‘Nyɛyaa nɔ Nyɛkɛfafaa Nyɛhe’

“Nyɛnanaa nyɛhaa nyɛhe ni nyɛkɛfafaa nyɛhe.”—KOLOSEBII 3:13.

 1. (a) Beni Petro wo ŋaa akɛ wɔkɛ mɛi krokomɛi ahe ake amɛ “kɛyashi shii kpawo” lɛ, mɛni hewɔ ekolɛ esusu akɛ eejie mlihilɛ kpo lɛ? (b) Mɛni Yesu tsɔɔ beni ewie akɛ wɔkɛ sane ake “[kɛyashi] shii nyɔŋmai kpawo kɛ kpawo” lɛ?

“NUNTSƆ, shii enyiɛ minyɛmi afee esha ashi mi ni miŋɔfa lɛ? Kɛyashi shii kpawo lo?” (Mateo 18:21, NW) Ekolɛ Petro susu akɛ ewiemɔ nɛɛ tsɔɔ bɔ ni eyɔɔ mlihilɛ babaoo hã. Yɛ nakai beaŋ lɛ, rabifoi lɛ ablema saji kɛɔ akɛ esaaa ni mɔ ko jieɔ eshaifaa kpo nɔ ni fe shii etɛ yɛ tɔmɔ kome too lɛ nɔŋŋ he.a Feemɔ bɔ ni Petro naa kpɛ ehe, beni Yesu hã lɛ hetoo akɛ: “Miikɛɛ bo akɛ, jeee, Kɛyashi shii kpawo, shi moŋ, Kɛyashi shii nyɔŋmai kpawo kɛ kpawo” lɛ he mfoniri okwɛ! (Mateo 18:22, NW) Bɔ ni etĩ kpawo mli lɛ tamɔ nɔ ni eekɛɛ akɛ “husu bɛ he.” Yɛ Yesu susumɔ naa lɛ, husu ko kwraa bɛ shii abɔ ni esa akɛ Kristofonyo kɛ sane ake mɛi krokomɛi lɛ he.

2, 3. (a) Mɛɛ shihilɛi komɛi amli ekolɛ eeewa akɛ wɔkɛ sane aaake mɛi krokomɛi yɛ? (b) Mɛni hewɔ wɔbaanyɛ wɔná nɔmimaa akɛ mɛi krokomɛi ahe ni wɔkɛkeɔ amɛ lɛ he yɛ sɛɛnamɔ fe fɛɛ kɛha wɔ lɛ?

² Shi kɛlɛ, jeee be fɛɛ be nakai ŋaawoo lɛ kɛ nitsumɔ feɔ mlɛo. Wɔteŋ namɔ nuko dɔlɛ ni awuiyeli ni ejaaa gbɛ kɛbaa lɛ he dã? Ekolɛ mɔ ko ni okɛ ohe fɔ̃ɔ enɔ lɛ ejie oteemɔŋ sane ko kpo. (Abɛi 11:13) Ekolɛ onaanyo ko ni bɛŋkɛ bo kpaakpa lɛ wiemɔi ni esusuuu he lɛ ‘dumɔ bo tamɔ klante.’ (Abɛi 12:18) Ekolɛ niseniianii ni mɔ ko ni osumɔɔ lɛ loo okɛ ohe fɔ̃ɔ enɔ lɛ fee bo lɛ edɔ bo waa. Kɛ́ nibii ni tamɔ nɛkɛ ba lɛ, ekolɛ bɔ ni wɔɔfee yɛ he yɛ adebɔɔ su naa ji wɔmli ni aaafũ. Ekolɛ wɔɔnu he akɛ wɔkɛ mɔ ni etɔ̃ wɔnɔ lɛ akpa wiemɔ kwraa, ni wɔtsi wɔhe kɛjɛ ehe kɛji eeehi. Ke ni wɔkɛ ehe aaake lɛ lɛ baafee tamɔ nɔ ni no baaha eye ehe kɛjɛ efɔŋ ni efee wɔ lɛ he toigbalamɔ mli. Shi kɛlɛ, kɛ wɔkɛ mlifu woɔ wɔmli lɛ, wɔyeɔ wɔ diɛŋtsɛ wɔhe awui.

³ No hewɔ lɛ Yesu tsɔɔ wɔ akɛ wɔkɛ sane ake—“shii nyɔŋmai kpawo kɛ kpawo.” Eka shi faŋŋ akɛ etsɔɔmɔi lɛ yeŋ wɔ awui kɔkɔɔkɔ. Nɔ fɛɛ nɔ ni etsɔɔ lɛ jɛ Yehowa, ‘Mɔ ni tsɔɔ wɔ nii ni hi ha wɔ’ lɛ ŋɔɔ. (Yesaia 48:17; Yohane 7:16, 17) Jwɛŋmɔ yɛ mli akɛ, wɔ sɛɛnamɔ hewɔ ni esa akɛ wɔkɛ sane ake mɛi krokomɛi lɛ. Dani wɔɔsusu nɔ hewɔ ni esa akɛ wɔkɛ sane ake kɛ gbɛ ni wɔɔtsɔ nɔ wɔfee nakai lɛ he lɛ, ekolɛ eeeye ebua akɛ wɔɔtsɔɔ nɔ ni eshaifaa ji kɛ nɔ ni ejeee lɛ mli faŋŋ klɛŋklɛŋ. Ekolɛ bɔ ni wɔnuɔ eshaifaa shishi wɔhaa lɛ kɔɔ bɔ ni wɔnyɛɔ wɔkɛ sane keɔ kɛji mɛi krokomɛi fee wɔ efɔŋ lɛ he.

 4. Mɛi krokomɛi ahe ni wɔkɛkeɔ amɛ lɛ etsɔɔɔ mɛni, shi te atsɔɔ eshaifaa shishi ahaa tɛŋŋ?

⁴ Tɔmɔi ni mɛi krokomɛi tɔ̃ɔ wɔnɔ ni wɔkɛkeɔ amɛ lɛ etsɔɔɔ akɛ wɔkpɛlɛɔ nɔ ni amɛfee lɛ nɔ loo wɔbuɔ lɛ nɔ ko bibioo; nakai nɔŋŋ hu etsɔɔɔ akɛ esa akɛ wɔha mɛi krokomɛi aná wɔhe sɛɛ yɛ gbɛ ni ejaaa nɔ. Ejaakɛ, kɛ Yehowa kɛ wɔhe ke wɔ lɛ, eka shi faŋŋ akɛ no etsɔɔɔ akɛ eebu eshai ni wɔfee lɛ akɛ nɔ ko bibioo, ni eŋmɛŋ gbɛ ni adesai eshafeelɔi anaanaa emɔbɔnalɛ lɛ nɔ kɔkɔɔkɔ. (Hebribii 10:29) Taakɛ Insight on the Scriptures lɛ tsɔɔ lɛ, atsɔɔ eshaifaa shishi akɛ “nɔtɔlɔ ko he ni akɛkeɔ lɛ; ní mli fuuu lɛ dɔŋŋ yɛ tɔmɔ ni etɔ̃ lɛ hewɔ, kɛ ŋmɛɛmɔ ni aŋmɛɛ hegbɛ ni ayɔɔ akɛ aaafee lɛ nɔ ko kɛto najiaŋ lɛ fɛɛ he.” (Kpo 1, baafa 861)b Biblia lɛ haa wɔ yiŋtoi kpakpai ni wɔɔdamɔ nɔ wɔkɛ mɛi krokomɛi ahe ake amɛ.

Mɛni Hewɔ Esa akɛ Wɔkɛ Mɛi Krokomɛi Ahe Ake Amɛ?

 5. Mɛɛ yiŋtoo ni he hiaa ni wɔɔdamɔ nɔ wɔkɛ mɛi krokomɛi ahe ake amɛ atsɔɔ yɛ Efesobii 5:1 lɛ?

⁵ Atsɔɔ yiŋtoo ni he hiaa hewɔ ni esa akɛ wɔkɛ mɛi krokomɛi ahe ake amɛ lɛ yɛ Efesobii 5:1 lɛ akɛ: “No hewɔ lɛ nyɛfea Nyɔŋmɔ kaselɔi, tamɔ bii ni asumɔɔ.” Mɛni mli esa akɛ wɔfee “Nyɔŋmɔ kaselɔi” lɛ yɛ? Wiemɔ ni ji “no hewɔ lɛ” kɛ wiemɔ lɛ tsaa kuku ni tsɔ hiɛ lɛ, ni kɛɔ akɛ: “Nyɛmli ahia ahaa nyɛhe, nyɛmusuŋ atsɔa nyɛ yɛ nyɛhe, nyɛŋɔfafaa nyɛhe, taakɛ bɔ nɔŋŋ ni Nyɔŋmɔ ŋɔfa nyɛ yɛ Kristo mli lɛ.” (Efesobii 4:32; wɔma efã ko nɔ mi.) Hɛɛ, kɛ aawie eshaifaa he lɛ, esa akɛ wɔtsɔmɔ Nyɔŋmɔ kaselɔi. Taakɛ gbekɛ bibioo bɔɔ mɔdɛŋ akɛ eeetamɔ etsɛ pɛpɛɛpɛ lɛ, nakai esa akɛ wɔ, ni wɔtamɔ gbekɛbii ni Yehowa sumɔɔ wɔsane waa lɛ, asumɔ akɛ wɔɔtamɔ wɔ ŋwɛi Tsɛ ni kɛ sane keɔ lɛ. Kwɛ bɔ ni Yehowa tsui baanya akɛ eeejɛ ŋwɛi ena ebii ni yɔɔ shikpɔŋ nɔ lɛ akɛ amɛmiibɔ mɔdɛŋ ni amɛtamɔ lɛ kɛtsɔ tɔmɔi ni amɛkɛkekeɔ amɛhe lɛ nɔ!—Luka 6:35, 36; okɛto Mateo 5:44-48 he.

 6. Sɔrɔtofeemɔ kpele yɛ Yehowa dɛŋ eshaifaa kɛ wɔnɔ lɛ teŋ yɛ mɛɛ gbɛ nɔ?

⁶ Eji anɔkwale akɛ, wɔnyɛŋ wɔkɛ sane ake yɛ gbɛ ni eye emuu nɔ taakɛ Yehowa feɔ lɛ. Ni no hewɔ titri esa akɛ wɔkɛ saji akekee wɔhe lɛ. Susumɔ enɛ he okwɛ: Sɔrɔto kpele diɛŋtsɛ yɛ Yehowa eshaifaa kɛ wɔnɔ lɛ teŋ. (Yesaia 55:7-9) Kɛ wɔkɛ mɛi ni efee esha amɛshi wɔ lɛ ahe ke amɛ lɛ, bei pii lɛ wɔfeɔ nakai ejaakɛ wɔle akɛ yɛ be ko mli lɛ, ekolɛ ehe baahia ni amɛ hu amɛto wɔ najiaŋ kɛtsɔ wɔhe ni amɛkɛaake wɔ lɛ nɔ. Yɛ adesai agbɛfaŋ lɛ, eji eshafeelɔi ni kɛ eshafeelɔi ahe keɔ amɛ be fɛɛ be. Shi, yɛ Yehowa gbɛfaŋ lɛ, eshaifaa lɛ jɛɔ he kome be fɛɛ be. Ekɛ wɔhe keɔ wɔ, shi ehe ehiaŋ kɔkɔɔkɔ akɛ wɔkɛ ehe ake lɛ. Kɛ Yehowa, ni efeee esha lɛ, baanyɛ ejɛ suɔmɔ mli ekɛ wɔhe ake wɔ kɛmɔ shi lɛ, ani esaaa ni wɔ adesai eshafeelɔi lɛ bɔɔ mɔdɛŋ akɛ wɔkɛ sane aaakekee wɔhe?—Mateo 6:12.

 7. Kɛ́ wɔkpɛlɛɛɛ ni wɔkɛ mɛi krokomɛi ahe ake amɛ kɛji nɔdaamɔ nɔ yɛ kɛha mɔbɔnalɛ lɛ, ebaanyɛ efite wɔkɛ Yehowa teŋ wekukpaa yɛ mɛɛ gbɛ nɔ?

⁷ Nɔ ni he hiaa fe no po ji akɛ, kɛji wɔkpɛlɛɛɛ ni wɔkɛ mɛi krokomɛi ahe keɔ amɛ kɛji nɔdaamɔ nɔ̃ yɛ kɛha mɔbɔnalɛ lɛ, ebaanyɛ esa wɔkɛ Nyɔŋmɔ teŋ wekukpaa he yɛ gbɛ fɔŋ nɔ. Jeee akɛ Yehowa biɔ ni wɔkɛ sane akekee wɔhe kɛkɛ; ekpaa gbɛ akɛ wɔɔfee nakai. Taakɛ Ŋmalɛi lɛ tsɔɔ lɛ, nɔ ni kanyaa wɔ koni wɔkɛ sane ake lɛ fã ko ji, bɔni afee ni Yehowa kɛ wɔhe ake wɔ, aloo akɛni ekɛ wɔhe eke wɔ lɛ hewɔ. (Mateo 6:14; Marko 11:25; Efesobii 4:32; 1 Yohane 4:11) Belɛ, kɛ wɔsumɔɔɔ ni wɔkɛ mɛi krokomɛi ahe ake amɛ beni wɔyɔɔ yiŋtoo kpakpa ni wɔɔdamɔ nɔ wɔfee nakai lɛ, ani wɔbaanyɛ wɔkpa eshaifaa ni tamɔ nakai gbɛ kɛjɛ Yehowa dɛŋ lɛɛlɛŋ?—Mateo 18:21-35.

 8. Mɛni hewɔ eshai ni wɔkɛfaa lɛ tsuɔ nɔ ni hi fe fɛɛ kɛha wɔ lɛ?

⁸ Yehowa tsɔɔ ewebii “gbɛ kpakpa ni amɛnyiɛ nɔ.” (1 Maŋtsɛmɛi 8:36) Kɛ efã wɔ akɛ wɔkɛ sane akekee wɔhe lɛ, wɔbaanyɛ wɔná hekɛnɔfɔɔ akɛ nɔ ni hi kɛha wɔ fe fɛɛ kã etsui nɔ. Yiŋtoo kpakpa hewɔ ni Biblia lɛ kɛɔ wɔ akɛ ‘wɔŋmɛ mlifu lɛ gbɛ’ lɛ. (Romabii 12:19) Mlifu ji jatsu ni tsii ni atereɔ yɛ shihilɛ mli. Kɛ wɔkɛ mlifu wo wɔmli lɛ, eyeɔ wɔ susumɔi anɔ, efiteɔ wɔ toiŋjɔlɛ, ni egbeɔ wɔ miishɛɛ. Mlifu ni sɛɛ tsɛɔ, tamɔ awuŋayeli, baanyɛ aye wɔ gbɔmɔtsoŋ hewalɛnamɔ awui. (Abɛi 14:30) Ni be mli ni enɛɛmɛi fɛɛ baa wɔnɔ lɛ, ekolɛ mɔ ni etɔ̃ wɔnɔ lɛ baahi shi kwraa ni eleee amanehulu ni wɔyɔɔ mli lɛ! Wɔ Bɔlɔ ni yɔɔ suɔmɔ lɛ le akɛ ehe miihia ni wɔkɛ mɛi krokomɛi ahe ake amɛ yɛ faŋŋ mli, jeee yɛ amɛ sɛɛnamɔ pɛ hewɔ, shi moŋ kɛha wɔ hu wɔ nɔ̃. Lɛɛlɛŋ, ŋaa ni Biblia lɛ woɔ wɔ akɛ wɔkɛ sane ake lɛ, ji ‘gbɛ kpakpa ni wɔɔnyiɛ nɔ.’

“Nyɛnanaa Nyɛhaa Nyɛhe”

9, 10. (a) Mɛɛ shihilɛi nɛkɛ eshaifaa ni ato he gbɛjianɔ he ehiaaa yɛ mli? (b) Wiemɔ ni ji “nyɛnanaa nyɛhaa nyɛhe” lɛ tsɔɔ mɛni?

⁹ Gbɔmɔtsoŋ pilamɔi baanyɛ afee sɔrɔtoi, kɛjɛ pilamɔi bibii anɔ kɛyashi pilamɔi ni dara nɔ, ni ebiii ni atsu fɛɛ he nii yɛ gbɛ kome nɔ. Nakai nɔŋŋ eji yɛ henumɔi ni aye lɛ awui lɛ gbɛfaŋ—pilamɔi lɛ ekomɛi dara fe ekrokomɛi. Ani ehe miihia ni wɔha tɔmɔi bibii fɛɛ ni aaatɔ̃ wɔnɔ yɛ wɔkɛ mɛi krokomɛi ateŋ sharamɔ mli lɛ atsɔ sane keketee? Mlilawoi bibii, heguɔgbeei, kɛ mlifui ji daa gbi shihilɛ mli nibii komɛi ni eshaifaa ni ato he gbɛjianɔ he ehiaaa yɛ mli. Kɛ ale wɔ akɛ mɔ ko ni tsiɔ ehe kɛjɛɔ mɛi krokomɛi ahe yɛ nijiaŋwujee bibii fɛɛ ahewɔ, ni no sɛɛ lɛ wɔbiɔ ni mɛi ni etɔ̃ wɔnɔ lɛ akpa wɔ fai dani wɔtse wɔhiɛ wɔha amɛ ni wɔkɛ amɛ aye kɛ bulɛ lɛ, no lɛ ekolɛ wɔmiinyɛ amɛnɔ ni amɛkwɛ amɛhe nɔ jogbaŋŋ yɛ amɛkɛ wɔ sharamɔ mli—loo ni amɛtsi amɛhe kɛjɛ wɔhe kwraa!

¹⁰ Yɛ no najiaŋ lɛ, ehi moŋ akɛ “wɔna gbɛi kpakpa akɛ mɔ ni yɔɔ mlijɔlɛ.” (Filipibii 4:5, Phillips) Ákɛ bɔɔnii ni yeee emuu ni miisɔmɔ kɔŋ kɛ kɔŋ lɛ, nilee yɛ mli akɛ aaakpa gbɛ akɛ wɔnyɛmimɛi baanyɛ afee nibii ni baawo wɔmlila yɛ be kɛ bei amli, kɛ́ wɔɔwie he nakai, ni wɔ hu wɔbaanyɛ wɔfee amɛ nakai nɔŋŋ. Kolosebii 3:13 woɔ wɔ ŋaa akɛ: “Nyɛnanaa nyɛhaa nyɛhe.” Nakai wiemɔ lɛ tsɔɔ wɔtsui shi ni wɔɔto wɔha mɛi krokomɛi, ni wɔŋmɛ nibii ni wɔsumɔɔɔ yɛ amɛhe, loo subaŋi komɛi ni ekolɛ ewoɔ wɔmlila lɛ agbɛ. Tsuishitoo kɛ henɔyeli ni tamɔ nɛkɛ baanyɛ aye abua wɔ ni wɔkpee mlifu kɛ tɔmɔi bibii ni wɔkɛkpeɔ yɛ wɔkɛ mɛi krokomɛi asharamɔ mli lɛ anaa—ni wɔfiteee asafo lɛ toiŋjɔlɛ.—1 Korintobii 16:14.

Beni Pilamɔi lɛ Amli Kwɔlɔ

11. Kɛ mɛi krokomɛi fee esha amɛshi wɔ lɛ, mɛni baanyɛ aye abua wɔ ni wɔkɛke amɛ?

¹¹ Shi, kɛji mɛi krokomɛi fee eshai amɛshi wɔ, ni aana pilamɔ lɛ faŋŋ lɛ hu? Kɛ esha lɛ jeee nɔ ni yɔɔ hiɛdɔɔ waa lɛ, no lɛ ekolɛ ŋaa ni Biblia lɛ woɔ akɛ ‘wɔŋɔfafaa wɔhe’ lɛ kɛ nitsumɔ efeŋ nɔ ni wa kɛha wɔ. (Efesobii 4:32) Nɛkɛ klalo ni wɔɔfee akɛ wɔkɛ sane aaake nɛɛ kɛ Petro wiemɔi ni jɛ mumɔŋ lɛ kpãa gbee: “Shi titri lɛ nyɛsuɔmɔ ni nyɛkɛsumɔsumɔɔ nyɛhe lɛ mli awa, ejaakɛ suɔmɔ haa eshai babaoo nɔ.” (1 Petro 4:8) Kaimɔ ni wɔkaiɔ akɛ wɔ hu eshafeelɔi ji wɔ lɛ yeɔ ebuaa wɔ koni wɔkafee shɛii yɛ mɛi krokomɛi atɔmɔi ahe. Kɛ wɔkɛ tɔmɔi keɔ yɛ nɛkɛ gbɛ nɔ lɛ, wɔŋmɛɛɔ mlifu lɛ he moŋ fe ni wɔkɛaawo wɔmli. Nɔ ni jɛɔ mli baa ji akɛ, wɔkɛ mɔ ni etɔ̃ wɔnɔ lɛ teŋ wekukpaa fiteee, ni wɔyeɔ wɔbuaa ni wɔbaa asafo lɛ toiŋjɔlɛ ni jara wa lɛ yi. (Romabii 14:19) Yɛ be ko sɛɛ lɛ, ekolɛ nɔ ni efee lɛ he kaimɔ baaje wɔjwɛŋmɔ mli kwraa.

12. (a) Mɛɛ hegbɛ ekolɛ ehe baahia ni wɔŋɔ ni wɔkɛtsu nii koni wɔkɛ mɔ ko ni eye wɔ awui waa lɛ he ake lɛ? (b) Wiemɔi ni yɔɔ Efesobii 4:26 lɛ tsɔɔ akɛ esa akɛ wɔsaa saji oya nɔŋŋ yɛ mɛɛ gbɛ nɔ?

¹² Shi, kɛ mɔ ko fee esha ni hiɛdɔɔ yɔɔ mli waa eshi wɔ, ni eye wɔ awui waa hu? Akɛ nɔkwɛmɔnɔ lɛ, ekolɛ onaanyo ko ni oheɔ lɛ oyeɔ lɛ ejie oteemɔŋ saji diɛŋtsɛ ni ogba lɛ yɛ hekɛnɔfɔɔ mli lɛ kpo. Edɔ bo waa, ewo bo hiɛgbele, ni ekpa yɛ osɛɛ. Obɔ mɔdɛŋ akɛ obaajie yɛ ojwɛŋmɔ mli, shi ohiɛ kpaaa sane lɛ nɔ lolo. Yɛ shihilɛ ni tamɔ nɛkɛ mli lɛ, ekolɛ ehe baahia ni oŋɔ hegbɛ ko ni okɛsaa naagba lɛ, ekolɛ kɛtsɔ mɔ ni etɔ̃ onɔ lɛ kɛ wiemɔ nɔ. Nilee yɛ mli akɛ ooofee enɛ dani eba akɛ sane lɛ mli aaawo wu. Paulo wo wɔ ŋaa akɛ: “Nyɛmli afũa, shi nyɛkafea esha [ni ji, mlifu ni wɔkɛaato loo ni wɔkɛaafee nɔ ko]; hulu akanyɔ shi yɛ nyɛmlila lɛ nɔ.” (Efesobii 4:26) Anɔkwale ni eji akɛ yɛ Yudafoi lɛ ateŋ lɛ, hulu shinyɔɔ kadiɔ gbi kome naagbee kɛ gbi hee shishijee lɛ, hãa shishinumɔ baa Paulo wiemɔi lɛ ahe. No hewɔ lɛ, ŋaawoo lɛ ji akɛ: Saamɔ sane lɛ oya!—Mateo 5:23, 24.

13. Kɛ wɔtee mɔ ko ni etɔ̃ wɔnɔ lɛ ŋɔɔ lɛ, mɛni esa akɛ efee oti ni ma wɔhiɛ, ni mɛɛ ŋaawoi baanyɛ aye abua wɔ ni wɔshɛ he?

¹³ Te esa akɛ okɛ mɔ ni etɔ̃ onɔ lɛ awie oha tɛŋŋ? ‘Taomɔ toiŋjɔlɛ ni onyiɛ no sɛɛ,’ taakɛ 1 Petro 3:11 kɛɔ lɛ. Belɛ, esaaa ni oti ni mã ohiɛ lɛ feɔ akɛ ooya oyajie mlifu kpo, shi moŋ ní toiŋjɔlɛ aba okɛ onyɛmi lɛ teŋ. Yɛ enɛ hewɔ lɛ, nɔ ni hi fe fɛɛ ji ni okɛ mlifu wiemɔi kɛ ninefɔ̃ɔ akatsu nii kwraa; ekolɛ enɛɛmɛi baaha mɔ kroko lɛ ahã bo hetoo yɛ nakai gbɛ nɔŋŋ nɔ. (Abɛi 15:18; 29:11) Kɛfata he lɛ, kaawie wiemɔi ni woɔ sane he, tamɔ, “Bo lɛ daa nɛɛ . . . !” aloo, “Bo lɛ ofeko . . . dã!” Wiemɔi ni awo he tamɔ nɛkɛ baaha lɛ hu ewie nɔ ko ni ekɛfã ehe. Yɛ no najiaŋ lɛ, hã gbee ni okɛwieɔ, kɛ ohiɛ su atsɔɔ akɛ ootao ni nyɛsaa sane ko ni edɔ bo waa. Wiemɔ bɔ ni onuɔ nɔ ni ba lɛ he ohaa lɛ he yɛ faŋŋ mli. Hã mɔ kroko lɛ hu hegbɛ ni etsɔɔ nɔ ni efee lɛ mli. Bó nɔ ni ebaakɛɛ lɛ toi. (Yakobo 1:19) Mɛɛ nɔ kpakpa baajɛ mli aba? Abɛi 19:11 tsɔɔ mli akɛ: “Gbɔmɔ ni yɔɔ jwɛŋmɔ lɛ, emli fuuu mra, ni ehiɛ ni ekuɔ efɔ̃ɔ nɔtɔmɔ nɔ lɛ, ehiɛnyam ni.” Ekolɛ mɔ kroko lɛ henumɔi kɛ yiŋtoi ni yɔɔ enifeemɔi lɛ asɛɛ lɛ ashishi ni ooonu lɛ baanyɛ ajie susumɔi kɛ henumɔi fɔji ni oná yɛ ehe lɛ kwraa. Kɛ wɔtsu shihilɛ lɛ he nii kɛ oti ni mã wɔhiɛ akɛ wɔmiitao toiŋjɔlɛ ni wɔhiɛ nakai su lɛ mli lɛ, no lɛ eeenyɛ eba akɛ abaanyɛ ana shishinumɔ ni eyabaaa lɛ naa, koni akɛ faikpamɔ ni sa ahã, ní ajie eshaifaa kpo atsɔɔ.

14. Kɛ wɔkɛ mɛi krokomɛi ahe ke amɛ lɛ, mɛɛ shishinumɔ naa esa akɛ wɔhiɛ akpa nɔ yɛ?

¹⁴ Ani mɛi krokomɛi ahe ni wɔkɛkeɔ amɛ lɛ tsɔɔ akɛ esa akɛ wɔhiɛ akpa nɔ ni ba lɛ nɔ diɛŋtsɛ? Kaimɔ Yehowa diɛŋtsɛ nɔkwɛmɔnɔ yɛ enɛ gbɛfaŋ, taakɛ asusu he yɛ nikasemɔ ni tsɔ hiɛ lɛ mli lɛ. Kɛ Biblia lɛ wie akɛ Yehowa hiɛ kpaa eshai ni wɔfeɔ lɛ anɔ lɛ, enɛ etsɔɔɔ akɛ enyɛɛɛ ekai dɔŋŋ. (Yesaia 43:25) Shi moŋ, ehiɛ kpaa nɔ kɛ shishinumɔ akɛ kɛ ekɛ wɔhe eshai lɛ ke wɔ lɛ, nakai eshai lɛ esaaa bɔ ni ebaakojo wɔ eha yɛ wɔsɛɛ be mli lɛ he dɔŋŋ. (Ezekiel 33:14-16) Nakai nɔŋŋ hu, wɔnanemɛi adesai ni wɔkɛ amɛhe keɔ amɛ lɛ etsɔɔɔ doo akɛ wɔnyɛŋ wɔkai nɔ ni amɛfee lɛ dɔŋŋ. Shi kɛlɛ, wɔhiɛ baanyɛ akpa nɔ kɛ shishinumɔ akɛ wɔhiɛŋ nakai esha lɛ mli wɔshiŋ mɔ ni etɔ̃ wɔnɔ lɛ, ni wɔwoŋ sane lɛ nɔ dɔŋŋ yɛ wɔsɛɛ be kroko mli. Kɛ agbe sane lɛ naa yɛ nɛkɛ gbɛ nɔ lɛ, efeŋ nɔ ni sa akɛ aaaye he osheku; nakai nɔŋŋ wɔhe ni wɔɔtsi kwraa kɛjɛ mɔ ni etɔ̃ wɔnɔ lɛ he, ni wɔkɛ lɛ aaaye tamɔ mɔ ni ashwie lɛ lɛ hu etsɔɔɔ suɔmɔ. (Abɛi 17:9) Eji anɔkwale akɛ, ebaahe be ko dani wɔkɛ lɛ teŋ wekukpaa lɛ baatsa kwraa; ekolɛ wɔbɛŋkɛŋ lɛ kpaakpa tamɔ bɔ ni wɔyɔɔ tsutsu lɛ. Shi wɔsumɔɔ lɛ lolo akɛ wɔnyɛmi Kristofonyo, ni wɔbɔɔ mɔdɛŋ ni wɔha toiŋjɔlɛ wekukpaa ahi wɔkɛ lɛ teŋ.—Okɛto Luka 17:3 he.

Be Mli ni Efeɔ Tamɔ nɔ ni Anyɛŋ Akɛ Esha Ake

15, 16. (a) Ani abiɔ ni Kristofoi kɛ efɔŋfeelɔ ni shwaaa ehe lɛ he ake lɛ? (b) Mɛɛ gbɛ nɔ wɔbaanyɛ wɔkɛ Biblia lɛ ŋaawoo ni wɔnaa yɛ Lala 37:8 atsu nii yɛ?

¹⁵ Shi, kɛ́ mɛi krokomɛi fee esha amɛshi wɔ yɛ gbɛ ni eye wɔ awui waa diɛŋtsɛ nɔ, ni kɛlɛ mɔ ni etɔ̃ lɛ ekpɛlɛɛɛ esha ni efee lɛ nɔ, eshwaaa ehe, ni ekpaaa fai yɛ he hu? (Abɛi 28:13) Ŋmalɛi lɛ tsɔɔ faŋŋ akɛ Yehowa kɛ eshafeelɔi ni shwaaa amɛhe, ni amɛkpiliŋ amɛtsuii lɛ ahe ekeee amɛ. (Hebribii 6:4-6; 10:26, 27) Shi wɔ hu? Insight on the Scriptures lɛ kɛɔ akɛ: “Abiii ni Kristofoi kɛ mɛi ni jeɔ gbɛ amɛfeɔ nibii fɔji, kɛ eshai ni amɛshwaaa amɛhe lɛ ahe ake amɛ. Mɛnɛɛmɛi batsɔmɔɔ Nyɔŋmɔ henyɛlɔi.” (Kpo 1, baafa 862) Esaaa ni Kristofonyo ko ni aye lɛ sane ni ejaaa kwraa, afee lɛ nihiinii, loo afee lɛ efɔŋ kpele ko lɛ nuɔ he akɛ aanyɛ enɔ ni ekɛ efɔŋfeelɔ ni shwaaa ehe lɛ he ake lɛ, loo ekɛfa lɛ.—Lala 139:21, 22.

¹⁶ Shishinumɔ yɛ he akɛ, ekolɛ mɛi ni akɛ amɛ eye kɛ yitsoŋwalɛ lɛ baanu dɔlɛ kɛ mlifu he. Shi kɛlɛ, kaimɔ akɛ mlila kɛ mlifu ni wɔɔya nɔ wɔhiɛ mli lɛ baanyɛ aye wɔ awui waa. Kɛ wɔmiimɛ tɔmɔ lɛ nɔkpɛlɛmɔ kɛ ehe faikpamɔ ni baaa kɔkɔɔkɔ lɛ, ekolɛ no baaha wɔya nɔ wɔmli afu waa. Ekolɛ jalɛ sane ni ayeee nɛɛ he susumɔ ni baayi wɔjwɛŋmɔ mli lɛ baaha mlifu lɛ mli awo wu yɛ wɔmli, ni ebaasa wɔ mumɔŋ, henumɔŋ, kɛ gbɔmɔtsoŋ hewalɛnamɔ he yɛ gbɛ ni ehiii nɔ. No tsɔɔ akɛ, wɔmiiŋmɛ mɔ ni ye wɔ awui lɛ gbɛ ní eya nɔ eye wɔ awui lolo. Biblia lɛ kɛ nilee woɔ ŋaa akɛ: “Hã mlifu sɛɛ afo ni oshɛ mlila ofɔ̃.” (Lala 37:8) No hewɔ lɛ, Kristofoi komɛi ena akɛ yɛ be ko sɛɛ lɛ, amɛnyɛ amɛkpɛ amɛyiŋ akɛ amɛkɛ sane lɛ baake kɛ shishinumɔ akɛ amɛyaŋ nɔ amɛkɛ mlifu lɛ woŋ amɛmli—jeee akɛ amɛmiiku amɛhiɛ amɛmiifɔ̃ nɔ ni afee amɛ lɛ nɔ, shi moŋ akɛ amɛhaŋ ehe mlifu ahi amɛmli ni eye amɛnɔ. Akɛni amɛshi sane lɛ amɛhã Nyɔŋmɔ ni yeɔ jalɛ sane lɛ hewɔ lɛ, amɛná heyeli babaoo ni amɛnyɛ amɛtee nɔ amɛhi shi ni mlifu henumɔi bɛ amɛmli.—Lala 37:28.

17. Mɛɛ nɔmimaa ni shɛjeɔ mɔ mii Yehowa shiwoo ni aŋma yɛ Kpojiemɔ 21:4 lɛ kɛhaa?

¹⁷ Kɛ awui ni aye wɔ lɛ mli wa waa lɛ, no lɛ ekolɛ wɔnyɛŋ wɔjie kwraa kɛjɛ wɔjwɛŋmɔ mli yɛ omanyeyeli mli, kɛ hoo lɛ, jeee yɛ nibii agbɛjianɔtoo nɛɛ mli. Shi Yehowa ewo shi akɛ jeŋ hee ko baaba ni “[eeetsumɔ] amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” (Kpojiemɔ 21:4) Nɔ fɛɛ nɔ ni wɔbaakai yɛ nakai beaŋ lɛ haŋ wɔnu dɔlɛ, loo piŋmɔ, ní ekolɛ ejwere wɔtsuii anɔ amrɔ nɛɛ tamɔ jatsu lɛ he.—Yesaia 65:17, 18.

18. (a) Mɛni hewɔ ehe hiaa ni wɔkɛ sane ake yɛ wɔkɛ wɔnyɛmimɛi hii kɛ yei ateŋ sharamɔ mli lɛ? (b) Kɛ mɛi krokomɛi fee esha amɛshi wɔ lɛ, wɔbaanyɛ wɔkɛke amɛ ni wɔhiɛ akpa nɔ yɛ mɛɛ shishinumɔ naa? (d) Enɛ he baa sɛɛnamɔ kɛhaa wɔ yɛ mɛɛ gbɛ nɔ?

¹⁸ Dani enɛ aaaba lɛ, esa akɛ wɔfee ekome kɛhi shi ni wɔtsu nii akɛ nyɛmimɛi hii kɛ yei ni yeee emuu, adesai ni feɔ esha. Wɔ fɛɛ wɔtɔ̃ɔ. Wɔhaa wɔnyɛmimɛi anine nyɛɔ shi ni wɔfeɔ amɛ dɔlɛ nii po yɛ be kɛ bei amli. Yesu le jogbaŋŋ akɛ ehe baahia ni wɔkɛ mɛi krokomɛi ahe ake amɛ, “jeee, Kɛyashi shii kpawo, shi moŋ, Kɛyashi shii nyɔŋmai kpawo kɛ kpawo”! (Mateo 18:22, NW) Eji anɔkwale akɛ, wɔnyɛŋ wɔkɛ sane ake kɛmɔ shi tamɔ bɔ ni Yehowa feɔ lɛ. Ni kɛlɛ, yɛ shihilɛi pii amli lɛ, kɛ́ wɔnyɛmimɛi fee esha amɛshi wɔ lɛ, wɔbaanyɛ wɔkɛke amɛ kɛ shishinumɔ akɛ wɔbaaye mlifu lɛ nɔ, ni wɔhiɛ baanyɛ akpa nɔ kɛ shishinumɔ akɛ wɔhiɛŋ nakai sane lɛ mli wɔshiŋ amɛ daa yɛ wɔsɛɛ be ko mli. Kɛ wɔkɛ sane ke ni wɔhiɛ kpa nɔ yɛ nɛkɛ gbɛ nɔ lɛ, jeee asafo lɛ toiŋjɔlɛ pɛ wɔyeɔ wɔbuaa ni akɛbaa yi, shi moŋ wɔ diɛŋtsɛ wɔjwɛŋmɔ kɛ wɔtsui mli toiŋjɔlɛ hu. Nɔ ni fe fɛɛ lɛ, wɔbaaná toiŋjɔlɛ ni wɔ-Nyɔŋmɔ, Yehowa ni yɔɔ suɔmɔ lɛ pɛ baanyɛ ekɛha lɛ mli ŋɔɔmɔ.—Filipibii 4:7.

[Shishigbɛ niŋmai]

Sanebimɔi Kɛha Emlitii

◻ Mɛni hewɔ esa akɛ wɔsumɔ akɛ wɔkɛ mɛi krokomɛi ahe aaake amɛ lɛ?

◻ Mɛɛ shihilɛi nɛkɛ biɔ ni ‘wɔnanaa wɔha wɔhe’?

◻ Kɛ mɛi krokomɛi eshai ye wɔ awui waa lɛ, mɛni wɔbaanyɛ wɔfee ni wɔkɛsaa sane lɛ yɛ toiŋjɔlɛ mli?

◻ Kɛ wɔkɛ mɛi krokomɛi ahe ke amɛ lɛ, esa akɛ wɔhiɛ akpa nɔ yɛ mɛɛ shishinumɔ naa?

[Mfoniri ni yɔɔ baafa 16]

Kɛ wɔkɛ mlifu wo wɔmli lɛ, ekolɛ mɔ ni etɔ̃ wɔnɔ lɛ leee amanehulu ni wɔyɔɔ mli lɛ

[Mfoniri ni yɔɔ baafa 17]

Kɛ otee mɛi krokomɛi aŋɔɔ kɛha toiŋjɔlɛ taomɔ lɛ, abaanyɛ ana naagbai anaa yɛ gbɛ ni waaa nɔ