Wolo Ni Ji Enyɔ Ni Akɛmaje Timoteo
1 Paulo, Kristo Yesu bɔfo yɛ Nyɔŋmɔ suɔmɔ naa, kɛ agbɛnɛ hu yɛ wala ni tsɔɔ Kristo Yesu nɔ kɛbaa lɛ he shiwoo lɛ naa lɛ,+ 2 kɛ wolo nɛɛ miimaje Timoteo, bi ni asumɔɔ:+
Dromɔ kɛ mɔbɔnalɛ kɛ toiŋjɔlɛ ni jɛ Nyɔŋmɔ, ni ji Tsɛ lɛ, kɛ Kristo Yesu, wɔ-Nuŋtsɔ lɛ dɛŋ ahã bo.
3 Miida Nyɔŋmɔ, mɔ ni mikɛ sɔɔmɔ krɔŋŋ hãa tamɔ bɔ ni mitsɛmɛi lɛ fee lɛ shi, ni mifeɔ nakai kɛ henilee ni he tse, ni mikpaaa bo kaimɔ yɛ fai ni mikɛ hiɛdɔɔ kpaa jenamɔ kɛ jetsɛremɔ lɛ mli. 4 Kɛ́ mikai oyaafonui lɛ, mishweɔ akɛ mana bo, koni mayi obɔ kɛ miishɛɛ. 5 Ejaakɛ mikaiɔ ohemɔkɛyeli ni osato bɛ mli,+ ni yɔɔ onaa Loise kɛ omami Eunike mli klɛŋklɛŋ, ni miyɔɔ nɔmimaa akɛ eyɛ bo hu omli lɛ.
6 Enɛ hewɔ lɛ, miikai bo ni oya nɔ okɛ Nyɔŋmɔ nikeenii ni yɔɔ omli ni oná be ni mikɛ miniji ŋmɛlɛ onɔ lɛ atsu nii kɛ hiɛdɔɔ, tamɔ bɔ ni ataa la mli koni etso waa lɛ.+ 7 Ejaakɛ Nyɔŋmɔ hãaa wɔ gbeyeishemɔ mumɔ,+ shi moŋ ehã wɔ hewalɛ+ kɛ suɔmɔ kɛ hiɛshikamɔ mumɔ. 8 No hewɔ lɛ, ohiɛ akagbo yɛ wɔ-Nuŋtsɔ lɛ he odaseyeli lɛ he+ aloo yɛ mi ni awo mi tsuŋ yɛ ehewɔ lɛ he, shi moŋ naa sane kpakpa lɛ he amanehulu lɛ eko+ yɛ Nyɔŋmɔ hewalɛ naa.+ 9 Ehere wɔyiwala, ni ekɛ tsɛmɔ krɔŋkrɔŋ tsɛ wɔ,+ jeee wɔnitsumɔi ahewɔ, shi moŋ, yɛ lɛ diɛŋtsɛ eyiŋtoo kɛ edromɔ lɛ hewɔ.+ Akɛ enɛ hã wɔ yɛ Kristo Yesu mli yɛ blema tɔ̃ɔ, 10 shi amrɔ nɛɛ, atsɔ wɔ-Yiwalaherelɔ Kristo Yesu kpojiemɔ lɛ nɔ ajie no kpo faŋŋ;+ lɛ efo gbele sɛɛ+ ni etsɔ sane kpakpa+ lɛ nɔ ehã la kpɛ yɛ wala+ kɛ nɔ ni fiteee+ nɔ, 11 nɔ hewɔ ni awó mi shiɛlɔ kɛ bɔfo kɛ tsɔɔlɔ lɛ.+
12 Enɛ hewɔ nɔŋŋ minaa amanehului nɛɛ,+ shi mihiɛ gbooo.+ Ejaakɛ mile mɔ ni mihe enɔ miye lɛ, ni miyɛ nɔmimaa akɛ ebaanyɛ ebu nɔ ni mikɛwo edɛŋ lɛ he kɛyashi nakai gbi lɛ nɔ.+ 13 Yaa nɔ onyiɛ wiemɔi ni hãa mɔ náa hewalɛ*+ ni onu kɛjɛ minaa lɛ he nɔkwɛmɔnɔ lɛ sɛɛ yɛ hemɔkɛyeli kɛ suɔmɔ ni jɛɔ ekome ni akɛ Kristo Yesu efee lɛ mli kɛbaa lɛ mli. 14 Tsɔ mumɔ krɔŋkrɔŋ ni hiɔ wɔmli+ lɛ nɔ obu nɔ kpakpa ni akɛwo odɛŋ nɛɛ he.
15 Ole enɛ akɛ mɛi fɛɛ ni yɔɔ Asia kpokpaa lɛ nɔ+ lɛ ekpa yɛ misɛɛ, ni amɛteŋ mɛi komɛi ji Figelo kɛ Hermogene. 16 Nuŋtsɔ lɛ ana Onesiforo shĩabii lɛ mɔbɔ,+ ejaakɛ ebaa miŋɔɔ kpitiokpitio ni ebahãa mihe jɔɔ mi, ni ehiɛ gbooo yɛ tsein ni awo mi lɛ hewɔ. 17 Shi be ni eba Roma lɛ, etao mi jogbaŋŋ ni ena mi. 18 Nuŋtsɔ lɛ ahã ená Yehowa* dɛŋ mɔbɔnalɛ yɛ nakai gbi lɛ nɔ. Ni ole sɔɔmɔ ni esɔmɔ yɛ Efeso lɛ fɛɛ jogbaŋŋ.