Nyɛfea Ekãa!
“Nyɛfea ekãa ni nyɛkɛɛa akɛ: ‘Yehowa ji miyelikɛbualɔ.’”—HEBRIBII 13:6, New World Translation.
1. Mɛɛ ekaa-feemɔ mɛi ni kase Nyɔŋmɔ anɔkwale lɛ yɛ Ŋ.B. klɛŋklɛŋ afii oha lɛ mli lɛ jie lɛ kpo?
WƆ ŊMƐNƐŊMƐNƐ Beaŋ klɛŋklɛŋ afii oha lɛ mli nɛ. Mesia ni amɛ lɛ aahu lɛ eba. Etsɔɔ ekaselɔi lɛ anii jogbaŋŋ, ni eto shiɛmɔ nitsumɔ ko ni he hiaa waa shishi. Be eshɛ ni esa akɛ gbɔmɛi anu Nyɔŋmɔ Maŋtsɛyeli lɛ he sanekpakpa lɛ. No hewɔ lɛ, hii kɛ yei ni amɛkase anɔkwale lɛ kɛ ekãa jaje nakai shɛɛ sane ni ŋɔɔ lɛ.—Mateo 28:19, 20.
2. Mɛni hewɔ ekaa-feemɔ he hiaa Yehowa Odasefoi ŋmɛnɛ lɛ?
2 Atooo Maŋtsɛyeli lɛ amaaa shi yɛ nakai gbii lɛ amli. Shi Maŋtsɛ ni Ahala lɛ lɛ, Yesu Kristo, egba wɔsɛɛ be mli ni ebaaba ní anaaa lɛ yɛ Maŋtsɛyeli hewalɛ mli lɛ efɔ shi. Nɔ ni baakadi enɛ ji tawuu, hɔmɔ, tsɛŋemɔ-helai, shikpɔŋhosomɔi, kɛ sanekpakpa lɛ shiɛmɔ yɛ jeŋ muu fɛɛ ni eko bako ni tamɔ nakai da. (Mateo 24:3-14; Luka 21:10, 11) Akɛ Yehowa Odasefoi lɛ, ekãa he miihia wɔ koni wɔnyɛ wɔdamɔ shihilɛi ni tamɔ nɛkɛ kɛ yiwaa ni wɔkɛkpeɔ lɛ anaa. No hewɔ lɛ, ehe baaba sɛɛnamɔ akɛ wɔɔsusu Biblia mli saji ni kɔɔ Ŋ.B. klɛŋklɛŋ afii oha lɛ mli Maŋtsɛyeli jajelɔi ni yɔɔ ekãa lɛ ashihilɛ he saji ahe lɛ he.
Ekãa ni Wɔɔna ni Wɔkɛkase Kristo
3. Namɔ kɛ ekaa-feemɔ he nɔkwɛmɔ nɔ ni hi fe fɛɛ haa, ni mɛni awie yɛ ehe yɛ Hebribii 12:1-3?
3 Yesu Kristo kɛ ekãa he nɔkwɛmɔ nɔ ni hi fe fɛɛ haa. Yɛ be mli ni ewie Yehowa odasefoi ‘babaoo ni tamɔ atatu’ ni yɔɔ ekãa ni hi shi dani Kristofoi abe lɛ shɛ lɛ he lɛ, bɔfo Paulo gbala jwɛŋmɔ kɛtee Yesu nɔ ni ekɛɛ akɛ: “Gbii abɔ ni wɔyɔɔ odasefoi babaoo ni ebɔle wɔ tamɔ atatu nɛɛ, nyɛhaa wɔkɛ jatsu fɛɛ jatsu aŋmɛa shi, kɛ esha ni ebɔle wɔhe kpula lɛ, ni wɔkɛ tsuishitoo ada foi ni ka wɔhiɛ lɛ, ni wɔkwɛ hemɔkɛyeli shishijelɔ kɛ naagbelɔ ni ji Yesu lɛ, mɔ ni nyamɔ ni ka ehiɛ lɛ hewɔ lɛ emia ehiɛ yɛ sɛŋmɔtso lɛ he amanehulu lɛ mli, ni ebuuu hiɛgbele lɛ, ni ekɛyata shi yɛ Nyɔŋmɔ maŋtsɛsɛi lɛ ninejurɔ nɔ lɛ. No hewɔ lɛ nyɛjwɛŋa mɔ ni ŋmɛ etsui shi eha naashai ni eshafeelɔi ŋmɛ lɛ nɛɛ he, koni ekaje nyɛtsine ni nyɛsusumai lɛ anijiaŋ miije wui.”—Hebribii 12:1-3.
4. Mɛɛ gbɛ nɔ Yesu jie ekaa-feemɔ kpo beni Satan ka lɛ lɛ?
4 Beni abaptisi lɛ lɛ sɛɛ kɛ gbii 40 ni ekɛsusu nitsumɔ ni ka ehiɛ lɛ he lɛ kɛ sɔlemɔ kɛ ŋmaahilɛ yɛ ŋa lɛ nɔ lɛ sɛɛ lɛ, Yesu te shi wo Satan yɛ ekãa naa. Abonsam ka lɛ koni eha tɛi atsɔmɔ aboloo, shi Yesu efeee nakai ejaakɛ ejaaa akɛ eeefee naakpɛɛ nii koni ekɛná nɔ ni lɛ diɛŋtsɛ esumɔɔ. Yesu kɛɛ: “Aŋma akɛ, ‘Jeee aboloo kɛkɛ haa gbɔmɔ yi naa wala; shi moŋ wiemɔ fɛɛ wiemɔ ni jɛɔ [Yehowa] Nyɔŋmɔ daaŋ lɛ.’” Beni Satan tswa lɛ mpoa akɛ ehuru kɛjɛ sɔlemɔwe lɛ yiteŋ lɛ, Yesu kpoo, ejaakɛ kulɛ ebaafee esha akɛ eeeka Nyɔŋmɔ koni ehere eyiwala kɛjɛ nɔ ni tamɔ ehegbee nɛɛ mli. Kristo jaje akɛ: “Aŋma ekoŋŋ akɛ, ‘Kaaka Nuŋtsɔ [Yehowa] o-Nyɔŋmɔ lɛ!’” Agbɛnɛ Satan kɛ je lɛŋ maŋtsɛyelii lɛ fɛɛ baaha lɛ kɛ ‘eeeja lɛ fioo ko’ lɛ, shi Yesu efeŋ hemɔkɛyeli kwalɔ koni eyafi Satan mpoatswaa akɛ adesai yeŋ anɔkwa amɛhaŋ Nyɔŋmɔ yɛ kaa shishi lɛ sɛɛ. No hewɔ lɛ Yesu jaje akɛ: “Ho misɛɛ, Satan! Ejaakɛ aŋma akɛ, ‘Nuŋtsɔ [Yehowa] o-Nyɔŋmɔ lɛ oja, ni lɛ kɛkɛ osɔmɔ!’” Kɛkɛ ni Kaalɔ lɛ “shi lɛ dã.”—Mateo 4:1-11; Luka 4:13.
5. Mɛni baanyɛ aye abua wɔ ni wɔdamɔ kaa naa?
5 Yesu baa ehe shi ehaa Yehowa ni eteɔ shi ewoɔ Satan. Ni kɛ wɔ hu ‘wɔba wɔhe shi wɔha Nyɔŋmɔ ni wɔte shi wɔwɔ Abonsam’ nakai nɔŋŋ lɛ, ‘eeejo wɔnaa foi.’ (Yakobo 4:7) Taakɛ Yesu fee lɛ, wɔbaanyɛ wɔkɛ ekãa akpee kaa naa kɛ wɔkɛ Ŋmalɛi lɛ tsu nii, ni ekolɛ wɔtsɛ wiemɔi kɛjɛ mli yɛ be mli ni akaa wɔ ni wɔfee esha ko lɛ. Ani eeenyɛ eba akɛ wɔbaaŋmɛɛ wɔhe wɔha kaa ni baaha wɔju kɛ yɛ nakai be lɛ mli lɛ wɔti Nyɔŋmɔ mla: “Kaaju,” lɛ mli wɔha wɔhe lɛ? Ani eeenyɛ eba akɛ Kristofoi enyɔ ko baaŋmɛɛ amɛhe amɛha ajwamaŋbɔɔ kɛ amɛteŋ mɔ kome kɛ ekãa tsɛ wiemɔi: “Kaabɔ ajwamaŋ” lɛ yisɛɛ?—Romabii 13:8-10; 2 Mose 20:14, 15.
6. Yesu ji je lɛ nɔ kunimyelɔ ni yɔɔ ekãa yɛ mɛɛ gbɛ nɔ?
6 Akɛ Kristofoi ni je nɛɛ nyɛɛɔ amɛ lɛ, wɔbaanyɛ wɔkwa emumɔ lɛ kɛ eshafeemɔ su lɛ. Yesu kɛɛ esɛɛnyiɛlɔi lɛ akɛ: “Je lɛŋ lɛ, hejaramɔ nyɛnaa, shi kɛlɛ nyɛtsui anyɔa nyɛmli: miye je lɛ nɔ kunim.” (Yohane 16:33) Eye je lɛ nɔ kunim kɛtsɔ ehe ni efeee tamɔ je lɛ lɛ nɔ. Enɔkwɛmɔ nɔ akɛ kunimyelɔ kɛ nɔ ni jɛ emuuyeli mli ni ehiɛ lɛ mli ba lɛ baanyɛ aha wɔna ekãa ni wɔkɛkase lɛ kɛtsɔ wɔhe ni wɔɔtsi kɛaajɛ je nɛɛ he ni wɔkaha eewo wɔhe muji lɛ nɔ.—Yohane 17:16.
Ekaa ni Wɔkɛaaya nɔ Wɔshiɛ
7, 8. Mɛni baaye abua wɔ ni wɔya nɔ wɔshiɛ yɛ yiwaa fɛɛ sɛɛ?
7 Yesu kɛ ekaselɔi lɛ kɛ amɛhe fɔ Nyɔŋmɔ nɔ kɛha ekãawoo koni amɛya nɔ amɛshiɛ yɛ yiwaa fɛɛ sɛɛ. Kristo kɛ ekãa tsu esɔɔmɔ lɛ he nii yɛ yiwaa lɛ fɛɛ sɛɛ, ni yɛ afi 33 Ŋ.B. Pentekoste sɛɛ lɛ, esɛɛnyiɛlɔi ni ayaa nɔ awaa amɛyi lɛ tee nɔ amɛjaje sanekpakpa lɛ yɛ mɔdɛŋ ni Yudafoi ajamɔ mli hiɛnyiɛlɔi lɛ bɔ koni amɛha amɛkpa lɛ fɛɛ sɛɛ. (Bɔfoi lɛ Asaji 4:18-20; 5:29) Kaselɔi lɛ sɔle akɛ: “Nuŋtsɔ [Yehowa], kwɛmɔ amɛhe gbeyei ni amɛwoɔ lɛ, ni oha otsuji lɛ kɛ ekãa pii ajaje owiemɔ lɛ.” Ni mɛni ba? Sane lɛ kɛɔ akɛ: “Ni beni amɛsɔle lɛ, he ni amɛnaa ebakpe shi yɛ lɛ hoso, ni mumɔ krɔŋkrɔŋ yimɔ amɛ fɛɛ amɛmli obɔbɔ, ni amɛkɛ ekãa jaje Nyɔŋmɔ wiemɔ lɛ.”—Bɔfoi lɛ Asaji 4:24-31.
8 Akɛni ŋmɛnɛ mɛi ni fa booo sanekpakpa lɛ toi hewɔ lɛ, ekãa he hiaa yɛ bei pii amli koni aya nɔ ashiɛ atsɔɔ amɛ. Beni awaa amɛyi lɛ mli titri ekãa ni Nyɔŋmɔ kɛhaa lɛ he bahiaa Yehowa tsuji koni amɛye odase kɛmɔ shi. (Bɔfoi lɛ Asaji 2:40; 20:24) No hewɔ lɛ, Paulo ni ji Maŋtsɛyeli jajelɔ ni yɔɔ ekãa lɛ kɛɛ enaanyo nitsulɔ ni bɛ niiashikpamɔ tsɔ lɛ akɛ: “Ejaakɛ Nyɔŋmɔ haaa wɔ gbeyeishemɔ mumɔ, shi moŋ hewalɛ kɛ suɔmɔ kɛ jwɛŋmɔ ni sa mumɔ eŋɔha wɔ. No hewɔ lɛ ohiɛ akagbo yɛ wɔ-Nuŋtsɔ lɛ he odaseyeli lɛ he aloo yɛ mi ni miji egbokɛlɛfonyo lɛ he, shi moŋ okɛ sanekpakpa lɛ ahiɛ amanehulu mli yɛ Nyɔŋmɔ hewalɛ naa.” (2 Timoteo 1:7, 8) Kɛ wɔsɔle wɔbi ekãa lɛ, wɔbaanyɛ wɔya nɔ wɔshiɛ, ni yiwaa po haŋ wɔlaaje wɔmiishɛɛ akɛ Maŋtsɛyeli jajelɔi lɛ.—Mateo 5:10-12.
Ekãa Koni Wɔdamɔ Yehowa Masɛi
9, 10. (a) Mɛni klɛŋklɛŋ afii oha lɛ mli Yudafoi kɛ Jeŋmajiaŋbii lɛ fee koni amɛtsɔmɔ Kristo sɛɛnyiɛlɔi ni abaptisi amɛ? (b) Mɛni hewɔ ekaafeemɔ he hiaa dani atsɔmɔ Kristofoi lɛ?
9 Klɛŋklɛŋ afii oha lɛ mli Yudafoi kɛ Jeŋmajiaŋbii pii kɛ ekãa kpoo blema saji ni bɛ ŋmalɛi lɛ amli lɛ koni amɛbatsɔmɔ Kristo sɛɛnyiɛlɔi ni abaptisi amɛ. Yɛ Pentekoste afi 33 Ŋ.B. lɛ sɛɛ nɔŋŋ lɛ, “kaselɔi lɛ ayi bafa babaoo diɛŋtsɛ yɛ Yerusalem; ni osɔfoi lɛ tete ateŋ mɛi pii boɔ hemɔkɛyeli lɛ toi.” (Bɔfoi lɛ Asaji 6:7) Nakai Yudafoi lɛ yɛ ekãa ni amɛkɛaafolɔ jamɔ mli tsakpaai ni efimɔ amɛ lɛ amli ni amɛkpɛlɛ Yesu nɔ akɛ lɛ ji Mesia lɛ.
10 Yɛ afi 36 Ŋ.B. shishijee mli lɛ, Jeŋmajiaŋbii pii batsɔmɔ heyelilɔi. Beni Kornelio, kɛ eshiabii, kɛ Jeŋmajiaŋbii krokomɛi nu sanekpakpa lɛ he lɛ, amɛkpɛlɛ nɔ amrɔ nɔŋŋ, amɛnine shɛ mumɔ krɔŋkrɔŋ lɛ nɔ, kɛkɛ ni “abaptisi amɛ yɛ Nuŋtsɔ [Yesu Kristo] gbɛi lɛ amli.” (Bɔfoi lɛ Asaji 10:1-48) Yɛ Filipi hu lɛ, gbokɛlɛfoi akwɛlɔ Jeŋmajiaŋnyo ko kɛ eshiabii mɔ Kristojamɔ mli oya, ni “abaptisi lɛ kɛ ewe lɛ bii fɛɛ amrɔ lɛ nɔŋŋ.” (Bɔfoi lɛ Asaji 16:25-34) Ebiɔ ekãa dani anyɛ akɔ gbɛ ni tamɔ nɛkɛ, ejaakɛ Kristofoi lɛ ji kuu fioo ko ni awaa amɛyi ni bɛ gbɛi kpakpa. Nakai amɛkã he amɛji. Shi kɛji akɛ ojɔko ohe nɔ ohako Nyɔŋmɔ ni abaptisiko bo akɛ Yehowa Odasefoi lɛ ateŋ mɔ kome lɛ, ani be shɛko lolo ni okɛaatsɔ ekãa-feemɔ gbɛi ni tamɔ nɛkɛ nɔ?
Ekãa ni Afeɔ yɛ Wekui ni Mli Egbala Mli
11. Mɛɛ ekãa he nɔkwɛmɔ nɔ fɛfɛo Eunike kɛ Timoteo kɛha?
11 Eunike kɛ ebinuu Timoteo to hemɔkɛyeli kɛ ekãa he okadi kpakpa amɛfɔ shi yɛ weku ni jamɔ egbala mli lɛ mli. Eyɛ mli akɛ Eunike ‘yɛ wu ni ji wɔŋjalɔ moŋ, shi etsɔɔ ebinuu lɛ “ŋmalɛi krɔŋkrɔŋi lɛ” kɛjɛ egbekɛbiiashi (2 Timoteo 3:14-17) Beni yoo nɛɛ batsɔ Kristofonyo lɛ, ‘ejie hemɔkɛyeli ni apasa bɛ mli’ kpo. (2 Timoteo 1:5) Agbɛnɛ hu ena ekãa ni aaaha ni ekɛ Kristofoi atsɔɔmɔ atsɔɔ Timoteo yɛ be mli ni ejieɔ bulɛ kpo etsɔɔ ewu ni heee yeee lɛ yitsoyeli lɛ. Yɛ anɔkwale mli lɛ, awo ehemɔkɛyeli kɛ ekãa-feemɔ lɛ he nyɔmɔ beni ahala ebinuu ni etsɔɔ lɛ nii jogbaŋŋ lɛ akɛ efata Paulo he yɛ emaŋsɛɛ sanekpakpa shiɛmɔ gbɛfaai lɛ amli lɛ. Kwɛ bɔ ni enɛ baanyɛ awo fɔlɔi Kristofoi ni naa amɛhe yɛ shihilɛi ni tamɔ nɛkɛ mli lɛ hewalɛ aha!
12. Mɛɛ gbɔmɔ nɛkɛ Timoteo batsɔ, ni namɛi jieɔ amɛhe kpo akɛ amɛtamɔ lɛ ŋmɛnɛ?
12 Eyɛ mli akɛ Timoteo hi shia ni jamɔ egbala mli lɛ mli moŋ, shi ekɛ ekãa kpɛlɛ Kristojamɔ nɔ, ni ebatsɔ mumɔŋ gbɔmɔ, mɔ ni Paulo baanyɛ awie yɛ ehe akɛ: “Mihiɛ ka nɔ yɛ Nuŋtsɔ Yesu mli, akɛ etsɛŋ ni matsu Timoteo nyɛŋɔɔ [Filipibii lɛ], koni kɛji minu bɔ ni nyɛyɔɔ lɛ, ni mi hu mitsui anyɔ mimli. Ejaakɛ mibɛ mɔ ko ni ejwɛŋmɔ kɛ mijwɛŋmɔ yeɔ egbɔ ni nyɛhe sane dɔɔ lɛ krɔŋŋ tamɔ lɛ. . . . Shi nyɛle etɛ naa, akɛ ekɛ mi sɔmɔɔ yɛ sanekpakpa lɛ hewɔ tamɔ bi kɛ etsɛ.” (Filipibii 2:19-22) Ŋmɛnɛ, gbekɛbii hii kɛ yei pii yɛ shiai ni jamɔ egbala mli lɛ amli ni kɛ ekãa mɔɔ anɔkwa Kristojamɔ mli. Taakɛ Timoteo ji lɛ, ale amɛtɛ naa, ni kwɛ bɔ ni wɔmli filiɔ wɔ haa akɛ amɛji Yehowa gbɛjianɔtoo lɛ fa!
Ekãa ni Haa ‘Wɔkɛ Wɔhe Woɔ Gbele Mli’
13. Akwila kɛ Priska jie ekaa-feemɔ kpo yɛ mɛɛ gbɛ nɔ?
13 Akwila kɛ eŋa Priska to okadi amɛfɔ shi kɛtsɔ ekãa naa ni ‘amɛkɛ amɛhe wo gbele mli’ yɛ amɛnaanyo heyelilɔ hewɔ lɛ nɔ. Amɛhere Paulo kɛba amɛshia, amɛkɛ lɛ tsu nii yɛ buufeemɔ mli, ni amɛye amɛbua lɛ ni eto asafo hee yɛ Korinto. (Bɔfoi lɛ Asaji 18:1-4) Amɛkɛ amɛwala po wo oshara mli yɛ ehewɔ yɛ afii 15 ni amɛkɛ lɛ hi shi lɛ mli yɛ gbɛ ni atsɔɔɔ nɔ. Roma amɛyɔɔ yɛ be mli ni ekɛɛ Kristofoi ni yɔɔ jɛmɛ lɛ akɛ: “Nyɛŋaa Priska kɛ Akwila, ni ji minanemɛi nitsulɔi yɛ Kristo Yesu mli lɛ nyɛhaa mi, mɛi ni kɛ amɛhe wo gbele mli yɛ miyiwala hewɔ, ni jeee mi kɛkɛ midaa amɛ shi, shi moŋ jeŋmaji lɛ amli asafoi lɛ fɛɛ hu daa amɛ shi lɛ.”—Romabii 16:3, 4.
14. Mɛɛ kita Akwila kɛ Priska kɛtsuɔ nii yɛ be mli ni amɛkɛ amɛwala wo oshara mli yɛ Paulo hewɔ lɛ?
14 Akɛni Akwila kɛ Priska kɛ amɛhe wo gbele mli amɛha Paulo hewɔ lɛ, amɛfee amɛnii yɛ Yesu wiemɔi nɛɛ kɛ gbeekpamɔ naa: “Kita hee miŋɔhaa nyɛ, akɛ nyɛsumɔ nyɛhe; taakɛ bɔ ni misumɔ nyɛ lɛ, nakai nyɛ hu nyɛsumɔa nyɛhe.” (Yohane 13:34) Kita “hee” nɛ, ejaakɛ etekeɔ Mose Mla ni biɔ ni mɔ ko asumɔ enaanyo tamɔ lɛ diɛŋtsɛ ehe lɛ. (3 Mose 19:18) Ebiɔ suɔmɔ ni haa akɛ he shãa afɔle, ni baaya shɔŋŋ bɔ ni aaaha mɔ lɛ kɛ ewala afɔ shi aha mɛi krokomɛi taakɛ Yesu fee lɛ. Niŋmalɔ, Tertullian, ni hi shi yɛ Ŋ.B. afii ohai enyɔ kɛ afii ohai etɛ lɛ mli lɛ tsɛ je lɛŋ bii awiemɔi ni kɔɔ Kristofoi ahe lɛ sɛɛ beni eŋma akɛ: “‘Nyɛkwɛa,’ je lɛŋ bii lɛ kɛɛ, ‘nyɛkwɛa bɔ ni Kristofoi lɛ sumɔɔ amɛhe ha . . . kɛ bɔ ni amɛfee klalo akɛ amɛaagboi po amɛha amɛhe.’” (Apology, yitso XXXIX, 7) Eba akɛ wɔɔnu he yɛ yiwaa be mli titri akɛ gbɛnaa nii ka wɔnɔ akɛ wɔjie nyɛmimɛi asuɔmɔ kpo kɛtsɔ wɔhe ni wɔkɛaawo oshara loo gbele mli yɛ ekãa naa, koni wɔkajie wɔnanemɛi heyelilɔi lɛ ashi kɛmiiba niseniianifeemɔ loo gbele yɛ henyɛlɔi adɛŋ lɛ nɔ.—1 Yohane 3:16.
Ekãa-Feemɔ Kɛ Miishɛɛ Baa
15, 16. Taakɛ atsɔɔ yɛ Bɔfoi lɛ Asaji yitso 16 lɛ, mɛɛ gbɛ nɔ abaatsɔ ni akɛ ekãa kɛ miishɛɛ atsa yɛ?
15 Paulo kɛ Sila kɛ odaseyeli ha akɛ ekaa ni ajieɔ lɛ kpo yɛ kaai amli kɛ miishɛɛ baa. Yɛ Filipi maŋ lɛ mli kojolɔi afamɔ naa lɛ, akɛ kpãai yi amɛ ni abɔ amɛnaji apã. Ni kɛlɛ amɛhe kpokpooo kɛ gbeyeishemɔ. Yɛ amɛ shihilɛi ni mli wawai lɛ fɛɛ sɛɛ lɛ, amɛyɛ ekãa ni Nyɔŋmɔ kɛha amɛ kɛ miishɛɛ ni enɛ kɛbahaa anɔkwa Kristofoi lɛ eko.
16 Aaafee nyɔɔŋ teŋ lɛ, Paulo kɛ Sila miisɔle ni amɛkɛ lalai miijie Nyɔŋmɔ yi. Trukaa pɛ kɛkɛ ni shikpɔŋ hoso gbokɛlɛfoi atsu lɛ, ni kpãai ni akɛfimɔ amɛ lɛ kpɔlɔke, ni shinaai lɛ fɛɛ gbelegbelei. Akɛ ekãa ye gbokɛlɛfoi akwɛlɔ ni tsui efa lɛ kɛ eweku lɛ odase ni enɛ ha abaptisi amɛ akɛ Yehowa tsuji. Ni “emli fili lɛ kɛ ewe lɛ fɛɛ akɛ ehe Nyɔŋmɔ eye.” (Bɔfoi lɛ Asaji 16:6-34) Kwɛ miishɛɛ ni Paulo kɛ Sila baanyɛ ana yɛ enɛ hewɔ! Yɛ be mli ni wɔsusu enɛ kɛ Ŋmalɛi lɛ amli nɔkwɛmɔ nii krokomɛi ni kɔɔ ekaa-feemɔ he lɛ, mɛɛ gbɛ nɔ wɔɔtsɔ wɔhi shi akɛ Yehowa tsuji ni yɔɔ ekãa?
Yaa nɔ Ofee Ekãa
17. Taakɛ atsɔɔ yɛ Lala 27 lɛ, Yehowa gbɛ ni akwɛɔ lɛ kɔɔ ekaa-feemɔ he yɛ mɛɛ gbɛ nɔ?
17 Yehowa gbɛ ni wɔɔkwɛ lɛ baaye ebua wɔ ni wɔhi shi akɛ mɛi ni yɔɔ ekãa. David la akɛ: “Kwɛmɔ Yehowa gbɛ! Wajemɔ ohe [feemɔ ekaa] ni ona tsui, ni okwɛ Yehowa gbɛ.” (Lala 27:14) Lala 27 tsɔɔ akɛ David kɛ ehiɛ fɔ Yehowa nɔ akɛ ewala “hewalɛ.” (Kuku 1) Na ni David na bɔ ni Nyɔŋmɔ kɛ ehenyɛlɔi lɛ ye ha yɛ bei ni eho lɛ amli lɛ ha ena ekãa. (Kukuji 2, 3) Nɔ kroko ni fata he ji hiɛsɔɔ kɛha Yehowa jamɔ he lɛ. (Kuku 4) Ehe ni ekɛfɔ Yehowa yelikɛbuamɔ, hebuu, kɛ yiwalaheremɔ nɔ lɛ hu tswa David ekãa-feemɔ ema shi. (Kukuji 5-10) Nɔ ni ye bua hu ji Yehowa jalɛ gbɛi lɛ ahe shishitoo mlai ni atee nɔ atsɔɔ lɛ nii yɛ mli lɛ. (Kuku 11) Sɔlemɔ ni afeɔ yɛ hekɛnɔfɔɔ mli kɛha jiemɔ kɛmiijɛ ehenyɛlɔi adɛŋ, kɛ hemɔkɛyeli kɛ hiɛnɔkamɔ ye bua David ni efee ekãa. (Kukuji 12-14) Wɔ hu wɔbaanyɛ wɔtswa wɔ ekãa-feemɔ lɛ wɔma shi yɛ gbɛi ni tamɔ nakai nɔŋŋ nɔ, ni wɔkɛtsɔɔ akɛ, ‘wɔkwɛɔ Yehowa gbɛ’ diɛŋtsɛ.
18. (a) Mɛni tsɔɔ akɛ nanemɛi Yehowa jalɔi ni akɛ amɛ bɔɔ daa lɛ baanyɛ aye abua wɔ ni wɔhi shi akɛ mɛi ni yɔɔ ekãa? (b) Mɛni Kristofoi akpeei tsuɔ yɛ ekãa ni atswaa amaa shi lɛ mli?
18 Nanemɛi Yehowa jalɔi ni wɔkɛ amɛ aaabɔ daa lɛ baaye abua wɔ ni wɔhi shi akɛ mɛi ni yɔɔ ekãa. Beni Paulo kɛ esane lɛ yafɔ Kaisare hiɛ ni eefa gbɛ kɛmiiya Roma lɛ, nanemɛi heyelilɔi kɛ lɛ kpe yɛ Apiiforo kɛ Tretaberna Jarawoo He lɛ. Sane lɛ tee nɔ akɛ, “ni beni Paulo na amɛ lɛ, eda Nyɔŋmɔ shi ni ena tsui [ekãa].” (Bɔfoi lɛ Asaji 28:15) Yɛ be mli ni wɔyaa Kristofoi akpeei daa lɛ, belɛ wɔmiibo Paulo ŋaawoo: “Nyɛhaa wɔyɔseyɔsea wɔhe, koni wɔhiɛ adɔ suɔmɔ kɛ nitsumɔi kpakpai ahe, ni wɔkakwa wɔhe naabuamɔ, taakɛ bɔ ni mɛi komɛi fɔɔ feemɔ lɛ, shi moŋ wɔwowoo wɔhe ŋaa [ekãa], ni titri lɛ akɛni nyɛnaa akɛ gbi lɛ miibɛŋkɛ nɛɛ” lɛ toi. (Hebribii 10: 24, 25) Akɛ wɔwowoo wɔhe ŋaa loo hewalɛ [ekãa] lɛ tsɔɔ mɛni? Akɛ awo hewalɛ loo ekãa lɛ tsɔɔ “kanyamɔ kɛ hewalɛ loo ekãa, mumɔ, loo hiɛnɔkamɔ.” (Webster’s Ninth New Collegiate Dictionary) Wɔbaanyɛ wɔfee babaoo ni wɔkɛ ekãa loo hewalɛ akanya Kristofoi krokomɛi, ni amɛkanyamɔ lɛ hu baanyɛ atswa nɛkɛ su nɛɛ awo wɔmli.
19. Ŋmalɛi lɛ kɛ Kristofoi awoji kɔɔ ekãa ni wɔɔya nɔ wɔfee lɛ he yɛ mɛɛ gbɛ nɔ?
19 Kɛ wɔɔhi shi akɛ mɛi ni feɔ ekãa lɛ, belɛ ebaabi ni wɔkase Nyɔŋmɔ Wiemɔ lɛ daa, ni wɔkɛ emli ŋaawoo lɛ atsu nii yɛ wɔshihilɛ mli. (5 Mose 31:9-12; Yoshua 1:8) Esa akɛ Kristofoi awoji ni damɔ Ŋmalɛi lɛ anɔ lɛ afata wɔ daa nikasemɔ lɛ he, ejaakɛ ŋaawoo kpakpa ni yɔɔ mli lɛ baaye abua wɔ ni wɔnyɛ wɔkɛ ekãa ni Nyɔŋmɔ kɛhaa lɛ adamɔ wɔhemɔkɛyeli he kaai lɛ anaa. Wɔna bɔ ni Yehowa tsuji fee ekãa yɛ shihilɛi sɔrɔtoi amli lɛ yɛ Biblia mli saji amli. Amrɔ nɛɛ, ekolɛ wɔleŋ bɔ ní saji ni tamɔ nɛkɛ aaaye abua wɔ, shi Nyɔŋmɔ Wiemɔ lɛ yɛ hewalɛ, ni nɔ ni wɔkaseɔ kɛjɛɔ mli lɛ he baaba sɛɛnamɔ aha wɔ yɛ be fɛɛ mli. (Hebribii 4:12) Akɛ nɔkwɛmɔ nɔ lɛ, kɛ gbɔmɔ he gbeyeishemɔ aaaje shishi ana wɔsɔɔmɔ nitsumɔ lɛ nɔ hewalɛ lɛ, ekolɛ wɔbaakai bɔ ni Henok na ekãa ni ekɛjaje Nyɔŋmɔ shɛɛ sane lɛ etsɔɔ jeŋ ni leee Nyɔŋmɔ lɛ.—Yuda 14, 15.
20. Mɛni hewɔ abaanyɛ akɛɛ akɛ, kɛ wɔɔhi shi akɛ Yehowa tsuji ni yɔɔ ekãa lɛ belɛ sɔlemɔ he miihia lɛ?
20 Kɛ wɔɔhi shi akɛ Yehowa tsuji ni yɔɔ ekãa lɛ, belɛ ebaabi ni wɔhiɛ sɔlemɔ mli daa. (Romabii 12:12) Yesu kɛ ekãa ŋmɛ etsui shi yɛ ekaai lɛ amli, ejaakɛ “eŋɔ sɔlemɔi kɛ faikpamɔi ni bolɔmɔ ni naa wa kɛ yaafonui fata he esha afɔle eha Mɔ ni yɔɔ hewalɛ ni ekɛaahere lɛ kɛaajɛ gbele mli lɛ, ni abo lɛ toi hu, ejaakɛ ebuɔ Nyɔŋmɔ.” (Hebribii 5:7) Kɛ wɔkɛ wɔhe kpɛtɛ Nyɔŋmɔ he yɛ sɔlemɔ mli lɛ, wɔfeŋ tamɔ je lɛŋ bii ni tsui faa ni nɔ ni baaba amɛnɔ ji “gbele ni ji enyɔ” ni gbohiiashitee ko bɛ mli lɛ. (Kpojiemɔ 21:8) Ŋwɛi hebuu kɛ wala yɛ Nyɔŋmɔ jeŋ hee lɛ mli lɛ yɛ kɛha etsuji ni feɔ ekãa lɛ.
21. Mɛni hewɔ Yehowa Odasefoi anɔkwafoi baanyɛ afee mɛi ni yɔɔ ekaa lɛ?
21 Akɛ Yehowa Odasefoi anɔkwafoi lɛ, ehe ehiaaa ni wɔshe henyɛlɔi ni ji daimonioi kɛ adesai lɛ agbeyei, ejaakɛ wɔyɛ Nyɔŋmɔ sɛɛfimɔ kɛ Yesu ekaa-feemɔ he nɔkwɛmɔ nɔ akɛ mɔ ni yeɔ je lɛ nɔ kunim lɛ. Yehowa webii ni akɛ amɛ bɔɔ yɛ mumɔŋ ni tswaa mɔ maa shi lɛ hu yeɔ ebuaa ni wɔfeɔ ekãa. Atswaa wɔ ekãafeemɔ lɛ hu amaa shi kɛtsɔɔ Ŋmalɛi lɛ kɛ Kristofoi awoji lɛ amli gbɛtsɔɔmɔi kɛ ŋaawoo nɔ. Ni Biblia mli saji ni kɔɔ Yehowa tsuji ni hi shi yɛ blema lɛ ahe lɛ hu yeɔ ebuaa wɔ ni wɔkɛ ekãa nyiɛɔ egbɛi lɛ anɔ. No hewɔ lɛ, nyɛhaa wɔkɛ ekãa ayaa wɔhiɛ yɛ sɔɔmɔ krɔŋkrɔŋ mli, yɛ naagbee gbii ni ji jaramɔ bei nɛɛ amli. Hɛɛ, nyɛhaa Yehowa webii fɛɛ afea ekãa!
Te Obaaha Hetoo Tɛŋŋ?
◻ Yesu nɔkwɛmɔ nɔ lɛ baanyɛ awo wɔ ekaa yɛ mɛɛ gbɛ nɔ?
◻ Mɛni wo Yesu kɛ ekaselɔi lɛ ekãa ni amɛtee nɔ amɛshiɛ lɛ?
◻ Mɛni hewɔ ekaa-feemɔ he hia Yudafoi kɛ Jeŋmajiaŋbii fɛɛ dani amɛdamɔ Yehowa afa lɛ?
◻ Mɛɛ ekaafeemɔ he nɔkwɛmɔ nii Eunike kɛ Timoteo kɛha?
◻ Mɛɛ odaseyeli yɔɔ ni tsɔɔ akɛ ekaafeemɔ kɛ miishɛɛ baa yɛ yiwaa mli po?
[Mfoniri ni yɔɔ baafa 18]
Taakɛ Yesu ji lɛ, wɔbaanyɛ wɔdamɔ kaa naa kɛ wɔkɛ Ŋmalɛi lɛ tsu nii yɛ wɔshihilɛ mli ni wɔtsɛ wiemɔi kɛjɛ mli