Yitso 35
Babilon Kpeteŋkpele lɛ Hiɛkpatamɔ
1. Te bɔfo lɛ tsɔɔ kooloo ni tsuɔ tamɔ muneele lɛ mli eha tɛŋŋ, ni mɛɛ nilee he hiaa koni akɛnu Kpojiemɔ mli okadii lɛ ashishi?
YƐ BE mli ni eyaa nɔ etsɔɔ kooloo ni tsuɔ tamɔ muneele ni yɔɔ Kpojiemɔ 17:3 lɛ mli lolo lɛ, bɔfo lɛ kɛɛ Yohane akɛ: “Biɛ jwɛŋmɔ ni nilee yɔɔ mli lɛ yɔɔ. Yitsei kpawo lɛ ji gɔji kpawo ni yoo lɛ ta nɔ lɛ, ni maŋtsɛmɛi kpawo ni. Mɛi enumɔ lɛ egbee shi, ni mɔ kome lɛ yɛ, ni mɔ kroko lɛ nako aba, ni kɛ eba lɛ, ja ehi shi fioo.” (Kpojiemɔ 17:9, 10) Bɔfo lɛ kɛ ŋwɛi nilee miiha yɛ biɛ, nilee kome pɛ ni baanyɛ ekɛ shishinumɔ ni kɔɔ Kpojiemɔ wolo lɛ okadii nɛɛ ahe lɛ aha. (Yakobo 3:17) Nilee nɛɛ haa Yohane kuu lɛ kɛ amɛhefatalɔi lɛ nuɔ bɔ ni hiɛdɔɔ yɔɔ be ni wɔyɔɔ mli nɛɛ mli lɛ shishi. Etswaa hiɛsɔɔ kɛha Yehowa kojomɔi, ni kpaako abaatsu he nii lɛ yɛ tsuii ni atuu aha Yehowa lɛ amli, ni etɛoɔ Yehowa he gbeyeishemɔ kpakpa ewoɔ mɛi amli. Taakɛ Abɛi 9:10 jaje lɛ: “Yehowa gbeyeishemɔ ji nilee shishijee, ni mɔ krɔŋkrɔŋ lɛ lee ji sanesɛɛkɔmɔ.” Mɛni ŋwɛi nilee jieɔ lɛ kpo kɛhaa wɔ yɛ nɛkɛ kooloo nɛɛ he?
2. Mɛni ji kooloo ni tsuɔ tamɔ muneele lɛ yitsei kpawo lɛ shishi, ni te ebaa lɛ tɛŋŋ ni “enumɔ lɛ egbee shi, ni mɔ kome yɛ lɛ”?
2 Kooloo ni he yɔɔ gbeyei lɛ yitsei kpawo lɛ damɔ shi kɛha “gɔji” kpawo, aloo “maŋtsɛmɛi” kpawo. Akɛ wiemɔi enyɔ nɛɛ fɛɛ tsuɔ nii yɛ Ŋmalɛ lɛ naa akɛtoɔ nɔyeli hewalɛi ahe. (Yeremia 51:24, 25; Daniel 2:34, 35, 44, 45) Yɛ Biblia mli lɛ, atsiɔ jeŋ hewalɛi ekpaa ni na Nyɔŋmɔ webii ashihilɛ nɔ hewalɛ lɛ ta: Mizraim, Ashur, Babilon, Media kɛ Pershia, Hela, kɛ Roma. Enɛɛmɛi ateŋ enumɔ eba ni amɛho amɛtee momo yɛ be mli ni Yohane nine shɛɔ Kpojiemɔ lɛ nɔ lɛ, ni Roma yɛ lolo akɛ jeŋ hewalɛ. Enɛ kɛ wiemɔi, “mɛi enumɔ lɛ egbee shi, ni mɔ kome lɛ yɛ” lɛ kpaa gbee. Shi “mɔ kroko” lɛ ni nako aba lɛ hu?
3. (a) Te fee tɛŋŋ ni ajara Roma Maŋtsɛyeli lɛ mli lɛ? (b) Te nibii tee nɔ yɛ Anaigbɛ eha tɛŋŋ? (d) Te abaabu Roma Maŋtsɛyeli Krɔŋkrɔŋ lɛ tɛŋŋ?
3 Roma Maŋtsɛyeli lɛ tee nɔ ehi shi ni elɛɛ emaŋtsɛyeli lɛ mli yɛ Yohane gbii lɛ asɛɛ afii ohai pii. Yɛ afi 330 Ŋ.B. lɛ, Maŋtsɛ Konstantino fa emaŋtiase lɛ kɛjɛ Roma kɛtee Byzantium, ni ewo lɛ gbɛi hee akɛ Constantinople. Aja Roma Maŋtsɛyeli lɛ mli enyɔ yɛ 395 Ŋ.B. afee lɛ Bokagbɛ nɔ kɛ Anaigbɛ nɔ. Roma diɛŋtsɛ gbee shi yɛ afi 410 Ŋ.B. yɛ Alaric, Visigothbii (Germany weku ko ni amɛbatsɔmɔ Arianbii ni ji “Kristojamɔ” fa ko) lɛ amaŋtsɛ lɛ hiɛ. German wekui (ni amɛ hu amɛji “Kristofoi”) ye Spania nɔ kunim kɛ Roma shikpɔji ni yɔɔ North Africa lɛ babaoo hu nɔ kunim. Maŋ hirihiriwoo, hoofeemɔ kɛ tsakemɔi tee nɔ yɛ Europa afii ohai babaoo. Maŋtsɛmɛi ni bahe gbɛi waa bate shi yɛ Anaigbɛ, tamɔ Charlemagne, ni kɛ Paapa Leo III fee kpaŋmɔ yɛ afii ohai 9 lɛ mli kɛ Frederick II, ni ye nɔ yɛ afii ohai 13 lɛ mli lɛ. Shi eyɛ mli akɛ atsɛ amɛ maŋtsɛyeli lɛ akɛ Roma Maŋtsɛyeli Krɔŋkrɔŋ lɛ moŋ, shi eyɛ bibioo fe tsutsu Roma Maŋtsɛyeli ni he gbɛi lɛ. Etamɔ nɔ ni akɛ nɛkɛ blema jeŋ hewalɛ nɛɛ miiku sɛɛ aba hewalɛ mli ekoŋŋ loo enɔtsamɔ moŋ fe ni eeeji maŋtsɛyeli hee.
4. Mɛɛ omanye Bokagbɛ Maŋtsɛyeli lɛ ye yɛ gbɛi sɔrɔtoi anɔ, shi mɛni ba tsutsu Roma shikpɔji ni yɔɔ North Africa, Spania, kɛ Siria lɛ babaoo nɔ?
4 Roma Bokagbɛ Maŋtsɛyeli ni he shi yɛ Constantinople lɛ kɛ Anaigbɛ Maŋtsɛyeli lɛ hi shi yɛ ekomefeemɔ ko ni mli waaa mli. Yɛ afii ohai ekpaa lɛ mli lɛ, Bokagbɛ maŋtsɛ Justinian I nyɛ eye North Africa (Afrika Kooyigbɛ) shikpɔji lɛ babaoo nɔ kunim ni ekɛ ehe wo Spania kɛ Italia saji amli. Justinian II nine shɛ Macedonia ni Slavic wekui komɛi ye nɔ kunim lɛ nɔ ni ehe eha maŋtsɛyeli lɛ yɛ afii ohai kpawo lɛ mli. Shi beni shɛɔ afii ohai kpaanyɔ lɛ mli lɛ, no mli lɛ tsutsu Roma shikpɔji ni yɔɔ Afrika Kooyigbɛ, Spania kɛ Siria lɛ babaoo ebaje Islam maŋtsɛyeli hee lɛ shishi ni enɛ je Constantinople kɛ Roma fɛɛ dɛŋ.
5. Eyɛ mli akɛ Roma maŋtiase lɛ gbee shi yɛ afi 410 Ŋ.B. moŋ, shi te eba lɛ tɛŋŋ ni ehe afii ohai babaoo dani maŋkwramɔŋ Roma Maŋtsɛyeli lɛ he nibii fɛɛ ho kɛjɛ je lɛŋ lɛ?
5 Shi Constantinople maŋtiase lɛ diɛŋtsɛ tsɛ fioo. Eje tutuamɔi ni Persiabii, Arabiabii, Bulgarbii, kɛ Russiabii kɛba lɛ mli aahu kɛbashi beni yɛ naagbee lɛ egbee shi yɛ 1203—jeee kɛmiiha Muslimbii, shi moŋ Crusaders loo mɛi ni kɛɔ akɛ amɛwuɔ tai krɔŋkrɔŋi ni jɛ Anaigbɛ lɛ. Shi ebaje Muslim Ottoman nɔyelɔ Mehmed II hewalɛ shishi yɛ 1453 ni etsɛɛɛ ni ebatsɔ Ottoman, loo Turkey Maŋtsɛyeli lɛ maŋtiase. No hewɔ lɛ eyɛ mli akɛ Roma maŋtiase lɛ gbee shi yɛ afi 410 Ŋ.B. moŋ, shi ehe afii ohai babaoo dani Roma maŋkwramɔ Maŋtsɛyeli lɛ he nibii fɛɛ ho akɛ jeŋ hewalɛ. Ni yɛ no sɛɛ po lɛ, ayɔseɔ hewalɛ ni eyɔɔ yɛ mɛi anɔ lɛ yɛ jamɔ maŋtsɛyelii ni damɔ Roma paapa gbɛjianɔtoo lɛ kɛ Eastern Orthodox sɔlemɔi lɛ anɔ lɛ mli.
6. Mɛɛ maŋtsɛyelii heei je kpo, ni te nɔ ni baye omanye fe fɛɛ lɛ?
6 Shi beni shɛɔ afii ohai 15 lɛ, no mli lɛ maji komɛi miitswa maŋtsɛyelii heei kɛmiimamɔ shi. Yɛ be mli ni ato nɛkɛ maŋtsɛyeli hewalɛi heei nɛɛ ekomɛi ashishi yɛ tsutsu Roma nɔyeli hei lɛ ekomɛi ashikpɔŋkukuji anɔ lɛ, amɛ maŋtsɛyelii lɛ efeee Roma Maŋtsɛyeli lɛ nɔtsamɔ. Portugal, Spania, France kɛ Holland fɛɛ batsɔmɔ maŋtsɛyelii ni nɔyeli hei shɛɔ shɔŋŋ. Shi mɔ ni ye omanye fe fɛɛ ji Britania, ni baye maŋtsɛyeli he ni da waa ni ‘hulu enyɔɔɔ shi yɛ nɔ’ lɛ nɔ lɛ. Nɛkɛ maŋtsɛyeli nɛɛ mli lɛɛ yɛ bei sɔrɔtoi amli kɛtee Amerika Kooyigbɛ, Afrika, India, kɛ Asia Wuoyi-Bokagbɛ, kɛ agbɛnɛ kɛtee South Pacific niiaŋ tɔɔ.
7. Te fee tɛŋŋ ni jeŋ hewalɛ ni bɔ he enyɔ ba shihilɛ mli, ni be enyiɛ Yohane kɛɛ akɛ ‘yitso’ loo jeŋ hewalɛ ni ji kpawo lɛ baaya nɔ ahi shi?
7 Beni shɛɔ afii ohai 19 lɛ, no mli lɛ shihemɔ hei ni yɔɔ Amerika Kooyigbɛ lɛ ekomɛi etsi amɛhe kɛjɛ Britania he amɛfee United States of America ni yeɔ ehe. Maŋkwramɔŋ béi tee nɔ yɛ maŋ hee lɛ kɛ tsutsu jakumaŋ lɛ teŋ. Yɛ fɛɛ sɛɛ lɛ, klɛŋklɛŋ jeŋ ta lɛ nyɛ maji enyɔ nɛɛ fɛɛ nɔ ni amɛyoo nibii ni amɛ fɛɛ amɛnyaa he lɛ ni amɛsaa ekomefeemɔ krɛdɛɛ ni ka amɛteŋ lɛ koni amɛha emli awa. No hewɔ lɛ, nɔ ko tamɔ jeŋ hewalɛ ni bɔ he enyɔ ko ba shihilɛ mli, ni nomɛi ji United States of America, ni amrɔ nɛɛ eji maŋ ni yɔɔ shika fe fɛɛ yɛ je lɛŋ lɛ kɛ Great Britain, jeŋ maŋtsɛyeli ni da fe fɛɛ lɛ shihilɛ he lɛ. Enɛ bafee ‘yitso’ ni ji kpawo lɛ, aloo jeŋ hewalɛ ni yaa nɔ ehiɔ shi kɛyashiɔ naagbee be lɛ mli, ni ŋmɛnɛŋmɛnɛ beaŋ Yehowa Odasefoi ni ato amɛ shishi lɛ yɔɔ amɛ shikpɔŋkukuji amli lɛ. Kɛ akɛto yitso ni ji ekpaa lɛ nɔyeli be kakadaŋŋ lɛ he lɛ, kpawo lɛ ‘baahi shi fioo,’ kɛyashi be mli ni Nyɔŋmɔ Maŋtsɛyeli lɛ aaakpata jeŋmaji ni yɔɔ shihilɛ mli lɛ fɛɛ ahiɛ.
Mɛni Hewɔ Atsɛɔ lɛ Maŋtsɛ ni ji Kpaanyɔ Lɛ?
8, 9. Te bɔfo lɛ tsɛ okadi kooloo ni tsuɔ tamɔ muneele lɛ tɛŋŋ, ni ejɛ kpawo lɛ mli yɛ mɛɛ gbɛ nɔ?
8 Bɔfo lɛ tee nɔ etsɔɔ mli lolo etsɔɔ Yohane: “Ni kooloo lɛ ni yɔɔ ni ebɛ lɛ, lɛ ji mɔ ni ji kpaanyɔ, ni ejɛ mɛi kpawo lɛ amli, ni eeya hiɛkpatamɔ mli.” (Kpojiemɔ 17:11) Okadi kooloo ni tsuɔ tamɔ muneele lɛ “jɛ” yitsei kpawo lɛ mli; ni ji akɛ shishijee “kooloo . . . ni fa kpo kɛjɛ ŋshɔ mli” ni kooloo ni tsuɔ tamɔ muneele lɛ ji ehe amaga lɛ yitsei lɛ fɔ lɛ loo amɛkɛ lɛ ba shihilɛ mli. Yɛ mɛɛ gbɛ nɔ? Ojogbaŋŋ, yɛ 1919 lɛ, no mli lɛ Anglo-Amerika hewalɛ lɛ ji yitso ni eje kpo. Tsutsu yitsei ekpaa lɛ egbee shi, ni gbɛhe akɛ jeŋ hewalɛ lɛ ebaje nɛkɛ yitsei enyɔ ni efee ekome nɛɛ adɛŋ. Akɛ jeŋ hewalɛi ni tsara nɔ lɛ aŋmɛnɛŋmɛnɛ beaŋ najiaŋdamɔlɔ lɛ, nɛkɛ yitso kpawo nɛɛ ji hewalɛ ni ha ato Jeŋmaji Akpaŋmɔ lɛ ama shi ni eka he eji mɔ ni fiɔ Jeŋmaji Ekomefeemɔ lɛ sɛɛ ni ekɛ shika yeɔ buaa lɛ. No hewɔ lɛ, yɛ okadi gbɛ nɔ lɛ, kooloo ni tsuɔ tamɔ muneele lɛ—maŋtsɛ ni ji kpaanyɔ lɛ—“jɛ” shishijee yitsei kpawo lɛ mli. Kɛ akwɛ lɛ yɛ nɛkɛ gbɛ nɔ lɛ, wiemɔ akɛ ejɛ kpawo lɛ mli lɛ kɛ tsutsu kpojiemɔ akɛ kooloo ni yɔɔ akoloŋtoi bibii enyɔ tamɔ toobi lɛ, (Anglo-Amerika Jeŋ Hewalɛ lɛ, nakai shishijee kooloo lɛ yitso ni ji kpawo lɛ) ji mɔ ni wo hewalɛ akɛ afee amaga lɛ ni lɛ ji mɔ ni kɛ wala ha lɛ lɛ kpaa gbee.—Kpojiemɔ 13:1, 11, 14, 15.
9 Kɛfata he lɛ, mɛi ni fata shishijee Jeŋmaji Akpaŋmɔ lɛ mlibii lɛ ahe lɛ ji Great Britain, kɛ nɔyelii ni ye nɔ yɛ tsutsu yitsei nɛɛ ekomɛi agbɛhe mli, tamɔ Hela, Iran (Persia), kɛ Italia (Roma). Yɛ naagbee lɛ, nɔyelii ni yeɔ shikpɔŋkuku ni tsutsu jeŋ hewalɛi ekpaa lɛ yeɔ nɔ lɛ anɔ lɛ bafee mɛi ni fiɔ kooloo lɛ he amaga lɛ sɛɛ lɛ mlibii. Abaanyɛ awie yɛ shishinumɔ nɛɛ naa hu akɛ, kooloo ni tsuɔ tamɔ muneele nɛɛ fa kpo kɛjɛ jeŋ hewalɛi kpawo lɛ amli.
10. (a) Te aaafee tɛŋŋ anyɛ akɛɛ akɛ kooloo ni tsuɔ tamɔ muneele lɛ hu ji “mɔ ni ji kpaanyɔ”? (b) Mɛɛ gbɛ nɔ tsutsu Soviet Union hiɛnyiɛlɔ ko tsɔɔ akɛ efiɔ Jeŋmaji Ekomefeemɔ lɛ sɛɛ?
10 Kadimɔ akɛ kooloo ni tsuɔ tamɔ muneele lɛ hu ji “mɔ ni ji kpaanyɔ.” No hewɔ lɛ, ato Jeŋmaji Ekomefeemɔ lɛ gbɛjianɔ ŋmɛnɛ koni etamɔ jeŋ nɔyeli. Yɛ bei komɛi amli lɛ, efeɔ enii tamɔ nakai, etsuɔ asraafoi kɛyaa tawuu he koni amɛyasaa majimaji ateŋ bei, taakɛ eba yɛ Korea, Sinai Ŋa lɛ nɔ, kɛ Afrika maji komɛi amli kɛ Lebanon lɛ. Shi eji maŋtsɛ ko he amaga kɛkɛ. Taakɛ jamɔ he amaga ji lɛ, ebɛ hegbɛ loo hewalɛ pɔtɛɛ ko ja nɔ ni mɛi ni kɛ lɛ ba shihilɛ mli ni amɛjaa lɛ lɛ kɛha lɛ lɛ. Bei shɛɔ ni nɛkɛ okadi kooloo nɛɛ feɔ mɔ ni egbɔjɔ kwraa; shi ekpako emlibii ni taoɔ amɛtsɔmɔ nɔyelɔi yiwalɔi ni amɛ fɛɛ amɛshiɔ lɛ taakɛ amɛfee ni amɛkɛha Jeŋmaji Akpaŋmɔ lɛ kokolo kɛbote bu kwɔŋkwɔŋ lɛ mli lɛ shi da. (Kpojiemɔ 17:8) Eyɛ mli akɛ amɛhiɛ susumɔi sɔrɔtoi yɛ nibii sɔrɔtoi ahe ni ehaa esoroɔ amɛ kwraa moŋ, shi tsutsu Soviet Union hiɛnyiɛlɔ ko ni ale lɛ waa kɛ Roma paapai lɛ fee ekome yɛ 1987 ni amɛkɛwie wiemɔi ni tsɔɔ akɛ amɛfiɔ Jeŋmaji Ekomefeemɔ lɛ sɛɛ. Ebi koni ana “majimaji ateŋ shweshweeshwe shihilɛ he gbɛjianɔtoo ni yaa shɔŋŋ” ni damɔ Jeŋmaji Ekomefeemɔ lɛ nɔ. Taakɛ etsɛɛɛ ni Yohane bale lɛ, be baashɛ ni Jeŋmaji Ekomefeemɔ lɛ baatsu nii kɛ hewalɛ ni fa. Kɛkɛ lɛ, lɛ diɛŋtsɛ hu “eeeya hiɛkpatamɔ mli.”
Maŋtsɛmɛi Nyɔŋma Kɛha Ŋmɛlɛtswaa Kome
11. Mɛni Yehowa bɔfo lɛ wie yɛ okadi kooloo ni tsuɔ tamɔ muneele lɛ akoloŋtoi nyɔŋma lɛ ahe?
11 Yɛ Kpojiemɔ wolo lɛ yitso ni tsɔ enɛ hiɛ lɛ mli lɛ, ŋwɛibɔfoi ni gbeɔ yi feɔ ekpaa kɛ kpawo lɛ fɔse Nyɔŋmɔ mlifu tɔi lɛ amli nii amɛshwie shi. No hewɔ lɛ akɛɛ wɔ akɛ aabua shikpɔŋ lɛ nɔ maŋtsɛmɛi lɛ anaa kɛmiiya Nyɔŋmɔ ta ni ji Harmagedon lɛ he, ni akɛ ‘abaakai Babilon Kpeteŋkpele lɛ yɛ Nyɔŋmɔ hiɛ.’ (Kpojiemɔ 16:1, 14, 19) Agbɛnɛ wɔbaakase bɔ ni abaatsu Nyɔŋmɔ fɔbuu kojomɔi ahe nii ashwie enɛɛmɛi anɔ lɛ he nii babaoo wɔfata he. Agbɛnɛ bo Yehowa bɔfo lɛ toi ekoŋŋ yɛ be mli ni ewieɔ etsɔɔ Yohane lɛ: “Ni akoloŋtoi nyɔŋma ni ona lɛ, maŋtsɛmɛi nyɔŋma ni, mɛi ni maŋtsɛyeli ko shɛko amɛdɛŋ, shi kɛlɛ amɛkɛ kooloo lɛ ena hegbɛ tamɔ maŋtsɛmɛi ŋmɛlɛtswaa kome. Mɛnɛɛmɛi hiɛ jwɛŋmɔ kome, ni amɛkɛ amɛhewalɛ kɛ amɛhegbɛ lɛ eha kooloo lɛ kwraa. Mɛnɛɛmɛi kɛ Toobi lɛ baawuu, ni Toobi lɛ baaye amɛnɔ kunim, ejaakɛ lɛ ji nuŋtsɔmɛi a-Nuŋtsɔ kɛ maŋtsɛmɛi a-Maŋtsɛ, ni mɛi ni kɛ lɛ yɔɔ lɛ ji mɛi ni atsɛ kɛ mɛi ni ahala kɛ mɛi ni heɔ yeɔ lɛ.”—Kpojiemɔ 17:12-14.
12. (a) Akoloŋtoi nyɔŋma lɛ feɔ mɛni he mfoniri? (b) Te ebaa lɛ tɛŋŋ ni okadi akoloŋtoi nyɔŋma lɛ ‘nine shɛko maŋtsɛyeli nɔ’ lɛ? (d) Okadi akoloŋtoi nyɔŋma lɛ ena “maŋtsɛyeli” agbɛnɛ, ni kɛyashi mɛɛ be?
12 Maŋtsɛmɛi nyɔŋma lɛ damɔ shi kɛha maŋkwramɔŋ hewalɛi fɛɛ ni amrɔ nɛɛ amɛyeɔ nɔ ni ale amɛ yɛ je lɛŋ ni fiɔ kooloo lɛ amaga lɛ sɛɛ lɛ. Maji ni yɔɔ amrɔ nɛɛ lɛ ateŋ fioo ko pɛ ale yɛ Yohane gbii lɛ amli. Ni mɛi ni ale amɛ yɛ no beaŋ nɛɛ ekomɛi ji Mizraim kɛ Persia (Iran), ni ŋmɛnɛ amɛhiɛ maŋkwramɔŋ gbɛjianɔtoo ni yɔɔ sɔrɔto kwraa lɛ. No hewɔ lɛ, ‘akoloŋtoi nyɔŋma lɛ nine shɛko maŋtsɛyeli nɔ’ yɛ klɛŋklɛŋ afii oha lɛ mli. Shi ŋmɛnɛ, yɛ Nuŋtsɔ lɛ gbi lɛ mli nɛɛ, amɛyɛ “maŋtsɛyeli,” aloo maŋkwramɔŋ hewalɛ. Beni shihemɔ maŋtsɛyelii wuji lɛ gbee shi pɛ, titri lɛ kɛjɛ jeŋ ta ni ji enyɔ lɛ sɛɛ kɛbaa nɛɛ, afɔ maji heei babaoo. Esa akɛ mɛnɛɛmɛi, kɛ agbɛnɛ hewalɛi ni ato amɛ etsɛ lɛ kɛ kooloo lɛ aye maŋtsɛ yɛ be fioo ko mli—yɛ “ŋmɛlɛtswaa kome” pɛ mli—dani Yehowa kɛ jeŋ maŋkwramɔŋ hegbɛi lɛ fɛɛ aba naagbee yɛ Harmagedon.
13. Akoloŋtoi nyɔŋma lɛ yɛ “jwɛŋmɔ kome” yɛ mɛɛ gbɛ nɔ, ni mɛɛ su amɛkɛ enɛ jieɔ lɛ kpo amɛtsɔɔ Toobi lɛ?
13 Ŋmɛnɛ, maŋhedɔɔ ji hewalɛi ni mli wa fe fɛɛ ni tsirɛɔ nɛkɛ akoloŋtoi nyɔŋma nɛɛ ateŋ ekome. Amɛyɛ “jwɛŋmɔ kome” ni tsɔɔ akɛ amɛmiisumɔ ni amɛbaa amɛmaŋ maŋtsɛyelii lɛ ayi moŋ fe ni amɛaakpɛlɛ Nyɔŋmɔ Maŋtsɛyeli lɛ nɔ. Enɛ ji yiŋtoo ni amɛyɔɔ ni no ha amɛkpɛlɛ Jeŋmaji Akpaŋmɔ lɛ kɛ Jeŋmaji Ekomefeemɔ gbɛjianɔtoi lɛ anɔ klɛŋklɛŋ kwraa lɛ—koni amɛha jeŋ toiŋjɔlɛ ahi shi ni amɛbaa amɛ diɛŋtsɛ amɛshihilɛ yi. Su ni tamɔ nɛkɛ maa nɔ mi akɛ akoloŋtoi lɛ baate shi awo Toobi lɛ, “nuŋtsɔmɛi a-Nuŋtsɔ kɛ maŋtsɛmɛi a-Maŋtsɛ lɛ,” ejaakɛ Yehowa eto eyiŋ akɛ etsɛŋ ni e-Maŋtsɛyeli ni yɔɔ Yesu Kristo shishi lɛ baaye nɛkɛ maŋtsɛyelii nɛɛ fɛɛ najiaŋ.—Daniel 7:13, 14; Mateo 24:30; 25:31-33, 46.
14. Mɛni haa jeŋ nɔyelɔi lɛ nyɛɔ amɛkɛ Toobi lɛ wuɔ ta lɛ, ni mɛni baajɛ mli aba?
14 Eji anɔkwale akɛ nɔ ko nɔ ko bɛ ni je nɛŋ nɔyelɔi lɛ baanyɛ afee ashi Yesu diɛŋtsɛ. Ŋwɛi eyɔɔ, eyɛ shɔŋŋ ni amɛnine shɛŋ enɔ. Shi Yesu nyɛmimɛi lɛ, yoo lɛ seshibii ni eshwɛ lɛ, yɛ shikpɔŋ nɔ lolo ni eka shi faŋŋ akɛ enine baanyɛ ashɛ amɛnɔ. (Kpojiemɔ 12:17) Akoloŋtoi nɛɛ babaoo ejie bɔ ni amɛnyɛɔ amɛ waa lɛ kpo amɛtsɔɔ amɛ, ni amɛtsɔ nɛkɛ gbɛ nɔ amɛkɛ Toobi lɛ ewuu. (Mateo 25:40, 45) Shi, etsɛŋ ni be baashɛ kɛha Nyɔŋmɔ Maŋtsɛyeli lɛ, ni “eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ.” (Daniel 2:44) No mli lɛ, shikpɔŋ lɛ nɔ maŋtsɛmɛi lɛ kɛ amɛhe baawo tawuu ni amɛkɛ Toobi lɛ baawuu kɛya naagbee lɛ mli, taakɛ etsɛŋ ni wɔbaana lɛ. (Kpojiemɔ 19:11-21) Shi wɔkaseɔ nɔ ni fa yɛ biɛ ni enɛ haa wɔyɔseɔ akɛ jeŋmaji lɛ yeŋ omanye. Eyɛ mli akɛ amɛkɛ Jeŋmaji Ekomefeemɔ kooloo ni tsuɔ tamɔ muneele lɛ yɛ “jwɛŋmɔ kome” moŋ, shi amɛnyɛŋ amɛye “nuŋtsɔmɛi a-Nuŋtsɔ kɛ maŋtsɛmɛi a-Maŋtsɛ” kpeteŋkpele lɛ nɔ kunim, ni asaŋ amɛnyɛŋ amɛye “mɛi ni atsɛ kɛ mɛi ni ahala kɛ mɛi ni heɔ yeɔ” ni esɛɛnyiɛlɔi ni afɔ amɛ mu ni yɔɔ shikpɔŋ nɔ lolo lɛ fata he lɛ anɔ kunim. No mli lɛ mɛnɛɛmɛi hu eye kunim kɛtsɔ emuuyeli mli ni amɛhiɛ ni amɛkɛha Satan naafolɔmɔ ni bɛ mli lɛ hetoo lɛ nɔ.—Romabii 8:37-39; Kpojiemɔ 12:10, 11.
Ajwamaŋ lɛ Hiɛkpatamɔ
15. Mɛni bɔfo lɛ kɛɔ yɛ ajwamaŋ lɛ kɛ su kɛ nifeemɔ ni akoloŋtoi nyɔŋma lɛ kɛ kooloo lɛ jieɔ lɛ kpo yɛ ehe lɛ he?
15 Jeee Nyɔŋmɔ webii lɛ pɛ ji mɛi ni akoloŋtoi nyɔŋma lɛ nyɛɔ amɛ. Agbɛnɛ bɔfo lɛ gbala Yohane jwɛŋmɔ kɛtee ajwamaŋ lɛ nɔ: “Ni ekɛɛ mi akɛ: Nui lɛ ni ona ni yoo ajwamaŋ lɛ ta nɔ lɛ ji maji kɛ asafoi kɛ jeŋmaji kɛ majianɔwiemɔi. Ni akoloŋtoi nyɔŋma ni ona lɛ, kɛ kooloo lɛ, amɛaanyɛ ajwamaŋ lɛ, ni amɛaafee lɛ amaŋfɔ, ni amɛaaŋmɛ lɛ yayai, ni amɛaaye eheloo, ni amɛkɛ la aaasha lɛ.”—Kpojiemɔ 17:15, 16.
16. Mɛni hewɔ Babilon Kpeteŋkpele lɛ nyɛŋ ni ekɛ ehiɛ afɔ enui lɛ anɔ koni amɛbu ehe ni amɛfi esɛɛ yɛ be mli ni maŋkwramɔŋ nɔyelii lɛ teɔ shi woɔ lɛ lɛ?
16 Taakɛ bɔ ni blema Babilon kɛ ehiɛ fɔɔ nui ni buɔ ehe lɛ anɔ lɛ, nakai nɔŋŋ Babilon Kpeteŋkpele lɛ ni yɔɔ ŋmɛnɛ lɛ hu kɛ ehiɛ fɔɔ emlibii babaoo ni ji “maji kɛ asafoi kɛ jeŋmaji kɛ majianɔwiemɔi” lɛ anɔ. Bɔfo lɛ gbala wɔjwɛŋmɔ kɛtee enɛɛmɛi anɔ yɛ gbɛ ni ja nɔ dani ekɛɛ wɔ hejɔ̃mɔ nibii ni baate shi yɛ no sɛɛ lɛ: Maŋkwramɔŋ nɔyelii ni yɔɔ shikpɔŋ nɛɛ nɔ lɛ kɛ mlifu kɛ yiwalɛ baate shi awo Babilon Kpeteŋkpele lɛ. Mɛni ji nɔ ni nakai “maji kɛ asafoi kɛ jeŋmaji kɛ majianɔwiemɔi” lɛ baafee agbɛnɛ? Nyɔŋmɔ webii lɛ miibɔ Babilon Kpeteŋkpele lɛ kɔkɔ akɛ Eufrate faa lɛ mli nui lɛ baamii. (Kpojiemɔ 16:12) Nakai nui lɛ baata kwraa yɛ naagbee. Amɛnyɛŋ amɛkɛ sɛɛfimɔ ni sa aha nakai blema ajwamaŋ ni anyaŋeɔ lɛ lɛ yɛ ŋmɛlɛtswaa ni eeehia lɛ fe fɛɛ lɛ mli.—Yesaia 44:27; Yeremia 50:38; 51:36, 37.
17. (a) Mɛni hewɔ Babilon Kpeteŋkpele lɛ jwetrii babaoo lɛ nyɛŋ ahere eyiwala lɛ? (b) Mɛni hewɔ Babilon Kpeteŋkpele lɛ naagbee efeŋ nɔ ni woo yɔɔ mli lɛ? (d) Yɛ akoloŋtoi nyɔŋma lɛ, aloo jeŋmaji aŋkroaŋkroi lɛ asɛɛ lɛ, mɛni hu bafataa hiɛkpatamɔ ni akɛbaa Babilon Kpeteŋkpele lɛ nɔ lɛ he?
17 Yɛ anɔkwale mli lɛ, Babilon Kpeteŋkpele lɛ jwetrii loo enii babaoo lɛ fɛɛ nyɛŋ ahere eyiwala. No moŋ po baaha ehiɛkpatamɔ lɛ aba oya, ejaakɛ ninaa lɛ tsɔɔ akɛ kɛ kooloo lɛ kɛ akoloŋtoi nyɔŋma lɛ fɔse amɛmlifu amɛshwie enɔ lɛ, amɛbaajie etadei fɛfɛji lɛ kɛ ejwetrii lɛ fɛɛ kɛjɛ ehe. Amɛbaaha enii ni ena lɛ fɛɛ. “Amɛaaŋmɛ lɛ yayai,” amɛbaakpa ehe mama ni ana bɔ ni esu ji diɛŋtsɛ yɛ hiɛshishwiemɔ mli. Mɛɛ hiɛkpatamɔ kwraa nɛ! Enaagbee lɛ baafee nɔ ni woo ko kwraa bɛ mli. Amɛaakpata ehiɛ, “amɛaaye eheloo lɛ,” ni ebaatsɔ wui ni wala bɛ mli. Yɛ naagbee lɛ “amɛkɛ la aaasha lɛ” kwraa. Ashaa lɛ tamɔ mɔ ni kɛ gbele hela baa, ni fuu ni woo yɔɔ mli fataaa he! Jeee jeŋmaji lɛ pɛ, ni akoloŋtoi nyɔŋma lɛ damɔ shi kɛha amɛ lɛ kpataa ajwamaŋ kpeteŋkpele nɛɛ hiɛ, shi moŋ “kooloo lɛ,” ni ji, Jeŋmaji Ekomefeemɔ lɛ diɛŋtsɛ, fataa amɛhe yɛ nɛkɛ hiɛkpatamɔ nɛɛ mli. Ebaafi apasa jamɔ hiɛkpatamɔ lɛ sɛɛ. Jeŋmaji Ekomefeemɔ lɛ mlibii 190 kɛ nɔ ni fe nakai lɛ ateŋ mɛi ni fa ejie su ko ni tamɔ nakai kpo, kɛtsɔ gbɛ ni amɛtsɔɔ nɔ amɛfɔɔ oshiki lɛ nɔ, akɛ béi ka amɛkɛ jamɔ teŋ, titri lɛ Kristendom.
18. (a) Mɛni ni baanyɛ aba ni baaha jeŋmaji lɛ atsɔ amɛhiɛ amɛwo Babilon Kpeteŋkpele lɛ atsɔ hiɛ ana momo? (b) Mɛni ji nɔ titri ni abaadamɔ nɔ atutua ajwamaŋ kpeteŋkpele lɛ kɛjɛ he fɛɛ he lɛ?
18 Mɛni hewɔ esa akɛ jeŋmaji lɛ afee amɛtsutsu hemɔ lɛ niseniianii ni tamɔ nɛkɛ? Wɔtsɔ hiɛ wɔna yɛ nyɛsɛɛ yinɔsane mli akɛ nɔ ni baanyɛ aba ni baaha atsɔ hiɛ awo Babilon jamɔ lɛ yɛ. Bɔ ni nɔyeli lɛ teɔ shi ewoɔ amɛ lɛ eba hewalɛ ni jamɔ hiɛ yɛ shikpɔji tamɔ tsutsu Soviet Union kɛ China lɛ shi babaoo. Yɛ hei ni Protestantbii fa yɛ yɛ Europa nɛkɛ lɛ, gbɔmɛi lɛ efee shikpilikpii ni amɛyiŋ efee amɛ kɔshikɔshi ni amɛshi sɔlemɔtsui lɛ amli, no hewɔ lɛ kɛ aaawie he lɛ, etamɔ nɔ ni Nyɔŋmɔ jamɔ egbo kwraa. Nɔ ni egbala loo etsɛrɛ Katolek maŋtsɛyeli wulu lɛ mli bianɛ ji atuatsemɔ kɛ gbeekpamɔ ni bɛ, ni ehiɛnyiɛlɔi lɛ nyɛɛɛ aba lɛ shi. Shi esaaa akɛ wɔhiɛ kpaa anɔkwale ni eji lɛ nɔ akɛ nɛkɛ naagbee tutuamɔ ni akɛ fɛɛ baaba Babilon Kpeteŋkpele lɛ nɔ lɛ baa akɛ Nyɔŋmɔ kojomɔ ni tsakeee ni ekɛbaa ajwamaŋ kpeteŋkpele lɛ nɔ lɛ kpojiemɔ.
Nyɔŋmɔ Yiŋtoo he Nitsumɔ
19. (a) Abaanyɛ afee Yehowa fɔbuu kojomɔ ni ekɛbaa ajwamaŋ kpeteŋkpele lɛ nɔ lɛ he mfoniri kɛtsɔ bɔ ni ekojo Yerusalem ni kwa hemɔkɛyeli lɛ yɛ afi 607 D.Ŋ.B. lɛ nɔ lɛ yɛ mɛɛ gbɛ nɔ? (b) Mɛni ji nɔ ni Yerusalem amaŋfɔfeemɔ ni mɔ ko mɔ ko ehiii mli yɛ afi 607 D.Ŋ.B. sɛɛ lɛ feɔ he mfoniri yɛ wɔgbii nɛɛ amli?
19 Mɛɛ gbɛ nɔ Yehowa tsɔɔ etsuɔ kojomɔ nɛɛ he nii yɛ? Abaanyɛ afee enɛ he mfoniri kɛtsɔ bɔ ni Yehowa fee enii eshi ewebii ni kwa hemɔkɛyeli lɛ yɛ blema bei lɛ amli ni ewie nɛkɛ yɛ amɛhe lɛ nɔ: “Ni mina gbeyei nɔ ko yɛ Yerusalem gbalɔi lɛ ahe: Amɛfiteɔ gbala, amɛnyiɛɔ yɛ amale mli, ni amɛwajeɔ mɛi fɔji anijiaŋ, ni mɔ ko mɔ ko akakpale kɛmiijɛ enɔ fɔŋ lɛ he. Amɛ fɛɛ kwa amɛtsɔmɔ tamɔ Sodom amɛha mi, ni emlibii lɛ tamɔ Gomora.” (Yeremia 23:14) Yehowa kɛ Nebukadnezar tsu nii yɛ afi 607 D.Ŋ.B. koni ekɛjie nakai maŋ ni bɔɔ mumɔŋ ajwamaŋ lɛ ‘atadei lɛ kɛ enibii fɛfɛji lɛ, ni eshi lɛ amaŋfɔ ni enyiɛ yayai.’ (Ezekiel 23:4, 26, 29) Yerusalem ni hi shi yɛ no beaŋ lɛ fee ŋmɛnɛŋmɛnɛ Kristendom he mfoniri, ni taakɛ Yohane na yɛ klɛŋklɛŋ ninai lɛ amli lɛ, Yehowa kɛ toigbalamɔ ni tamɔ nakai baaba Kristendom kɛ apasa jamɔi krokomɛi lɛ anɔ. Yerusalem shihilɛ ni fee amaŋfɔ ni mɔ ko bɛ mli, yɛ afi 607 D.Ŋ.B. lɛ sɛɛ lɛ tsɔɔ bɔ ni Nyɔŋmɔ jalɔ Kristendom baatamɔ yɛ be mli ni ajie ejwetrii lɛ fɛɛ kɛtee ni akpa ehe mama yɛ hiɛashishwiemɔ mli lɛ. Ni ehiŋ ehaŋ mɛi ni eshwɛ yɛ Babilon Kpeteŋkpele lɛ mli lɛ hu.
20. (a) Mɛɛ gbɛ nɔ Yohane tsɔɔ yɛ akɛ Yehowa kɛ adesai nɔyelɔi baatsu nii ekoŋŋ yɛ ehiɛkpatamɔ kojomɔ lɛ mli? (b) Mɛni ji Nyɔŋmɔ “yiŋtoo” lɛ? (d) Jeŋmaji lɛ baatsu amɛ “jwɛŋmɔ kome” lɛ he nii yɛ mɛɛ gbɛ nɔ, shi namɔ jwɛŋmɔ diɛŋtsɛ amɛtsuɔ he nii lɛ?
20 Yehowa kɛ adesai nɔyelɔi tsuɔ nii ekoŋŋ yɛ ekojomɔ mli. “Ejaakɛ Nyɔŋmɔ kɛwo amɛtsuiiaŋ koni amɛfee eyiŋtoo nii lɛ, ni amɛhiɛ jwɛŋmɔ kome, ni amɛkɛ amɛ maŋtsɛyeli lɛ aha kooloo lɛ kɛyashi beyinɔ ni aaagbe nii ni Nyɔŋmɔ ekɛɛ lɛ anaa.” (Kpojiemɔ 17:17) Mɛni ji Nyɔŋmɔ “yiŋtoo”? Ní eto gbɛjianɔ koni Babilon Kpeteŋkpele lɛ hiɛkpatalɔi lɛ afee ekome ni amɛkpata ehiɛ kwraa. Shi, jwɛŋmɔ ni nɔyelɔi lɛ hiɛ ni no haa amɛtutuaa lɛ lɛ baafee amɛ diɛŋtsɛ ‘amɛ jwɛŋmɔ kome’ he nitsumɔ. Amɛbaanu he akɛ ehe baa sɛɛnamɔ kɛhaa amɛ yɛ maŋhedɔɔ gbɛfaŋ akɛ amɛaatsɔ amɛhiɛ amɛha ajwamaŋ kpeteŋkpele lɛ. Be baashɛ ni amɛbaasusu ya ni jamɔ ni ato he gbɛjianɔ lɛ aaaya nɔ ahi shi yɛ amɛhusui amli lɛ he akɛ eji oshara kɛha amɛmaŋ nɔyeli. Shi Yehowa diɛŋtsɛ ji mɔ ni kudɔɔ saji lɛ; amɛbaatsu e-yiŋtoo he nii kɛtsɔ eblema henyɛlɔ ajwamaŋ lɛ hiɛ ni eeekpata shikome lɛ nɔ!—Okɛto Yeremia 7:8-11, 34 he.
21. Akɛni akɛ kooloo ni tsuɔ tamɔ muneele lɛ baatsu nii ni ekpata Babilon Kpeteŋkpele lɛ hiɛ hewɔ lɛ, mɛni eka shi faŋŋ akɛ jeŋmaji lɛ kɛ Jeŋmaji Ekomefeemɔ lɛ baafee?
21 Hɛɛ, jeŋmaji lɛ kɛ kooloo ni tsuɔ tamɔ muneele lɛ, Jeŋmaji Ekomefeemɔ lɛ, baatsu nii ni amɛkɛkpata Babilon Kpeteŋkpele lɛ hiɛ. Jeee amɛsuɔmɔ mli amɛjɛɔ amɛfeɔ enɛ, ejaakɛ Yehowa kɛwo amɛtsuii amli “koni amɛhiɛ jwɛŋmɔ kome, ni amɛkɛ amɛ maŋtsɛyeli lɛ aha kooloo lɛ.” Kɛ be lɛ shɛ lɛ, jeŋmaji lɛ baana bɔ ni ehe hiaa akɛ amɛaawaje Jeŋmaji Ekomefeemɔ lɛ yɛ faŋŋ mli. Kɛ aaawie he lɛ, amɛkɛ nyanyɔji baaha lɛ, ni amɛkɛ hegbɛ kɛ hewalɛ fɛɛ ni sa ni amɛyɔɔ lɛ baaha lɛ koni enyɛ etsɔ ehiɛ ewo apasa jamɔ ni ekɛ lɛ awuu yɛ omanyeyeli mli “kɛyashi beyinɔ ni aaagbe nii ni Nyɔŋmɔ ekɛɛ lɛ anaa.” No hewɔ lɛ, blema ajwamaŋ lɛ baashɛ enaagbee kwraa. Ni ehi hu akɛ ajie lɛ kɛtee yɛ nɛkɛ gbɛ nɔ!
22. (a) Bɔ ni bɔfo lɛ mu esane loo odase lɛ naa eha yɛ Kpojiemɔ 17:18 lɛ tsɔɔ mɛni? (b) Te Yehowa Odasefoi hereɔ teemɔŋ sane lɛ ni ajie lɛ kpo lɛ nɔ amɛhaa tɛŋŋ?
22 Akɛ nɔ ni ekɛmaa anɔkwale ni Yehowa fɔbuu kojomɔ ni ekɛbaa jeŋ apasa jamɔ maŋtsɛyeli nɔ lɛ ji lɛ nɔ mi lɛ, bɔfo lɛ kɛ edaseyeli lɛ ba naagbee akɛ: “Ni yoo lɛ ni ona lɛ ji maŋ kpeteŋkpele lɛ ni yeɔ shikpɔŋ lɛ nɔ maŋtsɛmɛi lɛ anɔ lɛ.” (Kpojiemɔ 17:18) Taakɛ Belshazar be lɛ mli Babilon ji lɛ, “aŋmɛ Babilon Kpeteŋkpele lɛ yɛ ŋsɛnii mli ni ana akɛ eshɛɛɛ.” (Daniel 5:27, The New English Bible) Ehiɛkpatamɔ lɛ baafee oya kɛ naagbee nɔ kwraa. Ni te Yehowa Odasefoi hereɔ ajwamaŋ kpeteŋkpele lɛ kɛ kooloo ni tsuɔ tamɔ muneele lɛ he teemɔŋ sane ni ajie lɛ kpo lɛ nɔ amɛhaa tɛŋŋ? Amɛkɛ ekaa jajeɔ Yehowa kojomɔ gbi lɛ, ni ‘amɛkɛ nyam’ haa mɛi ni taoɔ anɔkwale lɛ diɛŋtsɛ lɛ ahetoo. (Kolosebii 4:5, 6; Kpojiemɔ 17:3, 7) Taakɛ yitso ni nyiɛ sɛɛ lɛ baatsɔɔ lɛ, esa akɛ mɛi fɛɛ ni sumɔɔ ni amɛje mli yɛ be mli ni akpataa ajwamaŋ kpeteŋkpele lɛ hiɛ lɛ afee he nɔ ko, ni amɛfee enɛ oya!
[Mfonirii ni yɔɔ baafa 252]
Bɔ ni Jeŋ Hewalɛi Kpawo lɛ Tsara nɔ Kɛba
MIZRAIM
ASHUR
BABILON
MEDO-PERSHIA
HELA
ROMA
ANGLO-AMERIKA
[Mfonirii ni yɔɔ baafa 254]
‘Eji maŋtsɛ ni ji kpaanyɔ’
[Mfoniri ni yɔɔ baafa 255]
Akɛni amɛtsɔ amɛsɛɛ amɛha Toobi lɛ hewɔ lɛ, “amɛkɛ amɛhewalɛ kɛ amɛhegbɛ lɛ eha kooloo lɛ kwraa”
[Mfoniri ni yɔɔ baafa 257]
Akɛ Babilon Kpeteŋkpele lɛ fa titri lɛ, Kristendom baatamɔ blema Yerusalem yɛ hiɛkpatamɔ kwraa mli