Ohiɛ Ahi Otsɔɔmɔ lɛ Nɔ Daa
“Ohiɛ ahi ohe nɔ kɛ tsɔɔmɔ lɛ nɔ, hii shi yɛ nii nɛɛ amli; ejaakɛ kɛji ofee enɛ Iɛ, ooohere bo diɛŋtsɛ kɛ mɛi ni boɔo toi Iɛ fɛɛ yiwala.”—1 TIMOTEO 4:16.
1. Mɛni hewɔ enɛ jeee be ni wɔkɛbaa Maŋtsɛyeli-shiɛmɔ nitsumɔ lɛ shi lɛ?
YEHOWA miiha mɛi ni tamɔ gwaŋtɛŋi lɛ anaabuamɔ lɛ miiya nɔ kɛ foi. Yɛ anɔkwale mli lɛ bele enɛ jeee be ni esa akɛ ewebii lɛ afee shɔɔ yɛ amɛ Maŋtsɛyeli-shiɛmɔ kɛ kaselɔ-feemɔ nitsumɔ lɛ mli. (Yesaia 60:8, 22; Mateo 24:14; 28:19, 20) Ehe miihia ni wɔtsu nii ni ekɛ mumɔ ni Nyɔŋmɔ kɛtsuɔ nii yɛ wɔbe nɛɛ mli lɛ akpa gbee. Be mli ni naagbee lɛ bɛŋkɛɔ lɛ, wɔbaaya wɔ akutseiaŋbii lɛ aŋɔɔ shii abɔ. Yɛ anɔkwale mli lɛ, odaseyeli nitsumɔ ni fa babaoo kɛtsɔ shiɛlɔi kɛ gbɛgbalɔi babaoo nɔ lɛ miikanya je lɛ ni ji ŋmɔ lɛ. Ni nɛkɛ naabuamɔ nitsumɔ kɛ foi nɛɛ baaya nɔ ada kɛ foi.—Yesaia 60:11; okɛto Lala 126:5, 6 he.
2. (a) Taakɛ Yesaia 40:28-31 tsɔɔ lɛ, mɛɛ nyɛmɔ jɛɛhe wɔbaanyɛ wɔna hewale ni he hiaa lɛ kɛjɛ ni wɔkɛgbe Maŋtsɛyeli-shiɛmɔ nitsumɔ lɛ naa? (b) Mɛni ji yiŋtoo kpakpa ko hewɔ ni esa akɛ wɔhiɛ ahi wɔsɔɔmɔ nitsumɔ lɛ he yɛ nɛkɛ be nɛɛ mli nɔ?
2 Ni wɔɔnu he akɛ ‘etɔ wɔ’ akɛni aatsu shikpɔŋkuku ko mli nii shii abɔ hewɔ lɛ, esa akɛ wɔyɔse akɛ enɛ ji be ni esa akɛ wɔsɔle wɔha Yehowa koni wɔna “nyɛmɔ” ni he hiaa ni wɔkɛgbe nitsumɔ lɛ naa. (Yesaia 40:28-31; 1 Yohane 5:14) Eji anɔkwale akɛ abua “asafo babaoo” lɛ ni jɛ “toi krokomɛi” lɛ ateŋ lɛ akpekpei abɔ naa momo. Shi ekolɛ nɔ ni be ko lɛ eye omanye yɛ yelikɛbuamɔ ni akɛha mɛi komɛi ni yɔɔ wɔ shikpɔŋkukuji lɛ amli lɛ nyɛɛɛ aye omanye yɛ mɛi krokomɛi ahe nitsumɔ mli dɔŋŋ. (Kpojiemɔ 7:9, 10; Yohane 10:16) No hewɔ lɛ, ehe miihia ni wɔgbala wɔjwɛŋmɔ kɛba wɔsɔɔmɔ nitsumɔ lɛ hilɛ lɛ nɔ ekoŋŋ.
3. Mɛɛ gbɛ nɔ wɔɔtsɔ ni wɔkɛ miishɛɛ hee awo wɔshiɛmɔ nitsumɔ lɛ mli yɛ?
3 Kɛ wɔkɛ faishitswaa hee tsu nii lɛ, wɔbaanyɛ wɔtsu wɔsɔɔmɔ nitsumɔ lɛ hilɛ ni aaaya hiɛ lɛ he nii. Enɛ fɛɛ kɛ miishɛɛ hee baawo sɔɔmɔ nitsumɔ lɛ mli. Shi mɛɛ gbɛ nɔ wɔɔtsɔ wɔfee enɛ yɛ? Kɛtsɔ ‘wɔhiɛ ni wɔɔha ahi wɔhe kɛ wɔtsɔɔmɔ lɛ nɔ daa,’ shi jeee ni wɔɔtsu sɔɔmɔ lɛ he nii kɛkɛ. (1 Timoteo 4:16) Esa akɛ wɔlilɛi lɛ kɛ nɔ ni fe “yijiemɔ afɔle” kɛkɛ ni wɔkɛhaa aha. (Hebribii 13:15) Esa akɛ wɔhe asa yɛ wɔnitsumɔ lɛ mli. (Abɛi 22:29) Belɛ nɔ ni he hiaa ji hesaa ni wɔkɛaatsu nii yɛ wɔ shikpɔŋkuku lɛ mli. Naa wɔsɔɔmɔ lɛ mli nibii komɛi ni he baahia ni ‘wɔha wɔhiɛ ahi nɔ daa.’
Bɔ ni Ooosaa Otsu Shikpɔŋkuku “Hee” Mli Nii
4. Mɛɛ gbɛ nɔ wɔɔtsɔ ni wɔsaa shikpɔŋkuku “hee” yɛ wɔ asafo lɛ shikpɔŋkuku lɛ mli?
4 Nyɛhaa wɔkwɛa shihilɛ lɛ yɛ gbɛ ni aaanyɛ atsɔ nɔ atsu nii lɛ nɔ. Hei pii yɛ ni shikpɔŋkuku hee loo nɔ ni afɔɔɔ mli nitsumɔ bɛ. No hewɔ lɛ mɛni hewɔ osaaa otsuuu shikpɔŋkuku “hee” ni yɔɔ asafo lɛ shikpɔŋkuku lɛ mli lɛ mli nii? Ni yɛ mɛɛ gbɛ nɔ? Ojogbaŋŋ, kɛ wɔtee mɛi lɛ aŋɔɔ shii abɔ lɛ, wɔnyɛŋ wɔfee wɔnii akɛ wɔbakɔ shia lɛ mli da ni wɔwie tamɔ bɔ ni wɔfɔɔ feemɔ yɛ shiai lɛ. Eka shi faŋŋ akɛ shiatsɛ lɛ baayoo wɔ kɛji akɛ wɔtsu shikpɔŋkuku lɛ mli nii shii abɔ. Wolo ni ji Reasoning From the Scriptures lɛ haa wɔ hiɛkpamɔi fe 40 ni wɔbaanyɛ wɔkɛtsu nii yɛ wɔsɔɔmɔ lɛ mli. Esa akɛ wɔsaa amɛ jogbaŋŋ akɛ nɔ ko hee ni baaŋɔɔ amɛnaa ni wɔkɛto saji hee ni afɔɔ he wiemɔ ni yɔɔ miishɛɛ lɛ ahe. Ni oookpa fai moŋ akɛ ooba jɛmɛ tsɔ lɛ, ehe miihia ni wɔna jwɛŋmɔ ni ja ni wɔfee wɔ shikpɔŋkuku lɛ “ehee” kɛ shiɛmɔ wiemɔi ni hi ni sa. Shi ani enɛ baanyɛ aye abua kɛji akɛ shiatsɛmɛi lɛ ejieee naanyobɔɔ su kpo?
5. (a) Te wɔɔfee tɛŋŋ wɔha tsutsu miishɛɛ ko ni abɛ yɛ wɔnitsumɔ lɛ he lɛ afee nɔ ni he baaba sɛɛnamɔ aha wɔ? (b) Mɛni ji nɔ ni ona ni tsuɔ nii jogbaŋŋ yɛ he ni oyɔɔ lɛ? (d) Mɛni hewɔ toiboo kɛ yijiemɔ yɛ anɔkwayeli mli yeɔ buaa lɛ?
5 Akɛni wɔle shiatsɛ lɛ tsutsu subaŋ hewɔ lɛ nɔ ni baanyɛ ajɛ mli aba ji jwɛŋmɔ fɔŋ ni wɔɔna yɛ jɛmɛ ni wɔɔya ekoŋŋ lɛ he. Shi mɛni hewɔ ni okɛ nakai nilee lɛ tsuuu nii ni ehe baaba sɛɛnamɔ ahao? Yɛ mɛɛ gbɛ nɔ? Ekolɛ kɛtsɔ enɛ ta ni oootsi ni agbɛnɛ okɛ owiemɔ lɛ adamɔ nɔ ni otsɔ, hiɛ owie yɛ jɛmɛ klɛŋklɛŋ be ko ni otee jɛmɛ lɛ nɔ. Obaanyɛ okɛɛ akɛ: “Ojekoo, owula Mensah!” Kɛ okwɛ ni esa lɛ obaanyɛ okɛ fata he akɛ: “Te oyɔɔ tɛŋŋ?” Kɛkɛ lɛ obaanyɛ okɛɛ akɛ: “Beni miba biɛ nyɛsɛɛ otsi lɛ, okɛɛ mi akɛ osɔlemɔ lɛ kwɛɔ nyɛmumɔŋ hiamɔ nibii fɛɛ nɔ ni akɛ oji mɔ ko ni yaa sɔlemɔ waa. Akɛ okutsoŋnyo ni mi hu mihiɛ dɔɔ yɛ jamɔ he lɛ, ani manyɛ mabi nɔ ni osɔlemɔ lɛ kɛɔ yɛ bɔ ni wɔɔfee wɔje nuklea yinɔ nɛɛ mli lɛ he lo?” Kɛkɛ lɛ ŋmɛɛ lɛ gbɛ ni egba bo. Jiemɔ shiatsɛ lɛ yi kɛ obaanyɛ okɛ anɔkwayeli afee nakai. Kɛ obo lɛ toi ni ojie eyi lɛ enɛ baanyɛ atsake esubaŋ ni ehiɛ lɛ. Yɛ bei babaoo mli lɛ, gbɔmɛi baaŋmɛ gbɛ ni wɔba amɛŋɔɔ yɛ be kroko mli kɛji akɛ amɛ hu amɛbaanyɛ amɛwie nɔ ko. Shi eka shi faŋŋ akɛ obaasumɔ ni okudɔ owiemɔ lɛ ni okɛto nɔ ni shiatsɛ lɛ kɛɔ lɛ he.
6. (a) Te wɔɔfee tɛŋŋ wɔtsɔse shiatsɛmɛi lɛ ni amɛkpa wɔ gbɛ yɛ be fɛɛ mli? (b) Mɛɛ wiemɔi otii baanyɛ aye abua wɔ ni wɔye omanye? (d) Te nɔ ni sɛɛnamɔ yɔɔ he jogbaŋŋ yɛ wɔshikpɔŋkuku lɛ?
6 Obaanyɛ otsɔ nɔ ni okɛɔ lɛ nɔ otsɔse shiatsɛmɛi lɛ koni amɛkpa wɔ gbɛ akɛ wɔbaaba jɛmɛ daa. Bɔɔ mɔdɛŋ ni okɛɛ akɛ: “Hɛlo, Awula Ama! Te oyɔɔ tɛŋŋ ŋmɛnɛ? Wɔmiisara wɔ akutseiaŋbii lɛ ŋmɛnɛ ni wɔkɛ amɛ miiwie . . .” aloo obaanyɛ okɛɛ akɛ: “Ojekoo! Daa otsi saramɔ ni wɔkɛyaa mɛi aŋɔɔ lɛ mli wɔhiɛ nɛɛ. Eŋɔɔ minaa akɛ miku misɛɛ miba ekoŋŋ. Okutsoŋbii lɛ enya sane hee ni wɔkɛ amɛ gbaa he sane lɛ he.” Kɛkɛ lɛ yaa nɔ. Enɛ hu baaye abua ni eha shikpɔŋkuku lɛ afee “ehee” aha bo. Gbɛ ni oootsɔ nɔ oto owiemɔ lɛ naa diɛŋtsɛ lɛ baafee sɔrɔto yɛ omaŋ ni oyɔɔ mli lɛ mli, shi enɛ kɛ jwɛŋmɔ ni yɔɔ mli lɛ haa bo. Mɛni hewɔ okɛtsuuu nii ni ona he sɛɛ babaoo?
7. (a) Kɛ amɛmiishi shia lɛ, mɛɛ gbɛ nɔ Odasefoi komɛi saa shiatsɛ lɛ kɛhaa saramɔ kroko? (b) Ni yɛ enɛ gbɛfaŋ lɛ, mɛni sɛɛnamɔ yɔɔ he jogbaŋŋ yɛ shikpɔŋkuku lɛ mli?
7 Bɔni afee ni amɛsaa shiatsɛ lɛ kɛha amɛsɛɛsaramɔ lɛ, Odasefoi komɛi yeɔ omanye kɛ sane naamuu ni tamɔ nɛkɛ: “Wɔmiikpa gbɛ akɛ wɔbaaba wɔbasara bo ekoŋŋ.” Yɛ mɛi ni eshashao shi akɛ amɛkɛ bo aaawie yɛ klɛŋklɛŋ be mli lɛ ahe lɛ, obaanyɛ okɛɛ akɛ: “Minya wɔsanegbaa lɛ he. Obɔ mɔdɛŋ okɛ saji otii komɛi emamɔ shi. Wɔkɛ minitii fioo ko fee enɛ, shi kɛ hooo lɛ wɔwieee sane fɔŋŋ ko he, ejaakɛ enɛ ji nɔ ni wɔnuɔ yɛ be fɛɛ mli. Sane ni wɔgba lɛ fɛɛ hi jogbaŋŋ.” Ŋwanejee ko bɛ he akɛ obaanyɛ osaa ohe yɛ gbɛi krokomɛi ni hi jogbaŋŋ ni oootsɔ nɔ owie otsɔɔ oshiatsɛmɛi lɛ anɔ. Fɛɛ sɛɛ lɛ, kɛ okɛ jwɛŋmɔ kpakpa wie, ni okɛ owoji lɛ ha yɛ gbɛ kpakpa nɔ, ni ojie naanyobɔɔ su lɛ kpo lɛ, enɛ yeɔ buaa maŋbii lɛ ni amɛkajo amɛŋɔɔ daa ni wɔbaa lɛ naa foi.
Ye Odase ni Mɔɔ Shi
8, 9. Mɛɛ ŋaa awoɔ yɛ mɛi ni sa lɛ ni aaatao amɛ fitsofitso kɛma shi lɛ he?
8 Nɔ kroko ni wɔbaanyɛ wɔgbala wɔjwɛŋmɔ kɛya nɔ ni no hu baanyɛ aha wɔna miishɛɛ yɛ be fɛɛ mli ji mɛi ni sa lɛ ni wɔɔtao amɛ kɛmɔ shi. (Bɔfoi lɛ Asaji 8:25; 20:24) Akɛ nɔkwɛmɔ nɔ lɛ, nyɛmi ko baanyɛ abi nuu shi yɛ shia lɛ mli kɛji akɛ yoo loo gbekɛ ba shinaa lɛ naa yɛ otsii lɛ anaagbee loo yɛ gbɛkɛnaashi lɛ. Ekolɛ, ŋa lɛ ji mɔ ni wɔkɛ lɛ wieɔ yɛ be fɛɛ mli. Wɔbaanyɛ wɔkɛ shia ko mli bii aje shishi ehee kɛtsɔ wekuyitso lɛ ni wɔkɛ lɛ aaawie nɔ. Kɛkɛ lɛ wɔbaanyɛ wɔkɛ wɔsane lɛ ato ehe, ni wɔkɛɛ nibii komɛi akɛ, “Mɛni ji nɔ ni osusuɔ akɛ eeeha oweku lɛ ana miishɛɛ yɛ wɔsɛɛ be mli?” Aloo “Kwɛmɔ bɔ ni Biblia lɛ haa weku mli ekomefeemɔ baa.” Jiemɔ nuu lɛ yi yɛ ejwɛŋmɔ kpakpa loo nɔ ni eeewie ni hi lɛ he.
9 Gbɛ kroko ni aaatsɔ nɔ ana shikpɔŋkuku “hee” ji ni wɔtao weku lɛ mli bii krokomɛi ni yɔɔ shia kome too lɛ nɔŋŋ mli lɛ—naa ko nɛkɛ, wɔfaase ko nɛkɛ, aloo tsɛkwɛ loo nyɛkwɛ bi ko ni miiya skul, wuyoo ko nɛkɛ ni tsuɔ nii yɛ otsi lɛ mli. Bɔɔ mɔdɛŋ ni onine ashɛ mɛi ni ebana tsui lɛ fɛɛ anɔ—nikaselɔi, nitsulɔi ni ji oshijafoi, okulafoi, kɛ mɛi krokomɛi. Enɛ hu yeɔ ebuaa ni ekpaa shikpɔŋkuku lɛ mli.
10. Mɛni ji gbɛ kroko ni aaatsɔ nɔ akpã shia-kɛ-shia shikpɔŋkuku lɛ mli, ni mɛni ji nɔ ni mɛi komɛi efee koni amɛnine ashɛ nitsulɔi ni tsuɔ nii gbɛkɛ lɛ anɔ?
10 Gbɛ kroko hu nɔ ni oootsɔ okpã shikpɔŋkuku lɛ mli ji ni oha ejɔɔ ehe fioo yɛ bei komɛi amli yɛ be mli ni wɔkɛ wɔhe woɔ wɔsɔɔmɔ nitsumɔ lɛ fai krokomɛi amli lɛ. Kɛha emli tsakemɔ lɛ, wɔbaanyɛ wɔtsu shikpɔŋkuku lɛ mli nii akɛ mɛi ni miisumɔ ni wɔkɛ mɛi aje Biblia mli nikasemɔ shishi yaka. Mɛi komɛi hu yɛ ni akɛni wɔnaaa amɛ yɛ shia be mli ni wɔtee jɛmɛ hewɔ lɛ wɔbaana amɛ yɛ amɛnitsumɔ hei. Odaseyeli yɛ nitsumɔ hei nɛɛ hu baafee nɔ ni sɛɛnamɔ yɔɔ he. Wɔnine baanyɛ ashɛ nɛkɛ gbɔmɛi nɛɛ ekomɛi anɔ kɛ wɔfee gbɛjegbɛi anɔ odaseyeli yɛ be ni sa mli, yɛ ŋmɛlɛtswaa ni hi nɔ. Yɛ Kanada nɛkɛ lɛ, gbɛgbalɔi lɛ yeɔ omanye babaoo yɛ gbɛkɛnaashi sɛɛsaramɔi ni amɛyaa yɛ nitsulɔi ni tsuɔ nii yɛ pɛtrol hɔɔmɔ hei gbɛkɛ fɛɛ, kɛ shwapoi, kɛ gbɔiatoo hei, hei ni nɛkɛ nitsulɔi nɛɛ yɔɔ deka bɔ ni sa, ni agbɛnɛ amɛhiɛ sɔɔ akɛ amɛaana nɔ ko amɛkane lɛ. Shi, nyɛmimɛi yei lɛ titri ji mɛi ni baakwɛ jogbaŋŋ ni amɛkwa hei ni tamɔ nɛkɛ yaa be mli ni je ena.
11. (a) Mɛni Odasefoi komɛi feɔ yɛ shiai ni amɛnaaa mɔ ko yɛ mli klɛŋklɛŋ be mli ni amɛyaa jɛmɛ lɛ? (b) Mɛni baajɛ mɔdɛŋbɔɔ ni wɔkɛaawo mɛi ni bɛ shia ni wɔnaaa amɛ ni wɔyaa amɛŋɔɔ ekoŋŋ yɛ wɔshikpɔŋkuku lɛ mli lɛ mli aba, ni mɛni jɛɔ mli baa yɛ sɔɔmɔ nitsumɔ lɛ mli?
11 Shi mɛi ni bɛ shia yɛ be ni wɔyaa jɛmɛ lɛ hu? Esa akɛ wɔtsu nii kɛmɔ shi hu yɛ biɛ. Odasefoi komɛi kɛ amɛshia-kɛ-shia kadimɔ woji lɛ tsuɔ nii jogbaŋŋ ni amɛkɛ yaa gbɔmɛi ni bɛ shia lɛ aŋɔɔ ekoŋŋ amɛyataoɔ amɛ yɛ nakai gbi lɛ nɔŋŋ mli. Yɛ bei babaoo mli lɛ shiatsɛmɛi lɛ kuɔ amɛsɛɛ amɛbaa shia, aloo no mli lɛ mɛi ni tsuɔ nii gbɛkɛ lɛ wɔko. Hei pii yɛ ni gbɔmɛi lɛ fa kpotoo bɛ shia yɛ gbi lɛ mli. No hewɔ lɛ wɔbaanyɛ ni wɔha shikpɔŋkuku lɛ abɔ he toi enyɔ kɛtsɔ mɛi ni bɛ shia lɛ aŋɔɔ ni wɔɔya ekoŋŋ yɛ ŋmɛlɛtswai krokomɛi amli kɛyashi be mli ni wɔɔna mɔ ko yɛ shia. Gbɛgbalɔi kɛ shiɛlɔi ni he esa lɛ kpɛlɛɔ nɔ akɛ mɔdɛŋbɔɔ yɛ mɛi ni bɛ shia lɛ aŋɔɔ ni ayaa ekoŋŋ lɛ yeɔ omanye babaoo fe kɛ wɔje gbɛ wɔtee shikpɔŋkuku nɛɛ mli klɛŋklɛŋ kwraa lɛ. Kɛ wɔgbala wɔjwɛŋmɔ kɛtee wɔsɔɔmɔ nitsumɔ lɛ fa nɛɛ nɔ lɛ, wɔnine baashɛ jɔɔmɔi babaoo nɔ.—Abɛi 10:22.
Mɛi ni Wieɔ Shiɔ Lɛ
12. Te esa akɛ wɔfee wɔnii wɔha tɛŋŋ yɛ be mli ni gbɔmɛi wieɔ akɛ wɔmiiba amɛŋɔɔ shii abɔ tsɔ lɛ? Mɛni hewɔ?
12 Mɛni abaanyɛ akɛɛ yɛ mɛi ni wieɔ shiɔ akɛ wɔmiiba amɛŋɔɔ shii abɔ tsɔ lɛ ahe? Yɛ fɛɛ sɛɛ lɛ, esa akɛ wɔjie shishinumɔ kpo. (Mateo 7:12) Kɛha amɛ lɛ, amɛsusuɔ akɛ wɔku wɔsɛɛ wɔba mra tsɔ. Shi ehi akɛ wɔɔkai akɛ yɛ afii komɛi ni eho po lɛ, no mli lɛ gbɔmɛi miikɛɛ akɛ ‘Oba biɛ yɛ nyɛsɛɛ otsi lɛ mli,’ yɛ be mli ni amɛle jogbaŋŋ akɛ nyɔji ekpaa loo nɔ nɛ ni wɔba jɛmɛ. Kɛfata he lɛ, shii abɔ ni wɔyaa jɛmɛ lɛ baanyɛ atee miishɛɛ shi. Yɛ Guadeloupe lɛ, nuu ko jo foi kɛnyiɛ Odasefonyo ko sɛɛ ni ekɛɛ: “Mina bo aahu otsii babaoo. Yɛ be babaoo mli lɛ, mibooo Odasefoi lɛ atoi, shi esa akɛ male nɔ hewɔ ni oyaa gbɔmɛi lɛ aŋɔɔ shii abɔ nakai lɛ!” Shia Biblia mli nikasemɔ hee jɛ mli ba.
13, 14. Te nanemɛi heyelilɔi komɛi tsuɔ saji ahe nii amɛhaa tɛŋŋ beni shiatsɛmɛi wieɔ shiɔ lɛ?
13 Nyɛmimɛi komɛi enyɛ amɛkɛ mlihilɛ ekɛɛ mɛi ni wieɔ shiɔ nɛɛ nɔ be pɔtɛɛ ni amɛba jɛmɛ lɛ ni amɛtsɔ nɔ amɛkɛ woji tɛtrɛbii heei lɛ eha, ni amɛha emli efee faŋŋ akɛ saji ni yɔɔ mli lɛ yɛ sɔrɔto yɛ woji ni wɔtsɔ hiɛ wɔkɛha amɛ beni wɔba amɛŋɔɔ klɛŋklɛŋ lɛ he. Kɛ wɔkɛ shiatsɛmɛi ni tamɔ nɛkɛ susu saji ahe lɛ, wɔbaanyɛ wɔkɛɛ akɛ ekolɛ amɛnine eshɛ adafitswaa woji kɛ woji tɛtrɛbii pii anɔ kɛjɛ be mli ni wɔba jɛmɛ nɛɛ, shi yɛ be babaoo mli lɛ jeee saji kpakpai yɔɔ nɛkɛ woji nɛɛ amli. Wɔbaanyɛ wɔtsɔɔ mli akɛ wɔkɛ sanekpakpa baa ni akɛ wɔsaramɔi lɛ asɛɛ etsɛɛɛ. Shi kɛji akɛ shiatsɛ lɛ bɛ deka kwraa lɛ, wɔbaanyɛ wɔkɛɛ akɛ: “Kɛji akɛ enɛ jeee be ni hi fe fɛɛ ni wɔkɛ bo aaawie lɛ, manyɛ mana bo be ni wɔɔba yɛ otsi ni baa loo nɔ lɛ mli.”
14 Mɛni hu abaanyɛ akɛɛ? Enɛ damɔ shiatsɛ lɛ subaŋ nɔ kɛ bulɛ ni ajieɔ lɛ kpo yɛ he ni wɔyɔɔ lɛ nɔ. Nyɛmiyoo ko ni yɔɔ Japan tsɔɔ bɔ ni wɔyaa mɛi aŋɔɔ shii abɔ lɛ mli yɛ nɛkɛ gbɛ nɔ: ‘Televishin nɔ adafitswaa tsiɔ kɔɔyɔɔ kɛ ahum ni naa wa ni baa lɛ ta shii abɔ, ni amɛtiɔ nɛkɛ adafitswaa nɛɛ mli shii abɔ bɔni afee ni ehe aba sɛɛnamɔ aha mɛi ni nuuu nɛkɛ adafitswai nɛɛ ahe lɛ. Afeɔ enɛ ejaakɛ oshara eba wala he. Atiɔ amaniɛbɔɔ lɛ mli shii abɔ kɛyaa nɔ yɛ be mli ni ahum lɛ bɛŋkɛɔ lɛ. No hewɔ lɛ akɛni Harmageddon ahum lɛ bɛŋkɛɔ lɛ, esa akɛ ajaje shɛɛsane lɛ shii abɔ bɔni aaanyɛ ni akɛhere gbɔmɛi ayiwala.’ Shi, wɔkɛ mlihilɛ kɛ anɔkwayeli baajaje nɛkɛ sane nɛɛ wɔtsɔɔ, kɛ hiɛnɔkamɔ akɛ ebaashɛ toibolɔ lɛ tsui mli.
Shikpilikpiifeemɔ He Sane lɛ Naa ni Wɔɔnyɛ Wɔdamɔ
15. (a) Mɛni baanyɛ afee naagba ko yɛ be fɛɛ mli yɛ be mli ni wɔtsuɔ wɔ shikpɔŋkuku lɛ mli nii shii abɔ lɛ? (b) Mɛni hewɔ mɛi komɛi feɔ shikpilikpii lɛ.
15 Yɛ be mli ni wɔsaramɔ lɛ faa lɛ, naagba kome ji shikpilikpiifeemɔ ni wɔkɛkpeɔ yɛ bei babaoo mli lɛ. Shi nɔ ni haa mɛi feɔ shikpilikpii nɛɛ amlipɛimɔ baanyɛ awo wɔ hewalɛ ni wɔkadi akɛ wɔbaanyɛ wɔshɛ nɛkɛ gbɔmɛi nɛɛ atsui mli. Amɛ shikpilikpiifeemɔ lɛ baanyɛ afee nɔ ni jɛ nijiaŋwujee kɛ hiɛnɔkamɔ ni bɛ. Amɛbaanyɛ amɛnu he akɛ hiɛnɔkamɔ ko bɛ akɛ abaaje jeŋ shihilɛ nɛɛ mli, ni amɛbaasusu akɛ amɛbaahi shi kɛkɛ bɔ ni hi kɛha amɛ. Mɛi komɛi hu yɛ ni amɛmli efu yɛ bɔ ni jamɔ mli hiɛnyiɛlɔi kɛ amɛhe woɔ maŋkwramɔ mli, amɛyeɔ jeŋba shara he fɔ, aloo amɛtsuuu bɔlɛnamɔ mli jeŋba shara he nii shiŋŋ lɛ hewɔ. No hewɔ lɛ nɛkɛ shiatsɛmɛi nɛɛ ahiɛnɔkamɔi efee yaka ni amɛhiɔ shi kɛkɛ amɛhaa gbele.
16. Te wɔɔfee tɛŋŋ ni wɔnine ashɛ gbɔmɔ ni efee shikpilikpii lɛ tsui nɔ?
16 Wɔle akɛ mra be mli Kristofoi ni ji sɔɔlɔi lɛ ye omanye yɛ nɛkɛ su nɛɛ naa ni amɛnyɛ amɛdamɔ lɛ mli, ejaakɛ mɛi komɛi kɛɛ: “nyɛhaa wɔyea nii ni wɔnua daai, ejaakɛ wɔ lɛ, wɔbaagboi.” (1 Korintobii 15:32) No hewɔ lɛ, wɔyɛ nɔ pɛ ni he hiaa ni esa akɛ gbɔmɛi lɛ anu lɛ. Shi kɛlɛ, te wɔɔfee tɛŋŋ ni wɔnine ashɛ amɛtsui nɔ? Gbɛ kome ji ni wɔku sɛɛ wɔkɛ wɔwoji ni akɛkaseɔ Biblia lɛ ahɔlɔ wɔbaagi mli ekoŋŋ, ni wɔha amɛna akɛ wɔmiifee nakai. Kɛkɛ lɛ wɔbaanyɛ wɔbi amɛ saji ni jwɛŋmɔ yɔɔ mli nɛɛ akɛ: “Ani osusuɔ akɛ tsabaa ko yɛ kɛha ŋmɛnɛŋmɛnɛ beaŋ naagbai lɛ? Ani gbɔmɛi nako naagbai nɛɛ anaa tsabaa lolo? Ani esa akɛ wɔna jwɛŋmɔ kpakpa ni wɔya nɔ wɔtao?” Kɛha mɛi krokomɛi lɛ wɔbaanyɛ wɔkɛɛ akɛ: “Yɛ anɔkwale mli lɛ obaakpɛlɛ nɔ akɛ ehi moŋ akɛ aaahi shi yɛ hiɛnɔkamɔ mli fe ni abɛ nibii kpakpai ahe gbɛkpamɔ. Mɛni ji nɔ ni ohiɛ ka nɔ akɛ obaana?” Wɔbaanyɛ wɔbi akɛ: “Mɛni ji nɔ ni bo diɛŋtsɛ lɛ onaa akɛ eji gbɛtsii nii kpele ni tsiɔ jeŋ ekomefeemɔ kɛ toiŋjɔlɛ naa?” Wɔbaanyɛ wɔbi mɛi krokomɛi hu akɛ: “Ani osusuɔ akɛ jamɔi fɛɛ tamɔ bɔ ni otsɔɔ mli nɛɛ?” Yɛ bei babaoo mli lɛ nɛkɛ sanebimɔi nɛɛ baaha shiatsɛmɛi lɛ atsɔɔ amɛjwɛŋmɔ. Kɛkɛ lɛ kɛ amɛmiiha hetoo lɛ, kwɛmɔ ni obo toi. Hɛɛ, ha ni amɛfɔse amɛtsui mli saji amɛshwie onɔ. Amɛteŋ mɛi pii yɛ ni ‘amɛmiidɔmɔ ŋtsɔi ni amɛyeɔ ŋkɔmɔ yɛ nihiinii ni afeɔ bianɛ lɛ hewɔ.’—Ezekiel 9:4.
17. Mɛɛ gbɛ nɔ wɔɔtsɔ ni mɛi komɛi anine ashɛ wɔwoji lɛ anɔ kɛ amɛma nɔ mi yɛ klɛŋklɛŋ be mli po akɛ amɛbɛ he miishɛɛ lɛ?
17 Gbɛ kroko ni atsɔɔ nɔ atsuɔ shikpilikpiifeemɔ he nii ji ni okadi wiemɔ ko ni shiatsɛ lɛ kɛteɔ shi woɔo lɛ ni okɛ woji tɛtrɛbii loo Buu-Mɔɔ Asafo lɛ wolo kroko ni tsuɔ nɛkɛ sane nɛɛ he nii lɛ abaha lɛ. Klɛŋklɛŋ lɛ, ebaanyɛ efee sane ko ni kɔɔɔ jamɔ he, ekolɛ tamɔ sane ni kɔɔ abifabii ni gboiɔ trukaa lɛ loo kooi ni fiteɔ lɛ he. Tsɔɔmɔ mli akɛ oosusu nɔ ni shiatsɛ lɛ baanya he lɛ he ni okai nɛkɛ saji nɛɛ. Ni agbɛnɛ otsɔɔ lɛ nɔ ni ogbalaa ejwɛŋmɔ kɛyaa nɔ lɛ mli saji. Yoo ko ni ekpoo wɔwoji lɛ kpɛlɛ woji tɛtrɛbii lɛ anɔ yɛ no sɛɛ hiŋmɛitswaa fioo ko mli. Mɛni hewɔ? Ejaakɛ Odasefoi lɛ bi yoo lɛ kɛji akɛ ele akɛ afiteɔ musui akpekpei 55 daa afi lo. Akɛni efee lɛ naakpɛɛ ni ehe jɔ ehe yɛ enɛ he hewɔ lɛ, ebi ni akɛ wolo tɛtrɛɛ ni nɛkɛ sane nɛɛ yɔɔ mli lɛ aha lɛ.
Tsu he Nii Kɛyashi Naagbee
18, 19. (a) Mɛɛ saji otii krokomɛi esa akɛ ‘wɔgbala wɔjwɛŋmɔ kɛya nɔ’ yɛ be mli ni wɔtsuɔ wɔsɔɔmɔ lɛ he nii lɛ? (b) Mɛɛ jwɛŋmɔ fɔŋ mɛi komɛi yɔɔ yɛ wɔhe kɛ wɔhemɔkɛyelii ahe, ni te wɔɔfee tɛŋŋ wɔha amɛ hetoo?
18 Yɛ fɛɛ sɛɛ lɛ, ehe miihia ni wɔto wɔtsui shi wɔha gbɔmɛi. Wiemɔ blɛoo kɛ miishɛɛ. Jiemɔ suɔmɔ kɛ mlihilɛ kpo. (Galatabii 5:22, 23) Dani ooobote shia ko mli lɛ, susumɔ nɔ ni tee nɔ yɛ he ni oshiɔ lɛ he ni okwɛ nɔyaa ni obaanyɛ ofee. Nuu mɛi ashishi ejaakɛ mɛi pii hiɛ Yehowa Odasefoi ahe jwɛŋmɔ fɔŋ. Amɛbaanyɛ amɛkɛɛ akɛ: ‘Nyɛkɛ nyɛhe wooo maŋkwramɔ kɛ maŋ nitsumɔi amli,’ ‘Nyɛkɛ nyɛhe wooo asraafoi anitsumɔ mli,’ aloo ‘Nyɛfiteɔ wekui.’ Shi nɛkɛ su nɛɛ tamɔ jeŋ ni wɔnanemɛi heyelilɔi ni hi shi yɛ klɛŋklɛŋ afii oha lɛ mli lɛ hi mli lɛ nɔ. Tsɔɔmɔ shiatsɛmɛi lɛ akɛ nakai enɛ ji, ekolɛ kɛtsɔ wiemɔi ni oootsɛ kɛaajɛ saneyitso ni ji “Neutrality” (Maŋ saji ni akɛ he wooo mli) ni yɔɔ Reasoning wolo lɛ mli lɛ nɔ.
19 Yinɔsaneŋmalɔ Will Durant ŋma yɛ klɛŋklɛŋ Kristofoi lɛ ahe akɛ: “Kɛha Kristofonyo lɛ, ejamɔ lɛ ji nɔ ko ni yɔɔ sɔrɔto kwraa ni enɔ kwɔ hu fe maŋkwramɔŋ kuu lɛ; mɔ ni ebaa ehe shi ehaa ni ekɛ woo fɛɛ haa lɛ jeee Kaisare shi moŋ Kristo. . . . Bɔ ni Kristofonyo lɛ etsi ehe kɛjɛ shikpɔŋ nɔ saji ahe lɛ haa wɔŋjalɔi lɛ susuɔ akɛ ejo foi kɛjɛ emaŋ nitsumɔ he, ni egbɔjɔɔ maŋ hewalɛnamɔ kɛ suɔmɔnaa nifeemɔ. Tertullian wo Kristofoi lɛ aŋaa akɛ amɛkɛ amɛhe akawo asraafoi anitsumɔ mli; . . . Kristofoi ahiɛnyiɛlɔi lɛ woɔ amɛ hewalɛ ni amɛkwa mɛi ni jeee Kristofoi lɛ, amɛtsi amɛhe kɛjɛ amɛgbijurɔyelii ashwɛmɔi lɛ ahe akɛni amɛfeɔ amɛnii tamɔ mɛi ni amɛhiŋmɛi gbeleko lɛ hewɔ, kɛ amɛshwɛmɔ hei lɛ hu akɛ yakayaka nifeemɔ hei. . . . Kɛ Kristojamɔ [tsake mɛi heei lɛ] abuɔ no akɛ amɛmiifite shiai.”—Caesar and Christ, baafa 647.
20, 21. (a) Mɛni wɔsumɔɔ ni wɔna nɔmimaa yɛ he kɛ gbɔmɛi ekpɛlɛɛɛ sane lɛ nɔ lɛ? (b) Mɛni hewɔ esaaa akɛ ‘wɔnijiaŋ jeɔ wui’ shi moŋ wɔya nɔ yɛ wɔ-Maŋtsɛyeli-shiɛmɔ nitsumɔ kpakpa lɛ mli lɛ?
20 Mɛi komɛi boŋ toi, ni nɔ fɛɛ nɔ ni wɔɔkɛɛ lɛ kɔɔɔ he eko. Shi esa akɛ enɛ aba lɛ nakai akɛni amɛmiikpoo Maŋtsɛyeli lɛ he sane hewɔ, shi jeee akɛ gbɛ ni wɔtsɔɔ nɔ wɔkɛ sane lɛ haa yɛ wɔsɔɔmɔ nitsumɔ lɛ mli lɛ ehiii hewɔ. (Luka 10:8-11; Bɔfoi lɛ Asaji 17:32; Ezekiel 3:17-19) Esa akɛ wɔfee nɔ ni hi fe fɛɛ ni wɔɔnyɛ kɛ Nyɔŋmɔ yelikɛbuamɔ, ni Yehowa baakwɛ ni atsu nitsumɔ lɛ he nii kɛyashi naagbee.—Okɛto Filipibii 1:6 he.
21 Akɛni wɔyɔɔ hekɛnɔfɔɔ babaoo hewɔ lɛ “nyɛtekea nɔ yɛ Nuŋtsɔ lɛ nitsumɔ lɛ mli daa nɛɛ, ejaakɛ nyɛle akɛ nyɛmɔdɛŋbɔɔ lɛ efeŋ yaka yɛ Nuŋtsɔ lɛ mli.” (1 Korintobii 15:58) “Ohiɛ ahi ohe nɔ kɛ tsɔɔmɔ lɛ nɔ, hii shi yɛ nii nɛɛ amli; ejaakɛ kɛji ofee enɛ lɛ, ooohere bo diɛŋtsɛ kɛ mɛi ni boɔo toi lɛ fɛɛ yiwala.” (1 Timoteo 4:16) Yɛ fɛɛ sɛɛ lɛ, “nyɛkahaa ekpakpafeemɔ miitɔa wɔ, ejaakɛ kɛ wɔnijiaŋ ejeee wui lɛ, wɔbaakpa hu yɛ be ni sa mli.”—Galatabii 6:9.a
[Shishigbɛ niŋmai]
a Ajie kɛjɛ July 15, 1988 Watchtower lɛ mli.
Ani Obaanyɛ Okai?
◻ Mɛni ji gbɛi komɛi anɔ ni aaatsɔ ana jwɛŋmɔ kpakpa yɛ shikpɔŋkuku ni afɔɔ mli nitsumɔ lɛ mli lɛ?
◻ Te wɔɔfee tɛŋŋ wɔtao mɛi ni sa lɛ jogbaŋŋ kɛmɔ shi?
◻ Mɛɛ gbɛ nɔ wɔɔtsɔ wɔbɔ mɔdɛŋ ni wɔtsu mɛi ni wieɔ shiɔ akɛ wɔbaa amɛŋɔɔ shii abɔ tsɔ lɛ he nii?
◻ Mɛɛ gbɛi anɔ wɔɔtsɔ wɔtsu shikplikpiifeemɔ he naagba lɛ he nii yɛ?
◻ Mɛni baaha wɔsɔɔmɔ lɛ hilɛ aya hiɛ?
[Akrabatsa ni yɔɔ baafa 20]
BE NI SHIKPƆŊKUKU LƐ MLI NITSUMƆ YAA HIƐ LƐ.
‘Ha ohiɛ ahi enɛ nɔ daa’:
◻ Jwɛŋmɔ kpakpa ni wɔkɛaaya gbɔmɛi lɛ aŋɔɔ kɛ woji kɛ shiɛmɔ kpakpa
◻ Mɛi ni sa lɛ ataomɔ yɛ gbɛ ni mɔɔ shi nɔ
◻ Tsuishitoo ni wɔkɛaatsu mɛi ni wieɔ shiɔ lɛ ahe nii
◻ Shikpilikpiifeemɔ kɛ shishinumɔ ni bɛ he naagbai lɛ ahe nitsumɔ.