Yitso 44

Kpojiemɔ kɛ Bo

 1. (a) Mɛɛ nɔmimaa bɔfo lɛ kɛha Yohane yɛ naakpɛɛ shiwoi fɛɛ ni yɔɔ Kpojiemɔ lɛ he? (b) Namɔ ji mɔ ni kɛɔ akɛ, “Naa, miiba oya” lɛ, ni mɛɛ be nɛkɛ ‘ebaa’ nɛɛ baa mli?

BENI okane Yerusalem Hee lɛ mlitsɔɔmɔ ni ŋɔɔ lɛ, ekolɛ ebaatsirɛ bo ni obi akɛ: ‘Ani nɔ ko ni yɔɔ naakpɛɛ nɛkɛ baanyɛ aba mli lɛlɛŋ?’ Yohane ha nakai sanebimɔ lɛ hetoo kɛtsɔ bɔfo lɛ wiemɔi ni nyiɛ sɛɛ nɛɛ he amaniɛ ni ebɔ lɛ nɔ: “Ni ekɛɛ mi akɛ: Anɔkwa wiemɔi ni ma shi shiŋŋ nɛ; ni Nuŋtsɔ [Yehowa] ni ji gbalɔi amumɔi lɛ a-Nyɔŋmɔ lɛ tsu ebɔfo lɛ ni ebatsɔɔ etsuji nii ni sa akɛ aba mli oya. Naa, miiba oya. Ajɔɔ (miishɛɛ ji) mɔ ni kɛ nɛkɛ wolo nɛɛ mli gbalɛ wiemɔi lɛ toɔ lɛ.” (Kpojiemɔ 22:6, 7) Kpojiemɔ mli shiwoi ni yɔɔ naakpɛɛ lɛ fɛɛ baaba mli diɛŋtsɛ! Yɛ be mli ni ewieɔ yɛ Yesu gbɛi amli lɛ, bɔfo lɛ jaje akɛ Yesu miiba amrɔ nɔŋŋ, “oya.” Esa akɛ enɛ afee Yesu ni miiba “tamɔ julɔ” koni ebakpata Yehowa henyɛlɔi lɛ ahiɛ koni ekɛ Kpojiemɔ naagbee kwraa ni yɔɔ miishɛɛ lɛ aba. (Kpojiemɔ 16:15, 16) No hewɔ lɛ esa akɛ wɔkudɔ wɔshihilɛi koni ekɛ “nɛkɛ wolo nɛɛ,” ni ji Kpojiemɔ lɛ, mli wiemɔi akpa gbee, koni abu wɔ akɛ miishɛɛ ji wɔ yɛ nakai be lɛ mli.

 2. (a) Te Yohane fee enii eha tɛŋŋ yɛ Kpojiemɔ mli nibii babaoo ni ajie lɛ kpo atsɔɔ lɛ nɛɛ hewɔ, ni mɛni bɔfo lɛ kɛɛ lɛ? (b) Mɛni wɔkaseɔ kɛjɛɔ bɔfo lɛ wiemɔi, “Kaakwɛ ni ofee!” kɛ, “Nyɔŋmɔ moŋ oja” lɛ mli?

² Yɛ Kpojiemɔ mli nibii babaoo ni sɛɛnamɔ yɔɔ he nɛɛ sɛɛ lɛ, shishinumɔ yɛ he akɛ Yohane aaanu he akɛ enɛ eye ehenumɔ nɔ kwraa: “Ni mi, Yohane, ji mɔ ni na ni nu nii nɛɛ. Ni beni minu ni mina lɛ, miho mibu shi ni maja yɛ bɔfo lɛ ni tsɔɔ mi nii nɛɛ lɛ naji anaa. Ni ekɛɛ mi akɛ: Kaakwɛ ni ofee! Ejaakɛ onaanyo tsulɔ kɛ onyɛmimɛi kɛ gbalɔi kɛ mɛi ni toɔ nɛkɛ wolo nɛɛ mli wiemɔi lɛ ateŋ mɔ ko ji mi; Nyɔŋmɔ moŋ oja!” (Kpojiemɔ 22:8, 9; okɛto Kpojiemɔ 19:10 he.) Nɛkɛ kɔkɔbɔɔ ni akɛha shii enyɔ akɛ akaja ŋwɛi bɔfoi lɛ ji nɔ ni akɛha yɛ ebe naa pɛpɛɛpɛ yɛ Yohane gbi lɛ mli, yɛ be mli ni eka shi faŋŋ akɛ mɛi komɛi di jamɔ ni tamɔ nɛkɛ sɛɛ aloo amɛkɛɔ akɛ bɔfoi ejie nibii komɛi akpo kɛtsɔɔ amɛ lɛ. (1 Korintobii 13:1; Galatabii 1:8; Kolosebii 2:18) Ŋmɛnɛ, emaa anɔkwale ni eji akɛ esa akɛ wɔja Nyɔŋmɔ pɛ lɛ nɔ mi. (Mateo 4:10) Esaaa akɛ wɔkɛ mɔ ko loo nɔ kroko jamɔ fiteɔ jamɔ krɔŋŋ lɛ.—Yesaia 42:5, 8.

3, 4. Mɛni bɔfo lɛ tee nɔ ekɛɛ Yohane, ni shwɛɛnii ni afɔ amɛ mu lɛ ebo ewiemɔi lɛ atoi yɛ mɛɛ gbɛ nɔ?

³ Yohane tee nɔ akɛ: “Ni ekɛɛ mi akɛ: Kaasɔo nɛkɛ wolo nɛɛ mli gbalɛ wiemɔi lɛ anaa, shi be lɛ ebɛŋkɛ. Mɔ ni ejaaa lɛ, ha eya nɔ efee nii ni ejaaa lɛ; ni mɔ ni ji mujiatsɛ lɛ, ha eya nɔ ewo ehe muji lɛ; ni mɔ ni ji jalɔ lɛ, ha eya nɔ efee jalɛ nii; ni mɔ ni ji mɔ krɔŋkrɔŋ lɛ, ha eya nɔ ehi krɔŋkrɔŋ.”—Kpojiemɔ 22:10, 11.

⁴ Ŋmɛnɛ shwɛɛnii ni afɔ amɛ mu lɛ ebo bɔfo lɛ wiemɔi lɛ atoi. Amɛsɔoko gbalɛ wiemɔi lɛ anaa. Ejaakɛ Zion’s Watch Tower and Herald of Christ’s Presence (July 1879) lɛ klɛŋklɛŋ nɔ ni akala lɛ wie Kpojiemɔ lɛ mli kukuji lɛ ahe babaoo. Taakɛ wɔkadi yɛ wɔ shishijee yitso lɛ mli lɛ, Yehowa Odasefoi lɛ ekala woji krokomɛi ni kɔɔ Kpojiemɔ he ni tsɔɔ wolo lɛ mli. Agbɛnɛ wɔmiigbala mɛi ni sumɔɔ anɔkwale lɛ fɛɛ ajwɛŋmɔ kɛmiiba Kpojiemɔ gbalɛi lɛ kɛ amɛmlibaa ni yɔɔ hewalɛ lɛ anɔ.

 5. (a) Kɛ gbɔmɛi miisumɔ ni amɛku amɛhiɛ amɛshwie kɔkɔbɔi kɛ ŋaawoi ni yɔɔ Kpojiemɔ mli lɛ anɔ lɛ, mɛni? (b) Te esa akɛ heshibalɔi kɛ mɛi ni ja lɛ ahere enɛ nɔ amɛha tɛŋŋ?

⁵ Kɛ gbɔmɛi miisumɔ ni amɛku amɛhiɛ amɛshwie kɔkɔbɔi kɛ ŋaawoo ni yɔɔ Kpojiemɔ lɛ mli lɛ anɔ lɛ, ojogbaŋŋ, ha ni amɛfee nakai! “Mɔ ni ejaaa lɛ, ha ni eya nɔ efee nii ni ejaaa lɛ.” Kɛ eji nɔ ni amɛhala lɛ, belɛ mɛi ni wuɔ yinɔ ni ŋmɛɔ nɔ fɛɛ nɔ feemɔ gbɛ nɛɛ mli ŋmɔtɔ lɛ baanyɛ aya nɔ awu nakai ŋmɔtɔ lɛ ni amɛgboi yɛ nakai ŋmɔtɔ lɛ mli. Etsɛŋ, ni abaatsu Yehowa kojomɔi lɛ ahe nii kɛgbe naa kwraa, ni enɛ baaje shishi kɛ Babilon Kpeteŋkpele lɛ hiɛkpatamɔ. Ha heshibalɔi lɛ ahiɛ ahi amɛhe nɔ ni amɛbo gbalɔ lɛ wiemɔi nɛɛ atoi: “Nyɛtaoa Yehowa sɛɛ gbɛ . . . nyɛtaoa jalɛ sɛɛ gbɛ, nyɛtaoa heshibaa sɛɛ gbɛ: ekolɛ aaaŋɔ nyɛ atee yɛ Yehowa mlifu gbi lɛ nɔ!” (Zefania 2:3) Yɛ mɛi ni amɛjɔɔ amɛhe nɔ momo amɛha Yehowa lɛ agbɛfaŋ lɛ, “mɔ ni ji jalɔ, ha eya nɔ efee jalɛ nii, ni mɔ ni ji mɔ krɔŋkrɔŋ lɛ, ha eya nɔ ehi krɔŋkrɔŋ.” Nilelɔi lɛ le akɛ anyɛŋ akɛ esha mli ŋɔɔmɔ be fioo ko lɛ ato naanɔ jɔɔmɔi ni mɛi ni diɔ jalɛ kɛ krɔŋkrɔŋfeemɔ sɛɛ lɛ baana mli ŋɔɔmɔ lɛ ahe. Biblia lɛ kɛɔ akɛ: “Nyɛkaa nyɛ diɛŋtsɛ nyɛhe nyɛkwɛa akɛ nyɛyɛ hemɔkɛyeli lɛ mli lo; nyɛkwɛa nyɛ diɛŋtsɛ nyɛhe ni ahia.” (2 Korintobii 13:5) Onine baashɛ onyɔmɔwoo lɛ nɔ kɛtsɔ gbɛ ni ooohala akɛ oootsɔ nɔ ni ohi nɔ lɛ nɔ.—Lala 19:10-12; 58:11, 12.

 6. Mɛni Yehowa kɛɔ beni ewieɔ etsɔɔ mɛi ni kaneɔ Kpojiemɔ wolo lɛ yɛ naagbee kwraa yɛ gbalɛ lɛ mli?

⁶ Agbɛnɛ Yehowa, naanɔ Maŋtsɛ lɛ wieɔ tsɔɔ mɛi ni kaneɔ Kpojiemɔ lɛ yɛ naagbee kwraa yɛ gbalɛ lɛ mli, akɛ: “Naa, miiba oya, ni mihiɛ minyɔmɔwoo lɛ kɛmiiba, ni mawo mɔ fɛɛ mɔ nyɔmɔ yɛ enitsumɔ lɛ naa. Mi ji Alfa lɛ kɛ Omega lɛ, shishijee lɛ kɛ naagbee lɛ, klɛŋklɛŋ mɔ lɛ kɛ naagbee mɔ lɛ. Ajɔɔ (miishɛɛ ji) mɛi ni fɔɔ amɛtadei lɛ ahe lɛ, koni amɛna hegbɛ yɛ wala tso lɛ nɔ, ni amɛtsɔ agboi lɛ amli kɛbote maŋ lɛ mli. Shi maŋ lɛ sɛɛ lɛ, gbeei lɛ kɛ sulɔi lɛ kɛ ajwamaŋbɔlɔi lɛ kɛ awuiyelɔi lɛ kɛ amaga jalɔi lɛ kɛ mɔ fɛɛ mɔ ni sumɔɔ amale ni emaleɔ lɛ yɔɔ jɛi.”—Kpojiemɔ 22:12-15.

 7. (a) Yehowa “miiba oya” kɛha mɛni? (b) Mɛni hewɔ Kristendom osɔfoi lɛ naŋ gbɛfaŋnɔ ko yɛ Yerusalem Hee lɛ mli lɛ?

⁷ Yehowa Nyɔŋmɔ miima naanɔ maŋtsɛ ni eji lɛ kɛ anɔkwale ni eji akɛ ebaatsu nɔ ni eto eyiŋ yɛ he kɛjɛ shishijee lɛ he nii lɛ nɔ mi shikome ekoŋŋ. ‘Eeba oya’ koni ebatsu kojomɔ he nii ni ewo mɛi ni kɛ anɔkwayeli taoɔ esɛɛ gbɛ lɛ nyɔmɔ. (Hebribii 11:6) Tɛi ni efolɔ eshwie shi lɛ ji nɔ ni baatsɔɔ mɔ ni abaawo lɛ nyɔmɔ kɛ mɔ ni abaakpoo lɛ. Kristendom osɔfoi lɛ efee amɛnii tamɔ “gbeei mumuii,” amɛkuɔ amɛhiɛ amɛshwieɔ efɔŋ feemɔi ni Yehowa etsɔɔ mli yɛ biɛ lɛ anɔ. (Yesaia 56:10-12; kwɛmɔ 5 Mose 23:18 hu, New World Translation Reference Bible, shishigbɛ niŋmaa lɛ.) Yɛ anɔkwale mli lɛ, ‘amɛsumɔɔ amale ni amɛmaleɔ hu’ yɛ tsɔɔmɔi kɛ hemɔkɛyelii ni aka hiɛ awie ni abiii he sane lɛ ahe ni amɛku amɛhiɛ amɛshwie ŋaawoo ni Yesu kɛha asafoi kpawo lɛ nɔ kwraa. No hewɔ lɛ, amɛbɛ gbɛfaŋnɔ ko yɛ Yerusalem Hee lɛ mli.

 8. (a) Namɛi pɛ yaa “wala tsei” lɛ ahe, ni mɛni ji nɔ ni enɛ tsɔɔ? (b) Asafo babaoo lɛ “efɔ amɛtadei lɛ ahe” yɛ mɛɛ gbɛ nɔ, ni te amɛfeɔ tɛŋŋ amɛhiɛɔ amɛshidaamɔ ni he tse lɛ mli?

⁸ Kristofoi ni afɔ amɛ mu lɛ pɛ ni yɛ anɔkwale mli lɛ amɛji mɛi “ni fɔɔ amɛtadei lɛ ahe” bɔni afee ni amɛhe atse yɛ Yehowa hiɛ lɛ naa hegbɛ amɛyaa “wala tso lɛ nɔ.” No ji akɛ, amɛnine shɛɔ hegbɛ kɛ gbɛi ni kɛ amɛ yaa shihilɛ ni gbele bɛ mli yɛ amɛŋwɛi gbɛhei amli lɛ nɔ. (Okɛto 1 Mose 3:22-24; Kpojiemɔ 2:7; 3:4, 5 he.) Yɛ amɛgbele akɛ adesai lɛ sɛɛ lɛ, amɛnaa hegbɛ amɛboteɔ Yerusalem Hee lɛ mli kɛtsɔɔ gbohiiashitee nɔ. Bɔfoi 12 lɛ ŋmɛɔ amɛ gbɛ ni amɛbote mli, yɛ be mli ni amɛtsiɔ mɔ fɛɛ mɔ ni maleɔ aloo etsuɔ nii ni ejaaa gbɛ yɛ be mli ni amɛkɛɔ akɛ amɛyɔɔ ŋwɛi hiɛnɔkamɔ lɛ gbɛ koni ekabote mli. Asafo babaoo lɛ hu ni yɔɔ shikpɔŋ nɔ lɛ “efɔ amɛtadei lɛ ahe ni amɛha eyɛ futaa yɛ Toobi lɛ la lɛ mli,” ni ehe miihia ni amɛhiɛ amɛhetsemɔ shidaamɔ lɛ mli. Amɛbaanyɛ amɛfee enɛ kɛtsɔ kwa ni amɛaakwa nifɔjianii ni Yehowa ebɔ kɔkɔ eshi yɛ biɛ nɛɛ lɛ, kɛ agbɛnɛ Yesu kɔkɔbɔɔ ni yɔɔ eshɛɛ saji kpawo ni ekɛha asafoi lɛ amli lɛ ni amɛaabo toi lɛ nɔ.—Kpojiemɔ 7:14; yitsei 2 kɛ 3.

 9. Mɛɛ wiemɔi Yesu wie, ni namɛi nɛkɛ wiemɔi nɛɛ kɛ Kpojiemɔ muu lɛ fɛɛ kɔɔ amɛhe titri?

⁹ Beni Yehowa wie egbe naa lɛ sɛɛ lɛ, Yesu hu wie. Ekɛ hewalɛwoo wiemɔi ha mɛi ni tsui ja ni kaneɔ Kpojiemɔ lɛ, akɛ: “Mi, Yesu, miitsu mibɔfo lɛ koni ebaye nii nɛɛ ahe odase etsɔɔ nyɛ yɛ asafoi lɛ amli. Miji David shishifa lɛ kɛ eseshinyo lɛ, toloo ni kpɛɔ lɛ.” (Kpojiemɔ 22:16) Hɛɛ, nɛkɛ wiemɔi nɛɛ ji “asafoi” lɛ anɔ titri. Eji shɛɛ sane, klɛŋklɛŋ kwraa lɛ kɛha Kristofoi ni afɔ amɛ mu ni yɔɔ shikpɔŋ nɔ lɛ asafo lɛ. Aŋma nɔ fɛɛ nɔ ni yɔɔ Kpojiemɔ lɛ mli lɛ aha Kristofoi ni afɔ amɛ mu lɛ, ni baahi Yerusalem Hee lɛ mli lɛ klɛŋklɛŋ. Asafo babaoo lɛ hu naa hegbɛ akɛ amɛaanu nɛkɛ gbalɛ anɔkwalei ni he yɔɔ sɛɛnamɔ babaoo nɛɛ ashishi kɛtsɔ nakai asafo lɛ nɔ.—Yohane 17:18-21.

10. Mɛni hewɔ Yesu tsɛ lɛ diɛŋtsɛ ehe akɛ (a) “David shishifa kɛ eseshinyo” lɛ? (b) “toloo ni kpɛɔ lɛ”?

¹⁰ Akɛ hegbɛ ha Yesu Kristo koni ekɛ Kpojiemɔ mli wiemɔi lɛ aha Yohane koni kɛtsɔ enɔ lɛ ekɛha asafo lɛ. Yesu ji “David shishifa lɛ kɛ eseshinyo” lɛ fɛɛ. Etsɔ David nɔ kɛba yɛ heloo naa no hewɔ lɛ hegbɛ yɛ kɛha lɛ akɛ efeɔ Yehowa Maŋtsɛyeli lɛ nɔ Maŋtsɛ. Ebaafee David “Naanɔ Tsɛ,” kɛ agbɛnɛ David “shishifa” hu. (Yesaia 9:5; 11:1, 10) Lɛ ji naanɔ Maŋtsɛ ni gbooo ni yɔɔ David wekukpaa lɛ mli lɛ, ni lɛ ehaa kpaŋmɔ ni Yehowa kɛ David fee lɛ baa mli lɛ, kɛ “toloo ni kpɛɔ” lɛ ni agba ehe sane yɛ Mose gbii lɛ amli lɛ. (4 Mose 24:17; Lala 89:35-38) Lɛ ji “toloo” ni teɔ shi, ni haa je tsɛreɔ lɛ. (2 Petro 1:19) Henyɛlɔ kpeteŋkpele ni ji Babilon Kpeteŋkpele lɛ ŋaatsɔɔi lɛ fɛɛ nyɛɛɛ atsi nɛkɛ anunyam shitee nɛɛ gbɛ.

Kɛɛmɔ Akɛ: “Ba!”

11. Mɛɛ nine Yohane fɔɔ mɔ fɛɛ mɔ agbɛnɛ, ni namɛi baanyɛ ahere enɛ nɔ?

¹¹ Agbɛnɛ be eshɛ ni Yohane diɛŋtsɛ baawie. Ejɛ tsui ni eyi obɔ kɛ hiɛsɔɔ kɛha nɔ fɛɛ nɔ ni ena ni enu lɛ mli ebo akɛ: “Ni mumɔ lɛ kɛ ayemforo lɛ kɛɔ akɛ: Ba! Ni mɔ ni nuɔ lɛ, ha ni ekɛɛ: Ba! Ni mɔ ni kumai yeɔ lɛ lɛ, ha ni eba, ni mɔ ni sumɔɔ lɛ, ha ni ebayɛ wala nu lɛ yaka.” (Kpojiemɔ 22:17) Yesu kpɔmɔ afɔleshaa lɛ mli sɛɛnamɔi lɛ efeŋ nɔ ni yɔɔ kɛhaa 144,000 lɛ pɛ, ejaakɛ naa ninefɔɔ kɛha mɔ fɛɛ mɔ. Yehowa mumɔ ni sumɔɔ lɛ tsuɔ nii kɛtsɔɔ ayemforo kuu lɛ nɔ, ni yɛ enɛ hewɔ lɛ sane lɛ yaa nɔ ejijeɔ yɛ gbɛ ni mli tse nɔ: “Abayɛ wala nu lɛ yaka.” (Kwɛmɔ Yesaia 55:1; 59:21 hu.) Aafɔ nine aatsɛ mɔ fɛɛ mɔ ni jalɛ he kumai yeɔ lɛ lɛ akɛ “ba” ni enine abashɛ Yehowa nibii babaoo ni akɛhaa yaka lɛ nɔ. (Mateo 5:3, 6) Kwɛ hegbɛ ni enɛ ji kɛha mɛi fɛɛ ni kpaa gbɛ akɛ amɛbaafee shikpɔŋ nɔ kuu lɛ mli bii ni hereɔ Yohane kuu ni afɔ amɛ mu lɛ ninefɔɔ nɛɛ nɔ lɛ!

12. Te asafo babaoo lɛ hereɔ ninefɔɔ ni yɔɔ Kpojiemɔ 22:17 lɛ nɔ amɛhaa tɛŋŋ?

¹² Kɛjɛ 1930 afii lɛ shishijee mli kɛbaa nɛɛ, asafo babaoo lɛ ni amɛyi faa lɛ ‘miinu’—amɛmiibo ninefɔɔ lɛ toi. Amɛna shidaamɔ ni he tse yɛ Yehowa hiɛ, tamɔ amɛnanemɛi tsuji ni afɔ amɛ mu lɛ pɛpɛɛpɛ. Amɛmiishwe be ni Yerusalem Hee lɛ baakpeleke shi kɛjɛ ŋwɛi ni efɔse jɔɔmɔi eshwie adesai anɔ lɛ. Akɛni amɛnu Kpojiemɔ shɛɛ sane ni yɔɔ miishɛɛ lɛ hewɔ lɛ, jeee akɛ asafo babaoo lɛ kɛɔ akɛ “Ba!” kɛkɛ, shi moŋ amɛkɛ ekaa buaa mɛi krokomɛi anaa kɛbaa Yehowa gbɛjianɔtoo lɛ mli, ni amɛtsɔseɔ mɛnɛɛmɛi hu koni amɛjaje akɛ: “Mɔ ni kumai yeɔ lɛ lɛ, ha ni eba.” No hewɔ lɛ asafo babaoo lɛ ayifalɛ yaa nɔ eyaa hiɛ, ejaakɛ amɛteŋ mɛi ni fe 6,000,000 ni yɔɔ shikpɔji 235 nɔ yɛ jeŋ fɛɛ lɛ kɛ ayemforo kuu lɛ ni afɔ amɛ mu lɛ ni amɛyibɔ shɛɛɛ 9,000 lɛ naa nine ni afɔɔ akɛ “abayɛ wala nu lɛ yaka” lɛ mli gbɛfaŋnɔ.

13. Mɛɛ kɔkɔbɔɔ Yesu kɛha?

¹³ Yɛ enɛ sɛɛ lɛ, Yesu ji mɔ ni wie ekoŋŋ, akɛ: “Ni miiye odase miiha mɔ fɛɛ mɔ ni nuɔ nɛkɛ wolo nɛɛ mli gbalɛ wiemɔi lɛ akɛ: Kɛji mɔ ko kɛ nɔ ko fata nii nɛɛ ahe lɛ, Nyɔŋmɔ aaaŋɔ haomɔi ni aŋma yɛ nɛkɛ wolo nɛɛ mli lɛ afata he aha lɛ; ni kɛji mɔ ko jie nɔ ko kɛjɛ nɛkɛ gbalɛ wolo nɛɛ mli wiemɔi lɛ amli lɛ, Nyɔŋmɔ aaajie egbɛnaa kɛaajɛ wala tsei lɛ kɛ maŋ krɔŋkrɔŋ lɛ kɛ nii ni aŋma yɛ nɛkɛ wolo nɛɛ mli lɛ mli.”—Kpojiemɔ 22:18, 19, New World Translation.

14. Te Yohane kuu lɛ susuɔ Kpojiemɔ “gbalɛ” lɛ he amɛhaa tɛŋŋ?

¹⁴ Esa akɛ Yohane kuu lɛ agbala jwɛŋmɔ kɛya Kpojiemɔ “gbalɛ” lɛ nɔ. Esaaa akɛ amɛkɛteɔ loo amɛkɛ nɔ ko fataa he. Esa akɛ ashiɛ emli sane lɛ yɛ faŋŋ, “yɛ tsui ayiteaŋ.” (Mateo 10:27) Kpojiemɔ jɛ Nyɔŋmɔ mumɔ lɛŋ. Namɔ baanyɛ aka wiemɔ ko ni Nyɔŋmɔ diɛŋtsɛ wie ni etsɔ Maŋtsɛ, Yesu Kristo, ni yeɔ nɔ bianɛ lɛ nɔ ekɛha lɛ tsakemɔ? Eka shi faŋŋ akɛ gbɔmɔ ni tamɔ nɛkɛ lɛ baafee mɔ ni sa akɛ elaajeɔ wala koni haomɔi ni baaba Babilon Kpeteŋkpele lɛ kɛ jeŋ muu lɛ fɛɛ nɔ lɛ eko aba enɔ.

15. Yesu wiemɔi, “mɔ ni yeɔ nɛkɛ nii nɛɛ ahe odase” lɛ kɛ “miiba oya” lɛ tsɔɔ mɛni?

¹⁵ Agbɛnɛ Yesu kɛ naagbee hewalɛwoo wiemɔ ko fataa he: “Mɔ ni yeɔ nɛkɛ nii nɛɛ ahe odase lɛ miikɛɛ akɛ: Hɛɛ, miiba oya.” (Kpojiemɔ 22:20a) Yesu ji “odasefonyo anɔkwafo lɛ kɛ anɔkwayelɔ lɛ.” (Kpojiemɔ 3:14) Kɛ eye Kpojiemɔ lɛ mli ninai lɛ ahe odase lɛ, esa akɛ amɛfee anɔkwale. Lɛ kɛ Yehowa Nyɔŋmɔ fɛɛ maa anɔkwale ni eji akɛ amɛmiiba “oya” lɛ nɔ mi shii abɔ, ni shii enumɔ nɛ ni Yesu kɛɔ enɛ yɛ biɛ. (Kpojiemɔ 2:16; 3:11; 22:7, 12, 20) Nɔ hewɔ ni ‘ebaa’ lɛ ji ni ebatsu fɔbuu kojomɔ he nii eshi ajwamaŋ kpeteŋkpele lɛ, maŋkwramɔŋ “maŋtsɛmɛi” lɛ kɛ mɛi fɛɛ ni teɔ shi woɔ “wɔ-Nuŋtsɔ [Yehowa] kɛ e-Kristo lɛ maŋtsɛyeli lɛ.”—Kpojiemɔ 11:15; 16:14, 16; 17:1, 12-14.

16. Akɛni ole akɛ Yehowa Nyɔŋmɔ kɛ Yesu miiba oya hewɔ lɛ, mɛni esa akɛ okɛ faishitswaa afee?

¹⁶ Esa akɛ le ni ole akɛ Yehowa Nyɔŋmɔ kɛ Yesu miiba oya lɛ awo bo ekaa koni no aha “ba ni Yehowa gbi lɛ eba lɛ ahi ojwɛŋmɔ mli.” (2 Petro 3:12, New World Translation) Satan nibii agbɛjianɔtoo ni yɔɔ shikpɔŋ nɔ lɛ fa ko ni aaafee tamɔ edamɔ shi shiŋŋ lɛ ji lakamɔ. Nɔ ko ni tamɔ omanye ni jeŋ nɔyelɔi ni yɔɔ Satan shishi lɛ aŋwɛi lɛ baafee tamɔ amɛye lɛ ji nɔ ko ni sɛɛ etsɛɛɛ. Nɛkɛ nibii nɛɛ miiho aya. (Kpojiemɔ 21:1) Abaana nɔ ni hiɔ shi daa lɛ yɛ Yehowa mli, e-Maŋtsɛyeli ni yɔɔ Yesu Kristo shishi lɛ mli, kɛ agbɛnɛ jeŋ hee ni ewo shi yɛ he lɛ mli. Ohiɛ akakpa enɛ nɔ kɔkɔɔkɔ!—1 Yohane 2:15-17.

17. Te esa akɛ hiɛsɔɔ ni ona oha Yehowa krɔŋkrɔŋfeemɔ lɛ ana onɔ hewalɛ aha tɛŋŋ?

¹⁷ Belɛ, eba akɛ oooŋmɛ gbɛ koni nɔ ni okase kɛjɛ Kpojiemɔ he nikasemɔ nɛɛ mli lɛ ana oshihilɛ nɔ hewalɛ waa. Ani Yehowa ŋwɛi shihilɛ he lɛ mli ni ona fioo lɛ haaa wɔ-Bɔlɔ lɛ anunyam kɛ krɔŋkrɔŋfeemɔ ni fa fe fɛɛ lɛ aha onaa akpɛ ohe? (Kpojiemɔ 4:1-5:14) Mɛɛ hegbɛ ji enɛ akɛ ooosɔmɔ Nyɔŋmɔ ni tamɔ nɛkɛ! Eba akɛ hiɛsɔɔ ni ona kɛha ekrɔŋkrɔŋfeemɔ lɛ aaatsirɛ bo koni okɛ hiɛdɔɔ asusu Yesu ŋaawoo ni ekɛha asafoi kpawo lɛ he, koni okwa nibii tamɔ jeŋ ninamɔ, wɔŋjamɔ, jeŋba shara, kulɔkulɔfeemɔ, hemɔkɛyeli kwamɔ aloo nɔ fɛɛ nɔ ni baaha sɔɔmɔ ni okɛhaa Yehowa lɛ afee nɔ ni ekpɛlɛɛɛ nɔ. (Kpojiemɔ 2:1-3:22) Bɔfo Petro wiemɔi ni ekɛha Yohane kuu lɛ hu kɔɔ asafo babaoo lɛ he yɛ shishijee taomɔ nii anaa: “Bɔ ni mɔ ni tsɛ nyɛ lɛ yɔɔ krɔŋkrɔŋ lɛ, nyɛ hu nyɛfea krɔŋkrɔŋ yɛ nyɛjeŋba fɛɛ mli.”—1 Petro 1:15, 16.

18. Mɛni esa akɛ ona mli gbɛfaŋnɔ babaoo bɔ ni ooonyɛ lɛ, ni mɛni hewɔ nɛkɛ nitsumɔ nɛɛ he hiaa waa ŋmɛnɛ lɛ?

¹⁸ Kɛfata he lɛ, eba akɛ enɛ aaatsirɛ bo ni ona ekaa hee yɛ be mli ni oshiɛɔ “Yehowa duromɔ afi kɛ wɔ-Nyɔŋmɔ lɛ oweletɔɔ gbi” lɛ. (Yesaia 35:4; 61:2) Kɛji akɛ oji asafo kuu bibioo loo asafo babaoo lɛ mli nyo hu lɛ, eba akɛ ooona gbɛfaŋnɔ ni fa babaoo yɛ Nyɔŋmɔ mlifu tɔi lɛ ni afɔseɔ ashwieɔ shi lɛ mli, koni ogba Yehowa kojomɔi ni ekɛbaa Satan je lɛ nɔ lɛ otsɔɔ. Yɛ nakai beaŋ nɔŋŋ lɛ, okɛ ogbee afata naanɔ sanekpakpa lɛ jajemɔ ni yɔɔ miishɛɛ ni kɔɔ Yehowa kɛ e-Kristo lɛ Maŋtsɛyeli ni ato ama shi lɛ he lɛ he. (Kpojiemɔ 11:15; 14:6, 7) Okɛ ohe awo nitsumɔ nɛɛ mli kɛ hehiamɔ. Ni eba akɛ yɔsemɔ ni wɔɔyɔse akɛ wɔyɛ Nuŋtsɔ lɛ gbi lɛ mli lɛ aaatsirɛ mɛi babaoo ni sɔmɔɔɔ Yehowa bianɛ lɛ ni amɛkɛ amɛhe awo sanekpakpa lɛ jajemɔ lɛ mli. Eba akɛ mɛnɛɛmɛi hu aaashwere kɛya hiɛ ni amɛjɔɔ amɛwala nɔ amɛha Nyɔŋmɔ kɛ yiŋtoo akɛ aaabaptisi amɛ yɛ no sɛɛ. Kaimɔ akɛ, “be lɛ eshɛ eta”!—Kpojiemɔ 1:3.

19. Mɛni ji bɔfo Yohane ni egbɔ lɛ naagbee wiemɔi lɛ, ni te ohereɔ nɔ ohaa tɛŋŋ?

¹⁹ No hewɔ lɛ, wɔkɛ Yohane sɔleɔ waa akɛ: “Amen. Hɛɛ, Ba, Nuŋtsɔ Yesu.” Ni Yohane, ni ji bɔfo ni eda yɛ afii amli lɛ kɛfata he akɛ: “Eba akɛ wɔ-Nuŋtsɔ Yesu Kristo duromɔ lɛ kɛ krɔŋkrɔŋbii lɛ fɛɛ aaahi shi.” (Kpojiemɔ 22:20b, 21, New World Translation) Ni eba hu akɛ ekɛ nyɛ fɛɛ ni nyɛkaneɔ nɛkɛ wolo nɛɛ aaahi shi. Eba akɛ nyɛaana hemɔkɛyeli akɛ Kpojiemɔ naagbee kwraa lɛ ebɛŋkɛ, koni bo hu ofata wɔhe ni wɔjɛ wɔtsuiŋ wɔkɛɛ “Amen!”

[Mfoniri ni yɔɔ baafa 314]

“Shi maŋ lɛ sɛɛ lɛ gbeei . . . ”

[Mfoniri ni yɔɔ baafa 315]

“Miishɛɛ ji mɛi ni . . . tsɔɔ agboi lɛ amli kɛboteɔ maŋ lɛ mli lɛ”