Sane ko ní Odasefonyo ko kɛ Mɔ ko Gba—Ani Yesu Nɔŋŋ Ji Nyɔŋmɔ?

YEHOWA ODASEFOI sumɔɔ ni amɛkɛ mɛi agba Biblia mli saji. Ani oyɛ Biblia mli sane pɔtɛɛ ko ní onuuu shishi? Ani ootao ole Yehowa Odasefoi lɛ ahemɔkɛyelii loo amɛjamɔŋ nifeemɔi lɛ eko he nii babaoo? Kɛ́ nakai ni lɛ, no lɛ be kroko kɛ́ okɛ Odasefonyo ko kpe lɛ, bɔɔ mɔdɛŋ ní obi lɛ. Ebaaná he miishɛɛ waa akɛ ekɛ bo baasusu saji ni tamɔ nɛkɛ lɛ ahe.

Sane ni nyiɛ sɛɛ nɛɛ ji nɔkwɛmɔnɔ ni tsɔɔ sane ko ní Yehowa Odasefonyo ko kɛ mɔ ko baagba. Ŋɔɔ lɛ akɛ Odasefonyo ko ni atsɛɔ lɛ Karen lɛ eyasara yoo ko ni atsɛɔ lɛ Samantha yɛ eshĩa.

Lɛɛlɛŋ akɛ Nyɛheee Yesu nɔ Nyɛyeee?

Samantha: Wɔsɔfo lɛ kɛɛ Yehowa Odasefoi heee Yesu nɔ amɛyeee. Ani eji anɔkwale?

Karen: Ofainɛ wɔheɔ Yesu nɔ wɔyeɔ. Yɛ anɔkwale mli lɛ, wɔheɔ wɔyeɔ akɛ ja mɔ ko ená hemɔkɛyeli yɛ Yesu mli dani abaahere eyiwala.

Samantha: Nakai mi hu miheɔ miyeɔ.

Karen: Ni tsɔɔ akɛ mi kɛ bo fɛɛ heɔ sane nɛɛ wɔyeɔ. Shi ofainɛ atsɛɔ mi Karen, ni bo hu?

Samantha: Atsɛɔ mi Samantha. Ojɛi fɛɛ?

Karen: Mijɛi jogbaŋŋ, Samantha. Ekolɛ obaabi ohe akɛ, ‘Kɛ́ Yehowa Odasefoi heɔ Yesu nɔ amɛyeɔ lɛɛlɛŋ lɛ, belɛ mɛni hewɔ mɛi kɛɔ akɛ amɛheee enɔ amɛyeee lɛ?’

Samantha: Hɛɛ, miitao male.

Karen: Samantha ole nɔ ko, sane lɛ kukufoo kɛkɛ ji akɛ wɔheɔ Yesu nɔ wɔyeɔ waa diɛŋtsɛ, shi wɔheee nɔ fɛɛ nɔ ni mɛi kɛɔ yɛ Yesu he lɛ wɔyeee.

Samantha: Nakai, tamɔ mɛni nɛkɛ?

Karen: Ojogbaŋŋ. Mɛi komɛi kɛɔ akɛ Yesu ji gbɔmɔ kpakpa ko kɛkɛ. Shi wɔkɛ nakai susumɔ lɛ kpãaa gbee.

Samantha: Mi hu nakai nɔŋŋ.

Karen: Ni tsɔɔ akɛ mi kɛ bo fɛɛ hiɛ susumɔ kome yɛ enɛ hu he. Nɔ ni ji enyɔ lɛ, Yehowa Odasefoi heee tsɔɔmɔi ni teɔ shi woɔ nɔ ni Yesu diɛŋtsɛ wie yɛ tsakpãa ni yɔɔ ekɛ e-Tsɛ lɛ teŋ lɛ he lɛ amɛyeee.

Samantha: Te otsɔɔ tɛŋŋ?

Karen: Jamɔi babaoo tsɔɔ akɛ Yesu nɔŋŋ ji Nyɔŋmɔ. Ekolɛ, bo hu nakai atsɔɔ bo.

Samantha: Hɛɛ, wɔsɔfo lɛ kɛɛ Nyɔŋmɔ lɛ, lɛ nɔŋŋ ji Yesu.

Karen: Shi okɛ mi baakpã gbee akɛ kɛ́ wɔmiitao wɔle anɔkwale ni kɔɔ Yesu he lɛ, esa akɛ wɔpɛi nɔ ni lɛ diɛŋtsɛ ewie yɛ ehe lɛ mli wɔkwɛ, aloo jeee nakai?

Samantha: Nakai ni, mikɛ bo kpãa gbee.

Mɛni Yesu Wie?

Karen: Ha wɔsusu Biblia mli ŋmalɛ ko ni baaha wɔnu sane nɛɛ shishi jogbaŋŋ lɛ he wɔkwɛ. Ofainɛ, kadimɔ nɔ ni wɔbaakane yɛ Yohane 6:38 lɛ. Yesu kɛɛ akɛ: “Jeee mi diɛŋtsɛ misuɔmɔnaa nii feemɔ hewɔ mijɛ ŋwɛi miba, shi moŋ mɔ ni tsu mi lɛ suɔmɔnaa nii feemɔ.” Kɛ́ Yesu nɔŋŋ ji Nyɔŋmɔ lɛ, kulɛ sane nɛɛ baaha wɔyiŋ afutu wɔ.

Samantha: Mɛni otaoɔ otsɔɔ lɛ?

Karen: Ojogbaŋŋ, kadimɔ akɛ Yesu kɛɛ akɛ, jeee lɛ diɛŋtsɛ esuɔmɔnaa nii feemɔ hewɔ ejɛ ŋwɛi eba.

Samantha: Nakai, ekɛɛ eba koni ebaafee Mɔ ni tsu lɛ lɛ suɔmɔnaa nii.

Karen: Shi kɛ́ Yesu nɔŋŋ ji Nyɔŋmɔ lɛ, belɛ namɔ tsu lɛ kɛjɛ ŋwɛi kɛba? Ni mɛni hewɔ Yesu fee Mɔ ni tsu lɛ lɛ suɔmɔnaa nii lɛ?

Samantha: Miina nɔ ni otaoɔ otsɔɔ lɛ. Shi efeee mi akɛ abaanyɛ adamɔ ŋmalɛ nɛɛ pɛ nɔ atsɔɔ akɛ Yesu jeee Nyɔŋmɔ.

Karen: Yoo, bo lɛ susumɔ nɔ ni Yesu wie be kroko lɛ hu he okwɛ. Ewie nɔ ko tamɔ nakai nɔŋŋ yɛ Yohane, yitso 7 lɛ. Ofainɛ, ani obaanyɛ okane Yohane 7:16 lɛ?

Samantha: Hɛɛ. “Yesu here amɛ nɔ ni ekɛɛ: Minitsɔɔmɔ lɛ, jeee minɔ̃ŋ, shi moŋ mɔ ni tsu mi lɛ nɔ̃ŋ.”

Karen: Oyiwaladɔŋŋ, Samantha. Ani ŋmalɛ nɛɛ miikɛɛ akɛ Yesu nitsɔɔmɔi lɛ ji lɛ diɛŋtsɛ esusumɔi?

Samantha: Dabi, ekɛɛ enitsɔɔmɔi lɛ, Mɔ ni tsu lɛ lɛ nɔ ni.

Karen: Nakai ni. Shi kome ekoŋŋ lɛ, wɔbaabi akɛ: ‘Namɔ tsu Yesu? Ni namɔ kɛ anɔkwalei ni etsɔɔ lɛ ha lɛ?’ Ani nakai Mɔ lɛ nɔ kwɔŋ fe Yesu? Ekã shi faŋŋ akɛ kɛ́ mɔ ko tsuɔ mɔ ko lɛ, belɛ enɔ kwɔ fe mɔ ni etsuɔ lɛ lɛ.

Samantha: Enɛ ewo mi afua fioo. Mikaneko ŋmalɛ nɛɛ pɛŋ.

Karen: Agbɛnɛ hu, ha wɔsusu Yesu wiemɔi ni yɔɔ Yohane 14:28 lɛ he wɔkwɛ: “Nyɛnu akɛ mikɛɛ nyɛ akɛ: Miiya ni miiba nyɛŋɔɔ. Nyɛmiisumɔ mi kulɛ, nyɛaaná miishɛɛ akɛ miiya tsɛ lɛ ŋɔɔ, ejaakɛ mitsɛ da fe mi.” Yɛ ŋmalɛ nɛɛ naa lɛ, kɛ́ okwɛ lɛ, te Yesu naa ehe tɛŋŋ kɛ́ ekɛ ehe to Tsɛ lɛ he?

Samantha: Hmm, ekɛɛ Tsɛ lɛ da fe lɛ. No hewɔ lɛ, efeɔ mi akɛ enaa Nyɔŋmɔ akɛ enɔ kwɔ fe lɛ.

Karen: Nakai pɛpɛɛpɛ. Kadimɔ nɔ ni Yesu kɛɛ ekaselɔi lɛ ní aŋma yɛ Mateo 28:18 lɛ yɛ nɔkwɛmɔnɔ kroko nɛɛ hu mli. Ekɛɛ yɛ jɛmɛ akɛ: “Aŋɔ hegbɛ fɛɛ aha mi yɛ ŋwɛi kɛ shikpɔŋ nɔ.” No hewɔ lɛ, ani Yesu miitsɔɔ akɛ kɛjɛ jeŋbɔɔ beebe lɛ, eyɛ hegbɛ fɛɛ?

Samantha: Dabi, ekɛɛ aŋɔ hegbɛ fɛɛ aha lɛ.

Karen: Shi kɛ́ Yesu nɔŋŋ ji Nyɔŋmɔ lɛ, belɛ te feɔ tɛŋŋ ni aŋɔɔ hegbɛi babaoo ahaa lɛ lɛ? Ni namɔ ŋɔ ha lɛ?

Samantha: Ɛmm, enɛ lɛ esa akɛ masusu he fioo dã.

Namɔ Ekɛwieɔ Lɛ?

Karen: Nɔ kroko hu yɛ ni baaha wɔyiŋ afutu wɔ kɛ́ Yesu nɔŋŋ ji Nyɔŋmɔ lɛɛlɛŋ lɛ.

Samantha: Mɛni ni?

Karen: No ji nɔ ni wɔkaneɔ yɛ Yesu baptisimɔ lɛ he lɛ. Kadimɔ amaniɛbɔɔ ni yɔɔ Luka 3:21, 22 lɛ. Ofainɛ ni okane jɛmɛ.

Samantha: “Shi eba mli akɛ, beni abaptisi mɛi lɛ fɛɛ lɛ, abaptisi Yesu hu; ni beni esɔleɔ lɛ, ŋwɛi gbele, ni Mumɔ krɔŋkrɔŋ lɛ kpeleke shi kɛ su ní tamɔ okpo su kɛba enɔ; ni gbee ko jɛ ŋwɛi kɛɛ: Bo ji misuɔmɔ bi lɛ, bo ohe tsuijurɔ mináa!”

Karen: Ani oyɔse nɔ ni Yesu feɔ beni abaptisiɔ lɛ lɛ?

Samantha: Eesɔle.

Karen: Nakai. No hewɔ lɛ, wɔbaanyɛ wɔbi wɔhe akɛ, ‘Kɛ́ Yesu nɔŋŋ ji Nyɔŋmɔ lɛ, belɛ namɔ no mli lɛ esɔleɔ ehaa lɛ mɔ?’

Samantha: Obi sane. Enɛ lɛ esa akɛ miyabi wɔsɔfo lɛ.

Karen: Kɛfata he lɛ, kadimɔ akɛ beni Yesu je kpo kɛjɛ nu lɛ mli lɛ, mɔ ko wie kɛjɛ ŋwɛi. Ani okadi nɔ ni Mɔ lɛ kɛɛ lɛ?

Samantha: Ekɛɛ akɛ Yesu ji E-Bi ni E-sumɔɔ lɛ, ni E-náa ehe tsuijurɔ.

Karen: Nakai ni. Shi kɛ́ Yesu nɔŋŋ ji Nyɔŋmɔ lɛ, belɛ namɔ jɛ ŋwɛi ewie nibii nɛɛ?

Samantha: Anɔkwa, misusuko he nakai pɛŋ.

Mɛni Hewɔ Atsɛɔ Amɛ “Tsɛ” kɛ “Bi” Lɛ?

Karen: Susumɔ enɛ hu he okwɛ: Wɔkane akɛ Yesu tsɛ Nyɔŋmɔ akɛ eŋwɛi Tsɛ. Ni beni abaptisi Yesu lɛ, gbee ko jɛ ŋwɛi etsɛ Yesu akɛ E-Bi. Yɛ anɔkwale mli lɛ, Yesu diɛŋtsɛ tsɛ ehe Nyɔŋmɔ Bi. Ojogbaŋŋ, kɛ́ ootao otsɔɔ mi akɛ mɛi enyɔ komɛi yeɔ egbɔ lɛ, namɛi obaanyɛ okɛtsɔɔ mi nii anaa koni manu shishi?

Samantha: Ekolɛ matsĩ mɔ ko kɛ enyɛmi tã.

Karen: Nakai—ekolɛ obaanyɛ otsĩ haaji po atã. Shi Yesu tsɛ Nyɔŋmɔ akɛ Tsɛ lɛ, ni etsɛ ehe akɛ Bi lɛ. No hewɔ lɛ, mɛni osusuɔ akɛ Yesu taoɔ etsɔɔ lɛ?

Samantha: Mina nɔ ni otaoɔ otsɔɔ lɛ. Yesu miitsɔɔ akɛ mɔ kome da, ni eyɛ hegbɛ hu fe mɔ kroko lɛ.

Karen: Nakai pɛpɛɛpɛ. Susumɔ enɛ hu he okwɛ: Okɛ nɔkwɛmɔnɔ ni sa jogbaŋŋ ha kɛtsɔɔ mɛi enyɔ ni yeɔ egbɔ lɛ mli—ni ji mɔ ko kɛ enyɛmi, loo haaji. Kɛ́ Yesu ji Nyɔŋmɔ lɛɛlɛŋ lɛ, ani osusuuu akɛ kulɛ Yesu, ni ji Tsɔɔlɔ Kpele lɛ, kɛ nɔkwɛmɔnɔ ni tamɔ nakai nɔŋŋ loo nɔ ni yɔɔ faŋŋ po fe nakai baatsu nii kɛtsɔɔ akɛ amɛyi enyɔ lɛ yeɔ egbɔ?

Samantha: Lɛɛlɛŋ, kulɛ ebaafee nakai.

Karen: Moŋ lɛ, ekɛ wiemɔi ni ji “Tsɛ” kɛ “Bi” tsu nii kɛtsɔɔ tsakpãa ni yɔɔ ekɛ Nyɔŋmɔ teŋ.

Samantha: Osane lɛ eta mimli waa.

Mɛni Yesu Mra Be mli Sɛɛnyiɛlɔi lɛ Wie?

Karen: Dani mashi bo lɛ, kɛ́ oyɛ be fioo lɛ, masumɔ ni mikɛ bo asusu sane nɛɛ fã kroko he.

Samantha: Obaanyɛ oya nɔ, miyɛ be fioo.

Karen: Kɛ́ Yesu ji Nyɔŋmɔ lɛɛlɛŋ lɛ, kulɛ Yesu kaselɔi lɛ baaha ale enɛ faŋŋ, aloo jeee nakai?

Samantha: Etamɔ nɔ ni shishinumɔ yɛ he akɛ amɛbaafee nakai.

Karen: Kɛlɛ, he ko he ko bɛ Ŋmalɛi lɛ amli ni tsɔɔ akɛ amɛtsɔɔ nakai. Moŋ lɛ, kadimɔ nɔ ni bɔfo Paulo, ní eji Yesu mra be mli sɛɛnyiɛlɔi lɛ ateŋ mɔ kome lɛ ŋma. Ewie nɔ ni Nyɔŋmɔ fee beni Yesu gbo, ní atee lɛ shi sɛɛ lɛ he yɛ Filipibii 2:9 lɛ akɛ: “Nyɔŋmɔ wó enɔ gojoo, ni eduro lɛ gbɛi ní tá gbɛi fɛɛ gbɛi nɔ.” Yɛ ŋmalɛ nɛɛ naa lɛ, mɛni Nyɔŋmɔ fee Yesu?

Samantha: Ekɛɔ akɛ Nyɔŋmɔ wó enɔ gojoo.

Karen: Nakai. Shi kɛ́ dani Yesu baagbo lɛ, ekɛ Nyɔŋmɔ yeɔ egbɔ, ni sɛɛ mli lɛ Nyɔŋmɔ wó enɔ gojoo lɛ, belɛ no tsɔɔ akɛ Yesu nɔ ebakwɔ fe Nyɔŋmɔ agbɛnɛ, aloo jeee nakai? Kɛ́ okwɛ lɛ, ani mɔ ko nɔ baanyɛ akwɔ fe Nyɔŋmɔ?

Samantha: Dabi. Enyɛŋ eba lɛ nakai kɔkɔɔkɔ.

Karen: Mikɛ bo kpãa gbee. Yɛ nibii srɔtoi ni wɔsusu he nɛɛ anaa lɛ, te tɛŋŋ, ani obaakɛɛ akɛ Biblia lɛ tsɔɔ akɛ Yesu nɔŋŋ ji Nyɔŋmɔ?

Samantha: Dabi, minyɛŋ makɛɛ nakai. Biblia lɛ tsɔɔ akɛ Yesu ji Nyɔŋmɔ Bi.

Karen: Nakai pɛpɛɛpɛ. Shi Samantha ofainɛ kadimɔ akɛ, Yehowa Odasefoi buɔ Yesu waa. Wɔheɔ wɔyeɔ akɛ gbo ni ebagbo akɛ shiwoo Mesia lɛ gbele gbɛ koni adesai anɔkwafoi fɛɛ aná yiwalaheremɔ.

Samantha: Mi hu miheɔ nakai nɔŋŋ miyeɔ.

Karen: Ekolɛ obaabi ohe akɛ, ‘Te wɔɔfee tɛŋŋ wɔha Yesu ana akɛ wɔhiɛ sɔɔ ewala ní ekɛbafɔ̃ shi eha wɔ lɛ?’a

Samantha: Hɛɛ, misusuɔ he.

Karen: Kɛ́ obaasumɔ lɛ, maku misɛɛ mikɛ bo abasusu hetoo ni Biblia lɛ kɛhaa lɛ he. Ŋmɛnɛ otsi lɛ, ani obaahi shĩa yɛ nɛkɛ be nɛɛ mli nɔŋŋ?

Samantha: Hɛɛ, obaabanina mi.

Karen: Ehi waa, belɛ wɔbaakpe mɔ.

[Shishigbɛ niŋmaa]