Nɔ Ni Yohane Ŋma
7 Enɛ sɛɛ lɛ, Yesu tee nɔ enyiɛ kɛkpa Galilea, shi esumɔɔɔ akɛ efeɔ nakai yɛ Yudea, ejaakɛ Yudafoi lɛ miitao lɛ agbe.+ 2 Shi Yudafoi lɛ Agbai Agbi Jurɔ+ lɛ miibɛŋkɛ. 3 No hewɔ lɛ, enyɛmimɛi hii+ lɛ kɛɛ lɛ akɛ: “Jee biɛ ni oya Yudea, koni okaselɔi lɛ hu ana nitsumɔi ni otsuɔ lɛ. 4 Ejaakɛ mɔ ko mɔ ko bɛ ni miitao ni ale lɛ yɛ faŋŋ, ni efeɔ nɔ ko yɛ teemɔŋ. Akɛni oofee nibii nɛɛ hewɔ lɛ, hã jeŋ fɛɛ ana bo.” 5 Anɔkwa, no mli lɛ enyɛmimɛi hii lɛ heee amɛyeee akɛ Nyɔŋmɔ ni tsu lɛ.+ 6 No hewɔ lɛ, Yesu kɛɛ amɛ akɛ: “Mibe lɛ shɛko,+ shi nyɛ lɛ, nyɛbaanyɛ nyɛya be fɛɛ be. 7 Je lɛ bɛ yiŋtoo ko ni ebaadamɔ nɔ enyɛ nyɛ, shi mi lɛ, enyɛɔ mi, ejaakɛ miyeɔ ehe odase akɛ enitsumɔi lɛ, nitsumɔi fɔji ni.+ 8 Nyɛ lɛ, nyɛkwɔa kɛyaa gbi jurɔ lɛ; mi lɛ, miyaŋ gbi jurɔ nɛɛ bianɛ, ejaakɛ mibe lɛ shɛko.”+ 9 No hewɔ lɛ, be ni ekɛɛ amɛ nibii nɛɛ sɛɛ lɛ, etee nɔ ehi Galilea.
10 Shi be ni enyɛmimɛi hii lɛ ekwɔ kɛtee gbi jurɔ lɛ sɛɛ lɛ, lɛ hu ekwɔ kɛtee, shi jeee yɛ faŋŋ, moŋ lɛ yɛ teemɔŋ. 11 No hewɔ lɛ, Yudafoi lɛ bɔi lɛ taomɔ yɛ gbijurɔyeli lɛ shishi ni amɛkɛɛ: “Nɛgbɛ nakai nuu lɛ yɔɔ?” 12 Ni maŋbii lɛ wie huhuuhu yɛ amɛteŋ yɛ ehewɔ. Mɛi komɛi kɛɛ: “Gbɔmɔ kpakpa ji lɛ.” Mɛi krokomɛi hu kɛɛ: “Ejeee gbɔmɔ kpakpa. Elakaa mɛi.”+ 13 Anɔkwa, mɔ ko mɔ ko ewieee ehe yɛ faŋŋ ejaakɛ amɛmiishe Yudafoi lɛ gbeyei.+
14 Be ni shɛ gbijurɔyeli lɛ teŋgbɛ lɛ, Yesu kwɔ kɛtee sɔlemɔ shĩa lɛ ni eyabɔi nitsɔɔmɔ. 15 Ni Yudafoi lɛ anaa kpɛ amɛhe amɛkɛɛ: “Te nuu nɛɛ fee tɛŋŋ ele Ŋmalɛ lɛ* mli nɛkɛ,+ be mli ni ekaseko nii yɛ skul* ko kwraa mli lɛ?”+ 16 Yesu hu hã amɛ hetoo ekɛɛ: “Nɔ ni mitsɔɔ lɛ, jeee minɔ ni, shi moŋ mɔ ni tsu mi lɛ nɔ ni.+ 17 Kɛji mɔ ko miisumɔ akɛ efee Nyɔŋmɔ suɔmɔnaa nii lɛ, ebaale kɛji nitsɔɔmɔ lɛ jɛ Nyɔŋmɔ ŋɔɔ+ aloo mi diɛŋtsɛ mitoɔ miyiŋ miwieɔ. 18 Mɔ fɛɛ mɔ ni toɔ lɛ diɛŋtsɛ eyiŋ ewieɔ lɛ, eetao lɛ diɛŋtsɛ enunyam; shi mɔ fɛɛ mɔ ni sumɔɔ akɛ ewo mɔ ni tsu lɛ lɛ hiɛ nyam lɛ,+ anɔkwafo ji lɛ, ni nɔ ko ni ejaaa bɛ emli. 19 Mose hã nyɛ Mla lɛ,+ aloo jeee nakai? Shi nyɛteŋ mɔ ko mɔ ko yeee Mla lɛ nɔ. Mɛni hewɔ nyɛtaoɔ mi nyɛgbe lɛ?”+ 20 Maŋbii lɛ hã hetoo akɛ: “Oyɛ daimonio. Namɔ taoɔ bo agbe?” 21 Yesu hã amɛ hetoo akɛ: “Nɔ kome pɛ mifee, ni nyɛ fɛɛ nyɛnaa ekpɛ nyɛhe nɛɛ. 22 Enɛ hewɔ Mose kɛ ketiafoo lɛ hã nyɛ lɛ+—jeee akɛ ejɛ Mose ŋɔɔ, shi moŋ ejɛ tsɛmɛi lɛ aŋɔɔ+—ni nyɛfoɔ mɔ ketia yɛ Hejɔɔmɔ Gbi nɔ. 23 Kɛ́ afoɔ gbɔmɔ ketia yɛ Hejɔɔmɔ Gbi nɔ koni akaku Mose Mla lɛ mli lɛ, ani nyɛ lɛ, nyɛmli efu mi waa akɛni mihã mɔ ko ná hewalɛ yɛ Hejɔɔmɔ Gbi nɔ lɛ hewɔ?+ 24 Nyɛkpaa kponɔgbɛ ni nyɛkwɛɔ kɛkojoɔ lɛ, moŋ lɛ nyɛkojoa jalɛ kojomɔ.”+
25 Kɛkɛ ni Yerusalembii lɛ ateŋ mɛi komɛi bɔi kɛɛmɔ akɛ: “Mɔ nɛ ji mɔ ni amɛtaoɔ lɛ amɛgbe lɛ, aloo jeee lɛ ni?+ 26 Shi naa! eewie yɛ faŋŋ, ni amɛkɛɛɛ lɛ nɔ ko. Ani nɔyelɔi lɛ ená ele kɛ nɔmimaa akɛ mɔ nɛ ji Kristo lɛ? 27 Shi nuu nɛɛ, wɔle he ni ejɛ;+ shi kɛ́ Kristo lɛ ba lɛ, mɔ ko mɔ ko leŋ he ni ejɛ.” 28 Kɛkɛ ni be ni Yesu tsɔɔ nii yɛ sɔlemɔ shĩa lɛ, ebo ekɛɛ: “Nyɛle mi ni nyɛle he ni mijɛ. Ni mitooo mi diɛŋtsɛ miyiŋ mibaaa,+ shi mɔ ni tsu mi lɛ yɛ lɛɛlɛŋ, ni nyɛleee lɛ.+ 29 Mile lɛ,+ ejaakɛ najiaŋdamɔlɔ ni jɛ eŋɔɔ ji mi, ni nakai mɔ lɛ tsu mi.” 30 No hewɔ lɛ, amɛje shishi amɛtao bɔ ni amɛbaafee amɛmɔ lɛ,+ shi mɔ ko mɔ ko kɛ enine etaaa ehe ejaakɛ eŋmɛlɛtswaa lɛ shɛko.+ 31 Fɛɛ sɛɛ lɛ, mɛi ni bua shi lɛ ateŋ mɛi pii he enɔ amɛye,+ ni amɛkɛɛ akɛ: “Kɛ́ Kristo lɛ ba lɛ, ani ebaafee okadii babaoo fe nɔ ni nuu nɛɛ feɔ nɛɛ?”
32 Farisifoi lɛ nu akɛ maŋbii lɛ miiwie huhuuhu yɛ ehe, ni osɔfoi hiɛnaanɔbii lɛ kɛ Farisifoi lɛ tsu bulɔi koni amɛyamɔ lɛ. 33 Kɛkɛ ni Yesu kɛɛ: “Mikɛ nyɛ baahi shi be fioo dani maya mɔ ni tsu mi lɛ ŋɔɔ.+ 34 Nyɛbaatao mi, shi nyɛnaŋ mi, ni he ni miyɔɔ lɛ, nyɛnyɛŋ jɛmɛ nyɛba.”+ 35 No hewɔ lɛ, Yudafoi lɛ kɛɛkɛɛ yɛ amɛteŋ akɛ: “Nɛgbɛ nuu nɛɛ ekpɛ eyiŋ akɛ ebaaya, ni no hewɔ wɔnaŋ lɛ lɛ? Ani eeenyɛ efee akɛ ekpɛ eyiŋ akɛ ebaaya Yudafoi ni egbɛ eshwã Greekbii lɛ ateŋ lɛ aŋɔɔ koni eyatsɔɔ Greekbii lɛ nii? 36 Be ni ekɛɛ akɛ, ‘Nyɛbaatao mi, shi nyɛnaŋ mi, ni he ni miyɔɔ lɛ, nyɛnyɛŋ jɛmɛ nyɛba’ lɛ, no mli lɛ, mɛni etaoɔ etsɔɔ lɛ?”
37 Naagbee gbi lɛ nɔ, ni ji gbijurɔyeli lɛ gbi wulu lɛ nɔ lɛ,+ Yesu damɔ shi ni ebo ekɛɛ: “Kɛ́ kumai miiye mɔ ko lɛ, eba miŋɔɔ ni ebanu nu.+ 38 Mɔ fɛɛ mɔ ni heɔ minɔ eyeɔ lɛ, ‘Fai ni wala nu yɔɔ mli baajɛ emli tɔ̃ɔ aho,’ tamɔ bɔ ni ŋmalɛ lɛ ekɛɛ lɛ.”+ 39 Shi ewie enɛ yɛ mumɔ krɔŋkrɔŋ lɛ ni mɛi ni heɔ enɔ amɛyeɔ lɛ miiba amɛbaná lɛ hewɔ; no mli lɛ amɛnáko mumɔ krɔŋkrɔŋ lɛ,+ ejaakɛ anáko awo Yesu hiɛ nyam.+ 40 Maŋbii lɛ ateŋ mɛi komɛi ni nu wiemɔi nɛɛ bɔi kɛɛmɔ akɛ: “Mɔ nɛ ji Gbalɔ lɛ lɛɛlɛŋ.”+ 41 Mɛi krokomɛi hu miikɛɛ akɛ: “Kristo lɛ nɛ.”+ Shi mɛi komɛi hu kɛɛ akɛ: “Kristo lɛ, bɛ jeee Galilea ebaajɛ, aloo?+ 42 Ani ŋmalɛ lɛ ekɛɛɛ akɛ Kristo lɛ baajɛ David seshi lɛ mli,+ ni ebaajɛ Betlehem,+ akrowa ni David hi mli lɛ mli?”+ 43 No hewɔ lɛ, mɛi lɛ amli gbála yɛ ehewɔ. 44 Kulɛ amɛteŋ mɛi komɛi miitao amɛmɔ lɛ, shi mɔ ko mɔ ko kɛ enine etaaa ehe.
45 Kɛkɛ ni bulɔi lɛ ku amɛsɛɛ kɛtee osɔfoi hiɛnaanɔbii lɛ kɛ Farisifoi lɛ aŋɔɔ, ni amɛbi bulɔi lɛ akɛ: “Mɛni hewɔ nyɛkɛ lɛ baaa lɛ?” 46 Bulɔi lɛ here nɔ akɛ: “Gbɔmɔ ko gbɔmɔ ko ewieko nɛkɛ dã.”+ 47 Farisifoi lɛ hu here nɔ akɛ: “Ani nyɛ hu alaka nyɛ? 48 Ani nɔyelɔi lɛ loo Farisifoi lɛ ateŋ mɔ ko ehe enɔ eye?+ 49 Shi alomɔ maŋbii nɛɛ ni leee Mla lɛ.” 50 Nikodemo, mɔ ni ba eŋɔɔ be ko ni eho, ni eji amɛteŋ mɔ kome lɛ kɛɛ amɛ akɛ: 51 “Wɔ-Mla lɛ ekojooo mɔ ko, ja anu enaa sane ni aná ale nɔ ni efeɔ dã, aloo jeee nakai?”+ 52 Amɛhã lɛ hetoo akɛ: “Ani bo hu Galilea ojɛ? Taomɔ mli ni obaana akɛ gbalɔ ko eteŋ shi kɛjɛŋ Galilea.”*