Ani Okaiɔ?

Ani ona akɛ Buu-Mɔɔ sɔrɔtoi ni je kpo nyɛsɛɛ nɛɛ he yɛ sɛɛnamɔ kɛha bo? Kɛji nakai ni lɛ, mɛni hewɔ okɛ sanebimɔi ni nyiɛ sɛɛ nɛɛ ekaaa ojwɛŋmɔ okwɛɛɛ?

◻ Mɛɛ sɔrɔtofeemɔ yɔɔ “Nuntsɔ lɛ gbi lɛ” kɛ “Yehowa gbi lɛ” mli? (Kpojiemɔ 1:10; Yoel 2:11)

Nɔ ni fataa “Nuntsɔ lɛ gbi lɛ” he ji ninaai 16 ni atsɔɔ mli yɛ Kpojiemɔ yitsei 1 kɛyashi 22 lɛ mlibaa he, kɛ nibii titri ni Yesu gba fɔ̃ shi akɛ amɛbaaba akɛ hetoo kɛha ekaselɔi lɛ asanebimɔ ni kɔɔ ba ni eba lɛ he okadi lɛ. Kɛ Nuntsɔ lɛ gbi lɛ ba naagbee kwraa lɛ, Yehowa gbi ni yɔɔ gbeyei lɛ baafɛ yɛ be mli ni ekojoɔ Satan jeŋ ni ekpɔtɔ nɛɛ lɛ. (Mateo 24:3-14; Luka 21:11)—12/15, baafa 11.

◻ Mɛɛ nibii komɛi ni sa kadimɔ waa yɔɔ Makarios Biblia lɛ mli?

Gbɛi Yehowa lɛ jeɔ kpo fe shii 3,500 yɛ Makarios Biblia lɛ mli. Russia jamɔ he nikaselɔ ko kɛɛ: “Eshishitsɔɔmɔ [lɛ] kɛ Hebri ŋmalɛ yaa, ni eshishitsɔɔmɔ lɛ mli wiemɔi lɛ yɛ krɔŋŋ ni ekɔɔ sane lɛ he.”—12/15, baafa 27.

◻ Mɛni ji “anɔkwale lɛ” ni Yesu kɛɛ ebaaha wɔye wɔhe lɛ? (Yohane 8:32)

Kɛ Yesu kɛɛ “anɔkwale lɛ,” nɔ ni etsɔɔ ji ŋwɛi shɛɛ sane ni jɛ mumɔŋ lɛ—titri lɛ, saji ni kɔɔ Nyɔŋmɔ suɔmɔnaa nifeemɔi ahe—ni abaa yi yɛ Biblia lɛ mli lɛ.—1/1, baafa 3.

◻ Namɛi ji ŋmɛnɛŋmɛnɛ beaŋ Yehu kɛ Yehonadab lɛ?

Yehu feɔ Yesu Kristo, mɔ ni “Nyɔŋmɔ Israel lɛ” ni ji Kristofoi ni afɔ amɛ mu lɛ damɔɔ enajiaŋ yɛ shikpɔŋ nɔ lɛ he mfoniri. (Galatabii 6:16; Kpojiemɔ 12:17) Taakɛ Yehonadab ba ni ekɛ Yehu bakpe lɛ, nakai nɔŋŋ “asafo babaoo” ni jɛ jeŋmaji lɛ amli lɛ eba koni amɛfĩ Yesu shikpɔŋ nɔ najiaŋdamɔlɔi lɛ asɛɛ. (Kpojiemɔ 7:9, 10; 2 Maŋtsɛmɛi 10:15)—1/1, baafa 13.

◻ Ní akɛ “Nyɔŋmɔ aaanyiɛ” lɛ tsɔɔ mɛni? (1 Mose 5:24; 6:9)

Enɛ tsɔɔ akɛ gbɔmɛi ni feɔ nakai, tamɔ Henok kɛ Noa fee lɛ, baa amɛjeŋ yɛ gbɛ ni tsɔɔ akɛ amɛyɛ Nyɔŋmɔ mli hemɔkɛyeli ni mli wa. Amɛfee taakɛ Yehowa wo amɛ kita lɛ, ni amɛto amɛshihilɛi ahe gbɛjianɔ ni ekɛ nibii ni amɛle yɛ ehe ni kɔɔ bɔ ni ekɛ adesai yeɔ haa lɛ he lɛ kpaa gbee.—1/15, baafa 13.

◻ Mɛni hewɔ esa akɛ mɔ ko atsɔ hiɛ ato gbɛjianɔ kɛha gbo ni eeenyɛ egbo lɛ?

Yɛ shishinumɔ ko naa lɛ, gbɛjianɔtoo ni tamɔ nakai lɛ ji nikeenii kɛha mɔ lɛ weku. Etsɔɔ suɔmɔ. Etsɔɔ shwelɛ ni ayɔɔ akɛ ‘aaakwɛ mɛi ni ji shia mli bii,’ yɛ be mli ni mɔ lɛ kɛ amɛ bɛ po. (1 Timoteo 5:8)—1/15, baafa 22.

◻ Mɛni he nii “kpaŋmɔ momo lɛ” tsu? (2 Korintobii 3:14)

Efee kpaŋmɔ hee ni baaba lɛ he mfoniri, ni etsɔ afɔle ni ashaa nɔtonɔto lɛ nɔ etsɔɔ bɔ ni kpɔmɔ kɛmiijɛ esha kɛ gbele mli lɛ he hiaa gbɔmɔ waa ha lɛ mli. Eji “wɔtsɔselɔ kɛmiiya Kristo ŋɔɔ.” (Galatabii 3:24)—2/1, baafa 14.

◻ Mɛɛ gbɛi anɔ kpaŋmɔ hee lɛ ji nɔ ni hiɔ shi kɛyaa naanɔ yɛ? (Hebribii 13:20)

Klɛŋklɛŋ lɛ, akɛ nɔ ni tamɔɔɔ Mla kpaŋmɔ lɛ, akɛ eko etoŋ najiaŋ dɔŋŋ. Nɔ ni ji enyɔ lɛ, nɔ ni jɛɔ ekɛ nitsumɔ mli baa lɛ hiɔ shi daa. Ni nɔ ni ji etɛ lɛ, Nyɔŋmɔ Maŋtsɛyeli lɛ shishibii ni yɔɔ shikpɔŋ lɛ nɔ lɛ baaya nɔ aná kpaŋmɔ hee lɛ mli gbɛjianɔtoo lɛ he sɛɛ yɛ Afii Akpe Nɔyeli lɛ mli.—2/1, baafa 22.

◻ Mɛɛ sɛɛnamɔi jɛɔ shidaa mli baa?

Miishɛɛ ni mɔ ko naa akɛni ejieɔ hiɛsɔɔ kpo kɛjɛɔ etsui mli lɛ haa enaa miishɛɛ kɛ toiŋjɔlɛ. (Okɛto Abɛi 15:13, 15 he.) Akɛni eji su kpakpa hewɔ lɛ, shidaa buɔ mɔ he kɛjɛɔ henumɔi ni esaaa namɔ he, tamɔ mlifu, awuŋayeli, kɛ mlifu mli ni ahiɛɔ daa.—2/15, baafa 4.

◻ Mɛɛ kpaŋmɔ mli akɛ mumɔŋ bii lɛ ebote?

Kpaŋmɔ hee ni Yehowa kɛ mumɔŋ Israel mli bii lɛ fee lɛ, kɛ Maŋtsɛyeli lɛ he kpaŋmɔ ni Yesu kɛ esɛɛnyiɛlɔi ni afɔ amɛ mu ni nyiɛɔ enanemaahei lɛ asɛɛ lɛ fee lɛ. (Luka 22:20, 28-30)—2/15, baafa 16.

◻ Mɛɛ gbijurɔyelii wuji etɛ afã Israelbii lɛ koni amɛya?

Akpiti Gbijurɔ lɛ ni nyiɛɔ Nisan 14 Hehoo lɛ sɛɛ nɔŋŋ lɛ; Otsii Agbijurɔ lɛ ni baa yɛ gbi 50 ni kã Nisan 16 lɛ hiɛ; Nikpamɔ Gbijurɔ lɛ loo Asesei Agbijurɔ lɛ ni baa yɛ nyɔŋ ni ji kpawo lɛ mli lɛ. (5 Mose 16:1-15)—3/1 baafai 8, 9.

◻ Mɛni hewɔ eji hegbɛ ni ana akɛ aaaya Kristofoi akpeei?

Yesu kɛɛ: “He ni mɛi enyɔ loo mɛi etɛ ebua amɛhe naa yɛ, yɛ migbɛi anɔ lɛ, miyɛ amɛteŋ yɛ jɛi.” (Mateo 18:20; 28:20) Agbɛnɛ hu, gbɛ ni he hiaa ni akɛnáa mumɔŋ niyenii ji kɛtsɔ asafoŋ kpeei kɛ henaabuamɔi wuji ashishi yaa nɔ. (Mateo 24:45)—3/1, baafa 14.

◻ Nɛgbɛ aná gbɛi Nimrod lɛ kɛjɛ?

Woloŋlelɔi pii hiɛ jwɛŋmɔ akɛ, gbɛi Nimrod lɛ jeee gbɛi ni akɛha yɛ fɔmɔ mli. Shi moŋ amɛsusuɔ akɛ eji gbɛi ni akɛha yɛ sɛɛ mli, koni ekɛ etuatsemɔ subaŋ lɛ akpa gbee, beni ebafee faŋŋ lɛ sɛɛ.—3/15, baafa 25.

◻ Te weku lɛ he hiaa adesa shihilɛ gbɛjianɔtoo lɛ ehaa tɛŋŋ?

Weku lɛ ji nɔ ko ni he hiaa adesa. Yinɔsane tsɔɔ akɛ yɛ be mli ni weku gbɛjianɔtoo lɛ miifite lɛ, belɛ akutsei kɛ maji lɛ ahewalɛ nɔ miigbɔ. No hewɔ lɛ weku lɛ naa maŋ lɛ shimaa shiŋŋ kɛ gbekɛbii lɛ ahilɛ-kɛ-hamɔ kɛ wɔsɛɛ yinɔi lɛ anɔ hewalɛ tɛ̃ɛ.—4/1, baafa 6.

◻ Mɛɛ odaseyelii etɛ yɔɔ ni tsɔɔ akɛ Biblia lɛ ji Nyɔŋmɔ Wiemɔ?

(1) Eja yɛ jeŋ nilee naa; (2) Eyɛ shishitoo mlai ni yɔɔ ebe naa ni sa kɛha nitsumɔ yɛ ŋmɛnɛ shihilɛ nɛɛ mli; (3) Eyɛ gbalɛi krɛdɛɛi komɛi ni eba mli, taakɛ yinɔsaji maa nɔ mi lɛ.—4/1, baafa 15.