Yitso 19
Beni Nyɔŋmɔ he Nilee Yiɔ Shikpɔŋ nɔ Obɔ
1, 2. Te fee tɛŋŋ ni afite Yehowa nibɔɔ lɛ?
ŊƆƆ lɛ akɛ nitɛŋlɔ kpeteŋkpele ko egbe mfoniri fɛfɛo ko tɛŋmɔ naa. Esusuɔ yɛ gbɛ ni ja nɔ akɛ ehi naakpa—enɔ bɛ kwraa! Shi jenamɔ pɛ ni awuŋayelɔ akaŋshilɔ ko gbe nɔ ko yɛ hiɛ. Enɛ fee sane ni dɔ nitɛŋlɔ lɛ waa diɛŋtsɛ, ni anuɔ shishi nakai. Kwɛ bɔ ni ebaasumɔ waa koni ena ni awo mɔ ni fite nii nɛɛ tsuŋ aha! Ni obaanyɛ onu bɔ ni nitɛŋlɔ lɛ shweɔ babaoo akɛ eeesaa mfoniri lɛ koni efee fɛo taakɛ eji tsutsu lɛ shishi.
2 Taakɛ nakai nitɛŋlɔ lɛ ji lɛ, Yehowa bɔ nɔ ko ni nɔ bɛ beni esaa shikpɔŋ lɛ ni ekɛ adesai wo nɔ lɛ. Beni ebɔ nuu kɛ yoo lɛ sɛɛ lɛ, ejaje akɛ eshikpɔŋ nɔ nitsumɔ lɛ fɛɛ “hi naakpa.” (1 Mose 1:31) Adam kɛ Hawa ji Nyɔŋmɔ diɛŋtsɛ bii, ni esumɔɔ amɛ. Nɔ ni etsɔ hiɛ ena kɛha amɛ ji wɔsɛɛ be ni yɔɔ miishɛɛ kɛ nyam. Lɛlɛŋ, Satan nyiɛ amɛhiɛ kɛtee atuatsemɔ mli, shi afiteee Nyɔŋmɔ nibɔɔ ni yɔɔ naakpɛɛ lɛ kɛtekeee nɔ ni anyɛŋ asaa.—1 Mose 3:23, 24; 6:11, 12.
3. Mɛni ji “anɔkwa wala lɛ”?
3 Nyɔŋmɔ etswa efai shi akɛ ebaajaje nibii. Eesumɔ waa ni ena akɛ wɔmiihi shi yɛ eshishijee yiŋtoo lɛ naa. Wɔ shihilɛ kuku ni haomɔ yɔɔ mli lɛ jeee “anɔkwa wala lɛ,” ejaakɛ eshɛɛɛ nɔ ni Yehowa yɔɔ yɛ ejwɛŋmɔ mli lɛ he kwraa. “Anɔkwa wala lɛ” ni Nyɔŋmɔ taoɔ kɛhaa wɔ lɛ ji “naanɔ wala” yɛ shihilɛi ni yeɔ emuu shishi.—1 Timoteo 6:12, 19.
4, 5. (a) Te aaafee tɛŋŋ ni nine aaashɛ Paradeiso hiɛnɔkamɔ lɛ nɔ? (b) Mɛni hewɔ esa akɛ wɔsusu wɔ hiɛnɔkamɔ kɛha wɔsɛɛ be he lɛ?
4 Nyɔŋmɔ he nilee haa gbɛnaa nii bakaa mɔ ko nɔ yɛ Yehowa hiɛ. (Yakobo 4:17) Shi susumɔ jɔɔmɔi ni obaana mli ŋɔɔmɔ kɛ okɛ nakai nilee lɛ tsu nii ni onine shɛ naanɔ wala nɔ lɛ he okwɛ. Yehowa Nyɔŋmɔ efee bɔ ni nakai shihilɛ lɛ baatamɔ aha yɛ Paradeiso shikpɔŋ ni ebɛŋkɛ nɔ lɛ he mfoniri fɛfɛo yɛ e-Wiemɔ, Biblia lɛ mli. Shi, akɛ Yehowa webii lɛ, wɔsɔmɔɔɔ Nyɔŋmɔ yɛ nyɔmɔwoo ni wɔtaoɔ hewɔ. Wɔsɔmɔɔ Nyɔŋmɔ ejaakɛ wɔsumɔɔ lɛ. (Marko 12:29, 30) Agbɛnɛ, wala jeee nyɔmɔwoo yɛ Yehowa ni wɔsɔmɔɔ lɛ lɛ hewɔ. Naanɔ wala ji Nyɔŋmɔ nikee nii. (Romabii 6:23) Ebaahi kɛha wɔ akɛ wɔɔjwɛŋ wala ni tamɔ nɛkɛ nɔ, ejaakɛ Paradeiso hiɛnɔkamɔ lɛ kaiɔ wɔ nɔ̃ Nyɔŋmɔ ni Yehowa ji—“mɛi ni taoɔ esɛɛ gbɛ lɛ anyɔmɔwolɔ” ni yɔɔ suɔmɔ. (Hebribii 11:6) Hiɛnɔkamɔ ni kpɛɔ kaŋkaŋ yɛ wɔjwɛŋmɔi kɛ wɔtsuii amli lɛ baaha wɔnyɛ wɔŋmɛ wɔtsui shi yɛ haomɔi amli yɛ Satan je lɛ mli.—Yeremia 23:20.
5 Ha wɔgbala wɔjwɛŋmɔ kɛya naanɔ wala he hiɛnɔkamɔ yɛ wɔsɛɛ be mli shikpɔŋ nɔ Paradeiso ni damɔ Biblia lɛ nɔ lɛ nɔ agbɛnɛ. Te shihilɛ baatamɔ aha tɛŋŋ beni Nyɔŋmɔ he nilee yiɔ shikpɔŋ nɔ obɔ lɛ?
HARMAGEDON SƐƐ LƐ—PARADEISO SHIKPƆŊ
6. Mɛni ji Harmagedon, ni mɛni ebaatsɔɔ kɛha adesai?
6 Taakɛ atsɔ hiɛ atsɔɔ lɛ, etsɛŋ ni Yehowa Nyɔŋmɔ baakpata ŋmɛnɛŋmɛnɛ yiwalɛ nibii agbɛjianɔtoo lɛ hiɛ. Je lɛ miibɛŋkɛ nɔ ni Biblia lɛ tsɛɔ lɛ Har-Magedon, loo Armageddon lɛ he kɛ foi. Ekolɛ nakai wiemɔ lɛ baaha mɛi komɛi asusu nuklea hiɛkpatamɔ ni jeŋmaji ni kɛ amɛhe wuɔ ta lɛ kɛbaaba lɛ he, shi Harmagedon jeee nɔ ko ni tamɔ nakai kwraa. Taakɛ Kpojiemɔ 16:14-16 tsɔɔ lɛ, Harmagedon ji “Nyɔŋmɔ Ofe lɛ gbi wulu lɛ nɔ ta lɛ.” Eji ta ni kɔɔ “maŋtsɛmɛi ni yɔɔ jeŋ muu lɛ fɛɛ” loo jeŋmaji fɛɛ he. Etsɛŋ ni Yehowa Nyɔŋmɔ Bi, Maŋtsɛ ni ahala lɛ lɛ baafa kɛya ta. Ama nɔ ni baajɛ mli aba lɛ nɔ mi. Abaakpata mɛi fɛɛ ni teɔ shi woɔ Nyɔŋmɔ Maŋtsɛyeli lɛ ni amɛji Satan yiwalɛ gbɛjianɔtoo lɛ fa lɛ hiɛ. Mɛi ni yeɔ Yehowa anɔkwa lɛ pɛ baaje mli.—Kpojiemɔ 7:9, 14; 19:11-21.
7. Nɛgbɛ Satan kɛ edaimonioi lɛ baahi yɛ Kristo Afii Akpe Nɔyeli lɛ mli, ni enɛ he baaba sɛɛnamɔ aha adesai yɛ mɛɛ gbɛ nɔ?
7 Ŋɔɔ lɛ akɛ oje nakai hiɛkpatamɔ lɛ mli. Te shihilɛ baatamɔ aha tɛŋŋ yɛ Nyɔŋmɔ shiwoo jeŋ hee lɛ mli? (2 Petro 3:13) Esaaa akɛ wɔkaa wɔyiŋ yɛ he, ejaakɛ Biblia lɛ kɛɔ wɔ, ni nɔ ni ekɛɔ lɛ yɛ miishɛɛ. Wɔkaseɔ akɛ abaamɔmɔ Satan kɛ edaimonioi lɛ, abaaŋa amɛyi yɛ bu kwɔŋkwɔŋ ko mli, ni amɛnyɛŋ amɛfee nɔ ko dɔŋŋ yɛ mli yɛ Yesu Kristo Afii Akpe Nɔyeli lɛ mli. Nakai bɔɔ nii yiwalɔi efɔŋ feelɔi lɛ hɔlɔŋ shihilɛ sɛɛ, ni amɛmiitsɔ naagba he ŋaa ni amɛmiibɔ mɔdɛŋ ni amɛtsirɛ wɔ yisɛɛ kɛya nifeemɔi ni tsɔɔ anɔkwa ni ayeee Nyɔŋmɔ lɛ mli dɔŋŋ. Mɛɛ hejɔlɛ eeeji nɛkɛ!—Kpojiemɔ 20:1-3.
8, 9. Mɛni baaba piŋmɔi, helai, kɛ gbɔlɛ nɔ yɛ jeŋ hee lɛ mli?
8 Yɛ be ni sa mli lɛ, helai sɔrɔtoi fɛɛ baalaaje. (Yesaia 33:24) No mli lɛ obubuafoi baadamɔ shi, amɛbaanyiɛ, amɛbaajo foi, ni amɛjo yɛ naji ni yɔɔ shiŋŋ kɛ hewalɛ nɔ. Yɛ be mli ni mumuii kɛ afii pii ehi jeŋ ni amɛnuuu nɔ ko yɛ mli lɛ, amɛbaanu gbɛɛmɔi ni ŋɔɔ ni ebɔle amɛhe kɛkpe lɛ. Shwilafoi baamu kɛ naakpɛɛ yɛ be mli ni amɛkɛ amɛhiŋmɛii naa jeŋ ni hiɛ sui sɔrɔtoi fɛfɛji babaoo lɛ. (Yesaia 35:5, 6) Yɛ naagbee lɛ, amɛbaana amɛ suɔlɔi ahiɛ! Ekolɛ no mli lɛ miishɛɛ yaafonui baahã amɛhiŋmɛii anɔ aha yɛ be kuku ko mli.
9 Bo lɛ susumɔ he okwɛ! Hiŋmɛi glasei bɛ dɔŋŋ, tsutsɔmɔ tsei kɛ dɛhiɛmɔ tsei bɛ dɔŋŋ, tsofai bɛ dɔŋŋ, nyanyɔji afaamɔ hei loo helatsamɔ hei bɛ dɔŋŋ! Henumɔŋ hela kɛ nɔnyɛɛ heŋ gbɔmɛi amiishɛɛ kɛjɛŋ amɛdɛŋ dɔŋŋ. Helai fiteŋ gbekɛbiiashi dɔŋŋ. Abaatsake nii ni gbɔlɛ fiteɔ lɛ koni eya sɛɛsɛɛ. (Hiob 33:25) Wɔbaana gbɔmɔtsoŋ hewalɛ, ni wɔhe awa. Wɔbaate shi daa leebi kɛjɛ gbɛkɛ wɔ ni haa mɔ he jɔɔ lɛ mli kɛ nyɛmɔ hee, ni hewalɛ eyi mli obɔ ni miishwe gbi hee ni shihilɛ kpakpa kɛ nitsumɔ ni haa mɔ tsui nyɔɔ emli yɔɔ mli.
10. Mɛɛ nitsumɔ mɛi ni je Harmagedon mli lɛ baatsu?
10 Mɛi ni baaje Harmagedon mli lɛ baana nitsumɔ babaoo ni ŋɔɔ atsu. Amɛbaatsake shikpɔŋ lɛ ni amɛfee lɛ paradeiso. Amɛbaajie gbɛjianɔtoo momo ni mli ewo muji lɛ mli nibii fɛɛ ni eshwɛ lɛ kɛya. Shwɛmɔ hei kɛ abɔɔi baaye shihilɛi ni mli ewo muji kɛ shikpɔji ni nɔ efite najiaŋ. Mɔ fɛɛ mɔ baana wɔɔhei ni hi ni miishɛɛ yɔɔ mli lɛ mli ŋɔɔmɔ. (Yesaia 65:21) Beni be shwieɔ mli lɛ, shikpɔŋ lɛ hei ni etsɔmɔ paradeiso lɛ amli baalɛɛ ni amɛkɛ amɛhe akpe kɛyashi be mli ni shikpɔŋ muu lɛ fɛɛ baashɛ fɛo-feemɔ taomɔ nii ni Bɔlɔ lɛ kɛma shi tsutsu yɛ Eden trom lɛ mli lɛ he. Kwɛ bɔ ni wɔtsui aaanyɔ wɔmli aha akɛ wɔɔná nakai nisaamɔ nitsumɔ lɛ mli gbɛfaŋnɔ!
11. Mɛɛ tsakpaa baaka adesai awɔsɛɛ be kɛ nibii ni ebɔle shikpɔŋ lɛ he kɛkpe kɛ kooloi ashihilɛ lɛ teŋ?
11 Abaafee enɛɛmɛi fɛɛ yɛ ŋwɛi gbɛtsɔɔmɔ shishi koni ekaye shihilɛ ni ebɔle wɔhe lɛ awui ko. Gbɔmɛi kɛ kooloi baahi shi yɛ toiŋjɔlɛ mli. Ni gbɔmɔ aaagbe amɛ kɛkɛ lɛ, ekɛ hiɛshikamɔ baatsu shikpɔŋ lɛ nɔkwɛmɔ he nii, koni ekwɛ amɛnɔ jogbaŋŋ. Susumɔ bɔ ni klaji kɛ gwantɛŋ bii, jatai kɛ tsina bii aaaye nii yɛ he kome lɛ he okwɛ—ni shia kooloi fɛɛ efee shweshweeshwe. Gbekɛ bibioo po sheŋ ŋa nɔ kooloi agbeyei, ni asaŋ gbɔmɛi ni yi wa ni hiɛ yɔɔ la fiteŋ jeŋ hee lɛ mli toiŋjɔlɛ lɛ. (Yesaia 11:6-8) Mɛɛ toiŋjɔlɛ jeŋ hee enɛ aaaji nɛkɛ!
ADESAI ETSAKE
12. Yesaia 11:9 miiba mli ŋmɛnɛ yɛ mɛɛ gbɛ nɔ, ni te ebaaba mli yɛ Paradeiso eha tɛŋŋ?
12 Yesaia 11:9 kɛɔ wɔ nɔ hewɔ ni afeŋ efɔŋ ko yɛ shikpɔŋ lɛ fɛɛ nɔ lɛ. Ekɛɔ akɛ: “Ejaakɛ shikpɔŋ lɛ nɔ aaayi obɔ kɛ Yehowa he nilee lɛ, tamɔ bɔ ni nu ha ŋshɔ shishi lɛ.” Enɛ kɔɔ gbɔmɛi ahe ejaakɛ kooloi nyɛŋ ana “Yehowa he nilee” ni amɛfee tsakemɔi, ejaakɛ henumɔ ji nɔ ni kudɔɔ amɛ. Shi wɔ Bɔlɔ lɛ he nilee nyɛɔ etsakeɔ gbɔmɛi. Ŋwanejee ko bɛ he akɛ bo diɛŋtsɛ ofee tsakemɔi komɛi momo yɛ Nyɔŋmɔ he nilee ni okɛtsu nii yɛ oshihilɛ mli lɛ hewɔ. Akpekpei abɔ efee nakai. No hewɔ lɛ, gbalɛ nɛɛ ebɔi mlibaa momo yɛ mɛi ni sɔmɔɔ Yehowa lɛ anɔ. Kɛlɛ, etsɔɔ be ni gbɔmɛi ni yɔɔ je lɛŋ fɛɛ lɛ baajie kooloi asu loo yiwalɛ sui komɛi lɛ kɛjɛ amɛhe amɛshwie ni amɛtsɔmɔ mɛi ni sumɔɔ toiŋjɔlɛ kɛmiiya naanɔ lɛ hu.
13. Mɛɛ tsɔsemɔ he gbɛjianɔtoo ko baaya nɔ yɛ shikpɔŋ nɔ?
13 Kwɛ nyam ni eeeji, beni Nyɔŋmɔ he nilee yiɔ shikpɔŋ lɛ nɔ obɔ lɛ! Tsɔsemɔ he gbɛjianɔtoo babaoo baaba yɛ Maŋtsɛ Yesu Kristo kɛ enanemɛi niyelɔi 144,000 lɛ agbɛtsɔɔmɔ shishi. No mli lɛ akɛ “woji” heei baatsu nii. Eka shi faŋŋ akɛ enɛɛmɛi ji Nyɔŋmɔ famɔi ni aŋmala, ni no nɔ abaadamɔ akɛtsɔse shikpɔŋ lɛ nɔ bii lɛ. (Kpojiemɔ 20:12) Adesai baakase toiŋjɔlɛ, shi jeee tawuu. Tawuu nii ni kpataa nii ahiɛ lɛ fɛɛ baaje shihilɛ mli kɛya naanɔ. (Lala 46:10) Abaatsɔɔ jeŋ hee lɛ mli bii lɛ bɔ ni amɛkɛ amɛnanemɛi adesai baaye yɛ suɔmɔ, bulɛ, kɛ woo mli aha.
14. Mɛɛ gbɛ nɔ je lɛ baafee sɔrɔto yɛ be mli ni adesai etsɔ weku kome lɛ?
14 Adesai fɛɛ baatsɔ weku kome. Ekomefeemɔ kɛ nyɛmifeemɔ he gbɛtsii nii ehiŋ shi. (Lala 133:1-3) Mɔ ko eŋmɛŋ eshia mli ni ekɛtsi julɔi anaa. Toiŋjɔlɛ baahi tsui fɛɛ tsui mli, shia fɛɛ shia, yɛ shikpɔŋ lɛ nɔ he fɛɛ he.—Mika 4:4.
GBOHIIASHITEE NI KƐ MLIFILIMƆ BAA LƐ
15. Mɛɛ kui enyɔ abaatee amɛ shi yɛ shikpɔŋ nɔ lɛ?
15 Gbohiiashitee lɛ baaba yɛ nakai Afii Akpe lɛ mli. Mɛi ni jɛ amɛsuɔmɔ mli amɛfee esha amɛshi Nyɔŋmɔ mumɔ krɔŋkrɔŋ lɛ, loo nifeemɔ hewalɛ lɛ, kɛtsɔ amɛtsui ni amɛtsakeee yɛ amɛnifeemɔi ni teɔ shi woɔ nibii ni etsuɔ loo ehiɛnyiɛmɔi anɔ lɛ naŋ shitee. (Mateo 23:15, 33; Hebribii 6:4-6) Shi, Nyɔŋmɔ ji mɔ ni baatsɔɔ mɔ ni fee esha yɛ nɛkɛ gbɛ nɔ. Shi abaatee kui sɔrɔtoi enyɔ ko shi—“jalɔi kɛ mɛi ni ejaaa.” (Bɔfoi lɛ Asaji 24:15) Akɛni gbɛjianɔtoo kpakpa baahi shi hewɔ lɛ, shishinumɔ yɛ mli akɛ aaamu sane naa akɛ klɛŋklɛŋbii ni abaahere amɛ atuu kɛba wala mli yɛ shikpɔŋ nɔ lɛ baafee jalɔi lɛ, mɛi ni sɔmɔ Yehowa yɛ anɔkwayeli mli lɛ.—Hebribii 11:35-39.
16. (a) Namɛi baafata “jalɔi” ni abaatee amɛ shi kɛba shikpɔŋ nɔ lɛ ahe? (b) Mɛɛ blema bei amli anɔkwafoi osumɔɔ waa ni okɛ amɛ akpe, ni mɛni hewɔ?
16 Ni amɛaanu adafitswaa saji ni kɔɔ tawuu, osharai, kɛ gbele he lɛ, Yehowa tsuji anine baashɛ gbohiiashitee he amaniɛbɔi ni yɔɔ naakpɛɛ lɛ anɔ. Ebaafee miishɛɛ akɛ mɔ ko aaanu hii kɛ yei anɔkwafoi tamɔ Habel, Henok, Noa, Abraham, Sara, Hiob, Mose, Rahab, Rut, David, Elia, Ester sɛɛkuu he saji. Mɛɛ yinɔsane mli anɔkwa saji ni kanyaa mɔ amɛbaagba nɛkɛ, yɛ be mli ni amɛtsɔɔ Biblia mli saji babaoo ni tee nɔ lɛ mli fitsofitso lɛ! Ŋwanejee ko bɛ he akɛ amɛ kɛ jalɔi ni gboi yɛ bei ni ba nyɛsɛɛ nɛɛ amli lɛ hu he baatswa shi akɛ amɛaale Satan gbɛjianɔtoo lɛ naagbee kɛ bɔ ni Yehowa tse egbɛi krɔŋkrɔŋ lɛ he ni ebu jeŋ muu fɛɛ maŋtsɛ ni eji lɛ bem lɛ he sane.
17. Mɛɛ yelikɛbuamɔ anɔkwafoi kɛbaaha mɛi krokomɛi ni atee amɛ shi lɛ?
17 Kwɛ bɔ ni anɔkwafoi nɛɛ baafee mɛi ni yeɔ buaa, yɛ be mli ni ashɛɔ gbohiiashitee lɛ fã ni nyiɛ sɛɛ lɛ nɔ, ni aŋmɛɛɔ akpekpei toi akpei abɔ “ni ejaaa” lɛ ahe kɛjɛɔ gbele kpãai lɛ amli lɛ! Adesai ateŋ mɛi ni fa naaa hegbɛ akɛ amɛaale Yehowa. No mli lɛ Satan ‘miishwila amɛjwɛŋmɔi.’ (2 Korintobii 4:4) Shi Abonsam nitsumɔ lɛ baafee nɔ ni bɛ dɔŋŋ. Jalɔi lɛ baaba shikpɔŋ ni yɔɔ fɛo ni toiŋjɔlɛ yɔɔ mli nɔ ekoŋŋ. Gbɔmɛi ni ato amɛ gbɛjianɔ jogbaŋŋ baahere amɛ atuu ni amɛbaatsɔɔ amɛ nibii ni kɔɔ Yehowa kɛ e-Bi Yesu Kristo ni yeɔ maŋtsɛ lɛ he. Yɛ be mli ni akpekpei toi akpei abɔ ni atee amɛ shi lɛ baa ni amɛbaleɔ ni amɛbasumɔɔ amɛ Bɔlɔ lɛ, Yehowa he nilee baayi shikpɔŋ lɛ nɔ obɔ yɛ gbɛ ni anako nakai dã nɔ.
18. Te osusuɔ akɛ obaanu he oha tɛŋŋ yɛ be mli ni ohereɔ suɔlɔi ni atee amɛ shi lɛ?
18 Mɛɛ nyamɔ gbohiiashitee lɛ kɛbaaba wɔtsuii amli nɛkɛ! Namɔ enako nɔ̃ yɛ wɔ henyɛlɔ gbele hewɔ? Yɛ anɔkwale mli lɛ, namɔ nuko he akɛ efee shwɛm be mli ni hela, gbɔlɛ, oshara, loo awuiyeli gbe suɔlɔ ko, ni efite suɔmɔ loo naanyobɔɔ kpãa lɛ? Belɛ susumɔ miishɛɛ ekomefeemɔi ni baaba ekoŋŋ yɛ Paradeiso mli lɛ he okwɛ. Nyɛmɛi kɛ tsɛmɛi, bihii kɛ biyei, nanemɛi kɛ wekumɛi kɛ foi baafua amɛhe, ni amɛmiiŋmɔ ni amɛmiifo yɛ miishɛɛ hewɔ.
EMUUYELI EBA AGBƐNƐ!
19. Mɛɛ naakpɛɛ nii baaya nɔ yɛ Afii Akpe lɛ mli?
19 Naakpɛɛ nifeemɔ ko baaya nɔ yɛ Afii Akpe lɛ mli fɛɛ. Kɛha adesai lɛ, ekolɛ ebaafee Kristo Afii Akpe Nɔyeli lɛ fã ni yɔɔ miishɛɛ fe fɛɛ. Yehowa baakudɔ e-Bi lɛ koni ekɛ kpɔmɔ afɔleshãa lɛ mli sɛɛnamɔi lɛ atsu nuu kɛ yoo anɔkwafo fɛɛ anɔkwafo kɛ toibolɔ lɛ he nii. Enɛ nɔ abaatsɔ, ni abaajie eshai fɛɛ kɛya ni ahole adesai anɔ kɛyashɛ emuuyeli mli.—1 Yohane 2:2; Kpojiemɔ 21:1-4.
20. (a) Kɛ akɛɛ mɔ ko eye emuu lɛ belɛ te atsɔɔ tɛŋŋ? (b) Mɛɛ be mli mɛi ni je Harmagedon mli lɛ kɛ mɛi ni atee amɛ shi lɛ aaaje shihilɛ diɛŋtsɛ shishi yɛ shishinumɔ ni yeɔ emuu naa?
20 Emuuyeli! Mɛni no baatsɔɔ? Ebaatsɔɔ sɛɛkuu kɛmiiya shihilɛ ni Adam kɛ Hawa na mli ŋɔɔmɔ dani amɛfee esha amɛshi Yehowa Nyɔŋmɔ lɛ mli. Gbɔmɔtsoŋ, jwɛŋmɔŋ, henumɔŋ, jeŋba mli, mumɔŋ—yɛ gbɛ fɛɛ gbɛ ni aaanyɛ asusu nɔ lɛ—abaana Nyɔŋmɔ taomɔ nii lɛ yɛ adesai ni eye emuu lɛ ahe kɛmɔ shi. Shi ani gbɔmɛi fɛɛ baaje amɛhe? Dabi kwraa! Yehowa nibɔɔi—tsei, fɔfɔii, kooloi—fɛɛ tsɔɔ akɛ Yehowa sumɔɔ sɔrɔto-feemɔi. Adesai ni eye emuu lɛ baana su kɛ baŋi kɛ nikeenii ni yɔɔ sɔrɔtoi-sɔrɔtoi. Amɛteŋ mɔ fɛɛ mɔ baana shihilɛ mli ŋɔɔmɔ taakɛ Nyɔŋmɔ to ni efee lɛ. Kpojiemɔ 20:5 kɛɔ akɛ: “Shi gbohii ni eshwɛ lɛ ahiɛ nako atsɛ̃ kɛyashi beyinɔ ni aaagbe afii akpe lɛ naa.” Taakɛ asafo babaoo lɛ ni je Harmagedon mli lɛ ji lɛ, mɛi ni atee amɛ shi lɛ ahiɛ baatsɛ kwraa yɛ be mli ni amɛaashɛ emuuyeli ni esha bɛ mli lɛ he lɛ.
21. (a) Mɛni baaba yɛ Kristo Afii Akpe Nɔyeli lɛ naagbee? (b) Yɛ naagbee lɛ mɛni baaba Satan kɛ mɛi fɛɛ ni fataa ehe lɛ anɔ?
21 Adesai ni eye emuu lɛ kɛ naagbee kaa kome baakpe. Yɛ Afii Akpe lɛ naagbee lɛ, abaaŋmɛɛ Satan kɛ edaimonioi lɛ ahe kɛjɛ bu kwɔŋkwɔŋ lɛ mli be fioo ko, ni abaaŋmɛ amɛ gbɛ ni amɛka nɔ ni ji naagbee nɔ̃ kwraa akɛ amɛaagbala gbɔmɛi kɛjɛ Yehowa he. Mɛi komɛi kɛ akɔnɔ fɔŋ baaye Nyɔŋmɔ suɔmɔ lɛ najiaŋ, shi abaafo atuatsemɔ nɛɛ nɔ kuku. Yehowa baakpata pɛsɛmkunya-tsɛmɛi nɛɛ kɛ Satan kɛ edaimonioi lɛ fɛɛ ahiɛ. Kɛkɛ lɛ efɔŋ feelɔi fɛɛ etee kɛmiiya naanɔ.—Kpojiemɔ 20:7-10.
MƐNI OBAAFEE?
22. Mɛni okpaa gbɛ akɛ obaafee yɛ Paradeiso?
22 Naanɔ shihilɛ baakã mɛi ni sumɔɔ Yehowa Nyɔŋmɔ ni hiɔ Paradeiso shikpɔŋ lɛ nɔ lɛ ahiɛ. Wɔnyɛŋ wɔsusu bɔ ni amɛbaana miishɛɛ amɛha lɛ he, ni bo hu obaanyɛ ona enɛ mli gbɛfaŋnɔ. Lalai, nitɛŋmɔi, ŋaa nitsumɔi—adesai ni eye emuu lɛ amɔdɛŋbɔi baateke jeŋ momo lɛ mli nilelɔi ni fe fɛɛ lɛ aŋaa nitsumɔi fɛɛ! Fɛɛ sɛɛ lɛ, adesai baafee mɛi ni eye emuu ni amɛbaana be ni bɛ naagbee ni kã amɛhiɛ. Susumɔ nɔ ni obaanyɛ ofee akɛ adesa ni yeɔ emuu lɛ he okwɛ. Agbɛnɛ hu susumɔ nɔ ni bo kɛ onanemɛi adesai lɛ baanyɛ akase yɛ Yehowa nibɔɔ lɛ he—kɛjɛ ŋulamii kushai akpekpei toi akpei abɔ ni yɔɔ jeŋ muu fɛɛ kɛbashi nibii bibiibii ni ewa akɛ akɛ hiŋmɛi aaana amɛ lɛ he okwɛ. Nɔ fɛɛ nɔ ni adesai aaanyɛ atsu lɛ hu baafee nɔ ni wɔsuɔmɔ ŋwɛi Tsɛ Yehowa tsui baanya he.—Lala 150:1-6.
23. Mɛni hewɔ shihilɛ yɛ Paradeiso ejeŋ mɔ tsine kɔkɔɔkɔ lɛ?
23 No mli lɛ shihilɛ efeŋ nɔ ni jeɔ mɔ tsine. Ebaaŋɔɔ be fɛɛ be yɛ be mli ni be yaa nɔ lɛ. Ole, Nyɔŋmɔ he nilee baŋ naagbee. (Romabii 11:33) Nibii babaoo yɛ ni abaakase, ni abaagbɛ́lɛ shi ale nibii heei be fɛɛ be yɛ yinɔi fɛɛ mli. (Jajelɔ 3:11) Yɛ be mli ni oyaa nɔ okaseɔ Yehowa Nyɔŋmɔ he nii lɛ, obaaya nɔ ohi shi—jeee kɛha afii fioo shi kɛmiiya naanɔ!—Lala 22:27.
24, 25. Mɛni hewɔ esa akɛ ohi shi bianɛ yɛ Nyɔŋmɔ he nilee lɛ kɛ gbeekpamɔ naa?
24 Ani wɔsɛɛ be ni yɔɔ miishɛɛ yɛ paradeiso shikpɔŋ nɔ lɛ jeee nɔ ni sa mɔdɛŋbɔɔ loo afɔle fɛɛ ni oooshã yɛ he lɛ? Esa! Ojogbaŋŋ, Yehowa kɛ nakai wɔsɛɛ be ni yɔɔ miishɛɛ lɛ naa samfee eha bo. Nakai samfee lɛ ji Nyɔŋmɔ he nilee. Ani okɛbaatsu nii?
25 Kɛ osumɔɔ Yehowa lɛ, obaanya esuɔmɔnaa nifeemɔ he. (1 Yohane 5:3) Mɛɛ jɔɔmɔi po onine aaashɛ nɔ nɛkɛ, yɛ be mli ni odiɔ nɛkɛ gbɛ nɛɛ sɛɛ lɛ! Kɛ okɛ Nyɔŋmɔ he nilee tsu nii lɛ, ebaanyɛ ekɛ miishɛɛ aba oshihilɛ mli yɛ jeŋ ni haomɔi yɔɔ mli nɛɛ po mli. Ni wɔsɛɛ be mli nyɔmɔwoi lɛ fa babaoo diɛŋtsɛ, ejaakɛ enɛ ji nilee ni kɛ mɔ yaa naanɔ wala mli lɛ! Amrɔ nɛɛ ji be ni hi ni okɛaafee he nɔ ko. Tswaa ofai shi akɛ obaahi shi yɛ Nyɔŋmɔ he nilee lɛ kɛ gbeekpamɔ naa. Jiemɔ suɔmɔ ni oyɔɔ kɛha Yehowa lɛ kpo otsɔɔ. Wo egbɛi krɔŋkrɔŋ lɛ hiɛ nyam, ni oha ana Satan akɛ amalelɔ. Yɛ no sɛɛ lɛ, Yehowa Nyɔŋmɔ, anɔkwa nilee kɛ sɛɛyoomɔ Jɛɛhe lɛ mli baafili lɛ yɛ ohewɔ, yɛ esuɔmɔ tsui kpele lɛ mli. (Yeremia 31:3; Zefania 3:17) Ni ebaasumɔ bo kɛya naanɔ!
KAA ONILEE OKWƐ
Mɛni ji “anɔkwa wala lɛ”?
Yɛ Harmagedon sɛɛ lɛ, mɛni baaba shikpɔŋ nɔ?
Namɛi abaatee amɛ shi yɛ shikpɔŋ nɔ?
Mɛɛ gbɛ nɔ adesai baatsɔ aye emuu ni yɛ naagbee lɛ aka amɛ?
Mɛni ji ohiɛnɔkamɔ yɛ Paradeiso he?
[Mfoniri ni yɔɔ baafa 188, 189]
Ani ohiɛ ka nɔ akɛ ooohi shi yɛ Paradeiso, beni Nyɔŋmɔ he nilee yiɔ shikpɔŋ nɔ obɔ lɛ?