni hewɔ awieɔ kunimyelɔi ni afɔ amɛ mu lɛ ahe akɛ onukpai 24 kɛ agbɛnɛ 144,000 lɛ?
11 Wɔbaanyɛ wɔbi yɛ he ni wɔshɛ nɛɛ akɛ: Mɛni hewɔ atsɛɔ kunimyelɔi ni afɔ amɛ mu nɛɛ akɛ okadi onukpai 24 kɛ agbɛnɛ 144,000 lɛ? Nɔ hewɔ ji akɛ Kpojiemɔ susuɔ kuu kome nɛɛ he kɛjɛɔ gbɛi sɔrɔtoi enyɔ nɔ. Anaa onukpai 24 lɛ yɛ amɛŋwɛi gbɛhe lɛ akɛ amɛdamɔ Yehowa maŋtsɛsɛi lɛ he be fɛɛ be, ni ahala amɛ akɛ maŋtsɛmɛi kɛ osɔfoi yɛ ŋwɛi. Amɛfeɔ 144,000 lɛ fɛɛ he mfoniri yɛ amɛŋwɛi gbɛhei lɛ, eyɛ mli akɛ amrɔ nɛɛ amɛteŋ shwɛɛnii fioo ko yɛ shikpɔŋ nɔ lolo. (Kpojiemɔ 4:4, 10; 5:5-14; 7:11-13; 11:16-18) Shi Kpojiemɔ yitso 7 gbalaa jwɛŋmɔ kɛyaa 144,000 lɛ anɔ akɛ mɛi ni ahe amɛ kɛjɛ adesai ateŋ, ni emaa Yehowa yiŋtoo ni yɔɔ nyam akɛ ebaasɔo mumɔŋ Israel mli bii aŋkroaŋkroi lɛ ayibɔ lɛ naa ni ekɛ yiwalaheremɔ aha asafo babaoo ko ni anyɛŋ akane amɛ lɛ nɔ mi. Kpojiemɔ yitso 14 kɛ mfoniri ko haa ni maa nɔ mi akɛ abaabua Maŋtsɛyeli kuu ni ji aŋkroaŋkroi 144,000 lɛ fɛɛ ni yeɔ kunim lɛ anaa kɛ Toobi lɛ yɛ Zion Gɔŋ lɛ nɔ. Ahaa aleɔ hesai ni esa akɛ ana yɛ mɔ he dani akadi mɔ lɛ akɛ efata 144,000 lɛ ahe lɛ yɛ faŋŋ mli, taakɛ wɔbaana agbɛnɛ lɛ.d
Toobi lɛ Sɛɛnyiɛlɔi
12. (a) Te Yohane tee nɔ etsɔɔ bɔ ni 144,000 lɛ ji lɛ mli eha tɛŋŋ? (b) Mɛɛ shishinumɔ mli awieɔ 144,000 lɛ he yɛ akɛ obalahii muji lɛ?
12 Yɛ be mli ni eyaa nɔ etsɔɔ 144,000 lɛ ni “ahe amɛ kɛjɛ shikpɔŋ nɔ” lɛ mli lɛ, Yohane kɛɔ wɔ akɛ: “Mɛnɛɛmɛi ji mɛi ni kɛ yei buleko amɛhe, ejaakɛ obalahii muji ji amɛ ni amɛnyiɛɔ Toobi lɛ sɛɛ kɛyaa he fɛɛ he ni eyaa lɛ. Mɛnɛɛmɛi ji mɛi ni ahe kɛjɛ gbɔmɛi ateŋ ni amɛtsɔmɔ klɛŋklɛŋ yibii amɛha Nyɔŋmɔ kɛ Toobi lɛ; ni anaaa amale ko yɛ amɛdaaŋ, ejaakɛ kpa ko bɛ amɛhe.” (Kpojiemɔ 14:4, 5) Anɔkwale ni eji akɛ 144,000 lɛ ji “obalahii muji” lɛ etsɔɔɔ akɛ kuu nɛɛ mli bii lɛ boteee gbalashihilɛ mli yɛ heloo naa. Bɔfo Paulo ŋma eyaha Kristofoi ni yɔɔ ŋwɛi tsɛmɔ lɛ akɛ, yɛ be mli ni sɛɛnamɔ yɔɔ Kristofoi ni baanyɛ ahi shi akɛ oshijafoi lɛ mli lɛ, asumɔɔ gbalashihilɛ yɛ shihilɛi komɛi ashishi. (1 Korintobii 7:1, 2, 36, 37) Nɔ ni ayɔseɔ yɛ nɛkɛ kuu nɛɛ he ji mumɔŋ obalahii muji. Amɛkpoo mumɔŋ gbalafitemɔ ni amɛkɛ jeŋ maŋkwramɔ kɛ apasa jamɔ aaana. (Yakobo 4:4; Kpojiemɔ 17:5) Akɛ Kristo ayemforo ni etsɛ ehe baa lɛ, amɛhi shi krɔŋŋ, “ni kpa ko bɛ amɛhe yɛ yinɔ kɔɔdɔŋ ni bɛ eŋɛlɛ nɔ nɛɛ mli.”—Filipibii 2:15.
13. Mɛni hewɔ 144,000 lɛ ji ayemforo ni sa kɛha Yesu Kristo lɛ, ni “amɛnyiɛɔ Toobi lɛ sɛɛ kɛyaa he fɛɛ he ni eyaa” yɛ mɛɛ gbɛ nɔ?
13 Kɛfata he lɛ, “anaaa amale ko yɛ amɛdaaŋ.” Yɛ enɛ mli lɛ belɛ amɛtamɔ amɛ-Maŋtsɛ Yesu Kristo. Akɛ gbɔmɔ ni yeɔ emuu lɛ, “efeee esha, ni asaŋ anaaa apasa yɛ edaaŋ.” (1 Petro 2:21, 22) Akɛ kpa ko bɛ amɛhe ni apasa ko bɛ amɛdaaŋ hewɔ lɛ, asaa 144,000 lɛ akɛ ayemforo ni he tse aha Yehowa Osɔfonukpa kpeteŋkpele lɛ. Beni Yesu yɔɔ shikpɔŋ nɔ lɛ, efɔ nine etsɛ mɛi ni yɔɔ tsuijurɔ lɛ ni amɛnyiɛ esɛɛ. (Marko 8:34; 10:21; Yohane 1:43) Mɛi ni here nɔ lɛ kase eshihilɛ gbɛ lɛ ni amɛbo etsɔɔmɔi lɛ atoi. No hewɔ lɛ, “amɛnyiɛɔ Toobi lɛ sɛɛ kɛyaa he fɛɛ he ni eyaa” yɛ amɛshikpɔŋ nɔ sɔɔmɔ be lɛ mli yɛ be mli ni ekudɔɔ amɛ kɛtsɔɔ Satan je lɛ mli lɛ.
14. (a) 144,000 lɛ etsɔmɔ “klɛŋklɛŋ yibii amɛha Nyɔŋmɔ kɛ Toobi lɛ” yɛ mɛɛ gbɛ nɔ? (b) Asafo babaoo lɛ hu ji klɛŋklɛŋ yibii yɛ mɛɛ shishinumɔ naa?
14 “Ahe” 144,000 lɛ “kɛjɛ shikpɔŋ lɛ nɔ,” “ahe kɛjɛ gbɔmɛi ateŋ.” Ahala amɛ akɛ Nyɔŋmɔ bii, ni yɛ amɛshitee lɛ sɛɛ lɛ, amɛfeŋ adesai ni hiɛ heloo kɛ la dɔŋŋ. Taakɛ atsi ta yɛ kuku 4 lɛ, amɛbatsɔmɔɔ “klɛŋklɛŋ yibii amɛhaa Nyɔŋmɔ kɛ Toobi lɛ.” Eji anɔkwale akɛ, yɛ klɛŋklɛŋ afii oha lɛ mli lɛ, Yesu ji “klɛŋklɛŋ mɔ yɛ mɛi ni ewɔ lɛ ateŋ.” (1 Korintobii 15:20, 23) Shi 144,000 lɛ ji adesai ni yeee emuu lɛ “amli klɛŋklɛŋ yibii” ni atsɔ Yesu afɔleshaa lɛ nɔ ahe amɛ. (Yakobo 1:18) Ni kɛlɛ, yibii lɛ anaabuamɔ kɛmiijɛ adesai ateŋ lɛ baaa naagbee yɛ amɛ nɔ̃ lɛ mli. Kpojiemɔ wolo lɛ etsɔ hiɛ etsɔɔ asafo babaoo ko ni anyɛŋ akane amɛ ni kɛ gbee wulu jajeɔ akɛ: “Yiwalaheremɔ lɛ ji wɔ-Nyɔŋmɔ ni ta maŋtsɛsɛi lɛ nɔ lɛ kɛ Toobi lɛ nɔ!” lɛ anaabuamɔ. Nɛkɛ asafo babaoo nɛɛ baaje amanehulu kpeteŋkpele lɛ mli, ni yɛ be mli ni “wala nu bui” lɛ wajeɔ amɛ lɛ, akɛ amɛ baaba adesai emuuyeli mli yɛ shikpɔŋ nɔ. Yɛ amanehulu kpeteŋkpele lɛ sɛɛ be ko lɛ, Hades loo gbohiiaje baajie emli gbohii lɛ aha, ni abaatee adesai akpekpei toi abɔ ni anyɛɛɛ akane amɛ lɛ ashi koni amɛbana hegbɛ ni amɛnu nakai wala nu lɛ hu eko. Akɛni enɛ yɔɔ wɔjwɛŋmɔ mli hewɔ lɛ, ebaafee nɔ ni ja gbɛ akɛ aaatsɛ asafo babaoo lɛ akɛ toi krokomɛi lɛ ateŋ klɛŋklɛŋ yibii—amɛji klɛŋklɛŋ bii ni ‘fɔ amɛtadei lɛ ahe ni amɛha eyɛ futaa yɛ Toobi lɛ la lɛ mli,’ kɛ hiɛnɔkamɔ akɛ amɛbaahi shi kɛya naanɔ yɛ shikpɔŋ nɔ.—Kpojiemɔ 7:9, 10, 14, 17; 20:12, 13.
15. Mɛni nibii yɔɔ ni jejee amɛhe yɛ yibii sɔrɔtoi etɛ lɛ kɛ gbijuji ni ayeɔ yɛ Mose Mla lɛ shishi lɛ mli?
15 Nɛkɛ klɛŋklɛŋ yibii sɔrɔtoi etɛ nɛɛ (Yesu Kristo, 144,000 lɛ, kɛ asafo babaoo) lɛ yɛ nibii ni yɔɔ miishɛɛ ni je amɛhe yɛ gbijurɔyelii sɔrɔtoi ni yɔɔ blema Mose Mla lɛ mli lɛ mli. Yɛ Nisan 16, yɛ Akpiti Gbijurɔ lɛ mli lɛ, amɛkɛ amɛnikpamɔ nii ni ji ŋmaa loo abele lɛ mli klɛŋklɛŋ jatsu lɛ bahaa Yehowa. (3 Mose 23:6-14) Nisan 16 ji gbi ni atee Yesu shi kɛjɛ gbohii ateŋ. Yɛ Nisan 16 sɛɛ, gbi ni ji 50 lɛ nɔ, yɛ nyɔŋ ni ji etɛ lɛ nɔ lɛ, Israelbii lɛ yeɔ ŋmaa kpamɔ lɛ mli klɛŋklɛŋ yibii lɛ agbijurɔ lɛ. (2 Mose 23:16; 3 Mose 23:15, 16) Abatsɛ nɛkɛ gbijurɔyeli nɛɛ akɛ Pentekoste (kɛjɛ Hela wiemɔ ni eshishi ji “nyɔŋmai enumɔ” mli), ni Pentekoste afi 33 Ŋ.B. ji be mli ni akɛ mumɔ krɔŋkrɔŋ fɔ 144,000 lɛ ateŋ klɛŋklɛŋ bii lɛ mu. Yɛ naagbee lɛ, yɛ nyɔŋ ni ji kpawo lɛ nɔ, beni abua ŋmaa lɛ fɛɛ naa lɛ, ayeɔ Asesei Agbijurɔ lɛ, ni eji miishɛɛ kɛ shidaa be kɛha Israelbii lɛ, ni esa akɛ Israelbii lɛ ahi asesei amli otsi, asesei ni akɛ tsei aniji kusukusuu kɛ blɛoi fee mli. (3 Mose 23:33-43) Nɔ ni kɛ enɛ kpaa gbee lɛ, asafo babaoo lɛ, ni ji naabuamɔ kpeteŋkpele lɛ fa lɛ, kɛ shidaa haa yɛ maŋtsɛsɛi lɛ hiɛ “ni amɛhiɛ blɛoi yɛ amɛdɛŋ.”—Kpojiemɔ 7:9.
Naanɔ Sanekpakpa Jajemɔ
16, 17. (a) Nɛgbɛ Yohane na bɔfo ko akɛ eefiliki yɛ, ni mɛɛ sane bɔfo lɛ jajeɔ? (b) Namɛi ji mɛi ni amɛkɛ amɛhe ewo Maŋtsɛyeli shiɛmɔ nitsumɔ lɛ mli lɛ, ni mɛɛ niiashikpamɔi tsɔɔ enɛ?
16 Yɛ no sɛɛ lɛ Yohane ŋma akɛ: “Ni mina bɔfo kroko miifiliki yɛ ŋwɛi teŋ, ni ehiɛ naanɔ sanekpakpa ni eyaajaje etsɔɔ mɛi ni yɔɔ shikpɔŋ lɛ nɔ kɛ jeŋmaŋ fɛɛ jeŋmaŋ kɛ akutso fɛɛ akutso kɛ majianɔwiemɔi fɛɛ kɛ maŋ fɛɛ maŋ, ni ekɛ gbee wulu kɛɛ: Nyɛshea Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmɛlɛtswaa lɛ eshɛ; ni nyɛjaa mɔ ni fee ŋwɛi kɛ shikpɔŋ kɛ ŋshɔ kɛ nu bui ni baa lɛ.” (Kpojiemɔ 14:6, 7) Bɔfo lɛ miifiliki “yɛ ŋwɛi teŋ,” he ni loofɔji filikiɔ yɛ. (Okɛto Kpojiemɔ 19:17 he.) No hewɔ lɛ, abaanyɛ anu egbee yɛ shikpɔŋ muu lɛ fɛɛ nɔ. Kwɛ bɔ ni bɔfo nɛɛ gbee ni shɛɔ shikpɔŋ muu lɛ fɛɛ nɔ lɛ yaa shɔŋŋ fe televishin nɔ adafitswaa kwraa!
17 Awoɔ mɔ fɛɛ mɔ hewalɛ ni eshe Yehowa, mɔ ni yɔɔ hewalɛ kwraa fe okadi kooloo fɛɛ kooloo ni Satan kudɔɔ ni mɔ ko kɛ lɛ yeee egbɔ lɛ moŋ gbeyei, shi jeee kooloo lɛ kɛ emaga lɛ. Ejaakɛ Yehowa bɔ ŋwɛi kɛ shikpɔŋ, ni agbɛnɛ be eshɛ ni ebaakojo shikpɔŋ lɛ! (Okɛto 1 Mose 1:1; Kpojiemɔ 11:18 he.) Beni eyɔɔ shikpɔŋ nɔ lɛ, Yesu gba yɛ wɔgbii nɛɛ ahe akɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.” (Mateo 24:14) Kristofoi ni afɔ amɛ mu lɛ asafo lɛ miitsu nɛkɛ nitsumɔ nɛɛ. (1 Korintobii 9:16; Efesobii 6:15) Kpojiemɔ jieɔ lɛ kpo yɛ biɛ akɛ bɔfoi ni anaaa amɛ lɛ hu fata shiɛmɔ nitsumɔ nɛɛ he. Kwɛ bɔ ni ana ŋwɛibɔfoi akudɔmɔ shii abɔ yɛ Yehowa Odasefoi lɛ ni amɛkɛ amɛ baa shia ko ni susuma ko ehao ni eebi, eesɔle koni ena mumɔŋ yelikɛbuamɔ lɛ ŋɔɔ lɛ!
18. Taakɛ bɔfo ni filikiɔ yɛ ŋwɛi teŋ lɛ tsɔɔ lɛ, mɛɛ ŋmɛlɛtswaa eshɛ lɛ, ni namɛi baajaje saji krokomɛi lolo?
18 Taakɛ bɔfo ni filikiɔ yɛ ŋwɛi teŋ lɛ jaje lɛ, kojomɔ ŋmɛlɛtswaa lɛ eshɛ. Mɛɛ kojomɔ Nyɔŋmɔ kɛbaaha? Toiiaŋ baafee heŋŋ kɛ anu adafitswai ni bɔfo ni ji enyɔ, etɛ, ejwɛ, kɛ enumɔ lɛ baajaje lɛ he lɛ.—Yeremia 19:3.
[Shishigbɛ niŋmai]
a Taakɛ 1 Korintobii 4:8 tsɔɔ lɛ, Kristofoi ni afɔ amɛ mu lɛ yeee nɔ akɛ maŋtsɛmɛi beni amɛyɔɔ shikpɔŋ nɛɛ nɔ lɛ. Ni kɛlɛ, taakɛ Kpojiemɔ 14:3, 6, 12, 13 lɛ mli saji lɛ tsɔɔ lɛ, amɛnaa lala hee lɛ lamɔ lɛ mli gbɛfaŋnɔ kɛtsɔɔ sanekpakpa lɛ shiɛmɔ nɔ yɛ be mli ni amɛŋmɛɔ amɛtsui shi kɛyashiɔ amɛ shikpɔŋ nɔ nitsumɔ lɛ naagbee lɛ.
b Nɔ ni fiɔ enɛ sɛɛ ji Hebri gbɛii ni akɛtsu nii yɛ ninai krokomɛi amli lɛ; akɛ Hebri gbɛi “Abaddon” (ni eshishi ji “Hiɛkpatamɔ”) ha Yesu, ni etsuɔ kojomɔ he nii yɛ he ni “atsɛɔ jɛi yɛ Hebri wiemɔ mli akɛ Har-Magedon lɛ.”—Kpojiemɔ 9:11; 16:16.
c Ŋmalɛi lɛ kɛɔ akɛ “lala ko ni tamɔ ehee,” ejaakɛ aŋma lala lɛ diɛŋtsɛ yɛ gbalɛ wiemɔi amli yɛ blema bei amli. Shi mɔ ko bɛ ni he esa ni baanyɛ ala. Agbɛnɛ, akɛni ato Maŋtsɛyeli lɛ ama shi ni atee krɔŋkrɔŋbii lɛ ashi nɛɛ, gbalɛi lɛ amlibaa eje kpo, ni be eshɛ ni akɛ gbee baala lala nɛɛ kɛ ŋɔɔmɔ ni yɔɔ mli lɛ fɛɛ.
d Abaanyɛ akɛ shihilɛ lɛ ato tsulɔ anɔkwafo kɛ nilelɔ lɛ ni kɛ niyenii haa eshiabii yɛ be ni sa mli lɛ nɔ lɛ he. (Mateo 24:45) Tsulɔ kuu lɛ ji mɔ ni gbɛnaa nii ka enɔ akɛ ekɛ niyenii lɛ aha, shi shiabii lɛ, emli bii ni ji kuu lɛ mli bii aŋkroaŋkroi lɛ, naa hewalɛ kɛtsɔɔ nakai mumɔŋ niyenii lɛ yeli nɔ. Amɛji nakai kuu lɛ nɔŋŋ, shi atsɔɔ bɔ ni amɛji yɛ gbɛi sɔrɔtoi anɔ—kutuu kɛ agbɛnɛ aŋkroaŋkroi.
[Mfonirii ni yɔɔ baafa 202, 203]
144,000
Onukpai 24
Toobi, Kristo Yesu hefatalɔi niyelɔi ni anaa amɛ kɛjɛɔ gbɛi sɔrɔtoi enyɔ nɔ