Jiemɔ Yehowa Yi Daa
1 Nifeemɔi fioo komɛi yɛ ni bɔ ni amɛhe hiaa waa ha hewɔ lɛ, esa akɛ wɔgbala wɔjwɛŋmɔ kɛya nɔ daa. Nɔ ni wɔkɛfataa he ji niyeli, mumɔ, kɛ wɔɔ. Enɛɛmɛi ahe miihia kɛ wɔɔhi gbɔmɔtsoŋ hewalɛ mli. Bɔfo Paulo kɛ sanekpakpa lɛ shiɛmɔ wo shihilɛ ni tamɔ nɛkɛ mli beni ewo hewalɛ akɛ: “Nyɛhaa . . . wɔkɛ yijiemɔ afɔle abahaa Nyɔŋmɔ daa” lɛ. (Heb. 13:15) No hewɔ lɛ, esa akɛ wɔgbala wɔjwɛŋmɔ kɛya Yehowa yijiemɔ nɔ daa. Eji nɔ ko ni esa akɛ wɔbɔ mɔdɛŋ wɔfee daa gbi, ni wɔjie wɔŋwɛi Tsɛ lɛ yi be fɛɛ be.
2 Beni mɛi krokomɛi bɔ mɔdɛŋ akɛ amɛaagbala Yesu jwɛŋmɔ kɛya nɔ kroko nɔ lɛ, eha hetoo akɛ: “Esa akɛ miyajajeɔ Nyɔŋmɔ maŋtsɛyeli lɛ he sanekpakpa lɛ.” (Luka 4:43) Nɔ ni efee, daa gbi, yɛ esɔɔmɔ nitsumɔ ni he afii etɛ kɛ fa lɛ mli lɛ kɔɔ anunyam ni ekɛhaa Nyɔŋmɔ lɛ he tɛ̃ɛ yɛ gbɛ ko nɔ. Wɔle akɛ Paulo nu he nakai, yɛ jwɛŋmɔ ni ejie lɛ kpo yɛ 1 Korintobii 9:16 lɛ hewɔ: “Kɛji mijajeee sanekpakpa lɛ, kpoo ha mi!” Awoɔ Kristofoi anɔkwafoi krokomɛi ahewalɛ ni amɛfee klalo be fɛɛ be, koni amɛfã amɛ hiɛnɔkamɔ lɛ he yɛ mɛi ahiɛ. (1 Pet. 3:15) Ŋmɛnɛ, gbɛgbalɔi akpei ohai abɔ kɛ asafoŋ shiɛlɔi akpekpei abɔ ni yɔɔ ekãa bɔɔ mɔdɛŋ ni amɛnyiɛ nɔkwɛmɔ nii kpakpai ni tamɔ nɛkɛ sɛɛ.
3 Kɛ wɔsusu ekãa ni jɛ tsuiŋ fɛɛ ni Yesu Kristo, wɔ Nɔkwɛmɔ Nɔ lɛ jie lɛ kpo lɛ he lɛ, ekanyaa wɔ ni wɔnyiɛ enanemaa hei lɛ asɛɛ pɛpɛɛpɛ. (1 Pet. 2:21) Ekolɛ wɔnijiaŋ baaje wui yɛ bei komɛi amli, yɛ be mli ni esa akɛ wɔkɛ daa gbi shihilɛ mli naagbai akpe lɛ. Mɛɛ gbɛ nɔ wɔɔtsɔ ni wɔkɛ hegbɛi ni baa daa gbi lɛ atsu nii ni wɔkɛjie Yehowa yi, beni wɔyɔɔ nitsumɔ ni heɔ wɔbe fɛɛ lɛ? Asaŋ wɔnyɛŋ wɔku wɔhiɛ wɔshwie weku mli gbɛnaa nii ni biɔ wɔbe babaoo lɛ nɔ. Obalahii kɛ obalayei bibii pii yɛ ni daa gbi skulyaa ni he hiaa lɛ ehe amɛbe. Ekolɛ mɛi komɛi baanu he akɛ anyɛŋ ajie Yehowa yi yɛ faŋŋ daa. Yɛ bei komɛi amli lɛ, mɛi komɛi haa nyɔŋ muu fɛɛ hoɔ ni amɛkɛ amɛhe wooo sanekpakpa lɛ shiɛmɔ mli yɛ gbɛ ko kwraa nɔ.
4 Yeremia ji mɔ ko ni nyɛɛɛ atsi ehe naa. Beni enyɛɛɛ ewie Yehowa gbɛi lɛ he yɛ be fioo ko mli lɛ, enu he akɛ nɔ ko tamɔ la miitso yɛ emli ni enyɛɛɛ naa edamɔ. (Yer. 20:9) Kɛ ekɛ nɔ ni tamɔ haomɔ ni miiye enɔ po miikpe lɛ, Yeremia naa gbɛ ko kɛ̃ etsɔɔ nɔ ewieɔ Yehowa shɛɛ sane lɛ etsɔɔ mɛi krokomɛi daa. Ani wɔbaanyɛ wɔkase enɔkwɛmɔ nɔ ni ji ekãafeemɔ lɛ ni wɔka he wɔtao hegbɛi ni wɔkɛaajie wɔ-Bɔlɔ lɛ yi daa gbi?
5 Esaaa akɛ Yehowa ni wɔwieɔ ehe lɛ feɔ be ni aje gbɛ atsɔ hiɛ ato he gbɛjianɔ aha odaseyeli ni akɛ shiɛlɔi krokomɛi ni yɔɔ asafo lɛ shikpɔŋkuku mli lɛ pɛ aaatsu he nii. Nɔ ni he hiaa wɔ pɛ ji mɔ ni baabo wɔ toi. Wɔkɛ gbɔmɛi kpeɔ be fɛɛ be daa gbi—amɛbaa wɔshia, wɔkɛ amɛ tsuɔ nii, wɔkɛ amɛ kpeɔ yɛ jara nɔ kɛ shwapoi amli aloo wɔkɛ amɛ taa bɔs mli. Nɔ ni he hiaa pɛ ji naanyobɔɔ kɛ sanebimɔ ni kanyaa jwɛŋmɔ loo wiemɔ ko ni baatee sanegbaa shi. Mɛi pii ena akɛ enɛ efee amɛ odaseyeli gbɛ ni woɔ yibii babaoo. Kɛ wɔnaa hegbɛi pii ni wɔkɛaawie sanekpakpa lɛ he wɔtsɔɔ mɛi krokomɛi lɛ, enyɛŋ eba akɛ wɔɔha nyɔŋ muu fɛɛ aho ni wɔyeee Maŋtsɛyeli lɛ he odase.
6 Hegbɛ ni wɔkɛaajie Yehowa yi lɛ sɛɛ efoŋ kɔkɔɔkɔ. Taakɛ lalatsɛ lɛ tsɔɔ lɛ, esa akɛ nɔ fɛɛ nɔ ni muɔ ajie Yehowa yi, ni wɔmiisumɔ ni wɔfata he diɛŋtsɛ. (Lala 150:6) Kɛ wɔtsui tsirɛɔ wɔ ni wɔfee nakai be fɛɛ be lɛ, wɔbaaŋɔ hegbɛi ni baa daa gbi lɛ, ni wɔkɛwie Yehowa kɛ e-Wiemɔ lɛ he.