અયૂબ

૩૩ “હે અયૂબ, હવે મારો એકેએક શબ્દ સાંભળો;

હું જે કહું છું એ પર કાન ધરો.

 ૨ જુઓ! મારે મોં ઉઘાડવું પડશે;

મારી જીભ હવે બોલવા લાગશે.

 ૩ મારા શબ્દો મારા દિલની સચ્ચાઈ જાહેર કરશે,+

હું જે જાણું છું, એ જ મારા હોઠો કહેશે.

 ૪ ઈશ્વરે પોતાની શક્તિથી મને ઘડ્યો છે,+

સર્વશક્તિમાનના શ્વાસે મને જીવન આપ્યું છે.+

 ૫ જો તમે જવાબ આપી શકો, તો આપો;

તૈયાર થઈ જાઓ, તમારી દલીલો મારી આગળ રજૂ કરો.

 ૬ જુઓ! સાચા ઈશ્વરની આગળ હું પણ તમારા જેવો જ છું;

મને પણ માટીમાંથી જ ઘડવામાં આવ્યો છે.+

 ૭ એટલે મારાથી ડરશો નહિ,

મારા શબ્દો એટલા ભારે નહિ હોય કે તમને કચડી નાખે.

 ૮ તમારી વાત મેં બરાબર સાંભળી છે,

હા, તમારા આ શબ્દો મેં વારંવાર સાંભળ્યા છે:

 ૯ ‘હું શુદ્ધ છું, મેં કોઈ ગુનો કર્યો નથી;+

હું નિષ્કલંક છું, મારામાં કોઈ દોષ નથી.+

૧૦ પણ ઈશ્વર મારી સામે થવા બહાનાં શોધે છે;

તે મને પોતાનો દુશ્મન ગણે છે.+

૧૧ તે મારા પગ હેડમાં* નાખે છે;

મારા એકેએક પગલા પર નજર રાખે છે.’+

૧૪ ઈશ્વર એક વાર બોલે છે, હા, બે વાર બોલે છે,

પણ કોઈ તેમનું સાંભળતું નથી.

૧૫ તે સપનામાં, હા, રાતના દર્શનમાં બોલે છે,+

ત્યારે તો લોકો ભરઊંઘમાં હોય છે,

પોતાની પથારીમાં ઘસઘસાટ સૂતા હોય છે.

૧૬ પછી તે તેઓના કાન ઉઘાડે છે,+

તેઓનાં મનમાં પોતાની શિખામણ છાપી દે છે,*

૧૭ જેથી માણસ ખોટા માર્ગથી પાછો વળે,+

અને ઘમંડથી પોતાનું રક્ષણ કરે.+

૧૮ ઈશ્વર તેને કબરમાં* જતા

અને તલવારથી* તેના જીવનો નાશ થતા બચાવે છે.+

૧૯ કોઈ માણસ પથારીમાં દુઃખ-દર્દ ભોગવતો હોય,

અને આખો દિવસ તેનાં હાડકાં પીડાતાં હોય, ત્યારે તેને બોધપાઠ મળે છે,

૨૦ તેનો જીવ ખોરાકથી કંટાળે છે,

અરે, ભાવતા ભોજનથી પણ તેને સૂગ ચઢે છે.+

૨૧ તે સાવ સુકાઈ જાય છે,

બસ તેનાં હાડકાં જ દેખાય છે.

૨૨ તેનો જીવ કબર* નજીક જાય છે,

જેઓ તેનો જીવ લેવા માંગે છે, તેઓની નજીક જાય છે.

૨૩ કાશ! તેની પાસે કોઈ દૂત* આવે,

હજારમાંથી કોઈ એક તેની મદદે આવે

અને તેને જણાવે કે માણસ માટે શું સારું છે,

૨૪ પછી ઈશ્વર તેને કૃપા બતાવશે અને કહેશે,

‘તેને કબરમાં* જતા બચાવી લો!+

૨૬ તે ઈશ્વરને આજીજી કરશે+ અને એ સાંભળવામાં આવશે,

તે જયજયકાર કરતો કરતો ઈશ્વરની આગળ જશે,

ઈશ્વર પોતાની આગળ માણસને ન્યાયી ઠરાવશે.

૨૭ તે માણસ બધા આગળ ગાશે,*

‘મેં પાપ કર્યું છે+ અને સત્યને મરડી નાખ્યું છે,

પણ મને જેટલી સજા થવી જોઈએ, એટલી થઈ નથી.*

૨૮ ઈશ્વરે મારા જીવને કબરમાં* જતા બચાવ્યો છે,+

હું પ્રકાશ જોઈશ.’

૨૯ સાચે જ એ બધું ઈશ્વરે કર્યું છે,

માણસ માટે તે બે વાર, હા, ત્રણ વાર એમ કરે છે,

૩૦ જેથી તેને કબરમાંથી* પાછો લાવવામાં આવે,

અને તેની જીવન-જ્યોત ઝળહળતી રહે.+

૩૨ જો તમારે કંઈ કહેવું હોય, તો કહો,

બોલો, કેમ કે હું તમને નિર્દોષ સાબિત કરવા માંગું છું.

૩૩ જો તમારી પાસે કહેવા માટે કંઈ ન હોય, તો મારું સાંભળો;

ચૂપ રહો, હું તમને બુદ્ધિની વાતો શીખવીશ.”