Yitso 1

Kpojiemɔ​—Enaagbee Mlibaa ni Yɔɔ Miishɛɛ!

 1. Te wɔfeɔ tɛŋŋ wɔleɔ akɛ Nyɔŋmɔ miisumɔ ni wɔna miishɛɛ?

KPOJIEMƆ KƐHA YOHANE—nɛkɛ Biblia mli wolo kɛ sane ni ajɛ ŋwɛi aŋma lɛ baa enaagbee mlibaa ni yɔɔ miishɛɛ mli. Mɛni hewɔ wɔkɛɔ akɛ “miishɛɛ” lɛ? Atsɔɔ akɛ Biblia lɛ Ŋmalɔ lɛ ji “miishɛɛ Nyɔŋmɔ,” ni lɛ ekɛ “anunyam sanekpakpa” woɔ mɛi ni sumɔɔ lɛ lɛ adɛŋ. Eesumɔ ni wɔ hu wɔna miishɛɛ. No hewɔ lɛ, Kpojiemɔ shishijee beebe ema nɔ mi kɛha wɔ akɛ: “Miishɛɛ ji mɔ ni kaneɔ . . . gbalɛ wiemɔi” lɛ. Ni akɛɔ wɔ yɛ naagbee yitso lɛ mli akɛ: “Miishɛɛ ji mɔ fɛɛ mɔ ni yeɔ wolo nɛɛ mli gbalɛ wiemɔi lɛ anɔ lɛ.”—1 Timoteo 1:11; Kpojiemɔ 1:3; 22:7, New World Translation.

 2. Mɛni esa akɛ wɔfee koni wɔna miishɛɛ kɛtsɔ Kpojiemɔ wolo lɛ nɔ?

² Mɛɛ gbɛ nɔ wɔtsɔɔ wɔnaa miishɛɛ kɛtsɔɔ Kpojiemɔ wolo lɛ mli yɛ? Wɔfeɔ nakai kɛtsɔɔ emli nɔkwɛmɔnii loo okadii ni mli ka shi faŋŋ lɛ ashishinumɔ ni wɔtaoɔ, kɛ amɛhe nitsumɔ kɛ gbeekpamɔ nɔ. Etsɛŋ ni adesa yinɔsane be ni efee hoo lɛ baashɛ enaagbee kɛ hiɛkpatamɔ, yɛ be mli ni Nyɔŋmɔ kɛ Yesu Kristo kɛ fɔbuu kojomɔ baa ŋmɛnɛŋmɛnɛ yiwalɛ gbɛjianɔtoo lɛ nɔ, ni ekɛ “ŋwɛi hee kɛ shikpɔŋ hee” ni “gbele” po “bɛ dɔŋŋ” toɔ najiaŋ lɛ. (Kpojiemɔ 21:1, 4) Ani wɔ fɛɛ wɔsumɔɔɔ ni wɔhiɔ jeŋ hee ni tamɔ nɛkɛ mli, yɛ anɔkwale toiŋjɔlɛ kɛ shweshweeshwe shihilɛ mli? Wɔbaanyɛ wɔfee nakai kɛji akɛ wɔtsɔ Nyɔŋmɔ Wiemɔ lɛ kasemɔ, ni Kpojiemɔ gbalɛ ni kanyaa mɔ lɛ fata he lɛ nɔ wɔtswa wɔhemɔkɛyeli wɔma shi.

Apokalips—Mɛni Ni?

 3. Mɛni ji nɔ ni gbɔmɛi pii susuɔ akɛ Apokalips kɛ Harmagedon tsɔɔ?

³ Ani atsɛɛɛ Kpojiemɔ hu akɛ Apokalips? Nakai ni, Kpojiemɔ loo “Revelation” ji Ŋleshi shishitsɔɔmɔ kɛha Hela wiemɔ a·po·kaʹly·psis. Gbɔmɛi pii kɛ Apokalips toɔ je lɛ hiɛkpatamɔ kɛtsɔ nuklea tawuu nɔ lɛ he. Yɛ Texas, U.S. Amerika maŋtiase ni afee nuklea okpɛlɛmii babaoo yɛ jɛmɛ lɛ, gbɔmɛi ni sumɔɔ jamɔ yɛ jɛmɛ lɛ fɔɔ kɛɛmɔ yɛ be ko ni eho lɛ mli akɛ: “Wɔ wɔbaafee klɛŋklɛŋ bii ni baaya.” Abɔ amaniɛ akɛ osɔfoi ni yɔɔ jɛmɛ lɛ “ehe eye akɛ jeee akɛ Harmagedon baaba kɛkɛ shi moŋ ebɛŋkɛ hu, ni akɛ naagbee tawuu ni ka ekpakpa kɛ efɔŋ tabilɔi, ni ji Nyɔŋmɔ kɛ Satan teŋ lɛ baaba akɛ nuklea hiɛkpatamɔ.”a

 4. Mɛni wiemɔ “apokalips” lɛ diɛŋtsɛ tsɔɔ, ni mɛni hewɔ atsɛɔ Biblia lɛ naagbee wolo lɛ akɛ “Kpojiemɔ” yɛ gbɛ ni ja nɔ lɛ?

⁴ Shi mɛni diɛŋtsɛ ji apokalips? Eyɛ mli akɛ wiemɔi komekomei ashishitsɔɔmɔ woji tsɔɔ shishi akɛ “jeŋ muu fɛɛ hiɛkpatamɔ ni miiba” moŋ, shi Hela a·po·kaʹly·psis lɛ shishijee shishinumɔ ji “nɔ ko ni ajieɔ lɛ kpo” aloo “akpaa ehe mama.” No hewɔ lɛ, atsɛɔ Biblia mli naagbee wolo lɛ gbɛi yɛ gbɛ ni ja nɔ akɛ “Kpojiemɔ.” Jeee akɛ wɔnaa shɛɛ saji ni kɛ jeŋ muu lɛ fɛɛ hiɛkpatamɔ baa yɛ biɛ pɛ kɛkɛ, shi moŋ ŋwɛi anɔkwalei ni esa akɛ amɛtswa hiɛnɔkamɔ ni kpɛlɛɔ kaŋkaŋ kɛ hemɔkɛyeli ni hosooo yɛ wɔtsuii amli lɛ ni ajieɔ amɛ kpo.

 5. (a) Namɛi abaakpata amɛhiɛ yɛ Harmagedon, ni namɛi baaje mli? (b) Mɛɛ wɔsɛɛ be ni yɔɔ nyam mɛɔ mɛi ni baaje Harmagedon mli lɛ?

⁵ Lɛlɛŋ, atsɔɔ Harmagedon mli yɛ Biblia lɛ mli naagbee wolo lɛ mli akɛ “Nyɔŋmɔ Ofe lɛ gbi wulu lɛ nɔ ta lɛ.” (Kpojiemɔ 16:14, 16) Shi ebaafee nɔ ni esoro lɛ kwraa yɛ nuklea hiɛkpatamɔ ni baa jeŋ muu fɛɛ he! Jeŋ muu fɛɛ hiɛkpatamɔ ni tamɔ nɛkɛ lɛ baatsɔɔ wala ni yɔɔ shikpɔŋ lɛ fɛɛ nɔ lɛ naagbee. Shi nɔ ni tamɔɔɔ nakai lɛ, Nyɔŋmɔ Wiemɔ lɛ kɛ miishɛɛ nɔmimaa ko haa akɛ efɔŋ feelɔi ni teɔ shi woɔ Nyɔŋmɔ lɛ pɛ abaakpata amɛhiɛ—kɛtsɔ hewalɛi ni yɔɔ Nyɔŋmɔ kudɔmɔ shishi lɛ anɔ. (Lala 37:9, 10; 145:20) Adesai asafo babaoo, ni jɛ jeŋmaji fɛɛ mli baaje ŋwɛi naagbee kojomɔ ni baa yɛ Harmagedon lɛ mli. Kɛkɛ lɛ Kristo Yesu baanyiɛ amɛhiɛ ni ekudɔ amɛ kɛya naanɔ wala mli yɛ shikpɔŋ nɔ paradeiso mli. Ani osumɔɔɔ ni ofeɔ amɛteŋ mɔ kome? Yɛ miishɛɛ mli lɛ, Kpojiemɔ tsɔɔ akɛ obaanyɛ ofee nakai!—Kpojiemɔ 7:9, 14, 17.

Ŋwɛi Teemɔŋ Saji Ataomɔ

 6. Mɛɛ woji ni Yehowa Odasefoi fee eha anu Kpojiemɔ lɛ shishi yɛ afii ni eho lɛ amli?

⁶ Mra mli yɛ afi 1917 beebe ni Buu Mɔɔ Asafo lɛ ŋma wolo ko ni ji The Finished Mystery lɛ eha. Enɛ ji wolo ko ni tsɔɔ Biblia mli woji ni ji Ezekiel kɛ Kpojiemɔ lɛ kuku fɛɛ kuku shishi. Agbɛnɛ beni jeŋ saji yaa nɔ ni haa Biblia mli gbalɛ baa mli lɛ, aŋma wolokpoi enyɔ ni egbɛi ji Light ni ba yɛ ebe naa pɛpɛɛpɛ aha, ni ajie enɛ kpo yɛ 1930. Enɛ kɛ Kpojiemɔ wolo lɛ he nikasemɔ ni yaa hiɛ ha. La tee nɔ ‘ekpɛ eha jalɔi lɛ’ ni yɛ enɛ hewɔ lɛ Yehowa Odasefoi ŋma wolo kroko eha yɛ 1963 mli ni hiɛ baafai 704 ni egbɛi ji “Babylon the Great Has Fallen!” God’s Kingdom Rules! Enɛ kɛ Babilon Kpeteŋkpele lɛ, jeŋ apasa jamɔ maŋtsɛyeli lɛ shitee kɛ eshigbeemɔ mlitsɔɔmɔ yɛ yinɔsane mli ha, ni nɔ ni akɛ ba naagbee ji Kpojiemɔ wolo lɛ naagbee yitsei nɛɛhu lɛ he susumɔ. Yɛ be mli ni ‘jalɔi atempɔŋ lɛ yaa nɔ ekpɛɔ be fɛɛ be,’ titri lɛ yɛ asafoŋ nitsumɔi ahe hewɔ lɛ, wolo kroko ni nyiɛ sɛɛ yɛ 1969 ji wolokpo ni hiɛ baafai 384 ni egbɛi ji, “Then Is Finished the Mystery of God,” ni wieɔ Kpojiemɔ wolo lɛ mli klɛŋklɛŋ yitsei 13 lɛ ahe.—Lala 97:11; Abɛi 4:18.

 7. (a) Mɛni hewɔ Yehowa Odasefoi lɛ kɛ wolo ni kɔɔ Kpojiemɔ he nɛɛ ha lɛ? (b) Mɛɛ nibii ni akɛtsɔɔ nii akɛwo wolo nɛɛ mli koni ehe aba sɛɛnamɔ aha ekanelɔi?

⁷ Mɛni hewɔ aŋma wolo kroko ni kɔɔ Kpojiemɔ he yɛ ŋmɛnɛŋmɛnɛ be nɛɛ mli ni asaa akala ekoŋŋ lɛ? Atsɔɔ saji ni eje kpo momo lɛ amli fitsofitso, shi anyɛko atsɔɔ shishi ni akala yɛ jeŋ fɛɛ yɛ wiemɔi babaoo mli. No hewɔ lɛ, ana akɛ esa akɛ akɛ Kpojiemɔ he wolo ko aha yɛ kpo kome pɛ mli bɔ ni abaanyɛ atsɔɔ shishi oya kɛya wiemɔi sɔrɔtoi amli. Agbɛnɛ hu, aŋɔ hegbɛ ni wolokpo nɛɛ kɛhaa lɛ koni akɛ nibii ni akɛtsɔɔ nii, ni mfonirii, nɔkwɛmɔnii, kɛ nibii amli shishitsɔɔmɔi fata he aha koni eye ebua nikanelɔi lɛ ni amɛnu nɔ ni gbalɛ ni yɔɔ naakpɛɛ nɛɛ tsɔɔ yɛ faŋŋ mli lɛ shishi yɛ miishɛɛ mli.

 8. Mɛɛ yiŋtoo titri ni yɔɔ hewɔ aŋma wolo nɛɛ aha lɛ?

⁸ Yiŋtoo titri hu ni ha afee wolo nɛɛ ji bɔ ni ehe hiaa akɛ akɛ anɔkwalei ni eje kpo yɛ ŋmɛnɛŋmɛnɛ beaŋ lɛ aaanyiɛ pɛpɛɛpɛ lɛ. Yehowa miiya nɔ eeha la ni da miikpɛ kɛmiishwie e-Wiemɔ lɛ shishinumɔ nɔ, ni wɔbaanyɛ wɔkpa gbɛ akɛ wɔ shishinumɔ ni wɔyɔɔ yɛ Kpojiemɔ wolo lɛ he, kɛ gbalɛi krokomɛi lɛ mli baaka shi faŋŋ ni wɔnu shishi yɛ be mli ni wɔbɛŋkɛɔ amanehulu kpeteŋkpele lɛ he lɛ. (Mateo 24:21; Kpojiemɔ 7:14) Ehe miihia ni wɔle nɔ ni yaa nɔ lɛ fɛɛ jogbaŋŋ. Taakɛ bɔfo Petro ŋma yɛ ŋwɛi gbalɛ he lɛ: “Ni ama gbalɛ wiemɔ lɛ nɔ mi aha wɔ fe tsutsu lɛ, nɔ ni kɛji nyɛŋɔ nyɛhiɛ nyɛto nɔ akɛ la ni tsoɔ yɛ he ko ni woɔ duŋ, kɛyashi beyinɔ ni je aaatsɛre ni toloo lɛ aaate shi yɛ nyɛtsuii amli lɛ, no lɛ nyɛmiifee jogbaŋŋ.”—2 Petro 1:19.

 9. (a) Mɛni Kpojiemɔ lɛ tsɔɔ akɛ Nyɔŋmɔ baabɔ taakɛ gbalɛi krokomɛi etsɔɔ lɛ? (b) Mɛni ji jeŋ hee lɛ, ni te wɔɔfee tɛŋŋ wɔje mli kɛyabote mli?

⁹ Kpojiemɔ kɛ edaseyeli fataa Biblia mli gbalɛi krokomɛi babaoo he, ni etsɔɔ akɛ Yehowa Nyɔŋmɔ eto eyiŋ akɛ ebaabɔ ŋwɛi hee kɛ shikpɔŋ hee. (Yesaia 65:17; 66:22; 2 Petro 3:13; Kpojiemɔ 21:1-5) Klɛŋklɛŋ lɛ, aŋma emli shɛɛsaji lɛ amaje Kristofoi ni afɔ amɛ mu, ni Yesu kɛ ela lɛ he amɛ koni amɛbafata ehe akɛ nɔyelɔi yɛ ŋwɛi hee lɛ. (Kpojiemɔ 5:9, 10) Ni kɛlɛ, nɛkɛ sanekpakpa nɛɛ baawaje mɛi akpekpei abɔ ni kpaa naanɔ wala gbɛ yɛ Kristo Maŋtsɛyeli lɛ shishi lɛ ahemɔkɛyeli. Ani oji mɛnɛɛmɛi ateŋ mɔ kome? Belɛ Kpojiemɔ baawo ohiɛnɔkamɔ akɛ ooohi shi yɛ Paradeiso, akɛ shikpɔŋ hee lɛ fa lɛ mli hewalɛ, koni oyana toiŋjɔlɛ babaoo, kɛ gbɔmɔtsoŋ hewalɛnamɔ kpakpa, kɛ Nyɔŋmɔ gbɛjianɔtoi sɔrɔtoi ni baŋ naagbee lɛ amli ŋɔɔmɔ. (Lala 37:11, 29, 34; 72:1, 7, 8, 16) Kɛ oosumɔ ni oje mli kɛyabote jeŋ hee lɛ mli lɛ, belɛ ehe miihia, hɛɛ, eka onɔ doo akɛ obo bɔ ni Kpojiemɔ kɛ sane mlitsɔɔmɔ haa ni feɔ yinɔsane ni baa naagbee ni agbɛnɛ ebɛŋkɛ lɛ toi.—Zefania 2:3; Yohane 13:17.

[Shishigbɛ niŋmaa]

[Baafa muu mfoniri ni yɔɔ baafa 7]

Yitso 2

Biblia Mli Saneyitso ni Yɔɔ Nyam Lɛ

Ŋmalɛi lɛ Ashishitsɔɔmɔ Teemɔŋ saji ni aŋa naa awo Kpojiemɔ wolo lɛ mli lɛ eha Biblia kaselɔi anɔkwafoi anaa ekpɛ amɛhe yɛ be kakadaŋŋ mli ni amɛnuuu shishi. Shi, yɛ Nyɔŋmɔ diɛŋtsɛ be ni sa mli lɛ, esa akɛ eha nakai teemɔŋ saji lɛ aje kpo, shi yɛ mɛɛ gbɛ nɔ, mɛɛ be, ni kɛha namɛi? Nyɔŋmɔ mumɔ lɛ pɛ baanyɛ aha ale eshishinumɔ lɛ yɛ be mli ni be ni ato lɛ bɛŋkɛɔ lɛ. (Kpojiemɔ 1:3) Abaajie nakai teemɔŋ saji krɔŋkrɔŋi lɛ akpo atsɔɔ Nyɔŋmɔ tsuji ni yɔɔ ekaa ni yɔɔ shikpɔŋ nɔ lɛ koni no awo amɛ hewalɛ ni amɛjaje ekojomɔi lɛ. (Mateo 13:10, 11) Akɛko akɛ shishitsɔɔmɔi ni akɛha yɛ wolo nɛɛ mli lɛ ji nɔ ni tɔmɔ bɛ mli. Wɔkɛɔ tamɔ Yosef ni hi shi yɛ blema lɛ, akɛ: “Ani shishitsɔɔmɔ lɛ, jeee Nyɔŋmɔ nɔŋ?” (1 Mose 40:8) Shi yɛ nakai beaŋ nɔŋŋ lɛ, wɔheɔ wɔyeɔ akɛ shishitsɔɔmɔi ni wɔkɛha yɛ biɛ lɛ kɛ Biblia muu lɛ fɛɛ kpaa gbee, ni etsɔɔ bɔ ni ŋwɛi gbalɛ eba mli bɔ ni ekɛ jeŋ saji ni yaa nɔ yɛ oshara be ni wɔyɔɔ mli nɛɛ kpaa gbee pɛpɛɛpɛ yɛ naakpɛɛ gbɛ nɔ.

 1. Mɛni ji Yehowa yiŋtoo ni yɔɔ nyam lɛ?

BIBLIA mli abɛbua ko kɛɔ akɛ: “Sane naagbee hi fe ebɔimɔ.” (Jajelɔ 7:8) Kpojiemɔ wolo lɛ mli wɔkaneɔ Yehowa yiŋtoo ni yɔɔ nyam akɛ ebaatsuu egbɛi lɛ he yɛ bɔɔnii fɛɛ ahiɛ lɛ naagbee ni yɔɔ naakpɛɛ lɛ yɛ. Taakɛ Nyɔŋmɔ ejaje yɛ be kɛ bei amli shii abɔ kɛtsɔ emra be mli gbalɔi lɛ ekome nɔ lɛ: “Ni amɛaana amɛle akɛ mi ji Yehowa lɛ.”—Ezekiel 25:17; 38:23.

 2. Mɛɛ nilee ni haa mɔ tsui nyɔɔ emli Kpojiemɔ, kɛ agbɛnɛ Biblia mli woji ni etsɔ ehiɛ lɛ yeɔ ebuaa wɔ ni wɔnine shɛɔ nɔ?

² Taakɛ bɔ ni Kpojiemɔ jieɔ saji anaagbee yɛ kunimyeli mli lɛ kpo lɛ, nakai nɔŋŋ hu atsɔɔ amɛshishijee lɛ mli aha wɔ yɛ Biblia mli shishijee woji lɛ amli. Kɛ wɔsusu nɔ ni aŋma afɔ shi nɛɛ he lɛ, ehaa wɔnyɛɔ wɔnuɔ saji ni kɔɔ he lɛ ashishi ni ehaa wɔnaa Nyɔŋmɔ yiŋtoo ni kɔɔ he lɛ fɛɛ naa. Kwɛ bɔ ni enɛ haa mɔ tsui nyɔɔ emli ehaa! Agbɛnɛ, esa akɛ ekanya wɔ ni wɔfee nɔ ko, bɔni afee ni wɔna wɔsɛɛ be ni yɔɔ naakpɛɛ ni mɛɔ adesai lɛ amli gbɛfaŋnɔ. (Lala 145:16, 20) Etamɔ nɔ ni esa jogbaŋŋ akɛ wɔɔsusu nɔ ni hɔ Biblia muu lɛ fɛɛ sɛɛ lɛ kɛ esaneyitso lɛ he yɛ he ni wɔshɛ nɛɛ, bɔni afee ni wɔha sane titri ni ka shi ni amrɔ nɛɛ eka adesai fɛɛ ahiɛ, kɛ agbɛnɛ Nyɔŋmɔ yiŋtoo ni ejaje ni mli ka shi faŋŋ akɛ eeeha nakai sane lɛ aba naagbee lɛ ahi wɔjwɛŋmɔ mli.

 3. Mɛɛ gbalɛ ni yɔɔ 1 Mose wolo lɛ mli kɛ Biblia muu lɛ fɛɛ mli saneyitso haa wɔ, ni Kpojiemɔ fata he?

³ Biblia lɛ mli klɛŋklɛŋ wolo lɛ, 1 Mose, gbaa wɔ “shishijee” mli saji ni etsɔɔ Nyɔŋmɔ nibɔɔ nitsumɔi lɛ amli, kɛ eshikpɔŋ nɔ nibɔɔ ni ji gbɔmɔ ni ekɛmua naa kwraa lɛ mli. 1 Mose hu tsɔɔ klɛŋklɛŋ ŋwɛi gbalɛ ni Nyɔŋmɔ diɛŋtsɛ kɛha yɛ Eden abɔɔ lɛ mli aaafee afii 6,000 ni eho nɛ lɛ. Akɛ onufu ko etsu nii ni elaka klɛŋklɛŋ yoo lɛ, Hawa; lɛ hu egbala ewu, Adam efata ehe koni amɛku Yehowa mla mli kɛtsɔ “ekpakpa kɛ efɔŋ lee tso lɛ” nɔ yibii ni amɛye lɛ nɔ. Yɛ be mli ni ekojoɔ hefatalɔi enyɔ ni efee esha lɛ, Nyɔŋmɔ kɛɛ onufu lɛ akɛ: “Ni mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa oyitso nɔ, ni bo hu oootswa enanetsitsi nɔ.” (1 Mose 1:1; 2:17; 3:1-6, 14, 15) Nakai gbalɛ lɛ kɛ Biblia muu lɛ fɛɛ mli saneyitso, ni Kpojiemɔ fata he lɛ haa.

 4. (a) Beni Nyɔŋmɔ jaje klɛŋklɛŋ gbalɛ lɛ sɛɛ lɛ, mɛni ba wɔ klɛŋklɛŋ fɔlɔi lɛ anɔ? (b) Mɛɛ sanebimɔi teɔ shi yɛ klɛŋklɛŋ gbalɛ lɛ he, ni mɛni hewɔ ehe hiaa akɛ wɔɔle hetooi lɛ?

⁴ Beni ekɛ gbalɛ nɛɛ ha sɛɛ pɛ kɛkɛ ni Nyɔŋmɔ shwie wɔ klɛŋklɛŋ fɔlɔi lɛ kɛjɛ Eden. Amɛnyɛŋ amɛkpa naanɔ wala yɛ Paradeiso mli gbɛ dɔŋŋ; esa akɛ amɛhi shi yɛ shikpɔŋ ni asako nɔ ni yɔɔ esɛɛ lɛ nɔ amɛshihilɛ be fɛɛ mli. Akɛni amɛba gbele fɔbuu shishi hewɔ lɛ, amɛbaafɔ bii ni esha eyimɔ amɛ obɔbɔ. (1 Mose 3:23-4:1; Romabii 5:12) Shi mɛni nakai Eden gbalɛ lɛ tsɔɔ? Ekɔɔ namɛi ahe? Te ekɔɔ Kpojiemɔ he ehaa tɛŋŋ? Mɛɛ shɛɛ sane eyɔɔ kɛhaa wɔ ŋmɛnɛ? Bɔni afee ni wɔye wɔhe kɛjɛ nɔ ni ejɛ oshara ni ba ni ha Yehowa jaje gbalɛ nɛɛ lɛ mli lɛ, ehe miihia hu ni wɔle sanebimɔi nɛɛ ahetoo.

Mɛi Titrii ni Yɔɔ Nɔkwɛmɔnɔ lɛ Mli

 5. Beni onufu lɛ laka Hawa lɛ, mɛni ba yɛ jeŋ muu fɛɛ maŋtsɛ ni Nyɔŋmɔ ji lɛ kɛ egbɛi lɛ he, ni mɛɛ gbɛ nɔ abaatsɔ ni ana naataomɔ ni ebaka shi lɛ naa?

⁵ Awie gbalɛ ni yɔɔ 1 Mose 3:15 lɛ atsɔɔ onufu lɛ ni male etsɔɔ Hawa, ni ekɛɛ lɛ akɛ kɛ egbo toi lɛ egboŋ shi moŋ ebaaye ehe ni etsɔ nyɔŋmɔyoo ko lɛ. No hewɔ lɛ onufu lɛ ha Yehowa batsɔ amalelɔ ni ekɛ nakai tsɔɔ akɛ adesai baanyɛ aha amɛshihilɛi aya hiɛ kɛ amɛkpoo E-jeŋ muu fɛɛ nɔyeli lɛ. (1 Mose 3:1-5) Atswa Yehowa jeŋ muu fɛɛ maŋtsɛyeli lɛ mpoa ni agbe egbɛi kpakpa lɛ hu he guɔ. Kpojiemɔ wolo lɛ tsɔɔ bɔ ni jalɛ Kojolɔ, Yehowa, kɛ e-Bi, Yesu Kristo Maŋtsɛyeli nɔyeli lɛ tsuɔ nii, koni ekɛbu jeŋ muu fɛɛ maŋtsɛ ni eji lɛ bem ni ejie ahorabɔɔ ni akɛba egbɛi lɛ nɔ lɛ fɛɛ kɛya lɛ.—Kpojiemɔ 12:10; 14:7.

 6. Mɛɛ gbɛ nɔ Kpojiemɔ haa wɔleɔ mɔ ni wie etsɔɔ Hawa kɛtsɔ onufu lɛ nɔ lɛ yɛ?

⁶ Yɛ wiemɔ “onufu” lɛ gbɛfaŋ lɛ, ani ekɔɔ shinɔ loo onufu diɛŋtsɛ he? Dabida kwraa! Kpojiemɔ haa wɔyɔseɔ mumɔŋ bɔɔ nɔ ko ni hiɛ eshwie shi ni wie kɛtsɔ onufu lɛ nɔ lɛ. Lɛ ji “drako kpeteŋkpele . . . lɛ, shishijee onufu lɛ, mɔ ni atsɛɔ lɛ Abonsam kɛ Satan, ni shishiuɔ jeŋ muu lɛ fɛɛ lɛ,” mɔ ni “kɛ ekutumpɔo lɛ laka Hawa lɛ.”—Kpojiemɔ 12:9; 2 Korintobii 11:3.

 7. Mɛni tsɔɔ akɛ yoo ni yɔɔ 1 Mose 3:15 lɛ jɛ mumɔi amaŋtsɛyeli he lɛ?

⁷ No sɛɛ lɛ 1 Mose 3:15 wieɔ “yoo” ko he. Ani Hawa ni? Ekolɛ esusu nakai. (Okɛto 1 Mose 4:1 he.) Shi nyɛɛ ni sɛɛ tsɛɔ kakadaŋŋ ni aaaka Hawa kɛ Satan teŋ nyɛŋ aba mli beni Hawa gbo nɔ ni fe afii 5,000 ni eho nɛ lɛ. Kɛfata he lɛ, akɛni Onufu lɛ ni Yehowa wie etsɔɔ lɛ lɛ ji mumɔ ni anaaa lɛ hewɔ lɛ, esa akɛ wɔkpa gbɛ akɛ yoo lɛ hu jɛ mumɔi amaŋtsɛyeli he lɛ. Kpojiemɔ 12:1, 2 maa enɛ nɔ mi, ni ekɛtsɔɔ akɛ nɛkɛ okadi yoo nɛɛ ji Yehowa ŋwɛi mumɔŋ bɔɔ nii agbɛjianɔtoo lɛ.—Agbɛnɛ hu kwɛmɔ Yesaia 54:1, 5, 13.

Seshii Enyɔ ni Teɔ Shi Woɔ Amɛhe

 8. Mɛni hewɔ esa akɛ wɔnya nɔ ni akɛɔ agbɛnɛ yɛ seshii sɔrɔtoi enyɔ nɛɛ ahe waa lɛ?

⁸ Seshii enyɔ jeɔ kpo agbɛnɛ yɛ 1 Mose 3:15. Esa akɛ wɔnya amɛhe waa, ejaakɛ amɛkɔɔ sane kpele ni ka shi ni ji mɔ ni ji jeŋ muu fɛɛ maŋtsɛ ni sa yɛ shikpɔŋ nɛɛ nɔ lɛ he. Enɛ kɔɔ wɔteŋ mɔ fɛɛ mɔ he, kɛji akɛ wɔji gbekɛbii aloo onukpai. Seshii enyɔ nɛɛ ateŋ namɔ osumɔɔ?

 9. Namɛi diɛŋtsɛ fata Onufu lɛ seshi lɛ he?

⁹ Klɛŋklɛŋ lɛ, Onufu lɛ seshi, loo eshwiei yɛ. Mɛni ji enɛ? Yɛ anɔkwale mli lɛ mɛi ni fata he ji mumɔŋ bɔɔ nii krokomɛi ni bafata Satan he yɛ etuatsemɔ lɛ mli ni yɛ naagbee lɛ, “ashɛrɛ amɛ ashwie afata ehe” kɛba shikpɔŋ nɛɛ nɔ lɛ. (Kpojiemɔ 12:9) Akɛni Satan, aloo Beelzebub ji “daimonioi alumɔ” hewɔ lɛ, eka shi faŋŋ akɛ amɛ ji mɛi ni feɔ egbɛjianɔtoo ni anaaa lɛ.—Marko 3:22; Efesobii 6:12.

10. Mɛɛ gbɛ nɔ Biblia lɛ tsɔɔ ehaa wɔyooɔ mɛi krokomɛi akɛ Satan seshi lɛ fa?

¹⁰ Agbɛnɛ Yesu kɛɛ Yudafoi ni ji jamɔ mli hiɛnyiɛlɔi ni yɔɔ egbii lɛ amli lɛ akɛ: “Nyɛ lɛ nyɛtsɛ ni nyɛjɛ emli ji Abonsam, ni nyɛtsɛ lɛ tsinebaa nii nyɛsumɔɔ akɛ nyɛfee.” (Yohane 8:44) Akɛni amɛteɔ shi amɛwoɔ Nyɔŋmɔ Bi Yesu hewɔ lɛ, nakai jamɔ mli hiɛnyiɛlɔi lɛ tsɔɔ akɛ amɛ hu amɛfata Satan shwiei lɛ ahe. Amɛfata Satan seshi lɛ he, ni amɛsɔmɔɔ lɛ akɛ amɛtsɛ yɛ okadi gbɛ nɔ. Adesai krokomɛi babaoo ejie amɛhe kpo nakai nɔŋŋ akɛ amɛfeɔ Satan suɔmɔnaa nii, titri lɛ akɛni amɛteɔ shi amɛwoɔ ni amɛwaa Yesu kaselɔi lɛ ayi lɛ hewɔ, yɛ yinɔsane be fɛɛ mli. Kɛ abua nɛkɛ adesai nɛɛ fɛɛ anaa lɛ, abaanyɛ atsɔɔ akɛ amɛji mɛi ni feɔ Satan gbɛjianɔtoo ni anaa yɛ shikpɔŋ nɔ lɛ.—Kwɛmɔ Yohane 15:20; 16:33; 17:15.

Ayoo Yoo lɛ Seshi Lɛ

11. Mɛni Nyɔŋmɔ jie lɛ kpo yɛ yoo lɛ seshi lɛ he yɛ afii ohai abɔ lɛ mli?

¹¹ Gbalɛ ni yɔɔ 1 Mose 3:15 lɛ kɔɔ yoo lɛ seshi lɛ he yɛ naagbee. Yɛ be mli ni Satan buaa eseshi lɛ naa lɛ, Yehowa miisaa ‘eyoo’ loo ŋwɛi gbɛjianɔtoo ni tamɔ ŋa lɛ, koni efɔ seshi lɛ. Yehowa kɛ aaafee afii 4,000 tee nɔ ejie saji ni kɔɔ seshi ni baa nɛɛ he lɛ kpo etsɔɔ adesai ni sheɔ Nyɔŋmɔ gbeyei ni boɔ lɛ toi lɛ fiofio. (Yesaia 46:9, 10) Abraham, Isak, Yakob kɛ mɛi krokomɛi baanyɛ ana hemɔkɛyeli yɛ shiwoo ni tsɔɔ akɛ seshi lɛ baaba yɛ amɛ wekukpaa lɛ mli lɛ mli. (1 Mose 22:15-18; 26:4; 28:14) Satan kɛ esamaŋfoi lɛ fɔɔ nɛkɛ Yehowa tsuji nɛɛ ayiwaa yɛ amɛhemɔkɛyeli ni hosooo lɛ hewɔ.—Hebribii 11:1, 2, 32-38.

12. (a) Mɛɛ be, ni mɛni nifeemɔ kɛ yoo lɛ seshi lɛ fa titri lɛ ba? (b) Afɔ Yesu mu aha mɛɛ yiŋtoo?

¹² Yɛ naagbee lɛ, yɛ afii 29 yɛ Ŋmɛnɛŋmɛnɛ Beaŋ lɛ, nuu ni eye emuu, Yesu kɛ ehe ha yɛ Yordan Faa lɛ naa ni abaptisi lɛ. Kɛkɛ ni Yehowa tsɔ mumɔ krɔŋkrɔŋ lɛ nɔ efɔ Yesu, akɛ: “Mɔ nɛɛ ji misuɔmɔ Bi ni miná ehe tsui lɛ.” (Mateo 3:17) Ayoo Yesu yɛ biɛ akɛ atsu lɛ kɛjɛ Nyɔŋmɔ mumɔŋ gbɛjianɔtoo ni yɔɔ ŋwɛi lɛ mli. Afɔ lɛ mu hu akɛ Maŋtsɛ ni ahala lɛ kɛha ŋwɛi Maŋtsɛyeli ni baaku sɛɛ ekɛ shikpɔŋ nɔ nɔyeli yɛ Yehowa gbɛi mli aba ekoŋŋ lɛ, koni eha sane ni kɔɔ nɔyeli loo maŋtsɛyeli he lɛ aba naagbee shikome nyɔŋlo. (Kpojiemɔ 11:15) Belɛ Yesu ji Mɔ titri yɛ yoo lɛ seshi lɛ mli, Mesia ni agba ehe sane afɔ shi lɛ.—Okɛto Galatabii 3:16; Daniel 9:25 he.

13, 14. (a) Mɛni hewɔ esaaa akɛ wɔnaa kpɛɔ wɔhe akɛ wɔɔle akɛ yoo lɛ seshi lɛ efeŋ mɔ kome ni ehe gbɛi ni ale lɛ lɛ? (b) Mɛi enyiɛ Nyɔŋmɔ ehala amɛ kɛjɛ adesai ateŋ koni amɛbatsɔmɔ seshi lɛ fa ni ji enyɔ lɛ, ni mɛɛ gbɛjianɔtoo loo asafo amɛfeɔ? (d) Namɛi hu kɛ seshi lɛ sɔmɔɔ yɛ ekomefeemɔ mli?

¹³ Ani yoo lɛ seshi lɛ baafee gbɔmɔ kome ni ehe gbɛi ni ale lɛ? Ojogbaŋŋ, ni Satan seshi lɛ hu? Biblia lɛ haa ayooɔ Satan seshi lɛ akɛ mɛi ni fata he ji ŋwɛibɔfoi yiwalɔi babaoo kɛ adesai ni wooo Nyɔŋmɔ hiɛ nyam. Belɛ esaaa akɛ efeɔ wɔ naakpɛɛ akɛ wɔɔkase akɛ Nyɔŋmɔ yiŋtoo ji ni ehala emuuyeli mli hiɛlɔi 144,000 kɛjɛ adesai ateŋ ni amɛbatsɔmɔ osɔfoi kɛ nɔyelɔi kɛ Mesia Seshi Yesu Kristo. Kpojiemɔ wieɔ mɛnɛɛmɛi ahe yɛ be mli ni ekɛɔ akɛ akɛni Abonsam nyɛɔ Nyɔŋmɔ yoo ni ji egbɛjianɔtoo lɛ hewɔ lɛ, “eyiŋ etee ni ekɛ yoo lɛ seshibii ni eshwɛ . . . lɛ ayawuu” lɛ.—Kpojiemɔ 12:17; 14:1-4.

¹⁴ Atsɛɔ Kristofoi ni afɔ amɛ mu lɛ yɛ Biblia lɛ mli akɛ Yesu nyɛmimɛi, ni akɛ enyɛmimɛi lɛ, amɛ fɛɛ amɛyɛ Tsɛ kome kɛ nyɛ kome lɛ nɔŋŋ. (Hebribii 2:11) Amɛ Tsɛ ji Yehowa Nyɔŋmɔ. No hewɔ lɛ, esa akɛ amɛnyɛ afee “yoo” lɛ, Nyɔŋmɔ ŋwɛi gbɛjianɔtoo ni tamɔ eŋa lɛ. Amɛbafeɔ seshi lɛ fa ni ji enyɔ, ni Kristo Yesu ji seshi lɛ klɛŋklɛŋ fa. Nɛkɛ Kristofoi ni akɛ mumɔ efɔ amɛ ni yɔɔ shikpɔŋ nɛɛ nɔ lɛ asafo lɛ ji nɔ ni feɔ Nyɔŋmɔ gbɛjianɔtoo ni anaa ni sɔmɔɔ yɛ egbɛjianɔtoo ni tamɔ yoo ni yɔɔ ŋwɛi lɛ shishi lɛ, ni jɛmɛ ji he ni abaafee amɛ kɛ Kristo Yesu ekome yɛ amɛshitee be lɛ mli lɛ. (Romabii 8:14-17; Galatabii 3:16, 29) Eyɛ mli akɛ amɛjeee seshi lɛ fa moŋ, shi aabua tooi krokomɛi akpekpei abɔ ni jɛ jeŋmaji fɛɛ mli lɛ anaa aafee amɛ ekome koni amɛkɛ Nyɔŋmɔ gbɛjianɔtoo ni yɔɔ shikpɔŋ nɔ lɛ asɔmɔ. Ani oji tooi krokomɛi nɛɛ ateŋ mɔ kome? Belɛ ohiɛnɔkamɔ ni miishɛɛ yɔɔ mli ji naanɔ wala yɛ paradeiso shikpɔŋ nɔ.—Yohane 10:16; 17:1-3.

Bɔ ni Nyɛɛ lɛ Je Shishi

15. (a) Tsɔɔmɔ bɔ ni fee ni Satan seshi ni ji adesai kɛ ŋwɛibɔfoi lɛ ba lɛ mli. (b) Mɛni ba Satan seshi lɛ nɔ yɛ Noa gbii lɛ amli Nu Afua lɛ mli?

¹⁵ Ayoo Satan seshi ni ji adesai lɛ mra yɛ adesai ayinɔsane shishijee mli. Akɛ nɔkwɛmɔnɔ lɛ, Kain, klɛŋklɛŋ adesa ni afɔ lɛ, ni “jɛ mɔ fɔŋ lɛ mli ni egbe enyɛmi” Habel lɛ yɛ. (1 Yohane 3:12) Yɛ sɛɛ mli lɛ, Henok wie akɛ Yehowa baaba “kɛ ekrɔŋkrɔŋbii akpei nyɔŋma-nyɔŋmai abɔ ni ebakojo mɛi fɛɛ, ni eka nɔ sha feelɔi lɛ yɛ amɛnishai anitsumɔ fɛɛ ni amɛtsu lɛ kɛ wiemɔi waawaai fɛɛ ni eshafeelɔi Nyɔŋmɔ kwalɔi wie yɛ ehe lɛ hewɔ.” (Yuda 14, 15) Agbɛnɛ ŋwɛibɔfoi atuatselɔi yafata Satan he ni amɛfee eseshi lɛ fa. Mɛnɛɛmɛi “shi . . . amɛ diɛŋtsɛ amɛshihilɛ he lɛ” ni yɔɔ ŋwɛi lɛ bɔni afee ni amɛŋɔ heloo gbɔmɔtsei ni amɛkɛ gbɔmɛi abiyei ababote gbalashihilɛ mli. Amɛfɔ bii obalaŋi ni dara fe adesai ni amɛyi wa. Awuiyeli kɛ efɔŋ feemɔ bayi nakai je lɛ mli obɔ, no hewɔ lɛ Nyɔŋmɔ kɛ Nu Afua kpata hiɛ, ni Noa anɔkwafo lɛ kɛ eweku lɛ pɛ ji adesai ni je mli. Anyɛ nakai ŋwɛibɔfoi toigbolɔi—ni amrɔ nɛɛ amɛtsɔmɔ daimonioi yɛ Satan kudɔmɔ shishi lɛ anɔ—koni amɛshi amɛŋamɛi adesai ni hiɛkpatamɔ ba amɛnɔ lɛ kɛ amɛbii obalaŋi ni amɛfɔ amɛ lɛ yɛ amɛsɛɛ. Amɛtsake amɛhe, ni amɛbote mumɔi amaŋtsɛyeli he lɛ yɛ he ni amɛmɛɔ Nyɔŋmɔ hiɛkpatamɔ kojomɔ ni baa kɛ foi yɛ Satan kɛ eseshi lɛ nɔ lɛ.—Yuda 6; 1 Mose 6:4-12; 7:21-23; 2 Petro 2:4, 5.

16. (a) Mɛɛ yiwalɔ ko pue yɛ Nu Afua lɛ sɛɛ, ni mɛɛ gbɛ nɔ etsɔ ejie lɛ kpo akɛ eji Satan seshi lɛ fa yɛ? (b) Te fee tɛŋŋ ni Nyɔŋmɔ fite mɛi ni maa Babilon mɔɔ lɛ ajwɛŋmɔ lɛ?

¹⁶ Nu Afua lɛ sɛɛ etsɛɛɛ ni yiwalɔ nɔyelɔ ko ni atsɛɔ lɛ Nimrod pue yɛ shikpɔŋ lɛ nɔ. Biblia lɛ tsɔɔ akɛ eji “gbɔbilɔ kpanaa ni teɔ shi woɔ Yehowa”—eji Onufu lɛ seshi lɛ fa lɛlɛŋ. Ejie atuatsemɔ mumɔ kpo tamɔ Satan, ni lɛ efee Babel maŋ lɛ, aloo Babilon, ni ekɛmiite shi ewo Yehowa yiŋtoo akɛ adesai agbɛ ashwa shikpɔŋ muu lɛ fɛɛ nɔ lɛ. Nɔ ni Babilon kɛbaahe gbɛi ji mɔɔ kakadaŋŋ ko “ni eyiteŋ yashɛɔ ŋwɛi.” Nyɔŋmɔ fite nakai tsutswalɔi ni maa nakai mɔɔ lɛ anitsumɔ lɛ. Efutu amɛwiemɔ lɛ ni “Yehowa gbɛ amɛ eshwa kɛjɛ jɛmɛ kɛtee shikpɔŋ lɛ fɛɛ nɔ” shi eŋmɛ gbɛ ni Babilon diɛŋtsɛ hi shi.—1 Mose 9:1; 10:8-12; 11:1-9.

Maŋkwramɔŋ Hewalɛi Pue

17. Yɛ be mli ni adesai ayi faa lɛ, mɛɛ adesai aweku lɛ gbɛjianɔtoo ni ekpɔtɔ lɛ fa ko jie ehe kpo, ni yɛ enɛ hewɔ lɛ, mɛɛ maŋtsɛyelii wuji te shi?

¹⁷ Adesai akwasafoŋ gbɛjianɔtoi he nibii pue yɛ Babilon ni teɔ shi ewoɔ Yehowa jeŋ muu fɛɛ maŋtsɛyeli lɛ. Enɛɛmɛi ateŋ ekome ji maŋkwramɔ. Beni adesai ayifalɛ yaa hiɛ lɛ, gbɔmɛi krokomɛi ni taoɔ hiɛnyam nyiɛ Nimrod nɔkwɛmɔnɔ lɛ sɛɛ ni amɛshɔ hewalɛ kɛjɛ mɛi adɛŋ. Gbɔmɔ je shishi akɛ eeeye enyɛmi gbɔmɔ nɔ koni ekɛye lɛ awui. (Jajelɔ 8:9) Yɛ Abraham gbii lɛ amli lɛ, akɛ nɔkwɛmɔnɔ lɛ, Sodom, Gomora, kɛ maji ni bɛŋkɛ jɛmɛ lɛ baje Shinear maŋtsɛmɛi kɛ mɛi ni jɛ shikpɔji ni yɔɔ shɔŋŋ lɛ ahewalɛ shishi. (1 Mose 14:1-4) Yɛ naagbee lɛ, tawuu kɛ gbɛjianɔtoo mli nilelɔi ŋɔ maŋtsɛyelii wuji amɛha amɛhe kɛha amɛninamɔ kɛ anunyam. Biblia lɛ wieɔ maji nɛɛ ekomɛi ni fata he lɛ ahe akɛ amɛji Mizraim, Ashur, Babilon, Media kɛ Pershia, Hela kɛ Roma.

18. (a) Mɛɛ su ji nɔ ni Nyɔŋmɔ webii hiɛ yɛ maŋkwramɔŋ nɔyelɔi ahe? (b) Maŋkwramɔŋ hewalɛi lɛ etsu Nyɔŋmɔ yiŋtoo he nii yɛ mɛɛ gbɛ nɔ? (d) Nɔyelɔi pii ejie amɛhe kpo akɛ amɛji Onufu lɛ seshi lɛ fa yɛ mɛɛ gbɛ nɔ?

¹⁸ Yehowa ŋmɛ gbɛ koni nakai maŋkwramɔŋ hewalɛi lɛ ahi shi, ni ewebii lɛ kɛ toiboo ni husu yɔɔ mli haa amɛ yɛ be mli ni amɛhiɔ shikpɔji ni yɔɔ amɛhewalɛ shishi lɛ anɔ lɛ. (Romabii 13:1, 2) Yɛ bei komɛi amli lɛ, maŋkwramɔŋ hewalɛi lɛ po tsuɔ nii ni amɛhaa Nyɔŋmɔ yiŋtoi shwereɔ, aloo akɛ mɛi ni buɔ ewebii ahe. (Ezra 1:1-4; 7:12-26; Bɔfoi lɛ Asaji 25:11, 12; Kpojiemɔ 12:15, 16) Ni kɛlɛ, maŋkwramɔŋ nɔyelɔi pii ete shi ewo anɔkwale jamɔ waa, ni amɛjie amɛhe kpo akɛ Onufu lɛ seshi lɛ fa.—1 Yohane 5:19.

19. Atsɔɔ bɔ ni jeŋ hewalɛi lɛ ji yɛ Kpojiemɔ wolo lɛ mli yɛ mɛɛ gbɛ nɔ?

¹⁹ Adesa nɔyeli nine enyɛ shi yɛ gbɛ ni yɔɔ mɔbɔ nɔ ni enyɛɛɛ ni ekɛ miishɛɛ abaha adesai aloo ni eeena amɛhaomɔi lɛ anaa tsabaa yɛ gbɛ ko nɔ. Yehowa eŋmɛ adesai agbɛ koni amɛka nɔyelii sɔrɔtoi fɛɛ amɛkwɛ, shi ekpɛlɛɛɛ fitemɔ aloo gbɛ ni nɔyelii lɛ eye gbɔmɛi anɔ yɛ gbɛ ni ehiii nɔ lɛ nɔ. (Abɛi 22:22, 23) Kpojiemɔ feɔ jeŋ hewalɛi ni nyɛɔ mɛi anɔ lɛ he mfoniri akɛ amɛtamɔ kooloo ko ni he yɔɔ gbeyei ni woɔ ehe nɔ.—Kpojiemɔ 13:1, 2.

Pɛsɛmkunya Jarayelɔi Gbohii

20, 21. Mɛɛ kuu ni ji enyɔ esa akɛ akɛ amɛ afata “asafoiatsɛmɛi” lɛ kɛ “hewalɔi” lɛ ahe akɛ amɛfata Satan yiwalɛ seshi lɛ he, ni mɛni hewɔ?

²⁰ Mɛi ni kɛ amɛhe ekpɛtɛ maŋkwramɔŋ hiɛnyiɛlɔi lɛ ahe kpaakpa ni abayoo amɛ ji guɔyelɔi ni yeee anɔkwale. Nibii ni atsa shi ana yɛ blema Babilon ni etsɔ amaŋfɔ lɛ mli lɛ tsɔɔ akɛ jarayeli mli nitsumɔi ni shishiuɔ amɛnanemɛi gbɔmɛi yɛ gbɛi sɔrɔtoi anɔ lɛ fa babaoo yɛ nakai blema bei lɛ amli. Je lɛŋ jarayelɔi etee nɔ amɛtsu nii kɛha pɛsɛmkunya sɛɛnamɔ kɛbashi ŋmɛnɛŋmɛnɛ bei nɛɛ amli, ni maji pii yɛ ni amɛteŋ mɛi saŋŋ etsɔmɔ niiatsɛmɛi yɛ be mli ni gbɔmɛi lɛ ateŋ mɛi ni fa moŋ lɛ tswiaa shi yɛ ohia mli. Jarayelɔi kɛ guɔyeli nibii afeelɔi ena shika babaoo yɛ nɛkɛ yinɔ ni nilee ni akɛfeɔ nibii etee hiɛ waa nɛɛ mli kɛtsɔ tawuu nibii ni yɔɔ gbeyei ni kpataa nii ahiɛ ni amɛfeɔ amɛhaa maŋkwralɔi ni abuaa naa babaoo, ni tawuu nibii ni kpataa nii babaoo hiɛ ni amrɔ nɛɛ eha mɛi ehao waa fata he lɛ nɔ. Esa akɛ akɛ nɛkɛ nitsumɔtsɛmɛi hiɛjoolɔi kpanakpanaa nɛɛ kɛ mɛi krokomɛi ni tamɔ amɛ lɛ afata “asafoiatsɛmɛi” kɛ “hewalɔi” lɛ ahe akɛ amɛfata Satan yiwalɛ seshi lɛ he. Amɛ fɛɛ ji shikpɔŋ nɔ gbɛjianɔtoo lɛ ni Nyɔŋmɔ kɛ Kristo kojoɔ amɛ akɛ amɛsa hiɛkpatamɔ lɛ fa.—Kpojiemɔ 19:18.

²¹ Nɔ ni esa akɛ akɛfata maŋkwramɔ ni ekpɔtɔ lɛ kɛ jarayeli hiɛjoomɔ lɛ he ji adesai aweku lɛ fa ko ni gbeɔ yi feɔ etɛ ni sa Nyɔŋmɔ fɔbuu kojomɔ. Mɛni ji no? Nɔ ni Kpojiemɔ kɛɔ yɛ nɛkɛ jeŋ muu fɛɛ gbɛjianɔtoo ni ale lɛ jogbaŋŋ nɛɛ he lɛ baaha onaa akpɛ ohe.

Babilon Kpeteŋkpele Lɛ

22. Mɛɛ jamɔ nɛkɛ je shishi yɛ blema Babilon?

²² Shishijee Babilon maŋ lɛ too fe maŋkwramɔŋ nitsumɔ ko kɛkɛ. Akɛni ato maŋ lɛ ni akɛte shi awo Yehowa jeŋ muu fɛɛ maŋtsɛyeli hewɔ lɛ, ekɔɔ jamɔ he. Lɛlɛŋ akɛ, blema Babilon bafee wɔŋjamɔ aloo amaga jamɔ shikwɛɛ he. Esɔfoi loo ekɔmfoi lɛ tsɔɔ tsɔɔmɔi ni gbeɔ Nyɔŋmɔ he guɔ, tamɔ adesa susuma lɛ ni hiɔ shi yɛ gbele sɛɛ, ni akɛ yɛ no sɛɛ hu lɛ, naanɔ piŋmɔ he ni yɔɔ gbeyei ni daimonioi kwɛɔ jɛmɛ hu yɛ yɛ gbele sɛɛ. Amɛha bɔɔ nii kɛ agbɛnɛ nyɔŋmɔi kɛ nyɔŋmɔyei babaoo jamɔ shwere. Amɛtã adesai koni amɛkɛtsɔɔ shikpɔŋ lɛ kɛ gbɔmɔ ni yɔɔ nɔ lɛ shishijee ni amɛfee jamɔ mli kusum nibii sɔrɔtoi ni amɛsha afɔlei ni baa gbɔmɔ shi amɛha, kɛ yiŋtoo akɛ no baaha afɔ bii babaoo ni shikpɔŋ nɔ yibii babaoo hu aba, ni aye kunim yɛ tawuu mli.

23. (a) Yɛ be mli ni amɛjɛɔ Babilon amɛgbɛɔ amɛshwaa lɛ, mɛni gbɔmɛi lɛ kɛfata amɛhe kɛtee, ni mɛni jɛ mli ba? (b) Mɛɛ gbɛi Kpojiemɔ kɛtsɛɔ apasa jamɔ maŋtsɛyeli ko ni ekpele jeŋ muu fɛɛ lɛ? (d) Apasa jamɔ ewuu eshi mɛni yɛ be fɛɛ mli?

²³ Yɛ be mli ni wiemɔi sɔrɔtoi ni efee kui lɛ gbɛɔ shwaa kɛjɛɔ Babilon kɛyaa shikpɔŋ lɛ nɔ lɛ, amɛkɛ amɛ Babilon jamɔ lɛ fata amɛhe kɛtee. No hewɔ lɛ, kusum nifeemɔi kɛ hemɔkɛyelii ni tamɔ blema Babilon nɔ lɛ tee nɔ eshwere yɛ shikwɛɛbii ni hi Europa, Afrika kɛ Amerika kɛ Boka Gbɛ Shɔŋŋ kɛ Ŋshɔŋ Gbɛ maji lɛ anɔ lɛ ateŋ; ni nɛkɛ hemɔkɛyelii nɛɛ ekomɛi yɛ lolo kɛbashi ŋmɛnɛ. Belɛ esa jogbaŋŋ akɛ Kpojiemɔ aaawie jeŋ fɛɛ apasa jamɔ maŋtsɛyeli lɛ he akɛ maŋ ni atsɛɔ lɛ Babilon Kpeteŋkpele. (Kpojiemɔ yitsei 17, 18) He fɛɛ he ni aaatɛo apasa jamɔ yɛ lɛ, ekwɛ̃ɔ ni ewoɔ osɔfoyeli ko ni yi wa, apasa hemɔkɛyeli, kɛ nilee ni abɛ kɛ jeŋba shara. Efee dɛŋdade ko ni he wa waa yɛ Satan dɛ. Babilon Kpeteŋkpele lɛ ewuu waa eshi Jeŋ Muu Fɛɛ Nuŋtsɔ Yehowa anɔkwale jamɔ lɛ.

24. (a) Onufu lɛ nyɛ etswa yoo lɛ Seshi lɛ “nanetsitsi nɔ” yɛ mɛɛ gbɛ nɔ? (b) Mɛni hewɔ atsɔɔ yoo lɛ seshi lɛ nɔtswaa lɛ mli akɛ nanetsitsi pilamɔ pɛ lɛ?

²⁴ Akɛ Onufu lɛ seshi lɛ fa ni ahiɔ amɛ fe fɛɛ lɛ, woloŋmalɔi lɛ kɛ Farisifoi lɛ ni hi shi yɛ klɛŋklɛŋ afii oha lɛ mli Yuda jamɔ mli lɛ nyiɛ yiwaa ni akɛba yoo lɛ seshi lɛ najiaŋdamɔlɔ titri lɛ nɔ kɛ agbɛnɛ yɛ naagbee lɛ gbe ni agbe lɛ lɛ hiɛ. No hewɔ lɛ, Onufu lɛ nyɛ ‘etswa [“seshi”] lɛ nanetsitsi nɔ.’ (1 Mose 3:15; Yohane 8:39-44; Bɔfoi lɛ Asaji 3:12, 15) Mɛni hewɔ awie enɛ he akɛ nanetsitsi pilamɔ kɛkɛ lɛ? No ji akɛ nɛkɛ pilamɔ nɛɛ sa ehe yɛ be kukuoo ko pɛ mli yɛ shikpɔŋ nɛɛ nɔ. Ejeee nɔ ni hi shi kɛtee naanɔ ejaakɛ Yehowa tee Yesu shi yɛ gbi ni ji etɛ lɛ nɔ, ni ewo enɔ kɛtee mumɔŋ wala mli.—Bɔfoi lɛ Asaji 2:32, 33; 1 Petro 3:18.

25. (a) Yesu ni awo ehiɛ nyam lɛ ete shi ewo Satan kɛ ebɔfoi lɛ po momo yɛ mɛɛ gbɛ nɔ? (b) Mɛɛ be mli abaajie Satan shikpɔŋ nɔ seshi lɛ kɛya? (d) Kɛ Nyɔŋmɔ yoo lɛ Seshi lɛ tswa Satan, onufu lɛ “yitso” nɔ lɛ, mɛni no baatsɔɔ?

²⁵ Agbɛnɛ Yesu Kristo ni awo ehiɛ nyam lɛ miisɔmɔ yɛ Nyɔŋmɔ ninejurɔ nɔ, eekojo Yehowa henyɛlɔi lɛ. Efee nii eshi Satan kɛ ebɔfoi lɛ momo po, eshwie amɛ kɛjɛ ŋwɛi kɛba shikpɔŋ nɔ ni etsi amɛnitsumɔ lɛ naa ewo shikpɔŋ nɛɛ nɔ—ni enɛ hewɔ ni haomɔi babaoo efa yɛ wɔbe nɛɛ mli lɛ. (Kpojiemɔ 12:9, 12) Shi jiemɔ ni aaajie Satan shikpɔŋ nɔ seshi ni agba afɔ shi yɛ be mli ni Nyɔŋmɔ kɛ fɔbuu kojomɔ baa Babilon Kpeteŋkpele lɛ kɛ Satan gbɛjianɔtoo lɛ fai krokomɛi lɛ fɛɛ nɔ yɛ shikpɔŋ nɔ lɛ hu yɛ ni baaba. Yɛ naagbee lɛ, Nyɔŋmɔ yoo lɛ Seshi, Yesu Kristo, baatswa Satan, nakai blema onufu ni hiɛ etɛ lɛ “yitso nɔ,” ni no baatsɔɔ ehiɛkpatamɔ kwraa kɛ jiemɔ ni aaajie lɛ kwraa kɛaajɛ adesai asaji fɛɛ mli.—Romabii 16:20.

26. Mɛni hewɔ ehe hiaa waa akɛ wɔɔpɛi gbalɛ ni yɔɔ Kpojiemɔ lɛ mli lɛ?

²⁶ Mɛɛ gbɛ nɔ enɛɛmɛi fɛɛ baatsɔ aba yɛ? No ji nɔ ni ajie lɛ kpo aha wɔ yɛ Biblia mli wolo ni ji Kpojiemɔ lɛ mli lɛ. Ajie lɛ kpo atsɔɔ wɔ yɛ ninai sɔrɔtoi, ni akɛ okadii sɔrɔtoi ni yɔɔ naakpɛɛ tsɔɔ mli lɛ amli. Ha ni wɔkɛ hehiamɔ atao nɛkɛ gbalɛ ni mli wa nɛɛ mli. Miishɛɛ lɛlɛŋ ji wɔ nɔ̃ kɛji akɛ wɔnu ni wɔkɛ Kpojiemɔ mli wiemɔi lɛ tsu nii! Yɛ nakai feemɔ mli lɛ, wɔbaana gbɛfaŋnɔ yɛ Jeŋ Muu Fɛɛ Nuŋtsɔ Yehowa gbɛi lɛ hiɛ nyam ni awoɔ lɛ mli, ni wɔnine baashɛ enaanɔ jɔɔmɔi anɔ. Ofainɛ yaa nɔ okane ni okɛ nɔ ni okaneɔ lɛ atsu nii yɛ nilee mli. Ebaanyɛ etsɔɔ oyiwalaheremɔ yɛ adesa yinɔsane be ni eshɛ naagbee nɛɛ mli.

[Akrabatsa/Mfoniri ni yɔɔ baafa 13]

Blema niŋmaai ni kɔɔ nitsumɔ mli saji ahe

Wolo ni ji Ancient Near Eastern Texts ni James B. Pritchard ŋma lɛ eto mlai aaafee 300 ni Hammurabi bua naa yɛ Babilon bei amli lɛ naa. Enɛɛmɛi tsɔɔ akɛ ehe bahia ni awie ashi anɔkwale ni ayeee ni egbɛ eshwa babaoo yɛ jarayeli je lɛ ni yɔɔ nakai gbii lɛ amli lɛ. Kɛ wɔɔŋɔ nɔkwɛmɔnɔ kome lɛ: “Kɛji akɛ nuŋtsɔ loo ablade ko ehe loo enine eshɛ jwiɛtɛi loo shika aloo tsulɔ nuu loo tsulɔ yoo loo tsina loo too loo teji ko nɔ ni ehe aloo akɛha lɛ ni ekɛto ni ena enɛ kɛjɛ ablade loo nuŋtsɔ lɛ bii loo nuŋtsɔ loo ablade lɛ nyɔŋ ko dɛŋ ni odasefoi bɛ he ni gbeekpamɔ bɛ he lɛ, akɛni nuŋtsɔ loo ablade lɛ ji julɔ hewɔ lɛ, esa akɛ agbe lɛ.”

Yitso 3

Nii ni Sa akɛ Aba Mli Oya

 1. Te ooofee tɛŋŋ ojo Nyɔŋmɔ fɔbuu kojomɔ ni baa je nɛɛ nɔ lɛ naa foi?

ESA akɛ ofee mɔ ni susuɔ nibii ni yaa nɔ yɛ je lɛ mli ŋmɛnɛ lɛ he waa. Mɛni hewɔ? Ejaakɛ je nɛɛ nyɛŋ ajo Nyɔŋmɔ fɔbuu kojomɔ naa foi. Shi bo lɛ, obaanyɛ ojo naa foi. Obaanyɛ ofee enɛ kɛtsɔ ‘jeŋ’ ni abu lɛ fɔ aha hiɛkpatamɔ nɛɛ ‘fa’ ko ni ofeŋ lɛ nɔ. Enɛ etsɔɔɔ akɛ oooŋɔ osɔfoi mɔ kome shihilɛ gbɛ ni yɔɔ keketee lɛ eko. No tsɔɔ akɛ yɛ be mli ni onaa shihilɛ kpakpa ni shishinumɔ yɔɔ mli ni hi lɛ mli ŋɔɔmɔ lɛ, oootsi ohe kɛaajɛ maŋkwramɔ ni ekpɔtɔ nɛɛ, kɛaajɛ jarayeli hiɛjoomɔ, kɛ agbɛnɛ kɛaajɛ jamɔ ni gbeɔ Nyɔŋmɔ gbɛi lɛ he guɔ kɛ agbɛnɛ kɛaajɛ yiwalɛ kɛ jeŋba shara su ni yɔɔ lɛ he. Yɛ nakai beaŋ nɔŋŋ lɛ, esa akɛ odi Nyɔŋmɔ jeŋba he tɛi ni nɔ kwɔlɔ lɛ asɛɛ ni otao akɛ ooofee esuɔmɔnaa nii. (Yohane 17:14-16; Zefania 2:2, 3; Kpojiemɔ 21:8) Biblia mli wolo ni ji Kpojiemɔ tsɔɔ bɔ ni ehe hiaa kɛha bo akɛ okɛ enɛɛmɛi aaatsu nii koni ofee tsakemɔi ni he hiaa lɛ yɛ oshihilɛ gbɛ lɛ mli.

 2. Mɛɛ gbɛ nɔ bɔfo Yohane tsɔɔ ekpaa Kpojiemɔ gbalɛ ni yɔɔ nyam lɛ hiɛ yɛ, ni namɛi ji mɛi ni Nyɔŋmɔ kɛ shɛɛ saji ni he hiaa waa nɛɛ ha?

² Bɔfo Yohane kpaa nɛkɛ gbalɛ ni yɔɔ nyam nɛɛ hiɛ kɛ nɛkɛ wiemɔi nɛɛ: “Yesu Kristo kpojiemɔ ni Nyɔŋmɔ ŋɔ ha lɛ, ni ekɛtsɔɔ etsuji nii ni sa akɛ aba mli oya.” (Kpojiemɔ 1:1a) No hewɔ lɛ Yesu Kristo ni atee lɛ shi lɛ ji mɔ ni nine shɛ shɛɛ saji ni jɛ Nyɔŋmɔ ŋɔɔ ni hiɛdɔɔ yɔɔ mli nɛɛ nɔ. Akɛ mɔ ni fataaa Triniti teemɔŋ sane ko he lɛ, aatsɔɔ yɛ biɛ akɛ Yesu baa ehe shi ehaa e-Tsɛ lɛ. Nakai nɔŋŋ hu “tsuji” ni feɔ Kristofoi asafo lɛ baa amɛhe shi amɛhaa Yesu Kristo, no hewɔ lɛ ‘amɛnyiɛɔ esɛɛ kɛyaa he fɛɛ he ni eyaa.’ (Kpojiemɔ 14:4; Efesobii 5:24) Shi ŋmɛnɛ, namɛi ji Nyɔŋmɔ “tsuji” lɛ diɛŋtsɛ, ni Kpojiemɔ he baa sɛɛnamɔ kɛhaa amɛ yɛ mɛɛ gbɛ nɔ?

 3. (a) Namɛi ji “tsuji” ni baa amɛhe shi amɛhaa Yesu Kristo lɛ? (b) Mɛɛ nitsumɔ “tsuji” anɔkwafoi lɛ tsuɔ yɛ ŋwɛibɔfoi agbɛtsɔɔmɔ shishi?

³ Bɔfo Yohane ni ŋma Kpojiemɔ wolo lɛ efɔ shi lɛ tsɔɔ akɛ lɛ diɛŋtsɛ lɛ eji tsulɔ. Lɛ ji bɔfoi lɛ ateŋ naagbee mɔ ni yɔɔ wala mli kɛ “tsuji” akuu ni akɛ mumɔ efɔ amɛ mu ni ahala amɛ ni naa wala ni gbele bɛ mli yɛ ŋwɛi lɛ ateŋ mɔ kome. Ŋmɛnɛ, amɛteŋ mɛi akpei fioo ko pɛ eshwɛ yɛ shikpɔŋ lɛ nɔ lolo. Nyɔŋmɔ yɛ tsuji krokomɛi hu, hii, yei kɛ gbekɛbii ni feɔ asafo babaoo ko ni amrɔ nɛɛ amɛyibɔ shɛɔ akpekpei amli. Mɛnɛɛmɛi hu kɛ “tsuji” ni afɔ amɛ mu lɛ efee ekome kɛmiina naanɔ sanekpakpa kɛha adesai fɛɛ lɛ jajemɔ mli gbɛfaŋnɔ. Oo, kwɛ bɔ ni nɛkɛ “tsuji” nɛɛ fɛɛ kɛ amɛhe haa koni amɛye amɛbua shikpɔŋ lɛ nɔ heshibalɔi lɛ koni amɛnine ashɛ yiwalaheremɔ nɔ! (Mateo 24:14; Kpojiemɔ 7:9, 14; 14:6) Kpojiemɔ tsɔɔ nɔ ni esa akɛ ofee koni sanekpakpa ni kɛ miishɛɛ baa lɛ he aba sɛɛnamɔ aha bo.

 4. (a) Akɛni nɔ ni fa fe afii 1,900 eho momo yɛ be mli ni Yohane ŋma Kpojiemɔ lɛ hewɔ lɛ, te eeefee tɛŋŋ ewie “nii ni sa akɛ aba mli oya” lɛ he lɛ? (b) Mɛni odaseyelii lɛ tsɔɔ agbɛnɛ yɛ nibii ni agba afɔ shi lɛ ahe?

⁴ Te aaafee tɛŋŋ ni Yohane aaanyɛ akɛɛ akɛ akɛ “nii ni sa akɛ aba mli oya” baatsɔɔ nɛkɛ “tsuji” nɛɛ? Ani jeee nɔ ni fa fe afii 1,900 nɛ ni ajaje nakai wiemɔi lɛ? Yɛ Yehowa, ni ehiɛ lɛ afii akpe tamɔ “nyɛ kpaakpa nyɛ” lɛ susumɔ naa lɛ, afii 1,900 lɛ ji be kuku kɛ akɛto yinɔi babaoo ni ekɛbɔ nii koni ekɛsaa shikpɔŋ nɛɛ eha adesai ni baahi nɔ lɛ he lɛ. (Lala 90:4) Bɔfo Paulo ŋma yɛ lɛ diɛŋtsɛ ‘egbɛkwɛmɔ kɛ nɔhiɛkamɔ’ he, ejaakɛ ŋwanejee ko bɛ he akɛ etamɔ nɔ ni enyɔmɔwoo lɛ ebɛŋkɛ lɛ diɛŋtsɛ. (Filipibii 1:20) Shi, ŋmɛnɛ, odaseyelii babaoo yɛ ni tsɔɔ akɛ nibii fɛɛ ni agba afɔ shi lɛ baaba mli yɛ ebe naa pɛpɛɛpɛ. Be ko bako yɛ adesa yinɔsane mli ni oshara eba adesai ayiwalaheremɔ he nɛkɛ. Nyɔŋmɔ pɛ ji mɔ ni yɔɔ tsabaa lɛ!—Yesaia 45:21.

Adafitswaa Gbɛ ni Atsɔ nɔ Akɛha

 5. Mɛɛ gbɛ nɔ atsɔ akɛ Kpojiemɔ lɛ ha bɔfo Yohane kɛ agbɛnɛ kɛha asafoi lɛ?

⁵ Kpojiemɔ 1:1b, 2 (New World Translation) yaa nɔ akɛ: “Ni [Yesu] ekɛtsu ebɔfo lɛ ni ekɛ [Kpojiemɔ] abatsɔɔ etsulɔ Yohane, mɔ ni ye Nyɔŋmɔ wiemɔ lɛ kɛ Yesu Kristo odase lɛ he odase, yɛ nibii fɛɛ ni ena lɛ hewɔ lɛ yɛ okadii amli.” No hewɔ lɛ Yohane nine shɛ niŋmaa ni jɛ mumɔŋ lɛ nɔ kɛtsɔ tsulɔ ko ni ji ŋwɛibɔfo nɔ. Eŋma yɛ wolo mli, ni ekɛyaha asafoi ni yɔɔ ebe mli lɛ. Yɛ miishɛɛ mli lɛ, Nyɔŋmɔ ebaa yi koni akɛwo etsuji ni efee ekome ni yɔɔ shikpɔŋ nɔ ŋmɛnɛ lɛ asafoi aaafee 100,000 lɛ hewalɛ.

 6. Mɛɛ gbɛ nɔ Yesu tsɔ eha ayoo adafitswaa gbɛ ni ekɛbaatsu nii ni ekɛ mumɔŋ niyenii aha ‘etsuji’ ŋmɛnɛ lɛ yɛ?

⁶ Nyɔŋmɔ yɛ adafitswaa gbɛ ni ebaatsɔ nɔ ni ekɛ Kpojiemɔ lɛ aha yɛ Yohane gbii lɛ amli, ni Yohane ji nakai gbɛ lɛ fa ni yɔɔ shikpɔŋ nɔ. Nakai nɔŋŋ hu, Nyɔŋmɔ yɛ adafitswaa gbɛ ni etsɔɔ nɔ ekɛ mumɔŋ niyenii haa ‘etsuji’ ŋmɛnɛ. Yɛ Yesu gbalɛ kpeteŋkpele ni kɔɔ nibii agbɛjianɔtoo lɛ naagbee lɛ he lɛ, eha ayoo shikpɔŋ nɔ adafitswaa gbɛ nɛɛ akɛ “tsulɔ anɔkwafo kɛ nilelɔ, mɔ ni enuŋtsɔ ŋɔ lɛ eto ewebii anɔ, koni eha amɛ amɛŋmaa yɛ be ni sa nɔ.” (Mateo 24:3, 45-47) Ekɛ nɛkɛ Yohane kuu nɛɛ tsuɔ nii ni ekɛjieɔ gbalɛ lɛ shishinumɔ lɛ kpo.

 7. (a) Te esa akɛ okadii ni ana yɛ Kpojiemɔ lɛ asa wɔhe aha tɛŋŋ? (b) Bei enyiɛ nɛ ni Yohane kuu lɛ mlibii lɛ ekomɛi ená ninaai ni yɔɔ Kpojiemɔ lɛ mlibaa lɛ mli gbɛfaŋnɔ?

⁷ Bɔfo Yohane ŋma akɛ Yesu kɛ Kpojiemɔ lɛ ha yɛ “okadii” loo nɔkwɛmɔ nii amli. Enɛɛmɛi amlipɛimɔ kanyaa mɔ waa ni eyɛ miishɛɛ hu. Amɛtsɔɔ nifeemɔi ni hewalɛ yɔɔ mli ni sa akɛ akanya wɔ hu ni wɔkɛ ekaa kɛ mɔdɛŋbɔɔ aha mɛi krokomɛi ale gbalɛ lɛ kɛ eshishinumɔ. Kpojiemɔ kɛ ninaai sɔrɔtoi abɔ ni kanyaa mɔ haa wɔ, ni Yohane ná eko fɛɛ eko mli gbɛfaŋnɔ, ekolɛ akɛ mɔ ni kɛ ehe woɔ mli waa loo mɔ ni kwɛɔ nɔ ni yaa nɔ lɛ. Yohane kuu lɛ mlibii, ni amɛteŋ mɛi komɛi kɛ afii nyɔŋmai abɔ ená ninaai nɛɛ amlibaa mli gbɛfaŋnɔ lɛ yɛ miishɛɛ akɛ Nyɔŋmɔ mumɔ lɛ ejie amɛshishinumɔ lɛ kpo bɔni afee ni amɛnyɛ amɛtsɔɔ mli amɛha mɛi krokomɛi.

 8. (a) Mɛni yɔɔ faŋŋ yɛ Kpojiemɔ ninaai lɛ eko fɛɛ eko he? (b) Mɛɛ gbɛ nɔ Daniel gbalɛ lɛ yeɔ ebuaa wɔ koni wɔnu nɔ ni Kpojiemɔ mli kooloi lɛ ji lɛ shishi?

⁸ Akɛ ninaai ni yɔɔ Kpojiemɔ nɛɛ haaa yɛ be ni amɛba mli lɛ naa. Eko fɛɛ eko yɛ lɛ diɛŋtsɛ ebe ni ekɛbaaba mli. Ninaai lɛ pii amli wiemɔi lɛ haa wɔnuɔ gbalɛi komɛi ni atsɔ hiɛ akɛha ni haa wɔyooɔ amɛshishitsɔɔmɔ. Akɛ nɔkwɛmɔnɔ lɛ, Daniel gbalɛ lɛ tsɔɔ kooloi ejwɛ komɛi ni he yɔɔ gbeyei, ni etsɔɔ mli akɛ enɛɛmɛi damɔ shi kɛha shikpɔŋ nɔ hewalɛi ni yeɔ nɔ. No hewɔ lɛ, eyeɔ ebuaa wɔ ni wɔnuɔ shishi akɛ kooloi ni yɔɔ Kpojiemɔ lɛ damɔ shi kɛha maŋkwramɔŋ hewalɛi, ni nɔ ni yɔɔ bianɛ lɛ fata he.—Daniel 7:1-8, 17; Kpojiemɔ 13:2, 11-13; 17:3.

 9. (a) Mɛɛ su Yohane kuu lɛ ejie lɛ kpo tamɔ Yohane nɔŋŋ? (b) Yohane tsɔɔ wɔ gbɛ ni wɔɔtsɔ nɔ wɔna miishɛɛ lɛ yɛ mɛɛ gbɛ nɔ?

⁹ Yohane ye anɔkwale yɛ shɛɛ sane ni Nyɔŋmɔ tsɔ Yesu Kristo nɔ ekɛha lɛ ni ekɛye odase lɛ mli. Etsɔɔ “nibii fɛɛ ni ena” lɛ mli fitsofitso. Yohane kuu lɛ etee nɔ amɛkɛ anɔkwayeli etao gbɛtsɔɔmɔ kɛtsɔ Nyɔŋmɔ kɛ Yesu Kristo dɛŋ bɔni afee ni amɛnu gbalɛ lɛ shishi jogbaŋŋ ni amɛha Nyɔŋmɔ webii lɛ ale emli saji otii ni he hiaa lɛ. Kɛha asafo ni afɔ amɛ mu lɛ (kɛ agbɛnɛ asafo babaoo ni jɛ majimaji ateŋ ni Nyɔŋmɔ baabaa amɛyi kɛtsɔ amanehulu kpeteŋkpele lɛ mli lɛ) asɛɛnamɔ hewɔ lɛ, Yohane ŋma akɛ: “Miishɛɛ ji mɔ ni kaneɔ lɛ kɛ mɛi ni nuɔ gbalɛ wiemɔi nɛɛ, kɛ mɛi ni yeɔ nibii ni aŋmala yɛ mli lɛ anɔ lɛ, ejaakɛ be ni ato lɛ eshɛ eta.”—Kpojiemɔ 1:3, New World Translation.

10. Mɛni esa akɛ wɔfee yɛ Kpojiemɔ lɛ he ni wɔna miishɛɛ?

¹⁰ Kɛ okane Kpojiemɔ, ni titri lɛ hu kɛ oye wiemɔi ni aŋma yɛ mli lɛ anɔ lɛ, ehe baaba sɛɛnamɔ babaoo aha bo. Yohane tsɔɔ mli yɛ ewoji ni eŋmala lɛ ekome mli: “Enɛ ji Nyɔŋmɔ suɔmɔ lɛ, akɛ wɔye ekitai lɛ anɔ; ni ekitai lɛ waaa, ejaakɛ nɔ fɛɛ nɔ ni ajɛ Nyɔŋmɔ mli afɔ lɛ lɛ, eyeɔ je lɛ nɔ kunim; ni wɔ hemɔkɛyeli lɛ ji nɔ ni wɔkɛyeɔ je lɛ nɔ kunim.” (1 Yohane 5:3, 4) Kɛ ona hemɔkɛyeli ni tamɔ nɛkɛ lɛ, obaana miishɛɛ babaoo diɛŋtsɛ!

11. (a) Mɛni hewɔ ni ehe hiaa akɛ wɔɔye gbalɛ lɛ mli wiemɔi lɛ anɔ lɛ? (b) Mɛɛ be bɛŋkɛɔ wɔ kɛ foi yɛ gbɛ ni yɔɔ gbeyei nɔ lɛ?

¹¹ Ehe miihia waa ni wɔye gbalɛ lɛ mli wiemɔi lɛ anɔ, “ejaakɛ be ni ato lɛ eshɛ eta.” Be ni ato kɛha mɛni? Koni Kpojiemɔ mli gbalɛi ni Nyɔŋmɔ kojomɔi fata he lɛ aba mli. Be eshɛ ni Nyɔŋmɔ kɛ Yesu Kristo kɛ naagbee fɔbuu kojomɔ baaba Satan jeŋ gbɛjianɔtoo lɛ nɔ. Beni Yesu yɔɔ shikpɔŋ nɛɛ nɔ lɛ, ejaje akɛ Tsɛ lɛ pɛ le “no gbi lɛ kɛ no ŋmɛlɛtswaa lɛ.” Yɛ be mli ni ekwɛɔ haomɔ be ni baafa yɛ shikpɔŋ nɔ yɛ wɔbe nɛɛ mli lɛ, Yesu kɛɛ hu akɛ: “Yinɔ nɛɛ hoŋ, ja nii nɛɛ fɛɛ eba mli da.” No hewɔ lɛ be ni ato ni Nyɔŋmɔ kɛbaatsu eyiŋtoo he nii lɛ miibɛŋkɛ yɛ gbɛ ni yɔɔ gbeyei nɔ. (Marko 13:8, 30-32) Taakɛ Habakuk 2:3 jaje lɛ: “Shi ninaa lɛ yɛ ha be ni ato lɛ kɛ̃, ni eeye oyai ni eshɛ enaagbee, ni emaleŋ; kɛ eshashao shi hu ji, mɛɛ lɛ kɛ̃; ejaakɛ ebaaba lɛlɛŋ, ekpeŋ sɛɛ!” Wɔ yiwalaheremɔ kɛmiitsɔ amanehulu kpeteŋkpele lɛ mli lɛ damɔ Nyɔŋmɔ gbalɛ Wiemɔ lɛ mli wiemɔi lɛ atoiboo nɔ.—Mateo 24:20-22.

[Akrabatsa ni yɔɔ baafa 15]

Bɔni afee ni wɔnu Kpojiemɔ wolo lɛ shishi lɛ ehe miihia ni

● Wɔnine ashɛ Yehowa mumɔ lɛ yelikɛbuamɔ nɔ

● Wɔyoo be mli ni Nuŋtsɔ lɛ gbi lɛ je shishi

● Wɔyoo tsulɔ anɔkwafo kɛ nilelɔ lɛ ŋmɛnɛ

Yitso 4

Yesu Kɛ Hewalɛwoo Ba

 1. Namɛi Yohane ŋma amɛ agbɛnɛ lɛ, ni namɛi ŋmɛnɛ esa akɛ amɛna nɛkɛ shɛɛ saji nɛɛ ahe miishɛɛ waa lɛ?

ESA akɛ nɔ ni nyiɛ sɛɛ nɛɛ afee nɔ ko ni mɔ fɛɛ mɔ ni kɛ ehe ebɔ Nyɔŋmɔ webii asafoi lɛ ahe ŋmɛnɛ lɛ ana he miishɛɛ waa. Naa shɛɛ saji sɔrɔtoi. Amɛkɔɔ nibii pɔtɛɛ ahe yɛ be mli ni “be ni ato” lɛ bɛŋkɛɔ lɛ. (Kpojiemɔ 1:3) Eji nɔ ni yɛ kɛha wɔnaanɔ sɛɛnamɔ akɛ wɔɔbo nakai wiemɔi lɛ atoi. Nɔ ni aŋma afɔ shi lɛ kaneɔ akɛ: “Yohane ŋma yaha asafoi kpawo ni yɔɔ Asia lɛ: Duromɔ kɛ hejɔlɛ aha nyɛ, kɛjɛ mɔ ni yɔɔ lɛ kɛ mɔ ni yɛ lɛ kɛ mɔ ni baaba lɛ dɛŋ, ni kɛjɛ mumɔi kpawo ni yɔɔ emaŋtsɛsɛi lɛ hiɛ lɛ ŋɔɔ, ni kɛjɛ Yesu Kristo . . . dɛŋ.”—Kpojiemɔ 1:4, 5a.

 2. (a) Mɛni yibɔ ni ji “kpawo” lɛ tsɔɔ? (b) Shɛɛ saji ni akɛyaha “asafoi kpawo” lɛ kɔɔ namɛi ahe ŋmɛnɛ yɛ Nuŋtsɔ lɛ gbi nɛɛ mli?

² Yohane ŋma yaha “asafoi kpawo” lɛ, ni atsi asafoi nɛɛ ata aha wɔ yɛ sɛɛ mli gbalɛ lɛ mli. Afɔɔ yibɔ “kpawo” lɛ tatsii yɛ Kpojiemɔ. Edamɔ shi kɛha emuuyeli, titri lɛ nibii ni kɔɔ Nyɔŋmɔ kɛ esafo ni efɔ amɛ mu lɛ ahe. Akɛni Nyɔŋmɔ webii asafoi ni yɔɔ jeŋ fɛɛ lɛ ayi efa kɛyashɛ akpei nyɔŋmai abɔ yɛ Nuŋtsɔ lɛ gbi lɛ mli hewɔ lɛ, wɔbaanyɛ wɔna nɔmimaa akɛ nɔ ni akɛɔ mɛi ni afɔ amɛ mu lɛ “asafoi kpawo” lɛ titri lɛ hu kɔɔ Nyɔŋmɔ webii fɛɛ he ŋmɛnɛ. (Kpojiemɔ 1:10) Hɛɛ, Yohane yɛ sane ko ni he hiaa waa kɛha Yehowa Odasefoi asafoi fɛɛ kɛ mɛi fɛɛ ni kɛ amɛhe ebɔ amɛhe lɛ yɛ he fɛɛ he yɛ shikpɔŋ lɛ nɔ.

 3. (a) Yɛ Yohane ŋamɔ lɛ mli lɛ, nɛɛgbɛ “duromɔ kɛ hejɔlɛ” baa kɛjɛɔ? (b) Mɛɛ bɔfo Paulo wiemɔi komɛi tamɔ Yohane ŋamɔi nɛɛ nɔŋŋ?

³ “Duromɔ kɛ hejɔlɛ”—kwɛ bɔ ni asumɔɔ enɛɛmɛi ahaa titri lɛ kɛ wɔyoo he ni amɛjɛ lɛ! “Mɔ” ni enɛɛmɛi fɛɛ jɛ eŋɔɔ ji Nuŋtsɔ Maŋtsɛ Yehowa diɛŋtsɛ, mɔ ni ji “naanɔi a-Maŋtsɛ” lɛ, ni hiɔ shi “kɛjɛ naanɔ kɛyaa naanɔ” lɛ. (1 Timoteo 1:17; Lala 90:2) Mɛi ni enɛ kɔɔ amɛhe yɛ biɛ hu ji “mumɔi kpawo” ni tsɔɔ Nyɔŋmɔ nifeemɔ hewalɛ loo mumɔ krɔŋkrɔŋ lɛ nitsumɔ yɛ emuuyeli mli yɛ be mli ni ekɛ shishinumɔ kɛ jɔɔmɔ bahaa mɛi fɛɛ ni boɔ gbalɛ lɛ mli wiemɔi lɛ atoi lɛ. Mɔ ni ekɔɔ ehe titri hu ji “Yesu Kristo,” ni Yohane ŋma yɛ ehe yɛ sɛɛ mli nɛkɛ lɛ: “Ni duromɔ kɛ anɔkwale eyi lɛ obɔ.” (Yohane 1:14) No hewɔ lɛ, nɔ ni yɔɔ Yohane ŋamɔi lɛ amli lɛ tamɔ nɔ ni bɔfo Paulo tsi ta ekɛgbe wolo ni ji enyɔ ni eŋma eyaha Korinto asafo lɛ naa lɛ: “Nuŋtsɔ Yesu Kristo duromɔ lɛ kɛ Nyɔŋmɔ suɔmɔ lɛ kɛ mumɔ krɔŋkrɔŋ lɛ naanyobɔɔ lɛ kɛ nyɛ fɛɛ ahi shi.” (2 Korintobii 13:13) Eba akɛ nɛkɛ wiemɔi nɛɛ hu aaakɔ wɔteŋ mɔ fɛɛ mɔ ni sumɔɔ anɔkwale lɛ ŋmɛnɛ lɛ he!—Lala 119:97.

“Odasefonyo Anɔkwafo Lɛ”

 4. Te Yohane tee nɔ etsɔɔ bɔ ni Yesu Kristo ji lɛ mli eha tɛŋŋ, ni mɛni hewɔ bɔ ni etsɔɔ mli eha lɛ sa jogbaŋŋ lɛ?

⁴ Yɛ Yehowa sɛɛ lɛ, Yesu ji mɔ ni hiɛ yɔɔ nyam fe fɛɛ yɛ jeŋ muu fɛɛ taakɛ Yohane yɔseɔ lɛ ni etsɔɔ bɔ ni eji lɛ mli akɛ “‘Odasefonyo Anɔkwafo lɛ,’ ‘Gbohii ateŋ kromɔbi,’ kɛ ‘Shikpɔŋ lɛ nɔ maŋtsɛmɛi lɛ anɔyelɔ lɛ.’” (Kpojiemɔ 1:5b) Akɛ lɛ ema shi shiŋŋ akɛ Odasefonyo kpeteŋkpele kɛha Nyɔŋmɔ ni Yehowa ji lɛ tamɔ nyɔŋtsere ni yɔɔ ŋwɛi lɛ. (Lala 89:38) Yɛ be mli ni ehiɛ emuuyeli mli aahu kɛtee afɔleshaa gbele mli lɛ sɛɛ lɛ, ebafee adesai ateŋ klɛŋklɛŋ mɔ ni atee lɛ shi kɛtee mumɔŋ wala ni gbele bɛ mli lɛ mli. (Kolosebii 1:18) Agbɛnɛ ni eyɔɔ Yehowa hiɛ nɛɛ, awo enɔ kɛteke shikpɔŋ lɛ nɔ maŋtsɛmɛi fɛɛ, ni ‘aŋɔ ŋwɛi kɛ shikpɔŋ nɔ . . . hegbɛ fɛɛ aha lɛ.’ (Mateo 28:18; Lala 89:28; 1 Timoteo 6:15) Awo lɛ akɛ Maŋtsɛ yɛ 1914 koni eye shikpɔŋ nɔ jeŋmaji lɛ anɔ.—Lala 2:6-9.

 5. (a) Yohane tee nɔ ejie hiɛsɔɔ kpo etsɔɔ Nuŋtsɔ Yesu Kristo yɛ mɛɛ gbɛ nɔ? (b) Yesu nikeenii ni ji ewala akɛ adesa ni yeɔ emuu lɛ he baa sɛɛnamɔ kɛhaa namɛi, ni Kristofoi ni afɔ amɛ mu lɛ ena jɔɔmɔi krɛdɛɛ mli gbɛfaŋnɔ yɛ mɛɛ gbɛ nɔ?

⁵ Yohane tee nɔ etsɔɔ hiɛsɔɔ eha Nuŋtsɔ Yesu Kristo yɛ nɛkɛ miishɛɛ wiemɔi nɛɛ amli: “Mɔ ni sumɔɔ wɔ, ni ekɛ lɛ diɛŋtsɛ ela etsuu wɔhe kɛjɛ wɔhe eshai lɛ amli,—ni eŋɔ wɔ efee maŋtsɛmɛi, kɛ osɔfoi eha e-Tsɛ Nyɔŋmɔ lɛ,—lɛ aŋɔ anunyam kɛ nɔyeli lɛ aha kɛyashi naanɔi anaanɔ! Amen.” (Kpojiemɔ 1:5d, 6) Yesu kɛ adesa wala ni yeɔ emuu ni eyɔɔ lɛ ha koni asaa akɛ adesai aje lɛ mli mɛi ni heɔ enɔ yeɔ lɛ aba wala ni yeɔ emuu mli ekoŋŋ. Bo, nikanelɔ ni asumɔɔ bo, obaanyɛ ofata enɛ he! (Yohane 3:16) Shi Yesu afɔleshaa gbele lɛ gbele gbɛ kɛha jɔɔmɔ krɛdɛɛ ko ni baaba mɛi ni batsɔmɔɔ Kristofoi ni afɔ amɛ mu tamɔ Yohane lɛ anɔ. Atsɔ Yesu kpɔmɔ afɔleshaa lɛ nɔ abu mɛnɛɛmɛi jalɔi. Akɛni amɛkpoo shikpɔŋ nɔ wala gbɛkpamɔi fɛɛ, taakɛ Yesu fee lɛ hewɔ lɛ, akɛ Nyɔŋmɔ mumɔ krɔŋkrɔŋ lɛ efɔ́ asafo kuu bibioo lɛ, kɛ gbɛkpamɔ akɛ abaatee amɛ shi ni amɛyasɔmɔ akɛ maŋtsɛmɛi kɛ osɔfoi kɛ Yesu Kristo yɛ e-Maŋtsɛyeli lɛ mli. (Luka 12:32; Romabii 8:18; 1 Petro 2:5; Kpojiemɔ 20:6) Mɛɛ hegbɛ kpeteŋkpele po nɛ! Ŋwanejee ko bɛ he akɛ no hewɔ ni Yohane jaje kɛ nɔmimaa akɛ anunyam lɛ kɛ hewalɛ lɛ ji Yesu nɔ lɛ!

“Naa Eeba kɛ Atatui Lɛ”

 6. (a) Mɛni Yohane tswa he adafi yɛ Yesu ni “eeba yɛ ŋwɛi atatui lɛ anɔ” lɛ he, ni mɛɛ Yesu gbalɛ ko Yohane baanyɛ akai lɛ? (b) Yesu ‘baa’ yɛ mɛɛ gbɛ nɔ, ni namɛi baawo yara babaoo yɛ shikpɔŋ nɔ lɛ?

⁶ No sɛɛ lɛ, Yohane kɛ miishɛɛ tswa adafi akɛ: “Naa, eeba kɛ atatui lɛ ni hiŋmɛi fɛɛ hiŋmɛi aaana lɛ kɛ mɛi ni tsurɔ lɛ nii lɛ hu; shikpɔŋ lɛ nɔ akutsei lɛ fɛɛ aaawo yara yɛ ehewɔ. Hɛɛ, Amen.” (Kpojiemɔ 1:7) Ŋwanejee ko bɛ he akɛ akai Yohane Yesu gbalɛ ni etsɔ hiɛ ekɛha ni kɔɔ nibii agbɛjianɔtoo lɛ naagbee lɛ he lɛ yɛ biɛ. Yesu jaje akɛ: “Kɛkɛ ni gbɔmɔ bi lɛ okadi lɛ aaapue yɛ ŋwɛi, ni no lɛ shikpɔŋ lɛ nɔ akutsei lɛ fɛɛ aaawo yara, ni amɛaana gbɔmɔ bi lɛ akɛ eeba yɛ ŋwɛi atatui lɛ anɔ kɛ hewalɛ kɛ anunyam babaoo.” (Mateo 24:3, 30) No hewɔ lɛ Yesu ‘baa’ kɛtsɔɔ ejwɛŋmɔ ni egbalaa kɛyaa Yehowa kojomɔi ni ekɛbaa jeŋmaji lɛ anɔ lɛ nɔ. Nɔ ni baajɛ enɛ mli aba ji tsakemɔi yɛ shikpɔŋ nɔ yɛ naakpɛɛ gbɛ nɔ, ni akɛni “shikpɔŋ lɛ nɔ akutsei fɛɛ” ekpoo ba ni Yesu eba maŋtsɛyeli hewalɛ mli nɛɛ hewɔ lɛ, “Nyɔŋmɔ Ofe lɛ mlifu ni naa wa lɛ” baaba amɛnɔ diɛŋtsɛ.—Kpojiemɔ 19:11-21; Lala 2:2, 3, 8, 9.

 7. “Hiŋmɛi fɛɛ hiŋmɛi” ni toigbolɔi anɔ lɛ fata he lɛ “hu aaana” Yesu yɛ mɛɛ gbɛ nɔ?

⁷ Yesu kɛɛ ekaselɔi lɛ yɛ enaagbee gbɛkɛ ni ekɛ amɛ ye lɛ mli akɛ: “Eshwɛ fioo kɛkɛ ni je lɛ enaŋ mi dɔŋŋ.” (Yohane 14:19) Belɛ te feɔ tɛŋŋ ni “hiŋmɛi fɛɛ hiŋmɛi aaana lɛ” lɛ? Esaaa akɛ wɔkpaa gbɛ akɛ Yesu henyɛlɔi lɛ kɛ amɛhiŋmɛi diɛŋtsɛ nɛɛ baana lɛ, ejaakɛ bɔfo Paulo kɛɛ, yɛ be mli ni Yesu ekwɔ kɛtee ŋwɛi lɛ akɛ, agbɛnɛ Yesu “hiɔ la ni anyɛŋ abɛŋkɛ lɛ mli,” “mɔ ni gbɔmɔ ko gbɔmɔ ko enako lɛ da, ni enyɛŋ lɛ ena hu lɛ.” (1 Timoteo 6:16) Eka shi faŋŋ akɛ, Yohane kɛ ‘na’ lɛ miitsɔɔ ‘eyoomɔ,’ taakɛ bɔ ni wɔnyɛɔ wɔnaa loo wɔyooɔ Nyɔŋmɔ sui ni anaaa lɛ kɛtsɔɔ ebɔɔnii anɔ lɛ. (Romabii 1:20) Yesu ‘miiba kɛ atatui’ ni tsɔɔ akɛ ebaafee mɔ ni hiŋmɛi diɛŋtsɛ nɛɛ nyɛŋ lɛ ana taakɛ bɔ ni kɛ hulu yaje atatui asɛɛ lɛ anyɛɛɛ ana lɛ. Kɛ atatui tsi hulu hiɛ yɛ jetsɛremɔ mli po lɛ, wɔle akɛ eyɛ jɛmɛ ejaakɛ jetsɛremɔ la lɛ kpɛɔ kɛbɔleɔ wɔhe. Nakai nɔŋŋ hu, eyɛ mli akɛ anaaa Nuŋtsɔ Yesu moŋ, shi abaajie lɛ kpo tamɔ ‘lalilɛi yɛ be mli ni ekɛ oweletɔɔ baa mɛi ni booo ehe sanekpakpa lɛ toi lɛ anɔ lɛ.’ Abaanyɛ mɛnɛɛmɛi hu nɔ koni “amɛna lɛ.”—2 Tesalonikabii 1:6-8; 2:8, New World Translation.

 8. (a) Namɛi ji “mɛi ni tsurɔ lɛ nii” yɛ afi 33 Ŋ.B. lɛ, ni namɛi ji nakai mɛi lɛ ŋmɛnɛ? (b) Akɛni Yesu bɛ shikpɔŋ nɛɛ nɔ dɔŋŋ hewɔ lɛ, te aaafee tɛŋŋ ni gbɔmɛi ‘aaatsurɔ lɛ nii’ hu?

⁸ “Mɛi ni tsurɔ lɛ nii” lɛ hu ‘baana’ Yesu. Namɛi ji mɛnɛɛmɛi? Beni agbe Yesu yɛ afii 33 Ŋ.B. lɛ, Romabii lɛ kɛ akpɔlɔ tsurɔ lɛ diɛŋtsɛ. Egbee lɛ he fɔ lɛ ka Yudafoi lɛ hu nɔ, ejaakɛ Petro kɛɛ amɛteŋ mɛi komɛi yɛ Pentekoste akɛ: “Nyɔŋmɔ eŋɔ nɛkɛ Yesu ni nyɛsɛŋ lɛ nɛɛ efee Nuŋtsɔ kɛ Kristo fɛɛ.” (Bɔfoi lɛ Asaji 2:5-11, 36; okɛto Zakaria 12:10; Yohane 19:37 he.) Nakai Romabii lɛ kɛ Yudafoi lɛ egboi bianɛ yɛ nɔ ni miihe ashɛ afii 2,000 nɛ. No hewɔ lɛ ‘mɛi ni tsurɔ lɛ nii’ ŋmɛnɛ lɛ damɔ shi kɛha jeŋmaji kɛ gbɔmɛi ni jieɔ nakai nyɛɛ su lɛ nɔŋŋ ni ajie lɛ kpo atsɔɔ Yesu beni asɛŋ lɛ lɛ. Yesu bɛ shikpɔŋ nɛɛ nɔ dɔŋŋ. Shi kɛ shitee-kɛ-wolɔi wa Yehowa Odasefoi ni yeɔ Yesu he odase lɛ ayi aloo amɛkpɛlɛ niseniianii ni afee amɛ lɛ nɔ ŋmɛnɛ lɛ, belɛ etamɔ nɔ ni shitee-kɛ-wolɔi nɛɛ ‘miitsurɔ’ Yesu diɛŋtsɛ ‘nii.’—Mateo 25:33, 41-46.

“Alfa lɛ kɛ Omega Lɛ”

 9. (a) Namɔ wieɔ agbɛnɛ lɛ, ni shii enyiɛ efeɔ nakai yɛ Kpojiemɔ? (b) Mɛni Yehowa tsɔɔ, beni etsɛɔ lɛ diɛŋtsɛ ehe akɛ “Alfa lɛ kɛ Omega lɛ” kɛ “Ofe” lɛ?

⁹ Agbɛnɛ, naakpɛɛ nii amli naakpɛɛ nii! Nuŋtsɔ Yehowa Maŋtsɛ lɛ diɛŋtsɛ miiwie. Kwɛ bɔ ni enɛ sa jogbaŋŋ akɛ nɔ ko ni tsɔɔ ninaai ni baaje kpo lɛ hiɛ, ejaakɛ lɛ ji wɔ Jeŋ Muu Fɛɛ Tsɔɔlɔ kɛ Kpojiemɔ fɛɛ Jɛɛhe! (Yesaia 30:20) Wɔ Nyɔŋmɔ lɛ jajeɔ akɛ: “Mi ji Alfa lɛ kɛ Omega lɛ, . . . Mɔ ni yɔɔ lɛ kɛ Mɔ ni yɛ lɛ kɛ Mɔ ni baaba lɛ . . . Ofe lɛ.” (Kpojiemɔ 1:8) Enɛ ji shii etɛ ni Yehowa diɛŋtsɛ wieɔ kɛjɛɔ ŋwɛi yɛ Kpojiemɔ lɛ mli klɛŋklɛŋ nɔ. (Kwɛmɔ Kpojiemɔ 21:5-8; 22:12-15 hu.) Klɛŋklɛŋ afii oha lɛ mli Kristofoi lɛ baayoo alfa kɛ omega akɛ Hela alfabeta lɛ mli klɛŋklɛŋ nɔ kɛ naagbee nɔ lɛ oya. Yehowa ni kɛ nɛkɛ niŋmaai okadii enyɔ nɛɛ tsɛɔ lɛ diɛŋtsɛ ehe lɛ maa nɔ mi akɛ Nyɔŋmɔ ofe ko tsɔko ehiɛ, ni eko hu baŋ yɛ esɛɛ. Ekɛ sane ni kɔɔ Nyɔŋmɔyeli he lɛ baaba naagbee yɛ omanyeyeli mli kɛya naanɔ. Abaabu lɛ bem akɛ Nyɔŋmɔ Ofe kome pɛ ni yɔɔ, Jeŋ Muu Fɛɛ Maŋtsɛ ni yeɔ ebɔɔnii fɛɛ nɔ.—Okɛto Yesaia 46:10; 55:10, 11 he.

10. (a) Te Yohane tsɔɔ bɔ ni lɛ diɛŋtsɛ eji lɛ mli eha tɛŋŋ, ni nɛgbɛ atsi enaa yɛ lɛ? (b) Namɛi ye bua ni akɛ wolo ni Yohane ŋma lɛ yaha asafoi lɛ? (d) Mɛɛ gbɛ nɔ atsɔɔ akɛ mumɔŋ niyenii haa ŋmɛnɛ yɛ be babaoo mli?

¹⁰ Akɛni Yohane yɛ hekɛnɔfɔɔ akɛ Yehowa baakudɔ saji yɛ gbɛ ni esumɔɔ nɔ lɛ, ekɛɛ enanemɛi tsuji lɛ akɛ: “Mi Yohane ni ji nyɛnyɛmi kɛ nyɛnaanyo yɛ Yesu Kristo amanehulu lɛ kɛ emaŋtsɛyeli lɛ kɛ etsuishiŋmɛɛ lɛ mli lɛ, miyɛ ŋshɔkpɔ ni atsɛɔ lɛ Patmo lɛ nɔ yɛ Nyɔŋmɔ wiemɔ lɛ kɛ Yesu Kristo he odaseyeli lɛ hewɔ.” (Kpojiemɔ 1:9) Ákɛ gboklɛfonyo yɛ Patmo yɛ sanekpakpa lɛ hewɔ, ni ekɛ enyɛmimɛi lɛ miiŋmɛ amɛtsui shi yɛ amanehului amli, kɛ hiɛnɔkamɔ ni ma shi shiŋŋ akɛ amɛbaana Maŋtsɛyeli ni baa lɛ mli gbɛfaŋnɔ lɛ, Yohane ni eda lɛ na Kpojiemɔ wolo lɛ mli klɛŋklɛŋ ninaai lɛ agbɛnɛ. Ŋwanejee ko bɛ he akɛ nɛkɛ ninaai nɛɛ wo lɛ hewalɛ babaoo, taakɛ bɔ ni Yohane kuu lɛ naa ekaawoo ŋmɛnɛ yɛ amɛmlibaa ni amɛnaa lɛ hewɔ lɛ. Wɔleee gbɛ ni Yohane tsɔ nɔ ekɛ Kpojiemɔ wolo lɛ yaha asafoi lɛ moŋ, ejaakɛ atsi enaa yɛ nakai be lɛ mli. (Kpojiemɔ 1:11; 22:18, 19) Eka shi faŋŋ akɛ Yehowa bɔfoi lɛ ye bua ni afee enɛ, taakɛ bɔ ni amɛfaa Yehowa Odasefoi anɔkwafoi ni sɔmɔɔ yɛ hei ni agu nitsumɔ lɛ yɛ loo atsi naa ŋmɛnɛ hu he lɛ, no hewɔ lɛ enɛ eye ebua ni anyɛ akɛ mumɔŋ niyenii ni he hiaa nyɛmimɛi ni anɔkwale lɛ he hɔmɔ yeɔ amɛ lɛ eha amɛ yɛ ebe naa pɛpɛɛpɛ.—Lala 34:7, 8.

11. Mɛɛ hegbɛ ni tamɔ nɔ ni Yohane hiɛ sɔ lɛ Yohane kuu ni yɔɔ ŋmɛnɛ lɛ hu buɔ no jogbaŋŋ lɛ?

¹¹ Kwɛ bɔ ni Yohane hiɛ baasɔ hegbɛ ni ena akɛ Yehowa kɛ lɛ atsu nii akɛ adafitswaa gbɛ kɛha asafoi lɛ! Nakai nɔŋŋ hu Yohane kuu lɛ ni yɔɔ ŋmɛnɛ lɛ buɔ hegbɛ kpeteŋkpele ni amɛna akɛ amɛkɛ mumɔŋ niyenii aaaha Nyɔŋmɔ webii lɛ yɛ “be ni sa nɔ.” (Mateo 24:45) Eba akɛ ooofee mɛi ni nɛkɛ mumɔŋ niyenii nɛɛ woɔ amɛ hewalɛ lɛ ateŋ mɔ kome koni onine ashɛ anunyam oti ni ji naanɔ wala lɛ nɔ!—Abɛi 3:13-18; Yohane 17:3.

[Akrabatsa ni yɔɔ baafa 21]

Mumɔŋ Niyenii ni Anaa Yɛ Bei ni Mli Wawai Amli

Yɛ naagbee gbii nɛɛ amli, beni Yehowa Odasefoi ena nɔ babaoo yɛ yiwaa kɛ haomɔi amli lɛ, ehe ehia kɛha amɛ akɛ amɛnine aaashɛ mumɔŋ niyenii nɔ bɔni afee ni amɛhe awa yɛ hemɔkɛyeli lɛ mli. Yɛ be babaoo mli lɛ, amɛnine shɛɔ niyenii ni he hiaa nɔ, ni wɔdaa Yehowa hewalɛ ni ejieɔ lɛ kpo yɛ naakpɛɛ gbɛi anɔ yɛ be babaoo mli lɛ he shi.

Akɛ nɔkwɛmɔnɔ lɛ, yɛ Germany yɛ Hitler shishi lɛ, Odasefoi lɛ ŋmala Buu-Mɔɔ lɛ ni Nazi nɔyelɔi yiwalɔi lɛ egu lɛ bibii yɛ woji bibii anɔ ni amɛjara. Yɛ Hamburg lɛ, Gestapo lɛ yatutua shia ko he ni akalaa woji lɛ yɛ lɛ. Eji shia bibioo kwraa, ni he ko he ko bɛ ni aaanyɛ akɛ nɔ ko atee jogbaŋŋ. Ashi typewriter ni akɛŋmaa saji lɛ yɛ adeka ko mli yɛ jɛmɛ, ni tsɔne agbo ni akɛkalaa woji lɛ hu hɔ atomo jwɛinii ko mli yɛ tsu lɛ shishi. Agbɛnɛ nɔ ni yɔɔ jwɛinii nɛɛ mli ji adeka ko ni woji tɛtrɛbii eyi mli obɔ! Etamɔ nɔ ni bɔ fɛɛ bɔ ni ji lɛ abaana enɛ. Shi mɛni ba? Asraafonyo ni gbele adeka lɛ naa lɛ fee nakai yɛ gbɛ ni haaa ena typewriter lɛ. Yɛ tsu lɛ shishi hu lɛ, shiatsɛ lɛ bɔ amaniɛ akɛ: “Asraafoi etɛ lɛ damɔ tsu lɛ teŋ, ni kadimɔ akɛ, nɔ ni yɔɔ jwɛinii lɛ sɛɛ ji adeka ko ni Buu-Mɔɔ lɛ eyi mli obɔ. Shi etamɔ nɔ ni amɛteŋ mɔ ko mɔ no enaaa enɛ; etamɔ nɔ ni ashwila amɛhiŋmɛi.” Wɔmiida Yehowa shi yɛ naakpɛɛ nifeemɔ nɛɛ hewɔ; anyɛ atee nɔ atsɔ shia nɛɛ mli akɛ mumɔŋ niyenii ha yɛ bei ni mli wawai ni osharai hu yɔɔ mli nɛɛ amli.

Yɛ 1960 afii lɛ amli lɛ, no mli lɛ maŋ ta miiya nɔ yɛ Nigeria kɛ amɛkpokpaa lɛ ekome ni ji Biafra teŋ. Akɛni Nigeria shikpɔŋkuku lɛ ebɔle Biafra he kɛkpe hewɔ lɛ, gbɛ kome pɛ ni atsɔɔ nɔ ajɛɔ maŋsɛɛ abaa mli ji kɛtsɔ kɔɔyɔɔŋ lɛji ashidaamɔ he ko nɔ. Enɛ tsɔɔ akɛ oshara eba Odasefoi ni yɔɔ Biafra lɛ he akɛ abaafo mumɔŋ niyenii ni amɛnine shɛɔ nɔ lɛ mli. Kɛkɛ ni 1968 shishijee mli lɛ, Biafra nɔyeli lɛ mli onukpai lɛ kɛ nitsumɔ wo amɛmaŋ nitsulɔi lɛ ekome dɛŋ koni eyatsu nɔ ko ni he hiaa eha amɛ yɛ Europa ni akɛ mɔ kroko hu tee he ni Biafra kɔɔyɔɔŋ lɛji adaamɔ he lɛ yɔɔ lɛ koni eyatsu nii yɛ jɛmɛ. Duromɔ naa lɛ, nɛkɛ hii enyɔ nɛɛ ji Yehowa Odasefoi, ni agbɛnɛ naa amɛ ni amɛyaje hei enyɔ ni jɛmɛ ji he ni Biafrabii lɛ tsɔɔ amɛkɛ je lɛ yeɔ sharamɔ yɛ. Nyɛmimɛi enyɔ nɛɛ yɔse akɛ gbɛjianɔtoo nɛɛ jɛ Yehowa. No hewɔ lɛ, amɛkɛ amɛhe ha nɛkɛ nitsumɔ ni oshara yɔɔ mli nɛɛ koni amɛtsɔ nɔ ni amɛha mumɔŋ niyenii aba Biafra. Ni amɛnyɛ amɛfee enɛ yɛ ta be lɛ fɛɛ mli. Amɛteŋ mɔ kome kɛɛ akɛ: “Gbɛjianɔtoo lɛ ji nɔ ko ni tekeɔ nɔ ni adesai baanyɛ ato he gbɛjianɔ.”

[Akrabatsa ni yɔɔ baafa 19]

Yibɔ Okadii ni Yɔɔ Kpojiemɔ

Yibɔ Okadi Lɛ Shishinumɔ

Esa akɛ anu yibɔ okadii ni atsi ta yɛ Kpojiemɔ lɛ ekomɛi ashishi akɛ eji yibɔ diɛŋtsɛ. Yɛ be babaoo mli lɛ, ŋmalɛ lɛ mli sane lɛ yeɔ buaa ni ayɔseɔ enɛ. (Kwɛmɔ Kpojiemɔ 7:4, 9; 11:2, 3; 12:6, 14; 17:3, 9-11; 20:3-5.)

Yitso 5

Yohane Na Yesu ni Awo Ehiɛ Nyam Lɛ

Ninaa 1​—Kpojiemɔ 1:10–3:22

Saneyitso: Yesu miisara mumɔŋ Israel yɛ shikpɔŋ nɔ ni ekɛ hewalɛwoo ni miishɛɛ yɔɔ mli miiha

Emlibaa be: Nɛkɛ Nuŋtsɔ lɛ gbi lɛ fa nɛɛ mli kpaa kɛjɛɔ 1914 aahu kɛyashiɔ be mli ni anɔkwafoi ni afɔ amɛ mu lɛ ateŋ naagbee mɔ lɛ gboɔ ni ateɔ lɛ shi

 1. Mɛɛ gbɛ nɔ atsɔ akɛ klɛŋklɛŋ ninaa lɛ ha, ni mɛɛ gbɛ nɔ Yohane tsɔɔ be ni ebaaba mli klɛŋklɛŋ kwraa?

KLƐŊKLƐŊ ninaa ni yɔɔ Kpojiemɔ wolo lɛ mli lɛ jeɔ shishi kɛ yitso 1, kuku 10. Taakɛ ninaa nɛɛ kɛ ekrokomɛi ni ajaje yɛ Kpojiemɔ lɛ ji lɛ, Yohane kɛ nɔ ni ena loo enu ni yɔɔ naakpɛɛ lɛ jajemɔ je nɛkɛ ninaa nɛɛ shishi. (Kpojiemɔ 1:10, 12; 4:1; 6:1) Akɛ klɛŋklɛŋ ninaa nɛɛ ha tamɔ nɔ ko ni akɛmiitsu nii yɛ klɛŋklɛŋ afii oha lɛ mli, ni akɛ shɛɛ saji miimaje ayaha asafoi kpawo ni yɔɔ Yohane be lɛ mli lɛ. Shi Yohane tsɔɔ be diɛŋtsɛ mli ni akɛbaatsu nii lɛ beni ekɛɛ: “Miyɛ mumɔ mli yɛ Nuŋtsɔ lɛ gbi lɛ nɔ.” (Kpojiemɔ 1:10a) Mɛni ji nɛkɛ “gbi” nɛɛ? Ani bei nɛɛ ni efee hoo nɛɛ mli saji lɛ kɔɔ enɛ he? Kɛji nakai ni lɛ, esa akɛ wɔbo gbalɛ lɛ toi jogbaŋŋ, akɛ nɔ ko ni kɔɔ wɔwala diɛŋtsɛ he—wɔ yiwalaheremɔ po.—1 Tesalonikabii 5:20, 21.

Yɛ Nuŋtsɔ lɛ Gbi lɛ Nɔ

 2. Mɛɛ be mli Nuŋtsɔ lɛ gbi lɛ jeɔ shishi, ni mɛɛ be mli ebaa naagbee yɛ?

² Enɛ kɛ Kpojiemɔ mlibaa nɛɛ woɔ mɛɛ be mli? Ojogbaŋŋ, mɛni ji Nuŋtsɔ lɛ gbi lɛ? Bɔfo Paulo wieɔ he akɛ kojomɔ be kɛ Nyɔŋmɔ shiwooi amlibaa. (1 Korintobii 1:8; 2 Korintobii 1:14; Filipibii 1:6, 10; 2:16) Beni nakai “gbi” lɛ shɛ lɛ pɛ kɛkɛ ni Yehowa yiŋtoi ni yɔɔ nyam lɛ mlibaa fiofio yɛ kunimyeli mli bɛŋkɛ amɛnaagbee. Nakai “gbi” lɛ jeɔ shishi kɛ Yesu ni akɛ akekere bu lɛ akɛ ŋwɛi Maŋtsɛ. Nuŋtsɔ lɛ gbi lɛ yaa nɔ po yɛ be mli ni Yesu etsu fɔbuu kojomɔ he nii eshi Satan je lɛ, kɛ Paradeiso ni akɛaaba ekoŋŋ kɛ adesai ni aaaha amɛye emuu, kɛyashi be mli ni yɛ naagbee lɛ Yesu kɛ “maŋtsɛyeli lɛ aaawo e-Nyɔŋmɔ kɛ Tsɛ lɛ dɛŋ.”—1 Korintobii 15:24-26; Kpojiemɔ 6:1, 2, New World Translation.

 3. (a) Yɛ mɛɛ gbɛ nɔ Daniel gbalɛ ni kɔɔ “bei kpawo” lɛ he lɛ yeɔ ebuaa wɔ ni wɔnaa be ni Nuŋtsɔ lɛ gbi lɛ jeɔ shishi? (b) Mɛɛ nibii ni ba shikpɔŋ nɔ maa afi 1914 nɔ mi akɛ Nuŋtsɔ lɛ gbi lɛ shishijee?

³ Biblia gbalɛi krokomɛi amlibaa yeɔ ebuaa wɔ ni wɔnaa be mli ni Nuŋtsɔ lɛ gbi lɛ jeɔ shishi. Akɛ nɔkwɛmɔnɔ lɛ, Daniel tsɔɔ bɔ ni afo nɔyeli kpaa ko ni yɔɔ Maŋtsɛ David wekukpaa lɛ mli afɔ shi lɛ mli; yɛ “bei kpawo” sɛɛ lɛ abaale akɛ “mɔ ni yɔɔ ŋwɛi shɔŋŋ lɛ yɛ hewalɛ yɛ gbɔmɛi amaŋtsɛyeli nɔ, ni eŋɔhaa mɔ fɛɛ mɔ ni esumɔɔ!” (Daniel 4:23, 24, 31, 32) Nakai gbalɛ lɛ mlibaa wulu je shishi yɛ be mli ni afee Yuda maŋtsɛyeli lɛ amaŋfɔ, ni Biblia mli odaseyeli tsɔɔ akɛ eba mli kwraa yɛ October 607 D.Ŋ.B. lɛ. Kpojiemɔ 12:6, 14 tsɔɔ akɛ bei 3 1/2 feɔ gbii 1,260; no hewɔ lɛ, bei kpawo (nakai yibɔ lɛ toi enyɔ) baafee gbii 2,520. Kɛ abu naa akɛ “gbi kome miifee afi” lɛ, wɔnaa afii 2,520 akɛ “bei kpawo” lɛ sɛɛ jɛkɛmɔ. (Ezekiel 4:6) No hewɔ lɛ, Kristo Yesu je eŋwɛi nɔyeli lɛ shishi yɛ 1914 naagbee fa lɛ mli. Jeŋ ta ni fɛ yɛ nakai afi lɛ mli lɛ kadiɔ “kɔɔmɔi abɔimɔ” ni etee nɔ ehao adesai lɛ. Kɛjɛ 1914 kɛbaa nɛɛ, kwɛ bɔ ni nibii ni etee nɔ yɛ shikpɔŋ ni la ekpa nɔ babaoo nɛɛ nɔ lɛ maa nɔ mi akɛ nakai afi lɛ ji “gbi” ni ba ni Yesu eba lɛ jeɔ shishi!—Mateo 24:3-14.a

 4. (a) Mɛni Kpojiemɔ wiemɔi lɛ diɛŋtsɛ tsɔɔ yɛ be mli ni klɛŋklɛŋ ninaa lɛ ba mli? (b) Klɛŋklɛŋ ninaa lɛ mlibaa baa naagbee yɛ mɛɛ be mli?

⁴ No hewɔ lɛ, nɛkɛ klɛŋklɛŋ ninaa nɛɛ kɛ ŋaawoo ni yɔɔ mli lɛ yɛ kɛha Nuŋtsɔ lɛ gbi lɛ, kɛjɛ 1914 kɛbaa. Nɔ ni maa nɛkɛ be nɛɛ nɔ mi ji anɔkwale ni eji akɛ, yɛ sɛɛ mli yɛ Kpojiemɔ lɛ, nɔ ni aŋma afɔ shi lɛ tsɔɔ Nyɔŋmɔ anɔkwale kɛ jalɛ kojomɔi lɛ ahe nitsumɔ mli—nibii ni ba ni Nuŋtsɔ Yesu naa mli gbɛfaŋnɔ titri lɛ. (Kpojiemɔ 11:18; 16:15; 17:1; 19:2, 11) Kɛji akɛ klɛŋklɛŋ ninaa lɛ mlibaa je shishi yɛ 1914 lɛ, mɛɛ be mli amɛbaa naagbee? Taakɛ shɛɛ saji lɛ diɛŋtsɛ tsɔɔ lɛ, gbɛjianɔtoo ni aŋma wolo lɛ aha lɛ ji Nyɔŋmɔ webii ni afɔ amɛ mu ni yɔɔ shikpɔŋ nɔ lɛ asafo lɛ. Klɛŋklɛŋ ninaa lɛ mlibaa baa naagbee yɛ be mli ni asafo ni afɔ amɛ mu lɛ mli bii lɛ ateŋ naagbee mɔ lɛ gboɔ ni ateɔ lɛ shi kɛyaa ŋwɛi wala mli lɛ. Kɛlɛ, Nuŋtsɔ lɛ Gbi lɛ, ni jɔɔmɔ yɔɔ mli kɛha shikpɔŋ nɔ tooi krokomɛi lɛ, yaa nɔ kɛyashiɔ Yesu Kristo Afii Akpe Nɔyeli lɛ naagbee.—Yohane 10:16; Kpojiemɔ 20:4, 5.

 5. (a) Gbee ko tsɛ Yohane koni efee mɛni? (b) Mɛni hewɔ he ni “asafoi kpawo” lɛ yɔɔ lɛ baanyɛ aha akɛ woji ayaha amɛ lɛ?

⁵ Dani Yohane aaana nɔ ko kwraa yɛ eklɛŋklɛŋ ninaa lɛ mli lɛ, enu sane ko akɛ: “Ni minu gbee kpeteŋkpele ko yɛ misɛɛ tamɔ tɛtrɛmaŋtɛrɛ ni kɛɛ akɛ: ‘ . . . Nɔ ni onaa lɛ, ŋmaa owo wolo mli, ni oŋɔmaje asafoi kpawo ni yɔɔ Asia lɛ, ni akɛya Efeso, kɛ Smirna, kɛ Pergamo, kɛ Tiatira, kɛ Sarde, kɛ Filadelfia, kɛ Laodikea.’” (Kpojiemɔ 1:10b, 11) Akɛ hewalɛ famɔ ha tamɔ tɛtrɛmaŋtɛrɛ gbɛɛmɔ, ni gbee ko kɛɛ Yohane akɛ eŋma kɛyaha “asafoi kpawo” lɛ. Enine baashɛ shɛɛ saji sɔrɔtoi anɔ koni eŋmala nibii ni ebaana ni ebaanu lɛ. Kadimɔ akɛ asafoi ni atsi amɛta yɛ biɛ lɛ yɛ shihilɛ mli diɛŋtsɛ yɛ Yohane gbii lɛ amli. Fɛɛ yɛ Asia Bibioo lɛ, ŋshɔ ni ka Patmo hiɛ lɛ sɛɛ. Roma gbɛjegbɛi kpakpai lɛ ni yɔɔ nɛkɛ hei nɛɛ haa anyɛɔ ayaa nɛkɛ maji nɛɛ amli yɛ gbɛ ni waaa nɔ. Ewaŋ kwraa akɛ bɔfo loo tsulɔ ko kɛ nɛkɛ woji nɛɛ aaaya kɛaajɛ asafo kome mli kɛaaya asafo kroko mli. Nɛkɛ asafoi kpawo nɛɛ baanyɛ atamɔ ŋmɛnɛŋmɛnɛ Yehowa Odasefoi lɛ akpokpaa ko fa.

 6. (a) Mɛni ji “nii ni yɔɔ” lɛ shishi? (b) Mɛni hewɔ wɔbaanyɛ wɔna nɔmimaa akɛ shihilɛi ni yɔɔ Kristofoi ni afɔ amɛ mu lɛ asafoi lɛ amli ŋmɛnɛ lɛ tamɔ bɔ ni eji yɛ Yohane gbii lɛ amli lɛ pɛpɛɛpɛ lɛ?

⁶ Gbalɛi ni yɔɔ Kpojiemɔ lɛ babaoo baaba mli yɛ Yohane be lɛ sɛɛ. Amɛkɔɔ nibii ni “baaba yɛ nii nɛɛ asɛɛ lɛ” ahe. Shi ŋaawoi ni akɛha asafoi kpawo lɛ kɔɔ “nii ni yɔɔ,” shihilɛi ni yɔɔ asafoi kpawo lɛ amli diɛŋtsɛ yɛ nakai be lɛ mli lɛ ahe. Nakai shɛɛ saji lɛ ji nibii ni yeɔ buaa onukpai anɔkwafoi ni ahala amɛ ni yɔɔ nakai asafoi kpawo lɛ amli lɛ, kɛ agbɛnɛ mɛi krokomɛi ni yɔɔ Kristofoi ni afɔ amɛ mu lɛ asafoi krokomɛi fɛɛ mli yɛ nakai be lɛ mli lɛ ahe.b Akɛni ninaa lɛ kɔɔ Nuŋtsɔ lɛ gbi lɛ he titri hewɔ lɛ, nɔ ni Yesu kɛɔ lɛ haa wɔyooɔ akɛ abaakpa shihilɛi ni tamɔ nakai gbɛ yɛ Kristofoi ni afɔ amɛ mu lɛ asafoi lɛ amli yɛ wɔ diɛŋtsɛ wɔgbii nɛɛ amli.—Kpojiemɔ 1:10, 19.

 7. Namɔ Yohane na yɛ eklɛŋklɛŋ ninaa lɛ mli, ni mɛni hewɔ eji nɔ ko ni he hiaa kɛ miishɛɛ sane hu kɛha wɔ ŋmɛnɛ lɛ?

⁷ Yohane na Nuŋtsɔ Yesu Kristo ni kpɛlɛɔ kaŋkaŋ lɛ yɛ E-ŋwɛi anunyam mli yɛ klɛŋklɛŋ ninaa nɛɛ mli. Mɛni baanyɛ afee nɔ ni sa jogbaŋŋ aha gbalɛi awolo ni kɔɔ Nuŋtsɔ nɛɛ ni akɛ nitsumɔ wo edɛŋ lɛ gbi wulu lɛ he? Ni mɛni baanyɛ afee nɔ ni he hiaa wɔ, ni amrɔ nɛɛ wɔyɔɔ wala mli yɛ nakai be kplaŋŋ lɛ mli ni wɔboɔ efamɔi fɛɛ atoi nɛɛ fe fɛɛ? Agbɛnɛ hu, kwɛ bɔ ni eji miishɛɛ sane akɛ aaama nɔ mi aha mɛi ni fiɔ jeŋ muu fɛɛ maŋtsɛ ni Yehowa ji lɛ sɛɛ lɛ akɛ, Mesia Seshi lɛ, ni ŋmɛ etsui shi yɛ kaai kɛ yiwaai sɔrɔtoi ni Satan kɛba enɔ lɛ fɛɛ mli ni ena amanehulu yɛ piŋmɔ gbele mli beni atswa “enanetsitsi nɔ” nɔ ni miihe ashɛ afii 2,000 ni eho nɛ lɛ hiɛ ka agbɛnɛ yɛ ŋwɛi, ni akɛ hewalɛ ewo edɛŋ koni ekɛ Nyɔŋmɔ yiŋtoi ni yɔɔ nyam lɛ aba enaagbee yɛ kunimyeli mli!—1 Mose 3:15.

 8. Yesu efee klalo kɛha mɛni feemɔ agbɛnɛ?

⁸ Eka shi faŋŋ akɛ Yesu efee klalo agbɛnɛ akɛ ebaatsu nii akɛ mɔ ni awo lɛ Maŋtsɛ. Ahala lɛ akɛ Yehowa Blafonukpa koni etsu Yehowa naagbee kojomɔi ahe nii eshi yiwalɛ nibii agbɛjianɔtoo momo nɛɛ kɛ ediabolo nyɔŋmɔ ni ji Satan lɛ. Esaa ehe hu akɛ edamɔ shi akɛ ebaakojo esafo ni afɔ amɛ mu lɛ amlibii lɛ kɛ amɛhefatalɔi asafo babaoo lɛ kɛ agbɛnɛ jeŋ muu lɛ fɛɛ.—Kpojiemɔ 7:4, 9; Bɔfoi lɛ Asaji 17:31.

 9. (a) Te Yohane tsɔɔ Yesu Kristo ni awo ehiɛ nyam ni yɔɔ shika kanetsei lɛ ateŋ lɛ mli eha tɛŋŋ? (b) Shihilɛ lɛ ni tamɔ sɔlemɔtsu mli lɛ kɛ atade ni Yesu wo lɛ tsɔɔ mɛni? (d) Shika mlifii nii lɛ tsɔɔ mɛni?

⁹ Kɛkɛ ni Yohane tsɔ ehe beni enu gbee kroko ni naa wa lɛ, ni naa nɔ ni enaa: “Ni mitsɔ mihe koni makwɛ gbee lɛ ni kɛ mi wieɔ lɛ. Ni beni mitsɔ mihe lɛ, mina shika kanetsei kpawo.” (Kpojiemɔ 1:12) Yɛ sɛɛ mli lɛ, Yohane bale nɔ ni nɛkɛ kanetsei kpawo nɛɛ damɔ shi kɛha. Shi mɔ ni yɔɔ kanetsei lɛ ateŋ lɛ ji nɔ ni gbala ejwɛŋmɔ. Ekɛɛ, “mɔ ko yɛ kanetsei kpawo lɛ ateŋ ni tamɔ gbɔmɔ bi, ni ewo atade yuu ni ekɛ shika kpaa efi etsitsi.” (Kpojiemɔ 1:13) Yesu, “gbɔmɔ bi” lɛ kɛ ehe miitsɔɔ Yohane ni naa ekpɛ ehe akɛ odasefonyo lɛ yɛ biɛ, akɛ mɔ ko ni hiɛ yɔɔ nyam waa. Epue yɛ anunyam ni kpɛlɛɔ mli yɛ shika kanetsei ni tsoɔ lɛ ateŋ. Nɔ ni tamɔ sɔlemɔtsu mli nɛɛ ha Yohane kai anɔkwale ni eji akɛ amrɔ nɛɛ Yesu ji Yehowa Osɔfonukpa ni yɔɔ hewalɛ akɛ ekojo lɛ. (Hebribii 4:14; 7:21-25) Etade yuu lɛ kɛ esɔfoi anitsumɔ lɛ kpaa gbee. Taakɛ blema Yudafoi osɔfonukpa lɛ ji lɛ, ekɛ nɔ ko efi etsitsi—shika mlifii nii yɛ etsitsi ni ehaa etsui nɔ. Enɛ tsɔɔ akɛ ebaajɛ etsui muu fɛɛ mli etsu ŋwɛi famɔ ni enine eshɛ nɔ kɛjɛ Yehowa Nyɔŋmɔ ŋɔɔ lɛ he nii.—2 Mose 28:8, 30; Hebribii 8:1, 2.

10. (a) Yesu yitsɔi yɛŋ ni tamɔ snoo kɛ ehiŋmɛii ni tamɔ lalilɛi lɛ tsɔɔ mɛni? (b) Akɛ Yesu najiashi ni tamɔ ayawa ni kpɛlɛɔ kaŋkaŋ lɛ tsɔɔ mɛni?

¹⁰ Bɔ ni Yohane tsɔɔ mli eha lɛ tee nɔ akɛ: “Ni eyitso kɛ eyitsɔi yɛɔ tamɔ too he tsɔi yɛŋ, tamɔ snoo, ni ehiŋmɛii tamɔ lalilɛi.” (Kpojiemɔ 1:14) Eyitsɔi yɛŋ ni tamɔ snoo lɛ tsɔɔ nilee ni jɛ wala sɛɛ kɛlɛ. (Okɛto Abɛi 16:31 he.) Ni ehiŋmɛi ni tamɔ lalilɛi lɛ tsɔɔ akɛ ehiɛ yɛ ehe nɔ, ehiɛ ka, yɛ be mli ni epɛiɔ nibii amli, ekaa nibii, aloo ejieɔ emlifu kpo lɛ. Yohane yɔse Yesu najiashi po: “Ni enaji tamɔ ayawa kaŋkaŋ ni edɔ yɛ flɔnɔɔ mli, ni egbee tamɔ nui babaoo gbɛɛmɔ.” (Kpojiemɔ 1:15) Yesu naji tamɔ ayawa yɛ ninaa lɛ mli, ayawa ni kpɛɔ kaŋkaŋ—esa nakai kɛha mɔ ni nyiɛɔ yɛ ekaa naa ni eyɔɔ shidaamɔ kpakpa yɛ Yehowa Nyɔŋmɔ hiɛ. Agbɛnɛ, yɛ be mli ni yɛ Biblia mli lɛ akɛ shika feɔ nibii ni yɔɔ ŋwɛi lɛ ahe mfoniri lɛ, nakai nɔŋŋ hu akɛ ayawa toɔ adesai ahe nibii ahe.c No hewɔ lɛ Yesu naji ni kpɛɔ kaŋkaŋ tamɔ ayawa lɛ kaiɔ wɔ bɔ ni enaji “yɔɔ fɛo” yɛ be mli ni enyiɛ shikpɔŋ lɛ nɔ ni eshiɛɔ sanekpakpa lɛ.—Yesaia 52:7; Romabii 10:15.

11. (a) Yesu anunyam naji lɛ kaiɔ wɔ mɛni? (b) Anɔkwale ni eji akɛ Yesu gbee “tamɔ nui babaoo gbɛɛmɔ” lɛ tsɔɔ mɛni?

¹¹ Lɛlɛŋ, akɛ adesa ni yeɔ emuu lɛ, Yesu yɛ anunyam ko ni ŋwɛibɔfoi kɛ gbɔmɛi naa. (Yohane 1:14) Enunyam naji lɛ hu kaiɔ wɔ akɛ enaanaa shikpɔŋ krɔŋkrɔŋ nɔ yɛ Yehowa gbɛjianɔtoo ni eji Osɔfonukpa yɛ mli lɛ mli. (Okɛto 2 Mose 3:5 he.) Agbɛnɛ hu, egbee jijeɔ tamɔ srawa, tamɔ nui babaoo ni jɛɔ tɛsaa mli efɔseɔ eshwieɔ shi kɛ gbɛɛmɔ. Eyɛ fɛo, eyɛ naakpɛɛ ni ekanyaa mɔ, esa mɔ ni ahala lɛ ni atsɛɔ lɛ Nyɔŋmɔ Wiemɔ lɛ, mɔ ni baa koni ‘ebakojo jeŋ muu lɛ fɛɛ yɛ jalɛ naa’ lɛ.—Bɔfoi lɛ Asaji 17:31; Yohane 1:1.

12. “Tsi kɛ enaa ŋta ni naa ba” lɛ tsɔɔ mɛni?

¹² “Ni ehiɛ ŋulamii kpawo yɛ eninejurɔ nɔ, ni tsi kɛ enaa ŋta ni naa ba jɛ edaaŋ, ni ehiɛ tamɔ hulu ni tsoɔ waa. Ni beni mina lɛ lɛ, migbee shi yɛ enaji anaa tamɔ gbonyo.” (Kpojiemɔ 1:16, 17a) Yesu diɛŋtsɛ tsɔɔ ŋulamii kpawo lɛ shishi yɛ sɛɛ mli. Shi kadimɔ nɔ ni jeɔ kpo kɛjɛɔ edaaŋ lɛ: “tsi kɛ enaa ŋta ni naa ba.” Mɛɛ nii ni sa nɛ! Ejaakɛ Yesu ji mɔ ni ahala lɛ koni ejaje Yehowa naagbee kojomɔi lɛ eshi E-henyɛlɔi lɛ. Wiemɔi ni akpɛ mli momo ni jɛɔ edaaŋ lɛ kɛ efɔŋ feelɔi fɛɛ ahiɛkpatamɔ baa.—Kpojiemɔ 19:13, 15.

13. (a) Yesu hiɛ ni kpɛɔ kaŋkaŋ lɛ kaiɔ wɔ mɛni? (b) Mɛɛ shishinumɔ wɔnaa yɛ bɔ ni Yohane tsɔɔ bɔ ni Yesu ji lɛ mli?

¹³ Yesu hiɛ ni kpɛlɛɔ kaŋkaŋ lɛ kaiɔ wɔ akɛ Mose hiɛ kpɛlɛ nakai nɔŋŋ yɛ sɛɛ mli beni Yehowa kɛ lɛ ewie yɛ Sinai Gɔŋ lɛ nɔ lɛ. (2 Mose 34:29, 30) Kaimɔ hu akɛ, beni Yesu tsake yɛ ebɔfoi etɛ lɛ ahiɛ nɔ ni miihe ashɛ afii 2,000 ni eho nɛ lɛ, “esu tsake yɛ amɛhiɛ, ni ehiɛ kpɛ tamɔ hulu, ni etade lɛ yɛ tamɔ la.” (Mateo 17:2) Agbɛnɛ, taakɛ Yesu he ninaa yɛ Nuŋtsɔ lɛ gbi lɛ mli lɛ ji lɛ, ehiɛ kpɛlɛɔ kaŋkaŋ nakai nɔŋŋ kɛ fɛo akɛ mɔ ni ehi Yehowa hiɛ. (2 Korintobii 3:18) Yɛ anɔkwale mli lɛ, nɔ ni Yohane ninaa lɛ fɛɛ haa wɔnuɔ shishi ji anunyam gbɔmɔ. Kɛ akwɛ kɛjɛ eyiteŋ tsɔi yɛŋ ni tamɔ snoo lɛ nɔ, kɛbaa ehiŋmɛi ni tamɔ lalilɛi, kɛ agbɛnɛ bɔ ni ekpɛɔ kɛbayi enajiashi lɛ, eji Mɔ ni amrɔ nɛɛ ehiɔ “la ni anyɛŋ abɛŋkɛ mli” lɛ he ninaa ni nɔ bɛ. (1 Timoteo 6:16) Bɔ ni nɔ ni ana nɛɛ ji anɔkwale ha lɛ yɛ faŋŋ! Te Yohane ni naa ekpɛ ehe lɛ fee enii eha tɛŋŋ? Bɔfo lɛ kɛɔ wɔ: “Ni beni mina lɛ lɛ, migbee shi yɛ enaji anaa tamɔ gbonyo.”—Kpojiemɔ 1:17.

14. Kɛ wɔmiikane Yohane ninaai ni kɔɔ Yesu ni awo ehiɛ nyam lɛ he lɛ, te esa akɛ esa wɔhe eha tɛŋŋ?

¹⁴ Ŋmɛnɛ, bɔ ni atsɔɔ Yohane ninaa lɛ mli fɛfɛo aha lɛ kɛ tsuiaŋ hiɛsɔɔ woɔ Nyɔŋmɔ webii amli obɔ. Wɔtsɔ Nuŋtsɔ lɛ gbi lɛ mli nɔ ni fe afii 90 kɛho momo, ni ninaa lɛ etee nɔ ena emlibaa ni yɔɔ miishɛɛ. Kɛha wɔ lɛ, Yesu Maŋtsɛyeli nɔyeli lɛ yɛ diɛŋtsɛ yɛ ŋmɛnɛŋmɛnɛ beaŋ, jeee hiɛnɔkamɔ ko ni yɔɔ wɔsɛɛ be. No hewɔ lɛ, ehi jogbaŋŋ akɛ wɔ ni ji Maŋtsɛyeli lɛ shishi bii lɛ wɔkɛ naakpɛɛ aaakwɛ nɔ ni Yohane tsɔɔ yɛ klɛŋklɛŋ ninaa lɛ mli lɛ lolo ni wɔfee toiboo wɔha Yesu Kristo ni awo ehiɛ nyam lɛ wiemɔi lɛ.

[Shishigbɛ niŋmai]

[Mfonirii ni yɔɔ baafa 23]

Shitsaa mli nibii ni ana ni kɔɔ maji ni asafoi kpawo lɛ yɔɔ mli lɛ ahe lɛ maa Biblia mli sane lɛ nɔ mi. Biɛ ji he ni klɛŋklɛŋ afii oha lɛ mli Kristofoi lɛ anine shɛ Yesu hewalɛwoo wiemɔi ni ŋmɛnɛ ekanyaa asafoi ni yɔɔ jeŋ fɛɛ lɛ yɛ

PERGAMO

SMIRNA

TIATIRA

SARDE

EFESO

FILADELFIA

LAODIKEA

Yitso 6

Teemɔŋ Sane Krɔŋkrɔŋ ko Naagbelemɔ

 1. Te esa akɛ wɔfee wɔnii wɔha yɛ mfoniri fɛfɛo ni aŋma afɔ shi yɛ Kpojiemɔ 1:10-17 lɛ he wɔha tɛŋŋ?

YESU ni awo enɔ lɛ he ninaa yɛ naakpɛɛ kɛ gbeyei diɛŋtsɛ! Ŋwanejee ko bɛ he akɛ, eji wɔkɛ bɔfo Yohane na nɔ ni tee nɔ lɛ fɛɛ kulɛ, wɔ hu anunyam ni yɔɔ fɛo lɛ baaye wɔ nɔ, ni wɔkula shi taakɛ efee lɛ. (Kpojiemɔ 1:10-17) Ábaa nɛkɛ ninaa ni jɛ ŋwɛi ni kwɔ fe fɛɛ nɛɛ yi aha wɔ koni ekanya wɔ kɛha nifeemɔ ŋmɛnɛ. Esa akɛ wɔkɛ hiɛsɔɔ aba wɔhe shi wɔha nɔ fɛɛ nɔ ni ninaa lɛ tsɔɔ lɛ, taakɛ Yohane fee lɛ. Eba akɛ wɔɔna bulɛ ni gbeyeishemɔ kɛ woo yɔɔ mli wɔha Yesu gbɛhe akɛ Maŋtsɛ ni ta sɛi nɔ, akɛ Osɔfonukpa kɛ Kojolɔ lɛ.—Filipibii 2:5-11.

“Klɛŋklɛŋ Mɔ lɛ kɛ Naagbee Mɔ Lɛ”

 2. (a) Mɛɛ sabala Yesu kɛha ehe? (b) Mɛni ji nɔ ni atsɔɔ beni Yehowa kɛɔ akɛ: “Mi ji klɛŋklɛŋ mɔ lɛ kɛ naagbee mɔ lɛ”? (d) Yesu sabala “Klɛŋklɛŋ mɔ lɛ kɛ Naagbee mɔ lɛ” gbalaa jwɛŋmɔ kɛyaa mɛni nɔ?

² Ni kɛlɛ, esaaa akɛ gbeyei ni wɔsheɔ nɛɛ tsɔɔ gbeyeishemɔ ni ehiii. Yesu ha Yohane na nɔmimaa yɛ enɛ he taakɛ bɔfo lɛ jaje kɛfata he lɛ. “Ni ekɛ eninejurɔ ŋmɛ minɔ, ni ekɛɛ mi akɛ: ‘Kaashe gbeyei; mi ji klɛŋklɛŋ mɔ lɛ kɛ naagbee mɔ lɛ kɛ hiɛkalɔ lɛ.’” (Kpojiemɔ 1:17b, 18a) Yɛ Yesaia 44:6 lɛ, Yehowa tsɔɔ lɛ diɛŋtsɛ egbɛhe lɛ mli yɛ gbɛ ni ja nɔ akɛ Nyɔŋmɔ kome pɛ ni ji Ofe, akɛ: “Mi ji klɛŋklɛŋ mɔ kɛ sɛɛkpee mɔ, ni Nyɔŋmɔ ko bɛ, ja mi!”a Beni Yesu kɛ ehe tsɔɔ kɛtsɔ sabala ni ji “Klɛŋklɛŋ mɔ lɛ kɛ Naagbee mɔ lɛ” nɔ lɛ, etsɔɔɔ akɛ ekɛ Yehowa, Bɔlɔ Kpeteŋkpele lɛ yeɔ egbɔ. Ekɛ sabala ni Nyɔŋmɔ kɛha lɛ yɛ gbɛ ni ja nɔ lɛ miitsu nii. Yɛ Yesaia lɛ, Yehowa miiwie E-gbɛhe ni eko kɛ lɛ yeee egbɔ akɛ anɔkwa Nyɔŋmɔ lɛ he. Lɛ ji naanɔ Nyɔŋmɔ, ni Nyɔŋmɔ ko bɛ ni tamɔ lɛ. (1 Timoteo 1:17) Yesu miiwie sabala ni akɛha lɛ lɛ he yɛ Kpojiemɔ, ni eegbala jwɛŋmɔ kɛmiiba egbohiiashitee ni yɔɔ sɔrɔto lɛ nɔ.

 3. (a) Yesu ji “Klɛŋklɛŋ mɔ lɛ kɛ Naagbee mɔ lɛ” yɛ mɛɛ gbɛ nɔ? (b) “Gbohiiaje kɛ gbele naa samfele lɛ” ni Yesu hiɛ lɛ tsɔɔ mɛni?

³ Lɛlɛŋ Yesu ji “Klɛŋklɛŋ mɔ lɛ” ni ji adesa ni atee lɛ shi kɛtee mumɔŋ wala ni gbele bɛ mli lɛ mli. (Kolosebii 1:18) Agbɛnɛ, lɛ ji “Naagbee mɔ lɛ” ni Yehowa diɛŋtsɛ tee lɛ shi. No hewɔ lɛ ebatsɔɔ “hiɛkalɔ lɛ . . . ni hiɛ ka kɛmiiya naanɔi anaanɔ” lɛ. Enaa shihilɛ ni gbele bɛ mli lɛ mli ŋɔɔmɔ. Ebatsɔɔ tamɔ e-Tsɛ ni gbooo, ni atsɛɔ lɛ “Nyɔŋmɔ hiɛkalɔ lɛ” yɛ enɛ mli. (Kpojiemɔ 7:2; Lala 42:3) Kɛha adesai krokomɛi fɛɛ lɛ, Yesu diɛŋtsɛ ji “shitee lɛ kɛ wala lɛ.” (Yohane 11:25) Yɛ enɛ kɛ gbeekpamɔ naa lɛ, ekɛɔ Yohane akɛ: “Ni migbo, ni naa, mihiɛ ka kɛmiiya naanɔi anaanɔ, ni mihiɛ gbohiiaje kɛ gbele naa samfele lɛ.” (Kpojiemɔ 1:18b) Yehowa eha lɛ hegbɛ koni etee gbohii lɛ ashi. No hewɔ ni Yesu baanyɛ akɛɛ ehiɛ samfele ni ekɛbaagbele agboi lɛ eha mɛi ni gbele kɛ gbohiiaje efimɔ amɛ lɛ.—Okɛto Mateo 16:18 he.

 4. Mɛɛ famɔ Yesu tiɔ mli, ni kɛha namɛi asɛɛnamɔ?

⁴ Yesu ti efamɔ akɛ aŋma ninaa lɛ afɔ shi lɛ mli yɛ biɛ, ekɛɛ Yohane akɛ: “No hewɔ lɛ ŋmaa nii ni ona lɛ kɛ nii ni yɔɔ kɛ nii ni baaba yɛ nii nɛɛ asɛɛ lɛ.” (Kpojiemɔ 1:19) Mɛɛ nibii krokomɛi ni yɔɔ miishɛɛ Yohane baaha wɔle koni akɛtsɔɔ wɔ nii?

Ŋulamii lɛ kɛ Kanetsei Lɛ

 5. Te Yesu tsɔɔ “ŋulamii kpawo” lɛ kɛ “kanetsei kpawo” lɛ mli eha tɛŋŋ?

⁵ Yohane ena Yesu yɛ shika kanetsei kpawo kɛ ŋulamii kpawo ni yɔɔ eninejurɔ nɔ lɛ ateŋ. (Kpojiemɔ 1:12, 13, 16) Agbɛnɛ Yesu tsɔɔ enɛ mli: “Ŋulamii kpawo ni ona yɛ mininejurɔ nɔ lɛ he teemɔŋ sane lɛ, kɛ shika kanetsei kpawo lɛ: Ŋulamii kpawo lɛ ji asafoi kpawo lɛ abɔfoi, ni kanetsei kpawo ni ona lɛ ji asafoi kpawo lɛ.”—Kpojiemɔ 1:20.

 6. Ŋulamii kpawo lɛ damɔ shi kɛha mɛni, ni mɛni hewɔ aje gbɛ aŋma shɛɛ saji lɛ aha amɛ lɛ?

⁶ “Ŋulamii” lɛ ji “asafoi kpawo lɛ abɔfoi.” Yɛ bei komɛi amli lɛ, akɛ ŋulamii damɔɔ shi ahaa ŋwɛibɔfoi diɛŋtsɛ yɛ Kpojiemɔ, shi ebaŋ akɛ Yesu kɛ adesa niŋmalɔ ko baatsu nii ni eŋma wolo eyaha mumɔŋ bɔɔnii ni anaaa amɛ. No hewɔ lɛ esa akɛ “ŋulamii” lɛ afee adesai ni ji nɔkwɛlɔi, aloo onukpai ni yɔɔ asafoi lɛ amli, ni abuɔ amɛ akɛ Yesu bɔfoi lɛ.b Aŋma shɛɛ saji lɛ aha ŋulamii lɛ, ejaakɛ mɛnɛɛmɛi ji Yehowa tooi lɛ anɔkwɛlɔi ni akɛ nitsumɔ ewo amɛdɛŋ.—Bɔfoi lɛ Asaji 20:28.

 7. (a) Mɛni tsɔɔ akɛ Yesu ni miiwie atsɔɔ ŋwɛibɔfo kome pɛ yɛ asafo kome mli lɛ etsɔɔɔ akɛ asafo fɛɛ asafo yɛ onukpa kome pɛ lɛ? (b) Belɛ ŋulamii kpawo ni yɔɔ Yesu ninejurɔ dɛŋ lɛ damɔ shi kɛha namɛi?

⁷ Akɛni Yesu wie etsɔɔ “bɔfo” kome pɛ yɛ asafo fɛɛ asafo mli hewɔ lɛ, ani enɛ tsɔɔ akɛ asafo fɛɛ asafo yɛ onukpa kome pɛ? Dabi. Mra be mli yɛ Paulo gbii lɛ amli tɔɔ lɛ, no mli lɛ Efeso asafo lɛ yɛ onukpai babaoo, jeee mɔ kome pɛ. (Kpojiemɔ 2:1; Bɔfoi lɛ Asaji 20:17) No hewɔ lɛ, beni akɛ shɛɛ saji maje ayaha ŋulamii kpawo lɛ ni akane yɛ asafoi lɛ amli (ni Efeso fata he) yɛ Yohane gbii lɛ amli lɛ, ŋulamii lɛ baadamɔ shi aha mɛi fɛɛ ni sɔmɔɔ yɛ onukpai akui lɛ amli yɛ Yehowa asafo ni efɔ lɛ mu lɛ mli lɛ. Nakai nɔŋŋ hu, ŋmɛnɛ, nɔkwɛlɔi ni yɔɔ lɛ kaneɔ woji ni amɛnine shɛɔ nɔ kɛjɛɔ Nɔyeli Kuu ni feɔ nɔkwɛlɔi ni afɔ amɛ mu ni sɔmɔɔ yɛ Yesu yitsoyeli shishi lɛ adɛŋ lɛ amɛhaa amɛ asafoi lɛ. Esa akɛ onukpai akuu ni yɔɔ asafo lɛ mli lɛ akwɛ akɛ ani amɛ asafoi lɛ miinyiɛ Yesu ŋaawoo lɛ sɛɛ lo. Shi, ŋaawoo lɛ yɛ kɛha mɛi fɛɛ ni yɔɔ asafoi lɛ amli lɛ sɛɛnamɔ, shi jeee onukpai lɛ pɛ.—Kwɛmɔ Kpojiemɔ 2:11a.

 8. Onukpai lɛ ni yɔɔ Yesu ninejurɔ nɔ lɛ tsɔɔ mɛni?

⁸ Akɛni Yesu ji asafo lɛ Yitso lɛ, akɛɔ akɛ onukpai lɛ yɛ eninejurɔ dɛŋ yɛ gbɛ ni ja nɔ, ni ji akɛ, yɛ ekudɔmɔ kɛ egbɛtsɔɔmɔ shishi. (Kolosebii 1:18) Lɛ ji Tookwɛlɔ Nukpa lɛ, ni amɛji tookwɛlɔi bibii lɛ.—1 Petro 5:2-4.

 9. (a) Kanetsei kpawo lɛ damɔ shi kɛha mɛni, ni mɛni hewɔ kanetsei lɛ ji mfonirifeemɔ mli nɔ ko ni sa lɛ? (b) Eka shi faŋŋ akɛ ninaa lɛ baaha bɔfo Yohane akai mɛni?

⁹ Kanetsei kpawo lɛ ji asafoi kpawo ni Yohane ŋma Kpojiemɔ wolo lɛ eha amɛ lɛ: Efeso, Smirna, Pergamo, Tiatira, Sarde, Filadelfia, kɛ Laodikea. Mɛni hewɔ akɛ kanetsei feɔ asafoi lɛ ahe mfoniri lɛ? Ejaakɛ esa akɛ Kristofoi, akɛ aŋkroaŋkroi loo mɛi ni abua amɛnaa akɛ asafoi lɛ aha ‘amɛkanei akpɛ yɛ gbɔmɛi ahiɛ’ yɛ jeŋ ni mli ewo duŋ nɛɛ mli. (Mateo 5:14-16) Kɛfata he lɛ, kanetsei fata nibii ni yɔɔ Salomo sɔlemɔtsu lɛ mli lɛ ahe. Ní atsɛɔ asafoi lɛ akɛ kanetsei lɛ baakai Yohane akɛ, yɛ okadi gbɛ nɔ lɛ, asafo fɛɛ asafo ni mɛi ni afɔ amɛ mu lɛ yɔɔ mli lɛ ji “Nyɔŋmɔ sɔlemɔtsu,” Nyɔŋmɔ mumɔ lɛ shihilɛ he. (1 Korintobii 3:16) Agbɛnɛ, yɛ nɔ ni feɔ Yudafoi lɛ asɔlemɔtsu gbɛjianɔtoo lɛ he mfoniri lɛ mli lɛ, mɛi ni afɔ amɛ mu lɛ asafo lɛ mlibii lɛ sɔmɔɔ akɛ “maŋtsɛmɛi ni yeɔ osɔfoi” yɛ Yehowa mumɔŋ sɔlemɔtsu gbɛjianɔtoo kpeteŋkpele lɛ ni Yesu ji Osɔfonukpa yɛ mli ni Yehowa hiɔ jɛmɛ diɛŋtsɛ yɛ ŋwɛi Krɔŋkrɔŋ Fe Fɛɛ lɛ mli.—1 Petro 2:4, 5, 9; Hebribii 3:1; 6:20; 9:9-14, 24.

Hemɔkɛyeli Kwamɔ Kpeteŋkpele Lɛ

10. Mɛni ba Yudafoi agbɛjianɔtoo lɛ kɛ mɛi ni fiɔ sɛɛ ni tsakeee amɛtsui lɛ anɔ yɛ afi 70 Ŋ.B.?

¹⁰ Beni Yohane ŋma Kpojiemɔ lɛ, no mli lɛ Kristojamɔ eye kɛjɛ afii 60 kɛmiiya. Kɛjɛ shishijee lɛ ekɛ afii 40 hi shi ni Yuda jamɔ miite shi kɛmiiwo lɛ yɛ be fɛɛ mli. Kɛkɛ ni akpata Yudafoi agbɛjianɔtoo lɛ hiɛ yɛ afii 70 Ŋ.B. yɛ be mli ni Yudafoi ni tsakeee amɛtsui lɛ laaje akɛ maŋ kɛ agbɛnɛ nɔ ni amɛjaa tamɔ amaga ko kɛha amɛ—ni ji Yerusalem sɔlemɔtsu lɛ.

11. Mɛni hewɔ eji nɔ ni eba yɛ ebe naa pɛpɛɛpɛ hu kɛha Tookwɛlɔ Nukpa lɛ akɛ eeebɔ asafoi lɛ kɔkɔ yɛ nibii ni yaa nɔ lɛ ahe lɛ?

¹¹ Ni kɛlɛ, bɔfo Paulo egba efɔ shi akɛ hemɔkɛyeli kwamɔ baaba Kristofoi ni afɔ amɛ mu lɛ ateŋ, ni Yesu shɛɛ saji lɛ tsɔɔ akɛ yɛ Yohane gbɔlɛ be mli po lɛ, no mli lɛ nɛkɛ hemɔkɛyeli kwamɔ nɛɛ eje shishi. Yohane ji mɛi ni tsiɔ nɛkɛ mɔdɛŋ fɛɛ ni Satan bɔɔ koni efite yoo lɛ seshi lɛ naa lɛ ateŋ naagbee mɔ. (2 Tesalonikabii 2:3-12; 2 Petro 2:1-3; 2 Yohane 7-11) No hewɔ lɛ eji be ni sa jogbaŋŋ kɛha Yehowa Tookwɛlɔ Nukpa lɛ akɛ eeeŋma wolo eyaha onukpai ni yɔɔ asafoi lɛ amli lɛ, koni ebɔ amɛ kɔkɔ yɛ nibii ni yaa nɔ lɛ he ni ewo mɛi ni yɔɔ tsuijurɔ lɛ hewalɛ koni amɛdamɔ shi shiŋŋ amɛha jalɛ nifeemɔ.

12. (a) Mɛɛ gbɛ nɔ hemɔkɛyeli kwamɔ lɛ tee nɔ yɛ Yohane gbii lɛ asɛɛ afii ohai abɔ lɛ amli yɛ? (b) Te fee tɛŋŋ ni Kristendom ba shihilɛ mli lɛ?

¹² Wɔleee bɔ ni asafoi lɛ here Yesu shɛɛ saji nɛɛ anɔ amɛha yɛ afi 96 Ŋ.B. lɛ mli. Shi wɔle akɛ hemɔkɛyeli kwamɔ lɛ tee nɔ oyayaayai yɛ Yohane gbele sɛɛ. “Kristofoi” kpa Yehowa gbɛi lɛ tsɛmɔ ni amɛkɛ “Nuŋtsɔ” aloo “Nyɔŋmɔ” to enɛ najiaŋ yɛ Biblia lɛ fai ni akɛ niji ŋmala ekomɛi lɛ amli. Beni shɛɔ afii ohai ejwɛ lɛ mli lɛ, no mli lɛ apasa tsɔɔmɔ ni ji Triniti lɛ ebote asafoi lɛ amli. Yɛ nɛkɛ be nɛɛ nɔŋŋ mli lɛ, akpɛlɛ susuma ni gbooo he jwɛŋmɔ lɛ nɔ. Yɛ naagbee lɛ, Roma Maŋtsɛ Konstantino ha maŋ lɛ kpɛlɛ “Kristojamɔ” nɔ, ni enɛ ha aná Kristendom, shihilɛ mli ni Sɔlemɔ lɛ kɛ Maŋ lɛ fee ekome ni amɛye nɔ afii akpe lɛ. Ewaaa akɛ mɔ ko aaatsɔ “Kristofonyo” hee. Wekui kɛ wiemɔi muji fee tsakemɔi yɛ amɛ wɔŋjalɔi ahemɔkɛyelii amli ni amɛkpɛlɛ nɛkɛ jamɔ nɛɛ nɔ. Kristendom hiɛnyiɛlɔi lɛ pii batsɔmɔ maŋkwramɔŋ nɔyelɔi yiwalɔi, ni amɛtsɔ klante nɔ amɛnyɛ amɛhemɔkɛyeli kwamɔ jwɛŋmɔi lɛ yɛ mɛi anɔ.

13. Yɛ kɔkɔ ni Yesu bɔ eshi mligbalamɔ lɛ fɛɛ sɛɛ lɛ, mɛɛ gbɛ Kristofoi ni amɛkwa hemɔkɛyeli lɛ tsɔ nɔ?

¹³ Kristofoi ni amɛkwa hemɔkɛyeli lɛ ku amɛhiɛ amɛshwie Yesu wiemɔi ni ekɛmaje asafoi kpawo lɛ anɔ kwraa. Yesu ebɔ Efesobii lɛ kɔkɔ ni amɛnine ashɛ amɛ klɛŋklɛŋ suɔmɔ lɛ nɔ. (Kpojiemɔ 2:4) Ni kɛlɛ, akɛni Kristendom mli bii lɛ ji mɛi ni suɔmɔ kɛha Yehowa efeee amɛ ekome dɔŋŋ hewɔ lɛ, amɛwuu tai ni yɔɔ gbeyei ni amɛwa amɛhe yi yɛ gbɛ ni yɔɔ nyaŋemɔ nɔ. (1 Yohane 4:20) Yesu ebɔ asafo ni yɔɔ Pergamo lɛ kɔkɔ eshi mligbalamɔ. Ni kɛlɛ, kui bibii pue yɛ afii ohai enyɔ lɛ po mli, ni ŋmɛnɛ Kristendom yɛ jamɔi kɛ jamɔ mli kui bibii akpei abɔ.—Kpojiemɔ 2:15.

14. (a) Eyɛ mli akɛ Yesu bɔ kɔkɔ eshi mumɔŋ gbele moŋ, shi mɛɛ gbɛ mɛi ni kɛɔ akɛ amɛji Kristofoi lɛ tsɔ nɔ? (b) Mɛɛ gbɛi anɔ nɛkɛ mɛi ni kɛɔ akɛ amɛji Kristofoi lɛ nyɛɛɛ abo Yesu kɔkɔbɔɔ ni ekɛshi wɔŋjamɔ kɛ jeŋba shara lɛ toi yɛ?

¹⁴ Yesu ebɔ Sarde asafo lɛ kɔkɔ yɛ mumɔŋ gbele he. (Kpojiemɔ 3:1) Taakɛ mɛi ni yɔɔ Sarde lɛ ji lɛ, mɛi ni kɛɔ akɛ amɛji Kristofoi lɛ ahiɛ kpa Kristofoi anitsumɔ lɛ nɔ mra ni etsɛɛɛ ni amɛŋmɛɛ shiɛmɔ nitsumɔ ni he hiaa waa lɛ he amɛha osɔfoi akuu fioo ko ni awoɔ amɛ nyɔmɔ. Yesu ebɔ asafo ni yɔɔ Tiatira lɛ kɔkɔ eshi wɔŋjamɔ kɛ ajwamaŋbɔɔ. (Kpojiemɔ 2:20) Ni kɛlɛ, Kristendom kpɛlɛ amagai kɛ nitsumɔ nɔ yɛ faŋŋ mli, kɛ agbɛnɛ amaga jamɔ ko ni yɔɔ nigii ni ji maŋ hedɔɔ kɛ heloo gbɛfaŋ nibii ni eha eshwere lɛ nɔ. Ni yɛ be mli ni yɛ bei komɛi amli lɛ amɛshiɛɔ amɛshiɔ jeŋba shara lɛ, amɛkpɛlɛɔ enɛ nɔ yɛ gbɛ ni da nɔ yɛ be fɛɛ mli.

15. Yesu wiemɔi ni ekɛha asafoi kpawo lɛ kpaa mɛni he mama yɛ Kristendom jamɔi lɛ amli, ni Kristendom osɔfoi lɛ ejie amɛhe kpo akɛ amɛji mɛni?

¹⁵ No hewɔ lɛ, Yesu wiemɔi ni ekɛmaje asafoi kpawo lɛ kpa bɔ ni Kristendom jamɔi fɛɛ anine enyɛ shi ni amɛjeee Yehowa webii krɛdɛɛ lɛ he mama. Yɛ anɔkwale mli lɛ, Kristendom osɔfoi lɛ efee Satan seshi lɛ mli bii ni ale amɛ titri. Yɛ be mli ni ewieɔ mɛnɛɛmɛi ahe akɛ ‘mlakwalɔ’ lɛ, bɔfo Paulo gba akɛ “mɔ hu ni ebaa lɛ mli lɛ eeeba kɛ Satan nitsumɔ ni mli wa yɛ amale hewalɛ kɛ okadi kɛ naakpɛɛ nii fɛɛ mli, kɛ nii ni ejaaa gbɛ fɛɛ.”—2 Tesalonikabii 2:9, 10.

16. (a) Kristendom hiɛnyiɛlɔi lɛ jie nyɛɛ krɛdɛɛ ko kpo amɛtsɔɔ namɛi? (b) Mɛni tee nɔ yɛ Kristendom yɛ Teŋ Gbɛ Afii lɛ amli? (d) Ani Protestant atuatsemɔ loo Jamɔ Tsakemɔ lɛ tsake Kristendom hemɔkɛyeli kwamɔ gbɛ̀i lɛ?

¹⁶ Yɛ be mli ni amɛkɛɔ akɛ amɛji Nyɔŋmɔ tooi lɛ anɔkwɛlɔi lɛ, Kristendom hiɛnyiɛlɔi lɛ, yɛ jamɔ mli kɛ je lɛ mli fɛɛ lɛ ejie nyɛɛ krɛdɛɛ ko kpo yɛ mɔ fɛɛ mɔ ni aaabɔ mɔdɛŋ akɛ eeewo hewalɛ ni akane Biblia lɛ aloo mɔ fɛɛ mɔ ni aaakpa amɛnifeemɔi ni kɛ ŋmalɛi lɛ kpaaa gbee lɛ he mama lɛ he. Awa John Hus kɛ Biblia shishitsɔɔlɔ William Tyndale yi ni agbe amɛ akɛ la odasefoi. Yɛ Teŋ Gbɛ Afii ni mli ewo duŋ lɛ mli lɛ, hemɔkɛyeli kwamɔ ni akɛyeɔ nɔ lɛ yashɛ he ni kwɔ yɛ Katolik abonsamii Ayiwalɛ Saneyeli lɛ mli. Mɔ fɛɛ mɔ ni aaaje nɔyeli lɛ loo sɔlemɔ lɛ tsɔɔmɔi ahe ŋwane lɛ, abaa lɛ shi ni mɔbɔnalɛ bɛ mli, ni afee mɛi akpei abɔ ni anyɛɛɛ akane ni akɛɛ atsɛɔ amɛ jamɔ mli atuatselɔi lɛ niseniianii kɛtee gbele mli aloo asha mɛi komɛi po yɛ tsei ahe. No hewɔ lɛ Satan bɔ mɔdɛŋ koni ekwɛ ni akpata Nyɔŋmɔ gbɛjianɔtoo ni tamɔ yoo lɛ anɔkwale seshi fɛɛ seshi hiɛ oya. Beni Protestant atuatsemɔ loo Jamɔ Tsakemɔ lɛ ba (kɛjɛ 1517 kɛyaa lɛ), Protestant sɔlemɔi lɛ babaoo jie tsuishitoo mumɔ ni bɛ ni tamɔ nakai nɔŋŋ kpo. Amɛ hu amɛbaye la yi sɔ̃ kɛtsɔ gbe ni amɛgbe mɛi ni bɔɔ mɔdɛŋ ni amɛye Nyɔŋmɔ kɛ Kristo anɔkwale lɛ nɔ. Yɛ anɔkwale mli lɛ, afɔse “krɔŋkrɔŋbii lɛ ala” lɛ ashwie shi yaka!—Kpojiemɔ 16:6; okɛto Mateo 23:33-36 he.

Seshi lɛ Tee Nɔ Ehi Shi

17. (a) Yesu abɛbua ni kɔɔ ŋmaa lɛ kɛ jwɛi lɛ he lɛ tsɔɔ mɛni? (b) Mɛni ba yɛ 1918, ni no ha akpoo mɛni ni ahala mɛni?

¹⁷ Yɛ ebɛbua ni kɔɔ dumɔ wui kpakpai lɛ kɛ jwɛi lɛ he lɛ mli lɛ, Yesu gba duŋ kpii ni baahi shi yɛ be mli ni Kristendom yeɔ lumɔ lɛ efɔ shi. Ni kɛlɛ, hemɔkɛyeli kwamɔ afii ohai abɔ lɛ fɛɛ mli lɛ, aŋkroaŋkroi ni ji Kristofoi ni tamɔ dumɔ wui kpakpai, mɛi ni afɔ amɛ mu lɛ diɛŋtsɛ baahi shi. (Mateo 13:24-29, 36-43) No hewɔ lɛ, beni Nuŋtsɔ lɛ gbi lɛ je shishi yɛ October 1914 lɛ, no mli lɛ anɔkwa Kristofoi yɛ shikpɔŋ lɛ nɔ lolo. (Kpojiemɔ 1:10) Ebaje kpo akɛ Yehowa ba emumɔŋ sɔlemɔ we lɛ kɛha kojomɔ aaafee no sɛɛ afii etɛ kɛ fa, yɛ 1918, ni Yesu ni ji “kpaŋmɔ lɛ bɔfo” lɛ fata ehe. (Maleaki 3:1; Mateo 13:47-50) Be eshɛ ni yɛ naagbee lɛ Nuŋtsɔ lɛ baakpoo apasa Kristofoi lɛ ni ehala ‘tsulɔ anɔkwafo kɛ nilelɔ yɛ enibii fɛɛ nɔ.’—Mateo 7:22, 23; 24:45-47.

18. Mɛɛ “ŋmɛlɛtswaa” ba yɛ 1914, ni eji be ni esa akɛ tsulɔ lɛ afee mɛni?

¹⁸ Ni eji be hu ni sa akɛ nɛkɛ tsulɔ nɛɛ agbala ejwɛŋmɔ kɛya nibii ni aŋmala yɛ Yesu shɛɛ saji ni ekɛyaha asafoi kpawo lɛ mli lɛ anɔ, taakɛ wɔnaa yɛ nɔ ni ajaje yɛ mli lɛ. Akɛ nɔkwɛmɔnɔ lɛ, Yesu wie ba ni ebaaba ni ebakojo asafoi lɛ ahe, ni nɛkɛ kojomɔ nɛɛ je shishi yɛ 1918. (Kpojiemɔ 2:5, 16, 22, 23; 3:3) Ewieɔ akɛ ebaabaa Filadelfia asafo lɛ yi kɛjɛ “kaa ŋmɛlɛtswaa ni baaba jeŋ muu lɛ fɛɛ nɔ” lɛ mli. (Kpojiemɔ 3:10, 11) Nɛkɛ “kaa ŋmɛlɛtswaa” nɛɛ ba yɛ be mli ni Nuŋtsɔ lɛ gbi lɛ je shishi yɛ 1914 lɛ, ni yɛ esɛɛ lɛ aka Kristofoi lɛ akwɛ yɛ anɔkwayeli kɛha Nyɔŋmɔ Maŋtsɛyeli ni ato ama shi lɛ he.—Okɛto Mateo 24:3, 9-13 he.

19. (a) Asafoi kpawo lɛ feɔ mɛni he mfoniri ŋmɛnɛ? (b) Mɛɛ asafoi babaoo ko kɛ amɛhe ebabɔ Kristofoi ni afɔ amɛ mu lɛ ahe, ni mɛni hewɔ Yesu ŋaawoo lɛ kɛ eshihilɛi ni etsɔɔ mli lɛ hu kɔɔ amɛhe lɛ? (d) Te esa akɛ wɔsusu Yesu shɛɛ saji ni ekɛha klɛŋklɛŋ afii oha lɛ mli asafoi kpawo lɛ ahe wɔha tɛŋŋ?

¹⁹ Yɛ enɛ hewɔ lɛ, Yesu wiemɔi ni ekɛmaje asafoi lɛ ena amɛmlibaa ni da kɛjɛ 1914. Yɛ bɔ ni eyɔɔ nɛɛ hewɔ lɛ, asafoi kpawo lɛ feɔ Kristofoi ni afɔ amɛ mu ni yɔɔ Nuŋtsɔ lɛ gbi lɛ mli lɛ asafoi lɛ fɛɛ he mfoniri. Agbɛnɛ, yɛ afii 50 ni eho nɛɛ kɛ babaoo mli lɛ, heyelilɔi babaoo ko ni amɛhiɛnɔkamɔ ji ni amɛhi shi kɛya naanɔ yɛ Paradeiso yɛ shikpɔŋ nɔ lɛ kɛ amɛhe ebabɔ Kristofoi ni afɔ amɛ mu lɛ ni Yohane fee amɛhe mfoniri lɛ ahe. Yesu Kristo ni awo ehiɛ nyam lɛ ŋaawoo lɛ kɛ shihilɛi ni ena yɛ asafoi kpawo lɛ amli yɛ be mli ni ebasara asafoi nɛɛ lɛ hu kɔɔ mɛnɛɛmɛi ahe nakai nɔŋŋ, ejaakɛ jalɛ nifeemɔ kɛ anɔkwayeli he mla kome pɛ ni afo afɔ shi yɔɔ kɛha Yehowa tsuji fɛɛ. (2 Mose 12:49; Kolosebii 3:11) No hewɔ lɛ, Yesu shɛɛ saji ni ekɛyaha asafoi kpawo ni yɔɔ Asia Bibioo lɛ yɛ klɛŋklɛŋ afii oha lɛ mli lɛ jeee yinɔsane mli nibii ni ataoɔ ale kɛkɛ. Amɛtsɔɔ wala loo gbele kɛhaa wɔteŋ mɔ fɛɛ mɔ. No hewɔ lɛ nyɛhaa wɔboa Yesu wiemɔi lɛ atoi jogbaŋŋ.

[Shishigbɛ niŋmai]

[Akrabatsa ni yɔɔ baafa 32]

Be Kɛha Kaa kɛ Kojomɔ

Abaptisi Yesu ni afɔ lɛ mu akɛ Maŋtsɛ ni Ahala Lɛ yɛ Yordan Faa lɛ mli aaafee October 29 Ŋ.B. Yɛ afii etɛ kɛ fa sɛɛ, yɛ afi 33 Ŋ.B. lɛ, eba Yerusalem sɔlemɔtsu lɛ mli ni ebashwie mɛi ni kɛ jɛmɛ efee ojotswalɔi abuu lɛ kɛjɛ jɛmɛ. Etamɔ nɔ ni nɔ ko yɛ ni kɛ nɛkɛ afii etɛ kɛ fa be nɛɛ kpaa gbee kɛjɛ be mli ni awó Yesu maŋtsɛ yɛ ŋwɛi yɛ October 1914 lɛ aahu kɛbashi be mli ni eba ni ebasara mɛi ni kɛɔ akɛ amɛji Kristofoi lɛ yɛ be mli ni kojomɔ je shishi yɛ Nyɔŋmɔ shia lɛ. (Mateo 21:12, 13; 1 Petro 4:17) Akɛ shitee-kɛ-woo babaoo kpee Maŋtsɛyeli nitsumɔ ni Yehowa webii kɛ amɛhe ewo mli lɛ yɛ 1918 mra mli. Eji kaa be yɛ shikpɔŋ muu lɛ fɛɛ nɔ, ni ajie mɛi ni sheɔ gbeyei lɛ kɛjɛ mli. Yɛ May 1918 lɛ, Kristendom osɔfoi lɛ wo hewalɛ ni awo Buu Mɔɔ Asafo lɛ mli onukpai lɛ atsuŋ, shi nyɔji nɛɛhu sɛɛ lɛ ajie amɛ kɛjɛ tsuŋwoo lɛ mli. Yɛ sɛɛ mli lɛ, saneyelɔi lɛ gbala apasa naafolɔmɔi ni akɛshi amɛ lɛ sɛɛ. Kɛjɛ 1919 kɛyaa lɛ, Nyɔŋmɔ webii lɛ agbɛjianɔtoo ni aka akwɛ ni atsuu he lɛ tee ehiɛ yɛ ekaa naa koni ejaje Yehowa Maŋtsɛyeli kɛtsɔ Yesu Kristo nɔ lɛ akɛ adesai ahiɛnɔkamɔ.—Maleaki 3:1-3.

Beni Yesu je esaramɔ lɛ shishi yɛ 1918 lɛ, ŋwanejee ko bɛ he akɛ Kristendom osɔfoi lɛ nine shɛ fɔbuu kojomɔ nɔ. Jeee akɛ amɛtee yiwaa shi amɛwo Nyɔŋmɔ webii lɛ pɛ kɛkɛ, shi moŋ amɛye la yi sɔ babaoo kɛtsɔ jeŋmaji ni kɛ amɛhe wuɔ ta yɛ klɛŋklɛŋ jeŋ ta lɛ mli lɛ ni amɛfi amɛsɛɛ lɛ hewɔ. (Kpojiemɔ 18:21, 24) Kɛkɛ ni nakai osɔfoi lɛ kɛ amɛhiɛnɔkamɔ fɔ Jeŋmaji Akpaŋmɔ ni adesa fee lɛ nɔ. Kristendom kɛ jeŋ apasa jamɔ maŋtsɛyeli lɛ fɛɛ egbee shi shwɛtɛɛ kɛjɛ Nyɔŋmɔ duromɔ mli kɛjɛ 1919.

[Shikpɔŋ he mfoniri ni yɔɔ baafa 28, 29]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

PERGAMO

SMIRNA

TIATIRA

FILADELFIA

SARDE

EFESO

LAODIKEA

[Mfonirii ni yɔɔ baafa 31]

Kristendom jamɔi lɛ ye la yi sɔ̃ babaoo he fɔ kɛtsɔ mɛi ni tsɔɔ Biblia lɛ shishi lɛ aloo amɛkaneɔ aloo amɛyɔɔ eko lɛ ni amɛwa amɛyi ni amɛgbe amɛ lɛ nɔ

Yitso 7

Tsiɛmɔ Nakai Klɛŋklɛŋ Suɔmɔ lɛ Hiɛ!

EFESO

 1. Mɛɛ asafo akɛ Yesu klɛŋklɛŋ shɛɛ sane lɛ maje, ni ekaiɔ nɔkwɛlɔi lɛ yɛ mɛni he?

YESU klɛŋklɛŋ shɛɛ sane lɛ ji nɔ ni ekɛyaha asafo ni yɔɔ Efeso lɛ, ni no mli lɛ eji ŋshɔ naa maŋ ni yɔɔ Asia Bibioo ni bɛŋkɛ Patmo ŋshɔkpɔ lɛ. Efa Yohane akɛ: “Efeso asafo lɛ bɔfo lɛ, ŋmaa oyaha lɛ akɛ: Nii ni mɔ ni hiɛ ŋulamii kpawo lɛ yɛ eninejurɔ ni enyiɛɔ shika kanetsei kpawo lɛ ateŋ lɛ kɛɛ nɛ.” (Kpojiemɔ 2:1) Taakɛ eji yɛ shɛɛ saji krokomɛi ekpaa lɛ mli lɛ, Yesu miigbala jwɛŋmɔ kɛmiiba nɔ ko ni tsɔɔ ehewalɛ kɛ gbɛhe lɛ nɔ yɛ biɛ. Eekai nɔkwɛlɔi ni yɔɔ Efeso lɛ akɛ onukpai lɛ fɛɛ yɛ ehebuu kwɛmɔ shishi ni akɛ eesara ni eekwɛ asafoi lɛ fɛɛ. Etee nɔ ekɛ nɛkɛ yitsoyeli ni suɔmɔ yɔɔ mli nɛɛ etsu nii, ni ekwɛ onukpai lɛ ni ekɛ mlihilɛ enyiɛ mɛi fɛɛ ni kɛ amɛhe ebɔ asafo lɛ he lɛ ahiɛ kɛbashi wɔbei nɛɛ amli. Etsakeɔ asafoŋ gbɛjianɔtoi amli yɛ be kɛ bei amli bɔni afee ni la lɛ anyɛ akpɛ babaoo. Hɛɛ, Yesu ji Tookwɛlɔ Nukpa ni kwɛɔ Nyɔŋmɔ tooi lɛ anɔ.—Mateo 11:28-30; 1 Petro 5:2-4.

 2. (a) Yesu jie Efeso asafo lɛ yi yɛ mɛɛ nibii kpakpai amli? (b) Mɛɛ bɔfo Paulo ŋaawoo ko eka shi faŋŋ akɛ Efeso onukpai lɛ ebo toi?

² Kɛkɛ ni Yesu to okadi kɛha eshɛɛ saji kpawo lɛ fɛɛ kɛtsɔ yijiemɔ wiemɔi ni ekɛje shishi lɛ nɔ, ja asafoi enyɔ pɛ. Kɛha Efesobii lɛ, nɔ ni ekɛɛ amɛ nɛ: “Mile onitsumɔi lɛ kɛ odeŋmegbomɔi lɛ kɛ otsuishiŋmɛɛ lɛ kɛ bɔ ni okpɛlɛɛɛ mɛi fɔji lɛ, ni oka mɛi ni kɛɔ akɛ bɔfoi ji amɛ ni amɛjeee lɛ, ni ona akɛ amalelɔi ji amɛ, ni ohiɛ mli, ni oŋmɛɔ otsui shi, ni migbɛi lɛ ahewɔ lɛ obɔɔ mɔdɛŋ, ni etɔkoo.” (Kpojiemɔ 2:2, 3) Afii komɛi dani enɛ aaaba lɛ, no mli lɛ bɔfo Paulo ebɔ Efeso onukpai lɛ kɔkɔ yɛ “klaji fulɔi” ni ji hemɔkɛyeli kwalɔi ni gbaa tooi lɛ anaa lɛ he, ni ekɛɛ nakai onukpai lɛ akɛ “nyɛsaraa,” koni amɛkɛnyiɛ enɔkwɛmɔnɔ ni etɔɔɔ lɛ yɛ mli lɛ sɛɛ. (Bɔfoi lɛ Asaji 20:29, 31) Akɛni Yesu miijie amɛyi agbɛnɛ yɛ amɛdeŋmegbomɔ kɛ amɛtsuishiŋmɛɛ kɛ bɔ ni amɛhaaa etɔ amɛ lɛ he hewɔ lɛ, eka shi faŋŋ akɛ amɛkɛ nakai ŋaawoo lɛ tsu nii.

 3. (a) “Amale bɔfoi” ebɔ mɔdɛŋ akɛ amɛaalaka anɔkwafoi lɛ yɛ wɔgbii nɛɛ amli yɛ mɛɛ gbɛ nɔ? (b) Mɛɛ kɔkɔbɔɔ ni kɔɔ hemɔkɛyeli kwalɔi ahe Petro kɛha?

³ Yɛ Nuŋtsɔ lɛ gbi lɛ mli hu lɛ, “amale bɔfoi” ni “wieɔ nii ni ejaaa aaate shi, ni amɛaakpala kaselɔi lɛ amɛshwie amɛsɛɛ” lɛ ejie amɛhe kpo. (2 Korintobii 11:13; Bɔfoi lɛ Asaji 20:30; Kpojiemɔ 1:10) Amɛnaa nɔ ni hi yɛ jamɔi sɔrɔtoi ni mli egbala ni teɔ shi woɔ amɛhe lɛ amli, amɛkɛɔ akɛ Nyɔŋmɔ bɛ asafo ko, ni amɛkpɛlɛɛɛ nɔ akɛ Yesu nine shɛ Maŋtsɛyeli hewalɛ nɔ yɛ 1914. Amɛhaa gbalɛ ni yɔɔ 2 Petro 3:3, 4 lɛ baa mli akɛ: “Naagbee gbii lɛ anɔ lɛ hefɛoyelɔi aaaba kɛ hefɛoyeli, mɛi ni aaanyiɛ yɛ amɛ diɛŋtsɛ amɛ akɔnɔi lɛ anaa, ni amɛaakɛɛ: ‘Nɛgbɛ ebaa lɛ he shiwoo lɛ yɔɔ? Ejaakɛ kɛjɛ beyinɔ ni tsɛmɛi lɛ tee yawɔwɔi nɛɛ, bɔ ni nibii yɔɔ kɛjɛ jeŋ bɔɔ shishijee mli lɛ, nakai nɔŋŋ amɛyɔɔ nɛɛ.’”

 4. (a) Hefɛoyelɔi lɛ ahenɔwomɔ kɛ atuatsemɔ lɛ jeɔ kpo yɛ mɛɛ gbɛ nɔ? (b) Kristofoi ni yɔɔ ŋmɛnɛ lɛ tsɔɔ akɛ amɛtamɔ Efesobii lɛ kɛtsɔ mɛni ni amɛfeɔ amɛshiɔ shitee-kɛ-wolɔi amalelɔi lɛ nɔ?

⁴ Nɛkɛ hefɛoyelɔi nɛɛ tseɔ atua amɛshiɔ amɛhemɔkɛyeli ni amɛaajaje yɛ mɛi fɛɛ ahiɛ lɛ. (Romabii 10:10) Amɛtao Kristendom osɔfoi lɛ asɛɛfimɔ kɛ yelikɛbuamɔ kɛjɛ adafitswaa woji kɛ TV nitsumɔ hei adɛŋ koni amɛgbɛ amaniɛbɔi ni ji amale ni kɔɔ amɛtsutsu hefatalɔi lɛ ahe lɛ amɛshwa. Etsɛɛɛ ni anɔkwafoi naa akɛ anɔkwale bɛ nɛkɛ shishiulɔi nɛɛ awiemɔ kɛ jeŋba mli. Taakɛ Efesobii lɛ ji lɛ, Kristofoi ni yɔɔ ŋmɛnɛ lɛ “ekpɛlɛɛɛ mɛi fɔji lɛ,” no hewɔ lɛ amɛshwieɔ amɛ kɛjɛɔ amɛ asafoi lɛ amli.a

 5. (a) Mɛɛ gbɔjɔmɔ Yesu kɛɛ akɛ Efesobii lɛ yɔɔ? (b) Mɛɛ wiemɔi kulɛ esa akɛ Efesobii lɛ akai?

⁵ Agbɛnɛ, taakɛ efeɔ yɛ asafoi kpawo lɛ ateŋ enumɔ ahe lɛ, Yesu jieɔ naagba ni hiɛdɔɔ yɔɔ mli lɛ kpo. Ekɛɔ Efesobii lɛ akɛ: “Shi kɛlɛ mikɛo yɛ sane ko, no ji akɛ, oŋmɛɛ oklɛŋklɛŋ suɔmɔ lɛ he.” (Kpojiemɔ 2:4) Kulɛ esaaa akɛ amɛtɔɔ fa yɛ enɛ mli, ejaakɛ Paulo etsɔ hiɛ eŋma amɛ aaafee afii 35 ni ewie Nyɔŋmɔ “suɔmɔ babaoo ni ekɛsumɔɔ wɔ” lɛ he etsɔɔ amɛ, ni ewo amɛ hewalɛ akɛ: “Nyɛfea Nyɔŋmɔ kaselɔi, tamɔ bii ni asumɔɔ, ni nyɛnyiɛa yɛ suɔmɔ mli, taakɛ bɔ ni Kristo hu sumɔɔ wɔ lɛ.” (Efesobii 2:4; 5:1, 2) Agbɛnɛ hu, kulɛ esa akɛ aŋma Yesu wiemɔi lɛ yɛ amɛtsuii anɔ bɔ ni anyɛŋ atsumɔ: “Nuŋtsɔ [Yehowa] wɔ-Nyɔŋmɔ lɛ, [Yehowa] kome ni; ni suɔmɔ Nuŋtsɔ [Yehowa] o-Nyɔŋmɔ lɛ kɛ otsui fɛɛ kɛ osusuma fɛɛ kɛ ojwɛŋmɔ fɛɛ kɛ onyɛmɔ fɛɛ!” (Marko 12:29-31) Efesobii lɛ elaaje nakai klɛŋklɛŋ suɔmɔ lɛ.

 6. (a) Kɛ wɔji mɛi ni etsɛ loo mɛi heei ni kɛ amɛhe ebabɔ asafo lɛ he hu lɛ, mɛɛ oshara kɛ sui komɛi esa akɛ wɔkwɛ wɔhe nɔ jogbaŋŋ yɛ he? (b) Mɛni esa akɛ wɔsuɔmɔ kɛha Nyɔŋmɔ lɛ atsirɛ wɔ ni wɔfee?

⁶ Kɛ wɔji mɛi ni etsɛ loo mɛi heei yɛ asafo lɛ mli lɛ, esa akɛ wɔkwɛ jogbaŋŋ koni wɔkalaaje wɔ klɛŋklɛŋ suɔmɔ ni wɔyɔɔ kɛha Yehowa lɛ. Mɛɛ gbɛ nɔ wɔɔnyɛ wɔtsɔ wɔlaaje enɛ yɛ? Wɔbaanyɛ wɔha bɔ ni wɔkɛ wɔhe kpɛtɛɔ wɔheloo gbɛfaŋ nitsumɔ he, bɔ ni wɔshweɔ ni wɔna shika babaoo, aloo bɔ ni wɔdiɔ hiɛtserɛjiemɔ sɛɛ lɛ afee nɔ titri yɛ wɔshihilɛi amli. No hewɔ lɛ wɔbaanyɛ wɔtsɔmɔ gbɔmɛi ni amɛjwɛŋmɔ yɔɔ heloo naa nibii anɔ moŋ fe mɛi ni amɛjwɛŋmɔ yɔɔ mumɔŋ nibii anɔ. (Romabii 8:5-8; 1 Timoteo 4:8; 6:9, 10) Esa akɛ suɔmɔ ni wɔyɔɔ kɛha Yehowa lɛ atsirɛ wɔ ni wɔtsake sui ni tamɔ nɛkɛ koni ‘wɔya nɔ wɔtao Nyɔŋmɔ maŋtsɛyeli lɛ kɛ ejalɛ lɛ klɛŋklɛŋ,’ bɔni afee ni ‘wɔbua jwetrii anaa yɛ ŋwɛi wɔha wɔhe.’—Mateo 6:19-21, 31-33.

 7. (a) Mɛni esa akɛ no atsirɛ wɔsɔɔmɔ ni wɔkɛhaa Yehowa lɛ? (b) Mɛni Yohane wie yɛ suɔmɔ he?

⁷ Nyɛhaa suɔmɔ ni mli kwɔ ni wɔyɔɔ kɛhaa Yehowa lɛ afee nɔ ni kanyaa sɔɔmɔ yɛ be fɛɛ mli. Nyɛhaa wɔnaa hiɛsɔɔ diɛŋtsɛ wɔhaa nibii fɛɛ ni Yehowa kɛ Kristo efee kɛha wɔ lɛ. Taakɛ Yohane diɛŋtsɛ ŋma yɛ sɛɛ mli lɛ: “Enɛ mli suɔmɔ lɛ yɔɔ: Jeee akɛ wɔ ni wɔsumɔɔ Nyɔŋmɔ, shi moŋ akɛ lɛ ni esumɔ wɔ, ni etsu e-Bi lɛ akɛ ebafee wɔhe eshai lɛ ahe kpatamɔ nɔ.” Yohane yaa nɔ ekɛɔ wɔ akɛ: “Nyɔŋmɔ lɛ, suɔmɔ ji lɛ, ni mɔ ni hiɔ suɔmɔ mli lɛ, ehiɔ Nyɔŋmɔ mli, ni Nyɔŋmɔ hu hiɔ emli.” Ekaba kɔkɔɔkɔ akɛ wɔɔha wɔsuɔmɔ kɛha Yehowa, kɛha Nuŋtsɔ Yesu Kristo, kɛ agbɛnɛ kɛha Nyɔŋmɔ Wiemɔ ni hiɛ ka lɛ aaalaaje gbi ko! Wɔbaanyɛ wɔjie nɛkɛ suɔmɔ nɛɛ kpo wɔtsɔɔ ni jeee yɛ sɔɔmɔ kɛha Nyɔŋmɔ yɛ ekaa naa pɛ kɛkɛ, shi moŋ kɛtsɔ toiboo ni wɔɔfee wɔha “nɛkɛ kita nɛɛ [ni] wɔna kɛjɛ eŋɔɔ, koni mɔ ni sumɔɔ Nyɔŋmɔ lɛ asumɔ lɛ diɛŋtsɛ enyɛmi hu” lɛ nɔ.—1 Yohane 4:10, 16, 21; Hebribii 4:12; kwɛmɔ 1 Petro 4:8; Kolosebii 3:10-14; Efesobii 4:15 hu.

“Tsu Klɛŋklɛŋ Nitsumɔi Lɛ”

 8. Mɛni Yesu kɛɛ esa akɛ Efesobii lɛ afee?

⁸ Esa akɛ nakai Efesobii lɛ atsiɛ suɔmɔ ni be ko lɛ amɛyɔɔ lɛ hiɛ kɛji akɛ amɛsumɔɔɔ ni eje amɛdɛŋ. “No hewɔ lɛ,” Yesu kɛɛ amɛ akɛ: “kaimɔ he ni ojɛ ogbee shi lɛ, ni otsake otsui, ni otsu klɛŋklɛŋ nitsumɔi lɛ; shi kɛ jeee nakai lɛ, maba onɔ oya, ni matsi okanetso lɛ kɛaaje egbɛhe lɛ, ja oshwa ohe.” (Kpojiemɔ 2:5) Te Kristofoi ni yɔɔ Efeso asafo lɛ mli lɛ here nɛkɛ wiemɔi nɛɛ anɔ amɛha tɛŋŋ? Wɔleee. Wɔyɛ hiɛnɔkamɔ akɛ amɛtsake amɛtsui ni amɛye omanye yɛ suɔmɔ ni amɛyɔɔ kɛha Yehowa lɛ hiɛtsiɛmɔ mli. Kɛ amɛfeee nakai lɛ, abaagbe amɛkane lɛ, ni abaajie amɛkanetso lɛ. Hegbɛ ni amɛkɛhaa anɔkwale lɛ kpɛɔ lɛ baaje amɛdɛŋ.

 9. (a) Mɛɛ hewalɛwoo wiemɔ Yesu yɔɔ kɛha Efesobii lɛ? (b) Yɛ mɛɛ gbɛ nɔ asafoi ni hi shi yɛ Yohane gbii lɛ asɛɛ lɛ nyɛɛɛ abo Yesu ŋaawoo ni ekɛha Efesobii lɛ atoi?

⁹ Fɛɛ sɛɛ lɛ, Yesu yɛ nɛkɛ hewalɛwoo wiemɔi nɛɛ kɛha Efesobii lɛ: “Shi kɛlɛ enɛ oyɔɔ, akɛ onyɛɔ Nikolaemɛi lɛ anitsumɔi lɛ ni mi hu minyɛɔ lɛ.” (Kpojiemɔ 2:6) Kɛ hooo lɛ, amɛnyɛɔ jamɔ mligbalamɔi, taakɛ bɔ ni Nuŋtsɔ Yesu Kristo nyɛɔ lɛ. Shi beni afii lɛ hoɔ lɛ, asafoi pii booo nakai Yesu wiemɔi lɛ atoi. Suɔmɔ ni amɛbɛ kɛha Yehowa, kɛha anɔkwale lɛ, kɛ agbɛnɛ kɛha amɛhe ba ni nɔ ni jɛ mli ba ji kplaŋmɔ ni amɛkplaŋ kɛtee mumɔŋ duŋ kpii mli. Amɛmli gbala amɛfee kui bibii ni kɛ amɛhe beɔ. “Kristofoi” woloŋmalɔi ni bɛ suɔmɔ ko kɛha Yehowa lɛ jie Nyɔŋmɔ gbɛi lɛ diɛŋtsɛ kɛjɛ Hela Biblia lɛ ni akɛ niji ŋmala lɛ mli. Suɔmɔ ni abɛ lɛ hu ŋmɛ gbɛ ni abɔi Babilon kɛ Hela hemɔkɛyelii atsɔɔmɔ tamɔ hɛl la, hetsuumɔ he, kɛ Triniti, yɛ Kristojamɔ gbɛi amli. Akɛni amɛbɛ suɔmɔ ko kɛha Nyɔŋmɔ kɛ agbɛnɛ anɔkwale lɛ hewɔ lɛ, amɛteŋ mɛi pii ni kɛɔ akɛ Kristofoi ji amɛ lɛ kpa Nyɔŋmɔ Maŋtsɛyeli lɛ he sanekpakpa lɛ shiɛmɔ. Pɛsɛmkunya osɔfoi akuu ko ni fee lɛ diɛŋtsɛ emaŋtsɛyeli yɛ shikpɔŋ nɛɛ nɔ yɛ biɛ ji mɛi ni baye amɛnɔ.—Okɛto 1 Korintobii 4:8 he.

10. Te Kristendom jamɔ mli shihilɛ lɛ yɔɔ tɛŋŋ yɛ 1918 mli?

¹⁰ Beni kojomɔ je shishi yɛ Nyɔŋmɔ we lɛ yɛ 1918 lɛ, no mli lɛ Kristendom osɔfoi lɛ ni mli egbala efee kui sɔrɔtoi lɛ kɛ sɛɛfimɔ miiha Jeŋ Ta I, ni amɛmiiwo Katolikbii kɛ Protestantbii ni yɔɔ afai enyɔ lɛ fɛɛ hewalɛ akɛ amɛgbegbee amɛhe. (1 Petro 4:17) Akɛni amɛtamɔɔɔ Efeso asafo lɛ ni nyɛɔ nɔ ni nakai Nikolaemɛi akuu lɛ feɔ lɛ hewɔ lɛ, Kristendom jamɔi lɛ amli eyi obɔ kɛ tsɔɔmɔi ni teɔ shi woɔ Nyɔŋmɔ ni kɛ amɛhe kpaaa gbee, ni amɛ osɔfoi lɛ eyafi jeŋ ni Yesu kɛɛ esaaa akɛ ekaselɔi lɛ feɔ efa lɛ sɛɛ. (Yohane 15:17-19) Akɛni amɛ asafoi lɛ leee Biblia mli saneyitso ni ji Nyɔŋmɔ Maŋtsɛyeli lɛ he nɔ ko hewɔ lɛ, amɛjeee kanetsei ni miiha Ŋmalɛ naa anɔkwalei akpɛ, ni asaŋ amɛmli bii lɛ hu jeee Yehowa mumɔŋ sɔlemɔtsu lɛ mlibii lɛ fa. Amɛ hii (kɛ yei) hiɛnyiɛlɔi lɛ jeee ŋulamii shi moŋ ajie amɛ kpo akɛ amɛji “esha gbɔmɔ” loo mlakwamɔ gbɔmɔ lɛ mlibii.—2 Tesalonikabii 2:3; Maleaki 3:1-3.

11. (a) Mɛɛ Kristofoi akuu ko ni ayoo amɛ yɛ je lɛŋ yɛ 1918 mli kɛ Yesu wiemɔi ni ekɛha Efesobii lɛ tsu nii? (b) Mɛni Yohane kuu lɛ fee kɛjɛ 1919 mli kɛbaa?

¹¹ Shi Yohane kuu lɛ fa kpo kɛjɛ klɛŋklɛŋ jeŋ ta lɛ mli gbii ni fee hoo lɛ mli kɛ suɔmɔ kɛha Yehowa kɛ enɔkwale lɛ ni tsirɛ amɛ koni amɛkɛ ekaa ni tamɔ la asɔmɔ lɛ. Amɛte shi amɛwo mɛi ni bɔ mɔdɛŋ ni amɛkɛ mligbalamɔ aba kɛtsɔ jamɔ ni amɛkɛaaha Buu Mɔɔ Asafo lɛ klɛŋklɛŋ sɛinɔtalɔ, Charles T. Russell nɔ, yɛ egbele sɛɛ yɛ 1916 lɛ. Akɛni akɛ yiwaa kɛ haomɔi etsɔse amɛ hewɔ lɛ, nɛkɛ Kristofoi akuu nɛɛ nine shɛ kojomɔ ko ni ji “aekoo” nɔ yɛ faŋŋ mli kɛjɛ amɛ Nuŋtsɔ lɛ dɛŋ kɛ ninefɔɔ akɛ amɛbote emiishɛɛ lɛ mli. (Mateo 25:21, 23) Amɛtsɔ nibii ni ba je lɛ mli lɛ kɛ amɛ diɛŋtsɛ amɛniiashikpamɔ mli amɛyoo okadi ni Yesu kɛha ni baakadi ba ni eba yɛ Maŋtsɛyeli hewalɛ mli ni anaaa lɛ lɛ mlibaa. Kɛjɛ 1919 kɛbaa lɛ, amɛtee amɛhiɛ akɛ amɛaaná Yesu gbalɛ kpeteŋkpele lɛ mlibaa mli gbɛfaŋnɔ lolo: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.” (Mateo 6:9, 10; 24:3-14) Kɛ amɛsuɔmɔ kɛha Yehowa lɛ eba shi yɛ gbɛ ko nɔ lɛ, akanya lɛ ni etsɔ la ni tsoɔ kɛjɛ nakai be lɛ mli kɛbaa.

12. (a) Mɛɛ tsɛmɔ je kpo yɛ kpee ko ni fee yinɔsane lɛ shishi yɛ 1922? (b) Mɛɛ gbɛi anɔkwale Kristofoi kpɛlɛ nɔ yɛ 1931, ni amɛtsake amɛtsui kɛjɛ mɛni mli?

¹² Yɛ kpee ko ni afee ni fee yinɔsane, ni Kristofoi nɛɛ ateŋ 18,000 ba shishi, yɛ Cedar Point, Ohio, U.S.A., yɛ September 5-13, 1922 lɛ shishi lɛ, tsɛmɔ lɛ je kpo yɛ jɛmɛ akɛ: “Nyɛkɛ nyɛhe awoa sɔɔmɔ lɛ mli, O nyɛ ŋwɛi floflo Nyɔŋmɔ lɛ bii! . . . Esa akɛ je lɛ ale akɛ Yehowa ji Nyɔŋmɔ, ni akɛ Yesu Kristo ji maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ. . . . No hewɔ lɛ nyɛtswaa, nyɛtswaa, nyɛtswaa Maŋtsɛ lɛ kɛ maŋtsɛyeli lɛ he adafi.” Aaha Yehowa gbɛi ni nɔ bɛ lɛ miije kpo waa agbɛnɛ. Yɛ 1931 lɛ nɛkɛ Kristofoi nɛɛ bua amɛhe naa yɛ kpee ko shishi yɛ Columbus, Ohio, U.S.A., ni amɛkɛ miishɛɛ kpɛlɛ nɔ, ni amɛŋɔ gbɛi ni Nyɔŋmɔ etsɔɔ yɛ Yesaia gbalɛ lɛ mli—Yehowa Odasefoi—lɛ. (Yesaia 43:10, 12) Atsɔ March 1, 1939 nɔ̃ ni akala lɛ nɔ atsake Asafo lɛ wolo titri lɛ gbɛi afee lɛ Buu-Mɔɔ Eetswa Yehowa Maŋtsɛyeli He Adafi, ni etsɔ nɛkɛ gbɛ nɔ ekɛ klɛŋklɛŋ woo lɛ ha wɔ-Bɔlɔ lɛ kɛ odehei anɔyeli ni eto lɛ. Yehowa Odasefoi, ni ámɛna suɔmɔ hee amɛha Yehowa lɛ etsake amɛtsui kɛjɛ tsutsu woo ko ni ekolɛ amɛkɛyahaaa kɛ egbɛi kɛ Maŋtsɛyeli lɛ ni ehe shi lɛ ni amɛyajieee yi hewɔ lɛ mli.—Lala 106:6, 47, 48.

“Mɔ ni Yeɔ Kunim Lɛ”

13. (a) Mɛɛ jɔɔmɔi mɛɔ Efesobii lɛ kɛji akɛ ‘amɛye kunim’? (b) Mɛɛ gbɛ nɔ Efeso Kristofoi lɛ aaatsɔ ni ‘amɛye kunim’?

¹³ Yɛ naagbee lɛ, taakɛ efeɔ yɛ eshɛɛ saji krokomɛi lɛ amli lɛ, Yesu gbala jwɛŋmɔ kɛtee Nyɔŋmɔ mumɔ lɛ nɔ akɛ ekɛ nyɔmɔwoo kɛha anɔkwayeli miitsɔ Yesu nɔ aha. Ekɛɔ Efesobii lɛ akɛ: “Mɔ ni yɔɔ toi lɛ, ha ni enu nɔ ni mumɔ lɛ kɛɔ asafoi lɛ. Mɔ ni yeɔ kunim lɛ, maha lɛ wala tso lɛ ni yɔɔ mi-Nyɔŋmɔ lɛ paradeiso lɛ mli lɛ nɔ yibii lɛ eko eye.” (Kpojiemɔ 2:7) Mɛi ni yɔɔ toii ni nuɔ nii lɛ kɛ hepelemɔ baasumɔ ni amɛbo nakai shɛɛ sane ni he hiaa lɛ toi, akɛni amɛle akɛ jeee Yesu diɛŋtsɛ kɛbaa, shi moŋ ebaa kɛjɛɔ Jeŋ Muu Fɛɛ Nuŋtsɔ Yehowa lɛ diɛŋtsɛ ŋɔɔ kɛtsɔɔ E-mumɔ krɔŋkrɔŋ lɛ loo enitsumɔ hewalɛ lɛ nɔ lɛ. Te amɛaafee tɛŋŋ ni ‘amɛye kunim’ hu? Kɛtsɔ Yesu, mɔ ni hiɛ emuuyeli mli kɛtee gbele mli, ni yɛ no hewɔ lɛ enyɛ ekɛɛ akɛ: “Nyɛtsui anyɔa nyɛmli: Miye je lɛ nɔ kunim” lɛ sɛɛ nyiɛmɔ pɛpɛɛpɛ nɔ.—Yohane 8:28; 16:33; kwɛmɔ 1 Yohane 5:4 hu.

14. Mɛni “Nyɔŋmɔ paradeiso” ni Yesu tsi ta lɛ kɔɔ he?

¹⁴ Akɛni amɛbɛ gbɛkpamɔ ko akɛ amɛaahi shi yɛ shikpɔŋ nɔ paradeiso mli hewɔ lɛ, te aaafee tɛŋŋ ni Kristofoi ni afɔ amɛ mu lɛ, tamɔ mɛi ni yɔɔ Efeso lɛ, akɛ “wala tso lɛ ni yɔɔ . . . Nyɔŋmɔ . . . paradeiso lɛ mli lɛ nɔ yibii” lɛ yeli aaaha amɛ akɛ nyɔmɔwoo lɛ? Enɛ nyɛŋ afee Paradeiso ni aku sɛɛ akɛba shikpɔŋ nɔ lɛ, ejaakɛ Kristofoi 144,000 ni afɔ amɛ mu lɛ, ni mɛi ni yɔɔ Efeso asafo lɛ mli lɛ fata he lɛ ji mɛi ni ahe amɛ kɛjɛ adesai ateŋ koni amɛkɛ Toobi Kristo Yesu abaye maŋtsɛ, yɛ ŋwɛi Zion Gɔŋ lɛ nɔ akɛ mumɔŋ bii. (Efesobii 1:5-12; Kpojiemɔ 14:1, 4) No hewɔ lɛ, nɔ ni awieɔ he yɛ biɛ lɛ kɔɔ ŋwɛi maŋtsɛyeli he lɛ ni tamɔ abɔɔ ni nɛkɛ kunimyelɔi nɛɛ hiɔ jɛmɛ lɛ he. Yɛ nɛkɛ “Nyɔŋmɔ . . . paradeiso” nɛɛ mli, hɛɛ, yɛ Yehowa diɛŋtsɛ hiɛ ni mɛi ni yeɔ kunim ni akɛ shihilɛ ni gbele bɛ mli eha amɛ nɛɛ baaya nɔ ni amɛhi shi kɛya naanɔ taakɛ akɛ wala tso lɛ nɔ yibii lɛ yeli fee he okadi yɛ biɛ lɛ.

15. Mɛni hewɔ Yesu hewalɛwoo koni aye kunim lɛ he hiaa asafo babaoo ni yɔɔ ŋmɛnɛ lɛ waa lɛ?

¹⁵ Ni 144,000 lɛ ni afɔ amɛ mu lɛ sɛɛfilɔi anɔkwafoi ni yɔɔ shikpɔŋ nɔ lɛ hu? Nɛkɛ nanemɛi hefatalɔi Odasefoi nɛɛ asafo babaoo ko hu miiye kunim. Shi amɛhiɛnɔkamɔ damɔ shikpɔŋ nɔ paradeiso lɛ mli ni amɛaabote, he ni amɛbaanu “wala nu faa” ni amɛna tsabaa kɛjɛ “tso lɛ yibaai” ni atɛo yɛ faa lɛ toi biɛ kɛ biɛ lɛ mli lɛ nɔ. (Kpojiemɔ 7:4, 9, 17; 22:1, 2) Kɛ oji nɛkɛ kuu nɛɛ mli mɔ ko lɛ, eba akɛ bo hu ooojie osuɔmɔ ni mli wa lɛ kpo otsɔɔ Yehowa ni oye omanye yɛ hemɔkɛyeli kunimyeli lɛ mli. Enɛ baaha onine ashɛ naanɔ wala yɛ Paradeiso shikpɔŋ nɔ yɛ miishɛɛ mli lɛ nɔ.—Okɛto 1 Yohane 2:13, 14 he.

[Shishigbɛ niŋmaa]

[Akrabatsa ni yɔɔ baafa 36]

Yijiemɔ ni jɛ Suɔmɔ Mli Kɛha Yehowa kɛ E-Bi lɛ

Yɛ lala wolo ni Yehowa webii fee yɛ 1905 lɛ mli lɛ, lalai ni akɛjieɔ Yesu yi ni yɔɔ mli lɛ fa fe lalai ni akɛjieɔ Yehowa Nyɔŋmɔ yi lɛ toi enyɔ. Yɛ amɛ 1928 lala wolo lɛ mli lɛ, lalai ni jieɔ Yesu yi lɛ kɛ yibɔ ni jieɔ Yehowa yi lɛ bafee pɛpɛɛpɛ. Shi yɛ amɛ nyɛsɛɛ lala wolo hee ni afee yɛ 1984 lɛ mli lɛ, akɛ woo haa Yehowa shii toi ejwɛ fe bɔ ni akɛhaa Yesu. Enɛ kɛ Yesu diɛŋtsɛ wiemɔi lɛ kpaa gbee: “Mi-Tsɛ da fe mi.” (Yohane 14:28) Esa akɛ suɔmɔ kɛha Yehowa afee klɛŋklɛŋ nɔ, ni suɔmɔ ni mli kwɔ ni ayɔɔ kɛha Yesu kɛ hiɛsɔɔ kɛha efɔleshaa ni nɔ bɛ kɛ egbɛhe akɛ Nyɔŋmɔ Osɔfonukpa kɛ Maŋtsɛ lɛ afata he.

[Akrabatsa ni yɔɔ baafa 34]

Gbɛ ni Yesu Tsɔɔ nɔ Ewoɔ Ŋaa

(Kpojiemɔ wolo lɛ mli yitsei kɛ kukuji ni atsɛ)

hewalɛwoo

Efeso 2:1 2:2, 3 2:4 2:5, 6 2:7

Smirna 2:8 2:9 — 2:10 2:11

Pergamo 2:12 2:13 2:14, 15 2:16 2:17

Tiatira 2:18 2:19 2:20, 21 2:24, 25 2:26-28

Sarde 3:1 — 3:1, 2 3:3, 4 3:5

Filadelfia 3:7 3:8 — 3:8-11 3:12

Laodikea 3:14 — 3:15-17 3:18-20 3:21

Yitso 8

Mɔdɛŋ ni Abɔɔ Koni Atsɔmɔ Kunimyelɔi

SMIRNA

 1. (a) Mɛɛ asafo nine shɛ shɛɛ sane nɔ kɛjɛ Yesu ni awo ehiɛ nyam lɛ ŋɔɔ agbɛnɛ? (b) Yesu tsɔ tsɛ ni etsɛ ehe akɛ “Klɛŋklɛŋ mɔ lɛ kɛ Naagbee mɔ lɛ” nɔ ekai Kristofoi ni yɔɔ nakai asafo lɛ mli lɛ yɛ mɛni he?

ŊMƐNƐ, blema Efeso etsɔ amaŋfɔ. Shi he ni akɛ Yesu shɛɛ sane ni ji enyɔ lɛ tee lɛ yɛ lolo akɛ maŋtiase ni nibii miiya nɔ yɛ mli. Yɛ Efeso ni etsɔ amaŋfɔ lɛ kooyigbɛ aaafee shitoi 35 lɛ ji he ni obaana Turkeybii amaŋ ni ji Izmir, he ni obaana Yehowa Odasefoi asafoi ejwɛ ni yɔɔ ekaa ko lɛ yɛ, yɛ ŋmɛnɛ po lɛ. Biɛ ji he ni Smirna yɔɔ, yɛ klɛŋklɛŋ afii oha lɛ mli. Agbɛnɛ kadimɔ Yesu wiemɔi ni nyiɛ sɛɛ lɛ: “Ni Smirna asafo lɛ bɔfo lɛ, ŋmaa oyaha lɛ akɛ: Nii ni ‘Klɛŋklɛŋ mɔ lɛ kɛ Naagbee mɔ lɛ,’ mɔ ni gbo ni ehiɛ ka ekoŋŋ lɛ kɛɛ nɛ.” (Kpojiemɔ 2:8) Yesu kɛ nɔ ni ejaje etsɔɔ Kristofoi ni yɔɔ Smirna lɛ kai amɛ akɛ, lɛ ji klɛŋklɛŋ emuuyeli mlihiɛlɔ ni Yehowa diɛŋtsɛ tee lɛ shi tɛ̃ɛ kɛtee mumɔŋ wala ni gbele bɛ mli lɛ mli kɛ naagbee mɔ hu ni atee lɛ shi nakai. Yesu diɛŋtsɛ baatee Kristofoi ni afɔ amɛ mu lɛ fɛɛ ni eshwɛ lɛ ashi. No hewɔ lɛ eji mɔ ni sa akɛ ekɛ ŋaawoo haa enyɛmimɛi, mɛi ni hiɛ ka nɔ akɛ amɛnine baashɛ ŋwɛi wala ni gbele bɛ mli nɔ tamɔ lɛ lɛ.

 2. Mɛni hewɔ Mɔ ni “gbo ni ehiɛ ka ekoŋŋ lɛ” wiemɔi lɛ shɛjeɔ Kristofoi fɛɛ amii lɛ?

² Yesu nyiɛ hiɛ akɛ mɔ ni jalɛ hewɔ lɛ awa lɛ yi ni eŋmɛ etsui shi yɛ mli hu, ni enine shɛ nyɔmɔwoo ni sa lɛ hu nɔ. Enɔkwayeli kɛmiiya gbele mli kɛ no sɛɛ eshitee lɛ ji hiɛnɔkamɔ nɔdaamɔ nɔ kɛha Kristofoi fɛɛ. (Bɔfoi lɛ Asaji 17:31) Anɔkwale ni eji akɛ Yesu “gbo ni ehiɛ ka ekoŋŋ” lɛ yeɔ odase akɛ nɔ fɛɛ nɔ ni abaaŋmɛ tsui shi yɛ he yɛ anɔkwale lɛ hewɔ lɛ efeŋ efolo. Yesu shitee lɛ ji hewalɛwoo diɛŋtsɛ jɛɛhe kɛha Kristofoi fɛɛ, titri lɛ kɛ ebi ni amɛna amanehulu kɛha amɛhemɔkɛyeli lɛ. Ani shihilɛ ni tamɔ nɛkɛ mli oyɔɔ? Belɛ obaanyɛ ona ekaa kɛjɛ Yesu wiemɔi ni ekɛha asafo ni yɔɔ Smirna lɛ ni nyiɛ sɛɛ nɛɛ mli:

 3. (a) Mɛɛ hewalɛwoo Yesu kɛha Kristofoi ni yɔɔ Smirna lɛ? (b) Eyɛ mli akɛ Kristofoi ni yɔɔ Smirna lɛ ji ohiafoi moŋ, shi mɛni hewɔ Yesu kɛɛ akɛ amɛji ‘niiatsɛmɛi’ lɛ?

³ “Mile onitsumɔi lɛ kɛ omanehulu lɛ kɛ ohia lɛ—shi kɛlɛ niiatsɛ jio—ni mile mɛi ni kɛɔ akɛ Yudafoi ji amɛ, ni amɛjeee, shi amɛji Satan kpee he moŋ lɛ amusubɔɔ lɛ.” (Kpojiemɔ 2:9) Yesu bɛ wiemɔ ko ni ekɛshiɔ nyɛmimɛi ni yɔɔ Smirna lɛ, fe yijiemɔ ni miishɛɛ yɔɔ mli pɛ kɛkɛ eyɔɔ. Amɛna amanehulu babaoo yɛ amɛhemɔkɛyeli lɛ hewɔ. Yɛ heloo gbɛfaŋ lɛ, amɛji ohiafoi, eka shi faŋŋ akɛ yɛ amɛ anɔkwayeli hewɔ. (Hebribii 10:34) Shi nɔ ni he hiaa amɛ titri ji mumɔŋ nibii, ni amɛbua jwetrii anaa amɛto ŋwɛi, taakɛ Yesu wo ŋaa lɛ. (Mateo 6:19, 20) No hewɔ lɛ, Tookwɛlɔ Nukpa lɛ buɔ amɛ akɛ ‘niiatsɛmɛi.’—Okɛto Yakobo 2:5 he.

 4. Kristofoi ni yɔɔ Smirna lɛ na shitee-kɛ-woo mli amanehulu kɛjɛ namɛi adɛŋ, ni te Yesu bu nakai shitee-kɛ-wolɔi lɛ tɛŋŋ?

⁴ Yesu yoo akɛ Kristofoi ni yɔɔ Smirna lɛ titri edamɔ shitee-kɛ-woo ni jɛ heloo naa Yudafoi adɛŋ lɛ naa shii abɔ. Mra be mli tɔɔ ni nɛkɛ jamɔ nɛɛ mli mɛi pii tswa amɛfai shi akɛ amɛbaate shi amɛwo Kristojamɔ shweremɔ. (Bɔfoi lɛ Asaji 13:44, 45; 14:19) Agbɛnɛ, yɛ Yerusalem shigbeemɔ sɛɛ afii nyɔŋmai fioo ko lɛ, nakai Yudafoi ni yɔɔ Smirna lɛ miijie nakai Satan mumɔ lɛ nɔŋŋ kpo. Ŋwanejee ko bɛ he akɛ no hewɔ ni Yesu buɔ amɛ akɛ “Satan kpee he” lɛ!a

 5. Mɛɛ kaai jwere Kristofoi ni yɔɔ Smirna lɛ ahiɛ?

⁵ Akɛni nyɛɛ ni tamɔ nɛkɛ ka amɛhiɛ hewɔ lɛ, Yesu shɛje Kristofoi ni yɔɔ Smirna lɛ amii: “Kaashe amanehulu ni obaana lɛ eko eko gbeyei. Naa, Abonsam baaŋɔ nyɛteŋ mɛi komɛi awo tsuŋ, koni aŋɔka nyɛ, ni nyɛaana amanehulu gbii nyɔŋma. Feemɔ anɔkwafo kɛyashi gbele mli, ni mahao wala akekere lɛ.” (Kpojiemɔ 2:10) Yesu kɛ Hela wiemɔ ni tsɔɔ babaoo tsu nii shii etɛ yɛ biɛ akɛ “nyɛ,” ni tsɔɔ akɛ ewiemɔi lɛ kɔɔ asafo muu lɛ fɛɛ he. Yesu nyɛŋ awo shi akɛ etsɛŋ ni Kristofoi ni yɔɔ Smirna lɛ akaai lɛ baaba naagbee. Abaaya nɔ awa amɛteŋ mɛi komɛi ayi ni ashɛrɛ amɛ awo tsuŋ. Amɛbaana amanehulu “gbii nyɔŋma.” Nyɔŋma ji yibɔ ko ni damɔ shi kɛha shikpɔŋ nɔ emuuyeli kwraa. Mɛi ni ji niiatsɛmɛi yɛ mumɔŋ ni hiɛ amɛ emuuyeli mli po lɛ anine baashɛ kaa ni mli wa nɔ yɛ be mli ni amɛyɔɔ heloo mli lɛ.

 6. (a) Mɛni hewɔ esaaa akɛ Kristofoi ni yɔɔ Smirna lɛ sheɔ gbeyei lɛ? (b) Te Yesu mua eshɛɛ sane ni ekɛha asafo ni yɔɔ Smirna lɛ naa eha tɛŋŋ?

⁶ Ni kɛlɛ, esaaa akɛ Kristofoi ni yɔɔ Smirna lɛ sheɔ gbeyei aloo ni amɛaaŋmɛɛ saji ahe ni amɛkɛsaa. Kɛ amɛye anɔkwale kɛyashi naagbee lɛ, nɔ ni akɛto aha amɛ ji nyɔmɔwoo ni ji “wala akekere,” ni yɛ amɛ gbɛfaŋ lɛ, wala ni gbele bɛ mli yɛ ŋwɛi. (1 Korintobii 9:25; 2 Timoteo 4:6-8) Bɔfo Paulo bu nɛkɛ nyɔmɔwoo ni jara wa nɛɛ akɛ nɔ ko ni sa akɛ akɛ nɔ fɛɛ nɔ shaa afɔle ahaa, eshikpɔŋ nɔ wala lɛ po. (Filipibii 3:8) Eka shi faŋŋ akɛ, nakai anɔkwafoi ni yɔɔ Smirna lɛ nuɔ he yɛ nakai gbɛ nɔ nɔŋŋ. Yesu mu esane lɛ naa ni ekɛɛ: “Mɔ ni yɔɔ toi lɛ, ha ni enu nɔ ni mumɔ lɛ kɛɔ asafoi lɛ. Kunimyelɔ lɛ, afeŋ lɛ nɔ ko fɔŋ ko yɛ gbele ni ji enyɔ lɛ mli kwraa.” (Kpojiemɔ 2:11) Ama ŋwɛi wala ni agbooo ni gbele nyɛŋ ata he nɔ mi aha kunimyelɔi lɛ.—1 Korintobii 15:53, 54.

“Amanehulu Gbii Nyɔŋma”

7, 8. Taakɛ asafo ni yɔɔ Smirna lɛ ji lɛ, yɛ mɛɛ gbɛ nɔ ‘aka’ Kristofoi asafo lɛ akwɛ yɛ 1918?

⁷ Taakɛ Smirna Kristofoi lɛ ji lɛ, atee nɔ ‘aka’ Yohane kuu lɛ kɛ amɛhefatalɔi lɛ ŋmɛnɛ nakai nɔŋŋ. Amɛ anɔkwayeli yɛ kaa shishi lɛ kadiɔ amɛ akɛ Nyɔŋmɔ diɛŋtsɛ webii. (Marko 13:9, 10) Beni Nuŋtsɔ lɛ gbi lɛ je shishi lɛ sɛɛ etsɛɛɛ ni Yesu wiemɔi ni ekɛha Kristofoi ni yɔɔ Smirna lɛ kɛ miishɛjemɔ diɛŋtsɛ ha Yehowa webii ni ji emajimaji ateŋ kuu fioo ko lɛ. (Kpojiemɔ 1:10) Kɛjɛ afi 1879 mli kɛbaa nɛɛ, amɛtee nɔ amɛtsa mumɔŋ jwetrii kɛjɛ Nyɔŋmɔ Wiemɔ lɛ mli ni amɛkɛ mɛi krokomɛi eja enɛ yaka. Shi yɛ Jeŋ Ta I mli lɛ, amɛkɛ nyɛɛ kɛ shitee-kɛ-woo ni mli wa waa kpe, eko ji ni amɛkɛ amɛhe wooo tawuu he nibii ni yaa nɔ lɛ mli lɛ hewɔ kɛ agbɛnɛ akɛni amɛsheee gbeyei shi moŋ amɛkɛ ekaa kpa Kristendom tɔmɔi lɛ ahe mama hewɔ. Yiwaa ni amɛnine shɛ nɔ yɛ Kristendom hiɛnyiɛlɔi lɛ ateŋ mɛi komɛi ayisɛɛtsirɛmɔ hewɔ lɛ bashɛ he ni enaa bawa waa yɛ 1918 mli, ni abaanyɛ akɛto nɔ ni ba Kristofoi ni yɔɔ Smirna lɛ anɔ ni jɛ Yudafoi ni yɔɔ jɛmɛ lɛ adɛŋ lɛ he.

⁸ Yiwaa ni tee nɔ yɛ United States, Amerika fɛɛ lɛ bashɛ he ni kwɔ fe fɛɛ yɛ be mli ni awo Buu Mɔɔ Asafo lɛ sɛinɔtalɔ hee, Joseph F. Rutherford kɛ ehefatalɔi kpawo lɛ tsuŋ yɛ June 22, 1918, ni ajaje akɛ amɛteŋ mɛi pii baaye afii 20 yɛ tsuŋwoo lɛ mli lɛ. Aha amɛye amɛhe kɛjɛ amɛtsuŋwoo lɛ mli fioo yɛ nyɔji nɛɛhu sɛɛ. Ni yɛ May 14, 1919 lɛ, saneyeli ajinafoi ni kwɛɔ sane mli ekoŋŋ lɛ tsake amɛtsuŋwoo ni ejaaa gbɛ lɛ; atsɔɔ akɛ tɔmɔi sɔrɔtoi 130 yɛ nakai amɛsane ni aye lɛ mli. Roman Katolik Kojolɔ Manton ni eji ablade ni ehiɛ sabala yɛ St. Gregory the Great kuu lɛ mli, ni yɛ 1918 lɛ ekpoo akɛ eŋmɛɛɛ gbɛ ni aŋmɛɛ nɛkɛ Kristofoi nɛɛ ahe lɛ bafee mɔ ni yɛ sɛɛ mli lɛ, awo lɛ tsuŋ afii enyɔ yɛ 1939 mli, ni aha ewo shika ni shɛɔ Amerika shika dɔlai 10,000 akɛni afolɔ enaa shii ekpaa ni eye fɔ yɛ fɛɛ mli akɛ ehe nyɔɔŋ nii hewɔ.

 9. Te Hitler fee Yehowa Odasefoi ni yɔɔ Nazi Germany lɛ tɛŋŋ, ni mɛni osɔfoi lɛ hu fee yɛ he?

⁹ Beni Nazi nɔyeli lɛ yaa nɔ yɛ Germany lɛ, Hitler gu Yehowa Odasefoi lɛ ashiɛmɔ nitsumɔ lɛ kwraa. Amɔmɔ Odasefoi akpei abɔ afii babaoo ni akɛ amɛ wo tsuŋwoohei kɛ gbokɛlɛfoi aŋsraiaŋ, ni awa amɛ yi yɛ jɛmɛ, ni amɛteŋ mɛi pii gboi yɛ jɛmɛ ni agbe obalahii bibii 200 ni ekpɛlɛɛɛ nɔ akɛ amɛaawuu ta amɛfata Hitler asraafoi lɛ ahe lɛ. Katolik osɔfo ko wiemɔi ni yeɔ bɔ ni osɔfoi lɛ fi enɛɛmɛi fɛɛ sɛɛ lɛ he odase lɛ ji nɔ ko ni aŋma afɔ shi yɛ adafitswaa wolo ni ji The German Way lɛ mli yɛ May 29, 1938. Efa ko kɛɛ: “Maŋ kome pɛ yɔɔ shikpɔŋ nɔ bianɛ ni mɛi ni akɛɛ atsɛɔ amɛ . . . Biblia Kaselɔi [Yehowa Odasefoi] lɛ agu amɛ yɛ jɛmɛ. Maŋ lɛ ji Germany! . . . Beni Adolph Hitler batsɔ nɔyelɔ ni German Katolik Sɔlemɔ lɛ ti amɛ nibimɔ lɛ mli lɛ, Hitler kɛɛ: ‘Nakai mɛi ni akɛɛ atsɛɔ amɛ Biblia Kaselɔi Ni Yɔɔ Ekaa [Yehowa Odasefoi] lɛ ji mɛi ni gbaa mɔ naa; . . . mibuɔ amɛ akɛ amalelɔi; miŋmɛɛɛ gbɛ ni Amerikanyo Kojolɔ Rutherford awo German Katolikbii lɛ ahe muji yɛ nɛkɛ gbɛ nɔ; miigu [Yehowa Odasefoi] lɛ yɛ Germany.’” Kɛkɛ ni osɔfo lɛ kɛfata he akɛ: “Mo!”

10. (a) Yɛ be mli ni Nuŋtsɔ lɛ gbi lɛ yaa nɔ lɛ, mɛɛ yiwaa Yehowa Odasefoi kɛkpe? (b) Yɛ bei babaoo mli lɛ mɛni jɛɔ mli baa beni Kristofoi wuɔ amɛhaa jamɔ mli heyeli yɛ saneyeli hei lɛ?

¹⁰ Yɛ be mli ni Nuŋtsɔ lɛ gbi lɛ yaa nɔ lɛ, Onufu lɛ kɛ eseshi lɛ kpaaa wuu ni amɛwuɔ amɛshiɔ Kristofoi ni afɔ amɛ mu lɛ kɛ amɛhefatalɔi lɛ. Awo mɛnɛɛmɛi ateŋ mɛi pii atsuŋ ni awa amɛ yi yɛ gbɛ fɔŋ nɔ. (Kpojiemɔ 12:17) Nakai henyɛlɔi lɛ etee nɔ ‘amɛtsɔ mla nɔ amɛye sane fɔŋ,’ shi Yehowa webii lɛ kɛ shiŋŋfeemɔ ema nɔ mi akɛ: “Esa akɛ aboɔ Nyɔŋmɔ moŋ toi fe gbɔmɛi.” (Lala 94:20; Bɔfoi lɛ Asaji 5:29) Buu-Mɔɔ wolo tɛtrɛɛ lɛ bɔ amaniɛ yɛ 1954 akɛ: “Maji fe nyɔŋmai kpawo efee mla ni akɛtsiɔ Yehowa Odasefoi anaa ni akɛwaa amɛ yi yɛ be kome too lɛ nɔŋŋ mli loo yɛ be kroko mli yɛ afii nyɔŋmai ejwɛ ni eho nɛɛ amli.” Kɛ hegbɛ yɛ akɛ amɛaawuu amɛha jamɔ mli heyeli yɛ saneyeli hei lɛ, nɛkɛ Kristofoi nɛɛ feɔ nakai, ni amɛye kunim yɛ maji pii anɔ. Yehowa Odasefoi eye saji 50 mli kunim yɛ United States, Amerika Saneyeli He Wulu lɛ pɛ mli.

11. Mɛɛ Yesu gbalɛ ni kɔɔ ba ni eba lɛ he okadi eba mli yɛ Yehowa Odasefoi anɔ yɛ Nuŋtsɔ lɛ gbi lɛ nɔ?

¹¹ Kuu ko bɛ ni amɛjɛ henilee mli amɛye Yesu famɔ akɛ akɛ Kaisare nii aha Kaisare lɛ nɔ tamɔ amɛ. (Luka 20:25; Romabii 13:1, 7) Ni kɛlɛ, kuu ko bɛ ni awo amɛmli bii lɛ atsuŋ yɛ maji babaoo nɔ yɛ nɔyelii sɔrɔtoi sɔrɔtoi ashishi tamɔ amɛ, ni enɛ etee nɔ aahu kɛbashi ŋmɛnɛŋmɛnɛ bei nɛɛ amli yɛ Amerika maji lɛ amli, yɛ Europa, Afrika kɛ agbɛnɛ yɛ Asia. Nɛkɛ wiemɔi nɛɛ fata Yesu gbalɛ kpeteŋkpele ni kɔɔ ba ni eba lɛ he okadi lɛ he: “No be lɛ mli lɛ, amɛaajie nyɛ amɛwo amanehului amli, ni agbe nyɛ; ni migbɛi lɛ hewɔ lɛ, jeŋmaji fɛɛ aaanyɛ nyɛ.” (Mateo 24:3, 9) Enɛ eba mli diɛŋtsɛ yɛ Yehowa Odasefoi Kristofoi lɛ anɔ yɛ Nuŋtsɔ lɛ gbi lɛ mli.

12. Yohane kuu lɛ ewaje Nyɔŋmɔ webii lɛ yɛ yiwaa hewɔ yɛ mɛɛ gbɛ nɔ?

¹² Bɔni afee ni awaje Nyɔŋmɔ webii lɛ yɛ amanehulu naa lɛ, Yohane kuu lɛ etee nɔ ekai amɛ saji ni yɔɔ Yesu wiemɔi lɛ amli ni eŋma eyaha Kristofoi ni yɔɔ Smirna lɛ. Akɛ nɔkwɛmɔnɔ lɛ, beni Nazi yiwaa lɛ je shishi lɛ, Buu-Mɔɔ lɛ ni aŋma yɛ 1933 kɛ 1934 lɛ hiɛ wiemɔi komɛi tamɔ “Nyɛkashea Amɛ Gbeyei,” ni akɛ enɛ tsɔɔ Mateo 10:26-33 mli; “Niseremɔ Kukwɛi” ni damɔ Daniel 3:17, 18 nɔ; kɛ “Jatai Adaaŋ,” ni akɛ Daniel 6:22 tsɔɔ mli akɛ ŋmalɛ titri lɛ. Yɛ 1980 afii lɛ amli ní akala wolo nɛɛ klɛŋklɛŋ kwraa, ní Yehowa Odasefoi lɛ na nɔ yɛ nakai afii nyɔŋma lɛ mli waa kɛtsɔ yiwaa nɔ yɛ maji fe 40 mli lɛ, Buu-Mɔɔ lɛ waje Nyɔŋmɔ webii lɛ kɛ nikasemɔi ni tamɔ “Awaa Amɛ Yi ni Kɛlɛ Amɛyɛ Miishɛɛ!” kɛ “Kristofoi kɛ Tsuishiŋmɛɛ Kpeeɔ Yiwaa Naa.”b

13. Taakɛ Kristofoi ni yɔɔ Smirna lɛ ji lɛ, mɛni hewɔ ni Yehowa Odasefoi Kristofoi lɛ sheee yiwaa gbeyei lɛ?

¹³ Eji anɔkwale akɛ, Yehowa Odasefoi Kristofoi lɛ miina yiwaa kɛ kaai sɔrɔtoi krokomɛi amli amanehulu yɛ gbɔmɔtsoŋ kɛha okadi gbii nyɔŋma lɛ. Taakɛ Kristofoi ni hi shi yɛ blema Smirna lɛ ji lɛ, amɛsheee gbeyei; ni asaŋ ehe ehiaaa ni wɔteŋ mɔ ko ashe gbeyei yɛ be mli ni nibii yaa nɔ efiteɔ yɛ shikpɔŋ nɛɛ nɔ lɛ. Wɔfee klalo akɛ wɔbaaŋmɛ wɔtsui shi yɛ piŋmɔi ashishi ni wɔkpɛlɛ ‘wɔ nibii ni aaaha lɛ nɔ po’ yɛ miishɛɛ mli. (Hebribii 10:32-34) Kɛ wɔkase Nyɔŋmɔ Wiemɔ lɛ ni wɔkɛfee wɔ diɛŋtsɛ wɔ nɔ lɛ, ebaawaje wɔ ni wɔdamɔ shi shiŋŋ yɛ hemɔkɛyeli lɛ mli. Na nɔmimaa akɛ Yehowa baanyɛ ni eeebu ohe yɛ emuuyeli mli ni ohiɛ lɛ mli. “Nyɛŋɔa nyɛhaomɔi fɛɛ nyɛfɔa enɔ, ejaakɛ lɛ ejwɛŋɔ nyɛ nɔ.”—1 Petro 5:6-11.

[Shishigbɛ niŋmai]

[Akrabatsa/Mfoniri ni yɔɔ baafa 39]

Yinɔsaneŋmalɔi etee nɔ amɛkɛ odaseyelii ni kɔɔ emuuyeli mlihiɛmɔ ni German Yehowa Odasefoi lɛ jie lɛ kpo yɛ Nazi nɔyeli be lɛ mli lɛ eha yɛ afii babaoo mli. Wolo ni ji Mothers in the Fatherland ni yinɔsaneŋmalɔ Claudia Koonz ŋma yɛ 1986 lɛ kɛɛ akɛ: “Germanbii ni jeee Nazibii lɛ ateŋ mɛi ni fa ji mɛi ni na gbɛi sɔrɔtoi anɔ ni amɛtsɔ nɔ amɛhi shi yɛ nakai nɔyeli ni amɛhiɔ lɛ shishi. . . . Akɔntaabui lɛ kɛ jwɛŋmɔi sɔrɔtoi ni ahiɛ ni ayɔɔ he miishɛɛ nɛɛ anaagbee ji Yehowa Odasefoi 20,000, ni tamɔ nɔ ni amɛteŋ mɔ fɛɛ mɔ kpoo kwraa akɛ amɛaafee toiboo amɛha Nazi maŋ lɛ. . . . Nyɔŋmɔ jamɔ ji nɔ ni waje mɛi ni te shi wo amɛ waa nɛɛ. Kɛjɛ shishijee mli tɔɔ ni Yehowa Odasefoi kɛ Nazi maŋ lɛ mli nɔ ko nɔ ko kwraa efeee ekome. Beni Gestapo lɛ fite amɛ nitsumɔ he yitso lɛ yɛ 1933 ni amɛgu jamɔ lɛ yɛ 1935 mli po lɛ, amɛkpoo akɛ amɛaakɛɛ akɛ ‘Heil Hitler.’ Akɛ Yehowa Odasefoi lɛ ateŋ mɛi aaafee fa kpotoo (titri lɛ hii) tee gbokɛlɛfoi aŋsraiaŋ, ni agbe amɛteŋ mɛi akpe, ni amɛteŋ mɛi akpe kroko gboi kɛjɛ 1933 kɛbashi 1945. . . . Katolekbii kɛ Protestantbii nu ni amɛ osɔfoi lɛ miiwo amɛ hewalɛ koni amɛkɛ Hitler afee ekome. Kɛ amɛte shi amɛwo enɛ lɛ, belɛ amɛmiifee nakai yɛ famɔ ni jɛ sɔlemɔ lɛ kɛ maŋ lɛ dɛŋ ni amɛmiite shi amɛwo.”

Yitso 9

Yesu Gbɛi lɛ ni Aaahiɛ Mli Kpɛŋŋ

PERGAMO

 1. Mɛɛ asafo nine shɛ Yesu shɛɛ sane ni nyiɛ sɛɛ lɛ nɔ, ni mɛɛ maŋ nɛkɛ nakai Kristofoi lɛ hiɔ mli?

KƐ OFA gbɛ shitoi 50 kɛjɛ ŋshɔnaa gbɛ ni jɛ Smirna lɛ kɛmiiya kooyigbɛ ni agbɛnɛ otee shitoi 15 kɛbote mli kɛtsɔ Caicus Faa lɛ jɔɔ lɛ mli lɛ, wɔbaa Pergamo, ni amrɔ nɛɛ atsɛɔ lɛ Bergama lɛ. Maŋ lɛ he gbɛi yɛ Zeus loo Jupiter sɔlemɔtsu ni yɔɔ jɛmɛ lɛ hewɔ. Yɛ 1800 afii lɛ amli lɛ, shitsalɔi ni taoɔ blema nibii lɛ yafa afɔleshaa latɛ ni yɔɔ nakai sɔlemɔ we lɛ kɛtee Germany, ni anaa yɛ jɛmɛ bianɛ, kɛ amagai kɛ wɔŋjalɔi anyɔŋmɔi sɔrɔtoi ahe nibii, yɛ Pergamon Blema Nibii Atoo He ni yɔɔ Berlin lɛ. Mɛɛ shɛɛ sane Nuŋtsɔ Yesu kɛbaamaje asafo ni yɔɔ he ni wɔŋjamɔ eyi jɛmɛ obɔ lɛ?

 2. Mɛɛ gbɛ nɔ Yesu tsɔ ni eha ayoo lɛ, ni ‘tsi kɛ enaa ŋta’ ni eyɔɔ lɛ tsɔɔ mɛni?

² Klɛŋklɛŋ lɛ, Yesu tsɔɔ mɔ ni eji, akɛ: “Ni Pergamo asafo lɛ bɔfo lɛ, ŋmaa oyaha lɛ akɛ: Nii ni mɔ ni hiɛ tsi kɛ enaa ŋta ni naa ba lɛ kɛɛ nɛ.” (Kpojiemɔ 2:12) Yesu miiti bɔ ni atsɔɔ akɛ eji yɛ Kpojiemɔ 1:16 lɛ mli kɛmiiha lɛ yɛ biɛ. Akɛ Kojolɔ kɛ Blafo lɛ, ebaatswia mɛi ni waa ekaselɔi lɛ ayi lɛ nii. Kwɛ bɔ ni nakai sane nɔmimaa lɛ haa mɔ mii shɛɔ ehe ehaa! Shi yɛ kojomɔ he lɛ, esa akɛ abɔ mɛi ni yɔɔ asafo lɛ mli lɛ kɔkɔ akɛ Yehowa, ni miitsu nii kɛmiitsɔ nɛkɛ “kpaŋmɔ lɛ bɔfo” ni ji Yesu Kristo nɔ lɛ “baafee odasefonyo ni he yɔɔ oya” ashi mɛi fɛɛ ni kɛɔ akɛ amɛji Kristofoi ni diɔ wɔŋjamɔ, jeŋba shara, amale kɛ shishiumɔ sɛɛ ni kwɛɛɛ ohiafoi lɛ. (Maleaki 3:1, 5; Hebribii 13:1-3) Esa akɛ abo ŋaawoo kɛ kamɔ ni Nyɔŋmɔ haa Yesu kɛhaa lɛ toi!

 3. Mɛɛ apasa jamɔ tee nɔ yɛ Pergamo, ni mɛni hewɔ abaanyɛ akɛɛ akɛ “Satan maŋtsɛsɛi” lɛ yɛ jɛmɛ lɛ?

³ Agbɛnɛ Yesu kɛɔ asafo lɛ akɛ: “Mile onitsumɔi lɛ kɛ he ni oyɔɔ lɛ, he ni Satan maŋtsɛsɛi yɔɔ lɛ.” (Kpojiemɔ 2:13a) Eji anɔkwale akɛ Satan jamɔ ebɔle nakai Kristofoi lɛ ahe kɛkpe. Kɛfata Zeus sɔlemɔtsu lɛ he lɛ, Aesculapius, ni ji nyɔŋmɔ ni tsaa mɔ lɛ gbatsu hu yɛ. Ale Pergamo hu akɛ he ni ajɛɔ ajaa maŋtsɛ lɛ. Hebri wiemɔ ni atsɔɔ shishi akɛ “Satan” lɛ shishi ji “Shitee-kɛ-Wolɔ,” ni “emaŋtsɛsɛi” lɛ damɔ shi kɛha ejeŋ muu fɛɛ nɔyeli ni ajɛ ŋwɛi aŋmɛ lɛ gbɛ kɛha be ko lɛ. (Hiob 1:6, New World Translation Reference Bible, shishi gbɛ niŋmaa) Amaga jamɔ ni fa babaoo yɛ Pergamo lɛ tsɔɔ akɛ Satan “maŋtsɛsɛi” lɛ ma shi shiŋŋ yɛ nakai maŋ lɛ mli. Kwɛ bɔ ni Satan mli baafu aha akɛ nakai Kristofoi lɛ ni yɔɔ jɛmɛ lɛ kulaaa shi amɛhaaa lɛ yɛ maŋ jamɔ mli!

 4. (a) Mɛɛ yijiemɔ Yesu kɛhaa Kristofoi ni yɔɔ Pergamo lɛ? (b) Mɛni Roma bɔfo Pliny ŋma eyaha Maŋtsɛ Trajan yɛ bɔ ni efeɔ Kristofoi lɛ ahe? (d) Yɛ oshara lɛ fɛɛ sɛɛ lɛ, mɛni ji gbɛ ni Kristofoi ni yɔɔ Pergamo lɛ tsɔ nɔ?

⁴ Hɛɛ, “Satan maŋtsɛsɛi” lɛ yɛ Pergamo diɛŋtsɛ. Yesu tee nɔ akɛ: “Ni ohiɛ migbɛi lɛ amli, ni okwako mihemɔkɛyeli lɛ yɛ no gbii lɛ amli tete, beni Antipa ji midasefonyo anɔkwafo, ni agbe lɛ yɛ nyɛteŋ, heni Satan yɔɔ lɛ.” (Kpojiemɔ 2:13b) Mɛɛ yijiemɔ ni kanyaa mɔ susuma po ji enɛ! Ŋwanejee ko bɛ he akɛ nɔ ni ha agbe Antipa akɛ la odasefonyo lɛ jɛ bɔ ni ekpoo akɛ ekɛ ehe aaawo daimonioi anifeemɔi kɛ Roma maŋtsɛ lɛ jamɔ lɛ mli lɛ hewɔ. Beni Yohane nine shɛ gbalɛ nɛɛ nɔ lɛ sɛɛ etsɛɛɛ ni Pliny Bibioo ni ji Maŋtsɛ Trajan ni yɔɔ Roma lɛ bɔfo loo najiaŋdamɔlɔ lɛ ŋma wolo eyaha Trajan ni etsɔɔ gbɛ ni etsɔɔ nɔ etsuɔ gbɔmɛi ni afolɔɔ amɛnaa akɛ amɛji Kristofoi lɛ ahe nii yɛ mli—nifeemɔ gbɛ ko ni maŋtsɛ lɛ kpɛlɛ nɔ. Mɛi ni kpoo akɛ amɛji Kristofoi lɛ aŋmɛɔ amɛhe, taakɛ Pliny kɛɛ lɛ, “beni amɛbo amɛtsɛ nyɔŋmɔi lɛ kɛnyiɛ misɛɛ taakɛ mifeɔ lɛ, ni amɛshã tsofa-kɛ-ŋma ni amɛkɛ wein hu eha bo [Trajan] omaga lɛ . . . ni kɛfata he lɛ, amɛlomɔ Kristo hu.” Agbeɔ mɔ fɛɛ mɔ ni anaa lɛ akɛ eji Kristofonyo. Eyɛ mli akɛ amɛkɛ oshara ni tamɔ nɛkɛ kpeɔ moŋ, shi Kristofoi ni yɔɔ Pergamo lɛ kwaaa amɛ hemɔkɛyeli lɛ. Amɛmɔ ‘Yesu gbɛi lɛ mli kpɛŋŋ’ ejaakɛ amɛtee nɔ amɛkɛ woo ha gbɛhe ni nɔ kwɔ ni eyɔɔ mli akɛ Yehowa Bembulɔ kɛ Kojolɔ ni ehala lɛ lɛ. Amɛkɛ anɔkwayeli nyiɛ Yesu nanemaa hei asɛɛ akɛ Maŋtsɛyeli odasefoi.

 5. (a) Mɛɛ ŋmɛnɛŋmɛnɛ beaŋ maŋtsɛ jamɔ yɔɔ ni kɛ kaai babaoo eba Kristofoi anɔ yɛ wɔbe nɛɛ mli? (b) Mɛɛ yelikɛbuamɔ Buu-Mɔɔ lɛ kɛha Kristofoi?

⁵ Yesu eha ale yɛ bei sɔrɔtoi amli akɛ Satan ji mɔ ni yeɔ ŋmɛnɛŋmɛnɛ yiwalɛ je lɛ nɔ, shi yɛ emuuyeli mli ni Yesu hiɛ hewɔ lɛ, Satan nine shɛɛɛ enɔ. (Mateo 4:8-11; Yohane 14:30) Yɛ wɔbe nɛɛ mli lɛ, jeŋmaji ni he wa lɛ, titri lɛ “kooyigbɛ maŋtsɛ lɛ” kɛ “wuoyigbɛ maŋtsɛ lɛ” epele jeŋ nɔyeli he. (Daniel 11:40) Akanya maŋhedɔɔ waa yɛ mɛi amli, ni ŋmɛnɛŋmɛnɛ beaŋ maŋtsɛ jamɔ ni yɔɔ ni ji maŋhedɔɔ lɛ ji nɔ ni egbɛ eshwa shikpɔŋ muu lɛ fɛɛ nɔ. Saji ni kɔɔ maŋ saji ni akɛ he wooo mli ni je kpo yɛ November 1, 1939, kɛ agbɛnɛ November 1, 1979 blɔfo Buu-Mɔɔ kɛ agbɛnɛ September 1, 1986 Ga Buu-Mɔɔ lɛ mli lɛ etsɔɔ Biblia mli tsɔɔmɔ ni kɔɔ sane nɛɛ he lɛ mli faŋŋ, ni ekɛ gbɛtsɔɔmɔ eha nakai Kristofoi lɛ ni miisumɔ ni amɛnyiɛ yɛ Yehowa gbɛi amli ni amɛye je lɛ nɔ kunim lɛ, taakɛ Yesu hu kɛ ekaafeemɔ fee lɛ.—Mika 4:1, 3, 5; Yohane 16:33; 17:4, 6, 26; 18:36, 37; Bɔfoi lɛ Asaji 5:29.

 6. Te Yehowa Odasefoi lɛ edamɔ shi shiŋŋ yɛ ŋmɛnɛŋmɛnɛ beaŋ amɛha tɛŋŋ, taakɛ Antipa fee lɛ?

⁶ Ŋaawoo ni tamɔ nɛkɛ efee nɔ ni he hiaa waa. Yɛ maŋhedɔɔ mumɔ ni asusuuu nɔ ko he yɛ mli lɛ hewɔ lɛ, ehe bahia ni Yehowa Odasefoi, mɛi ni afɔ amɛ mu lɛ kɛ amɛnanemɛi lɛ fɛɛ adamɔ shi shiŋŋ yɛ amɛ hemɔkɛyeli lɛ mli. Yɛ United States, Amerika nɛkɛ lɛ, ashwie skul gbekɛbii kɛ tsɔɔlɔi ohai abɔ akɛni amɛŋaaa maŋ aflaŋaa lɛ hewɔ, yɛ be mli ni yɛ Germany lɛ akɛ yiwalɛ fee Odasefoi lɛ nisenianii akɛni amɛkpoo akɛ amɛaaŋa swastika loo German aflaŋaa lɛ hewɔ. Taakɛ akadi momo lɛ, Hitler Nazibii lɛ gbe Yehowa tsuji anɔkwafoi lɛ akpei abɔ ejaakɛ amɛkpoo akɛ amɛkɛ amɛhe aaawo maŋ amaga jamɔ nɛɛ mli. Yɛ 1930 afii nɛɛ amli, yɛ be mli ni Japan Shinto maŋtsɛ jamɔ lɛ ehe shi waa lɛ, gbɛgbalɔi enyɔ ko ni ji sɔɔlɔi tɛo Maŋtsɛyeli dumɔ wui lɛ yɛ Taiwan ni no mli lɛ Japanbii ebaye amɛnɔ lɛ. Nɔyelɔi ni ji asraafoi lɛ kɛ amɛ wo tsuŋ, ni amɛteŋ mɔ kome gbo yɛ jɛmɛ yɛ nisenianii ni afee amɛ lɛ hewɔ. Yɛ sɛɛ mli lɛ ajie mɔ kroko lɛ, shi ni ajie lɛ pɛ kɛkɛ ni atswa lɛ tu yɛ esɛɛ—akɛ ŋmɛnɛŋmɛnɛ beaŋ Antipa. Kɛbashi ŋmɛnɛ gbi nɛɛ, maji pii yɛ ni maŋ okadii ajamɔ kɛ he ni atuɔ ahaa Maŋ lɛ pɛ ji nɔ ni abiɔ yɛ jɛmɛ. Awo Odasefoi obalaŋtai pii atsuŋ, ni mɛi ni agbe amɛ lɛ hu fa, yɛ bɔ ni amɛdamɔɔ shi kɛ ekaa akɛ Kristofoi ni kɛ amɛhe wooo maŋ saji amli lɛ hewɔ. Kɛ oji obalaŋta ni kɛ saji ni tamɔ nɛkɛ miikpe lɛ, kasemɔ Nyɔŋmɔ Wiemɔ lɛ daa bɔni afee ni ‘ona hemɔkɛyeli ni baa susuma yi,’ koni onine ashɛ naanɔ wala nɔ.—Hebribii 10:39-11:1; Mateo 10:28-31.

 7. Te gbekɛbii komɛi damɔ maŋ hedɔɔ jamɔ lɛ naa yɛ India amɛha tɛŋŋ, ni mɛni jɛ mli ba?

⁷ Obalaŋtai ni yaa skul kɛ saji ni tamɔ nɛkɛ ekpe. Yɛ 1985, yɛ Kerala maŋ ni yɔɔ India lɛ mli lɛ, Yehowa Odasefoi ni ji gbekɛbii bibii etɛ kpoo akɛ amɛaaŋmɛɛ amɛ hemɔkɛyeli ni damɔ Biblia lɛ nɔ lɛ he koni amɛkɛsaa, akɛ, amɛlaaa maŋ loo jakumaŋ lala lɛ. Amɛkɛ bulɛ damɔ shi beni mɛi krokomɛi laa, ni kɛlɛ ashwie amɛ kɛjɛ skul. Amɛtsɛ te shi ewo nɛkɛ sane nɛɛ aahu kɛyashi sane lɛ yashɛ India Saneyeli He Wulu lɛ hiɛ, he ni kojolɔi enyɔ lɛ ye sane lɛ ha gbekɛbii lɛ, ni amɛkɛ ekaa jaje akɛ: “Wɔ blema saji lɛ tsɔɔ tsuishitoo; wɔ jeŋ nilee lɛ tsɔɔ tsuishitoo; wɔ maŋ nɔkwɛmɔ gbɛjianɔtoo lɛ kɛ tsuishitoo tsuɔ nii; nyɛkahaa wɔfutua mli.” Adafitswaa woji kɛ emli saji ni wie sane nɛɛ he ekpakpa lɛ ha maŋ muu lɛ fɛɛ ni no mli lɛ gbɔmɛi ni yɔɔ mli lɛ ayifalɛ miihe ashɛ gbɔmɛi ayifalɛ ni yɔɔ jeŋ muu fɛɛ lɛ mlijaa enumɔ mli ekome lɛ le akɛ Kristofoi ni jaa anɔkwa Nyɔŋmɔ ni ji Yehowa yɛ nakai shikpɔŋ lɛ nɔ ni akɛ mɛnɛɛmɛi damɔɔ shi yɛ anɔkwayeli mli amɛhaa Biblia mli shishitoo mlai.

Sui ni Fiteɔ Mɔ

 8. Mɛɛ kamɔ Yesu na akɛ ehe miihia ni ekɛha Kristofoi ni yɔɔ Pergamo lɛ?

⁸ Hɛɛ, Kristofoi ni yɔɔ Pergamo lɛ ji emuuyeli mlihiɛlɔi. Yesu kɛɛ: “Shi kɛlɛ, mikɛo yɛ sane fioo ko.” Mɛni amɛfee ni baaha awie ashi amɛ lɛ? Yesu kɛɔ wɔ: “Oyɛ mɛi yɛ jɛi ni hiɛ Bileam, mɔ ni tsɔɔ Balak akɛ etsɔ Israelbii lɛ atsɔne ni amɛye wɔji afɔleshaa nii ni amɛbɔ ajwamaŋ lɛ tsɔɔmɔ lɛ mli.”—Kpojiemɔ 2:14.

 9. Namɔ ji Bileam, ni te fee tɛŋŋ ni eŋaawoo lɛ “kɛ gbɛtsii nii fɔ Israelbii lɛ ahiɛ” lɛ?

⁹ Yɛ Mose gbii lɛ amli lɛ, Maŋtsɛ Balak ni jɛ Moab lɛ yabɔ Bileam, gbalɔ ni jeee Israelnyo, ni le Yehowa gbɛi lɛ he nɔ ko lɛ apaa, koni elomɔ Israel. Yehowa te shi ewo Bileam, ni enyɛ enɔ koni ejaje jɔɔmɔi moŋ eshwie Israelbii lɛ anɔ kɛ kpoo kɛha amɛ henyɛlɔi lɛ. Bileam kpa Balak fai yɛ nɔ ni eba ni esumɔɔɔ nɛɛ hewɔ ni ewo lɛ ŋaa ko ni yɔɔ nigii ni ebaanyɛ ni etsɔ nɔ etutua amɛ: Ha Moab yei lɛ alaka Israel hii lɛ kɛya ajwamaŋbɔɔ jeŋba shara kɛ apasa nyɔŋmɔ Baal ni jɛ Peor lɛ jamɔ mli! Nɛkɛ ŋaatsɔɔ nɛɛ tsu nii. Yehowa jalɛ mlifu te shi ewo amɛ, ni etsu hela kɛba amɛteŋ ni gbe nakai Israel ajwamaŋbɔlɔi lɛ ateŋ mɛi 24,000—gbele hela ni sɛɛ fo yɛ be mli ni osɔfo Pinehas tsɔ gbɛ kpakpa nɔ etsu nii ni ekɛjie nɔ fɔŋ lɛ kɛjɛ Israel lɛ.—4 Mose 24:10, 11; 25:1-3, 6-9; 31:16.

10. Mɛɛ gbɛtsii nii loo nanetɔtɔmɔ nii ebote asafo ni yɔɔ Pergamo lɛ mli, ni mɛni hewɔ ebaanyɛ eba akɛ nakai Kristofoi lɛ baanu he akɛ Nyɔŋmɔ baaku ehiɛ eshwie amɛtɔmɔi anɔ lɛ?

¹⁰ Agbɛnɛ, ani pampii ni tamɔ nakai nɔŋŋ yɛ Pergamo yɛ Yohane gbii lɛ amli? Eko yɛ! Jeŋba shara kɛ wɔŋjamɔ ebote asafo lɛ mli. Nakai Kristofoi lɛ boko Nyɔŋmɔ kɔkɔbɔɔ ni akɛha kɛtsɔ bɔfo Paulo nɔ lɛ toi. (1 Korintobii 10:6-11) Akɛni amɛŋmɛ amɛtsui shi yɛ yiwaa mli hewɔ lɛ, ekolɛ amɛnu he akɛ Yehowa baaku ehiɛ eshwie amɛ bɔlɛnamɔ mli tɔmɔi lɛ anɔ. No hewɔ lɛ Yesu fee lɛ faŋŋ akɛ esa akɛ amɛjie nɔ fɔŋ feemɔ nɛɛ kɛjɛ amɛteŋ.

11. (a) Esa akɛ Kristofoi akwɛ amɛhe nɔ jogbaŋŋ yɛ mɛni he, ni mɛɛ susumɔ loo jwɛŋmɔ esa akɛ amɛkwa? (b) Mɛi enyiɛ ashwie amɛ kɛjɛ Kristofoi asafo lɛ mli, yɛ afii abɔ lɛ amli, ni titri lɛ mɛni nɔ adamɔ?

¹¹ Nakai nɔŋŋ hu ŋmɛnɛ, esa akɛ Kristofoi akwɛ amɛhe nɔ jogbaŋŋ koni amɛkafee “nɔsha feelɔi ni ŋɔɔ Nyɔŋmɔ duromɔ lɛ amɛbɔɔ nyenyeŋtswi.” (Yuda 4) Eka wɔnɔ akɛ wɔnyɛ nɔ ni ehiii ni ‘wɔgbala wɔgbɔmɔtsei lɛ mai’ bɔni afee ni wɔnyɛ wɔtiu Kristofoi ajeŋba kpakpa gbɛ lɛ sɛɛ. (1 Korintobii 9:27; Lala 97:10; Romabii 8:6) Esaaa akɛ wɔsusuɔ kɔkɔɔkɔ akɛ ekaa ni wɔfeɔ yɛ Nyɔŋmɔ sɔɔmɔ mli kɛ emuuyeli mli hiɛmɔ yɛ yiwaa shishi lɛ haa hegbɛ koni wɔkɛ wɔhe awo bɔlɛnamɔ mli jeŋba shara mli. Yɛ afii ni eho lɛ amli lɛ, mɛi ni tɔ̃ɔ ni ashwieɔ amɛ kɛjɛɔ jeŋ muu fɛɛ Kristofoi asafo lɛ mli, yɛ ajwamaŋbɔɔ titri hewɔ lɛ ayi efa kɛbote akpei nyɔŋmai abɔ mli. Afii lɛ ekomɛi yɛ ni mɛi ni ashwieɔ amɛ nɛkɛ lɛ ayi faa kwraa fe mɛi ni gboi yɛ blema Israel yɛ Baal-Peor jamɔ hewɔ lɛ. Eba akɛ wɔɔha wɔhiɛ ahi wɔhe nɔ koni wɔkagbee su ni tamɔ nɛkɛ mli!—Romabii 11:20; 1 Korintobii 10:12.

12. Taakɛ eji yɛ Nyɔŋmɔ tsuji ni hi shi yɛ blema bei lɛ amli lɛ ahe lɛ, mɛɛ shishitoo mlai kɔɔ Kristofoi ahe ŋmɛnɛ?

¹² Yesu ka Pergamo Kristofoi lɛ hu hiɛ yɛ ‘nii ni akɛsha afɔle aha wɔji ni amɛye lɛ hewɔ.’ Mɛni baanyɛ afee enɛɛmɛi? Yɛ Paulo wiemɔi ni ekɛha Korintobii lɛ hewɔ lɛ, ekolɛ mɛi komɛi kɛ amɛ Kristofoi aheyeli lɛ miitsu nii yɛ gbɛ fɔŋ nɔ ni amɛmiifite mɛi krokomɛi ahenilee. Eeenyɛ ebalɛ akɛ amɛkɛ amɛhe miiwo amaga jamɔi amli kusum nifeemɔi diɛŋtsɛ amli. (1 Korintobii 8:4-13; 10:25-30) Esa akɛ Kristofoi anɔkwafoi ni yɔɔ ŋmɛnɛ lɛ ajie suɔmɔ ni pɛsɛmkunya bɛ mli lɛ kpo yɛ amɛ Kristofoi aheyeli lɛ he nitsumɔ mli, koni amɛkwɛ jogbaŋŋ koni amɛkatɔtɔ mɛi krokomɛi anane. Eka shi faŋŋ akɛ esa akɛ amɛkwa ŋmɛnɛŋmɛnɛ beaŋ amaga jamɔ, tamɔ TV, sinii, kɛ kpɔiaŋgbɔlemɔ mli gbɔmɛi ni ehe gbɛi lɛ ajamɔ, aloo ni amɛkɛ shika aaafee amɛ nyɔŋmɔ, aloo ni amɛkɛ amɛmusu aaafee nakai!—Mateo 6:24; Filipibii 1:9, 10; 3:17-19.

Kwa Kui ni kɛ Mligbalamɔi Baa!

13. Mɛɛ kamɔ wiemɔi Yesu kɛha Kristofoi ni yɔɔ Pergamo lɛ ekoŋŋ, ni mɛni hewɔ enɛ he hiaa asafo lɛ?

¹³ Yesu tee nɔ eka Kristofoi ni yɔɔ Pergamo lɛ lolo akɛ: “Nakai nɔŋŋ hu oyɔɔ mɛi ni hiɛ Nikolaemɛi atsɔɔmɔ lɛ ni minyɛɔ lɛ mli.” (Kpojiemɔ 2:15) Yesu etsɔ hiɛ ejie Efesobii lɛ ayi yɛ nyɛ ni amɛnyɛɔ nɛkɛ kuu nɛɛ hewɔ. Shi ŋaawoo he miihia Kristofoi ni yɔɔ Pergamo lɛ yɛ gbɛ ni amɛaatsɔ nɔ ni amɛha asafo lɛ aye ehe kɛjɛ kui ni kɛ mligbalamɔ baa lɛ ahe. Ehe miihia ni amɛfee shiŋŋ babaoo yɛ tɛi ni afolɔ ashwie shi aha Kristofoi lɛ mli bɔni afee ni anyɛ abaa ekomefeemɔ ni Yesu sɔle yɛ he yɛ Yohane 17:20-23 lɛ yi. Ehe miihia ni “anyɛ awie atsɔɔ mɛi yɛ nitsɔɔmɔ ni tsaa mɔ lɛ mli, ni mɛi ni kuɔ wiemɔ lɛ naa lɛ hu, aka amɛhiɛ.”—Tito 1:9, New World Translation.

14. (a) Kristofoi asafo lɛ kɛ namɛi eshi mple kɛjɛ mra gbii lɛ amli, ni te bɔfo Paulo tsɔɔ bɔ ni amɛji lɛ mli eha tɛŋŋ? (b) Mɛɛ Yesu wiemɔi esa akɛ mɛi ni baasumɔ ni amɛyanyiɛ kuu ko ni baatse amɛhe lɛ asɛɛ lɛ abo toi?

¹⁴ Kɛjɛ mra gbii lɛ amli tɔɔ, ni ehe bahia ni Kristofoi asafo lɛ ate shi awo hemɔkɛyeli kwalɔi henɔwolɔi ni tsɔɔ wiemɔi ni yɔɔ dɔkɔbii nɔ “amɛkɛ mligbalamɔi kɛ pampitoo baa” ni kɛ tsɔɔmɔ ni akɛha kɛtsɔ Yehowa adafitswaa gbɛ lɛ nɔ lɛ enyiɛɛɛ lɛ. (Romabii 16:17, 18) Bɔfo Paulo bɔ kɔkɔ yɛ nɛkɛ hegbeyeiwoo nɛɛ he yɛ nɔ ni miihe ashɛ ewoji lɛ fɛɛ mli.a Yɛ ŋmɛnɛŋmɛnɛ beaŋ, beni Yesu kɛ anɔkwale asafo lɛ eba e-Kristofoi akrɔŋŋfeemɔ kɛ ekomefeemɔ mli ekoŋŋ lɛ, oshara ni yɔɔ kui ni kɛ mligbalamɔi baa lɛ he lɛ yɛ lolo. No hewɔ lɛ, mɔ fɛɛ mɔ ni baasumɔ ni ekɛ ehe ayabɔ kuu ko ni baatse ehe lɛ he, ni yɛ nɛkɛ gbɛ nɔ lɛ, eto kuu kroko lɛ abo Yesu wiemɔi ni nyɛi sɛɛ nɛɛ toi: “No hewɔ lɛ tsakemɔ otsui! Shi kɛ jeee nakai lɛ, maba onɔ oya ni mikɛ midaaŋ tsi lɛ kɛ amɛ aaabawuu.”—Kpojiemɔ 2:16.

15. Kui ni kɛ mligbalamɔi baa jeɔ shishi yɛ mɛɛ gbɛ nɔ?

¹⁵ Mɛɛ gbɛ nɔ kui ni kɛ mligbalamɔi baa nɛɛ jeɔ shishi yɛ? Ekolɛ mɔ ko ni tsɛɔ ehe tsɔɔlɔ tɛoɔ yiŋkɔshikɔshifeemɔ yɛ mɛi amli, ejeɔ Biblia mli anɔkwale ko he ŋwane (ekolɛ naagbee bei amli ni wɔyɔɔ lɛ), no hewɔ lɛ kuu ko tseɔ ehe kɛyanyiɛɔ esɛɛ. (2 Timoteo 3:1; 2 Petro 3:3, 4) Aloo mɔ ko wieɔ eshiɔ gbɛ ni Yehowa haa atsuɔ enitsumɔ lɛ yɛ nɔ lɛ ni ekɛɔ mɛi ni sumɔɔ ni amɛna mumɔ ni haaa akɛ he awo nitsumɔ mli babaoo lɛ akɛ ebɛ Ŋmalɛ lɛ mli ni asaŋ hu ehe ehiaaa akɛ aaaya shia-kɛ-shia ni ayajaje Maŋtsɛyeli lɛ he sane lɛ. Sɔɔmɔ nitsumɔ ni tamɔ nɛkɛ ni akɛ he aaawo mli ni akɛnyiɛ Yesu kɛ ebɔfoi lɛ anɔkwɛmɔnɔ lɛ sɛɛ lɛ baaha mɔ ko aba ehe shi; ni kɛlɛ amɛmiisumɔ ni amɛtsi amɛhe ni amɛha nibii afee mlɛo aha amɛ, ekolɛ ni amɛkane Biblia lɛ pɛ yɛ be kɛ bei amli akɛ kuu ko yɛ teemɔŋ. (Mateo 10:7, 11-13; Bɔfoi lɛ Asaji 5:42; 20:20, 21) Gbɔmɛi ni tamɔ nɛkɛ kɛ amɛ diɛŋtsɛ amɛsusumɔi ni kɔɔ Yesu gbele lɛ Kaimɔ lɛ he, Ŋmalɛ naa famɔ akɛ atsi he kɛjɛ la he, gbijurɔyelii, kɛ tawa shɛremɔ he lɛ haa. Agbɛnɛ, amɛbaa Yehowa gbɛi lɛ shi; etsɛɛɛ kɛkɛ lɛ amɛyagbee Babilon Kpeteŋkpele lɛ gbɛ ni ŋmɛɔ nɔ fɛɛ nɔ feemɔ gbɛ lɛ mli. Nɔ ni ehiii fe fɛɛ lɛ, Satan tsirɛɔ mɛi komɛi ni amɛtsɔɔ amɛhe ‘ni amɛyiɔ amɛnanemɛi tsuji lɛ,’ be ko mli amɛnyɛmimɛi lɛ.—Mateo 24:49; Bɔfoi lɛ Asaji 15:29; Kpojiemɔ 17:5.

16. (a) Mɛni hewɔ esa akɛ mɛi ni hosoɔ yɛ hemɔkɛyeli kwamɔ hewɔ lɛ ahe afee oya ni amɛtsake amɛtsui lɛ? (b) Mɛni baaba mɛi ni sumɔɔɔ akɛ amɛtsakeɔ amɛtsui lɛ anɔ?

¹⁶ Esa akɛ mɔ fɛɛ mɔ ni baahoso yɛ hewalɛ ni hemɔkɛyeli kwalɔi aaana yɛ enɔ hewɔ lɛ he afee oya ni ebo Yesu tsɛmɔ akɛ atsake lɛ toi! Esa akɛ akpoo hemɔkɛyeli kwamɔ shishiumɔ wiemɔi akɛ ebɔɔ ni nakai eji hu lɛ! Nɔ ni hɔ sɛɛ ji nyɛɛ kɛ hetsɛ, ni teɔ shi woɔ jalɛ, hetsemɔ, kɛ anɔkwalei ni asumɔɔ ni Yesu kɛlɛɔ esafo lɛ. (Luka 12:42; Filipibii 1:15, 16; 4:8, 9) Yɛ mɛi ni kpooɔ akɛ amɛaatsake amɛtsui lɛ agbɛfaŋ lɛ, Nuŋtsɔ Yesu kɛ “[edaaŋ] tsi lɛ kɛ amɛ aaabawuu” diɛŋtsɛ. Eesha ewebii lɛ amli bɔni afee ni ebaa ekomefeemɔ ni esɔle yɛ he yɛ enaagbee gbɛkɛ ni ekɛ ekaselɔi lɛ yɔɔ shikpɔŋ nɔ lɛ yi. (Yohane 17:20-23, 26) Akɛni hemɔkɛyeli kwalɔi lɛ kpooɔ ŋaawoo ni suɔmɔ yɔɔ mli lɛ kɛ yelikɛbuamɔ ni ŋulamii ni yɔɔ eninejurɔ nɔ lɛ kɛhaa amɛ lɛ hewɔ lɛ, Yesu kojoɔ amɛ ni egbalaa amɛtoi ‘waa,’ ni ekɛ amɛ woɔ “gbɛ sɛɛ duŋ” lɛ mli. Ashwieɔ amɛ, ni amɛnyɛŋ amɛtsu nii dɔŋŋ akɛ mãsha yɛ Nyɔŋmɔ webii ateŋ.—Mateo 24:48-51; 25:30; 1 Korintobii 5:6, 9, 13; Kpojiemɔ 1:16.

‘Mana ni Aŋɔtee kɛ Tɛ Yɛŋ’

17. Mɛɛ nyɔmɔwoo mɛɔ Kristofoi ni afɔ amɛ mu ni ‘yeɔ kunim’ lɛ, ni ehe miihia ni Kristofoi ni yɔɔ Pergamo lɛ aye mɛni nɔ kunim?

¹⁷ Nyɔmɔwoo ko ni da miimɛ mɛi fɛɛ ni boɔ Yesu ŋaawoo, ni atsɔ Yehowa mumɔ krɔŋkrɔŋ lɛ kudɔmɔ nɔ akɛha lɛ toi lɛ. Bo toi! “Mɔ ni yɔɔ toi lɛ ha ni enu nɔ ni mumɔ lɛ kɛɔ asafoi lɛ. Mɔ ni yeɔ kunim lɛ, maha lɛ mana ni aŋɔtee lɛ eko eye, ni maha lɛ tɛ yɛŋ, ni tɛ lɛ nɔ lɛ aŋma gbɛi hee ni mɔ ko leee akɛ ja mɔ ni naa lɛ.” (Kpojiemɔ 2:17) No hewɔ lɛ, aawo Kristofoi ni yɔɔ Pergamo lɛ hewalɛ koni ‘amɛye kunim’ taakɛ afee Smirna Kristofoi lɛ. Kɛ amɛbaanyɛ amɛye omanye lɛ, belɛ esa akɛ mɛi ni yɔɔ Pergamo, yɛ he ni Satan maŋtsɛsɛi lɛ ma lɛ atsi amɛhe kɛjɛ amaga jamɔ he. Esa akɛ amɛye jeŋba shara, kui ni kɛ mligbalamɔi baa, kɛ hemɔkɛyeli kwamɔ ni kɔɔ Balak, Bileam kɛ Nikolaemɛi akui ahe lɛ nɔ kunim. Kɛ amɛfee nakai lɛ, abaafɔ̃ nakai Kristofoi ni afɔ amɛ mu lɛ nine ni amɛbaye “mana ni aŋɔtee” lɛ eko. Mɛni ji nɔ ni enɛ tsɔɔ?

18, 19. (a) Mɛni ji mana ni Yehowa kɛha Israelbii lɛ? (b) Mɛɛ mana akɛtee lɛ? (d) Mana ni akɛtee lɛ yeli feɔ mɛni he mfoniri?

¹⁸ Yehowa kɛ mana ha yɛ Mose gbii lɛ amli, koni ewaje Israelbii lɛ yɛ amɛ ŋa nɔ gbɛfaa lɛ mli. Nakai mana lɛ jeee nɔ ni aŋɔtee, ejaakɛ daa leebi lɛ—ja Hejɔɔmɔ Gbi lɛ—ebaa yɛ naakpɛɛ gbɛ nɔ, tamɔ nɔ komɛi kokolobii bibii tamɔ bɔ ni efi ni ha shikpɔŋ. Eji ŋwɛi gbɛjianɔtoo ni baaha Israelbii lɛ aya nɔ ahi wala mli. Bɔni afee ni amɛkai enɛ lɛ, Yehowa fa Mose akɛ eha nɛkɛ “aboloo” nɛɛ eko ahi shika kpulu lɛ mli yɛ kpaŋmɔ adeka krɔŋkrɔŋ lɛ mli yɛ “[Israel] yinɔi fɛɛ mli.”—2 Mose 16:14, 15, 23, 26, 33; Hebribii 9:3, 4.

¹⁹ Mɛɛ okadi ni sa po ji enɛ! Akɛ mana nɛɛ eto sɔlemɔtsu lɛ mli Krɔŋkrɔŋ Fe Fɛɛ lɛ, he ni naakpɛɛ la ni tsotsoro Kpaŋmɔ Adeka lɛ naa nɔ́ lɛ yiteŋ lɛ damɔ shi kɛha jɛmɛ ni Yehowa yɔɔ lɛ. (2 Mose 26:34) Aŋmɛɛɛ mɔ ko gbɛ ni ebote he krɔŋkrɔŋ nɛɛ bɔni afee ni eyaye mana ni aŋɔtee lɛ eko. Shi Yesu kɛɛ akɛ esɛɛnyiɛlɔi ni afɔ amɛ mu lɛ ni yeɔ kunim lɛ baaye “mana ni aŋɔtee” lɛ eko. Taakɛ bɔ ni Kristo ni tsɔ amɛhiɛ lɛ fee lɛ, amɛ hu amɛboteɔ, “jeee he krɔŋkrɔŋ ni akɛ niji fee ni ji nii lɛ diɛŋtsɛ lɛ ahenɔ kɛkɛ lɛ mli, . . . shi moŋ ŋwɛi diɛŋtsɛ.” (Hebribii 9:12, 24) Kɛ atee amɛ shi lɛ, amɛkɛ shihilɛ ni fitemɔ kɛ gbele bɛ mli haa amɛhe—gbɛjianɔtoo ni yɔɔ naakpɛɛ ni Yehowa kɛha, ni damɔ shi kɛha “mana ni aŋɔtee” ni fiteee lɛ ni akɛha amɛ. Kwɛ hegbɛ ni nɛkɛ kuu fioo ni yeɔ kunim nɛɛ ena!—1 Korintobii 15:53-57.

20, 21. (a) Tɛ yɛŋ ni akɛhaa Kristofoi ni afɔ amɛ mu lɛ feɔ mɛni he mfoniri? (b) Akɛni tɛi yɛji 144,000 pɛ yɔɔ hewɔ lɛ, mɛɛ hiɛnɔkamɔ asafo babaoo lɛ yɔɔ?

²⁰ Amɛnine shɛɔ “tɛ yɛŋ” ko hu nɔ. Akɛ tɛi tsuɔ nii yɛ Roma saneyeli hei yɛ be mli ni akojoɔ mɛi.b Tɛ yɛŋ tsɔɔ akɛ aŋmɛɛ mɔ lɛ he, yɛ be mli ni tɛ diŋ tsɔɔ fɔbuu, yɛ be babaoo mli lɛ gbele. “Tɛ yɛŋ” ni Yesu kɛha Kristofoi ni yɔɔ Pergamo lɛ baatsɔɔ akɛ ekojoɔ amɛ akɛ amɛyeee fɔ, amɛyɛ krɔŋŋ ni amɛhe tse. Shi Yesu wiemɔi lɛ baanyɛ ana shishinumɔ ni yaa hiɛ lolo. Yɛ Roma bei amli lɛ, akɛ tɛi hu tsuɔ nii tamɔ tikitii koni akɛbote nifeemɔi ni he hiaa lɛ ashishi. No hewɔ lɛ tɛ yɛŋ lɛ baanyɛ atsɔɔ nɔ ko krɛdɛɛ ko kɛha Kristofonyo ni afɔ lɛ mu ni yeɔ kunim lɛ—gbɛ ni aŋmɛɔ lɛ koni eba he ko ni yɔɔ nyam yɛ ŋwɛi yɛ Toobi lɛ yookpeemɔ lɛ shishi. Tɛi 144,000 ni tamɔ nɛkɛ pɛ akɛha.—Kpojiemɔ 14:1; 19:7-9.

²¹ Ani enɛ tsɔɔ akɛ ashi bo ni asusuuu ohe akɛni oji asafo babaoo ni ji nanemɛi jalɔi lɛ ateŋ mɔ kome lɛ hewɔ? Dabida kwraa! Yɛ be mli ni onine shɛɛɛ tɛ yɛŋ ni haa aŋɔɔ bo awoɔ ŋwɛi lɛ nɔ lɛ, kɛ oooŋmɛ otsui shi lɛ, obaanyɛ oje amanehulu kpeteŋkpele lɛ mli koni oyana gbɛfaŋnɔ yɛ miishɛɛ nitsumɔ ni ji Paradeiso ni akuɔ sɛɛ akɛbaa shikpɔŋ nɔ ekoŋŋ lɛ mli. Mɛi ni baafata ohe yɛ enɛ mli ji anɔkwafoi ni gboi dani Kristofoi abe lɛ ba ni atee amɛ shi lɛ kɛ tooi krokomɛi lɛ ni gboi nyɛsɛɛ nɛɛ nɔŋŋ lɛ. Yɛ naagbee lɛ, gbohii ni akpɔ amɛ lɛ fɛɛ baana hegbɛ akɛ amɛaana shitee ni kɛ mɔ yaa wala mli yɛ paradeiso shikpɔŋ nɔ lɛ mli gbɛfaŋnɔ.—Lala 45:17; Yohane 10:16; Kpojiemɔ 7:9, 14.

22, 23. Gbɛi ni aŋma yɛ tɛ lɛ nɔ ni akɛhaa Kristofoi ni afɔ amɛ mu lɛ tsɔɔ mɛni, ni mɛɛ hewalɛwoo esa akɛ enɛ kɛha?

²² Mɛni ji gbɛi hee ni aŋma yɛ tɛ lɛ nɔ lɛ? Gbɛi ji nɔ ko ni atsɔɔ nɔ akɛyooɔ mɔ ko ni haa efeɔ sɔrɔto yɛ mɛi krokomɛi ahe. Nɛkɛ Kristofoi ni afɔ amɛ mu nɛɛ anine shɛɔ tɛ lɛ nɔ yɛ be mli ni amɛgbe amɛ shikpɔŋ nɔ nitsumɔ lɛ naa akɛ kunimyelɔi lɛ sɛɛ. Eka shi faŋŋ akɛ belɛ gbɛi ni yɔɔ tɛ lɛ nɔ lɛ kɔɔ hegbɛ ni amɛna akɛ amɛkɛ Yesu aaafee ekome yɛ ŋwɛi lɛ he—gbɛhe ko ni haa ayeɔ yitsoŋ sane ni jɛ sɔɔmɔ yɛ anɔkwayeli mli ni mɛi ni nine shɛɔ ŋwɛi Maŋtsɛyeli lɛ nɔ lɛ pɛ naa enɛ ni amɛnaa mli ŋɔɔmɔ lɛ. No hewɔ lɛ, eji gbɛi loo gbɛhe ko “ni mɔ ko mɔ ko leee akɛ ja mɔ ni naa lɛ.”—Okɛto Kpojiemɔ 3:12 he.

²³ Mɛɛ kanyamɔ enɛ ji kɛha Yohane kuu lɛ koni “amɛbo nɔ ni mumɔ lɛ kɛɔ asafoi lɛ toi” ni amɛkɛtsu nii! Ni kwɛ bɔ ni enɛ woɔ amɛ hefatalɔi, asafo babaoo lɛ hewalɛ, koni amɛkɛ amɛ asɔmɔ yɛ anɔkwayeli mli yɛ be mli ni amɛnaa amɛnaanyobɔɔ yɛ shikpɔŋ nɛɛ nɔ lɛ mli gbɛfaŋnɔ ni amɛkɛ amɛhe woɔ Yehowa Maŋtsɛyeli lɛ ni amɛhaa mɛi leɔ lɛ mli lɛ!

[Shishigbɛ niŋmai]

[Mfonirii ni yɔɔ baafa 43]

Nɛkɛ odaseyelii nɛɛ ni tsɔɔ wɔŋjamɔ babaoo lɛ ji nɔ ko ni anaa faŋŋ yɛ Pergamon Museum ni yɔɔ Berlin lɛ

[Mfoniri ni yɔɔ baafa 45]

Akɛ mana lɛ eko to kpaŋmɔ adeka lɛ mli. Ni akɛ okadi mana ni akɛto lɛ aaaha amɛ lɛ tsɔɔ akɛ mɛi ni afɔ amɛ mu ni yeɔ kunim lɛ nine shɛɔ shihilɛ ni gbele bɛ mli nɔ

[Mfoniri ni yɔɔ baafa 45]

Tɛ yɛŋ lɛ yɛ kɛha mɛi ni aŋɔɔ amɛ awoɔ Toobi lɛ yookpeemɔ lɛ mli lɛ

Yitso 10

“Satan Nibii ni Mli Kwɔlɔ” lɛ Nyaŋemɔ

TIATIRA

 1. Nɛgbɛ Tiatira yɔɔ kɛ akɛto asafoi krokomɛi lɛ ahe, ni mɛɛ jamɔ nɛkɛ yaa nɔ yɛ jɛmɛ?

NƆ NI ka Bergama (Pergamo) wuoyi-bokagbɛ aaafee shitoi 40 ji Turkeybii amaŋ Akhisar ni gbɔmɛi pii yɔɔ jɛmɛ lɛ. Aaafee afii 1,900 ni eho nɛ lɛ, no mli lɛ biɛ ji he ni Tiatira yɔɔ. Nɔkwɛlɔ gbɛfalɔ baanyɛ ashɛ nɛkɛ maŋ Tiatira nɛɛ mli oya kɛtsɔ gbɛ ni eeefa kɛtsɔ gbɛjegbɛ ni jɛɔ Pergamo lɛ nɔ ni agbɛnɛ ebɔle shi kɛya asafoi ni eshwɛ ni yɔɔ Kpojiemɔ yitso 3 lɛ amli—Sarde, Filadelfia, kɛ Laodikea. Tiatira tamɔɔɔ Pergamo, ejaakɛ ejeee he ko ni ehe gbɛi yɛ maŋtsɛ jamɔ lɛ mli, shi eyɛ gbatsui kɛ sɔlemɔtsui ni ajɔɔ nɔ aha wɔŋjalɔi anyɔŋmɔi. Ale Tiatira akɛ jarayeli maŋ diɛŋtsɛ.

2, 3. (a) Mɛni atsɔ hiɛ aŋma yɛ Tiatiranyo ni batsɔ Kristofonyo ko he? (b) Akɛ Yesu ji “Nyɔŋmɔ Bi” ni “ehiŋmɛii tamɔ lalilɛi” lɛ tsɔɔ mɛni kɛhaa Kristofoi ni yɔɔ Tiatira lɛ?

² Beni Paulo shiɛɔ yɛ Makedonia lɛ, ekɛ Tiatira yoo ko ni atsɛɔ lɛ Lidia, ni hɔɔ kɔɔjaŋ kpe. Lidia kɛ eshiabii lɛ fɛɛ kpɛlɛ sane ni Paulo shiɛɔ lɛ nɔ kɛ miishɛɛ ni amɛjie gbɔfeemɔ ni ekaaa kpo amɛtsɔɔ lɛ. (Bɔfoi lɛ Asaji 16:14, 15) Lɛ ji mɔ ni bafee klɛŋklɛŋ Tiatiranyo ni ale ni kpɛlɛ Kristojamɔ nɔ. Yɛ be ni sa mli lɛ, maŋ lɛ diɛŋtsɛ bana Kristofoi asafo. Yesu kɛ eshɛɛ sane ni kɛ fe fɛɛ lɛ ha amɛ yɛ jɛmɛ: “Ni Tiatira asafo lɛ bɔfo lɛ, ŋmaa oyaha lɛ akɛ: Nii ni Nyɔŋmɔ Bi lɛ ni ehiŋmɛii tamɔ lalilɛi ni enaji tamɔ ayawa ni kpɛɔ nyeramnyeram lɛ kɛɛ nɛ.”—Kpojiemɔ 2:18, New World Translation.

³ Enɛ ji be pɛ mli ni wiemɔ “Nyɔŋmɔ Bi” lɛ pueɔ yɛ Kpojiemɔ, eyɛ mli akɛ Yesu wieɔ Yehowa he yɛ hei krokomɛi akɛ “mi-Tsɛ.” (Kpojiemɔ 2:27; 3:5, 21) Eka shi faŋŋ akɛ sabala nɛɛ ni akɛtsu nii yɛ biɛ lɛ kaiɔ Tiatira Kristofoi lɛ akɛ Yesu kɛ Yehowa yeɔ yitsoŋ sane diɛŋtsɛ. Nɛkɛ Bi nɛɛ “hiŋmɛii tamɔ lalilɛi”—kɔkɔbɔɔ kɛha Kristofoi ni yɔɔ Tiatira lɛ akɛ ekojomɔ lɛ baatso tamɔ la ashi nɔ fɛɛ nɔ ni enaa ni gbeɔ asafo lɛ he guɔ lɛ. Akɛni shii enyɔ nɛ ni ewieɔ enaji ni tamɔ ayawa ni kpɛlɛɔ lɛ he hewɔ lɛ, emaa lɛ diɛŋtsɛ enɔkwayeli he nɔkwɛmɔnɔ ni kpɛlɛɔ kaŋkaŋ yɛ be mli ni enyiɛ shikpɔŋ nɛɛ nɔ lɛ nɔ mi. Ŋwanejee ko bɛ he akɛ Kristofoi ni yɔɔ Tiatira lɛ bo eŋaawoo lɛ toi, ni esa akɛ wɔfee nakai ŋmɛnɛ!—1 Petro 2:21.

4, 5. (a) Mɛni hewɔ Yesu baanyɛ ajie Kristofoi ni yɔɔ Tiatira lɛ ayi lɛ? (b) Mɛɛ gbɛ nɔ asafo ni yɔɔ Tiatira lɛ tamɔ asafoi ni yɔɔ ŋmɛnɛ lɛ?

⁴ Yɛ miishɛɛ mli lɛ, Yesu baanyɛ ajie mɛi ni yɔɔ Tiatira lɛ ayi. Ekɛɔ akɛ: “Mile onitsumɔi lɛ kɛ osuɔmɔ lɛ kɛ osɔɔmɔ lɛ kɛ ohemɔkɛyeli lɛ kɛ otsuishiŋmɛɛ lɛ, ni mile onitsumɔi lɛ akɛ sɛɛkpee nii lɛ fe tsutsu nii lɛ tete.” (Kpojiemɔ 2:19) Akɛ mɛi ni tamɔɔɔ Efesobii lɛ, Kristofoi ni afɔ amɛ mu ni yɔɔ jɛmɛ lɛ elajeko amɛ klɛŋklɛŋ suɔmɔ ni amɛyɔɔ kɛha Yehowa lɛ. Ni amɛhemɔkɛyeli mli wa. Agbɛnɛ hu, amɛnitsumɔi lɛ fa fe tsutsu nɔ lɛ, ni taakɛ asafoi etɛ ni tsɔ hiɛ lɛ ji lɛ, Kristofoi ni yɔɔ Tiatira lɛ miiŋmɛ amɛtsui shi. Kwɛ bɔni amɛfeɔ Yehowa Odasefoi asafoi aaafee 100,000 ni yɔɔ shikpɔŋ muu lɛ fɛɛ nɔ ŋmɛnɛ lɛ he mfoniri ha! Suɔmɔ kɛha Yehowa kpɛɔ kɛtsɔɔ mli, yɛ be mli ni ekaafeemɔ mumɔ ni amɛyɔɔ yɛ sɔɔmɔ nitsumɔ lɛ mli lɛ gbuɔ shi kɛboteɔ asafo lɛ mli, ni ekanyaa gbekɛbii kɛ onukpai fɛɛ lɛ. Amɛteŋ mɛi ni amɛyifalɛ miiya hiɛ kɛ amɛhe miiha akɛ gbɛgbalɔi, ni tsɔɔ akɛ amɛkɛ amɛbe ni eshwɛ lɛ miijaje Nyɔŋmɔ Maŋtsɛyeli ni baa lɛ anunyam hiɛnɔkamɔ lɛ amɛmiitsɔɔ yɛ nilee mli!—Mateo 24:14; Marko 13:10.

⁵ Afii nyɔŋmai abɔ nɛ ni anɔkwafoi pii, ni jɛ shwɛɛnii ni afɔ amɛ mu lɛ kɛ asafo babaoo lɛ ateŋ etee nɔ ejie tsuishiŋmɛɛ ni ekaaa kpo yɛ Nyɔŋmɔ sɔɔmɔ mli, yɛ be mli ni jeŋ ni ebɔle amɛhe kɛkpe lɛ maa eyi shi vii kɛboteɔ duŋ kpii ni hiɛnɔkamɔ bɛ mli lɛ mli lɛ. Shi nyɛhaa wɔnaa ekaa! Kpojiemɔ maa Nyɔŋmɔ gbalɔi ni tsɔ hiɛ lɛ odaseyeli lɛ nɔ mi. “Yehowa gbi wulu lɛ ebɛŋkɛ, ebɛŋkɛ ni eeye oyai naakpa.”—Zefania 1:14; Yoel 2:1; Habakuk 2:3; Kpojiemɔ 7:9; 22:12, 13.

“Nakai Yoo Isabel Lɛ”

 6. (a) Yɛ nibii ni sa yijiemɔ lɛ fɛɛ sɛɛ lɛ, mɛɛ naagba Yesu kadi yɛ asafo ni yɔɔ Tiatira lɛ mli ni he hiaa ni atsu he nii amrɔ nɔŋŋ? (b)  Namɔ ji Isabel, ni ani eyɛ nɔ ni ja ni eeenyɛ edamɔ nɔ efee gbalɔyoo?

⁶ Yesu hiŋmɛii ni tamɔ lalilɛi lɛ egbu shi kɛtee shɔŋŋ. Ekadiɔ nɔ ko ni sa akɛ atsu he nii amrɔ nɔŋŋ. Ekɛɔ Kristofoi ni yɔɔ Tiatira lɛ akɛ: “Shi kɛlɛ, mikɛo yɛ sane ko, akɛ oŋmɛ nakai yoo Isabel lɛ, ni tsɛɔ ehe gbalɔyoo lɛ gbɛ, ni etsɔɔ mitsuji lɛ anii ni elakaa amɛ ni amɛbɔ ajwamaŋ ni amɛye nibii ni akɛsha afɔle aha wɔji.” (Kpojiemɔ 2:20, New World Translation) Yɛ afii ohai nyɔŋma D.Ŋ.B. lɛ mli lɛ, Maŋnyɛ Isabel, Israel Maŋtsɛ Ahab ŋa Baal jalɔ lɛ bafee mɔ ni he gbɛi gbonyo yɛ egbɔmɔgbee, egbalafitemɔ kɛ nɔnyɛɛ gbɛi lɛ ahewɔ. Yehu, akɛ mɔ ni Yehowa efɔ lɛ mu lɛ ha agbe lɛ. (1 Maŋtsɛmɛi 16:31; 18:4; 21:1-16; 2 Maŋtsɛmɛi 9:1-7, 22, 30, 33) Isabel wɔŋjalɔ lɛ nyɛŋ atsɔɔ akɛ gbalɔyoo ji lɛ. Etamɔɔɔ Miriam kɛ Debora, ni sɔmɔ akɛ gbalɔyei anɔkwafoi yɛ Israel lɛ. (2 Mose 15:20, 21; Kojolɔi 4:4; 5:1-31) Ni Yehowa mumɔ lɛ hu tsirɛɛɛ lɛ koni egba taakɛ bɔ ni etsirɛ Hana ni egbɔ lɛ kɛ Filipo sanekpakpashiɛlɔ lɛ biyei ejwɛ lɛ.—Luka 2:36-38; Bɔfoi lɛ Asaji 21:9.

 7. (a) “Nakai yoo Isabel” lɛ ni Yesu tsi eta lɛ tsɔɔ akɛ ekɛmiitsɔɔ mɛɛ su loo hewalɛ ko? (b) Yɛ mɛɛ gbɛ nɔ ekolɛ yei komɛi ni kɛ amɛhe ebabɔ asafo lɛ he lɛ buɔ amɛ pɛsɛmkunya gbɛ ni yɔɔ keketee lɛ bem?

⁷ Eka shi faŋŋ akɛ, “nakai yoo Isabel” lɛ ni kɛɔ akɛ eji gbalɔyoo yɛ Tiatira lɛ ji amalelɔ. Nyɔŋmɔ mumɔ lɛ fiii esɛɛ. Namɔ ji yoo nɛɛ? Eka shi faŋŋ akɛ eji yoo ko loo yei akuu ko ni hiɛ gbooo nii ni miifee nii koni amɛfite asafo lɛ. Ekolɛ yei ni kɛ amɛhe ebabɔ asafo lɛ he lɛ miiha asafo lɛ mlibii lɛ ateŋ mɛi komɛi kɛ amɛhe miiwo jeŋba shara mli, ni amɛkɛ hiɛwaa miibu nɛkɛ amɛ pɛsɛmkunya gbɛ ni amɛtsɔɔ nɔ nɛɛ bem kɛtsɔ ŋmalɛi ni amɛtsɔɔ shishi yɛ gbɛ ni ejaaa nɔ lɛ nɔ. Eji apasa gbalɛ diɛŋtsɛ! Amɛbaalaka mɛi krokomɛi koni amɛbanyiɛ amɛ diɛŋtsɛ amɛ “ajwamaŋbɔɔ, nyaŋemɔ nitsumɔ, mlila, akɔnɔ fɔŋ, kɛ hiɛjoomɔ ni ji wɔŋjamɔ” nifeemɔi lɛ asɛɛ. (Kolosebii 3:5) Amɛbaasumɔ ni mɛi ni yɔɔ asafo lɛ mli lɛ kɛ amɛhe awo jeŋba shara, akɔnɔi asɛɛdii shihilɛ ni amrɔ nɛɛ akpɛlɛɔ nɔ loo akuɔ hiɛ ashwieɔ nɔ yɛ Kristendom jamɔi babaoo mli lɛ mli.

 8. (a) Mɛni Yesu jaje yɛ “Isabel” ni yɔɔ Tiatira lɛ he? (b) Anu yei ahewalɛ he yɛ gbɛ ni ejaaa nɔ yɛ ŋmɛnɛŋmɛnɛ beaŋ yɛ mɛɛ gbɛ nɔ?

⁸ Yesu tee nɔ ekɛɛ onukpai ni yɔɔ Tiatira lɛ akɛ: “Ni miha lɛ be, koni ekɛtsake etsui, shi esumɔɔɔ akɛ etsake kɛjɛ ejwamaŋbɔɔ lɛ mli. Naa, mikɛ lɛ miifɔ saa nɔ ni mikɛ mɛi ni kɛ lɛ efite gbala lɛ hu miiwo amanehulu kpeteŋkpele mli, ja amɛtsake amɛtsuii kɛjɛ enitsumɔi lɛ amli.” (Kpojiemɔ 2:21, 22) Taakɛ bɔ ni eka shi faŋŋ akɛ shishijee Isabel lɛ ye Ahab nɔ ni ebuuu Nyɔŋmɔ blafo, Yehu hu lɛ, nakai nɔŋŋ nɛkɛ yei asu nɛɛ baanyɛ abɔ mɔdɛŋ ni amɛkudɔ wumɛi kɛ onukpai. Etamɔ nɔ ni onukpai ni yɔɔ Tiatira lɛ miiŋmɛ hewalɛ ni Isabel ni bɛ heshibaa nɛɛ naa yɛ mɛi anɔ lɛ gbɛ. Yesu miibɔ amɛ kɔkɔ ni mli wa yɛ biɛ, kɛ agbɛnɛ kɛha Yehowa webii asafo ni yɔɔ jeŋ muu fɛɛ lɛ ŋmɛnɛ. Yɛ ŋmɛnɛŋmɛnɛ beaŋ hu lɛ, yei komɛi ni yɔɔ keketee lɛ etsɔ amɛwumɛi ayiŋ ni amɛbatsɔmɔ hemɔkɛyeli kwalɔi ni amɛkɛ Yehowa anɔkwa tsuji lɛ po etee saneyeli hei.—Okɛto Yuda 5-8 he.

 9. (a) Mɛni hewɔ Yesu wiemɔi ni kɔɔ Isabel he lɛ etsɔɔɔ akɛ aawie yei fɛɛ ni yɔɔ asafo lɛ mli lɛ ahe efɔŋ lɛ? (b) Mɛɛ be mli pɛ Isabel su loo hewalɛ teɔ shi?

⁹ Enɛ egbeee yei anɔkwafoi ni yɔɔ Kristofoi asafo lɛ mli lɛ ahe guɔ yɛ gbɛ ko nɔ. Mɛi ni tsuɔ odaseyeli nitsumɔ lɛ titri yɛ ŋmɛnɛŋmɛnɛ gbii nɛɛ amli lɛ ji nyɛmimɛi yei anɔkwafoi; yɛ shia Biblia mli nikasemɔi ni amɛfeɔ lɛ hewɔ lɛ, amɛkɛ mɛi pii miiba asafo lɛ mli. Nyɔŋmɔ diɛŋtsɛ jɔɔ nɛkɛ gbɛjianɔtoo nɛɛ nɔ, taakɛ atsɔɔ yɛ Lala 68:12 lɛ: “Nuŋtsɔ [Yehowa] lɛ ha anu hewalɛ wiemɔ; yei ni shiɛɔ kunimyeli lɛ fa babaoo.” Ŋamɛi aheshibaa kɛ bulɛ subaŋ ni “jara wa yɛ Nyɔŋmɔ hiɛ” lɛ naa amɛwumɛi anɔ hewalɛ kpakpa. (1 Petro 3:1-4) Maŋtsɛ Lemuel jieɔ yoo kpakpa ni le nitsumɔ lɛ yi. (Abɛi 31:10-31) Yɛ be mli ni yei jeɔ amɛŋɛlɛ nɔ ni amɛlakaa hii loo amɛtswaa yitsoyeli lɛ mpoa aloo amɛkuɔ amɛhiɛ amɛshwieɔ nɔ lɛ pɛ haa Isabel hewalɛ lɛ teɔ shi.—Efesobii 5:22, 23; 1 Korintobii 11:3.

10. (a) Mɛni hewɔ Isabel kɛ ebii lɛ anine shɛ fɔbuu kojomɔ nɔ lɛ? (b) Mɛɛ shihilɛ ko ni oshara yɔɔ mli mɛi ni batsɔmɔɔ Isabel bii lɛ boteɔ mli, ni mɛni ji nɔ ni esa akɛ mɛi ni tamɔ nɛkɛ afee?

¹⁰ Yɛ be mli ni ewieɔ “nakai yoo Isabel” lɛ he lɛ, Yesu tee nɔ akɛ: “Ni ebii lɛ, gbe magbe amɛ; ni asafoi lɛ fɛɛ aaana ale akɛ mi ji mɔ ni taoɔ sabai kɛ tsuii amli, ni maha nyɛteŋ mɔ fɛɛ mɔ bɔ ni nyɛnitsumɔi lɛ yɔɔ lɛ.” (Kpojiemɔ 2:23) Yesu eha Isabel kɛ ebii lɛ be koni amɛtsake, shi amɛmiiya nɔ yɛ amɛjeŋba shara gbɛi lɛ amli lolo ni yɛ enɛ hewɔ lɛ esa akɛ amɛnine ashɛ kojomɔ nɔ. Shɛɛ sane ko ni mli wa yɛ biɛ kɛha Kristofoi ni yɔɔ ŋmɛnɛ lɛ. Mɛi ni kaseɔ Isabel, kɛ amɛji hii jio yei jio, ni amɛbatsɔmɔɔ ebii kɛtsɔɔ Biblia mli shishitoo mlai ni kɔɔ yitsoyeli kɛ jeŋba kpakpa he lɛ mli ni amɛkuɔ aloo kɛtsɔɔ kuɛŋtimɔ nɔ koni amɛku amɛhiɛ amɛshwie teokrase gbɛjianɔtoo nɔ lɛ, amɛbafeɔ mɛi ni yɔɔ mumɔŋ hela he oshara ko mli. Eji anɔkwale akɛ kɛji akɛ mɔ ni tamɔ nɛkɛ tsɛ onukpai ni yɔɔ asafo lɛ mli koni amɛsɔle amɛha lɛ lɛ, “hemɔkɛyeli sɔlemɔ lɛ aaahere helatsɛ lɛ yiwala, ni Nuŋtsɔ [Yehowa] lɛ aaatee lɛ shi”—kɛ ekɛ heshibaa aaatsu nii ni ekɛ nakai sɔlemɔ lɛ akpa gbee lɛ. Shi mɔ ko akasusu akɛ ebaanyɛ eshishiu Nyɔŋmɔ loo Kristo kɛtsɔ jeŋba shara ko ni aaafee atee lɛ nɔ aloo kɛtsɔ ekaa yɛ sɔɔmɔ lɛ mli ni aaajie lɛ kpo atsɔɔ yɛ kponɔ gbɛ lɛ nɔ.—Yakobo 5:14, 15.

11. Mɛɛ gbɛ nɔ atsɔɔ ayeɔ abuaa asafoi lɛ ŋmɛnɛ koni amɛhiɛ ahi amɛhe nɔ yɛ yei ahewalɛ ni abaasumɔ ni akɛbote asafo lɛ mli yɛ gbɛ ni esaaa nɔ lɛ he yɛ?

¹¹ Yɛ miishɛɛ mli lɛ, Yehowa Odasefoi asafoi ni yɔɔ ŋmɛnɛ lɛ babaoo hiɛ yɛ amɛhe nɔ yɛ nɛkɛ oshara nɛɛ he. Onukpai lɛ kwɛɔ sui ni jeee teokrase sui kɛ nɔ fɔŋ feemɔ sui lɛ. Amɛbɔɔ mɔdɛŋ ni amɛye amɛbua hii kɛ yei fɛɛ ni yɔɔ oshara mli lɛ bɔni afee ni amɛmumɔŋ shihilɛ ahi ni ajaje amɛ dani efee akɛ ekpe sɛɛ tsɔ. (Galatabii 5:16; 6:1) Nɛkɛ nɔkwɛlɔi Kristofoi nɛɛ kɛ suɔmɔ kɛ shiŋŋfeemɔ tsiɔ mɔdɛŋ ni yoo ko aaabɔ ni eto kui loo eha nifeemɔi komɛi ni tamɔ yei aheyeli ashwere lɛ naa. Agbɛnɛ, akɛ ŋaawoo ni sa haa yɛ be kɛ bei amli yɛ Yehowa Odasefoi lɛ awoji amli.a

12. Yɛ mɛɛ gbɛ nɔ Yohane kuu ni yɔɔ ŋmɛnɛ lɛ jieɔ ekaa ni tamɔ Yehu nɔ lɛ kpo?

¹² Shi, kɛ jeŋba shara ni ehiii kwraa etee nɔ, ni titri lɛ he ni enɛ feɔ nɔ ko ni afɔɔ feemɔ lɛ, esa akɛ ashwie eshafeelɔi ni tsakeee amɛtsui lɛ kɛjɛ asafo lɛ mli. Wɔkaiɔ ekaa ni Yehu fee ni ekɛjie Isabel hewalɛ fɛɛ ni eyɔɔ yɛ Israel kɛjɛ jɛmɛ lɛ. Nakai nɔŋŋ hu Yohane kuu lɛ feɔ shiŋŋ ŋmɛnɛ yɛ nitsumɔ mli, ni amɛtoɔ okadi amɛhaa amɛnanemɛi “Yehonadab” bii lɛ, ni amɛkɛtsɔɔ akɛ esoro amɛ kwraa yɛ Kristendom sɔɔlɔi ni ŋmɛɔ nɔ fɛɛ nɔ feemɔ gbɛ lɛ ahe.—2 Maŋtsɛmɛi 9:22, 30-37; 10:12-17.

13. Mɛni baaba mɛi ni baa amɛhe shi amɛhaa yei ahewalɛ ni ejaaa gbɛ lɛ anɔ?

¹³ Akɛ Yehowa Bɔfo kɛ Kojolɔ lɛ, Nyɔŋmɔ Bi lɛ tsuɔ nii amrɔ ni ehaa ayɔseɔ ŋmɛnɛŋmɛnɛ beaŋ Isabel ni ekɛ hela tswaa lɛ efɔɔ saa nɔ, ejaakɛ emumɔŋ hela lɛ ji nɔ ko ni anyɛŋ atsa. (Maleaki 3:1, 5) Mɛi ni kɛ amɛhe eha nɛkɛ yei asu fɔŋ nɛɛ hu baana amanehulu kpeteŋkpele—awerɛho ni ji shwiemɔ ni ashwieɔ amɛ, afoɔ amɛ ashɛɔ afɔɔ kɛjɛɔ Kristofoi asafo lɛ mli tamɔ amɛgboi. Ja amɛtsake, ni amɛtsi amɛhe, ni ahe amɛ kɛba asafo lɛ mli ekoŋŋ, kɛ jeee nakai lɛ gbɔmɔtso mli gbele diɛŋtsɛ kɛtsɔ ‘hela ni gbeɔ mɔ’—ni baaba yɛ amanehulu kpeteŋkpele lɛ mli lɛ aaaba amɛnɔ. Shi, abaanyɛ asaa amɛ ekoŋŋ kɛji akɛ amɛtsake amɛtsui kɛjɛ amɛnifeemɔi gbohii lɛ amli.—Mateo 24:21, 22; 2 Korintobii 7:10.

14. (a) Mɛɛ gbɛ nɔ Yesu kɛ onukpai lɛ tsuɔ nii ni amɛtsuɔ naagbai komɛi ahe nii, tamɔ hewalɛ ni Isabel naa lɛ nɛkɛ yɛ? (b) Te esa akɛ asafo lɛ afi onukpai ni tsuɔ naagbai nɛɛ ahe nii lɛ sɛɛ amɛha tɛŋŋ?

¹⁴ Esa akɛ “asafoi lɛ fɛɛ” ale akɛ Yesu taoɔ “sabai,” ni ji henumɔi ni mli kwɔlɔ lɛ, kɛ ‘tsui’ lɛ, mli gbɛ gbɔmɔ lɛ, ni yiŋtoi ni hɔlɔ shishi fata he lɛ amli. Yɛ enɛ hewɔ lɛ, ekɛ ŋulamii loo onukpai ni anyɛɔ akɛ he fɔɔ amɛnɔ tsuɔ nii yɛ naagbai komɛi ahe nitsumɔ mli, tamɔ yɛ he fɛɛ he ni Isabel hewalɛ nɛɛ aaajie ehe kpo yɛ lɛ nɛkɛ. (Kpojiemɔ 1:20) Beni nɛkɛ onukpai nɛɛ etao sane ni tamɔ nɛkɛ mli ni akɛ kojomɔ ni sa eha lɛ, ejeee gbɛnaa nii ni ka aŋkroaŋkroi anɔ dɔŋŋ akɛ amɛtao nɔ hewɔ kɛ mɛni hewɔ ni afee nakai lɛ mli. Esa akɛ mɔ fɛɛ mɔ akpɛlɛ bɔ ni onukpai lɛ etsu sane lɛ he nii lɛ nɔ yɛ heshibaa mli, ni amɛya nɔ amɛfi nɛkɛ asafo mli ŋulamii nɛɛ asɛɛ. Abaawo anɔkwayeli kɛha Yehowa kɛ egbɛjianɔ ni eto yɛ esafo lɛ mli lɛ he nyɔmɔ. (Lala 37:27-29; Hebribii 13:7, 17) Yɛ bo diɛŋtsɛ ogbɛfaŋ lɛ, eba akɛ gbɛfaŋnɔ ni onaa yɛ mli lɛ aaatsɔ jɔɔmɔ yɛ be mli ni Yesu kɛ mɔ fɛɛ mɔ nitsumɔ he nyɔmɔwoo haa lɛ lɛ.—Galatabii 5:19-24; 6:7-9.

“Nɔ ni Nyɛyɔɔ lɛ Nyɛhiɛa Mli”

15. (a) Mɛni Yesu yɔɔ ni ebaakɛɛ mɛi ni Isabel fiteko amɛ lɛ? (b) Mɛni tsɔɔ akɛ jeee mɛi fɛɛ ni kɛɔ akɛ amɛji Kristofoi yɛ afi 1918 mli lɛ Kristendom ni ekwa hemɔkɛyeli lɛ efite amɛ?

¹⁵ Yesu wiemɔi ni nyiɛ sɛɛ lɛ kɛ miishɛjemɔ baa: “Shi miikɛɛ nyɛ, nyɛ mɛi fɛɛ ni nyɛshwɛ yɛ Tiatira lɛ, mɛi abɔ ni ehiɛɛɛ tsɔɔmɔ nɛɛ mli, ni amɛleee Satan nibii ni mli kwɔlɔ lɛ (bɔ ni amɛkɛɔ lɛ), akɛ: Mikɛ jatsu kroko eŋmɛŋ nyɛnɔ; shi nɔ ni nyɛyɔɔ lɛ, nyɛhiɛa mli kɛyashi beyinɔ ni maba.” (Kpojiemɔ 2:24, 25) Susumai anɔkwafoi yɛ Tiatira ni Isabel nako amɛnɔ hewalɛ. Nakai nɔŋŋ hu aaafee afii 40 dani 1918 aaashɛ ni agbɛnɛ kɛjɛ no sɛɛ lɛ, jeee mɛi fɛɛ ni kɛɔ akɛ amɛji Kristofoi lɛ ekpɛlɛ Kristendom jeŋba shara gbɛ ni fiteɔ mɔ ni egbɛ eshwa babaoo lɛ nɔ. Biblia Kaselɔi akuu fioo lɛ, ni amrɔ nɛɛ ale amɛ akɛ Yehowa Odasefoi lɛ, ebɔ mɔdɛŋ ni amɛye amɛbua sɔlemɔi lɛ amlibii ni amɛna bɔ ni Kristendom tsɔɔmɔi babaoo jeee Kristofoi atsɔɔmɔ ni amɛtsi amɛhe kɛjɛ Babilon jamɔ mli hemɔkɛyelii kɛ nifeemɔi ni amɛnine shɛ nɔ kɛtsɔ hemɔkɛyeli kwalɔ Kristendom nɔ lɛ fɛɛ he. Nɔ ni fata enɛ he ji “nakai yoo Isabel” lɛ tsɔɔmɔi ni ŋmɛɔ nɔ fɛɛ nɔ feemɔ gbɛ lɛ.

16. Eyɛ mli akɛ Yesu kɛ klɛŋklɛŋ afii oha lɛ mli Kristofoi anɔyeli kuu lɛ kɛ jatsu ko fataaa he ehaaa amɛ moŋ, shi mɛni nibii esa akɛ amɛkwa?

¹⁶ Yohane kuu lɛ ni yɔɔ ŋmɛnɛ lɛ hu ewo amɛnanemɛi ni ji asafo babaoo lɛ hewalɛ, ni amɛhiɛ ahi amɛhe nɔ yɛ jeŋba shara sui tamɔ nɔ ni yɔɔ jeŋ ni eba shi nɛɛ hiɛtserɛjiemɔ mli lɛ ahe. Ehe ehiaaa ni okwɛ loo otsɔ fitemɔ ni tamɔ nɛkɛ mli ni ootao ole bɔ ni eji aloo ni okase bɔ ni ooofee ni ojo naa foi. Eji nilee gbɛ akɛ oootsi ohe kɛaaya shɔŋŋ kwraa kɛjɛ “Satan nibii ni mli kwɔlɔ” lɛ ahe. Taakɛ Yesu kɛɔ lɛ: “Mikɛ jatsu kroko eŋmɛŋ nyɛnɔ.” Enɛ kaiɔ wɔ Kristofoi anɔyeli kuu lɛ ni hi shi yɛ klɛŋklɛŋ afii oha lɛ mli lɛ akpɔ ni amɛwo lɛ: “Ejaakɛ esa mumɔ krɔŋkrɔŋ lɛ hiɛ ni esa wɔ hu wɔhiɛ akɛ, wɔkɛ jatsu ko akafɔ nyɛnɔ dɔŋŋ, akɛ ja nii ni he hiaa nɛɛ nɔŋŋ: akɛ nyɛhi looi ni agbe aha wɔji kɛ la kɛ kooloi ni ashɔtɔ kɛ ajwamaŋbɔɔ; kɛji nyɛhi enɛɛmɛi lɛ, nyɛfee jogbaŋŋ. Nyɛhia shi jogbaŋŋ!” (Bɔfoi lɛ Asaji 15:28, 29) Bɔni afee ni oshwere yɛ mumɔŋ lɛ, kwa apasa jamɔ, la ni akɛtsuɔ nii yɛ gbɛ ni ejaaa nɔ (tamɔ la ni agbalaa awoɔ mɔ mli), kɛ jeŋba shara! Ni enɛ hu baabu ogbɔmɔtsoŋ hewalɛnamɔ he.

17. (a) Yɛ mɛɛ gbɛ nɔ Satan kɛ “nibii ni mli kwɔlɔ” eka mɛi ŋmɛnɛ? (b) Mɛni esa akɛ efee wɔsubaŋ yɛ Satan je lɛ mli “nibii ni mli kwɔlɔ” ni yɔɔ hwanyaŋŋ lɛ he?

¹⁷ Satan yɛ “nibii ni mli kwɔlɔ” krokomɛi ŋmɛnɛ, tamɔ nibii ni akaa yiŋ awieɔ lɛ hwanyaŋŋ kɛ jeŋ nilee sɔrɔtoi ni jieɔ mɛi ni le nii lɛ ayi lɛ. Kɛfata nɔ fɛɛ nɔ feemɔ gbɛ ni aŋmɛɔ, jeŋba shara mli susumɔi ahe lɛ, nɔ ni fata enɛɛmɛi ahe hu ji mumɔi atsɛmɔ kɛ sutsakemɔ tsɔɔmɔ ni akaa yiŋ awieɔ lɛ. Te Bɔlɔ, nilee fɛɛ tsɛ lɛ buɔ nɛkɛ “nibii ni mli kwɔlɔ” nɛɛ tɛŋŋ? Bɔfo Paulo ŋɔ ewiemɔi lɛ ekɛtsu nii akɛ: “Mafite nilelɔi anilee.” Nɔ ni tamɔɔɔ enɛ lɛ, “Nyɔŋmɔ nibii ni mli kwɔlɔ” lɛ yɛ mlɛo, amɛmli ka shi faŋŋ, ni eshɛjeɔ mɔ mii. Kristofoi ni le nii lɛ kpooɔ Satan je lɛ mli “nibii ni mli kwɔlɔ” ni yɔɔ hwanyaŋŋ lɛ. Kaimɔ akɛ, “je lɛ miiho aya kɛ ekɔnɔi, shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.”—1 Korintobii 1:19, Kingdom Interlinear; 2:10; 1 Yohane 2:17.

18. Mɛɛ jɔɔmɔi Yesu wo Kristofoi ni afɔ amɛ mu ni hiɔ shi akɛ anɔkwafoi kɛyashiɔ naagbee lɛ shi yɛ he, ni mɛɛ hegbɛ mɛi ni abaatee amɛ shi nɛɛ baana yɛ Harmagedon?

¹⁸ Agbɛnɛ Yesu kɛ miishɛjemɔ wiemɔi haa nakai Kristofoi ni yɔɔ Tiatira lɛ. Wiemɔi nɛɛ hu woɔ Kristofoi ni afɔ amɛ mu lɛ hewalɛ ŋmɛnɛ: “Ni kunimyelɔ lɛ kɛ mɔ ni toɔ minitsumɔi lɛ kɛyashiɔ naagbee lɛ, maha lɛ hegbɛ yɛ jeŋmaji lɛ anɔ, ni ekɛ dadetso aaakpala amɛ ni eeejwara amɛ tamɔ ajwaraa su gbɛi lɛ, taakɛ bɔ ni mi hu mina kɛjɛ mi-Tsɛ ŋɔɔ lɛ.” (Kpojiemɔ 2:26, 27) Eji hegbɛ ni yɔɔ naakpɛɛ lɛlɛŋ! Nɛkɛ hegbɛ ni kunimyelɔi ni afɔ amɛ mu nɛɛ anine shɛɔ nɔ yɛ amɛshitee lɛ mli lɛ ji gbɛfaŋnɔ ni amɛkɛ Yesu naa yɛ hiɛkpatamɔ “dadetso” ni amɛkɛtsuɔ nii amɛshiɔ jeŋmaji atuatselɔi lɛ yɛ Harmagedon lɛ mli. Nakai jeŋmaji lɛ anuklea lɛ fɛlɛmɔ baatamɔ kukwɛi shishi lai ni efɔ fɛlɛmɔ ni no pɛ amɛbaanyɛ amɛfee, yɛ be mli ni Kristo jwaraa ehenyɛlɔi lɛ dukuduku taakɛ afeɔ gbɛshɔlɔ gbɛ lɛ.—Lala 2:8, 9; Kpojiemɔ 16:14, 16; 19:11-13, 15.

19. (a) Namɔ ji “leebi ŋulami” [tooloo] lɛ, ni akɛ lɛ baaha mɛi ni yeɔ kunim lɛ yɛ mɛɛ gbɛ nɔ? (b) Mɛɛ hewalɛwoo akɛhaa asafo babaoo lɛ?

¹⁹ Yesu kɛfata he akɛ: “Ni maŋɔ leebi ŋulami [tooloo] lɛ maha lɛ.” (Kpojiemɔ 2:28, New World Translation.) Yɛ sɛɛ mli lɛ, Yesu tsɔɔ nɔ ni nɛkɛ “ŋulami” nɛɛ diɛŋtsɛ ji lɛ mli, akɛ: “Mi ji David shishifa lɛ kɛ eseshinyo lɛ, leebi ŋulami [tooloo] ni kpɛɔ lɛ.” (Kpojiemɔ 22:16, New World Translation) Hɛɛ, Yesu ji mɔ ni haa gbalɛ ni Yehowa nyɛ Bileam nɔ ni ejaje kɛjɛ naabui ni sumɔɔɔ akɛ efeɔ nakai lɛ mli lɛ baa mli: “Ŋulami ko aaajɛ Yakob mli aba, ni maŋtsɛtso ko aaate shi kɛaajɛ Israel mli.” (4 Mose 24:17) Te Yesu aaafee tɛŋŋ ekɛ “leebi ŋulami” loo tooloo lɛ aha mɛi ni yeɔ kunim lɛ? Eka shi faŋŋ akɛ kɛtsɔ lɛ diɛŋtsɛ ehe ni ekɛaaha amɛ, ŋɔ ni eeeŋɔ amɛ ni amɛfee gbɔmɛi ni bɛŋkɛ lɛ kpaakpa ni kɛ lɛ yeɔ yitsoŋ sane lɛ nɔ. (Yohane 14:2, 3) Lɛlɛŋ akɛ eji yiŋtsɔmɔ ko koni aŋmɛ tsui shi lɛ he hewalɛwoo! Eji nɔ kroko hu ni kanyaa asafo babaoo lɛ akɛ amɛaale akɛ etsɛŋ ni “leebi ŋulami” [tooloo] ni kpɛɔ lɛ baatsu e-Maŋtsɛyeli hegbɛ lɛ he nii ni ekɛ Paradeiso aba shikpɔŋ nɛɛ nɔ ekoŋŋ!

Hiɛmɔ Emuuyeli Mli

20. Mɛɛ nibii ni tee nɔ yɛ Kristendom kaiɔ wɔ gbɔjɔmɔi ni yɔɔ Tiatira asafo lɛ mli lɛ ekomɛi?

²⁰ Nɛkɛ shɛɛ sane nɛɛ baawo Kristofoi ni yɔɔ Tiatira lɛ hewalɛ waa. Bo lɛ susumɔ enɛ he—Nyɔŋmɔ Bi ni yɔɔ ŋwɛi ni awo ehiɛ nyam lɛ diɛŋtsɛ ewie etsɔɔ Kristofoi ni yɔɔ Tiatira lɛ yɛ amɛhaomɔi lɛ ekomɛi ahe! Eji anɔkwale akɛ kɛ hooo lɛ, mɛi ni yɔɔ asafo lɛ mli lɛ ateŋ mɛi komɛi kpɛlɛ nɛkɛ suɔmɔ kwɛmɔ nɛɛ nɔ. Shɛɛ saji kpawo lɛ ateŋ nɔ ni kɛ fe fɛɛ nɛɛ hu yeɔ buaa wɔ koni wɔyoo anɔkwale Kristofoi asafo lɛ ŋmɛnɛ. Yɛ afi 1918 mli, beni Yesu ba Yehowa sɔlemɔwe lɛ kɛha kojomɔ lɛ, no mli lɛ gbɛjianɔtoi babaoo ni amɛyi fa ni amɛkɛɔ akɛ amɛji Kristofoi lɛ kɛ amɛhe ewo wɔŋjamɔ kɛ mumɔŋ ajwamaŋbɔɔ mli. (Yakobo 4:4) Mɛi komɛi kɛ amɛhiɛ fɔ yei ni yɔɔ keketee ni hi shi yɛ afii ohai 19 lɛ mli lɛ atsɔɔmɔi anɔ, tamɔ Ellen White ni jɛ Seventh-Day Adventists jamɔ lɛ mli kɛ Mary Baker Eddy ni jɛ Christian Scientists jamɔ lɛ mli lɛ kɛ nyɛsɛɛ nɛɛ nɔŋŋ lɛ yei pii ni shiɛɔ kɛjɛɔ shiɛmɔ adekai amli lɛ atsɔɔmɔi anɔ. (Nɔ ni tamɔɔɔ enɛ lɛ, kwɛmɔ 1 Timoteo 2:11, 12.) Katolik jamɔi sɔrɔtoi lɛ fɛɛ woɔ Maria hiɛ nyam fe Nyɔŋmɔ kɛ Kristo. Yesu wooo ehiɛ nyam nakai. (Yohane 2:4; 19:26) Ani abaanyɛ akpɛlɛ asafoi ni ŋmɛɔ nɛkɛ yei ahewalɛ ni esaaa nɛɛ gbɛ lɛ anɔ akɛ amɛji Kristofoi?

21. Mɛɛ nikasemɔ yɔɔ Yesu shɛɛ sane ni ekɛmaje Tiatira lɛ mli kɛha aŋkroaŋkroi?

²¹ Aŋkroaŋkroi ni ji Kristofoi baafee jogbaŋŋ akɛ amɛaasusu nɛkɛ sane nɛɛ he, kɛji akɛ amɛji Yohane kuu lɛ mlibii loo tooi krokomɛi lɛ mlibii. (Yohane 10:16) Gbɛ ni yɔɔ mlɛo nɔ tsɔmɔ baanyɛ alaka mɛi komɛi, taakɛ Tiatirabii Isabel kaselɔi lɛ ateŋ mɛi komɛi fee lɛ. Agbɛnɛ kaa ni baaha mɔ aŋmɛɛ saji ahe ni ekɛsaa lɛ hu yɛ. Ŋmɛnɛ, saji tamɔ la he nibii ni abaaye aloo ni aaakpɛlɛ la ni agbalaa awoɔ mɔ mli lɛ nɔ lɛ yɛ ni esa akɛ akɛkpe. Mɛi komɛi baanu he akɛ ekãa ni amɛyɔɔ yɛ sɔɔmɔ nitsumɔ lɛ mli loo yɛ wiemɔi ahamɔ mli lɛ haa amɛ hegbɛ ni amɛkafee keketee tsɔ yɛ shihilɛi krokomɛi amli, tamɔ awuiyeli kɛ jeŋba shara he sinii kɛ video nɔ nibii ni fiteɔ jeŋba ni amɛaakwɛ, aloo daa ni wa ni amɛaanu lɛ babaoo. Yesu kɔkɔbɔɔ ni ekɛha Kristofoi ni yɔɔ Tiatira lɛ kɛɔ wɔ akɛ esaaa akɛ wɔkɛ nibii ni tamɔ nɛkɛ shwɛɔ. Yehowa miisumɔ ni wɔhe atse, wɔjɛ wɔsusuma muu fɛɛ mli wɔtsu nii, ni wɔyiŋ akafee wɔ kɔshikɔshi taakɛ Kristofoi pii ni yɔɔ Tiatira lɛ ji lɛ.

22. Yesu maa bɔ ni ehe hiaa akɛ aaafee toiboo lɛ nɔ mi yɛ mɛɛ gbɛ nɔ?

²² Yɛ naagbee lɛ, Yesu jaje akɛ: “Mɔ ni yɔɔ toi lɛ, ha ni enu nɔ ni mumɔ lɛ kɛɔ asafoi lɛ.” (Kpojiemɔ 2:29) Shii ejwɛ nɛ ni Yesu tiɔ nɛkɛ sane ni kanyaa mɔ nɛɛ mli, ni no nɔŋŋ ekɛbaagbe shɛɛ saji etɛ ni baaba lɛ fɛɛ naa. Ani oyɛ toi ni nuɔ nii nakai? Belɛ yaa nɔ ni obo toi jogbaŋŋ, yɛ be mli ni Nyɔŋmɔ tsɔɔ emumɔ lɛ nɔ ekɛ ŋaawoo tsɔɔ egbɛ lɛ nɔ ni ekɛhaa lɛ.

[Shishigbɛ niŋmaa]

[Mfonirii ni yɔɔ baafa 51]

Ŋmɛnɛ, nyɛmimɛi yei anɔkwafoi titri ji mɛi ni kɛ amɛhe woɔ odaseyeli nitsumɔ nɛɛ mli yɛ be mli ni amɛkɛ heshibaa fiɔ teokrase hegbɛi asɛɛ lɛ

Yitso 11

Ani Ogbɛi yɛ Wala Wolo lɛ Mli?

SARDE

 1. Mɛni ji asafo ni yɔɔ Sarde lɛ mumɔŋ shihilɛ, ni te Yesu je eshɛɛ sane lɛ shishi eha tɛŋŋ?

ASAFO ni nyiɛ sɛɛ ni nine shɛ shɛɛ sane nɔ kɛjɛ Yesu ni awo ehiɛ nyam lɛ dɛŋ lɛ ji nɔ ni yɔɔ ŋmɛnɛŋmɛnɛ beaŋ Akhisar (Tiatira) wuoyigbɛ aaafee shitoi 30 lɛ: Sarde. Yɛ afii ohai ekpaa dani wɔ Ŋmɛnɛŋmɛnɛ Be nɛɛ shɛ lɛ, no mli lɛ eji blema Lidia maŋtsɛyeli lɛ maŋtiase ni ehe gbɛi lɛ kɛ he ni Maŋtsɛ Croesus niiatsɛ kpanaa lɛ yeɔ nɔ kɛjɛɔ. Beni Yohane gbii lɛ shɛɔ lɛ no mli lɛ etsɔ maŋ ni yeɔ ohia, ni etsutsu shihilɛ fɛfɛo yɛ Croesus shishi lɛ ji yinɔsane ko kɛkɛ ni eho. Nakai nɔŋŋ hu Kristofoi asafo lɛ ni yɔɔ jɛmɛ lɛ ebatsɔ nɔ ni yeɔ ohia yɛ mumɔŋ. Enɛ ji klɛŋklɛŋ be mli ni Yesu kɛ yijiemɔ ejeee eshɛɛ sane lɛ shishi. Shi moŋ ekɛɔ akɛ: “Ni Sarde asafo lɛ bɔfo lɛ, ŋmaa oyaha lɛ akɛ: Nii ni mɔ ni yɔɔ Nyɔŋmɔ mumɔi kpawo lɛ kɛ ŋulamii kpawo lɛ kɛɛ nɛ: ‘Mile onitsumɔi lɛ akɛ ohiɛ gbɛi akɛ ohiɛ ka, shi ogbo.’”—Kpojiemɔ 3:1.

 2. (a) “Mumɔi kpawo” lɛ ni Yesu hiɛ lɛ tsɔɔ mɛni kɛha Kristofoi ni yɔɔ Sarde lɛ? (b) Mɛɛ gbɛi Sarde asafo lɛ he, shi mɛni ji anɔkwa saji lɛ diɛŋtsɛ?

² Mɛni hewɔ Yesu jieɔ ehe kpo akɛ “mɔ ni yɔɔ Nyɔŋmɔ mumɔi kpawo lɛ”? Ejaakɛ nɛkɛ mumɔi nɛɛ damɔ shi kɛha Yehowa mumɔ krɔŋkrɔŋ lɛ ni miitsu nii kɛmiimɔ shi. Yɛ sɛɛ mli lɛ, Yohane tsɔɔ mli akɛ amɛji “hiŋmɛii kpawo,” ni tsɔɔ ninaa ni gbuɔ shi kɛyaa shɔŋŋ ni Nyɔŋmɔ mumɔ krɔŋkrɔŋ lɛ kɛha Yesu. (Kpojiemɔ 5:6) No hewɔ lɛ enyɛɔ enaa ni etsuɔ shihilɛ ni yɔɔ lɛ he nii. (Mateo 10:26; 1 Korintobii 4:5) Asafo ni yɔɔ Sarde lɛ yɛ gbɛi ko akɛ ehiɛ ka, eyɛ ekãa. Shi Yesu baanyɛ ana akɛ egbo yɛ mumɔŋ. Eka shi faŋŋ akɛ emlibii lɛ ateŋ mɛi pii efee mɛi ni nɔ ko jeee amɛhe sane ko dɔŋŋ, tamɔ shihilɛ mli ni amɛyɔɔ dani amɛbatsɔmɔ Kristofoi lɛ.—Okɛto Efesobii 2:1-3; Hebribii 5:11-14 he.

 3. (a) Mɛni hewɔ esa akɛ “Sarde asafo lɛ bɔfo” lɛ ayoo anɔkwale ni eji akɛ Yesu yɛ “ŋulamii kpawo” lɛ diɛŋtsɛ lɛ? (b) Mɛɛ ŋaawoo ni mli wa Yesu kɛha asafo ni yɔɔ Sarde lɛ?

³ Yesu kai “Sarde asafo lɛ bɔfo lɛ” hu akɛ Lɛ ji mɔ ni yɔɔ “ŋulamii kpawo” lɛ. Ehiɛ nakai asafoŋ onukpai lɛ yɛ eninejurɔ dɛŋ, ni eyɛ hegbɛ ni ekɛkudɔɔ amɛ yɛ amɛ tookwɛmɔ nitsumɔ lɛ mli. Esa akɛ amɛto amɛtsuii ni ‘amɛle bɔ ni amɛ tookuu lɛ yɔɔ lɛ diɛŋtsɛ.’ (Abɛi 27:23) No hewɔ lɛ, esa akɛ amɛbo Yesu wiemɔi ni nyiɛ sɛɛ nɛɛ toi jogbaŋŋ: “Ohiɛ atsɛ ni owaje nii ni eshwɛ ni heɔ agboi lɛ. Ejaakɛ minako onitsumɔi lɛ eko akɛ eye emuu yɛ mi-Nyɔŋmɔ lɛ hiɛ. No hewɔ lɛ kaimɔ bɔ ni ona ni onu lɛ, ni okɛto, ni otsake otsui. Shi agbɛnɛ kɛ ohiɛ etsɛɛɛ lɛ, maba onɔ taakɛ julɔ, ni oleŋ nɔ ŋmɛlɛtswaa nɔ ni maba onɔ kwraa.”—Kpojiemɔ 3:2, 3.

 4. Yɛ mɛɛ gbɛ nɔ Petro wiemɔi akɛ “owaje nii ni eshwɛ lɛ” baanyɛ aye abua asafo ni yɔɔ Sarde lɛ?

⁴ Esa akɛ Sarde onukpai lɛ akai miishɛɛ ni amɛna yɛ klɛŋklɛŋ be mli yɛ be mli ni amɛkase anɔkwale lɛ kɛ jɔɔmɔi ni amɛnine shɛ nɔ lɛ. Shi agbɛnɛ amɛgboi yɛ mumɔŋ nitsumɔ mli. Amɛ asafoŋ kane lɛ etsooo jogbaŋŋ yɛ hemɔkɛyeli nitsumɔi ni bɛ mli lɛ hewɔ. Afii babaoo dani enɛ aaaba lɛ, bɔfo Petro ŋma wolo eyaha asafoi ni yɔɔ Asia (ni ekolɛ Sarde fata he) lɛ koni ekɛtswa hiɛsɔɔ ni amɛyɔɔ kɛha anunyam sanekpakpa lɛ ni Kristofoi ekpɛlɛ nɔ ni ajaje “kɛ mumɔ krɔŋkrɔŋ ni atsu kɛjɛ ŋwɛi”—ni mumɔi kpawo ni yɔɔ Yohane ninaa lɛ mli lɛ damɔ shi kɛha amɛ lɛ ewo amɛmli. Petro kai nakai Asia Kristofoi lɛ hu akɛ ‘amɛji weku ni ahala, maŋtsɛmɛi ni yeɔ osɔfoi, maŋ krɔŋkrɔŋ, gbɔmɛi ni eŋɔfee lɛ diɛŋtsɛ enɔ, koni amɛjaje mɔ ni tsɛ amɛ kɛjɛ duŋ lɛ mli kɛba enaakpɛɛ la lɛ he lɛ agbojee lɛ amɛtsɔɔ.’ (1 Petro 1:12, 25; 2:9) Kɛ Sarde asafo lɛ jwɛŋ mumɔŋ anɔkwalei ni tamɔ nɛkɛ nɔ lɛ, ebaaye ebua amɛ ni amɛtsake ni “amɛwaje nii ni eshwɛ lɛ.”—Okɛto 2 Petro 3:9 he.

 5. (a) Mɛni ba hiɛsɔɔ ni Kristofoi ni yɔɔ Sarde lɛ yɔɔ lɛ nɔ? (b) Mɛni baaba kɛji akɛ Sarde Kristofoi lɛ booo Yesu ŋaawoo lɛ toi?

⁵ Amrɔ nɛɛ, amɛ hiɛsɔɔ kɛ suɔmɔ ni amɛyɔɔ kɛha anɔkwale lɛ tamɔ la ni egbo eta momo po. Emlibii fioo ko pɛ tsoɔ lolo. Yesu miiwo amɛ hewalɛ ni amɛhuu la lɛ mli, ni amɛta la lɛ mli, ni amɛtsake kɛjɛ amɛhe eshai ni amɛhiɛ ni amɛkuɔ amɛshwieɔ nii anɔ lɛ kɛ amɛ bote mli lɛ he, ni amɛtsɔ asafo ni amɛhiɛ etsɛ yɛ mumɔŋ shikome ekoŋŋ. (Okɛto 2 Timoteo 1:6, 7 he.) Kɛ jeee nakai lɛ, kɛ Yesu ba trukaa—“taakɛ julɔ”—koni ebatsu fɔbuu kojomɔ he nii lɛ, ebaati asafo ni yɔɔ Sarde lɛ shi trukaa ni amɛsako amɛhe.—Mateo 24:43, 44.

Eeba “Taakɛ Julɔ”

 6. Yɛ mɛɛ gbɛ nɔ Yesu ba “taakɛ julɔ” yɛ 1918, ni mɛni ji shihilɛ ni ebanina yɛ mɛi ni kɛɔ akɛ amɛji esɛɛnyiɛlɔi lɛ ateŋ?

⁶ Yesu kɔkɔbɔɔ akɛ ebaaba “taakɛ julɔ” lɛ baa aahu kɛbashiɔ ŋmɛnɛŋmɛnɛ beaŋ. Ekɔɔ Kristofoi ni je mli kɛyabote Nuŋtsɔ lɛ gbi lɛ mli lɛ he yɛ gbɛ krɛdɛɛ nɔ. Afi 1914 sɛɛ etsɛɛɛ ni Maleaki gbalɛ lɛ ba mli: “Nuŋtsɔ lɛ ni nyɛtaoɔ lɛ aaaba esɔlemɔ we lɛ trukaa; ni kpaŋmɔ bɔfo lɛ ni nyɛnaa ehe tsui lɛ, naa, eeba! Yehowa Zebaot kɛɛ.” (Maleaki 3:1; Kpojiemɔ 1:10) Akɛ “kpaŋmɔ bɔfo” lɛ, Yesu ba koni ebasara ni ekojo mɛi ni kɛɔ akɛ amɛji esɛɛnyiɛlɔi lɛ. (1 Petro 4:17) Yɛ nakai be lɛ mli, yɛ 1918 lɛ, no mli lɛ Kristendom kɛ ehe ewo Jeŋ Ta I mli kɛmiishwie la shi, ni egbo kwraa, kɛ aaawie he yɛ mumɔŋ. Anɔkwa Kristofoi po, ni dani ta lɛ aaaba lɛ, amɛkɛ ekaa shiɛ lɛ tsɔ mumɔŋ wɔdɔiwɔɔ be mli. Awo emli onukpai ni ale amɛ lɛ ateŋ mɛi komɛi atsuŋ, ni shiɛmɔ nitsumɔ lɛ fee tamɔ nɔ ni eba naagbee kwraa. Beni Yehowa mumɔ lɛ tsiɛ nɛkɛ Kristofoi nɛɛ ahiɛ yɛ afi ni nyiɛ sɛɛ lɛ mli lɛ, jeee amɛ fɛɛ amɛfee klalo. Amɛteŋ mɛi komɛi, taakɛ obalayei kwashiai ni yɔɔ Yesu abɛbua lɛ mli lɛ ji lɛ, esako amɛhe yɛ mumɔŋ kɛhako hegbɛ akɛ amɛaasɔmɔ Yehowa. Shi yɛ miishɛɛ mli lɛ, mɛi pii yɛ, ni tamɔ obalayei nilelɔi lɛ, ni bo Yesu kɔkɔbɔɔ akɛ: “No hewɔ lɛ nyɛsaraa, ejaakɛ nyɛleee nɔ gbi loo nɔ ŋmɛlɛtswaa nɔ” lɛ toi.—Mateo 25:1-13.

 7. Mɛni hewɔ ehe hiaa ni Kristofoi ni yɔɔ ŋmɛnɛ lɛ asara loo amɛhiɛ atsɛ lɛ?

⁷ Bɔ ni ehe hiaa akɛ Kristofonyo hiɛ aaahi ehe nɔ lɛ baaa naagbee yɛ Nuŋtsɔ lɛ gbi lɛ shishijee mli. Yɛ egbalɛ kpeteŋkpele ni kɔɔ “be mli ni nii nɛɛ fɛɛ kwa aaaba mli lɛ he okadi” lɛ mli lɛ, Yesu kɛ kɔkɔbɔɔ ko ni mli wa ha akɛ: “Shi no gbi lɛ kɛ no ŋmɛlɛtswaa lɛ mɔ ko mɔ ko leee . . . Nyɛkwɛa jogbaŋŋ, nyɛshia kpe ni nyɛsɔlea ejaakɛ nyɛleee beyinɔ ni be lɛ shɛɔ. Shi nɔ ni mikɛɔ nyɛ nɛɛ, mɛi fɛɛ mikɛɔ: Nyɛsaraa!” (Marko 13:4, 32, 33, 37) Hɛɛ, kɛbashi nɛkɛ ŋmɛlɛtswaa nɛɛ mli po lɛ, esa akɛ wɔteŋ mɔ fɛɛ mɔ, kɛ wɔji mɛi ni afɔ amɛ mu lɛ eko loo wɔji asafo babaoo lɛ mli bii hu lɛ, ehe miihia ni wɔhiɛ ahi wɔhe nɔ ni wɔwuu wɔshi kplaŋmɔ ni wɔɔkplaŋ kɛaaya mumɔŋ wɔɔ mli. Kɛ Yehowa gbi lɛ ba “tamɔ julɔ baa nyɔɔŋ” lɛ, eba akɛ eeebanina wɔ ni wɔmiishi kpe bɔni afee ni wɔnine ashɛ kojomɔ kpakpa nɔ.—1 Tesalonikabii 5:2, 3; Luka 21:34-36; Kpojiemɔ 7:9.

 8. Mɛɛ gbɛ nɔ Yohane kuu ni yɔɔ ŋmɛnɛ lɛ ekanya Nyɔŋmɔ webii lɛ koni amɛhiɛ aka yɛ mumɔŋ?

⁸ Yohane kuu lɛ ni yɔɔ ŋmɛnɛ lɛ diɛŋtsɛ hiɛ ka bɔ ni ehe hiaa akɛ amɛaakanya Nyɔŋmɔ webii lɛ ni amɛhiɛ aka yɛ mumɔŋ lɛ he. Yɛ enɛ hewɔ lɛ atoɔ henaabuamɔi krɛdɛɛi ahe gbɛjianɔ yɛ shikpɔŋ muu lɛ fɛɛ nɔ shii abɔ daa afi. Yɛ nyɛsɛɛ nɛɛ afi ko mli lɛ, mɛi ni ba kpokpaa wuji anɔ kpeei 2,981 ni afee lɛ shishi lɛ ayifalɛ yashɛ 10,953,774, ni abaptisi heyelilɔi heei 122,701. Yohane kuu lɛ etee nɔ amɛkɛ Buu-Mɔɔ wolo tɛtrɛɛ lɛ etsu nii ni amɛkɛtswa Yehowa gbɛi kɛ eyiŋtoo he adafi. Bɔni afee ni amɛkɛkpee yiwaa ni naa wa ni ba amɛnɔ yɛ jeŋ tai enyɔ lɛ mli lɛ naa lɛ, Buu-Mɔɔ lɛ kanya Yehowa Odasefoi kɛbote ekaa hee mli kɛtsɔ saji tamɔ ‘Ajɔɔ Mɛi ni Sheee Gbeyei Lɛ’ (1919), ‘Tsɛmɔ Kɛha Nifeemɔ’ (1925), kɛ ‘Yiwaa nɔ Kunimyeli’ (1942) ni aŋmala lɛ nɔ.

 9. (a) Mɛni esa akɛ Kristofoi fɛɛ abi amɛ diɛŋtsɛ amɛhe? (b) Mɛɛ hewalɛwoo Buu-Mɔɔ lɛ kɛha?

⁹ Taakɛ eji yɛ Sarde asafo lɛ mli lɛ, nakai nɔŋŋ hu he-kaa-kɛ-kwɛmɔ ni aaaya nɔ afee he miihia Kristofoi fɛɛ yɛ asafoi lɛ amli ŋmɛnɛ. Esa akɛ wɔ fɛɛ wɔya nɔ wɔbi wɔhe akɛ: Ani “wɔnitsumɔi lɛ eye emuu” yɛ wɔ-Nyɔŋmɔ lɛ hiɛ? Yɛ be mli ni wɔkojooo mɛi krokomɛi lɛ, ani wɔ diɛŋtsɛ lɛ wɔtaoɔ he-kɛ-afɔleshaa mumɔ lɛ ni wɔbɔɔ mɔdɛŋ ni wɔjɛ wɔsusuma muu fɛɛ mli wɔsɔmɔ Nyɔŋmɔ? Yɛ enɛ gbɛfaŋ lɛ, Buu-Mɔɔ wolo tɛtrɛɛ lɛ kɛ hewalɛwoo eha kɛtsɔ wiemɔi tamɔ “Nyɛyaa Nɔ Nyɛtsɔa Bɔ Ni Nyɛ Diɛŋtsɛ Nyɛji” kɛ “Wɔhiii Shi Wɔhaaa Wɔ Diɛŋtsɛ Wɔhe Dɔŋŋ” ni akase lɛ nɔ.a Akɛni wɔyɔɔ Ŋmalɛ naa yelikɛbuamɔ nɛɛ hewɔ lɛ, nyɛhaa wɔpɛia wɔmli gbɛ gbɔmɔ lɛ mli yɛ be mli ni wɔbɔɔ mɔdɛŋ ni wɔkɛ heshibaa anyiɛ kɛ agbɛnɛ yɛ sɔlemɔ mli yɛ emuuyeli mli yɛ Yehowa hiɛ lɛ.—Lala 26:1-3; 139:23, 24.

“Gbɛii Fioo Ko”

10. Mɛni ni woɔ mɔ hewalɛ Yesu yɔse yɛ asafo ni yɔɔ Sarde lɛ mli, ni te esa akɛ enɛ asa wɔhe aha tɛŋŋ?

¹⁰ Yesu wiemɔi ni nyiɛ sɛɛ ni ekɛmaje Sarde asafo lɛ woɔ mɔ hewalɛ waa. Ekɛɔ akɛ: “Shi kɛlɛ, oyɛ gbɛii fioo ko yɛ Sarde, mɛi ni woko amɛtadei lɛ amuji: ni amɛkɛ mi baanyiɛ yɛ atadei yɛji amli, ejaakɛ amɛsa nakai. Kunimyelɔ lɛ, aaawo lɛ atadei yɛji, ni migbeŋ egbɛi yɛ wala wolo lɛ mli gbi ko gbi ko, ni matsi egbɛi ata yɛ mi-Tsɛ hiɛ kɛ ebɔfoi lɛ ahiɛ.” (Kpojiemɔ 3:4, 5) Ani nɛkɛ wiemɔi nɛɛ kanyaaa wɔ ni ewooo wɔfaishitswaa hewalɛ koni wɔye anɔkwale? Yɛ onukpai akuu lɛ fɛɛ ni baaku amɛhiɛ amɛshwie nɔ ko nɔ hewɔ lɛ, ebaaha asafo muu lɛ fɛɛ abote mumɔŋ wɔɔ ni tsii mli. Ni kɛlɛ, aŋkroaŋkroi komɛi ni yɔɔ mli lɛ baabɔ mɔdɛŋ ni amɛkɛ ekaa ahiɛ nɔ ni haa ayɔseɔ amɛ akɛ Kristofoi ni yɔɔ krɔŋŋ ni muji ko bɛ amɛhe koni amɛya nɔ amɛna gbɛi kpakpa yɛ Yehowa hiɛ lɛ mli.—Abɛi 22:1.

11, 12. (a) Yɛ mɛɛ gbɛ nɔ mɛi komɛi batsɔmɔ “gbɛii fioo” ni ji anɔkwafoi yɛ Sarde, yɛ hemɔkɛyeli kwamɔ kpeteŋkpele be lɛ mli po? (b) Mɛɛ miishɛɛ sane ba kɛha Kristofoi ni tamɔ ŋmaa kpakpa lɛ yɛ Nuŋtsɔ lɛ gbi lɛ mli?

¹¹ Hɛɛ, nakai “atadei yɛji” lɛ kɔɔ gbɔmɔ lɛ jalɛ shidaamɔ akɛ Kristofonyo lɛ he. (Okɛto Kpojiemɔ 16:15; 19:8 he.) Eeeha Yesu tsui anya akɛ eeena akɛ, yɛ bɔ ni mɛi ni fa lɛ efee shikpilikpii lɛ fɛɛ sɛɛ lɛ, “gbɛii fioo ko,” Kristofoi ni afɔ amɛ mu ni yɔɔ Sarde lɛ ateŋ mɛi fioo ko kɛ̃ bɔɔ mɔdɛŋ ni ayoo amɛ nakai. Nakai nɔŋŋ hu beni aŋɔ mɛi ni kɛɔ akɛ amɛji Kristofoi lɛ awo Babilon Kpeteŋkpele ni ji jeŋ apasa jamɔ maŋtsɛyeli lɛ mli, yɛ afii ohai babaoo ni hemɔkɛyeli kwamɔ kpeteŋkpele lɛ he lɛ mli lɛ, aŋkroaŋkroi fioo ko kɛ̃ hi shi yɛ be fɛɛ mli ni bɔ mɔdɛŋ akɛ amɛaafee Yehowa suɔmɔnaa nii yɛ gbɛtsii nii lɛ fɛɛ sɛɛ. Mɛnɛɛmɛi ja tamɔ ŋmaa ni etee ehe yɛ kui ni ji jamɔ mligbalamɔi jwɛi amli.—Kpojiemɔ 17:3-6; Mateo 13:24-29.

¹² Yesu wo shi akɛ ekɛ nɛkɛ Kristofoi ni tamɔ ŋmaa nɛɛ baahi shi “daa kɛyashi jeŋ naagbee lɛ.” Ele mɛi ni amɛji kɛ nɔ gbɛi kpakpa ni amɛfee amɛha amɛhe. (Mateo 28:20; Jajelɔ 7:1) Bo lɛ susumɔ miishɛɛ ni anɔkwafoi “fioo” ni yɔɔ wala mli lolo yɛ be mli ni Nuŋtsɔ lɛ gbi lɛ je shishi lɛ baana lɛ he! Yɛ naagbee lɛ ajie amɛ kwraa kɛjɛ Kristendom ni egbo yɛ mumɔŋ lɛ he, ni abua amɛnaa awo jalɔi asafo ni tamɔ Smirna asafo lɛ mli.—Mateo 13:40-43.

13. Mɛɛ jɔɔmɔi yɔɔ kɛha Kristofoi ni afɔ amɛ mu “ni woko amɛtadei lɛ amuji” lɛ?

¹³ Mɛi ni yɔɔ Sarde ni yeɔ anɔkwale kɛyashiɔ naagbee ni amɛwooo amɛ Kristofoi asu kɛ baŋ lɛ mli muji lɛ anine shɛɔ hiɛnɔkamɔ ni yɔɔ naakpɛɛ lɛ nɔ. Yɛ be mli ni ato Yesu Mesia Maŋtsɛyeli lɛ ama shi yɛ 1914 sɛɛ lɛ, atee amɛ shi kɛtee mumɔŋ wala mli akɛ kunimyelɔi ni akɛ atadei yɛji wo amɛ ni akɛfee amɛjalɛ ni muji loo tɔmɔ ko bɛ mli lɛ he okadi. Akɛni amɛnyiɛ gbɛ fintɔŋŋ ni kɛ mɔ yaa wala mli lɛ nɔ hewɔ lɛ, amɛbaana naanɔ wala mli ŋɔɔmɔ akɛ nyɔmɔwoo.—Mateo 7:14; kwɛmɔ Kpojiemɔ 6:9-11 hu.

Yɛ Wala Wolo lɛ Mli Kɛmiiya Naanɔ!

14. Mɛni ji “wala wolo lɛ,” ni namɛi agbɛii aŋmala yɛ mli?

¹⁴ Mɛni ji “wala wolo lɛ,” ni namɛi agbɛii abaaha ahi mli? Wala wolo lɛ, aloo wolokpo lɛ damɔ shi kɛha Yehowa tsuji ni akɛ naanɔ wala baaduro amɛ lɛ ahe saji ni aŋmala ashwie shi. (Maleaki 3:16) Aje gbɛ atsi Kristofoi ni afɔ amɛ mu lɛ agbɛii ata yɛ enɛ mli yɛ Kpojiemɔ. Shi aŋmala mɛi ni baana naanɔ wala yɛ shikpɔŋ nɔ lɛ hu agbɛii yɛ mli. Ni agbɛnɛ hu, abaanyɛ ‘atsumɔ’ gbɛii kɛjɛ nakai wolo lɛ mli. (2 Mose 32:32, 33) Ni kɛlɛ, mɛi ni ji Yohane kuu lɛ mlibii ni amɛgbɛii hiɔ wala wolo lɛ mli aahu kɛyashiɔ amɛgbele be mli lɛ anine shɛɔ wala ni gbele bɛ mli nɔ yɛ ŋwɛi. (Kpojiemɔ 2:10) Enɛ ji gbɛii ni Yesu jeɔ gbɛ etsiɔ ta yɛ e-Tsɛ kɛ E-ŋwɛi bɔfoi lɛ ahiɛ lɛ. Kwɛ bɔ ni nakai nyɔmɔwoo lɛ ji nɔ wulu ha!

15. Te asafo babaoo lɛ mli bii lɛ aaafee tɛŋŋ ni amɛha aŋmala amɛgbɛii yɛ wala wolo lɛ mli ni atsumɔŋ dɔŋŋ?

¹⁵ Asafo babaoo lɛ ni amɛ hu aŋmaa amɛgbɛii yɛ wala wolo lɛ mli lɛ baaje amanehulu kpeteŋkpele lɛ mli hiɛkalɔi. Kɛ amɛtee nɔ amɛhiɛ amɛhemɔkɛyeli mli kɛtsɔ Yesu Afii Akpe Nɔyeli lɛ mli fɛɛ kɛ agbɛnɛ yɛ naagbee kaa ni nyiɛɔ sɛɛ baa lɛ mli lɛ, akɛ naanɔ wala yɛ Paradeiso shikpɔŋ nɔ baaha amɛ akɛ nyɔmɔwoo. (Daniel 12:1; Kpojiemɔ 7:9, 14; 20:15; 21:4) Agbɛnɛ amɛgbɛii baahi wala wolo lɛ mli akɛ nɔ ni anyɛŋ atsumɔ. Akɛni ole nɔ ni akɛhaa yɛ biɛ kɛtsɔɔ mumɔ krɔŋkrɔŋ lɛ nɔ lɛ hewɔ lɛ, ani okɛ miishɛɛ hereee Yesu kɔkɔbɔɔ ni eti mli shii abɔ nɛɛ nɔ: “Mɔ ni yɔɔ toi lɛ, ha ni enu nɔ ni mumɔ lɛ kɛɔ asafoi lɛ”?—Kpojiemɔ 3:6.

[Shishigbɛ niŋmaa]

[Mfoniri ni yɔɔ baafa 57]

Eba akɛ ogbɛi aaaya nɔ ahi wala wolo lɛ mli

Yitso 12

“Hiɛmɔ Nɔ ni Oyɔɔ lɛ Mli ni Awa”

FILADELFIA

 1. Aŋma Yesu shɛɛ sane ni ji ekpaa lɛ aha mɛɛ maŋ mli asafo, ni mɛni nakai maŋ lɛ gbɛi tsɔɔ?

NYƐMIMƐI AHEDƆƆ—mɛɛ su ni asumɔɔ ji enɛ! Ŋwanejee ko bɛ he akɛ enɛ yɛ Yesu jwɛŋmɔ mli yɛ be mli ni ekɛ shɛɛ sane ni ji ekpaa lɛ ha, ni akɛha Filadelfia asafo lɛ, ejaakɛ nakai gbɛi lɛ shishi ji “Nyɛmimɛi Ahedɔɔ.” Yohane ni egbɔ lɛ kaiɔ nakai be lɛ, nɔ ni fe afii 60, beni Petro ma nɔ mi shii etɛ eha Yesu akɛ, lɛ Petro lɛ, dɔɔ e-Nuŋtsɔ lɛ he waa lɛ. (Yohane 21:15-17) Ani Kristofoi ni yɔɔ Filadelfia lɛ hu miijie nyɛmimɛi ahedɔɔ kpo? Eka shi faŋŋ akɛ amɛmiifee nakai!

 2. Mɛɛ maŋ nɛkɛ Filadelfia ji, ni mɛɛ asafo yɔɔ jɛmɛ, ni mɛni Yesu kɛɔ asafo nɛɛ mli bɔfo lɛ?

² Nɔ ni yɔɔ Sarde wuoyi-bokagbɛ aaafee shitoi 30 (yɛ he ni ŋmɛnɛŋmɛnɛ beaŋ Turkey maŋ ni ji Alasehir yɔɔ lɛ) ji Filadelfia ni yɔɔ Yohane gbii lɛ amli ni eji maŋ ni shweremɔ yaa nɔ yɛ jɛmɛ bɔ ni sa. Shi nɔ ni sa kadimɔ waa yɛ jɛmɛ ji shweremɔ ni yaa nɔ yɛ Kristofoi asafo ni yɔɔ jɛmɛ lɛ mli lɛ. Mɛɛ miishɛɛ po amɛkɛbaakpee sɔɔlɔ ni ba ebasara amɛ ni eka shi faŋŋ akɛ eba kɛjɛ Sarde lɛ! Ŋaawoo ni kanyaa mɔ yɛ shɛɛ sane ni ekɛbaha amɛ lɛ mli. Shi klɛŋklɛŋ lɛ ewieɔ Mɔ Ni Tsu Lɛ ni ehe gbɛi lɛ hegbɛ lɛ he. Ekɛɔ akɛ: “Ni Filadelfia asafo lɛ bɔfo lɛ, ŋmaa oyaha lɛ akɛ: Nii ni mɔ krɔŋkrɔŋ lɛ, anɔkwafo lɛ, mɔ ni hiɛ David samfele lɛ, mɔ ni gbeleɔ ni mɔ ko ŋaaa, ni eŋaa hu ni mɔ ko gbeleee lɛ kɛɛ nɛ.”—Kpojiemɔ 3:7.

 3. Mɛni hewɔ ni esa jogbaŋŋ akɛ aaatsɛ Yesu akɛ “krɔŋkrɔŋ” lɛ, ni mɛɛ gbɛ nɔ abaanyɛ akɛɛ yɛ akɛ eji “anɔkwafo”?

³ Yohane enu ni Petro miikɛɛ nakai nuu ni ji Yesu Kristo lɛ akɛ: “Bo oyɔɔ naanɔ wala wiemɔi lɛ; ni wɔ lɛ wɔhe wɔye ni asaŋ wɔna wɔle akɛ bo ji Kristo, Nyɔŋmɔ hiɛkalɔ lɛ bi lɛ.” (Yohane 6:68, 69) Akɛni Yehowa Nyɔŋmɔ ji krɔŋkrɔŋfeemɔ naamuu hewɔ lɛ, esa akɛ e-Bi koome lɛ hu afee “krɔŋkrɔŋ.” (Kpojiemɔ 4:8) Yesu ji “anɔkwafo” hu. Hela wiemɔ ni akɛtsu nii yɛ biɛ lɛ (a·le·thi·nosʹ) tsɔɔ krɔŋŋfeemɔ. Yɛ shishinumɔ nɛɛ naa hewɔ lɛ, Yesu ji anɔkwa la kɛ anɔkwa aboloo ni jɛ ŋwɛi ba lɛ. (Yohane 1:9; 6:32) Lɛ ji anɔkwa weintso lɛ. (Yohane 15:1) Yesu ji anɔkwafo hu kɛ shishinumɔ akɛ anyɛɔ akɛ he fɔɔ enɔ. Ewieɔ anɔkwale daa. (Kwɛmɔ Yohane 8:14, 17, 26.) Yɛ anɔkwale mli lɛ nɛkɛ Nyɔŋmɔ Bi nɛɛ sa akɛ esɔmɔɔ akɛ Maŋtsɛ kɛ Kojolɔ.—Kpojiemɔ 19:11, 16.

“David Samfele Lɛ”

4, 5. “David samfele” lɛ kɔɔ mɛɛ kpaŋmɔ he?

⁴ Yesu hiɛ “David samfele lɛ.” Kɛ ekɛmiitsu nii lɛ, “egbeleɔ ni mɔ ko ŋaaa, ni eŋaa hu ni mɔ ko gbeleee.” Mɛni ji nɛkɛ “David samfele” nɛɛ?

⁵ Maŋtsɛ David ni jɛ Israel lɛ ji mɔ ni Yehowa kɛ lɛ fee kpaŋmɔ kɛha naanɔ maŋtsɛyeli. (Lala 89:2-5, 35-38) David shia lɛ ye lumɔ kɛjɛ Yehowa maŋtsɛsɛi lɛ nɔ yɛ Yerusalem kɛjɛ afi 1070 kɛyashi 607 D.Ŋ.B., kɛkɛ ni atsu Nyɔŋmɔ fɔbuu kojomɔ he nii ashi nakai maŋtsɛyeli lɛ ejaakɛ eyadi nɔ fɔŋ feemɔ sɛɛ. No hewɔ lɛ Yehowa je shishi akɛ eeeha egbalɛ ni yɔɔ Ezekiel 21:32 aba mli: “Butumɔ, butumɔ, butumɔ mabutu [shikpɔŋ nɔ Yerusalem] lɛ; ni enɛ hu [maŋtsɛtso ni yɔɔ David wekukpaa lɛ mli lɛ] ehiŋ shi kɛyashi beyinɔ ni mɔ gbɛnaa ni ji lɛ aaaba, ni maŋɔ ha lɛ!”

6, 7. Mɛɛ be ni yɛ mɛɛ gbɛ nɔ “mɔ gbɛnaa ni ji” lɛ baapue?

⁶ Mɛɛ be ni yɛ mɛɛ gbɛ nɔ “mɔ gbɛnaa ni ji” nɛɛ baapue? Te aaafee tɛŋŋ ni akɛ David maŋtsɛyeli lɛ mli maŋtsɛtso lɛ aaaha lɛ lɛ?

⁷ Sɛɛ mli aaafee afii 600 lɛ, Maŋtsɛ David seshinyo ko, Yudayoo obalayoo folo Maria baŋɔ hɔ ko ni jɛ mumɔ krɔŋkrɔŋ lɛ. Nyɔŋmɔ tsu bɔfo Gabriel koni eyakɛɛ Maria akɛ ebaafɔ binuu, ni abaatsɛ lɛ Yesu. Gabriel kɛfata he akɛ: “Eeetsɔ agbo, ni aaatsɛ lɛ Ŋwɛinyo lɛ Bi, ni Nuŋtsɔ [Yehowa] Nyɔŋmɔ aaaŋɔ etsɛ David maŋtsɛsɛi lɛ aha lɛ. Ni eeeye Yakob we lɛ nɔ maŋtsɛ kɛaatee naanɔ, ni emaŋtsɛyeli lɛ sɛɛ efoŋ.”—Luka 1:31-33.

 8. Yesu jie ehe kpo akɛ eji mɔ ni sa akɛ enine shɛɔ David maŋtsɛyeli lɛ nɔ yɛ mɛɛ gbɛ nɔ?

⁸ Beni abaptisi Yesu yɛ afi 29 Ŋ.B. yɛ Yordan Faa lɛ mli ni akɛ mumɔ krɔŋkrɔŋ fɔ lɛ mu lɛ, kɛkɛ ni ebatsɔ Maŋtsɛ Ni Ahala Lɛ yɛ David wekukpaa lɛ mli. Ejie ekãa ni ekaaa kpo yɛ Maŋtsɛyeli lɛ he sanekpakpa lɛ shiɛmɔ mli ni ekɛ nitsumɔ wo ekaselɔi lɛ adɛŋ akɛ amɛshiɛ nakai nɔŋŋ. (Mateo 4:23; 10:7, 11) Yesu ba ehe shi, kɛtee sɛŋmɔtso nɔ gbele mli po, ni ekɛjie ehe kpo akɛ esa kwraa akɛ enine shɛɔ David maŋtsɛyeli lɛ nɔ. Yehowa tee Yesu shi akɛ mumɔŋ gbɔmɔ ni gbooo dɔŋŋ, ni ewo enɔ gojoo kɛtee lɛ diɛŋtsɛ E-ninejurɔ nɔ yɛ ŋwɛi. Jɛmɛ ji he ni akɛ hegbɛ ni David maŋtsɛyeli lɛ yɔɔ lɛ fɛɛ wo edɛŋ yɛ. Yɛ be ni sa mli lɛ Yesu kɛ nɛkɛ hegbɛ nɛɛ baatsu nii akɛ: “Ye lumɔ yɛ ohenyɛlɔi lɛ ateŋ!”—Lala 110:1, 2; Filipibii 2:8, 9; Hebribii 10:13, 14.

 9. Te feɔ tɛŋŋ ni Yesu kɛ David samfele lɛ tsuɔ nii ni ekɛgbeleɔ ni ekɛŋaa hu lɛ?

⁹ Dani enɛ aaaba lɛ Yesu kɛ David samfele lɛ baatsu nii koni ekɛgbele hegbɛi ni kɔɔ Nyɔŋmɔ Maŋtsɛyeli lɛ he lɛ eha. Yehowa baatsɔ Yesu nɔ agbɛnɛ ni ejie Kristofoi ni afɔ amɛ mu ni yɔɔ shikpɔŋ nɔ lɛ “kɛjɛ duŋ hewalɛ lɛ mli,” ni ekɛ amɛ aya “esuɔmɔ Bi lɛ maŋtsɛyeli lɛ mli.” (Kolosebii 1:13, 14) Akɛ samfele lɛ hu baatsu nii koni akɛtsi hegbɛi ni tamɔ nɛkɛ ni mɛi ni yeee lɛ anɔkwale lɛ aaana lɛ naa. (2 Timoteo 2:12, 13) Akɛni Yehowa fiɔ nɛkɛ David maŋtsɛyeli lɛ naanɔ gboshiniyelɔ nɛɛ sɛɛ hewɔ lɛ, bɔɔ nɔ ko bɛ ni baatsi lɛ gbɛ yɛ enitsumɔi nɛɛ ahe nitsumɔ mli.—Okɛto Mateo 28:18-20 he.

10. Mɛɛ ekaawoo Yesu kɛha asafo ni yɔɔ Filadelfia lɛ?

¹⁰ Akɛni Yesu wiemɔi ni akɛmaje Kristofoi ni yɔɔ Filadelfia nɛɛ jɛ jɛɛhe ko ni nɔ kwɔ grɔŋŋ hewɔ lɛ, belɛ esa akɛ efee miishɛjemɔ sane krɛdɛɛ! Ejieɔ amɛyi akɛ: “Mile onitsumɔi lɛ; naa mikɛ shinaa ni agbele ema ohiɛ, ni mɔ ko nyɛŋ aŋa; ejaakɛ hewalɛ fioo oyɔɔ, shi oye miwiemɔ lɛ nɔ, ni okwako migbɛi lɛ.” (Kpojiemɔ 3:8) Asafo lɛ kɛ ekaa etsu nii ni agbele shinaa yɛ ehiɛ—ŋwanejee ko bɛ he akɛ eji hegbɛ shinaa kɛha sɔɔmɔ nitsumɔ. (Okɛto 1 Korintobii 16:9; 2 Korintobii 2:12 he.) No hewɔ lɛ, Yesu woɔ asafo lɛ hewalɛ koni eŋɔ hegbɛ fɛɛ ni ena akɛ ekɛaashiɛ lɛ. Amɛŋmɛ amɛtsui shi ni amɛjie amɛhe kpo akɛ amɛyɛ hewalɛ ni sa, kɛ yelikɛbuamɔ ni jɛ Nyɔŋmɔ mumɔ lɛ ŋɔɔ, koni amɛya nɔ yɛ “nitsumɔi” amli lolo yɛ Yehowa sɔɔmɔ mli. (2 Korintobii 12:10; Zakaria 4:6) Amɛbo Yesu famɔ lɛ toi ni amɛkwako Kristo, kɛtsɔ wiemɔ loo nifeemɔ nɔ.

“Ni Amɛaakoto Bo”

11. Mɛɛ jɔɔmɔ Yesu kɛwo Kristofoi lɛ ashi, ni enɛ ba mli yɛ mɛɛ gbɛ nɔ?

¹¹ No hewɔ lɛ, Yesu wo yibiiwoo shi eha amɛ akɛ: “Naa, mikɛ mɛi komɛi ni jɛ Satan kpee he lɛ ni kɛɔ akɛ Yudafoi ji amɛ, shi ebɛ mli, shi malemɔ moŋ amɛmaleɔ lɛ miiha; naa, maha amɛba ni amɛbakoto onaji anaa, ni amɛle akɛ mi lɛ misumɔɔ bo.” (Kpojiemɔ 3:9) Ekolɛ, Yudafoi ni yɔɔ maŋ lɛ mli lɛ miigba asafo lɛ naa taakɛ eji yɛ Smirna lɛ. Yesu wie mɛnɛɛmɛi ahe akɛ “Satan kpeehe.” Ni kɛlɛ, kɛ hooo lɛ nakai Yudafoi lɛ ateŋ mɛi komɛi miihe ayoo akɛ nɔ ni Kristofoi lɛ shiɛɔ yɛ Yesu he lɛ ji anɔkwale lɛ. No hewɔ lɛ ‘shi ni amɛkotoɔ’ lɛ baatamɔ bɔ ni Paulo tsɔɔ mli yɛ 1 Korintobii 14:24, 25 lɛ, no hewɔ lɛ amɛtsakeɔ amɛtsui diɛŋtsɛ ni amɛbatsɔmɔɔ Kristofoi, ni amɛhiɛ basɔɔ Yesu suɔmɔ kpele ni eyɔɔ ni no ha ekɛ esusuma ha po yɛ ekaselɔi lɛ ahewɔ lɛ.—Yohane 15:12, 13.

12. Mɛni hewɔ eka shi faŋŋ akɛ Yudafoi akpee he ni yɔɔ Filadelfia lɛ mlibii lɛ anaa baakpɛ amɛhe akɛ amɛaanu akɛ ‘amɛbaakoto shi’ amɛha Kristofoi akuu ni yɔɔ nakai maŋ lɛ mli lɛ?

¹² Eka shi faŋŋ akɛ Yudafoi akpeehe ni yɔɔ Filadelfia lɛ hu mlibii lɛ anaa baakpɛ amɛhe kɛ amɛna amɛle akɛ amɛteŋ mɛi komɛi ‘eba ni amɛmiikoto’ Kristofoi asafoku ni yɔɔ jɛmɛ lɛ. Yɛ anɔkwale ni eji akɛ ŋwanejee ko bɛ he akɛ mɛi pii ni jeee Yudafoi yɛ nakai asafo lɛ mli hewɔ lɛ, amɛbaakpa gbɛ akɛ nɔ ni tamɔɔɔ enɛ lɛ moŋ baaba. Mɛni hewɔ? Ejaakɛ Yesaia gba akɛ: “Ni maŋtsɛmɛi [ni jeee Yudafoi] aaatsɔmɔ [Israelbii] lɛ kwɛlɔi, ni amɛmaŋnyɛmɛi lɛ aaatsɔmɔ ofufɔhalɔi; amɛaakoto bo ni amɛkɛ amɛhiɛ aaabumɔ shi.” (Yesaia 49:23; 45:14; 60:14) Nakai nɔŋŋ hu akɛ mumɔ tsirɛ Zakaria koni eŋma akɛ: “Nakai gbii lɛ amli lɛ, aaaba mli akɛ hii nyɔŋma [ni jeee Yudafoi] ni jɛ jeŋmaji anɔ wiemɔi sɔrɔtoi fɛɛ mli aaamɔ Yudanyo kome atade naamuu mli, amɛaakɛɛ akɛ: Wɔkɛ nyɛ aaatee; ejaakɛ wɔnu akɛ Nyɔŋmɔ kɛ nyɛ yɛ!” (Zakaria 8:23) Hɛɛ, mɛi ni jeee Yudafoi aaakula shi aha Yudafoi, shi jeee nɔ ni tamɔɔɔ nakai!

13. Namɛi ji Yudafoi ni gbalɛi ni agba aha blema Israel baaba mli yɛ amɛnɔ lɛ?

¹³ Agba nakai gbalɛi lɛ atsɔɔ Nyɔŋmɔ maŋ ni ehala amɛ lɛ. Beni akɛ gbalɛi lɛ ha lɛ, no mli lɛ heloo naa Israel yɛ nakai gbɛhe ni woo yɔɔ mli lɛ mli. Shi beni Yudafoi amaŋ lɛ kpoo Mesia lɛ, Yehowa shɛ amɛ efɔ. (Mateo 15:3-9; 21:42, 43; Luka 12:32; Yohane 1:10, 11) Yɛ Pentekoste, afi 33 Ŋ.B. lɛ, ehala anɔkwa Israel ni jɛ Nyɔŋmɔ lɛ, Kristofoi asafo lɛ, eto amɛnajiaŋ. Emlibii lɛ ji mumɔŋ Yudafoi ni amɛketiafoo lɛ jɛ tsui mli. (Bɔfoi lɛ Asaji 2:1-4, 41, 42; Romabii 2:28, 29; Galatabii 6:16) Yɛ no sɛɛ lɛ, gbɛ kome pɛ ni heloo naa Yudafoi aŋkroaŋkroi lɛ baanyɛ atsɔ nɔ ni amɛna amɛkɛ Yehowa teŋ wekukpaa ni duromɔ yɔɔ mli ji kɛtsɔ hemɔkɛyeli ni amɛaana yɛ Yesu mli akɛ Mesia lɛ nɔ. (Mateo 23:37-39) Eka shi faŋŋ akɛ, enɛ miihe aba mli yɛ aŋkroaŋkroi komɛi ni yɔɔ Filadelfia lɛ anɔ.a

14. Yɛ mɛɛ gbɛ nɔ Yesaia 49:23 kɛ Zakaria 8:23 ena mlibaa diɛŋtsɛ yɛ ŋmɛnɛŋmɛnɛ beaŋ?

¹⁴ Gbalɛi tamɔ nɔ ni yɔɔ Yesaia 49:23 kɛ Zakaria 8:23 lɛ ena amɛmlibaa yɛ gbɛ ni mli ka shi faŋŋ nɔ yɛ ŋmɛnɛŋmɛnɛ beaŋ. Yɛ Yohane kuu lɛ shiɛmɔ lɛ hewɔ lɛ, gbɔmɛi babaoo etsɔ shinaa ni agbele lɛ mli kɛbote Maŋtsɛyeli sɔɔmɔ mli.b Amɛteŋ mɛi pii ba kɛjɛ Kristendom, ni ejamɔi lɛ kɛɔ yɛ apasa gbɛ nɔ akɛ amɛji mumɔŋ Israel lɛ. (Okɛto Romabii 9:6 he.) Mɛnɛɛmɛi, akɛ asafo babaoo lɛ, fɔɔ amɛtadei lɛ ahe ni amɛhaa eyɛɔ futaa kɛtsɔɔ hemɔkɛyeli ni amɛnaa yɛ Yesu la ni ekɛsha afɔle lɛ mli lɛ nɔ. (Kpojiemɔ 7:9, 10, 14) Akɛni amɛboɔ Kristo Maŋtsɛyeli nɔyeli lɛ toi hewɔ lɛ, amɛyɛ hiɛnɔkamɔ akɛ amɛnine baashɛ emli jɔɔmɔi lɛ anɔ yɛ shikpɔŋ nɔ yɛ biɛ. Amɛbaa Yesu nyɛmimɛi ni afɔ amɛ mu lɛ aŋɔɔ ni ‘amɛkotoɔ’ amɛ, kɛ aaawie yɛ mumɔ naa, ejaakɛ ‘amɛnu akɛ Nyɔŋmɔ kɛ amɛ yɛ.’ Amɛsɔmɔɔ nɛkɛ mɛi ni afɔ amɛ mu nɛɛ, ni amɛkɛ amɛ feɔ ekome yɛ jeŋ muu fɛɛ nyɛmimɛi anaanyobɔɔ mli.—Mateo 25:34-40; 1 Petro 5:9.

“Kaa Ŋmɛlɛtswaa”

15. (a) Mɛni Yesu kɛwo Kristofoi ni yɔɔ Filadelfia lɛ shi, ni awo amɛ hewalɛ ni amɛfee mɛni? (b) Mɛɛ “akekere” Kristofoi lɛ kpaa gbɛ akɛ amɛnine baashɛ nɔ?

¹⁵ Yesu tee nɔ ekɛɛ akɛ: “Ejaakɛ oye mitsuishiŋmɛɛ wiemɔ lɛ nɔ hewɔ lɛ, mi hu matoo yɛ kaa ŋmɛlɛtswaa ni baaba jeŋ muu lɛ fɛɛ nɔ ni akɛbaaka mɛi ni yɔɔ shikpɔŋ lɛ nɔ lɛ mli. Naa, miiba oya; hiɛmɔ nɔ ni oyɔɔ lɛ mli ni awa, koni mɔ ko akashɔ okekere lɛ.” (Kpojiemɔ 3:10, 11) Eyɛ mli akɛ Kristofoi ni yɔɔ Yohane gbii lɛ amli lɛ ehiŋ shi kɛbashiŋ Nuŋtsɔ lɛ gbi lɛ (ni je shishi yɛ 1914) lɛ mli moŋ, shi amɛhekɛnɔfɔɔ akɛ Yesu miiba lɛ baaha amɛ hewalɛ ni amɛya nɔ amɛshiɛ. (Kpojiemɔ 1:10; 2 Timoteo 4:2) Naanɔ wala he “akekere” aloo nyɔmɔwoo lɛ miimɛ amɛ yɛ ŋwɛi. (Yakobo 1:12; Kpojiemɔ 11:18) Kɛ amɛye anɔkwale kɛyashi gbele mli lɛ, mɔ ko mɔ ko nyɛŋ ashɔ nakai nyɔmɔwoo lɛ kɛjɛ amɛdɛŋ.—Kpojiemɔ 2:10.

16, 17. (a) Mɛni ji “kaa ŋmɛlɛtswaa ni baaba jeŋ muu lɛ fɛɛ nɔ” lɛ? (b) Mɛɛ shihilɛ mli mɛi ni afɔ amɛ mu lɛ yɔɔ yɛ “kaa ŋmɛlɛtswaa” lɛ shishijee?

¹⁶ Shi mɛni ji “kaa ŋmɛlɛtswaa” lɛ? Ŋwanejee ko bɛ he akɛ esa akɛ nakai Kristofoi ni yɔɔ Asia lɛ adamɔ yiwaa kroko ni naa wa ni jɛ Roma nɔyeli lɛ dɛŋ lɛ naa.c Ni kɛlɛ, emlibaa wulu lɛ ji ŋmɛlɛtswaa ni akɛsɔŋ amɛnɔ ni akɛkojo amɛ ni ba yɛ Nuŋtsɔ lɛ gbi lɛ nɔ, ni ba naagbee kɛjɛ 1918 kɛyaa lɛ. Aka amɛ koni akɛkwɛ akɛ ani amɛyɛ kɛha Nyɔŋmɔ Maŋtsɛyeli ni ato ama shi lɛ aloo Satan je lɛ. Ebaa yɛ be kuku mli, kɛ akɛaato he lɛ tamɔ ‘ŋmɛlɛtswaa kome,’ shi ebako naagbee lolo. Dani eeeba naagbee lɛ, wɔhiɛ akakpa nɔ akɛ “kaa ŋmɛlɛtswaa” lɛ mli wɔyɔɔ lɛ.—Luka 21:34-36.

¹⁷ Afi 1918 mli ni Yohane kuu ni ji Kristofoi ni afɔ amɛ mu lɛ—taakɛ Filadelfia asafo lɛ ni he wa lɛ ji lɛ—kɛ shitee-kɛ-woo ni jɛ ŋmɛnɛŋmɛnɛ beaŋ “Satan kpeehe” lɛ kpe. Kristendom jamɔ mli hiɛnyiɛlɔi, ni kɛɔ akɛ amɛji mumɔŋ Yudafoi lɛ tsɔ gbɛ ni yɔɔ nigii nɔ amɛkudɔ nɔyelɔi lɛ koni amɛnyɛ anɔkwa Kristofoi anɔ. Ni kɛlɛ, amɛbɔ mɔdɛŋ waa ‘amɛhiɛ Yesu tsuishiŋmɛɛ wiemɔ lɛ mli’; no hewɔ lɛ, yɛ mumɔŋ yelikɛbuamɔ, kɛ “hewalɛ fioo” ni amɛyɔɔ hewɔ lɛ, amɛje mli ni akanya amɛ koni amɛbote shinaa ni agbele naa afɔ amɛhiɛ lɛ mli. Yɛ mɛɛ gbɛ nɔ?

“Shinaa ni Agbele”

18. Mɛɛ halamɔ Yesu fee yɛ 1919, ni mɛɛ gbɛ nɔ mɛi ni ahala amɛ lɛ batsɔmɔ tamɔ Hezekia tsulɔ anɔkwafo lɛ?

¹⁸ Afi 1919 mli ni Yesu ha eshiwoo lɛ ba mli ni ekpɛlɛ anɔkwale Kristofoi akuu fioo ni afɔ amɛ mu lɛ nɔ akɛ ‘etsulɔ anɔkwafo kɛ nilelɔ’ lɛ. (Mateo 24:45-47) Mɛnɛɛmɛi bote hegbɛ ko ni tamɔ nɔ ni Eliakim, tsulɔ anɔkwafo ni hi shi yɛ Maŋtsɛ Hezekia gbii lɛ amli lɛ na mli ŋɔɔmɔ lɛ mli.d Yehowa wie yɛ Eliakim he akɛ: “Ni maŋɔ David we lɛ samfele lɛ mafɔ ekɔŋ nɔ, ni kɛ egbele lɛ, mɔ ko bɛ ni aaaŋa, ni kɛ eŋa lɛ, mɔ ko bɛ ni aaagbele.” Eliakim tsu gbɛnaa nii ni tsii he nii eha Hezekia, David bi ni ji odehe lɛ. Nakai nɔŋŋ hu ŋmɛnɛ, akɛ “David we lɛ samfele lɛ” efɔ Yohane kuu ni afɔ amɛ mu lɛ kɔŋ nɔ, ni ji ákɛ akɛ Mesia Maŋtsɛyeli lɛ he nibii ni yɔɔ shikpɔŋ nɔ lɛ ewo amɛdɛŋ. Yehowa ewo etsuji lɛ hewalɛ kɛha nɛkɛ hegbɛ nɛɛ, ewaje amɛ hewalɛ fioo lɛ ni etsɔ hewalɛ kpele ni fa kɛha jeŋ muu fɛɛ odaseyeli nitsumɔ kpeteŋkpele.—Yesaia 22:20, 22; 40:29.

19. Mɛɛ gbɛ nɔ Yohane kuu lɛ tsu gbɛnaa nii ni Yesu kɛha amɛ yɛ 1919 lɛ he nii yɛ, ni mɛni jɛ mli ba?

¹⁹ Kɛjɛ 1919 mli kɛyaa lɛ, shwɛɛnii ni afɔ amɛ mu lɛ ni nyiɛ Yesu nɔkwɛmɔnɔ lɛ sɛɛ lɛ fa Maŋtsɛyeli lɛ he sanekpakpa lɛ shiɛmɔ he tafaa wulu ko. (Mateo 4:17; Romabii 10:18) Nɔ ni jɛ mli ba ji akɛ, ŋmɛnɛŋmɛnɛ beaŋ Satan kpee he, ni ji Kristendom mlibii lɛ ekomɛi ba shwɛɛnii ni afɔ amɛ mu lɛ aŋɔɔ ni amɛtsake amɛtsui ni ‘amɛkoto shi,’ ni amɛkpɛlɛ hegbɛ ni tsulɔ lɛ yɔɔ lɛ nɔ. Amɛ hu amɛba koni amɛbasɔmɔ Yehowa yɛ ekomefeemɔ mli kɛ Yohane kuu lɛ mli onukpai lɛ. Enɛ tee nɔ aahu kɛyashi be mli ni abua Yesu nyɛmimɛi ni afɔ amɛ mu lɛ ayibɔ lɛ fɛɛ naa agbe naa. Nɔ ni nyiɛ enɛ sɛɛ ji akɛ, “asafo babaoo ko . . . ni jɛ jeŋmaji fɛɛ mli” eba ni “amɛbakoto” tsulɔ ni afɔ lɛ mu lɛ. (Kpojiemɔ 7:3, 4, 9) Tsulɔ lɛ kɛ asafo babaoo nɛɛ fɛɛ sɔmɔɔ akɛ kuu kome ni ji Yehowa Odasefoi.

20. Mɛni hewɔ esa akɛ Yehowa Odasefoi ni yɔɔ ŋmɛnɛ lɛ afee mɛi ni yɔɔ hemɔkɛyeli ni wa kɛ mɛi ni yɔɔ ekaa yɛ Nyɔŋmɔ sɔɔmɔ mli lɛ?

²⁰ Akɛni amɛfee ekome tamɔ Kristofoi ni yɔɔ Filadelfia lɛ yɛ nyɛmimɛi ahedɔɔ kpaa diɛŋtsɛ ko mli hewɔ lɛ, Yehowa Odasefoi le akɛ esa akɛ amɛkɛ hehiamɔ atsu amɛshiɛmɔ nitsumɔ lɛ he nii ŋmɛnɛ. Etsɛŋ, ni amanehulu kpeteŋkpele lɛ kɛ Satan yiwalɛ je lɛ nifeemɔi lɛ baaba naagbee. Yɛ nakai be lɛ mli lɛ, eba akɛ aaana wɔteŋ mɔ fɛɛ mɔ akɛ eyɛ hemɔkɛyeli ni wa ni eyɛ ekaa yɛ Nyɔŋmɔ sɔɔmɔ mli hu, koni akatsumɔ wɔgbɛi kɛmiijɛ Yehowa wala wolo lɛ mli. (Kpojiemɔ 7:14) Nyɛhaa wɔkɛ hiɛdɔɔ diɛŋtsɛ asusua ŋaa ni Yesu woɔ Filadelfia asafo lɛ he koni wɔmɔ wɔsɔɔmɔ hegbɛ lɛ mli kpɛŋŋ koni wɔnine ashɛ naanɔ wala nyɔmɔwoo lɛ nɔ.

Kunimyelɔi lɛ Ajɔɔmɔi

21. Kristofoi ni afɔ amɛ mu ni yɔɔ ŋmɛnɛ lɛ ‘eye Yesu tsuishiŋmɛɛ wiemɔ lɛ nɔ’ yɛ mɛɛ gbɛ nɔ, ni mɛɛ gbɛkpamɔ mɛɔ amɛ?

²¹ Yohane kuu ni yɔɔ ŋmɛnɛ lɛ ‘eye Yesu tsuishiŋmɛɛ wiemɔ lɛ nɔ,’ ni ji akɛ, amɛnyiɛ enɔkwɛmɔnɔ lɛ sɛɛ, ni amɛŋmɛ amɛtsui shi. (Hebribii 12:2, 3; 1 Petro 2:21) No hewɔ lɛ Yesu wiemɔi krokomɛi ni ekɛha asafo ni yɔɔ Filadelfia lɛ ewo amɛ hewalɛ waa: “Kunimyelɔ lɛ, maŋɔ lɛ mafee akulashiŋ yɛ mi-Nyɔŋmɔ lɛ sɔlemɔtsu lɛ mli, ni ejeŋ kpo dɔŋŋ.”—Kpojiemɔ 3:12a.

22. (a) Mɛni ji Yesu Nyɔŋmɔ lɛ sɔlemɔtsu lɛ? (b) Yɛ mɛɛ gbɛ nɔ Kristofoi ni afɔ amɛ mu lɛ ni yeɔ kunim lɛ baatsɔmɔ akulashiŋi yɛ sɔlemɔtsu nɛɛ mli?

²² Mɛɛ hegbɛ ji enɛ akɛ mɔ ko aaafee akulashiŋ yɛ Yehowa sɔlemɔtsu lɛ mli! Yɛ blema Yerusalem lɛ, sɔlemɔtsu ni akɛ niji ma lɛ ji Yehowa jamɔ lɛ shihilɛ he. Osɔfonukpa lɛ kɛ kooloi ni akɛ amɛ esha afɔle lɛ ala yaa sɔlemɔtsu lɛ mli “Krɔŋkrɔŋ Fe Fɛɛ” lɛ, yɛ naakpɛɛ la ni damɔ shi kɛha jɛmɛ ni Yehowa yɔɔ lɛ hiɛ gbi kome daa afi. (Hebribii 9:1-7) Beni abaptisi Yesu pɛ kɛkɛ ni sɔlemɔtsu kroko ba shihilɛ mli, mumɔŋ sɔlemɔtsu gbɛjianɔtoo kpeteŋkpele ko kɛha Yehowa jamɔ. Nɛkɛ sɔlemɔtsu nɛɛ mli krɔŋkrɔŋ fe fɛɛ lɛ yɛ ŋwɛi, he ni Yesu yapue “yɛ Nyɔŋmɔ hiɛ” lɛ. (Hebribii 9:24) Yesu ji Osɔfonukpa lɛ, ni afɔleshaa kome pɛ ekɛha koni ekɛha eshai fɛɛ nɔ: nuu Yesu ni yeɔ emuu lɛ la ni efɔse eshwie shi lɛ. (Hebribii 7:26, 27; 9:25-28; 10:1-5, 12-14) Bei abɔ ni amɛyaa nɔ amɛhiɔ shi akɛ anɔkwafoi lɛ, Kristofoi ni afɔ amɛ mu ni yɔɔ shikpɔŋ nɔ lɛ sɔmɔɔ akɛ osɔfoi bibii yɛ sɔlemɔtsu nɛɛ mli shikpɔŋ nɔ kpoi lɛ anɔ. (1 Petro 2:9) Shi kɛ amɛye kunim pɛ, amɛ hu amɛboteɔ nakai ŋwɛi krɔŋkrɔŋ fe fɛɛ lɛ ni amɛbatsɔmɔɔ tamɔ akulashiŋi ni anyɛŋ afamɔ, tamɔ akulashiŋi yɛ gbɛjianɔtoo ni tamɔ sɔlemɔtsu kɛha jamɔ lɛ mli. (Hebribii 10:19; Kpojiemɔ 20:6) Akɛ “amɛjeŋ kpo dɔŋŋ” kɛjɛŋ mli lɛ, oshara ko bɛ enɛ he.

23. (a) Mɛɛ shiwoo kroko Yesu kɛha Kristofoi ni afɔ amɛ mu ni yeɔ kunim lɛ? (b) Mɛni jɛɔ Yehowa gbɛi lɛ kɛ Yerusalem hee lɛ gbɛi ni aŋmaa yɛ Kristofoi kunimyelɔi lɛ anɔ lɛ mli baa?

²³ Yesu yaa nɔ ekɛɔ akɛ: “Ni maŋma mi-Nyɔŋmɔ lɛ gbɛi kɛ mi-Nyɔŋmɔ lɛ maŋ ni ji Yerusalem hee ni jɛɔ ŋwɛi kpelekeɔ shi kɛjɛɔ mi-Nyɔŋmɔ lɛ ŋɔɔ lɛ gbɛi, kɛ mi diɛŋtsɛ migbɛi hee lɛ yɛ enɔ.” (Kpojiemɔ 3:12b) Hɛɛ, nɛkɛ kunimyelɔi nɛɛ eha aŋmala Yehowa—amɛ-Nyɔŋmɔ lɛ kɛ Yesu Nyɔŋmɔ lɛ gbɛi yɛ amɛnɔ. Enɛ tsɔɔ akɛ Yehowa kɛ Yesu ji gbɔmɛi sɔrɔtoi enyɔ shi jeee nyɔŋmɔi etɛ ni efee ekome, aloo Triniti ko fai enyɔ. (Yohane 14:28; 20:17) Esa akɛ bɔɔ nii fɛɛ ana akɛ mɛi ni afɔ amɛ mu nɛɛ ji Yehowa nii. Amɛji e-dasefoi. Aŋma Yerusalem hee lɛ gbɛi hu yɛ amɛnɔ, ŋwɛi maŋ ni kpelekeɔ shi kɛjɛɔ ŋwɛi kɛ shishinumɔ akɛ ekpãa enɔyeli ni feɔ ejurɔ lɛ mli ehaa adesai anɔkwafoi fɛɛ lɛ. (Kpojiemɔ 21:9-14) Shikpɔŋ nɔ tooi ni ji Kristofoi lɛ fɛɛ hu baale akɛ kunimyelɔi ni afɔ amɛ mu nɛɛ ji Maŋtsɛyeli lɛ, ŋwɛi Yerusalem lɛ mlibii.—Lala 87:5, 6; Mateo 25:33, 34; Filipibii 3:20; Hebribii 12:22.

24. Yesu gbɛi hee lɛ damɔ shi kɛha mɛni, ni aŋma yɛ Kristofoi anɔkwafoi ni afɔ amɛ mu lɛ anɔ yɛ mɛɛ gbɛ nɔ?

²⁴ Yɛ naagbee lɛ, aŋmaa Yesu gbɛi hee lɛ yɛ kunimyelɔi ni afɔ amɛ mu nɛɛ anɔ. Enɛ kɔɔ Yesu nitsumɔ hee kɛ hegbɛ ni ekaaa ni Yehowa kɛha lɛ lɛ he. (Filipibii 2:9-11; Kpojiemɔ 19:12) Mɔ ko mɔ ko leee nakai gbɛi lɛ, kɛ shishinumɔ akɛ mɔ ko mɔ ko bɛ ni yɔɔ nakai niiashikpamɔi lɛ aloo akɛ hegbɛi ni tamɔ nakai ewo edɛŋ. Shi, kɛ Yesu ŋma egbɛi yɛ enyɛmimɛi anɔkwafoi lɛ anɔ lɛ, amɛkɛ lɛ boteɔ wekukpaa ni bɛŋkɛ kpaakpa mli yɛ nakai ŋwɛi maŋtsɛyeli he lɛ ni amɛnaa ehegbɛi lɛ amli gbɛfaŋnɔ po. (Luka 22:29, 30) Belɛ ebɛ naakpɛɛ akɛ Yesu aaamu eshɛɛ saji ni ekɛha mɛi ni afɔ amɛ mu nɛɛ naa kɛtsɔ ŋaawoo nɛɛ mlitii nɔ: “Mɔ ni yɔɔ toi lɛ, ha ni enu nɔ ni mumɔ lɛ kɛɔ asafoi lɛ.”—Kpojiemɔ 3:13.

25. Te aaafee tɛŋŋ ni aŋkroaŋkro Kristofoi ni yɔɔ ŋmɛnɛ lɛ kɛ shishitoo mla ni yɔɔ ŋaawoo ni Yesu kɛha asafo ni yɔɔ Filadelfia lɛ sɛɛ lɛ aaatsu nii hu?

²⁵ Mɛɛ hewalɛwoo fɛfɛo nakai shɛɛ sane lɛ baaji aha Kristofoi anɔkwafoi ni yɔɔ Filadelfia lɛ nɛkɛ! Ni eji shɛɛ sane ni hiɛ nikasemɔ kpele kɛha Yohane kuu lɛ bianɛ, yɛ Nuŋtsɔ lɛ gbi lɛ mli. Shi emli shishitoo mlai lɛ he hiaa kɛha aŋkroaŋkroi Kristofoi fɛɛ, kɛ amɛjɛ mɛi ni afɔ amɛ mu lɛ ateŋ aloo amɛji tooi krokomɛi. (Yohane 10:16) Wɔteŋ mɔ fɛɛ mɔ hu baafee jogbaŋŋ akɛ wɔɔya nɔ wɔwo Maŋtsɛyeli yibii lɛ taakɛ Kristofoi ni yɔɔ Filadelfia lɛ fee lɛ. Kɛ hooo lɛ wɔteŋ mɔ fɛɛ mɔ yɛ hewalɛ fioo. Wɔ fɛɛ wɔbaanyɛ wɔfee nɔ ko yɛ Yehowa sɔɔmɔ mli. Nyɛhaa wɔkɛ nɛkɛ hewalɛ nɛɛ atsua nii! Nyɛhaa wɔhiɛ ahia wɔhe nɔ yɛ Maŋtsɛyeli hegbɛi ni yaa hiɛ lɛ ahe, koni wɔbote hegbɛ fɛɛ hegbɛ ni aaagbele naa aha wɔ lɛ mli. Wɔbaanyɛ wɔsɔle po ni Yehowa agbele shinaa ni tamɔ nɛkɛ aha wɔ. (Kolosebii 4:2, 3) Yɛ be mli ni wɔnyiɛɔ Yesu tsuishiŋmɛɛ nɔkwɛmɔnɔ lɛ sɛɛ ni wɔyaa nɔ wɔyeɔ egbɛi lɛ anɔkwale lɛ, wɔbaatsɔɔ akɛ wɔ hu wɔyɛ toi ni baabo nɔ ni Nyɔŋmɔ mumɔ krɔŋkrɔŋ lɛ kɛɔ asafoi lɛ toi.

[Shishigbɛ niŋmai]

[Akrabatsa ni yɔɔ baafa 63]

Mɛi Pii ni Ayeɔ Abuaa Koni Amɛkula Shi

Yɛ 144,000 ni afɔ amɛ mu lɛ ni baana ŋwɛi Maŋtsɛyeli lɛ ateŋ lɛ, etamɔ nɔ ni shwɛɛnii ko, Yohane kuu lɛ, ni shɛɛɛ 9,000 lɛ yɛ lolo ni amɛbaagbe amɛshikpɔŋ nɔ shihilɛ lɛ naa. Yɛ nakai beaŋ nɔŋŋ lɛ, asafo babaoo lɛ ayi efa kɛyashɛ 6,600,000 kɛ nɔ ni fa fe nakai. (Kpojiemɔ 7:4, 9) Mɛni ye bua ni yifalɛ nɛɛ ba? Skul sɔrɔtoi ni Yehowa Odasefoi kɛtsuɔ nii lɛ eye ebua babaoo. Esoro enɛ yɛ Kristendom nyɔŋmɔ jamɔ he nikasemɔ hei ni tsɔɔ jeŋ nilee ni baa Biblia lɛ shi lɛ ahe, ejaakɛ Odasefoi lɛ askul sɔrɔtoi lɛ tɛoɔ Nyɔŋmɔ Wiemɔ lɛ mli hemɔkɛyeli ni mli kwɔ amɛwoɔ amɛtsuii amli. Amɛtsɔɔ bɔ ni anyɛɔ akɛtsuɔ jeŋba kpakpa ni he tse kɛ shihilɛi ni ajɔɔ nɔ aha Nyɔŋmɔ sɔɔmɔ he nii. Kɛjɛ 1943 kɛbaa nɛɛ, Yehowa Odasefoi asafo fɛɛ asafo feɔ Teokrase Sɔɔmɔ Skul yɛ e-Maŋtsɛyeli Asa lɛ nɔ yɛ jeŋ fɛɛ. Akpekpei abɔ yaa skul nɛɛ daa otsi, ni amɛkaseɔ Biblia mli tsɔsemɔ he gbɛjianɔtoo yɛ ekomefeemɔ mli.

Kɛjɛ 1959 kɛbaa nɛɛ, Yehowa Odasefoi efee Maŋtsɛyeli Sɔɔmɔ Skul hu ni akɛtsɔseɔ asafoŋ onukpai kɛ asafoŋ sɔɔlɔi. Ni kɛjɛ 1977 kɛbaa nɛɛ, Gbɛgbamɔ Sɔɔmɔ Skul lɛ hu etsɔse nyɛmimɛi hii kɛ yei akpei ohai abɔ ni yɔɔ Filadelfia anɔkwale mumɔ lɛ, ni kɛ amɛbe fɛɛ sɔmɔɔ Yehowa yɛ shiɛmɔ nitsumɔ lɛ mli. Yɛ afi 1987 mli lɛ, aje Sɔɔlɔi Atsɔsemɔ Skul lɛ shishi koni akɛtsɔse Odasefoi ni ji hii aha sɔɔmɔ krɛdɛɛ ko yɛ je lɛ mli.

Nɔ ni ekaaa yɛ skul sɔrɔtoi ni Yehowa Odasefoi kɛtsuɔ nii nɛɛ mli ji Watchtower Bible School of Gilead. Kɛjɛ 1943 mli kɛbaa nɛɛ, nɛkɛ maŋsɛɛ sanekpakpashiɛlɔi askul, ni yɔɔ New York State lɛ etsɔse nikaselɔi akui enyɔ daa afi. Kɛ abua fɛɛ naa lɛ, amɛtsɔse Yehowa sɔɔlɔi fe 7,000 aha maŋsɛɛ sanekpakpashiɛmɔ sɔɔmɔ lɛ. Mɛi ni amɛkase nii yɛ nɛkɛ skul nɛɛ mli lɛ esɔmɔ yɛ shikpɔji fe oha nɔ, ni hei pii yɛ ni amɛnɔ atsɔ ni agbele Maŋtsɛyeli nitsumɔ lɛ mli. Yɛ aaafee afii 60 sɛɛ nɛɛ, maŋsɛɛ sanekpakpashiɛlɔi ni ji klɛŋklɛŋbii lɛ ateŋ mɛi pii miisɔmɔ lolo, amɛkɛ maŋsɛɛ sanekpakpashiɛlɔi heei lɛ efee ekome kɛmiilɛɛ Yehowa gbɛjianɔtoo lɛ mli yɛ jeŋ muu fɛɛ. Mɛɛ nitsumɔ mligbelemɔ ni yɔɔ naakpɛɛ nɛ!

[Akrabatsa ni yɔɔ baafa 64]

Yɛ 1919 mli lɛ Maŋtsɛ Yesu ni yeɔ nɔ lɛ gbele shinaa ko ni ji hegbɛ kɛha Kristofoi asɔɔmɔ nitsumɔ lɛ. Kristofoi ni amɛtuu amɛhe amɛha ni amɛyi faa yɛ be fɛɛ mli lɛ eŋɔ nakai hegbɛ lɛ.

Afi Shikpɔji ni Kristofoi ni Be Fɛɛ

Shiɛmɔ Nitsumɔ na Shiɛmɔ Mli Shiɛlɔie

Shɛ Nɔ Gbɛfaŋnɔf

1918 14 3,868 591

1928 32 23,988 1,883

1938 52 47,143 4,112

1948 96 230,532 8,994

1958 175 717,088 23,772

1968 200 1,155,826 63,871

1978 205 2,086,698 115,389

1988 212 3,430,926 455,561

1998 233 5,544,059 698,781

2005 235 6,390,022 843,234

[Shishigbɛ niŋmai]

[Akrabatsa ni yɔɔ baafa 65]

Yehowa Odasefoi anitsumɔ lɛ ji nɔ ni jɛɔ tsui muu fɛɛ mli. Akɛ nɔkwɛmɔnɔ lɛ, susumɔ ŋmɛlɛtswai abɔ ni amɛkɛshiɛ ni amɛkɛtsɔɔ nii kɛ shia Biblia mli nikasemɔi babaoo ni amɛkɛ mɛi fee yaka lɛ he.

Afi Ŋmɛlɛtswai Biblia Mli

Abɔ ni Akɛshiɛ Nikasemɔi ni Afee

(Afi Yibɔ) (Daa Nyɔŋ Nɔ)

1918 19,116 Not Recorded

1928 2,866,164 Not Recorded

1938 10,572,086 Not Recorded

1948 49,832,205 130,281

1958 110,390,944 508,320

1968 208,666,762 977,503

1978 307,272,262 1,257,084

1988 785,521,697 3,237,160

1998 1,186,666,708 4,302,852

2005 1,278,235,504 6,061,534

[Mfoniri ni yɔɔ baafa 59]

Roma samfele yɛ klɛŋklɛŋ afii oha lɛ mli

Yitso 13

Hemɔ Shika ni Atsuu He yɛ La Mli

LAODIKEA

1, 2. Nɛgbɛ ji he ni asafoi kpawo lɛ mli naagbee nɔ ni nine shɛ shɛɛ sane nɔ kɛjɛ Yesu ni awo ehiɛ nyam lɛ ŋɔɔ lɛ yɔɔ, ni mɛni ayɔseɔ yɛ nɛkɛ maŋtiase nɛɛ he?

LAODIKEA ji asafoi kpawo ni nine shɛ shɛɛ saji anɔ kɛjɛ Yesu ni atee lɛ shi lɛ ŋɔɔ lɛ naagbee asafo. Ni mɛɛ saji ni gbeleɔ mɔ hiŋmɛi ni kanyaa mɔ po ekɛba nɛkɛ!

² Ŋmɛnɛ, obaana Laodikea amaŋfɔ lɛ yɛ maŋ ni ji Denizli masɛi, aaafee shitoi 55 yɛ Alasehir wuoyi-bokagbɛ. Yɛ klɛŋklɛŋ afii oha lɛ mli lɛ, Laodikea ji maŋ ko ni shwere waa. Akɛni eyɛ gbɛŋta wulu ko nɔ hewɔ lɛ, akɛ shika toɔ nɛkɛ maŋ nɛɛ mli ni jarayeli hu yaa nɔ yɛ jɛmɛ. Hiŋmɛi tsofa ko ni ale jogbaŋŋ ni ahɔɔ yɛ jɛmɛ lɛ kɛ nii fata eninamɔ lɛ he, ni ehe gbɛi hu yɛ atadei kpakpai ni afeɔ yɛ jɛmɛ kɛjɛɔ too hetsɔi diŋ fɛfɛo mli lɛ hewɔ. Aye nu hɔmɔ ni ji maŋ lɛ naagba kome lɛ nɔ kunim kɛtsɔ nu gbɛ ni agba kɛjɛ nu hiŋmɛii ni mli edɔ ni yɔɔ shitoi komɛi amli lɛ nɔ. No hewɔ lɛ, beni nu lɛ aaashɛ maŋ lɛ mli lɛ, no mli lɛ efee kulɔkulɔ.

 3. Te Yesu jeɔ eshɛɛ sane ni ekɛha asafo ni yɔɔ Laodikea lɛ shishi ehaa tɛŋŋ?

³ Laodikea bɛŋkɛ Kolose. Yɛ be mli ni eŋmaa wolo eyaha Kolosebii lɛ, bɔfo Paulo tsi wolo ko ni eŋma eyaha Laodikeabii lɛ ta. (Kolosebii 4:15, 16) Wɔleee nɔ ni Paulo ŋma yɛ nakai wolo lɛ mli, shi shɛɛ sane ni Yesu kɛmajeɔ Laodikeabii lɛ bianɛ lɛ tsɔɔ akɛ amɛgbee mumɔŋ shihilɛ ni ehiii kwraa mli. Taakɛ efɔɔ feemɔ lɛ, klɛŋklɛŋ lɛ, Yesu tsɔɔ mɔ ni eji, akɛ: “Ni Laodikea asafo lɛ bɔfo lɛ, ŋmaa oyaha lɛ akɛ: Nii ni Amen lɛ ni ji odasefonyo anɔkwafo lɛ kɛ anɔkwayelɔ lɛ kɛ Nyɔŋmɔ nibɔɔ lɛ shishijee lɛ kɛɛ nɛ.”—Kpojiemɔ 3:14.

 4. Yesu ji “Amen lɛ” yɛ mɛɛ gbɛ nɔ?

⁴ Mɛni hewɔ Yesu tsɛɔ ehe akɛ “Amen lɛ”? Nɛkɛ sabala nɛɛ kɛ kojomɔ hewalɛ fataa eshɛɛ sane lɛ he. Atsɔɔ “Amen” shishi kɛjɛ Hebri wiemɔ ni eshishi ji “nakai,” “aba mli nakai” mli ni akɛtsuɔ nii yɛ sɔlemɔi anaagbee koni akɛma henumɔi ni atsɔɔ yɛ mli lɛ nɔ mi. (1 Korintobii 14:16) Yesu ji “Amen lɛ” ejaakɛ emuuyeli mli ni ehiɛ ni tɔmɔ baaa he kɛ efɔleshaa gbele lɛ maa Yehowa shiwoi ni jara wawai lɛ fɛɛ amlibaa nɔ aduatsɔ. (2 Korintobii 1:20) Kɛjɛ nakai be lɛ mli kɛbaa nɛɛ, akɛ sɔlemɔi fɛɛ haa Yehowa kɛtsɔɔ Yesu nɔ yɛ gbɛ ni ja nɔ.—Yohane 15:16; 16:23, 24.

 5. Yesu ji “odasefonyo anɔkwafo lɛ kɛ anɔkwayelɔ lɛ” yɛ mɛɛ gbɛ nɔ?

⁵ Yesu ji “odasefonyo anɔkwafo lɛ kɛ anɔkwayelɔ lɛ” hu. Yɛ gbalɛ mli lɛ, akɛ lɛ toɔ anɔkwayeli, anɔkwale kɛ jalɛ nifeemɔ he, ejaakɛ anyɛɔ akɛ he fɔɔ enɔ kwraa akɛ Yehowa Nyɔŋmɔ tsulɔ. (Lala 45:5; Yesaia 11:4, 5; Kpojiemɔ 1:5; 19:11) Lɛ ji Odasefonyo kpeteŋkpele kɛha Yehowa. Yɛ anɔkwale mli lɛ, akɛ “Nyɔŋmɔ nibɔɔ lɛ shishijee lɛ,” Yesu ejaje Nyɔŋmɔ anunyam lɛ kɛjɛ shishijee tɔɔ. (Abɛi 8:22-30) Eye anɔkwale lɛ he odase yɛ be mli ni eji gbɔmɔ yɛ shikpɔŋ nɔ lɛ. (Yohane 18:36, 37; 1 Timoteo 6:13) Yɛ eshitee lɛ sɛɛ lɛ, ewo ekaselɔi lɛ ashi akɛ mumɔ krɔŋkrɔŋ baaba amɛnɔ ni ekɛɛ amɛ akɛ: “Nyɛaatsɔmɔ midasefoi yɛ Yerusalem kɛ Yudea kɛ Samaria fɛɛ, kɛyashi shikpɔŋ lɛ naagbee hei lɛ.” Yesu kudɔ nɛkɛ Kristofoi ni afɔ amɛ mu nɛɛ kɛjɛ Pentekoste afi 33 Ŋ.B. kɛyaa, yɛ sanekpakpa lɛ “ni ashiɛɔ atsɔɔ bɔɔ nii fɛɛ ni yɔɔ ŋwɛi shishi lɛ” mli. (Bɔfoi lɛ Asaji 1:6-8; Kolosebii 1:23) Yɛ anɔkwale mli lɛ, Yesu ji mɔ ni esa akɛ atsɛɔ lɛ odasefonyo anɔkwafo kɛ anɔkwayelɔ. Eeefee sɛɛnamɔ kɛha Kristofoi ni afɔ amɛ mu ni yɔɔ Laodikea lɛ akɛ amɛaabo ewiemɔi atoi.

 6. (a) Yesu tsɔɔ mumɔŋ shihilɛ ni yɔɔ Laodikea asafo lɛ mli lɛ mli yɛ mɛɛ gbɛ nɔ? (b) Mɛɛ Yesu nɔkwɛmɔnɔ kpakpa ko Kristofoi ni yɔɔ Laodikea lɛ enyiɛɛɛ sɛɛ?

⁶ Mɛɛ shɛɛ sane Yesu yɔɔ kɛha Laodikeabii lɛ? Ebɛ yijiemɔ wiemɔ ko kɛha amɛ. Ekɛɔ amɛ, yɛ faŋŋ mli akɛ: “Mile onitsumɔi lɛ akɛ obɛ ŋanii ni obɛ klakla hu. Oh, kulɛ ofee ŋanii loo ofee klakla! Shi nɛkɛ nɛɛ, akɛni kulɔkulɔ oyɔɔ ni obɛ ŋanii ni obɛ klakla hu hewɔ lɛ, mibafɛ̃o yɛ midaaŋ mashwie.” (Kpojiemɔ 3:15, 16) Te ooofee tɛŋŋ ohere shɛɛ sane ni tamɔ nɛkɛ ni jɛ Nuŋtsɔ Yesu Kristo ŋɔɔ lɛ nɔ? Ani ohɛleŋ shi ni opɛi bo diɛŋtsɛ omli okwɛ? Lɛlɛŋ, ehe miihia ni nakai Laodikeabii lɛ ahɛle shi, ejaakɛ amɛbatsɔmɔ mumɔŋ hejɔ̃lɔi, ni eka shi faŋŋ akɛ amɛŋmɛɔ nibii babaoo he kɛkɛ. (Okɛto 2 Korintobii 6:1 he.) Yesu, ni akɛ Kristofoi lɛ esa akɛ amɛkase lɛ lɛ jieɔ ekaa ni tamɔ la kpo ehaa Yehowa kɛ esɔɔmɔ yɛ be fɛɛ mli. (Yohane 2:17) Agbɛnɛ hu, mɛi ni baa amɛhe shi lɛ naa akɛ ehe jɔ ni eyɛ kpoo yɛ be fɛɛ mli, tamɔ bɔ ni nu hɔlɔ kpulu kome shɛjeɔ mɔ mii yɛ latsaa be ni edɔ klakla mli lɛ. (Mateo 11:28, 29) Shi Kristofoi ni yɔɔ Laodikea lɛ bɛ klakla ni asaŋ amɛbɛ ŋanii hu. Amɛfee kulɔkulɔ, tamɔ nui ni hoɔ kɛbaa amɛmaŋ lɛ mli lɛ. Amɛtamɔ mɛi ni Yesu baakpoo amɛ kwraa, ‘ebaashwe amɛ kɛjɛ edaaŋ eshwie’! Eba akɛ yɛ wɔ gbɛfaŋ lɛ, wɔɔbɔ mɔdɛŋ wɔfee mɛi ni yɔɔ ekaa daa, taakɛ Yesu fee lɛ, koni wɔnyɛ wɔkɛ mumɔŋ miishɛjemɔ kɛ hejɔɔmɔ aha mɛi krokomɛi.—Mateo 9:35-38.

“Okɛɔ Akɛ: ‘Niiatsɛ Ji Mi’”

 7. (a) Mɛɛ gbɛ nɔ Yesu tsɔ ni eha wɔyoo Kristofoi ni yɔɔ Laodikea lɛ anaagba lɛ diɛŋtsɛ? (b) Mɛni hewɔ Yesu kɛɔ akɛ Laodikea Kristofoi lɛ ji “shwilafo kɛ he yayaiatsɛ” lɛ?

⁷ Mɛni ji Laodikeabii lɛ anaagba lɛ shishifa diɛŋtsɛ? Wɔnaa jwɛŋmɔ kpakpa ko ni kɔɔ enɛ he kɛjɛɔ Yesu wiemɔi ni nyiɛ sɛɛ lɛ mli: “Ejaakɛ okɛɔ akɛ: Niiatsɛ ji mi ni miyɛ nii ni nɔ ko nɔ ko he ehiaaa mi, ni oleee akɛ oyɛ amane mli ni onii hu yɛ mɔbɔ ni ohiafo kɛ shwilafo kɛ he yayaiatsɛ jio.” (Kpojiemɔ 3:17; okɛto Luka 12:16-21 he.) Akɛni amɛyɔɔ maŋ ni shika yɔɔ jɛmɛ babaoo mli hewɔ lɛ, amɛnuɔ he akɛ nɔ ko nɔ ko he ehiaaa amɛ yɛ amɛninamɔ lɛ hewɔ. Eka shi faŋŋ akɛ, shwɛmɔ hei lɛ kɛ akaŋshii hei lɛ kɛ kpɔiaŋgbɔlemɔ hei lɛ ena amɛshihilɛ nɔ hewalɛ, ni yɛ enɛ hewɔ lɛ amɛbatsɔmɔ “mɛi ni sumɔɔ shwɛmɔ kɛ ŋɔɔmɔ fe Nyɔŋmɔ.”a (2 Timoteo 3:4) Shi Laodikeabii ni yɔɔ heloo gbɛfaŋ nibii babaoo lɛ ji ohiafoi yɛ mumɔŋ. ‘Jwetrii ni aŋɔtee yɛ ŋwɛi’ lɛ fioo ko pɛ amɛyɔɔ, kɛ amɛyɛ eko po. (Mateo 6:19-21) Amɛhaaa amɛhiŋmɛii anɔ atse, koni amɛkɛ Nyɔŋmɔ Maŋtsɛyeli lɛ aye klɛŋklɛŋ gbɛhe yɛ amɛshihilɛ mli. Amɛyɛ duŋ mli diɛŋtsɛ, shwilafoi, amɛbɛ mumɔŋ ninaa ko. (Mateo 6:22, 23, 33) Agbɛnɛ hu, yɛ atadei fɛfɛji ni shika ni amɛyɔɔ lɛ baanyɛ ahe aha amɛ lɛ fɛɛ sɛɛ lɛ, yɛ Yesu hiɛ lɛ amɛnyiɛ yayai. Amɛbɛ mumɔŋ atadei komɛi ni baaha ayoo amɛ akɛ Kristofoi.—Okɛto Kpojiemɔ 16:15 he.

 8. (a) Shihilɛ ni tamɔ nɔ ni yɔɔ Laodikea lɛ hu yɛ ŋmɛnɛ yɛ mɛɛ gbɛ nɔ? (b) Kristofoi komɛi eshishiu amɛ diɛŋtsɛ amɛhe yɛ nɛkɛ hiɛjoomɔ jeŋ nɛɛ mli yɛ mɛɛ gbɛ nɔ?

⁸ Mɛɛ shihilɛ ni haa mɔ he jɔ̃ɔ lɛ nɛ! Shi ani wɔfɔɔɔ shihilɛ ni tamɔ nakai nɔŋŋ namɔ yɛ wɔ ŋmɛnɛŋmɛnɛ bei nɛɛ amli? Mɛni ji nɔ ni hɔ shishi? Eji su ni haa mɛi kɛ amɛhiɛ fɔɔ amɛ diɛŋtsɛ amɛhe nɔ ni jɛɔ heloo gbɛfaŋ nibii kɛ nibii ni adesai ebua naa ni akɛ he fɔɔ nɔ lɛ hewɔ. Taakɛ Kristendom sɔlemɔyalɔi komɛi ji lɛ, Yehowa webii lɛ ateŋ mɛi komɛi eshishiu amɛhe ni amɛsusu akɛ amɛbaanyɛ amɛsa Nyɔŋmɔ hiɛ kɛtsɔ kpeei ni amɛaaya be kɛ bei amli lɛ nɔ. Amɛbɔɔ mɔdɛŋ ni amɛfee nɔ ko fioo ko kɛkɛ yɛ “wiemɔ lɛ nɔ yelɔi” lɛ he. (Yakobo 1:22) Yɛ kɔkɔbɔɔ ni Yohane kuu lɛ etee nɔ amɛkɛha shii abɔ lɛ fɛɛ sɛɛ lɛ, amɛkɛ amɛtsuii maa atadei, kar sɔrɔtoi kɛ shiai fɛfɛji anɔ kɛ shihilɛ ni damɔ hiɛtserɛjiemɔ kɛ miishɛɛnamɔ nɔ. (1 Timoteo 6:9, 10; 1 Yohane 2:15-17) Nɔ ni jɛɔ enɛɛmɛi fɛɛ mli baa ji mumɔŋ sɛɛyoomɔ ni baa shi. (Hebribii 5:11, 12) Ni amɛaafee mɛi ni yɔɔ kulɔkulɔ ni anyɛɛɛ akɛ amɛ afee nɔ ko lɛ, ehe miihia ni amɛtsiɛ̃ “mumɔ lɛ la” lɛ hiɛ ni amɛna ekaa hee amɛha ‘wiemɔ lɛ shiɛmɔ.’—1 Tesalonikabii 5:19; 2 Timoteo 4:2, 5.

 9. (a) Mɛɛ Yesu wiemɔi esa akɛ ehɛle Kristofoi ni efee kulɔkulɔ lɛ ashi, ni mɛni hewɔ? (b) Te asafo lɛ aaafee tɛŋŋ aye abua “tooi” ni kplaŋɔ kɛyaa lɛ?

⁹ Te Yesu buɔ Kristofoi ni yɔɔ kulɔkulɔ lɛ ehaa tɛŋŋ? Esa akɛ wiemɔi ni mli ka shi faŋŋ lɛ ahɛle amɛ shi: “Oleee akɛ oyɛ amane mli ni onii hu yɛ mɔbɔ ni ohiafo kɛ shwilafo kɛ he yayaiatsɛ jio.” Amɛ henilee ekpiliŋ kɛyashɛ he ni amɛyooo shihilɛ ni yɔɔ mɔbɔ ni amɛyɔɔ mli lɛ dɔŋŋ. (Okɛto Abɛi 16:2; 21:2 he.) Anyɛŋ aku hiɛ ashwie shihilɛ ni hiɛdɔɔ yɔɔ mli ni yɔɔ asafo lɛ mli lɛ nɔ. Kɛ onukpai lɛ kɛ mɛi krokomɛi ni akɛ nitsumɔ ewo amɛdɛŋ lɛ to ekaafeemɔ he okadi kpakpa kɛtsɔ amɛkwɛmɔ yɛ suɔmɔ mli nɔ lɛ onukpai lɛ baanyɛ atsiɛ “tooi” ni laajeɔ nɛɛ ahiɛ koni amɛnine ashɛ amɛtsutsu miishɛɛ ni amɛyɔɔ yɛ tsui muu fɛɛ mli ni amɛjɛɔ amɛsɔmɔɔ lɛ nɔ ekoŋŋ.—Luka 15:3-7.

‘Nii ni Aaana’ He Ŋaawoo

10. Mɛni ji “shika” ni Yesu kɛɔ Kristofoi ni yɔɔ Laodikea lɛ akɛ amɛhe kɛjɛ eŋɔɔ lɛ?

¹⁰ Ani tsabaa ko yɛ kɛha shihilɛi ni ehiii ni yɔɔ Laodikea lɛ? Hɛɛ, kɛ nakai Kristofoi lɛ aaanyiɛ Yesu ŋaawoo nɛɛ sɛɛ lɛ: “Miiwoo ŋaa akɛ ohe shika ni atsuu he yɛ la mli yɛ miŋɔɔ, koni ona nii.” (Kpojiemɔ 3:18a) Anɔkwale Kristofoi ‘ashika’ ni atsuu he yɛ la mli ni ajie muji yɛ mli lɛ baaha amɛteŋ mɔ fɛɛ mɔ atsɔ “niiatsɛ yɛ Nyɔŋmɔ gbɛfaŋ.” (Luka 12:21) Nɛgbɛ amɛbaahe shika ni tamɔ nɛkɛ kɛjɛ? Jeee kɛmiijɛ shikatoo hei ni yɔɔ maŋ lɛ mli lɛ aŋɔɔ, shi moŋ kɛmiijɛ Yesu ŋɔɔ! Bɔfo Paulo tsɔɔ nɔ ni nakai shika lɛ ji lɛ mli beni ekɛɛ Timoteo akɛ ewo Kristofoi ni yɔɔ nii babaoo lɛ ŋaa akɛ “amɛfee ejurɔ, ni amɛtsɔmɔ niiatsɛmɛi yɛ ejurɔfeemɔi agbɛfaŋ, amɛsumɔ nihamɔ, amɛnine akpɔ, amɛbɔ jwetri amɛha amɛhe, ni efee shishitoo kpakpa eha be ni baaba” lɛ. Amɛhe ni amɛkɛaaha yɛ nɛkɛ gbɛ nɔ pɛ amɛaanyɛ ni “amɛmɔ anɔkwa wala lɛ mli.” (1 Timoteo 6:17-19) Kulɛ esa akɛ Laodikeabii ni yɔɔ heloo gbɛfaŋ nibii babaoo lɛ abo Paulo ŋaawoo lɛ toi ni amɛtsɔmɔ niiatsɛmɛi yɛ mumɔŋ.—Kwɛmɔ Abɛi 3:13-18 hu.

11. Mɛɛ ŋmɛnɛŋmɛnɛ beaŋ nɔkwɛmɔnii wɔyɔɔ ni kɔɔ mɛi ni heɔ “shika ni atsuu he yɛ la mli” lɛ ahe?

¹¹ Ani ŋmɛnɛŋmɛnɛ beaŋ nɔkwɛmɔnii ni kɔɔ mɛi ni heɔ “shika ni atsuu he yɛ la mli” yɛ? Hɛɛ, eko yɛ! Yɛ be mli ni Nuŋtsɔ lɛ gbi lɛ bɛŋkɛɔ lɛ po lɛ, no mli lɛ Biblia kaselɔi akuu fioo ko miihɛle shi yɛ bɔ ni Kristendom tsɔɔmɔi babaoo ni jɛ Babilon, tamɔ Triniti, susuma ni gbooo, hɛl la mli piŋmɔi, gbekɛbii abaptisimɔ, kɛ amagai ajamɔ (ni sɛŋmɔtso lɛ kɛ Maria nɔ lɛ hu fata he) lɛ ji amale kwraa ha lɛ he. Yɛ be mli ni amɛfiɔ Biblia mli anɔkwale lɛ sɛɛ lɛ, nɛkɛ Kristofoi nɛɛ jaje Yehowa Maŋtsɛyeli lɛ akɛ adesai ahiɛnɔkamɔ kome pɛ kɛ Yesu kpɔmɔ afɔleshaa lɛ hu akɛ nɔ ni adamɔɔ nɔ anaa yiwalaheremɔ. Amɛtsɔ hiɛ aaafee afii 40 sɔŋŋ, amɛkɛ amɛnine tsɔɔ 1914 akɛ afi ni akadi yɛ Biblia gbalɛ mli akɛ Jeŋmaji abe lɛ naagbee, be mli ni abaana naakpɛɛ nifeemɔi komɛi yɛ shikpɔŋ lɛ nɔ lɛ.—Kpojiemɔ 1:10.

12. Namɔ ji mɔ ni fata mɛi ni nyiɛɔ hiɛ yɛ Kristofoi ni hiɛ tsɛɔ loo amɛhɛleɔ shi lɛ ahe lɛ, ni mɛɛ gbɛ nɔ etsɔ eto okadi ko ni ekaaa yɛ jwetrii ni akɛtoɔ ŋwɛi lɛ mli?

¹² Mɔ ni nyiɛ nɛkɛ Kristofoi ni amɛhiɛ tsɛɔ loo amɛhɛleɔ shi nɛɛ ahiɛ ji Charles Taze Russell, ni yɛ 1870 afii lɛ mra mli lɛ eto Biblia kaselɔi akuu yɛ Allegheny (ni amrɔ nɛɛ eji Pittsburgh fa lɛ), yɛ Pennsylvania, U.S.A. Beni Russell je anɔkwale lɛ taomɔ shishi lɛ, no mli lɛ ekɛ etsɛ efee ekome yɛ nitsumɔ mli ni enyiɛ gbɛ kɛmiiba koni ebatsɔ niiatsɛ kpanaa. Shi ehɔɔ eshwapoi babaoo ni tsara nɔ lɛ ni ekɛ shika ni ena lɛ ye bua koni akɛshiɛ Nyɔŋmɔ Maŋtsɛyeli lɛ yɛ shikpɔŋ muu lɛ fɛɛ nɔ. Afi 1884 mli ni Russell batsɔ gbɛjianɔtoo ni ale bianɛ akɛ Watch Tower Bible and Tract Society of Pennsylvania lɛ klɛŋklɛŋ sɛinɔtalɔ. Egbo yɛ 1916 mli, yɛ oketeke mli, yɛ he ko ni bɛŋkɛ Pampa, yɛ Texas, beni eefa gbɛ kɛmiiba New York, ni enaagbee shiɛmɔ ni ekɛkpa U.S. Amerika anaigbɛ fɛɛ lɛ eha etɔ lɛ lɛ. Eto okadi kpakpa ni ekaaa yɛ mumɔŋ jwetri ni aŋɔtoɔ ŋwɛi lɛ mli, nɔkwɛmɔnɔ ni sɔɔlɔi gbɛgbalɔi akpei ohai abɔ enyiɛ sɛɛ ŋmɛnɛ lɛ—Hebribii 13:7; Luka 12:33, 34; okɛto 1 Korintobii 9:16; 11:1 he.

Mumɔŋ Hiŋmɛi Tsofa lɛ kɛ Nitsumɔ

13. (a) Mumɔŋ hiŋmɛi tsofa baanyɛ aha shihilɛ mli ni Laodikeabii lɛ yɔɔ lɛ aya hiɛ yɛ mɛɛ gbɛ nɔ? (b) Mɛɛ atadei nɛkɛ Yesu jie yi lɛ, ni mɛni hewɔ?

¹³ Yesu bɔ nakai Laodikeabii lɛ kɔkɔ waa akɛ: “Ohe . . . atadei yɛji, koni owo ni oyayaiaŋ hiɛgbele lɛ akakã shi, kɛ hiŋmɛi tsofa ni okɛfɔ ohiŋmɛii, koni ona nii.” (Kpojiemɔ 3:18b) Esa akɛ amɛtao tsabaa amɛha amɛmumɔŋ shwilamɔ lɛ kɛtsɔ hiŋmɛi tsofa ni amɛaahe nɔ, jeee kɛmiijɛ maŋ lɛ mli helatsalɔi lɛ aŋɔɔ, shi moŋ nɔ ni Yesu pɛ kɛhaa lɛ. Enɛ baaye abua amɛ ni amɛna mumɔŋ sɛɛyoomɔ, ni eye ebua amɛ ni amɛnyiɛ yɛ “jalɔi atempɔŋ” lɛ nɔ kɛ amɛhiŋmɛi ni miikpɛlɛ ni amɛkɛmamɔ Nyɔŋmɔ suɔmɔnaa nifeemɔ nɔ. (Abɛi 4:18, 25-27) No hewɔ lɛ, jeee atadei ni jara wawai ni akɛ too hetsɔi diŋ ekpɛ yɛ Laodikea amɛbaawo, shi moŋ amɛbaawo “atadei yɛji” fɛfɛji ni jajeɔ hegbɛ ni haa ayɔseɔ amɛ akɛ Yesu Kristo sɛɛnyiɛlɔi yɛ faŋŋ mli lɛ.—Okɛto 1 Timoteo 2:9, 10; 1 Petro 3:3-5 he.

14. (a) Mɛɛ mumɔŋ hiŋmɛi tsofa yɔɔ kɛjɛ 1879? (b) Namɔ ji mɔ ni shika ni Yehowa Odasefoi kɛtsuɔ nii lɛ fɛɛ jɛɔ eŋɔɔ lɛ? (d) Esoro Yehowa Odasefoi lɛ yɛ mɛi krokomɛi ahe yɛ oniatsumɔ he yɛ mɛɛ gbɛ nɔ?

¹⁴ Ani mumɔŋ hiŋmɛi tsofa yɛ ŋmɛnɛŋmɛnɛ beaŋ? Hɛɛ, kɛ nɔmimaa! Afi 1879 mli ni Pastor Russell, taakɛ afɔɔ lɛ tsɛmɔ kɛ suɔmɔ lɛ je shishi akɛ eeekala wolo tɛtrɛɛ ni ale yɛ jeŋ fɛɛ ŋmɛnɛ akɛ Buu-Mɔɔ Eetswa Yehowa Maŋtsɛyeli He Adafi lɛ koni ekafã anɔkwale lɛ he. Ejaje yɛ nɔ ni ji enyɔ ni eŋma lɛ mli akɛ: “[Wolo tɛtrɛɛ nɛɛ] yɛ esɛɛfilɔ, taakɛ wɔheɔ wɔyeɔ lɛ, ni lɛ ji YEHOWA, ni yɛ be mli ni nɛkɛ sane lɛ ji lɛ wɔkpaŋ fai ni asaŋ wɔbiŋ mɛi ni amɛye amɛbua wɔ. Be mli ni Mɔ ni kɛɔ akɛ: ‘Gɔji fɛɛ nɔ shika kɛ jwiɛtɛi fɛɛ ji minɔ’ lɛ nyɛɛɛ ni ekɛ shika aha dɔŋŋ lɛ, wɔbaanu shishi akɛ be ni esa akɛ akpa wolo nɛɛ feemɔ eshɛ.” Televishin nɔ sanekpakpashiɛlɔi komɛi ebua shika babaoo naa ni amɛhiɔ shi yɛ hiɛtserɛjiemɔ ni yɔɔ hiɛgbele (yɛ bei komɛi amli lɛ kɛ jeŋba shara) mli. (Kpojiemɔ 18:3) Nɔ ni tamɔɔɔ enɛ lɛ, Biblia Kaselɔi, ni ale amɛ ŋmɛnɛ akɛ Yehowa Odasefoi lɛ kɛ yelikɛbuamɔ loo shika ni amɛbiii ni amɛnine shɛɔ nɔ lɛ fɛɛ etsu nii koni amɛkɛto jeŋ muu fɛɛ shiɛmɔ nitsumɔ ni kɔɔ Yehowa Maŋtsɛyeli ni baa lɛ he lɛ he gbɛjianɔ ni akɛha eya hiɛ. Kɛbashi amrɔ nɛɛ, Yohane kuu lɛ kudɔɔ Buu-Mɔɔ lɛ kɛ Awake! woji tɛtrɛbii lɛ ni amrɔ nɛɛ nɔ ni akalaa shikome be fɛɛ be yɛ 2006 mli lɛ yibɔ fe akpekpei 59 lɛ. Buu-Mɔɔ lɛ yɛ wiemɔi aaafee 150 mli. No ji asafo ni emlibii fe Kristofoi akpekpei ekpaa lɛ wolo titri ni amɛkɛtsu nii akɛ mumɔŋ hiŋmɛi tsofa ni no eha amɛhiŋmɛi egbele ni amɛna apasa jamɔ kɛ bɔ ni ehe hiaa akɛ aaashiɛ sanekpakpa lɛ aha jeŋmaji fɛɛ lɛ.—Marko 13:10.

Kamɔ kɛ Toigbalamɔ He Sɛɛ ni Aaana

15. Mɛni hewɔ ni Yesu kɛ kɔkɔbɔɔ ni mli wa ha Kristofoi ni yɔɔ Laodikea lɛ, ni te esa akɛ asafo lɛ afee enii yɛ he eha tɛŋŋ?

¹⁵ Nyɛhaa wɔkua wɔsɛɛ kɛyaa Laodikeabii lɛ anɔ. Mɛɛ gbɛ nɔ amɛaatsɔ ni amɛtsu ŋaawoo ni mli wa ni jɛ Yesu ŋɔɔ lɛ he nii yɛ? Ani esa akɛ amɛnijiaŋ aje wui ni amɛnu he akɛ Yesu taooo amɛ akɛ esɛɛnyiɛlɔi dɔŋŋ? Dabi, jeee nakai sane lɛ ji kwraa. Sane lɛ yaa nɔ akɛ: “Mi lɛ mɛi abɔ ni midɔɔ amɛhe lɛ, mikãa amɛ, ni migbalaa amɛtoii; no hewɔ lɛ ohiɛ adɔ ni otsake otsui!” (Kpojiemɔ 3:19) Taakɛ toigbalamɔ ni jɛ Yehowa ŋɔɔ ji lɛ, Yesu toigbalamɔ lɛ ji suɔmɔ he okadi. (Hebribii 12:4-7) Esa akɛ Laodikea asafo lɛ aŋɔ hegbɛ ni suɔmɔ yɔɔ mli ni akɛsusuɔ mɔ he nɛɛ ni amɛkɛ eŋaawoo lɛ atsu nii. Esa akɛ amɛtsake amɛtsui, ni amɛyoo akɛ amɛ kulɔkulɔfeemɔ lɛ tsɔɔ eshafeemɔ. (Hebribii 3:12, 13; Yakobo 4:17) Ha onukpai ni yɔɔ amɛteŋ lɛ ashɛrɛ heloo gbɛfaŋ nibii asɛɛdii gbɛi lɛ amɛshwie amɛsɛɛ koni ‘amɛkanya’ nikeenii ni amɛnine shɛ nɔ kɛjɛ Nyɔŋmɔ ŋɔɔ lɛ ‘tamɔ la.’ Yɛ be mli ni mumɔŋ hiŋmɛi tsofa lɛ tsuɔ nii lɛ, eba akɛ mɛi fɛɛ ni yɔɔ asafo lɛ mli lɛ aaana hejɔɔmɔ tamɔ nu ŋanii ni haa mɔ he jɔɔ lɛ ni jɛ nu ŋma mli.—2 Timoteo 1:6; Abɛi 3:5-8; Luka 21:34.

16. (a) Ajieɔ Yesu suɔmɔ kɛ hedɔɔ lɛ kpo ŋmɛnɛ yɛ mɛɛ gbɛ nɔ? (b) Kɛ wɔnine shɛ ŋaawoo loo kɔkɔbɔɔ ni mli wa nɔ lɛ, te esa akɛ wɔfee wɔnii yɛ he wɔha tɛŋŋ?

¹⁶ Ni ŋmɛnɛ wɔ hu? Yesu yaa nɔ ‘esumɔɔ mɛi ni ji enɔ ni yɔɔ je lɛ mli lɛ.’ Ni ebaafee enɛ “daa kɛyashi jeŋ naagbee lɛ.” (Yohane 13:1; Mateo 28:20) Esuɔmɔ kɛ hedɔɔ lɛ jeɔ kpo kɛtsɔɔ ŋmɛnɛŋmɛnɛ beaŋ Yohane kuu lɛ kɛ ŋulamii loo onukpai lɛ ni yɔɔ Kristofoi asafo lɛ mli lɛ nɔ. (Kpojiemɔ 1:20) Onukpai lɛ yɛ he suɔmɔ waa akɛ amɛaaye amɛbua wɔ fɛɛ, onukpai kɛ gbekɛbii, koni wɔhi teokrase too kuu lɛ husui amli, yɛ nɛkɛ bei ni mli wa nɛɛ amli, koni wɔte shi wɔshi heyeli mumɔ, heloo gbɛfaŋ nibii ahe hiɛjoomɔ, kɛ jeŋba shara ni yɔɔ je lɛ mli lɛ. Kɛ wɔnine shɛ ŋaawoo loo toigbalamɔ ni mli wa nɔ yɛ bei komɛi amli lɛ, kaimɔ akɛ “tsɔsemɔ kamɔi lɛ, wala gbɛ ni.” (Abɛi 6:23) Wɔ fɛɛ wɔyeee emuu ni esa akɛ wɔkɛ ekaa afee tsakemɔi ni he hiaa lɛ oya koni ajaje wɔ ni wɔhi Nyɔŋmɔ suɔmɔ lɛ mli.—2 Korintobii 13:11.

17. Ninamɔ baanyɛ atsɔ mumɔŋ oshara aha wɔ yɛ mɛɛ gbɛ nɔ?

¹⁷ Esaaa akɛ wɔŋmɛɔ gbɛ koni heloo gbɛfaŋ nibii, ninamɔ, aloo shika ni wɔbɛ miifee wɔ kulɔkulɔ. Ninamɔ baanyɛ aye abua ni egbele sɔɔmɔ hegbɛi heei, shi ebaanyɛ efee oshara hu yɛ nakai beaŋ nɔŋŋ. (Mateo 19:24) Gbɔmɔ ni yɔɔ nii lɛ baanu he akɛ ehe ehiaaa ni ekɛ ekaa awo shiɛmɔ nitsumɔ lɛ mli taakɛ mɛi krokomɛi feɔ lɛ, bei abɔ ni ebaanyɛ ni ekɛ shika wuji awo onia adeka lɛ mli yɛ be kɛ bei amli lɛ. Aloo ebaanyɛ enu he akɛ akɛni eji niiatsɛ hewɔ lɛ, esa akɛ ena mɛi ahiɛ duromɔ. Kɛfata he lɛ, hiɛtserɛjiemɔi kɛ shwɛmɔi pii ahe hegbɛ yɛ kɛha gbɔmɛi ni yɔɔ nii babaoo lɛ ni mɛi krokomɛi nyɛɛɛ ana enɛ. Shi nɛkɛ nibii ni gbalaa mɛi nɛɛ heɔ mɔ be ni ebaanyɛ egbala mɛi ni leee nii lɛ kɛjɛ Kristofoi asɔɔmɔ nitsumɔ lɛ mli, ni ebaaha mɛi ni leee nii lɛ afee kulɔkulɔ. Eba akɛ wɔɔjo nɛkɛ tsɔnei nɛɛ fɛɛ anaa foi ni wɔya nɔ “wɔtsu nii waa ni wɔmia wɔhiɛ” kɛjɛ wɔtsui muu fɛɛ mli yɛ naanɔ wala hewɔ.—1 Timoteo 4:8-10; 6:9-12, New World Translation.

‘Gbɛkɛnaashi Niyenii lɛ ni Aaaye’

18. Mɛɛ hegbɛ Yesu kɛmaa Kristofoi ni yɔɔ Laodikea lɛ ahiɛ?

¹⁸ Yesu yaa nɔ ekɛɔ akɛ: “Naa! Midamɔ shinaa lɛ naa ni miishi. Kɛji mɔ ko nu migbee ni egbele shinaa lɛ, maba eshia lɛ mli ni mikɛ lɛ aye gbɛkɛnaashi nii lɛ ni lɛ hu ekɛ mi aye nii.” (Kpojiemɔ 3:20, New World Translation.) Kɛji akɛ Laodikea Kristofoi lɛ aaahere Yesu kɛaaba amɛ asafo lɛ mli lɛ, ebaaye ebua amɛ ni amɛye amɛ kulɔkulɔfeemɔ lɛ nɔ kunim!—Mateo 18:20.

19. Mɛni Yesu tsɔɔ beni ewo shi akɛ ebaaba ni ekɛ Laodikea asafo lɛ abaye gbɛkɛnaashi niyenii lɛ?

¹⁹ Ŋwanejee ko bɛ he akɛ gbɛkɛnaashi niyenii lɛ ta ni Yesu tsi lɛ kaiɔ Laodikeabii lɛ be ni ekɛ ekaselɔi lɛ ye nii lɛ. (Yohane 12:1-8) Nɛkɛ bei nɛɛ kɛ mumɔŋ jɔɔmɔi bahaa mɛi ni yɔɔ jɛmɛ lɛ yɛ be fɛɛ mli. Nakai nɔŋŋ hu akadiɔ bei komɛi yɛ Yesu shitee lɛ sɛɛ ni ekɛ ekaselɔi lɛ kpe yɛ niyeli shishi, ni nɛkɛ be nɛɛ wo amɛ hewalɛ waa. (Luka 24:28-32; Yohane 21:9-19) No hewɔ lɛ, eshiwoo akɛ ebaaba Laodikea asafo lɛ mli ni ekɛ amɛ abaye gbɛkɛnaashi niyenii lɛ ji shiwoo ni tsɔɔ akɛ ekɛ mumɔŋ sɛɛnamɔi babaoo baaba abaha amɛ kɛ amɛaahere lɛ moŋ.

20. (a) Mɛni jɛ Kristendom kulɔkulɔfeemɔ lɛ mli ba yɛ Nuŋtsɔ lɛ gbi lɛ shishijee mli? (b) Yesu kojomɔ lɛ esa Kristendom he yɛ mɛɛ gbɛ nɔ?

²⁰ Ŋaawoo ni suɔmɔ yɔɔ mli ni Yesu kɛha Laodikeabii lɛ tsɔɔ nɔ ko babaoo kɛhaa Kristofoi ni afɔ amɛ mu ni eshwɛ ŋmɛnɛ lɛ. Amɛteŋ mɛi komɛi kaiɔ akɛ beni Nuŋtsɔ lɛ gbi lɛ je shishi lɛ, no mli lɛ Kristendom jamɔi lɛ amlibii lɛ efee kulɔkulɔ kwraa yɛ gbɛ ni yɔɔ gbeyei nɔ. Ni amɛaahere wɔ-Nuŋtsɔ lɛ sɛɛkuu yɛ 1914 lɛ nɔ lɛ, esɔfoi lɛ kɛ amɛhe wo amɛhe gbee mli yɛ Jeŋ Ta I mli, nɔ ni maji 28 ni kɛ amɛhe wuɔ ta lɛ ateŋ 24 kɛɔ akɛ amɛji Kristofoi lɛ. Kwɛ bɔ ni amɛ la yi sɔ̃yeli lɛ da ha! Yɛ Jeŋ Ta II, ni no hu awuu titri yɛ Kristendom lɛ mli lɛ, apasa jamɔ he eshai lɛ bafa babaoo “kɛyashɛ ŋwɛi tɔɔ.” (Kpojiemɔ 18:5, New World Translation.) Agbɛnɛ, osɔfoi lɛ etsɔ amɛsɛɛ amɛha Yehowa Maŋtsɛyeli ni baa lɛ, ejaakɛ amɛyafi Jeŋmaji Akpaŋmɔ lɛ, Jeŋmaji Ekomefeemɔ lɛ, kɛ maŋhedɔɔ kɛ maŋ hiɛtsakemɔ kui ni eko kwraa bɛ ni baanyɛ ana tsabaa aha adesai anaagbai lɛ asɛɛ. Jeeŋmɔ beebe Yesu jɛ ekpoo osɔfoi lɛ, ebu amɛ fɔ ni eshɛrɛ amɛ eshwie, taakɛ wolɛɛnyo shɛrɛɔ looi ni ehiii yɛ eyaa mli eshwieɔ lɛ. Shihilɛ ni yɔɔ mɔbɔ ni Kristendom sɔlemɔi lɛ yɔɔ mli ŋmɛnɛ lɛ yeɔ bɔ ni akojo lɛ aha lɛ he odase. Eba akɛ nɔ ni baaba enɔ yɛ naagbee lɛ aaafee kɔkɔbɔɔ nɔ aha wɔ!—Mateo 13:47-50.

21. Kɛjɛ 1919 kɛbaa nɛɛ, te Kristofoi ni yɔɔ anɔkwale asafo lɛ mli lɛ ehere Yesu wiemɔi ni ekɛha Kristofoi ni yɔɔ Laodikea lɛ nɔ amɛha tɛŋŋ?

²¹ Mɛi komɛi yɛ anɔkwale asafo lɛ mli po, ni amɛji aŋkroaŋkroi ni efee kulɔkulɔ tamɔ nu ko ni anuɔ ni nyɛɛɛ akanya mɔ akɛni ebɛ klakla aloo enyɛɛɛ ni eha mɔ he ajɔ lɛ akɛni ebɛ ŋanii hu hewɔ. Shi Yesu miisumɔ esafo lɛ waa. Ehaa Kristofoi ni jieɔ gbɔfeemɔ su kpo lɛ naa lɛ, ni mɛi pii ehere lɛ atuu, tamɔ nɔ ni ekɛ amɛ miiye nii yɛ gbɛkɛnaashi niyeli shishi. Nɔ ni ejɛ mli eba ji akɛ, kɛjɛ 1919 kɛbaa nɛɛ agbele amɛhiŋmɛii ni amɛbanu Biblia mli gbalɛi ashishi. Amɛna hiɛtɛjemɔ kɛ shishinumɔ kpele be mli ŋɔɔmɔ.—Lala 97:11; 2 Petro 1:19.

22. Mɛɛ wɔsɛɛ be gbɛkɛnaashi niyenii ekolɛ eyɔɔ Yesu jwɛŋmɔ mli, ni namɛi baana mli gbɛfaŋnɔ?

²² Yesu baanyɛ ana gbɛkɛnaashi niyenii kroko he jwɛŋmɔ yɛ be mli ni ewieɔ etsɔɔ Laodikeabii lɛ. Wɔkaneɔ yɛ sɛɛ mli yɛ Kpojiemɔ akɛ: “Miishɛɛ ji mɛi ni afɔ̃ amɛ nine kɛba Toobi lɛ yookpeemɔ gbɛkɛnaashi niyenii lɛ shishi lɛ.” Enɛ ji kunimyeli okpɔlɔŋmɛɛ kpeteŋkpele ni akɛjieɔ Yehowa yi yɛ sɛɛ mli beni ekɛ fɔbuu kojomɔ kɛ hiɛkpatamɔ eba apasa jamɔ nɔ lɛ—okpɔlɔŋmɛɛ ni Kristo kɛ eyɛmforo ni ji 144,000 ni yɔɔ ŋwɛi ni amɛyi eshɛ lɛ naa mli gbɛfaŋnɔ lɛ. (Kpojiemɔ 19:1-9) Blema Laodikea asafo lɛ mlibii ni hereɔ tsɛmɔ lɛ nɔ—hɛɛ, kɛ Kristo Yesu nyɛmimɛi anɔkwafoi ni yɔɔ ŋmɛnɛ, ni woɔ atadei yɛji ni haa ayɔseɔ amɛ akɛ anɔkwa Kristofoi ni afɔ amɛ mu lɛ—fɛɛ kɛ amɛ Ayɛmforo Wu lɛ baaye nii yɛ gbɛkɛnaashi niyenii lɛ shishi. (Mateo 22:2-13) Mɛɛ kanyamɔ ni hewalɛ yɔɔ mli koni afee ekaa ni atsake tsui po enɛ ji nɛkɛ!

Maŋtsɛsɛi Kɛha Kunimyelɔi Lɛ

23, 24. (a) Mɛɛ nyɔmɔwoo kroko Yesu wieɔ he? (b) Mɛɛ be mli Yesu ta e-Mesia maŋtsɛsɛi lɛ nɔ, ni mɛɛ be mli eje mɛi ni kɛɔ akɛ amɛji Kristofoi lɛ akojomɔ shishi? (d) Mɛɛ shiwoo ko ni yɔɔ naakpɛɛ Yesu kɛha ekaselɔi lɛ beni eto egbele lɛ Kaimɔ lɛ shishi lɛ?

²³ Yesu wieɔ nyɔmɔwoo kroko he, akɛ: “Kunimyelɔ lɛ, maha lɛ gbɛ ni ekɛ mi ata mimaŋtsɛsɛi lɛ nɔ, taakɛ bɔ nɔŋŋ ni mi hu miye kunim, ni mikɛ mi-Tsɛ ta emaŋtsɛsɛi lɛ nɔ lɛ.” (Kpojiemɔ 3:21) Yɛ David wiemɔ ni yɔɔ Lala 110:1, 2 lɛ mlibaa mli lɛ, atee Yesu ni hiɛ emuuyeli mli, ni eye je lɛ nɔ kunim lɛ shi yɛ afi 33 Ŋ.B. ni awo enɔ koni ekɛ e-Tsɛ ayata shi yɛ e-Ŋwɛi maŋtsɛsɛi lɛ nɔ. (Bɔfoi lɛ Asaji 2:32, 33) Yɛ afi kroko ni hiɛdɔɔ yɔɔ mli, 1914 mli lɛ, Yesu ba koni ebata lɛ diɛŋtsɛ e-Mesia maŋtsɛsɛi lɛ nɔ akɛ Maŋtsɛ kɛ Kojolɔ. Yɛ anɔkwale mli lɛ, kojomɔ lɛ je shishi yɛ 1918 yɛ mɛi ni kɛɔ akɛ amɛji Kristofoi lɛ ateŋ. Abaatee kunimyelɔi ni afɔ amɛ mu ni gboi dani nakai be lɛ shɛ lɛ ashi ni amɛyafata Yesu he yɛ e-Maŋtsɛyeli lɛ mli. (1 Petro 4:17) Ekɛ shiwoo nɛɛ ha amɛ yɛ be mli ni etoɔ egbele lɛ Kaimɔ lɛ, ni ekɛɛ ekaselɔi lɛ akɛ: “Miito maŋtsɛyeli maha nyɛ taakɛ bɔ ni mi-Tsɛ eto eha mi lɛ, koni nyɛye nii ni nyɛnu yɛ mikpɔlɔŋ lɛ he yɛ mimaŋtsɛyeli lɛ mli, ni nyɛtara sɛii anɔ ni nyɛkojo Israel akutsei nyɔŋma-kɛ-enyɔ lɛ.”—Luka 22:28-30.

²⁴ Mɛɛ nitsumɔ ni yɔɔ naakpɛɛ nɛ—ni akɛ Maŋtsɛ ní yeɔ nɔ lɛ aaata shi “yɛ jeŋ hee lɛ mli” ni amɛdamɔ efɔleshaa ni yeɔ emuu lɛ nɔ amɛkɛ lɛ ana adesai toibolɔi aje lɛ ni aaawo amɛnɔ kɛyashɛ Eden emuuyeli mli lɛ mli gbɛfaŋnɔ! (Mateo 19:28; 20:28) Taakɛ Yohane kɛɔ wɔ lɛ, Yesu feɔ mɛi ni yeɔ kunim lɛ “maŋtsɛmɛi kɛ osɔfoi ehaa e-Tsɛ Nyɔŋmɔ lɛ,” koni amɛtara maŋtsɛsɛii anɔ kɛbɔle Yehowa diɛŋtsɛ ŋwɛi maŋtsɛsɛi fɛfɛo lɛ. (Kpojiemɔ 1:6; 4:4) Nyɛhaa wɔ fɛɛ—kɛ wɔji mɛi ni afɔ amɛ mu lɛ ateŋ mɛi komɛi loo shikpɔŋ hee lɛ nɔ bii ni hiɛ ka nɔ akɛ amɛaana Paradeiso ni aku sɛɛ akɛba lɛ mli gbɛfaŋnɔ lɛ—wɔkɛ Yesu wiemɔi ni ekɛha Laodikeabii lɛ ato wɔtsui mli!—2 Petro 3:13; Bɔfoi lɛ Asaji 3:19-21.

25. (a) Taakɛ eji yɛ shɛɛ saji ni etsɔ hiɛ lɛ amli lɛ, te Yesu kɛ eshɛɛ sane ni ekɛha Laodikea lɛ ba naagbee eha tɛŋŋ? (b) Te esa akɛ Kristofoi aŋkroaŋkroi ni yɔɔ ŋmɛnɛ lɛ ahere Yesu wiemɔi ni ekɛha asafo ni yɔɔ Laodikea lɛ nɔ amɛha tɛŋŋ?

²⁵ Taakɛ eji yɛ saji ni etsɔ hiɛ lɛ amli lɛ, Yesu kɛ enɛ baa naagbee kɛ ŋaawoo: “Mɔ ni yɔɔ toi lɛ, ha ni enu nɔ ni mumɔ lɛ kɛɔ asafoi lɛ.” (Kpojiemɔ 3:22) Naagbee be lɛ mli vii wɔyɔɔ nɛɛ. Odaseyelii lɛ ebɔle wɔ akɛ Kristendom he ejɔ ŋanii yɛ suɔmɔ gbɛfaŋ. Nɔ ni tamɔɔɔ enɛ lɛ, eba akɛ wɔ akɛ anɔkwale Kristofoi lɛ kɛ hehiamɔ aaahere Yesu shɛɛ sane ni ekɛhaa Laodikea asafo lɛ nɔ, hɛɛ, kɛ wɔ Nuŋtsɔ lɛ shɛɛ saji kpawo ni ekɛha asafoi lɛ fɛɛ. Wɔbaanyɛ wɔfee enɛ kɛtsɔ Yesu gbalɛ kpeteŋkpele kɛha wɔgbi nɛɛ lɛ mlibaa lɛ mli gbɛfaŋnɔ ni wɔɔna yɛ ekaa mli lɛ nɔ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.”—Mateo 24:12-14.

26. Mɛɛ be mli Yesu wie ekoŋŋ etsɔɔ Yohane tɛ̃ɛ, shi mɛni mli ekɛ ehe woɔ?

²⁶ Yesu ŋaawoo ni ekɛha asafoi kpawo lɛ eba naagbee. Ekɛ Yohane ewieee dɔŋŋ yɛ Kpojiemɔ lɛ mli aahu kɛyashi enaagbee yitso lɛ; shi ekɛ ehe wo ninai lɛ babaoo mli, akɛ nɔkwɛmɔnɔ lɛ, yɛ Yehowa fɔbuu kojomɔ he nitsumɔ mli. Agbɛnɛ nyɛhaa wɔfataa Yohane kuu lɛ he ni wɔkɛpɛia ninaa ni ji enyɔ ni yɔɔ naakpɛɛ ni Nuŋtsɔ Yesu Kristo jie lɛ kpo lɛ mli.

[Shishigbɛ niŋmaa]

[Akrabatsa ni yɔɔ baafa 73]

Ninamɔ kɛ Nilee Akaŋshii

Afi 1956 mli lɛ, adafitswaa wolo mli niŋmalɔ ko ŋma akɛ: “Abuɔ naa akɛ yɛ afii oha ni ho lɛ mli lɛ, gbɔmɔ taomɔ nii ni akane ji 72, emli 16 ji nɔ ni abuɔ akɛ hiamɔ nii. Ŋmɛnɛ, gbɔmɔ taomɔ nii ni akane ji 474, ni abuɔ emli 94 akɛ hiamɔ nii. Afii oha ni eho nɛ lɛ, nibii komekomei ni afeɔ lɛ mli 200 ji nɔ ni nihɔɔlɔi woɔ gbɔmɔ fɛɛ gbɔmɔ hewalɛ koni ehe—shi ŋmɛnɛ nibii komekomei 32,000 ni biɔ ni nihɔɔlɔi aye abua ehemɔ yɔɔ. Gbɔmɔ hiamɔ nii lɛ, fioo pɛ ni—shi etaomɔ nii lɛ, ebɛ naagbee.” Ŋmɛnɛ, saji ni awieɔ he babaoo awoɔ gbɔmɛi ayitseiaŋ ji jwɛŋmɔ ni ahiɛ akɛ heloo gbɛfaŋ ninamɔ kɛ nibii babaoo ni gbɔmɔ yɔɔ lɛ ji nɔ titri yɛ shihilɛ mli. No hewɔ lɛ, mɛi pii kuɔ amɛhiɛ amɛshwieɔ ŋaawoo ni nilee yɔɔ mli ni yɔɔ Jajelɔ 7:12 lɛ nɔ: “Nilee tamɔ hɔɔŋ, tamɔ bɔ ni shika hu tamɔ hɔɔŋ lɛ; shi nɔ ni nilee kɛfe ji akɛ, nilee hereɔ etsɛ yiwala.”

[Mfoniri ni yɔɔ baafa 67]

Nu ni baa Laodikea lɛ baafee nɔ ni efee kulɔkulɔ ni eŋɔɔɔ. Kristofoi ni yɔɔ Laodikea lɛ yɛ mumɔ ko ni efee kulɔkulɔ ni haaa mɔ tsui anyɔ emli

Yitso 14

Yehowa Ŋwɛi Maŋtsɛsɛi lɛ Anunyam Lɛ

Ninaa 2​—Kpojiemɔ 4:1–5:14

Saneyitso: Nibii ni yɔɔ gbeyei kɛ naakpɛɛ miiya nɔ yɛ Nyɔŋmɔ kojomɔ maŋtsɛsɛi lɛ hiɛ

Emlibaa Be: Nɛkɛ ninaa nɛɛ kɔɔ nibii ni ba kɛjɛ 1914 aahu kɛyashi afii akpe lɛ naagbee kɛ esɛɛ, yɛ be mli ni bɔɔ nɔ fɛɛ bɔɔ nɔ ni yɔɔ ŋwɛi kɛ shikpɔŋ nɔ baajie Yehowa yi lɛ he.—Kpojiemɔ 5:13

 1. Mɛni hewɔ esa akɛ wɔnya Yohane ninai ni egbaa wɔ emli saji lɛ ahe waa lɛ?

YOHANE jeɔ shishi egbaa wɔ ninai ni kanyaa susuma lɛ mli saji. Eyɛ mumɔ mli yɛ Nuŋtsɔ lɛ gbi lɛ mli lolo. No hewɔ lɛ, nɔ ni etsɔɔ mli lɛ hiɛ shishinumɔ ko ni mli kwɔ waa kɛha wɔ mɛi ni wɔyɔɔ wala mli yɛ nakai gbi lɛ mli lɛ. Yehowa tsɔ nɛkɛ ninai nɛɛ anɔ ejie nɔ ni eha ŋwɛi ni anaaa jɛmɛ lɛ hiɛ lɛ diɛŋtsɛ ni ehaa wɔleɔ ekojomɔi ni ekɛbaaba shikpɔŋ lɛ nɔ lɛ mli. Agbɛnɛ, kɛ wɔji mɛi ni yɔɔ ŋwɛi loo shikpɔŋ nɔ hiɛnɔkamɔ lɛ, nɛkɛ kpojiemɔi nɛɛ yeɔ buaa wɔ ni wɔnaa wɔ gbɛhe yɛ Yehowa yiŋtoo mli. No hewɔ lɛ, esa akɛ wɔya nɔ ni wɔnya Yohane wiemɔ nɛɛ he akɛ: “Miishɛɛ ji mɔ ni kaneɔ lɛ kɛ mɛi ni nuɔ gbalɛ wiemɔi lɛ, kɛ mɛi ni ŋɔɔ nibii ni aŋma yɛ mli lɛ amɛtoɔ lɛ.”—Kpojiemɔ 1:3, New World Translation.

 2. Mɛɛ niiashikpamɔ Yohane na agbɛnɛ?

² Nɔ ni nyiɛ sɛɛ ni Yohane na lɛ fe nɔ fɛɛ nɔ ni adesai ni yɔɔ ŋmɛnɛŋmɛnɛ beaŋ lɛ naa yɛ video nɔ lɛ! Eŋma akɛ: “Nii nɛɛ asɛɛ lɛ mikwɛ ni naa, shinaa ko ni agbele yɛ ŋwɛi; ni klɛŋklɛŋ gbee ni minu ni tamɔ tɛtrɛmaŋtrɛ ni kɛ mi wie lɛ kɛɛ: Kwɔɔ kɛba biɛ nɛɛ, ni matsɔɔo nii ni sa akɛ aba mli yɛ nii nɛɛ asɛɛ.” (Kpojiemɔ 4:1) Yohane ni yɔɔ ninaa mli lɛ gbu shi kɛtee ŋwɛi ni anaaa jɛmɛ lɛ yɛ Yehowa hiɛ, he ni awo nɔ grɔŋŋ kwraa fe wɔ ŋwɛiniiaŋ shɔŋŋ ni ŋmɛnɛŋmɛnɛ beaŋ ŋulamiiaŋ shifolɔi eyakpa shi yɛ jɛmɛ lɛ, nɔ ni kwɔ kwraa fe wɔ jeŋ muu fɛɛ ŋulamii kuikui nɛɛ. Afɔ nine atsɛ Yohane koni ekɛ ehiŋmɛi abakwɛ naakpɛɛ nii ni tsakeɔ yɛ be fɛɛ mli yɛ ŋwɛi mumɔi ashihilɛ he ni kwɔ fe fɛɛ, yɛ he ni Yehowa diɛŋtsɛ ta maŋtsɛsɛi nɔ yɛ lɛ tamɔ shinaa ko ni agbele naa ni eetsɔ mli. (Lala 11:4; Yesaia 66:1) Mɛɛ hegbɛ po nɛ!

 3. Mɛni “gbee ni tamɔ tɛtrɛmaŋtrɛ” lɛ kaiɔ wɔ, ni ŋwanejee ko bɛ he akɛ namɔ ji enɛ Jɛɛhe?

³ Biblia lɛ etsɔɔɔ nɔ ni “klɛŋklɛŋ gbee” lɛ ji. Taakɛ Yesu gbee ni wa ni anu kɛjɛ shishijee lɛ ji lɛ, egbɛɛmɔ tamɔ tɛtrɛmaŋtrɛ ni naa wa. (Kpojiemɔ 1:10, 11) Ehaa wɔkaiɔ tɛtrɛmaŋtrɛ gbɛɛmɔ ni fee okadi akɛ Yehowa eba Sinai Gɔŋ lɛ nɔ lɛ. (2 Mose 19:18-20) Ŋwanejee ko bɛ he akɛ, Yehowa ji famɔ fɛɛ Jɛɛhe kpeteŋkpele. (Kpojiemɔ 1:1) Egbele shinaa lɛ koni Yohane atsɔ ninaa mli abote Yehowa maŋtsɛyeli nɔyeli he kpeteŋkpele lɛ krɔŋkrɔŋ fe fɛɛ lɛ mli.

Yehowa Hiɛ ni Kpɛlɛɔ Kaŋkaŋ Lɛ

 4. (a) Mɛni ji shishinumɔ ni Yohane ninaa lɛ yɔɔ kɛha Kristofoi ni afɔ amɛ mu lɛ? (b) Mɛɛ shishinumɔ ninaa lɛ yɔɔ kɛha mɛi ni yɔɔ hiɛnɔkamɔ akɛ amɛaahi shi kɛya naanɔ yɛ shikpɔŋ nɔ lɛ?

⁴ Mɛni Yohane naa? Bo toi, yɛ be mli ni egbaa wɔ eniiashikpamɔ ni yɔɔ nyam lɛ: “Ni amrɔ lɛ miyɛ mumɔ mli; ni naa, maŋtsɛsɛi ko ma shi yɛ ŋwɛi, ni mɔ ko ta maŋtsɛsɛi lɛ nɔ.” (Kpojiemɔ 4:2) Yɛ hiŋmɛitswaa mli lɛ, atsɔ Nyɔŋmɔ mumɔ ni tsuɔ nii lɛ nɔ akɛ Yohane tee Yehowa maŋtsɛsɛi lɛ hiɛ diɛŋtsɛ yɛ mumɔ mli. Kwɛ miishɛɛ ni enɛ ji kɛha Yohane! Aha etsɔ hiɛ ena ŋwɛi he ni asaa “gboshinii ni fiteee ni he bɛ kpa ko ni ekwaaa” ni kpɛlɛɔ kaŋkaŋ lɛ ato aha lɛ kɛ Kristofoi krokomɛi ni afɔ amɛ mu lɛ he ninaa ni kpɛlɛɔ. (1 Petro 1:3-5; Filipibii 3:20) Kɛha mɛi ni amɛhiɛnɔkamɔ ji ni amɛhi shi kɛya naanɔ yɛ shikpɔŋ nɔ lɛ, Yohane ninaa lɛ hu ji nɔ ko ni shishinumɔ yɔɔ mli waa kɛha amɛ. Eyeɔ ebuaa amɛ ni amɛnuɔ anunyam ni yɔɔ Yehowa hiɛ kɛ bɔ ni Yehowa kɛ ŋwɛi nɔyeli gbɛjianɔtoo lɛ tsuɔ nii ehaa ni ekɛkojoɔ jeŋmaji lɛ ni yɛ no sɛɛ lɛ ekɛyeɔ adesai awala nɔ yɛ shikpɔŋ nɔ lɛ shishi. Yehowa ji Nyɔŋmɔ ni toɔ gbɛjianɔ kpakpa fe fɛɛ lɛlɛŋ!

 5. Mɛni diɛŋtsɛ ji nɔ ni Yohane naa ni akɛ kpaŋmɔ adeka lɛ kpatamɔ sɛi lɛ fee he mfoniri lɛ?

⁵ Nibii ni Yohane na yɛ ŋwɛi lɛ tamɔ nibii ni yɔɔ kpee buu ni yɔɔ ŋa lɛ nɔ lɛ mli lɛ. Atsɔ hiɛ ama enɛ aaafee afii 1,600 akɛ anɔkwa jamɔ kpee buu kɛha Israelbii lɛ. Nɔ ni yɔɔ nakai kpee buu lɛ Krɔŋkrɔŋ Fe Fɛɛ lɛ mli ji kpaŋmɔ adeka lɛ, ni nakai Adeka lɛ kpatamɔ sɛi ni akɛ shika ŋmiiŋmi efee lɛ nɔ Yehowa diɛŋtsɛ wieɔ kɛjɛɔ. (2 Mose 25:17-22; Hebribii 9:5) No hewɔ lɛ, Adeka lɛ kpatamɔ sɛi lɛ sɔmɔɔ akɛ Yehowa maŋtsɛsɛi lɛ he okadi. Yohane miina nakai okadi nibii lɛ pɔtɛɛ agbɛnɛ: Jeŋ Muu Fɛɛ Nuŋtsɔ Yehowa diɛŋtsɛ ni ta shi fɛfɛo yɛ anunyam fɛɛ mli yɛ eŋwɛi maŋtsɛsɛi ni kwɔ grɔŋŋ lɛ nɔ!

 6. Mɛni Yohane haa wɔyooɔ loo wɔnaa yɛ Yehowa he, ni mɛni hewɔ enɛ sa lɛ?

⁶ Nɔ ni tamɔɔɔ gbalɔi ni tsɔ hiɛ ni na Yehowa maŋtsɛsɛi lɛ he ninai lɛ, Yohane etsɔɔɔ bɔ ni Mɔ Krɔŋkrɔŋ ni ta nɔ lɛ ji lɛ mli fitsofitso. (Ezekiel 1:26, 27; Daniel 7:9, 10) Shi Yohane haa wɔnaa bɔ ni esusuɔ Mɔ ni ta maŋtsɛsɛi lɛ nɔ lɛ he ehaa lɛ yɛ nɛkɛ wiemɔi nɛɛ amli: “Ni mɔ ni ta nɔ lɛ, kɛ akwɛ lɛ lɛ, etamɔ yaspi kɛ sardi tɛ, ni kwaabuɛtɛ bɔle maŋtsɛsɛi lɛ he, ni kɛ akwɛ lɛ, etamɔ smaragde tɛ.” (Kpojiemɔ 4:3) Mɛɛ anunyam ni anyɛŋ akɛ nɔ ko ato he nɛ! Yohane na nɔ ko ni yɔɔ fɛo ni kpɛlɛɔ tamɔ ojarawa tɛi ni asha he ni miikpɛlɛ. Kwɛ bɔ ni enɛ kɛ bɔ ni kaselɔ Yakobo tsɔɔ akɛ Yehowa ji lɛ mli eha akɛ “lai a-Tsɛ” lɛ kpaa gbee ehaa! (Yakobo 1:17) Beni eŋma Kpojiemɔ lɛ sɛɛ etsɛɛɛ ni Yohane diɛŋtsɛ jaje akɛ: “Nyɔŋmɔ lɛ, la ji lɛ, ni duŋ ko bɛ emli kwraa.” (1 Yohane 1:5) Mɛɛ anunyam Gbɔmɔ ni nɔ bɛ Yehowa ji diɛŋtsɛ nɛkɛ!

 7. Mɛni wɔbaanyɛ wɔkase kɛjɛ anɔkwale ni eji akɛ kwaabuɛtɛ ebɔle Yehowa maŋtsɛsɛi lɛ he kɛkpe lɛ mli?

⁷ Kadimɔ akɛ Yohane na ni kwaabuɛtɛ ebɔle maŋtsɛsɛi lɛ he, ni esu tamɔ smaragde tɛ baa ŋmɔŋ. Hela wiemɔ ni atsɔɔ shishi yɛ biɛ akɛ kwaabuɛtɛ (irʹis) lɛ tsɔɔ nɔ ko ni yɔɔ kokoloo. Atsi kwaabuɛtɛ ta klɛŋklɛŋ yɛ Biblia lɛ mli akɛto Noa gbii lɛ ahe. Beni Nua Afua lɛ ba shi lɛ, Yehowa ha kwaabuɛtɛ pue yɛ atatui lɛ amli, ni etsɔɔ nɔ ni edamɔ shi kɛha lɛ mli yɛ nɛkɛ wiemɔi nɛɛ amli: “Miŋɔ mikwaabuɛtɛ mito atatui lɛ amli, ni efee kpaŋmɔ ni yɔɔ mi kɛ shikpɔŋ lɛ teŋ lɛ he okadi. Ni makai mikpaŋmɔ lɛ ni mikɛ nyɛ kɛ wala susuma fɛɛ wala susuma ni yɔɔ heloo fɛɛ mli ekpaŋ lɛ, ni nui lɛ tsɔŋ afua ni eeekpata heloo fɛɛ hiɛ dɔŋŋ.” (1 Mose 9:13, 15) Belɛ mɛni ji nɔ ni nɛkɛ ŋwɛi ninaa nɛɛ baaha Yohane akai? Kwaabuɛtɛ ni ena lɛ baakai lɛ yɛ bɔ ni ehe hiaa ni toiŋjɔlɛ wekukpaa akã Yehowa kɛ mɔ ko teŋ, tamɔ nɔ ni Yohane kuu lɛ naa mli ŋɔɔmɔ ŋmɛnɛ lɛ. Agbɛnɛ hu, bɔ ni Yehowa hiɛ baa yɔɔ kpoo ni toiŋjɔlɛ yɔɔ mli, kpoofeemɔ ni abaakpa mli aha adesai toibolɔi fɛɛ yɛ be mli ni Yehowa shiɔ ebuu ehaa adesai fɛɛ nɔ yɛ shikpɔŋ hee lɛ nɔ lɛ baaka ejwɛŋmɔ mli.—Lala 119:165; Filipibii 4:7; Kpojiemɔ 21:1-4.

Onukpai 24 lɛ ni Ayooɔ Amɛ

 8. Namɛi Yohane na ni amɛbɔle maŋtsɛsɛi lɛ he lɛ, ni amɛdamɔ shi kɛha namɛi?

⁸ Yohane le akɛ ahalaa osɔfoi lɛ koni amɛsɔmɔ yɛ blema kpee buu lɛ mli. No hewɔ lɛ nɔ ni ena ni etsɔɔ mli kɛnyiɛ sɛɛ lɛ baaha enaa akpɛ ehe: “Ni maŋtsɛsɛi lɛ he lɛ maŋtsɛsɛii nyɔŋmai-enyɔ kɛ ejwɛ mamɔ shi kɛkpe, ni onukpai nyɔŋmai-enyɔ kɛ ejwɛ tara sɛii lɛ anɔ, amɛwo atadei yɛji ni shika akekerei fimɔ amɛyitsei.” (Kpojiemɔ 4:4) Hɛɛ, ni aaana osɔfoi moŋ lɛ, ana onukpai 24, ni amɛtara maŋtsɛsɛii anɔ ni akekerei bumɔ amɛyitsei tamɔ maŋtsɛmɛi. Namɛi ji onukpai nɛɛ? Amɛjeee mɛi komɛi akɛ Kristofoi asafo lɛ mli mɛi ni afɔ amɛ mu lɛ, ni atee amɛ shi ni amɛtara ŋwɛi gbɛhei ni Yehowa wo amɛ shi yɛ he lɛ. Te wɔfeɔ tɛŋŋ wɔleɔ enɛ?

9, 10. Te wɔfeɔ tɛŋŋ wɔleɔ akɛ onukpai 24 lɛ damɔ shi kɛha Kristofoi asafo ni afɔ amɛ mu lɛ ni yɔɔ eŋwɛi gbɛhe yɛ anunyam mli lɛ?

⁹ Klɛŋklɛŋ kwraa lɛ, amɛbumɔ maŋtsɛfaii. Biblia lɛ wieɔ Kristofoi ni afɔ amɛ mu lɛ ahe akɛ amɛnine shɛɔ ‘akekere ni fiteee nɔ,’ ni amɛnine shɛɔ naanɔ wala nɔ—wala ni gbele bɛ mli. (1 Korintobii 9:25; 15:53, 54) Shi akɛni nɛkɛ onukpai 24 nɛɛ tara maŋtsɛsɛii anɔ hewɔ lɛ, shika akekere ni fimɔ amɛyitsei lɛ damɔ shi kɛha odehei ahegbɛ. (Okɛto Kpojiemɔ 6:2; 14:14 he.) Enɛ fiɔ sanenaamuu akɛ onukpai 24 lɛ feɔ Yesu nanemaa hei asɛɛnyiɛlɔi ni afɔ amɛ mu lɛ he mfoniri yɛ amɛ ŋwɛi gbɛhe lɛ sɛɛ, ejaakɛ Yesu kɛ amɛ efee kpaŋmɔ koni amɛbatara maŋtsɛsɛii anɔ yɛ e-Maŋtsɛyeli lɛ mli. (Luka 22:28-30) Atsɔɔ mli akɛ Yesu kɛ nɛkɛ onukpai 24 nɛɛ pɛ—ni ŋwɛi bɔfoi lɛ po fataaa he—yeɔ maŋtsɛ yɛ ŋwɛi yɛ Yehowa hiɛ.

¹⁰ Enɛ kɛ shiwoo ni Yesu kɛha Laodikea asafo lɛ kpaa gbee: “Kunimyelɔ lɛ, maha lɛ hegbɛ ni ekɛ mi ata mimaŋtsɛsɛi lɛ nɔ.” (Kpojiemɔ 3:21) Shi ŋwɛi nitsumɔ ni akɛha onukpai 24 lɛ jeee nɔ ni aje he husu aha nɔyeli he nitsumɔ pɛ. Beni ekpaa Kpojiemɔ wolo lɛ hiɛ lɛ, Yohane kɛɛ yɛ Yesu he akɛ: “Eŋɔ wɔ efee maŋtsɛmɛi kɛ osɔfoi eha e-Tsɛ Nyɔŋmɔ lɛ.” (Kpojiemɔ 1:5, 6) Mɛnɛɛmɛi bafeɔ maŋtsɛmɛi kɛ osɔfoi fɛɛ. “Amɛaatsɔmɔ Nyɔŋmɔ kɛ Kristo osɔfoi, ni amɛkɛ lɛ aaaye maŋtsɛ afii akpe.”—Kpojiemɔ 20:6.

11. Mɛni hewɔ esa akɛ onukpai lɛ ayibɔ afee 24 lɛ, ni mɛni ji nɔ ni nakai yibɔ lɛ tsɔɔ?

¹¹ Mɛni ji nɔ ni yibɔ okadi ni ji 24 lɛ tsɔɔ, yɛ nɔ ni Yohane na onukpai 24 ni ebɔle maŋtsɛsɛi lɛ he lɛ hewɔ? Akɛ blema Israel osɔfoi anɔkwafoi lɛ fee mɛnɛɛmɛi ahe mfoniri yɛ gbɛi sɔrɔtoi anɔ. Bɔfo Petro ŋma eyaha Kristofoi ni afɔ amɛ mu lɛ akɛ: “Shi nyɛ lɛ, weku ni ahala ji nyɛ, maŋtsɛmɛi ni yeɔ osɔfoi, jeŋmaŋ krɔŋkrɔŋ, maŋ ni eŋɔfee enɔ.” (1 Petro 2:9) Nɔ ni yɔɔ miishɛɛ ji akɛ, ajara blema Yudafoi osɔfoyeli lɛ mli afee lɛ kui 24. Kuu fɛɛ kuu yɛ otsii ni ekɛsɔmɔɔ yɛ Yehowa hiɛ yɛ afi lɛ mli, no hewɔ lɛ atsuɔ sɔɔmɔ krɔŋkrɔŋ lɛ he nii ni afooo mli. (1 Kronika 24:5-19) Belɛ eja mɔ akɛ aaafee onukpai 24 he mfoniri yɛ Yohane ninaa ni kɔɔ ŋwɛi osɔfoyeli lɛ he lɛ mli ejaakɛ nɛkɛ osɔfoyeli nɛɛ sɔmɔɔ Yehowa daa, ni afooo mli. Kɛ agbe naa lɛ, abaana kui 24, ni kuu fɛɛ kuu hiɛ kunimyelɔi 6,000, ejaakɛ Kpojiemɔ 14:1-4 kɛɔ wɔ akɛ 144,000 (24 x 6,000) lɛ ji mɛi ni “ahe kɛjɛ adesai ateŋ” koni amɛkɛ Toobi, Yesu Kristo adamɔ ŋwɛi Zion Gɔŋ lɛ nɔ. Akɛni yibɔ okadi 12 lɛ damɔ shi kɛha ŋwɛi gbɛjianɔtoo ni ŋmɛɔ pɛpɛɛpɛ hewɔ lɛ, 24 lɛ bɔɔ he toi enyɔ—aloo ewoɔ gbɛjianɔtoo ni tamɔ nɛkɛ mli hewalɛ.

Sarawai, Gbee kɛ Nugbɔshiimɔi

12. Mɛni Yohane na ni enu yɛ no sɛɛ, ni mɛni “sarawai kɛ gbee kɛ nugbɔshiimɔi” lɛ kɛbaa ojwɛŋmɔ mli?

¹² Mɛni Yohane na ni enu hu yɛ enɛ sɛɛ? “Ni sarawai kɛ gbee kɛ nugbɔshiimɔi jɛ maŋtsɛsɛi lɛ mli.” (Kpojiemɔ 4:5a) Kwɛ bɔ ni enɛ haa wɔkaiɔ Yehowa ŋwɛi hewalɛ lɛ kpojiemɔ yɛ gbɛ ni yɔɔ gbeyei nɔ lɛ! Akɛ nɔkwɛmɔnɔ lɛ, beni Yehowa “kpeleke shi” kɛba Sinai Gɔŋ lɛ nɔ lɛ, Mose bɔ amaniɛ akɛ: “Ni eba mli akɛ gbi ni ji gbi etɛ lɛ nɔ leebi lɛ, nugbɔshiimɔi kɛ sarawa gbalamɔi kɛ atatu kpii ba gɔŋ lɛ nɔ, kɛ tɛtrɛmaŋtrɛ gbee ni naa wa naakpa; . . . Ni beni tɛtrɛmaŋtrɛ lɛ gbɛɛɔ waa kɛyaa nɔ lɛ, Mose wie ni Nyɔŋmɔ kɛ gbee here lɛ nɔ.”—2 Mose 19:16-19.

13. Sarawai ni baa kɛjɛɔ Yehowa maŋtsɛsɛi lɛ mli lɛ feɔ mɛni he mfoniri?

¹³ Yɛ Nuŋtsɔ lɛ gbi lɛ mli hu lɛ, Yehowa haa anuɔ ehewalɛ kɛ ba ni eba lɛ he yɛ gbɛ ni yɔɔ nyam nɔ. Dabi, jeee kɛtsɔ sarawa gbamɔ diɛŋtsɛ nɔ, ejaakɛ Yohane miina okadii. Belɛ mɛni ji nɔ ni sarawai lɛ damɔ shi kɛha? Ojogbaŋŋ, sarawa gbalamɔ lɛ baanyɛ akpɛlɛ, ni ebaanyɛ eyi mɔ ko nɔ ni egbe lɛ hu. No hewɔ lɛ, nɛkɛ sarawa ni faa kpo kɛjɛɔ Yehowa maŋtsɛsɛi lɛ mli lɛ feɔ hiɛtɛjemɔ loo shishinumɔ ni etee nɔ ekɛha ewebii lɛ yɛ be fɛɛ mli, kɛ agbɛnɛ nɔ ni jeɔ kpo yɛ faŋŋ mli lɛ, ekojomɔ shɛɛ saji ni tamɔ la lɛ.—Okɛto Lala 18:15; 144:5, 6; Mateo 4:14-17; 24:27 he.

14. Gbeei ejije ŋmɛnɛ yɛ mɛɛ gbɛ nɔ?

¹⁴ Ni gbee lɛ hu? Yɛ be mli ni Yehowa kpelekeɔ shi kɛbaa Sinai Gɔŋ lɛ nɔ lɛ, gbee ko wie tsɔɔ Mose. (2 Mose 19:19) Gbee ni jɛ ŋwɛi ji nɔ ni jaje famɔi kɛ saji sɔrɔtoi ni yɔɔ Kpojiemɔ wolo lɛ mli lɛ pii. (Kpojiemɔ 4:1; 10:4, 8; 11:12; 12:10; 14:13; 16:1, 17; 18:4; 19:5; 21:3) Ŋmɛnɛ, Yehowa hu kɛ famɔi kɛ sane jajemɔi eha ewebii, ni eha shishinumɔ ni amɛyɔɔ yɛ Biblia mli gbalɛi kɛ shishitoo mlai ahe lɛ mli efee faŋŋ ni emli ekpɛ. Afɔɔ saji ni kɔɔ hiɛtɛjemɔ loo nibii ahe shishinumɔ he lɛ kɛhamɔ yɛ majimaji ateŋ kpeei ashishi, ni ajajeɔ nɛkɛ Biblia mli anɔkwalei nɛɛ hu atsɔɔ yɛ jeŋ muu fɛɛ. Bɔfo Paulo wie sanekpakpa lɛ shiɛlɔi anɔkwafoi lɛ ahe akɛ: “Lɛlɛŋ akɛ amɛgbee ejije kɛtee shikpɔŋ muu lɛ fɛɛ nɔ, ni amɛwiemɔi lɛ eshɛ jeŋ naagbee hei.”—Romabii 10:18.

15. Mɛɛ nugbɔshiimɔi eje kpo kɛjɛ maŋtsɛsɛi lɛ mli yɛ Nuŋtsɔ lɛ gbi nɛɛ mli?

¹⁵ Nugbɔshiimɔi ji nɔ ni fɔɔ sarawa gbalamɔi asɛɛ nyiɛmɔ. David wie nugbɔshimɔ diɛŋtsɛ he akɛ “Yehowa gbee.” (Lala 29:3, 4) Beni Yehowa fata David he ni ewuu eshi ehenyɛlɔi lɛ, awie akɛ nugbɔshiimɔ ba kɛjɛ E-ŋɔɔ. (2 Samuel 22:14; Lala 18:14) Elihu kɛɛ Hiob akɛ Yehowa gbee jijeɔ tamɔ nugbɔshiimɔ, beni E-feɔ “nibii wuji kpelei hu ni wɔnaaa naa” lɛ. (Hiob 37:4, 5) Yɛ Nuŋtsɔ lɛ gbi lɛ fa nɛɛ mli lɛ, Yehowa ‘eshimɔ,’ ni ekɛbɔ kɔkɔ yɛ nibii wuji ni ebaafee eshi ehenyɛlɔi lɛ ahe. Nɛkɛ okadi nugbɔshiimɔi nɛɛ ejije shii abɔ kɛbɔle shikpɔŋ lɛ fɛɛ nɔ. Miishɛɛ jio kɛ obo nɛkɛ nugbɔshiimɔi ni jijeɔ nɛɛ toi ni okɛ olilɛi miitsu nii yɛ nilee mli okɛmiifata amɛnaawalɛ lɛ he!—Yesaia 50:4, 5; 61:1, 2.

La Haai kɛ Ashwishwɛ Ŋshɔ

16. Mɛni “la haai kpawo ni tsoɔ” lɛ feɔ he mfoniri?

¹⁶ Mɛni hu Yohane na ekoŋŋ? Enɛ: “Ni la haai kpawo ni tsoɔ ni ji Nyɔŋmɔ mumɔi kpawo lɛ yɛ maŋtsɛsɛi lɛ hiɛ. Ni nɔ ko tamɔ ashwishwɛ ŋshɔ ni tamɔ kristalo yɛ maŋtsɛsɛi lɛ hiɛ.” (Kpojiemɔ 4:5b, 6a) Yohane diɛŋtsɛ kɛɔ wɔ nɔ ni la kpawo lɛ damɔ shi kɛha: “Ni la haai kpawo ni tsoɔ ni ji Nyɔŋmɔ mumɔi kpawo lɛ yɛ.” Yibɔ ni ji kpawo lɛ damɔ shi kɛha ŋwɛi emuuyeli; no hewɔ lɛ esa akɛ la haai kpawo lɛ hu adamɔ shi aha mumɔ krɔŋkrɔŋ lɛ hewalɛ ni haa hiɛtɛjemɔ loo shishinumɔ ni yeɔ emuu. Kwɛ shi ni Yohane kuu lɛ daa ŋmɛnɛ akɛ akɛ nɛkɛ hiɛtɛjemɔ loo shishinumɔ nɛɛ haa amɛ, kɛ hegbɛ hu ni amɛkɛha mɛi ni mumɔŋ hɔmɔ yeɔ amɛ yɛ shikpɔŋ lɛ nɔ lɛ! Kwɛ miishɛɛ ni wɔna akɛ yɛ daa afi lɛ, Buu-Mɔɔ wolo tɛtrɛɛ lɛ akpekpei ohai abɔ ni akalaa lɛ yaa nɔ ehaa nɛkɛ la nɛɛ kpɛɔ yɛ wiemɔi aaafee 200 mli!—Lala 43:3.

17. Mɛni “ashwishwɛ ŋshɔ ni tamɔ kristalo” lɛ feɔ he mfoniri?

¹⁷ Yohane na “ashwishwɛ ŋshɔ ni tamɔ kristalo” hu. Mɛni enɛ baanyɛ afee he okadi yɛ mɛi ni afɔ nine atsɛ amɛ kɛba Yehowa ŋwɛi gwabɔɔ lɛ mli lɛ ahe? Paulo wie gbɛ ni Yesu tsɔ nɔ etsuu asafo lɛ he lɛ akɛ, “ekɛ nu hejuu lɛ tsuu ehe yɛ wiemɔ mli.” (Efesobii 5:26) Dani Yesu aaagbo lɛ, ekɛɛ ekaselɔi lɛ akɛ: “Agbɛnɛ nyɛhe eje momo yɛ wiemɔ ni mikɛ nyɛ ewie lɛ hewɔ.” (Yohane 15:3) No hewɔ lɛ, esa akɛ nɛkɛ ashwishwɛ ŋshɔ ni tamɔ kristalo nɛɛ adamɔ shi aha Nyɔŋmɔ Wiemɔ lɛ ni juɔ mɔ he loo etsuuɔ mɔ he lɛ. Esa akɛ e-Wiemɔ lɛ eju osɔfoi aweku lɛ mlibii ni baa Yehowa hiɛ lɛ ahe jogbaŋŋ momo.

Naa—“Hiɛkalɔi Ejwɛ”!

18. Mɛni Yohane na yɛ maŋtsɛsɛi lɛ teŋ kɛ ehewɔ?

¹⁸ Agbɛnɛ Yohane na nɔ kroko. Eŋma akɛ: “Ni hiɛkalɔi ejwɛ ni hiŋmɛii eyimɔ amɛhiɛ kɛ amɛsɛɛ obɔ yɛ maŋtsɛsɛi lɛ teŋ kɛ ehewɔ.”—Kpojiemɔ 4:6b.

19. Hiɛkalɔi ejwɛ lɛ feɔ mɛni he mfoniri, ni te wɔfeɔ tɛŋŋ wɔleɔ enɛ?

¹⁹ Nɛkɛ bɔɔ nii loo hiɛkalɔi nɛɛ feɔ mɛni he mfoniri? Ninaa ko ni gbalɔ kroko, Ezekiel bɔ he amaniɛ lɛ yeɔ ebuaa wɔ ni wɔnaa hetoo lɛ. Ezekiel na ni Yehowa ta ŋwɛi shwiili ko nɔ ni bɔɔ nii ni ji hiɛkalɔi fata ehe ni sui ni ana yɛ amɛhe lɛ tamɔ nɔ ni Yohane tsɔɔ mli lɛ. (Ezekiel 1:5-11, 22-28) Yɛ sɛɛ mli lɛ, Ezekiel na nakai maŋtsɛsɛi ni tamɔ shwiili lɛ ekoŋŋ ni hiɛkalɔi lɛ fata he. Shi yɛ enɛ mli lɛ, etsɛ nɛkɛ hiɛkalɔi nɛɛ akɛ kerubim. (Ezekiel 10:9-15) No hewɔ lɛ esa akɛ hiɛkalɔi ejwɛ ni Yohane na lɛ adamɔ shi aha Nyɔŋmɔ kerubim babaoo lɛ—bɔɔ nii ni nɔ kwɔlɔ yɛ E-mumɔŋ gbɛjianɔtoo lɛ mli. Yohane susuŋ he akɛ eji nɔ ko ni ekaaa akɛ eeena kerubim ni damɔ Yehowa he kpaakpa nakai, ejaakɛ yɛ blema kpee buu lɛ mli gbɛjianɔtoo naa lɛ, afee shika kerubim enyɔ yɛ kpaŋmɔ adeka lɛ kpatamɔ sɛi ni damɔ shi kɛha Yehowa maŋtsɛsɛi lɛ nɔ. Yehowa gbee kɛ famɔi faa kpo kɛhaa maŋ lɛ kɛjɛɔ nɛkɛ kerubim enyɔ nɛɛ ateŋ.—2 Mose 25:22: Lala 80:2.

20. Yɛ mɛɛ gbɛ nɔ aaanyɛ akɛɛ akɛ hiɛkalɔi ejwɛ lɛ “yɛ maŋtsɛsɛi lɛ teŋ kɛ ehewɔ”?

²⁰ Nɛkɛ hiɛkalɔi ejwɛ nɛɛ “yɛ maŋtsɛsɛi lɛ teŋ kɛ ehewɔ.” Mɛni pɔtɛɛ ji nɔ ni enɛ tsɔɔ? Ebaanyɛ etsɔɔ akɛ amɛdamɔ maŋtsɛsɛi lɛ he bɔ ni haa amɛjeɔ efa fɛɛ fa teŋ gbɛ. No hewɔ lɛ, mɛi ni tsɔɔ Today’s English Version lɛ shishi lɛ fo shishijee Hela wiemɔ lɛ kuku yɛ nɛkɛ gbɛ nɔ: “Amɛbɔle maŋtsɛsɛi lɛ he kɛkpe yɛ ekoŋ fɛɛ koŋ.” Yɛ gbɛ kroko nɔ lɛ, wiemɔ lɛ baanyɛ atsɔɔ akɛ hiɛkalɔi ejwɛ lɛ yɛ ŋwɛi teŋ diɛŋtsɛ yɛ he ni maŋtsɛsɛi lɛ yɔɔ lɛ. Ekolɛ, no hewɔ ni The Jerusalem Bible lɛ tsɔɔ wiemɔ lɛ shishi akɛ: “Yɛ teŋ gbɛ, amɛfee kutuu kɛbɔle maŋtsɛsɛi lɛ diɛŋtsɛ he” lɛ. Nɔ ni he hiaa lɛ ji bɔ ni kerubim lɛ bɛŋkɛ Yehowa maŋtsɛsɛi lɛ he kpaakpa lɛ, kɛ akɛto kerubim ni Ezekiel na yɛ Yehowa gbɛjianɔtoo ni tamɔ shwiili loo kokloloŋtoi lɛ koŋ fɛɛ koŋ lɛ he lɛ. (Ezekiel 1:15-22) Enɛɛmɛi fɛɛ kɛ wiemɔi ni yɔɔ Lala 99:1 lɛ kpaa gbee akɛ: “Yehowa miiye maŋtsɛ, . . . eta kerubim lɛ anɔ.”

21, 22. (a) Te Yohane tsɔɔ bɔ ni hiɛkalɔi ejwɛ lɛ yɔɔ lɛ mli eha tɛŋŋ? (b) Hiɛkalɔi ejwɛ lɛ ateŋ mɔ fɛɛ mɔ su damɔ shi kɛha mɛni?

²¹ Yohane tee nɔ akɛ: “Ni klɛŋklɛŋ hiɛkalɔ lɛ tamɔ jata, ni hiɛkalɔ ni ji enyɔ lɛ tamɔ tsina, ni hiɛkalɔ ni ji etɛ lɛ hiɛ tamɔ gbɔmɔ, ni hiɛkalɔ ni ji ejwɛ lɛ tamɔ okropɔŋ ni filikiɔ.” (Kpojiemɔ 4:7) Mɛni hewɔ nɛkɛ hiɛkalɔi ejwɛ nɛɛ yɔɔ sɔrɔto ni esoro mɔ nɛ ni esoro mɔ nɛ lɛ? Eka shi faŋŋ akɛ nɛkɛ bɔɔ nii ni yɔɔ sɔrɔtoi nɛɛ maa Nyɔŋmɔ gbeyeishemɔ mli sui pɔtɛɛ komɛi anɔ mi. Klɛŋklɛŋ lɛ, jata lɛ yɛ. Akɛ jata tsuɔ nii yɛ Biblia mli akɛ ekaafeemɔ he okadi, titri lɛ yɛ jalɛsaneyeli kɛ jalɛ nifeemɔ sɛɛdii mli. (2 Samuel 17:10; Abɛi 28:1) No hewɔ lɛ, jata lɛ damɔ shi kɛha Nyɔŋmɔ gbeyeishemɔ su ni ji ekaafeemɔ yɛ jalɛsaneyeli mli. (5 Mose 32:4; Lala 89:15) Hiɛkalɔ ni ji enyɔ lɛ tamɔ tsina. Mɛɛ su tsina kɛbaa ojwɛŋmɔ mli? Kɛha Israelbii lɛ tsina lɛ ji amɛnibii ni jara wa kɛha amɛ lɛ ateŋ ekome yɛ hewalɛ ni eyɔɔ lɛ hewɔ. (Abɛi 14:4; kwɛmɔ Hiob 39:9-11 hu.) Belɛ tsina lɛ damɔ shi kɛha hewalɛ, nyɛmɔ ni Yehowa kɛhaa.—Lala 62:12; Yesaia 40:26.

²² Bɔɔ nɔ ni ji etɛ lɛ hiɛ tamɔ gbɔmɔ hiɛ. Esa akɛ enɛ adamɔ shi aha Nyɔŋmɔ gbeyeishemɔ su ni ji suɔmɔ, akɛni yɛ shikpɔŋ nɔ lɛ gbɔmɔ pɛ ji mɔ ni abɔ lɛ yɛ Nyɔŋmɔ subaŋ nɔ, kɛ su ni kwɔ grɔŋŋ ni ji suɔmɔ lɛ hewɔ. (1 Mose 1:26-28; Mateo 22:36-40; 1 Yohane 4:8, 16) Ŋwanejee ko bɛ he akɛ kerubim lɛ jieɔ su ni tamɔ nɛkɛ kpo yɛ be mli ni amɛsɔmɔɔ kɛbɔleɔ Yehowa maŋtsɛsɛi lɛ he lɛ. Shi bɔɔ nɔ ni ji ejwɛ lɛ hu? Mɔ nɛ tamɔ okropɔŋ ni filikiɔ. Yehowa diɛŋtsɛ gbalaa jwɛŋmɔ kɛyaa nii ni okropɔŋ naa kɛyaa shɔŋŋ lɛ nɔ: “Ehiŋmɛii naa nii yɛ shɔŋŋ.” (Hiob 39:29) No hewɔ lɛ, okropɔŋ lɛ damɔ shi kɛha nilee ni naa nii kɛyaa shɔŋŋ. Yehowa ji nilee Jɛɛhe. Ni kerubim lɛ kɛ ŋwɛi nilee tsuɔ nii yɛ be mli ni amɛboɔ efamɔi atoi lɛ.—Abɛi 2:6; Yakobo 3:17.

Yehowa Yijiemɔ Jijeɔ Kɛjeɔ Kpo

23. Anɔkwale ni eji akɛ hiɛkalɔi ejwɛ lɛ “amli eyimɔ obɔbɔ kɛ hiŋmɛii sɔŋŋ” lɛ feɔ mɛni he mfoniri, ni fiji enyɔ-nyɔ sɔrɔtoi etɛ ni amɛyɔɔ lɛ feɔ mɛni he mfoniri?

²³ Yohane yaa nɔ kɛ esane mlitsɔɔmɔ lɛ mli akɛ: “Ni hiɛkalɔi ejwɛ lɛ ateŋ mɔ fɛɛ mɔ yɛ fiji ekpaa-ekpaa, ni amɛhewɔ kɛ amɛmli eyimɔ obɔbɔ kɛ hiŋmɛii sɔŋŋ, ni amɛjɔɔɔ amɛhe nyɔɔŋ kɛ shwane ni amɛkɛɔ akɛ: Krɔŋkrɔŋ, krɔŋkrɔŋ, krɔŋkrɔŋ ji Nuŋtsɔ [Yehowa] Nyɔŋmɔ Ofe lɛ, mɔ ni yɛ lɛ kɛ mɔ ni yɔɔ lɛ kɛ mɔ ni baaba lɛ.” (Kpojiemɔ 4:8) Hiŋmɛii sɔŋŋ lɛ tsɔɔ ninaa ni eye emuu ni yaa shɔŋŋ. Hiɛkalɔi ejwɛ lɛ kɛ enɛ tsuɔ nii ni amɛkpaaa, ejaakɛ wɔɔ he ehiaaa amɛ. Amɛkaseɔ Mɔ ni aŋma yɛ ehe akɛ: “Ejaakɛ Yehowa yɔɔ nɛɛ, ehiŋmɛii kpaa shikpɔŋ muu lɛ fɛɛ nɔ, ni ejieɔ ehewalɛ kpo ehaa mɛi ni amɛtsuii ehi kɛwula shi yɛ egbɛfaŋ lɛ.” (2 Kronika 16:9) Akɛni amɛyɔɔ hiŋmɛii babaoo nɛkɛ hewɔ lɛ, kerubim lɛ baanyɛ ana he fɛɛ he. Nɔ ko nɔ ko bɛ ni amɛnaaa. No hewɔ lɛ awula amɛ jogbaŋŋ bɔ ni amɛbaanyɛ amɛsɔmɔ Nyɔŋmɔ yɛ ekojomɔ nitsumɔ lɛ mli. Awie yɛ ehe akɛ: “Yehowa hiŋmɛii yɛ he fɛɛ he, ni ekwɛɔ mɛi fɔji kɛ mɛi kpakpai fɛɛ.” (Abɛi 15:3) Ni akɛni amɛhiɛ fiji enyɔ-nyɔ sɔrɔtoi etɛ—akɛ yibɔ ni ji etɛ lɛ tsuɔ nii yɛ Biblia lɛ mli akɛmaa sane nɔ mi hewɔ lɛ—kerubim lɛ baanyɛ ni amɛkɛ oyaiyeli ni tamɔ sarawa gbamɔ atswa Yehowa kojomɔi ahe adafi ni amɛtsu he nii.

24. Kerubim lɛ jieɔ Yehowa yi yɛ mɛɛ gbɛ nɔ, ni mɛni ji nɔ ni no tsɔɔ?

²⁴ Bo toi! Yijiemɔ lala ni kerubim lɛ laa amɛhaa Yehowa lɛ ŋɔɔ ni ekanyaa susuma: “Krɔŋkrɔŋ, krɔŋkrɔŋ, krɔŋkrɔŋ ji Nuŋtsɔ [Yehowa] Nyɔŋmɔ Ofe lɛ, mɔ ni yɛ lɛ kɛ mɔ ni yɔɔ lɛ kɛ mɔ ni baaba lɛ.” Kɛfata he lɛ, nɔ ni bɔ he etɛ nɛɛ tsɔɔ enaawalɛ ekoŋŋ. Kerubim lɛ kɛ hewalɛ maa krɔŋkrɔŋ ni Yehowa Nyɔŋmɔ ji lɛ nɔ mi. Lɛ ji krɔŋkrɔŋfeemɔ he Tɛi ni Afolɔ Ashwie Shi lɛ naagbee Jɛɛhe. Agbɛnɛ hu lɛ ji “naanɔ Maŋtsɛ” lɛ, kɛ “Alfa lɛ kɛ Omega lɛ, shishijee lɛ kɛ naagbee lɛ, klɛŋklɛŋ mɔ lɛ kɛ naagbee mɔ lɛ” yɛ be fɛɛ mli. (1 Timoteo 1:17; Kpojiemɔ 22:13) Kerubim lɛ ejɔɔɔ amɛhe yɛ be mli ni amɛjajeɔ Yehowa sui ni eko kɛ lɛ yeee egbɔ yɛ bɔɔ nii fɛɛ hiɛ lɛ.

25. Hiɛkalɔi ejwɛ lɛ kɛ onukpai 24 lɛ feɔ ekome amɛkɛjieɔ Yehowa yi yɛ mɛɛ gbɛ nɔ?

²⁵ Ŋwɛi amli ŋwɛi jijeɔ kɛ Yehowa yijiemɔi lɛ! Yohane sane mlitsɔɔmɔ lɛ yaa nɔ akɛ: “Ni beni hiɛkalɔi lɛ ŋɔɔ anunyam kɛ agbojee kɛ shidaa amɛhaa mɔ ni ta maŋtsɛsɛi lɛ nɔ ni ehiɛ ka kɛjɛ naanɔ kɛyaa naanɔ lɛ, onukpai nyɔŋmai-enyɔ kɛ ejwɛ lɛ hoɔ gbeɔ shi yɛ mɔ ni ta maŋtsɛsɛi lɛ nɔ lɛ hiɛ, ni amɛjaa mɔ ni hiɛ ka kɛjɛ naanɔ kɛyaa naanɔ lɛ, ni amɛshɛrɛɔ amɛ kekerei lɛ amɛshwieɔ maŋtsɛsɛi lɛ hiɛ ni amɛkɛɔ akɛ: Nuŋtsɔ [Yehowa wɔ-Nyɔŋmɔ] bo ji mɔ ni sa akɛ oŋɔ anunyam kɛ agbojee kɛ hewalɛ lɛ, ejaakɛ bo obɔ nii fɛɛ, ni osuɔmɔnaa amɛyɔɔ ni abɔ amɛ.” (Kpojiemɔ 4:9-11) Enɛ ji yijiemɔi ni yɔɔ nyam fe fɛɛ ni akɛha Yehowa, wɔ-Nyɔŋmɔ kɛ Jeŋ Muu Fɛɛ Nuŋtsɔ lɛ yɛ Ŋmalɛi lɛ fɛɛ mli lɛ ateŋ ekome!

26. Mɛni hewɔ onukpai 24 lɛ shɛrɛ amɛ akekerei lɛ amɛshwie Yehowa hiɛ lɛ?

²⁶ Onukpai 24 lɛ yɛ jwɛŋmɔ loo su ni Yesu jieɔ lɛ kpo lɛ nɔŋŋ eko, ejaakɛ amɛshɛrɛ amɛ akekerei lɛ amɛshwie Yehowa hiɛ. Akɛ amɛaahole amɛhe nɔ yɛ Yehowa hiɛ lɛ ji sane ni yɔɔ shɔŋŋ yɛ amɛjwɛŋmɔ mli. Amɛkɛ heshibaa kpɛlɛɔ nɔ akɛ yiŋtoo ni yɔɔ maŋtsɛmɛi ni amɛyeɔ lɛ sɛɛ ji ni amɛkɛ woo kɛ anunyam abaha lɛ, taakɛ bɔ ni Yesu feɔ yɛ be fɛɛ mli lɛ. (Filipibii 2:5, 6, 9-11) Amɛkɛ heshibaa kpɛlɛɔ hewalɛ ni amɛ diɛŋtsɛ amɛbɛ lɛ nɔ ni amɛjajeɔ akɛ amɛ nɔyeli lɛ damɔ jeŋ muu fɛɛ maŋtsɛ Yehowa nɔ. No hewɔ lɛ, amɛjɛɔ amɛtsui mli amɛkɛ kerubim lɛ kɛ bɔɔ nii anɔkwafoi lɛ fɛɛ feɔ ekome ni amɛkɛ yijiemɔ kɛ anunyam haa Nyɔŋmɔ ni bɔ nibii fɛɛ lɛ.—Lala 150:1-6.

27, 28. (a) Te esa akɛ bɔ ni Yohane tsɔɔ ninaa nɛɛ mli eha lɛ asa wɔhe aha tɛŋŋ? (b) Mɛɛ sanebimɔi teɔ shi yɛ nɔ ni Yohane na ni enu kɛnyiɛ sɛɛ lɛ he?

²⁷ Namɔ baanyɛ ahi shi akɛ mɔ ni nɔ ko tsirɛɛɛ lɛ yɛ be mli ni ekane Yohane sane ni kɔɔ ninaa nɛɛ he lɛ? Eyɛ fɛo, eyɛ nyam! Shi te bɔ ni eji diɛŋtsɛ lɛ baatamɔ tɛŋŋ? Esa akɛ Yehowa agbojee lɛ akanya mɔ fɛɛ mɔ ni ekɛ tsuiŋ hiɛsɔɔ afata hiɛkalɔi ejwɛ lɛ kɛ onukpai 24 lɛ ahe ni amɛkɛjie E-yi, yɛ sɔlemɔ mli kɛ agbɛnɛ kɛtsɔ E-gbɛi lɛ jajemɔ yɛ mɛi ahiɛ lɛ nɔ. Nyɔŋmɔ ni Kristofoi ena hegbɛ akɛ amɛaaye ehe odase ŋmɛnɛ lɛ nɛ. (Yesaia 43:10) Kaimɔ akɛ Yohane ninaa lɛ kɔɔ Nuŋtsɔ lɛ gbi nɛɛ he, he ni wɔyɔɔ bianɛ lɛ. “Mumɔi kpawo lɛ” efee klalo akɛ amɛbaakudɔ wɔ ni amɛwo wɔ hewalɛ. (Galatabii 5:16-18) Nyɔŋmɔ Wiemɔ lɛ yɛ ŋmɛnɛ ni baaye abua wɔ ni wɔfee krɔŋkrɔŋ yɛ Nyɔŋmɔ ni yɔɔ krɔŋkrɔŋ lɛ sɔɔmɔ mli. (1 Petro 1:14-16) Eka shi faŋŋ akɛ, eeefee wɔ miishɛɛ akɛ wɔɔkane gbalɛ wiemɔi nɛɛ waa ni anu. (Kpojiemɔ 1:3) Kwɛ bɔ ni amɛtsɔɔ wɔyiŋ koni wɔye Yehowa anɔkwale koni wɔkaŋmɛ gbɛ ni je lɛ miigbala wɔ kɛmiijɛ eyijiemɔ ni wɔɔla daa lɛ he!—1 Yohane 2:15-17.

²⁸ Yɛ he ni wɔshɛ nɛɛ, Yohane etsɔɔ nɔ ni enaa beni afɔ nine atsɛ lɛ ni etsɔ shinaa ni agbele yɛ ŋwɛi lɛ mli lɛ mli. Nɔ ni ekaaa fe fɛɛ lɛ, ebɔ amaniɛ akɛ Yehowa ta E-ŋwɛi maŋtsɛsɛi lɛ nɔ yɛ E-gbojee kɛ woo kɛ nyam fɛɛ mli. Mɛi ni ebɔle ehe kɛkpe ji mɛi ni he wa fe fɛɛ yɛ gbɛjianɔtoi fɛɛ mli—ekpɛlɛɔ yɛ ehefɛo kɛ anɔkwayeli mli. Ŋwɛi Gwabɔɔ lɛ ekpe. (Daniel 7:9, 10, 18) Afee klalo aha nɔ ko ni ekaaa ni baaba. Mɛni ji no, ni mɛɛ gbɛ nɔ etsɔɔ esaa wɔhe ŋmɛnɛ yɛ? Nyɛhaa wɔkwɛa yɛ be mli ni ninaa lɛ jeɔ kpo lɛ!

[Baafa muu mfoniri ni yɔɔ baafa 75]

[Baafa muu mfoniri ni yɔɔ baafa 78]

Yitso 15

“Namɔ Ji Mɔ ni Sa akɛ Eeegbele Wolo lɛ Naa?”

 1. Mɛni baa agbɛnɛ yɛ Yohane ninaa lɛ mli?

EYƐ NYAM! EKANYAA GBEYEISHEMƆ! Nɛkɛ ji bɔ ni Yehowa maŋtsɛsɛi ni yɔɔ la haai lɛ, kerubim lɛ, onukpai 24 lɛ kɛ ashwishwɛ ŋshɔ lɛ teŋ lɛ he ninaa ni kanyaa mɔ lɛ yɔɔ. Shi Yohane, mɛni ji nɔ ni onaa ekoŋŋ? Yohane gbala jwɛŋmɔ kɛtee nɔ ni yaa nɔ yɛ ŋwɛi nɛɛ teŋ diɛŋtsɛ lɛ nɔ, ni ekɛɔ wɔ akɛ: “Ni mina wolo ko yɛ Mɔ ni ta maŋtsɛsɛi lɛ nɔ lɛ ninejurɔ nɔ, ni aŋma emli kɛ esɛɛ fɛɛ, asɔo naa kɛ naasɔomɔi kpawo. Ni mina bɔfo agbo ko miishiɛ kɛ gbee wulu akɛ: Namɔ ji mɔ ni sa akɛ eeegbele wolo lɛ naa ni etsɛrɛ enaasɔomɔi lɛ? Ni mɔ ko mɔ ko bɛ ŋwɛi loo shikpɔŋ lɛ nɔ loo shikpɔŋ lɛ shishi ni aaanyɛ wolo lɛ naa agbele loo akwɛ mli. Ni mifo aahu, ejaakɛ anaaa mɔ ko mɔ ko ni sa akɛ eeegbele wolo lɛ naa, ni ekane loo ekwɛ mli.”—Kpojiemɔ 5:1-4.

2, 3. (a) Mɛni hewɔ ni Yohane shweɔ akɛ aaana mɔ ko ni baagbele wolo lɛ naa lɛ, ni mɛni ji nɔ ni aaanyɛ afee gbɛkpamɔ ni yɔɔ yɛ enɛ he? (b) Mɛni Nyɔŋmɔ webii ni afɔ amɛ mu lɛ kɛ hehiamɔ emɛ yɛ wɔbe nɛɛ mli?

² Yehowa diɛŋtsɛ, bɔɔ nii fɛɛ anɔ Nuŋtsɔ kɛ Maŋtsɛ lɛ ji mɔ ni hiɛ wolo lɛ. Saji ni he hiaa eyi mli obɔ tɔ, ejaakɛ aŋma emli kɛ esɛɛ fɛɛ. Wɔmiitao nibii amli wɔle. Mɛni yɔɔ wolo lɛ mli? Wɔkaiɔ nine ni Yehowa fɔ Yohane lɛ: “Kwɔɔ kɛba biɛ nɛɛ, ni matsɔɔo nii ni sa akɛ aba mli yɛ nii nɛɛ asɛɛ.” (Kpojiemɔ 4:1) Wɔkɛ gbɛkpamɔ ni kanyaa mɔ miikpa gbɛ akɛ wɔɔkase nakai nibii lɛ ahe nii. Shi ao, asɔo wolo lɛ naa kpɛŋŋ, akɛ naasoɔmɔi kpawo esɔo naa!

³ Ani bɔfo agbo loo mɔ ni he wa lɛ baana mɔ ko ni sa ni eeegbele wolo lɛ naa? Taakɛ Kingdom Interlinear lɛ tsɔɔ lɛ, wolo lɛ yɛ Yehowa “ninejurɔ nɔ.” Enɛ tsɔɔ akɛ ehiɛ wolo lɛ yɛ edɛŋ. Shi etamɔ nɔ ni mɔ ko mɔ ko bɛ ŋwɛi loo shikpɔŋ nɔ ni sa akɛ ekpɛlɛɔ nɔ ni egbeleɔ nakai wolo lɛ naa. Mɔ ko mɔ ko bɛ shikpɔŋ lɛ shishi po yɛ Nyɔŋmɔ tsuji anɔkwafoi ni amɛgboi lɛ ateŋ, ni eji mɔ ni he esa kɛha nɛkɛ woo ni nɔ kwɔ nɛɛ. Enɛ hewɔ ni sane lɛ gba Yohane naa yɛ faŋŋ mli! Ekolɛ enuŋ “nii ni sa akɛ aba mli yɛ nii nɛɛ asɛɛ” lɛ. Yɛ wɔgbii nɛɛ amli hu lɛ, Nyɔŋmɔ webii ni afɔ amɛ mu lɛ kɛ hehiamɔ emɛ Yehowa koni eha ela kɛ enɔkwale lɛ akpɛ ashwie Kpojiemɔ lɛ nɔ. Ebaafee enɛ fiofio kɛya nɔ yɛ be ni ato aha gbalɛ lɛ mlibaa lɛ, bɔni afee ni enyiɛ ewebii lɛ ahiɛ yɛ “yiwalaheremɔ kpeteŋkpele” gbɛ lɛ nɔ.—Lala 43:3, 5, New World Translation.

Mɔ ni Sa Lɛ

 4. (a) Namɔ akpa shi ni ana akɛ lɛ esa akɛ egbeleɔ wolokpo lɛ kɛ enaasɔomɔi lɛ anaa? (b) Mɛɛ nyɔmɔwoo kɛ hegbɛ Yohane kuu lɛ kɛ amɛhefatalɔi lɛ naa mli ŋɔɔmɔ?

⁴ Hɛɛ, mɔ ko yɛ ni baanyɛ agbele wolo lɛ naa! Yohane gba akɛ: “Ni onukpai lɛ ateŋ mɔ kome kɛɛ mi akɛ: Kaafo! Naa, Jata lɛ ni jɛ Yuda akutso lɛ mli lɛ, mɔ ni ji David shishifa lɛ eye kunim ni egbele wolo lɛ naa, ni etserɛ enaasɔomɔi kpawo lɛ.” (Kpojiemɔ 5:5) No hewɔ lɛ, Yohane, tsuumɔ nakai yaafonui lɛ! Yohane kuu lɛ kɛ amɛhefatalɔi anɔkwafoi ni yɔɔ ŋmɛnɛ lɛ hu eŋmɛ amɛtsui shi afii nyɔŋma-nyɔŋmai abɔ yɛ kaai ni mli wawai amli yɛ be mli ni amɛkɛ tsuishiŋmɛɛ mɛɔ hiɛtɛjemɔ loo sane shishinumɔ lɛ. Mɛɛ nyɔmɔwoo ni shɛjeɔ mɔ mii wɔyɔɔ nɛkɛ akɛ wɔɔnu ninaa lɛ shishi agbɛnɛ, ni mɛɛ hegbɛ hu wɔna nɛkɛ akɛ wɔɔna emlibaa lɛ mli gbɛfaŋnɔ kɛtsɔ emli sane lɛ ni wɔɔjaje wɔtsɔɔ mɛi krokomɛi lɛ nɔ!

 5. (a) Mɛɛ gbalɛ ni kɔɔ Yuda he ji nɔ ni awie, ni nɛgbɛ ji he ni Yuda seshibii lɛ ye maŋtsɛ yɛ? (b) Namɔ ji Shilo?

⁵ Ah, “Jata lɛ ni jɛ Yuda akutso lɛ mli lɛ”! Yohane le gbalɛ ni Yakob, mɔ ni fɔ Yudafoi aweku lɛ jaje ni kɔɔ ebi ni ji ejwɛ, Yuda he lɛ jogbaŋŋ: “Jata bi nuu ji Yuda; milɛloo nɔ ote shi kɛjɛ, mibi. Eekoto shi, eebu shi tamɔ jata, tamɔ jata yoo; namɔ aaawo ehiɛ la? Maŋtsɛtso ejeŋ Yuda dɛŋ, ni nɔyeli tso hu ejeŋ enaji ateŋ, kɛyashi beyinɔ ni mɔ nɔ ni ji [Shilo] lɛ aaaba, ni lɛ toi majimaji lɛ aaabo.” (1 Mose 49:9, 10) Odehei aweku ni yɔɔ Nyɔŋmɔ webii lɛ ateŋ lɛ ba kɛjɛ Yuda. Eje shishi kɛjɛ David nɔ, ni maŋtsɛmɛi fɛɛ ni eye nɔ yɛ Yerusalem kɛbashi be mli ni Babilonbii lɛ kpata maŋ lɛ hiɛ lɛ ji Yuda seshibii. Shi amɛteŋ mɔ ko mɔ ko jeee Shilo ni Yakob gba yɛ ehe lɛ. Shilo shishi ji “Mɔ Nɔ Ni [Hegbɛ Lɛ] Ji.” Yɛ gbalɛ naa lɛ, gbɛi nɛɛ kɔɔ Yesu, mɔ ni David Maŋtsɛyeli lɛ ji enɔ kɛmiiya naanɔ lɛ he.—Ezekiel 21:30-32; Luka 1:32, 33; Kpojiemɔ 19:16.

 6. Mɛɛ gbɛ nɔ Yesu batsɔ Ishai “tso fɔ” kɛ agbɛnɛ hu “David shishifa” yɛ?

⁶ Yohane kɛ oyaiyeli yɔse nɔ ni awieɔ he akɛ “David shishifa lɛ.” Atsɛɔ shiwoo Mesia lɛ yɛ gbalɛ mli akɛ “tso fɔ ko . . . ni jɛ Ishai [Maŋtsɛ David tsɛ] tso kuku lɛ mli” kɛ “Ishai shishifa ni ji aflaŋaa ni ashi aha majimaji lɛ.” (Yesaia 11:1, 10) Yesu ji Ishai tso fɔ, afɔ lɛ awo David, Ishai bi nuu lɛ odehei aweku lɛ mli. Agbɛnɛ, akɛ Ishai shishifa lɛ, lɛ ji Mɔ ni ha David odehei aweku lɛ tsɛ̃ ekoŋŋ, ni eha lɛ wala kɛ nɔ ni ekɛbaawaje lɛ kɛya naanɔ.—2 Samuel 7:16.

 7. Mɛni haa Yesu bafeɔ mɔ ni sa akɛ eheɔ wolokpo lɛ kɛjɛɔ Mɔ ni ta maŋtsɛsɛi lɛ nɔ lɛ dɛŋ lɛ?

⁷ Yesu ji mɔ ni akɛ adesa ni yeɔ emuu lɛ, esɔmɔ Yehowa yɛ emuuyeli mli yɛ kaai ni mli wawai ashishi ni fe fɛɛ. Lɛ ekɛ hetoo ni yeɔ emuu ha Satan mpoatswaa lɛ. (Abɛi 27:11) No hewɔ lɛ, ebaanyɛ ewie taakɛ bɔ ni efee yɛ gbɛkɛ ni etsɔ afɔleshaa gbele mli lɛ akɛ, “miye je lɛ nɔ kunim.” (Yohane 16:33) Yɛ enɛ hewɔ lɛ, Yehowa kɛ ‘ŋwɛi kɛ shikpɔŋ nɔ hegbɛ fɛɛ’ ewo Yesu ni atee lɛ shi lɛ dɛŋ. Yɛ Nyɔŋmɔ tsuji fɛɛ ateŋ lɛ, lɛ pɛ ji mɔ ni he esa akɛ eheɔ wolo lɛ, kɛ yiŋtoo akɛ eeeha ale emli saji ni he hiaa lɛ.—Mateo 28:18.

 8. (a) Yɛ nɔ ni kɔɔ Maŋtsɛyeli lɛ he lɛ, mɛni tsɔɔ akɛ Yesu sa kɛha enɛ? (b) Mɛni hewɔ esa akɛ onukpai 24 lɛ ateŋ mɔ kome ajie mɔ ni esa akɛ egbeleɔ wolo lɛ naa lɛ kpo atsɔɔ Yohane lɛ?

⁸ Eji nɔ ni sa diɛŋtsɛ akɛ Yesu aaagbele wolo lɛ naa. Kɛjɛ 1914 mli ni awo lɛ Maŋtsɛ yɛ Nyɔŋmɔ Mesia Maŋtsɛyeli lɛ nɔ, ni nakai wolo lɛ jieɔ nibii pii ni kɔɔ Maŋtsɛyeli lɛ kɛ nɔ ni ebaatsu he lɛ kpo. Yesu ye Maŋtsɛyeli anɔkwale lɛ he odase yɛ anɔkwayeli mli yɛ be mli ni eyɔɔ shikpɔŋ nɛɛ nɔ lɛ. (Yohane 18:36, 37) Etsɔɔ ekaselɔi lɛ ni amɛsɔle amɛha Maŋtsɛyeli lɛ baa. (Mateo 6:9, 10) Lɛ eje Maŋtsɛyeli lɛ sanekpakpa lɛ shiɛmɔ shishi yɛ Kristofoi abei lɛ shishijee mli ni egba he ni shiɛmɔ nitsumɔ lɛ baaya ayashɛ yɛ naagbee be lɛ mli lɛ efɔ shi. (Mateo 4:23; Marko 13:10) Nakai nɔŋŋ hu eji nɔ ni sa akɛ onukpai 24 lɛ ateŋ mɔ kome aaajie lɛ kpo aha Yohane akɛ Yesu ji mɔ ni baatserɛ naasɔomɔi lɛ anaa lɛ. Mɛni hewɔ? Ejaakɛ nɛkɛ onukpai nɛɛ tara maŋtsɛsɛii anɔ, ni akekerei fimɔ amɛyitsei, ni tsɔɔ akɛ amɛji Kristo nanemɛi niyelɔi yɛ e-Maŋtsɛyeli lɛ mli.—Romabii 8:17; Kpojiemɔ 4:4.

‘Toobi lɛ ni Agbe lɛ Lɛ’

 9. Yɛ jata najiaŋ lɛ, mɛni ji nɔ ni Yohane na ni edamɔ “maŋtsɛsɛi lɛ teŋ,” ni te etsɔɔ enɛ mli eha tɛŋŋ?

⁹ Yohane kwɛ ni ena nɛkɛ “Jata lɛ ni jɛ Yuda akutso lɛ mli lɛ.” Shi kwɛ bɔ ni enɛ yɔɔ naakpɛɛ ha! Okadi mfoniri kroko kwraa pue: “Ni mikwɛ, ni naa, maŋtsɛsɛi lɛ kɛ hiɛkalɔi ejwɛ lɛ teŋ lɛ, kɛ onukpai nyɔŋmai-enyɔ kɛ ejwɛ lɛ ateŋ lɛ, toobi ko damɔ shi tamɔ nɔ ni agbe lɛ, eyɛ akoloŋtoi kpawo, kɛ hiŋmɛii kpawo ni ji Nyɔŋmɔ mumɔi kpawo lɛ ni atsu kɛtee shikpɔŋ lɛ fɛɛ nɔ lɛ.”—Kpojiemɔ 5:6.

10. Namɔ ji “toobi” ni Yohane na lɛ, ni mɛni hewɔ gbɛi ni akɛtsɛ lɛ nɛɛ sa jogbaŋŋ lɛ?

¹⁰ Nɔ ni yɔɔ teŋgbɛ yɛ maŋtsɛsɛi lɛ masɛi, yɛ liamɔ kutruku ni hiɛkalɔi ejwɛ lɛ kɛ onukpai 24 lɛ efo lɛ teŋ ji toobi ko! Ŋwanejee ko bɛ he akɛ Yohane yɔse nɛkɛ toobi nɛɛ oya akɛ “Jata lɛ ni jɛ Yuda akutso lɛ mli lɛ” kɛ “David shishifa” lɛ. Ele akɛ, yɛ nɔ ni fe afii 60 ni tsɔ hiɛ lɛ mli lɛ, Yohane Baptisilɔ lɛ jie Yesu etsɔɔ Yudafoi ni kwɛɔ lɛ lɛ akɛ “Nyɔŋmɔ Toobi ni woɔ je lɛ he esha kɛyaa lɛ!” (Yohane 1:29) Yɛ eshihilɛ be fɛɛ ni eye yɛ shikpɔŋ nɛɛ nɔ lɛ mli lɛ, Yesu hi shi akɛ mɔ ni je lɛ wooo ehe muji—tamɔ toobi ni kpa ko bɛ ehe—bɔni afee ni enyɛ ekɛ ewala asha afɔle aha adesai akɛ nɔ ni kpa ko bɛ he.—1 Korintobii 5:7; Hebribii 7:26.

11. Mɛni hewɔ tsɛ ni atsɛ Yesu akɛ etamɔ “toobi ko ni tamɔ nɔ ni agbe lɛ” lɛ jeee ehiɛ nyam ni awooo lɛ?

¹¹ Shi ekolɛ ákɛ ‘akɛ toobi ko ni tamɔ nɔ ni agbe lɛ’ aaato Yesu ni awo ehiɛ nyam lɛ he lɛ baa lɛ shi aloo eji nɔ ni bulɛ bɛ mli? Dabida! Anɔkwale ni eji akɛ Yesu hi shi akɛ anɔkwafo kɛyashi gbele mli lɛ ji Satan nɔ kunim kpeteŋkpele ni aye kɛ kunimyeli kpele kɛha Yehowa Nyɔŋmɔ. Yesu he mfoniri ni afee yɛ nɛkɛ gbɛ nɔ lɛ tsɔɔ bɔ ni eyeɔ Satan je lɛ nɔ kunim ni ekaiɔ wɔ suɔmɔ ni mli kwɔ ni Yehowa kɛ Yesu yɔɔ kɛha adesai lɛ yɛ faŋŋ mli. (Yohane 3:16; 15:13; okɛto Kolosebii 2:15 he.) Akɛ nine tsɔɔ Yesu yɛ biɛ akɛ shiwoo Seshi lɛ, mɔ ni he esa kwraa akɛ etseɔ wolo lɛ naa lɛ.—1 Mose 3:15.

12. Mɛni Toobi lɛ akoloŋtoi kpawo lɛ damɔ shi kɛha?

¹² Mɛni hu kɛ nɔ ko fataa hiɛsɔɔ ni wɔyɔɔ wɔhaa “toobi” nɛɛ he lɛ he? Eyɛ akoloŋtoi kpawo. Yɛ Biblia mli lɛ, afɔɔ akoloŋtoi kɛ nitsumɔ akɛ eji hewalɛ loo hegbɛ he okadi, ni kpawo baadamɔ shi aha nɔ ni yeɔ emuu. (Okɛto 1 Samuel 2:1, 10; Lala 112:9; 148:14 he.) No hewɔ lɛ Toobi lɛ akoloŋtoi kpawo lɛ damɔ shi kɛha hewalɛ ni eyi obɔ ni Yehowa kɛwo Yesu dɛŋ lɛ. Enɔ kwɔ “fe onukpayeli kɛ hegbɛ kɛ hewalɛ kɛ nɔyeli fɛɛ kɛ gbɛi fɛɛ gbɛi ni awo, jeee benɛbe nɛɛ mli kɛkɛ, shi be ni baaba lɛ mli hu lɛ.” (Efesobii 1:20-23; 1 Petro 3:22) Kɛjɛ 1914 yɛ be mli ni Yehowa wo lɛ Maŋtsɛ yɛ ŋwɛi lɛ mli ni Yesu kɛ nɔyeli hewalɛ etsu nii titri.—Lala 2:6.

13. (a) Mɛni Toobi lɛ hiŋmɛii kpawo lɛ damɔ shi kɛha? (b) Mɛni Toobi lɛ je shishi efee?

¹³ Agbɛnɛ, mumɔ krɔŋkrɔŋ eyi Yesu obɔ kɛmɔ shi, taakɛ bɔ ni Toobi lɛ hiŋmɛii kpawo ni “ji Nyɔŋmɔ mumɔi kpawo lɛ” feɔ he mfoniri lɛ. Yesu ji adafitswaa gbɛ ni Yehowa nitsumɔ hewalɛ ni eyi lɛ obɔ lɛ tsɔɔ nɔ ehoɔ kɛyaa E-shikpɔŋ nɔ tsuji lɛ anɔ. (Tito 3:6) Eka shi faŋŋ akɛ, nɛkɛ mumɔ nɛɛ nɔŋŋ nɔ etsɔɔ enaa nɔ ni yaa nɔ yɛ shikpɔŋ lɛ nɔ lɛ kɛjɛɔ ŋwɛi. Taakɛ e-Tsɛ lɛ ji lɛ, Yesu yɛ sɛɛyoomɔ ni yeɔ emuu. Nɔ ko nɔ ko bɛ ni laajeɔ yɛ ehiɛ. (Okɛto Lala 11:4; Zakaria 4:10 he.) Eka shi faŋŋ akɛ, nɛkɛ Bi nɛɛ—emuuyeli mlihiɛlɔ ni ye je lɛ nɔ kunim lɛ; Jata ni jɛ Yuda akutso lɛ mli lɛ; David shishifa lɛ; mɔ ni kɛ ewala ha adesai lɛ; mɔ ni yɔɔ hegbɛ fe fɛɛ, ni mumɔ krɔŋkrɔŋ eyi lɛ obɔ, kɛ sɛɛyoomɔ ni yeɔ emuu ni jɛ Yehowa Nyɔŋmɔ ŋɔɔ lɛ—hɛɛ, mɔ nɛ ji mɔ ni sa jogbaŋŋ akɛ eheɔ wolo lɛ kɛjɛɔ Yehowa dɛŋ. Ani eshashao shi akɛ eeehe nitsumɔ ni tamɔ nɛkɛ ni jɛ Yehowa gbɛjianɔtoo ni nɔ kwɔ grɔŋŋ lɛ dɛŋ lɛ? Dabi! Shi moŋ, “eba ni ebahe wolo lɛ kɛjɛ Mɔ ni ta maŋtsɛsɛi lɛ nɔ lɛ ninejurɔ nɔ.” (Kpojiemɔ 5:7) Mɛɛ suɔmɔ mli ni ajɛɔ afeɔ nii he nɔkwɛmɔnii fɛfɛo nɛ!

Yijiemɔ Lalai

14. (a) Te hiɛkalɔi ejwɛ lɛ kɛ onukpai 24 lɛ fee amɛnii amɛha tɛŋŋ yɛ be mli ni Yesu he wolo lɛ? (b) Yɛ mɛɛ gbɛ nɔ onukpai 24 lɛ ahe sane ni Yohane nine shɛ nɔ lɛ maa mɛi ni amɛji kɛ gbɛhe ni amɛyɔɔ mli lɛ nɔ mi?

¹⁴ Te mɛi krokomɛi lɛ ni yɔɔ Yehowa maŋtsɛsɛi lɛ hiɛ lɛ feɔ amɛnii amɛhaa tɛŋŋ? “Ni beni eheɔ wolo lɛ, hiɛkalɔi ejwɛ lɛ kɛ onukpai nyɔŋmai-enyɔ kɛ ejwɛ lɛ ho gbee shi yɛ Toobi lɛ hiɛ, ni amɛteŋ mɔ fɛɛ mɔ hiɛ saŋku kɛ shika tɔi kɛ amɛmli tsofai-kɛ-ŋmai obɔbɔ ni ji krɔŋkrɔŋbii lɛ asɔlemɔi lɛ.” (Kpojiemɔ 5:8) Taakɛ hiɛkalɔi ejwɛ ni ji kerubim ni yɔɔ Nyɔŋmɔ maŋtsɛsɛi lɛ hiɛ lɛ fee lɛ, onukpai 24 lɛ hu kulaa shi amɛhaa Yesu amɛkɛkpɛlɛɔ hegbɛ ni eyɔɔ lɛ nɔ. Shi nɛkɛ onukpai nɛɛ pɛ hiɛ saŋkui kɛ tsofa-kɛ-ŋma tɔi lɛ. Ni agbɛnɛ amɛ pɛ amɛlaa lala hee lɛ.a (Kpojiemɔ 5:9) No hewɔ lɛ amɛ tamɔ “Nyɔŋmɔ Israel lɛ” krɔŋkrɔŋbii 144,000 lɛ ni amɛ hu amɛhiɛ saŋkui ni amɛlaa lala hee lɛ. (Galatabii 6:16; Kolosebii 1:12; Kpojiemɔ 7:3-8; 14:1-4) Agbɛnɛ hu anaa ni onukpai 24 lɛ miitsu ŋwɛi osɔfoyeli nitsumɔ ko, ni akɛfee nɔ ni blema Israel osɔfoi ni sha tsofa-kɛ-ŋma amɛha Yehowa yɛ kpee buu lɛ mli lɛ fee he mfoniri lɛ—nitsumɔ ni ba naagbee yɛ shikpɔŋ nɔ beni Nyɔŋmɔ jie Mose Mla lɛ kɛtee, kɛtsɔ Yesu sɛŋmɔtso lɛ nɔ ni ekɛkpɛtɛ lɛ. (Kolosebii 2:14) Te wɔmuɔ enɛɛmɛi fɛɛ naa wɔhaa tɛŋŋ? Akɛ anaa kunimyelɔi ni afɔ amɛ mu lɛ yɛ amɛgbɛhe kɛ nitsumɔ diɛŋtsɛ akɛ ‘Nyɔŋmɔ kɛ Kristo osɔfoi, ni amɛkɛ lɛ aaaye maŋtsɛ afii akpe’ lɛ mli.—Kpojiemɔ 20:6.

15. (a) Yɛ Israel lɛ, namɔ pɛ ji mɔ ni yɔɔ hegbɛ akɛ eyaa Krɔŋkrɔŋ Fe fɛɛ lɛ yɛ kpee buu lɛ mli? (b) Mɛni hewɔ ni eji wala kɛ gbele sane kɛha osɔfonukpa lɛ akɛ eeesha tsofa-kɛ-ŋma dani ebote Krɔŋkrɔŋ Fe Fɛɛ lɛ?

¹⁵ Yɛ blema Israel lɛ, osɔfonukpa lɛ pɛ ji mɔ ni aŋmɛɔ lɛ gbɛ ni eyaa Krɔŋkrɔŋ Fe Fɛɛ ni damɔ shi kɛha Yehowa hiɛ lɛ. Kɛha lɛ lɛ, tsofa-kɛ-ŋma ni ekɛaaya jɛmɛ lɛ ji wala loo gbele sane hu. Yehowa mla lɛ kɛɛ: “Ni [Aaron] eloo ŋai kɛ la ŋɛsu obɔ yɛ afɔleshaa latɛ lɛ nɔ yɛ Yehowa hiɛ, kɛ tsofa-kɛ-ŋma ni ashi bɔdɔbɔdɔ ekɔkɔi obɔbɔ, ni ekɛbote muhɔɔ lɛ sɛɛ; ni eŋɔ tsofa-kɛ-ŋma lɛ efɔ la lɛ nɔ yɛ Yehowa hiɛ, ni tsofa-kɛ-ŋma lɛ he lasu kumɔŋŋ lɛ aha Kpatamɔ Sɛi lɛ ni bu Odaseyeli Nɔ lɛ naa lɛ he, koni ekagbo.” (3 Mose 16:12, 13) Osɔfonukpa lɛ nyɛŋ abote Krɔŋkrɔŋ Fe Fɛɛ lɛ mli ja esha tsofa-kɛ-ŋma da.

16. (a) Yɛ Kristofoi anibii agbɛjianɔtoo lɛ mli lɛ, namɔ ji mɔ ni nyɛɔ efoɔ mli kɛyaa mfonirifeemɔ mli Krɔŋkrɔŋ Fe Fɛɛ lɛ mli? (b) Mɛni hewɔ esa akɛ Kristofoi ni afɔ amɛ mu lɛ ‘asha tsofa-kɛ-ŋma’ lɛ?

¹⁶ Yɛ Kristofoi anibii agbɛjianɔtoo lɛ mli lɛ, jeee Osɔfonukpa, Yesu Kristo ni afee ehe mfoniri lɛ pɛ boteɔ Krɔŋkrɔŋ Fe Fɛɛ ni afee he mfoniri, ni ji Yehowa hiɛ diɛŋtsɛ yɛ ŋwɛi lɛ mli, shi moŋ osɔfoi bibii 144,000 lɛ ateŋ mɔ fɛɛ mɔ boteɔ jɛmɛ yɛ naagbee. (Hebribii 10:19-23) Nɛkɛ osɔfoi, ni onukpai 24 lɛ damɔ shi kɛha amɛ lɛ nyɛŋ abote Krɔŋkrɔŋ Fe Fɛɛ lɛ, ja ‘amɛsha tsofa-kɛ-ŋma,’ ni ji akɛ, ja amɛsɔle ni amɛkpa Yehowa fai daa dã.—Hebribii 5:7; Yuda 20, 21; okɛto Lala 141:2 he.

Lala Hee

17. (a) Mɛɛ lala hee ko ji nɔ ni onukpai 24 lɛ laa? (b) Te akɛ wiemɔ “lala hee” lɛ fɔɔ nitsumɔ yɛ Biblia lɛ mli ahaa tɛŋŋ?

¹⁷ Lala hee ko ni ŋɔɔ jijeɔ agbɛnɛ. Toobi lɛ hefatalɔi osɔfoi bibii, ni ji onukpai 24 lɛ laa haa lɛ: “Ni amɛla lala hee ko amɛkɛɛ: Sa osa akɛ oheɔ wolo lɛ ni otserɛɔ enaasɔomɔi lɛ, ejaakɛ agbeo, ni okɛ ola lɛ ekpɔ wɔ oha Nyɔŋmɔ kɛjɛ akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ kɛ jeŋmaŋ fɛɛ jeŋmaŋ mli.” (Kpojiemɔ 5:9) Wiemɔ “lala hee” lɛ jeɔ kpo shii abɔ yɛ Biblia lɛ mli ni yɛ be babaoo mli lɛ ekɔɔ yijiemɔ ni akɛhaa Yehowa yɛ yiwalaheremɔ nifeemɔ wulu ko hewɔ lɛ he. (Lala 96:1; 98:1; 144:9) No hewɔ lɛ, lala hee ni ejaakɛ mɔ ni laa lɛ baanyɛ ajaje Yehowa naakpɛɛ nitsumɔi krokomɛi ni ejie hiɛsɔɔ hee ni ena eha E-nunyam gbɛi lɛ kpo.

18. Onukpai 24 lɛ kɛ amɛlala hee lɛ jieɔ Yesu yi yɛ mɛni he?

¹⁸ Shi yɛ biɛ lɛ, onukpai 24 lɛ laa lala hee yɛ Yesu hiɛ moŋ fe ni amɛaala yɛ Yehowa hiɛ. Shi shishitoo mla lɛ yɛ nakai nɔŋŋ. Amɛjieɔ Yesu yi yɛ nibii hee ni lɛ, akɛ Nyɔŋmɔ Bi lɛ, efee eha amɛ lɛ hewɔ. Etsɔ ela lɛ nɔ ewo kpaŋmɔ hee lɛ mli hewalɛ ni yɛ enɛ hewɔ lɛ eha anyɛ ato maŋ hee ko akɛ Yehowa nii krɛdɛɛ. (Romabii 2:28, 29; 1 Korintobii 11:25; Hebribii 7:18-25) Nɛkɛ mumɔŋ maŋ hee nɛɛ mlibii lɛ ba kɛjɛ heloo naa jeŋmaji sɔrɔtoi amli, shi Yesu fee amɛ ekome yɛ asafo kome mli akɛ maŋ kome.—Yesaia 26:2; 1 Petro 2:9, 10.

19. (a) Mɛɛ jɔɔmɔ heloonaa Israel nine shɛɛɛ nɔ yɛ anɔkwale ni amɛyeee lɛ hewɔ? (b) Mɛɛ jɔɔmɔ ji nɔ ni Yehowa maŋ hee lɛ nine shɛɔ nɔ koni amɛna mli ŋɔɔmɔ?

¹⁹ Beni Yehowa to Israelbii lɛ akɛ maŋ yɛ Mose gbii lɛ amli lɛ, ekɛ amɛ fee kpaŋmɔ, ni ewo shi akɛ kɛji akɛ amɛaaye ekpaŋmɔ lɛ anɔkwale lɛ, amɛaatsɔmɔ osɔfoi amaŋtsɛyeli yɛ ehiɛ. (2 Mose 19:5, 6) Israelbii lɛ yeee anɔkwale ni nakai shiwoo lɛ baaa mli haaa amɛ. Shi yɛ gbɛ kroko nɔ lɛ, maŋ hee lɛ ni atsɔɔ kpaŋmɔ hee ni Yesu ji teŋdamɔlɔ lɛ nɔ atoɔ lɛ etee nɔ ehi shi akɛ anɔkwafo. No hewɔ lɛ emlibii lɛ baanyɛ aye shikpɔŋ lɛ nɔ akɛ maŋtsɛmɛi ni agbɛnɛ hu amɛsɔmɔ akɛ osɔfoi, ni amɛye amɛbua mɛi ni tsui ja yɛ adesai ateŋ lɛ ni akpata amɛkɛ Yehowa teŋ. (Kolosebii 1:20) Etamɔ bɔ ni lala hee lɛ jieɔ lɛ kpo lɛ pɛpɛɛpɛ: “Ni oŋɔ wɔ ofee maŋtsɛmɛi kɛ osɔfoi oha wɔ-Nyɔŋmɔ lɛ, ni wɔɔye maŋtsɛ yɛ shikpɔŋ lɛ nɔ.” (Kpojiemɔ 5:10) Mɛɛ miishɛɛ po nakai onukpai 24 lɛ na yɛ nɛkɛ yijiemɔ lala hee ni amɛla amɛha Yesu ni awo ehiɛ nyam hewɔ lɛ nɛkɛ!

Ŋwɛi Lala Nɔheremɔ

20. Mɛɛ yijiemɔ lala alaa agbɛnɛ akɛjieɔ Toobi lɛ yi?

²⁰ Te mɛi krokomɛi ni yɔɔ ŋwɛi asafo kpeteŋkpele ni ji Yehowa gbɛjianɔtoo lɛ mli lɛ here nɛkɛ lala hee nɛɛ nɔ amɛha tɛŋŋ? Yohane na miishɛɛ akɛ ena bɔ ni amɛjɛ amɛtsuiŋ amɛhere nɔ lɛ: “Ni mikwɛ, ni minu bɔfoi pii ni ebɔle maŋtsɛsɛi lɛ kɛ hiɛkalɔi lɛ kɛ onukpai lɛ ahe kɛkpe lɛ agbee, ni amɛyibɔ ji akpei nyɔŋma toi akpei nyɔŋma kɛ akpe toi akpe, ni amɛkɛ gbee wulu kɛɛ akɛ: Toobi ni agbe lɛ sa akɛ eŋɔ hewalɛ kɛ nifalɛ kɛ nilee kɛ nyɛmɔ kɛ agbojee kɛ anunyam kɛ jɔɔmɔ.” (Kpojiemɔ 5:11, 12) Mɛɛ yijiemɔ lala ni naa mɔ nɔ hewalɛ nɛ!

21. Ani Toobi lɛ yijiemɔ lɛ gbalaa jwɛŋmɔ kɛjɛɔ jeŋ muu fɛɛ nɔyelɔ ni Yehowa ji loo ehegbɛ lɛ nɔ? Tsɔɔmɔ mli.

²¹ Ani enɛ tsɔɔ akɛ belɛ agbɛnɛ Yesu ebaye Yehowa Nyɔŋmɔ najiaŋ ni ákɛ bɔɔ nii fɛɛ etsɔ amɛhe amɛmiijie eyi moŋ fe e-Tsɛ lɛ? Jeee nakai kwraa! Shi moŋ, nɛkɛ yijiemɔ lala nɛɛ kɛ nɔ ni bɔfo Paulo ŋma lɛ kpaa gbee: “Enɛ hewɔ hu ni Nyɔŋmɔ wo [Yesu] enɔ gojoo, ni eduro lɛ gbɛi ni ta gbɛi fɛɛ nɔ, koni mɛi ni yɔɔ ŋwɛi kɛ mɛi ni yɔɔ shikpɔŋ lɛ nɔ kɛ mɛi ni yɔɔ shikpɔŋ lɛ shishi lɛ anakutso fɛɛ nakutso akula shi yɛ Yesu gbɛi lɛ amli, ni lilɛi fɛɛ lilɛi agba mli kpoo akɛ Yesu Kristo ji Nuŋtsɔ, kɛwo Tsɛ Nyɔŋmɔ lɛ hiɛ nyam.” (Filipibii 2:9-11) No hewɔ lɛ ajieɔ Yesu yi yɛ biɛ yɛ gbɛfaŋnɔ ni ena yɛ shishijee naataomɔ ni ka bɔɔ nii fɛɛ hiɛ lɛ mli lɛ hewɔ—jeŋ muu fɛɛ maŋtsɛ ni Yehowa ji lɛ bembuu. Mɛɛ anunyam diɛŋtsɛ, enɛ kɛbaha e-Tsɛ lɛ nɛkɛ!

Lala ni Mɛi Pii Laa

22. Mɛɛ lala ni mɛi pii laa gbeei ni jɛ shikpɔŋ lɛ nɔyeli he lɛ fataa he kɛlaa?

²² Yɛ nɔ ni Yohane tsɔɔ mli lɛ mli lɛ, ŋwɛi asafo lɛ kɛ lala ni ŋɔɔ miijie Yesu yi kɛmiikpɛlɛ enɔkwayeli lɛ kɛ hegbɛ ni ena yɛ ŋwɛi lɛ nɔ. Ni mɛi ni bafataa amɛhe ji gbeei ni jɛ shikpɔŋ nɔ maŋtsɛyeli he lɛ yɛ be mli ni amɛ hu amɛnaa Tsɛ lɛ kɛ Bi lɛ fɛɛ yijiemɔ mli gbɛfaŋnɔ lɛ. Taakɛ bɔ ni adesa bi ko mɔdɛŋbɔɔ baanyɛ ni ekɛ yijiemɔ babaoo abaha efɔlɔi lɛ, nakai nɔŋŋ hu Yesu anɔkwayeli gbɛ lɛ jijeɔ yɛ bɔɔ nii fɛɛ mli “kɛwoɔ Tsɛ Nyɔŋmɔ lɛ hiɛ nyam.” No hewɔ lɛ Yohane tee nɔ ebɔ amaniɛ akɛ: “Ni minu akɛ bɔɔ nii fɛɛ ni yɔɔ ŋwɛi kɛ shikpɔŋ lɛ nɔ kɛ shikpɔŋ lɛ shishi kɛ ŋshɔ hiɛ kɛ nii fɛɛ ni yɔɔ amɛmli lɛ kɛɛ akɛ: Aŋɔ jɔɔmɔ kɛ agbojee kɛ anunyam kɛ nɔyeli aha Mɔ ni ta maŋtsɛsɛi lɛ nɔ lɛ kɛ Toobi lɛ kɛjɛ naanɔ kɛya naanɔ!”—Kpojiemɔ 5:13.

23, 24. (a) Mɛni ji nɔ ni tsɔɔ be mli ni abaaje nɛkɛ lala ni mɛi pii laa nɛɛ shishi yɛ ŋwɛi, ni mɛɛ be abaaje shishi yɛ shikpɔŋ lɛ nɔ? (b) Mɛɛ gbɛ nɔ lala lɛ gbɛɛmɔ yaa hiɛ waa yɛ be mli ni afii lɛ hoɔ lɛ?

²³ Mɛɛ be mli lala ni ŋɔɔ jogbaŋŋ nɛɛ jijeɔ? Eje shishi ejije yɛ Nuŋtsɔ lɛ gbi lɛ shishijee mli. Yɛ be mli ni ashwie Satan kɛ edaimonioi lɛ kɛjɛ ŋwɛi lɛ sɛɛ lɛ, “bɔɔ nii fɛɛ ni yɔɔ ŋwɛi” baanyɛ afee ekome yɛ nɛkɛ yijiemɔ lala nɛɛ mli. Ni taakɛ nɔ ni aŋma afɔ shi lɛ tsɔɔ lɛ, kɛjɛ 1919 kɛbaa nɛɛ, gbɔmɛi ni amɛyi faa yɛ be fɛɛ mli ni yɔɔ shikpɔŋ lɛ nɔ lɛ kɛ amɛgbee efata he yɛ ekomefeemɔ mli akɛmiijie Yehowa yi, ni amɛyifalɛ etee nɔ kɛjɛ akpei fioo ko kɛyashɛ nɔ ni fe akpekpei ekpaa yɛ afi 2005.b Yɛ be mli ni akpata Satan shikpɔŋ nɔ gbɛjianɔtoo lɛ hiɛ lɛ sɛɛ lɛ, “bɔɔ nii fɛɛ ni yɔɔ . . . shikpɔŋ lɛ nɔ” lɛ baala Yehowa kɛ e-Bi lɛ yijiemɔ lalai. Yɛ Yehowa diɛŋtsɛ be ni sa mli lɛ, akpekpei abɔ ni anyɛŋ akane amɛ ni egboi lɛ ashitee lɛ baaje shishi, kɛkɛ lɛ “bɔɔ nii fɛɛ ni yɔɔ . . . shikpɔŋ lɛ shishi” ni ji mɛi ni yɔɔ Nyɔŋmɔ kaimɔ mli lɛ baana hegbɛ ni amɛbafata lala nɛɛ lamɔ he.

²⁴ Amrɔ nɛɛ po, adesai akpekpei abɔ kɛ Yehowa jeŋ muu fɛɛ gbɛjianɔtoo lɛ miila nɛkɛ lala hee nɛɛ “kɛjɛ shikpɔŋ lɛ naagbee he . . . ŋshɔ hiɛ, kɛ . . . ŋshɔkpɔi lɛ” anɔ. (Yesaia 42:10; Lala 150:1-6) Nɛkɛ nyamɔ yijiemɔ nɛɛ baashɛ he ni kwɔ fe fɛɛ yɛ Afii Akpe lɛ naagbee, beni awo adesai anɔ kɛyashɛ emuuyeli mli lɛ. Yɛ no sɛɛ lɛ, abaakpata nakai blema onufu lɛ, shishiulɔ kpeteŋkpele lɛ, Satan diɛŋtsɛ hiɛ kwraa koni eha 1 Mose 3:15 aba mli kɛmɔ shi, ni yɛ naagbee kunimyeli mli kwraa lɛ, bɔɔ nii fɛɛ ni yɔɔ wala mli, mumɔi kɛ adesai baala yɛ ekomefeemɔ mli akɛ: “Aŋɔ jɔɔmɔ kɛ agbojee kɛ anunyam kɛ nɔyeli lɛ aha Mɔ ni ta maŋtsɛsɛi lɛ nɔ kɛ Toobi lɛ kɛjɛ naanɔ kɛya naanɔ!” Gbee ko ni ekpɛlɛɛɛ enɛ nɔ ehiŋ jeŋ muu lɛ fɛɛ mli.

25. (a) Yohane niŋmaa ni kɔɔ jeŋ muu fɛɛ lala ni mɛi pii laa nɛɛ he lɛ kanemɔ tsirɛɔ wɔ koni wɔfee mɛni? (b) Yɛ be mli ni ninaa lɛ baa naagbee lɛ, mɛɛ nɔkwɛmɔnɔ ni yɔɔ nyam hiɛkalɔi ejwɛ lɛ kɛ onukpai 24 lɛ feɔ amɛhaa wɔ?

²⁵ Mɛɛ nyamɔ be enɛ aaaji nɛkɛ! Yɛ anɔkwale mli lɛ, nɔ ni Yohane tsɔɔ mli yɛ biɛ nɛɛ haa wɔtsuii nyaa kɛ miishɛɛ ni ekanyaa wɔ koni wɔkɛ wɔhe afata ŋwɛi asafoi lɛ ahe kɛla yijiemɔ lalai ni jɛ tsuiŋ wɔha Yehowa Nyɔŋmɔ kɛ Yesu Kristo. Ani wɔtswako wɔfai shi babaoo akɛ agbɛnɛ wɔbaaŋmɛ wɔtsui shi yɛ nitsumɔi ni ja mli? Kɛ wɔfee nakai lɛ, wɔbaakpa gbɛ akɛ, yɛ Yehowa yelikɛbuamɔ naa lɛ, wɔ baahi jɛmɛ akɛ aŋkroaŋkroi yɛ miishɛɛ naagbee lɛ mli, ni wɔkɛ wɔgbee ayafata nakai jeŋ muu fɛɛ yijiemɔ lala nɔheremɔ lɛ he. Yɛ anɔkwale mli lɛ, hiɛkalɔi ejwɛ ni ji kerubim lɛ kɛ Kristofoi ni afɔ amɛ mu ni atee amɛ shi lɛ fɛɛ kpaa gbee, ejaakɛ ninaa lɛ baa naagbee kɛ nɛkɛ wiemɔi nɛɛ: “Ni hiɛkalɔi ejwɛ lɛ kɛɛ: Amen. Ni onukpai nyɔŋmai-enyɔ kɛ ejwɛ lɛ ho gbee shi ni amɛja.”—Kpojiemɔ 5:14.

26. Mɛni mli esa akɛ wɔtsɔɔ hemɔkɛyeli yɛ, ni mɛni Toobi lɛ saa ehe koni efee?

²⁶ Eba akɛ, bo nikanelɔ, ooojie hemɔkɛyeli kpo yɛ Toobi lɛ—‘mɔ ni sa’ lɛ afɔleshaa lɛ mli—koni ajɔɔ bo yɛ mɔdɛŋ ni obɔɔ yɛ heshibaa mli koni oja ni osɔmɔ Yehowa—“Mɔ ni ta maŋtsɛsɛi lɛ nɔ lɛ” mli. Ha Yohane kuu lɛ aye abua bo ŋmɛnɛ yɛ be mli ni ekɛ “[mumɔŋ] niyenii haa yɛ be ni sa mli” lɛ. (Luka 12:42) Shi kwɛmɔ! Toobi lɛ esaa ehe koni egbele naasɔomɔi kpawo lɛ anaa. Mɛɛ nibii ni haa mɔ mii shɛɔ ehe yɔɔ mli kɛha wɔ?

[Shishigbɛ niŋmai]

[Baafa muu mfoniri ni yɔɔ baafa 86]

Yitso 16

Okpɔŋɔnɔtaralɔi Ejwɛ ni Miiho!

Ninaa 3​—Kpojiemɔ 6:1-17

Saneyitso: Okpɔŋɔnɔtaralɔi ejwɛ lɛ anyiɛmɔ, la odasefoi ni yɔɔ afɔleshaa latɛ lɛ shishi lɛ, kɛ mlifu gbi kpeteŋkpele lɛ

Emlibaa be: Kɛjɛ 1914 kɛyashi nibii agbɛjianɔtoo nɛɛ

 1. Yehowa jieɔ wolo ni Yesu tseɔ naa lɛ mli saji lɛ kpo etsɔɔ Yohane yɛ mɛɛ gbɛ nɔ?

YƐ HAOMƆ gbii nɛɛ amli lɛ, ani wɔbɛ he miishɛɛ waa akɛ wɔɔle “nii ni sa akɛ aba mli oya”? Wɔmiisumɔ ni wɔle, ejaakɛ ekɔɔ wɔ diɛŋtsɛ wɔhe! No hewɔ lɛ nyɛhaa wɔfataa Yohane he yɛ be mli ni Yesu yaa nɔ egbeleɔ nakai wolo ni ataoɔ ale emli sane lɛ naa lɛ. Nɔ ni yɔɔ naakpɛɛ ji akɛ, ehe ehiaaa ni Yohane akane. Mɛni hewɔ? Ejaakɛ akɛ emli nibii lɛ ha lɛ “yɛ okadii amli” kɛtsɔ nibii sɔrɔtoi afeemɔ ni hewalɛ yɔɔ mli nɔ.—Kpojiemɔ 1:1, 10.

 2. (a) Mɛni Yohane na ni enu hu, ni kerubim lɛ puemɔ tsɔɔ mɛni? (b) Namɔ klɛŋklɛŋ kerubim lɛ kɛ efamɔ lɛ ha, ni mɛni hewɔ ohaa hetoo nakai?

² Bo Yohane toi beni Yesu tse wolo lɛ klɛŋklɛŋ naasɔomɔ nɔ lɛ naa lɛ: “Ni mina akɛ Toobi lɛ tse naasɔomɔi kpawo lɛ ekome; ni minu akɛ hiɛkalɔi ejwɛ lɛ ateŋ mɔ kome kɛ gbee ni tamɔ nugbɔshimɔ gbee kɛɛ: Ba ni obakwɛ!” (Kpojiemɔ 6:1) Enɛ ji klɛŋklɛŋ kerubim lɛ gbee. Bɔ ni ehiɛ tamɔ jata ha lɛ baaha Yohane anu shishi akɛ Yehowa gbɛjianɔtoo lɛ kɛ ekaa baatsu nii yɛ E-jalɛ fɔbuu kojomɔi lɛ ahe nitsumɔ mli. Ni namɔ akɛ famɔ nɛɛ ha? Enyɛŋ efee Yohane, ejaakɛ afɔ nine atsɛ Yohane momo akɛ eba ni ebana gbalɛ mli nibii nɛɛ amli gbɛfaŋnɔ. (Kpojiemɔ 4:1) Nakai “gbee ni tamɔ nugbɔshimɔ gbee” lɛ miitsɛ mɛi krokomɛi ni yɔɔ ninai sɔrɔtoi ejwɛ ni baaba lɛ mli klɛŋklɛŋ nɔ lɛ mli lɛ.

Okpɔŋɔ Yɛŋ kɛ Enɔtalɔ ni Ehe Gbɛi Lɛ

 3. (a) Mɛni Yohane tsɔɔ mli agbɛnɛ? (b) Yɛ nɔ ni kɛ Biblia mli okadii kpaa gbee lɛ, esa akɛ okpɔŋɔ yɛŋ lɛ afee mɛni he mfoniri?

³ Yohane, kɛ Yohane kuu lɛ kɛ amɛhefatalɔi ni yɔɔ ekaa ŋmɛnɛ lɛ ena hegbɛ akɛ amɛaana nɔkwɛmɔnɔ ko ni hoɔ oya kɛ foi! Yohane kɛɛ: “Ni mikwɛ, ni naa, okpɔŋɔ yɛŋ; ni mɔ ni ta enɔ lɛ hiɛ gai, ni aha lɛ akekere, ni eje kpo eeye kunim, koni egbe ekunimyeli lɛ naa.” (Kpojiemɔ 6:2, New World Translation.) Hɛɛ, yɛ nakai “ba ni obakwɛ!” lɛ ni gbɛɛ tamɔ nugbɔshiimɔ lɛ hetoohamɔ mli lɛ, okpɔŋɔ yɛŋ fa kɛ foi ba. Yɛ Biblia mli lɛ, afɔɔ okpɔŋɔ he mfonirifeemɔ akɛ tawuu. (Lala 20:8; Abɛi 21:31; Yesaia 31:1) Eka shi faŋŋ akɛ okpɔŋɔ nɛɛ he yɛ fɛo, ehe eyɛŋ ni ekpɛlɛɔ, ni tsɔɔ krɔŋkrɔŋfeemɔ ni muji ko bɛ mli. (Okɛto Kpojiemɔ 1:14; 4:4; 7:9; 20:11 he.) Kwɛ bɔ ni enɛ sa jogbaŋŋ ha, ejaakɛ etsɔɔ tawuu ni he tse ni ja yɛ Yehowa hiŋmɛii ni yɔɔ krɔŋkrɔŋ lɛ amli!—Kwɛmɔ Kpojiemɔ 19:11, 14 hu.

 4. Namɔ ji okpɔŋɔ yɛŋ lɛ Nɔtalɔ lɛ? Tsɔɔmɔ mli.

⁴ Namɔ ji okpɔŋɔ nɛɛ Nɔtalɔ lɛ? Ehiɛ gai, tawuu nii ni akɛtutuaa mɔ, shi aha lɛ akekere hu. Jalɔi pɛ ni ana ni amɛbumɔ akekerei yɛ Nuŋtsɔ lɛ gbi lɛ mli ji Yesu kɛ kuu ni onukpai 24 lɛ damɔ shi kɛha amɛ lɛ. (Daniel 7:13, 14, 27; Luka 1:31-33; Kpojiemɔ 4:4, 10; 14:14)a Enyɛŋ eba akɛ aaafee onukpai 24 akuu nɛɛ mli nyo ko he mfoniri akɛ enine miishɛ akekere nɔ yɛ lɛ diɛŋtsɛ ejalɛ naa. No hewɔ lɛ, esa akɛ nɛkɛ okpɔŋɔnɔtalɔ kome nɛɛ afee Yesu Kristo shi jeee mɔ kroko. Yohane na lɛ yɛ ŋwɛi yɛ 1914 ni fee yinɔsane be lɛ mli, yɛ be mli ni Yehowa jaje akɛ, “Miwo mimaŋtsɛ,” ni ekɛɔ lɛ akɛ yiŋtoo ni yɔɔ sɛɛ ji ni “maŋɔ jeŋmaji lɛ mahão akɛ ogboshinii” lɛ. (Lala 2:6-8)b No hewɔ lɛ, klɛŋklɛŋ naasɔomɔ ni Yesu tse naa lɛ jieɔ bɔ ni lɛ diɛŋtsɛ lɛ, akɛ Maŋtsɛ hee ni akɛ akekere ebu lɛ lɛ, eyaa ta yɛ be ni Nyɔŋmɔ eto lɛ naa lɛ kpo.

 5. Yɛ mɛɛ gbɛ nɔ Lalatsɛ lɛ tsɔɔ bɔ ni okpɔŋɔ Nɔtalɔ lɛ ji lɛ mli tamɔ nɔ ni yɔɔ Kpojiemɔ 6:2 lɛ pɛpɛɛpɛ?

⁵ Ninaa nɛɛ kɛ Lala 45:5-8, ni akɛ Maŋtsɛ ni Yehowa kɛ lɛ eta sɛi nɔ lɛ wie lɛ kpaa gbee fɛfɛo: “Anɔkwale kɛ mlijɔlɛ kɛ jalɛ hewɔ lɛ jee kpo ni oba yɛ ogbojee lɛ mli, ni oninejurɔ atsɔɔo nii ni yɔɔ gbeyei! Ogaimlibii lɛ anaa ba; maji lɛ tswiatswiaa shi yɛ ohiɛ; amɛtsurɔɔ maŋtsɛ lɛ henyɛlɔi lɛ atsuiaŋ! Nyɔŋmɔ, omaŋtsɛsɛi lɛ ma shi kɛmiiya naanɔi anaanɔ; omaŋtsɛyeli tso lɛ, jalɛ tso ni. Osumɔɔ jalɛ ni onyɛɔ nifɔji anii; hewɔ lɛ Nyɔŋmɔ, ni ji o-Nyɔŋmɔ lɛ, kɛ mlifilimɔ mu lɛ efoɔ fe onanemɛi.” Akɛni ele gbalɛ nɛɛ mlitsɔɔmɔ lɛ hewɔ lɛ, Yohane baayoo akɛ ekɔɔ Yesu nitsumɔ akɛ Maŋtsɛ lɛ he.—Okɛto Hebribii 1:1, 2, 8, 9 he.

Eeya Koni Eyaye Kunim

 6. (a) Mɛni hewɔ esa akɛ okpɔŋɔ Nɔtalɔ lɛ aya nɔ aye kunim lɛ? (b) Nɛkɛ kunimyeli tafaa nɛɛ yaa nɔ kɛtsɔɔ mɛɛ afii amli?

⁶ Shi, mɛni hewɔ esa akɛ Maŋtsɛ hee ni awo lɛ nɛɛ ata okpɔŋɔ nɔ kɛya ta lɛ? No ji akɛ ato emaŋtsɛyeli lɛ ama shi yɛ shitee-kɛ-woo ni naa wa ni jɛ Yehowa henyɛlɔ kpeteŋkpele, Satan Abonsam, kɛ mɛi ni yɔɔ shikpɔŋ nɔ ni—amɛle jio amɛleee jio—amɛsɔmɔɔ Satan nibii lɛ adɛŋ. Maŋtsɛyeli lɛ diɛŋtsɛ fɔmɔ biɔ ni ta wulu ko aba ŋwɛi. Yɛ be mli ni ewuɔ ta yɛ gbɛi ni ji Mikael (ni eshishi ji “Namɔ Tamɔ Nyɔŋmɔ?”) lɛ shishi lɛ, Yesu ye Satan kɛ edaimonioi lɛ anɔ kunim ni eshɛrɛ amɛ eshwie shikpɔŋ lɛ nɔ. (Kpojiemɔ 12:7-12) Yesu kunim ni eyeɔ lɛ yaa nɔ kɛtsɔɔ Nuŋtsɔ lɛ gbi lɛ mli shishijee afii nyɔŋmai abɔ lɛ amli yɛ be mli ni abuaa adesai ni tamɔ gwaŋtɛŋi lɛ anaa lɛ. Eyɛ mli akɛ jeŋ muu lɛ fɛɛ “ka mɔ fɔŋ lɛ hewalɛ mli” moŋ, shi Yesu yaa nɔ ekɛ suɔmɔ kwɛɔ enyɛmimɛi ni afɔ amɛ mu lɛ kɛ amɛhefatalɔi lɛ, ni eyeɔ ebuaa amɛteŋ mɔ fɛɛ mɔ koni enine ashɛ hemɔkɛyeli kunimyeli lɛ nɔ.—1 Yohane 5:19.

 7. Mɛɛ kunim Yesu eye yɛ shikpɔŋ nɔ yɛ Nuŋtsɔ lɛ gbi lɛ klɛŋklɛŋ afii nyɔŋmai abɔ lɛ amli, ni mɛni esa akɛ efee wɔfaishitswaa?

⁷ Mɛɛ kunimii krokomɛi Yesu eye yɛ afii 90 kɛ nɔ ni fe nakai ni eho kɛjɛ Nuŋtsɔ lɛ gbi lɛ mli kɛbaa nɛɛ lɛ mli? Yehowa webii kɛ haomɔi, nɔnyɛɛ kɛ yiwai sɔrɔtoi ekpe yɛ jeŋ muu fɛɛ, akɛ aŋkroaŋkroi kɛ asafoi, tamɔ nɔ ni bɔfo Paulo tsɔɔ mli yɛ be mli ni eyeɔ esɔɔmɔ nitsumɔ lɛ he odase lɛ. (2 Korintobii 11:23-28) “Hewalɛ ni fa kɛteke nɔ” he ehia Yehowa Odasefoi, titri lɛ yɛ tawuu kɛ awuiyeli be mli, bɔni afee ni amɛnyɛ amɛŋmɛ amɛtsui shi. (2 Korintobii 4:7) Shi yɛ shihilɛi ni mli wawai lɛ amli po lɛ, Odasefoi anɔkwafoi lɛ enyɛ ekɛɛ taakɛ bɔ ni Paulo kɛɛ lɛ: “Shi Nuŋtsɔ lɛ fi misɛɛ ni ewo mi hewalɛ, koni atsɔ minɔ ama shiɛmɔ lɛ nɔ mi.” (2 Timoteo 4:17) Hɛɛ, Yesu ye kunim yɛ amɛ hewɔ. Ni ebaaya nɔ eye kunim yɛ wɔ hewɔ, bei abɔ ni wɔtswa wɔfai shi akɛ wɔbaagbe wɔ hemɔkɛyeli ni yeɔ kunim lɛ naa lɛ.—1 Yohane 5:4.

8, 9. (a) Mɛɛ kunimyelii jeŋ muu fɛɛ Yehowa Odasefoi asafo lɛ ena mli gbɛfaŋnɔ? (b) Yehowa Odasefoi lɛ ayifalɛ lɛ eje kpo yɛ gbɛ ni ekaaa nɔ diɛŋtsɛ yɛ mɛni mli?

⁸ Yehowa Odasefoi asafo ni yɔɔ jeŋ muu fɛɛ lɛ ena kunimyelii pii amli gbɛfaŋnɔ yɛ e-Maŋtsɛ ni yeɔ kunim lɛ gbɛtsɔɔmɔ shishi. Nɔ ni ekaaa ji be mli ni ebu nɛkɛ Biblia Kaselɔi nɛɛ ahe koni akabule amɛshishi yɛ 1918 lɛ, yɛ be mli ni amɛ diɛŋtsɛ lɛ Satan maŋkwramɔŋ gbɛjianɔtoo lɛ ‘ye amɛnɔ kunim’ yɛ be kukuoo mli lɛ. Shi yɛ 1919 mli lɛ, ekumɔ gboklɛfoi atsui asɛɛ adabaŋi lɛ ni ejie amɛ, ni ewo amɛ hewalɛ koni amɛjaje sanekpakpa lɛ “kɛyashi shikpɔŋ lɛ naagbee hei lɛ.”—Kpojiemɔ 13:7; Bɔfoi lɛ Asaji 1:8.

⁹ Dani Jeŋ Ta II aaaba, kɛ no mli fɛɛ lɛ, Nɔyelɔi yiwalɔi ni efee ekome lɛ bɔ mɔdɛŋ ni amɛkpata Yehowa Odasefoi ahiɛ yɛ shikpɔji pii anɔ yɛ he ni jamɔ mli hiɛnyiɛlɔi, titri lɛ mɛi ni jɛ Roma Katolik nɔyeli kuu lɛ mli lɛ fi nɔyelɔi yiwalɔi nɛɛ asɛɛ koni amɛwa amɛ yi yɛ faŋŋ mli loo yɛ okadi gbɛ nɔ lɛ. Shi Odasefoi 71,509 ni shiɛɔ yɛ be mli ni ta lɛ je shishi yɛ 1939 lɛ ayifalɛ shɛ 141,606 yɛ be mli ni ta lɛ baa naagbee yɛ 1945, eyɛ mli akɛ amɛyibɔ ni fe 10,000 kɛ afii babaoo ehi gboklɛfoi atsui kɛ yiwalɛ ŋsraiaŋ ni agbe aaafee 2,000 hu. Odasefoi ni yɔɔ ekaa lɛ ayibɔ yɛ shikpɔŋ muu lɛ fɛɛ nɔ lɛ mli elɛɛ kɛyashɛ nɔ ni fe akpekpei ekpaa ŋmɛnɛ. Yifalɛ nɛɛ efee nɔ ni etee nɔ waa yɛ gbɛ ni ekaaa nɔ yɛ Katolik shikpɔji anɔ kɛ agbɛnɛ yɛ maji ni yiwaa lɛ mli wa waa yɛ mli lɛ anɔ—tamɔ Germany, Italia, kɛ Japan, ni Odasefoi ni yɔɔ jɛmɛ lɛ ayibɔ fe shiɛlɔi 600,000 ni yɔɔ ekaa lɛ.—Yesaia 54:17; Yeremia 1:17-19.

10. Mɛɛ kunimyelii Maŋtsɛ ni yeɔ kunim lɛ kɛjɔɔ ewebii lɛ yɛ “sanekpakpa lɛ hefamɔ kɛ enɔmimaa mli”?

¹⁰ Wɔ Maŋtsɛ ni yeɔ kunim lɛ hu ejɔɔ ewebii ni yɔɔ ekaa lɛ ejaakɛ enyiɛ amɛhiɛ kɛtee kunimyelii pii amli yɛ “sanekpakpa lɛ he famɔ kɛ enɔmimaa mli” yɛ saneyeli hei kɛ agbɛnɛ yɛ nɔyelɔi ahiɛ. (Filipibii 1:7; Mateo 10:18; 24:9) Enɛ etee nɔ yɛ majimaji babaoo mli—yɛ Australia, Argentina, Canada, Greece, India, Swaziland, Switzerland, Turkey, kɛ maji krokomɛi anɔ. Mla naa kunimyelii 50 ni Yehowa Odasefoi na yɛ U.S.A Kojomɔ He Wulu lɛ mli ekomɛi efee nɔ ni maa hegbɛ ni ayɔɔ akɛ akɛaajaje sanekpakpa “yɛ faŋŋ kɛ shia kɛ shia” lɛ nɔ mi ni agbɛnɛ amɛtsi amɛhe kɛjɛ maŋhedɔɔ nifeemɔi ni ji wɔŋjamɔ lɛ ahe. (Bɔfoi lɛ Asaji 5:42; 20:20; 1 Korintobii 10:14) No hewɔ lɛ, agbele gbɛ aha jeŋ muu fɛɛ odaseyeli nitsumɔ mlilɛɛmɔ.

11. (a) Okpɔŋɔ Nɔtalɔ lɛ “gbeɔ ekunimyeli lɛ naa” yɛ mɛɛ gbɛ nɔ? (b) Te esa akɛ naasɔomɔ ni ji enyɔ, etɛ kɛ ejwɛ lɛ naatsemɔ asa wɔhe aha tɛŋŋ?

¹¹ Mɛɛ gbɛ Yesu tsɔɔ nɔ “egbeɔ ekunimyeli lɛ naa” yɛ?c Efeɔ enɛ, taakɛ wɔbaana lɛ, kɛtsɔɔ apasa jamɔ ni ejieɔ kɛyaa kɛ agbɛnɛ Satan gbɛjianɔtoo ni anaa lɛ mli nɔ fɛɛ nɔ ni eshwɛ ni eshɛrɛɔ ewoɔ okadi “la kpaakpo” lɛ ni ji hiɛkpatamɔ mli lɛ nɔ, ni ekɛ nɛkɛ feemɔ buɔ jeŋ muu fɛɛ maŋtsɛ ni Yehowa ji lɛ bem. Wɔkɛ hekɛnɔfɔɔ miikpa nakai Harmagedon gbi lɛ gbɛ agbɛnɛ, yɛ be mli ni wɔ “maŋtsɛmɛi a-Maŋtsɛ” lɛ baaye naagbee kunim kwraa yɛ Satan maŋkwramɔŋ gbɛjianɔtoo ni waa mɛi ayi lɛ nɔ lɛ! (Kpojiemɔ 16:16; 17:14; 19:2, 14-21; Ezekiel 25:17) Dani enɛ aaaba lɛ, Kunimyelɔ ni anyɛɛɛ enɔ aye ni ta okpɔŋɔ yɛŋ lɛ nɔ lɛ yaa nɔ yɛ be mli ni Yehowa yaa nɔ ekɛ mɛi ni yɔɔ tsuijurɔ lɛ fataa E-jalɛ maŋ ni yɔɔ shikpɔŋ lɛ nɔ lɛ ahe lɛ. (Yesaia 26:2; 60:22) Ani okɛ Yohane kuu ni afɔ amɛ mu lɛ miina nakai Maŋtsɛyeli mlilɛɛmɔ ni miishɛɛ yɔɔ mli lɛ mli gbɛfaŋnɔ? Yɛ enɛ mli lɛ, nɔ ni bɔfo Yohane na yɛ be mli ni atserɛɔ naasɔomɔi etɛ ni nyiɛ sɛɛ lɛ anaa lɛ baakanya bo koni ona Yehowa nitsumɔ kɛha ŋmɛnɛ gbi nɛɛ lɛ mli gbɛfaŋnɔ babaoo.

Naa, Okpɔŋɔ ni Tsuɔ!

12. Mɛni Yesu kɛɛ akɛ ebaakadi ba ni eba akɛ Maŋtsɛ ni anaaa lɛ lɛ?

¹² Kɛmiiya Yesu shikpɔŋ nɔ sɔɔmɔ nitsumɔ lɛ naagbee lɛ, ekaselɔi lɛ bi lɛ yɛ teemɔŋ akɛ: “Mɛni ji beni oba lɛ kɛ nibii agbɛjianɔtoo lɛ naagbee lɛ he okadi?” Yɛ hetoohamɔ mli lɛ, egba amanehului babaoo ni baafee “kɔɔmɔi lɛ abɔimɔ.” Yesu kɛɛ: “Ni maŋ aaate shi awo maŋ, ni maŋtsɛyeli hu aaate shi awo maŋtsɛyeli; ni shikpɔŋhosomɔi ni naa wa aaaba hei sɔrɔtoi fɛɛ, kɛ hɔji kɛ gbelehelai, ni gbeyei nibii kɛ okadii wuji aaajɛ ŋwɛi aba.” (Mateo 24:3, 7, 8, New World Translation; Luka 21:10, 11) Nibii ni Yohane na beni atserɛ wolo lɛ naasɔomɔi ni eshwɛ lɛ anaa lɛ kɛ nɔ ko ni kɛ gbalɛ nɛɛ kpaa gbee ha. Agbɛnɛ kwɛmɔ yɛ be mli ni Yesu ni awo ehiɛ nyam lɛ tseɔ naasɔomɔ nɔ ni ji enyɔ lɛ naa lɛ!

13. Mɛɛ sɔrɔtofeemɔ ko Yohane baana agbɛnɛ?

¹³ “Ni beni etse naasɔomɔ nɔ ni ji enyɔ lɛ, minu akɛ hiɛkalɔ ni ji enyɔ lɛ kɛɛ: Ba ni obakwɛ!” (Kpojiemɔ 6:3) Kerubim ni ji enyɔ lɛ, mɔ ni hiɛ tamɔ tsina lɛ, lɛ ji mɔ ni kɛ famɔ lɛ ha. Hewalɛ ji nɔ ni afeɔ he mfoniri yɛ biɛ lɛ, shi hewalɛ ni akɛtsuɔ nii yɛ jalɛ naa. Nɔ ni tamɔɔɔ enɛ lɛ, agbɛnɛ Yohane baana hewalɛ kpojiemɔ ni yɔɔ gbeyei ni gbeɔ mɔ.

14. Mɛɛ okpɔŋɔ kɛ enɔtalɔ Yohane na yɛ enɛ sɛɛ, ni nɛkɛ ninaa nɛɛ feɔ mɛni he mfoniri?

¹⁴ Belɛ mɛɛ gbɛ nɔ ahaa famɔ ni ji enyɔ ni ji “Ba ni obakwɛ!” lɛ hetoo yɛ? Yɛ nɛkɛ gbɛ nɔ: “Ni okpɔŋɔ kroko ni tsuɔ je kpo, ni mɔ ni ta enɔ lɛ, aha lɛ hegbɛ koni ejie hejɔlɛ kɛjɛ shikpɔŋ lɛ nɔ ni amɛgbegbee amɛhe, ni aha lɛ klante kpeteŋkpele ko.” (Kpojiemɔ 6:4) Ninaa ko ni yɔɔ gbeyei lɛlɛŋ! Ni ŋwanejee ko bɛ nɔ ni efeɔ he mfoniri lɛ he: ta! Jeee Yehowa Maŋtsɛ ni yeɔ kunim lɛ jalɛ kunimyeli tawuu lɛ eko, shi moŋ adesai amajimaji ateŋ tawuu ni he ehiaaa ni fɔseɔ la babaoo eshwieɔ shi ni ekɛ piŋmɔ kɛ yiwalɛ baa lɛ. Belɛ kwɛ bɔ ni esa jogbaŋŋ akɛ nɛkɛ okpɔŋɔnɔtalɔ nɛɛ aaata okpɔŋɔ ni tsuɔ nɔ!

15. Mɛni hewɔ esaaa akɛ wɔtaoɔ okpɔŋɔnɔtalɔ ni ji enyɔ lɛ nyiɛmɔ lɛ?

¹⁵ Eka shi faŋŋ akɛ Yohane basumɔŋ ni ekɛ okpɔŋɔnɔtalɔ nɛɛ kɛ he ni eyaa lɛ ana nɔ ko feemɔ, ejaakɛ agba yɛ Nyɔŋmɔ webii lɛ ahe akɛ: “Ni amɛkaseŋ tawuu dɔŋŋ.” (Yesaia 2:4) Eyɛ mli akɛ “amɛyɛ je lɛ mli” lolo moŋ, shi Yohane, ni agbɛnɛ kɛ abaakpa mli lɛ, Yohane kuu lɛ kɛ asafo babaoo ni yɔɔ ŋmɛnɛ lɛ “jeee” gbɛjianɔtoo ni la ekpa mli fɛɛ nɛɛ “fa”. Wɔtawuu nii lɛ, mumɔŋ tawuu nii ni, kɛ “hewalɛ nii yɛ Nyɔŋmɔ hiɛ” koni akɛjaje anɔkwale lɛ yɛ ekaa naa, ni heloonaa tawuu bɛ mli.—Yohane 17:11, 14; 2 Korintobii 10:3, 4.

16. Mɛɛ be mli ni yɛ mɛɛ gbɛ nɔ akɛ “klante kpeteŋkpele ko” ha mɔ ni ta okpɔŋɔ tsuru lɛ nɔ lɛ yɛ?

¹⁶ Awuu tai pii dani 1914, afi nɔ ni Okpɔŋɔnɔtalɔ ni ta okpɔŋɔ yɛŋ lɛ nɔ lɛ nine shɛ ekekere lɛ nɔ lɛ ba. Shi agbɛnɛ aha okpɔŋɔnɔtalɔ ni ta okpɔŋɔ tsuru lɛ nɔ lɛ “klante kpeteŋkpele ko.” Mɛni ji nɔ ni enɛ tsɔɔ? Beni Jeŋ Ta I fɛ pɛ kɛkɛ ni adesa tawuu batsɔ nɔ ni shwieɔ la shi babaoo, nɔ ni fiteɔ nii babaoo fe fɛɛ. Yɛ 1914-18 la ni afɔse ashwie shi lɛ mli lɛ, akɛ tawuu tsɔnei, kɔɔyɔɔ ni ebɔɔ yɔɔ mli, kɔɔyɔŋ lɛji, ŋshɔ shishi lɛji, okpɛlɛmii wuji kɛ tawuu nii heei tsu nii ekolɛ yɛ klɛŋklɛŋ be mli kwraa aloo yɛ gbɛ ni da ni afeko nakai da lɛ nɔ. Maji 28 yɛ ni abua maŋ muu lɛ fɛɛ naa awo ta he mɔdɛŋbɔɔ lɛ mli, shi jeee asraafoi pɛ. Mɛi ni gboi lɛ yɛ gbeyei. Agbe asraafoi fe akpekpei nɛɛhu, ni maŋbii ni gboi lɛ ayifalɛ lɛ faa mɔ tsui. Beni ta lɛ ba naagbee po lɛ, akuuu sɛɛɛ ayaaa toiŋjɔlɛ he yɛ shikpɔŋ lɛ nɔ dɔŋŋ. Aaafee ta lɛ sɛɛ afii 50 lɛ, German maŋ onukpa Konrad Adenauer wie akɛ: “Shweshweeshwe shihilɛ kɛ kpoofeemɔ elaaje kɛjɛ gbɔmɛi ashihilɛ mli kɛjɛ 1914.” Lɛlɛŋ eji akɛ, akɛ hegbɛ ha okpɔŋɔ tsuru lɛ nɔtalɔ lɛ koni ejie toiŋjɔlɛ kɛjɛ shikpɔŋ lɛ nɔ kɛya!

17. “Klante kpeteŋkpele” lɛ kɛ nitsumɔ etee nɔ yɛ Jeŋ Ta I sɛɛ yɛ mɛɛ gbɛ nɔ?

¹⁷ Kɛkɛ ni, akɛni etee la he kumai ni yeɔ lɛ shi hewɔ lɛ, mɔ ni ta okpɔŋɔ tsuru lɛ nɔ lɛ kɛ ehe wo Jeŋ Ta II mli. Dɛŋdadei ni akɛgbe gbɔmɛi lɛ yɛ gbeyei fe nine, ni mɛi ni gboi lɛ ku bɔ Jeŋ Ta I nɔ lɛ he toi ejwɛ. Aŋmɛɛ atɔm okpɛlɛmii enyɔ he ashwie Japan nɔ, yɛ 1945, ni eko fɛɛ eko—yɛ hiŋmɛitswaa pɛ mli lɛ—kpata gbɔmɛi akpei nyɔŋma-nyɔŋmai abɔ hiɛ. Yɛ jeŋ ta ni ji enyɔ lɛ mli lɛ, mɔ ni ta okpɔŋɔ tsuru lɛ nɔ lɛ kpa ŋmaa diɛŋtsɛ ni ji wala akpekpei 55, ni yɛ no po mli lɛ etsui enyɔɔɔ emli. Abɔ amaniɛ ni anyɛɔ akɛ he fɔɔ nɔ akɛ susumai ni fa fe akpekpei 20 enyɔ yɛ “klante kpeteŋkpele” ni ekɛtsu nii kɛjɛ Jeŋ Ta II be lɛ sɛɛ nɛɛ lɛ mli.

18, 19. (a) Ni eeefee tawuu he nilee he kunimyeli moŋ lɛ, anɔkwale ni eji akɛ ágbe gbɔmɛi babaoo yɛ Jeŋ Ta II sɛɛ lɛ ji mɛni he odaseyeli? (b) Mɛɛ oshara kã adesai ahiɛ, shi mɛni ji nɔ ni okpɔŋɔ yɛŋ lɛ Nɔtalɔ lɛ baafee koni ekɛjie enɛ kɛya?

¹⁸ Ani wɔɔnyɛ wɔtsɛ enɛɛmɛi fɛɛ akɛ kunimyeli kɛha tawuu mli nilee? Eji odaseyeli moŋ ni tsɔɔ akɛ okpɔŋɔ tsuru lɛ ni enaaa mɔbɔ lɛ miiho lolo. Ni nɛgbɛ ji he ni eyaa nɛɛ baaya ayagbe naa yɛ? Jeŋ nilelɔi komɛi tsɔɔ akɛ nuklea tawuu baanyɛ aba trukaa—aahu ni nuklea tawuu ni aje gbɛ ato he gbɛjianɔ! Shi yɛ miishɛɛ mli lɛ, okpɔŋɔ yɛŋ lɛ Nɔtalɔ ni yeɔ kunim lɛ yɛ susumɔi krokomɛi yɛ enɛ he.

¹⁹ Bei abɔ ni gbɔmɛi damɔɔ maŋhedɔɔ henɔwomɔ kɛ nyɛɛ nɔ amɛhiɔ shi nɛɛ, esa akɛ adesai atara nuklea tutsofa ni yɔɔ gbeyei lɛ nɔ. Kɛji akɛ jeŋmaji lɛ baakpata amɛ nuklea tawuu nii lɛ fɛɛ ahiɛ yɛ hehiamɔ mli po lɛ, amɛbaaya nɔ amɛle bɔ ni afeɔ lɛ lɛ lolo. Kɛ afa yɛ be kukuoo mli lɛ, amɛbaanyɛ amɛku sɛɛ amɛfee amɛ nuklea tawuu nii ni yɔɔ gbeyei nɛɛ ekoŋŋ; no hewɔ lɛ, etsɛŋ ni ta ni akɛ tawuu nii memeji lɛ wuɔ lɛ baatsɔ nuklea tawuu. Esa akɛ nyɛɛ kɛ hetsɛ ni ebɔle jeŋmaji lɛ ahe ŋmɛnɛ kɛkpe lɛ anyiɛ adesai ahiɛ kɛya hegbee mli, ja—ah, hɛɛ, ja okpɔŋɔ yɛŋ lɛ Nɔtalɔ lɛ etsi okpɔŋɔ tsuru lɛ nyiɛmɔ yɛ sɛkɛyeli mli lɛ naa. Nyɛhaa wɔnaa hekɛnɔfɔɔ akɛ Kristo ni ji Maŋtsɛ lɛ baata okpɔŋɔ nɔ koni egbe jeŋ ni Satan kudɔɔ lɛ nɔ kunim ni eyeɔ lɛ naa kwraa koni eto jalɛ shikpɔŋ hee ni damɔ suɔmɔ nɔ ema shi—suɔmɔ kɛha Nyɔŋmɔ kɛ naanyo—ni ji hewalɛ kɛha toiŋjɔlɛ ni fe nuklea tawuu nii ni damɔɔɔ shi shiŋŋ ni akɛɛ akɛbaaku tawuu naa kwraa yɛ wɔ sɛkɛyeli be nɛɛ mli lɛ.—Lala 37:9-11; Marko 12:29-31; Kpojiemɔ 21:1-5.

Okpɔŋɔ Diŋ Fa Kpo

20. Mɛɛ nɔmimaa wɔyɔɔ akɛ okpɔŋɔ yɛŋ lɛ Nɔtalɔ lɛ baanyɛ adamɔ shihilɛi ni kɛ haomɔi baa lɛ fɛɛ naa?

²⁰ Agbɛnɛ Yesu tse naasɔomɔ ni ji etɛ lɛ! Yohane, mɛni onaa? “Ni beni etse naasɔomɔ ni ji etɛ lɛ, minu akɛ hiɛkalɔ ni ji etɛ lɛ kɛɛ: Ba ni obakwɛ!” (Kpojiemɔ 6:5a) Yɛ miishɛɛ mli lɛ, nɛkɛ kerubim ni ji etɛ nɛɛ “hiɛ tamɔ gbɔmɔ hiɛ,” ni eetsɔɔ su ni ji suɔmɔ. Suɔmɔ ni damɔ shishitoo mla nɔ baafa babaoo yɛ Nyɔŋmɔ jeŋ hee lɛ mli, taakɛ bɔ ni nakai su fɛfɛo lɛ egbɛ eshwa Yehowa gbɛjianɔtoo muu lɛ fɛɛ mli ŋmɛnɛ lɛ. (Kpojiemɔ 4:7; 1 Yohane 4:16) Wɔbaanyɛ wɔna nɔmimaa akɛ nakai okpɔŋɔ yɛŋ lɛ Nɔtalɔ lɛ, ni “ja eye maŋtsɛ kɛyashi beyinɔ ni eeeŋɔ ehenyɛlɔi lɛ fɛɛ eto enajiashi” lɛ kɛ suɔmɔ baajie amanehulu shihilɛ ni akɛtsɔɔ Yohane koni epɛi mli lɛ fɛɛ kɛya.—1 Korintobii 15:25.

21. (a) Okpɔŋɔ diŋ lɛ kɛ enɔtalɔ lɛ feɔ mɛni he mfoniri? (b) Mɛni yeɔ odase akɛ okpɔŋɔ diŋ lɛ miifite nii kɛmiiya lolo?

²¹ Belɛ mɛni ji nɔ ni Yohane naa, yɛ be mli ni ahaa famɔ ni ji etɛ akɛ “Ba ni obakwɛ!” lɛ hetoo lɛ? “Ni mikwɛ, ni naa okpɔŋɔ diŋ; ni mɔ ni ta enɔ lɛ hiɛ ŋsɛnii yɛ edɛŋ.” (Kpojiemɔ 6:5b) Hɔmɔ diɛŋtsɛ! No ji shɛɛ sane ni mli wa ni gbalɛ mfoniri nɛɛ kɛhaa. Etsɔɔ hiɛ etsɔɔ shihilɛ ni baaba yɛ Nuŋtsɔ lɛ gbi lɛ shishijee mli, nɔ be mli ni akɛ ŋsɛnii baaja niyenii lɛ. Kɛjɛ 1914 kɛbaa nɛɛ, hɔmɔ efee naagba ni miiya nɔ yɛ jeŋ muu lɛ fɛɛ mli. Ŋmɛnɛŋmɛnɛ beaŋ tawuu kɛ hɔmɔ baa, ejaakɛ akɛ shika kɛ nibii ni akɛlɛɔ gbɔmɛi ni hɔmɔ yeɔ amɛ lɛ feɔ tawuu nii amɛhaa ta lɛ. Abuaa okwaafoi anaa afeɔ amɛ asraafoi, ni okwaafoi amaji ni tawuu efite nɔ kɛ mlai ni yɔɔ keketee baa niyenii he nitsumɔ shi. Kwɛ bɔ ni enɛ ji anɔkwale yɛ klɛŋklɛŋ jeŋ ta lɛ mli, yɛ be mli ni akpekpei abɔ na amanehulu yɛ hɔmɔ hewɔ ni amɛgboi lɛ! Kɛfata he lɛ, hɔmɔ okpɔŋɔ diŋ lɛ nɔtalɔ lɛ tsui enyɔɔɔ emli yɛ be mli ni ta lɛ baa naagbee lɛ. Yɛ 1930 afii lɛ amli lɛ, gbɔmɛi akpekpei enumɔ gboi yɛ hɔmɔ kome pɛ ni ba Ukraine lɛ hewɔ. Jeŋ ta ni ji enyɔ lɛ hu kɛ hɔmɔ babaoo kɛ niyenii ni anaaa ba. Yɛ be mli ni okpɔŋɔ diŋ lɛ yaa nɔ enyiɛɔ lɛ, The World Food Council ni ji gwabɔɔ ni toɔ niyenii he gbɛjianɔ lɛ bɔ amaniɛ yɛ 1987 teŋ gbɛ akɛ hɔmɔ miiye gbɔmɛi akpekpei 512 ni ákɛ gbekɛbii 40,000 gboiɔ daa gbi yɛ hɔmɔ hewɔ.

22. (a) Mɛni ji nɔ ni gbee ko kɛɛ, ni mɛɛ hiamɔ nii ko he ewieɔ? (b) Ŋmaa susumɔ nɔ kome kɛ akoko susumɔ nii etɛ lɛ jara lɛ tsɔɔ mɛni?

²² Yohane yɛ babaoo ni ebaakɛɛ wɔ: “Ni minu gbee ko yɛ hiɛkalɔi ejwɛ lɛ ateŋ miikɛɛ: Ŋmaa susumɔ nɔ kome denario, ni akoko susumɔ nii etɛ denario; ni mu kɛ wein lɛ kaata he!” (Kpojiemɔ 6:6, New World Translation.) Kerubim ejwɛ lɛ fɛɛ efee ekome kɛmiiwie bɔ ni ehe hiaa akɛ aaakwɛ niyenii ni nine shɛɔ nɔ lɛ jogbaŋŋ—taakɛ bɔ ni ehe bahia ni gbɔmɛi lɛ “aŋmɛ aboloo amɛye kɛ tsuiyeli” beni eshwɛ fioo ni Yerusalem hiɛkpatamɔ baaba yɛ afi 607 D.Ŋ.B. lɛ. (Ezekiel 4:16) Yɛ Yohane be lɛ mli lɛ, abuɔ ŋmaa susumɔ nɔ kome akɛ daa gbi niyenii kɛha asraafonyo. Enyiɛ abaahe niyenii ni tamɔ nɛkɛ? Denario kome—apaafonyo gbi muu nyɔmɔwoo! (Mateo 20:2)d Shi kɛji akɛ nuu lɛ yɛ weku hu? Ojogbaŋŋ, ebaanyɛ ehe akoko ni akpɔko he susumɔ nii etɛ yɛ najiaŋ. Shi enɛ hu weku fioo ko pɛ ebaashɛ amɛnaa. Ni abuuu akoko akɛ niyenii kpakpa ko tamɔ ŋmaa.

23. Mɛni ji nɔ ni wiemɔ “Mu kɛ wein lɛ kaata he!” lɛ tsɔɔ?

²³ Mɛni ji nɔ ni nɛkɛ wiemɔ “Mu kɛ wein lɛ kaata he!” lɛ tsɔɔ? Mɛi komɛi esusu he akɛ eshishinumɔ ji akɛ be mli ni mɛi pii naŋ niyenii ni hɔmɔ po miigbe amɛ lɛ, ataŋ miishɛjemɔ nibii ni niiatsɛmɛi yeɔ lɛ ahe. Shi mu kɛ wein jeee miishɛjemɔ nibii yɛ Boka-Teŋgbɛ. Yɛ Biblia bei amli lɛ, abuɔ aboloo, mu kɛ wein akɛ niyenii titri. (Okɛto 1 Mose 14:18; Lala 104:14, 15 he.) Nu ni amɛnuɔ lɛ ehiii yɛ bei pii amli, no hewɔ lɛ afɔɔ wein numɔ ni yɛ bei komɛi amli hu akɛfeɔ tsofa. (1 Timoteo 5:23) Yɛ mu gbɛfaŋ lɛ, yɛ Elia gbii lɛ amli lɛ, Zarefat okulafo lɛ ji ohiafo moŋ, shi no mli lɛ eyɛ mu ko ni eshwɛ ni ekɛbaafata mamu ni eyɔɔ lɛ he ni ekɛfee niyenii. (1 Maŋtsɛmɛi 17:12) No hewɔ lɛ, famɔ akɛ “mu kɛ wein lɛ kaata he!” lɛ tamɔ ŋaa ko ni akɛmiiha akɛ akɛ nɛkɛ nibii nɛɛ fɛɛ akahoo nii mra tsɔ shi moŋ afee lɛ fiofio yɛ amɛ kɛ nitsumɔ mli. Kɛ jeee nakai lɛ, ‘abaata he,’ ni ji akɛ amɛbaata dani hɔmɔ lɛ baaba naagbee.

24. Mɛni hewɔ okpɔŋɔ diŋ lɛ nyɛŋ afo shi yɛ be kakadaŋŋ mli lolo lɛ?

²⁴ Kwɛ miishɛɛ ni wɔbaanyɛ wɔna akɛ etsɛŋ kwraa ni okpɔŋɔ yɛŋ lɛ Nɔtalɔ lɛ baaku nakai okpɔŋɔ diŋ lɛ naa! Ejaakɛ aŋma yɛ E-suɔmɔ gbɛjianɔtoo kɛha jeŋ hee lɛ he akɛ: “Jalɔ aaafrɔke yɛ egbii lɛ amli, ni hejɔlɛ aaafa kɛyashi beyinɔ ni nyɔŋtsere bɛ dɔŋŋ. . . . Shikpɔŋ lɛ nɔ aaaba abele babaoo kɛyashwie gɔji lɛ ayiteaŋ.”—Lala 72:7, 16; kwɛmɔ Yesaia 25:6-8 hu.

Okpɔŋɔ Lamulu kɛ E-Nɔtalɔ Lɛ

25. Beni Yesu tse naasɔomɔ ni ji ejwɛ lɛ naa lɛ, namɔ gbee Yohane nu, ni mɛni enɛ tsɔɔ?

²⁵ Agbeko sane lɛ fɛɛ naa. Yesu tse naasɔomɔ ni ji ejwɛ lɛ naa, ni Yohane kɛɔ wɔ nɔ ni jɛ mli ba: “Ni beni etse naasɔomɔ ni ji ejwɛ lɛ, minu hiɛkalɔ ni ji ejwɛ lɛ gbee miikɛɛ: Ba ni obakwɛ!” (Kpojiemɔ 6:7) Enɛ ji kerubim ni tamɔ okropɔŋ ni filikiɔ lɛ gbee. Aatsɔɔ nilee ni naa nii kɛyaa shɔŋŋ, ni yɛ anɔkwale mli lɛ, ehe miihia ni Yohane, Yohane kuu lɛ, kɛ Nyɔŋmɔ tsuji krokomɛi fɛɛ ni yɔɔ shikpɔŋ lɛ nɔ lɛ ayoo ni amɛkɛ sanesɛɛkɔmɔ atsu nii yɛ nɔ ni atsɔɔ yɛ biɛ lɛ hewɔ. Kɛ wɔfee nakai lɛ, abaabaa wɔyi kɛjɛ haomɔi ni gbaa ŋmɛnɛŋmɛnɛ yinɔbii ni bɛ jeŋba ni kɛɛ amɛle nii lɛ anaa yɛ jeŋ ni woɔ amɛhe nɔ nɛɛ mli lɛ mli.—1 Korintobii 1:20, 21.

26. (a) Namɔ ji okpɔŋɔnɔtalɔ ni ji ejwɛ lɛ, ni mɛni hewɔ ekpɔŋɔ lɛ su sa lɛ lɛ? (b) Mɛni nyiɛ okpɔŋɔnɔtalɔ ni ji ejwɛ lɛ sɛɛ, ni mɛni baa mɛi ni egbeɔ amɛ lɛ anɔ?

²⁶ Mɛɛ nibii hee ni yɔɔ gbeyei ajie lɛ kpo agbɛnɛ, yɛ be mli ni okpɔŋɔnɔtalɔ ni ji ejwɛ lɛ hereɔ tsɛmɔ lɛ nɔ lɛ? Yohane kɛɔ wɔ: “Ni mikwɛ, ni naa, okpɔŋɔ lamulu; ni mɔ ni ta enɔ lɛ gbɛi ji Gbele, ni Gbohiiaje nyiɛ esɛɛ.” (Kpojiemɔ 6:8a) Mɔ ni ta naagbee okpɔŋɔ lɛ nɔ lɛ yɛ gbɛi: Gbele. Lɛ pɛ ji okpɔŋɔnɔtaralɔi ejwɛ ni yɔɔ Apokalips loo Kpojiemɔ lɛ mli lɛ ni jie mɔ ni eji diɛŋtsɛ lɛ kpo etsɔɔ. Yɛ gbɛ ni ja nɔ lɛ, Gbele ta okpɔŋɔ ko ni ehe tamɔ lamulu nɔ, ejaakɛ akɛ wiemɔ lamulu-lamulu (Hela, khlo·rosʹ) tsuɔ nii yɛ Hela woji amli akɛtsɔɔ hiɛi ni eyɛ futaa, tamɔ yɛ hela hewɔ. Nɔ ni sa hu ji akɛ, nɔ ni nyiɛ Gbele sɛɛ kpaakpa yɛ gbɛ ni anyɛɛɛ atsɔɔ shishi nɔ ji Gbohiiaje, ejaakɛ Gbohiiaje ji nɔ ni heɔ mɛi ni okpɔŋɔnɔtalɔ ni ji ejwɛ lɛ gbeɔ amɛ lɛ ateŋ mɛi ni fa. Yɛ miishɛɛ mli lɛ, gbohiiashitee yɛ kɛha mɛnɛɛmɛi, yɛ be mli ni ‘gbele kɛ Gbohiiaje baajie mɛi ni yɔɔ amɛmli lɛ amɛha lɛ.’ (Kpojiemɔ 20:13) Shi mɛɛ gbɛ nɔ Gbele tsɔɔ eheɔ nakai gbɔmɛi lɛ?

27. (a) Yɛ mɛɛ gbɛ nɔ okpɔŋɔnɔtalɔ ni ji Gbele lɛ nine shɛɔ mɛi ni egbeɔ amɛ lɛ anɔ yɛ? (b) “Shikpɔŋ lɛ mlijai ejwɛ mli ekome” ni Gbele yɔɔ hewalɛ yɛ nɔ lɛ tsɔɔ mɛni?

²⁷ Ninaa lɛ tsiɔ gbɛi lɛ ekomɛi ata: “Ni aha amɛ hegbɛ yɛ shikpɔŋ lɛ mlijai ejwɛ mli ekome nɔ, akɛ amɛkɛ klante kɛ hɔmɔ kɛ gbelehela kɛ shikpɔŋ lɛ nɔ kooloi lɛ agbegbee amɛ.” (Kpojiemɔ 6:8b) Ehe ehiaaa ni efee shikpɔŋ lɛ nɔ gbɔmɛi ayifalɛ mlijai ejwɛ mli ekome diɛŋtsɛ, shi moŋ amɛji shikpɔŋ lɛ nɔ bii lɛ ateŋ mɛi ni fa, kɛ mɛi pii yɛ shikpɔŋ lɛ fa ko nɔ aloo mɛi fioo hu yɔɔ efa kroko lɛ, amɛbaanu okpɔŋɔnɔtalɔ nɛɛ he. Nɛkɛ okpɔŋɔnɔtalɔ nɛɛ loɔ mɛi ni okpɔŋɔnɔtalɔ ni ji enyɔ lɛ klante kpeteŋkpele lɛ gbeɔ amɛ lɛ kɛ okpɔŋɔnɔtalɔ ni ji etɛ lɛ hɔmɔ ni gbe mɛi krokomɛi hu lɛ ewoɔ emli. Eloɔ mɛi ni lɛ diɛŋtsɛ egbe amɛ lɛ hu ewoɔ emli, kɛ nɔ ni jɛ gbelehela lɛ mli ba kɛ agbɛnɛ mɛi ni shikpɔŋhosomɔ ni atsɔɔ mli yɛ Luka 21:10, 11 lɛ gbeɔ amɛ lɛ hu.

28. (a) Gbalɛ ni kɔɔ “gbelehela” lɛ he lɛ mlibaa eba mli yɛ mɛɛ gbɛ nɔ? (b) Abu Yehowa webii ahe kɛjɛ helai babaoo he ŋmɛnɛ yɛ mɛɛ gbɛ nɔ?

²⁸ Nɔ ni he hiaa yɛ biɛnɛɛ hu ji “gbelehela” lɛ. Nɔ ni fite nii kɛnyiɛ Jeŋ Ta I sɛɛ ba ji Spanish flu ni gbe gbɔmɛi fe akpekpei 20 yɛ 1918-19 nyɔji fioo ko mli lɛ. Shikpɔŋkuku pɛ ni yɔɔ shikpɔŋ nɔ ni je nɛkɛ haomɔ nɛɛ mli ji ŋshɔkpɔ bibioo ni ji St. Helena. Yɛ he ni egbe gbɔmɛi lɛ ateŋ mɛi ni fa yɛ lɛ, abua gbohii lɛ anaa ni akɛ lai shwie nɔ ni asha. Ni ŋmɛnɛ, tsui hela kɛ heloo mli fala ni yɔɔ gbeyei lɛ hu he oshara lɛ yɛ, ni nɔ titri ni kɛ enɛ ba ji tawashɛremɔ ni woɔ kɔɔyɔɔ mli muji lɛ. Yɛ nɔ ni atsɔɔ mli akɛ eji “afii nyɔŋma taŋtaŋ” ni yɔɔ 1980 afii lɛ amli lɛ, shihilɛ gbɛ ni yeee mla kɛ tɛi ni Biblia lɛ efolɔ eshwie shi lɛ anɔ lɛ kɛ AIDS haomɔ lɛ bafata “gbelehela” lɛ he. Yɛ afi 2000 mli lɛ, abɔ amaniɛ akɛ U.S. maŋ lɛ helatsamɔhei anɔkwɛlɔ lɛ kɛɛ akɛ AIDS “baanyɛ afee tsɛŋemɔ hela ni ehiii fe fɛɛ ni eba jeŋ pɛŋ.” Ekɛɛ akɛ mɛi akpekpei 52 ená HIV kɛ AIDS yɛ jeŋ fɛɛ, ni amɛteaŋ akpekpei 20 egboi. Kwɛ bɔ ni Yehowa webii daa shi akɛ e-Wiemɔ lɛ mli ŋaawoo ni nilee yɔɔ mli lɛ jieɔ amɛ kɛjɛɔ ajwamaŋbɔɔ kɛ la ni akɛtsuɔ nii yɛ gbɛ fɔŋ nɔ, ni atsɔɔ nɔ akɛ helai pii haa ŋmɛnɛ lɛ mli!—Bɔfoi lɛ Asaji 15:28, 29; okɛto 1 Korintobii 6:9-11 he.

29, 30. (a) “Kojomɔi fɔji ejwɛ” ni yɔɔ Ezekiel 14:21 lɛ baakɔ mɛni he ŋmɛnɛ? (b) Mɛni esa akɛ wɔnu shishi kɛ wiemɔ ni ji “kooloi awuiyelɔi” ni yɔɔ Kpojiemɔ 6:8 lɛ? (d) Mɛni ji sane titri ni yɔɔ gbalɛ mfoniri nɛɛ mli?

²⁹ Yohane ninaa lɛ tsi kooloi awuiyelɔi atã akɛ nɔ ni ji ejwɛ ni kɛ trukaa gbele baa. Yɛ anɔkwale mli lɛ, nibii ejwɛ ni ana yɛ be mli ni agbele naasɔomɔ ni ji ejwɛ lɛ naa lɛ—tawuu, hɔmɔ, helai kɛ kooloi awuiyelɔi lɛ—ji nii ni abuɔ yɛ blema bei amli akɛ amɛkɛ trukaa gbele baa titri. No hewɔ lɛ amɛfeɔ nibii fɛɛ ni kɛ trukaa gbele baa ŋmɛnɛ lɛ he mfoniri. Etamɔ bɔ pɛ ni Yehowa bɔ Israel kɔkɔ lɛ: “Aahu ni mitsu mikojomɔi fɔji ejwɛ: klante kɛ hɔmɔ kɛ kooloi fɔji kɛ gbelehela kɛtee Yerusalem, koni akpata gbɔmɔ kɛ kooloo hiɛ yɛ mli.”—Ezekiel 14:21.

³⁰ Afɔɔɔ gbele ni kooloi awuiyelɔi kɛbaa yɛ ŋmɛnɛŋmɛnɛ beaŋ lɛ ahe adafitswaa yɛ woji amli, eyɛ mli akɛ yɛ shikpɔji ni hulutsoo kɛ nugbɔnɛmɔ fa yɛ jɛmɛ lɛ anɔ lɛ, kooloi awuiyelɔi etee nɔ egbe gbɔmɛi. Amɛbaanyɛ amɛgbe gbɔmɛi babaoo yɛ wɔsɛɛ be mli kɛji akɛ atsɔ tawuu nɔ afite shikpɔŋ lɛ nɔ nibii aloo kɛji akɛ hɔmɔ ye gbɔmɛi lɛ kɛyashɛ he ni amɛbɛ hewalɛ ni amɛkɛaashwie kooloi ni hɔmɔ yeɔ amɛ lɛ. Kɛfata he lɛ, adesai babaoo yɛ ŋmɛnɛ, ni tamɔ kooloi ni leee nii, ni jieɔ kooloi asu kpo ni kɛ nɔ ni atsɔɔ mli yɛ Yesaia 11:6-9 lɛ kpaaa gbee. Mɛnɛɛmɛi ji mɛi ni kɛ bɔlɛnamɔ he awuiyeli, gbɔmɔgbee, hegbeyeiwoo, kɛ okpɛlɛmii ni atswiaa akɛfiteɔ nii ŋmɛnɛŋmɛnɛ yɛ jeŋ muu fɛɛ lɛ baa titri. (Okɛto Ezekiel 21:31; Romabii 1:28-31; 2 Petro 2:12 he.) Okpɔŋɔnɔtalɔ ni ji ejwɛ lɛ hu nine shɛɔ emɛi ni egbeɔ lɛ anɔ. Yɛ anɔkwale mli lɛ, sane oti ni yɔɔ gbalɛ mfoniri nɛɛ mli lɛ ji akɛ mɔ ni ta okpɔŋɔ ni he tamɔ lamulu lɛ nɔ lɛ kɛ trukaa gbele baa adesai anɔ yɛ gbɛi pii anɔ.

31. Yɛ nibii ni okpɔŋɔ tsuru, ediŋ, kɛ okpɔŋɔ lamulu lɛ nɔtaralɔi lɛ efite lɛ fɛɛ sɛɛ lɛ, mɛni hewɔ wɔbaanyɛ wɔna ekaa lɛ?

³¹ Saji ni naasɔomɔi ejwɛ ni atserɛ naa lɛ ejie lɛ kpo lɛ maa saji anɔ mi kɛhaa wɔ ejaakɛ etsɔɔ wɔ akɛ wɔkahao yɛ tawuu, hɔmɔ, hela, kɛ nibii krokomɛi ni kɛ trukaa gbele baa ni egbɛ eshwa babaoo ŋmɛnɛ lɛ hewɔ; ni asaŋ esaaa akɛ wɔhiɛnɔkamɔ feɔ yaka akɛni adesai hiɛnyiɛlɔi nyɛɛɛ ana naagbai ni yaa nɔ lɛ ahe tsabaa hewɔ. Kɛji akɛ jeŋ shihilɛ ha efee faŋŋ akɛ okpɔŋɔ tsuru, ediŋ kɛ okpɔŋɔ ni he lamulu lɛ anɔtaralɔi lɛ eje kpo lɛ, kaaha ohiɛ miikpa nɔ akɛ okpɔŋɔ yɛŋ lɛ Nɔtalɔ lɛ ji klɛŋklɛŋ mɔ ni je etafaa lɛ shishi. Yesu ebatsɔ Maŋtsɛ, ni eye kunim momo kɛyashɛ he ni eshwie Satan kɛjɛ ŋwɛi. Nɔ ni fata ekunimyelii krokomɛi lɛ ahe ji mumɔŋ Israel shwɛɛnii lɛ anaabuamɔ kɛ asafo babaoo ni jɛ majimaji ateŋ, ni amɛ yifalɛ shɛɔ akpekpei abɔ lɛ hu anaabuamɔ kɛha yibaamɔ kɛtsɔ amanehulu kpeteŋkpele lɛ mli. (Kpojiemɔ 7:4, 9, 14) Esa akɛ ekpɔŋɔ nɔtamɔ lɛ aya nɔ aahu kɛyashi be mli ni eeegbe ekunimyeli lɛ naa.

32. Mɛni anaa ni kadiɔ klɛŋklɛŋ naasɔomɔi ejwɛ lɛ ni atserɛ naa lɛ eko fɛɛ eko?

³² Nɔ ni enyiɛ klɛŋklɛŋ naasɔomɔi ejwɛ lɛ eko fɛɛ eko naatsemɔ sɛɛ ji famɔ ni ji: “Ba ni obakwɛ!” Okpɔŋɔ kɛ enɔtalɔ faa kpo yɛ eko fɛɛ eko mli. Beni naasɔomɔ ni ji enumɔ lɛ jeɔ shishi lɛ, wɔnuuu nɛkɛ famɔ nɛɛ he dɔŋŋ. Shi okpɔŋɔnɔtaralɔi lɛ nyiɛ lolo, ni amɛbaaya nɔ amɛnyiɛ kɛtsɔ nibii agbɛjianɔtoo nɛɛ naagbee be lɛ fɛɛ mli. (Okɛto Mateo 28:20 he.) Mɛɛ nibii krokomɛi ni he hiaa Yesu jieɔ lɛ kpo yɛ be mli ni etseɔ naasɔomɔi etɛ ni eshwɛ lɛ anaa lɛ? Nibii ni ba lɛ ekomɛi bafee nibii ni gbɔmɔ hiŋmɛii enaaa. Ekrokomɛi ni anaa lɛ hu baaba yɛ wɔsɛɛ be mli. Ni kɛlɛ, amɛmlibaa lɛ baaba mli kɛ̃. Nyɛhaa wɔkwɛa nɔ ni amɛji.

[Shishigbɛ niŋmai]

[Akrabatsa ni yɔɔ baafa 92]

Maŋtsɛ lɛ Miiya yɛ Kunimyeli Mli

Yɛ 1930 kɛ 1940 afii lɛ amli lɛ, henyɛlɔi ni amɛtswa amɛfai shi bɔ mɔdɛŋ ni amɛha Yehowa Odasefoi asɔɔmɔ nitsumɔ lɛ afee tamɔ nɔ ni mla eŋmɛɛɛ gbɛ, efɔŋfeelɔi anifeemɔ, aloo ejwaa maŋ. (Lala 94:20) Yɛ afi 1936 pɛ mli lɛ, amɔmɔ amɛteŋ 1,149 yɛ U.S.A pɛ. Odasefoi lɛ wuu mla naa ta aahu kɛyashɛ U.S.A Kojomɔ He Wulu lɛ, ni nɔ ni nyiɛ sɛɛ nɛɛ ji amɛkunimyelii ni ekaaa lɛ ateŋ ekomɛi.

Yɛ May 3, 1943 lɛ, yɛ Kojomɔ He Wulu lɛ sane ni kɔɔ Murdock kɛ Pennsylvania he lɛ mli lɛ, akpɛ yiŋ akɛ gbɛbimɔ wolo he ehiaaa Odasefoi lɛ dani amɛhɔɔ amɛwolo amɛhe shika. Yɛ nakai gbi lɛ nɔ nɔŋŋ lɛ, akpɛ yiŋ yɛ Martin kɛ City of Struthers sane lɛ mli akɛ ejeee nɔ ni mla eŋmɛɛɛ gbɛ akɛ amɛaatswa shinaa naa ŋmɛlɛ yɛ be mli ni amɛkɛ amɛhe ewo shinaa naa kɛ shinaa naa nitsumɔ ni amɛkɛjaa dɛhiɛmɔ woji bibii kɛ woji krokomɛi amli lɛ.

Yɛ June 14, 1943 lɛ, Kojomɔ He Wulu lɛ kpɛ yiŋ yɛ Taylor kɛ Mississippi sane lɛ mli akɛ Odasefoi lɛ wooo hewalɛ akɛ akaye nɔyeli lɛ anɔkwale yɛ nɔ ni amɛshiɛɔ lɛ hewɔ. Yɛ nakai gbi lɛ nɔ nɔŋŋ lɛ, yɛ West Virginia State Board of Education kɛ Barnette sane lɛ mli lɛ, Saneyeli He lɛ ma nɔ mi akɛ skul onukpai lɛ bɛ hegbɛ akɛ amɛshwieɔ Yehowa Odasefoi abii ni kɛɛ amɛŋaaa aflaŋaa lɛ kɛjɛɔ skul. Enɔ jetsɛremɔ lɛ, Australia Saneyeli He Wulu lɛ ni kojolɔi lɛ fɛɛ kpe lɛ fo mla ni akɛgu Yehowa Odasefoi ni yɔɔ nakai maŋ lɛ mli lɛ mli, ni amɛtsɔɔ mli akɛ enɛ bafee sane ni “jwɛŋmɔ bɛ mli, ni anyɛɛɛ akɛ he afɔ nɔ ni eji yiwaa hu.”

[Akrabatsa ni yɔɔ baafa 94]

“Aha lɛ Hegbɛ Koni Ejie Hejɔlɛ Kɛjɛ Shikpɔŋ lɛ Nɔ”

Nɛgbɛ ji he ni tsɔnei ahe nilee kɛwɔ yaa? The Globe and Mail, Toronto, Canada adafitswaa wolo lɛ bɔ wiemɔ ni nyiɛ sɛɛ nɛɛ ni Ivan L. Head ni ji International Development Research Centre lɛ onukpa lɛ kɛha lɛ he amaniɛ yɛ January 22, 1987 nɔ lɛ mli akɛ:

“Anyɛɔ akɛ he fɔɔ akɔntaabuu akɛ jeŋ nilelɔi kɛ tsɔnei ahe nilelɔi ejwɛ fɛɛ ejwɛ mli ekome ni kɛ amɛhe ewo nibii amlipɛimɔ kɛ efeemɔ mli lɛ miitsu tawuu nii ahe nii lɛ nɔ. . . . Kɛ abu naa yɛ 1986 lɛ, shika ni afiteɔ yɛ enɛ he lɛ fe Amerika dɔla akpekpei 1.5 miniti kome. . . . Ani wɔ fɛɛ wɔyɛ shweshweeshwe babaoo yɛ nɛkɛ tsɔnei ahe nilee nɔmimaa nɛɛ hewɔ? Nuklea tawuu nii ni jeŋmaji ni yɔɔ hewalɛ lɛ hiɛ bianɛ lɛ shɛɔ tuŋtɛi ni akɛtsu nii yɛ Jeŋ Ta ni ji Enyɔ lɛ mli lɛ fɛɛ ni abua naa lɛ—toi 6,000. Ni ji akɛ Jeŋ Ta ni ji Enyɔ toi akpei ekpaa. Kɛjɛ 1945 kɛbaa nɛɛ, nɔ ni shɛɛɛ otsii kpawo pɛ je lɛ kɛhi shi ni tawuu nitsumɔ ko eyaaa nɔ yɛ mli. Awuu tai sɔrɔtoi fe 150 ni ji majimaji ateŋ nɔ aloo maŋ muu mli nɔ, ni kɛ abu naa lɛ mɛi ni amɛlaaje amɛwala yɛ enɛ mli lɛ ji akpekpei 19.3, ni amɛteŋ mɛi titri ji nɔ ni jɛ tsɔnei ahe nilee hee ni akɛtsuɔ nii yɛ gbɛ ni mɔɔ shi nɔ ni eba yɛ Jeŋmaji Ekomefeemɔ lɛ be nɛɛ mli lɛ hewɔ.”

Beni shɛɔ afi 2005 lɛ, no mli lɛ tawuu nifeemɔi ekpata mɛi ni fa fe akpekpei 20 ahiɛ.

[Akrabatsa ni yɔɔ baafa 98, 99]

Bɔ ni Ato Kpojiemɔ Wolo lɛ He Gbɛjianɔ Aha

Yɛ he ni wɔshɛ yɛ Kpojiemɔ wolo nɛɛ hesusumɔ mli lɛ hewɔ lɛ, wɔmiije shishi wɔmiina bɔ ni ato wolo nɛɛ he gbɛjianɔ aha lɛ yɛ faŋŋ mli. Yɛ hiɛkpamɔ ni kanyaa mɔ lɛ sɛɛ lɛ (Kpojiemɔ 1:1-9), abaanyɛ asusu Kpojiemɔ he akɛ ajara mli awo ninaai 16 ni nyiɛ sɛɛ nɛɛ amli:

NINAA 1 (1:10–3:22): Yohane tsɔ mumɔ lɛ tsirɛmɔ nɔ ena Yesu ni awo ehiɛ nyam, ni kɛ shɛɛ saji ni ji ŋaawoo ni miishɛɛ yɔɔ mli maje asafoi kpawo lɛ.

NINAA 2 (4:1–5:14): Yehowa Nyɔŋmɔ ŋwɛi maŋtsɛsɛi lɛ he ninaa ko ni yɔɔ fɛo. Mɔ nɛɛ kɛ wolo ko ha Toobi lɛ.

NINAA 3 (6:1-17): Atse wolo naasɔomɔi lɛ mli klɛŋklɛŋ ekpaa lɛ naa, Toobi lɛ jie ninaai sɔrɔtoi ni baaba mli yɛ Nuŋtsɔ lɛ gbi lɛ mli lɛ kpo fiofio. Apokalips loo Kpojiemɔ okpɔŋɔnɔtaralɔi ejwɛ lɛ je kpo, Nyɔŋmɔ tsuji ni agbe amɛ lɛ anine shɛ atadei yɛji anɔ, ni atsɔɔ gbi wulu ni he yɔɔ gbeyei lɛ mli.

NINAA 4 (7:1-17): Ŋwɛibɔfoi hiɛ hiɛkpatamɔ kɔɔyɔɔ lɛ mli kɛyashi aaasɔo mumɔŋ Israelbii 144,000 lɛ anaa da. Asafo babaoo ko ni jɛ jeŋmaji fɛɛ mli kɛ amɛ yiwalaheremɔ haa Nyɔŋmɔ kɛ Kristo ni abuaa amɛnaa kɛhaa yibaamɔ kɛtsɔɔ amanehulu kpeteŋkpele lɛ mli.

NINAA 5 (8:1–9:21): Beni atse naasɔomɔ nɔ ni ji kpawo lɛ naa lɛ, akpa tɛtrɛmaŋtɛrɛi kpawo, emli klɛŋklɛŋ ekpaa lɛ feɔ ninaa ni ji enumɔ lɛ. Nɛkɛ tɛtrɛmaŋtɛrɛi kpamɔi ekpaa nɛɛ tsɔɔ Yehowa kojomɔi ni ekɛbaa adesai anɔ. Tɛtrɛmaŋtɛrɛi kpamɔ ni ji enumɔ kɛ ekpaa lɛ hu kɛ klɛŋklɛŋ kpoo kɛ nɔ ni ji enyɔ lɛ baa.

NINAA 6 (10:1–11:19): Bɔfo ko ni he wa kɛ wolo bibioo ko ha Yohane, asusu sɔlemɔ we lɛ, ni wɔkaseɔ odasefoi enyɔ lɛ aniiashikpamɔi. Nɔ ni ekɛbaa naagbee ji tɛtrɛmaŋtɛrɛ ni ji kpawo lɛ kpamɔ, ni etswaa kpoo ni ji etɛ kɛha Nyɔŋmɔ henyɛlɔi lɛ—Yehowa kɛ e-Kristo lɛ Maŋtsɛyeli ni baa lɛ he adafi.

NINAA 7 (12:1-7): Enɛ tsɔɔ Maŋtsɛyeli lɛ fɔmɔ mli, ni nɔ ni jɛ mli ba ji Mikael ni shɛ onufu lɛ, Satan, efɔ shikpɔŋ nɔ.

NINAA 8 (13:1-18): Kooloo ko ni he wa fa kpo kɛjɛ ŋshɔŋ, ni kooloo ni hiɛ akolontoi enyɔ tamɔ toobi lɛ wo adesai ahewalɛ ni amɛja lɛ.

NINAA 9 (14:1-20): 144,000 lɛ ni yɔɔ Zion Gɔŋ lɛ nɔ lɛ he ninaa ni yɔɔ fɛo. Anu ŋwɛibɔfoi ashɛɛ saji kɛbɔle shikpɔŋ lɛ nɔ, shikpɔŋ lɛ weintso lɛ etsu ni akpaa, anaanaa Nyɔŋmɔ mlifu lɛ weinŋaanɔ lɛ nɔ.

NINAA 10 (15:1–16:21): Ŋwɛi gwabɔɔ lɛ he ninaa kroko, ni nɔ ni nyiɛ sɛɛ ji Yehowa mlifu kpuji kpawo ni afɔse ashwie shikpɔŋ nɔ. Efa nɛɛ hu baa naagbee kɛ gbalɛ mlitsɔɔmɔ ni kɔɔ Satan gbɛjianɔtoo lɛ naagbee he.

NINAA 11 (17:1-18): Ajwamaŋ kpeteŋkpele, Babilon Kpeteŋkpele lɛ, ta kooloo ni tsuɔ tamɔ muneele lɛ, ni yaa bu kwɔŋkwɔŋ lɛ mli fioo shi ebaa ekoŋŋ ni ekpata yoo lɛ hiɛ lɛ nɔ.

NINAA 12 (18:1–19:10): Atswa Babilon Kpeteŋkpele lɛ naagbee shigbeemɔ kɛ hiɛkpatamɔ he adafi. Kɛ akpata ehiɛ sɛɛ lɛ, mɛi komɛi foɔ lɛ, mɛi komɛi jieɔ Yehowa yi; atswaa Toobi lɛ yookpeemɔ he adafi.

NINAA 13 (19:11-21): Yesu nyiɛɔ ŋwɛi tabilɔi ahiɛ kɛtsuɔ Nyɔŋmɔ mlifu ni ekɛkojoɔ Satan gbɛjianɔtoo lɛ, etabilɔi, kɛ esɛɛfilɔi ahe nii; loofɔji yeɔ amɛloo.

NINAA 14 (20:1-10): Satan Abonsam ni akɛ lɛ wo bu kwɔŋkwɔŋ lɛ mli, Kristo kɛ enanemɛi Maŋtsɛmɛi Afii Akpe Nɔyeli lɛ, adesai anaagbee kaa, kɛ Satan kɛ edaimonioi lɛ ahiɛkpatamɔ.

NINAA 15 (20:11–21:8): Gbohiiashitee lɛ kɛ Kojomɔ Gbi kpeteŋkpele lɛ; ŋwɛi hee kɛ shikpɔŋ hee je kpo, kɛ naanɔ jɔɔmɔi kɛha adesai ni ji jalɔi.

NINAA 16 (21:9–22:5): Kpojiemɔ ba naagbee kɛ Yerusalem Hee lɛ, Toobi lɛ ŋa lɛ he anunyam ninaa. Nyɔŋmɔ gbɛjianɔtoo kɛha tsamɔ kɛ wala kɛha adesai hoɔ kɛjɛɔ nakai maŋ lɛ mli.

Kpojiemɔ baa naagbee kɛ ŋamɔi kɛ ŋaawoi ni miishɛɛ yɔɔ mli ni jɛ Yehowa, Yesu, kɛ bɔfo lɛ kɛ Yohane diɛŋtsɛ ŋɔɔ. Nine ni afɔɔ mɔ fɛɛ mɔ ji “Ba!”—Kpojiemɔ 22:6-21.

Yitso 17

Awo ‘Susumai ni Agbe Amɛ lɛ’ Nyɔmɔ

 1. Mɛɛ be mli wɔyɔɔ nɛɛ, ni mɛɛ odaseyeli yɔɔ ni tsɔɔ enɛ?

NYƆŊMƆ Maŋtsɛyeli lɛ miiye nɔ! Okpɔŋɔ yɛŋ lɛ Nɔtalɔ lɛ miihe agbe ekunimyeli lɛ naa! Okpɔŋɔ tsuru lɛ, okpɔŋɔ diŋ lɛ, kɛ okpɔŋɔ lamulu lɛ miikpa shikpɔŋ lɛ nɔ kɛ foi! Yesu diɛŋtsɛ gbalɛi ni kɔɔ ba ni eba akɛ Maŋtsɛ lɛ miiba mli ni ŋwanejee ko bɛ he. (Mateo, yitsei 24, 25; Marko, yitso 13; Luka, yitso 21) Hɛɛ, nibii agbɛjianɔtoo nɛɛ naagbee gbii lɛ amli wɔyɔɔ lɛ. (2 Timoteo 3:1-5) Akɛni nakai eji hewɔ lɛ, nyɛhaa wɔkwɛa bɔ ni Toobi, Yesu Kristo, tseɔ wolo lɛ naasoɔmɔ ni ji enumɔ lɛ naa lɛ jogbaŋŋ. Mɛɛ kpojiemɔ kroko agbɛnɛ wɔbaana mli gbafaŋnɔ lɛ?

 2. (a) Mɛni Yohane na beni atse naasɔomɔ ni ji enumɔ lɛ naa lɛ? (b) Mɛni hewɔ esaaa akɛ efeɔ wɔ naakpɛɛ akɛ wɔɔkane afɔleshaa latɛ ko ni yɔɔ ŋwɛi lɛ he sane?

² Yohane tsɔɔ ninaa ko ni kanyaa mɔ lɛ mli: “Ni beni etse naasoɔmɔ ni ji enumɔ lɛ, mina mɛi ni agbe yɛ Nyɔŋmɔ wiemɔ lɛ hewɔ lɛ kɛ odase ni amɛye lɛ hewɔ lɛ asusumai yɛ afɔleshaa latɛ lɛ shishi.” (Kpojiemɔ 6:9) Mɛni ji enɛ? Ani afɔleshaa latɛ yɛ ŋwɛi? Hɛɛ! Enɛ ji klɛŋklɛŋ be mli ni Yohane etsi afɔleshaa latɛ ta. Shi etsɔ hiɛ etsɔɔ akɛ Yehowa ta E-maŋtsɛsɛi nɔ, kerubim ebɔle lɛ, ashwishwɛ ŋshɔ, kanei lɛ, kɛ onukpai 24 ni hiɛ tsofa-kɛ-ŋma lɛ—enɛɛmɛi fɛɛ ji nɔ ko ni tamɔ shikpɔŋ nɔ kpee buu lɛ ni ji Yehowa sɔlemɔ we yɛ Israel lɛ he nii. (2 Mose 25:17, 18; 40:24-27, 30-32; 1 Kronika 24:4) Belɛ ani esa akɛ efee wɔ naakpɛɛ akɛ wɔɔna okadi afɔleshaa latɛ ko yɛ ŋwɛi?—2 Mose 40:29.

 3. (a) Mɛɛ gbɛ nɔ atsɔ afɔse susumai ashwie “afɔleshaa latɛ lɛ shishi” yɛ blema Yudafoi akpee buu lɛ mli? (b) Mɛni hewɔ Yohane na odasefoi ni agbe amɛ lɛ asusumai yɛ okadi afɔleshaa latɛ ni yɔɔ ŋwɛi lɛ shishi lɛ?

³ Nɔ ni yɔɔ afɔleshaa latɛ nɛɛ shishi ji “mɛi ni agbe yɛ Nyɔŋmɔ wiemɔ lɛ hewɔ kɛ odase ni amɛye lɛ hewɔ lɛ asusumai.” Mɛni ji nɔ ni enɛ tsɔɔ? Enɛ nyɛŋ afee susumai ni bɛ gbɔmɔtsei—tamɔ nɔ ni Hela wɔŋjalɔi lɛ heɔ yeɔ lɛ. (1 Mose 2:7; Ezekiel 18:4) Shi moŋ, Yohane le akɛ akɛ la damɔɔ shi ahaa susuma loo wala, ni kɛji akɛ blema Yuda osɔfoi lɛ gbe kooloo ko ni akɛbaasha afɔle lɛ, amɛkɛ ela lɛ shwaa “afɔleshaa latɛ lɛ nɔ kɛkpeɔ” aloo amɛfɔseɔ amɛshwieɔ “afɔleshaa latɛ . . . lɛ shishi.” (3 Mose 3:2, 8, 13; 4:7; 17:6, 11, 12) No hewɔ lɛ akɛ kooloo lɛ susuma toɔ afɔleshaa latɛ lɛ he. Mɛni hewɔ anaa nɛkɛ Nyɔŋmɔ tsuji nɛɛ asusumai, loo amɛla yɛ okadi afɔleshaa latɛ ni yɔɔ ŋwɛi lɛ shishi lɛ? Ejaakɛ abuɔ amɛ gbele lɛ akɛ afɔleshaa nɔ.

 4. Kristofoi ni akɛ mumɔ efɔ amɛ lɛ agbele ji afɔleshaa nɔ yɛ mɛɛ gbɛ nɔ?

⁴ Yɛ anɔkwale mli lɛ, mɛi fɛɛ ni afɔɔ amɛ akɛ Nyɔŋmɔ mumɔŋ bii lɛ gboɔ afɔleshaa gbele. Yɛ nitsumɔ ni amɛbaatsu yɛ Yehowa ŋwɛi Maŋtsɛyeli lɛ mli hewɔ lɛ, eji Nyɔŋmɔ suɔmɔnaa nii akɛ amɛkpoo naanɔ wala yɛ shikpɔŋ nɔ lɛ he hiɛnɔkamɔ fɛɛ ni amɛyɔɔ ni amɛkɛsha afɔle. Yɛ enɛ mli lɛ, amɛkɛ amɛhe haa afɔleshaa gbele yɛ Yehowa jeŋ muu fɛɛ maŋtsɛyeli lɛ hewɔ. (Filipibii 3:8-11; okɛto 2:17 he.) Enɛ ji anɔkwale diɛŋtsɛ yɛ mɛi ni Yohane na yɛ afɔleshaa latɛ lɛ shishi lɛ ahe. Amɛji mɛi ni afɔ amɛ mu ni agbe amɛ akɛ la odasefoi yɛ amɛgbii lɛ amli yɛ sɔɔmɔ nitsumɔ lɛ ni amɛkɛ ekaa tsu ni amɛkɛfi Yehowa Wiemɔ kɛ jeŋ muu fɛɛ maŋtsɛ ni eji lɛ sɛɛ lɛ hewɔ. “Agbe amɛ yɛ Nyɔŋmɔ wiemɔ lɛ hewɔ kɛ odase ni amɛye [mar·ty·riʹan] lɛ hewɔ.”

 5. Mɛni haa ebaalɛ akɛ anɔkwafoi lɛ asusumai miibolɔ kɛmiitsɛ oweletɔɔ, tsɛbelɛ amɛgboi lɛ?

⁵ Nifeemɔ lɛ miiba lolo: “Ni amɛbolɔ kɛ gbee waa akɛ: Owura krɔŋkrɔŋ kɛ anɔkwafo, mɛɛ beyinɔ po oookojo ni oootɔ wɔla lɛ he owele yɛ mɛi ni hiɔ shikpɔŋ lɛ nɔ lɛ anɔ?” (Kpojiemɔ 6:10) Te aaafee tɛŋŋ ni amɛsusumai, aloo amɛla aaabolɔ koni atɔ owele, akɛni Biblia lɛ tsɔɔ akɛ gbohii lɛ leee nɔ ko nɔ ko lɛ? (Jajelɔ 9:5) Ojogbaŋŋ, ani jalɔ Habel la bolɔɔɔ etsɛɛɛ Kain ni gbe lɛ lɛ? Kɛkɛ ni Yehowa kɛɛ Kain akɛ: “Mɛni ofee nɛɛ? Onyɛmi lɛ la gbee miibolɔ miitsɛ mi kɛmiijɛ shikpɔŋ su lɛ mli!” (1 Mose 4:10, 11; Hebribii 12:24) Enɛ etsɔɔɔ akɛ Habel la diɛŋtsɛ miiwie wiemɔi. Shi moŋ, Habel egbo akɛ mɔ ni leee esha ko, ni jalɛsaneyeli miibolɔ akɛ agbala mɔ ni gbe lɛ lɛ toi. Nakai nɔŋŋ hu nakai Kristofoi ni ji la odasefoi lɛ efeko efɔŋ ko, ni yɛ jalɛsaneyeli naa lɛ, esa akɛ atɔ amɛhe owele. (Luka 18:7, 8) Gbee ni akɛtsɛɔ koni atɔ owele lɛ naa wa ejaakɛ akpei babaoo egboi nakai nɔŋŋ.—Okɛto Yeremia 15:15, 16 he.

 6. Mɛɛ la ni efeko nɔ ko ni afɔseɔ ashwieɔ shi yaka lɛ he oweletɔɔ ba yɛ afi 607 D.Ŋ.B.?

⁶ Abaanyɛ akɛ shihilɛ lɛ hu ato Yuda ni kwa hemɔkɛyeli lɛ he yɛ be mli ni Maŋtsɛ Manase baye maŋtsɛ yɛ afi 716 D.Ŋ.B. lɛ. Efɔse mɛi ni efeko nɔ ko lɛ ala pii eshwie shi, ekolɛ ‘ekɛ akpalala gba’ gbalɔ Yesaia mli po. (Hebribii 11:37; 2 Maŋtsɛmɛi 21:16) Eyɛ mli akɛ yɛ sɛɛ mli lɛ Manase shwa ehe ni etsake etsui moŋ shi nakai la yi sɔ̃yeli lɛ hi shi. Yɛ afi 607 D.Ŋ.B., beni Babilonbii lɛ fee Yuda maŋtsɛyeli lɛ amaŋfɔ lɛ, “Yehowa famɔ naa kɛkɛ ni enɛ eba Yuda nɔ nɛɛ, koni ejie amɛ kɛjɛ ehiɛ eshwie yɛ Manase he eshai ni efee lɛ fɛɛ ahewɔ, kɛ mɛi ni efeko nɔ ko lɛ ala ni efɔse eshwie shi lɛ hu hewɔ; ejaakɛ ewo Yerusalem obɔ tɔ kɛ mɛi ni efeko nɔ ko lɛ ala, ni Yehowa sumɔɔɔ akɛ eeeŋɔfa.” —2 Maŋtsɛmɛi 24:3, 4.

 7. Namɔ titri ji mɔ ni eye fɔ yɛ “krɔŋkrɔŋbii lɛ ala” ni afɔse ashwie shi nɛɛ mli?

⁷ Taakɛ eji yɛ Biblia bei amli lɛ, nakai nɔŋŋ hu ŋmɛnɛ aŋkroaŋkroi ni gbe Nyɔŋmɔ odasefoi lɛ ateŋ mɛi pii egboi jeeŋmɔ. Shi gbɛjianɔtoo ni ha agbe amɛ lɛ yɛ lolo ni eye la yi sɔ. No ji Satan shikpɔŋ nɔ gbɛjianɔtoo lɛ, eshikpɔŋ nɔ seshi lɛ. Mɔ ni ji mɔ titri yɛ mli ji Babilon Kpeteŋkpele lɛ, jeŋ apasa jamɔ maŋtsɛyeli lɛ.a Atsɔɔ mli akɛ “krɔŋkrɔŋbii lɛ ala lɛ kɛ Yesu odasefoi lɛ ala lɛ etɔ lɛ daa.” Hɛɛ, “ni emli ana gbalɔi kɛ krɔŋkrɔŋbii kɛ mɛi fɛɛ ni agbe yɛ shikpɔŋ lɛ nɔ lɛ ala lɛ yɛ.” (Kpojiemɔ 17:5, 6; 18:24; Efesobii 4:11; 1 Korintobii 12:28) Mɛɛ la yi sɔ̃yeli ni tsii waa nɛ! Yɛ bei abɔ ni Babilon Kpeteŋkpele lɛ yɔɔ lolo lɛ, mɛi ni egbe amɛ lɛ ala baaya nɔ abolɔ koni aye jalɛsane.—Kpojiemɔ 19:1, 2.

 8. (a) Mɛɛ la odasefoi ahe nɔkwɛmɔnii tee nɔ yɛ Yohane shihilɛ be mli? (b) Mɛɛ yiwai Roma maŋtsɛmɛi lɛ tsirɛ mɛi ayisɛɛ amɛwo mli?

⁸ Yohane diɛŋtsɛ na bɔ ni agbe mɛi yɛ klɛŋklɛŋ afii oha lɛ mli akɛ la odasefoi lɛ yɛ be mli ni Onufu yiwalɔ lɛ kɛ eshikpɔŋ nɔ seshi lɛ wuɔ shiɔ Kristofoi ni afɔ amɛ mu lɛ asafoi ni yaa nɔ eshwereɔ lɛ. Yohane na bɔ ni asɛŋ wɔ-Nuŋtsɔ lɛ ni eje mli yɛ be mli ni agbeɔ Stefano, kɛ lɛ diɛŋtsɛ enyɛmi Yakobo, kɛ Petro, Paulo kɛ ehefatalɔi krokomɛi ni bɛŋkɛ lɛ kpaakpa lɛ. (Yohane 19:26, 27; 21:15, 18, 19; Bɔfoi lɛ Asaji 7:59, 60; 8:2; 12:2; 2 Timoteo 1:1; 4:6, 7) Yɛ afi 64 Ŋ.B. lɛ, Roma maŋtsɛ Nero je gbɛ eshwa Kristofoi lɛ, efolɔ amɛnaa akɛ amɛ amɛsha maŋ lɛ, bɔni afee ni ekɛtsimɔ sane ni gbɛɔ shwaa akɛ lɛ ji mɔ ni fee enɛ lɛ naa. Yinɔsaneŋmalɔ Tacitus bɔ amaniɛ akɛ: “Amɛ [Kristofoi] lɛ gboi kɛtsɔ gbɛi komɛi ni haa amɛtsɔmɔɔ fɛoyeli nii anɔ; akɛ kooloi awuiyelɔi ahewolo haa amɛhe, ni gbeei tsɛrɛɔ amɛmli, [asɛŋɔ mɛi komɛi],b ni ashaa mɛi komɛi gbɛkɛ koni amɛtsɔmɔ kanei.” Yiwaa kroko ni ba yɛ Maŋtsɛ Domitian (81-96 Ŋ.B.) shishi lɛ ha atswa Yohane nane shi tu kɛtee Patmo ŋshɔkpɔ lɛ nɔ. Taakɛ Yesu kɛɛ lɛ: “Kɛ amɛwa mi yi lɛ, amɛaawa nyɛ hu yi.”—Yohane 15:20; Mateo 10:22.

 9. (a) Mɛɛ shishiumɔ nifeemɔ ko Satan kɛba yɛ Ŋ.B. afii ohai ejwɛ lɛ mli, ni eji mɛni fa titri? (b) Mɛni nɔyelɔi komɛi ni yɔɔ Kristendom lɛ fee Yehowa Odasefoi yɛ Jeŋ Tai I kɛ II bei lɛ amli?

⁹ Beni shɛɔ Ŋ.B. afii ohai ejwɛ lɛ mli lɛ, no mli lɛ nakai blema onufu, Satan Abonsam efɔ eshishiumɔ gbɛjianɔtoo lɛ, hemɔkɛyeli kwamɔ jamɔ ni ji Kristendom—Babilon gbɛjianɔtoo ni akɛtee yɛ “Kristojamɔ” ni akɛha hiɛ lɛ shishi. Lɛ ji Onufu lɛ seshi lɛ fa titri ni amɛmli egbala kɛtee nɔ amɛfee kui bibii sɔrɔtoi babaoo ni teɔ shi woɔ amɛhe. Taakɛ blema Yuda ni yeee anɔkwale lɛ ji lɛ, Kristendom tere la yi sɔ ni tsii, ejaakɛ ekɛ ehe wo afai enyɔ lɛ fɛɛ mli yɛ Jeŋ Ta I kɛ II mli. Kristendom maŋkwramɔŋ nɔyelɔi lɛ ekomɛi po kɛ nɛkɛ tai nɛɛ tsu nii ni amɛtsɔ nɔ amɛkɛgbe Nyɔŋmɔ tsuji ni afɔ amɛ mu lɛ. Yɛ be mli ni ebɔɔ bɔ ni Hitler wa Yehowa Odasefoi lɛ ayi lɛ he amaniɛ lɛ, Friedrich Zipfel wolo, Kirchenkampf in Deutschland (Sɔlemɔi lɛ Atawuu yɛ Germany) lɛ mlitii jaje akɛ: “Amɛyifalɛ mlijaa etɛ mli ekome [ni ji Odasefoi] lɛ agbe amɛ, kɛtsɔ sɛŋmɔ loo tui ni atswiaa amɛ lɛ nɔ, aloo kɛtsɔ yiwalɛ nifeemɔi, hɔmɔ, hela loo gboklɛfoi aŋsraiaŋ nɔ. Nɔ ko bɛ ni kɛ nifeemɔ nɛɛ naawalɛ lɛ yeɔ egbɔ, ni fɛɛ jɛ amɛhemɔkɛyeli ni amɛŋmɛɛɛ he koni amɛkɛ Maŋ Kwasafoŋ jwɛŋmɔ ni ahiɛ lɛ akpa gbee lɛ hewɔ.” Yɛ anɔkwale mli lɛ, abaanyɛ awie yɛ Kristendom ni esɔfoyeli lɛ fata he lɛ he akɛ: “Anaa ohiafoi ni efeko nɔ ko lɛ asusumai lɛ ala yɛ otade naamui lɛ amli.”—Yeremia 2:34.c

10. Mɛɛ yiwai eba asafo babaoo lɛ mli obalaŋtai anɔ yɛ shikpɔji pii anɔ?

¹⁰ Kɛjɛ 1935 kɛbaa nɛɛ, obalahii anɔkwafoi ni jɛ asafo babaoo lɛ mli lɛ kɛ yiwaa ni naa wa ekpe yɛ shikpɔji babaoo nɔ. (Kpojiemɔ 7:9) Beni Jeŋ Ta II baa naagbee yɛ Europa lɛ, asɛŋ obalahii 14 ni ji Yehowa Odasefoi yɛ maŋ kome pɛ mli. Mɛni efɔŋ amɛfee? Amɛkɛɛ “amɛkaseŋ tawuu dɔŋŋ.” (Yesaia 2:4) Nyɛsɛɛ nɛɛ nɔŋŋ, ni ayi obalahii komɛi ni yɔɔ Bokagbɛ kɛ Afrika kɛbote gbele mli aloo atswia amɛ tu agbe amɛ yɛ nɛkɛ sane nɛɛ nɔŋŋ he. Nɛkɛ obalaŋtai la odasefoi nɛɛ, Yesu nyɛmimɛi ni afɔ amɛ mu lɛ asɛɛfilɔi ni sa nɛɛ baana shitee kɛ̃ yɛ shikpɔŋ hee ni awo shi yɛ he lɛ mli.—2 Petro 3:13; okɛto Lala 110:3; Mateo 25:34-40; Luka 20:37, 38 he.

Atade Yuu ni Yɛɔ

11. Kristofoi ni afɔ amɛ mu ni gboiɔ akɛ la odasefoi lɛ anine shɛɔ “atadei yɛji” anɔ yɛ mɛɛ shishinumɔ naa?

¹¹ Yɛ be mli ni ewie emuuyeli mlihiɛlɔi anɔkwafoi ni hi shi yɛ blema bei lɛ amli lɛ ahe saji lɛ, bɔfo Paulo kɛɛ: “Ni mɛnɛɛmɛi fɛɛ lɛ, aye amɛhe odase kpakpa yɛ hemɔkɛyeli lɛ hewɔ moŋ, shi amɛnine shɛɛɛ shiwoo ni hi lɛ anɔ, ejaakɛ Nyɔŋmɔ esaa nɔ ko kpakpa eto wɔ, koni amɛkaye emuu amɛshi wɔ.” (Hebribii 11:39, 40) Mɛni ji nakai “nɔ ko kpakpa” ni Paulo kɛ Kristofoi krokomɛi ni afɔ amɛ mu lɛ kpaa lɛ gbɛ lɛ? Yohane na enɛ yɛ ninaa mli: “Ni aŋɔ atade yuu ni yɛɔ aha amɛteŋ mɔ fɛɛ mɔ, ni akɛɛ amɛ akɛ amɛjɔɔ amɛhe be fioo ko lolo, kɛyashi beyinɔ ni amɛnanemɛi tsuji lɛ kɛ amɛnyɛmimɛi lɛ hu ni abaagbe amɛ taakɛ bɔ ni agbe amɛ diɛŋtsɛ lɛ hu lɛ ayikulɛ lɛ aaashɛ.” (Kpojiemɔ 6:11) “Atade yuu ni yɛɔ” lɛ ni amɛnine shɛ nɔ lɛ kɔɔ amɛshitee kɛmiiya wala ni gbele bɛ mli akɛ mumɔŋ bɔɔ nii lɛ he. Amɛyaaa nɔ amɛkaaa afɔleshaa latɛ lɛ shishi akɛ susumai ni agbe amɛ dɔŋŋ, shi moŋ ateɔ amɛ shi koni amɛbafee onukpai 24 ni jaa yɛ Nyɔŋmɔ ŋwɛi maŋtsɛsɛi lɛ hiɛ akɛ kuu lɛ fa. Aha amɛteŋ mɔ fɛɛ mɔ maŋtsɛsɛi yɛ jɛmɛ, ni tsɔɔ akɛ aha amɛ hegbɛ akɛ odehei. Ni “amɛwo atadei yɛji,” ni tsɔɔ akɛ abu amɛ jalɔi, mɛi ni sa akɛ amɛnaa gbɛhe ni woo yɔɔ mli yɛ Yehowa hiɛ yɛ nakai ŋwɛi gwabɔɔ he lɛ. Enɛ hu haa Yesu shiwoo ni ekɛha Kristofoi anɔkwafoi ni afɔ amɛ mu ni yɔɔ Sarde asafo lɛ mli lɛ baa mli: “Kunimyelɔ lɛ, aaawo lɛ atadei yɛji.”—Kpojiemɔ 3:5; 4:4; 1 Petro 1:4.

12. Mɛi ni afɔ amɛ mu ni ateɔ amɛ shi lɛ “jɔɔ amɛhe be fioo” yɛ mɛɛ gbɛ nɔ, ni kɛyashiɔ mɛɛ be?

¹² Odaseyelii lɛ fɛɛ tsɔɔ akɛ nɛkɛ ŋwɛi shitee nɛɛ je shishi yɛ 1918, beni awo Yesu maŋtsɛ yɛ 1914 kɛ be mli ni eta okpɔŋɔ nɔ akɛ eeje ekunimyeli akɛ maŋtsɛ lɛ shishi kɛtsɔ Satan kɛ edaimonioi lɛ ni eshwie amɛ kɛjɛ ŋwɛi lɛ sɛɛ lɛ nɔ. Ni kɛlɛ akɛɔ nakai mɛi ni afɔ amɛ mu lɛ ni ateɔ amɛ shi lɛ akɛ esa akɛ “amɛjɔɔ amɛhe be fioo ko lolo kɛyashi beyinɔ ni amɛnanemɛi tsuji lɛ . . . ayikulɛ lɛ aaashɛ.” Esa akɛ mɛi ni ji Yohane kuu lɛ mlibii lɛ ni yɔɔ shikpɔŋ lɛ nɔ lolo lɛ ahiɛ amɛ emuuyeli yɛ kaa kɛ yiwaa shishi lɛ mli, ni abaagbe mɛnɛɛmɛi ateŋ mɛi komɛi lolo. Yɛ naagbee lɛ, abaatɔ jalɔi ala ni Babilon Kpeteŋkpele lɛ kɛ emaŋkwramɔŋ hemɛi lɛ fɛɛ efɔse eshwie shi lɛ ahe owele. Dani enɛ aaaba lɛ, ŋwanejee ko bɛ he akɛ mɛi ni atee amɛ shi lɛ bɛ deka kwraa kɛ ŋwɛi nitsumɔi. Mɛi ni eshwɛ lɛ hu ejɔɔɔ amɛhe kɛkɛ, shi moŋ amɛkɛ tsuishiŋmɛɛ miimɛ Yehowa oweletɔɔ gbi lɛ. (Yesaia 34:8; Romabii 12:19) Amɛhejɔɔmɔ lɛ baaba naagbee yɛ be mli ni amɛaana apasa jamɔ hiɛkpatamɔ, ni akɛ “mɛi ni atsɛ kɛ mɛi ni ahala kɛ mɛi ni heɔ yeɔ lɛ,” amɛfataa Nuŋtsɔ Yesu Kristo he amɛkɛ fɔbuu kojomɔ baa Satan yiwalɛ seshi ni yɔɔ shikpɔŋ lɛ nɔ lɛ fai krokomɛi ni eshwɛ lɛ fɛɛ nɔ.—Kpojiemɔ 2:26, 27; 17:14; Romabii 16:20.

‘Mɛi ni Egboi lɛ Klɛŋklɛŋ Baate Shi’

13, 14. (a) Taakɛ bɔfo Paulo tsɔɔ lɛ, mɛɛ be mli ŋwɛi shitee lɛ jeɔ shishi, ni namɛi ateɔ amɛ shi lɛ? (b) Mɛɛ be mli ateɔ mɛi ni afɔ amɛ mu ni hiɔ wala mli kɛyashiɔ Nuŋtsɔ lɛ gbi lɛ nɔ lɛ ashi kɛyaa ŋwɛi?

¹³ Shishinumɔ ni naasoɔmɔ ni ji enumɔ lɛ ni atse naa lɛ kɛhaa lɛ kɛ ŋmalɛi krokomɛi ni kɔɔ ŋwɛi shitee he lɛ kpaa gbee pɛpɛɛpɛ. Akɛ nɔkwɛmɔnɔ lɛ, bɔfo Paulo ŋma akɛ: “Ejaakɛ wɔmiikɛɛ nyɛ enɛ yɛ Nuŋtsɔ [Yehowa] lɛ wiemɔ ko naa, akɛ wɔ mɛi ni wɔhiɛ kamɔ ni baashwɛ yɛ Nuŋtsɔ lɛ baa be lɛ mli lɛ, wɔtsɔŋ mɛi ni ewɔ lɛ ahiɛ; ejaakɛ lɛ Nuŋtsɔ lɛ diɛŋtsɛ kɛ oshebɔɔ kɛ ŋwɛibɔfonukpa gbee kɛ Nyɔŋmɔ tɛtrɛmaŋtɛrɛ aaajɛ ŋwɛi akpeleke shi, ni gbohii ni yɔɔ Kristo mli lɛ tsutsu baate shi, no sɛɛ lɛ, wɔ mɛi ni wɔhiɛ kamɔ ni eshwɛ lɛ, aaasha wɔkɛ amɛ fɛɛ yɛ atatui amli kɛaatee Nuŋtsɔ lɛ kpeemɔ yɛ kɔɔyɔɔ mli, ni nakai wɔkɛ Nuŋtsɔ lɛ aaaya hi shi daa.”—1 Tesalonikabii 4:15-17.

¹⁴ Mɛɛ sane ni kanyaa mɔ kukuji nɛɛ gbaa wɔ nɛkɛ! Yesu nyɛmimɛi ni afɔ amɛ mu lɛ ni amɛgboi momo lɛ tsɔɔ mɛi ni hiɔ shi kɛyashiɔ beni Yesu eba lɛ, ni ji mɛi ni yɔɔ wala mli lolo yɛ shikpɔŋ nɔ yɛ beni eba nɛɛ mli lɛ ahiɛ kɛyaa ŋwɛi. Nɛkɛ mɛi ni egboi yɛ Kristo mli lɛ, teɔ shi klɛŋklɛŋ. Yesu kpelekeɔ shi, ni ji akɛ, egbalaa ejwɛŋmɔ kɛbaa amɛnɔ, ni eteɔ amɛ shi kɛyaa mumɔŋ wala mli, ehaa amɛ “atadei yɛji.” Yɛ no sɛɛ lɛ, mɛi ni yɔɔ wala mli lolo akɛ adesai lɛ gbeɔ amɛ shikpɔŋ nɔ nitsumɔ lɛ naa, amɛteŋ mɛi pii gboiɔ awuiyeli gbele yɛ shitee-kɛ-wolɔi adɛŋ. Shi amɛwɔɔɔ yɛ gbele mli taakɛ mɛi ni etsɔ amɛhiɛ lɛ fee lɛ. Shi moŋ, kɛ amɛgboi lɛ, atsakeɔ amɛ amrɔ nɔŋŋ—“yɛ hiŋmɛitswaa mli”—ashaa amɛ kɛyaa ŋwɛi koni amɛkɛ Yesu kɛ Kristo gbɔmɔtso lɛ mlibii lɛ ayahi shi. (1 Korintobii 15:50-52; okɛto Kpojiemɔ 14:13 he.) No hewɔ lɛ, Kristofoi ni afɔ amɛ mu lɛ ashitee lɛ jeɔ shishi beni okpɔŋɔnɔtaralɔi ni yɔɔ Kpojiemɔ lɛ eje amɛnyiɛmɔ lɛ shishi lɛ sɛɛ nɔŋŋ.

15. (a) Mɛɛ sanekpakpa naasɔomɔ ni ji enumɔ ni atse naa lɛ kɛhaa? (b) Kunimyelɔ lɛ ni ta okpɔŋɔ yɛŋ lɛ nɔ lɛ nyiɛmɔ lɛ baa naagbee yɛ mɛɛ gbɛ nɔ?

¹⁵ Nɛkɛ naasɔomɔ ni ji enumɔ lɛ naatsemɔ lɛ kɛ sanekpakpa ni kɔɔ emuuyeli mlihiɛlɔi ni afɔ amɛ mu ni amɛye kunim, ni amɛye anɔkwale kɛyashi gbele mli lɛ he haa. Shi ekɛ sanekpakpa ko haaa Satan kɛ eseshi lɛ. Kunimyelɔ ni ta okpɔŋɔ yɛŋ lɛ nɔ lɛ nyiɛmɔ lɛ miiya nɔ, ni mɔ ko nyɛɛɛ enaa atsi ni ebaa naagbee yɛ akɔntaabuu be kɛha je lɛ “ni ka mɔ fɔŋ lɛ hewalɛ mli lɛ” mli. (1 Yohane 5:19) Afee enɛ faŋŋ yɛ be mli ni Toobi lɛ tse naasɔomɔ ni ji ekpaa lɛ naa lɛ.

[Shishigbɛ niŋmai]

[Akrabatsa ni yɔɔ baafa 102]

‘Susumai ni agbe amɛ’

McClintock kɛ Strong Cyclopedia lɛ tsɛ wiemɔ kɛjɛ John Jortin, Ŋleshi Protestantnyo ni hi shi yɛ afii ohai 18 mli ni efɔlɔi ji French Huguenotbii lɛ wiemɔ mli akɛ: “He ni yiwaa jeɔ shishi yɛ lɛ, Kristojamɔ baa naagbee . . . Yɛ sɛɛ mli beni ato Kristojamɔ ama shi akɛ [Roma] maŋtsɛyeli lɛ jamɔ sɛɛ, kɛ agbɛnɛ beni akɛ ninamɔ kɛ woo eha esɔɔlɔi lɛ sɛɛ dani yiwaa ni ji efɔŋ ni ehiii kwraa lɛ bana hewalɛ kpeteŋkpele, ni eshɛrɛ ehewalɛ ni fiteɔ nii lɛ eshwie Sanekpakpa lɛ mli jamɔ lɛ nɔ.”

[Mfoniri ni yɔɔ baafa 103]

“Ni aŋɔ atade yuu ni yɛɔ aha amɛteŋ mɔ fɛɛ mɔ”

Yitso 18

Shikpɔŋhosomɔi yɛ Nuŋtsɔ lɛ Gbi lɛ Nɔ

1, 2. (a) Ni aaatsɔ shikpɔŋhosomɔ ko ni naa wa mli lɛ tamɔ mɛni? (b) Mɛni Yohane tsɔɔ mli yɛ be mli ni atse naasɔomɔ ni ji ekpaa lɛ naa lɛ?

ANI otsɔ shikpɔŋhosomɔ ko ni naa wa mli pɛŋ? Ejeee niiashikpamɔ ko ni ŋɔɔ kwraa. Shikpɔŋhosomɔ ko ni naa wa baanyɛ aje shishi kɛ kokolomɔ ni kɛ hiɛdimɔ baa kɛ hoofeemɔ ni naa wa. Obaadidaŋ kɛya biɛ kɛba biɛ waa kɛtsɔ fɔ̃ ni efɔ̃ɔ bo kɛyaa kɛbaa be mli ni ogba shi kɛyaa he ko ni yɔɔ shweshweeshwe lɛ—ekolɛ ni oyahɔ okpɔlɔ ko shishi lɛ. Aloo ekolɛ ebaanyɛ eba trukaa, tsimɔ ko ni naa wa, ni nɔ ni nyiɛɔ sɛɛ baa ji tsɛŋsii loo nihoomɔ nii, tsu mli nibii kɛ tsui po ni miigbeegbee shi. Nibii ni baafite lɛ baada naakpa, ni yɛ bei komɛi amli lɛ nibii komɛi tsaraa sɛɛ baa kpitiokpitio ni no hu fiteɔ nii ni kɛ eko fataa haomɔ lɛ he.

² Yɛ be mli ni enɛ yɔɔ ojwɛŋmɔ mli lɛ, susumɔ nɔ ni Yohane tsɔɔ mli yɛ be mli ni atseɔ naasɔomɔ ni ji ekpaa lɛ naa lɛ he: “Ni mina beni etse naasɔomɔ ni ji ekpaa lɛ, ni naa, shikpɔŋ hoso babaoo.” (Kpojiemɔ 6:12a) Esa akɛ enɛ aba yɛ be kometoo lɛ ni akɛtserɛɔ naasɔomɔi krokomɛi lɛ anaa lɛ mli. Nuŋtsɔ lɛ gbi lɛ nɔ mɛɛ be kwraa nɛkɛ shikpɔŋhosomɔ nɛɛ baa, ni mɛɛ hosomɔ enɛ ji?—Kpojiemɔ 1:10.

 3. (a) Mɛni nibii Yesu gba efɔ shi akɛ ebaaba yɛ gbalɛ ni kɔɔ ba ni eba lɛ he okadi lɛ mli? (b) Kɛ akɛ shikpɔŋhosomɔi diɛŋtsɛ ni baa lɛ to okadi shikpɔŋhosomɔ kpeteŋkpele ni yɔɔ Kpojiemɔ 6:12 lɛ he lɛ te anaa tɛŋŋ?

³ Atsiɔ shikpɔŋhosomɔi diɛŋtsɛ kɛ nɔ ni ji okadifeemɔ mli nɔ ta shii abɔ yɛ Biblia lɛ mli. Yɛ be mli ni Yesu gbaa egbalɛ kpeteŋkpele ni kɔɔ beni eba Maŋtsɛyeli hewalɛ mli lɛ he lɛ, egba akɛ “shikpɔŋhosomɔi baaba hei sɔrɔtoi fɛɛ.” Enɛɛmɛi baafee “kɔɔmɔi abɔimɔ” lɛ fa. Kɛjɛ 1914 kɛbaa nɛɛ, yɛ be mli ni shikpɔŋ lɛ nɔ gbɔmɛi ayifalɛ ebote akpekpei toi akpei abɔ mli nɛɛ, shikpɔŋhosomɔi diɛŋtsɛ kɛ eko efata haomɔi ni eba wɔbei nɛɛ amli lɛ he diɛŋtsɛ. (Mateo 24:3, 7, 8) Ni kɛlɛ, eyɛ mli akɛ amɛhaa gbalɛ baa mli moŋ, shi nakai shikpɔŋhosomɔi lɛ efee adebɔɔ mli nɔ ni kɛ osharai diɛŋtsɛ baa. Amɛji nɔ ni tsɔɔ okadifeemɔ mli shikpɔŋhosomɔ kpeteŋkpele ni yɔɔ Kpojiemɔ 6:12 lɛ hiɛ. Enɛ baa akɛ naagbee hiɛkpatamɔ kɛha shikpɔŋhosomɔi sɔrɔtoi ni hosoɔ adesa shikpɔŋ nɔ gbɛjianɔtoo ni Satan eto ema shi lɛ kɛyashɛɔ eshishitoi anɔ diɛŋtsɛ.a

Hosomɔi ni Yɔɔ Adesa Gbɛjianɔtoo Mli

 4. (a) Kɛjɛ mɛɛ be mli Yehowa webii ekpa nakai nibii ni baatsɔɔ oshara ni baaje shishi yɛ 1914 lɛ gbɛ? (b) Mɛɛ be kplaŋŋ ko 1914 baakadi enaagbee lɛ?

⁴ Kɛjɛ 1870 afii lɛ teŋ gbɛ tɔɔ Yehowa webii ekpa nakai nibii ni kɛ oshara baa ni baaje shishi yɛ 1914 ni baakadi Jeŋmaji Abe lɛ naagbee lɛ gbɛ. Enɛ ji “bei kpawo” (afii 2,520) ni je shishi kɛjɛ be mli ni abutu David maŋtsɛyeli ni yɔɔ Yerusalem lɛ yɛ afi 607 D.Ŋ.B. kɛyashi be ni akɛ Yesu ta maŋtsɛsɛi nɔ yɛ ŋwɛi Yerusalem yɛ 1914 Ŋ.B. lɛ.—Daniel 4:24, 25; Luka 21:24.b

 5. (a) Mɛɛ adafitswaa ko C. T. Russell kɛha yɛ October 2, 1914? (b) Mɛɛ maŋkwramɔŋ hetsimɔ kɛ basabasafeemɔ etee nɔ kɛjɛ 1914 kɛbaa?

⁵ Beni C. T. Russell pue kɛha leebi jamɔ yɛ Brooklyn, New York, Betel weku lɛ hiɛ yɛ October 2, 1914 leebi lɛ, ekɛ adafitswaa ko ni hɛleɔ mɔ shi ha: “Jeŋmaji Abe lɛ eba naagbee; amɛmaŋtsɛmɛi lɛ eye amɛgbi lɛ amɛta.” Yɛ anɔkwale mli lɛ, jeŋ muu fɛɛ hoofeemɔ ni je shishi yɛ 1914 lɛ yashɛ shɔŋŋ akɛ eha maŋtsɛmɛi amaŋtsɛyelii sɔrɔtoi laaje. Czar maŋtsɛyeli ni abutu lɛ yɛ Bolshevik maŋ hiɛ atuatsemɔ lɛ mli yɛ 1917 lɛ kɛ mpleshii ni tee nɔ yɛ bei kpalaŋŋ mli yɛ Marxist nɔyeli kɛ nɔyelii ni bɔɔ jwetrii amɛhaa amɛhe lɛ teŋ lɛ ba. Maŋkwramɔŋ hosomɔi ni kɛ tsakemɔi baa miiya nɔ lolo kɛmiihao adesa weku lɛ yɛ shikpɔŋ muu lɛ fɛɛ nɔ. Ŋmɛnɛ, nɔyelii pii nyɛɛɛ ahi shi kɛteke afi loo afii enyɔ. Afeɔ bɔ ni maŋkwramɔŋ je lɛ nyɛɛɛ adamɔ shi diŋŋ lɛ he mfoniri yɛ Italia, ni na nɔyelii sɔrɔtoi heei 47 yɛ afii 42 pɛ ni nyiɛ Jeŋ Ta II sɛɛ lɛ nɔ mli. Shi nɛkɛ hosomɔi ni tsɔɔ hiɛ nɛɛ ji shishijee nɔ ni baaya ayagbe naa yɛ nɔyeli mli hosomɔ mli. Mɛni baajɛ mli aba? Nyɔŋmɔ Maŋtsɛyeli lɛ baaŋɔ shikpɔŋ lɛ fɛɛ nɔ nɔyeli lɛ.—Yesaia 9:5, 6.

 6. (a) H. G. Wells tsɔɔ be hee ni hiɛdɔɔ yɔɔ mli lɛ mli yɛ mɛɛ gbɛ nɔ? (b) Mɛni jeŋ nilelɔ ko kɛ maŋ nɔkwɛlɔ ko ŋma yɛ be ni je shishi yɛ 1914 kɛbaa lɛ he?

⁶ Yinɔsaneŋmalɔi, jeŋ nilelɔi, kɛ maŋkwramɔŋ hiɛnyiɛlɔi kɛ amɛnine etsɔɔ afi 1914 akɛ eji yinɔsane be hee ko ni hiɛdɔɔ yɔɔ mli shishijee. Nɛkɛ be nɛɛ sɛɛ afii nyɔŋma kɛ kpawo lɛ, yinɔsaneŋmalɔ H. G. Wells wie akɛ: “Eyɛ miishɛɛ akɛ gbalɔ lɛ aaagba nibii ni ŋɔɔ. Shi enitsumɔ ji ni egba nɔ ni enaa. Enaa jeŋ ko ni asraafoi, maŋhedɔlɔi, mɛi ni kɛ shika faa amɛheɔ ehe kpa babaoo, shika suɔlɔi yeɔ nɔ; jeŋ ni aŋmɛɛ ehe aha mɛi ahe jwɛŋmɔ fɔŋ namɔ kɛ nyɛɛ, ni eelaje heyeli ni aŋkroaŋkroi yɔɔ lɛ kɛ foi, eetɔ̃ kɛmiibote kui amli béi ni naa wa mli, ni eesaa ehe kɛmiiha tai heei.” Afi 1953 mli ni jeŋ nilelɔ Bertrand Russell ŋma akɛ: “Kɛjɛ 1914 kɛbaa nɛɛ, mɔ fɛɛ mɔ ni naa shihilɛ ni yaa nɔ yɛ je lɛ mli lɛ ehao waa yɛ nɔ ni tamɔ shɛɛ mli sane ko ni ka enɔ akɛ eshi ako kɛya ehiɛ kɛyabote osharai wuji amli lɛ hewɔ. . . . Amɛnaa adesa weku lɛ tamɔ mɔ ni ehe gbɛi yɛ Hela oshara ko mli, ni nyɔŋmɔi ni mli efu tsirɛɔ eyisɛɛ ni agbɛnɛ ejeee mɔ ni yeɔ shɛɛ mli sane nɔ dɔŋŋ lɛ.” Afi 1980 mli ni beni maŋ nɔkwɛlɔ Harold Macmillan susuɔ afii ohai 20 lɛ shishijee yɛ toiŋjɔlɛ mli lɛ he lɛ, ekɛɛ: “Nɔ fɛɛ nɔ baaya hiɛ ni eya nɔ jogbaŋŋ. Enɛ ji jeŋ ni afɔ mi yɛ mli lɛ. . . . Trukaa, ni akpaaa gbɛ, leebi ko yɛ 1914 ni enɛɛmɛi ba naagbee.”

7-9. (a) Mɛɛ hosomɔi komɛi ehoso adesa weku lɛ kɛjɛ 1914 kɛbaa nɛɛ? (b) Yɛ naagbee kwraa lɛ, mɛɛ shihilɛ ni fata hosomɔi ni adesai weku lɛ kɛbɔi kpee kɛjɛ beni Yesu ba lɛ he adesai baayaje mli?

⁷ Jeŋ Ta II kɛ hoofeemɔ kɛ hosomɔ kroko ba. Ni tai bibii kɛ awuiyeli ni akɛtutuaa mɛi yɛ majimaji amli lɛ miiya nɔ eehoso shikpɔŋ lɛ. Gbeyei ni mɛi sheɔ akɛ ekolɛ mɛi ni kɛ awuiyeli tutuaa mɛi lɛ kɛ okpɛlɛmii ni kpataa nibii babaoo hiɛ baatsu nii loo maji kɛ okpɛlɛmii ni kpataa nibii babaoo hiɛ baatsu nii lɛ miiha mɛi pii miisusu amɛyiŋ.

⁸ Kɛfata tai ahe lɛ, nibii krokomɛi hu ehoso adesa weku lɛ kɛjɛ 1914 kɛbaa nɛɛ kɛyashɛ eshishitoi anɔ. Haomɔ be ni hiɛ kpaŋ nɔ ni kɛ hosomɔi baa nɛɛ ekome ji nɔ ni U.S. Amerika shika ni gbee shi yɛ October 29, 1929 lɛ kɛba lɛ. Enɛ kɛ Fimɔ Be Kpeteŋkpele ni sa maji ni bɔɔ jwetri amɛhaa amɛhe lɛ fɛɛ he ba. Fimɔ be nɛɛ ba shi loo eyawa yɛ 1932 kɛ 1934 afii lɛ amli, shi wɔmiinu nɔ ni jɛ mli ba lɛ he lolo. Kɛjɛ 1929 kɛbaa nɛɛ, akɛ nibii sɔrɔtoi ebɛje jeŋ ni he yeɔ yɛ shika gbɛfaŋ lɛ tamɔ mama ni atara mli jabejabe loo eko kɛ eko kɛkɛ. Nɔyelii kɛ amɛhe woɔ shikafaa koni akɛwo nyɔji loo akɛtsu nii amli. Mu kɛ pɛtrol he naagba ni ba yɛ 1973 lɛ kɛ 1987 shika ni gbee shi lɛ kɛ eko fata shika maŋtsɛyeli lɛ hosomɔi lɛ ahe. Beni enɛ yaa nɔ lɛ, gbɔmɛi akpekpei abɔ filiɔ nii titri. Gbɔmɛi babaoo ni anyɛɛɛ akane amɛ lɛ etsɔmɔ mɛi ni atsɔɔ shika mli ŋaatsɔɔ, shishiumɔi, kɛ loto kɛ asɔshwɛmɔi sɔrɔtoi ni nɔyelii babaoo tsuɔ enɛɛmɛi ahe nii lɛ anɔ ashishiuɔ amɛ yɛ be mli ni esa akɛ nɔyeli lɛ moŋ abu gbɔmɛi lɛ ahe. Kristendom televishin nɔ sanekpakpashiɛlɔi lɛ po kpaa amɛniji amli koni amɛnine ashɛ amɛ gbɛfaŋnɔ ni shɛɔ dɔlai akpekpei toi akpekpei abɔ lɛ anɔ!—Okɛto Yeremia 5:26-31 he.

⁹ Shika he lɛtemɔ mli naagbai ni tsɔ hiɛ lɛ ji nɔ ni gbele gbɛ ni no ha Mussolini kɛ Hitler shɔ hewalɛ. Babilon Kpeteŋkpele lɛ fiteee be kwraa yɛ amɛdɛŋ hiɛnyam taomɔ mli, kɛkɛ ni Vatican kɛ Italia bote kpaŋmɔi amli yɛ 1929 kɛ agbɛnɛ Germany yɛ 1933. (Kpojiemɔ 17:5) Gbii ni mli wa ni nyiɛ sɛɛ ba lɛ ji Yesu gbalɛ ni tsɔɔ ba ni eba lɛ mlibaa diɛŋtsɛ, ni nɔ ni baafata he ji “jeŋmaji afimɔ lɛ [ni] aaaba shikpɔŋ lɛ nɔ, ni amɛaafee yeyeeye, . . . ni nɔ aaanyɔnyɔɔ gbɔmɛi anɔ yɛ gbeyei kɛ nibii ni baa je lɛŋ lɛ agbɛkwɛmɔ hewɔ” lɛ. (Luka 21:7-9, 25-31)c Hɛɛ, hosomɔi ni je shishi akɛ eeehoso adesa weku lɛ yɛ 1914 lɛ etee nɔ, ni hosomɔi ni naa wa enyiɛ sɛɛ kɛba.

Yehowa kɛ Hosomɔ lɛ Eko Baa

10. (a) Mɛni hewɔ hosomɔi pii eba adesai ashihilɛ mli lɛ? (b) Mɛni ji nɔ ni Yehowa feɔ, koni ekɛsaa ehe eha mɛni?

¹⁰ Nɛkɛ hosomɔi yɛ adesai ashihilɛ mli nɛɛ jɛ gbɔmɔ ni nyɛɛɛ akudɔ lɛ diɛŋtsɛ enajifaamɔi ahewɔ. (Yeremia 10:23) Agbɛnɛ, nakai blema onufu lɛ, Satan, “ni shishiuɔ jeŋ muu lɛ fɛɛ” lɛ, kɛ haomɔi miiba yɛ enaagbee mɔdɛŋ ni ebɔɔ ni etsi adesai fɛɛ kɛjɛ Yehowa jamɔ he lɛ mli. Ŋmɛnɛŋmɛnɛ beaŋ tsɔnei ahe nilee eha shikpɔŋ lɛ efee bibioo tamɔ akutso kome, he ni maŋhedɔɔ kɛ weku mli nyɛɛi miihoso adesa weku lɛ kɛmiishɛ eshishitoi anɔ, ni nɔ ni akɛɛ atsɛɔ lɛ Jeŋmaji Ekomefeemɔ lɛ naaa tsabaa ko ni mɔɔ shi. Agbɛnɛ gbɔmɔ miiye enyɛmi gbɔmɔ nɔ kɛmiiye lɛ awui fe be fɛɛ. (Kpojiemɔ 12:9, 12; Jajelɔ 8:9) Ni kɛlɛ, Nuŋtsɔ Maŋtsɛ Yehowa, ŋwɛi kɛ shikpɔŋ Feelɔ lɛ, miiha hosomɔ ko miiya nɔ yɛ nɔ ni miihe ashɛ afii 90 nɛ, koni ekɛsaa ehe ni ekɛ tsabaa aha shikpɔŋ lɛ naagbai lɛ shikome nyɔŋlo. Yɛ mɛɛ gbɛ nɔ?

11. (a) Mɛni hosomɔ ko atsɔɔ mli yɛ Hagai 2:6, 7? (b) Hagai gbalɛ lɛ miiba mli yɛ mɛɛ gbɛ nɔ?

¹¹ Wɔkaneɔ yɛ Hagai 2:6, 7 akɛ: “Shi bɔ ni Yehowa Zebaot kɛɛ nɛ: Eshwɛ be, be kukuoo kɛkɛ, ni mahoso ŋwɛi kɛ shikpɔŋ kɛ ŋshɔ kɛ shikpɔŋ gbiŋ; ni mahoso jeŋmaji fɛɛ kwa, ni jeŋmaji lɛ fɛɛ anii ni jara wa lɛ aaaba, ni mikɛ anunyam sɔŋŋ aaawo shia nɛɛ obɔ, Yehowa Zebaot kɛɛ.” Kɛjɛ afi 1919 mli titri ni Yehowa eha edasefoi lɛ ejaje ekojomɔi yɛ adesa weku lɛ fɛɛ ni yɔɔ shikpɔŋ nɛɛ nɔ lɛ ateŋ. Aha Satan jeŋ gbɛjianɔtoo lɛ ele jeŋ muu fɛɛ kɔkɔbɔɔ nɛɛ.d Yɛ be mli ni kɔkɔbɔɔ lɛ mli waa lɛ, akanya adesai ni sheɔ Nyɔŋmɔ gbeyei, “nii ni jara wa lɛ,” koni amɛtsi amɛhe kɛjɛ jeŋmaji lɛ ahe. Jeee hosomɔ ni yaa nɔ yɛ Satan gbɛjianɔtoo lɛ mli lɛ hosoɔ amɛ kɛjeɔ kpo. Shi yɛ be mli ni amɛyɔseɔ shihilɛ lɛ, amɛkpɛɔ amɛ diɛŋtsɛ amɛyiŋ akɛ amɛbaafata Yohane kuu ni afɔ amɛ mu lɛ ahe ni amɛkɛ anunyam awo Yehowa jamɔ shia lɛ obɔ. Amɛfeɔ enɛ yɛ mɛɛ gbɛ nɔ? Kɛtsɔ Nyɔŋmɔ Maŋtsɛyeli ni ato ama shi lɛ he sanekpakpa lɛ shiɛmɔ kɛ ekaa nɔ. (Mateo 24:14) Nɛkɛ Maŋtsɛyeli, ni mɛi ni feɔ ji Yesu kɛ esɛɛnyiɛlɔi ni afɔ amɛ mu lɛ baadamɔ shi kɛya naanɔ koni ewo Yehowa hiɛ nyam akɛ “maŋtsɛyeli ni anyɛŋ ahoso lɛ.”—Hebribii 12:26-29.

12. Kɛ oje shishi akɛ ooobo shiɛmɔ ni agba afɔ shi yɛ Mateo 24:14 lɛ toi lɛ, belɛ mɛni esa akɛ ofee dani shikpɔŋhosomɔ kpeteŋkpele ni yɔɔ Kpojiemɔ 6:12 lɛ aba?

¹² Ani oji mɔ ni ebɔi nakai shiɛmɔ lɛ toiboo? Ani ekolɛ ofata mɛi akpekpei abɔ ni nyɛsɛɛ nɛɛ amɛba Yesu gbele lɛ Kaimɔ lɛ yeli shishi lɛ ahe? Kɛji nakai ni lɛ, yaa nɔ oshwere yɛ Biblia mli anɔkwale ni okaseɔ lɛ mli. (2 Timoteo 2:15; 3:16, 17) Tsi ohe kɛjɛ Satan shikpɔŋ nɔ gbɛjianɔtoo ni abu lɛ gbele fɔ lɛ shihilɛ ni ekpɔtɔ lɛ he kwraa! Ba Kristofoi ajeŋ hee asafo lɛ mli amrɔ nɔŋŋ ni obana emli nitsumɔ lɛ mli gbɛfaŋnɔ dani naagbee “shikpɔŋhosomɔ” ni ji hiɛkpatamɔ lɛ akumɔ Satan je lɛ fɛɛ dukuduku. Shi mɛni ji nakai shikpɔŋhosomɔ kpeteŋkpele lɛ? Ha wɔkwɛ agbɛnɛ.

Shikpɔŋhosomɔ Kpeteŋkpele Lɛ!

13. Yɛ mɛɛ gbɛ nɔ shikpɔŋhosomɔ kpeteŋkpele lɛ ji ehee kwraa ni adesai enako eko da?

¹³ Hɛɛ, nɛkɛ naagbee gbii ni ji jaramɔ bei nɛɛ efee shikpɔŋhosomɔi abe—nɔ ni baa diɛŋtsɛ kɛ okadifeemɔ mli nɔ. (2 Timoteo 3:1) Shi nɛkɛ hosomɔi nɛɛ eko kwraa jeee naagbee hosomɔ kpeteŋkpele ni Yohane na yɛ be mli ni atse naasɔomɔ ni ji ekpaa lɛ naa lɛ. Hosomɔi ni tsɔ hiɛ lɛ abe lɛ eba naagbee. Agbɛnɛ shikpɔŋhosomɔ kpeteŋkpele ni ji ehee kwraa ni adesa enako eko da lɛ miiba agbɛnɛ. Bɔ ni shikpɔŋhosomɔ nɛɛ da sɔŋŋ ha kɛ bɔ ni ebaahoso nibii ni ekokolo nibii eha hewɔ lɛ, anyɛŋ akɛ Richter ŋsɛnii ni akɛsusuɔ shikpɔŋhosomɔ hewalɛ lɛ loo adesa susumɔ nɔ ko ato he. Enɛ jeee hosomɔ ko ni baa maŋ kome pɛ nɔ, shi moŋ eji jeŋ muu fɛɛ hosomɔ ni fiteɔ “shikpɔŋ” muu lɛ fɛɛ, ni ji akɛ, adesai ni bɛ jeŋba lɛ fɛɛ.

14. (a) Mɛɛ gbalɛ ko gba shikpɔŋhosomɔ kpeteŋkpele ko kɛ nɔ ni baajɛ mli aba lɛ? (b) Esa akɛ Yoel gbalɛ lɛ kɛ Kpojiemɔ 6:12, 13 akɔ mɛni he?

¹⁴ Yehowa gbalɔi krokomɛi gba shikpɔŋhosomɔ ni tamɔ nɛkɛ kɛ jeŋ muu fɛɛ hiɛkpatamɔ ni ekɛbaaba lɛ. Akɛ nɔkwɛmɔnɔ lɛ, aaafee afi 820 D.Ŋ.B. lɛ, Yoel wie “Yehowa gbi wulu ni he yɔɔ gbeyei” ni baa lɛ he, ni etsɔɔ mli akɛ “hulu aaatsɔ duŋ, ni nyɔŋtsere aaatsɔ lá.” Yɛ sɛɛ mli lɛ, ekɛ nɛkɛ wiemɔi nɛɛ fata he: “Asafoi, asafoi yɛ atɛŋbuu jɔɔ lɛ mli; ejaakɛ Yehowa gbi lɛ eshɛ shi eta, yɛ atɛŋbuu jɔɔ lɛ mli. Hulu kɛ nyɔŋtsere ewo duŋ, ni ŋulamii efɔɔ kpɛmɔ. Ni Yehowa aaahũu kɛaajɛ Zion, ni eeewo egbee nɔ kɛaaje Yerusalem, ni ŋwɛi kɛ shikpɔŋ aaahoso; shi Yehowa aaatsɔ abobaa he eha emaŋ lɛ kɛ mɔɔ ni wa hu eha Israelbii lɛ.” (Yoel 3:4; 4:14-16) Nɛkɛ hosomɔ nɛɛ baanyɛ akɔ Yehowa fɔbuu kojomɔ yɛ amanehulu kpeteŋkpele be lɛ mli lɛ pɛ he. (Mateo 24:21) No hewɔ lɛ sane ni tamɔ nakai nɔŋŋ ni yɔɔ Kpojiemɔ 6:12, 13 lɛ hu baakɔ enɛ he nakai nɔŋŋ.—Kwɛmɔ Yeremia 10:10; Zefania 1:14, 15 hu.

15. Mɛɛ hosomɔ ko ni naa wa waa gbalɔ Habakuk gba fɔ shi?

¹⁵ Yoel sɛɛ aaafee afii 200 lɛ, gbalɔ Habakuk wie nɛkɛ yɛ sɔlemɔ mli eha e-Nyɔŋmɔ lɛ akɛ: “Yehowa, minu ohe ni mishe gbeyei! Yehowa, tsiɛmɔ onitsumɔ lɛ hiɛ yɛ afii nɛɛ amli nɔŋŋ, ha ale yɛ afii nɛɛ amli nɔŋŋ; mlifu mli lɛ kaimɔ musuŋtsɔlɛ!” Nakai “mlifu” lɛ baafee mɛni? Habakuk tee nɔ etsɔɔ bɔ ni amanehulu kpeteŋkpele lɛ baaji lɛ mli fitsofitso, ni ewie yɛ Yehowa he akɛ: “Ewa edamɔ shi, ni shikpɔŋ hoso; ekwɛ, ni jeŋmaji ahe kpokpo, . . . okɛ mlila fa kɛtsɔ shikpɔŋ lɛ nɔ, okɛ mlifu shimɔ jeŋmaji lɛ dukuduku. Shi mi lɛ, manya yɛ Yehowa mli, mimli aaafili mi yɛ miyiwalaheremɔ Nyɔŋmɔ lɛ mli!” (Habakuk 3:1, 2, 6, 12, 18) Mɛɛ hosomɔ kpeteŋkpele po Yehowa aaaha aba shikpɔŋ muu lɛ fɛɛ nɔ nɛkɛ, yɛ be mli ni eshimɔɔ jeŋmaji lɛ dukuduku lɛ!

16. (a) Mɛni gbalɔ Ezekiel egba efɔ shi kɛha be ni Satan baatutua Nyɔŋmɔ webii lɛ yɛ naagbee kwraa lɛ? (b) Mɛni jɛɔ shikpɔŋhosomɔ kpeteŋkpele ni yɔɔ Kpojiemɔ 6:12 lɛ mli baa?

¹⁶ Ezekiel hu gba akɛ beni Gog ni jɛ Magog lɛ (Satan ni aba lɛ shi lɛ) kɛ enaagbee tutuamɔ baa Nyɔŋmɔ webii lɛ anɔ lɛ, Yehowa baaha “hosomɔ kpeteŋkpele” aba “Israel shikpɔŋ lɛ nɔ.” (Ezekiel 38:18, 19) Eyɛ mli akɛ shikpɔŋhosomɔ diɛŋtsɛ fata he moŋ, shi esa akɛ wɔkai akɛ akɛ Kpojiemɔ ha yɛ okadii amli. Nɛkɛ gbalɛ nɛɛ kɛ gbalɛi krokomɛi ni akɛha lɛ fɛɛ ji okadi mli nɔ. No hewɔ lɛ, etamɔ nɔ ni naasɔomɔ ni ji ekpaa lɛ ni atse naa lɛ haa wɔnaa hosomɔi fɛɛ ni eba shikpɔŋ nɛɛ nɔ nibii agbɛjianɔtoo lɛ nɔ lɛ naagbee—ni ji shikpɔŋhosomɔ kpeteŋkpele ni emli akpataa adesai fɛɛ ni teɔ shi woɔ Yehowa Nyɔŋmɔ maŋtsɛyeli lɛ hiɛ yɛ lɛ.

Duŋ Be

17. Shikpɔŋhosomɔ kpeteŋkpele lɛ saa hulu, nyɔŋtsere kɛ ŋulamii lɛ ahe yɛ mɛɛ gbɛ nɔ?

¹⁷ Taakɛ Yohane tee nɔ etsɔɔ lɛ, nɔ ni fata shikpɔŋhosomɔ kpeteŋkpele lɛ he ba ji nibii ni yɔɔ gbeyei ni kɔɔ ŋwɛi he. Ekɛɛ: “Ni hulu tsɔ ediŋ tamɔ tsɔi kotoku, ni nyɔŋtsere muu lɛ tsɔ tamɔ lá; ni ŋwɛi ŋulamii lɛ tserɛ shwie shikpɔŋ, tamɔ bɔ ni agbami tso yi agbamii ŋmilikitii shwieɔ shi, beni kɔɔyɔɔ kpeteŋkpele hosoɔ lɛ lɛ.” (Kpojiemɔ 6:12b, 13) Mɛɛ nii ni yɔɔ naakpɛɛ nɛ! Ani obaanyɛ osusu bɔ ni duŋ ni baawo nɛɛ baafee gbeyei aha kɛji akɛ gbalɛ nɛɛ aaaba mli pɔtɛɛ lɛ he? Hulu la ni kpɛɔ ni haa dɔlɛ yɛ jetsɛremɔ mli bɛ dɔŋŋ! Nyɔŋtsere ni kpɛɔ fɛfɛo gbɛkɛ tamɔ shieŋtsɛ ko lɛ bɛ dɔŋŋ! Ni ŋulamii akpekpei toi akpekpei abɔ lɛ kpɛlɛŋ yɛ ŋwɛi ni tamɔ kuŋtu lɛ mli dɔŋŋ. Shi moŋ, duŋ kpii ni efee ŋanii ni miiya nɔ kɛkɛ.—Okɛto Mateo 24:29 he.

18. ‘Ŋwɛi wo duŋ’ kɛha Yerusalem yɛ afi 607 D.Ŋ.B. yɛ mɛɛ gbɛ nɔ?

¹⁸ Yɛ mumɔŋ shishinumɔ naa lɛ, agba nɛkɛ duŋ nɛɛ he sane afɔ shi aha blema Israel. Yeremia bɔ kɔkɔ akɛ: “Shikpɔŋ muu lɛ fɛɛ baatsɔ amaŋfɔ koikoi, ani esaaa akɛ mibuleɔ amɛshishi? Yɛ enɛ hewɔ lɛ shikpɔŋ lɛ aaawo yara, ni ŋwɛi aaadi tuŋŋ.” (Yeremia 4:27, 28, New World Translation.) Beni nakai gbalɛ lɛ ba mli yɛ afi 607 D.Ŋ.B. lɛ, nibii amli badi tuŋŋ diɛŋtsɛ kɛha Yehowa webii. Amɛ maŋtiase, Yerusalem, gbee shi yɛ Babilonbii lɛ ahiɛ. Akpata amɛ sɔlemɔ tsu lɛ hiɛ, ni ashi amɛmaŋ lɛ amaŋfɔ. Kɛha amɛ lɛ, miishɛjemɔ ni tamɔ la ko baaa kɛjɛɛɛ ŋwɛi. Yɛ no najiaŋ lɛ, etamɔ bɔ ni Yeremia kɛ yaafo kɛɛ Yehowa lɛ: “Ogbe wɔ, onako mɔbɔ. Okɛ atatu eha ohe, koni faikpamɔ akatsɔ mli kɛmiiho.” (Yaafo 3:43, 44) Kɛha Yerusalem lɛ, nakai ŋwɛi duŋ lɛ tsɔɔ gbele kɛ hiɛkpatamɔ.

19. (a) Yɛ mɛɛ gbɛ nɔ Nyɔŋmɔ gbalɔ Yesaia tsɔɔ duŋ ko ni wo yɛ ŋwɛi ni kɔɔ blema Babilon he lɛ mli? (b) Mɛɛ be ni yɛ mɛɛ gbɛ nɔ Yesaia gbalɛ lɛ ba mli?

¹⁹ Yɛ sɛɛ mli lɛ, ŋwɛi duŋ ko ni tamɔ nakai nɔŋŋ batsɔ oshara kɛha blema Babilon. Akɛ mumɔ tsirɛ Nyɔŋmɔ gbalɔ lɛ koni eŋma yɛ enɛ he akɛ: “Naa, Yehowa gbi lɛ miiba kɛ yiwalɛ kɛ mlila kɛ mlifu ni naa wa, koni ebafee shikpɔŋ lɛ fɛɛ amaŋfɔ, ni ekpata emli eshafeelɔi lɛ ahiɛ kɛjɛ nɔ. Ni ŋwɛi ŋulamii kɛ oŋwɛ̃ kpɛŋ; hulu aaawo duŋ yɛ ekpojee mli, nyɔŋtsere hu haŋ ela lɛ akpɛ. Ni mawo je lɛ nyɔmɔ yɛ amɛ nɔ fɔŋ lɛ hewɔ, kɛ mɛi fɔji hu yɛ amɛ nɔ sha lɛ hewɔ, ni maha hewolɔi ahetsɔɔmɔ lɛ sɛɛ afo, ni maba yiwalɔi ahenɔwomɔ lɛ shi.” (Yesaia 13:9-11) Gbalɛ nɛɛ ba mli yɛ afi 539 D.Ŋ.B., beni Babilon gbee shi yɛ Media kɛ Persiabii lɛ ahiɛ lɛ. Etsɔɔ duŋ kpii, hiɛnɔkamɔ ni bɛ, la ni shɛjeɔ mɔ mii ko ni bɛ kɛha Babilon yɛ be mli ni egbee shi kwraa kɛjɛ egbɛhe akɛ tsutsu jeŋ hewalɛ kɛmiiya naanɔ lɛ.

20. Mɛni ni yɔɔ gbeyei ni baajɛ mli aba mɛɔ nibii agbɛjianɔtoo nɛɛ yɛ be mli ni shikpɔŋhosomɔ kpeteŋkpele lɛ aaaba lɛ?

²⁰ Yɛ nakai gbɛ nɔ nɔŋŋ lɛ, beni shikpɔŋhosomɔ kpeteŋkpele nɛɛ aaahoso lɛ, nɛkɛ jeŋ gbɛjianɔtoo muu nɛɛ fɛɛ baabote yeyeeyefeemɔ ni tamɔ duŋ kpii mli. Satan shikpɔŋ nɔ gbɛjianɔtoo lɛ ŋulamii ni kpɛlɛɔ kaŋkaŋ lɛ kpɛŋ kɛ hiɛnɔkamɔ ko. Amrɔ nɛɛ po, shikpɔŋ nɔ maŋkwramɔŋ hiɛnyiɛlɔi lɛ, titri lɛ mɛi ni yɔɔ Kristendom lɛ ebafee mɛi ni ehe gbɛi akɛ mɛi ni efite kwraa, amalelɔi kɛ mɛi ni bɛ jeŋba. (Yesaia 28:14-19) Anyɛŋ akɛ he afɔ amɛnɔ dɔŋŋ. Amɛkane ni miihe agbo lɛ baabote duŋ mli kwraa yɛ be mli ni Yehowa kɛ fɔbuu kojomɔ baa enɔ lɛ. Abaakpa hewalɛ ni amɛnaa yɛ shikpɔŋ nɔ saji amli ni tamɔ nyɔŋtsere la lɛ he mama akɛ eji nɔ ni la eyi mli obɔ, nɔ ni kɛ gbele baa. Amɛ je lɛŋ ŋulamii wuji lɛ baagboi kwraa tamɔ ŋwɛi ŋulamii bibii ni jɛɔ ŋwɛi gbeɔ shi ni agbɛɔ amɛ ashwaa tamɔ wein yibii ŋmilikitii yɛ ahum ni naa wa mli. Wɔ jeŋ muu nɛɛ fɛɛ baahoso yɛ “amanehulu babaoo . . . ni anako nɔ da kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ” lɛ shishi. (Mateo 24:21) Mɛɛ gbɛkpamɔ ni yɔɔ gbeyei po nɛ!

“Ŋwɛi” Tsi Ehe Kɛtee

21. Mɛni Yohane na ni kɔɔ “ŋwɛi” kɛ “gɔŋ fɛɛ gɔŋ kɛ ŋshɔkpɔ fɛɛ ŋshɔkpɔ” he yɛ eninaa lɛ mli?

²¹ Yohane ninaa lɛ tee nɔ: “Ni ŋwɛi tsi ehe kɛtee tamɔ akotaa wolo; ni atsirɛ gɔŋ fɛɛ gɔŋ kɛ ŋshɔkpɔ fɛɛ ŋshɔkpɔ kɛjɛ amɛ gbɛhei.” (Kpojiemɔ 6:14) Eka shi faŋŋ akɛ enɛɛmɛi jeee ŋwɛi diɛŋtsɛ loo gɔji kɛ ŋshɔkpɔi diɛŋtsɛ. Shi mɛni amɛfeɔ he mfoniri?

22. Mɛɛ “ŋwɛi” nɛkɛ “akota tamɔ wolo ko” yɛ Edom?

²² Yɛ “ŋwɛi” nɛɛ he lɛ, gbalɛ kroko ni tamɔ nakai ni wieɔ Yehowa mlifu ni ekɛteɔ shi eshiɔ jeŋmaji fɛɛ he lɛ yeɔ ebuaa wɔ ni wɔnuɔ shishi: “Ni ŋwɛi asafo lɛ fɛɛ aaafite, aaakota ŋwɛi tamɔ wolo.” (Yesaia 34:4) Edom titri ji mɔ ni esa akɛ ena amanehulu. Yɛ mɛɛ gbɛ nɔ? Beni akpata Yerusalem hiɛ yɛ afi 607 D.Ŋ.B. lɛ sɛɛ nɔŋŋ pɛ kɛkɛ ni Babilon ye enɔ kunim. Aŋmaaa nɔ ko afɔɔɔ shi akɛ nɔ ko ni yɔɔ naakpɛɛ ba yɛ ŋwɛi diɛŋtsɛ ni anaa nɛɛ yɛ nakai be lɛ mli. Shi nibii ni kɛ osharai baa tee nɔ yɛ Edom “ŋwɛi” lɛ amli.e Aba amɛ adesai nɔyeli hewalɛi lɛ ashi kɛjɛ amɛgbɛhe ni awo nɔ, ni tamɔ gbɛhe ni yɔɔ ŋwɛi lɛ. (Yesaia 34:5) “Akota” amɛ ni akɛfɔ shi, tamɔ wolo momo ko ni he bɛ sɛɛnamɔ ko kwraa dɔŋŋ kɛha mɔ ko.

23. Mɛni ji “ŋwɛi” ni ‘baatsi ehe aya tamɔ wolo’ lɛ, ni Petro wiemɔi lɛ maa nɛkɛ shishinumɔ nɛɛ nɔ mi yɛ mɛɛ gbɛ nɔ?

²³ No hewɔ lɛ, “ŋwɛi” ni ‘baatsi ehe aya tamɔ wolo’ lɛ kɔɔ nɔyelii ni yeɔ shikpɔŋ nɛɛ nɔ ni teɔ shi woɔ Nyɔŋmɔ lɛ ahe. Okpɔŋɔ Nɔtalɔ ni ta okpɔŋɔ yɛŋ lɛ nɔ ni yeɔ kunim yɛ mɔ fɛɛ mɔ nɔ lɛ baajie amɛ kɛya kwraa yɛ naagbee. (Kpojiemɔ 19:11-16, 19-21) Nɔ ni bɔfo Petro wie yɛ be mli ni ekpaa nibii ni naasɔomɔ ni ji ekpaa lɛ naatsemɔ feɔ he mfoniri lɛ agbɛ lɛ maa enɛ nɔ mi: “Shi ŋwɛi kɛ shikpɔŋ ni yɔɔ nɛɛ, lɛ nɔŋŋ ewiemɔ akɛto amɛ aha la, ni akɛ amɛ eto kɛyaashi kojomɔ kɛ gbɔmɛi ni kwa Nyɔŋmɔ lɛ ahiɛkpatamɔ lɛ nɔ.” (2 Petro 3:7) Shi wiemɔ, “ni atsirɛ gɔŋ fɛɛ gɔŋ kɛ ŋshɔkpɔ fɛɛ ŋshɔkpɔ kɛjɛ amɛgbɛhei” lɛ hu?

24. (a) Mɛɛ be, yɛ Biblia gbalɛ mli, akɛɔ akɛ gɔji kɛ ŋshɔkpɔi hosoɔ aloo amɛtsirɛɔ amɛhe lɛ? (b) Yɛ mɛɛ gbɛ nɔ ‘gɔji hoso’ yɛ be mli ni Ninive gbee shi lɛ?

²⁴ Awieɔ yɛ Biblia gbalɛ mli akɛ gɔji kɛ ŋshɔkpɔi hosoɔ aloo amɛhaoɔ yɛ be kɛ bei amli yɛ be mli ni maŋkwramɔŋ basabasafeemɔ ko eba lɛ. Akɛ nɔkwɛmɔnɔ lɛ, yɛ be mli ni egbaa Yehowa kojomɔi ni ekɛshiɔ Ninive lɛ, gbalɔ Nahum ŋma akɛ: “Gɔji hosoɔ yɛ ehiɛ, ni gɔŋkpɔi hu sereɔ; shikpɔŋ lɛ woɔ ehe nɔ yɛ ehiɛ, kɛ jeŋ kɛ emli bii lɛ fɛɛ.” (Nahum 1:5) Nɔ ko bɛ ni aŋma afɔ shi ni tsɔɔ gɔji diɛŋtsɛ ni kumɔ beni Ninive gbee shi yɛ 632 D.Ŋ.B. lɛ. Shi moŋ jeŋ hewalɛ ni tsutsu lɛ etamɔ gɔŋ yɛ hewalɛ mli lɛ gbee shi trukaa.—Okɛto Yeremia 4:24 he.

25. Yɛ mɛɛ gbɛ nɔ “gɔŋ fɛɛ gɔŋ kɛ ŋshɔkpɔ fɛɛ ŋshɔkpɔ” baafamɔ kɛjɛ amɛgbɛhei yɛ nibii agbɛjianɔtoo nɛɛ naagbee ni baa lɛ mli?

²⁵ No hewɔ lɛ “gɔŋ fɛɛ gɔŋ kɛ ŋshɔkpɔ fɛɛ ŋshɔkpɔ” ni awie he yɛ naasɔomɔ ni ji ekpaa lɛ naatsemɔ mli lɛ baadamɔ shi aha maŋkwramɔŋ nɔyelii kɛ gbɛjianɔtoi ni yɔɔ je nɛŋ ni hiɛ amɛhe ni tamɔ nɔ ni damɔ shi shiŋŋ kɛha adesai pii lɛ yɛ sane naatsɔɔmɔ ni ja naa. Abaahoso amɛ ni amɛfamɔ kɛjɛ amɛ gbɛhei, koni mɛi ni tsutsu lɛ amɛkɛ amɛhiɛ fɔɔ amɛnɔ lɛ ahiɛ afee amɛ yaa ni amɛshe gbeyei. Taakɛ gbalɛ lɛ yaa nɔ ejajeɔ lɛ, sanebimɔ ko baŋ he akɛ Yehowa kɛ e-Bi lɛ mlifu gbi kpeteŋkpele lɛ—naagbee hosomɔ ni jieɔ Satan gbɛjianɔtoo lɛ fɛɛ kɛyaa lɛ—eba kɛ oweletɔɔ!

“Nyɛgbeea Wɔ Nɔ ni Nyɛteea Wɔ”

26. Te gbɔmɛi ni teɔ shi woɔ Nyɔŋmɔ maŋtsɛyeli lɛ baafee amɛnii yɛ amɛgbeyeishemɔ lɛ mli amɛha tɛŋŋ, ni mɛɛ wiemɔi ni tsɔɔ gbeyeishemɔ amɛbaajaje?

²⁶ Yohane wiemɔi lɛ yaa nɔ akɛ: “Ni shikpɔŋ lɛ nɔ maŋtsɛmɛi lɛ kɛ mɛi agboi lɛ kɛ asafoiatsɛmɛi lɛ kɛ niiatsɛmɛi lɛ kɛ hewalɔi lɛ, kɛ nyɔŋ fɛɛ nyɔŋ kɛ odehe fɛɛ odehe yateetee amɛhe yɛ bui amli kɛ gɔji atɛsai amli, ni amɛkɛɛ gɔji lɛ kɛ tɛsai lɛ akɛ: Nyɛgbeea wɔ nɔ, ni nyɛteea wɔ kɛjɛa mɔ ni ta maŋtsɛsɛi lɛ nɔ lɛ hiɛ kɛ toobi lɛ mlifu lɛ naa. Ejaakɛ emlifu gbi wulu lɛ eshɛ, ni namɔ aaanyɛ shi adamɔ?”—Kpojiemɔ 6:15-17.

27. Te Israelbii ni yɔɔ Samaria ni yee anɔkwale lɛ bolɔ amɛha tɛŋŋ, ni nakai wiemɔi lɛ ba mli yɛ mɛɛ gbɛ nɔ?

²⁷ Beni Hoshea jajeɔ Yehowa kojomɔ eshwieɔ Samaria, kooyigbɛ Israel maŋtsɛyeli lɛ maŋtiase lɛ nɔ lɛ, ekɛɛ: “Ni aaakpata Bet-Awen hei grɔŋŋi lɛ ni ji Israel he esha lɛ ahiɛ; ŋmei kɛ aŋlɛŋlɛi ni aaakwɛ yɛ amɛfɔleshaa latɛi lɛ anɔ, ni amɛaakɛɛ gɔji lɛ akɛ: Nyɛhaa wɔ nɔ! Kɛ gɔŋkpɔi lɛ hu akɛ: Nyɛbagbeea wɔ nɔ!” (Hoshea 10:8) Wiemɔi nɛɛ ba mli yɛ mɛɛ gbɛ nɔ? Ojogbaŋŋ, beni Samaria gbee shi yɛ Ashurbii ni yi wa lɛ ahiɛ yɛ 740 D.Ŋ.B. lɛ, he ko he ko bɛ ni Israelbii lɛ baajo foi kɛaaya. Hoshea wiemɔi lɛ tsɔɔ henumɔ ko ni tsɔɔ akɛ nɔ ko nɔ ko kwraa bɛ ni abaanyɛ afee, gbeyei diɛŋtsɛ, kɛ bɔ ni mɛi ni aye amɛnɔ kunim lɛ nu he akɛ afee amɛ shwɛm ni akpoo amɛ. Ŋmeŋmei diɛŋtsɛ loo Samaria gbɛjianɔtoi ni tamɔ gɔji lɛ nyɛɛɛ abu amɛhe, eyɛ mli akɛ etamɔ nɔ ni amɛsusu yɛ tsutsu akɛ amɛbaahi shi daa.

28. (a) Mɛɛ kɔkɔ Yesu bɔ yei ni yɔɔ Yerusalem lɛ? (b) Yesu kɔkɔbɔɔ lɛ ba mli yɛ mɛɛ gbɛ nɔ?

²⁸ Nakai nɔŋŋ hu, beni Roma asraafoi lɛ nyiɛ Yesu hiɛ kɛyaa egbele mli lɛ, ewie etsɔɔ Yerusalem yei lɛ ni ekɛɛ: “Ejaakɛ naa, gbii miiba, nɔ mli ni amɛaakɛɛ: Ajɔɔ kenei kɛ musui ni fɔko da kɛ fufɔi ni ayeko da! No mli lɛ amɛaabɔi gɔji lɛ akɛɛmɔ akɛ: Nyɛbagbeea wɔ nɔ! Kɛ gɔŋkpɔi lɛ hu akɛ: Nyɛbahaa wɔ nɔ!” (Luka 23:29, 30) Yerusalem hiɛkpatamɔ yɛ Roma asraafoi lɛ adɛŋ yɛ afi 70 Ŋ.B. lɛ ji nɔ ni aŋmala ashwie shi yɛ yinɔsane mli, ni eka shi faŋŋ akɛ Yesu wiemɔi lɛ mli shishinumɔ tamɔ Hoshea nɔ lɛ pɛpɛɛpɛ. Teemɔ he ko bɛ kɛha Yudafoi ni shwɛ yɛ Yudea lɛ. He fɛɛ he ni amɛaabɔ mɔdɛŋ akɛ amɛaatee amɛhe yɛ yɛ Yerusalem lɛ, aloo kɛ amɛjo foi kɛtee Masada gɔŋ lɛ yiteŋ po lɛ, amɛnyɛɛɛ amɛjo Yehowa kojomɔ mlifu ni naa wa lɛ naa foi.

29. (a) Kɛ Yehowa mlifu gbi lɛ ba lɛ, mɛni baaba mɛi ni fiɔ gbɛjianɔtoo nɛɛ sɛɛ lɛ anɔ? (b) Mɛɛ Yesu gbalɛ baaba mli beni Yehowa jieɔ E-mlifu kpo lɛ?

²⁹ Agbɛnɛ, naasɔomɔ ni ji ekpaa lɛ naatsemɔ etsɔɔ akɛ nɔ ko ni tamɔ nakai baaba yɛ Yehowa mlifu gbi ni baa lɛ mli. Yɛ be mli ni abaahoso shikpɔŋ nɔ gbɛjianɔtoo lɛ yɛ naagbee kwraa lɛ, mɛi ni etuu amɛhe amɛha esɛɛfimɔ lɛ kɛ hehiamɔ baatao teemɔ he, shi amɛnaŋ eko. Apasa jamɔ, Babilon Kpeteŋkpele lɛ, eha amɛnine enyɛ shi yɛ gbɛ ni yɔɔ mɔbɔ nɔ. Gɔji diɛŋtsɛ amli bui loo okadi gɔji ni ji maŋkwramɔŋ kɛ jarayeli mli gbɛjianɔtoi nyɛŋ ekɛ shika mli hebuu loo yelikɛbuamɔ ko ni tamɔ nakai aha amɛ. Nɔ ko nɔ ko bɛ ni baabaa amɛyi kɛjɛ Yehowa mlifu lɛ naa. Yesu etsɔɔ bɔ ni amɛ gbeyeishemɔ lɛ ji lɛ diɛŋtsɛ mli nɛkɛ, akɛ: “Kɛkɛ ni gbɔmɔbi lɛ okadi lɛ aaapue yɛ ŋwɛi, ni no lɛ shikpɔŋ lɛ nɔ akutsei lɛ fɛɛ aaawo yara, ni amɛaana gbɔmɔbi lɛ akɛ eeba yɛ ŋwɛi atatui lɛ anɔ kɛ hewalɛ kɛ anunyam babaoo hu.”—Mateo 24:30.

30. (a) Sanebimɔ akɛ: “Namɔ baanyɛ shi adamɔ?” lɛ tsɔɔ mɛni? (b) Ani mɔ ko baanyɛ adamɔ shi yɛ Yehowa kojomɔ be lɛ mli?

³⁰ Hɛɛ, mɛi ni amɛkpoo akɛ amɛaakpɛlɛ okpɔŋɔ yɛŋ lɛ Nɔtalɔ kunimyelɔ lɛ hewalɛ lɛ nɔ lɛ, abaanyɛ amɛnɔ ni amɛkpɛlɛ amɛtɔmɔ lɛ nɔ. Adesai ni amɛjɛ amɛsuɔmɔ mli amɛfee onufu lɛ seshi lɛ fa lɛ, hiɛkpatamɔ ji nɔ ni baaba amɛnɔ yɛ be mli ni Satan je lɛ hoɔ eyaa lɛ. (1 Mose 3:15; 1 Yohane 2:17) Bɔ ni jeŋ shihilɛ lɛ baatamɔ yɛ nakai be lɛ mli hewɔ lɛ eeeha mɛi pii abi yɛ no hewɔ akɛ: “Namɔ baanyɛ shi adamɔ?” Ekolɛ amɛbaawie akɛ mɔ ko mɔ ko kwraa bɛ ni baanyɛ adamɔ shi akɛ mɔ ni akpɛlɛ enɔ yɛ Yehowa hiɛ yɛ nakai ekojomɔ gbi lɛ nɔ. Shi amɛbaafee mɛi ni amɛtɔ̃ kwraa taakɛ Kpojiemɔ wolo lɛ yaa nɔ etsɔɔ lɛ.

[Shishigbɛ niŋmai]

[Akrabatsa/​Mfoniri ni yɔɔ baafa 105]

Atsɔ Hiɛ Ana 1914

“Afi B.C. 606 mli ni Nyɔŋmɔ maŋtsɛyeli lɛ ba naagbee, akpɔ akekre lɛ, ni akɛ shikpɔŋ lɛ fɛɛ wo Jeŋmajiaŋbii lɛ adɛŋ. Afii 2,520 kɛjɛ B.C. 606 baa naagbee yɛ A.D. 1914.”f—The Three Worlds ni aŋma yɛ 1877 lɛ, baafa 83.

“Biblia mli odaseyeli yɛ faŋŋ ni ema shi shiŋŋ akɛ ‘Jeŋmaji Abe’ lɛ ji be ni feɔ afii 2,520, kɛjɛ afi B.C. 606 kɛyashi A.D. 1914 ni fata he.”—Studies in the Scriptures, Kpo 2, ni C. T. Russell ŋma ni akala yɛ 1889, baafa 79.

Charles Taze Russell kɛ enanemɛi Biblia kaselɔi lɛ yɔse afii nyɔŋmai abɔ kɛtsɔ hiɛ akɛ 1914 baakadi Jeŋmaji Abe lɛ, aloo jeŋmaji abe ni ato lɛ naagbee. (Luka 21:24) Yɛ be mli ni yɛ nakai mra gbii lɛ amli lɛ amɛnuuu nɔ ni enɛ baatsɔɔ lɛ shishi jogbaŋŋ lɛ, amɛhe amɛye diɛŋtsɛ akɛ 1914 baafee tsakemɔ be yɛ adesa yinɔsane mli, ni amɛsane lɛ ja. Kadimɔ wiemɔi ni jɛ adafitswaa woji amli nɛɛ:

“Ta ni yɔɔ gbeyei ni fɛ yɛ Europa lɛ eha gbalɛ ko ni ekaaa eba mli. Aaafee afii nyɔŋmai enyɔ kɛ enumɔ ni eho nɛ, ni ‘Majimaji Ateŋ Biblia Kaselɔi’ ni ale amɛ jogbaŋŋ akɛ ‘Millennial Dawners’ lɛ etsɔ shiɛlɔi kɛ adafitswaa woji anɔ amɛjaje amɛtsɔɔ je lɛ akɛ Mlifu Gbi ni agba afɔ shi yɛ Biblia lɛ mli lɛ baaba yɛ 1914. ‘Nyɛkwɛa 1914 jogbaŋŋ ei!’ efee sanekpakpa jajelɔi gbɛfalɔi ohai abɔ lɛ abolɔmɔ.”—The World, New York adafitswaa wolo ko, August 30, 1914.

[Shishigbɛ niŋmaa]

[Akrabatsa ni yɔɔ baafa 106]

1914​—Tsakemɔ Be

Wolo Politikens Verdenshistorie—Historiens Magt og Mening (Politiken’s World History—The Power and Meaning of History), ni aŋma yɛ 1987 yɛ Copenhagen lɛ wie nɔ ni aŋma nɛɛ yɛ ebaafa 40:

“Afii ohai 19 lɛ mli hemɔkɛyeli ni yaa nɔ fiofio lɛ fite kwraa yɛ 1914. Yɛ afi ni tsɔ afi ni kɛ ta lɛ ba lɛ hiɛ lɛ mli lɛ, Danish yinɔsaneŋmalɔ kɛ maŋkwralɔ Peter Munch ŋma kɛ jwɛŋmɔ kpakpa akɛ: ‘Odaseyelii lɛ fɛɛ tsɔɔ akɛ ta nyɛŋ aba Europa hewalɛi wuji lɛ ateŋ. “Ta he oshara” lɛ hu baalaaje yɛ wɔsɛɛ be mli, taakɛ eba mli shii abɔ kɛjɛ 1871 kɛbaa nɛɛ.’

“Nɔ ni tamɔɔɔ nakai lɛ, wɔkaneɔ yɛ wolo ko ni eŋma nibii ni ekaiɔ lɛ yɛ mli yɛ sɛɛ mli lɛ akɛ: ‘Ta ni fɛ yɛ 1914 lɛ ji tsakemɔ kpele diɛŋtsɛ yɛ adesai ayinɔsane mli. Wɔjɛ bei ni shweremɔ yɔɔ mli, he ni abaanyɛ adi nitsumɔi asɛɛ kɛ hiɛshikamɔ yɛ shweshweeshwe mli lɛ mli ni wɔyabote oshara yinɔ mli, gbeyeishemɔ kɛ nyɛɛ, ni shweshweeshwe bɛ he ko he ko shihilɛ ko mli. Mɔ ko mɔ ko nyɛɛɛ awie, ni ŋmɛnɛ po mɔ ko mɔ ko nyɛŋ awie kɛji akɛ duŋ ni nina wɔ yɛ nakai be lɛ mli lɛ baatsɔ gbɛjianɔtoo muu lɛ fɛɛ ni adesa eto eha ehe yɛ afii akpei abɔ lɛ amli lɛ hiɛkpatamɔ.’”

[Mfoniri ni yɔɔ baafa 110]

‘Ni atsi gɔŋ fɛɛ gɔŋ kɛjɛ egbɛhe’

[Mfoniri ni yɔɔ baafa 111]

Amɛtee amɛhe yɛ tɛsai amli

Yitso 19

Nyɔŋmɔ Israel lɛ Naasɔomɔ

Ninaa 4​—Kpojiemɔ 7:1-17

Saneyitso: Asɔo 144,000 lɛ naa ni ana ni asafo babaoo ko damɔ Yehowa maŋtsɛsɛi lɛ kɛ Toobi lɛ hiɛ

Emlibaa be: Kɛjɛ be mli ni akɛ Kristo Yesu ta maŋtsɛsɛi nɔ yɛ 1914 kɛyashi Afii Akpe Maŋtsɛyeli be lɛ mli

 1. “Namɔ aaanyɛ shi adamɔ” yɛ ŋwɛi mlifu gbi wulu lɛ nɔ?

“NAMƆ aaanyɛ shi adamɔ?” (Kpojiemɔ 6:17) Hɛɛ, namɔ lɛlɛŋ? Kɛ nakai ŋwɛi mlifu gbi kpeteŋkpele lɛ kpata Satan gbɛjianɔtoo lɛ hiɛ lɛ, nɔyelɔi kɛ gbɔmɛi ni yɔɔ je lɛŋ lɛ baanyɛ abi nakai sane lɛ. Kɛha amɛ lɛ ebaafee tamɔ nɔ ni hiɛkpatamɔ ni baa lɛ baagbe adesa wala fɛɛ wala. Shi ani ebaafee nakai? Yɛ miishɛɛ mli lɛ, Nyɔŋmɔ gbalɔ lɛ maa nɔ mi kɛhaa wɔ: “Mɔ fɛɛ mɔ ni aaatsɛ Yehowa gbɛi anɔ lɛ, aaahere eyiwala.” (Yoel 3:5) Bɔfo Petro kɛ Paulo ma nakai anɔkwa sane lɛ nɔ mi. (Bɔfoi lɛ Asaji 2:19-21; Romabii 10:13) Hɛɛ, mɛi ni tsɛɔ Yehowa gbɛi lɛ baaje mli. Namɛi ji mɛnɛɛmɛi? Wɔbaana yɛ be mli ni ninaa ni nyiɛ sɛɛ lɛ jeɔ kpo lɛ.

 2. Mɛni hewɔ eji nɔ ko ni yɔɔ naakpɛɛ ni ekaaa hu akɛ mɛi komɛi ayi aaana wala yɛ Yehowa kojomɔ gbi lɛ nɔ lɛ?

² Akɛ mɔ ko aaaje Yehowa kojomɔ gbi lɛ mli shweshweeshwe lɛ yɛ naakpɛɛ diɛŋtsɛ kɛ nɔ ni ekaaa fɛɛ, ejaakɛ Nyɔŋmɔ gbalɔi lɛ ateŋ mɔ kome kɛ nɛkɛ wiemɔi nɛɛ tsɔɔ mli: “Naa, Yehowa laasuogbele ni ji emlifu lɛ je kpo, laasuogbele ni tsɔmɔɔ ni, ni eebɔle mɛi fɔji ayitsei ahe. Yehowa mlifu ni naa wa lɛ kpaleŋ kɛyashi beyinɔ ni eeefee egbe naa ni eeeha etsui mli yiŋtoi lɛ aba mli.” (Yeremia 30:23, 24) Ehe miihia ni wɔto gbɛjianɔ koni wɔnyɛ wɔdamɔ nakai laasuogbele lɛ naa!—Abɛi 2:22; Yesaia 55:6, 7; Zefania 2:2, 3.

Kɔɔyɔi Ejwɛ Lɛ

 3. (a) Mɛɛ sɔɔmɔ krɛdɛɛ ko ni ŋwɛibɔfoi kɛhaa Yohane na? (b) “Kɔɔyɔi ejwɛ” lɛ damɔ shi kɛha mɛni?

³ Dani Yehowa aaaŋmɛɛ emlifu lɛ he lɛ, ŋwɛibɔfoi tsuɔ nitsumɔ krɛdɛɛ ko. Yohane na enɛ yɛ eninaa lɛ mli: “Nii nɛɛ asɛɛ lɛ mina ŋwɛibɔfoi ejwɛ damɔ shikpɔŋ koji ejwɛ lɛ nɔ, ni amɛhiɛ shikpɔŋ lɛ nɔ kɔɔyɔi ejwɛ lɛ mli, koni kɔɔyɔɔ ko akatswa yɛ shikpɔŋ lɛ nɔ loo ŋshɔ nɔ loo tso ko nɔ.” (Kpojiemɔ 7:1) Mɛni enɛ tsɔɔ kɛhaa wɔ ŋmɛnɛ? Nɛkɛ “kɔɔyɔi ejwɛ” nɛɛ ji hiɛkpatamɔ kojomɔ ni aahe aŋmɛɛ he ashwie gbɔmɛi yiwalɔi ni yɔɔ shikpɔŋ nɔ lɛ anɔ, kɛ adesai mlakwalɔi ni efee hoo tamɔ “ŋshɔ,” kɛ nɔyelɔi ni kwɔlɔ gojogojoo tamɔ tsei ni naa sɛɛfimɔ kɛ nii kɛjɛɔ shikpɔŋ nɔ gbɔmɛi lɛ aŋɔɔ lɛ he okadi ni mli ka shi faŋŋ.—Yesaia 57:20; Lala 37:35, 36.

 4. (a) Ŋwɛibɔfoi ejwɛ lɛ damɔ shi kɛha mɛni? (b) Kɛ aŋmɛɛ kɔɔyɔi ejwɛ lɛ ahe lɛ, mɛni baaba Satan shikpɔŋ nɔ gbɛjianɔtoo lɛ nɔ?

⁴ Ŋwanejee ko bɛ he akɛ nɛkɛ ŋwɛibɔfoi ejwɛ nɛɛ damɔ shi kɛha ŋwɛibɔfoi akui ejwɛ, ni Yehowa kɛ amɛ tsuɔ nii koni amɛtsi hiɛkpatamɔ kojomɔ lɛ naa kɛyashi be ni ato lɛ baashɛ lɛ. Kɛ nakai ŋwɛibɔfoi lɛ ŋmɛɛ nakai ŋwɛi mlifu kɔɔyɔi lɛ ahe koni ebɔle shi amrɔ nɔŋŋ kɛjɛ kooyigbɛ, wuoyigbɛ, bokagbɛ kɛ anaigbɛ lɛ, nakai hiɛkpatamɔ lɛ baada kpeteŋkpele. Ebaatamɔ bɔ ni Yehowa kɛ kɔɔyɔi ejwɛ lɛ tsu nii ni ekɛgbɛ blema Elambii lɛ eshwa, ni ekumɔ amɛ ni ekpata amɛhiɛ lɛ, shi yɛ enɛ gbɛfaŋ lɛ yɛ gbɛ ni da nɔ. (Yeremia 49:36-38) Ebaafee laasuogbele kpeteŋkpele ni fiteɔ nii babaoo fe “ahum” ni Yehowa kɛkpata Amon maŋ lɛ hiɛ lɛ. (Amos 1:13-15) Satan shikpɔŋ nɔ gbɛjianɔtoo ko bɛ ni baanyɛ adamɔ shi yɛ Yehowa mlifu gbi lɛ nɔ, beni efaa jeŋ muu fɛɛ maŋtsɛ ni eji lɛ he kɛhaa naanɔi fɛɛ ni baaba lɛ.—Lala 83:16, 19; Yesaia 29:5, 6.

 5. Yɛ mɛɛ gbɛ nɔ Yeremia gbalɛ lɛ yeɔ ebuaa wɔ ni wɔnuɔ shishi akɛ Nyɔŋmɔ kojomɔi lɛ baaba shikpɔŋ muu lɛ fɛɛ nɔ?

⁵ Ani wɔyɛ nɔmimaa akɛ Nyɔŋmɔ kojomɔi lɛ baakpata shikpɔŋ muu lɛ fɛɛ hiɛ? Agbɛnɛ bo egbalɔ Yeremia hu toi: “Naa, efɔŋ aaajɛ jeŋmaŋ nɔ aya jeŋmaŋ nɔ, ni ahum kpeteŋkpele aaate shi kɛaajɛ shikpɔŋ lɛ naagbee he tɔɔ; ni mɛi ni Yehowa aaagbe yɛ nakai gbi lɛ nɔ lɛ aaakamɔ shi kɛaajɛ shikpɔŋ lɛ naagbee he kome kɛaatee shikpɔŋ lɛ naagbee he kroko lɛ.” (Yeremia 25:32, 33) Nɛkɛ ahum kpeteŋkpele nɛɛ mli ni duŋ kpii baaha shikpɔŋ muu lɛ fɛɛ nɔ. Abaahoso emli nɔyelɔi lɛ koni amɛlaaje kwraa. (Kpojiemɔ 6:12-14) Shi wɔsɛɛ be efeŋ ediŋ kɛhaŋ mɔ fɛɛ mɔ. Belɛ namɛi ahewɔ ni atsi kɔɔyɔi ejwɛ lɛ naa lɛ?

Nyɔŋmɔ Tsuji lɛ Anaasɔomɔ

 6. Namɔ kɛɔ ŋwɛibɔfoi lɛ akɛ amɛtsi kɔɔyɔi ejwɛ lɛ anaa lɛ, no hewɔ lɛ enɛ ŋmɛɔ gbɛ kɛha mɛni feemɔ?

⁶ Yohane tee nɔ etsɔɔ bɔ ni abaakadi mɛi komɛi aha yiwalaheremɔ lɛ mli, akɛ: “Ni mina bɔfo kroko miikwɔ kɛmiijɛ hulu shitee he kɛmiiba, ni ehiɛ Nyɔŋmɔ hiɛkalɔ lɛ naasɔomɔ nɔ; ni ebolɔ kɛ gbee waa ekɛɛ bɔfoi ejwɛ lɛ ni aha amɛ hegbɛ akɛ amɛfee shikpɔŋ lɛ kɛ ŋshɔ lɛ efɔŋ lɛ akɛ: Nyɛkafea shikpɔŋ lɛ loo ŋshɔ lɛ loo tsei lɛ efɔŋ ko kɛyaashi beyinɔ ni wɔkɛ naasɔomɔ nɔ aaakadi wɔ-Nyɔŋmɔ lɛ tsuji lɛ ahiɛŋtsei anɔ da.”—Kpojiemɔ 7:2, 3.

 7. Namɔ diɛŋtsɛ ji ŋwɛibɔfo ni ji enumɔ lɛ, ni mɛɛ odaseyeli yeɔ ebuaa wɔ ni wɔnaa akɛ nakai eji?

⁷ Eyɛ mli akɛ atsiii nɛkɛ bɔfo ni ji enumɔ nɛɛ gbɛi ata moŋ, shi odaseyelii lɛ fɛɛ tsɔɔ akɛ ebaafee Nuŋtsɔ Yesu ni awo ehiɛ nyam lɛ. Akɛni Yesu ji Bofɔnukpa hewɔ lɛ, anaa yɛ biɛ akɛ eyɛ hewalɛ yɛ ŋwɛibɔfoi krokomɛi lɛ anɔ. (1 Tesalonikabii 4:16; Yuda 9) Ebaa kɛjɛɔ bokagbɛ, tamɔ “maŋtsɛmɛi ni jɛ hulu shitee he lɛ”—Yehowa kɛ e-Kristo lɛ—ni kɛ hiɛkpatamɔ kojomɔ baa, taakɛ maŋtsɛmɛi ni ji Dario kɛ Koresh fee yɛ be mli ni amɛba blema Babilon shi lɛ. (Kpojiemɔ 16:12; Yesaia 45:1; Yeremia 51:11; Daniel 5:31) Nɛkɛ bɔfo nɛɛ hu tamɔ Yesu ejaakɛ akɛ Kristofoi ni afɔ amɛ mu lɛ anaasɔomɔ ewo edɛŋ. (Efesobii 1:13, 14) Kɛfata he lɛ, kɛ aŋmɛɛ kɔɔyɔi lɛ ahe lɛ, Yesu ji mɔ ni nyiɛ ŋwɛi tabilɔi lɛ ahiɛ ni amɛtsuɔ fɔbuu kojomɔ he nii yɛ jeŋmaji lɛ anɔ. (Kpojiemɔ 19:11-16) Yɛ sane naatsɔɔmɔ ni ja naa lɛ, belɛ Yesu ji mɔ ni baafa akɛ Satan shikpɔŋ nɔ gbɛjianɔtoo lɛ hiɛkpatamɔ lɛ amɛ kɛyashi be mli ni aaasɔo Nyɔŋmɔ tsuji lɛ anaa da.

 8. Mɛni ji naasɔomɔ lɛ, ni mɛɛ be mli ejeɔ shishi?

⁸ Mɛni ji nɛkɛ naasɔomɔ nɛɛ, ni namɛi ji nɛkɛ Nyɔŋmɔ tsuji nɛɛ? Naasɔomɔ lɛ je shishi yɛ Pentekoste afi 33 Ŋ.B., beni akɛ mumɔ krɔŋkrɔŋ lɛ fɔ klɛŋklɛŋ Yudafoi Kristofoi lɛ amu lɛ. Yɛ sɛɛ mli lɛ, Nyɔŋmɔ je shishi etsɛ “gbɔmɛi ni jɛ jeŋmaji lɛ ateŋ” lɛ hu ni efɔ amɛ mu. (Romabii 3:29; Bɔfoi lɛ Asaji 2:1-4, 14, 32, 33; 15:14) Bɔfo Paulo ŋma yɛ Kristofoi ni afɔ amɛ mu lɛ ahe akɛ amɛyɛ nɔmimaa akɛ “amɛji Kristo nii” ni ekɛfata he akɛ Nyɔŋmɔ “esɔo wɔnaa ni eha wɔ nɔ ni baaba lɛ he okadi, ni ji, mumɔ, ni yɔɔ wɔtsuii amli lɛ.” (2 Korintobii 1:21, 22, New World Translation; okɛto Kpojiemɔ 14:1 he.) No hewɔ lɛ, kɛ aŋɔ nɛkɛ tsuji nɛɛ akɛ Nyɔŋmɔ mumɔŋ bii lɛ, amɛnine shɛɔ amɛ ŋwɛi gboshiniyeli lɛ he okadi ko nɔ kɛtsɔɔ hiɛ—naasɔomɔ nɔ, aloo shiwoo. (2 Korintobii 5:1, 5; Efesobii 1:10, 11) Amɛbaanyɛ amɛkɛɛ akɛ: “Mumɔ lɛ diɛŋtsɛ kɛ wɔmumɔ lɛ yeɔ odase akɛ Nyɔŋmɔ bii ji wɔ. Ni kɛ bii ji wɔ lɛ, belɛ niyelɔi hu ji wɔ: Nyɔŋmɔ niyelɔi diɛŋtsɛ, shi Kristo hefatalɔi niyelɔi, shi ja wɔkɛ lɛ fɛɛ ena amanehulu koni awo wɔkɛ lɛ fɛɛ hiɛ nyam hu.”—Romabii 8:15-17, New World Translation.

 9. (a) Mɛɛ tsuishiŋmɛɛ ataoɔ yɛ Nyɔŋmɔ mumɔŋ bii ni akɛ mumɔ efɔ amɛ ni amɛshwɛ lɛ agbɛfaŋ? (b) Mɛi ni afɔ amɛ mu lɛ ni akaa amɛ lɛ baaya nɔ kɛyashi mɛɛ be?

⁹ “Shi ja wɔkɛ lɛ fɛɛ ena amanehulu”—mɛni no tsɔɔ? Bɔni afee ni amɛnine ashɛ wala akekere lɛ nɔ lɛ, esa akɛ Kristofoi ni afɔ amɛ mu lɛ aŋmɛ amɛtsui shi, amɛye anɔkwale kɛyashi gbele mli. (Kpojiemɔ 2:10) Ejeee ‘bei abɔ ni ahere oyiwala lɛ, belɛ ahere oyiwala yɛ be fɛɛ mli’ he sane ko ni. (Mateo 10:22; Luka 13:24) Shi moŋ, awoɔ amɛ ŋaa akɛ: “Nyɛbɔa mɔdɛŋ ni nyɛwajea nyɛtsɛmɔ kɛ halamɔ lɛ.” Taakɛ bɔfo Paulo fee lɛ, yɛ naagbee lɛ esa akɛ amɛnyɛ amɛkɛɛ akɛ: “Ta kpakpa lɛ, miwuu; foidamɔ lɛ, mida migbe naa; hemɔkɛyeli lɛ, mihiɛ mli tswɛ.” (2 Petro 1:10, 11; 2 Timoteo 4:7, 8) No hewɔ lɛ esa akɛ Nyɔŋmɔ bii ni eshwɛ ni akɛ mumɔ efɔ amɛ lɛ akaa kɛ nɔsɔŋmɔ lɛ aya nɔ yɛ shikpɔŋ nɛɛ nɔ kɛyashi be mli ni Yesu kɛ ŋwɛibɔfoi ni fata ehe lɛ kɛ naasɔomɔ nɔ lɛ ‘aaakpɛtɛ’ mɛnɛɛmɛi fɛɛ ‘ahiɛnaai,’ koni no aha ayoo amɛ akɛ “wɔ-Nyɔŋmɔ lɛ tsuji” anɔkwafoi ni aka amɛ akwɛ kwraa ni anyɛŋ atsake. No hewɔ lɛ nakai naasɔomɔ nɔ lɛ batsɔɔ naanɔ kadimɔ nɔ. Eka shi faŋŋ akɛ, kɛ aŋmɛɛ haomɔ kɔɔyɔi ejwɛ lɛ ahe lɛ, no mli lɛ asɔo mumɔŋ Israel fɛɛ naa agbe naa, eyɛ mli akɛ ekolɛ amɛteŋ mɛi fioo ko baahi wala mli yɛ heloo mli lolo. (Mateo 24:13; Kpojiemɔ 19:7) No mli lɛ amɛ yibɔ lɛ fɛɛ eshɛ!—Romabii 11:25, 26.

Mɛi Enyiɛ Asɔo Amɛnaa?

10. (a) Mɛɛ ŋmalɛi tsɔɔ akɛ aje husu awo mɛi ni asɔo amɛnaa lɛ ayibɔ lɛ he? (b) Mɛi enyiɛ asɔo amɛnaa lɛ, ni te ato amɛ naa aha tɛŋŋ?

¹⁰ Yesu kɛɛ mɛi ni abaasɔo amɛnaa lɛ akɛ: “Kaashe gbeyei, asafo kuu bibioo; ejaakɛ nyɛ-Tsɛ lɛ yɛ he tsuijurɔ akɛ eeeŋɔ maŋtsɛyeli lɛ eha nyɛ.” (Luka 12:32) Ŋmalɛi krokomɛi tamɔ Kpojiemɔ 6:11 kɛ Romabii 11:25 tsɔɔ akɛ nakai asafo kuu bibioo lɛ ayifalɛ lɛ ji nɔ ni aje husu awo he lɛlɛŋ, ni yɛ anɔkwale mli lɛ, atsɔ hiɛ ana yibɔ lɛ ato. Yohane wiemɔi ni nyiɛ sɛɛ lɛ maa enɛ nɔ mi: “Ni minu mɛi ni akɛ naasɔomɔ nɔ lɛ ekadi lɛ ayibɔ: mɛi akpei oha kɛ nyɔŋmai ejwɛ kɛ ejwɛ ni akɛ naasɔomɔ nɔ ekadi amɛ kɛjɛ Israelbii lɛ akutso fɛɛ akutso mli: Yuda akutso lɛ mli lɛ, akɛ naasɔomɔ nɔ lɛ kadi mɛi akpei nyɔŋma-kɛ-enyɔ; Ruben akutso lɛ mli lɛ mɛi akpei nyɔŋma-kɛ-enyɔ, Gad akutso lɛ mli lɛ mɛi akpei nyɔŋma-kɛ-enyɔ, Asher akutso lɛ mli lɛ mɛi akpei nyɔŋma-kɛ-enyɔ, Naftali akutso lɛ mli lɛ mɛi akpei nyɔŋma-kɛ-enyɔ, Manase akutso lɛ mli lɛ mɛi akpei nyɔŋma-kɛ-enyɔ, Simeon akutso lɛ mli lɛ mɛi akpei nyɔŋma-kɛ-enyɔ, Levi akutso lɛ mli lɛ mɛi akpei nyɔŋma-kɛ-enyɔ, Isakar akutso lɛ mli lɛ mɛi akpei nyɔŋma-kɛ-enyɔ, Zebulun akutso lɛ mli lɛ mɛi akpei nyɔŋma-kɛ-enyɔ, Yosef akutso lɛ mli lɛ mɛi akpei nyɔŋma-kɛ-enyɔ, Benyamin akutso lɛ mli lɛ mɛi akpei nyɔŋma-kɛ-enyɔ.”—Kpojiemɔ 7:4-8.

11. (a) Mɛni hewɔ akutsei 12 lɛ ni awieɔ amɛhe lɛ kɔɔɔ heloo naa Israel diɛŋtsɛ he lɛ? (b) Mɛni hewɔ Kpojiemɔ tsiɔ akutsei 12 ta lɛ? (d) Mɛni hewɔ odehei loo osɔfoi aweku kome ko bɛ Nyɔŋmɔ Israel mli lɛ?

¹¹ Ani jeee heloo naa Israel diɛŋtsɛ he awieɔ nɛɛ? Dabi, ejaakɛ Kpojiemɔ 7:4-8 tsi ehe kɛjɛ bɔ ni ato wekui lɛ anaa kɛjɛ shishijee lɛ he. (4 Mose 1:17, 47) Eka shi faŋŋ akɛ, bɔ ni ato naa yɛ biɛ lɛ jeee koni akɛyoo heloo naa Yudafoi lɛ kɛtsɔ amɛ akutsei anaa, shi moŋ koni akɛtsɔɔ bɔ ni ato mumɔŋ Israel naa aloo ehe gbɛjianɔ aha. Enɛ ŋmɛɔ pɛpɛɛpɛ. Maŋ hee nɛɛ mli bii baafee 144,000 pɛpɛɛpɛ—12,000 kɛmiijɛ akutsei 12 lɛ eko fɛɛ eko mli. Nyɔŋmɔ Israel nɛɛ mli akutso ko bɛ ni lɛ pɛ eji odehe ni yeɔ maŋtsɛ loo osɔfo. Maŋ muu lɛ fɛɛ baaye nɔ akɛ maŋtsɛmɛi, ni maŋ muu lɛ fɛɛ baasɔmɔ akɛ osɔfoi.—Galatabii 6:16; Kpojiemɔ 20:4, 6.

12. Mɛni hewɔ esa akɛ onukpai 24 lɛ aaala Kpojiemɔ 5:9, 10 mli wiemɔi lɛ yɛ Toobi lɛ hiɛ lɛ?

¹² Eyɛ mli akɛ akɛ klɛŋklɛŋ hegbɛ ha heloo naa Yudafoi kɛ mɛi ni amɛtsɔmɔ amɛhe Yudafoi lɛ koni ahala amɛ akɛ mumɔŋ Israelbii moŋ, shi nakai maŋ lɛ mli mɛi fioo ko pɛ kpɛlɛ nɔ. No hewɔ lɛ Yehowa kpa ninefɔɔ lɛ mli eha Jeŋmajiaŋbii lɛ. (Yohane 1:10-13; Bɔfoi lɛ Asaji 2:4, 7-11; Romabii 11:7) Taakɛ eji yɛ Efesobii ni tsutsu lɛ amɛji “mɛi kpɔji yɛ Israel maŋ gbɛnaa nii agbɛfaŋ” lɛ, agbɛnɛ abaanyɛ akɛ Nyɔŋmɔ mumɔ lɛ asɔo mɛi ni jeee Yudafoi lɛ anaa ni amɛbatsɔmɔ Kristofoi ni afɔ amɛ mu lɛ asafo lɛ fa. (Efesobii 2:11-13; 3:5, 6; Bɔfoi lɛ Asaji 15:14) No hewɔ lɛ esa jogbaŋŋ akɛ onukpai 24 lɛ aaala yɛ Toobi lɛ hiɛ akɛ: “Okɛ ola lɛ ekpɔ̃ wɔ oha Nyɔŋmɔ kɛjɛ akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ kɛ jeŋmaŋ fɛɛ jeŋmaŋ mli, ni oŋɔ wɔ ofee maŋtsɛmɛi kɛ osɔfoi oha wɔ-Nyɔŋmɔ lɛ, ni wɔɔye maŋtsɛ yɛ shikpɔŋ lɛ nɔ.”—Kpojiemɔ 5:9, 10.

13. Mɛni hewɔ Yesu nyɛ bi Yakobo baanyɛ aŋma ewolo lɛ eyaha “akutsei nyɔŋma-kɛ-enyɔ ni egbɛ eshwa lɛ” yɛ gbɛ ni ja nɔ lɛ?

¹³ Kristofoi asafo lɛ ji “weku ni ahala . . . maŋtsɛmɛi ni yeɔ osɔfoi, jeŋmaŋ krɔŋkrɔŋ.” (1 Petro 2:9) Akɛni akɛ amɛ miito heloo naa Israel najiaŋ akɛ Nyɔŋmɔ maŋ hewɔ lɛ, ebafeɔ Israel hee ni ji “ ‘Israel’ diɛŋtsɛ.” (Romabii 9:6-8; Mateo 21:43)a Yɛ enɛ hewɔ lɛ, eja gbɛ kwraa akɛ Yesu nyɛ bi Yakobo aaaŋma egbɛtsɔɔmɔ wolo ni jɛ mumɔŋ lɛ “ayaha akutsei nyɔŋma-kɛ-enyɔ ni egbɛ eshwa lɛ,” ni ji akɛ eŋma eha Kristofoi ni afɔ amɛ mu lɛ asafoi ni yɔɔ jeŋ fɛɛ ni yɛ be ni sa mli lɛ amɛyibɔ aaafee 144,000 lɛ.—Yakobo 1:1.

Nyɔŋmɔ Israel ni Yɔɔ Ŋmɛnɛ

14. Mɛni tsɔɔ akɛ Yehowa Odasefoi etee nɔ amɛkɛ amɛhe ekpɛtɛ mɛi ni feɔ mumɔŋ Israel lɛ ayibɔ ni ji 144,000 lɛ he akɛ nakai eji diɛŋtsɛ?

¹⁴ Nɔ ni yɔɔ miishɛɛ lɛ, Charles T. Russell yɔse akɛ 144,000 lɛ ji yibɔ diɛŋtsɛ ni ji aŋkroaŋkroi ni feɔ mumɔŋ Israel. Yɛ ewolo The New Creation, Kpo VI ni jɛ ewolo ni ji Studies in the Scriptures, ni aŋma yɛ 1904 lɛ mli lɛ, eŋma akɛ: “Wɔyɛ nɔmimaa fɛɛ ni wɔkɛaahe wɔye akɛ mɛi ni ahala [ni ji mɛi ni ahala amɛ ni afɔ amɛ mu lɛ] ayibɔ diɛŋtsɛ ji nɔ ni atsiɔ ta shii abɔ yɛ Kpojiemɔ lɛ (7:4; 14:1); ni ji, 144,000 ‘ni akpɔ̃ amɛ kɛjɛ gbɔmɛi ateŋ lɛ.’” Awie hu yɛ wolo Light, Book One, ni Biblia Kaselɔi lɛ ŋma yɛ 1930 lɛ mli akɛ: “Kristo gbɔmɔtso lɛ mli bii ni ji 144,000 lɛ ni ana amɛ yɛ henaabuamɔ lɛ mli lɛ tsɔɔ akɛ ahala amɛ ni afɔ amɛ mu, aloo asɔo amɛnaa.” Yehowa Odasefoi etee nɔ amɛkɛ amɛhe ekpɛtɛ nakai jwɛŋmɔ lɛ he akɛ Kristofoi ni afɔ amɛ mu ni amɛyibɔ ji 144,000 diɛŋtsɛ feɔ mumɔŋ Israel.

15. Dani Nuŋtsɔ lɛ gbi lɛ aaaje shishi lɛ, mɛni Biblia kaselɔi ni kɛ hiɛdɔɔ kaseɔ nii lɛ susu akɛ heloo naa Yudafoi lɛ baana mli ŋɔɔmɔ yɛ be mli ni Jeŋmaji Abe lɛ ba naagbee lɛ?

¹⁵ Ni kɛlɛ, ani duromɔ krɛdɛɛ ko esaaa heloo naa Israel ŋmɛnɛ? Yɛ be ni tsɔ Nuŋtsɔ lɛ gbi lɛ hiɛ, yɛ be mli ni Biblia kaselɔi anɔkwafoi lɛ miikpa shishijee anɔkwalei ni yɔɔ Nyɔŋmɔ Wiemɔ lɛ mli lɛ ashi lɛ, asusu akɛ, kɛ Jeŋmaji Abe lɛ ba naagbee lɛ, Yudafoi lɛ baana shidaamɔ ni duromɔ yɔɔ mli ekoŋŋ yɛ Nyɔŋmɔ hiɛ. No hewɔ lɛ C. T. Russell wolo ni ji The Time Is at Hand (ni ji Studies in the Scriptures lɛ Kpo II) ni eŋma yɛ 1889 lɛ kɛ Yeremia 31:29-34 to heloo naa Yudafoi lɛ ahe ni ekɛɛ: “Je lɛ yeɔ anɔkwale ni eji akɛ Israel toigbalamɔ yɛ Jeŋmaji lɛ anɔyeli shishi lɛ etee nɔ aahu kɛjɛ B.C. [607], ni akɛ eeya nɔ lolo, ni akɛ yiŋtoo ko bɛ ni aaadamɔ nɔ akpa gbɛ akɛ amɛmaŋ gbɛjianɔtoo lɛ baaba mra fe A.D. 1914, ni ji be ni amɛ ‘bei kpawo’—afii 2520 lɛ baashɛ lɛ he odase.” Etamɔ nɔ ni belɛ abaaku sɛɛ ato Yudafoi lɛ akɛ maŋ ama shi ekoŋŋ, ni nɛkɛ gbɛkpamɔ nɛɛ mli bafee faŋŋ yɛ 1917, yɛ be mli ni Balfour Declaration lɛ kɛ shiwoo akɛ Ŋleshi baafi Palestina ni aaafee lɛ Yudafoi lɛ amaŋ lɛ sɛɛ lɛ ha lɛ.

16. Mɛɛ mɔdɛŋ Yehowa Odasefoi bɔ koni amɛkɛ Kristofoi asane lɛ ayaha heloo naa Yudafoi lɛ, ni mɛni jɛ mli ba?

¹⁶ Yɛ klɛŋklɛŋ jeŋ ta lɛ sɛɛ lɛ, Palestina bafee shikpɔŋkuku ni akɛ enɔkwɛmɔ ewo Great Britain dɛŋ, ni gbɛ bagbele koni Yudafoi babaoo aku amɛsɛɛ amɛya nakai shikpɔŋ lɛ nɔ. Ato Israel maŋkwramɔŋ Maŋ lɛ ama shi yɛ 1948. Ani enɛ etsɔɔɔ akɛ belɛ ŋwɛi jɔɔmɔi miihe aba Yudafoi lɛ anɔ? Yehowa Odasefoi he amɛye afii babaoo akɛ nakai eji. No hewɔ lɛ, yɛ 1925 mli lɛ, amɛŋma wolo ko ni hiɛ baafai 128, ni ji Comfort for the Jews lɛ amɛha. Yɛ 1929 mli lɛ, amɛjie wolo fɛfɛo ko ni hiɛ baafai 360 ni egbɛi ji Life lɛ kpo, kɛ yiŋtoo akɛ Yudafoi lɛ baasumɔ nɛkɛ wolo nɛɛ, ni enɛ hu wieɔ Biblia mli wolo ni ji Hiob he. Abɔ mɔdɛŋ waa, titri lɛ yɛ New York Maŋtiase lɛ mli, koni Yudafoi lɛ anine ashɛ nɛkɛ Mesia lɛ he sane nɛɛ nɔ. Yɛ miishɛɛ mli lɛ, aŋkroaŋkroi fioo ko kpɛlɛ nɔ, shi Yudafoi lɛ ateŋ mɛi ni fa, taakɛ amɛblematsɛmɛi ni hi shi yɛ klɛŋklɛŋ afii oha lɛ mli lɛ ji lɛ, kpoo odaseyeli ni kɔɔ ba ni Mesia lɛ eba lɛ he lɛ.

17, 18. Mɛni Nyɔŋmɔ tsuji ni yɔɔ shikpɔŋ lɛ nɔ lɛ banu shishi yɛ kpaŋmɔ hee lɛ kɛ Biblia mli gbalɛi ni kɔɔ nibii asaamɔ he lɛ he?

¹⁷ Eka shi faŋŋ akɛ Yudafoi, akɛ gbɔmɛi kɛ maŋ lɛ jeee Israel ni atsɔɔ mli yɛ Kpojiemɔ 7:4-8 loo Biblia mli gbalɛi krokomɛi ni kɔɔ Nuŋtsɔ lɛ gbi lɛ he lɛ. Akɛni amɛdiɔ blema saji asɛɛ hewɔ lɛ, Yudafoi lɛ tee nɔ amɛkpoo gbɛi krɔŋkrɔŋ lɛ tsɛmɔ. (Mateo 15:1-3, 7-9) Yɛ be mli ni ewieɔ Yeremia 31:31-34 he lɛ, wolo ni ji Jehovah ni Yehowa Odasefoi ŋma yɛ 1934 lɛ wie kɛ nɔmimaa akɛ: “Kpaŋmɔ hee lɛ kɛ heloo naa Israelbii aseshibii kɛ adesai fɛɛ bɛ nɔ ko feemɔ, shi . . . ekɔɔ mumɔŋ Israel pɛ he.” Biblia mli gbalɛi ni kɔɔ nibii asaamɔ he lɛ kɔɔɔ heloo naa Yudafoi lɛ loo maŋkwramɔŋ Israel he, ejaakɛ eji Jeŋmaji Ekomefeemɔ lɛ mli nyo kɛ je lɛ ni Yesu wie he yɛ Yohane 14:19, 30 kɛ 18:36 lɛ fa.

¹⁸ Beni shɛɔ 1931 lɛ, no mli lɛ Nyɔŋmɔ tsuji ni yɔɔ shikpɔŋ nɔ lɛ anine eshɛ gbɛi Yehowa Odasefoi lɛ nɔ kɛ miishɛɛ babaoo. Amɛbaanyɛ amɛjɛ amɛtsuiŋ fɛɛ amɛkpɛlɛ wiemɔi ni yɔɔ Lala 97:11 lɛ nɔ akɛ: “La baate shi aha jalɔ kɛ, kɛ miishɛɛ ha mɛi ni ja yɛ amɛtsuiaŋ lɛ.” Amɛnyɛ amɛyoo yɛ faŋŋ mli akɛ mumɔŋ Israel pɛ ji mɛi ni akɛ amɛ eba kpaŋmɔ hee lɛ mli. (Hebribii 9:15; 12:22, 24) Heloo naa Israel ni hereee tsɛmɔ nɛɛ nɔ lɛ bɛ gbɛfaŋnɔ yɛ mli, ni nakai nɔŋŋ adesai fɛɛ ji. Nɛkɛ shishinumɔ nɛɛ gba gbɛ koni ŋwɛi la ni kpɛɔ kaŋkaŋ, ni ekaaa yɛ teokrase yinɔsane be mli aba. Enɛ baajie bɔ ni Yehowa jieɔ emɔbɔnalɛ, emlihilɛ, kɛ anɔkwale lɛ kpo babaoo ehaa adesai fɛɛ ni bɛŋkɛɔ lɛ lɛ kpo. (2 Mose 34:6; Yakobo 4:8) Hɛɛ, kɛfata Nyɔŋmɔ Israel he lɛ, mɛi krokomɛi hu baana ŋwɛibɔfoi lɛ ni tsiɔ kɔɔyɔi ejwɛ lɛ ahiɛkpatamɔ naa lɛ he sɛɛ. Namɛi mɛnɛɛmɛi baanyɛ afee? Ani ooonyɛ ofee amɛteŋ mɔ kome? Ha wɔkwɛ agbɛnɛ.

[Shishigbɛ niŋmaa]

[Baafa muu mfoniri ni yɔɔ baafa 114]

[Mfonirii ni yɔɔ baafa 117]

Anɔkwale Nyɔŋmɔ Israel lɛ halamɔ tee nɔ kɛjɛ Pentekoste afi 33 Ŋ.B. gbi lɛ nɔ kɛbashi 1935, beni yɛ kpee ko ni Yehowa Odasefoi fee ni fee yinɔsane yɛ Washington, D.C. lɛ shishi lɛ, agbala jwɛŋmɔ kɛtee asafo babaoo ko ni yɔɔ shikpɔŋ nɔ wala he hiɛnɔkamɔ lɛ anaabuamɔ nɔ lɛ (Kpojiemɔ 7:9)

Yitso 20

Asafoi ni Amɛyi Fa Babaoo

 1. Yɛ be mli ni etsɔɔ 144,000 lɛ anaasɔomɔ lɛ mli lɛ, mɛɛ kuu kroko Yohane na?

YƐ BE mli ni etsɔɔ 144,000 lɛ naasɔomɔ lɛ mli lɛ, Yohane tee nɔ ebɔ Ŋmalɛ lɛ mli kpojiemɔi ni yɔɔ miishɛɛ fe fɛɛ lɛ ekome he amaniɛ. Kwɛ bɔ ni emli baafili lɛ kɛ miishɛɛ yɛ be mli ni ebɔɔ enɛ he amaniɛ lɛ, akɛ: “Nii nɛɛ asɛɛ lɛ mikwɛ, ni naa, asafo babaoo ni mɔ ko mɔ ko nyɛŋ akane ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔwiemɔi amli damɔ maŋtsɛsɛi lɛ hiɛ kɛ Toobi lɛ hiɛ, ni amɛwo atadei yɛji, ni amɛhiɛ blɛoi yɛ amɛdɛŋ.” (Kpojiemɔ 7:9) Hɛɛ, kɔɔyɔi ejwɛ lɛ ni ahiɛ mli lɛ ŋmɛɔ gbɛ koni ahere kuu kroko yiwala yɛ 144,000 mumɔŋ Israel mlibii lɛ asɛɛ: asafo babaoo ko ni wieɔ wiemɔi srɔtoi srɔtoi, ni jɛ majimaji anɔ.a—Kpojiemɔ 7:1.

 2. Te je lɛŋ bii ni wieɔ Biblia lɛ he lɛ etsɔɔ asafo babaoo lɛ mli amɛha tɛŋŋ, ni te Biblia Kaselɔi lɛ po susu nɛkɛ kuu nɛɛ he yɛ blema amɛha tɛŋŋ?

² Je lɛŋ bii ni wieɔ Biblia mli saji ahe lɛ etsɔɔ asafo babaoo nɛɛ shishi akɛ amɛji mɛi ni jeee Yudafoi yɛ heloo naa ni atsake amɛ kɛtee Kristojamɔ mli aloo amɛji Kristofoi la odasefoi ni miiya ŋwɛi. Biblia Kaselɔi ni hi shi yɛ tsutsu lɛ po bu amɛ akɛ amɛji ŋwɛi kuu ni ji enyɔ, taakɛ obaanyɛ ona yɛ 1886 mli yɛ Studies in the Scriptures, The Divine Plan of the Ages lɛ Kpo I lɛ mli lɛ: “Amɛlaajeɔ maŋtsɛsɛi lɛ he nyɔmɔwoo lɛ kɛ ŋwɛi akutso lɛ, shi yɛ naagbee lɛ, amɛnine baashɛ fɔmɔ akɛ mumɔŋ gbɔmɛi lɛ anɔ yɛ gbɛjianɔtoo ni baa shi fe ŋwɛi gbɔmɔtso lɛ nɔ lɛ nɔ. Eyɛ mli akɛ mɛnɛɛmɛi ejɔɔ amɛhe nɔ diɛŋtsɛ moŋ, shi je lɛŋ mumɔ lɛ yeɔ amɛnɔ aahu kɛyashiɔ he ni agbɛnɛ amɛkɛ amɛwala haaa yɛ afɔleshaa mli dɔŋŋ.” Ni yɛ sɛɛ mli be aaafee 1930 mli po lɛ, atsɔɔ jwɛŋmɔ nɛɛ yɛ Light, Book One lɛ mli akɛ: “Mɛi ni feɔ nɛkɛ asafo babaoo nɛɛ hereŋ tsɛmɔ akɛ amɛbafee Nuŋtsɔ lɛ odasefoi ni yɔɔ ekaa lɛ nɔ.” Atsɔɔ akɛ amɛji kuu ko ni buɔ amɛhe jalɔi ni akɛ amɛyɛ anɔkwale lɛ he nilee shi nɔ ko fioo ko pɛ amɛfeɔ yɛ eshiɛmɔ he. Amɛbaaya ŋwɛi akɛ kuu ni ji enyɔ ni amɛkɛ Kristo naŋ enɔyeli lɛ mli gbɛfaŋnɔ.

 3. (a) Mɛɛ hiɛnɔkamɔ akɛha mɛi komɛi ni tsui ja ni sɛɛ mli lɛ amɛbatsɔmɔ mɛi ni yɔɔ ekaa yɛ shiɛmɔ nitsumɔ lɛ mli lɛ? (b) Te The Watch Tower lɛ tsɔɔ gwantɛŋi lɛ kɛ abotiai lɛ he abɛbua lɛ mli yɛ 1923 mli eha tɛŋŋ?

³ Shi, Kristofoi ni afɔ amɛ mu lɛ ahefatalɔi komɛi yɛ ni sɛɛ mli lɛ amɛbafee mɛi ni yɔɔ ekaa waa yɛ shiɛmɔ nitsumɔ lɛ mli. Amɛbɛ hiɛnɔkamɔ ko akɛ amɛbaaya ŋwɛi. Yɛ anɔkwale mli lɛ, amɛ hiɛnɔkamɔ kɛ maŋshiɛmɔ ko ni Yehowa webii ha kɛjɛ 1918 kɛbashi 1922 lɛ kpaa gbee. Shishijee mli lɛ, no ji “Je lɛ Eba Naagbee—Akpekpei Abɔ ni Yɔɔ Wala Mli Bianɛ lɛ Gboiŋ Gbi ko Gbi Ko.”b Yɛ no sɛɛ nɔŋŋ lɛ, Watch Tower wolo tɛtrɛɛ ni aŋma yɛ October 15, 1923 mli lɛ tsɔɔ Yesu abɛbua ni kɔɔ gwantɛŋi kɛ abotiai lɛ ahe lɛ mli (Mateo 25:31-46), ni ejaje akɛ: “Gwantɛŋi lɛ damɔ shi kɛha gbɔmɛi ni jɛ jeŋmaji lɛ fɛɛ mli, jeee mɛi ni akɛ mumɔ efɔ amɛ, shi moŋ mɛi ni sumɔɔ jalɛnifeemɔ, mɛi ni jɛɔ amɛjwɛŋmɔ mli amɛkpɛlɛɔ Yesu Kristo nɔ akɛ Nuŋtsɔ lɛ kɛ mɛi ni miitao ni amɛhiɛ ka be kpakpai anɔ yɛ enɔyeli lɛ shishi.”

 4. Yɛ mɛɛ gbɛ nɔ la loo shishinumɔ ni kɔɔ shikpɔŋ nɔ kuu lɛ he lɛ mli bafee faŋŋ yɛ 1931? yɛ 1932? yɛ 1934?

⁴ Yɛ afii komɛi asɛɛ, yɛ 1931 lɛ, Vindication, Book One lɛ wie Ezekiel yitso 9 he, ni etsɔɔ akɛ mɛi ni akadi amɛ yɛ amɛhiɛnaai kɛha yibaamɔ yɛ je lɛ naagbee lɛ ji gwantɛŋi ni yɔɔ abɛbua ni yɔɔ yiteŋgbɛ nɛɛ mli lɛ. Vindication, Book Three lɛ ni ajie lɛ kpo yɛ 1932 lɛ tsɔɔ tsui ni ja su ni Yehonadab ni jeee Israelnyo lɛ ni kɛ ehe bɔ Israel Maŋtsɛ Yehu ni afɔ lɛ mu lɛ he yɛ eshwiili mli ni ekɛlɛ tee koni eyakwɛ ekaa ni Yehu yɔɔ yɛ apasa nyɔŋmɔ jalɔi ahiɛkpatamɔ mli lɛ yɔɔ lɛ. (2 Maŋtsɛmɛi 10:15-17) Wolo lɛ wie akɛ: “Yehonadab damɔ shi kɛha aloo efeɔ gbɔmɛi akuu ni yɔɔ shikpɔŋ nɔ bianɛ yɛ be mli ni Yehu nitsumɔ [ni ji Yehowa kojomɔi lɛ ajajemɔ] yaa nɔ nɛɛ mli, ni yɔɔ tsuijurɔ, ni kɛ Satan gbɛjianɔtoo lɛ kpaaa gbee, ni damɔɔ shi amɛhaa jalɛnifeemɔ, ni amɛji mɛi ni Nuŋtsɔ lɛ baabaa amɛyi yɛ Harmagedon be mli lɛ, ni ehere amɛyiwala kɛtsɔ nakai haomɔ be lɛ mli, ni eha amɛ naanɔ wala yɛ shikpɔŋ nɔ lɛ he mfoniri. Mɛnɛɛmɛi feɔ ‘gwantɛŋ’ kuu lɛ.” Yɛ afi 1934 mli lɛ, Buu-Mɔɔ lɛ fee lɛ faŋŋ akɛ esa akɛ nɛkɛ Kristofoi ni yɔɔ shikpɔŋ nɔ hiɛnɔkamɔ lɛ ajɔɔ amɛhe nɔ amɛha Yehowa ni abaptisi amɛ. La ni kɔɔ nɛkɛ shikpɔŋ nɔ kuu nɛɛ ahe lɛ miikpɛ kaŋkaŋ yɛ be fɛɛ mli.—Abɛi 4:18.

 5. (a) Ayɔse asafo babaoo lɛ yɛ 1935 akɛ amɛji namɛi? (b) Beni J. F. Rutherford bi kpeeyalɔi ni yɔɔ hiɛnɔkamɔ akɛ amɛbaahi shi kɛya naanɔ yɛ shikpɔŋ nɔ lɛ akɛ amɛte shi amɛdamɔ shi, yɛ 1935 mli lɛ, mɛni ba?

⁵ Shishinumɔ ni yɔɔ Kpojiemɔ 7:9-17 he lɛ miihe aje kpo faŋŋ yɛ ekpɛmɔ ni fe fɛɛ mli! (Lala 97:11) Buu-Mɔɔ wolo tɛtrɛɛ lɛ etsɔɔ shii abɔ akɛ hiɛnɔkamɔ yɛ akɛ kpee ni abaafee yɛ May 30 kɛyashi June 3, 1935 yɛ Washington, D.C., U.S.A. lɛ baafee “miishɛjemɔ kɛ sɛɛnamɔ diɛŋtsɛ” aha mɛi ni akɛ Yehonadab fee amɛhe mfoniri lɛ. Ni eba mli nakai hu! Yɛ wiemɔ ko ni kanyaa mɔ ni ji “Asafo Babaoo Lɛ” ni J. F. Rutherford ni nyiɛɔ shiɛmɔ nitsumɔ lɛ hiɛ yɛ nakai beaŋ lɛ kɛha mɛi aaafee 20,000 lɛ mli lɛ, ekɛ Ŋmalɛ naa odaseyeli ha akɛ ŋmɛnɛŋmɛnɛ beaŋ toi krokomɛi lɛ ji asafo babaoo ni yɔɔ Kpojiemɔ 7:9 lɛ. Yɛ ewiemɔ lɛ naagbee lɛ, wielɔ lɛ bi akɛ: “Nyɛfainɛ ani mɛi fɛɛ ni yɔɔ hiɛnɔkamɔ akɛ amɛbaahi shi kɛya naanɔ yɛ shikpɔŋ nɔ lɛ baanyɛ ate shi adamɔ shi lo?” Yɛ be mli ni toibolɔi lɛ ateŋ mɛi ni fa te shi amɛdamɔ shi lɛ, wielɔ lɛ jaje akɛ: “Naa! Asafo babaoo lɛ!” Dioofeemɔ ko ba, kɛkɛ ni nɔ ni nyiɛ sɛɛ ba ji dɛtswaa ni gbɛɛ waa diɛŋtsɛ. Kwɛ miishɛɛ ni Yohane kuu lɛ na—kɛ Yehonadab kuu lɛ hu! Yɛ gbi ni nyiɛ sɛɛ lɛ nɔ lɛ, abaptisi Odasefoi heei 840, ni mɛnɛɛmɛi ateŋ mɛi ni fa ji mɛi ni kɛɛ amɛjɛ nakai asafo babaoo lɛ ateŋ.

Mɛi ni Asafo Babaoo lɛ Ji lɛ Nɔmimaa

 6. (a) Mɛni hewɔ wɔbaanyɛ wɔnu shishi yɛ faŋŋ mli akɛ asafo babaoo lɛ ji ŋmɛnɛŋmɛnɛ beaŋ kuu ni ji Kristofoi ni amɛjɔɔ amɛhe nɔ ni yɔɔ hiɛnɔkamɔ akɛ amɛbaahi shi kɛya naanɔ yɛ shikpɔŋ nɔ lɛ? (b) Asafo babaoo lɛ atadei yɛji lɛ feɔ mɛni he mfoniri?

⁶ Te wɔɔfee tɛŋŋ wɔjaje kɛ nɔmimaa akɛ asafo babaoo lɛ ji ŋmɛnɛŋmɛnɛ beaŋ Kristofoi akuu ni amɛjɔɔ amɛhe nɔ ni yɔɔ hiɛnɔkamɔ akɛ amɛbaahi shi kɛya naanɔ yɛ Nyɔŋmɔ shikpɔŋ lɛ nɔ lɛ? Dani enɛ aaaba lɛ, Yohane etsɔ hiɛ ena ŋwɛi kuu lɛ ni “akpɔ amɛ aha . . . Nyɔŋmɔ kɛjɛ akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ kɛ jeŋmaŋ fɛɛ jeŋmaŋ mli” lɛ yɛ ninaa mli. (Kpojiemɔ 5:9, 10) Asafo babaoo lɛ hu jɛ he ko ni tamɔ nakai, shi esoro amɛhiɛnɔkamɔ. Amɛtamɔɔɔ Nyɔŋmɔ Israel, ejaakɛ agbako amɛyibɔ lɛ afɔko shi. Gbɔmɔ ko nyɛŋ atsɔ hiɛ ale bɔ ni amɛyibɔ baafee. Amɛfɔ amɛtadei lɛ ahe ni eyɛ futaa yɛ Toobi lɛ la lɛ mli ni enɛ tsɔɔ akɛ amɛyɛ jalɛ shidaamɔ yɛ Yehowa hiɛ kɛtsɔ hemɔkɛyeli ni amɛyɔɔ yɛ Yesu afɔleshaa lɛ mli lɛ hewɔ. (Kpojiemɔ 7:14) Ni amɛmiifɔ̃ blɛoi, amɛmiijie Mesia lɛ yi akɛ amɛ-Maŋtsɛ.

7, 8. (a) Ŋwanejee ko bɛ he akɛ blɛoi ni amɛfɔɔ lɛ kai bɔfo Yohane yɛ mɛni he? (b) Asafo babaoo lɛ ni fɔɔ blɛoi lɛ tsɔɔ mɛni?

⁷ Yɛ be mli ni ekwɛɔ ninaa nɛɛ lɛ, Yohane susumɔi baanyɛ ekɛ lɛ aya sɛɛ yɛ nɔ ni fe afii 60 kɛyashɛ Yesu naagbee otsi ni eye yɛ shikpɔŋ nɔ lɛ nɔ. Yɛ Nisan 9, afi 33 Ŋ.B., beni asafoi lɛ ke yuu kɛbahere Yesu kɛba Yerusalem lɛ, “amɛkɔlɔ blɛoi, ni amɛje kpo amɛyakpee lɛ, ni amɛbolɔ akɛ: Hosiana! Ajɔɔ mɔ ni baa yɛ Nuŋtsɔ lɛ [Yehowa] gbɛi anɔ lɛ, Israel maŋtsɛ lɛ!” (Yohane 12:12, 13) Nakai nɔŋŋ hu blɛoi ni asafo babaoo lɛ kɔlɔ kɛ amɛbolɔmɔ lɛ tsɔɔ akɛ amɛkɛ miishɛɛ fɛɛ miikpɛlɛ Yesu nɔ akɛ Yehowa Maŋtsɛ ni ahala lɛ.

⁸ Ŋwanejee ko bɛ he akɛ, blɛoi lɛ kɛ miishɛɛnamɔ lɛ kaiɔ Yohane blema Israel Asesei Agbijurɔ lɛ. Ejaakɛ Yehowa fa yɛ nɛkɛ gbijurɔ nɛɛ yeli he akɛ: “Ni klɛŋklɛŋ gbi lɛ nɔ lɛ, nyɛŋɔa tsei ayibii fɛfɛji kɛ blɛoi kɛ tsei kusuu aniji kɛ faa naa kpaai, ni nyɛnyaa yɛ Yehowa nyɛ-Nyɔŋmɔ lɛ hiɛ gbii kpawo.” Akɛ blɛoi lɛ tsu nii akɛ mlifilimɔ he okadi. Asesei ni amɛmamɔ ni baaye gbii fioo lɛ kaiɔ amɛ akɛ Yehowa ehere ewebii lɛ kɛjɛ Mizraim, koni amɛhi buui amli yɛ ŋa lɛ nɔ. “Gbɔ kɛ awusa kɛ okulafo” hu naa nɛkɛ gbijurɔyeli nɛɛ mli gbɛfaŋnɔ. Esa akɛ Israel fɛɛ ‘mii ashɛ amɛhe jogbaŋŋ.’—3 Mose 23:40; 5 Mose 16:13-15.

 9. Mɛɛ bolɔmɔ kɛ nyamɔ ko asafo babaoo lɛ kɛ amɛhe woɔ mli?

⁹ Belɛ esa akɛ asafo babaoo lɛ afɔ blɛoi, eyɛ mli akɛ amɛjeee mumɔŋ Israel fa moŋ, ejaakɛ amɛkɛ miishɛɛ kɛ shidaa wieɔ akɛ kunimyeli kɛ yiwalaheremɔ ji Nyɔŋmɔ kɛ Toobi lɛ nɔ, taakɛ bɔ ni Yohane naa yɛ biɛ lɛ: “Ni amɛbolɔ kɛ gbee waa amɛkɛɛ: Yiwalaheremɔ lɛ ji wɔ-Nyɔŋmɔ ni ta maŋtsɛsɛi lɛ nɔ lɛ, kɛ Toobi lɛ nɔ!” (Kpojiemɔ 7:10) Eyɛ mli akɛ ajie amɛ kɛjɛ shikpɔŋ lɛ nɔ kui sɔrɔtoi fɛɛ mli moŋ, shi asafo babaoo lɛ bolɔɔ ‘kɛ gbee kome ni naa wa.’ Te amɛaafee tɛŋŋ amɛfee enɛ, akɛni amɛjɛ jeŋmaji kɛ wiemɔi sɔrɔtoi amli lɛ?

10. Te asafo babaoo lɛ aaafee tɛŋŋ ni amɛbolɔ kɛ “gbee waa” yɛ ekomefeemɔ mli yɛ maji srɔtoi anɔ ni amɛjɛ kɛ wiemɔi srɔtoi ni amɛwieɔ lɛ fɛɛ sɛɛ?

¹⁰ Nɛkɛ asafo babaoo nɛɛ ji majimaji ateŋ gbɛjianɔtoo kome pɛ ni yɔɔ shikpɔŋ nɛɛ nɔ ŋmɛnɛ ni efee ekome lɛlɛŋ lɛ fa. Amɛbɛ tɛi sɔrɔtoi ni afolɔ ashwie shi aha maji sɔrɔtoi, shi moŋ amɛkɛ Biblia mli shishitoo mlai ni ja lɛ tsuɔ nii pɛpɛɛpɛ yɛ he fɛɛ he ni amɛyɔɔ. Amɛkɛ amɛhe wooo maŋhedɔɔ, maŋ hiɛ atuatsemɔ kui amli, shi moŋ ‘amɛkɛ amɛklantei esɔ̃ kɔii.’ (Yesaia 2:4) Amɛmli gbalako amɛfeko jamɔ kui sɔrɔtoi, ni yɛ enɛ hewɔ lɛ amɛkɛ wiemɔi ni teɔ shi woɔ amɛhe bolɔɔɔ amɛwooo amɛhe taakɛ Kristendom jamɔi lɛ feɔ lɛ; ni asaŋ amɛshiii yijiemɔ lɛ amɛhaaa osɔfoi akuu ko ni amɛkɛ no efee amɛnitsumɔ koni amɛtsu amɛyijiemɔ lɛ he nii amɛha amɛ. Amɛbolɔɔɔ akɛ amɛyiwalaheremɔ jɛ mumɔ krɔŋkrɔŋ lɛ, ejaakɛ amɛjeee triniti nyɔŋmɔ ko tsuji. Amɛfee ekome yɛ Yehowa gbɛi lɛ tsɛmɔ mli yɛ be mli ni amɛwieɔ anɔkwale wiemɔ krɔŋŋ lɛ yɛ shikpɔji aaafee 200 nɔ yɛ jeŋ muu fɛɛ lɛ. (Zefania 3:9) Amɛjajeɔ yɛ faŋŋ akɛ amɛyiwalaheremɔ jɛ Yehowa, yiwalaheremɔ Nyɔŋmɔ lɛ, kɛtsɔ Yesu Kristo, E-yiwalaheremɔ Najiaŋdamɔlɔ Nukpa lɛ nɔ yɛ gbɛ ni ja nɔ.—Lala 3:9; Hebribii 2:10.

11. Ŋmɛnɛŋmɛnɛ beaŋ tsɔnei ahe nilee eye ebua asafo babaoo lɛ koni amɛgbee ni wa lɛ ajije po fe nakai yɛ mɛɛ gbɛ nɔ?

¹¹ Ŋmɛnɛŋmɛnɛ beaŋ tsɔnei ahe nilee eye ebua ni eha asafo babaoo ni efee ekome lɛ gbee lɛ ejije waa diɛŋtsɛ. Jamɔ kuu ko bɛ shikpɔŋ nɛɛ nɔ ni ehe ehia akɛ amɛkala Biblia kasemɔ woji yɛ wiemɔi fe 400 mli, ejaakɛ kuu ko bɛ ni yɔɔ he miishɛɛ akɛ amɛkɛ shɛɛ sane kome ko aaayaha shikpɔŋ lɛ nɔ bii fɛɛ. Akɛ nɔ ni yeɔ buaa enɛ lolo lɛ, yɛ Yehowa Odasefoi Anɔyeli Kuu ni afɔ amɛ mu lɛ kwɛmɔ shishi hewɔ lɛ, afee Multilanguage Electronic Phototypesetting System (ekukufoo mli lɛ MEPS). Beni akalaa nɛkɛ wolo nɛɛ lɛ, no mli lɛ akɛ MEPS nɛɛ he tsɔnei sɔrɔtoi miitsu nii yɛ hei fe 125 yɛ shikpɔŋ muu lɛ fɛɛ lɛ anɔ, ni enɛ eye ebua koni anyɛ akala wolo ni baa daa otsii enyɔ, ni ji Buu-Mɔɔ lɛ yɛ wiemɔi fe 130 mli ni akalaa fɛɛ yɛ be kome mli. Yehowa webii ŋmalaa woji hu kɛ amɛmli sane kome tamɔ enɛ ni yɔɔ wiemɔi babaoo mli lɛ yɛ be kome too mli. No hewɔ lɛ Yehowa Odasefoi, ni amɛteŋ mɛi ni fa ji asafo babaoo lɛ mli bii lɛ nyɛɔ amɛjaa woji sɔrɔtoi akpekpei ohai abɔ daa afi yɛ wiemɔi ni ale jogbaŋŋ lɛ fɛɛ mli, ni eyeɔ ebuaa ni mɛi krokomɛi babaoo ni jɛ akutsei kɛ majianɔwiemɔi fɛɛ mli kaseɔ Nyɔŋmɔ Wiemɔ lɛ ni amɛkɛ amɛgbee fataa asafo babaoo lɛ gbee ni naa wa waa lɛ he.—Yesaia 42:10, 12.

Amɛyɛ Ŋwɛi Loo Shikpɔŋ Nɔ?

12, 13. Asafo babaoo lɛ “damɔ maŋtsɛsɛi lɛ kɛ Toobi lɛ hiɛ” yɛ mɛɛ gbɛ nɔ?

¹² Te wɔfeɔ tɛŋŋ wɔleɔ akɛ “amɛdamɔ maŋtsɛsɛi lɛ hiɛ” lɛ etsɔɔɔ akɛ asafo babaoo lɛ yɛ ŋwɛi? Odaseyeli ni mli ka shi faŋŋ yɛ ni kɔɔ enɛ he. Akɛ nɔkwɛmɔnɔ lɛ, Hela wiemɔ ni atsɔɔ shishi yɛ biɛ akɛ “hiɛ” (e·noʹpi·on) lɛ shishi diɛŋtsɛ ji “yɛ hiɛ” ni akɛtsuɔ nii shii abɔ yɛ adesai ni yɔɔ shikpɔŋ nɔ ni yɔɔ Yehowa “hiɛ” lɛ ahe. (1 Timoteo 5:21; 2 Timoteo 2:14; Romabii 14:22; Galatabii 1:20) Be ko beni Israelbii lɛ yɔɔ ŋa lɛ nɔ lɛ, Mose kɛɛ Aaron akɛ: “Kɛɛmɔ Israelbii asafo muu lɛ fɛɛ akɛ: Nyɛtsia nyɛbaa Yehowa hiɛ; ejaakɛ enu nyɛhuhuuhu wiemɔi lɛ.” (2 Mose 16:9) Ehe ehiaaa ni aloo Israelbii lɛ kɛya ŋwɛi bɔni afee ni amɛyadamɔ Yehowa hiɛ yɛ nakai be lɛ mli. (Okɛto 3 Mose 24:8 he.) Shi moŋ, ŋa lɛ nɔ amɛdamɔ yɛ Yehowa hiɛ ni egbala ejwɛŋmɔ kɛba amɛnɔ.

¹³ Kɛfata he lɛ, wɔkaneɔ akɛ: “Shi beni gbɔmɔbi lɛ aaaba yɛ enunyam lɛ mli . . . ni aaabua jeŋmaji lɛ fɛɛ naa yɛ ehiɛ.”c Adesa weku muu lɛ fɛɛ ehiŋ ŋwɛi yɛ be mli ni nɛkɛ gbalɛ nɛɛ baa mli lɛ. Eka shi faŋŋ akɛ mɛi ni yaa ‘naanɔ la’ loo naanɔ hiɛkpatamɔ mli lɛ ehiŋ ŋwɛi. (Mateo 25:31-33, 41, 46) Shi moŋ, adesai damɔɔ shikpɔŋ nɛɛ nɔ ni Yesu naa amɛ, ni egbalaa ejwɛŋmɔ kɛyaa amɛnɔ koni ekojo amɛ. Nakai nɔŋŋ hu asafo babaoo lɛ “damɔ maŋtsɛsɛi lɛ hiɛ kɛ Toobi lɛ hiɛ” ni ji akɛ amɛdamɔɔ shi akɛ mɛi ni Yehowa kɛ e-Maŋtsɛ Kristo Yesu, ni amɛnine shɛɔ kojomɔ kpakpa nɔ kɛjɛɔ amɛdɛŋ lɛ miina amɛ.

14. (a) Namɛi atsɔɔ mli akɛ ‘amɛbɔle maŋtsɛsɛi lɛ he kɛkpe’ ni ‘amɛyɛ [ŋwɛi] Zion Gɔŋ lɛ nɔ’ lɛ? (b) Eyɛ mli akɛ asafo babaoo lɛ sɔmɔɔ Nyɔŋmɔ yɛ “esɔlemɔtsu” lɛ mli moŋ, shi mɛni hewɔ enɛ efeee amɛ osɔfoi akuu lɛ?

¹⁴ Atsɔɔ mli akɛ onukpai 24 lɛ kɛ kuu ni afɔ amɛ mu ni ji 144,000 lɛ ‘ebɔle’ Yehowa ‘maŋtsɛsɛi lɛ he kɛkpe’ ni amɛdamɔ “[ŋwɛi] Zion Gɔŋ lɛ nɔ.” (Kpojiemɔ 4:4; 14:1) Asafo babaoo lɛ jeee osɔfoi akuu ni amɛnine shɛɛɛ nakai gbɛhe ni awo nɔ lɛ nɔ. Eji anɔkwale akɛ atsɔɔ mli yɛ sɛɛ mli yɛ Kpojiemɔ 7:15 akɛ amɛsɔmɔɔ Nyɔŋmɔ “yɛ esɔlemɔ we lɛ.” Shi nɛkɛ sɔlemɔ we nɛɛ damɔɔɔ shi kɛhaaa mli gbɛ tsu lɛ, Krɔŋkrɔŋ Fe Fɛɛ lɛ. Shi moŋ, eji Nyɔŋmɔ mumɔŋ sɔlemɔ we lɛ shikpɔŋ nɔ kpo lɛ nɔ. Hela wiemɔ na·osʹ, ni atsɔɔ shishi yɛ biɛ akɛ “sɔlemɔtsu” lɛ tsɔɔ tsu muu lɛ fɛɛ ni ama aha Yehowa jamɔ lɛ yɛ be babaoo mli. Ŋmɛnɛ, enɛ ji mumɔŋ tsu ko ni kɔɔ ŋwɛi kɛ shikpɔŋ lɛ fɛɛ he.—Okɛto Mateo 26:61; 27:5, 39, 40; Marko 15:29, 30; Yohane 2:19-21 he, New World Translation Reference Bible, shishigbɛ niŋmaa.

Jeŋ Muu Fɛɛ Yijiemɔ kɛ Gbee ni Wa

15, 16. (a) Mɛni ba yɛ ŋwɛi yɛ be mli ni asafo babaoo lɛ pue lɛ? (b) Te Yehowa mumɔŋ bɔɔ nii lɛ feɔ amɛnii yɛ eyiŋtoo lɛ ni ajieɔ ehee fɛɛ ehee kpo lɛ he amɛhaa tɛŋŋ? (d) Te wɔɔfee tɛŋŋ ni wɔ ni wɔyɔɔ shikpɔŋ nɔ lɛ wɔkɛ wɔhe aaawo yijiemɔ lala lɛ mli?

¹⁵ Asafo babaoo lɛ miijie Yehowa yi, shi mɛi krokomɛi hu miila eyijiemɔi. Yohane bɔ amaniɛ akɛ: “Ni bɔfoi lɛ fɛɛ damɔ maŋtsɛsɛi lɛ kɛ onukpai nyɔŋmai enyɔ-kɛ-ejwɛ lɛ kɛ hiɛkalɔi ejwɛ lɛ ahewɔ kɛkpe, ni amɛkɛ amɛhiɛ bumɔ shi yɛ maŋtsɛsɛi lɛ hiɛ, ni amɛja Nyɔŋmɔ amɛkɛɛ: Amen! Jɔɔmɔ kɛ anunyam kɛ nilee kɛ shidaa kɛ agbojee kɛ hewalɛ kɛ nyɛmɔ aha wɔ-Nyɔŋmɔ lɛ kɛjɛ naanɔ kɛya naanɔ! Amen.”—Kpojiemɔ 7:11, 12.

¹⁶ Beni Yehowa bɔ shikpɔŋ lɛ, eŋwɛibɔfoi krɔŋkrɔŋi lɛ fɛɛ “la nyamɔ lala shikome, ni Nyɔŋmɔ bii lɛ fɛɛ kwa bɔ oshe.” (Hiob 38:7) Yehowa yiŋtoo fɛɛ yiŋtoo hee lɛ kpojiemɔ baanyɛ akanya ŋwɛibɔfoi ayijiemɔ kɛ gbee ni wa tamɔ nakai. Beni onukpai 24 lɛ—144,000 lɛ ni yɔɔ amɛŋwɛi anunyam mli lɛ—bolɔ waa amɛkɛkpɛlɛ Toobi lɛ nɔ lɛ, Nyɔŋmɔ ŋwɛi bɔɔ nii krokomɛi lɛ fɛɛ fata he ni amɛkɛ yijiemɔ ha Yesu kɛ Yehowa Nyɔŋmɔ. (Kpojiemɔ 5:9-14) Nɛkɛ bɔɔ nii nɛɛ amli efili amɛ babaoo po fe nine akɛ amɛmiina ni Yehowa yiŋtoo lɛ miiba mli yɛ adesai anɔkwafoi ni afɔ amɛ mu lɛ ni eteɔ amɛ shi kɛyaa anunyam gbɛhe mli yɛ mumɔŋ nɔyeli he lɛ hewɔ. Agbɛnɛ, Yehowa ŋwɛi bɔɔ nii anɔkwafoi lɛ fɛɛ kɛ gbee ni ŋɔɔ jie eyi yɛ be mli ni asafo babaoo lɛ pue lɛ. Yɛ anɔkwale mli lɛ, kɛha Yehowa tsuji fɛɛ lɛ, Nuŋtsɔ lɛ gbi lɛ ji miishɛɛ be ni aaahi mli. (Kpojiemɔ 1:10) Kwɛ hegbɛ ni wɔna yɛ shikpɔŋ nɛɛ nɔ akɛ wɔɔná yijiemɔ lala ni ji odase ni ayeɔ yɛ Yehowa Maŋtsɛyeli lɛ he lɛ mli gbɛfaŋnɔ!

Asafo Babaoo lɛ Pue

17. (a) Mɛni sane onukpai 24 lɛ ateŋ mɔ kome bi, ni anɔkwale ni eji akɛ onukpa lɛ baanyɛ aha hetoo lɛ tsɔɔ mɛni? (b) Mɛɛ be mli aha onukpa lɛ sanebimɔ lɛ hetoo?

¹⁷ Kɛjɛ bɔfo Yohane gbii lɛ amli aahu kɛbashi Nuŋtsɔ lɛ gbi lɛ nɔ lɛ, Kristofoi ni afɔ amɛ mu lɛ nuuu mɛi ni asafo babaoo lɛ ji lɛ shishi jogbaŋŋ. No hewɔ lɛ esa akɛ onukpai 24 lɛ ateŋ mɔ kome, ni damɔ shi kɛha mɛi ni afɔ amɛ mu lɛ ni yɔɔ ŋwɛi momo lɛ aaakanya Yohane susumɔ kɛtsɔ sanebimɔ ko nɔ. “Ni onukpai lɛ ateŋ mɔ kome here nɔ ni ekɛɛ mi akɛ: Mɛi ni wo atadei yɛji nɛɛ, namɛi ni, ni nɛgbɛ amɛjɛ? Ni mikɛɛ lɛ akɛ: Minuŋtsɔ, bo ole.” (Kpojiemɔ 7:13, 14a) Hɛɛ, nakai onukpa lɛ baanyɛ ana he ni hetoo lɛ yɔɔ ni ekɛha Yohane. Enɛ tsɔɔ akɛ onukpai 24 akuu lɛ ni atee amɛ shi lɛ fata he ni akɛ ŋwɛi anɔkwalei haa ŋmɛnɛ lɛ. Yɛ amɛgbɛfaŋ lɛ, Yohane kuu lɛ mli bii ni yɔɔ shikpɔŋ nɔ lɛ na le mɛi ni asafo babaoo lɛ ji kɛtsɔ nɔ ni Yehowa feɔ yɛ amɛteŋ lɛ ni amɛkwɛɔ no jogbaŋŋ lɛ nɔ. Amɛhe fee oya ni amɛkɛyɔse ŋwɛi la ni kpɛ kaŋkaŋ ni ha teokrase ŋwɛi lɛ kpɛ yɛ 1935, yɛ Yehowa be ni sa mli lɛ.

18, 19. (a) Mɛɛ hiɛnɔkamɔ Yohane kuu lɛ ma nɔ mi yɛ 1920 kɛ 1930 afii lɛ amli, shi namɛi here sane lɛ nɔ babaoo? (b) Asafo babaoo lɛ ni ayoo amɛ yɛ 1935 lɛ tsɔɔ mɛni yɛ 144,000 lɛ ahe? (d) Kaimɔ lɛ he akɔntaabuu jieɔ mɛni kpo?

¹⁸ Yɛ 1920 afii lɛ amli kɛ 1930 afii lɛ shishijee mli lɛ, Yohane kuu lɛ ma ŋwɛi hiɛnɔkamɔ lɛ nɔ mi, yɛ woji kɛ agbɛnɛ shiɛmɔ nitsumɔ lɛ mli. Eka shi faŋŋ akɛ no mli lɛ 144,000 lɛ yibɔ ni yeɔ emuu lɛ shɛko. Shi mɛi ni bo sane lɛ toi lɛ ateŋ mɛi ni amɛyi faa yɛ be fɛɛ mli lɛ tsɔɔ ekaa yɛ odaseyeli nitsumɔ lɛ mli ni amɛtsɔɔ miishɛɛ yɛ Paradeiso shikpɔŋ nɔ shihilɛ kɛmiiya naanɔ lɛ mli. Amɛbɛ suɔmɔ ko akɛ amɛaaya ŋwɛi. Jeee no ji amɛtsɛmɔ. Amɛjeee asafo kuu bibioo lɛ fa, shi moŋ toi krokomɛi. (Luka 12:32; Yohane 10:16) Bɔ ni ayoo amɛ yɛ 1935 akɛ asafo babaoo ni ji toi krokomɛi lɛ tsɔɔ akɛ 144,000 lɛ halamɔ lɛ miihe aba naagbee.

¹⁹ Ani akɔntaabui fiɔ sanenaamuu nɛɛ sɛɛ? Hɛɛ, amɛfiɔ sɛɛ. Yɛ 1938 lɛ, Yehowa Odasefoi 59,047 kɛ amɛhe wo sɔɔmɔ nitsumɔ lɛ mli yɛ jeŋ muu fɛɛ. Mɛnɛɛmɛi ateŋ 36,732 ye Yesu gbele lɛ Kaimɔ ni afeɔ daa afi lɛ he nibii lɛ eko, ni amɛkɛtsɔɔ akɛ amɛyɛ ŋwɛi tsɛmɔ lɛ mli. Kɛjɛ no sɛɛ afii lɛ amli kɛbaa nɛɛ, mɛi ni yeɔ enɛ eko lɛ ayifalɛ lɛ etee nɔ eba shi fiofio, ni titri lɛ ejɛ Yehowa Odasefoi anɔkwafoi lɛ ni gbeɔ amɛshikpɔŋ nɔ nitsumɔ lɛ naa yɛ gbele mli lɛ hewɔ. Yɛ afi 2005 lɛ, mɛi 8,524 pɛ ye Kaimɔ nibii lɛ eko—kɛ akɛto he lɛ, amɛji mɛi 16,390,116 ni ba shishi yɛ jeŋ muu fɛɛ lɛ mli oha mlijaa 0.05 pɛ.

20. (a) Mɛni J. F. Rutherford wie yɛ asafo babaoo lɛ he yɛ teemɔŋ yɛ Jeŋ Ta II be lɛ mli? (b) Mɛɛ anɔkwa saji tsɔɔ amrɔ nɛɛ akɛ asafo babaoo lɛ da diɛŋtsɛ?

²⁰ Beni jeŋ ta ni ji enyɔ lɛ fɛ lɛ, Satan kɛ mɔdɛŋbɔɔ ni naa wa wo mli koni ekɛtsi asafo babaoo lɛ anaabuamɔ lɛ naa. Atsi Yehowa nitsumɔ lɛ naa yɛ maji pii anɔ. Yɛ nakai gbii ni mli ewo duŋ lɛ mli, kɛ agbɛnɛ beni eshwɛ fioo ni eeegbo yɛ January 1942 lɛ, anu ni J. F. Rutherford miikɛɛ akɛ: “Ojogbaŋŋ . . . etamɔ nɔ ni yɛ fɛɛ sɛɛ lɛ asafo babaoo lɛ yifalɛ efeŋ babaoo nakai.” Shi ŋwɛi jɔɔmɔ tsɔɔ nɔ kroko! Beni shɛɔ 1946, no mli lɛ Odasefoi ni shiɛɔ yɛ jeŋ fɛɛ lɛ ayifalɛ ji 176,456—mɛnɛɛmɛi ateŋ mɛi ni fa ji asafo babaoo lɛ mli bii. Beni shɛɔ 2005 lɛ, Odasefoi 6,390,022 miisɔmɔ Yehowa yɛ anɔkwayeli mli yɛ maji srɔtoi 235 nɔ—ASAFO BABAOO lɛlɛŋ! Ni amɛyibɔ lɛ miiya hiɛ lolo.

21. (a) Yɛ mɛɛ gbɛ nɔ Nyɔŋmɔ webii lɛ anaabuamɔ yɛ Nuŋtsɔ lɛ gbi lɛ mli lɛ kɛ Yohane ninaa lɛ kpaa gbee kwraa yɛ? (b) Te fee tɛŋŋ ni gbalɛi komɛi ni he hiaa bɔi mlibaa?

²¹ No hewɔ lɛ Nyɔŋmɔ webii anaabuamɔ yɛ Nuŋtsɔ lɛ gbi lɛ nɔ lɛ kɛ Yohane ninaa lɛ kpaa gbee kwraa: klɛŋklɛŋ lɛ 144,000 lɛ ateŋ mɛi ni eshwɛ lɛ anaabuamɔ; kɛkɛ lɛ asafo babaoo lɛ anaabuamɔ. Taakɛ Yesaia gba efɔ shi lɛ, amrɔ nɛɛ, yɛ “naagbee gbii lɛ amli” nɛɛ, gbɔmɛi ni jɛ jeŋmaji fɛɛ mli miiho yuu koni amɛyana Yehowa jamɔ krɔŋŋ lɛ mli gbɛfaŋnɔ. Ni yɛ anɔkwale mli lɛ, wɔmli filiɔ wɔ kɛ hiɛsɔɔ yɛ “ŋwɛi hee kɛ shikpɔŋ hee” ni Yehowa bɔɔ lɛ hewɔ. (Yesaia 2:2-4; 65:17, 18) Nyɔŋmɔ miibua “nibii fɛɛ [naa] eto yitso kome shishi yɛ Kristo mli, nii ni yɔɔ ŋwɛi kɛ nii ni yɔɔ shikpɔŋ lɛ nɔ lɛ fɛɛ, yɛ emli.” (Efesobii 1:10) Ŋwɛi Maŋtsɛyeli lɛ mli niyelɔi ni afɔ amɛ mu lɛ—ni ahala amɛ kɛtsɔ afii ohai abɔ lɛ amli kɛjɛ Yesu gbii lɛ amli lɛ—ji “nii ni yɔɔ ŋwɛi” lɛ. Ni agbɛnɛ, asafo babaoo lɛ ni ji toi krokomɛi lɛ pueɔ akɛ “nii ni yɔɔ shikpɔŋ lɛ nɔ lɛ” shishijee bii. Nakai gbɛjianɔtoo lɛ ni ooosɔmɔ yɛ he yɛ gbeekpamɔ naa lɛ baanyɛ atsɔ naanɔ miishɛɛ aha bo.

Asafo Babaoo lɛ Jɔɔmɔi

22. Mɛɛ saji krokomɛi Yohane nine shɛ nɔ yɛ asafo babaoo lɛ ahe?

²² Yohane tsɔ ŋwɛi adafitswaa gbɛ lɛ nɔŋŋ nɔ ni enine shɛ saji krokomɛi ni kɔɔ asafo babaoo nɛɛ he lɛ anɔ: “Ni [onukpa lɛ] ekɛɛ mi akɛ: Mɛnɛɛmɛi ji mɛi ni jɛ amanehulu kpeteŋkpele lɛ mli lɛ, ni amɛfɔ amɛtadei lɛ ahe, ni amɛha eyɛ futaa yɛ Toobi lɛ la lɛ mli. No hewɔ ni amɛyɔɔ Nyɔŋmɔ maŋtsɛsɛi lɛ hiɛ, ni amɛjaa lɛ nyɔɔŋ kɛ shwane yɛ esɔlemɔtsu lɛ mli lɛ; ni mɔ ni ta maŋtsɛsɛi lɛ nɔ lɛ aaashi ebuu lɛ eto amɛnɔ.”—Kpojiemɔ 7:14b, 15.

23. Mɛni ji amanehulu babaoo ni asafo babaoo lɛ ‘jeɔ kpo kɛjɛɔ mli’ lɛ?

²³ Yɛ be ko ni tsɔ enɛ hiɛ lɛ mli lɛ, Yesu ekɛɛ akɛ nɔ ni baajɛ ba ni eba yɛ Maŋtsɛyeli anunyam mli lɛ mli aba yɛ naagbee ji “amanehulu babaoo . . . ni anako nɔ da kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ.” (Mateo 24:21, 22) Yɛ nakai gbalɛ lɛ mlibaa mli lɛ, ŋwɛibɔfoi lɛ baaŋmɛɛ shikpɔŋ lɛ nɔ kɔɔyɔi ejwɛ lɛ ahe koni amɛkpata Satan jeŋ gbɛjianɔtoo lɛ hiɛ. Klɛŋklɛŋ nii ni baaya ji Babilon Kpeteŋkpele, jeŋ apasa jamɔ maŋtsɛyeli lɛ. Kɛkɛ lɛ, yɛ amanehulu lɛ naagbee ni mli wa fe fɛɛ lɛ, Yesu baahere 144,000 lɛ mli bii ni amɛshwɛ yɛ shikpɔŋ nɔ lɛ, kɛ asafo babaoo lɛ fɛɛ yiwala.—Kpojiemɔ 7:1; 18:2.

24. Aŋkroaŋkroi ni yɔɔ asafo babaoo lɛ mli lɛ ahe saa kɛhaa yibaamɔ yɛ mɛɛ gbɛ nɔ?

²⁴ Te feɔ tɛŋŋ ni aŋkroaŋkroi ni jɛ asafo babaoo lɛ ateŋ lɛ ahe saa kɛhaa yibaamɔ? Onukpa lɛ kɛɛ Yohane akɛ “amɛfɔ amɛtadei lɛ ahe, ni amɛha eyɛ futaa yɛ Toobi lɛ la lɛ mli.” Yɛ gbɛ kroko nɔ lɛ, amɛtsɔɔ hemɔkɛyeli yɛ Yesu mli akɛ Kpɔlɔ lɛ, amɛjɔɔ amɛhe nɔ amɛha Yehowa, ni amɛkɛ nu mli baptisimɔ efee amɛhenɔjɔɔmɔ lɛ he okadi, ni amɛhiɛ “henilee kpakpa” mli yɛ amɛjeŋba ni ja lɛ hewɔ. (1 Petro 3:16, 21; Mateo 20:28) No hewɔ lɛ, amɛhe tse ni amɛja yɛ Yehowa hiɛ. Ni amɛtsiɔ amɛhe kɛjɛɔ je lɛ he koni ‘amɛkawo amɛhe muji.’—Yakobo 1:27.

25. (a) Asafo babaoo lɛ miisɔmɔ Yehowa “nyɔɔŋ kɛ shwane yɛ esɔlemɔtsu lɛ mli” yɛ mɛɛ gbɛ nɔ? (b) Yehowa ‘shiɔ ebuu lɛ etoɔ’ asafo babaoo lɛ ‘anɔ’ yɛ mɛɛ gbɛ nɔ?

²⁵ Kɛfata he lɛ, amɛbatsɔmɔɔ Yehowa Odasefoi ni yɔɔ ekaa—“amɛjaa lɛ nyɔɔŋ kɛ shwane yɛ esɔlemɔ tsu lɛ mli.” Ani oji asafo babaoo ni amɛjɔɔ amɛhe nɔ nɛɛ ateŋ mɔ kome? Kɛji nakai ni lɛ, eji hegbɛ ni ona akɛ ooosɔmɔ Yehowa ni oŋmɛɛɛ he yɛ emumɔŋ sɔlemɔtsu kpeteŋkpele lɛ shikpɔŋ nɔ kpo lɛ nɔ. Ŋmɛnɛ, asafo babaoo lɛ miitsu odaseyeli nitsumɔ lɛ titri yɛ mɛi ni afɔ amɛ mu lɛ agbɛtsɔɔmɔ shishi. Yɛ heloo gbɛfaŋ nitsumɔi fɛɛ asɛɛ lɛ, amɛteŋ mɛi akpei ohai abɔ eto gbɛjianɔ amɛha be fɛɛ sɔɔmɔ lɛ akɛ gbɛgbalɔi. Shi kɛji akɛ oyɛ nakai kuu lɛ mli aloo obɛ mli hu lɛ, akɛ asafo babaoo lɛ mlinyo ni ojɔɔ ohe nɔ lɛ, omli baanyɛ afili bo akɛ yɛ ohemɔkɛyeli kɛ onitsumɔi ahewɔ lɛ, abuo jalɔ akɛ Nyɔŋmɔ shieŋtsɛ ni ahere bo atuu kɛba ekpee buu lɛ mli. (Lala 15:1-5; Yakobo 2:21-26) No hewɔ lɛ Yehowa ‘lɛɛɔ ebuu’ lɛ mli ehaa mɛi ni sumɔɔ lɛ lɛ anɔ, ni akɛ gbɔfeelɔ kpakpa lɛ, ebuɔ amɛhe.—Abɛi 18:10.

26. Mɛɛ jɔɔmɔi krokomɛi asafo babaoo lɛ baana mli gbɛfaŋnɔ?

²⁶ Onukpa lɛ tee nɔ akɛ: “Hɔmɔ yeŋ amɛ dɔŋŋ, ni kumai hu yeŋ amɛ dɔŋŋ, ni asaŋ hulu loo latsaa ko esaŋ amɛhe dɔŋŋ; ejaakɛ Toobi lɛ ni yɔɔ maŋtsɛsɛi lɛ teŋ lɛ aaalɛ amɛ, ni eeetsɔɔ amɛ gbɛ kɛaatee wala nu bui ahe, ni Nyɔŋmɔ aaatsumɔ amɛhiɛaŋ yaafonui fɛɛ.” (Kpojiemɔ 7:16, 17) Hɛɛ, Yehowa ji gbɔfeelɔ ni mli hi diɛŋtsɛ! Shi te shishinumɔ ni yɔɔ nɛkɛ wiemɔi nɛɛ amli lɛ mli kwɔ ha tɛŋŋ?

27. (a) Yesaia gba nɔ ko ni tamɔ onukpa lɛ wiemɔi lɛ yɛ mɛɛ gbɛ nɔ? (b) Mɛni tsɔɔ akɛ Yesaia gbalɛ lɛ mlibaa je shishi yɛ Kristofoi asafo lɛ nɔ yɛ Paulo gbii lɛ amli?

²⁷ Nyɛhaa wɔsusua gbalɛ ko ni emli wiemɔi tamɔ enɛ lɛ he: “Bɔ ni Yehowa kɛɛ nɛ: Be ni sa mli miboo toi yɛ, ni yiwalaheremɔ gbi lɛ nɔ hu miye mibuao yɛ. . . Hɔmɔ yeŋ amɛ, ni kumai hu yeŋ amɛ, ni shia ŋa ni nɔ edɔ loo hulu esaŋ amɛhe; ejaakɛ mɔ ni musuŋ tsɔɔ lɛ yɛ amɛhe lɛ aaawa amɛ, ni eeetsɔɔ amɛ gbɛ kɛaatee nu bui ahe.” (Yesaia 49:8, 10; kwɛmɔ Lala 121:5, 6 hu.) Bɔfo Paulo ŋɔ nɛkɛ gbalɛ nɛɛ mli wiemɔi lɛ eko ni ekɛto “yiwalaheremɔ gbi” lɛ ni je shishi yɛ Pentekoste afi 33 Ŋ.B. lɛ he. Eŋma akɛ: “Ejaakɛ [Yehowa] ekɛɛ akɛ: ‘Be ni sa mli miboo toi yɛ, ni walaheremɔ gbi nɔ hu miye mibuao yɛ.’ Naa, be ni sa jogbaŋŋ nɛ; naa, walaheremɔ gbi nɛ.”—2 Korintobii 6:2.

28, 29. (a) Yesaia wiemɔi lɛ ba mli yɛ klɛŋklɛŋ afii oha lɛ mli yɛ mɛɛ gbɛ nɔ? (b) Wiemɔi ni yɔɔ Kpojiemɔ 7:16 lɛ baa mli yɛ asafo babaoo lɛ anɔ yɛ mɛɛ gbɛ nɔ? (d) Mɛni baajɛ asafo babaoo lɛ ni anyiɛɔ amɛhiɛ kɛyaa “wala nu bui ahe” lɛ mli aba? (e) Mɛni hewɔ asafo babaoo lɛ baafee gbɔmɛi sɔrɔtoi yɛ adesai ateŋ lɛ?

²⁸ Mɛni ji nɔ ni shiwoo akɛ hɔmɔ yeŋ amɛ loo kumai hu yeŋ amɛ ni hulu eshaŋ amɛ lɛ kɔɔ he yɛ no be lɛ mli? Eka shi faŋŋ akɛ, hɔmɔ kɛ kumai diɛŋtsɛ ye Kristofoi ni hi shi yɛ klɛŋklɛŋ afii oha lɛ mli lɛ yɛ bei komɛi amli. (2 Korintobii 11:23-27) Shi yɛ mumɔŋ gbɛfaŋ lɛ, amɛyɛ nii babaoo. Aha amɛ nibii babaoo kɛteke nɔ, no hewɔ lɛ mumɔŋ nibii ahe hɔmɔ loo kumai yeee amɛ. Agbɛnɛ, Yehowa haaa emlifu lɛ mli la lɛ asha amɛ beni ekpata Yudafoi anibii agbɛjianɔtoo lɛ hiɛ yɛ afi 70 Ŋ.B. lɛ. Wiemɔi ni yɔɔ Kpojiemɔ 7:16 lɛ hu baa mli yɛ mumɔŋ kɛhaa asafo babaoo lɛ ni yɔɔ ŋmɛnɛ lɛ. Amɛkɛ Kristofoi ni afɔ amɛ mu lɛ fɛɛ naa mumɔŋ niyenii babaoo mli ŋɔɔmɔ.—Yesaia 65:13; Nahum 1:6, 7.

²⁹ Kɛ oji nakai asafo babaoo lɛ mli bii lɛ ateŋ mɔ kome lɛ, shihilɛ ni hi ni otsui yɔɔ mli lɛ baaha “obolɔ kɛ nyamɔ,” ní nɔ ni obaaŋmɛ otsui shi yɛ mli kɛtsɔ nibii ni onaa kɛ nɔnyɛɛ ni baa yɛ Satan gbɛjianɔtoo nɛɛ afii lɛ amli lɛ kɔɔɔ he eko. (Yesaia 65:14) Yɛ nakai shishinumɔ naa lɛ, amrɔ nɛɛ po Yehowa baanyɛ ‘atsumɔ ohiŋmɛiaŋ yaafo nui fɛɛ.’ Nyɔŋmɔ “hulu” ni naa wa ni ji efɔbuu kojomɔ lɛ woŋ ohe gbeyei, ni kɛ aŋmɛɛ hiɛkpatamɔ kɔɔyɔi ejwɛ lɛ ahe lɛ, abaabaa oyi kɛjɛ Yehowa mlifu lɛ mli ‘la ni shaa nii’ lɛ mli. Beni nakai hiɛkpatamɔ lɛ eho lɛ, Toobi lɛ baanyiɛ ohiɛ bɔni afee ni “wala nu bui” ni wajeɔ mɔ ni damɔ shi kɛha gbɛjianɔ fɛɛ ni Yehowa eto koni ona naanɔ wala lɛ he aba sɛɛnamɔ aha bo. Abaabu hemɔkɛyeli ni ona yɛ Toobi lɛ la lɛ mli lɛ bem akɛni aaawo onɔ fiofio kɛyashɛ adesa emuuyeli mli hewɔ. Bo ni ofata asafo babaoo lɛ he lɛ baafee mɔ sɔrɔto yɛ adesai ateŋ akɛ “akpekpei” abɔ ni ehe ebahiaaa ni amɛgboi lɛ ateŋ mɔ kome! Yɛ shishinumɔ ni yeɔ emuu naa lɛ, no mli lɛ atsumɔ yaafo nui fɛɛ kɛjɛ ohiŋmɛiaŋ.—Kpojiemɔ 21:4.

Tsɛmɔ lɛ nɔ Mi ni Oooma

30. Mɛni nibii sɔrɔtoi pii ni yɔɔ naakpɛɛ ni baaba he ninaa agbeleɔ naa ahaa wɔ yɛ Yohane ninaa lɛ mli, ni namɛi “baanyɛ shi adamɔ”?

³⁰ Mɛɛ nibii sɔrɔtoi babaoo ni baaba ni yɔɔ naakpɛɛ lɛ ahe ninaa nɛkɛ wiemɔi nɛɛ gbeleɔ naa kɛhaa wɔ nɛkɛ! Yehowa diɛŋtsɛ ta emaŋtsɛsɛi nɔ, ni etsuji fɛɛ, ni yɔɔ ŋwɛi kɛ shikpɔŋ nɔ, efee ekome kɛmiijie eyi. Eshikpɔŋ nɔ tsuji lɛ yɔseɔ hegbɛ ni yɔɔ naakpɛɛ ni amɛna akɛ amɛaana yijiemɔ gbee ni jijeɔ nɛɛ mli gbɛfaŋnɔ. Etsɛŋ kwraa, Yehowa kɛ Kristo Yesu baatsu fɔbuu kojomɔ he nii, ni abaanu bolɔmɔ ni ji: “Emlifu gbi wulu lɛ eshɛ, ni namɔ aaanyɛ shi adamɔ?” lɛ he. (Kpojiemɔ 6:17) Ni hetoo lɛ hu? Adesai ateŋ mɛi fioo ko pɛ, ni 144,000 lɛ ni asɔo amɛnaa lɛ ateŋ mɔ fɛɛ mɔ ni ekolɛ eyɔɔ heloo mli lolo yɛ shikpɔŋ nɔ lɛ kɛ asafo babaoo lɛ ni ji toi krokomɛi lɛ pɛ “baanyɛ shi adamɔ,” ni ji akɛ, amɛkɛ amɛ baaje mli.—Yeremia 35:19; 1 Korintobii 16:13.

31. Te esa akɛ Yohane ninaa lɛ mlibaa asa Kristofoi ni ji mɛi ni afɔ amɛ mu lɛ kɛ asafo babaoo lɛ ahe aha tɛŋŋ?

³¹ Yɛ anɔkwa sane nɛɛ hewɔ lɛ, Yohane kuu lɛ mli bii ni ji Kristofoi ni afɔ amɛ mu lɛ miaa amɛhiɛ waa ni amɛmiitiu “oti lɛ kɛyashɛ Nyɔŋmɔ tsɛmɔ ni jɛ ŋwɛi yɛ Kristo Yesu mli lɛ he jweremɔ nɔ lɛ he.” (Filipibii 3:14) Amɛle jogbaŋŋ akɛ saji ni yaa nɔ yɛ nɛkɛ gbii nɛɛ amli lɛ biɔ tsuishiŋmɛɛ krɛdɛɛ yɛ amɛgbɛfaŋ. (Kpojiemɔ 13:10) Yɛ be mli ni amɛkɛ anɔkwayeli esɔmɔ Yehowa afii babaoo lɛ, amɛmɔɔ amɛhemɔkɛyeli lɛ mli kpɛŋŋ, amɛmli filiɔ amɛ akɛ “aŋmala” amɛgbɛi “yɛ ŋwɛi.” (Luka 10:20; Kpojiemɔ 3:5) Mɛi ni jɛ asafo babaoo lɛ ateŋ lɛ hu le akɛ “mɔ ni hiɛɔ mli kɛyawulaa shi lɛ, lɛ aaahere eyiwala.” (Mateo 24:13) Yɛ be mli ni ákɛ kuu lɛ, akadi asafo babaoo lɛ koni amɛje amanehulu kpeteŋkpele lɛ mli lɛ, esa akɛ aŋkroaŋkroi ni yɔɔ mli lɛ amia amɛhiɛ ni amɛhi shi akɛ mɛi ni he tse ni yɔɔ ekaa kɛ nitsumɔ.

32. Mɛɛ shihilɛ ko ni he hiaa anɔkwale ni eji akɛ kui enyɔ pɛ “baanyɛ shi adamɔ” yɛ Yehowa mlifu gbi lɛ nɔ lɛ maa nɔ mi?

³² Odaseyeli ko bɛ ni tsɔɔ akɛ yɛ nɛkɛ kui enyɔ nɛɛ asɛɛ lɛ kuu kroko ko yɛ ni “baanyɛ shi adamɔ” yɛ Yehowa mlifu gbi lɛ nɔ. Mɛni ji nɔ ni enɛ tsɔɔ kɛhaa akpekpei abɔ ni daa afi lɛ amɛjieɔ bulɛ ko kpo amɛhaa Yesu afɔleshaa lɛ kɛtsɔɔ egbele lɛ Kaimɔ lɛ shishi ni amɛbaa, shi kɛlɛ amɛtsɔko hemɔkɛyeli yɛ Yesu afɔleshaa lɛ mli kɛyashɛko he ni amɛaafee mɛi ni amɛjɔɔ amɛhe nɔ, Yehowa tsuji ni abaptisi amɛ, ni yɔɔ ekaa yɛ esɔɔmɔ lɛ mli lɛ hu? Kɛfata he lɛ, mɛi ni tsutsu ko lɛ amɛyɔɔ ekaa shi agbɛnɛ amɛŋmɛ gbɛ ni ‘haomɔi ehe amɛtsuii’ lɛ hu? Eba akɛ mɛnɛɛmɛi fɛɛ aaahɛle shi, ni amɛhiɛ atsɛ, bɔni afee ni ‘amɛnyɛ nii ni baaba nɛɛ fɛɛ mli amɛje, ni amɛnyɛ gbɔmɔbi lɛ’—Yesu Kristo—hiɛ amɛdamɔ. Be lɛ faaa!—Luka 21:34-36.

[Shishigbɛ niŋmai]

[Akrabatsa ni yɔɔ baafa 119]

Shishitsɔɔmɔ lɛ Nyɔŋmɔ Nɔŋ

Afii nyɔŋma-nyɔŋmai abɔ ho ni Yohane kuu lɛ miibi mɛi ni asafo babaoo lɛ ji, shi amɛnaaa hetoo ko ni haa mɔ tsui nyɔɔ emli. Mɛni hewɔ? Wɔnaa hetoo lɛ yɛ Yosef anɔkwafo lɛ wiemɔi amli, beni ekɛɛ: “Ani shishitsɔɔmɔ lɛ jeee Nyɔŋmɔ nɔŋ?” (1 Mose 40:8) Mɛɛ be ni yɛ mɛɛ gbɛ nɔ Nyɔŋmɔ tsɔɔ egbalɛi amlibaa shishi? Yɛ bei babaoo mli lɛ beni amɛmlibaa be eshɛ aloo amɛmiiba mli bɔni afee ni tsuji ni pɛiɔ saji amli lɛ anu saji lɛ ashishi yɛ faŋŋ mli. Akɛ shishinumɔ nɛɛ haa kɛha “wɔhe nitsɔɔmɔ . . . koni wɔkɛ tsuishiŋmɛɛ kɛ ŋmalɛi lɛ amli miishɛjemɔ lɛ ana hiɛnɔkamɔ.”—Romabii 15:4.

[Akrabatsa ni yɔɔ baafa 124]

Asafo babaoo lɛ mli bii

▪ amɛbaa kɛjɛɔ jeŋmaji kɛ wekui kɛ gbɔmɛi kɛ wiemɔi fɛɛ mli

▪ amɛdamɔ Yehowa maŋtsɛsɛi lɛ hiɛ

▪ amɛfɔ amɛtadei ahe ni eyɛ futaa yɛ Toobi lɛ la lɛ mli

▪ amɛkɛɔ akɛ amɛyiwalaheremɔ jɛ Yehowa kɛ Yesu

▪ amɛbaa kɛjɛɔ amanehulu kpeteŋkpele lɛ mli

▪ amɛsɔmɔɔ Yehowa yɛ esɔlemɔtsu lɛ mli nyɔɔŋ kɛ shwane

▪ amɛnine shɛɔ Yehowa suɔmɔ kwɛmɔ kɛ hebuu nɔ

▪ Yesu nyiɛɔ amɛhiɛ kɛyaa wala nu bui ahe

[Baafa muu mfoniri ni yɔɔ baafa 121]

[Mfoniri ni yɔɔ baafa 127]

Asafo babaoo lɛ yiwalaheremɔ jɛ Nyɔŋmɔ kɛ Toobi lɛ

[Mfoniri ni yɔɔ baafa 128]

Toobi lɛ baanyiɛ asafo babaoo lɛ hiɛ kɛya wala nu bui ahe

Yitso 21

Yehowa Haomɔi ni Ekɛba Kristendom Nɔ

Ninaa 5​—Kpojiemɔ 8:1–9:21

Saneyitso: Tɛtrɛmaŋtɛrɛi kpawo lɛ amli ekpaa kpamɔ

Emlibaa be: Kɛjɛ be mli ni akɛ Kristo Yesu ta maŋtsɛsɛi nɔ yɛ 1914 kɛyashi amanehulu kpeteŋkpele be lɛ mli

 1. Mɛni ba beni Toobi lɛ tse naasɔomɔ nɔ ni ji kpawo lɛ naa lɛ?

“ATSI kɔɔyɔi ejwɛ” lɛ naa kɛyashi be mli ni aaasɔo 144,000 lɛ ni ji mumɔŋ Israel lɛ naa ni aaakpɛlɛ asafo babaoo lɛ nɔ aha yibaamɔ. (Kpojiemɔ 7:1-4, 9) Shi, dani nakai lasuogbele kpeteŋkpele lɛ aaafɛ ashwie shikpɔŋ lɛ nɔ lɛ, esa akɛ aha ale Yehowa fɔbuu kojomɔi ni ekɛshiɔ Satan je lɛ da! Yɛ be mli ni Toobi lɛ yaa nɔ etseɔ naasɔomɔ ni ji kpawo kɛ naagbee nɔ lɛ naa lɛ, no mli lɛ Yohane miikwɛ lɛ gaa koni ena nɔ ni baaje kpo kɛaajɛ mli lɛ. Agbɛnɛ egbaa wɔ eniiashikpamɔ lɛ: “Ni beni [Toobi lɛ] etse naasɔomɔ ni ji kpawo lɛ, afee diŋŋ yɛ ŋwɛi aaafee ŋmɛlɛtswaa fa. Ni mina bɔfoi kpawo lɛ ni damɔ Nyɔŋmɔ hiɛ lɛ, ni aŋɔ tɛtrɛmaŋtɛrɛi kpawo aha amɛ.”—Kpojiemɔ 8:1, 2.

Be Kɛha Sɔlemɔ ni Mli Wa

 2. Mɛni ba yɛ okadi ŋmɛlɛtswaa fa ni ŋwɛi fee dioo lɛ mli?

² Dioofeemɔ diɛŋtsɛ ko nɛ! Ŋmɛlɛtswaa fa baanyɛ afee be kakadaŋŋ kɛ ookpa gbɛ ni nɔ ko aba. Agbɛnɛ, anuuu ŋwɛi yijiemɔ lalai ni baa nɔtonɔto lɛ he dɔŋŋ. (Kpojiemɔ 4:8) Mɛni hewɔ? Yohane na nɔ hewɔ lɛ yɛ eninaa lɛ mli: “Ni bɔfo kroko ba ni ebadamɔ afɔleshaa latɛ lɛ he, ni ehiɛ shika tsofa-kɛ-ŋma shaa nɔ, ni aŋɔ tsofa-kɛ-ŋma babaoo aha lɛ, koni eŋɔfata krɔŋkrɔŋbii lɛ fɛɛ asɔlemɔi lɛ ahe yɛ shika afɔleshaa latɛ ni ma maŋtsɛsɛi lɛ hiɛ lɛ nɔ. Ni tsofa-kɛ-ŋma lɛ lasu lɛ te shi kɛjɛ bɔfo lɛ dɛŋ kɛyafata krɔŋkrɔŋbii lɛ asɔlemɔi lɛ ahe kɛtee Nyɔŋmɔ hiɛ.”—Kpojiemɔ 8:3, 4.

 3. (a) Mɛni tsofa-kɛ-ŋma shaa lɛ kaiɔ wɔ? (b) Mɛni ji ŋmɛlɛtswaa fa dioofeemɔ ni ba yɛ ŋwɛi lɛ yiŋtoo?

³ Enɛ kaiɔ wɔ akɛ, ashaa tsofa-kɛ-ŋma daa gbi yɛ kpee buu lɛ mli, kɛ agbɛnɛ yɛ sɛɛ mli afii lɛ amli lɛ yɛ Yerusalem sɔlemɔwe lɛ, yɛ Yudafoi anibii agbɛjianɔtoo lɛ shishi. (2 Mose 30:1-8) Kɛ aasha tsofa-kɛ-ŋma ni tamɔ nɛkɛ lɛ, Israelbii ni jeee osɔfoi lɛ mɛɔ yɛ krɔŋkrɔŋ he lɛ sɛɛ, amɛsɔleɔ—ŋwanejee ko bɛ he akɛ diŋŋ yɛ amɛtsuii amli—kɛhaa Mɔ ni tsofa-kɛ-ŋma lɛ lasu lɛ kwɔɔ kɛyaa eŋɔɔ lɛ. (Luka 1:10) Agbɛnɛ Yohane na ni nɔ ko ni tamɔ nakai miiya nɔ yɛ ŋwɛi. Tsofa-kɛ-ŋma lɛ ni ŋwɛibɔfo lɛ sha lɛ kɔɔ “krɔŋkrɔŋbii lɛ asɔlemɔi” lɛ he. Yɛ anɔkwale mli lɛ, atsɔɔ akɛ tsofa-kɛ-ŋma damɔ shi kɛha sɔlemɔi ni tamɔ nɛkɛ yɛ ninaa ko ni tsɔ hiɛ lɛ mli. (Kpojiemɔ 5:8; Lala 141:1, 2) Eka shi faŋŋ akɛ, okadi dioofeemɔ ni ba yɛ ŋwɛi lɛ ba lɛ nakai koni aŋmɛ gbɛ ni anu krɔŋkrɔŋbii ni yɔɔ shikpɔŋ lɛ nɔ lɛ asɔlemɔi lɛ.

4, 5. Mɛɛ yinɔsane mli nii ni tee nɔ yeɔ ebuaa wɔ ni wɔleɔ be kpalaŋŋ ni kɛ okadi ŋmɛlɛtswaa fa dioofeemɔ lɛ kpaa gbee lɛ?

⁴ Ani wɔbaanyɛ wɔtsɔɔ be mli ni enɛ ba? Hɛɛ, wɔbaanyɛ wɔtsɔɔ, kɛ wɔsusu emli saji lɛ ahe, kɛ yinɔsane mli nibii ni ba yɛ Nuŋtsɔ lɛ gbi lɛ shishijee mli lɛ he lɛ. (Kpojiemɔ 1:10) Yɛ 1918 kɛ 1919 mli lɛ, nibii ni ba yɛ shikpɔŋ lɛ nɔ lɛ kɛ nibii ni atsɔɔ mli yɛ Kpojiemɔ 8:1-4 lɛ kpaa gbee babaoo diɛŋtsɛ. Ejaakɛ afii 40 dani 1914 aaaba lɛ, Biblia Kaselɔi—taakɛ atsɛɔ Yehowa Odasefoi yɛ nakai be lɛ mli lɛ—kɛ ekaa miijaje yɛ faŋŋ akɛ Jeŋmaji abe lɛ baaba naagbee yɛ nakai afi lɛ mli. Nibii ni haoɔ mɔ ni ba yɛ 1914 lɛ ha amɛsane lɛ fee anɔkwale. (Luka 21:24; Mateo 24:3, 7, 8) Shi amɛteŋ mɛi pii hu he ye akɛ abaaŋɔ amɛ kɛjɛ shikpɔŋ nɛɛ nɔ kɛya amɛŋwɛi shihilɛ he lɛ yɛ 1914. Enɛ baaa mli. Shi moŋ, amɛtsɔ yiwaa ni naa wa mli yɛ klɛŋklɛŋ jeŋ ta lɛ mli. Buu Mɔɔ Asafo lɛ klɛŋklɛŋ sɛinɔtalɔ, Charles T. Russell gbo yɛ October 31, 1916. Kɛkɛ ni yɛ July 4, 1918 lɛ, akɛ sɛinɔtalɔ hee lɛ, Joseph F. Rutherford kɛ Asafo lɛ najiaŋdamɔlɔi krokomɛi kpawo tee Atlanta, Georgia, tsuŋwoo he, ni ayawo amɛ tsuŋ afii babaoo yɛ gbɛ ni ejaaa nɔ.

⁵ Yohane kuu lɛ mli anɔkwa Kristofoi lɛ ayiŋ fee amɛ yaa. Mɛni ji nɔ ni Nyɔŋmɔ taoɔ ni amɛfee agbɛnɛ? Mɛɛ be mli abaaŋɔ amɛ kɛya ŋwɛi? Wiemɔ ko ni eyitso ji “Ŋmaakpamɔ lɛ Eba Naagbee—Mɛni Baanyiɛ Sɛɛ?” je kpo yɛ May 1, 1919 The Watch Tower ni akala lɛ mli. Etsɔɔ shihilɛ ni aleee nɔ ni afeɔ yɛ mli nɛɛ, ni ewo anɔkwafoi lɛ hewalɛ ni amɛya nɔ ni amɛŋmɛ amɛtsui shi, akɛ: “Wɔheɔ wɔyeɔ akɛ eji anɔkwale bianɛ akɛ aaakɛɛ akɛ maŋtsɛyeli kuu lɛ ni abuaa amɛnaa lɛ ji anɔkwa sane ko ni eba mli, ni akɛ asɔo mɛnɛɛmɛi fɛɛ naa ni aŋa shinaa lɛ.” Yohane kuu lɛ sɔlemɔi ni mli wa lɛ miikwɔ kɛmiiya ŋwɛi, tamɔ tsofa-kɛ-ŋma babaoo ni ewo lasu yɛ nɛkɛ haomɔ be nɛɛ mli. Ni aanu amɛsɔlemɔi lɛ!

La ni Atsi Ashwie Shikpɔŋ Nɔ

 6. Mɛni ba yɛ dioofeemɔ ni ba yɛ ŋwɛi lɛ sɛɛ, ni mɛni ha eba lɛ nakai?

⁶ Yohane kɛɔ wɔ akɛ: “Ni bɔfo lɛ kɔ tsofa-kɛ-ŋma shaa nɔ lɛ, ni eje afɔleshaa latɛ lɛ nɔ la lɛ eko ewo lɛ obɔ, ni etsi eshwie shikpɔŋ lɛ nɔ, ni gbeei kɛ nugbɔshiimɔi kɛ sarawai kɛ shikpɔŋhosomɔi ba.” (Kpojiemɔ 8:5) Yɛ dioofeemɔ lɛ sɛɛ lɛ, trukaa pɛ kɛkɛ ni nifeemɔ je shishi! Eka shi faŋŋ akɛ enɛ ji krɔŋkrɔŋbii lɛ asɔlemɔi lɛ ahetoo, ni nɔ ni kanya enɛ feemɔ ji la ni aje kɛjɛ tsofa-kɛ-ŋma shaa latɛ lɛ nɔ lɛ. Yɛ sɛɛ mli afi ni ji 1513 D.Ŋ.B. lɛ, yɛ Sinai Gɔŋ lɛ he lɛ, nugbɔshiimɔi kɛ sarawai, kɛ hoofeemɔi kɛ la, kɛ gɔŋ lɛ hosomɔ kadi Yehowa jwɛŋmɔ ni egbala kɛba ewebii anɔ. (2 Mose 19:16-20) Nifeemɔ ni tamɔ nakai nɔŋŋ ni Yohane bɔ he amaniɛ lɛ hu tsɔɔ akɛ Yehowa miibo etsuji ni yɔɔ shikpɔŋ nɔ lɛ atoi. Shi nɔ ni Yohane naa lɛ je kpo yɛ okadii amli. (Kpojiemɔ 1:1) No hewɔ lɛ te atsɔɔ okadi la, nugbɔshiimɔi, gbee, sarawai, kɛ shikpɔŋhosomɔi lɛ ashishi ahaa tɛŋŋ yɛ ŋmɛnɛ?

 7. (a) Mɛɛ okadi la Yesu shɛre yɛ shikpɔŋ nɔ yɛ esɔɔmɔ be lɛ mli? (b) Kristo mumɔŋ nyɛmimɛi lɛ shɛre la yɛ Kristendom yɛ mɛɛ gbɛ nɔ?

⁷ Be ko lɛ Yesu kɛɛ ekaselɔi lɛ akɛ: “La-woo miba yɛ shikpɔŋ lɛ nɔ.” (Luka 12:49) Lɛlɛŋ ewo la. Yesu tsɔ ekaa ni ekɛshiɛ lɛ nɔ efee Nyɔŋmɔ Maŋtsɛyeli lɛ sane titri yɛ Yudafoi lɛ ahiɛ, ni enɛ tee ŋwanejee ni naa wa shi yɛ maŋ muu lɛ fɛɛ mli. (Mateo 4:17, 25; 10:5-7, 17, 18) Yɛ 1919 mli lɛ, Yesu mumɔŋ nyɛmimɛi ni yɔɔ shikpɔŋ nɔ lɛ, Kristofoi akuu fioo ni afɔ amɛ mu ni amɛje Jeŋ Ta I haomɔ be lɛ mli lɛ wo la ni tamɔ nakai yɛ Kristendom. Yɛ nakai afi lɛ September mli lɛ, ana Yehowa mumɔ lɛ nitsumɔ yɛ faŋŋ mli yɛ be mli ni e-Dasefoi anɔkwafoi lɛ ebua amɛhe naa kɛjɛ he ni bɛŋkɛ kɛ he ni yɔɔ shɔŋŋ yɛ Cedar Point, Ohio, U.S.A. lɛ. Joseph F. Rutherford, ni ajie lɛ yɛ tsuŋwoohe etsɛko, ní no mli lɛ eshwɛ fioo ni abaajie naafolɔmɔi ni akɛshwie enɔ lɛ kɛjɛ saneyelihe lɛ kɛ ekaa wie etsɔɔ kpee lɛ, akɛ: “Yɛ toiboo ni wɔfeɔ wɔhaa wɔ-Nuŋtsɔ lɛ famɔ, kɛ hegbɛ kɛ nitsumɔ ni wɔyɔɔ akɛ wɔkɛ apasa mɔji lɛ ni eŋɔ gbɔmɛi lɛ nom yɛ be kakadaŋŋ mli lɛ awuu ta hewɔ lɛ, wɔnitsumɔ ji ni wɔtswa Mesia anunyam maŋtsɛyeli ni baa lɛ he adafi.” Enɛ ji sane titri lɛ—Nyɔŋmɔ Maŋtsɛyeli lɛ!

8, 9. (a) Te J. F. Rutherford tsɔɔ Nyɔŋmɔ webii lɛ anifeemɔ kɛ nɔ ni amɛshweɔ yɛ tai afii ni mli wa lɛ mli eha tɛŋŋ? (b) Yɛ mɛɛ shishinumɔ naa atsi la ashwie shikpɔŋ lɛ nɔ? (d) Yɛ mɛɛ gbɛ nɔ nugbɔshiimɔi, gbee, sarawa gbalamɔi kɛ shikpɔŋhosomɔi eba?

⁸ Yɛ be mli ni ewieɔ Nyɔŋmɔ webii lɛ aniiashikpamɔ ni mli wawai ni baa amɛnɔ lɛ ahe lɛ, wielɔ lɛ kɛɛ: “Ni henyɛlɔ lɛ tutuamɔ lɛ enaaa mɔbɔ hewɔ lɛ, Nuŋtsɔ lɛ toi ni esumɔɔ amɛ lɛ ateŋ mɛi pii anaa kpɛ amɛhe, ni amɛdamɔ shi diŋŋ ni amɛhiɛ efee amɛ yaa, amɛsɔle ni amɛmɛ koni Nuŋtsɔ lɛ atsɔɔ esuɔmɔnaa nii. . . . Shi yɛ nijiaŋwujee ni ba yɛ be fioo lɛ mli lɛ fɛɛ sɛɛ lɛ, shwe ni ashweɔ akɛ aaajaje maŋtsɛyeli lɛ sane lɛ miitso tamɔ la.”—Kwɛmɔ September 15, 1919 The Watch Tower lɛ mli yɛ baafa 280.

⁹ Nakai shwe ni ashweɔ loo esuɔmɔnaa nii lɛ ba mli yɛ 1919. Aje la awo Kristofoi akuu fioo ni yɔɔ ekaa nɛɛ ateŋ, kɛ aaawie yɛ mumɔŋ, koni amɛje jeŋ muu fɛɛ shiɛmɔ nitsumɔ he tafaa shishi. (Okɛto 1 Tesalonikabii 5:19 he.) Atsi la ashwie shikpɔŋ lɛ nɔ kɛ shishinumɔ akɛ aha Nyɔŋmɔ Maŋtsɛyeli lɛ fee sane ni he hiaa fe fɛɛ, ni etee nɔ efee nakai! Akɛ gbee ni wa to dioofeemɔ najiaŋ, ni akɛjaje Maŋtsɛyeli shɛɛ sane lɛ yɛ faŋŋ mli. Kɔkɔbɔi ni tamɔ nugbɔshiimɔi ni jɛ Biblia lɛ mli jije kɛje kpo. Anɔkwale la ni kpɛɔ tamɔ sarawa gbalamɔ kpɛ kɛjɛ Yehowa gbalɛ Wiemɔ lɛ mli, ni ahoso Nyɔŋmɔ jamɔ maŋtsɛyeli he lɛ kɛyashɛ eshishitoi anɔ tamɔ shikpɔŋhosomɔ wulu ko. Yohane kuu lɛ na akɛ nitsumɔ yɛ ni esa akɛ atsu. Ni kɛbashi ŋmɛnɛ, nakai nitsumɔ lɛ mlilɛɛmɔ miiya nɔ yɛ anunyam mli yɛ shikpɔŋ ni ayɔɔ nɔ lɛ fɛɛ nɔ!—Romabii 10:18.

He ni Asaa Ahaa Tɛtrɛmaŋtɛrɛi Akpamɔ

10. Ŋwɛibɔfoi kpawo lɛ saa amɛhe koni amɛfee mɛni, ni mɛni hewɔ?

¹⁰ Yohane tee nɔ ekɛɛ: “Ni bɔfoi kpawo lɛ ni hiɛ tɛtrɛmaŋtɛrɛi kpawo lɛ saa amɛhe koni amɛkpa.” (Kpojiemɔ 8:6) Nakai tɛtrɛmaŋtɛrɛi lɛ akpamɔ tsɔɔ mɛni? Yɛ Israel gbii amli lɛ, akɛ tɛtrɛmaŋtɛrɛi akpamɔ tsuɔ nii ni akɛkadiɔ gbii ni he hiaa loo saji ni sa kadimɔ ni eba. (3 Mose 23:24; 2 Maŋtsɛmɛi 11:14) Nakai nɔŋŋ hu tɛtrɛmaŋtɛrɛi ni Yohane baanu amɛkpamɔ lɛ baagbala ejwɛŋmɔ kɛya saji ni he hiaa tamɔ wala kɛ gbele lɛ nɔ.

11. Mɛɛ hesaamɔ nitsumɔ ko Yohane kuu lɛ kɛ amɛhe wo mli yɛ shikpɔŋ nɔ ni deka bɛ mli kwraa kɛjɛ 1919 kɛbashi 1922?

¹¹ Beni ŋwɛibɔfoi lɛ fee klalo akɛ amɛaakpa tɛtrɛmaŋtɛrɛi lɛ, ŋwanejee ko bɛ he akɛ amɛkɛ gbɛtsɔɔmɔ kɛha shikpɔŋ nɔ nitsumɔ ko shishijee miiha. Kɛjɛ 1919 kɛbashi 1922 lɛ, no mli lɛ Yohane kuu ni awo amɛ hewalɛ ekoŋŋ lɛ bɛ deka kwraa yɛ maŋ sɔɔmɔ lɛ kɛ woji afeemɔ kɛ ekalamɔ he gbɛjianɔtoo mli. Yɛ 1919 lɛ, wolo tɛtrɛɛ, The Golden Age, ni ale ŋmɛnɛ akɛ Awake! lɛ je kpo akɛ “Anɔkwale, Hiɛnɔkamɔ, kɛ Hekɛnɔfɔɔ Wolo”—dɛŋdade ko ni tamɔ tɛtrɛmaŋtɛrɛ ni baatsu nitsumɔ titri ko yɛ apasa jamɔ ni kɛ ehe woɔ maŋkwramɔŋ saji amli lɛ he mama kpamɔ mli.

12. Tɛtrɛmaŋtɛrɛ lɛ eko fɛɛ eko kpamɔ tswaa mɛni he adafi, ni mɛni ekaiɔ wɔ yɛ Mose gbii lɛ amli?

¹² Taakɛ wɔbaana agbɛnɛ lɛ, tɛtrɛmaŋtɛrɛ lɛ eko fɛɛ eko kpamɔ tswaa sane ko ni baaba ni haomɔi wuji ni yɔɔ gbeyei saa shikpɔŋ lɛ hei komɛi ahe lɛ he adafi. Enɛɛmɛi ekomɛi kaiɔ wɔ haomɔi ni Yehowa tsu kɛba koni akɛgbala Mizraimbii ni yɔɔ Mose gbii lɛ amli lɛ atoi lɛ. (2 Mose 7:19-12:32) Enɛɛmɛi ji Yehowa kojomɔi ni ekɛba nakai maŋ lɛ nɔ lɛ kpojiemɔ, ni amɛgbele gbɛ koni Nyɔŋmɔ webii lɛ ajo foi kɛjɛ nyɔŋyeli mli. Haomɔi ni Yohane na lɛ tsɔɔ nɔ ko ni tamɔ nakai. Shi, amɛjeee haomɔi diɛŋtsɛ. Amɛji okadii ni feɔ Yehowa jalɛ kojomɔi ahe mfoniri.—Kpojiemɔ 1:1.

“Mlijai Etɛ Mli Ekome” lɛ Yɔsemɔ

13. Mɛni ba beni akpa klɛŋklɛŋ tɛtrɛmaŋtɛrɛi ejwɛ lɛ, ni mɛɛ sanebimɔ enɛ teɔ lɛ shi?

¹³ Taakɛ wɔbaana lɛ, beni akpa tɛtrɛmaŋtɛrɛi lɛ amli klɛŋklɛŋ ejwɛ lɛ, akɛ haomɔi ba shikpɔŋ lɛ, ŋshɔ lɛ, kɛ faai kɛ nu bui, kɛ shikpɔŋ lɛ la jɛɛhei “amlijai etɛ mli ekome” nɔ. (Kpojiemɔ 8:7-12) Mlijai etɛ mli ekome ji nɔ ko fã ni fa shi jeee nii muu lɛ fɛɛ. (Okɛto Yesaia 19:24; Ezekiel 5:2; Zakaria 13:8, 9 he.) No hewɔ lɛ mɛɛ “mlijai etɛ mli ekome” baafee nɔ ni sa nɛkɛ haomɔi nɛɛ? Satan kɛ eseshi lɛ eshwila adesai ateŋ mɛi ni fa lɛ ahiŋmɛi ni efite amɛ. (1 Mose 3:15; 2 Korintobii 4:4) Shihilɛ lɛ tamɔ bɔ ni David tsɔɔ mli lɛ: “Amɛ fɛɛ amɛgba afa, amɛfite; gbɔmɔ ko bɛ ni feɔ ekpakpa, dabi, mɔ kome folo bɛ!” (Lala 14:3) Hɛɛ, oshara yɛ akɛ fɔbuu kojomɔ baaba adesai fɛɛ nɔ. Shi efa titri ko ji nɔ ni eye fɔ fe fɛɛ. Kulɛ esa akɛ efa ko—“mlijai etɛ mli ekome”—ale nii fe nakai! Mɛni ji nakai “mlijai etɛ mli ekome” lɛ?

14. Mɛni ji okadi mlijai etɛ mli ekome ni nine shɛɔ shɛɛ saji ni ji haomɔi anɔ kɛjɛɔ Yehowa ŋɔɔ lɛ?

¹⁴ No ji Kristendom! Yɛ 1920 afii lɛ amli lɛ, no mli lɛ enɔyeli he lɛ shɛɔ aaafee adesai amlijai etɛ mli ekome. Ejamɔ lɛ ji yibii ni hemɔkɛyeli kwamɔ kpeteŋkpele kɛmiijɛ anɔkwale Kristojamɔ he lɛ ewo—hemɔkɛyeli kwamɔ ni Yesu kɛ ekaselɔi lɛ gba fɔ shi lɛ. (Mateo 13:24-30; Bɔfoi lɛ Asaji 20:29, 30; 2 Tesalonikabii 2:3; 2 Petro 2:1-3) Kristendom osɔfoi lɛ kɛɔ akɛ amɛyɛ Nyɔŋmɔ sɔlemɔwe lɛ ni amɛkɛ amɛhe tsɔɔ akɛ Kristojamɔ tsɔɔlɔi. Shi amɛtsɔɔmɔi lɛ kɛ Biblia mli anɔkwale lɛ teŋ jɛkɛ naakpa, ni amɛyaa nɔ amɛgbeɔ Nyɔŋmɔ gbɛi lɛ he guɔ daa. Akɛni edamɔ shi kɛha nɛkɛ okadi mlijai etɛ mli ekome nɛɛ hewɔ lɛ, Kristendom nine shɛɔ haomɔi ni ji shɛɛ saji ni naa wa nɔ kɛjɛɔ Yehowa ŋɔɔ. Ŋwɛi duromɔ ko kwraa esaaa nakai adesai amlijai etɛ mli ekome lɛ!

15. (a) Ani tɛtrɛmaŋtɛrɛi lɛ eko fɛɛ eko kpamɔ yaa nɔ yɛ afi pɔtɛɛ ko mli? Tsɔɔmɔ mli. (b) Namɛi kɛ amɛgbee efata Yohane kuu lɛ anɔ he ni amɛkɛmiijaje Yehowa kojomɔi lɛ?

¹⁵ Bɔni afee ni ekɛ tɛtrɛmaŋtɛrɛi akpamɔ ni agbe naa lɛ akpa gbee lɛ, atsu yiŋkpɛi krɛdɛɛi ahe nii yɛ kpeei kpawo ni afee kɛjɛ 1922 kɛbashi 1928 lɛ ashishi. Shi jeee nakai afii lɛ pɛ tɛtrɛmaŋtɛrɛ kpamɔi lɛ yaa nɔ yɛ mli. Kristendom yiwalɛ gbɛi lɛ ahe mama kpamɔ yɛ ekaa naa lɛ etee nɔ yɛ be fɛɛ mli, eeya nɔ lolo, yɛ be mli ni Nuŋtsɔ lɛ gbi lɛ yaa hiɛ lɛ. Esa akɛ ajaje Yehowa kojomɔi lɛ yɛ jeŋ muu fɛɛ, kɛha jeŋmaji fɛɛ, yɛ majimaji ateŋ nyɛɛ kɛ yiwaa lɛ fɛɛ sɛɛ. Ni no dani Satan gbɛjianɔtoo lɛ naagbee aaaba. (Marko 13:10, 13) Yɛ miishɛɛ mli lɛ, asafo babaoo lɛ kɛ egbee efata Yohane kuu lɛ nɔ he koni amɛkɛ shɛɛ saji ni jijeɔ tamɔ nugbɔshiimɔi ni he hiaa yɛ jeŋ fɛɛ lɛ aha.

Shikpɔŋ lɛ Mlijai Etɛ Mli Ekome Sha

16. Mɛni nyiɛ sɛɛ ba beni klɛŋklɛŋ ŋwɛibɔfo lɛ kpa etɛtrɛmaŋtɛrɛ lɛ?

¹⁶ Yɛ be mli ni ebɔɔ ŋwɛibɔfoi lɛ ahe amaniɛ lɛ, Yohane ŋma akɛ: “Ni klɛŋklɛŋ bɔfo lɛ kpa, ni nyɔŋmɔŋtɛ kɛ la ni lá futu mli ba ni ebashwie shikpɔŋ lɛ nɔ, ni shikpɔŋ lɛ mlijai etɛ mli ekome sha, ni tsei amlijai etɛ mli ekome sha, ni jwɛi fɔ fɛɛ sha.” (Kpojiemɔ 8:7) Enɛ tamɔ haomɔ ni ji kpawo ni ba Mizraim nɔ lɛ, shi ani ehaoɔ mɛi yɛ wɔbei nɛɛ amli?—2 Mose 9:24.

17. (a) Mɛni ji nɔ ni wiemɔ “shikpɔŋ” lɛ damɔ shi kɛha yɛ Kpojiemɔ 8:7? (b) Ashaa Kristendom shikpɔŋ lɛ mlijai etɛ mli ekome yɛ mɛɛ gbɛ nɔ?

¹⁷ Yɛ Biblia mli lɛ, wiemɔ “shikpɔŋ” lɛ tsɔɔ adesai yɛ be babaoo mli. (1 Mose 11:1; Lala 96:1) Akɛni haomɔ ni ji enyɔ lɛ ba ŋshɔ lɛ nɔ, ni no hu kɔɔ adesai ahe hewɔ lɛ, “shikpɔŋ” lɛ baanyɛ akɔ adesai aweku ni feɔ tamɔ amɛyɛ shiŋŋ ni Satan etswa ema shi ni etsɛŋ abaakpata amɛhiɛ lɛ he. (2 Petro 3:7; Kpojiemɔ 21:1) Haomɔ ni ato naa ni baaba lɛ jieɔ lɛ kpo akɛ Yehowa mlifu ni naa wa lɛ mli la lɛ esha Kristendom shikpɔŋ lɛ mlijai etɛ mli ekome. Emli gbɔmɛi wuji ni ale amɛ lɛ—ni damɔ shi tamɔ tsei yɛ eteŋ lɛ—Yehowa fɔbuu kojomɔi ni ajajeɔ lɛ shaa amɛ. Kɛji akɛ esɔlemɔ lɛ mli bii akpekpei ohai abɔ lɛ tee nɔ amɛfi Kristendom jamɔ lɛ sɛɛ lɛ, amɛbatsɔmɔɔ tamɔ jwɛi fɔ ni asha, ni amɛgboi yɛ mumɔŋ yɛ Nyɔŋmɔ hiɛ.—Okɛto Lala 37:1, 2 he.a

18. Ajaje Yehowa kojomɔ saji lɛ yɛ 1922 Cedar Point kpee lɛ shishi yɛ mɛɛ gbɛ nɔ?

¹⁸ Mɛɛ gbɛ nɔ atsɔɔ akɛ nɛkɛ kojomɔ saji nɛɛ haa yɛ? Jeee kɛmiitsɔ jeŋ adafitswaa woji loo redio nɔ, ejaakɛ amɛji je lɛ fa ni yɛ be babaoo mli lɛ amɛgbeɔ Nyɔŋmɔ “tsuji” lɛ ahe guɔ. (Mateo 24:45) Ajaje enɛ atsɔɔ yɛ gbɛ ni sa kadimɔ jogbaŋŋ nɔ yɛ Nyɔŋmɔ webii ahenaabuamɔ ni ji enyɔ ni fee yinɔsane lɛ shishi yɛ Cedar Point, Ohio, yɛ September 10, 1922. Mɛnɛɛmɛi kɛ miishɛɛ kɛ ekomefeemɔ kpɛlɛ yiŋkpɛɛ ko ni eyitso ji “Mpoa ni Atswaa Jeŋ Hiɛnyiɛlɔi” lɛ nɔ. Etsɔ wiemɔi ni awieɔ lɛ kpookpoo mli ehɛle ŋmɛnɛŋmɛnɛ beaŋ okadi shikpɔŋ lɛ shi, kɛ wiemɔi ni nyiɛ sɛɛ nɛɛ: “No hewɔ lɛ wɔmiitsɛ shikpɔŋ lɛ nɔ jeŋmaji lɛ, amɛnɔyelɔi kɛ hiɛnyiɛlɔi lɛ, kɛ sɔlemɔi sɔrɔtoi ni yɔɔ shikpɔŋ nɔ lɛ amli osɔfoi lɛ fɛɛ, amɛ sɛɛnyiɛlɔi kɛ hefatalɔi lɛ, jarayeli nitsumɔtsɛmɛi wuji kɛ maŋkwralɔi wuji lɛ, ni amɛkɛ amɛ odaseyeli ni buɔ amɛ bem yɛ gbɛhe ni amɛkɔ akɛ amɛbaanyɛ amɛto toiŋjɔlɛ kɛ shweremɔ yɛ shikpɔŋ nɔ ni amɛkɛ miishɛɛ abaha gbɔmɛi lɛ aba; ni kɛ amɛnyɛɛɛ amɛfee nakai lɛ, wɔmiibi ni amɛfee toiboo amɛha odaseyeli ni wɔ akɛ odasefoi lɛ wɔyeɔ wɔhaa Nuŋtsɔ lɛ, ni agbɛnɛ ha amɛkɛɛ kɛji akɛ wɔ odaseyeli lɛ ji anɔkwale aloo ejeee nakai.”

19. Mɛɛ odaseyeli Nyɔŋmɔ webii lɛ kɛha Kristendom yɛ Nyɔŋmɔ Maŋtsɛyeli lɛ he?

¹⁹ Mɛɛ odaseyeli nɛkɛ Kristofoi nɛɛ kɛha? Enɛ: “Wɔheɔ wɔyeɔ ni wɔmiijaje akɛ Mesia maŋtsɛyeli lɛ ji tsofa ni yeɔ emuu kɛha adesai ahelai fɛɛ ni no kɛ toiŋjɔlɛ baaba shikpɔŋ nɔ kɛ tsuijurɔ hu kɛha gbɔmɛi, jeŋmaji fɛɛ asuɔmɔnaa nii lɛ; akɛ mɛi ni jɛɔ amɛsuɔmɔ mli amɛkɛ amɛhe haa nɛkɛ jalɛ nɔyeli ni eje shishi bianɛ lɛ, akɛ naanɔ toiŋjɔlɛ, wala, heyeli, kɛ naanɔ miishɛɛ baajɔɔ amɛ.” Yɛ nɛkɛ fitemɔ bei nɛɛ amli, beni nɔyelii ni adesa to, titri lɛ nɔ ni yɔɔ Kristendom lɛ nyɛɛɛ afee nɔ ko kwraa ni amɛkɛaana tsabaa amɛha jeŋ haomɔi lɛ, nakai mpoatswaa ni tamɔ tɛtrɛmaŋtɛrɛ lɛ jijeɔ kɛ hewalɛ ni naa wa fe 1922 nɔ lɛ. Kwɛ bɔ ni eji anɔkwale akɛ Nyɔŋmɔ Maŋtsɛyeli ni yɔɔ e-Kristo lɛ ni yeɔ kunim lɛ dɛŋ lɛ ji adesai ahiɛnɔkamɔ kome pɛ ha!

20. (a) Mɛɛ gbɛ nɔ Kristofoi ni afɔ amɛ mu lɛ asafo lɛ etsɔ amɛkɛ kojomɔ saji ni tamɔ tɛtrɛmaŋtɛrɛi akpamɔ eha yɛ 1922 kɛ no sɛɛ? (b) Mɛni ba Kristendom nɔ yɛ klɛŋklɛŋ tɛtrɛmaŋtɛrɛ lɛ kpamɔ hewɔ?

²⁰ Atsɔ yiŋkpɛi, dɛhiɛmɔ woji, woji bibii, woji wuji, woji tɛtrɛbii kɛ shiɛmɔ wiemɔi anɔ akɛ enɛ kɛ sɛɛ mli jajemɔi ni tamɔ tɛtrɛmaŋtɛrɛi lɛ ha kɛtsɔ Kristofoi ni afɔ amɛ mu lɛ asafo lɛ nɔ. Nɔ ni jɛ klɛŋklɛŋ tɛtrɛmaŋtɛrɛ lɛ kpamɔ mli ba ji Kristendom ni atswia lɛ nii tamɔ akɛ nu ni ewa shimɔɔ lɛ. La yi sɔ ni eye, yɛ ehe ni ekɛwo afii ohai 20 lɛ mli tai amli lɛ ji nɔ ko ni ajie fɛɛ kpo yɛ faŋŋ mli, ni ajie lɛ kpo atsɔɔ akɛ esa Yehowa mlifu ni naa wa ni tamɔ la lɛ. Yohane kuu lɛ, ni yɛ sɛɛ mli lɛ asafo babaoo lɛ fiɔ amɛsɛɛ lɛ etee nɔ eha klɛŋklɛŋ tɛtrɛmaŋtɛrɛ kpamɔ lɛ ejije, ni agbala jwɛŋmɔ kɛtee bɔ ni Yehowa kwɛɔ Kristendom ehaa akɛ hiɛkpatamɔ pɛ sa lɛ lɛ nɔ.—Kpojiemɔ 7:9, 15.

Tamɔ Gɔŋ ni Shaa kɛ La

21. Mɛni ba beni ŋwɛibɔfo ni ji enyɔ lɛ kpa etɛtrɛmaŋtɛrɛ lɛ?

²¹ “Ni bɔfo ni ji enyɔ lɛ kpa, ni ashɛ nɔ ko ni tamɔ gɔŋ ni shaa kɛ la afɔ ŋshɔŋ, ni ŋshɔ lɛ mlijai etɛ mli ekome tsɔ lá, ni ŋshɔ lɛ mli bɔɔ nii ni yɔɔ wala lɛ amlijai etɛ mli ekome gboi, ni lɛji lɛ amlijai etɛ mli ekome fite.” (Kpojiemɔ 8:8, 9) Mɛni ji nɔ ni nɛkɛ ninaa ni yɔɔ gbeyei nɛɛ feɔ he mfoniri?

22, 23. (a) Mɛɛ yiŋkpɛɛ ba ni ŋwanejee ko bɛ he akɛ ejɛ tɛtrɛmaŋtɛrɛ ni ji enyɔ lɛ kpamɔ lɛ? (b) “Ŋshɔ lɛ mlijai etɛ mli ekome” lɛ damɔ shi kɛha mɛni?

²² Wɔbaanyɛ wɔdamɔ kpee ni Yehowa webii fee yɛ Los Angeles, California, U.S. Amerika yɛ August 18-26, 1923 lɛ nɔ wɔnu shishi jogbaŋŋ. Hɔɔ shwane wiemɔ ni ato ni J. F. Rutherford kɛbaaha lɛ ji “Gwantɛŋi kɛ Abotiai.” Ayoo “gwantɛŋi” lɛ yɛ faŋŋ mli akɛ gbɔmɛi ni sumɔɔ jalɛnifeemɔ ni baana Nyɔŋmɔ Maŋtsɛyeli lɛ nɔyeli he ni yɔɔ shikpɔŋ nɛɛ nɔ lɛ. Yiŋkpɛɛ ko ni nyiɛ sɛɛ lɛ gbala jwɛŋmɔ kɛtee osato ni “osɔfoi ni amɛkwa hemɔkɛyeli lɛ kɛ ‘amɛtoi lɛ amli mɛi titrii’ ni ji je lɛŋ gbɔmɛi ni he wa yɛ shika gbɛfaŋ kɛ maŋkwramɔŋ lɛ feɔ lɛ nɔ.” Etsɛ ni “gbɔmɛi babaoo ni sumɔɔ toiŋjɔlɛ kɛ gbɛjianɔtoo kpakpa ni yɔɔ sɔlemɔi sɔrɔtoi lɛ amli lɛ . . . agbala amɛhe shi kɛjɛ osɔfoi agbɛjianɔtoo ni ejaaa ni Nuŋtsɔ lɛ tsɛɔ lɛ akɛ ‘Babilon’ lɛ he” ni amɛ diɛŋtsɛ lɛ amɛfee klalo “ni amɛnine ashɛ Nyɔŋmɔ maŋtsɛyeli lɛ mli jɔɔmɔi anɔ.”

²³ Ŋwanejee ko bɛ he akɛ nɛkɛ yiŋkpɛɛ nɛɛ ba yɛ tɛtrɛmaŋtɛrɛ ni ji enyɔ lɛ jijemɔ hewɔ. Mɛi ni yɛ be ni sa mli lɛ amɛbaakpɛlɛ nakai sane lɛ nɔ lɛ baatsi amɛhe kɛjɛ mɛi ni Yesaia tsɔɔ bɔ ni amɛji lɛ mli kɛ nɛkɛ wiemɔi nɛɛ lɛ ahe: “Shi mɛi fɔji tamɔ ŋshɔ ni efee hamahama, ejaakɛ enyɛɛɛ dioo efee, shi emli nu lɛ looɔ ŋmiamɔ kɛ ŋmɔtɔ eshwieɔ.” (Yesaia 57:20; 17:12, 13) No hewɔ lɛ, “ŋshɔ” lɛ feɔ adesai ni ehao ni nyɛɛɛ amɛfee dioo, kɛ adesai atuatselɔi ni kanyaa yeyeeyefeemɔ kɛ maŋ hiɛ atuatsemɔ lɛ ahe mfoniri. (Okɛto Kpojiemɔ 13:1 he.) Be baashɛ ni nakai “ŋshɔ” lɛ bɛ dɔŋŋ. (Kpojiemɔ 21:1) Dani enɛ aaaba lɛ, Yehowa tsɔ tɛtrɛmaŋtɛrɛ ni ji enyɔ lɛ kpamɔ nɔ ejaje kojomɔ eshwie emlijai etɛ mli ekome nɔ—fa ni anyɛɛɛ nɔ aye ni yɔɔ Kristendom nɔyeli he lɛ diɛŋtsɛ lɛ.

24. Gɔŋ ni shaa tamɔ la ni afɔ̃ awo ŋshɔ mli lɛ feɔ mɛni he mfoniri?

²⁴ Afɔ nɔ ko ni tamɔ gɔŋ ni tsoɔ kɛ la awo nɛkɛ “ŋshɔ” nɛɛ mli. Yɛ Biblia mli lɛ, akɛ gɔji feɔ nɔyelii ahe mfoniri. Akɛ nɔkwɛmɔnɔ lɛ, afee Nyɔŋmɔ Maŋtsɛyeli lɛ he mfoniri akɛ gɔŋ ko. (Daniel 2:35, 44) Babilon ni fiteɔ nii lɛ hu batsɔ “gɔŋ ni ashã.” (Yeremia 51:25) Shi gɔŋ ni Yohane na lɛ miisha lolo. Ŋshɔ mli ni afɔ̃ awo lɛ feɔ bɔ ni yɛ klɛŋklɛŋ jeŋ ta lɛ mli kɛ esɛɛ fɛɛ lɛ, nɔyeli he sane lɛ bafee tamɔ sane ko ni tsoɔ yɛ adesai ateŋ lɛ, titri lɛ yɛ Kristendom shikpɔji anɔ lɛ. Yɛ Italia lɛ, Mussolini kɛ Fascist nɔyeli lɛ ba. Germany hu kpɛlɛ Hitler Nazi nɔyeli lɛ nɔ, yɛ be mli ni maji krokomɛi ka kwasafo nɔyelii sɔrɔtoi amɛkwɛ. Tsakemɔ ko ni naa wa ba yɛ Russia, he ni Bolshevik maŋ hiɛ atuatsemɔ lɛ kɛ klɛŋklɛŋ Komunist maŋ lɛ ba lɛ, ni nɔ ni jɛ mli ba ji akɛ jamɔ mli hiɛnyiɛlɔi ni yɔɔ Kristendom lɛ laaje hewalɛ ni amɛyɔɔ yɛ mɛi anɔ yɛ tsutsu he ni ji amɛshidaamɔ he ni wa lɛ.

25. Nɔyeli etee nɔ efee sane ni tsoɔ tamɔ la yɛ Jeŋ Ta II sɛɛ yɛ mɛɛ gbɛ nɔ?

²⁵ Jeŋ ta ni ji enyɔ lɛ fite Fascist kɛ Nazi kaa-kɛ-kwɛmɔ lɛ, shi nɔyeli tee nɔ efee sane ko ni tsoɔ tamɔ la, ni adesa ŋshɔ lɛ tee nɔ etsɔmɔ ni efɛ̃ maŋ hiɛ atuatsemɔ nɔyelii heei kɛba. Yɛ afi 1945 sɛɛ afii nyɔŋmai abɔ lɛ mli lɛ, ato nɛkɛ nɔyelii nɛɛ yɛ hei babaoo, tamɔ China, Vietnam, Cuba, kɛ Nicaragua. Asraafoi ayiwalɛ nɔyeli ni aka akwɛ lɛ nyɛɛɛ adamɔ shi yɛ Hela. Nɔ ni jɛ Komunist nɔyeli ni Kampuchea (Cambodia) kɛ ehe wo mli lɛ mli ba ji gbɔmɛi fe akpekpei enyɔ ni gboi.

26. Yɛ mɛɛ gbɛ nɔ “gɔŋ ni shaa kɛ la” lɛ etee nɔ efee ŋshɔkei yɛ adesai ni tamɔ ŋshɔ lɛ ateŋ?

²⁶ Nakai “gɔŋ ni shaa kɛ la” lɛ yaa nɔ efeɔ ŋshɔkei yɛ adesai ŋshɔ lɛ mli lolo. Atee nɔ abɔ nɔyeli hepelemɔi yɛ Afrika, Amerika Wuoyigbɛ, Asia, kɛ Pacific ŋshɔkpɔi lɛ anɔ lɛ ahe amaniɛ. Nɔyeli hepelemɔi nɛɛ babaoo tee nɔ yɛ Kristendom shikpɔji anɔ aloo he ni Kristendom maŋsɛɛ sanekpakpashiɛlɔi lɛ kɛ amɛhe ewo mli lɛ anɔ. Roma Katolik osɔfoi po kɛ amɛhe wo mli ni amɛwuu ta akɛ Komunist asraafoi ni butuɔ nɔyelii. Yɛ nakai beaŋ nɔŋŋ lɛ, Protestant sanekpakpashiɛlɔi akui tsu nii yɛ Central Amerika koni amɛkɛku nɔ ni amɛtsɛ lɛ Komunistbii “ahiɛdɔɔ kɛ hewalɛ kumai ni yeɔ amɛ ni baaa shi” lɛ naa. Shi nɛkɛ hosomɔi ni yaa nɔ yɛ adesai ni tamɔ ŋshɔ lɛ mli lɛ eko kwraa bɛ ni enyɛ ekɛ toiŋjɔlɛ kɛ shweshweeshwe shihilɛ eba.—Okɛto Yesaia 25:10-12; 1 Tesalonikabii 5:3 he.

27. (a) “Ŋshɔ lɛ mlijai etɛ mli ekome” tsɔ tamɔ lá yɛ mɛɛ gbɛ nɔ? (b) ‘Bɔɔ nii ni yɔɔ ŋshɔ mli lɛ amlijai etɛ mli ekome’ gboi yɛ mɛɛ gbɛ nɔ, ni mɛni baaba “lɛji lɛ amlijai etɛ mli ekome” nɔ?

²⁷ Tɛtrɛmaŋtɛrɛ ni ji enyɔ lɛ kpamɔ lɛ jieɔ lɛ kpo akɛ adesai ateŋ mɛi ni kɛ amɛhe woɔ maŋ hiɛ atuatsemɔ he bei yɛ nɔyeli lɛ mli moŋ fe ni amɛaaba amɛhe shi amɛha Nyɔŋmɔ Maŋtsɛyeli lɛ eye la yi sɔ. Titri lɛ Kristendom “ŋshɔ lɛ mlijai etɛ mli ekome” etsɔ tamɔ lá. Nibii fɛɛ ni yɔɔ wala ni yɔɔ mli lɛ egboi yɛ Nyɔŋmɔ hiɛ. Gbɛjianɔtoi sɔrɔtoi ni yɔɔ veveeve ni hoɔ yɛ hiɛ tamɔ lɛlɛ yɛ nakai ŋshɔ lɛ mlijai etɛ mli ekome lɛ mli lɛ nyɛŋ akwa naagbee shishamɔ. Kwɛ miishɛɛ ni wɔna akɛ gbɔmɛi akpekpei abɔ ni tamɔ gwantɛŋi ebo tsɛmɔ ni tamɔ tɛtrɛmaŋtɛrɛ kpamɔ akɛ amɛtsi amɛhe kɛjɛ mɛi ni kokoloɔ yɛ maŋhedɔɔ jwɛŋmɔ fintɔŋŋ lɛ kɛ nakai ŋshɔ lɛ mli la yi sɔyeli lɛ he lɛ toi agbɛnɛ.

Ŋulami ko Jɛ Ŋwɛi Bagbee Shi

28. Mɛni ba beni ŋwɛibɔfo ni ji etɛ kpa etɛtrɛmaŋtɛrɛ lɛ?

²⁸ “Ni bɔfo ni ji etɛ lɛ kpa, ni ŋulami kpeteŋkpele ni tsoɔ tamɔ haa jɛ ŋwɛi bagbee shi, ni egbee faai lɛ amlijai etɛ mli ekome kɛ nu bui lɛ anɔ. Ni ŋulami lɛ gbɛi ji apsinto (joomɔ tso), ni nui lɛ amlijai etɛ mli ekome tsɔ joomɔ tsofa, ni gbɔmɛi pii gboi yɛ nui lɛ ahewɔ, ejaakɛ amɛmiijoo.” (Kpojiemɔ 8:10, 11) Biblia lɛ fai krokomɛi yeɔ ebuaa wɔ shikome ekoŋŋ ni wɔna bɔ ni nɛkɛ ŋmalɛ nɛɛ kɔɔ Nuŋtsɔ lɛ gbi lɛ he ehaa.

29. Mɛni haa “ŋulami kpeteŋkpele ni tsoɔ tamɔ haa” lɛ he okadi lɛ baa mli, ni mɛni hewɔ?

²⁹ Wɔkɛ ŋulami ni yɔɔ Yesu shɛɛ saji ni ekɛyaha asafoi kpawo lɛ ni ŋulamii kpawo lɛ feɔ onukpai ni yɔɔ asafoi lɛ amli lɛ he mfoniri lɛ okadi lɛ ekpe momo.b (Kpojiemɔ 1:20) “Ŋulamii” ni afɔ amɛ mu lɛ kɛ mɛi krokomɛi fɛɛ ni afɔ amɛ mu lɛ, hiɔ ŋwɛi shihilɛ hei yɛ mumɔŋ shishinumɔ naa kɛjɛ be mli ni akɛ mumɔ krɔŋkrɔŋ lɛ sɔo amɛnaa akɛ okadi ni yeɔ amɛ ŋwɛi shihilɛ he lɛ he odase lɛ. (Efesobii 2:6, 7) Shi, bɔfo Paulo bɔ kɔkɔ akɛ hemɔkɛyeli kwalɔi, mɛi ni kɛ mligbalamɔi baa, baafa kpo kɛaajɛ nɛkɛ gbɔmɛi ni tamɔ ŋulamii nɛɛ ateŋ ni amɛbaashishiu asafo kuu lɛ. (Bɔfoi lɛ Asaji 20:29, 30) Nɔ ni baajɛ anɔkwale ni ayeee nɛɛ mli aba ji hemɔkɛyeli kwamɔ kpeteŋkpele, ni nɛkɛ onukpai ni amɛgbee shi nɛɛ baafee mlakwamɔ gbɔmɔ ko ni mɛi pii yɔɔ mli, ni baawo ehe nɔ kɛyashɛ nyɔŋmɔ gbɛhe mli yɛ adesai ateŋ. (2 Tesalonikabii 2:3, 4) Paulo kɔkɔbɔi lɛ ba mli yɛ be mli ni Kristendom osɔfoi lɛ pue ni ayoo amɛ yɛ je lɛŋ lɛ. Nɛkɛ kuu nɛɛ damɔ shi kɛha okadi ni ji “ŋulami kpeteŋkpele ni tsoɔ tamɔ haa” lɛ.

30. (a) Beni akɛ Babilon maŋtsɛ lɛ wie akɛ mɔ ni ejɛ ŋwɛi ebagbee shi lɛ, mɛni ji eshishi? (b) Shi ni agbeɔ kɛjɛɔ ŋwɛi lɛ baanyɛ atsɔɔ mɛni?

³⁰ Yohane na ni nɛkɛ ŋulami pɔtɛɛ nɛɛ miijɛ ŋwɛi miigbe shi. Yɛ mɛɛ gbɛ nɔ? Blema maŋtsɛ ko niiashikpamɔ yeɔ ebuaa wɔ koni wɔnu shishi. Yɛ be mli ni ewieɔ etsɔɔ Babilon maŋtsɛ lɛ, Yesaia kɛɛ: “Te fee tɛŋŋ ni ojɛ ŋwɛi obagbee shi nɛɛ, bo toloo ni okpɛɔ hɛŋŋ! Te fee tɛɛ ni afɔ̃o afɔ shikpɔŋ nɛɛ, bo ni obaa jeŋmaji lɛ ashi lɛ!” (Yesaia 14:12) Nɛkɛ gbalɛ nɛɛ ba mli yɛ be mli ni Koresh asraafoi lɛ butu Babilon, ni emaŋtsɛ lɛ kpeleke shi trukaa kɛjɛ jeŋ nɔyeli he lɛ kɛba enɔ kunim ni aye yɛ hiɛshishwiemɔ mli lɛ. No hewɔ lɛ, shigbeemɔ kɛmiijɛ ŋwɛi baanyɛ akɔ gbɛhe ko ni kwɔ grɔŋŋ ni aaaje mɔ ko dɛŋ ni agbee shi kɛbote hiɛshishwiemɔ mli lɛ he.

31. (a) Mɛɛ be mli Kristendom osɔfoi lɛ gbee shi kɛjɛ amɛ “ŋwɛi” gbɛhe lɛ mli? (b) Yɛ mɛɛ gbɛ nɔ nui ni osɔfoi lɛ kɛhaa lɛ etsɔ “joomɔ tso,” ni mɛni ejɛ mli eba mɛi pii anɔ?

³¹ Beni Kristendom osɔfoi lɛ kwa anɔkwa Kristojamɔ hemɔkɛyeli lɛ, amɛgbee shi kɛjɛ “ŋwɛi” gbɛhe ni kwɔ grɔŋŋ ni Paulo tsɔɔ mli yɛ Efesobii 2:6, 7 lɛ mli. Ni amɛkɛ anɔkwale nui ŋma aaaha moŋ lɛ, amɛkɛ “joomɔ tso” ha, amalei ni ehiii kwraa tamɔ hɛl la, hetsuumɔ he, Triniti lɛ, kɛ shɛɛ mli sane; agbɛnɛ hu, amɛnyiɛ jeŋmaji lɛ ahiɛ kɛtee ta, ni amɛtswaaa amɛ amɛmaaa shi akɛ Nyɔŋmɔ tsuji ni yɔɔ jeŋba. Mɛni jɛ mli ba? Mumɔŋ ebɔɔ ni amɛkɛha mɛi ni he amalei lɛ amɛye lɛ. Amɛsane lɛ tamɔ Israelbii ni yeee anɔkwale ni hi shi yɛ Yeremia gbii lɛ amli lɛ ni Yehowa wie nɛkɛ yɛ amɛhe lɛ: “Naa, mikɛ taatso (joomɔ tso) aaafee amɛniyenii, ni maha amɛ nu ni ebɔɔ yɔɔ mli amɛnu; ejaakɛ Yerusalem gbalɔi lɛ aŋɔɔ efɔŋ feemɔ jɛ kɛtee shikpɔŋ lɛ nɔ fɛɛ!”—Yeremia 9:15; 23:15.

32. Mɛɛ be mli Kristendom shigbeemɔ kɛmiijɛ mumɔŋ ŋwɛi lɛ bafee faŋŋ, ni afee enɛ he nɔkwɛmɔnɔ yɛ mɛɛ gbɛ nɔ?

³² Nɛkɛ shigbeemɔ kɛmiijɛ mumɔŋ ŋwɛi nɛɛ baje kpo faŋŋ yɛ afi 1919, beni ahala Kristofoi ni afɔ amɛ mu lɛ ateŋ shwɛɛnii fioo lɛ akɛ amɛkwɛ Maŋtsɛyeli lɛ he nibii anɔ moŋ, fe Kristendom osɔfoi lɛ. (Mateo 24:45-47) Ni kɛjɛ 1922 kɛbaa lɛ afee nakai shigbeemɔ lɛ he nɔkwɛmɔnɔ beni nɛkɛ Kristofoi akuu nɛɛ kanya amɛtafaa ni kɔɔ nibii ni Kristendom osɔfoi lɛ efeee lɛ ahe ni amɛkpaa he mama yɛ faŋŋ mli ekoŋŋ lɛ.

33. Mɛɛ Kristendom osɔfoi lɛ ahe mama akpa yɛ 1924 kpee ni afee yɛ Columbus, Ohio, U.S.A. lɛ shishi?

³³ Nɔ ni yɔɔ sɔrɔto ni ekaaa yɛ enɛ mli ji nɔ ni The Golden Age wolo tɛtrɛɛ lɛ tsɔɔ mli akɛ “Biblia Kaselɔi lɛ akpee wulu ni fe fɛɛ ni afee yɛ yinɔi lɛ amli” lɛ sanejajemɔ lɛ. Afee kpee nɛɛ yɛ Columbus, Ohio, July 20-27, 1924. Ŋwanejee ko bɛ he akɛ yɛ ŋwɛibɔfo lɛ ni kpa tɛtrɛmaŋtɛrɛ ni ji etɛ lɛ gbɛtsɔɔmɔ naa lɛ, akpɛlɛ yiŋkpɛɛ ko ni mli wa nɔ yɛ jɛmɛ ni yɛ sɛɛ mli lɛ aja ekomekomei akpekpei 50 aha akɛ dɛhiɛmɔ wolo. Aŋma enɛ yɛ yitso ni ji Ecclesiastics Indicted (Afolɔ Osɔfoi Anaa) shishi. Eyitso bibioo ko kɛ sane nɛɛ ha: “Shiwoo Seshi lɛ kɛ Onufu lɛ Seshi lɛ Akaŋshii.” Sane ni akɛfolɔ amɛnaa lɛ diɛŋtsɛ kpa Kristendom osɔfoi lɛ ahe mama yɛ saji ni tamɔ jamɔ mli sabalai wuji ni amɛŋɔ amɛha amɛhe, jarayeli nitsulɔi wuji kɛ maŋkwralɔi ni amɛkɛ amɛ efee mɛi titrii yɛ amɛtooi lɛ ateŋ, bɔ ni amɛsumɔɔ ni amɛkpɛ yɛ gbɔmɛi ahiɛ, kɛ bɔ ni amɛkpoo akɛ amɛaashiɛ Mesia Maŋtsɛyeli lɛ he sane lɛ amɛha gbɔmɛi lɛ mli. Ema nɔ mi akɛ Nyɔŋmɔ kɛ nitsumɔ ewo Kristofonyo fɛɛ Kristofonyo ni ejɔɔ ehe nɔ lɛ dɛŋ akɛ ejaje “wɔ-Nyɔŋmɔ lɛ oweletɔɔ gbi; ni eshɛje ŋkɔmɔyelɔi fɛɛ amii.”—Yesaia 61:2.

34, 35. (a) Mɛni eba osɔfoi lɛ ahewalɛ kɛ mɛi anɔ ni amɛyeɔ lɛ nɔ kɛjɛ be mli ni ŋwɛibɔfo ni ji etɛ lɛ je shishi akɛ eeekpa etɛtrɛmaŋtɛrɛ lɛ nɛɛ? (b) Mɛni yɔɔ wɔsɛɛ be kɛha Kristendom osɔfoi lɛ?

³⁴ Kɛjɛ be mli ni ŋwɛibɔfo ni ji etɛ lɛ bɔi etɛtrɛmaŋtɛrɛ lɛ kpamɔ nɛɛ, osɔfoi lɛ agbɛhe ni kwɔ akɛ mɛi ni yeɔ mɛi anɔ yɛ adesai ateŋ lɛ miishane shi, ni kɛbashi nɛkɛ gbi kɛ yinɔ nɛɛ mli lɛ, amɛteŋ mɛi fioo ko pɛ hiɛ hewalɛi ni tamɔ nyɔŋmɔi anɔ ni amɛna mli ŋɔɔmɔ yɛ tsutsu afii ohai abɔ ni eho lɛ amli lɛ. Yɛ Yehowa Odasefoi lɛ ashiɛmɔ lɛ hewɔ lɛ, gbɔmɛi babaoo diɛŋtsɛ ebayoo akɛ tsɔɔmɔi ni osɔfoi lɛ tsɔɔ lɛ babaoo ji mumɔŋ ebɔɔ—“joomɔ tso.” Kɛfata he lɛ, hewalɛ ni osɔfoi lɛ yɔɔ yɛ Europa kooyigbɛ lɛ eta, yɛ be mli ni yɛ maji krokomɛi anɔ lɛ, nɔyeli lɛ je gbɛ etsi hewalɛ ni amɛyɔɔ yɛ mɛi anɔ lɛ naa. Yɛ hei ni Katolikbii fa yɛ Europa kɛ Amerika maji lɛ anɔ nɛkɛ lɛ, gbɛi gbonyo ni osɔfoi lɛ ena yɛ shika gbɛfaŋ, yɛ maŋkwramɔŋ, kɛ agbɛnɛ yɛ jeŋba mli lɛ efite amɛgbɛi. Kɛjɛ amrɔ nɛɛ kɛyaa lɛ, fitemɔ kɛkɛ amɛgbɛhe lɛ baaya nɔ afite, ejaakɛ etsɛŋ ni nɔ ni baaba apasa jamɔi fɛɛ nɔ lɛ hu baaba amɛnɔ.—Kpojiemɔ 18:21; 19:2.

³⁵ Haomɔ ni Yehowa kɛhaoɔ Kristendom lɛ bako naagbee. Susumɔ nɔ ni ba yɛ be mli ni akpa tɛtrɛmaŋtɛrɛ ni ji ejwɛ lɛ he.

Duŋ!

36. Mɛni ba beni ŋwɛibɔfo ni ji ejwɛ lɛ kpaa etɛtrɛmaŋtɛrɛ lɛ?

³⁶ “Ni bɔfo ni ji ejwɛ lɛ kpa, ni atswa hulu mlijai etɛ mli ekome kɛ nyɔŋtsere mlijai etɛ mli ekome kɛ ŋulamii amlijai etɛ mli ekome nɔ, koni amɛmlijai etɛ mli ekomekome lɛ awo duŋ, ni shwane mlijai etɛ mli ekome lɛ jeŋ tseee ni nyɔɔŋ hu nakai nɔŋŋ.” (Kpojiemɔ 8:12) Haomɔ ni ji nɛɛhu ni ba Mizraim nɔ lɛ ji duŋ kpii diɛŋtsɛ haomɔ. (2 Mose 10:21-29) Shi mɛni ji nɛkɛ okadi duŋ ni baa bahaoɔ mɛi lɛ?

37. Bɔfo Petro kɛ Paulo tsɔɔ mumɔŋ shihilɛ ni mɛi ni yɔɔ Kristofoi asafo lɛ sɛɛ lɛ yɔɔ mli lɛ mli yɛ mɛɛ gbɛ nɔ ?

³⁷ Bɔfo Petro kɛɛ enanemɛi heyelilɔi lɛ akɛ amɛhi duŋ mli, kɛ aaawie yɛ mumɔŋ lɛ, dani amɛbatsɔmɔ Kristofoi. (1 Petro 2:9) Paulo hu kɛ wiemɔ “duŋ” tsu nii ni ekɛtsɔɔ mumɔŋ shihilɛ ni mɛi ni yɔɔ Kristofoi asafo lɛ sɛɛ lɛ yɔɔ mli lɛ mli. (Efesobii 5:8; 6:12; Kolosebii 1:13; 1 Tesalonikabii 5:4, 5) Shi mɛi ni yɔɔ Kristendom ni kɛɔ akɛ amɛheɔ Nyɔŋmɔ nɔ amɛyeɔ, ni kpɛlɛɔ nɔ akɛ Yesu ji amɛ Yiwalaherelɔ lɛ hu?

38. Mɛɛ anɔkwa saji ni kɔɔ Kristendom “la” lɛ he ŋwɛibɔfo ni ji ejwɛ lɛ kpa he tɛtrɛmaŋtɛrɛ?

³⁸ Yesu kɛɛ akɛ abaatsɔ anɔkwa Kristofoi lɛ ayibii anɔ ayoo amɛ, ni akɛ mɛi pii ni kɛɔ akɛ amɛji esɛɛnyiɛlɔi lɛ baafee “mɛi ni tsuɔ nibii ni ejaaa gbɛ.” (Mateo 7:15-23) Mɔ ko mɔ ko bɛ ni kwɛɔ yibii ni Kristendom shihilɛ he ni feɔ je lɛ mlijai etɛ mli ekome lɛ ewo lɛ ni baakɛɛ akɛ jeee mumɔŋ duŋ kpii mli enyiɛ lɛ. (2 Korintobii 4:4) Lɛ ji mɔ ni ashwaa fe fɛɛ, ejaakɛ ekɛɔ akɛ eji Kristofonyo. No hewɔ lɛ, eja gbɛ akɛ ŋwɛibɔfo ni ji ejwɛ lɛ aaakpã anɔkwale ni eji akɛ Kristendom “la” lɛ ji duŋ diɛŋtsɛ yɛ anɔkwale mli, ni Babilon ji he ni enaa “la” lɛ kɛjɛɔ—shi jeee Kristofoi anɔ mli lɛ he tɛtrɛmaŋtɛtrɛ.—Marko 13:22, 23; 2 Timoteo 4:3, 4.

39. (a) Yɛ mɛɛ gbɛ nɔ yiŋkpɛɛ ni akpɛlɛ nɔ yɛ 1925 kpee lɛ shishi lɛ tsɔɔ Kristendom apasa la lɛ mli? (b) Mɛɛ ehe mama kpamɔ kroko afee yɛ 1955?

³⁹ Nɔ ni kɛ nakai ŋwɛi sanejajemɔ lɛ kpaa gbee lɛ, Nyɔŋmɔ webii bua amɛhe naa babaoo yɛ kpee ni afee yɛ Indianapolis, Indiana, U.S.A lɛ shishi, yɛ August 29, 1925, ni amɛkpɛlɛ yiŋkpɛɛ ko ni maa saji anɔ mi kpookpoo ni eyitso ji “Hiɛnɔkamɔ Sane” lɛ nɔ akɛ aŋma aha. Agbɛnɛ hu, aja aaafee akpekpei 50 yɛ wiemɔi babaoo mli. Etsɔɔ apasa la ni jarayeli mli hiɛjoolɔi, maŋkwramɔŋ hiɛnyiɛlɔi kɛ jamɔ mli osɔfoi efee ekome amɛkɛha, ni nɔ ni ejɛ mli eba ji “duŋ kpii mli ni gbɔmɛi lɛ egbee” lɛ mli. Ni ekɛ enine tsɔɔ Nyɔŋmɔ Maŋtsɛyeli lɛ akɛ hiɛnɔkamɔ diɛŋtsɛ ni no nɔ abaatsɔ ni nine ashɛ “toiŋjɔlɛ, shweremɔ, gbɔmɔtsoŋ hewalɛnamɔ, wala, heyeli, kɛ naanɔ miishɛɛ mli jɔɔmɔi” lɛ anɔ. Ebi ekaa dani Kristofoi ni afɔ amɛ mu lɛ akuu bibioo lɛ ajaje nɛkɛ shɛɛ saji nɛɛ amɛshi Kristendom gbɛjianɔtoo ni tamɔ obalaŋ lɛ. Shi amɛtee nɔ amɛfee nakai aahu kɛtsara nɔ, kɛjɛ 1920 afii lɛ ashishijee mli aahu kɛbashi bianɛ. Yɛ nyɛsɛɛ nɛɛ nɔŋŋ, yɛ 1955 mli lɛ, akpa osɔfoi akuu lɛ ahe mama ekoŋŋ kɛtsɔ wolo bibioo ni egbɛi ji Christendom or Christianity—Which One Is “the Light of the World”? (Kristendom loo Kristojamɔ—Te nɔ ni ji “Je lɛ La Lɛ”?) ni aja babaoo yɛ wiemɔi sɔrɔtoi babaoo mli yɛ jeŋ muu fɛɛ lɛ nɔ. Ŋmɛnɛ, Kristendom osatofeemɔ lɛ eje kpo faŋŋ akɛ mɛi pii yɛ je lɛŋ ni amɛ diɛŋtsɛ lɛ amɛnyɛɔ amɛnaa. Shi Yehowa webii eŋmɛko ehe mama ni amɛkpaa koni ale nɔ ni eji: duŋ maŋtsɛyeli, lɛ he.

Okropɔŋ ko ni Miifiliki

40. Tɛtrɛmaŋtɛrɛi ejwɛ lɛ akpamɔ ha ale Kristendom akɛ eji mɛni?

⁴⁰ Nɔ ni jɛ nɛkɛ klɛŋklɛŋ tɛtrɛmaŋtɛrɛi ejwɛ nɛɛ akpamɔ mli ba diɛŋtsɛ ji amaŋfɔ kɛ gbele shihilɛ mli ni Kristendom yɔɔ lɛ ni akpa he mama. Akpa “shikpɔŋ lɛ” fa ni ji enɔ lɛ he mama akɛ nɔ ni sa Yehowa kojomɔ. Aha ana akɛ maŋ hiɛ atuatsemɔ nɔyelii ni kwɛ̃ɔ yɛ eshikpɔji lɛ anɔ kɛ hei krokomɛi lɛ ehiii haaa mumɔŋ shihilɛ. Aha ana shigbeemɔ shihilɛ ni esɔfoi lɛ yɔɔ mli lɛ yɛ faŋŋ mli, ni akpa duŋ kpii ni emumɔŋ shihilɛ lɛ yɔɔ mli lɛ he mama koni mɛi fɛɛ ana. Yɛ anɔkwale mli lɛ Kristendom ji Satan nibii agbɛjianɔtoo lɛ fa ni anyaŋeɔ fe fɛɛ.

41. Mɛni Yohane na ni enu yɛ tɛtrɛmaŋtɛrɛi lɛ akpamɔ lɛ ni afo mli fioo lɛ sɛɛ?

⁴¹ Mɛni yɔɔ ekoŋŋ ni esa akɛ ajie lɛ kpo? Dani wɔɔtao hetoo wɔha sanebimɔ nɛɛ, awa fioo yɛ tɛtrɛmaŋtɛrɛi lɛ akpamɔ mli. Yohane tsɔɔ nɔ ni nyiɛ sɛɛ ni ena lɛ mli: “Ni mina, ni minu okropɔŋ ko miifiliki yɛ ŋwɛi teŋ, ni ekɛ gbee waa kɛɛ: Kpoo, kpoo, kpoo ha mɛi ni hiɔ shikpɔŋ lɛ nɔ lɛ yɛ bɔfoi etɛ ni baakpa lɛ atɛtrɛmaŋtɛrɛi agbee ni eshwɛ lɛ ahewɔ!”—Kpojiemɔ 8:13.

42. Mɛni okropɔŋ ni filikiɔ yɛ ŋwɛi lɛ baanyɛ atsɔɔ, ni mɛni ji eshɛɛ sane lɛ?

⁴² Okropɔŋ filikiɔ yɛ ŋwɛi shɔŋŋ, koni gbɔmɛi ni yɔɔ he ni da anyɛ ana lɛ. Enaa nii jogbaŋŋ yɛ gbɛ ni ekaaa nɔ ni ebaanyɛ ena nii yɛ ehiɛ kɛya shɔŋŋ. (Hiob 39:29) Afee kerubim ni ji hiɛkalɔi ejwɛ ni ebɔle Nyɔŋmɔ maŋtsɛsɛi lɛ he lɛ ekome he mfoniri akɛ okropɔŋ ni filikiɔ. (Kpojiemɔ 4:6, 7) Kɛji akɛ nɛkɛ kerubim nɛɛ ni aloo eji Nyɔŋmɔ tsuji ni naa shɔŋŋ nii lɛ eko hu lɛ, ekɛ gbee ni wa jaje sane ni ji: “Kpoo, kpoo, kpoo”! Ha ni shikpɔŋ lɛ nɔ bii lɛ akadi enɛ, yɛ be mli ni anuɔ tɛtrɛmaŋtɛrɛi etɛ ni eshwɛ ni abaakpa lɛ he lɛ, ejaakɛ eko fɛɛ eko kɔɔ nɛkɛ kpoo nɛɛ ekome he.

[Shishigbɛ niŋmai]

[Akrabatsa ni yɔɔ baafa 139]

Ajie Kristendom Nui lɛ Akpo Akɛ Amɛji Joomɔ Tso

[Mfoniri ni yɔɔ baafa 132]

Naasɔomɔi kpawo lɛ anaatsemɔ kɛ tɛtrɛmaŋtɛrɛi kpawo akpamɔ ba

[Mfoniri ni yɔɔ baafa 140]

“Mpoa ni Atswa Jeŋ Hiɛnyiɛlɔi.” (1922)

Nɛkɛ yiŋkpɛɛ nɛɛ ye ebua ni aha je lɛ le Yehowa haomɔi ni ekɛshiɔ “shikpɔŋ lɛ”

[Mfoniri ni yɔɔ baafa 140]

“Kɔkɔbɔɔ Kɛha Kristofoi Fɛɛ” (1923)

Atsɔ nɛkɛ yiŋkpɛɛ nɛɛ nɔ ajaje Yehowa fɔbuu kojomɔ ni ekɛshiɔ “ŋshɔ lɛ mlijai etɛ mli ekome” lɛ atsɔɔ yɛ he fɛɛ he

[Mfoniri ni yɔɔ baafa 141]

“Ajaje Osɔfoi Atɔmɔ Atsɔɔ” (1924)

Nɛkɛ dɛhiɛmɔ wolo nɛɛ ni aja yɛ jeŋ fɛɛ lɛ ye bua ni ehɛle gbɔmɛi ashi akɛ Kristendom osɔfoi lɛ ‘aŋulami’ lɛ egbee shi

[Mfoniri ni yɔɔ baafa 141]

“Hiɛnɔkamɔ Sane” (1925)

Akɛ yiŋkpɛɛ ni jaje saji kpookpoo nɛɛ tsu nii ni akɛkpa Kristendom shishiumɔ la lɛ jɛɛ he lɛ he mama akɛ yɛ anɔkwale mli lɛ ejɛɛ he lɛ mli ewo duŋ kpii

Yitso 22

Klɛŋklɛŋ Kpoo Lɛ—Baalabii

 1. Namɛi nyiɛɔ sɛɛ baa beni ŋwɛibɔfoi lɛ kpaa amɛ tɛtrɛmaŋtɛrɛi lɛ, ni mɛni tɛtrɛmaŋtɛrɛ kpamɔ ni ji enumɔ lɛ tswaa he adafi?

BƆFO ni ji enumɔ lɛ saa ehe koni ekpa etɛtrɛmaŋtɛrɛ lɛ. Akpa ŋwɛi tɛtrɛmaŋtɛrɛi ejwɛ momo, ni akudɔ haomɔi ejwɛ ashwie shikpɔŋ lɛ mlijai etɛ mli ekome ni Yehowa buɔ no akɛ nɔ ni ahiɔ fe fɛɛ lɛ nɔ—Kristendom. Ayoo shihilɛ mli ni eyɔɔ lɛ akɛ mɔ ni gbelehela yeɔ lɛ. Yɛ be mli ni ŋwɛibɔfoi kpaa tɛtrɛmaŋtɛrɛ lɛ, adesai adafitswalɔi hu nyiɛɔ sɛɛ kɛtsɔɔ shikpɔŋ lɛ nɔ. Agbɛnɛ abaakpa ŋwɛi tɛtrɛmaŋtɛrɛ ni ji enumɔ lɛ ni akɛtswa klɛŋklɛŋ kpoo lɛ he adafi, nɔ ni yɔɔ gbeyei kwraa fe nɔ ni etsɔ hiɛ eba lɛ. Ekɔɔ baalabii ahaomɔ ni yɔɔ gbeyei ko he. Shi klɛŋklɛŋ lɛ, ha wɔpɛi ŋmalɛi krokomɛi ni baaye abua wɔ ni wɔnu nɛkɛ haomɔ nɛɛ shishi jogbaŋŋ lɛ mli.

 2. Mɛɛ Biblia mli wolo tsɔɔ baalabii ahaomɔ ko ni tamɔ nɔ ni Yohane na lɛ mli lɛ, ni te enɛ sa blema Israel he eha tɛŋŋ?

² Biblia mli wolo ni ji Yoel, ni aŋma yɛ afii ohai nɛɛhu D.Ŋ.B. lɛ tsɔɔ filikilɔi ahaomɔ ko ni baalabii fata he lɛ mli tamɔ nɔ ni Yohane na lɛ nɔŋŋ. (Yoel 2:1-11, 25)a Ekɛ haomɔ baaba Israel ni ekwa hemɔkɛyeli lɛ nɔ, ni ebaaha Yudafoi aŋkroaŋkroi lɛ hu atsake amɛtsui ni amɛku amɛsɛɛ amɛba Yehowa duromɔ mli. (Yoel 2:6, 12-14) Kɛ nakai be lɛ shɛ lɛ, Yehowa baafɔse emumɔ lɛ eshwie “heloo fɛɛ nɔ,” yɛ be mli ni okadii ni yɔɔ gbeyei kɛ nɔ ni haa mɔ tsui faa tsɔɔ “Yehowa gbi wulu ni he yɔɔ gbeyei” lɛ hiɛ lɛ.—Yoel 2:11; 3:1-5.

Klɛŋklɛŋ Afii Oha lɛ Mli Haomɔ

3, 4. (a) Mɛɛ be mli Yoel yitso 2 ba mli, ni yɛ mɛɛ gbɛ nɔ? (b) Haomɔ ko ni tamɔ baalabii babaoo ba yɛ klɛŋklɛŋ afii oha Ŋ.B. lɛ mli yɛ mɛɛ gbɛ nɔ, ni haomɔ nɛɛ tee nɔ kɛyashi mɛɛ be?

³ Yoel yitso 2 ba mli yɛ klɛŋklɛŋ afii oha lɛ mli. No mli, yɛ Pentekoste afi 33 Ŋ.B., ni afɔse mumɔ krɔŋkrɔŋ lɛ ashwie shi, ni efɔ klɛŋklɛŋ Kristofoi lɛ mu, ni ewo amɛ hewalɛ koni amɛwie “Nyɔŋmɔ nibii wuji” lɛ ahe yɛ wiemɔi sɔrɔtoi babaoo mli. Nɔ ni jɛ mli ba ji akɛ, asafo babaoo ko bua amɛhe naa. Bɔfo Petro wie etsɔɔ nakai mɛi ni kwɛɔ nɔ ni yaa nɔ lɛ ni amɛnaa ekpɛ amɛhe lɛ, ni etsɛ ŋmalɛ kɛjɛ Yoel 3:1, 2 ni ekɛtsɔɔ mli akɛ emlibaa he odase amɛyeɔ lɛ. (Bɔfoi lɛ Asaji 2:1-21) Shi odaseyeli ko bɛ ni tsɔɔ akɛ kooloi filikilɔi diɛŋtsɛ haomɔ ba yɛ nakai be lɛ mli, ni ebagba mɛi komɛi anaa ni no ha mɛi komɛi tsake.

⁴ Ani okadifeemɔ haomɔ ko ba yɛ nakai gbii lɛ amli? Hɛɛ, eba mli diɛŋtsɛ! Eba yɛ Kristofoi ni afɔ amɛ mu ehee lɛ ashiɛmɔ ni amɛŋmɛɛɛ he lɛ hewɔ.b Yehowa tsɔ amɛnɔ efɔ Yudafoi ni baabo toi ni amɛtsake lɛ nine ni amɛbana jɔɔmɔi amli ŋɔɔmɔ kɛjɛ eŋɔɔ. (Bɔfoi lɛ Asaji 2:38-40; 3:19) Aŋkroaŋkroi ni kpɛlɛ nɔ lɛ anine shɛ eduromɔ nɔ kɛyashɛ shɔŋŋ. Shi kɛha mɛi ni kpoo eninefɔɔ lɛ, klɛŋklɛŋ afii oha lɛ mli Kristofoi lɛ batsɔmɔ tamɔ baalabii babaoo ni kpataa nii ahiɛ kɛha amɛ. Amɛje shishi kɛjɛ Yerusalem, ni amɛgbɛ amɛshwa Yudea kɛ Samaria fɛɛ. Etsɛɛɛ ni ana amɛ yɛ he fɛɛ he, ni amɛkɛ Yesu shitee lɛ he sane lɛ jajemɔ yɛ faŋŋ mli, kɛ nɔ ni enɛɛmɛi fɛɛ tsɔɔ lɛ miipiŋ Yudafoi ni heee yeee lɛ. (Bɔfoi lɛ Asaji 1:8; 4:18-20; 5:17-21, 28, 29, 40-42; 17:5, 6; 21:27-30) Nakai haomɔi lɛ tee nɔ aahu kɛyashi “gbi wulu ni he yɔɔ gbeyei” lɛ ba yɛ afi 70 Ŋ.B., beni Yehowa kɛ Roma asraafoi lɛ ba Yerusalem nɔ koni amɛbakpata hiɛ lɛ. Kristofoi pɛ ni tsɛ Yehowa gbɛi lɛ yɛ hemɔkɛyeli mli lɛ ahere amɛyiwala.—Yoel 3:5; Bɔfoi lɛ Asaji 2:20, 21; Abɛi 18:10.

Baalabii Ahaomɔ ni Yɔɔ Ŋmɛnɛ Beaŋ Lɛ

 5. Yoel gbalɛ lɛ ena emlibaa kɛjɛ 1919 kɛbaa nɛɛ yɛ mɛɛ gbɛ nɔ?

⁵ Yɛ shishinumɔ naa lɛ, wɔbaanyɛ wɔkpa Yoel gbalɛ lɛ naagbee mlibaa gbɛ yɛ naagbee be lɛ mli. Kwɛ bɔ ni enɛ efee anɔkwale eha! Yɛ Biblia Kaselɔi lɛ akpee ni amɛfee yɛ Cedar Point, Ohio, U.S.A., September 1-8, 1919 lɛ, Yehowa mumɔ lɛ fɔsemɔ kɛ shishwiemɔ ko ni akadi kanya ewebii lɛ koni amɛto jeŋ muu fɛɛ shiɛmɔ he tafaa ko he gbɛjianɔ. Akɛni amɛ pɛ ji mɛi ni yɔse ákɛ akɛ Yesu eta maŋtsɛsɛi nɔ yɛ ŋwɛi akɛ Maŋtsɛ yɛ mɛi ni tsɛɔ amɛhe Kristofoi lɛ fɛɛ ateŋ hewɔ lɛ, amɛkɛ mɔdɛŋbɔɔ fɛɛ ni amɛaanyɛ jaje nakai sanekpakpa lɛ amɛtsɔɔ yɛ he fɛɛ he. Amɛ odaseyeli ni amɛŋmɛɛɛ he, ni ha gbalɛ lɛ ba mli lɛ batsɔ tamɔ haomɔ ko ni piŋɔ hemɔkɛyeli kwalɔ Kristendom.—Mateo 24:3-8, 14; Bɔfoi lɛ Asaji 1:8.

 6. (a) Mɛni Yohane na beni bɔfo ni ji enumɔ lɛ kpa etɛtrɛmaŋtɛrɛ lɛ? (b) Nɛkɛ “ŋulami” nɛɛ feɔ namɔ he mfoniri, ni mɛni hewɔ?

⁶ Kpojiemɔ, ni aŋma yɛ Yerusalem hiɛkpatamɔ lɛ sɛɛ aaafee afii 26 lɛ hu tsɔɔ haomɔ lɛ mli. Mɛni ekɛfataa Yoel sane mlitsɔɔmɔ lɛ he? Nyɛhaa wɔkanea nɔ ni aŋma afɔ shi lɛ, taakɛ Yohane bɔ he amaniɛ lɛ: “Ni bɔfo ni ji enumɔ lɛ kpa, ni mina ŋulami ko jɛ ŋwɛi bagbee shikpɔŋ lɛ nɔ, ni aŋɔ bu kwɔŋkwɔŋ lɛ naa samfee lɛ aha lɛ.” (Kpojiemɔ 9:1) Nɛkɛ “ŋulami” nɛɛ yɛ sɔrɔto yɛ nɔ ni yɔɔ Kpojiemɔ 8:10 ni Yohane na akɛ eegbee shi lɛ he. Ena “ŋulami ko jɛ ŋwɛi bagbee shikpɔŋ lɛ nɔ” ni nakai ŋulami lɛ yɛ nitsumɔ ko ni kɔɔ shikpɔŋ nɛɛ he. Ani mumɔŋ gbɔmɔ loo helooŋ gbɔmɔ nɛ? Atsɔɔ mɔ ni hiɛ “bu kwɔŋkwɔŋ lɛ naa samfee” nɛɛ mli yɛ sɛɛ mli akɛ efɔ Satan ewo “bu kwɔŋkwɔŋ” lɛ mli. (Kpojiemɔ 20:1-3) No hewɔ lɛ ebaafee mumɔŋ gbɔmɔ ko ni he wa. Yohane kɛɔ wɔ yɛ Kpojiemɔ 9:11 akɛ baalabii lɛ yɛ “maŋtsɛ, bu kwɔŋkwɔŋ lɛ mli bɔfo lɛ.” Nakai kukuji lɛ fɛɛ kɔɔ mɔ kome too lɛ nɔŋŋ he, ejaakɛ ŋwɛibɔfo ni hiɛ bu kwɔŋkwɔŋ lɛ naa samfee lɛ baafee bu kwɔŋkwɔŋ lɛ mli bɔfo lɛ yɛ sane naatsɔɔmɔ ni ja naa. Ni ŋulami lɛ baadamɔ shi aha Yehowa Maŋtsɛ ni ehala lɛ lɛ, ejaakɛ Kristofoi ni afɔ amɛ mu lɛ kpɛlɛɔ Maŋtsɛ kome pɛ ni ji ŋwɛibɔfo, Yesu Kristo nɔ.—Kolosebii 1:13; 1 Korintobii 15:25.

 7. (a) Mɛni ba beni agbele “bu kwɔŋkwɔŋ lɛ naa” lɛ? (b) Mɛni ji “bu kwɔŋkwɔŋ” lɛ, ni namɛi yaye be fioo yɛ mli?

⁷ Sane lɛ yaa nɔ akɛ: “Ni egbele bu kwɔŋkwɔŋ lɛ naa, ni lasu te shi kɛjɛ bu lɛ mli tamɔ flɔnɔɔ kpeteŋkpele mli lasu, ni hulu kɛ atatuiaŋ wo duŋ yɛ bu lɛŋ lasu lɛ hewɔ. Ni baalabii jɛ lasu lɛ mli kɛba shikpɔŋ lɛ nɔ; ni aha amɛ hewalɛ tamɔ hewalɛ ni nyɔŋmɔŋkrakroi yɔɔ yɛ shikpɔŋ lɛ nɔ lɛ.” (Kpojiemɔ 9:2, 3) Yɛ ŋmalɛ naa lɛ, “bu kwɔŋkwɔŋ” lɛ ji he ko ni nitsumɔ ko bɛ jɛmɛ, tamɔ gbele. (Okɛto Romabii 10:7; Kpojiemɔ 17:8; 20:1, 3 he.) Yesu nyɛmimɛi akuu fioo lɛ ye be fioo ko yɛ nɛkɛ “bu kwɔŋkwɔŋ” ni nitsumɔ ko bɛ jɛmɛ lɛ mli yɛ klɛŋklɛŋ jeŋ ta (1918-19) lɛ naagbee mli. Shi beni Yehowa fɔse emumɔ lɛ eshwie etsuji ni amɛtsake amɛtsui lɛ anɔ yɛ 1919 lɛ, amɛfa kpo babaoo akɛ amɛaakpee nitsumɔ ni ka amɛhiɛ lɛ he kaa lɛ naa.

 8. Te feɔ tɛŋŋ ni “lasu” fataa baalabii ni ajieɔ amɛ lɛ ahe kɛbaa lɛ?

⁸ Yohane yɔse akɛ lasu fata baalabii lɛ aheŋmɛɛmɔ he kɛba, “tamɔ flɔnɔɔ kpeteŋkpele mli lasu.”c Nɛkɛ ji bɔ ni ebalɛ yɛ 1919. Shihilɛ lɛ badi tuŋŋ diɛŋtsɛ kɛha Kristendom kɛ agbɛnɛ je lɛ fɛɛ. (Okɛto Yoel 3:3, 4 he.) Nakai baalabii lɛ, ni ji Yohane kuu lɛ, aheŋmɛɛmɔ lɛ ji Kristendom osɔfoi lɛ ni tsɔ ŋaa koni agbe Maŋtsɛyeli nitsumɔ lɛ kwraa ni agbɛnɛ amɛkpoo Nyɔŋmɔ Maŋtsɛyeli lɛ bianɛ lɛ nɔ kunim ni aye diɛŋtsɛ. Odaseyeli ko ni tamɔ lasu ni etsɔ tamɔ kuŋtu je shishi akɛ eeegbɛ eshwa Kristendom ni ekwa hemɔkɛyeli lɛ mli fɛɛ yɛ be mli ni akɛ ŋwɛi hewalɛ ha nakai baalabii lɛ ni amɛje shishi amɛkɛtsu nii ni amɛkɛjaje kojomɔ saji ni mli wawai lɛ. Kristendom “hulu” lɛ—ehiŋmɛi gbelemɔ loo ehiɛtɛjemɔ lɛ—wo duŋ, ni “kɔɔyɔɔ” lɛ mli bati kɛ ŋwɛi kojomɔi ajajemɔ yɛ be mli ni aha ale akɛ je nɛŋ “kɔɔyɔɔ mli hewalɛ lɛ nɔ lumɔ lɛ” ji Kristendom nyɔŋmɔ lɛ.—Efesobii 2:2; Yohane 12:31; 1 Yohane 5:19.

Nakai Baalabii ni Piŋɔ Mɛi Lɛ!

 9. Mɛɛ tawuu he famɔ baalabii lɛ anine shɛ nɔ?

⁹ Mɛɛ tawuu mli famɔi nakai baalabii lɛ anine shɛ nɔ? Yohane bɔɔ amaniɛ akɛ: “Ni akɛɛ amɛ akɛ amɛkafee shikpɔŋ lɛ nɔ jwɛi aloo baa ŋmɔŋ aloo tso ko efɔŋ ko, akɛ ja gbɔmɛi ni bɛ Nyɔŋmɔ naasɔomɔ nɔ lɛ okadi yɛ amɛhiɛŋtsei anɔ lɛ kɛkɛ. Ni aha amɛ hegbɛ akɛ amɛkagbe amɛ, shi moŋ amɛpiŋ amɛ nyɔji enumɔ. Ni amɛnaa jaramɔ lɛ tamɔ nyɔŋmɔŋkrakro jaramɔ, kɛ etsɛ̃ mɔ lɛ. Ni nakai gbii lɛ amli lɛ, gbɔmɛi aaashwe gbele, ni amɛnaŋ, ni amɛaasumɔ akɛ amɛaagboi, shi gbele aaajo amɛnaa foi.”—Kpojiemɔ 9:4-6.

10. (a) Namɛi akɛ haomɔ lɛ shiɔ titri, ni mɛni jɛɔ mli baa amɛnɔ? (b) Mɛɛ piŋmɔ loo hejaramɔ yɔɔ enɛ mli? (Kwɛmɔ shishigbɛ niŋmaa lɛ hu.)

¹⁰ Kadimɔ akɛ atsɔɔɔ akɛ haomɔ nɛɛ baaba gbɔmɛi loo amɛteŋ mɛi ni ehe gbɛi lɛ anɔ klɛŋklɛŋ—‘shikpɔŋ lɛ nɔ jwɛi kɛ tsei lɛ.’ (Okɛto Kpojiemɔ 8:7 he.) Baalabii lɛ baapiŋ gbɔmɛi ni bɛ Nyɔŋmɔ naasɔomɔ nɔ lɛ yɛ amɛhiɛŋtsei anɔ lɛ pɛ, mɛi ni yɔɔ Kristendom ni kɛɔ akɛ asɔo amɛnaa shi nɔ ni amɛfeɔ lɛ tsɔɔ akɛ nɔ ni amɛkɛɔ lɛ bɛ mli lɛ. (Efesobii 1:13, 14) No hewɔ lɛ, akudɔɔ ŋmɛnɛŋmɛnɛ beaŋ baalabii nɛɛ awiemɔi ni piŋɔ mɛi lɛ kɛyaa Kristendom jamɔ mli hiɛnyiɛlɔi lɛ anɔ klɛŋklɛŋ. Kwɛ bɔ ni nɛkɛ wiemɔi nɛɛ aaapiŋ henɔwolɔi nɛɛ babaoo aha yɛ be mli ni amɛaanu akɛ aajaje yɛ faŋŋ mli akɛ jeee akɛ amɛnyiɛɛɛ amɛ asafo kuu lɛ hiɛ kɛyaaa ŋwɛi pɛ kɛkɛ, shi moŋ amɛ diɛŋtsɛ hu amɛyaŋ jɛmɛ lɛ!d Yɛ anɔkwale mli lɛ, sane lɛ efee ‘shwilafo ni miitsɔɔ shwilafo gbɛ’!—Mateo 15:14.

11. (a) Be sɛɛjɛkɛmɔ enyiɛ akɛ hewalɛ ha baalabii lɛ ni amɛpiŋ Nyɔŋmɔ henyɛlɔi lɛ, ni mɛni hewɔ enɛ jeee be kukuoo diɛŋtsɛ lɛ? (b) Te amɛtsɛ̃rɛmɔ lɛ jaramɔ loo enaawalɛ lɛ yɔɔ tɛŋŋ?

¹¹ Piŋmɔ lɛ yaa nɔ aahu nyɔji enumɔ. Ani kɛ akɛto he lɛ eji be ni sɛɛ etsɛɛɛ? Jeee yɛ baalabii diɛŋtsɛ ahiɛ. Nyɔji enumɔ lɛ tsɔɔ nɛkɛ filikilɔi nɛɛ awala sɛɛ tsɛlɛ diɛŋtsɛ. No hewɔ lɛ, bei abɔ ni amɛyɔɔ wala mli nɛɛ, nɛkɛ ŋmɛnɛŋmɛnɛ beaŋ baalabii nɛɛ baaya nɔ atsɛ̃rɛ Nyɔŋmɔ henyɛlɔi lɛ. Kɛfata he lɛ, enaa jaramɔ lɛ naa walɛ sɔŋŋ hewɔ lɛ gbɔmɛi aaasumɔ akɛ amɛaagboi. Eji anɔkwale akɛ, wɔbɛ nɔ ko ni aŋma afɔ shi ni tsɔɔ akɛ mɛi ni baalabii lɛ tsɛ̃rɛ amɛ lɛ bɔ mɔdɛŋ ni amɛgbe amɛhe diɛŋtsɛ. Shi wiemɔ lɛ yeɔ ebuaa wɔ ni wɔna bɔ ni piŋmɔ lɛ jaramɔ loo enaawalɛ lɛ yɔɔ diɛŋtsɛ—tamɔ nyɔŋmɔŋkrakroi atsɛ̃rɛmɔ ni baaa shi. Etamɔ piŋmɔ ni Yeremia tsɔ hiɛ ena akɛ ebaaba Israelbii ni yeee anɔkwale ni Babilon nɔyelɔi lɛ baagbɛ amɛ ashwa ni amɛbaasumɔ gbele moŋ fe wala lɛ apiŋmɔ lɛ.—Yeremia 8:3; kwɛmɔ Jajelɔ 4:2, 3 hu.

12. Mɛni hewɔ aŋmɛ gbɛ koni baalabii lɛ apiŋ Kristendom jamɔ mli hiɛnyiɛlɔi lɛ, yɛ mumɔŋ shishinumɔ naa, shi jeee ni amɛgbe amɛ lɛ?

¹² Mɛni hewɔ aŋmɛ gbɛ koni apiŋ mɛnɛɛmɛi, yɛ mumɔŋ shishinumɔ naa, shi jeee ni agbe amɛ lɛ? Enɛ ji shishijee kpoo ni akɛkpaa Kristendom amalei lɛ kɛ nibii ni enyɛɛɛ efee lɛ ahe mama, shi yɛ sɛɛ mli, yɛ be mli ni Nuŋtsɔ lɛ gbi lɛ yaa hiɛ lɛ, no mli ni aaatswa emumɔŋ shihilɛ ni tamɔ gbele lɛ he adafi atsɔɔ yɛ faŋŋ mli. Ni kpoo ni ji enyɔ lɛ mli ni agbeɔ gbɔmɛi amlijaa etɛ mli ekome lɛ.—Kpojiemɔ 1:10; 9:12, 18; 11:14.

Baalabii ni Awula Amɛ Aha Ta

13. Te baalabii lɛ asu kɛ baŋ yɔɔ tɛŋŋ?

¹³ Kwɛ bɔ ni nakai baalabii lɛ ahe yɔɔ naakpɛɛ ha! Yohane tsɔɔ bɔ ni amɛji: “Ni baalabii lɛ asubaŋ tamɔ okpɔŋɔi ni asaa kɛyaa ta, ni nɔ komɛi fimɔ amɛyitsei tamɔ shika akekerei, ni amɛhiɛaŋ tamɔ gbɔmɛi ahiɛaŋ; ni amɛyitsɔi tamɔ yei ayitsɔi, ni amɛnyanyɔji tamɔ jatai anɔ; ni amɛwo damai tamɔ dade damai, ni amɛfijiaŋ gbɛɛmɔ tamɔ okpɔŋɔi babaoo kɛ shwiilii ni hiɛ foi kɛyaa ta gbɛɛmɔ.”—Kpojiemɔ 9:7-9.

14. Mɛni hewɔ bɔ ni Yohane tsɔɔ baalabii lɛ amli eha lɛ tamɔ Kristofoi akuu ni awaje amɛ ekoŋŋ yɛ 1919 lɛ?

¹⁴ Enɛ feɔ Kristofoi anɔkwafoi ni awaje amɛ lɛ akuu lɛ he mfoniri yɛ 1919. Amɛfee klalo amɛha ta tamɔ okpɔŋɔi, amɛmiiye oyai ni amɛwuu amɛha anɔkwale lɛ yɛ gbɛ ni bɔfo Paulo tsɔɔ mli lɛ nɔ. (Efesobii 6:11-13; 2 Korintobii 10:4) Nɔ ni Yohane na yɛ amɛyitsei ji nɔ ko tamɔ shika akekerei. Ebafeŋ nɔ ni sa akɛ amɛaana akekere diɛŋtsɛ ejaakɛ amɛjeŋ shishi akɛ amɛaaye nɔ akɛ maŋtsɛmɛi yɛ be mli ni amɛyɔɔ shikpɔŋ nɔ lolo lɛ. (1 Korintobii 4:8; Kpojiemɔ 20:4) Shi yɛ 1919 mli tɔɔ lɛ no mli lɛ amɛtamɔ maŋtsɛmɛi momo po. Amɛji Maŋtsɛ lɛ nyɛmimɛi, ni asaa amɛŋwɛi akekerei lɛ ato aha amɛ momo, shi ja amɛtee nɔ amɛye anɔkwale kɛyashi naagbee.—2 Timoteo 4:8; 1 Petro 5:4.

15. Mɛni ji nɔ ni baalabii lɛ (a) dade damai lɛ tsɔɔ? (b) hiɛ ni tamɔ gbɔmɛi ahiɛ lɛ tsɔɔ? (d) yitsɔi ni tamɔ yoo yitsɔi lɛ tsɔɔ? (e) nyanyɔji ni tamɔ jatai anɔ lɛ tsɔɔ? (ɛ) ni feɔ hoo kɛ gbɛɛmɔ lɛ tsɔɔ?

¹⁵ Yɛ ninaa lɛ mli lɛ, baalabii lɛ yɛ dade damai, ni damɔ shi kɛha jalɛ nifeemɔ ni akuuu mli. (Efesobii 6:14-18) Agbɛnɛ amɛyɛ gbɔmɛi ahiɛ hu, ni enɛ hu tsɔɔ su ni ji suɔmɔ, ejaakɛ afee gbɔmɔ yɛ Nyɔŋmɔ, ni ji suɔmɔ lɛ subaŋ nɔ. (1 Mose 1:26; 1 Yohane 4:16) Amɛyitsɔi lɛ kɛlɛ tamɔ yoo yitsɔi, ni enɛ feɔ amɛhe shi ni amɛbaa amɛhaa amɛ-Maŋtsɛ lɛ, bu kwɔŋkwɔŋ lɛ mli bɔfo lɛ he mfoniri. Ni amɛ nyanyɔji tamɔ jatai anyanyɔji. Jata kɛ enyanyɔŋ tsuɔ nii ni ekɛtserɛɔ loo mli. Kɛjɛ 1919 mli kɛbaa lɛ, Yohane kuu lɛ enyɛ amɛye mumɔŋ niyenii ni wa, titri lɛ anɔkwalei ni kɔɔ Nyɔŋmɔ Maŋtsɛyeli ni “Jata lɛ ni jɛ Yuda akutso lɛ mli lɛ,” Yesu Kristo yeɔ nɔ lɛ he lɛ. Taakɛ bɔ ni jata damɔ shi kɛha ekaafeemɔ lɛ, nakai nɔŋŋ hu ekaafeemɔ babaoo he ebahia koni amɛta sane ni mli wa waa nɛɛ ni amɛmi, ni amɛkɛha yɛ woji amli, ni amɛja kɛbɔle jeŋ fɛɛ. Nakai mfonirifeemɔ mli baalabii lɛ efee hoo diɛŋtsɛ, tamɔ “okpɔŋɔi babaoo kɛ shwiilii ni hiɛ foi kɛyaa ta gbɛɛmɔ.” Yɛ klɛŋklɛŋ afii oha lɛ mli Kristofoi lɛ anɔkwɛmɔnɔ lɛ sɛɛnyiɛmɔ mli hewɔ lɛ, amɛkpɛ amɛyiŋ akɛ amɛfeŋ dioo.—1 Korintobii 11:7-15; Kpojiemɔ 5:5.

16. Baalabii lɛ ni yɔɔ “leii tamɔ nyɔŋmɔŋkrakroi” ni amɛkɛtsɛ̃rɛɔ mɔ lɛ tsɔɔ mɛni?

¹⁶ Babaoo kɔɔ nɛkɛ shiɛmɔ nɛɛ he fe wiemɔ ni aaawie kɛkɛ! “Ni amɛyɛ leii tamɔ nyɔŋmɔŋkrakroi, ni gãii yɛ amɛleii lɛ anaa, ni amɛyɛ hegbɛ akɛ amɛfee gbɔmɛi efɔŋ nyɔji enumɔ.” (Kpojiemɔ 9:10) Mɛni enɛ baanyɛ atsɔɔ? Yɛ be mli ni Yehowa Odasefoi tsuɔ Maŋtsɛyeli nitsumɔ lɛ, amɛtsɔɔ amɛwiemɔ kɛ woji ni akala lɛ anɔ amɛkɛ hewalɛ wiemɔi ni damɔ Nyɔŋmɔ Wiemɔ lɛ nɔ lɛ haa. Amɛshɛɛ saji lɛ anaa jaraa tamɔ nyɔŋmɔŋkrakroi atsɛ̃mɔ, ejaakɛ amɛbɔɔ Yehowa oweletɔɔ gbi ni baa lɛ he kɔkɔ. (Yesaia 61:2) Dani ŋmɛnɛŋmɛnɛ mumɔŋ baalabii ayinɔ nɛɛ awala lɛ fɛɛ aaata lɛ, no mli lɛ agbe nitsumɔ ni ajɛ ŋwɛi akɛha akɛ amɛjaje Yehowa kojomɔi amɛtsɔɔ lɛ naa—koni akɛye musubɔlɔi fɛɛ ni kuɛŋ ti lɛ awui.

17. (a) Mɛni atswa he adafi yɛ Biblia Kaselɔi lɛ akpee ni amɛfee yɛ 1919 lɛ shishi ni baaha amɛ odaseyeli ni ji amɛtsɛ̃rɛmɔ lɛ naa awa lolo? (b) Apiŋ osɔfoi lɛ yɛ mɛɛ gbɛ nɔ, ni te amɛfeɔ amɛnii yɛ enɛ he amɛhaa tɛŋŋ?

¹⁷ Nakai baalabii akuu lɛ amiishɛɛ lɛ bateke nɔ beni atswaa wolo tɛtrɛɛ hee, The Golden Age lɛ he adafi yɛ amɛ 1919 kpee lɛ shishi lɛ. Eji wolo tɛtrɛɛ ni baa daa otsii enyɔ, ni ato he gbɛjianɔ koni ewo amɛ odaseyeli nitsumɔ lɛ tsɛ̃mɔ lɛ mli hewalɛ.e Nɔ ni afee ni ji No. 27 nɔ, yɛ September 29, 1920 lɛ kpa bɔ ni osɔfoi lɛ kɛ amɛhe wo Biblia Kaselɔi ni yɔɔ U.S.A lɛ ayiwaa mli yɛ 1918-19 lɛ he mama. The Golden Age lɛ piŋ osɔfoi lɛ lolo kɛtsɔ 1920 afii lɛ kɛ 1930 afii lɛ amli kɛ saji kɛ mfonirii ni tsɛ̃rɛɔ amɛ ni kpa ŋaa gbɛ ni amɛtsɔɔ nɔ amɛkɛ amɛhe woɔ maŋkwramɔ mli, titri lɛ Katolik osɔfoi akuu lɛ gbeekpamɔ ni amɛkɛ Fascist kɛ Nazi nɔyelɔi yiwalɔi lɛ fee lɛ ahe mama. Bɔni afee ni amɛkpee enɛ naa lɛ, osɔfoi lɛ hu ‘tsɔ mla nɔ amɛye sane fɔŋ’ ni amɛbua gbɔmɛi asafoi babaoo ni feɔ basabasa naa amɛwo Nyɔŋmɔ webii lɛ.—Lala 94:20.

Aha Jeŋ Nɔyelɔi Le nɔ ni Yaa Nɔ

18. Mɛɛ nitsumɔ ka baalabii lɛ anɔ ni esa akɛ amɛtsu, ni mɛni ba yɛ tɛtrɛmaŋtɛrɛ kpamɔ ni ji enumɔ lɛ hewɔ?

¹⁸ Ŋmɛnɛŋmɛnɛ beaŋ baalabii lɛ yɛ nitsumɔ ni esa akɛ amɛtsu. Esa akɛ ashiɛ Maŋtsɛyeli lɛ he sanekpakpa lɛ. Esa akɛ akpa tɔmɔi ahe mama. Esa akɛ atao tooi ni amɛlaaje lɛ. Yɛ be mli ni baalabii nɛɛ yaa nɔ yɛ nɛkɛ nitsumɔi nɛɛ amli lɛ, eha je lɛ hɛle shi, koni amɛle nɔ ni yaa nɔ lɛ. Yɛ ŋwɛibɔfo lɛ tɛtrɛmaŋtɛrɛ kpamɔ lɛ toiboo mli lɛ, Yohane kuu lɛ etee nɔ amɛkpa Kristendom he mama akɛ lɛ ji mɔ ni sa akɛ Yehowa fɔbuu kojomɔi baa enɔ. Yɛ tɛtrɛmaŋtɛrɛ ni ji enumɔ lɛ he nitsumɔ mli lɛ, ama nɛkɛ kojomɔi nɛɛ ahe nɔ ko pɔtɛɛ nɔ mi yɛ kpee ni Biblia Kaselɔi lɛ fee yɛ London, England, yɛ May 25-31, 1926 lɛ shishi. Nifeemɔ nɛɛ ji yiŋkpɛɛ ko, “Odaseyeli Kɛha Jeŋ Nɔyelɔi Lɛ,” kɛ maŋshiɛmɔ ni aha yɛ Royal Albert Hall lɛ ni ji “Nɔ Hewɔ ni Jeŋ Hewalɛi lɛ Miididaŋ—Enaa Tsabaa,” ni aŋma nɛkɛ maŋshiɛmɔ nɛɛ kɛ yiŋkpɛɛ lɛ fɛɛ yɛ London adafitswaa wolo titri ko mli yɛ enɔ jetsɛremɔ. Yɛ sɛɛ mli lɛ, baalabii akuu nɛɛ ja nakai yiŋkpɛɛ lɛ ekomekomei akpekpei 50 akɛ dɛhiɛmɔ wolo yɛ jeŋ fɛɛ—eji piŋmɔ lɛlɛŋ kɛha osɔfoi lɛ! Yɛ afii komɛi asɛɛ lɛ, gbɔmɛi ni yɔɔ England loo Ŋleshi Ablotsiri lɛ wie nɛkɛ tsɛ̃rɛmɔ ni akɛkpa mama nɛɛ he lolo.

19. Mɛɛ tawuu nibii krokomɛi okadi baalabii lɛ anine eshɛ nɔ, ni mɛni eyɔɔ ni ebaawie yɛ London yiŋtoo jajemɔ lɛ he?

¹⁹ Okadi baalabii lɛ anine shɛ tawuu nibii krokomɛi anɔ ekoŋŋ yɛ nɛkɛ kpee nɛɛ shishi, titri lɛ wolo hee ko ni egbɛi ji Deliverance. Nɔ ni fata he ji ŋmalɛ naa saji ahe susumɔ ni kɔɔ okadi ni tsɔɔ akɛ afɔ ‘bi nuu’ nɔyeli, ni ji Kristo ŋwɛi Maŋtsɛyeli lɛ yɛ 1914. (Mateo 24:3-14; Kpojiemɔ 12:1-10) Yɛ no sɛɛ lɛ, etsɛ wiemɔ kɛjɛ yiŋtoo jajemɔ ni aŋma yɛ London, yɛ 1917, ni osɔfoi kpaanyɔ ni atsɔɔ mli akɛ amɛfata “je lɛŋ shiɛlɔi kpanakpanaai lɛ ahe” lɛ kɛ amɛwaonaa gbɛi wo shishi lɛ mli. Amɛdamɔ shi kɛha Protestant jamɔi titrii lɛ—Baptist, Congregational, Presbyterian, Episcopalian, kɛ Methodist. Nɛkɛ yiŋtoo loo sanejajemɔ nɛɛ jaje akɛ “ŋmɛnɛŋmɛnɛ haomɔi nɛɛ tsɔɔ Jeŋmaji abe lɛ naagbee” ni akɛ “abaanyɛ akpa Nuŋtsɔ lɛ kpojiemɔ lɛ gbɛ akɛ ebaaba be fɛɛ be agbɛnɛ.” Hɛɛ, nakai osɔfoi lɛ eyɔse ba ni Yesu eba lɛ he okadi lɛ! Shi ani amɛmiisumɔ ni amɛfee nɔ ko yɛ he? Wolo ni ji Deliverance lɛ kɛɔ wɔ akɛ: “Sane nɛɛ fa ni yɔɔ naakpɛɛ fe fɛɛ ji akɛ nɛkɛ hii nɛɛ nɔŋŋ ni kɛ amɛwaonaa gbɛi wo yiŋtoo loo sanejajemɔ lɛ shishi lɛ kwa enɛ yɛ amɛnɔ ni amɛkpoo odaseyeli ni tsɔɔ akɛ wɔyɛ je lɛ naagbee kɛ ba ni Nuŋtsɔ lɛ eba nɔ ni ji shii enyɔ lɛ mli lɛ.”

20. (a) Mɛni osɔfoi lɛ ehala yɛ baalabii akuu lɛ kɛ amɛ-Maŋtsɛ lɛ he? (b) Namɔ Yohane kɛɛ lɛ ji mɔ ni kwɛɔ baalabii akuu lɛ nɔ, ni mɛni ji egbɛi?

²⁰ Ni amɛaatswa Nyɔŋmɔ Maŋtsɛyeli ni baa lɛ he adafi moŋ lɛ, Kristendom osɔfoi lɛ ehala akɛ amɛkɛ Satan je lɛ aaahi shi. Amɛtaooo ni amɛkɛ baalabii akuu lɛ kɛ amɛ-Maŋtsɛ, ni Yohane wie nɛkɛ yɛ ehe lɛ feɔ nɔ ko: “Ni amɛnɔ maŋtsɛ ji bu kwɔŋkwɔŋ lɛ mli bɔfo lɛ, ni atsɛɔ egbɛi yɛ Hebri wiemɔ lɛ mli akɛ Abadon [eshishi ji “Hiɛkpatamɔ”], ni Hela wiemɔ lɛ mli lɛ atsɛɔ egbɛi Apolion [eshishi ji “Hiɛkpatalɔ”].” (Kpojiemɔ 9:11) Akɛ “bu kwɔŋkwɔŋ lɛ mli bɔfo” kɛ “Hiɛkpatalɔ” lɛ, Yesu ejie haomɔ ni ji kpoo eshwie Kristendom nɔ lɛlɛŋ. Shi babaoo baanyiɛ sɛɛ!

[Shishigbɛ niŋmai]

[Mfoniri ni yɔɔ baafa 143]

Tɛtrɛmaŋtɛrɛ ni ji enumɔ lɛ kpamɔ kɛ kpooi etɛ lɛ mli klɛŋklɛŋ nɔ lɛ ba

[Mfoniri ni yɔɔ baafa 146]

Ogaimlibii lɛ anaa ba ni amɛtsurɔɔ Maŋtsɛ lɛ henyɛlɔi lɛ atsuiiaŋ. (Lala 45:6) Ákɛ nɔ ni fata nɛkɛ wiemɔ nɛɛ he lɛ, mfoniri ni onaa yɛ yiteŋgbɛ nɛɛ tamɔ babaoo ni afee yɛ 1930 afii lɛ amli ni tsɛ̃rɛ “gbɔmɛi ni bɛ Nyɔŋmɔ naasɔomɔ nɔ lɛ”

[Mfonirii ni yɔɔ baafa 147]

Royal Albert Hall, he ni ajie wolo Deliverance lɛ kpo yɛ ni akpɛlɛ yiŋkpɛɛ “Odaseyeli Kɛha Jeŋ Nɔyelɔi Lɛ” nɔ yɛ lɛ