Hekɛnɔfɔɔ Yɛ Jeŋ Ni Ŋwanejee Eyi Mli Obɔ Mli
“Ajɔɔ gbɔmɔ ni ŋɔɔ ehiɛ efɔɔ Yehowa nɔ, ni Yehowa ji ehiɛnɔkamɔ [hekɛnɔfɔɔ] lɛ.”—Bibliaa
‘Ŋwanejee loo yiŋkɔshikɔshifeemɔ ji su ni akpaa gbɛ yɛ woloŋlelɔ ni eda lɛ dɛŋ.’—Jeŋ Nilee
1, 2. Mɛni ji su ni Helabii komɛi hiɛ, ni mɛni ji nɔ ni je nɛŋ nikasemɔ ni yaa hiɛ lɛ kɛba?
1 “MƐNI ji anɔkwale?” Nakai hetoo lɛ ni Pontio Pilato kɛha Yesu Kristo lɛ ji yiŋkɔshikɔshifeemɔ su ni ayoo yɛ gbɔmɛi pii ahe. (Yoh. 18:38) Awie akɛ blema Helabii ŋwanejelɔi ni yiŋ feɔ amɛ kɔshikɔshi lɛ “kɛ jwɛŋmɔŋ toiŋjɔlɛ ni nɔ ko nɔ ko gbaa amɛnaa feɔ oti ni ma amɛhiɛ, ni amɛnine ashɛ nɔ kɛtsɔ ŋwanejee sɔrɔtoi enyɔ ni amɛaaŋmɛ amɛkwɛ yɛ be fɛɛ mli lɛ nɔ, koni amɛkɛ nakai feemɔ aba nɔ fɛɛ nɔ shi amɛwo shihilɛ ko ni yiŋkɔshikɔshifeemɔ kɛ ŋwanejee yɔɔ he lɛ mli.”
2 Sui sɔrɔtoi ni kɔɔ ŋwanejee he nɛɛ bote wɔgbii nɛɛ amli kɛtsɔ jeŋ nilelɔi tamɔ Frenchnyo René Descartes, Dutchnyo Spinoza, Scotnyo David Hume kɛ Germannyo jeŋ nilelɔ Kant nɔ. Yɛ hewalɛ ni nɛkɛ hii nɛɛ kɛ mɛi krokomɛi na yɛ mɛi anɔ Iɛ hewɔ lɛ, yiŋkɔshikɔshifeemɔ loo ŋwanejee ni yaa nɔ yɛ be fɛɛ mli lɛ ebafee mɛi ni kaseɔ nii kɛyaa hiɛ lɛ ahemɔkɛyeli ko. Skul wuji tamɔ University ni yɔɔ maji fɛɛ mli lɛ ena yinɔbii ko ni jeɔ ŋwane, ejaakɛ “akɛ nɔ fɛ nɔ toɔ nɔ ko he.”
3. (a) Mɛni ji nɔ ni ehii kwraa ni ejɛ ŋwanejee mli eba lɛ ekome? (b) Mɛɛ su kpakpa awoɔ hewalɛ yɛ he yɛ Biblia lɛ mli?
3 Yɛ be mli ni ewieɔ hewalɛ fɔŋ ni nɛkɛ ŋwanejee loo nii amli ni aleee agbeee naa nɛɛ kɛbaa lɛ he lɛ, mɔ ko ni yɔɔ enɛ he nilee waa lɛ jaje akɛ “nɔ ni ejɛ nii ni akɛtoɔ nii ahe kɛ yiŋkɔshikɔshifeemɔ kɛ ŋwanejee su nɛɛ mli eba yɛ wɔdiɛŋtsɛ wɔyinɔ nɛɛ mli lɛ jɛ bulɛ ni abɛ kɛha anɔkwale ni tamɔ nɛkɛ.” Eyaa nɔ ekɛɔ akɛ:
Bulɛ kɛha anɔkwale jeee wɔdiɛŋtsɛ wɔyinɔ nɛɛ mli nii ahe jwɛŋmɔ fɔŋ ni akwaa anaa kɛkɛ ni bɔɔ mɔdɛŋ ni “ekpa” nɔ fɛɛ nɔ “he mama,” yɛ he ni aheɔ ayeɔ akɛ mɔ ko mɔ ko bɛ, ni nɔ ko nɔ ko hu bɛ ni baanyɛ akɛɛ yɛ anɔkwale mli akɛ ehiɛ aloo eyɛ anɔkwale lɛ. Eji su ni kɛ hiɛnɔkamɔ ni miishɛɛ yɔɔ mli feɔ ekome akɛ abaanyɛ ana anɔkwale lɛlɛŋ, ni aba he shi aha anɔkwale yɛ be fɛɛ be kɛ he fɛɛ he ni eeepue yɛ. Kpɛlɛmɔ ni akpɛlɛɔ anɔkwale nɔ nɛɛ ji nɔ ni ataoɔ yɛ mɛi ni jaa anɔkwale Nyɔŋmɔ lɛ ahe. . . Enɛ ji su . . . ni [Kpaŋmɔ Momo] lɛ kɛ [Kpamɔ Hee] lɛ fɛɛ yeɔ he odase.—“New International Dictionary of New Testament Theology” 1978, Kpo 3, baafai 900, 901.
Hekɛnɔfɔɔ Ni Miishɛɛ Yɔɔ Mli Yɛ Anɔkwale Lɛ Mli
4, 5. (a) Yɛ mɛɛ gbɛ nɔ Ŋmalɛi lɛ kɛ hekɛnɔfɔɔ haa, shi jeee ŋwanejee loo yiŋkɔshikɔshifeemɔ? (b) Mɛni ji nibii kpakpai ni jɛɔ puemɔ ni akpɛlɛɔ Biblia mli ‘tsamɔ wiemɔi lɛ nɔ lɛ mli baa lɛ ekomɛi?
4 Hɛɛ, Biblia muu lɛ fɛɛ kanyaa ekanelɔi lɛ, jeee kɛ ŋwanejee loo yiŋkɔshikɔshifeemɔ shi moŋ kɛ hekɛnɔfɔɔ. Hebri Ŋmalɛi lɛ kɛɔ akɛ: “Ajɔɔ gbɔmɔ ni ŋɔɔ ehiɛ efɔɔ Yehowa nɔ, ni Yehowa ji ehiɛnɔkamɔ [hekɛnɔfɔɔ] lɛ.” (Yer. 17:7) Ní Paulo ŋma yɛ Kristofoi a-Hela Ŋmalɛi lɛ mli akɛ: “Milajeko hiɛnɔkamɔ, ejaakɛ mile mɔ ni mikɛ mihe efɔ enɔ lɛ ni miyɛ hekɛnɔfɔɔ akɛ ebaanyɛ ekwɛ nɔ fɛɛ nɔ ni mikɛwo edɛŋ lɛ nɔ kɛyashi nakai gbi lɛ nɔ.” Yiŋkɔshikɔshifeemɔ ko bɛ enɛ mli! —2 Tim. 1:12, The Jerusalem Bible
5 Beni etsɔɔ ehe ni ekɛfɔɔ Nyɔŋmɔ nɔ kwraa nɛɛ mli lɛ sɛɛ lɛ Paulo kɛfata he akɛ: “Nyiɛmɔ tsamɔ wiemɔ ni onu yɛ minaa lɛ akadi lɛ mli lɛ hemɔkɛyeli kɛ suɔmɔ ni yɔɔ Kristo Yesu mli lɛ mli.” (2 Tim. 1:13) Kpɛlɛmɔ ni aaakpɛlɛ “tsamɔ wiemɔi” ni anaa yɛ Biblia lɛ mli lɛ nɔ lɛ haa wɔhemɔkɛyeli kɛ suɔmɔ yaa hiɛ, ni ehaa wɔ hiɛnɔkamɔ ni miishɛɛ yɔɔ mli, yɛ anɔkwale ni shiwooi ni jara wa ni Yehowa kɛha wɔ lɛ ji lɛ mli. Enɛ hu haa wɔ hiɛnɔkamɔ, ni ji “wɔsusuma sɛkɛ ni tseee ni efi shi shiŋŋ” lɛ.—Heb. 6:17-19.
6. Beni afee ni wɔnyɛ wɔgba “sanekpakpa” lɛ wɔtsɔɔ mɛi krokomɛi lɛ, mɛni ji nɔ ni he hiaa wɔdiɛŋtsɛ?
6 Nɛkɛ anɔkwale nɛɛ mli hekɛnɔfɔɔ ni miishɛɛ yɔɔ mli nɛɛ ji nɔ ni yeɔ ebuaa wɔ ni wɔnyɛɔ wɔyaa wɔyashiɛɔ Nyɔŋmɔ maŋtsɛyeli lɛ he sanekpakpa lɛ akɛ adesai ahiɛnɔkamɔ kome pɛ lɛ. Esa akɛ mɔ ko ahe anɔkwale ni hiɛnɔkamɔ he sane lɛ ji kwraa lɛ eye dani enyɛ egba mɛi krokomɛi. No hewɔ lɛ wɔbaanyɛ wɔkɛɛ mɛi ni boɔ wɔ toi lɛ akɛ: “Akɛ wɔsanekpakpa lɛ baaa nyɛŋɔɔ yɛ wiemɔ mli kɛkɛ, shi moŋ yɛ hewalɛ kɛ mumɔ krɔŋkrɔŋ kɛ nɔmimaa babaoo mli.” “Ejaakɛ beni nyɛnine shɛ Nyɔŋmɔ wiemɔ ni nyɛnu yɛ wɔnaa lɛ nɔ nɛ, nyɛmɔ mli akɛ Nyɔŋmɔ wiemɔ, taakɛ bɔni eji hu lɛlɛŋ lɛ, shi jeee akɛ gbɔmɛi wiemɔ ko ni.”—1 Tes. 1:5; 2:13.
7, 8. Namɛi ye bua nyɛmimɛi lɛ koni amɛjie ŋwanejee loo yiŋkɔshikɔshifeemɔ yɛ amɛhe kwraa yɛ mra bɛ mli Kristofoi asafo lɛ mli?
7 Nɔkwɛlɔi anɔkwafoi ni hi shi yɛ mra be mli Kristofoi asafo lɛ mli lɛ ye bua amɛnanemɛi Kristofoi lɛ ni amɛtsumɔ ŋwanejee loo yiŋkɔshikɔshifeemɔ kɛjɛ amɛjwɛŋmɔi amli beni afee ni amɛdamɔ shi shiŋŋ yɛ hemɔkɛyeli lɛ mli. Yɛ mumɔ krɔŋkrɔŋ lɛ yelikɛbuamɔ naa lɛ, klɛŋklɛŋ afii oha lɛ mli nɔyeli kuu lɛ ni feɔ bɔfoi lɛ kɛ onukpai ni yɔɔ Yerusalem asafo lɛ mli lɛ to amɛyiŋ, amɛkɛ famɔi ha ni amɛtsu hii anɔkwafoi beni afee ni amɛyatswa nyɛmimɛi lɛ amɛma shi. ‘Wɔkaneɔ yɛ Biblia mli wolo ni ji bɔfoi lɛ asaji lɛ mli akɛ: “Shi beni [Paulo, Sila kɛ amɛnanemɛi gbɛfalɔi lɛ] amɛkpaa maji lɛ anɔ lɛ, amɛkɛ mlai ni bɔfoi lɛ kɛ onukpai lɛ ni yɔɔ Yerusalem lɛ wo lɛ ha amɛ, koni amɛye nɔ. Agbɛnɛ asafoi lɛ na hewalɛ yɛ hemɔkɛyeli mli, ni amɛyi faa daa nɛɛ.”—Bɔf. 16:4, 5; 15:23-29.
8 Yɛ be mli ni eŋmaa wolo eyaha asafo lɛ ni yɔɔ Kolose lɛ, Paulo wie Kristofonyo anɔkwafo Epafra he akɛ “daa nɛɛ epeleɔ nyɛhe yɛ esɔlemɔi amli, koni nyɛdamɔ shi ni nyɛye emuu ni nyɛyimɔ obɔbɔ yɛ Nyɔŋmɔ suɔmɔnaa nii fɛɛ mli.” (Kol. 4:12) Shi gbɛ ko kwraa bɛ kɛha yiŋkɔshikɔshifeemɔ kɛ ŋwanejee yɛ nakai gbii lɛ po mli. Ehe miihia ni nakai mra be mli Kristofoi lɛ ‘adamɔ shi shiŋŋ yɛ hemɔkɛyeli lɛ mli.’ ‘nɔkpɛlɛmɔ ni ma shi shiŋŋ.’
Ŋwanejee Loo Yiŋkɔshikɔshifeemɔ Nɔ Ni Aaaye
9. Mɛni hewɔ Kristofoi ahekɛnɔfɔɔ he hiaa titri ŋmɛnɛ lɛ?
9 Ani Kristofoi ahekɛnɔfɔɔ ji nɔ ko ni he ehiaaa yɛ wɔgbii nɛɛ amli, yɛ jeŋ ni taakɛ Ŋleshi jeŋ nilelɔ Bertrand Russell kɛɛ lɛ,‘ yiŋkɔshikɔshifeemɔ loo ŋwanejee ji nɔ ni akpaa gbɛ yɛ woloŋlelɔ ni eda lɛ he’ lɛ mli? Dabi. Kɛ nɔ̃ ko yɛ kwraa po lɛ, hemɔkɛyeli ni ma shi shiŋŋ he miihia waa ejaakɛ kpaako kwraa “mumɔ ni tsuɔ nii ŋmɛnɛŋmɛnɛ yɛ toigbele bii amli lɛ” woɔ he ni anyɛɛɛ akɛfɔ mɔ nɔ kɛ yiŋkɔshikɔshifeemɔ loo ŋwanejee he hewalɛ fe be fɛɛ. (Efe. 2:2) No hewɔ lɛ esa akɛ Kristofonyo ni ŋwanejee haoɔ lɛ lɛ ayoo osharai lɛ ni eto he gbɛjianɔ bɔni sa beni afeee ni ‘edamɔ shi ni eye emuu.’
10, 11. (a) Kɛji akɛ ŋwanejee miihe ana shishifa yɛ wɔjwɛŋmɔ mli lɛ mɛɛ saji esa akɛ wɔbi wɔdiɛŋtsɛ wɔhe? (b) Te mɛi fe 2,000,000 aaaha nɛkɛ sanebimɔi nɛɛ ahetoo aha tɛɛŋ?
10 Kɛji akɛ ŋwanejee loo yiŋkɔshikɔshifeemɔ ni baa nigii je shishi ebɔi ejwɛŋmɔ mli baa lɛ, Kristofonyo lɛ baafee jogbaŋŋ kɛji akɛ klɛŋklɛŋ lɛ esusu shihilɛ lɛ he ni ekɛ saji titrii komɛi bi lɛ diɛŋtsɛ ehe:
Nɛgbɛ mikase kɛjɛ akɛ Nyɔŋmɔ gbɛi ji Yehowa, nɔ ni nakai gbɛi lɛ shishi ji, nɔ ni ji Nyɔŋmɔ yiŋtoo ni suɔmɔ yɔɔ mli kɛha adesai kɛ nɔ hewɔ ni eŋmɛ nɔnaa gbɛ ni eya nɔ yɛ be kakadaŋŋ nɛɛ mli yɛ shikpɔŋ nɔ?—Lala 83: 19; Kpoj. 21:3, 4; 2 Pet. 8:9, 13.
Namɔ tsɔɔ mi akɛ Yesu Kristo jeee Triniti nyɔŋmɔ lɛ fa ni ji enyɔ, shi eji Yehowa suɔmɔ Bi, ni namɔ ye bua mi ni minu nɔ ni yiwalaheremɔ kɛmiijɛ esha mli kɛtsɔ Kristo kpɔmɔ afɔle lɛ nɔ lɛ ji diɛŋtsɛ lɛ shishi?—Yoh. 3:16; 14:28; 1 Kor. 15:27, 28.
Mɛɛ jamɔ ha minu sane ni kɔɔ mumɔ krɔŋkrɔŋ lɛ he lɛ shishi jogbaŋŋ yɛ mijwɛŋmɔ mli, akɛ ejeee gbɔmɔ “Mumɔ Krɔŋkrɔŋ” shi moŋ eji Yehowa nitsumɔ hewalɛ, ni nɛgbɛ ji heni mina gbɔmɛi akuu ko ni kɛ anɔkwayeli miibɔ ni amɛwo mumɔ lɛ yibii lɛ yɛ?—Bɔf. 2:33; Gal. 5:22, 23; Kol. 3:12-14.
Mɛɛ jamɔ gbɛjianɔtoo ha minu blema wɔŋjalɔi ajwɛŋmɔ ni kɔɔ adesa susuma lɛ ni gbooo lɛ he lɛ shishi, ni eha mina kɛjɛ Biblia lɛ mli akɛ susuma lɛ gboɔ ni eha Biblia mli tsɔɔmɔ ni kɔɔ gbohiiashitee lɛ he lɛ mli fee faŋŋ kɛha mi ni eha miye mihe kwraa kɛjɛ nitsɔɔmɔ ni gbeɔ Nyɔŋmɔ he guɔ ni ji hell-la tsɔɔmɔ lɛ he?—Ezek. 18:4; Bɔf. 24:15; Rom. 6:23.
Namɛi pɛ shiɛɔ Nyɔŋmɔ maŋtsɛyeli lɛ akɛ adesai ahiɛnɔkamɔ kome pɛ, ni namɔ eye ebua mi ni eha mibale akɛ wɔyɛ “naagbee gbii” lɛ amli, ni akɛ esa akɛ “wɔsra” yɛ Nyɔŋmɔ Bi lɛ ni baa lɛ hewɔ?—Mar. 13:10, 33-37; Luka 21:34-36; 2 Pet. 3:3-7.
Namɛi ateŋ mibaná yiŋtoo diɛŋtsɛ yɛ shihilɛ mli, “Nyɔŋmɔ toiŋjɔlɛ,” yibaamɔ kɛmiijɛ je nɛŋ kaai kɛ shigbeemɔi amli kɛ nilee diɛŋtsɛ ni baaha manyɛ matsu shihilɛ mli naagbai lɛ ahe nii yɛ omanyeyeli mli?—Mat. 24:45-47; 1 Tim. 3:15; Filip. 4:6-9.
Naagbee lɛ, mɛɛ Kristofoi akuu yɔɔ ‘suɔmɔ yɛ amɛteŋ’ lɛlɛŋ (Yoh. 13:34, 35) , ni amɛjieɔ bulɛ kpo amɛtsɔɔ Shishitoo mlai ni yɔɔ Yohane 17:14, 16 kɛ Yesaia 2:4 ni awaa amɛyi, ni jeee akɛni amɛkɛ amɛhe woɔ maŋkwramɔ saji amli po hewɔ, shi moŋ ‘yɛ Yesu gbɛi lɛ hewɔ, ni ji akɛ, akɛni amɛji Kristofoi diɛŋtsɛ lɛ hewɔ?—Mat. 24:9; Yoh. 15:18, 19.
11 Kɛha mɛi ni amɛyibɔ fe 2,000,000 ni yɔɔ shikpɔji kɛ ŋshɔkpɔi fe 200 nɔ lɛ, nakai sanebimɔi lɛ ahetoo ni mli ka shi faŋŋ ji: Yehowa Odasefoi, ni “tsulɔ anɔkwafo kɛ nilelɔ” kuu lɛ kɛ enɔyeli kuu lɛ kɛ mumɔŋ niyenii lɛɔ amɛ lɛ.—Okɛto Luka 12:42-44 he.
Hiɛmɔ Jwɛŋmɔ Kpakpa Mli
12. Nɛgbɛ ji heni ŋwanejee loo yiŋkɔshikɔshifeemɔ jeɔ shishi kɛjɛɔ?
12 Beni afee ni wɔkwa je lɛ mumɔ ni wɔɔna, susumɔ fɔŋ mumɔ, he ni aheee mɔ ayee mumɔ kɛ ŋwanejee lɛ, ehe miihia ni mɔ akwɛ susumɔi ni yɔɔ emli gbɛ tɔɔ lɛ jogbaŋŋ. Ekɛɛ bɔfoi anɔkwafoi 11 lɛ kɛ kaselɔi krokomɛi lɛ ni ewa kɛha amɛ akɛ amɛaahe Kristo ni atee lɛ shi lɛlɛŋ lɛ amɛyɛ lɛ akɛ: “Mɛɛba nyɛtsui faa? Ní mɛni hewɔ hu ni ŋwanejee teɔ shi yɛ nyɛtsuii amli?” (Luka 24:38) Hɛɛ, jɛmɛ ji heni ŋwanejee loo yiŋkɔshikɔshifeemɔ jeɔ shishi —yɛ tsui lɛ mli.
13, 14. (a) Ŋwanejee loo yiŋkɔshikɔshifeemɔ baanyɛ afee mɛni he okadi? (b) Mɛni ji nɔ ni wɔbaanyɛ wɔkase kɛjɛ Israel ni yeee anɔkwale lɛ he?
13 No hewɔ lɛ kɛji akɛ ŋwanejee ni gbaa mɔ naa je shishi akɛ eehao wɔ lɛ, esa akɛ wɔje shishi wɔpɛi wɔdiɛŋtsɛ wɔsusumɔi amli jogbaŋŋ. Ani wɔ ŋwanejee loo yiŋkɔshikɔshifeemɔ lɛ anɔkwale ni, aloo wɔkwa wɔmiijie enɛ kpo koni wɔkafee kpɔkee? Ani no tsɔɔ akɛ wɔbɛ tsuishiŋmɛɛ? Ani ejieɔ hemɔkɛyeli ni wɔbɛ yɛ Nyɔŋmɔ hewalɛ ni ekɛaafɔ wɔ lɛ mli? Ani mɔ ko miidu ŋwanejee loo yiŋkɔshikɔshifeemɔ wui yɛ wɔmli? (1 Yoh. 1:9; Bɔf. 20:30) Paulo ŋma akɛ: “Nyɛkwɛa ni ahia, anyɛmimɛi, koni nyɛteŋ mɔ ko akahi tsui fɔŋ ni heee yeee ni ekpale kɛjɛ Nyɔŋmɔ hiɛkalɔ lɛ he; Nyɛkawajea nyɛtsuii.”—Heb. 3:12-15.
14 Kɛji akɛ wɔhiɛ jwɛŋmɔ ni ja lɛ mli ni wɔkai nibii fɛɛ ni Yehowa efee kɛha wɔ kɛtsɔ e-Bi Yesu Kristo nɔ kɛ nibii fɛɛ ni wɔkase ni kɔɔ eyiŋtooi kɛ shiwooi kɛ mumɔŋ niyenii ni etsɔɔ “tsulɔ anɔkwafo kɛ nilelɔ” lɛ nɔ ekɛhaa wɔ lɛ, wɔbaakwa trumui ni wɔɔfee tamɔ Israelbii ni Yehowa wie amɛhe akɛ: “Tsina le etsɛ, ni teji hu le heni enuntsɔ lɛɔ lɛ yɛ. Shi enɛ fa fe bɔni mimaŋ Israel le” lɛ.—Yes. 1:3, Good News Bible.
Mɛnɛɛmɛi Na Ohekɛnɔfɔɔ Ekoŋŋ
15. Mɛɛ gbɛ nɔ atsɔ aye ebua onukpa ko ni eye eŋwanejee loo yiŋkɔshikɔshifeemɔ nɔ?
15 Onukpa ko ni jɛ France anaigbɛ je shishi eje ŋwane ni eyiŋ fee lɛ kɔshikɔshi yɛ Nyɔŋmɔ anɔkwa asafo lɛ ni ekɛ ehe ebɔ he lɛ he, ni taakɛ ewie lɛ, mumɔŋ niyenii ni akɛhaa lɛ feɔ tamɔ niyenii kome daa nɛɛ. No hewɔ Iɛ ebi ni ejie lɛ kɛjɛ Kristofoi anitsumɔ ni ehiɛ mli akɛ onukpa lɛ nɔ. Shi kɛlɛ eweku lɛ kɛ onukpai krokomɛi lɛ ebuuu lɛ akɛ eji mɔ ni ekwa hemɔkɛyeli lɛ. Amɛkɛ suɔmɔ ye bua Iɛ kɛtsɔ sɔlemɔ kɛ sanegbaa ni tswaa mɔ maa shi hu nɔ. Fiofio lɛ, aye abua nɛkɛ nyɛminuu’nɛɛ ni ebayoo akɛ shishitsɔɔmɔ hee nyɛŋ aba yɛ be fɛɛ mli, taakɛ bɔni nyɛ̃ ko hu nyɛŋ ahoo niyenii sɔrɔtoi shii etɛ gbi kome yɛ gbii 365 ni feɔ afi muu lɛ fɛɛ mli lɛ. Nibii sɔrɔtoi ni akɛhoɔ niyenii lɛ baa yɛ gbɛi sɔrɔtoi anɔ, shi tsinebaa ni hiɛsɔɔ yɔɔ mli lɛ yeɔ buaa ni mɔ lɛ naa niyenii lɛ yeli mli ŋɔɔmɔ, etaa lɛ jogbaŋŋ ni eboteɔ emli ni enaa hewalɛ kɛjɛɔ mli. Aye abua nɛkɛ nyɛmi nɛɛ koni esusu bɔni mumɔŋ hɔmɔ ni yeɔ mɛi yɛ hei krokomɛi lɛ da ha lɛ he. Fiofio lɛ ebana hekɛnɔfɔɔ ekoŋŋ, ena ehiɛsɔɔ kɛha nibii kpakpai ni ekaseɔ kɛjɛɔ Buu Mɔɔ woji lɛ amli lɛ mli kwɔ, enine shɛ emumɔŋ hewalɛ lɛ nɔ ekoŋŋ, ni ená miishɛɛ hee yɛ Yehowa sɔɔmɔ mli. Amrɔ nɛɛ eesɔmɔ akɛ Kristofonyo onukpa.
16. Mɛni ha ŋwanejee loo yiŋkɔshikɔshifeemɔ ba France Odasefonyo oblanyo ko jwɛŋmɔ mli lɛ, ni mɛɛ gbɛ nɔ atsɔ ajaje lɛ?
16 Odasefonyo oblanyo ko ni yɔɔ France wuoyigbɛ ni hiɛ jwɛŋmɔ ko akɛ mɔ fɛɛ mɔ afee esuɔmɔnaa nii, dani ebale anɔkwale lɛ, kɛ wolo ko ni wieɔ anarchism loo mla nɔ ni ayee (“nitsɔɔmɔ akɛ nɔyelii fɛɛ kɛ amɛhe woɔ hegbɛ ni aŋkroaŋkro yɔɔ lɛ mli yɛ gbɛ ni ejaaa nɔ, no hewɔ lɛ esa akɛ aŋkroaŋkroi afee kuui ni akɛto nɔyeli lɛ najiaŋ”) ba-kpe. Ekane nɛkɛ wolo nɛɛ ni ena akɛ ena he miishɛɛ, ni ehe woji krokomɛi ni tamɔ enɛ nɔŋŋ ni be mli ni ekaneɔ enɛɛmɛi lɛ ehemɔkɛyeli lɛ bɔi fitemɔ ni eyiŋ bɔ̃i lɛ kɔshikɔshifeemɔ kɛ ŋwanejee. Kɛkɛ ni trukaa lɛ taakɛ lɛ diɛŋtsɛ ewie lɛ, “miyoo akɛ miŋmɛ gbɛ ní mumɔŋ niyenii ni ehiii akanya mitsutsu su kɛ baŋ lɛ, nɔ ni ekome ji atuatsemɔ mumɔ lɛ.” Buu-Mɔɔ lɛ mli nikasemɔi enyɔ jaje ejwɛŋmɔ: “Wala Gbɛ Lɛ —Eyɛ Leleoo Shi Hejɔlɛ yɛ Nɔ,” ni je kpo yɛ May, 1, 1978 Ga Buu-Mɔɔ lɛ mli lɛ kɛ “Bɔni Nyɔŋmɔ Maŋtsɛyeli lɛ He Aaanyɛ Aba Sɛɛnamɔ Aha Bo” ni je kpo yɛ August 1, 1978 Ga Buu-Mɔɔ lɛ mli lɛ. Ena hekɛnɔfɔɔ ekoŋŋ, ekɛ ehe wo be fɛɛ shiɛmɔ nitsumɔ lɛ mli ni amrɔ nɛɛ eesɔmɔ akɛ gbɛgbalɔ krɛdɛɛ.
Hekɛnɔfɔɔ Kɛ Miishɛɛ Baa
17, 18. Mɛni ji nɔ ni Yakobo kɛɔ yɛ ŋwanejelɔi ahe, ni mɛɛ ŋaa ewoɔ amɛ?
17 Nɔkwɛmɔnii enyɔ ni kɔɔ Kristofoi ni ŋwanejee loo yiŋkɔshikɔshifeemɔ bagba amɛnaa, shi amɛnyɛ amɛyɛ nɔ ni amɛnine shɛ miishɛɛ ni amɛyɔɔ yɛ Nyɔŋmɔ sɔɔmɔ mli lɛ nɔ ekoŋŋ lɛ ahe saji enyɔ pɛ nɛ. Eji amɛŋmɛɛ amɛhe amɛha amɛ yiŋkɔshikɔshifeemɔ kɛ ŋwanejee lɛ kulɛ ŋmɛnɛ amɛbaafee mɛi ni bɛ miishɛɛ ni amɛbɛ hiɛnɔkamɔ ko. Biblia lɛ kɛɔ akɛɛ “Ejaakɛ ŋwanejelɔ lɛ etamɔ ŋshɔke ni kɔɔyɔ tswaa kɛyaa kɛbaa.” (Yak 1:6) Hɛɛ, ŋwanejee haa gbɛ baa wɔhe. Yakobo kɛfata he akɛ ŋwanejelɔ Iɛ tamɔ “jwɛŋmɔi enyɔnyɔtsɛ ko ni fiii shi yɛ egbɛi fɛɛ mli.”—Yak. 1:8.
18 Hekɛnɔfɔɔ ni mliwa ni aaana yɛ Yehowa kɛ e-Wiemɔ lɛ kɛ egbɛjianɔtoo lɛ mli lɛ jieɔ ŋwanejee ni kumɔɔ mɔ lɛ kɛyaa kwraa ni ekɛ miishɛɛ diɛŋtsɛ baa. Enɛ ji anɔkwa nilee gbɛ lɛ. No hewɔ lɛ Yakobo kɛɛ akɛ: “Shi kɛ nilee eshwɛ nyɛteŋ mɔ ko lɛ, ekpa Nyɔŋmɔ ni haa mɛi fɛɛ faa ni ewieee mɔ ko hiɛ lɛ fai ni aaaŋɔha lɛ, shi ha ni ekpa fai yɛ hemɔkɛyeli mli, ni okaje nɔ ko nɔ ko he ŋwane.”—Yak. 1:5, 6.
19. Mɛni hewɔ esa ni wɔkwa “je nɛŋ mumɔ” lɛ, ni mɛni baaye abuɔ wɔ ni wɔmɔ “wɔhe ni wɔŋɔ-fɔɔ enɔ kɛjɛ shishijee lɛ mli?
19 Kɛji akɛ wɔŋɔ “je Iɛ mumɔ lɛ” wɔfɔ wɔnɔ lɛ, ŋwanejee ji nɔ ni baafee wɔsusumɔ lɛ fa. Shi Paulo ŋma akɛ: “Shi wɔ lɛ, jeee je nɛŋ mumɔ lɛ wɔna, shi moŋ mumɔ ni jɛ Nyɔŋmɔ mli lɛ, koni wɔle nii ni Nyɔŋmɔ eŋɔduro wɔ lɛ.” (1 Kor. 2:12) Kɛji akɛ wɔhiɛ ka “nii ni Nyɔŋmɔ eŋɔ-duro wɔ lɛ” fɛɛ nɔ, ni wɔkpɛlɛ nɔ yɛ anɔkwale mli akɛ wɔba le nɛkɛ nibii nɛɛ kɛtsɔ Biblia lɛ ni wɔkɛ Yehowa Odasefoi kase lɛ nɔ lɛ, no lɛ shi ni wɔbaada Yehowa babaoo lɛ baatsirɛ wɔ ni wɔjie ŋwanejee loo yiŋkɔshikɔshifeemɔ kɛjɛ wɔhe kwraa koni “wɔhiɛ wɔhe ni wɔŋɔfɔɔ enɔ kɛjɛ shishijee lɛ mli kpɛŋŋ kɛyashi naagbee.”—Heb. 3:14.
20. Mɛni ji hekɛnɔfɔɔ mli nyɔmɔwooi enyɔ lɛ?
20 Kɛji akɛ ‘wɔmɔ wɔhekɛnɔfɔɔ’ ni wɔyɔɔ yɛ Nyɔŋmɔ, Wiemɔ ni tɔmɔ ko bɛ mli kɛ eshikpɔŋ nɔ asafo lɛ ni yɔɔ Kristo kudɔmɔ shishi lɛ mli kpɛŋŋ’ lɛ, wɔbaana nyɔmɔwoo babaoo bianɛ kɛ agbɛnɛ yɛ wɔsɛɛ be mli. Enɛɛmɛi ateŋ ekome, ni esaaa akɛ wɔbuɔ lɛ nɔ ko flɛflɛ ji jwɛŋmɔŋ toiŋjɔlɛ. Lalatsɛ lɛ ŋma akɛ: “Mɛi ni sumɔɔ omla lɛ yɛ hejɔlɛ babaoo, ni nɔ ko nɔ ko bɛ ni woɔ amɛnajiaŋ.” (Lala 119:165; kwɛmɔ Kolosebii 3:15 hu.) Nɔ ni nyɔmɔwoo yɔɔ mli waa hu ji naanyobɔɔ kpakpa ni wɔkɛ Kristofoi anɔkwafoi ni hiɛ sɔɔ “nii ni Nyɔŋmɔ eŋɔ-duro wɔ” kɛtsɔ emumɔ lɛ, e-Wiemɔ kɛ esafo lɛ ni anaa lɛ nɔ lɛ.—Lala 1:1-3; 2 Tes. 3:6, 14; Heb. 10:24, 25.
21, 22. (a) Mɛɛ sɛɛnamɔi krokomɛi hekɛnɔfɔɔ kɛbaa? (b) Mɛni ji mɔ ni abaatao mli yɛ nikasemɔ ni nyiɛ sɛɛ lɛ mli?
21 Wɔhe ni wɔŋɔfɔ enɔ ‘kɛjɛ shishijee lɛ mli kpɛŋŋ ni wɔhiɛ’ lɛ yeɔ ebuaa wɔ ni wɔkɛ ekaa atsu Nyɔŋmɔ sɔɔmɔ nitsumɔ lɛ, ni wɔkɛ miishɛɛ abaha Yehowa kɛ wɔdiɛŋtsɛ wɔhe. (Abɛi 27:11) Miishɛɛ aloo nyamɔ ni wɔnuɔ he lɛ diɛŋtsɛ ji nyɔmɔwoo (Mat. 25:23) , shi nɔ ni fata he lɛ, eji hebuu, eji ‘mɔɔ ni wa’ kɛha wɔ. (Neh. 8:10) Miishɛɛ ni tamɔ nɛkɛ ni wɔyɔɔ yɛ Yehowa sɔɔmɔ mli lɛ haa wɔnaa jwɛŋmɔ kpakpa, nɔ ni mli tseɔ keŋkeŋ yɛ be fɛɛ mli yɛ be mli ni wɔnaa gbalɛi amlibaa lɛ. Wɔyɛ yiŋtoo yɛ shihilɛ mli. Wɔle heni wɔyaa. Wɔyɛ anunyam hiɛnɔkamɔ ko, nɔ ni ji “maŋ” aloo Mesia maŋtsɛyeli ni Abraham kɛ ehiɛ fɔ nɔ lɛ.—Heb. 11:10, 16.
22 Shi, “mumɔ lɛ kɛɔ faŋŋ akɛ, naagbee gbii lɛ anɔ lɛ mɛi komɛi aaakwa hemɔkɛyeli lɛ.” (1 Tim. 4:1) Mɛni hewɔ esa akɛ eba lɛ nɛkɛ, ni mɛni hewɔ esaaa akɛ egbaa wɔnaa tsɔ? Wɔbaasusu enɛ he yɛ nikasemɔ ni nyiɛ sɛɛ lɛ mli.
[Shishigbɛ niŋmai]
a Ajie kɛjɛ August 1, 1980 Blɔfo Buu-Mɔɔ lɛ mli.